ಶ್ರೀಮಾನ್ ಯಸ್ಯಾಃ ಪ್ರಿಯಸ್ಸನ್ ಸಕಲಮಪಿ ಜಗಜ್ಜಙ್ಗಮಸ್ಥಾವರಾದ್ಯಂ
ಸ್ವರ್ಭೂಪಾತಾಲಭೇದಂ ವಿವಿಧವಿಧಮಹಾಶಿಲ್ಪಸಾಮರ್ಥ್ಯಸಿದ್ಧಮ್ ।
ರಞ್ಜನ್ ಬ್ರಹ್ಮಾಮರೇನ್ದ್ರೈಸ್ತ್ರಿಭುವನಜನಕಃ ಸ್ತೂಯತೇ ಭೂರಿಶೋ ಯಃ
ಸಾ ವಿಷ್ಣೋರೇಕಪತ್ನೀ ತ್ರಿಭುವನಜನನೀ ಪಾತು ಪದ್ಮಾವತೀ ನಃ ॥ 1 ॥
ಶ್ರೀಶೃಙ್ಗಾರೈಕದೇವೀಂ ವಿಧಿಮುಖಸುಮನಃಕೋಟಿಕೋಟೀರಜಾಗ್ರ-
ದ್ರತ್ನಜ್ಯೋತ್ಸ್ನಾಪ್ರಸಾರಪ್ರಕಟಿತಚರಣಾಮ್ಭೋಜನೀರಾಜಿತಾರ್ಚಾಮ್ ।
ಗೀರ್ವಾಣಸ್ತ್ರೈಣವಾಣೀಪರಿಫಣಿತಮಹಾಕೀರ್ತಿಸೌಭಾಗ್ಯಭಾಗ್ಯಾಂ
ಹೇಲಾನಿರ್ದಗ್ಧದೈನ್ಯಶ್ರಮವಿಷಮಮಹಾರಣ್ಯಗಣ್ಯಾಂ ನಮಾಮಿ ॥ 2 ॥
ವಿದ್ಯುತ್ಕೋಟಿಪ್ರಕಾಶಾಂ ವಿವಿಧಮಣಿಗಣೋನ್ನಿದ್ರಸುಸ್ನಿಗ್ಧಶೋಭಾ-
ಸಮ್ಪತ್ಸಮ್ಪೂರ್ಣಹಾರಾದ್ಯಭಿನವವಿಭವಾಲಙ್ಕ್ರಿಯೋಲ್ಲಾಸಿಕಣ್ಠಾಮ್ ।
ಆದ್ಯಾಂ ವಿದ್ಯೋತಮಾನಸ್ಮಿತರುಚಿರಚಿತಾನಲ್ಪಚನ್ದ್ರಪ್ರಕಾಶಾಂ
ಪದ್ಮಾಂ ಪದ್ಮಾಯತಾಕ್ಷೀಂ ಪದನಲಿನನಮತ್ಪದ್ಮಸದ್ಮಾಂ ನಮಾಮಿ ॥ 3 ॥
ಶಶ್ವತ್ತಸ್ಯಾಃ ಶ್ರಯೇಽಹಂ ಚರಣಸರಸಿಜಂ ಶಾರ್ಙ್ಗಪಾಣೇಃ ಪುರನ್ಧ್ರ್ಯಾಃ
ಸ್ತೋಕಂ ಯಸ್ಯಾಃ ಪ್ರಸಾದಃ ಪ್ರಸರತಿ ಮನುಜೇ ಕ್ರೂರದಾರಿದ್ರ್ಯದಗ್ಧೇ ।
ಸೋಽಯಂ ಸದ್ಯೋಽನವದ್ಯಸ್ಥಿರತರರುಚಿರಶ್ರೇಷ್ಠಭೂಯಿಷ್ಠನವ್ಯ-
ಸ್ತವ್ಯಪ್ರಾಸಾದಪಙ್ಕ್ತಿಪ್ರಸಿತಬಹುವಿಧಪ್ರಾಭವೋ ಬೋಭವೀತಿ ॥ 4 ॥
ಸೌನ್ದರ್ಯೋದ್ವೇಲಹೇಮಾಮ್ಬುಜಮಹಿತಮಹಾಸಿಂಹಪೀಠಾಶ್ರಯಾಢ್ಯಾಂ
ಪುಷ್ಯನ್ನೀಲಾರವಿನ್ದಪ್ರತಿಮವರಕೃಪಾಪೂರಸಮ್ಪೂರ್ಣನೇತ್ರಾಮ್ ।
ಜ್ಯೋತ್ಸ್ನಾಪೀಯೂಷಧಾರಾವಹನವಸುಷಮಕ್ಷೌಮಧಾಮೋಜ್ಜ್ವಲಾಙ್ಗೀಂ
ವನ್ದೇ ಸಿದ್ಧೇಶಚೇತಸ್ಸರಸಿಜನಿಲಯಾಂ ಚಕ್ರಿಸೌಭಾಗ್ಯಋದ್ಧಿಮ್ ॥ 5 ॥
ಸಂಸಾರಕ್ಲೇಶಹನ್ತ್ರೀಂ ಸ್ಮಿತರುಚಿರಮುಖೀಂ ಸಾರಶೃಙ್ಗಾರಶೋಭಾಂ
ಸರ್ವೈಶ್ವರ್ಯಪ್ರದಾತ್ರೀಂ ಸರಸಿಜನಯನಾಂ ಸಂಸ್ತುತಾಂ ಸಾಧುಬೃನ್ದೈಃ ।
ಸಂಸಿದ್ಧಸ್ನಿಗ್ಧಭಾವಾಂ ಸುರಹಿತಚರಿತಾಂ ಸಿನ್ಧುರಾಜಾತ್ಮಭೂತಾಂ
ಸೇವೇ ಸಮ್ಭಾವನೀಯಾನುಪಮಿತಮಹಿಮಾಂ ಸಚ್ಚಿದಾನನ್ದರೂಪಾಮ್ ॥ 6 ॥
ಸಿದ್ಧಸ್ವರ್ಣೋಪಮಾನದ್ಯುತಿಲಸಿತತನುಂ ಸ್ನಿಗ್ಧಸಮ್ಪೂರ್ಣಚನ್ದ್ರ-
ವ್ರೀಡಾಸಮ್ಪಾದಿವಕ್ತ್ರಾಂ ತಿಲಸುಮವಿಜಯೋದ್ಯೋಗನಿರ್ನಿದ್ರನಾಸಾಮ್ ।
ತಾದಾತ್ವೋತ್ಫುಲ್ಲನೀಲಾಮ್ಬುಜಹಸನಚಣಾತ್ಮೀಯಚಕ್ಷುಃ ಪ್ರಕಾಶಾಂ
ಬಾಲಶ್ರೀಲಪ್ರವಾಲಪ್ರಿಯಸಖಚರಣದ್ವನ್ದ್ವರಮ್ಯಾಂ ಭಜೇಽಹಮ್ ॥ 7 ॥
ಯಾಂ ದೇವೀಂ ಮೌನಿವರ್ಯಾಃ ಶ್ರಯದಮರವಧೂಮೌಲಿಮಾಲ್ಯಾರ್ಚಿತಾಙ್ಘ್ರಿಂ
ಸಂಸಾರಾಸಾರವಾರಾನ್ನಿಧಿತರತರಣೇ ಸರ್ವದಾ ಭಾವಯನ್ತೇ ।
ಶ್ರೀಕಾರೋತ್ತುಙ್ಗರತ್ನಪ್ರಚುರಿತಕನಕಸ್ನಿಗ್ಧಶುದ್ಧಾನ್ತಲೀಲಾಂ
ತಾಂ ಶಶ್ವತ್ಪಾದಪದ್ಮಶ್ರಯದಖಿಲಹೃದಾಹ್ಲಾದಿನೀಂ ಹ್ಲಾದಯೇಽಹಮ್ ॥ 8 ॥
ಆಕಾಶಾಧೀಶಪುತ್ರೀಂ ಶ್ರಿತಜನನಿವಹಾಧೀನಚೇತಃಪ್ರವೃತ್ತಿಂ
ವನ್ದೇ ಶ್ರೀವೇಙ್ಕಟೇಶಪ್ರಭುವರಮಹಿಷೀಂ ದೀನಚಿತ್ತಪ್ರತೋಷಾಮ್ ।
ಪುಷ್ಯತ್ಪಾದಾರವಿನ್ದಪ್ರಸೃಮರಸುಮಹಶ್ಶಾಮಿತಸ್ವಾಶ್ರಿತಾನ್ತ-
ಸ್ತಾಮಿಸ್ರಾಂ ತತ್ತ್ವರೂಪಾಂ ಶುಕಪುರನಿಲಯಾಂ ಸರ್ವಸೌಭಾಗ್ಯದಾತ್ರೀಮ್ ॥ 9 ॥
ಶ್ರೀಶೇಷಶರ್ಮಾಭಿನವೋಪಕ್ಲುಪ್ತಾ
ಪ್ರಿಯೇಣ ಭಕ್ತ್ಯಾ ಚ ಸಮರ್ಪಿತೇಯಮ್ ।
ಪದ್ಮಾವತೀಮಙ್ಗಲಕಣ್ಠಭೂಷಾ
ವಿರಾಜತಾಂ ಶ್ರೀನವರತ್ನಮಾಲಾ ॥ 10 ॥
ಇತಿ ಶ್ರೀ ಪದ್ಮಾವತೀ ನವರತ್ನಮಾಲಿಕಾ ಸ್ತುತಿಃ ।
