śrīmādhavī kānanasthē garbharakṣāmbikē pāhi bhaktāṃ stuvantīm ॥
vāpītaṭē vāmabhāgē
vāmadēvasya dēvasya dēvi sthitā tvam ।
mānyā varēṇyā vadānyā
pāhi garbhasthajantūn tathā bhaktalōkān ॥ 1 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
śrīgarbharakṣāpurē yā
divyasaundaryayuktā sumāṅgaḻyagātrī ।
dhātrī janitrī janānāṃ
divyarūpāṃ dayārdrāṃ manōjñāṃ bhajē tvām ॥ 2 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
āṣāḍhamāsē supuṇyē
śukravārē sugandhēna gandhēna liptā ।
divyāmbarākalpavēṣā
vājapēyādiyāgasthabhaktaiḥ sudṛṣṭā ॥ 3 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
kalyāṇadātrīṃ namasyē
vēdikāḍhyastriyā garbharakṣākarīṃ tvām ।
bālaissadā sēvitāṅghriṃ
garbharakṣārthamārādupētairupētām ॥ 4 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
brahmōtsavē vipravīthyāṃ
vādyaghōṣēṇa tuṣṭāṃ rathē sanniviṣṭām ।
sarvārthadātrīṃ bhajē'haṃ
dēvavṛndairapīḍyāṃ jaganmātaraṃ tvām ॥ 5 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
ētat kṛtaṃ stōtraratnaṃ
dīkṣitānantarāmēṇa dēvyāścha tuṣṭyai ।
nityaṃ paṭhēdyastu bhaktyā
putrapautrādi bhāgyaṃ bhavēttasya nityam ॥ 6 ॥
śrīmādhavī kānanasthē garbharakṣāmbikē pāhi bhaktāṃ stuvantīm ॥
iti śrīanantarāmadīkṣitavarya virachitaṃ garbharakṣāmbikā stōtram ॥
