॥ ಗೀತಗೋವಿನ್ದಮ್ ॥
॥ ಅಷ್ಟಪದೀ ॥
॥ ಶ್ರೀ ಗೋಪಾಲಕ ಧ್ಯಾನಮ್ ॥
ಯದ್ಗೋಪೀವದನೇನ್ದುಮಣ್ಡನಮಭೂತ್ಕಸ್ತೂರಿಕಾಪತ್ರಕಂ ಯಲ್ಲಕ್ಷ್ಮೀಕುಚಶಾತಕುಮ್ಭ ಕಲಶೇ ವ್ಯಾಗೋಚಮಿನ್ದೀವರಮ್ ।
ಯನ್ನಿರ್ವಾಣವಿಧಾನಸಾಧನವಿಧೌ ಸಿದ್ಧಾಞ್ಜನಂ ಯೋಗಿನಾಂ ತನ್ನಶ್ಯಾಮಳಮಾವಿರಸ್ತು ಹೃದಯೇ ಕೃಷ್ಣಾಭಿಧಾನಂ ಮಹಃ ॥ 1 ॥
॥ ಶ್ರೀ ಜಯದೇವ ಧ್ಯಾನಮ್ ॥
ರಾಧಾಮನೋರಮರಮಾವರರಾಸಲೀಲ-ಗಾನಾಮೃತೈಕಭಣಿತಂ ಕವಿರಾಜರಾಜಮ್ ।
ಶ್ರೀಮಾಧವಾರ್ಚ್ಚನವಿಧವನುರಾಗಸದ್ಮ-ಪದ್ಮಾವತೀಪ್ರಿಯತಮಂ ಪ್ರಣತೋಸ್ಮಿ ನಿತ್ಯಮ್ ॥ 2 ॥
ಶ್ರೀಗೋಪಲವಿಲಾಸಿನೀ ವಲಯಸದ್ರತ್ನಾದಿಮುಗ್ಧಾಕೃತಿ ಶ್ರೀರಾಧಾಪತಿಪಾದಪದ್ಮಭಜನಾನನ್ದಾಬ್ಧಿಮಗ್ನೋಽನಿಶಮ್ ॥
ಲೋಕೇ ಸತ್ಕವಿರಾಜರಾಜ ಇತಿ ಯಃ ಖ್ಯಾತೋ ದಯಾಮ್ಭೋನಿಧಿಃ ತಂ ವನ್ದೇ ಜಯದೇವಸದ್ಗುರುಮಹಂ ಪದ್ಮಾವತೀವಲ್ಲಭಮ್ ॥ 3 ॥
॥ ಪ್ರಥಮಃ ಸರ್ಗಃ ॥
॥ ಸಾಮೋದದಾಮೋದರಃ ॥
ಮೇಘೈರ್ಮೇದುರಮಮ್ಬರಂ ವನಭುವಃ ಶ್ಯಾಮಾಸ್ತಮಾಲದ್ರುಮೈ-ರ್ನಕ್ತಂ ಭೀರುರಯಂ ತ್ವಮೇವ ತದಿಮಂ ರಾಧೇ ಗೃಹಂ ಪ್ರಾಪಯ ।
ಇತ್ಥಂ ನನ್ದನಿದೇಶಿತಶ್ಚಲಿತಯೋಃ ಪ್ರತ್ಯಧ್ವಕುಞ್ಜದ್ರುಮಂ ರಾಧಾಮಾಧವಯೋರ್ಜಯನ್ತಿ ಯಮುನಾಕೂಲೇ ರಹಃಕೇಲಯಃ ॥ 1 ॥
ವಾಗ್ದೇವತಾಚರಿತಚಿತ್ರಿತಚಿತ್ತಸದ್ಮಾ ಪದ್ಮಾವತೀಚರಣಚಾರಣಚಕ್ರವರ್ತೀ ।
ಶ್ರೀವಾಸುದೇವರತಿಕೇಲಿಕಥಾಸಮೇತಂ ಏತಂ ಕರೋತಿ ಜಯದೇವಕವಿಃ ಪ್ರಬನ್ಧಮ್ ॥ 2 ॥
ಯದಿ ಹರಿಸ್ಮರಣೇ ಸರಸಂ ಮನೋ ಯದಿ ವಿಲಾಸಕಲಾಸು ಕುತೂಹಲಮ್ ।
ಮಧುರಕೋಮಲಕಾನ್ತಪದಾವಲೀಂ ಶೃಣು ತದಾ ಜಯದೇವಸರಸ್ವತೀಮ್ ॥ 3 ॥
ವಾಚಃ ಪಲ್ಲವಯತ್ಯುಮಾಪತಿಧರಃ ಸನ್ದರ್ಭಶುದ್ಧಿಂ ಗಿರಾಂ ಜಾನೀತೇ ಜಯದೇವ ಏವ ಶರಣಃ ಶ್ಲಾಘ್ಯೋ ದುರೂಹದ್ರುತೇ ।
ಶೃಙ್ಗಾರೋತ್ತರಸತ್ಪ್ರಮೇಯರಚನೈರಾಚಾರ್ಯಗೋವರ್ಧನ-ಸ್ಪರ್ಧೀ ಕೋಽಪಿ ನ ವಿಶ್ರುತಃ ಶ್ರುತಿಧರೋ ಧೋಯೀ ಕವಿಕ್ಷ್ಮಾಪತಿಃ ॥ 4 ॥
॥ ಗೀತಂ 1 ॥
ಪ್ರಲಯಪಯೋಧಿಜಲೇ ಧೃತವಾನಸಿ ವೇದಮ್ ।
ವಿಹಿತವಹಿತ್ರಚರಿತ್ರಮಖೇದಮ್ ॥
ಕೇಶವ ಧೃತಮೀನಶರೀರ ಜಯ ಜಗದೀಶ ಹರೇ ॥ 1 ॥
ಕ್ಷಿತಿರತಿವಿಪುಲತರೇ ತವ ತಿಷ್ಠತಿ ಪೃಷ್ಠೇ ।
ಧರಣಿಧರಣಕಿಣಚಕ್ರಗರಿಷ್ಠೇ ॥
ಕೇಶವ ಧೃತಕಚ್ಛಪರೂಪ ಜಯ ಜಗದೀಶ ಹರೇ ॥ 2 ॥
ವಸತಿ ದಶನಶಿಖರೇ ಧರಣೀ ತವ ಲಗ್ನಾ ।
ಶಶಿನಿ ಕಲಙ್ಕಕಲೇವ ನಿಮಗ್ನಾ ॥
ಕೇಶವ ಧೃತಸೂಕರರೂಪ ಜಯ ಜಗದೀಶ ಹರೇ ॥ 3 ॥
ತವ ಕರಕಮಲವರೇ ನಖಮದ್ಭುತಶೃಙ್ಗಮ್ ।
ದಲಿತಹಿರಣ್ಯಕಶಿಪುತನುಭೃಙ್ಗಮ್ ॥
ಕೇಶವ ಧೃತನರಹರಿರೂಪ ಜಯ ಜಗದೀಶ ಹರೇ ॥ 4 ॥
ಛಲಯಸಿ ವಿಕ್ರಮಣೇ ಬಲಿಮದ್ಭುತವಾಮನ ।
ಪದನಖನೀರಜನಿತಜನಪಾವನ ॥
ಕೇಶವ ಧೃತವಾಮನರೂಪ ಜಯ ಜಗದೀಶ ಹರೇ ॥ 5 ॥
ಕ್ಷತ್ರಿಯರುಧಿರಮಯೇ ಜಗದಪಗತಪಾಪಮ್ ।
ಸ್ನಪಯಸಿ ಪಯಸಿ ಶಮಿತಭವತಾಪಮ್ ॥
ಕೇಶವ ಧೃತಭೃಘುಪತಿರೂಪ ಜಯ ಜಗದೀಶ ಹರೇ ॥ 6 ॥
ವಿತರಸಿ ದಿಕ್ಷು ರಣೇ ದಿಕ್ಪತಿಕಮನೀಯಮ್ ।
ದಶಮುಖಮೌಲಿಬಲಿಂ ರಮಣೀಯಮ್ ॥
ಕೇಶವ ಧೃತರಾಮಶರೀರ ಜಯ ಜಗದೀಶ ಹರೇ ॥ 7 ॥
ವಹಸಿ ವಪುಷಿ ವಿಶದೇ ವಸನಂ ಜಲದಾಭಮ್ ।
ಹಲಹತಿಭೀತಿಮಿಲಿತಯಮುನಾಭಮ್ ॥
ಕೇಶವ ಧೃತಹಲಧರರೂಪ ಜಯ ಜಗದೀಶ ಹರೇ ॥ 8 ॥
ನಿನ್ದಸಿ ಯಜ್ಞವಿಧೇರಹಹ ಶ್ರುತಿಜಾತಮ್ ।
ಸದಯಹೃದಯದರ್ಶಿತಪಶುಘಾತಮ್ ॥
ಕೇಶವ ಧೃತಬುದ್ಧಶರೀರ ಜಯ ಜಗದೀಶ ಹರೇ ॥ 9 ॥
ಮ್ಲೇಚ್ಛನಿವಹನಿಧನೇ ಕಲಯಸಿ ಕರವಾಲಮ್ ।
ಧೂಮಕೇತುಮಿವ ಕಿಮಪಿ ಕರಾಲಮ್ ॥
ಕೇಶವ ಧೃತಕಲ್ಕಿಶರೀರ ಜಯ ಜಗದೀಶ ಹರೇ ॥ 10 ॥
ಶ್ರೀಜಯದೇವಕವೇರಿದಮುದಿತಮುದಾರಮ್ ।
ಶೃಣು ಸುಖದಂ ಶುಭದಂ ಭವಸಾರಮ್ ॥
ಕೇಶವ ಧೃತದಶವಿಧರೂಪ ಜಯ ಜಗದೀಶ ಹರೇ ॥ 11 ॥
ವೇದಾನುದ್ಧರತೇ ಜಗನ್ನಿವಹತೇ ಭೂಗೋಲಮುದ್ಬಿಭ್ರತೇ ದೈತ್ಯಂ ದಾರಯತೇ ಬಲಿಂ ಛಲಯತೇ ಕ್ಷತ್ರಕ್ಷಯಂ ಕುರ್ವತೇ ।
ಪೌಲಸ್ತ್ಯಂ ಜಯತೇ ಹಲಂ ಕಲಯತೇ ಕಾರುಣ್ಯಮಾತನ್ವತೇ ಮ್ಲೇಚ್ಛಾನ್ಮೂರ್ಚ್ಛಯತೇ ದಶಾಕೃತಿಕೃತೇ ಕೃಷ್ಣಾಯ ತುಭ್ಯಂ ನಮಃ ॥ 5 ॥
॥ ಗೀತಂ 2 ॥
ಶ್ರಿತಕಮಲಾಕುಚಮಣ್ಡಲ! ಧೃತಕುಣ್ಡಲ! ।
ಕಲಿತಲಲಿತವನಮಾಲ! ಜಯ, ಜಯ, ದೇವ! ಹರೇ! ॥ 1 ॥
ದಿನಮಣೀಮಣ್ಡಲಮಣ್ಡನ! ಭವಖಣ್ಡನ! ।
ಮುನಿಜನಮಾನಸಹಂಸ! ಜಯ, ಜಯ, ದೇವ! ಹರೇ! ॥ 2 ॥
ಕಾಲಿಯವಿಷಧರಗಞ್ಜನ! ಜನರಞ್ಜನ! ।
ಯದುಕುಲನಲಿನದಿನೇಶ! ಜಯ, ಜಯ, ದೇವ! ಹರೇ! ॥ 3 ॥
ಮಧುಮುರನರಕವಿನಾಶನ! ಗರುಡಾಸನ! ।
ಸುರಕುಲಕೇಲಿನಿದಾನ! ಜಯ, ಜಯ, ದೇವ! ಹರೇ! ॥ 4 ॥
ಅಮಲಕಮಲದಲಲೋಚನ! ಭವಮೋಚನ್! ।
ತ್ರಿಭುವನಭವನನಿಧಾನ! ಜಯ, ಜಯ, ದೇವ! ಹರೇ! ॥ 5 ॥
ಜನಕಸುತಾಕೃತಭೂಷಣ! ಜಿತದೂಷಣ! ।
ಸಮರಶಮಿತದಶಖಣ್ಠ! ಜಯ, ಜಯ, ದೇವ! ಹರೇ! ॥ 6 ॥
ಅಭಿನವಜಲಧರಸುನ್ದರ! ಧೃತಮನ್ದರ! ।
ಶ್ರೀಮುಖಚನ್ದ್ರಚಕೋರ! ಜಯ, ಜಯ, ದೇವ! ಹರೇ! ॥ 7 ॥
ಶ್ರೀಜಯದೇವಕವೇರಿದಂ ಕುರುತೇ ಮುದಮ್ ।
ಮಙ್ಗಲಮುಜ್ಜ್ವಲಗೀತಂ; ಜಯ, ಜಯ, ದೇವ! ಹರೇ! ॥ 8 ॥
ಪದ್ಮಾಪಯೋಧರತಟೀಪರಿರಮ್ಭಲಗ್ನ-ಕಾಶ್ಮೀರಮುದ್ರಿತಮುರೋ ಮಧುಸೂದನಸ್ಯ ।
ವ್ಯಕ್ತಾನುರಾಗಮಿವ ಖೇಲದನಙ್ಗಖೇದ-ಸ್ವೇದಾಮ್ಬುಪೂರಮನುಪೂರಯತು ಪ್ರಿಯಂ ವಃ ॥ 6 ॥
ವಸನ್ತೇ ವಾಸನ್ತೀಕುಸುಮಸುಕುಮಾರೈರವಯವೈ-ರ್ಭ್ರಮನ್ತೀಂ ಕಾನ್ತಾರೇ ಬಹುವಿಹಿತಕೃಷ್ಣಾನುಸರಣಾಮ್ ।
ಅಮನ್ದಂ ಕನ್ದರ್ಪಜ್ವರಜನಿತಚಿನ್ತಾಕುಲತಯಾ ವಲದ್ಬಾಧಾಂ ರಾಧಾಂ ಸರಸಮಿದಮುಚೇ ಸಹಚರೀ ॥ 7 ॥
॥ ಗೀತಂ 3 ॥
ಲಲಿತಲವಙ್ಗಲತಾಪರಿಶೀಲನಕೋಮಲಮಲಯಸಮೀರೇ ।
ಮಧುಕರನಿಕರಕರಮ್ಬಿತಕೋಕಿಲಕೂಜಿತಕುಞ್ಜಕುಟೀರೇ ॥
ವಿಹರತಿ ಹರಿರಿಹ ಸರಸವಸನ್ತೇ ನೃತ್ಯತಿ ಯುವತಿಜನೇನ ಸಮಂ ಸಖಿ ವಿರಹಿಜನಸ್ಯ ದುರನ್ತೇ ॥ 1 ॥
ಉನ್ಮದಮದನಮನೋರಥಪಥಿಕವಧೂಜನಜನಿತವಿಲಾಪೇ ।
ಅಲಿಕುಲಸಙ್ಕುಲಕುಸುಮಸಮೂಹನಿರಾಕುಲಬಕುಲಕಲಾಪೇ ॥ 2 ॥
ಮೃಗಮದಸೌರಭರಭಸವಶಂವದನವದಲಮಾಲತಮಾಲೇ ।
ಯುವಜನಹೃದಯವಿದಾರಣಮನಸಿಜನಖರುಚಿಕಿಂಶುಕಜಾಲೇ ॥ 3 ॥
ಮದನಮಹೀಪತಿಕನಕದಣ್ಡರುಚಿಕೇಶರಕುಸುಮವಿಕಾಸೇ ।
ಮಿಲಿತಶಿಲೀಮುಖಪಾಟಲಿಪಟಲಕೃತಸ್ಮರತೂಣವಿಲಾಸೇ ॥ 4 ॥
ವಿಗಲಿತಲಜ್ಜಿತಜಗದವಲೋಕನತರುಣಕರುಣಕೃತಹಾಸೇ ।
ವಿರಹಿನಿಕೃನ್ತನಕುನ್ತಮುಖಾಕೃತಿಕೇತಕದನ್ತುರಿತಾಶೇ ॥ 5 ॥
ಮಾಧವಿಕಾಪರಿಮಲಲಲಿತೇ ನವಮಾಲಿಕಜಾತಿಸುಗನ್ಧೌ ।
ಮುನಿಮನಸಾಮಪಿ ಮೋಹನಕಾರಿಣಿ ತರುಣಾಕಾರಣಬನ್ಧೌ ॥ 6 ॥
ಸ್ಫುರದತಿಮುಕ್ತಲತಾಪರಿರಮ್ಭಣಮುಕುಲಿತಪುಲಕಿತಚೂತೇ ।
ಬೃನ್ದಾವನವಿಪಿನೇ ಪರಿಸರಪರಿಗತಯಮುನಾಜಲಪೂತೇ ॥ 7 ॥
ಶ್ರೀಜಯದೇವಭಣಿತಮಿದಮುದಯತಿ ಹರಿಚರಣಸ್ಮೃತಿಸಾರಮ್ ।
ಸರಸವಸನ್ತಸಮಯವನವರ್ಣನಮನುಗತಮದನವಿಕಾರಮ್ ॥ 8 ॥
ದರವಿದಲಿತಮಲ್ಲೀವಲ್ಲಿಚಞ್ಚತ್ಪರಾಗ-ಪ್ರಕಟಿತಪಟವಾಸೈರ್ವಾಸಯನ್ ಕಾನನಾನಿ ।
ಇಹ ಹಿ ದಹತಿ ಚೇತಃ ಕೇತಕೀಗನ್ಧಬನ್ಧುಃ ಪ್ರಸರದಸಮಬಾಣಪ್ರಾಣವದ್ಗನ್ಧವಾಹಃ ॥ 8 ॥
ಉನ್ಮೀಲನ್ಮಧುಗನ್ಧಲುಬ್ಧಮಧುಪವ್ಯಾಧೂತಚೂತಾಙ್ಕುರ-ಕ್ರೀಡತ್ಕೋಕಿಲಕಾಕಲೀಕಲಕಲೈರುದ್ಗೀರ್ಣಕರ್ಣಜ್ವರಾಃ ।
ನೀಯನ್ತೇ ಪಥಿಕೈಃ ಕಥಙ್ಕಥಮಪಿ ಧ್ಯಾನಾವಧಾನಕ್ಷಣ-ಪ್ರಾಪ್ತಪ್ರಾಣಸಮಾಸಮಾಗಮರಸೋಲ್ಲಾಸೈರಮೀ ವಾಸರಾಃ ॥ 9 ॥
ಅನೇಕನಾರೀಪರಿರಮ್ಭಸಮ್ಭ್ರಮ-ಸ್ಫುರನ್ಮನೋಹಾರಿವಿಲಾಸಲಾಲಸಮ್ ।
ಮುರಾರಿಮಾರಾದುಪದರ್ಶಯನ್ತ್ಯಸೌ ಸಖೀ ಸಮಕ್ಷಂ ಪುನರಾಹ ರಾಧಿಕಾಮ್ ॥ 10 ॥
॥ ಗೀತಂ 4 ॥
ಚನ್ದನಚರ್ಚಿತನೀಲಕಲೇಬರಪೀತವಸನವನಮಾಲೀ ।
ಕೇಲಿಚಲನ್ಮಣಿಕುಣ್ಡಲಮಣ್ಡಿತಗಣ್ಡಯುಗಸ್ಮಿತಶಾಲೀ ॥
ಹರಿರಿಹಮುಗ್ಧವಧೂನಿಕರೇ ವಿಲಾಸಿನಿ ವಿಲಸತಿ ಕೇಲಿಪರೇ ॥ 1 ॥
ಪೀನಪಯೋಧರಭಾರಭರೇಣ ಹರಿಂ ಪರಿರಮ್ಯ ಸರಾಗಮ್ ।
ಗೋಪವಧೂರನುಗಾಯತಿ ಕಾಚಿದುದಞ್ಚಿತಪಞ್ಚಮರಾಗಮ್ ॥ 2 ॥
ಕಾಪಿ ವಿಲಾಸವಿಲೋಲವಿಲೋಚನಖೇಲನಜನಿತಮನೋಜಮ್ ।
ಧ್ಯಾಯತಿ ಮುಗ್ಧವಧೂರಧಿಕಂ ಮಧುಸೂದನವದನಸರೋಜಮ್ ॥ 3 ॥
ಕಾಪಿ ಕಪೋಲತಲೇ ಮಿಲಿತಾ ಲಪಿತುಂ ಕಿಮಪಿ ಶ್ರುತಿಮೂಲೇ ।
ಚಾರು ಚುಚುಮ್ಬ ನಿತಮ್ಬವತೀ ದಯಿತಂ ಪುಲಕೈರನುಕೂಲೇ ॥ 4 ॥
ಕೇಲಿಕಲಾಕುತುಕೇನ ಚ ಕಾಚಿದಮುಂ ಯಮುನಾಜಲಕೂಲೇ ।
ಮಞ್ಜುಲವಞ್ಜುಲಕುಞ್ಜಗತಂ ವಿಚಕರ್ಷ ಕರೇಣ ದುಕೂಲೇ ॥ 5 ॥
ಕರತಲತಾಲತರಲವಲಯಾವಲಿಕಲಿತಕಲಸ್ವನವಂಶೇ ।
ರಾಸರಸೇ ಸಹನೃತ್ಯಪರಾ ಹರಿಣಾ ಯುವತಿಃ ಪ್ರಶಶಂಸೇ ॥ 6 ॥
ಶ್ಲಿಷ್ಯತಿ ಕಾಮಪಿ ಚುಮ್ಬತಿ ಕಾಮಪಿ ಕಾಮಪಿ ರಮಯತಿ ರಾಮಾಮ್ ।
ಪಶ್ಯತಿ ಸಸ್ಮಿತಚಾರುಪರಾಮಪರಾಮನುಗಚ್ಛತಿ ವಾಮಾಮ್ ॥ 7 ॥
ಶ್ರೀಜಯದೇವಕವೇರಿದಮದ್ಭುತಕೇಶವಕೇಲಿರಹಸ್ಯಮ್ ।
ವೃನ್ದಾವನವಿಪಿನೇ ಲಲಿತಂ ವಿತನೋತು ಶುಭಾನಿ ಯಶಸ್ಯಮ್ ॥ 8 ॥
ವಿಶ್ವೇಷಾಮನುರಞ್ಜನೇನ ಜನಯನ್ನಾನನ್ದಮಿನ್ದೀವರ-ಶ್ರೇಣೀಶ್ಯಾಮಲಕೋಮಲೈರುಪನಯನ್ನಙ್ಗೈರನಙ್ಗೋತ್ಸವಮ್ ।
ಸ್ವಚ್ಛನ್ದಂ ವ್ರಜಸುನ್ದರೀಭಿರಭಿತಃ ಪ್ರತ್ಯಙ್ಗಮಾಲಿಙ್ಕಿತಃ ಶೃಙ್ಗಾರಃ ಸಖಿ ಮೂರ್ತಿಮಾನಿವ ಮಧೌ ಮುಗ್ಧೋ ಹರಿಃ ಕ್ರೀಡತಿ ॥ 11 ॥
ಅದ್ಯೋತ್ಸಙ್ಗವಸದ್ಭುಜಙ್ಗಕವಲಕ್ಲೇಶಾದಿವೇಶಾಚಲಂ ಪ್ರಾಲೇಯಪ್ಲವನೇಚ್ಛಯಾನುಸರತಿ ಶ್ರೀಖಣ್ಡಶೈಲಾನಿಲಃ ।
ಕಿಂ ಚ ಸ್ನಿಗ್ಧರಸಾಲಮೌಲಿಮುಕುಲಾನ್ಯಾಲೋಕ್ಯ ಹರ್ಷೋದಯಾ-ದುನ್ಮೀಲನ್ತಿ ಕುಹೂಃ ಕುಹೂರಿತಿ ಕಲೋತ್ತಾಲಾಃ ಪಿಕಾನಾಂ ಗಿರಃ ॥ 12 ॥
ರಾಸೋಲ್ಲಾಸಭರೇಣವಿಭ್ರಮಭೃತಾಮಾಭೀರವಾಮಭ್ರುವಾ-ಮಭ್ಯರ್ಣಂ ಪರಿರಮ್ಯನಿರ್ಭರಮುರಃ ಪ್ರೇಮಾನ್ಧಯಾ ರಾಧಯಾ ।
ಸಾಧು ತ್ವದ್ವದನಂ ಸುಧಾಮಯಮಿತಿ ವ್ಯಾಹೃತ್ಯ ಗೀತಸ್ತುತಿ-ವ್ಯಾಜಾದುದ್ಭಟಚುಮ್ಬಿತಸ್ಮಿತಮನೋಹರೀ ಹರಿಃ ಪಾತು ವಃ ॥ 13 ॥
॥ ಇತಿ ಶ್ರೀಗೀತಗೋವಿನ್ದೇ ಸಾಮೋದದಾಮೋದರೋ ನಾಮ ಪ್ರಥಮಃ ಸರ್ಗಃ ॥
