ಚೌರಾಷ್ಟಕಮ್ (ಶ್ರೀ ಚೌರಾಗ್ರಗಣ್ಯ ಪುರುಷಾಷ್ಟಕಮ್)

Collection of Spiritual and Devotional Literature in Various Indian Languages

View this in:

This document is in ಶುದ್ಧ ಕನ್ನಡ with the right anusvaras marked. View this in ಸರಳ ಕನ್ನಡ, with simplified anusvaras for easier reading.

ವ್ರಜೇ ಪ್ರಸಿದ್ಧಂ ನವನೀತಚೌರಂ
ಗೋಪಾಙ್ಗನಾನಾಂ ಚ ದುಕೂಲಚೌರಮ್ ।
ಅನೇಕಜನ್ಮಾರ್ಜಿತಪಾಪಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ॥ 1॥

ಶ್ರೀರಾಧಿಕಾಯಾ ಹೃದಯಸ್ಯ ಚೌರಂ
ನವಾಮ್ಬುದಶ್ಯಾಮಲಕಾನ್ತಿಚೌರಮ್ ।
ಪದಾಶ್ರಿತಾನಾಂ ಚ ಸಮಸ್ತಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ॥ 2॥

ಅಕಿಞ್ಚನೀಕೃತ್ಯ ಪದಾಶ್ರಿತಂ ಯಃ
ಕರೋತಿ ಭಿಕ್ಷುಂ ಪಥಿ ಗೇಹಹೀನಮ್ ।
ಕೇನಾಪ್ಯಹೋ ಭೀಷಣಚೌರ ಈದೃಗ್-
ದೃಷ್ಟಃಶ್ರುತೋ ವಾ ನ ಜಗತ್ತ್ರಯೇಽಪಿ ॥ 3॥

ಯದೀಯ ನಾಮಾಪಿ ಹರತ್ಯಶೇಷಂ
ಗಿರಿಪ್ರಸಾರಾನ್ ಅಪಿ ಪಾಪರಾಶೀನ್ ।
ಆಶ್ಚರ್ಯರೂಪೋ ನನು ಚೌರ ಈದೃಗ್
ದೃಷ್ಟಃ ಶ್ರುತೋ ವಾ ನ ಮಯಾ ಕದಾಪಿ ॥ 4॥

ಧನಂ ಚ ಮಾನಂ ಚ ತಥೇನ್ದ್ರಿಯಾಣಿ
ಪ್ರಾಣಾಂಶ್ಚ ಹೃತ್ವಾ ಮಮ ಸರ್ವಮೇವ ।
ಪಲಾಯಸೇ ಕುತ್ರ ಧೃತೋಽದ್ಯ ಚೌರ
ತ್ವಂ ಭಕ್ತಿದಾಮ್ನಾಸಿ ಮಯಾ ನಿರುದ್ಧಃ ॥ 5॥

ಛಿನತ್ಸಿ ಘೋರಂ ಯಮಪಾಶಬನ್ಧಂ
ಭಿನತ್ಸಿ ಭೀಮಂ ಭವಪಾಶಬನ್ಧಮ್ ।
ಛಿನತ್ಸಿ ಸರ್ವಸ್ಯ ಸಮಸ್ತಬನ್ಧಂ
ನೈವಾತ್ಮನೋ ಭಕ್ತಕೃತಂ ತು ಬನ್ಧಮ್ ॥ 6॥

ಮನ್ಮಾನಸೇ ತಾಮಸರಾಶಿಘೋರೇ
ಕಾರಾಗೃಹೇ ದುಃಖಮಯೇ ನಿಬದ್ಧಃ ।
ಲಭಸ್ವ ಹೇ ಚೌರ! ಹರೇ! ಚಿರಾಯ
ಸ್ವಚೌರ್ಯದೋಷೋಚಿತಮೇವ ದಣ್ಡಮ್ ॥ 7॥

ಕಾರಾಗೃಹೇ ವಸ ಸದಾ ಹೃದಯೇ ಮದೀಯೇ
ಮದ್ಭಕ್ತಿಪಾಶದೃಢಬನ್ಧನನಿಶ್ಚಲಃ ಸನ್ ।
ತ್ವಾಂ ಕೃಷ್ಣ ಹೇ! ಪ್ರಲಯಕೋಟಿಶತಾನ್ತರೇಽಪಿ
ಸರ್ವಸ್ವಚೌರ! ಹೃದಯಾನ್ ನ ಹಿ ಮೋಚಯಾಮಿ ॥ 8॥

ಇತಿ ಶ್ರೀಬಿಲ್ವಮಙ್ಗಲಠಾಕೂರವಿರಚಿತಂ ಚೌರಾಷ್ಟಕಂ ಸಮ್ಪೂರ್ಣಮ್ ।

ಚೌರಗ್ರಗಣ್ಯ ಪುರುಷಾಷ್ಟಕಮ್ ।

Browse Related Categories: