॥ ಚತುರ್ಥಃ ಸರ್ಗಃ ॥
॥ ಸ್ನಿಗ್ಧಮಧುಸೂದನಃ ॥
ಯಮುನಾತೀರವಾನೀರನಿಕುಞ್ಜೇ ಮನ್ದಮಾಸ್ಥಿತಮ್ ।
ಪ್ರಾಹ ಪ್ರೇಮಭರೋದ್ಭ್ರಾನ್ತಂ ಮಾಧವಂ ರಾಧಿಕಾಸಖೀ ॥ 25 ॥
॥ ಗೀತಂ 8 ॥
ನಿನ್ದತಿ ಚನ್ದನಮಿನ್ದುಕಿರಣಮನು ವಿನ್ದತಿ ಖೇದಮಧೀರಮ್ ।
ವ್ಯಾಲನಿಲಯಮಿಲನೇನ ಗರಲಮಿವ ಕಲಯತಿ ಮಲಯಸಮೀರಮ್ ॥
ಸಾ ವಿರಹೇ ತವ ದೀನಾ ಮಾಧವ ಮನಸಿಜವಿಶಿಖಭಯಾದಿವ ಭಾವನಯಾ ತ್ವಯಿ ಲೀನಾ ॥ 1 ॥
ಅವಿರಲನಿಪತಿತಮದನಶರಾದಿವ ಭವದವನಾಯ ವಿಶಾಲಮ್ ।
ಸ್ವಹೃದಯರ್ಮಣೀ ವರ್ಮ ಕರೋತಿ ಸಜಲನಲಿನೀದಲಜಾಲಮ್ ॥ 2 ॥
ಕುಸುಮವಿಶಿಖಶರತಲ್ಪಮನಲ್ಪವಿಲಾಸಕಲಾಕಮನೀಯಮ್ ।
ವ್ರತಮಿವ ತವ ಪರಿರಮ್ಭಸುಖಾಯ ಕರೋತಿ ಕುಸುಮಶಯನೀಯಮ್ ॥ 3 ॥
ವಹತಿ ಚ ಗಲಿತವಿಲೋಚನಜಲಭರಮಾನನಕಮಲಮುದಾರಮ್ ।
ವಿಧುಮಿವ ವಿಕಟವಿಧುನ್ತುದದನ್ತದಲನಗಲಿತಾಮೃತಧಾರಮ್ ॥ 4 ॥
ವಿಲಿಖತಿ ರಹಸಿ ಕುರಙ್ಗಮದೇನ ಭವನ್ತಮಸಮಶರಭೂತಮ್ ।
ಪ್ರಣಮತಿ ಮಕರಮಧೋ ವಿನಿಧಾಯ ಕರೇ ಚ ಶರಂ ನವಚೂತಮ್ ॥ 5 ॥
ಪ್ರತಿಪದಮಿದಮಪಿ ನಿಗತತಿ ಮಾಧವ ತವ ಚರಣೇ ಪತಿತಾಹಮ್ ।
ತ್ವಯಿ ವಿಮುಖೇ ಮಯಿ ಸಪದಿ ಸುಧಾನಿಧಿರಪಿ ತನುತೇ ತನುದಾಹಮ್ ॥ 6 ॥
ಧ್ಯಾನಲಯೇನ ಪುರಃ ಪರಿಕಲ್ಪ್ಯ ಭವನ್ತಮತೀವ ದುರಾಪಮ್ ।
ವಿಲಪತಿ ಹಸತಿ ವಿಷೀದತಿ ರೋದಿತಿ ಚಞ್ಚತಿ ಮುಞ್ಚತಿ ತಾಪಮ್ ॥ 7 ॥
ಶ್ರೀಜಯದೇವಭಣಿತಮಿದಮಧಿಕಂ ಯದಿ ಮನಸಾ ನಟನೀಯಮ್ ।
ಹರಿವಿರಹಾಕುಲಬಲ್ಲವಯುವತಿಸಖೀವಚನಂ ಪಠನೀಯಮ್ ॥ 8 ॥
ಆವಾಸೋ ವಿಪಿನಾಯತೇ ಪ್ರಿಯಸಖೀಮಾಲಾಪಿ ಜಾಲಾಯತೇ ತಾಪೋಽಪಿ ಶ್ವಸಿತೇನ ದಾವದಹನಜ್ವಾಲಾಕಲಾಪಾಯತೇ ।
ಸಾಪಿ ತ್ವದ್ವಿರಹೇಣ ಹನ್ತ ಹರಿಣೀರೂಪಾಯತೇ ಹಾ ಕಥಂ ಕನ್ದರ್ಪೋಽಪಿ ಯಮಾಯತೇ ವಿರಚಯಞ್ಶಾರ್ದೂಲವಿಕ್ರೀಡಿತಮ್ ॥ 26 ॥
॥ ಗೀತಂ 9 ॥
ಸ್ತನವಿನಿಹಿತಮಪಿ ಹಾರಮುದಾರಮ್ ।
ಸಾ ಮನುತೇ ಕೃಶತನುರತಿಭಾರಮ್ ॥
ರಾಧಿಕಾ ವಿರಹೇ ತವ ಕೇಶವ ॥ 1 ॥
ಸರಸಮಸೃಣಮಪಿ ಮಲಯಜಪಙ್ಕಮ್ ।
ಪಶ್ಯತಿ ವಿಷಮಿವ ವಪುಷಿ ಸಶಙ್ಕಮ್ ॥ 2 ॥
ಶ್ವಸಿತಪವನಮನುಪಮಪರಿಣಾಹಮ್ ।
ಮದನದಹನಮಿವ ವಹತಿ ಸದಾಹಮ್ ॥ 3 ॥
ದಿಶಿ ದಿಶಿ ಕಿರತಿ ಸಜಲಕಣಜಾಲಮ್ ।
ನಯನನಲಿನಮಿವ ವಿಗಲಿತನಾಲಮ್ ॥ 4 ॥
ನಯನವಿಷಯಮಪಿ ಕಿಸಲಯತಲ್ಪಮ್ ।
ಕಲಯತಿ ವಿಹಿತಹುತಾಶವಿಕಲ್ಪಮ್ ॥ 5 ॥
ತ್ಯಜತಿ ನ ಪಾಣಿತಲೇನ ಕಪೋಲಮ್ ।
ಬಾಲಶಶಿನಮಿವ ಸಾಯಮಲೋಲಮ್ ॥ 6 ॥
ಹರಿರಿತಿ ಹರಿರಿತಿ ಜಪತಿ ಸಕಾಮಮ್ ।
ವಿರಹವಿಹಿತಮರಣೇನ ನಿಕಾಮಮ್ ॥ 7 ॥
ಶ್ರೀಜಯದೇವಭಣಿತಮಿತಿ ಗೀತಮ್ ।
ಸುಖಯತು ಕೇಶವಪದಮುಪುನೀತಮ್ ॥ 8 ॥
ಸಾ ರೋಮಾಞ್ಚತಿ ಸೀತ್ಕರೋತಿ ವಿಲಪತ್ಯುತ್ಕ್ಮ್ಪತೇ ತಾಮ್ಯತಿ ಧ್ಯಾಯತ್ಯುದ್ಭ್ರಮತಿ ಪ್ರಮೀಲತಿ ಪತತ್ಯುದ್ಯಾತಿ ಮೂರ್ಚ್ಛತ್ಯಪಿ ।
ಏತಾವತ್ಯತನುಜ್ವರೇ ವರತನುರ್ಜೀವೇನ್ನ ಕಿಂ ತೇ ರಸಾತ್ ಸ್ವರ್ವೈದ್ಯಪ್ರತಿಮ ಪ್ರಸೀದಸಿ ಯದಿ ತ್ಯಕ್ತೋಽನ್ಯಥಾ ನಾನ್ತಕಃ ॥ 27 ॥
ಸ್ಮರಾತುರಾಂ ದೈವತವೈದ್ಯಹೃದ್ಯ ತ್ವದಙ್ಗಸಙ್ಗಾಮೃತಮಾತ್ರಸಾಧ್ಯಾಮ್ ।
ವಿಮುಕ್ತಬಾಧಾಂ ಕುರುಷೇ ನ ರಾಧಾ-ಮುಪೇನ್ದ್ರ ವಜ್ರಾದಪಿ ದಾರುಣೋಽಸಿ ॥ 28 ॥
ಕನ್ದರ್ಪಜ್ವರಸಞ್ಜ್ವರಸ್ತುರತನೋರಾಶ್ಚರ್ಯಮಸ್ಯಾಶ್ಚಿರಂ ಚೇತಶ್ಚನ್ದನಚನ್ದ್ರಮಃಕಮಲಿನೀಚಿನ್ತಾಸು ಸನ್ತಾಮ್ಯತಿ ।
ಕಿನ್ತು ಕ್ಲಾನ್ತಿವಶೇನ ಶೀತಲತನುಂ ತ್ವಾಮೇಕಮೇವ ಪ್ರಿಯಂ ಧ್ಯಾಯನ್ತೀ ರಹಸಿ ಸ್ಥಿತಾ ಕಥಮಪಿ ಕ್ಷೀಣಾ ಕ್ಷಣಂ ಪ್ರಾಣಿತಿ ॥ 29 ॥
ಕ್ಷಣಮಪಿ ವಿರಹಃ ಪುರಾ ನ ಸೇಹೇ ನಯನನಿಮೀಲನಖಿನ್ನಯಾ ಯಯಾ ತೇ ।
ಶ್ವಸಿತಿ ಕಥಮಸೌ ರಸಾಲಶಾಖಾಂ ಚಿರವಿರಹೇಣ ವಿಲೋಕ್ಯ ಪುಷ್ಪಿತಾಗ್ರಾಮ್ ॥ 30 ॥
॥ ಇತಿ ಗೀತಗೋವಿನ್ದೇ ಸ್ನಿಗ್ಧಮಾಧವೋ ನಾಮ ಚತುರ್ಥಃ ಸರ್ಗಃ ॥
