ಕೈಲಾಸಶಿಖರೇ ರಮ್ಯೇ ಗೌರೀ ಪಪ್ರಚ್ಛ ಶಙ್ಕರಮ್ ।
ಬ್ರಹ್ಮಾಣ್ಡಾಖಿಲನಾಥಸ್ತ್ವಂ ಸೃಷ್ಟಿಸಂಹಾರಕಾರಕಃ ॥ 1 ॥
ತ್ವಮೇವ ಪೂಜ್ಯಸೇ ಲೋಕೈರ್ಬ್ರಹ್ಮವಿಷ್ಣುಸುರಾದಿಭಿಃ ।
ನಿತ್ಯಂ ಪಠಸಿ ದೇವೇಶ ಕಸ್ಯ ಸ್ತೋತ್ರಂ ಮಹೇಶ್ವರ ॥ 2 ॥
ಆಶ್ಚರ್ಯಮಿದಮತ್ಯನ್ತಂ ಜಾಯತೇ ಮಮ ಶಙ್ಕರ ।
ತತ್ಪ್ರಾಣೇಶ ಮಹಾಪ್ರಾಜ್ಞ ಸಂಶಯಂ ಛಿನ್ಧಿ ಮೇ ಪ್ರಭೋ ॥ 3 ॥
ಶ್ರೀಮಹಾದೇವ ಉವಾಚ-
ಧನ್ಯಾಸಿ ಕೃತಪುಣ್ಯಾಸಿ ಪಾರ್ವತಿ ಪ್ರಾಣವಲ್ಲಭೇ ।
ರಹಸ್ಯಾತಿರಹಸ್ಯಂ ಚ ಯತ್ಪೃಚ್ಛಸಿ ವರಾನನೇ ॥ 4 ॥
ಸ್ತ್ರೀಸ್ವಭಾವಾನ್ಮಹಾದೇವಿ ಪುನಸ್ತ್ವಂ ಪರಿಪೃಚ್ಛಸಿ ।
ಗೋಪನೀಯಂ ಗೋಪನೀಯಂ ಗೋಪನೀಯಂ ಪ್ರಯತ್ನತಃ ॥ 5 ॥
ದತ್ತೇ ಚ ಸಿದ್ಧಿಹಾನಿಃ ಸ್ಯಾತ್ತಸ್ಮಾದ್ಯತ್ನೇನ ಗೋಪಯೇತ್ ।
ಇದಂ ರಹಸ್ಯಂ ಪರಮಂ ಪುರುಷಾರ್ಥಪ್ರದಾಯಕಮ್ ॥ 6 ॥
ಧನರತ್ನೌಘಮಾಣಿಕ್ಯಂ ತುರಙ್ಗಂ ಚ ಗಜಾದಿಕಮ್ ।
ದದಾತಿ ಸ್ಮರಣಾದೇವ ಮಹಾಮೋಕ್ಷಪ್ರದಾಯಕಮ್ ॥ 7 ॥
ತತ್ತೇಽಹಂ ಸಮ್ಪ್ರವಕ್ಷ್ಯಾಮಿ ಶೃಣುಷ್ವಾವಹಿತಾ ಪ್ರಿಯೇ ।
ಯೋಽಸೌ ನಿರಞ್ಜನೋ ದೇವಶ್ಚಿತ್ಸ್ವರೂಪೀ ಜನಾರ್ದನಃ ॥ 8 ॥
ಸಂಸಾರಸಾಗರೋತ್ತಾರಕಾರಣಾಯ ನೃಣಾಂ ಸದಾ ।
ಶ್ರೀರಙ್ಗಾದಿಕರೂಪೇಣ ತ್ರೈಲೋಕ್ಯಂ ವ್ಯಾಪ್ಯ ತಿಷ್ಠತಿ ॥ 9 ॥
ತತೋ ಲೋಕಾ ಮಹಾಮೂಢಾ ವಿಷ್ಣುಭಕ್ತಿವಿವರ್ಜಿತಾಃ ।
ನಿಶ್ಚಯಂ ನಾಧಿಗಚ್ಛನ್ತಿ ಪುನರ್ನಾರಾಯಣೋ ಹರಿಃ ॥ 10 ॥
ನಿರಞ್ಜನೋ ನಿರಾಕಾರೋ ಭಕ್ತಾನಾಂ ಪ್ರೀತಿಕಾಮದಃ ।
ಬೃನ್ದಾವನವಿಹಾರಾಯ ಗೋಪಾಲಂ ರೂಪಮುದ್ವಹನ್ ॥ 11 ॥
ಮುರಳೀವಾದನಾಧಾರೀ ರಾಧಾಯೈ ಪ್ರೀತಿಮಾವಹನ್ ।
ಅಂಶಾಂಶೇಭ್ಯಃ ಸಮುನ್ಮೀಲ್ಯ ಪೂರ್ಣರೂಪಕಳಾಯುತಃ ॥ 12 ॥
ಶ್ರೀಕೃಷ್ಣಚನ್ದ್ರೋ ಭಗವಾನ್ ನನ್ದಗೋಪವರೋದ್ಯತಃ ।
ಧರಣೀರೂಪಿಣೀ ಮಾತಾ ಯಶೋದಾ ನನ್ದಗೇಹಿನೀ ॥ 13 ॥
ದ್ವಾಭ್ಯಾಂ ಪ್ರಯಾಚಿತೋ ನಾಥೋ ದೇವಕ್ಯಾಂ ವಸುದೇವತಃ ।
ಬ್ರಹ್ಮಣಾಽಭ್ಯರ್ಥಿತೋ ದೇವೋ ದೇವೈರಪಿ ಸುರೇಶ್ವರಃ ॥ 14 ॥
ಜಾತೋಽವನ್ಯಾಂ ಚ ಮುದಿತೋ ಮುರಳೀವಾಚನೇಚ್ಛಯಾ ।
ಶ್ರಿಯಾ ಸಾರ್ಧಂ ವಚಃ ಕೃತ್ವಾ ತತೋ ಜಾತೋ ಮಹೀತಲೇ ॥ 15 ॥
ಸಂಸಾರಸಾರಸರ್ವಸ್ವಂ ಶ್ಯಾಮಲಂ ಮಹದುಜ್ಜ್ವಲಮ್ ।
ಏತಜ್ಜ್ಯೋತಿರಹಂ ವನ್ದ್ಯಂ ಚಿನ್ತಯಾಮಿ ಸನಾತನಮ್ ॥ 16 ॥
ಗೌರತೇಜೋ ವಿನಾ ಯಸ್ತು ಶ್ಯಾಮತೇಜಸ್ಸಮರ್ಚಯೇತ್ ।
ಜಪೇದ್ವಾ ಧ್ಯಾಯತೇ ವಾಪಿ ಸ ಭವೇತ್ಪಾತಕೀ ಶಿವೇ ॥ 17 ॥
ಸ ಬ್ರಹ್ಮಹಾ ಸುರಾಪೀ ಚ ಸ್ವರ್ಣಸ್ತೇಯೀ ಚ ಪಞ್ಚಮಃ ।
ಏತೈರ್ದೋಷೈರ್ವಿಲಿಪ್ಯೇತ ತೇಜೋಭೇದಾನ್ಮಹೀಶ್ವರಿ ॥ 18 ॥
ತಸ್ಮಾಜ್ಜ್ಯೋತಿರಭೂದ್ದ್ವೇಧಾ ರಾಧಾಮಾಧವರೂಪಕಮ್ ।
ತಸ್ಮಾದಿದಂ ಮಹಾದೇವಿ ಗೋಪಾಲೇನೈವ ಭಾಷಿತಮ್ ॥ 19 ॥
ದುರ್ವಾಸಸೋ ಮುನೇರ್ಮೋಹೇ ಕಾರ್ತಿಕ್ಯಾಂ ರಾಸಮಣ್ಡಲೇ ।
ತತಃ ಪೃಷ್ಟವತೀ ರಾಧಾ ಸನ್ದೇಹಂ ಭೇದಮಾತ್ಮನಃ ॥ 20 ॥
ನಿರಞ್ಜನಾತ್ಸಮುತ್ಪನ್ನಂ ಮಾಯಾತೀತಂ ಜಗನ್ಮಯಮ್ ।
ಶ್ರೀಕೃಷ್ಣೇನ ತತಃ ಪ್ರೋಕ್ತಂ ರಾಧಾಯೈ ನಾರದಾಯ ಚ ॥ 21 ॥
ತತೋ ನಾರದತಸ್ಸರ್ವಂ ವಿರಳಾ ವೈಷ್ಣವಾಸ್ತಥಾ ।
ಕಲೌ ಜಾನನ್ತಿ ದೇವೇಶಿ ಗೋಪನೀಯಂ ಪ್ರಯತ್ನತಃ ॥ 22 ॥
ಶಠಾಯ ಕೃಪಣಾಯಾಥ ಡಾಮ್ಭಿಕಾಯ ಸುರೇಶ್ವರಿ ।
ಬ್ರಹ್ಮಹತ್ಯಾಮವಾಪ್ನೋತಿ ತಸ್ಮಾದ್ಯತ್ನೇನ ಗೋಪಯೇತ್ ॥ 23 ॥
ಓಂ ಅಸ್ಯ ಶ್ರೀಗೋಪಾಲಸಹಸ್ರನಾಮಸ್ತೋತ್ರ ಮಹಾಮನ್ತ್ರಸ್ಯ ಶ್ರೀನಾರದ ಋಷಿಃ, ಅನುಷ್ಟುಪ್ ಛನ್ದಃ, ಶ್ರೀಗೋಪಾಲೋ ದೇವತಾ, ಕಾಮೋ ಬೀಜಂ, ಮಾಯಾ ಶಕ್ತಿಃ, ಚನ್ದ್ರಃ ಕೀಲಕಂ, ಶ್ರೀಕೃಷ್ಣಚನ್ದ್ರ ಭಕ್ತಿರೂಪಫಲಪ್ರಾಪ್ತಯೇ ಶ್ರೀಗೋಪಾಲಸಹಸ್ರನಾಮಸ್ತೋತ್ರಜಪೇ ವಿನಿಯೋಗಃ ।
ಓಂ ಐಂ ಕ್ಲೀಂ ಬೀಜಂ, ಶ್ರೀಂ ಹ್ರೀಂ ಶಕ್ತಿಃ, ಶ್ರೀ ಬೃನ್ದಾವನನಿವಾಸಃ ಕೀಲಕಂ, ಶ್ರೀರಾಧಾಪ್ರಿಯಂ ಪರಂ ಬ್ರಹ್ಮೇತಿ ಮನ್ತ್ರಃ, ಧರ್ಮಾದಿ ಚತುರ್ವಿಧ ಪುರುಷಾರ್ಥಸಿದ್ಧ್ಯರ್ಥೇ ಜಪೇ ವಿನಿಯೋಗಃ ।
ನ್ಯಾಸಃ ।
ಓಂ ನಾರದ ಋಷಯೇ ನಮಃ ಶಿರಸಿ ।
ಅನುಷ್ಟುಪ್ ಛನ್ದಸೇ ನಮಃ ಮುಖೇ ।
ಶ್ರೀಗೋಪಾಲದೇವತಾಯೈ ನಮಃ ಹೃದಯೇ ।
ಕ್ಲೀಂ ಕೀಲಕಾಯ ನಮಃ ನಾಭೌ ।
ಹ್ರೀಂ ಶಕ್ತಯೇ ನಮಃ ಗುಹ್ಯೇ ।
ಶ್ರೀಂ ಕೀಲಕಾಯ ನಮಃ ಫಾಲಯೋಃ ।
ಓಂ ಕ್ಲೀಂ ಕೃಷ್ಣಾಯ ಗೋವಿನ್ದಾಯ ಗೋಪೀಜನವಲ್ಲಭಾಯ ಸ್ವಾಹಾ ಇತಿ ಮೂಲಮನ್ತ್ರಃ ।
ಕರನ್ಯಾಸಃ ।
ಓಂ ಕ್ಲಾಂ ಅಙ್ಗುಷ್ಠಾಭ್ಯಾಂ ನಮಃ ।
ಓಂ ಕ್ಲೀಂ ತರ್ಜನೀಭ್ಯಾಂ ನಮಃ ।
ಓಂ ಕ್ಲೂಂ ಮಧ್ಯಮಾಭ್ಯಾಂ ನಮಃ ।
ಓಂ ಕ್ಲೈಂ ಅನಾಮಿಕಾಭ್ಯಾಂ ನಮಃ ।
ಓಂ ಕ್ಲೌಂ ಕನಿಷ್ಠಿಕಾಭ್ಯಾಂ ನಮಃ ।
ಓಂ ಕ್ಲಃ ಕರತಲಕರಪೃಷ್ಠಾಭ್ಯಾಂ ನಮಃ ।
ಹೃದಯಾದಿನ್ಯಾಸಃ ।
ಓಂ ಕ್ಲಾಂ ಹೃದಯಾಯ ನಮಃ ।
ಓಂ ಕ್ಲೀಂ ಶಿರಸೇ ಸ್ವಾಹಾ ।
ಓಂ ಕ್ಲೂಂ ಶಿಖಾಯೈ ವಷಟ್ ।
ಓಂ ಕ್ಲೈಂ ಕವಚಾಯ ಹುಮ್ ।
ಓಂ ಕ್ಲೌಂ ನೇತ್ರತ್ರಯಾಯ ವೌಷಟ್ ।
ಓಂ ಕ್ಲಃ ಅಸ್ತ್ರಾಯ ಫಟ್ ।
ಮೂಲಮನ್ತ್ರನ್ಯಾಸಃ ।
ಕ್ಲೀಂ ಅಙ್ಗುಷ್ಠಾಭ್ಯಾಂ ನಮಃ ।
ಕೃಷ್ಣಾಯ ತರ್ಜನೀಭ್ಯಾಂ ನಮಃ ।
ಗೋವಿನ್ದಾಯ ಮಧ್ಯಮಾಭ್ಯಾಂ ನಮಃ ।
ಗೋಪೀಜನ ಅನಾಮಿಕಾಭ್ಯಾಂ ನಮಃ ।
ವಲ್ಲಭಾಯ ಕನಿಷ್ಠಿಕಾಭ್ಯಾಂ ನಮಃ ।
ಸ್ವಾಹಾ ಕರತಲಕರಪೃಷ್ಠಾಭ್ಯಾಂ ನಮಃ ।
ಕ್ಲೀಂ ಹೃದಯಾಯ ನಮಃ ।
ಕೃಷ್ಣಾಯ ಶಿರಸೇ ಸ್ವಾಹಾ ।
ಗೋವಿನ್ದಾಯ ಶಿಖಾಯೈ ವಷಟ್ ।
ಗೋಪೀಜನ ಕವಚಾಯ ಹುಮ್ ।
ವಲ್ಲಭಾಯ ನೇತ್ರತ್ರಯಾಯ ವೌಷಟ್ ।
ಸ್ವಾಹಾ ಅಸ್ತ್ರಾಯ ಫಟ್ ।
ಧ್ಯಾನಮ್ ।
ಫುಲ್ಲೇನ್ದೀವರಕಾನ್ತಿಮಿನ್ದುವದನಂ ಬರ್ಹಾವತಂಸಪ್ರಿಯಂ
ಶ್ರೀವತ್ಸಾಙ್ಕಮುದಾರಕೌಸ್ತುಭಧರಂ ಪೀತಾಮ್ಬರಂ ಸುನ್ದರಮ್ ।
ಗೋಪೀನಾಂ ನಯನೋತ್ಪಲಾರ್ಚಿತತನುಂ ಗೋಗೋಪಸಙ್ಘಾವೃತಂ
ಗೋವಿನ್ದಂ ಕಲವೇಣುವಾದನಪರಂ ದಿವ್ಯಾಙ್ಗಭೂಷಂ ಭಜೇ ॥ 1 ॥
ಕಸ್ತೂರೀತಿಲಕಂ ಲಲಾಟಫಲಕೇ ವಕ್ಷಸ್ಸ್ಥಲೇ ಕೌಸ್ತುಭಂ
ನಾಸಾಗ್ರೇ ವರಮೌಕ್ತಿಕಂ ಕರತಲೇ ವೇಣುಂ ಕರೇ ಕಙ್ಕಣಮ್ ।
ಸರ್ವಾಙ್ಗೇ ಹರಿಚನ್ದನಂ ಚ ಕಲಯನ್ ಕಣ್ಠೇ ಚ ಮುಕ್ತಾವಲಿಂ
ಗೋಪಸ್ತ್ರೀಪರಿವೇಷ್ಟಿತೋ ವಿಜಯತೇ ಗೋಪಾಲಚೂಡಾಮಣಿಃ ॥ 2 ॥
ಓಂ ಕ್ಲೀಂ ದೇವಃ ಕಾಮದೇವಃ ಕಾಮಬೀಜಶಿರೋಮಣಿಃ ।
ಶ್ರೀಗೋಪಾಲೋ ಮಹೀಪಾಲೋ ವೇದವೇದಾಙ್ಗಪಾರಗಃ ॥ 1 ॥
ಕೃಷ್ಣಃ ಕಮಲಪತ್ರಾಕ್ಷಃ ಪುಣ್ಡರೀಕಃ ಸನಾತನಃ ।
ಗೋಪತಿರ್ಭೂಪತಿಃ ಶಾಸ್ತಾ ಪ್ರಹರ್ತಾ ವಿಶ್ವತೋಮುಖಃ ॥ 2 ॥
ಆದಿಕರ್ತಾ ಮಹಾಕರ್ತಾ ಮಹಾಕಾಲಃ ಪ್ರತಾಪವಾನ್ ।
ಜಗಜ್ಜೀವೋ ಜಗದ್ಧಾತಾ ಜಗದ್ಭರ್ತಾ ಜಗದ್ವಸುಃ ॥ 3 ॥
ಮತ್ಸ್ಯೋ ಭೀಮಃ ಕುಹೂಭರ್ತಾ ಹರ್ತಾ ವಾರಾಹಮೂರ್ತಿಮಾನ್ ।
ನಾರಾಯಣೋ ಹೃಷೀಕೇಶೋ ಗೋವಿನ್ದೋ ಗರುಡಧ್ವಜಃ ॥ 4 ॥
ಗೋಕುಲೇಶೋ ಮಹಾಚನ್ದ್ರಃ ಶರ್ವರೀಪ್ರಿಯಕಾರಕಃ ।
ಕಮಲಾಮುಖಲೋಲಾಕ್ಷಃ ಪುಣ್ಡರೀಕಃ ಶುಭಾವಹಃ ॥ 5 ॥
ದುರ್ವಾಸಾಃ ಕಪಿಲೋ ಭೌಮಃ ಸಿನ್ಧುಸಾಗರಸಙ್ಗಮಃ ।
ಗೋವಿನ್ದೋ ಗೋಪತಿರ್ಗೋತ್ರಃ ಕಾಳಿನ್ದೀಪ್ರೇಮಪೂರಕಃ ॥ 6 ॥
ಗೋಪಸ್ವಾಮೀ ಗೋಕುಲೇನ್ದ್ರಃ ಗೋವರ್ಧನವರಪ್ರದಃ ।
ನನ್ದಾದಿಗೋಕುಲತ್ರಾತಾ ದಾತಾ ದಾರಿದ್ರ್ಯಭಞ್ಜನಃ ॥ 7 ॥
ಸರ್ವಮಙ್ಗಳದಾತಾ ಚ ಸರ್ವಕಾಮವರಪ್ರದಃ ।
ಆದಿಕರ್ತಾ ಮಹೀಭರ್ತಾ ಸರ್ವಸಾಗರಸಿನ್ಧುಜಃ ॥ 8 ॥
ಗಜಗಾಮೀ ಗಜೋದ್ಧಾರೀ ಕಾಮೀ ಕಾಮಕಲಾನಿಧಿಃ ।
ಕಳಙ್ಕರಹಿತಶ್ಚನ್ದ್ರೋ ಬಿಮ್ಬಾಸ್ಯೋ ಬಿಮ್ಬಸತ್ತಮಃ ॥ 9 ॥
ಮಾಲಾಕಾರಃ ಕೃಪಾಕಾರಃ ಕೋಕಿಲಸ್ವರಭೂಷಣಃ ।
ರಾಮೋ ನೀಲಾಮ್ಬರೋ ದೇಹೀ ಹಲೀ ದ್ವಿವಿದಮರ್ದನಃ ॥ 10 ॥
ಸಹಸ್ರಾಕ್ಷಪುರೀಭೇತ್ತಾ ಮಹಾಮಾರೀವಿನಾಶನಃ ।
ಶಿವಃ ಶಿವತಮೋ ಭೇತ್ತಾ ಬಲಾರಾತಿಪ್ರಪೂಜಕಃ ॥ 11 ॥
ಕುಮಾರೀವರದಾಯೀ ಚ ವರೇಣ್ಯೋ ಮೀನಕೇತನಃ ।
ನರೋ ನಾರಾಯಣೋ ಧೀರೋ ಧರಾಪತಿರುದಾರಧೀಃ ॥ 12 ॥
ಶ್ರೀಪತಿಃ ಶ್ರೀನಿಧಿಃ ಶ್ರೀಮಾನ್ ಮಾಪತಿಃ ಪ್ರತಿರಾಜಹಾ ।
ಬೃನ್ದಾಪತಿಃ ಕುಲಂ ಗ್ರಾಮೀ ಧಾಮ ಬ್ರಹ್ಮಸನಾತನಃ ॥ 13 ॥
ರೇವತೀರಮಣೋ ರಾಮಃ ಪ್ರಿಯಶ್ಚಞ್ಚಲಲೋಚನಃ ।
ರಾಮಾಯಣಶರೀರಶ್ಚ ರಾಮೋ ರಾಮಃ ಶ್ರಿಯಃಪತಿಃ ॥ 14 ॥
ಶರ್ವರಃ ಶರ್ವರೀ ಶರ್ವಃ ಸರ್ವತ್ರ ಶುಭದಾಯಕಃ ।
ರಾಧಾರಾಧಯಿತಾರಾಧೀ ರಾಧಾಚಿತ್ತಪ್ರಮೋದಕಃ ॥ 15 ॥
ರಾಧಾರತಿಸುಖೋಪೇತೋ ರಾಧಾಮೋಹನತತ್ಪರಃ ।
ರಾಧಾವಶೀಕರೋ ರಾಧಾಹೃದಯಾಮ್ಭೋಜಷಟ್ಪದಃ ॥ 16 ॥
ರಾಧಾಲಿಙ್ಗನಸಮ್ಮೋದೋ ರಾಧಾನರ್ತನಕೌತುಕಃ ।
ರಾಧಾಸಞ್ಜಾತಸಮ್ಪ್ರೀತೋ ರಾಧಾಕಾಮಫಲಪ್ರದಃ ॥ 17 ॥
ಬೃನ್ದಾಪತಿಃ ಕೋಕನಿಧಿಃ ಕೋಕಶೋಕವಿನಾಶನಃ ।
ಚನ್ದ್ರಾಪತಿಶ್ಚನ್ದ್ರಪತಿಶ್ಚಣ್ಡಕೋದಣ್ಡಭಞ್ಜನಃ ॥ 18 ॥
ರಾಮೋ ದಾಶರಥೀ ರಾಮೋ ಭೃಗುವಂಶಸಮುದ್ಭವಃ ।
ಆತ್ಮಾರಾಮೋ ಜಿತಕ್ರೋಧೋ ಮೋಹೋ ಮೋಹಾನ್ಧಭಞ್ಜನಃ ॥ 19 ॥
ವೃಷಭಾನುಭವೋ ಭಾವೀ ಕಾಶ್ಯಪಿಃ ಕರುಣಾನಿಧಿಃ ।
ಕೋಲಾಹಲೋ ಹಲೋ ಹಾಲೀ ಹಲೀ ಹಲಧರಪ್ರಿಯಃ ॥ 20 ॥
ರಾಧಾಮುಖಾಬ್ಜಮಾರ್ತಾಣ್ಡೋ ಭಾಸ್ಕರೋ ರವಿಜೋ ವಿಧುಃ ।
ವಿಧಿರ್ವಿಧಾತಾ ವರುಣೋ ವಾರುಣೋ ವಾರುಣೀಪ್ರಿಯಃ ॥ 21 ॥
ರೋಹಿಣೀಹೃದಯಾನನ್ದೀ ವಸುದೇವಾತ್ಮಜೋ ಬಲಿಃ ।
ನೀಲಾಮ್ಬರೋ ರೌಹಿಣೇಯೋ ಜರಾಸನ್ಧವಧೋಽಮಲಃ ॥ 22 ॥
ನಾಗೋ ಜವಾಮ್ಭೋ ವಿರುದೋ ವೀರಹಾ ವರದೋ ಬಲೀ ।
ಗೋಪದೋ ವಿಜಯೀ ವಿದ್ವಾನ್ ಶಿಪಿವಿಷ್ಟಃ ಸನಾತನಃ ॥ 23 ॥
ಪರಶುರಾಮವಚೋಗ್ರಾಹೀ ವರಗ್ರಾಹೀ ಸೃಗಾಲಹಾ ।
ದಮಘೋಷೋಪದೇಷ್ಟಾ ಚ ರಥಗ್ರಾಹೀ ಸುದರ್ಶನಃ ॥ 24 ॥
ವೀರಪತ್ನೀಯಶಸ್ತ್ರಾತಾ ಜರಾವ್ಯಾಧಿವಿಘಾತಕಃ ।
ದ್ವಾರಕಾವಾಸತತ್ತ್ವಜ್ಞೋ ಹುತಾಶನವರಪ್ರದಃ ॥ 25 ॥
ಯಮುನಾವೇಗಸಂಹಾರೀ ನೀಲಾಮ್ಬರಧರಃ ಪ್ರಭುಃ ।
ವಿಭುಃ ಶರಾಸನೋ ಧನ್ವೀ ಗಣೇಶೋ ಗಣನಾಯಕಃ ॥ 26 ॥
ಲಕ್ಷ್ಮಣೋ ಲಕ್ಷಣೋ ಲಕ್ಷ್ಯೋ ರಕ್ಷೋವಂಶವಿನಾಶಕಃ ।
ವಾಮನೋ ವಾಮನೀಭೂತೋ ವಮನೋ ವಮನಾರುಹಃ ॥ 27 ॥
ಯಶೋದಾನನ್ದನಃ ಕರ್ತಾ ಯಮಳಾರ್ಜುನಮುಕ್ತಿದಃ ।
ಉಲೂಖಲೀ ಮಹಾಮಾನೋ ದಾಮಬದ್ಧಾಹ್ವಯೀ ಶಮೀ ॥ 28 ॥
ಭಕ್ತಾನುಕಾರೀ ಭಗವಾನ್ ಕೇಶವೋಽಚಲಧಾರಕಃ ।
ಕೇಶಿಹಾ ಮಧುಹಾ ಮೋಹೀ ವೃಷಾಸುರವಿಘಾತಕಃ ॥ 29 ॥
ಅಘಾಸುರವಿಘಾತೀ ಚ ಪೂತನಾಮೋಕ್ಷದಾಯಕಃ ।
ಕುಬ್ಜಾವಿನೋದೀ ಭಗವಾನ್ ಕಂಸಮೃತ್ಯುರ್ಮಹಾಮುಖೀ ॥ 30 ॥
ಅಶ್ವಮೇಧೋ ವಾಜಪೇಯೋ ಗೋಮೇಧೋ ನರಮೇಧವಾನ್ ।
ಕನ್ದರ್ಪಕೋಟಿಲಾವಣ್ಯಶ್ಚನ್ದ್ರಕೋಟಿಸುಶೀತಲಃ ॥ 31 ॥
ರವಿಕೋಟಿಪ್ರತೀಕಾಶೋ ವಾಯುಕೋಟಿಮಹಾಬಲಃ ।
ಬ್ರಹ್ಮಾ ಬ್ರಹ್ಮಾಣ್ಡಕರ್ತಾ ಚ ಕಮಲಾವಾಞ್ಛಿತಪ್ರದಃ ॥ 32 ॥
ಕಮಲೀ ಕಮಲಾಕ್ಷಶ್ಚ ಕಮಲಾಮುಖಲೋಲುಪಃ ।
ಕಮಲಾವ್ರತಧಾರೀ ಚ ಕಮಲಾಭಃ ಪುರನ್ದರಃ ॥ 33 ॥
ಸೌಭಾಗ್ಯಾಧಿಕಚಿತ್ತಶ್ಚ ಮಹಾಮಾಯೀ ಮದೋತ್ಕಟಃ ।
ತಾಟಕಾರಿಃ ಸುರತ್ರಾತಾ ಮಾರೀಚಕ್ಷೋಭಕಾರಕಃ ॥ 34 ॥
ವಿಶ್ವಾಮಿತ್ರಪ್ರಿಯೋ ದಾನ್ತೋ ರಾಮೋ ರಾಜೀವಲೋಚನಃ ।
ಲಙ್ಕಾಧಿಪಕುಲಧ್ವಂಸೀ ವಿಭೀಷಣವರಪ್ರದಃ ॥ 35 ॥
ಸೀತಾನನ್ದಕರೋ ರಾಮೋ ವೀರೋ ವಾರಿಧಿಬನ್ಧನಃ ।
ಖರದೂಷಣಸಂಹಾರೀ ಸಾಕೇತಪುರವಾಸವಾನ್ ॥ 36 ॥
ಚನ್ದ್ರಾವಳಿಪತಿಃ ಕೂಲಃ ಕೇಶಿಕಂಸವಧೋಽಮರಃ ।
ಮಾಧವೋ ಮಧುಹಾ ಮಾಧ್ವೀ ಮಾಧ್ವೀಕೋ ಮಾಧವೀ ವಿಭುಃ ॥ 37 ॥
ಮುಞ್ಜಾಟವೀಗಾಹಮಾನೋ ಧೇನುಕಾರಿರ್ದಶಾತ್ಮಜಃ ।
ವಂಶೀವಟವಿಹಾರೀ ಚ ಗೋವರ್ಧನವನಾಶ್ರಯಃ ॥ 38 ॥
ತಥಾ ತಾಳವನೋದ್ದೇಶೀ ಭಾಣ್ಡೀರವನಶಙ್ಕರಃ ।
ತೃಣಾವರ್ತಕೃಪಾಕಾರೀ ವೃಷಭಾನುಸುತಾಪತಿಃ ॥ 39 ॥
ರಾಧಾಪ್ರಾಣಸಮೋ ರಾಧಾವದನಾಬ್ಜಮಧೂತ್ಕಟಃ ।
ಗೋಪೀರಞ್ಜನದೈವಜ್ಞಃ ಲೀಲಾಕಮಲಪೂಜಿತಃ ॥ 40 ॥
ಕ್ರೀಡಾಕಮಲಸನ್ದೋಹೋ ಗೋಪಿಕಾಪ್ರೀತಿರಞ್ಜನಃ ।
ರಞ್ಜಕೋ ರಞ್ಜನೋ ರಙ್ಗೋ ರಙ್ಗೀ ರಙ್ಗಮಹೀರುಹಃ ॥ 41 ॥
ಕಾಮಃ ಕಾಮಾರಿಭಕ್ತಶ್ಚ ಪುರಾಣಪುರುಷಃ ಕವಿಃ ।
ನಾರದೋ ದೇವಲೋ ಭೀಮೋ ಬಾಲೋ ಬಾಲಮುಖಾಮ್ಬುಜಃ ॥ 42 ॥
ಅಮ್ಬುಜೋ ಬ್ರಹ್ಮಸಾಕ್ಷೀ ಚ ಯೋಗೀ ದತ್ತವರೋ ಮುನಿಃ ।
ಋಷಭಃ ಪರ್ವತೋ ಗ್ರಾಮೋ ನದೀಪವನವಲ್ಲಭಃ ॥ 43 ॥
ಪದ್ಮನಾಭಃ ಸುರಜ್ಯೇಷ್ಠೋ ಬ್ರಹ್ಮಾ ರುದ್ರೋಽಹಿಭೂಷಿತಃ ।
ಗಣಾನಾಂ ತ್ರಾಣಕರ್ತಾ ಚ ಗಣೇಶೋ ಗ್ರಹಿಳೋ ಗ್ರಹಿಃ ॥ 44 ॥
ಗಣಾಶ್ರಯೋ ಗಣಾಧ್ಯಕ್ಷೋ ಕ್ರೋಡೀಕೃತಜಗತ್ತ್ರಯಃ ।
ಯಾದವೇನ್ದ್ರೋ ದ್ವಾರಕೇನ್ದ್ರೋ ಮಥುರಾವಲ್ಲಭೋ ಧುರೀ ॥ 45 ॥
ಭ್ರಮರಃ ಕುನ್ತಲೀ ಕುನ್ತೀಸುತರಕ್ಷೀ ಮಹಾಮನಾಃ ।
ಯಮುನಾವರದಾತಾ ಚ ಕಾಶ್ಯಪಸ್ಯ ವರಪ್ರದಃ ॥ 46 ॥
ಶಙ್ಖಚೂಡವಧೋದ್ದಾಮೋ ಗೋಪೀರಕ್ಷಣತತ್ಪರಃ ।
ಪಾಞ್ಚಜನ್ಯಕರೋ ರಾಮೀ ತ್ರಿರಾಮೀ ವನಜೋ ಜಯಃ ॥ 47 ॥
ಫಾಲ್ಗುಣಃ ಫಲ್ಗುನಸಖೋ ವಿರಾಧವಧಕಾರಕಃ ।
ರುಕ್ಮಿಣೀಪ್ರಾಣನಾಥಶ್ಚ ಸತ್ಯಭಾಮಾಪ್ರಿಯಙ್ಕರಃ ॥ 48 ॥
ಕಲ್ಪವೃಕ್ಷೋ ಮಹಾವೃಕ್ಷೋ ದಾನವೃಕ್ಷೋ ಮಹಾಫಲಃ ।
ಅಙ್ಕುಶೋ ಭೂಸುರೋ ಭಾವೋ ಭಾಮಕೋ ಭ್ರಾಮಕೋ ಹರಿಃ ॥ 49 ॥
ಸರಳಃ ಶಾಶ್ವತೋ ವೀರೋ ಯದುವಂಶಶಿವಾತ್ಮಕಃ ।
ಪ್ರದ್ಯುಮ್ನೋ ಬಲಕರ್ತಾ ಚ ಪ್ರಹರ್ತಾ ದೈತ್ಯಹಾ ಪ್ರಭುಃ ॥ 50 ॥
ಮಹಾಧನೋ ಮಹಾವೀರೋ ವನಮಾಲಾವಿಭೂಷಣಃ ।
ತುಲಸೀದಾಮಶೋಭಾಢ್ಯೋ ಜಾಲನ್ಧರವಿನಾಶನಃ ॥ 51 ॥
ಸೂರಃ ಸೂರ್ಯೋ ಮೃಕಣ್ಡುಶ್ಚ ಭಾಸ್ವರೋ ವಿಶ್ವಪೂಜಿತಃ ।
ರವಿಸ್ತಮೋಹಾ ವಹ್ನಿಶ್ಚ ಬಾಡಬೋ ಬಡಬಾನಲಃ ॥ 52 ॥
ದೈತ್ಯದರ್ಪವಿನಾಶೀ ಚ ಗರುಡೋ ಗರುಡಾಗ್ರಜಃ ।
ಗೋಪೀನಾಥೋ ಮಹೀನಾಥೋ ಬೃನ್ದಾನಾಥೋಽವರೋಧಕಃ ॥ 53 ॥
ಪ್ರಪಞ್ಚೀ ಪಞ್ಚರೂಪಶ್ಚ ಲತಾಗುಲ್ಮಶ್ಚ ಗೋಮತಿಃ ।
ಗಙ್ಗಾ ಚ ಯಮುನಾರೂಪೋ ಗೋದಾ ವೇತ್ರವತೀ ತಥಾ ॥ 54 ॥
ಕಾವೇರೀ ನರ್ಮದಾ ತಾಪೀ ಗಣ್ಡಕೀ ಸರಯೂ ರಜಃ ।
ರಾಜಸಸ್ತಾಮಸಸ್ಸತ್ತ್ವೀ ಸರ್ವಾಙ್ಗೀ ಸರ್ವಲೋಚನಃ ॥ 55 ॥
ಸುಧಾಮಯೋಽಮೃತಮಯೋ ಯೋಗಿನಾಂ ವಲ್ಲಭಃ ಶಿವಃ ।
ಬುದ್ಧೋ ಬುದ್ಧಿಮತಾಂ ಶ್ರೇಷ್ಠೋ ವಿಷ್ಣುರ್ಜಿಷ್ಣುಃ ಶಚೀಪತಿಃ ॥ 56 ॥
ವಂಶೀ ವಂಶಧರೋ ಲೋಕೋ ವಿಲೋಕೋ ಮೋಹನಾಶನಃ ।
ರವರಾವೋ ರವೋ ರಾವೋ ವಲೋ ವಾಲೋ ವಲಾಹಕಃ ॥ 57 ॥
ಶಿವೋ ರುದ್ರೋ ನಲೋ ನೀಲೋ ಲಾಙ್ಗಲೀ ಲಾಙ್ಗಲಾಶ್ರಯಃ ।
ಪಾರದಃ ಪಾವನೋ ಹಂಸೋ ಹಂಸಾರೂಢೋ ಜಗತ್ಪತಿಃ ॥ 58 ॥
ಮೋಹಿನೀಮೋಹನೋ ಮಾಯೀ ಮಹಾಮಾಯೋ ಮಹಾಸುಖೀ ।
ವೃಷೋ ವೃಷಾಕಪಿಃ ಕಾಲಃ ಕಾಲೀದಮನಕಾರಕಃ ॥ 59 ॥
ಕುಬ್ಜಾಭಾಗ್ಯಪ್ರದೋ ವೀರೋ ರಜಕಕ್ಷಯಕಾರಕಃ ।
ಕೋಮಲೋ ವಾರುಣೀ ರಾಜಾ ಜಲಜೋ ಜಲಧಾರಕಃ ॥ 60 ॥
ಹಾರಕಃ ಸರ್ವಪಾಪಘ್ನಃ ಪರಮೇಷ್ಠೀ ಪಿತಾಮಹಃ ।
ಖಡ್ಗಧಾರೀ ಕೃಪಾಕಾರೀ ರಾಧಾರಮಣಸುನ್ದರಃ ॥ 61 ॥
ದ್ವಾದಶಾರಣ್ಯಸಮ್ಭೋಗೀ ಶೇಷನಾಗಫಣಾಲಯಃ ।
ಕಾಮಃ ಶ್ಯಾಮಃ ಸುಖಶ್ರೀದಃ ಶ್ರೀಪತಿಃ ಶ್ರೀನಿಧಿಃ ಕೃತಿಃ ॥ 62 ॥
ಹರಿರ್ಹರೋ ನರೋ ನಾರೋ ನರೋತ್ತಮ ಇಷುಪ್ರಿಯಃ ।
ಗೋಪಾಲಚಿತ್ತಹರ್ತಾ ಚ ಕರ್ತಾ ಸಂಸಾರತಾರಕಃ ॥ 63 ॥
ಆದಿದೇವೋ ಮಹಾದೇವೋ ಗೌರೀಗುರುರನಾಶ್ರಯಃ ।
ಸಾಧುರ್ಮಧುರ್ವಿಧುರ್ಧಾತಾ ತ್ರಾತಾಽಕ್ರೂರಪರಾಯಣಃ ॥ 64 ॥
ರೋಲಮ್ಬೀ ಚ ಹಯಗ್ರೀವೋ ವಾನರಾರಿರ್ವನಾಶ್ರಯಃ ।
ವನಂ ವನೀ ವನಾಧ್ಯಕ್ಷೋ ಮಹಾವನ್ದ್ಯೋ ಮಹಾಮುನಿಃ ॥ 65 ॥
ಸ್ಯಮನ್ತಕಮಣಿಪ್ರಾಜ್ಞಃ ವಿಜ್ಞೋ ವಿಘ್ನವಿಘಾತಕಃ ।
ಗೋವರ್ಧನೋ ವರ್ಧನೀಯೋ ವರ್ಧನೀ ವರ್ಧನಪ್ರಿಯಃ ॥ 66 ॥
ವಾರ್ಧನ್ಯೋ ವರ್ಧನೋ ವರ್ಧೀ ವರ್ಧಿಷ್ಣಸ್ತು ಸುಖಪ್ರಿಯಃ ।
ವರ್ಧಿತೋ ವರ್ಧಕೋ ವೃದ್ಧೋ ಬೃನ್ದಾರಕಜನಪ್ರಿಯಃ ॥ 67 ॥
ಗೋಪಾಲರಮಣೀಭರ್ತಾ ಸಾಮ್ಬಕುಷ್ಠವಿನಾಶನಃ ।
ರುಕ್ಮಿಣೀಹರಣಪ್ರೇಮಾ ಪ್ರೇಮೀ ಚನ್ದ್ರಾವಲೀಪತಿಃ ॥ 68 ॥
ಶ್ರೀಕರ್ತಾ ವಿಶ್ವಭರ್ತಾ ಚ ನಾರಾಯಣ ನರೋ ಬಲೀ ।
ಗಣೋ ಗಣಪತಿಶ್ಚೈವ ದತ್ತಾತ್ರೇಯೋ ಮಹಾಮುನಿಃ ॥ 69 ॥
ವ್ಯಾಸೋ ನಾರಾಯಣೋ ದಿವ್ಯೋ ಭವ್ಯೋ ಭಾವುಕಧಾರಕಃ ।
ಶ್ವಃಶ್ರೇಯಸಂ ಶಿವಂ ಭದ್ರಂ ಭಾವುಕಂ ಭವುಕಂ ಶುಭಮ್ ॥ 70 ॥
ಶುಭಾತ್ಮಕಃ ಶುಭಃ ಶಾಸ್ತಾ ಪ್ರಶಸ್ತೋ ಮೇಘನಾದಹಾ ।
ಬ್ರಹ್ಮಣ್ಯದೇವೋ ದೀನಾನಾಮುದ್ಧಾರಕರಣಕ್ಷಮಃ ॥ 71 ॥
ಕೃಷ್ಣಃ ಕಮಲಪತ್ರಾಕ್ಷಃ ಕೃಷ್ಣಃ ಕಮಲಲೋಚನಃ ।
ಕೃಷ್ಣಃ ಕಾಮೀ ಸದಾ ಕೃಷ್ಣಃ ಸಮಸ್ತಪ್ರಿಯಕಾರಕಃ ॥ 72 ॥
ನನ್ದೋ ನನ್ದೀ ಮಹಾನನ್ದೀ ಮಾದೀ ಮಾದನಕಃ ಕಿಲೀ ।
ಮೀಲೀ ಹಿಲೀ ಗಿಲೀ ಗೋಲೀ ಗೋಲೋ ಗೋಲಾಲಯೋ ಗುಲೀ ॥ 73 ॥
ಗುಗ್ಗುಲೀ ಮಾರಕೀ ಶಾಖೀ ವಟಃ ಪಿಪ್ಪಲಕಃ ಕೃತೀ ।
ಮ್ಲೇಚ್ಛಹಾ ಕಾಲಹರ್ತಾ ಚ ಯಶೋದಾ ಯಶ ಏವ ಚ ॥ 74 ॥
ಅಚ್ಯುತಃ ಕೇಶವೋ ವಿಷ್ಣುಃ ಹರಿಃ ಸತ್ಯೋ ಜನಾರ್ದನಃ ।
ಹಂಸೋ ನಾರಾಯಣೋ ನೀಲೋ ಲೀನೋ ಭಕ್ತಿಪರಾಯಣಃ ॥ 75 ॥
ಜಾನಕೀವಲ್ಲಭೋ ರಾಮೋ ವಿರಾಮೋ ವಿಷನಾಶನಃ ।
ಸಿಂಹಭಾನುರ್ಮಹಾಭಾನು-ರ್ವೀರಭಾನುರ್ಮಹೋದಧಿಃ ॥ 76 ॥
ಸಮುದ್ರೋಽಬ್ಧಿರಕೂಪಾರಃ ಪಾರಾವಾರಃ ಸರಿತ್ಪತಿಃ ।
ಗೋಕುಲಾನನ್ದಕಾರೀ ಚ ಪ್ರತಿಜ್ಞಾಪರಿಪಾಲಕಃ ॥ 77 ॥
ಸದಾರಾಮಃ ಕೃಪಾರಾಮೋ ಮಹಾರಾಮೋ ಧನುರ್ಧರಃ ।
ಪರ್ವತಃ ಪರ್ವತಾಕಾರೋ ಗಯೋ ಗೇಯೋ ದ್ವಿಜಪ್ರಿಯಃ ॥ 78 ॥
ಕಮಲಾಶ್ವತರೋ ರಾಮೋ ರಾಮಾಯಣಪ್ರವರ್ತಕಃ ।
ದ್ಯೌರ್ದಿವೋ ದಿವಸೋ ದಿವ್ಯೋ ಭವ್ಯೋ ಭಾಗೀ ಭಯಾಪಹಃ ॥ 79 ॥
ಪಾರ್ವತೀಭಾಗ್ಯಸಹಿತೋ ಭರ್ತಾ ಲಕ್ಷ್ಮೀಸಹಾಯವಾನ್ । [ವಿಲಾಸವಾನ್]
ವಿಲಾಸೀ ಸಾಹಸೀ ಸರ್ವೀ ಗರ್ವೀ ಗರ್ವಿತಲೋಚನಃ ॥ 80 ॥
ಸುರಾರಿರ್ಲೋಕಧರ್ಮಜ್ಞೋ ಜೀವನೋ ಜೀವನಾನ್ತಕಃ ।
ಯಮೋ ಯಮಾರಿರ್ಯಮನೋ ಯಮೀ ಯಾಮವಿಘಾತಕಃ ॥ 81 ॥
ವಂಶುಲೀ ಪಾಂಶುಲೀ ಪಾಂಸುಃ ಪಾಣ್ಡುರರ್ಜುನವಲ್ಲಭಃ ।
ಲಲಿತಾ ಚನ್ದ್ರಿಕಾಮಾಲಾ ಮಾಲೀ ಮಾಲಾಮ್ಬುಜಾಶ್ರಯಃ ॥ 82 ॥
ಅಮ್ಬುಜಾಕ್ಷೋ ಮಹಾಯಕ್ಷೋ ದಕ್ಷಶ್ಚಿನ್ತಾಮಣಿಪ್ರಭುಃ ।
ಮಣಿರ್ದಿನಮಣಿಶ್ಚೈವ ಕೇದಾರೋ ಬದರೀಶ್ರಯಃ ॥ 83 ॥
ಬದರೀವನಸಮ್ಪ್ರೀತೋ ವ್ಯಾಸಃ ಸತ್ಯವತೀಸುತಃ ।
ಅಮರಾರಿನಿಹನ್ತಾ ಚ ಸುಧಾಸಿನ್ಧುವಿಧೂದಯಃ ॥ 84 ॥
ಚನ್ದ್ರೋ ರವಿಃ ಶಿವಃ ಶೂಲೀ ಚಕ್ರೀ ಚೈವ ಗದಾಧರಃ ।
ಶ್ರೀಕರ್ತಾ ಶ್ರೀಪತಿಃ ಶ್ರೀದಃ ಶ್ರೀದೇವೋ ದೇವಕೀಸುತಃ ॥ 85 ॥
ಶ್ರೀಪತಿಃ ಪುಣ್ಡರೀಕಾಕ್ಷಃ ಪದ್ಮನಾಭೋ ಜಗತ್ಪತಿಃ ।
ವಾಸುದೇವೋಽಪ್ರಮೇಯಾತ್ಮಾ ಕೇಶವೋ ಗರುಡಧ್ವಜಃ ॥ 86 ॥
ನಾರಾಯಣಃ ಪರಂ ಧಾಮ ದೇವದೇವೋ ಮಹೇಶ್ವರಃ ।
ಚಕ್ರಪಾಣಿಃ ಕಳಾಪೂರ್ಣೋ ವೇದವೇದ್ಯೋ ದಯಾನಿಧಿಃ ॥ 87 ॥
ಭಗವಾನ್ ಸರ್ವಭೂತೇಶೋ ಗೋಪಾಲಃ ಸರ್ವಪಾಲಕಃ ।
ಅನನ್ತೋ ನಿರ್ಗುಣೋ ನಿತ್ಯೋ ನಿರ್ವಿಕಲ್ಪೋ ನಿರಞ್ಜನಃ ॥ 88 ॥
ನಿರಾಧಾರೋ ನಿರಾಕಾರೋ ನಿರಾಭಾಸೋ ನಿರಾಶ್ರಯಃ ।
ಪುರುಷಃ ಪ್ರಣವಾತೀತೋ ಮುಕುನ್ದಃ ಪರಮೇಶ್ವರಃ ॥ 89 ॥
ಕ್ಷಣಾವನಿಃ ಸಾರ್ವಭೌಮೋ ವೈಕುಣ್ಠೋ ಭಕ್ತವತ್ಸಲಃ ।
ವಿಷ್ಣುರ್ದಾಮೋದರಃ ಕೃಷ್ಣೋ ಮಾಧವೋ ಮಥುರಾಪತಿಃ ॥ 90 ॥
ದೇವಕೀಗರ್ಭಸಮ್ಭೂತೋ ಯಶೋದಾವತ್ಸಲೋ ಹರಿಃ ।
ಶಿವಃ ಸಙ್ಕರ್ಷಣಃ ಶಮ್ಭುರ್ಭೂತನಾಥೋ ದಿವಸ್ಪತಿಃ ॥ 91 ॥
ಅವ್ಯಯಃ ಸರ್ವಧರ್ಮಜ್ಞೋ ನಿರ್ಮಲೋ ನಿರುಪದ್ರವಃ ।
ನಿರ್ವಾಣನಾಯಕೋ ನಿತ್ಯೋ ನೀಲಜೀಮೂತಸನ್ನಿಭಃ ॥ 92 ॥
ಕಲಾಕ್ಷಯಶ್ಚ ಸರ್ವಜ್ಞಃ ಕಮಲಾರೂಪತತ್ಪರಃ ।
ಹೃಷೀಕೇಶಃ ಪೀತವಾಸಾ ವಸುದೇವಪ್ರಿಯಾತ್ಮಜಃ ॥ 93 ॥
ನನ್ದಗೋಪಕುಮಾರಾರ್ಯೋ ನವನೀತಾಶನೋ ವಿಭುಃ ।
ಪುರಾಣಃ ಪುರುಷಶ್ರೇಷ್ಠಃ ಶಙ್ಖಪಾಣಿಃ ಸುವಿಕ್ರಮಃ ॥ 94 ॥
ಅನಿರುದ್ಧಶ್ಚಕ್ರಧರಃ ಶಾರ್ಙ್ಗಪಾಣಿಶ್ಚತುರ್ಭುಜಃ ।
ಗದಾಧರಃ ಸುರಾರ್ತಿಘ್ನೋ ಗೋವಿನ್ದೋ ನನ್ದಕಾಯುಧಃ ॥ 95 ॥
ಬೃನ್ದಾವನಚರಃ ಶೌರಿರ್ವೇಣುವಾದ್ಯವಿಶಾರದಃ ।
ತೃಣಾವರ್ತಾನ್ತಕೋ ಭೀಮಸಾಹಸೋ ಬಹುವಿಕ್ರಮಃ ॥ 96 ॥
ಶಕಟಾಸುರಸಂಹಾರೀ ಬಕಾಸುರವಿನಾಶನಃ ।
ಧೇನುಕಾಸುರಸಂಹಾರೀ ಪೂತನಾರಿರ್ನೃಕೇಸರೀ ॥ 97 ॥
ಪಿತಾಮಹೋ ಗುರುಸ್ಸಾಕ್ಷೀ ಪ್ರತ್ಯಗಾತ್ಮಾ ಸದಾಶಿವಃ ।
ಅಪ್ರಮೇಯಃ ಪ್ರಭುಃ ಪ್ರಾಜ್ಞೋಽಪ್ರತರ್ಕ್ಯಃ ಸ್ವಪ್ನವರ್ಧನಃ ॥ 98 ॥
ಧನ್ಯೋ ಮಾನ್ಯೋ ಭವೋ ಭಾವೋ ಧೀರಃ ಶಾನ್ತೋ ಜಗದ್ಗುರುಃ ।
ಅನ್ತರ್ಯಾಮೀಶ್ವರೋ ದಿವ್ಯೋ ದೈವಜ್ಞೋ ದೇವಸಂಸ್ತುತಃ ॥ 99 ॥
ಕ್ಷೀರಾಬ್ಧಿಶಯನೋ ಧಾತಾ ಲಕ್ಷ್ಮೀವಾನ್ ಲಕ್ಷ್ಮಣಾಗ್ರಜಃ ।
ಧಾತ್ರೀಪತಿರಮೇಯಾತ್ಮಾ ಚನ್ದ್ರಶೇಖರಪೂಜಿತಃ ॥ 100 ॥
ಲೋಕಸಾಕ್ಷೀ ಜಗಚ್ಚಕ್ಷುಃ ಪುಣ್ಯಚಾರಿತ್ರಕೀರ್ತನಃ ।
ಕೋಟಿಮನ್ಮಥಸೌನ್ದರ್ಯೋ ಜಗನ್ಮೋಹನವಿಗ್ರಹಃ ॥ 101 ॥
ಮನ್ದಸ್ಮಿತತನುರ್ಗೋಪಗೋಪಿಕಾಪರಿವೇಷ್ಟಿತಃ ।
ಫುಲ್ಲಾರವಿನ್ದನಯನಶ್ಚಾಣೂರಾನ್ಧ್ರನಿಷೂದನಃ ॥ 102 ॥
ಇನ್ದೀವರದಳಶ್ಯಾಮೋ ಬರ್ಹಿಬರ್ಹಾವತಂಸಕಃ ।
ಮುರಳೀನಿನದಾಹ್ಲಾದೋ ದಿವ್ಯಮಾಲಾಮ್ಬರಾವೃತಃ ॥ 103 ॥
ಸುಕಪೋಲಯುಗಃ ಸುಭ್ರೂಯುಗಳಃ ಸುಲಲಾಟಕಮ್ ।
ಕಮ್ಬುಗ್ರೀವೋ ವಿಶಾಲಾಕ್ಷೋ ಲಕ್ಷ್ಮೀವಾಞ್ಛುಭಲಕ್ಷಣಃ ॥ 104 ॥
ಪೀನವಕ್ಷಾಶ್ಚತುರ್ಬಾಹುಶ್ಚತುರ್ಮೂರ್ತಿಸ್ತ್ರಿವಿಕ್ರಮಃ ।
ಕಳಙ್ಕರಹಿತಃ ಶುದ್ಧೋ ದುಷ್ಟಶತ್ರುನಿಬರ್ಹಣಃ ॥ 105 ॥
ಕಿರೀಟಕುಣ್ಡಲಧರಃ ಕಟಕಾಙ್ಗದಮಣ್ಡಿತಃ ।
ಮುದ್ರಿಕಾಭರಣೋಪೇತಃ ಕಟಿಸೂತ್ರವಿರಾಜಿತಃ ॥ 106 ॥
ಮಞ್ಜೀರರಞ್ಜಿತಪದಃ ಸರ್ವಾಭರಣಭೂಷಿತಃ ।
ವಿನ್ಯಸ್ತಪಾದಯುಗಳೋ ದಿವ್ಯಮಙ್ಗಳವಿಗ್ರಹಃ ॥ 107 ॥
ಗೋಪಿಕಾನಯನಾನನ್ದಃ ಪೂರ್ಣಚನ್ದ್ರನಿಭಾನನಃ ।
ಸಮಸ್ತಜಗದಾನನ್ದಃ ಸುನ್ದರೋ ಲೋಕನನ್ದನಃ ॥ 108 ॥
ಯಮುನಾತೀರಸಞ್ಚಾರೀ ರಾಧಾಮನ್ಮಥವೈಭವಃ ।
ಗೋಪನಾರೀಪ್ರಿಯೋ ದಾನ್ತೋ ಗೋಪೀವಸ್ತ್ರಾಪಹಾರಕಃ ॥ 109 ॥
ಶೃಙ್ಗಾರಮೂರ್ತಿಃ ಶ್ರೀಧಾಮಾ ತಾರಕೋ ಮೂಲಕಾರಣಮ್ ।
ಸೃಷ್ಟಿಸಂರಕ್ಷಣೋಪಾಯಃ ಕ್ರೂರಾಸುರವಿಭಞ್ಜನಃ ॥ 110 ॥
ನರಕಾಸುರಸಂಹಾರೀ ಮುರಾರಿರ್ವೈರಿಮರ್ದನಃ ।
ಆದಿತೇಯಪ್ರಿಯೋ ದೈತ್ಯಭೀಕರೋ ಯದುಶೇಖರಃ ॥ 111 ॥
ಜರಾಸನ್ಧಕುಲಧ್ವಂಸೀ ಕಂಸಾರಾತಿಃ ಸುವಿಕ್ರಮಃ ।
ಪುಣ್ಯಶ್ಲೋಕಃ ಕೀರ್ತನೀಯೋ ಯಾದವೇನ್ದ್ರೋ ಜಗನ್ನುತಃ ॥ 112 ॥
ರುಕ್ಮಿಣೀರಮಣಃ ಸತ್ಯಭಾಮಾಜಾಮ್ಬವತೀಪ್ರಿಯಃ ।
ಮಿತ್ರವಿನ್ದಾನಾಗ್ನಜಿತೀಲಕ್ಷ್ಮಣಾಸಮುಪಾಸಿತಃ ॥ 113 ॥
ಸುಧಾಕರಕುಲೇ ಜಾತೋಽನನ್ತಃ ಪ್ರಬಲವಿಕ್ರಮಃ ।
ಸರ್ವಸೌಭಾಗ್ಯಸಮ್ಪನ್ನೋ ದ್ವಾರಕಾಪಟ್ಟಣಸ್ಥಿತಃ ॥ 114 ॥
ಭದ್ರಾಸೂರ್ಯಸುತಾನಾಥೋ ಲೀಲಾಮಾನುಷವಿಗ್ರಹಃ ।
ಸಹಸ್ರಷೋಡಶಸ್ತ್ರೀಶೋ ಭೋಗಮೋಕ್ಷೈಕದಾಯಕಃ ॥ 115 ॥
ವೇದಾನ್ತವೇದ್ಯಃ ಸಂವೇದ್ಯೋ ವೈದ್ಯೋ ಬ್ರಹ್ಮಾಣ್ಡನಾಯಕಃ ।
ಗೋವರ್ಧನಧರೋ ನಾಥಃ ಸರ್ವಜೀವದಯಾಪರಃ ॥ 116 ॥
ಮೂರ್ತಿಮಾನ್ ಸರ್ವಭೂತಾತ್ಮಾ ಆರ್ತತ್ರಾಣಪರಾಯಣಃ ।
ಸರ್ವಜ್ಞಃ ಸರ್ವಸುಲಭಃ ಸರ್ವಶಾಸ್ತ್ರವಿಶಾರದಃ ॥ 117 ॥
ಷಡ್ಗುಣೈಶ್ವರ್ಯಸಮ್ಪನ್ನಃ ಪೂರ್ಣಕಾಮೋ ಧುರನ್ಧರಃ ।
ಮಹಾನುಭಾವಃ ಕೈವಲ್ಯದಾಯಕೋ ಲೋಕನಾಯಕಃ ॥ 118 ॥
ಆದಿಮಧ್ಯಾನ್ತರಹಿತಃ ಶುದ್ಧಸಾತ್ತ್ವಿಕವಿಗ್ರಹಃ ।
ಅಸಮಾನಃ ಸಮಸ್ತಾತ್ಮಾ ಶರಣಾಗತವತ್ಸಲಃ ॥ 119 ॥
ಉತ್ಪತ್ತಿಸ್ಥಿತಿಸಂಹಾರಕಾರಣಂ ಸರ್ವಕಾರಣಮ್ ।
ಗಮ್ಭೀರಃ ಸರ್ವಭಾವಜ್ಞಃ ಸಚ್ಚಿದಾನನ್ದವಿಗ್ರಹಃ ॥ 120 ॥
ವಿಷ್ವಕ್ಸೇನಃ ಸತ್ಯಸನ್ಧಃ ಸತ್ಯವಾಕ್ ಸತ್ಯವಿಕ್ರಮಃ ।
ಸತ್ಯವ್ರತಃ ಸತ್ಯರತಃ ಸತ್ಯಧರ್ಮಪರಾಯಣಃ ॥ 121 ॥
ಆಪನ್ನಾರ್ತಿಪ್ರಶಮನಃ ದ್ರೌಪದೀಮಾನರಕ್ಷಕಃ ।
ಕನ್ದರ್ಪಜನಕಃ ಪ್ರಾಜ್ಞೋ ಜಗನ್ನಾಟಕವೈಭವಃ ॥ 122 ॥
ಭಕ್ತಿವಶ್ಯೋ ಗುಣಾತೀತಃ ಸರ್ವೈಶ್ವರ್ಯಪ್ರದಾಯಕಃ ।
ದಮಘೋಷಸುತದ್ವೇಷೀ ಬಾಣಬಾಹುವಿಖಣ್ಡನಃ ॥ 123 ॥
ಭೀಷ್ಮಭಕ್ತಿಪ್ರದೋ ದಿವ್ಯಃ ಕೌರವಾನ್ವಯನಾಶನಃ ।
ಕೌನ್ತೇಯಪ್ರಿಯಬನ್ಧುಶ್ಚ ಪಾರ್ಥಸ್ಯನ್ದನಸಾರಥಿಃ ॥ 124 ॥
ನಾರಸಿಂಹೋ ಮಹಾವೀರಃ ಸ್ತಮ್ಭಜಾತೋ ಮಹಾಬಲಃ ।
ಪ್ರಹ್ಲಾದವರದಃ ಸತ್ಯೋ ದೇವಪೂಜ್ಯೋಽಭಯಙ್ಕರಃ ॥ 125 ॥
ಉಪೇನ್ದ್ರ ಇನ್ದ್ರಾವರಜೋ ವಾಮನೋ ಬಲಿಬನ್ಧನಃ ।
ಗಜೇನ್ದ್ರವರದಃ ಸ್ವಾಮೀ ಸರ್ವದೇವನಮಸ್ಕೃತಃ ॥ 126 ॥
ಶೇಷಪರ್ಯಙ್ಕಶಯನೋ ವೈನತೇಯರಥೋ ಜಯೀ ।
ಅವ್ಯಾಹತಬಲೈಶ್ವರ್ಯಸಮ್ಪನ್ನಃ ಪೂರ್ಣಮಾನಸಃ ॥ 127 ॥
ಯೋಗೀಶ್ವರೇಶ್ವರಃ ಸಾಕ್ಷೀ ಕ್ಷೇತ್ರಜ್ಞೋ ಜ್ಞಾನದಾಯಕಃ ।
ಯೋಗಿಹೃತ್ಪಙ್ಕಜಾವಾಸೋ ಯೋಗಮಾಯಾಸಮನ್ವಿತಃ ॥ 128 ॥
ನಾದಬಿನ್ದುಕಳಾತೀತಶ್ಚತುರ್ವರ್ಗಫಲಪ್ರದಃ ।
ಸುಷುಮ್ನಾಮಾರ್ಗಸಞ್ಚಾರೀ ದೇಹಸ್ಯಾನ್ತರಸಂಸ್ಥಿತಃ ॥ 129 ॥
ದೇಹೇನ್ದ್ರಿಯಮನಃಪ್ರಾಣಸಾಕ್ಷೀ ಚೇತಃಪ್ರಸಾದಕಃ ।
ಸೂಕ್ಷ್ಮಃ ಸರ್ವಗತೋ ದೇಹೀ ಜ್ಞಾನದರ್ಪಣಗೋಚರಃ ॥ 130 ॥
ತತ್ತ್ವತ್ರಯಾತ್ಮಕೋಽವ್ಯಕ್ತಃ ಕುಣ್ಡಲೀ ಸಮುಪಾಶ್ರಿತಃ ।
ಬ್ರಹ್ಮಣ್ಯಃ ಸರ್ವಧರ್ಮಜ್ಞಃ ಶಾನ್ತೋ ದಾನ್ತೋ ಗತಕ್ಲಮಃ ॥ 131 ॥
ಶ್ರೀನಿವಾಸಃ ಸದಾನನ್ದೋ ವಿಶ್ವಮೂರ್ತಿರ್ಮಹಾಪ್ರಭುಃ ।
ಸಹಸ್ರಶೀರ್ಷಾ ಪುರುಷಃ ಸಹಸ್ರಾಕ್ಷಃ ಸಹಸ್ರಪಾತ್ ॥ 132 ॥
ಸಮಸ್ತಭುವನಾಧಾರಃ ಸಮಸ್ತಪ್ರಾಣರಕ್ಷಕಃ ।
ಸಮಸ್ತಸ್ಸರ್ವಭಾವಜ್ಞೋ ಗೋಪಿಕಾಪ್ರಾಣವಲ್ಲಭಃ ॥ 133 ॥
ನಿತ್ಯೋತ್ಸವೋ ನಿತ್ಯಸೌಖ್ಯೋ ನಿತ್ಯಶ್ರೀರ್ನಿತ್ಯಮಙ್ಗಳಮ್ ।
ವ್ಯೂಹಾರ್ಚಿತೋ ಜಗನ್ನಾಥಃ ಶ್ರೀವೈಕುಣ್ಠಪುರಾಧಿಪಃ ॥ 134 ॥
ಪೂರ್ಣಾನನ್ದಘನೀಭೂತೋ ಗೋಪವೇಷಧರೋ ಹರಿಃ ।
ಕಲಾಪಕುಸುಮಶ್ಯಾಮಃ ಕೋಮಲಃ ಶಾನ್ತವಿಗ್ರಹಃ ॥ 135 ॥
ಗೋಪಾಙ್ಗನಾವೃತೋಽನನ್ತೋ ಬೃನ್ದಾವನಸಮಾಶ್ರಯಃ ।
ವೇಣುನಾದರತಃ ಶ್ರೇಷ್ಠೋ ದೇವಾನಾಂ ಹಿತಕಾರಕಃ ॥ 136 ॥
ಜಲಕ್ರೀಡಾಸಮಾಸಕ್ತೋ ನವನೀತಸ್ಯ ತಸ್ಕರಃ ।
ಗೋಪಾಲಕಾಮಿನೀಜಾರಶ್ಚೋರಜಾರಶಿಖಾಮಣಿಃ ॥ 137 ॥
ಪರಞ್ಜ್ಯೋತಿಃ ಪರಾಕಾಶಃ ಪರಾವಾಸಃ ಪರಿಸ್ಫುಟಃ ।
ಅಷ್ಟಾದಶಾಕ್ಷರೋ ಮನ್ತ್ರೋ ವ್ಯಾಪಕೋ ಲೋಕಪಾವನಃ ॥ 138 ॥
ಸಪ್ತಕೋಟಿಮಹಾಮನ್ತ್ರಶೇಖರೋ ದೇವಶೇಖರಃ ।
ವಿಜ್ಞಾನಜ್ಞಾನಸನ್ಧಾನಸ್ತೇಜೋರಾಶಿರ್ಜಗತ್ಪತಿಃ ॥ 139 ॥
ಭಕ್ತಲೋಕಪ್ರಸನ್ನಾತ್ಮಾ ಭಕ್ತಮನ್ದಾರವಿಗ್ರಹಃ ।
ಭಕ್ತದಾರಿದ್ರ್ಯಶಮನೋ ಭಕ್ತಾನಾಂ ಪ್ರೀತಿದಾಯಕಃ ॥ 140 ॥
ಭಕ್ತಾಧೀನಮನಾಃ ಪೂಜ್ಯೋ ಭಕ್ತಲೋಕಶಿವಙ್ಕರಃ ।
ಭಕ್ತಾಭೀಷ್ಟಪ್ರದಃ ಸರ್ವಭಕ್ತಾಘೌಘನಿಕೃನ್ತಕಃ ॥ 141 ॥
ಅಪಾರಕರುಣಾಸಿನ್ಧುರ್ಭಗವಾನ್ ಭಕ್ತತತ್ಪರಃ ॥ 142 ॥
[ಇತಿ ಶ್ರೀರಾಧಿಕಾನಾಥ ನಾಮ್ನಾಂ ಸಾಹಸ್ರಮೀರಿತಮ್ । ]
ಸ್ಮರಣಾತ್ಪಾಪರಾಶೀನಾಂ ಖಣ್ಡನಂ ಮೃತ್ಯುನಾಶನಮ್ ॥ 1 ॥
ವೈಷ್ಣವಾನಾಂ ಪ್ರಿಯಕರಂ ಮಹಾದಾರಿದ್ರ್ಯನಾಶನಮ್ ।
ಬ್ರಹ್ಮಹತ್ಯಾಸುರಾಪಾನಂ ಪರಸ್ತ್ರೀಗಮನಂ ತಥಾ ॥ 2 ॥
ಪರದ್ರವ್ಯಾಪಹರಣಂ ಪರದ್ವೇಷಸಮನ್ವಿತಮ್ ।
ಮಾನಸಂ ವಾಚಿಕಂ ಕಾಯಂ ಯತ್ಪಾಪಂ ಪಾಪಸಮ್ಭವಮ್ ॥ 3 ॥
ಸಹಸ್ರನಾಮಪಠನಾತ್ಸರ್ವೇ ನಶ್ಯನ್ತಿ ತತ್ಕ್ಷಣಾತ್ ।
ಮಹಾದಾರಿದ್ರ್ಯಯುಕ್ತೋ ವೈ ವೈಷ್ಣವೋ ವಿಷ್ಣುಭಕ್ತಿಮಾನ್ ॥ 4 ॥
ಕಾರ್ತಿಕ್ಯಾಂ ಯಃ ಪಠೇದ್ರಾತ್ರೌ ಶತಮಷ್ಟೋತ್ತರಂ ಕ್ರಮಾತ್ ।
ಪೀತಾಮ್ಬರಧರೋ ಧೀಮಾನ್ ಸುಗನ್ಧೀ ಪುಷ್ಪಚನ್ದನೈಃ ॥ 5 ॥
ಪುಸ್ತಕಂ ಪೂಜಯಿತ್ವಾ ಚ ನೈವೇದ್ಯಾದಿಭಿರೇವ ಚ ।
ರಾಧಾಧ್ಯಾನಾಙ್ಕಿತೋ ಧೀರೋ ವನಮಾಲಾವಿಭೂಷಿತಃ ॥ 6 ॥
ಶತಮಷ್ಟೋತ್ತರಂ ದೇವಿ ಪಠೇನ್ನಾಮಸಹಸ್ರಕಮ್ ।
ಚೈತ್ರೇ ಕೃಷ್ಣೇ ಚ ಶುಕ್ಲೇ ಚ ಕುಹೂಸಙ್ಕ್ರಾನ್ತಿವಾಸರೇ ॥ 7 ॥
ಪಠಿತವ್ಯಂ ಪ್ರಯತ್ನೇನ ತ್ರೈಲೋಕ್ಯಂ ಮೋಹಯೇತ್ ಕ್ಷಣಾತ್ ।
ತುಲಸೀಮಾಲಯಾ ಯುಕ್ತೋ ವೈಷ್ಣವೋ ಭಕ್ತಿತತ್ಪರಃ ॥ 8 ॥
ರವಿವಾರೇ ಚ ಶುಕ್ರೇ ಚ ದ್ವಾದಶ್ಯಾಂ ಶ್ರಾದ್ಧವಾಸರೇ ।
ಬ್ರಾಹ್ಮಣಂ ಪೂಜಯಿತ್ವಾ ಚ ಭೋಜಯಿತ್ವಾ ವಿಧಾನತಃ ॥ 9 ॥
ಪಠೇನ್ನಾಮಸಹಸ್ರಂ ಚ ತತಃ ಸಿದ್ಧಿಃ ಪ್ರಜಾಯತೇ ।
ಮಹಾನಿಶಾಯಾಂ ಸತತಂ ವೈಷ್ಣವೋ ಯಃ ಪಠೇತ್ಸದಾ ॥ 10 ॥
ದೇಶಾನ್ತರಗತಾ ಲಕ್ಷ್ಮೀಃ ಸಮಾಯಾತಿ ನ ಸಂಶಯಃ ।
ತ್ರೈಲೋಕ್ಯೇ ತು ಮಹಾದೇವಿ ಸುನ್ದರ್ಯಃ ಕಾಮಮೋಹಿತಾಃ ॥ 11 ॥
ಮುಗ್ಧಾಃ ಸ್ವಯಂ ಸಮಾಯಾನ್ತಿ ವೈಷ್ಣವಂ ಚ ಭಜನ್ತಿ ತಾಃ ।
ರೋಗೀ ರೋಗಾತ್ಪ್ರಮುಚ್ಯೇತ ಬದ್ಧೋ ಮುಚ್ಯೇತ ಬನ್ಧನಾತ್ ॥ 12 ॥
ಗರ್ಭಿಣೀ ಜನಯೇತ್ಪುತ್ರಂ ಕನ್ಯಾ ವಿನ್ದತಿ ಸತ್ಪತಿಮ್ ।
ರಾಜಾನೋ ವಶತಾಂ ಯಾನ್ತಿ ಕಿಂ ಪುನಃ ಕ್ಷುದ್ರಮಾನುಷಾಃ ॥ 13 ॥
ಸಹಸ್ರನಾಮಶ್ರವಣಾತ್ ಪಠನಾತ್ ಪೂಜನಾತ್ ಪ್ರಿಯೇ ।
ಧಾರಣಾತ್ ಸರ್ವಮಾಪ್ನೋತಿ ವೈಷ್ಣವೋ ನಾತ್ರ ಸಂಶಯಃ ॥ 14 ॥
ವಂಶೀವಟೇ ಚಾನ್ಯವಟೇ ತಥಾ ಪಿಪ್ಪಲಕೇಽಥ ವಾ ।
ಕದಮ್ಬಪಾದಪತಲೇ ಶ್ರೀಗೋಪಾಲಸ್ಯ ಸನ್ನಿಧೌ ॥ 15 ॥
ಯಃ ಪಠೇದ್ವೈಷ್ಣವೋ ನಿತ್ಯಂ ಸ ಯಾತಿ ಹರಿಮನ್ದಿರಮ್ ।
ಕೃಷ್ಣೇನೋಕ್ತಂ ರಾಧಿಕಾಯೈ ತಯಾ ಪ್ರೋಕ್ತಂ ಪುರಾ ಶಿವೇ ॥ 16 ॥
ನಾರದಾಯ ಮಯಾ ಪ್ರೋಕ್ತಂ ನಾರದೇನ ಪ್ರಕಾಶಿತಮ್ ।
ಮಯಾ ತವ ವರಾರೋಹೇ ಪ್ರೋಕ್ತಮೇತತ್ಸುದುರ್ಲಭಮ್ ॥ 17 ॥
ಗೋಪನೀಯಂ ಪ್ರಯತ್ನೇನ ನ ಪ್ರಕಾಶ್ಯಂ ಕದಾಚನ ।
ಶಠಾಯ ಪಾಪಿನೇ ಚೈವ ಲಮ್ಪಟಾಯ ವಿಶೇಷತಃ ॥ 18 ॥
ನ ದಾತವ್ಯಂ ನ ದಾತವ್ಯಂ ನ ದಾತವ್ಯಂ ಕದಾಚನ ।
ದೇಯಂ ಶಾನ್ತಾಯ ಶಿಷ್ಯಾಯ ವಿಷ್ಣುಭಕ್ತಿರತಾಯ ಚ ॥ 19 ॥
ಗೋದಾನಬ್ರಹ್ಮಯಜ್ಞಾದೇರ್ವಾಜಪೇಯಶತಸ್ಯ ಚ ।
ಅಶ್ವಮೇಧಸಹಸ್ರಸ್ಯ ಫಲಂ ಪಾಠೇ ಭವೇದ್ಧ್ರುವಮ್ ॥ 20 ॥
ಮೋಹನಂ ಸ್ತಮ್ಭನಂ ಚೈವ ಮಾರಣೋಚ್ಚಾಟನಾದಿಕಮ್ ।
ಯದ್ಯದ್ವಾಞ್ಛತಿ ಚಿತ್ತೇನ ತತ್ತತ್ಪ್ರಾಪ್ನೋತಿ ವೈಷ್ಣವಃ ॥ 21 ॥
ಏಕಾದಶ್ಯಾಂ ನರಃ ಸ್ನಾತ್ವಾ ಸುಗನ್ಧದ್ರವ್ಯತೈಲಕೈಃ ।
ಆಹಾರಂ ಬ್ರಾಹ್ಮಣೇ ದತ್ತ್ವಾ ದಕ್ಷಿಣಾಂ ಸ್ವರ್ಣಭೂಷಣಮ್ ॥ 22 ॥
ತತಃ ಪ್ರಾರಮ್ಭಕರ್ತಾಸೌ ಸರ್ವಂ ಪ್ರಾಪ್ನೋತಿ ಮಾನವಃ ।
ಶತಾವೃತ್ತ ಸಹಸ್ರಂ ಚ ಯಃ ಪಠೇದ್ವೈಷ್ಣವೋ ಜನಃ ॥ 23 ॥
ಶ್ರೀಬೃನ್ದಾವನಚನ್ದ್ರಸ್ಯ ಪ್ರಸಾದಾತ್ಸರ್ವಮಾಪ್ನುಯಾತ್ ।
ಯದ್ಗೃಹೇ ಪುಸ್ತಕಂ ದೇವಿ ಪೂಜಿತಂ ಚೈವ ತಿಷ್ಠತಿ ॥ 24 ॥
ನ ಮಾರೀ ನ ಚ ದುರ್ಭಿಕ್ಷಂ ನೋಪಸರ್ಗಭಯಂ ಕ್ವಚಿತ್ ।
ಸರ್ಪಾದಿಭೂತಯಕ್ಷಾದ್ಯಾ ನಶ್ಯನ್ತೇ ನಾತ್ರ ಸಂಶಯಃ ॥ 25 ॥
ಶ್ರೀಗೋಪಾಲೋ ಮಹಾದೇವಿ ವಸೇತ್ತಸ್ಯ ಗೃಹೇ ಸದಾ ।
ಯದ್ಗೃಹೇ ಚ ಸಹಸ್ರಂ ಚ ನಾಮ್ನಾಂ ತಿಷ್ಠತಿ ಪೂಜಿತಮ್ ॥ 26 ॥
ಇತಿ ಶ್ರೀಸಮ್ಮೋಹನತನ್ತ್ರೇ ಹರಗೌರೀಸಂವಾದೇ ಶ್ರೀಗೋಪಾಲ ಸಹಸ್ರನಾಮಸ್ತೋತ್ರಮ್ ।
