ശ്രീമാന് യസ്യാഃ പ്രിയസ്സന് സകലമപി ജഗജ്ജംഗമസ്ഥാവരാദ്യം
സ്വര്ഭൂപാതാലഭേദം വിവിധവിധമഹാശില്പസാമര്ഥ്യസിദ്ധമ് ।
രംജന് ബ്രഹ്മാമരേംദ്രൈസ്ത്രിഭുവനജനകഃ സ്തൂയതേ ഭൂരിശോ യഃ
സാ വിഷ്ണോരേകപത്നീ ത്രിഭുവനജനനീ പാതു പദ്മാവതീ നഃ ॥ 1 ॥
ശ്രീശൃംഗാരൈകദേവീം വിധിമുഖസുമനഃകോടികോടീരജാഗ്ര-
ദ്രത്നജ്യോത്സ്നാപ്രസാരപ്രകടിതചരണാംഭോജനീരാജിതാര്ചാമ് ।
ഗീർവാണസ്ത്രൈണവാണീപരിഫണിതമഹാകീര്തിസൌഭാഗ്യഭാഗ്യാം
ഹേലാനിര്ദഗ്ധദൈന്യശ്രമവിഷമമഹാരണ്യഗണ്യാം നമാമി ॥ 2 ॥
വിദ്യുത്കോടിപ്രകാശാം വിവിധമണിഗണോന്നിദ്രസുസ്നിഗ്ധശോഭാ-
സംപത്സംപൂര്ണഹാരാദ്യഭിനവവിഭവാലംക്രിയോല്ലാസികംഠാമ് ।
ആദ്യാം വിദ്യോതമാനസ്മിതരുചിരചിതാനല്പചംദ്രപ്രകാശാം
പദ്മാം പദ്മായതാക്ഷീം പദനലിനനമത്പദ്മസദ്മാം നമാമി ॥ 3 ॥
ശശ്വത്തസ്യാഃ ശ്രയേഽഹം ചരണസരസിജം ശാര്ങ്ഗപാണേഃ പുരംധ്ര്യാഃ
സ്തോകം യസ്യാഃ പ്രസാദഃ പ്രസരതി മനുജേ ക്രൂരദാരിദ്ര്യദഗ്ധേ ।
സോഽയം സദ്യോഽനവദ്യസ്ഥിരതരരുചിരശ്രേഷ്ഠഭൂയിഷ്ഠനവ്യ-
സ്തവ്യപ്രാസാദപംക്തിപ്രസിതബഹുവിധപ്രാഭവോ ബോഭവീതി ॥ 4 ॥
സൌംദര്യോദ്വേലഹേമാംബുജമഹിതമഹാസിംഹപീഠാശ്രയാഢ്യാം
പുഷ്യന്നീലാരവിംദപ്രതിമവരകൃപാപൂരസംപൂര്ണനേത്രാമ് ।
ജ്യോത്സ്നാപീയൂഷധാരാവഹനവസുഷമക്ഷൌമധാമോജ്ജ്വലാംഗീം
വംദേ സിദ്ധേശചേതസ്സരസിജനിലയാം ചക്രിസൌഭാഗ്യഋദ്ധിമ് ॥ 5 ॥
സംസാരക്ലേശഹംത്രീം സ്മിതരുചിരമുഖീം സാരശൃംഗാരശോഭാം
സർവൈശ്വര്യപ്രദാത്രീം സരസിജനയനാം സംസ്തുതാം സാധുബൃംദൈഃ ।
സംസിദ്ധസ്നിഗ്ധഭാവാം സുരഹിതചരിതാം സിംധുരാജാത്മഭൂതാം
സേവേ സംഭാവനീയാനുപമിതമഹിമാം സച്ചിദാനംദരൂപാമ് ॥ 6 ॥
സിദ്ധസ്വര്ണോപമാനദ്യുതിലസിതതനും സ്നിഗ്ധസംപൂര്ണചംദ്ര-
വ്രീഡാസംപാദിവക്ത്രാം തിലസുമവിജയോദ്യോഗനിര്നിദ്രനാസാമ് ।
താദാത്വോത്ഫുല്ലനീലാംബുജഹസനചണാത്മീയചക്ഷുഃ പ്രകാശാം
ബാലശ്രീലപ്രവാലപ്രിയസഖചരണദ്വംദ്വരമ്യാം ഭജേഽഹമ് ॥ 7 ॥
യാം ദേവീം മൌനിവര്യാഃ ശ്രയദമരവധൂമൌലിമാല്യാര്ചിതാംഘ്രിം
സംസാരാസാരവാരാന്നിധിതരതരണേ സർവദാ ഭാവയംതേ ।
ശ്രീകാരോത്തുംഗരത്നപ്രചുരിതകനകസ്നിഗ്ധശുദ്ധാംതലീലാം
താം ശശ്വത്പാദപദ്മശ്രയദഖിലഹൃദാഹ്ലാദിനീം ഹ്ലാദയേഽഹമ് ॥ 8 ॥
ആകാശാധീശപുത്രീം ശ്രിതജനനിവഹാധീനചേതഃപ്രവൃത്തിം
വംദേ ശ്രീവേംകടേശപ്രഭുവരമഹിഷീം ദീനചിത്തപ്രതോഷാമ് ।
പുഷ്യത്പാദാരവിംദപ്രസൃമരസുമഹശ്ശാമിതസ്വാശ്രിതാംത-
സ്താമിസ്രാം തത്ത്വരൂപാം ശുകപുരനിലയാം സർവസൌഭാഗ്യദാത്രീമ് ॥ 9 ॥
ശ്രീശേഷശര്മാഭിനവോപക്ലുപ്താ
പ്രിയേണ ഭക്ത്യാ ച സമര്പിതേയമ് ।
പദ്മാവതീമംഗലകംഠഭൂഷാ
വിരാജതാം ശ്രീനവരത്നമാലാ ॥ 10 ॥
ഇതി ശ്രീ പദ്മാവതീ നവരത്നമാലികാ സ്തുതിഃ ।
