ශ්රීමාන් යස්යාඃ ප්රියස්සන් සකලමපි ජගජ්ජංගමස්ථාවරාද්යං
ස්වර්භූපාතාලභේදං විවිධවිධමහාශිල්පසාමර්ථ්යසිද්ධම් ।
රංජන් බ්රහ්මාමරේංද්රෛස්ත්රිභුවනජනකඃ ස්තූයතේ භූරිශෝ යඃ
සා විෂ්ණෝරේකපත්නී ත්රිභුවනජනනී පාතු පද්මාවතී නඃ ॥ 1 ॥
ශ්රීශෘංගාරෛකදේවීං විධිමුඛසුමනඃකෝටිකෝටීරජාග්ර-
ද්රත්නජ්යෝත්ස්නාප්රසාරප්රකටිතචරණාංභෝජනීරාජිතාර්චාම් ।
ගීර්වාණස්ත්රෛණවාණීපරිඵණිතමහාකීර්තිසෞභාග්යභාග්යාං
හේලානිර්දග්ධදෛන්යශ්රමවිෂමමහාරණ්යගණ්යාං නමාමි ॥ 2 ॥
විද්යුත්කෝටිප්රකාශාං විවිධමණිගණෝන්නිද්රසුස්නිග්ධශෝභා-
සංපත්සංපූර්ණහාරාද්යභිනවවිභවාලංක්රියෝල්ලාසිකංඨාම් ।
ආද්යාං විද්යෝතමානස්මිතරුචිරචිතානල්පචංද්රප්රකාශාං
පද්මාං පද්මායතාක්ෂීං පදනලිනනමත්පද්මසද්මාං නමාමි ॥ 3 ॥
ශශ්වත්තස්යාඃ ශ්රයේऽහං චරණසරසිජං ශාර්ඞ්ගපාණේඃ පුරංධ්ර්යාඃ
ස්තෝකං යස්යාඃ ප්රසාදඃ ප්රසරති මනුජේ ක්රූරදාරිද්ර්යදග්ධේ ।
සෝऽයං සද්යෝऽනවද්යස්ථිරතරරුචිරශ්රේෂ්ඨභූයිෂ්ඨනව්ය-
ස්තව්යප්රාසාදපංක්තිප්රසිතබහුවිධප්රාභවෝ බෝභවීති ॥ 4 ॥
සෞංදර්යෝද්වේලහේමාංබුජමහිතමහාසිංහපීඨාශ්රයාඪ්යාං
පුෂ්යන්නීලාරවිංදප්රතිමවරකෘපාපූරසංපූර්ණනේත්රාම් ।
ජ්යෝත්ස්නාපීයූෂධාරාවහනවසුෂමක්ෂෞමධාමෝජ්ජ්වලාංගීං
වංදේ සිද්ධේශචේතස්සරසිජනිලයාං චක්රිසෞභාග්යඍද්ධිම් ॥ 5 ॥
සංසාරක්ලේශහංත්රීං ස්මිතරුචිරමුඛීං සාරශෘංගාරශෝභාං
සර්වෛශ්වර්යප්රදාත්රීං සරසිජනයනාං සංස්තුතාං සාධුබෘංදෛඃ ।
සංසිද්ධස්නිග්ධභාවාං සුරහිතචරිතාං සිංධුරාජාත්මභූතාං
සේවේ සංභාවනීයානුපමිතමහිමාං සච්චිදානංදරූපාම් ॥ 6 ॥
සිද්ධස්වර්ණෝපමානද්යුතිලසිතතනුං ස්නිග්ධසංපූර්ණචංද්ර-
ව්රීඩාසංපාදිවක්ත්රාං තිලසුමවිජයෝද්යෝගනිර්නිද්රනාසාම් ।
තාදාත්වෝත්ඵුල්ලනීලාංබුජහසනචණාත්මීයචක්ෂුඃ ප්රකාශාං
බාලශ්රීලප්රවාලප්රියසඛචරණද්වංද්වරම්යාං භජේऽහම් ॥ 7 ॥
යාං දේවීං මෞනිවර්යාඃ ශ්රයදමරවධූමෞලිමාල්යාර්චිතාංඝ්රිං
සංසාරාසාරවාරාන්නිධිතරතරණේ සර්වදා භාවයංතේ ।
ශ්රීකාරෝත්තුංගරත්නප්රචුරිතකනකස්නිග්ධශුද්ධාංතලීලාං
තාං ශශ්වත්පාදපද්මශ්රයදඛිලහෘදාහ්ලාදිනීං හ්ලාදයේऽහම් ॥ 8 ॥
ආකාශාධීශපුත්රීං ශ්රිතජනනිවහාධීනචේතඃප්රවෘත්තිං
වංදේ ශ්රීවේංකටේශප්රභුවරමහිෂීං දීනචිත්තප්රතෝෂාම් ।
පුෂ්යත්පාදාරවිංදප්රසෘමරසුමහශ්ශාමිතස්වාශ්රිතාංත-
ස්තාමිස්රාං තත්ත්වරූපාං ශුකපුරනිලයාං සර්වසෞභාග්යදාත්රීම් ॥ 9 ॥
ශ්රීශේෂශර්මාභිනවෝපක්ලුප්තා
ප්රියේණ භක්ත්යා ච සමර්පිතේයම් ।
පද්මාවතීමංගලකංඨභූෂා
විරාජතාං ශ්රීනවරත්නමාලා ॥ 10 ॥
ඉති ශ්රී පද්මාවතී නවරත්නමාලිකා ස්තුතිඃ ।
