ଶ୍ରୀମାନ୍ ୟସ୍ୟାଃ ପ୍ରିୟସ୍ସନ୍ ସକଲମପି ଜଗଜ୍ଜଂଗମସ୍ଥାଵରାଦ୍ୟଂ
ସ୍ଵର୍ଭୂପାତାଲଭେଦଂ ଵିଵିଧଵିଧମହାଶିଲ୍ପସାମର୍ଥ୍ୟସିଦ୍ଧମ୍ ।
ରଂଜନ୍ ବ୍ରହ୍ମାମରେଂଦ୍ରୈସ୍ତ୍ରିଭୁଵନଜନକଃ ସ୍ତୂୟତେ ଭୂରିଶୋ ୟଃ
ସା ଵିଷ୍ଣୋରେକପତ୍ନୀ ତ୍ରିଭୁଵନଜନନୀ ପାତୁ ପଦ୍ମାଵତୀ ନଃ ॥ 1 ॥
ଶ୍ରୀଶୃଂଗାରୈକଦେଵୀଂ ଵିଧିମୁଖସୁମନଃକୋଟିକୋଟୀରଜାଗ୍ର-
ଦ୍ରତ୍ନଜ୍ୟୋତ୍ସ୍ନାପ୍ରସାରପ୍ରକଟିତଚରଣାଂଭୋଜନୀରାଜିତାର୍ଚାମ୍ ।
ଗୀର୍ଵାଣସ୍ତ୍ରୈଣଵାଣୀପରିଫଣିତମହାକୀର୍ତିସୌଭାଗ୍ୟଭାଗ୍ୟାଂ
ହେଲାନିର୍ଦଗ୍ଧଦୈନ୍ୟଶ୍ରମଵିଷମମହାରଣ୍ୟଗଣ୍ୟାଂ ନମାମି ॥ 2 ॥
ଵିଦ୍ୟୁତ୍କୋଟିପ୍ରକାଶାଂ ଵିଵିଧମଣିଗଣୋନ୍ନିଦ୍ରସୁସ୍ନିଗ୍ଧଶୋଭା-
ସଂପତ୍ସଂପୂର୍ଣହାରାଦ୍ୟଭିନଵଵିଭଵାଲଂକ୍ରିୟୋଲ୍ଲାସିକଂଠାମ୍ ।
ଆଦ୍ୟାଂ ଵିଦ୍ୟୋତମାନସ୍ମିତରୁଚିରଚିତାନଲ୍ପଚଂଦ୍ରପ୍ରକାଶାଂ
ପଦ୍ମାଂ ପଦ୍ମାୟତାକ୍ଷୀଂ ପଦନଲିନନମତ୍ପଦ୍ମସଦ୍ମାଂ ନମାମି ॥ 3 ॥
ଶଶ୍ଵତ୍ତସ୍ୟାଃ ଶ୍ରୟେଽହଂ ଚରଣସରସିଜଂ ଶାର୍ଙ୍ଗପାଣେଃ ପୁରଂଧ୍ର୍ୟାଃ
ସ୍ତୋକଂ ୟସ୍ୟାଃ ପ୍ରସାଦଃ ପ୍ରସରତି ମନୁଜେ କ୍ରୂରଦାରିଦ୍ର୍ୟଦଗ୍ଧେ ।
ସୋଽୟଂ ସଦ୍ୟୋଽନଵଦ୍ୟସ୍ଥିରତରରୁଚିରଶ୍ରେଷ୍ଠଭୂୟିଷ୍ଠନଵ୍ୟ-
ସ୍ତଵ୍ୟପ୍ରାସାଦପଂକ୍ତିପ୍ରସିତବହୁଵିଧପ୍ରାଭଵୋ ବୋଭଵୀତି ॥ 4 ॥
ସୌଂଦର୍ୟୋଦ୍ଵେଲହେମାଂବୁଜମହିତମହାସିଂହପୀଠାଶ୍ରୟାଢ୍ୟାଂ
ପୁଷ୍ୟନ୍ନୀଲାରଵିଂଦପ୍ରତିମଵରକୃପାପୂରସଂପୂର୍ଣନେତ୍ରାମ୍ ।
ଜ୍ୟୋତ୍ସ୍ନାପୀୟୂଷଧାରାଵହନଵସୁଷମକ୍ଷୌମଧାମୋଜ୍ଜ୍ଵଲାଂଗୀଂ
ଵଂଦେ ସିଦ୍ଧେଶଚେତସ୍ସରସିଜନିଲୟାଂ ଚକ୍ରିସୌଭାଗ୍ୟଋଦ୍ଧିମ୍ ॥ 5 ॥
ସଂସାରକ୍ଲେଶହଂତ୍ରୀଂ ସ୍ମିତରୁଚିରମୁଖୀଂ ସାରଶୃଂଗାରଶୋଭାଂ
ସର୍ଵୈଶ୍ଵର୍ୟପ୍ରଦାତ୍ରୀଂ ସରସିଜନୟନାଂ ସଂସ୍ତୁତାଂ ସାଧୁବୃଂଦୈଃ ।
ସଂସିଦ୍ଧସ୍ନିଗ୍ଧଭାଵାଂ ସୁରହିତଚରିତାଂ ସିଂଧୁରାଜାତ୍ମଭୂତାଂ
ସେଵେ ସଂଭାଵନୀୟାନୁପମିତମହିମାଂ ସଚ୍ଚିଦାନଂଦରୂପାମ୍ ॥ 6 ॥
ସିଦ୍ଧସ୍ଵର୍ଣୋପମାନଦ୍ୟୁତିଲସିତତନୁଂ ସ୍ନିଗ୍ଧସଂପୂର୍ଣଚଂଦ୍ର-
ଵ୍ରୀଡାସଂପାଦିଵକ୍ତ୍ରାଂ ତିଲସୁମଵିଜୟୋଦ୍ୟୋଗନିର୍ନିଦ୍ରନାସାମ୍ ।
ତାଦାତ୍ଵୋତ୍ଫୁଲ୍ଲନୀଲାଂବୁଜହସନଚଣାତ୍ମୀୟଚକ୍ଷୁଃ ପ୍ରକାଶାଂ
ବାଲଶ୍ରୀଲପ୍ରଵାଲପ୍ରିୟସଖଚରଣଦ୍ଵଂଦ୍ଵରମ୍ୟାଂ ଭଜେଽହମ୍ ॥ 7 ॥
ୟାଂ ଦେଵୀଂ ମୌନିଵର୍ୟାଃ ଶ୍ରୟଦମରଵଧୂମୌଲିମାଲ୍ୟାର୍ଚିତାଂଘ୍ରିଂ
ସଂସାରାସାରଵାରାନ୍ନିଧିତରତରଣେ ସର୍ଵଦା ଭାଵୟଂତେ ।
ଶ୍ରୀକାରୋତ୍ତୁଂଗରତ୍ନପ୍ରଚୁରିତକନକସ୍ନିଗ୍ଧଶୁଦ୍ଧାଂତଲୀଲାଂ
ତାଂ ଶଶ୍ଵତ୍ପାଦପଦ୍ମଶ୍ରୟଦଖିଲହୃଦାହ୍ଲାଦିନୀଂ ହ୍ଲାଦୟେଽହମ୍ ॥ 8 ॥
ଆକାଶାଧୀଶପୁତ୍ରୀଂ ଶ୍ରିତଜନନିଵହାଧୀନଚେତଃପ୍ରଵୃତ୍ତିଂ
ଵଂଦେ ଶ୍ରୀଵେଂକଟେଶପ୍ରଭୁଵରମହିଷୀଂ ଦୀନଚିତ୍ତପ୍ରତୋଷାମ୍ ।
ପୁଷ୍ୟତ୍ପାଦାରଵିଂଦପ୍ରସୃମରସୁମହଶ୍ଶାମିତସ୍ଵାଶ୍ରିତାଂତ-
ସ୍ତାମିସ୍ରାଂ ତତ୍ତ୍ଵରୂପାଂ ଶୁକପୁରନିଲୟାଂ ସର୍ଵସୌଭାଗ୍ୟଦାତ୍ରୀମ୍ ॥ 9 ॥
ଶ୍ରୀଶେଷଶର୍ମାଭିନଵୋପକ୍ଲୁପ୍ତା
ପ୍ରିୟେଣ ଭକ୍ତ୍ୟା ଚ ସମର୍ପିତେୟମ୍ ।
ପଦ୍ମାଵତୀମଂଗଲକଂଠଭୂଷା
ଵିରାଜତାଂ ଶ୍ରୀନଵରତ୍ନମାଲା ॥ 10 ॥
ଇତି ଶ୍ରୀ ପଦ୍ମାଵତୀ ନଵରତ୍ନମାଲିକା ସ୍ତୁତିଃ ।
