ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః । భ॒ద్ర-మ్ప॑శ్యేమా॒ఖ్షభి॒-ర్యజ॑త్రాః । స్థి॒రైరఙ్గై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇన్ద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑-ర్దధాతు ॥
ఓం శాన్తి॒-శ్శాన్తి॒-శ్శాన్తిః॑ ॥

॥ ఓ-మ్బ్రహ్మణే నమః ॥

॥ ప్రథమముణ్డకే ప్రథమః ఖణ్డః ॥

ఓ-మ్బ్రహ్మా దేవానా-మ్ప్రథమ-స్సమ్బభూవ విశ్వస్య కర్తా
భువనస్య గోప్తా । స బ్రహ్మవిద్యాం సర్వవిద్యాప్రతిష్ఠామథర్వాయ
జ్యేష్ఠపుత్రాయ ప్రాహ ॥ 1॥

అథర్వణే యా-మ్ప్రవదేత బ్రహ్మా-ఽథర్వా తం
పురోవాచాఙ్గిరే బ్రహ్మవిద్యామ్ ।
స భారద్వాజాయ సత్యవాహాయ ప్రాహ
భారద్వాజో-ఽఙ్గిరసే పరావరామ్ ॥ 2॥

శౌనకో హ వై మహాశాలో-ఽఙ్గిరసం-విఀధివదుపసన్నః పప్రచ్ఛ ।
కస్మిన్ను భగవో విజ్ఞాతే సర్వమిదం-విఀజ్ఞాత-మ్భవతీతి ॥ 3॥

తస్మై స హోవాచ ।
ద్వే విద్యే వేదితవ్యే ఇతి హ స్మ
యద్బ్రహ్మవిదో వదన్తి పరా చైవాపరా చ ॥ 4॥

తత్రాపరా ఋగ్వేదో యజుర్వేద-స్సామవేదో-ఽథర్వవేదః
శిఖ్షా కల్పో వ్యాకరణ-న్నిరుక్త-ఞ్ఛన్దో జ్యోతిషమితి ।
అథ పరా యయా తదఖ్షరమధిగమ్యతే ॥ 5॥

యత్తదద్రేశ్యమగ్రాహ్యమగోత్రమవర్ణ-
మచఖ్షుస్శ్రోత్ర-న్తదపాణిపాదమ్ ।
నిత్యం-విఀభుం సర్వగతం సుసూఖ్ష్మం
తదవ్యయం-యఀద్భూతయోని-మ్పరిపశ్యన్తి ధీరాః ॥ 6॥

యథోర్ణనాభి-స్సృజతే గృహ్ణతే చ
యథా పృథివ్యామోషధయ-స్సమ్భవన్తి ।
యథా సతః పురుషా-త్కేశలోమాని
తథా-ఽఖ్షరా-థ్సమ్భవతీహ విశ్వమ్ ॥ 7॥

తపసా చీయతే బ్రహ్మ తతో-ఽన్నమభిజాయతే ।
అన్నా-త్ప్రాణో మన-స్సత్యం-లోఀకాః కర్మసు చామృతమ్ ॥ 8॥

య-స్సర్వజ్ఞ-స్సర్వవిద్యస్య జ్ఞానమయ-న్తపః ।
తస్మాదేతద్బ్రహ్మ నామ రూపమన్న-ఞ్చ జాయతే ॥ 9॥

॥ ఇతి ముణ్డకోపనిషది ప్రథమముణ్డకే ప్రథమః ఖణ్డః ॥