అధ్యాయ 2
వల్లీ 2

పురమేకాదశద్వారమజస్యావక్రచేతసః।
అనుష్ఠాయ న శోచతి విముక్తశ్చ విముచ్యతే। ఏతద్వై తత్‌ ॥ ॥1॥

హంస-శ్శుచిషద్వసురాన్తరిఖ్షసద్ధోతా వేదిషదతిథిర్దురోణసత్‌।
నృషద్వరసదృతసద్వ్యోమసదబ్జా గోజా ఋతజా అద్రిజా ఋత-మ్బృహత్‌ ॥ ॥2॥

ఊర్ధ్వ-మ్ప్రాణమున్నయత్యపాన-మ్ప్రత్యగస్యతి।
మధ్యే వామనమాసీనం-విఀశ్వే దేవా ఉపాసతే ॥ ॥3॥

అస్య విస్రంసమానస్య శరీరస్థస్య దేహినః।
దేహాద్విముచ్యమానస్య కిమత్ర పరిశిష్యతే। ఏతద్వై తత్‌ ॥ ॥4॥

న ప్రాణేన నాపానేన మర్త్యో జీవతి కశ్చన।
ఇతరేణ తు జీవన్తి యస్మిన్నేతావుపాశ్రితౌ ॥ ॥5॥

హన్త త ఇద-మ్ప్రవఖ్ష్యామి గుహ్య-మ్బ్రహ్మ సనాతనమ్‌।
యథా చ మరణ-మ్ప్రాప్య ఆత్మా భవతి గౌతమ ॥ ॥6॥

యోనిమన్యే ప్రపద్యన్తే శరీరత్వాయ దేహినః।
స్థాణుమన్యే-ఽనుసం​యఀన్తి యథాకర్మ యథాశ్రుతమ్‌ ॥ ॥7॥

య ఏష సుప్తేషు జాగర్తి కామ-ఙ్కామ-మ్పురుషో నిర్మిమాణః।
తదేవ శుక్ర-న్తద్ బ్రహ్మ తదేవామృతముచ్యతే।
తస్మిం​ల్లోఀకా-శ్శ్రితా-స్సర్వే తదు నాత్యేతి కశ్చన। ఏతద్వై తత్‌ ॥ ॥8॥

అగ్నిర్యథైకో భువన-మ్ప్రవిష్టో రూపం రూప-మ్ప్రతిరూపో బభూవ।
ఏకస్తథా సర్వభూతాన్తరాత్మా రూపం రూప-మ్ప్రతిరూపో బహిశ్చ ॥ ॥9॥

వాయుర్యథైకో భువన-మ్ప్రవిష్టో రూపం రూప-మ్ప్రతిరూపో బభూవ।
ఏకస్తథా సర్వభూతాన్తరాత్మా రూపం రూప-మ్ప్రతిరూపో బహిశ్చ ॥ ॥10॥

సూర్యో యథా సర్వలోకస్య చఖ్షుర్న లిప్యతే చాఖ్షుషైర్బహ్యిదోషైః।
ఏకస్తథా సర్వభూతాన్తరాత్మా న లిప్యతే లోకదుఃఖేన బాహ్యః ॥ ॥11॥

ఏకో వశీ సర్వభూతాన్తరాత్మా ఏకం రూప-మ్బహుధా యః కరోతి।
తమాత్మస్థం-యేఀ-ఽనుపశ్యన్తి ధీరాస్తేషాం సుఖం శాశ్వత-న్నేతరేషామ్‌ ॥ ॥12॥

నిత్యో-ఽనిత్యానా-ఞ్చేతనశ్చేతనానామేకో బహూనాం-యోఀ విదధాతి కామాన్‌।
తమాత్మస్థం-యేఀ-ఽనుపశ్యన్తి ధీరాస్తేషాం శాన్తి-శ్శాశ్వతీ నేతరేషామ్‌ ॥ ॥13॥

తదేతదితి మన్యన్తే-ఽనిర్దేశ్య-మ్పరమం సుఖమ్‌।
కథ-న్ను తద్విజానీయా-ఙ్కిము భాతి విభాతి వా ॥ ॥14॥

న తత్ర సూర్యో భాతి న చన్ద్రతారక-న్నేమా విద్యుతో భాన్తి కుతో-ఽయమగ్నిః।
తమేవ భాన్తమనుభాతి సర్వ-న్తస్య భాసా సర్వమిదం-విఀభాతి ॥ ॥15॥