షష్ఠః ప్రశ్నః

అథ హైనం సుకేశా భారద్వాజః పప్రచ్ఛ -
భగవన్‌ హిరణ్యనాభః కౌసల్యో రాజపుత్రో మాముపేత్యైత-మ్ప్రశ్నమపృచ్ఛత -
షోడశకల-మ్భారద్వాజ పురుషం-వేఀత్థ। తమహ-ఙ్కుమారమ్బ్రువ-న్నాహమిమం-వేఀద యధ్యహమిమమవేదిష-ఙ్కథ-న్తే నావఖ్ష్యమితి ।
సమూలో వా ఏష పరిశుష్యతి యో-ఽనృతమభివదతి। తస్మాన్నార్​హమ్యనృతం-వఀక్తుమ్‌। స తూష్ణీం రథమారుహ్య ప్రవవ్రాజ। త-న్త్వా పృచ్ఛామి క్వాసౌ పురుష ఇతి ॥1॥

తస్మై స హోవాచ ।
ఇహైవాన్తస్శరీరే సోభ్య స పురుషో యస్మిన్నతా-ష్షోడశకలాః ప్రభవన్తీతి ॥2॥

స ఈఖ్షాఞ్చక్రే। కస్మిన్నహముత్క్రాన్త ఉత్క్రాన్తో భవిష్యామి కస్మిన్ వా ప్రతిష్ఠితే ప్రతిష్టస్యామీతి ॥3॥

స ప్రాణమసృజత। ప్రాణాచ్ఛ్రద్ధా-ఙ్ఖం-వాఀయుర్జ్యోతిరాపః పృథివీన్ద్రియ-మ్మనో-ఽన్నమన్నాద్వీర్య-న్తపో మన్త్రాః కర్మలోకా లోకేషు చ నామ చ ॥4॥

స యథేమా నధ్య-స్స్యన్దమానా-స్సముద్రాయణా-స్సముద్ర-మ్ప్రాప్యాస్త-ఙ్గచ్ఛన్తి భిధ్యేతే తాసా-న్నామరుపే సముద్ర ఇత్యేవ-మ్ప్రోచ్యతే।
ఏవమేవాస్య పరిద్రష్టురిమా-ష్షోడశకలాః పురుషాయణాః పురుష-మ్ప్రాప్యాస్త-ఙ్గచ్ఛన్తి భిధ్యేతే చాసా-న్నామరుపే పురుష ఇత్యేవ-మ్ప్రోచ్యతే స ఏషో-ఽకలో-ఽమృతో భవతి తదేష శ్లోకః ॥5॥

అరా ఇవ రథనాభౌ కలా యస్మి-న్ప్రతిష్ఠితాః।
తం-వేఀధ్య-మ్పురుషం-వేఀద యథా మా వో మృత్యుః పరివ్యథా ఇతి ॥6॥

తాన్‌ హోవాచైతావదేవాహమేతత్‌ పర-మ్బ్రహ్మ వేద। నాతః పరమస్తీతి ॥7॥

తే తమర్చయన్తస్త్వం హి నః పితా యో-ఽస్మాకమవిధ్యాయాః పర-మ్పార-న్తారయసీతి।
నమః పరమృషిభ్యో నమః పరమృషిభ్యః ॥8॥