అధ్యాయ 2
వల్లీ 1
పరాఞ్చిఖాని వ్యతృణత్స్వయమ్భూస్తస్మాత్పరాఙ్పశ్యతి నాన్తరాత్మన్‌।
కశ్చిద్ధీరః ప్రత్యగాత్మానమైషదావృత్తచఖ్షురమృతత్వమిచ్ఛన్‌ ॥ ॥1॥
పరాచః కామాననుయన్తి బాలాస్తే మృత్యోర్యన్తి వితతస్య పాశమ్‌।
అథ ధీరా అమృతత్వం-విఀదిత్వా ధ్రువమధ్రువేష్విహ న ప్రార్థయన్తే ॥ ॥2॥
యేన రూపం రస-ఙ్గన్ధం శబ్దాన్స్పర్శాంశ్చ మైథునాన్‌।
ఏతేనైవ విజానాతి కిమత్ర పరిశిష్యతే। ఏతద్వై తత్‌ ॥ ॥3॥
స్వప్నాన్త-ఞ్జాగరితాన్త-ఞ్చోభౌ యేనానుపశ్యతి।
మహాన్తం-విఀభుమాత్మాన-మ్మత్వా ధీరో న శోచతి ॥ ॥4॥
య ఇమ-మ్మధ్వదం-వేఀద ఆత్మాన-ఞ్జీవమన్తికాత్‌।
ఈశాన-మ్భూతభవ్యస్య న తతో విజుగుప్సతే। ఏతద్వై తత్‌ ॥ ॥5॥
యః పూర్వ-న్తపసో జాతమద్‌భ్యః పూర్వమజాయత।
గుహా-మ్ప్రవిశ్య తిష్ఠన్తం-యోఀ భూతేభిర్వ్యపశ్యత। ఏతద్వై తత్‌ ॥ ॥6॥
యా ప్రాణేన సమ్భవత్యదితిర్దేవతామయీ।
గుహా-మ్ప్రవిశ్య తిష్ఠన్తీం-యాఀ భూతేభిర్వ్యజాయత। ఏతద్వై తత్‌ ॥ ॥7॥
అరణ్యోర్నిహితో జాతవేదా గర్భ ఇవ సుభృతో గర్భిణీభిః।
దివే దివే ఈడ్యో జాగృవద్భిర్హవిష్మద్భిర్మనుష్యేభిరగ్నిః। ఏతద్వై తత్‌ ॥ ॥8॥
యతశ్చోదేతి సూర్యో-ఽస్తం-యఀత్ర చ గచ్ఛతి।
త-న్దేవా-స్సర్వే-ఽర్పితాస్తదు నాత్యేతి కశ్చన। ఏతద్వై తత్‌ ॥ ॥9॥
యదేవేహ తదముత్ర యదముత్ర తదన్విహ।
మృత్యో-స్స మృత్యుమాప్నోతి య ఇహ నానేవ పశ్యతి ॥ ॥10॥
మనసైవేదమాప్తవ్య-న్నేహ నానా-ఽస్తి కిఞ్చన।
మృత్యో-స్స మృత్యు-ఙ్గచ్ఛతి య ఇహ నానేవ పశ్యతి ॥ ॥11॥
అఙ్గుష్ఠమాత్రః పురుషో మధ్య ఆత్మని తిష్ఠతి।
ఈశానో భూతభవ్యస్య న తతో విజుగుప్సతే। ఏతద్వై తత్‌ ॥ ॥12॥
అఙ్గుష్ఠమాత్రః పురుషో జ్యోతిరివాధూమకః।
ఈశానో భూతభవ్యస్య స ఏవాద్య స ఉ శ్వః। ఏతద్వై తత్‌ ॥ ॥13॥
యథోదక-న్దుర్గం-వృఀష్ట-మ్పర్వతేషు విధావతి।
ఏవ-న్ధర్మాన్పృథక్‌ పశ్యంస్తానేవానువిధావతి ॥ ॥14॥
యథోదకం శుద్ధే శుద్ధమాసిక్త-న్తాదృగేవ భవతి।
ఏవ-మ్మునేర్విజానత ఆత్మా భవతి గౌతమ ॥ ॥15॥
