මුචුකුංද ස්තුතිඃ

විමෝහිතෝऽයං ජන ඊශ මායයා
ත්වදීයයා ත්වාං ච භජත්යනර්ථදෘක් ।
සුඛාය දුඃඛප්රභවේෂු සජ්ජතේ
ගෘහේෂු යෝෂිත්පුරුෂශ්ච වංචිතඃ ॥ 1 ॥
ලබ්ධ්වා ජනෝ දුර්ලභමත්ර මානුෂං
කථංචිදව්යංගමයත්නතෝऽනඝ ।
පාදාරවිංදං න භජත්යසන්මති-
ර්ගෘහාංධකූපේ පතිතෝ යථා පශුඃ ॥ 2 ॥
මමෛෂ කාලෝऽජිත නිෂ්ඵලෝ ගතෝ
රාජ්යශ්රියෝන්නද්ධමදස්ය භූපතේ ।
මර්ත්යාත්මබුද්ධේඃ සුතදාරකෝශභූ-
ෂ්වාසජ්ජමානස්ය දුරංතචිංතයා ॥ 3 ॥
කලේවරේऽස්මින් ඝටකුඩ්යසන්නිභේ
නිරූඪමානෝ නරදේව ඉත්යහම් ।
වෘතෝ රථේභාශ්වපදාත්යනීකපෛර්ගාං
පර්යටංස්ත්වාගණයන් සුදුර්මදඃ ॥ 4 ॥
ප්රමත්තමුච්චෛරිති කෘත්යචිංතයා
ප්රභුද්ධලෝභං විෂයේෂු ලාලසම් ।
ත්වමප්රමත්තඃ සහසාऽභිපද්යසේ
ක්ෂුල්ලේලිහානෝऽහිරිවාඛුමංතකඃ ॥ 5 ॥
පුරා රථෛර්හේමපරිෂ්කෘතෛශ්චරන්
මතංගජෛර්වා නරදේවසංජ්ඤිතඃ ।
ස ඒව කාලේන දුරත්යයේන තේ
කලේවරෝ විට්කෘමිභස්මසංජ්ඤිතඃ ॥ 6 ॥
නිර්ජිත්ය දික්චක්රමභූතවිග්රහෝ
වරාසනස්ථඃ සමරාජවංදිතඃ ।
ගෘහේෂු මෛථුන්යසුඛේෂු යෝෂිතාං
ක්රීඩාමෘග පූරුෂ ඊශ නීයතේ ॥ 7 ॥
කරෝති කර්මාණි තපඃසු නිෂ්ඨිතෝ
නිවෘත්තභෝගස්තදපේක්ෂයා දදත් ।
පුනශ්ච භූයේයමහං ස්වරාඩිති
ප්රබුද්ධතර්ෂෝ න සුඛාය කල්පතේ ॥ 8 ॥
භවාපවර්ගෝ භ්රමතෝ යදා භවේ-
ජ්ජනස්ය තර්හ්යච්යුත සත්සමාගමඃ ।
සත්සංගමෝ යර්හි තදෛව සද්ගතෞ
පරාවරේශේ ත්වයි ජායතේ මතිඃ ॥ 9 ॥
මන්යේ මමානුග්රහ ඊශ තේ කෘතෝ
රාජ්යානුබංධාපගමෝ යදෘච්ඡයා ।
යඃ ප්රාර්ථ්යතේ සාධුභිරේකචර්යයා
වනං විවික්ෂද්භිරඛංඩභූමිපෛඃ ॥ 10 ॥
න කාමයේऽන්යං තව පාදසේවනාද්-
අකිංචනප්රාර්ථ්යතමාද්වරං විභෝ ।
ආරාධ්ය කස්ත්වාං හ්යපවර්ගදං හරේ
වෘණීත ආර්යෝ වරමාත්මබංධනම් ॥ 11 ॥
තස්මාද්විසෘජ්යාශිෂ ඊශ සර්වතෝ
රජස්තමඃසත්ත්වගුණානුබංධනාඃ ।
නිරංජනං නිර්ගුණමද්වයං පරං
ත්වාං ජ්ඤප්තිමාත්රං පුරුෂං ව්රජාම්යහම් ॥ 12 ॥
චිරමිහ වෘජිනාර්තස්තප්යමානෝऽනුතාපෛඃ
අවිතෘෂෂඩමිත්රෝ ලබ්ධශාංතිඃ කථංචිත් ।
ශරණද සමුපේතස්ත්වත්පදාබ්ජං පරාත්මන්
අභයමමෘතමශෝකං පාහි මාऽපන්නමීශ ॥ 13 ॥

ඉති ශ්රීමද්භාගවතාංතර්ගතා මුචුකුංදකෘතා ශ්රීවිෂ්ණුස්තුතිඃ සමාප්තා ।

Browse Related Categories: