મુચુકુંદ સ્તુતિઃ

વિમોહિતોઽયં જન ઈશ માયયા
ત્વદીયયા ત્વાં ચ ભજત્યનર્થદૃક્ ।
સુખાય દુઃખપ્રભવેષુ સજ્જતે
ગૃહેષુ યોષિત્પુરુષશ્ચ વંચિતઃ ॥ 1 ॥
લબ્ધ્વા જનો દુર્લભમત્ર માનુષં
કથંચિદવ્યંગમયત્નતોઽનઘ ।
પાદારવિંદં ન ભજત્યસન્મતિ-
ર્ગૃહાંધકૂપે પતિતો યથા પશુઃ ॥ 2 ॥
મમૈષ કાલોઽજિત નિષ્ફલો ગતો
રાજ્યશ્રિયોન્નદ્ધમદસ્ય ભૂપતે ।
મર્ત્યાત્મબુદ્ધેઃ સુતદારકોશભૂ-
ષ્વાસજ્જમાનસ્ય દુરંતચિંતયા ॥ 3 ॥
કલેવરેઽસ્મિન્ ઘટકુડ્યસન્નિભે
નિરૂઢમાનો નરદેવ ઇત્યહમ્ ।
વૃતો રથેભાશ્વપદાત્યનીકપૈર્ગાં
પર્યટંસ્ત્વાગણયન્ સુદુર્મદઃ ॥ 4 ॥
પ્રમત્તમુચ્ચૈરિતિ કૃત્યચિંતયા
પ્રભુદ્ધલોભં વિષયેષુ લાલસમ્ ।
ત્વમપ્રમત્તઃ સહસાઽભિપદ્યસે
ક્ષુલ્લેલિહાનોઽહિરિવાખુમંતકઃ ॥ 5 ॥
પુરા રથૈર્હેમપરિષ્કૃતૈશ્ચરન્
મતંગજૈર્વા નરદેવસંજ્ઞિતઃ ।
સ એવ કાલેન દુરત્યયેન તે
કલેવરો વિટ્કૃમિભસ્મસંજ્ઞિતઃ ॥ 6 ॥
નિર્જિત્ય દિક્ચક્રમભૂતવિગ્રહો
વરાસનસ્થઃ સમરાજવંદિતઃ ।
ગૃહેષુ મૈથુન્યસુખેષુ યોષિતાં
ક્રીડામૃગ પૂરુષ ઈશ નીયતે ॥ 7 ॥
કરોતિ કર્માણિ તપઃસુ નિષ્ઠિતો
નિવૃત્તભોગસ્તદપેક્ષયા દદત્ ।
પુનશ્ચ ભૂયેયમહં સ્વરાડિતિ
પ્રબુદ્ધતર્ષો ન સુખાય કલ્પતે ॥ 8 ॥
ભવાપવર્ગો ભ્રમતો યદા ભવે-
જ્જનસ્ય તર્હ્યચ્યુત સત્સમાગમઃ ।
સત્સંગમો યર્હિ તદૈવ સદ્ગતૌ
પરાવરેશે ત્વયિ જાયતે મતિઃ ॥ 9 ॥
મન્યે મમાનુગ્રહ ઈશ તે કૃતો
રાજ્યાનુબંધાપગમો યદૃચ્છયા ।
યઃ પ્રાર્થ્યતે સાધુભિરેકચર્યયા
વનં વિવિક્ષદ્ભિરખંડભૂમિપૈઃ ॥ 10 ॥
ન કામયેઽન્યં તવ પાદસેવનાદ્-
અકિંચનપ્રાર્થ્યતમાદ્વરં વિભો ।
આરાધ્ય કસ્ત્વાં હ્યપવર્ગદં હરે
વૃણીત આર્યો વરમાત્મબંધનમ્ ॥ 11 ॥
તસ્માદ્વિસૃજ્યાશિષ ઈશ સર્વતો
રજસ્તમઃસત્ત્વગુણાનુબંધનાઃ ।
નિરંજનં નિર્ગુણમદ્વયં પરં
ત્વાં જ્ઞપ્તિમાત્રં પુરુષં વ્રજામ્યહમ્ ॥ 12 ॥
ચિરમિહ વૃજિનાર્તસ્તપ્યમાનોઽનુતાપૈઃ
અવિતૃષષડમિત્રો લબ્ધશાંતિઃ કથંચિત્ ।
શરણદ સમુપેતસ્ત્વત્પદાબ્જં પરાત્મન્
અભયમમૃતમશોકં પાહિ માઽપન્નમીશ ॥ 13 ॥

ઇતિ શ્રીમદ્ભાગવતાંતર્ગતા મુચુકુંદકૃતા શ્રીવિષ્ણુસ્તુતિઃ સમાપ્તા ।

Browse Related Categories: