ମୁଚୁକୁଂଦ ସ୍ତୁତିଃ

ଵିମୋହିତୋଽୟଂ ଜନ ଈଶ ମାୟୟା
ତ୍ଵଦୀୟୟା ତ୍ଵାଂ ଚ ଭଜତ୍ୟନର୍ଥଦୃକ୍ ।
ସୁଖାୟ ଦୁଃଖପ୍ରଭଵେଷୁ ସଜ୍ଜତେ
ଗୃହେଷୁ ୟୋଷିତ୍ପୁରୁଷଶ୍ଚ ଵଂଚିତଃ ॥ 1 ॥
ଲବ୍ଧ୍ଵା ଜନୋ ଦୁର୍ଲଭମତ୍ର ମାନୁଷଂ
କଥଂଚିଦଵ୍ୟଂଗମୟତ୍ନତୋଽନଘ ।
ପାଦାରଵିଂଦଂ ନ ଭଜତ୍ୟସନ୍ମତି-
ର୍ଗୃହାଂଧକୂପେ ପତିତୋ ୟଥା ପଶୁଃ ॥ 2 ॥
ମମୈଷ କାଲୋଽଜିତ ନିଷ୍ଫଲୋ ଗତୋ
ରାଜ୍ୟଶ୍ରିୟୋନ୍ନଦ୍ଧମଦସ୍ୟ ଭୂପତେ ।
ମର୍ତ୍ୟାତ୍ମବୁଦ୍ଧେଃ ସୁତଦାରକୋଶଭୂ-
ଷ୍ଵାସଜ୍ଜମାନସ୍ୟ ଦୁରଂତଚିଂତୟା ॥ 3 ॥
କଲେଵରେଽସ୍ମିନ୍ ଘଟକୁଡ୍ୟସନ୍ନିଭେ
ନିରୂଢମାନୋ ନରଦେଵ ଇତ୍ୟହମ୍ ।
ଵୃତୋ ରଥେଭାଶ୍ଵପଦାତ୍ୟନୀକପୈର୍ଗାଂ
ପର୍ୟଟଂସ୍ତ୍ଵାଗଣୟନ୍ ସୁଦୁର୍ମଦଃ ॥ 4 ॥
ପ୍ରମତ୍ତମୁଚ୍ଚୈରିତି କୃତ୍ୟଚିଂତୟା
ପ୍ରଭୁଦ୍ଧଲୋଭଂ ଵିଷୟେଷୁ ଲାଲସମ୍ ।
ତ୍ଵମପ୍ରମତ୍ତଃ ସହସାଽଭିପଦ୍ୟସେ
କ୍ଷୁଲ୍ଲେଲିହାନୋଽହିରିଵାଖୁମଂତକଃ ॥ 5 ॥
ପୁରା ରଥୈର୍ହେମପରିଷ୍କୃତୈଶ୍ଚରନ୍
ମତଂଗଜୈର୍ଵା ନରଦେଵସଂଜ୍ଞିତଃ ।
ସ ଏଵ କାଲେନ ଦୁରତ୍ୟୟେନ ତେ
କଲେଵରୋ ଵିଟ୍କୃମିଭସ୍ମସଂଜ୍ଞିତଃ ॥ 6 ॥
ନିର୍ଜିତ୍ୟ ଦିକ୍ଚକ୍ରମଭୂତଵିଗ୍ରହୋ
ଵରାସନସ୍ଥଃ ସମରାଜଵଂଦିତଃ ।
ଗୃହେଷୁ ମୈଥୁନ୍ୟସୁଖେଷୁ ୟୋଷିତାଂ
କ୍ରୀଡାମୃଗ ପୂରୁଷ ଈଶ ନୀୟତେ ॥ 7 ॥
କରୋତି କର୍ମାଣି ତପଃସୁ ନିଷ୍ଠିତୋ
ନିଵୃତ୍ତଭୋଗସ୍ତଦପେକ୍ଷୟା ଦଦତ୍ ।
ପୁନଶ୍ଚ ଭୂୟେୟମହଂ ସ୍ଵରାଡିତି
ପ୍ରବୁଦ୍ଧତର୍ଷୋ ନ ସୁଖାୟ କଲ୍ପତେ ॥ 8 ॥
ଭଵାପଵର୍ଗୋ ଭ୍ରମତୋ ୟଦା ଭଵେ-
ଜ୍ଜନସ୍ୟ ତର୍ହ୍ୟଚ୍ୟୁତ ସତ୍ସମାଗମଃ ।
ସତ୍ସଂଗମୋ ୟର୍ହି ତଦୈଵ ସଦ୍ଗତୌ
ପରାଵରେଶେ ତ୍ଵୟି ଜାୟତେ ମତିଃ ॥ 9 ॥
ମନ୍ୟେ ମମାନୁଗ୍ରହ ଈଶ ତେ କୃତୋ
ରାଜ୍ୟାନୁବଂଧାପଗମୋ ୟଦୃଚ୍ଛୟା ।
ୟଃ ପ୍ରାର୍ଥ୍ୟତେ ସାଧୁଭିରେକଚର୍ୟୟା
ଵନଂ ଵିଵିକ୍ଷଦ୍ଭିରଖଂଡଭୂମିପୈଃ ॥ 10 ॥
ନ କାମୟେଽନ୍ୟଂ ତଵ ପାଦସେଵନାଦ୍-
ଅକିଂଚନପ୍ରାର୍ଥ୍ୟତମାଦ୍ଵରଂ ଵିଭୋ ।
ଆରାଧ୍ୟ କସ୍ତ୍ଵାଂ ହ୍ୟପଵର୍ଗଦଂ ହରେ
ଵୃଣୀତ ଆର୍ୟୋ ଵରମାତ୍ମବଂଧନମ୍ ॥ 11 ॥
ତସ୍ମାଦ୍ଵିସୃଜ୍ୟାଶିଷ ଈଶ ସର୍ଵତୋ
ରଜସ୍ତମଃସତ୍ତ୍ଵଗୁଣାନୁବଂଧନାଃ ।
ନିରଂଜନଂ ନିର୍ଗୁଣମଦ୍ଵୟଂ ପରଂ
ତ୍ଵାଂ ଜ୍ଞପ୍ତିମାତ୍ରଂ ପୁରୁଷଂ ଵ୍ରଜାମ୍ୟହମ୍ ॥ 12 ॥
ଚିରମିହ ଵୃଜିନାର୍ତସ୍ତପ୍ୟମାନୋଽନୁତାପୈଃ
ଅଵିତୃଷଷଡମିତ୍ରୋ ଲବ୍ଧଶାଂତିଃ କଥଂଚିତ୍ ।
ଶରଣଦ ସମୁପେତସ୍ତ୍ଵତ୍ପଦାବ୍ଜଂ ପରାତ୍ମନ୍
ଅଭୟମମୃତମଶୋକଂ ପାହି ମାଽପନ୍ନମୀଶ ॥ 13 ॥

ଇତି ଶ୍ରୀମଦ୍ଭାଗଵତାଂତର୍ଗତା ମୁଚୁକୁଂଦକୃତା ଶ୍ରୀଵିଷ୍ଣୁସ୍ତୁତିଃ ସମାପ୍ତା ।

Browse Related Categories: