ত্বত্তীরে মণিকর্ণিকে হরিহরৌ সায়ুজ্যমুক্তিপ্রদৌ
বাদংতৌ কুরুতঃ পরস্পরমুভৌ জংতোঃ প্রয়াণোত্সবে ।
মদ্রূপো মনুজোঽযমস্তু হরিণা প্রোক্তঃ শিবস্তত্ক্ষণা-
ত্তন্মধ্য়াদ্ভৃগুলাংছনো গরুডগঃ পীতাংবরো নির্গতঃ ॥ 1 ॥
ইংদ্রাদ্য়াস্ত্রিদশাঃ পতংতি নিযতং ভোগক্ষয়ে যে পুন-
র্জায়ংতে মনুজাস্ততোপি পশবঃ কীটাঃ পতংগাদয়ঃ ।
যে মাতর্মণিকর্ণিকে তব জলে মজ্জংতি নিষ্কল্মষাঃ
সায়ুজ্য়েঽপি কিরীটকৌস্তুভধরা নারাযণাঃ স্য়ুর্নরাঃ ॥ 2 ॥
কাশী ধন্যতমা বিমুক্তনগরী সালংকৃতা গংগয়া
তত্রেয়ং মণিকর্ণিকা সুখকরী মুক্তির্হি তত্কিংকরী ।
স্বর্লোকস্তুলিতঃ সহৈব বিবুধৈঃ কাশ্য়া সমং ব্রহ্মণা
কাশী ক্ষোণিতলে স্থিতা গুরুতরা স্বর্গো লঘুত্বং গতঃ ॥ 3 ॥
গংগাতীরমনুত্তমং হি সকলং তত্রাপি কাশ্য়ুত্তমা
তস্য়াং সা মণিকর্ণিকোত্তমতমা যেত্রেশ্বরো মুক্তিদঃ ।
দেবানামপি দুর্লভং স্থলমিদং পাপৌঘনাশক্ষমং
পূর্বোপার্জিতপুণ্যপুংজগমকং পুণ্য়ৈর্জনৈঃ প্রাপ্যতে ॥ 4 ॥
দুঃখাংভোধিগতো হি জংতুনিবহস্তেষাং কথং নিষ্কৃতিঃ
জ্ঞাত্বা তদ্ধি বিরিংচিনা বিরচিতা বারাণসী শর্মদা ।
লোকাঃস্বর্গসুখাস্ততোঽপি লঘবো ভোগাংতপাতপ্রদাঃ
কাশী মুক্তিপুরী সদা শিবকরী ধর্মার্থমোক্ষপ্রদা ॥ 5 ॥
একো বেণুধরো ধরাধরধরঃ শ্রীবত্সভূষাধরঃ
যোঽপ্য়েকঃ কিল শংকরো বিষধরো গংগাধরো মাধবঃ ।
যে মাতর্মণিকর্ণিকে তব জলে মজ্জংতি তে মানবাঃ
রুদ্রা বা হরয়ো ভবংতি বহবস্তেষাং বহুত্বং কথম্ ॥ 6 ॥
ত্বত্তীরে মরণং তু মংগলকরং দেবৈরপি শ্লাঘ্যতে
শক্রস্তং মনুজং সহস্রনযনৈর্দ্রষ্টুং সদা তত্পরঃ ।
আয়াংতং সবিতা সহস্রকিরণৈঃ প্রত্য়ুদ্গতোঽভূত্সদা
পুণ্য়োঽসৌ বৃষগোঽথবা গরুডগঃ কিং মংদিরং যাস্যতি ॥ 7 ॥
মধ্য়াহ্নে মণিকর্ণিকাস্নপনজং পুণ্য়ং ন বক্তুং ক্ষমঃ
স্বীয়ৈরব্ধশতৈশ্চতুর্মুখধরো বেদার্থদীক্ষাগুরুঃ ।
যোগাভ্য়াসবলেন চংদ্রশিখরস্তত্পুণ্যপারংগত-
স্ত্বত্তীরে প্রকরোতি সুপ্তপুরুষং নারাযণং বা শিবম্ ॥ 8 ॥
কৃচ্ছ্রৈ কোটিশতৈঃ স্বপাপনিধনং যচ্চাশ্বমেধৈঃ ফলং
তত্সর্বে মণিকর্ণিকাস্নপনজে পুণ্য়ে প্রবিষ্টং ভবেত্ ।
স্নাত্বা স্তোত্রমিদং নরঃ পঠতি চেত্সংসারপাথোনিধিং
তীর্ত্বা পল্বলবত্প্রয়াতি সদনং তেজোময়ং ব্রহ্মণঃ ॥ 9 ॥
