𑌕𑌦𑌂𑌬𑌵𑌨𑌚𑌾𑌰𑌿𑌣𑍀𑌂 𑌮𑍁𑌨𑌿𑌕𑌦𑌂𑌬𑌕𑌾𑌦𑌂𑌬𑌿𑌨𑍀𑌂
𑌨𑌿𑌤𑌂𑌬𑌜𑌿𑌤𑌭𑍂𑌧𑌰𑌾𑌂 𑌸𑍁𑌰𑌨𑌿𑌤𑌂𑌬𑌿𑌨𑍀𑌸𑍇𑌵𑌿𑌤𑌾𑌮𑍍 ।
𑌨𑌵𑌾𑌂𑌬𑍁𑌰𑍁𑌹𑌲𑍋𑌚𑌨𑌾𑌮𑌭𑌿𑌨𑌵𑌾𑌂𑌬𑍁𑌦𑌶𑍍𑌯𑌾𑌮𑌲𑌾𑌂
𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌂𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌮𑌾𑌶𑍍𑌰𑌯𑍇 ॥ 1 ॥
𑌕𑌦𑌂𑌬𑌵𑌨𑌵𑌾𑌸𑌿𑌨𑍀𑌂 𑌕𑌨𑌕𑌵𑌲𑍍𑌲𑌕𑍀𑌧𑌾𑌰𑌿𑌣𑍀𑌂
𑌮𑌹𑌾𑌰𑍍𑌹𑌮𑌣𑌿𑌹𑌾𑌰𑌿𑌣𑍀𑌂 𑌮𑍁𑌖𑌸𑌮𑍁𑌲𑍍𑌲𑌸𑌦𑍍𑌵𑌾𑌰𑍁𑌣𑍀𑌮𑍍 ।
𑌦𑌯𑌾𑌵𑌿𑌭𑌵𑌕𑌾𑌰𑌿𑌣𑍀𑌂 𑌵𑌿𑌶𑌦𑌰𑍋𑌚𑌨𑌾𑌚𑌾𑌰𑌿𑌣𑍀𑌂
𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌂𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌮𑌾𑌶𑍍𑌰𑌯𑍇 ॥ 2 ॥
𑌕𑌦𑌂𑌬𑌵𑌨𑌶𑌾𑌲𑌯𑌾 𑌕𑍁𑌚𑌭𑌰𑍋𑌲𑍍𑌲𑌸𑌨𑍍𑌮𑌾𑌲𑌯𑌾
𑌕𑍁𑌚𑍋𑌪𑌮𑌿𑌤𑌶𑍈𑌲𑌯𑌾 𑌗𑍁𑌰𑍁𑌕𑍃𑌪𑌾𑌲𑌸𑌦𑍍𑌵𑍇𑌲𑌯𑌾 ।
𑌮𑌦𑌾𑌰𑍁𑌣𑌕𑌪𑍋𑌲𑌯𑌾 𑌮𑌧𑍁𑌰𑌗𑍀𑌤𑌵𑌾𑌚𑌾𑌲𑌯𑌾
𑌕𑌯𑌾𑌪𑌿 𑌘𑌨𑌨𑍀𑌲𑌯𑌾 𑌕𑌵𑌚𑌿𑌤𑌾 𑌵𑌯𑌂 𑌲𑍀𑌲𑌯𑌾 ॥ 3 ॥
𑌕𑌦𑌂𑌬𑌵𑌨𑌮𑌧𑍍𑌯𑌗𑌾𑌂 𑌕𑌨𑌕𑌮𑌂𑌡𑌲𑍋𑌪𑌸𑍍𑌥𑌿𑌤𑌾𑌂
𑌷𑌡𑌂𑌬𑍁𑌰𑍁𑌹𑌵𑌾𑌸𑌿𑌨𑍀𑌂 𑌸𑌤𑌤𑌸𑌿𑌦𑍍𑌧𑌸𑍌𑌦𑌾𑌮𑌿𑌨𑍀𑌮𑍍 ।
𑌵𑌿𑌡𑌂𑌬𑌿𑌤𑌜𑌪𑌾𑌰𑍁𑌚𑌿𑌂 𑌵𑌿𑌕𑌚𑌚𑌂𑌦𑍍𑌰𑌚𑍂𑌡𑌾𑌮𑌣𑌿𑌂
𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌂𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌮𑌾𑌶𑍍𑌰𑌯𑍇 ॥ 4 ॥
𑌕𑍁𑌚𑌾𑌂𑌚𑌿𑌤𑌵𑌿𑌪𑌂𑌚𑌿𑌕𑌾𑌂 𑌕𑍁𑌟𑌿𑌲𑌕𑍁𑌂𑌤𑌲𑌾𑌲𑌂𑌕𑍃𑌤𑌾𑌂
𑌕𑍁𑌶𑍇𑌶𑌯𑌨𑌿𑌵𑌾𑌸𑌿𑌨𑍀𑌂 𑌕𑍁𑌟𑌿𑌲𑌚𑌿𑌤𑍍𑌤𑌵𑌿𑌦𑍍𑌵𑍇𑌷𑌿𑌣𑍀𑌮𑍍 ।
𑌮𑌦𑌾𑌰𑍁𑌣𑌵𑌿𑌲𑍋𑌚𑌨𑌾𑌂 𑌮𑌨𑌸𑌿𑌜𑌾𑌰𑌿𑌸𑌮𑍍𑌮𑍋𑌹𑌿𑌨𑍀𑌂
𑌮𑌤𑌂𑌗𑌮𑍁𑌨𑌿𑌕𑌨𑍍𑌯𑌕𑌾𑌂 𑌮𑌧𑍁𑌰𑌭𑌾𑌷𑌿𑌣𑍀𑌮𑌾𑌶𑍍𑌰𑌯𑍇 ॥ 5 ॥
𑌸𑍍𑌮𑌰𑍇𑌤𑍍𑌪𑍍𑌰𑌥𑌮𑌪𑍁𑌷𑍍𑌪𑌿𑌣𑍀𑌂 𑌰𑍁𑌧𑌿𑌰𑌬𑌿𑌂𑌦𑍁𑌨𑍀𑌲𑌾𑌂𑌬𑌰𑌾𑌂
𑌗𑍃𑌹𑍀𑌤𑌮𑌧𑍁𑌪𑌾𑌤𑍍𑌰𑌿𑌕𑌾𑌂 𑌮𑌦𑌵𑌿𑌘𑍂𑌰𑍍𑌣𑌨𑍇𑌤𑍍𑌰𑌾𑌂𑌚𑌲𑌾𑌮𑍍 ।
𑌘𑌨𑌸𑍍𑌤𑌨𑌭𑌰𑍋𑌨𑍍𑌨𑌤𑌾𑌂 𑌗𑌲𑌿𑌤𑌚𑍂𑌲𑌿𑌕𑌾𑌂 𑌶𑍍𑌯𑌾𑌮𑌲𑌾𑌂
𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌂𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌮𑌾𑌶𑍍𑌰𑌯𑍇 ॥ 6 ॥
𑌸𑌕𑍁𑌂𑌕𑍁𑌮𑌵𑌿𑌲𑍇𑌪𑌨𑌾𑌮𑌲𑌕𑌚𑍁𑌂𑌬𑌿𑌕𑌸𑍍𑌤𑍂𑌰𑌿𑌕𑌾𑌂
𑌸𑌮𑌂𑌦𑌹𑌸𑌿𑌤𑍇𑌕𑍍𑌷𑌣𑌾𑌂 𑌸𑌶𑌰𑌚𑌾𑌪𑌪𑌾𑌶𑌾𑌂𑌕𑍁𑌶𑌾𑌮𑍍 ।
𑌅𑌶𑍇𑌷𑌜𑌨𑌮𑍋𑌹𑌿𑌨𑍀𑌮𑌰𑍁𑌣𑌮𑌾𑌲𑍍𑌯𑌭𑍂𑌷𑌾𑌂𑌬𑌰𑌾𑌂
𑌜𑌪𑌾𑌕𑍁𑌸𑍁𑌮𑌭𑌾𑌸𑍁𑌰𑌾𑌂 𑌜𑌪𑌵𑌿𑌧𑍌 𑌸𑍍𑌮𑌰𑌾𑌮𑍍𑌯𑌂𑌬𑌿𑌕𑌾𑌮𑍍 ॥ ॥
𑌪𑍁𑌰𑌂𑌦𑌰𑌪𑍁𑌰𑌂𑌧𑍍𑌰𑌿𑌕𑌾𑌚𑌿𑌕𑍁𑌰𑌬𑌂𑌧𑌸𑍈𑌰𑌂𑌧𑍍𑌰𑌿𑌕𑌾𑌂
𑌪𑌿𑌤𑌾𑌮𑌹𑌪𑌤𑌿𑌵𑍍𑌰𑌤𑌾𑌪𑌟𑍁𑌪𑌟𑍀𑌰𑌚𑌰𑍍𑌚𑌾𑌰𑌤𑌾𑌮𑍍 ।
𑌮𑍁𑌕𑍁𑌂𑌦𑌰𑌮𑌣𑍀𑌮𑌣𑍀𑌲𑌸𑌦𑌲𑌂𑌕𑍍𑌰𑌿𑌯𑌾𑌕𑌾𑌰𑌿𑌣𑍀𑌂
𑌭𑌜𑌾𑌮𑌿 𑌭𑍁𑌵𑌨𑌾𑌂𑌬𑌿𑌕𑌾𑌂 𑌸𑍁𑌰𑌵𑌧𑍂𑌟𑌿𑌕𑌾𑌚𑍇𑌟𑌿𑌕𑌾𑌮𑍍 ॥ ॥
𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍍𑌯𑌷𑍍𑌟𑌕𑌮𑍍 ।
