॥ ഇംദ്രാദയോ ഊചുഃ ॥
ജടാകടാഹയുക്തമുംഡപ്രാംതവിസ്തൃതം ഹരേഃ
അപാംഗക്രുദ്ധദര്ശനോപഹാര ചൂര്ണകുംതലഃ ।
പ്രചംഡവേഗകാരണേന പിംജലഃ പ്രതിഗ്രഹഃ
സ ക്രുദ്ധതാംഡവസ്വരൂപധൃഗ്വിരാജതേ ഹരിഃ ॥ 1 ॥
അഥേഹ വ്യൂഹപാര്ഷ്ണിപ്രാഗ്വരൂഥിനീ നിഷംഗിനഃ
തഥാംജനേയൃക്ഷഭൂപസൌരബാലിനംദനാഃ ।
പ്രചംഡദാനവാനലം സമുദ്രതുല്യനാശകാഃ
നമോഽസ്തുതേ സുരാരിചക്രഭക്ഷകായ മൃത്യവേ ॥ 2 ॥
കലേവരേ കഷായവാസഹസ്തകാര്മുകം ഹരേഃ
ഉപാസനോപസംഗമാര്ഥധൃഗ്വിശാഖമംഡലമ് ।
ഹൃദി സ്മരന് ദശാകൃതേഃ കുചക്രചൌര്യപാതകം
വിദാര്യതേ പ്രചംഡതാംഡവാകൃതിഃ സ രാഘവഃ ॥ 3 ॥
പ്രകാംഡകാംഡകാംഡകര്മദേഹഛിദ്രകാരണം
കുകൂടകൂടകൂടകൌണപാത്മജാഭിമര്ദനമ് ।
തഥാഗുണംഗുണംഗുണംഗുണംഗുണേന ദര്ശയന്
കൃപീടകേശലംഘ്യമീശമേകരാഘവം ഭജേ ॥ 4 ॥
സവാനരാന്വിതഃ തഥാപ്ലുതം ശരീരമസൃജാ
വിരോധിമേദസാഗ്രമാംസഗുല്മകാലഖംഡനൈഃ ।
മഹാസിപാശശക്തിദംഡധാരകൈഃ നിശാചരൈഃ
പരിപ്ലുതം കൃതം ശവൈശ്ച യേന ഭൂമിമംഡലമ് ॥ 5 ॥
വിശാലദംഷ്ട്രകുംഭകര്ണമേഘരാവകാരകൈഃ
തഥാഹിരാവണാദ്യകംപനാതികായജിത്വരൈഃ ।
സുരക്ഷിതാം മനോരമാം സുവര്ണലംകനാഗരീം
നിജാസ്ത്രസംകുലൈരഭേദ്യകോടമര്ദനം കൃതഃ ॥ 6 ॥
പ്രബുദ്ധബുദ്ധയോഗിഭിഃ മഹര്ഷിസിദ്ധചാരണൈഃ
വിദേഹജാപ്രിയഃ സദാനുതോ സ്തുതോ ച സ്വസ്തിഭിഃ ।
പുലസ്ത്യനംദനാത്മജസ്യ മുംഡരുംഡഛേദനം
സുരാരിയൂഥഭേദനം വിലോകയാമി സാംപ്രതമ് ॥ 7 ॥
കരാലകാലരൂപിണം മഹോഗ്രചാപധാരിണം
കുമോഹഗ്രസ്തമര്കടാച്ഛഭല്ലത്രാണകാരണമ് ।
വിഭീഷണാദിഭിഃ സദാഭിഷേണനേഽഭിചിംതകം
ഭജാമി ജിത്വരം തഥോര്മിലാപതേഃ പ്രിയാഗ്രജമ് ॥ 8 ॥
ഇതസ്തതഃ മുഹുര്മുഹുഃ പരിഭ്രമംതി കൌംതികാഃ
അനുപ്ലവപ്രവാഹപ്രാസികാശ്ച വൈജയംതികാഃ ।
മൃധേ പ്രഭാകരസ്യ വംശകീര്തിനോഽപദാനതാം
അഭിക്രമേണ രാഘവസ്യ താംഡവാകൃതേഃ ഗതാഃ ॥ 9 ॥
നിരാകൃതിം നിരാമയം തഥാദിസൃഷ്ടികാരണം
മഹോജ്ജ്വലം അജം വിഭും പുരാണപൂരുഷം ഹരിമ് ।
നിരംകുശം നിജാത്മഭക്തജന്മമൃത്യുനാശകം
അധര്മമാര്ഗഘാതകം കപീശവ്യൂഹനായകമ് ॥ 10 ॥
കരാലപാലിചക്രശൂലതീക്ഷ്ണഭിംദിപാലകൈഃ
കുഠാരസർവലാസിധേനുകേലിശല്യമുദ്ഗരൈഃ ।
സുപുഷ്കരേണ പുഷ്കരാംച പുഷ്കരാസ്ത്രമാരണൈഃ
സദാപ്ലുതം നിശാചരൈഃ സുപുഷ്കരംച പുഷ്കരമ് ॥ 11 ॥
പ്രപന്നഭക്തരക്ഷകം വസുംധരാത്മജാപ്രിയം
കപീശവൃംദസേവിതം സമസ്തദൂഷണാപഹമ് ।
സുരാസുരാഭിവംദിതം നിശാചരാംതകം വിഭും
ജഗത്പ്രശസ്തികാരണം ഭജേഹ രാമമീശ്വരമ് ॥ 12 ॥
॥ ഇതി ശ്രീഭാഗവതാനംദഗുരുണാ വിരചിതേ ശ്രീരാഘവേംദ്രചരിതേ
ഇംദ്രാദി ദേവഗണൈഃ കൃതം ശ്രീരാമതാംഡവസ്തോത്രം സംപൂര്ണമ് ॥
