॥ ଇଂଦ୍ରାଦୟୋ ଊଚୁଃ ॥
ଜଟାକଟାହୟୁକ୍ତମୁଂଡପ୍ରାଂତଵିସ୍ତୃତଂ ହରେଃ
ଅପାଂଗକ୍ରୁଦ୍ଧଦର୍ଶନୋପହାର ଚୂର୍ଣକୁଂତଲଃ ।
ପ୍ରଚଂଡଵେଗକାରଣେନ ପିଂଜଲଃ ପ୍ରତିଗ୍ରହଃ
ସ କ୍ରୁଦ୍ଧତାଂଡଵସ୍ଵରୂପଧୃଗ୍ଵିରାଜତେ ହରିଃ ॥ 1 ॥
ଅଥେହ ଵ୍ୟୂହପାର୍ଷ୍ଣିପ୍ରାଗ୍ଵରୂଥିନୀ ନିଷଂଗିନଃ
ତଥାଂଜନେୟୃକ୍ଷଭୂପସୌରବାଲିନଂଦନାଃ ।
ପ୍ରଚଂଡଦାନଵାନଲଂ ସମୁଦ୍ରତୁଲ୍ୟନାଶକାଃ
ନମୋଽସ୍ତୁତେ ସୁରାରିଚକ୍ରଭକ୍ଷକାୟ ମୃତ୍ୟଵେ ॥ 2 ॥
କଲେଵରେ କଷାୟଵାସହସ୍ତକାର୍ମୁକଂ ହରେଃ
ଉପାସନୋପସଂଗମାର୍ଥଧୃଗ୍ଵିଶାଖମଂଡଲମ୍ ।
ହୃଦି ସ୍ମରନ୍ ଦଶାକୃତେଃ କୁଚକ୍ରଚୌର୍ୟପାତକଂ
ଵିଦାର୍ୟତେ ପ୍ରଚଂଡତାଂଡଵାକୃତିଃ ସ ରାଘଵଃ ॥ 3 ॥
ପ୍ରକାଂଡକାଂଡକାଂଡକର୍ମଦେହଛିଦ୍ରକାରଣଂ
କୁକୂଟକୂଟକୂଟକୌଣପାତ୍ମଜାଭିମର୍ଦନମ୍ ।
ତଥାଗୁଣଂଗୁଣଂଗୁଣଂଗୁଣଂଗୁଣେନ ଦର୍ଶୟନ୍
କୃପୀଟକେଶଲଂଘ୍ୟମୀଶମେକରାଘଵଂ ଭଜେ ॥ 4 ॥
ସଵାନରାନ୍ଵିତଃ ତଥାପ୍ଲୁତଂ ଶରୀରମସୃଜା
ଵିରୋଧିମେଦସାଗ୍ରମାଂସଗୁଲ୍ମକାଲଖଂଡନୈଃ ।
ମହାସିପାଶଶକ୍ତିଦଂଡଧାରକୈଃ ନିଶାଚରୈଃ
ପରିପ୍ଲୁତଂ କୃତଂ ଶଵୈଶ୍ଚ ୟେନ ଭୂମିମଂଡଲମ୍ ॥ 5 ॥
ଵିଶାଲଦଂଷ୍ଟ୍ରକୁଂଭକର୍ଣମେଘରାଵକାରକୈଃ
ତଥାହିରାଵଣାଦ୍ୟକଂପନାତିକାୟଜିତ୍ଵରୈଃ ।
ସୁରକ୍ଷିତାଂ ମନୋରମାଂ ସୁଵର୍ଣଲଂକନାଗରୀଂ
ନିଜାସ୍ତ୍ରସଂକୁଲୈରଭେଦ୍ୟକୋଟମର୍ଦନଂ କୃତଃ ॥ 6 ॥
ପ୍ରବୁଦ୍ଧବୁଦ୍ଧୟୋଗିଭିଃ ମହର୍ଷିସିଦ୍ଧଚାରଣୈଃ
ଵିଦେହଜାପ୍ରିୟଃ ସଦାନୁତୋ ସ୍ତୁତୋ ଚ ସ୍ଵସ୍ତିଭିଃ ।
ପୁଲସ୍ତ୍ୟନଂଦନାତ୍ମଜସ୍ୟ ମୁଂଡରୁଂଡଛେଦନଂ
ସୁରାରିୟୂଥଭେଦନଂ ଵିଲୋକୟାମି ସାଂପ୍ରତମ୍ ॥ 7 ॥
କରାଲକାଲରୂପିଣଂ ମହୋଗ୍ରଚାପଧାରିଣଂ
କୁମୋହଗ୍ରସ୍ତମର୍କଟାଚ୍ଛଭଲ୍ଲତ୍ରାଣକାରଣମ୍ ।
ଵିଭୀଷଣାଦିଭିଃ ସଦାଭିଷେଣନେଽଭିଚିଂତକଂ
ଭଜାମି ଜିତ୍ଵରଂ ତଥୋର୍ମିଲାପତେଃ ପ୍ରିୟାଗ୍ରଜମ୍ ॥ 8 ॥
ଇତସ୍ତତଃ ମୁହୁର୍ମୁହୁଃ ପରିଭ୍ରମଂତି କୌଂତିକାଃ
ଅନୁପ୍ଲଵପ୍ରଵାହପ୍ରାସିକାଶ୍ଚ ଵୈଜୟଂତିକାଃ ।
ମୃଧେ ପ୍ରଭାକରସ୍ୟ ଵଂଶକୀର୍ତିନୋଽପଦାନତାଂ
ଅଭିକ୍ରମେଣ ରାଘଵସ୍ୟ ତାଂଡଵାକୃତେଃ ଗତାଃ ॥ 9 ॥
ନିରାକୃତିଂ ନିରାମୟଂ ତଥାଦିସୃଷ୍ଟିକାରଣଂ
ମହୋଜ୍ଜ୍ଵଲଂ ଅଜଂ ଵିଭୁଂ ପୁରାଣପୂରୁଷଂ ହରିମ୍ ।
ନିରଂକୁଶଂ ନିଜାତ୍ମଭକ୍ତଜନ୍ମମୃତ୍ୟୁନାଶକଂ
ଅଧର୍ମମାର୍ଗଘାତକଂ କପୀଶଵ୍ୟୂହନାୟକମ୍ ॥ 10 ॥
କରାଲପାଲିଚକ୍ରଶୂଲତୀକ୍ଷ୍ଣଭିଂଦିପାଲକୈଃ
କୁଠାରସର୍ଵଲାସିଧେନୁକେଲିଶଲ୍ୟମୁଦ୍ଗରୈଃ ।
ସୁପୁଷ୍କରେଣ ପୁଷ୍କରାଂଚ ପୁଷ୍କରାସ୍ତ୍ରମାରଣୈଃ
ସଦାପ୍ଲୁତଂ ନିଶାଚରୈଃ ସୁପୁଷ୍କରଂଚ ପୁଷ୍କରମ୍ ॥ 11 ॥
ପ୍ରପନ୍ନଭକ୍ତରକ୍ଷକଂ ଵସୁଂଧରାତ୍ମଜାପ୍ରିୟଂ
କପୀଶଵୃଂଦସେଵିତଂ ସମସ୍ତଦୂଷଣାପହମ୍ ।
ସୁରାସୁରାଭିଵଂଦିତଂ ନିଶାଚରାଂତକଂ ଵିଭୁଂ
ଜଗତ୍ପ୍ରଶସ୍ତିକାରଣଂ ଭଜେହ ରାମମୀଶ୍ଵରମ୍ ॥ 12 ॥
॥ ଇତି ଶ୍ରୀଭାଗଵତାନଂଦଗୁରୁଣା ଵିରଚିତେ ଶ୍ରୀରାଘଵେଂଦ୍ରଚରିତେ
ଇଂଦ୍ରାଦି ଦେଵଗଣୈଃ କୃତଂ ଶ୍ରୀରାମତାଂଡଵସ୍ତୋତ୍ରଂ ସଂପୂର୍ଣମ୍ ॥
