॥ indrādayō ūchuḥ ॥
jaṭākaṭāhayuktamuṇḍaprāntavistṛtaṃ harēḥ
apāṅgakruddhadarśanōpahāra chūrṇakuntalaḥ ।
prachaṇḍavēgakāraṇēna piñjalaḥ pratigrahaḥ
sa kruddhatāṇḍavasvarūpadhṛgvirājatē hariḥ ॥ 1 ॥
athēha vyūhapārṣṇiprāgvarūthinī niṣaṅginaḥ
tathāñjanēyṛkṣabhūpasaurabālinandanāḥ ।
prachaṇḍadānavānalaṃ samudratulyanāśakāḥ
namō'stutē surārichakrabhakṣakāya mṛtyavē ॥ 2 ॥
kalēvarē kaṣāyavāsahastakārmukaṃ harēḥ
upāsanōpasaṅgamārthadhṛgviśākhamaṇḍalam ।
hṛdi smaran daśākṛtēḥ kuchakrachauryapātakaṃ
vidāryatē prachaṇḍatāṇḍavākṛtiḥ sa rāghavaḥ ॥ 3 ॥
prakāṇḍakāṇḍakāṇḍakarmadēhaChidrakāraṇaṃ
kukūṭakūṭakūṭakauṇapātmajābhimardanam ।
tathāguṇaṅguṇaṅguṇaṅguṇaṅguṇēna darśayan
kṛpīṭakēśalaṅghyamīśamēkarāghavaṃ bhajē ॥ 4 ॥
savānarānvitaḥ tathāplutaṃ śarīramasṛjā
virōdhimēdasāgramāṃsagulmakālakhaṇḍanaiḥ ।
mahāsipāśaśaktidaṇḍadhārakaiḥ niśācharaiḥ
pariplutaṃ kṛtaṃ śavaiścha yēna bhūmimaṇḍalam ॥ 5 ॥
viśāladaṃṣṭrakumbhakarṇamēgharāvakārakaiḥ
tathāhirāvaṇādyakampanātikāyajitvaraiḥ ।
surakṣitāṃ manōramāṃ suvarṇalaṅkanāgarīṃ
nijāstrasaṅkulairabhēdyakōṭamardanaṃ kṛtaḥ ॥ 6 ॥
prabuddhabuddhayōgibhiḥ maharṣisiddhachāraṇaiḥ
vidēhajāpriyaḥ sadānutō stutō cha svastibhiḥ ।
pulastyanandanātmajasya muṇḍaruṇḍaChēdanaṃ
surāriyūthabhēdanaṃ vilōkayāmi sāmpratam ॥ 7 ॥
karālakālarūpiṇaṃ mahōgrachāpadhāriṇaṃ
kumōhagrastamarkaṭāchChabhallatrāṇakāraṇam ।
vibhīṣaṇādibhiḥ sadābhiṣēṇanē'bhichintakaṃ
bhajāmi jitvaraṃ tathōrmilāpatēḥ priyāgrajam ॥ 8 ॥
itastataḥ muhurmuhuḥ paribhramanti kauntikāḥ
anuplavapravāhaprāsikāścha vaijayantikāḥ ।
mṛdhē prabhākarasya vaṃśakīrtinō'padānatāṃ
abhikramēṇa rāghavasya tāṇḍavākṛtēḥ gatāḥ ॥ 9 ॥
nirākṛtiṃ nirāmayaṃ tathādisṛṣṭikāraṇaṃ
mahōjjvalaṃ ajaṃ vibhuṃ purāṇapūruṣaṃ harim ।
niraṅkuśaṃ nijātmabhaktajanmamṛtyunāśakaṃ
adharmamārgaghātakaṃ kapīśavyūhanāyakam ॥ 10 ॥
karālapālichakraśūlatīkṣṇabhindipālakaiḥ
kuṭhārasarvalāsidhēnukēliśalyamudgaraiḥ ।
supuṣkarēṇa puṣkarāñcha puṣkarāstramāraṇaiḥ
sadāplutaṃ niśācharaiḥ supuṣkarañcha puṣkaram ॥ 11 ॥
prapannabhaktarakṣakaṃ vasundharātmajāpriyaṃ
kapīśavṛndasēvitaṃ samastadūṣaṇāpaham ।
surāsurābhivanditaṃ niśācharāntakaṃ vibhuṃ
jagatpraśastikāraṇaṃ bhajēha rāmamīśvaram ॥ 12 ॥
॥ iti śrībhāgavatānandaguruṇā virachitē śrīrāghavēndracharitē
indrādi dēvagaṇaiḥ kṛtaṃ śrīrāmatāṇḍavastōtraṃ sampūrṇam ॥
