കൈലാസശിഖരേ രമ്യേ ഗൌരീ പപ്രച്ഛ ശംകരമ് ।
ബ്രഹ്മാംഡാഖിലനാഥസ്ത്വം സൃഷ്ടിസംഹാരകാരകഃ ॥ 1 ॥

ത്വമേവ പൂജ്യസേ ലോകൈര്ബ്രഹ്മവിഷ്ണുസുരാദിഭിഃ ।
നിത്യം പഠസി ദേവേശ കസ്യ സ്തോത്രം മഹേശ്വര ॥ 2 ॥

ആശ്ചര്യമിദമത്യംതം ജായതേ മമ ശംകര ।
തത്പ്രാണേശ മഹാപ്രാജ്ഞ സംശയം ഛിംധി മേ പ്രഭോ ॥ 3 ॥

ശ്രീമഹാദേവ ഉവാച-
ധന്യാസി കൃതപുണ്യാസി പാർവതി പ്രാണവല്ലഭേ ।
രഹസ്യാതിരഹസ്യം ച യത്പൃച്ഛസി വരാനനേ ॥ 4 ॥

സ്ത്രീസ്വഭാവാന്മഹാദേവി പുനസ്ത്വം പരിപൃച്ഛസി ।
ഗോപനീയം ഗോപനീയം ഗോപനീയം പ്രയത്നതഃ ॥ 5 ॥

ദത്തേ ച സിദ്ധിഹാനിഃ സ്യാത്തസ്മാദ്യത്നേന ഗോപയേത് ।
ഇദം രഹസ്യം പരമം പുരുഷാര്ഥപ്രദായകമ് ॥ 6 ॥

ധനരത്നൌഘമാണിക്യം തുരംഗം ച ഗജാദികമ് ।
ദദാതി സ്മരണാദേവ മഹാമോക്ഷപ്രദായകമ് ॥ 7 ॥

തത്തേഽഹം സംപ്രവക്ഷ്യാമി ശൃണുഷ്വാവഹിതാ പ്രിയേ ।
യോഽസൌ നിരംജനോ ദേവശ്ചിത്സ്വരൂപീ ജനാര്ദനഃ ॥ 8 ॥

സംസാരസാഗരോത്താരകാരണായ നൃണാം സദാ ।
ശ്രീരംഗാദികരൂപേണ ത്രൈലോക്യം വ്യാപ്യ തിഷ്ഠതി ॥ 9 ॥

തതോ ലോകാ മഹാമൂഢാ വിഷ്ണുഭക്തിവിവര്ജിതാഃ ।
നിശ്ചയം നാധിഗച്ഛംതി പുനര്നാരായണോ ഹരിഃ ॥ 10 ॥

നിരംജനോ നിരാകാരോ ഭക്താനാം പ്രീതികാമദഃ ।
ബൃംദാവനവിഹാരായ ഗോപാലം രൂപമുദ്വഹന് ॥ 11 ॥

മുരളീവാദനാധാരീ രാധായൈ പ്രീതിമാവഹന് ।
അംശാംശേഭ്യഃ സമുന്മീല്യ പൂര്ണരൂപകളായുതഃ ॥ 12 ॥

ശ്രീകൃഷ്ണചംദ്രോ ഭഗവാന് നംദഗോപവരോദ്യതഃ ।
ധരണീരൂപിണീ മാതാ യശോദാ നംദഗേഹിനീ ॥ 13 ॥

ദ്വാഭ്യാം പ്രയാചിതോ നാഥോ ദേവക്യാം വസുദേവതഃ ।
ബ്രഹ്മണാഽഭ്യര്ഥിതോ ദേവോ ദേവൈരപി സുരേശ്വരഃ ॥ 14 ॥

ജാതോഽവന്യാം ച മുദിതോ മുരളീവാചനേച്ഛയാ ।
ശ്രിയാ സാര്ധം വചഃ കൃത്വാ തതോ ജാതോ മഹീതലേ ॥ 15 ॥

സംസാരസാരസർവസ്വം ശ്യാമലം മഹദുജ്ജ്വലമ് ।
ഏതജ്ജ്യോതിരഹം വംദ്യം ചിംതയാമി സനാതനമ് ॥ 16 ॥

ഗൌരതേജോ വിനാ യസ്തു ശ്യാമതേജസ്സമര്ചയേത് ।
ജപേദ്വാ ധ്യായതേ വാപി സ ഭവേത്പാതകീ ശിവേ ॥ 17 ॥

സ ബ്രഹ്മഹാ സുരാപീ ച സ്വര്ണസ്തേയീ ച പംചമഃ ।
ഏതൈര്ദോഷൈർവിലിപ്യേത തേജോഭേദാന്മഹീശ്വരി ॥ 18 ॥

തസ്മാജ്ജ്യോതിരഭൂദ്ദ്വേധാ രാധാമാധവരൂപകമ് ।
തസ്മാദിദം മഹാദേവി ഗോപാലേനൈവ ഭാഷിതമ് ॥ 19 ॥

ദുർവാസസോ മുനേര്മോഹേ കാര്തിക്യാം രാസമംഡലേ ।
തതഃ പൃഷ്ടവതീ രാധാ സംദേഹം ഭേദമാത്മനഃ ॥ 20 ॥

നിരംജനാത്സമുത്പന്നം മായാതീതം ജഗന്മയമ് ।
ശ്രീകൃഷ്ണേന തതഃ പ്രോക്തം രാധായൈ നാരദായ ച ॥ 21 ॥

തതോ നാരദതസ്സർവം വിരളാ വൈഷ്ണവാസ്തഥാ ।
കലൌ ജാനംതി ദേവേശി ഗോപനീയം പ്രയത്നതഃ ॥ 22 ॥

ശഠായ കൃപണായാഥ ഡാംഭികായ സുരേശ്വരി ।
ബ്രഹ്മഹത്യാമവാപ്നോതി തസ്മാദ്യത്നേന ഗോപയേത് ॥ 23 ॥

ഓം അസ്യ ശ്രീഗോപാലസഹസ്രനാമസ്തോത്ര മഹാമംത്രസ്യ ശ്രീനാരദ ഋഷിഃ, അനുഷ്ടുപ് ഛംദഃ, ശ്രീഗോപാലോ ദേവതാ, കാമോ ബീജം, മായാ ശക്തിഃ, ചംദ്രഃ കീലകം, ശ്രീകൃഷ്ണചംദ്ര ഭക്തിരൂപഫലപ്രാപ്തയേ ശ്രീഗോപാലസഹസ്രനാമസ്തോത്രജപേ വിനിയോഗഃ ।

ഓം ഐം ക്ലീം ബീജം, ശ്രീം ഹ്രീം ശക്തിഃ, ശ്രീ ബൃംദാവനനിവാസഃ കീലകം, ശ്രീരാധാപ്രിയം പരം ബ്രഹ്മേതി മംത്രഃ, ധര്മാദി ചതുർവിധ പുരുഷാര്ഥസിദ്ധ്യര്ഥേ ജപേ വിനിയോഗഃ ।

ന്യാസഃ ।
ഓം നാരദ ഋഷയേ നമഃ ശിരസി ।
അനുഷ്ടുപ് ഛംദസേ നമഃ മുഖേ ।
ശ്രീഗോപാലദേവതായൈ നമഃ ഹൃദയേ ।
ക്ലീം കീലകായ നമഃ നാഭൌ ।
ഹ്രീം ശക്തയേ നമഃ ഗുഹ്യേ ।
ശ്രീം കീലകായ നമഃ ഫാലയോഃ ।
ഓം ക്ലീം കൃഷ്ണായ ഗോവിംദായ ഗോപീജനവല്ലഭായ സ്വാഹാ ഇതി മൂലമംത്രഃ ।

കരന്യാസഃ ।
ഓം ക്ലാം അംഗുഷ്ഠാഭ്യാം നമഃ ।
ഓം ക്ലീം തര്ജനീഭ്യാം നമഃ ।
ഓം ക്ലൂം മധ്യമാഭ്യാം നമഃ ।
ഓം ക്ലൈം അനാമികാഭ്യാം നമഃ ।
ഓം ക്ലൌം കനിഷ്ഠികാഭ്യാം നമഃ ।
ഓം ക്ലഃ കരതലകരപൃഷ്ഠാഭ്യാം നമഃ ।

ഹൃദയാദിന്യാസഃ ।
ഓം ക്ലാം ഹൃദയായ നമഃ ।
ഓം ക്ലീം ശിരസേ സ്വാഹാ ।
ഓം ക്ലൂം ശിഖായൈ വഷട് ।
ഓം ക്ലൈം കവചായ ഹുമ് ।
ഓം ക്ലൌം നേത്രത്രയായ വൌഷട് ।
ഓം ക്ലഃ അസ്ത്രായ ഫട് ।

മൂലമംത്രന്യാസഃ ।
ക്ലീം അംഗുഷ്ഠാഭ്യാം നമഃ ।
കൃഷ്ണായ തര്ജനീഭ്യാം നമഃ ।
ഗോവിംദായ മധ്യമാഭ്യാം നമഃ ।
ഗോപീജന അനാമികാഭ്യാം നമഃ ।
വല്ലഭായ കനിഷ്ഠികാഭ്യാം നമഃ ।
സ്വാഹാ കരതലകരപൃഷ്ഠാഭ്യാം നമഃ ।
ക്ലീം ഹൃദയായ നമഃ ।
കൃഷ്ണായ ശിരസേ സ്വാഹാ ।
ഗോവിംദായ ശിഖായൈ വഷട് ।
ഗോപീജന കവചായ ഹുമ് ।
വല്ലഭായ നേത്രത്രയായ വൌഷട് ।
സ്വാഹാ അസ്ത്രായ ഫട് ।

ധ്യാനമ് ।

ഫുല്ലേംദീവരകാംതിമിംദുവദനം ബര്ഹാവതംസപ്രിയം
ശ്രീവത്സാംകമുദാരകൌസ്തുഭധരം പീതാംബരം സുംദരമ് ।
ഗോപീനാം നയനോത്പലാര്ചിതതനും ഗോഗോപസംഘാവൃതം
ഗോവിംദം കലവേണുവാദനപരം ദിവ്യാംഗഭൂഷം ഭജേ ॥ 1 ॥

കസ്തൂരീതിലകം ലലാടഫലകേ വക്ഷസ്സ്ഥലേ കൌസ്തുഭം
നാസാഗ്രേ വരമൌക്തികം കരതലേ വേണും കരേ കംകണമ് ।
സർവാംഗേ ഹരിചംദനം ച കലയന് കംഠേ ച മുക്താവലിം
ഗോപസ്ത്രീപരിവേഷ്ടിതോ വിജയതേ ഗോപാലചൂഡാമണിഃ ॥ 2 ॥

ഓം ക്ലീം ദേവഃ കാമദേവഃ കാമബീജശിരോമണിഃ ।
ശ്രീഗോപാലോ മഹീപാലോ വേദവേദാംഗപാരഗഃ ॥ 1 ॥

കൃഷ്ണഃ കമലപത്രാക്ഷഃ പുംഡരീകഃ സനാതനഃ ।
ഗോപതിര്ഭൂപതിഃ ശാസ്താ പ്രഹര്താ വിശ്വതോമുഖഃ ॥ 2 ॥

ആദികര്താ മഹാകര്താ മഹാകാലഃ പ്രതാപവാന് ।
ജഗജ്ജീവോ ജഗദ്ധാതാ ജഗദ്ഭര്താ ജഗദ്വസുഃ ॥ 3 ॥

മത്സ്യോ ഭീമഃ കുഹൂഭര്താ ഹര്താ വാരാഹമൂര്തിമാന് ।
നാരായണോ ഹൃഷീകേശോ ഗോവിംദോ ഗരുഡധ്വജഃ ॥ 4 ॥

ഗോകുലേശോ മഹാചംദ്രഃ ശർവരീപ്രിയകാരകഃ ।
കമലാമുഖലോലാക്ഷഃ പുംഡരീകഃ ശുഭാവഹഃ ॥ 5 ॥

ദുർവാസാഃ കപിലോ ഭൌമഃ സിംധുസാഗരസംഗമഃ ।
ഗോവിംദോ ഗോപതിര്ഗോത്രഃ കാളിംദീപ്രേമപൂരകഃ ॥ 6 ॥

ഗോപസ്വാമീ ഗോകുലേംദ്രഃ ഗോവര്ധനവരപ്രദഃ ।
നംദാദിഗോകുലത്രാതാ ദാതാ ദാരിദ്ര്യഭംജനഃ ॥ 7 ॥

സർവമംഗളദാതാ ച സർവകാമവരപ്രദഃ ।
ആദികര്താ മഹീഭര്താ സർവസാഗരസിംധുജഃ ॥ 8 ॥

ഗജഗാമീ ഗജോദ്ധാരീ കാമീ കാമകലാനിധിഃ ।
കളംകരഹിതശ്ചംദ്രോ ബിംബാസ്യോ ബിംബസത്തമഃ ॥ 9 ॥

മാലാകാരഃ കൃപാകാരഃ കോകിലസ്വരഭൂഷണഃ ।
രാമോ നീലാംബരോ ദേഹീ ഹലീ ദ്വിവിദമര്ദനഃ ॥ 10 ॥

സഹസ്രാക്ഷപുരീഭേത്താ മഹാമാരീവിനാശനഃ ।
ശിവഃ ശിവതമോ ഭേത്താ ബലാരാതിപ്രപൂജകഃ ॥ 11 ॥

കുമാരീവരദായീ ച വരേണ്യോ മീനകേതനഃ ।
നരോ നാരായണോ ധീരോ ധരാപതിരുദാരധീഃ ॥ 12 ॥

ശ്രീപതിഃ ശ്രീനിധിഃ ശ്രീമാന് മാപതിഃ പ്രതിരാജഹാ ।
ബൃംദാപതിഃ കുലം ഗ്രാമീ ധാമ ബ്രഹ്മസനാതനഃ ॥ 13 ॥

രേവതീരമണോ രാമഃ പ്രിയശ്ചംചലലോചനഃ ।
രാമായണശരീരശ്ച രാമോ രാമഃ ശ്രിയഃപതിഃ ॥ 14 ॥

ശർവരഃ ശർവരീ ശർവഃ സർവത്ര ശുഭദായകഃ ।
രാധാരാധയിതാരാധീ രാധാചിത്തപ്രമോദകഃ ॥ 15 ॥

രാധാരതിസുഖോപേതോ രാധാമോഹനതത്പരഃ ।
രാധാവശീകരോ രാധാഹൃദയാംഭോജഷട്പദഃ ॥ 16 ॥

രാധാലിംഗനസമ്മോദോ രാധാനര്തനകൌതുകഃ ।
രാധാസംജാതസംപ്രീതോ രാധാകാമഫലപ്രദഃ ॥ 17 ॥

ബൃംദാപതിഃ കോകനിധിഃ കോകശോകവിനാശനഃ ।
ചംദ്രാപതിശ്ചംദ്രപതിശ്ചംഡകോദംഡഭംജനഃ ॥ 18 ॥

രാമോ ദാശരഥീ രാമോ ഭൃഗുവംശസമുദ്ഭവഃ ।
ആത്മാരാമോ ജിതക്രോധോ മോഹോ മോഹാംധഭംജനഃ ॥ 19 ॥

വൃഷഭാനുഭവോ ഭാവീ കാശ്യപിഃ കരുണാനിധിഃ ।
കോലാഹലോ ഹലോ ഹാലീ ഹലീ ഹലധരപ്രിയഃ ॥ 20 ॥

രാധാമുഖാബ്ജമാര്താംഡോ ഭാസ്കരോ രവിജോ വിധുഃ ।
വിധിർവിധാതാ വരുണോ വാരുണോ വാരുണീപ്രിയഃ ॥ 21 ॥

രോഹിണീഹൃദയാനംദീ വസുദേവാത്മജോ ബലിഃ ।
നീലാംബരോ രൌഹിണേയോ ജരാസംധവധോഽമലഃ ॥ 22 ॥

നാഗോ ജവാംഭോ വിരുദോ വീരഹാ വരദോ ബലീ ।
ഗോപദോ വിജയീ വിദ്വാന് ശിപിവിഷ്ടഃ സനാതനഃ ॥ 23 ॥

പരശുരാമവചോഗ്രാഹീ വരഗ്രാഹീ സൃഗാലഹാ ।
ദമഘോഷോപദേഷ്ടാ ച രഥഗ്രാഹീ സുദര്ശനഃ ॥ 24 ॥

വീരപത്നീയശസ്ത്രാതാ ജരാവ്യാധിവിഘാതകഃ ।
ദ്വാരകാവാസതത്ത്വജ്ഞോ ഹുതാശനവരപ്രദഃ ॥ 25 ॥

യമുനാവേഗസംഹാരീ നീലാംബരധരഃ പ്രഭുഃ ।
വിഭുഃ ശരാസനോ ധന്വീ ഗണേശോ ഗണനായകഃ ॥ 26 ॥

ലക്ഷ്മണോ ലക്ഷണോ ലക്ഷ്യോ രക്ഷോവംശവിനാശകഃ ।
വാമനോ വാമനീഭൂതോ വമനോ വമനാരുഹഃ ॥ 27 ॥

യശോദാനംദനഃ കര്താ യമളാര്ജുനമുക്തിദഃ ।
ഉലൂഖലീ മഹാമാനോ ദാമബദ്ധാഹ്വയീ ശമീ ॥ 28 ॥

ഭക്താനുകാരീ ഭഗവാന് കേശവോഽചലധാരകഃ ।
കേശിഹാ മധുഹാ മോഹീ വൃഷാസുരവിഘാതകഃ ॥ 29 ॥

അഘാസുരവിഘാതീ ച പൂതനാമോക്ഷദായകഃ ।
കുബ്ജാവിനോദീ ഭഗവാന് കംസമൃത്യുര്മഹാമുഖീ ॥ 30 ॥

അശ്വമേധോ വാജപേയോ ഗോമേധോ നരമേധവാന് ।
കംദര്പകോടിലാവണ്യശ്ചംദ്രകോടിസുശീതലഃ ॥ 31 ॥

രവികോടിപ്രതീകാശോ വായുകോടിമഹാബലഃ ।
ബ്രഹ്മാ ബ്രഹ്മാംഡകര്താ ച കമലാവാംഛിതപ്രദഃ ॥ 32 ॥

കമലീ കമലാക്ഷശ്ച കമലാമുഖലോലുപഃ ।
കമലാവ്രതധാരീ ച കമലാഭഃ പുരംദരഃ ॥ 33 ॥

സൌഭാഗ്യാധികചിത്തശ്ച മഹാമായീ മദോത്കടഃ ।
താടകാരിഃ സുരത്രാതാ മാരീചക്ഷോഭകാരകഃ ॥ 34 ॥

വിശ്വാമിത്രപ്രിയോ ദാംതോ രാമോ രാജീവലോചനഃ ।
ലംകാധിപകുലധ്വംസീ വിഭീഷണവരപ്രദഃ ॥ 35 ॥

സീതാനംദകരോ രാമോ വീരോ വാരിധിബംധനഃ ।
ഖരദൂഷണസംഹാരീ സാകേതപുരവാസവാന് ॥ 36 ॥

ചംദ്രാവളിപതിഃ കൂലഃ കേശികംസവധോഽമരഃ ।
മാധവോ മധുഹാ മാധ്വീ മാധ്വീകോ മാധവീ വിഭുഃ ॥ 37 ॥

മുംജാടവീഗാഹമാനോ ധേനുകാരിര്ദശാത്മജഃ ।
വംശീവടവിഹാരീ ച ഗോവര്ധനവനാശ്രയഃ ॥ 38 ॥

തഥാ താളവനോദ്ദേശീ ഭാംഡീരവനശംകരഃ ।
തൃണാവര്തകൃപാകാരീ വൃഷഭാനുസുതാപതിഃ ॥ 39 ॥

രാധാപ്രാണസമോ രാധാവദനാബ്ജമധൂത്കടഃ ।
ഗോപീരംജനദൈവജ്ഞഃ ലീലാകമലപൂജിതഃ ॥ 40 ॥

ക്രീഡാകമലസംദോഹോ ഗോപികാപ്രീതിരംജനഃ ।
രംജകോ രംജനോ രംഗോ രംഗീ രംഗമഹീരുഹഃ ॥ 41 ॥

കാമഃ കാമാരിഭക്തശ്ച പുരാണപുരുഷഃ കവിഃ ।
നാരദോ ദേവലോ ഭീമോ ബാലോ ബാലമുഖാംബുജഃ ॥ 42 ॥

അംബുജോ ബ്രഹ്മസാക്ഷീ ച യോഗീ ദത്തവരോ മുനിഃ ।
ഋഷഭഃ പർവതോ ഗ്രാമോ നദീപവനവല്ലഭഃ ॥ 43 ॥

പദ്മനാഭഃ സുരജ്യേഷ്ഠോ ബ്രഹ്മാ രുദ്രോഽഹിഭൂഷിതഃ ।
ഗണാനാം ത്രാണകര്താ ച ഗണേശോ ഗ്രഹിളോ ഗ്രഹിഃ ॥ 44 ॥

ഗണാശ്രയോ ഗണാധ്യക്ഷോ ക്രോഡീകൃതജഗത്ത്രയഃ ।
യാദവേംദ്രോ ദ്വാരകേംദ്രോ മഥുരാവല്ലഭോ ധുരീ ॥ 45 ॥

ഭ്രമരഃ കുംതലീ കുംതീസുതരക്ഷീ മഹാമനാഃ ।
യമുനാവരദാതാ ച കാശ്യപസ്യ വരപ്രദഃ ॥ 46 ॥

ശംഖചൂഡവധോദ്ദാമോ ഗോപീരക്ഷണതത്പരഃ ।
പാംചജന്യകരോ രാമീ ത്രിരാമീ വനജോ ജയഃ ॥ 47 ॥

ഫാല്ഗുണഃ ഫല്ഗുനസഖോ വിരാധവധകാരകഃ ।
രുക്മിണീപ്രാണനാഥശ്ച സത്യഭാമാപ്രിയംകരഃ ॥ 48 ॥

കല്പവൃക്ഷോ മഹാവൃക്ഷോ ദാനവൃക്ഷോ മഹാഫലഃ ।
അംകുശോ ഭൂസുരോ ഭാവോ ഭാമകോ ഭ്രാമകോ ഹരിഃ ॥ 49 ॥

സരളഃ ശാശ്വതോ വീരോ യദുവംശശിവാത്മകഃ ।
പ്രദ്യുമ്നോ ബലകര്താ ച പ്രഹര്താ ദൈത്യഹാ പ്രഭുഃ ॥ 50 ॥

മഹാധനോ മഹാവീരോ വനമാലാവിഭൂഷണഃ ।
തുലസീദാമശോഭാഢ്യോ ജാലംധരവിനാശനഃ ॥ 51 ॥

സൂരഃ സൂര്യോ മൃകംഡുശ്ച ഭാസ്വരോ വിശ്വപൂജിതഃ ।
രവിസ്തമോഹാ വഹ്നിശ്ച ബാഡബോ ബഡബാനലഃ ॥ 52 ॥

ദൈത്യദര്പവിനാശീ ച ഗരുഡോ ഗരുഡാഗ്രജഃ ।
ഗോപീനാഥോ മഹീനാഥോ ബൃംദാനാഥോഽവരോധകഃ ॥ 53 ॥

പ്രപംചീ പംചരൂപശ്ച ലതാഗുല്മശ്ച ഗോമതിഃ ।
ഗംഗാ ച യമുനാരൂപോ ഗോദാ വേത്രവതീ തഥാ ॥ 54 ॥

കാവേരീ നര്മദാ താപീ ഗംഡകീ സരയൂ രജഃ ।
രാജസസ്താമസസ്സത്ത്വീ സർവാംഗീ സർവലോചനഃ ॥ 55 ॥

സുധാമയോഽമൃതമയോ യോഗിനാം വല്ലഭഃ ശിവഃ ।
ബുദ്ധോ ബുദ്ധിമതാം ശ്രേഷ്ഠോ വിഷ്ണുര്ജിഷ്ണുഃ ശചീപതിഃ ॥ 56 ॥

വംശീ വംശധരോ ലോകോ വിലോകോ മോഹനാശനഃ ।
രവരാവോ രവോ രാവോ വലോ വാലോ വലാഹകഃ ॥ 57 ॥

ശിവോ രുദ്രോ നലോ നീലോ ലാംഗലീ ലാംഗലാശ്രയഃ ।
പാരദഃ പാവനോ ഹംസോ ഹംസാരൂഢോ ജഗത്പതിഃ ॥ 58 ॥

മോഹിനീമോഹനോ മായീ മഹാമായോ മഹാസുഖീ ।
വൃഷോ വൃഷാകപിഃ കാലഃ കാലീദമനകാരകഃ ॥ 59 ॥

കുബ്ജാഭാഗ്യപ്രദോ വീരോ രജകക്ഷയകാരകഃ ।
കോമലോ വാരുണീ രാജാ ജലജോ ജലധാരകഃ ॥ 60 ॥

ഹാരകഃ സർവപാപഘ്നഃ പരമേഷ്ഠീ പിതാമഹഃ ।
ഖഡ്ഗധാരീ കൃപാകാരീ രാധാരമണസുംദരഃ ॥ 61 ॥

ദ്വാദശാരണ്യസംഭോഗീ ശേഷനാഗഫണാലയഃ ।
കാമഃ ശ്യാമഃ സുഖശ്രീദഃ ശ്രീപതിഃ ശ്രീനിധിഃ കൃതിഃ ॥ 62 ॥

ഹരിര്ഹരോ നരോ നാരോ നരോത്തമ ഇഷുപ്രിയഃ ।
ഗോപാലചിത്തഹര്താ ച കര്താ സംസാരതാരകഃ ॥ 63 ॥

ആദിദേവോ മഹാദേവോ ഗൌരീഗുരുരനാശ്രയഃ ।
സാധുര്മധുർവിധുര്ധാതാ ത്രാതാഽക്രൂരപരായണഃ ॥ 64 ॥

രോലംബീ ച ഹയഗ്രീവോ വാനരാരിർവനാശ്രയഃ ।
വനം വനീ വനാധ്യക്ഷോ മഹാവംദ്യോ മഹാമുനിഃ ॥ 65 ॥

സ്യമംതകമണിപ്രാജ്ഞഃ വിജ്ഞോ വിഘ്നവിഘാതകഃ ।
ഗോവര്ധനോ വര്ധനീയോ വര്ധനീ വര്ധനപ്രിയഃ ॥ 66 ॥

വാര്ധന്യോ വര്ധനോ വര്ധീ വര്ധിഷ്ണസ്തു സുഖപ്രിയഃ ।
വര്ധിതോ വര്ധകോ വൃദ്ധോ ബൃംദാരകജനപ്രിയഃ ॥ 67 ॥

ഗോപാലരമണീഭര്താ സാംബകുഷ്ഠവിനാശനഃ ।
രുക്മിണീഹരണപ്രേമാ പ്രേമീ ചംദ്രാവലീപതിഃ ॥ 68 ॥

ശ്രീകര്താ വിശ്വഭര്താ ച നാരായണ നരോ ബലീ ।
ഗണോ ഗണപതിശ്ചൈവ ദത്താത്രേയോ മഹാമുനിഃ ॥ 69 ॥

വ്യാസോ നാരായണോ ദിവ്യോ ഭവ്യോ ഭാവുകധാരകഃ ।
ശ്വഃശ്രേയസം ശിവം ഭദ്രം ഭാവുകം ഭവുകം ശുഭമ് ॥ 70 ॥

ശുഭാത്മകഃ ശുഭഃ ശാസ്താ പ്രശസ്തോ മേഘനാദഹാ ।
ബ്രഹ്മണ്യദേവോ ദീനാനാമുദ്ധാരകരണക്ഷമഃ ॥ 71 ॥

കൃഷ്ണഃ കമലപത്രാക്ഷഃ കൃഷ്ണഃ കമലലോചനഃ ।
കൃഷ്ണഃ കാമീ സദാ കൃഷ്ണഃ സമസ്തപ്രിയകാരകഃ ॥ 72 ॥

നംദോ നംദീ മഹാനംദീ മാദീ മാദനകഃ കിലീ ।
മീലീ ഹിലീ ഗിലീ ഗോലീ ഗോലോ ഗോലാലയോ ഗുലീ ॥ 73 ॥

ഗുഗ്ഗുലീ മാരകീ ശാഖീ വടഃ പിപ്പലകഃ കൃതീ ।
മ്ലേച്ഛഹാ കാലഹര്താ ച യശോദാ യശ ഏവ ച ॥ 74 ॥

അച്യുതഃ കേശവോ വിഷ്ണുഃ ഹരിഃ സത്യോ ജനാര്ദനഃ ।
ഹംസോ നാരായണോ നീലോ ലീനോ ഭക്തിപരായണഃ ॥ 75 ॥

ജാനകീവല്ലഭോ രാമോ വിരാമോ വിഷനാശനഃ ।
സിംഹഭാനുര്മഹാഭാനു-ർവീരഭാനുര്മഹോദധിഃ ॥ 76 ॥

സമുദ്രോഽബ്ധിരകൂപാരഃ പാരാവാരഃ സരിത്പതിഃ ।
ഗോകുലാനംദകാരീ ച പ്രതിജ്ഞാപരിപാലകഃ ॥ 77 ॥

സദാരാമഃ കൃപാരാമോ മഹാരാമോ ധനുര്ധരഃ ।
പർവതഃ പർവതാകാരോ ഗയോ ഗേയോ ദ്വിജപ്രിയഃ ॥ 78 ॥

കമലാശ്വതരോ രാമോ രാമായണപ്രവര്തകഃ ।
ദ്യൌര്ദിവോ ദിവസോ ദിവ്യോ ഭവ്യോ ഭാഗീ ഭയാപഹഃ ॥ 79 ॥

പാർവതീഭാഗ്യസഹിതോ ഭര്താ ലക്ഷ്മീസഹായവാന് । [വിലാസവാന്]
വിലാസീ സാഹസീ സർവീ ഗർവീ ഗർവിതലോചനഃ ॥ 80 ॥

സുരാരിര്ലോകധര്മജ്ഞോ ജീവനോ ജീവനാംതകഃ ।
യമോ യമാരിര്യമനോ യമീ യാമവിഘാതകഃ ॥ 81 ॥

വംശുലീ പാംശുലീ പാംസുഃ പാംഡുരര്ജുനവല്ലഭഃ ।
ലലിതാ ചംദ്രികാമാലാ മാലീ മാലാംബുജാശ്രയഃ ॥ 82 ॥

അംബുജാക്ഷോ മഹായക്ഷോ ദക്ഷശ്ചിംതാമണിപ്രഭുഃ ।
മണിര്ദിനമണിശ്ചൈവ കേദാരോ ബദരീശ്രയഃ ॥ 83 ॥

ബദരീവനസംപ്രീതോ വ്യാസഃ സത്യവതീസുതഃ ।
അമരാരിനിഹംതാ ച സുധാസിംധുവിധൂദയഃ ॥ 84 ॥

ചംദ്രോ രവിഃ ശിവഃ ശൂലീ ചക്രീ ചൈവ ഗദാധരഃ ।
ശ്രീകര്താ ശ്രീപതിഃ ശ്രീദഃ ശ്രീദേവോ ദേവകീസുതഃ ॥ 85 ॥

ശ്രീപതിഃ പുംഡരീകാക്ഷഃ പദ്മനാഭോ ജഗത്പതിഃ ।
വാസുദേവോഽപ്രമേയാത്മാ കേശവോ ഗരുഡധ്വജഃ ॥ 86 ॥

നാരായണഃ പരം ധാമ ദേവദേവോ മഹേശ്വരഃ ।
ചക്രപാണിഃ കളാപൂര്ണോ വേദവേദ്യോ ദയാനിധിഃ ॥ 87 ॥

ഭഗവാന് സർവഭൂതേശോ ഗോപാലഃ സർവപാലകഃ ।
അനംതോ നിര്ഗുണോ നിത്യോ നിർവികല്പോ നിരംജനഃ ॥ 88 ॥

നിരാധാരോ നിരാകാരോ നിരാഭാസോ നിരാശ്രയഃ ।
പുരുഷഃ പ്രണവാതീതോ മുകുംദഃ പരമേശ്വരഃ ॥ 89 ॥

ക്ഷണാവനിഃ സാർവഭൌമോ വൈകുംഠോ ഭക്തവത്സലഃ ।
വിഷ്ണുര്ദാമോദരഃ കൃഷ്ണോ മാധവോ മഥുരാപതിഃ ॥ 90 ॥

ദേവകീഗര്ഭസംഭൂതോ യശോദാവത്സലോ ഹരിഃ ।
ശിവഃ സംകര്ഷണഃ ശംഭുര്ഭൂതനാഥോ ദിവസ്പതിഃ ॥ 91 ॥

അവ്യയഃ സർവധര്മജ്ഞോ നിര്മലോ നിരുപദ്രവഃ ।
നിർവാണനായകോ നിത്യോ നീലജീമൂതസന്നിഭഃ ॥ 92 ॥

കലാക്ഷയശ്ച സർവജ്ഞഃ കമലാരൂപതത്പരഃ ।
ഹൃഷീകേശഃ പീതവാസാ വസുദേവപ്രിയാത്മജഃ ॥ 93 ॥

നംദഗോപകുമാരാര്യോ നവനീതാശനോ വിഭുഃ ।
പുരാണഃ പുരുഷശ്രേഷ്ഠഃ ശംഖപാണിഃ സുവിക്രമഃ ॥ 94 ॥

അനിരുദ്ധശ്ചക്രധരഃ ശാര്ങ്ഗപാണിശ്ചതുര്ഭുജഃ ।
ഗദാധരഃ സുരാര്തിഘ്നോ ഗോവിംദോ നംദകായുധഃ ॥ 95 ॥

ബൃംദാവനചരഃ ശൌരിർവേണുവാദ്യവിശാരദഃ ।
തൃണാവര്താംതകോ ഭീമസാഹസോ ബഹുവിക്രമഃ ॥ 96 ॥

ശകടാസുരസംഹാരീ ബകാസുരവിനാശനഃ ।
ധേനുകാസുരസംഹാരീ പൂതനാരിര്നൃകേസരീ ॥ 97 ॥

പിതാമഹോ ഗുരുസ്സാക്ഷീ പ്രത്യഗാത്മാ സദാശിവഃ ।
അപ്രമേയഃ പ്രഭുഃ പ്രാജ്ഞോഽപ്രതര്ക്യഃ സ്വപ്നവര്ധനഃ ॥ 98 ॥

ധന്യോ മാന്യോ ഭവോ ഭാവോ ധീരഃ ശാംതോ ജഗദ്ഗുരുഃ ।
അംതര്യാമീശ്വരോ ദിവ്യോ ദൈവജ്ഞോ ദേവസംസ്തുതഃ ॥ 99 ॥

ക്ഷീരാബ്ധിശയനോ ധാതാ ലക്ഷ്മീവാന് ലക്ഷ്മണാഗ്രജഃ ।
ധാത്രീപതിരമേയാത്മാ ചംദ്രശേഖരപൂജിതഃ ॥ 100 ॥

ലോകസാക്ഷീ ജഗച്ചക്ഷുഃ പുണ്യചാരിത്രകീര്തനഃ ।
കോടിമന്മഥസൌംദര്യോ ജഗന്മോഹനവിഗ്രഹഃ ॥ 101 ॥

മംദസ്മിതതനുര്ഗോപഗോപികാപരിവേഷ്ടിതഃ ।
ഫുല്ലാരവിംദനയനശ്ചാണൂരാംധ്രനിഷൂദനഃ ॥ 102 ॥

ഇംദീവരദളശ്യാമോ ബര്ഹിബര്ഹാവതംസകഃ ।
മുരളീനിനദാഹ്ലാദോ ദിവ്യമാലാംബരാവൃതഃ ॥ 103 ॥

സുകപോലയുഗഃ സുഭ്രൂയുഗളഃ സുലലാടകമ് ।
കംബുഗ്രീവോ വിശാലാക്ഷോ ലക്ഷ്മീവാംഛുഭലക്ഷണഃ ॥ 104 ॥

പീനവക്ഷാശ്ചതുര്ബാഹുശ്ചതുര്മൂര്തിസ്ത്രിവിക്രമഃ ।
കളംകരഹിതഃ ശുദ്ധോ ദുഷ്ടശത്രുനിബര്ഹണഃ ॥ 105 ॥

കിരീടകുംഡലധരഃ കടകാംഗദമംഡിതഃ ।
മുദ്രികാഭരണോപേതഃ കടിസൂത്രവിരാജിതഃ ॥ 106 ॥

മംജീരരംജിതപദഃ സർവാഭരണഭൂഷിതഃ ।
വിന്യസ്തപാദയുഗളോ ദിവ്യമംഗളവിഗ്രഹഃ ॥ 107 ॥

ഗോപികാനയനാനംദഃ പൂര്ണചംദ്രനിഭാനനഃ ।
സമസ്തജഗദാനംദഃ സുംദരോ ലോകനംദനഃ ॥ 108 ॥

യമുനാതീരസംചാരീ രാധാമന്മഥവൈഭവഃ ।
ഗോപനാരീപ്രിയോ ദാംതോ ഗോപീവസ്ത്രാപഹാരകഃ ॥ 109 ॥

ശൃംഗാരമൂര്തിഃ ശ്രീധാമാ താരകോ മൂലകാരണമ് ।
സൃഷ്ടിസംരക്ഷണോപായഃ ക്രൂരാസുരവിഭംജനഃ ॥ 110 ॥

നരകാസുരസംഹാരീ മുരാരിർവൈരിമര്ദനഃ ।
ആദിതേയപ്രിയോ ദൈത്യഭീകരോ യദുശേഖരഃ ॥ 111 ॥

ജരാസംധകുലധ്വംസീ കംസാരാതിഃ സുവിക്രമഃ ।
പുണ്യശ്ലോകഃ കീര്തനീയോ യാദവേംദ്രോ ജഗന്നുതഃ ॥ 112 ॥

രുക്മിണീരമണഃ സത്യഭാമാജാംബവതീപ്രിയഃ ।
മിത്രവിംദാനാഗ്നജിതീലക്ഷ്മണാസമുപാസിതഃ ॥ 113 ॥

സുധാകരകുലേ ജാതോഽനംതഃ പ്രബലവിക്രമഃ ।
സർവസൌഭാഗ്യസംപന്നോ ദ്വാരകാപട്ടണസ്ഥിതഃ ॥ 114 ॥

ഭദ്രാസൂര്യസുതാനാഥോ ലീലാമാനുഷവിഗ്രഹഃ ।
സഹസ്രഷോഡശസ്ത്രീശോ ഭോഗമോക്ഷൈകദായകഃ ॥ 115 ॥

വേദാംതവേദ്യഃ സംവേദ്യോ വൈദ്യോ ബ്രഹ്മാംഡനായകഃ ।
ഗോവര്ധനധരോ നാഥഃ സർവജീവദയാപരഃ ॥ 116 ॥

മൂര്തിമാന് സർവഭൂതാത്മാ ആര്തത്രാണപരായണഃ ।
സർവജ്ഞഃ സർവസുലഭഃ സർവശാസ്ത്രവിശാരദഃ ॥ 117 ॥

ഷഡ്ഗുണൈശ്വര്യസംപന്നഃ പൂര്ണകാമോ ധുരംധരഃ ।
മഹാനുഭാവഃ കൈവല്യദായകോ ലോകനായകഃ ॥ 118 ॥

ആദിമധ്യാംതരഹിതഃ ശുദ്ധസാത്ത്വികവിഗ്രഹഃ ।
അസമാനഃ സമസ്താത്മാ ശരണാഗതവത്സലഃ ॥ 119 ॥

ഉത്പത്തിസ്ഥിതിസംഹാരകാരണം സർവകാരണമ് ।
ഗംഭീരഃ സർവഭാവജ്ഞഃ സച്ചിദാനംദവിഗ്രഹഃ ॥ 120 ॥

വിഷ്വക്സേനഃ സത്യസംധഃ സത്യവാക് സത്യവിക്രമഃ ।
സത്യവ്രതഃ സത്യരതഃ സത്യധര്മപരായണഃ ॥ 121 ॥

ആപന്നാര്തിപ്രശമനഃ ദ്രൌപദീമാനരക്ഷകഃ ।
കംദര്പജനകഃ പ്രാജ്ഞോ ജഗന്നാടകവൈഭവഃ ॥ 122 ॥

ഭക്തിവശ്യോ ഗുണാതീതഃ സർവൈശ്വര്യപ്രദായകഃ ।
ദമഘോഷസുതദ്വേഷീ ബാണബാഹുവിഖംഡനഃ ॥ 123 ॥

ഭീഷ്മഭക്തിപ്രദോ ദിവ്യഃ കൌരവാന്വയനാശനഃ ।
കൌംതേയപ്രിയബംധുശ്ച പാര്ഥസ്യംദനസാരഥിഃ ॥ 124 ॥

നാരസിംഹോ മഹാവീരഃ സ്തംഭജാതോ മഹാബലഃ ।
പ്രഹ്ലാദവരദഃ സത്യോ ദേവപൂജ്യോഽഭയംകരഃ ॥ 125 ॥

ഉപേംദ്ര ഇംദ്രാവരജോ വാമനോ ബലിബംധനഃ ।
ഗജേംദ്രവരദഃ സ്വാമീ സർവദേവനമസ്കൃതഃ ॥ 126 ॥

ശേഷപര്യംകശയനോ വൈനതേയരഥോ ജയീ ।
അവ്യാഹതബലൈശ്വര്യസംപന്നഃ പൂര്ണമാനസഃ ॥ 127 ॥

യോഗീശ്വരേശ്വരഃ സാക്ഷീ ക്ഷേത്രജ്ഞോ ജ്ഞാനദായകഃ ।
യോഗിഹൃത്പംകജാവാസോ യോഗമായാസമന്വിതഃ ॥ 128 ॥

നാദബിംദുകളാതീതശ്ചതുർവര്ഗഫലപ്രദഃ ।
സുഷുമ്നാമാര്ഗസംചാരീ ദേഹസ്യാംതരസംസ്ഥിതഃ ॥ 129 ॥

ദേഹേംദ്രിയമനഃപ്രാണസാക്ഷീ ചേതഃപ്രസാദകഃ ।
സൂക്ഷ്മഃ സർവഗതോ ദേഹീ ജ്ഞാനദര്പണഗോചരഃ ॥ 130 ॥

തത്ത്വത്രയാത്മകോഽവ്യക്തഃ കുംഡലീ സമുപാശ്രിതഃ ।
ബ്രഹ്മണ്യഃ സർവധര്മജ്ഞഃ ശാംതോ ദാംതോ ഗതക്ലമഃ ॥ 131 ॥

ശ്രീനിവാസഃ സദാനംദോ വിശ്വമൂര്തിര്മഹാപ്രഭുഃ ।
സഹസ്രശീര്ഷാ പുരുഷഃ സഹസ്രാക്ഷഃ സഹസ്രപാത് ॥ 132 ॥

സമസ്തഭുവനാധാരഃ സമസ്തപ്രാണരക്ഷകഃ ।
സമസ്തസ്സർവഭാവജ്ഞോ ഗോപികാപ്രാണവല്ലഭഃ ॥ 133 ॥

നിത്യോത്സവോ നിത്യസൌഖ്യോ നിത്യശ്രീര്നിത്യമംഗളമ് ।
വ്യൂഹാര്ചിതോ ജഗന്നാഥഃ ശ്രീവൈകുംഠപുരാധിപഃ ॥ 134 ॥

പൂര്ണാനംദഘനീഭൂതോ ഗോപവേഷധരോ ഹരിഃ ।
കലാപകുസുമശ്യാമഃ കോമലഃ ശാംതവിഗ്രഹഃ ॥ 135 ॥

ഗോപാംഗനാവൃതോഽനംതോ ബൃംദാവനസമാശ്രയഃ ।
വേണുനാദരതഃ ശ്രേഷ്ഠോ ദേവാനാം ഹിതകാരകഃ ॥ 136 ॥

ജലക്രീഡാസമാസക്തോ നവനീതസ്യ തസ്കരഃ ।
ഗോപാലകാമിനീജാരശ്ചോരജാരശിഖാമണിഃ ॥ 137 ॥

പരംജ്യോതിഃ പരാകാശഃ പരാവാസഃ പരിസ്ഫുടഃ ।
അഷ്ടാദശാക്ഷരോ മംത്രോ വ്യാപകോ ലോകപാവനഃ ॥ 138 ॥

സപ്തകോടിമഹാമംത്രശേഖരോ ദേവശേഖരഃ ।
വിജ്ഞാനജ്ഞാനസംധാനസ്തേജോരാശിര്ജഗത്പതിഃ ॥ 139 ॥

ഭക്തലോകപ്രസന്നാത്മാ ഭക്തമംദാരവിഗ്രഹഃ ।
ഭക്തദാരിദ്ര്യശമനോ ഭക്താനാം പ്രീതിദായകഃ ॥ 140 ॥

ഭക്താധീനമനാഃ പൂജ്യോ ഭക്തലോകശിവംകരഃ ।
ഭക്താഭീഷ്ടപ്രദഃ സർവഭക്താഘൌഘനികൃംതകഃ ॥ 141 ॥

അപാരകരുണാസിംധുര്ഭഗവാന് ഭക്തതത്പരഃ ॥ 142 ॥

[ഇതി ശ്രീരാധികാനാഥ നാമ്നാം സാഹസ്രമീരിതമ് । ]
സ്മരണാത്പാപരാശീനാം ഖംഡനം മൃത്യുനാശനമ് ॥ 1 ॥

വൈഷ്ണവാനാം പ്രിയകരം മഹാദാരിദ്ര്യനാശനമ് ।
ബ്രഹ്മഹത്യാസുരാപാനം പരസ്ത്രീഗമനം തഥാ ॥ 2 ॥

പരദ്രവ്യാപഹരണം പരദ്വേഷസമന്വിതമ് ।
മാനസം വാചികം കായം യത്പാപം പാപസംഭവമ് ॥ 3 ॥

സഹസ്രനാമപഠനാത്സർവേ നശ്യംതി തത്ക്ഷണാത് ।
മഹാദാരിദ്ര്യയുക്തോ വൈ വൈഷ്ണവോ വിഷ്ണുഭക്തിമാന് ॥ 4 ॥

കാര്തിക്യാം യഃ പഠേദ്രാത്രൌ ശതമഷ്ടോത്തരം ക്രമാത് ।
പീതാംബരധരോ ധീമാന് സുഗംധീ പുഷ്പചംദനൈഃ ॥ 5 ॥

പുസ്തകം പൂജയിത്വാ ച നൈവേദ്യാദിഭിരേവ ച ।
രാധാധ്യാനാംകിതോ ധീരോ വനമാലാവിഭൂഷിതഃ ॥ 6 ॥

ശതമഷ്ടോത്തരം ദേവി പഠേന്നാമസഹസ്രകമ് ।
ചൈത്രേ കൃഷ്ണേ ച ശുക്ലേ ച കുഹൂസംക്രാംതിവാസരേ ॥ 7 ॥

പഠിതവ്യം പ്രയത്നേന ത്രൈലോക്യം മോഹയേത് ക്ഷണാത് ।
തുലസീമാലയാ യുക്തോ വൈഷ്ണവോ ഭക്തിതത്പരഃ ॥ 8 ॥

രവിവാരേ ച ശുക്രേ ച ദ്വാദശ്യാം ശ്രാദ്ധവാസരേ ।
ബ്രാഹ്മണം പൂജയിത്വാ ച ഭോജയിത്വാ വിധാനതഃ ॥ 9 ॥

പഠേന്നാമസഹസ്രം ച തതഃ സിദ്ധിഃ പ്രജായതേ ।
മഹാനിശായാം സതതം വൈഷ്ണവോ യഃ പഠേത്സദാ ॥ 10 ॥

ദേശാംതരഗതാ ലക്ഷ്മീഃ സമായാതി ന സംശയഃ ।
ത്രൈലോക്യേ തു മഹാദേവി സുംദര്യഃ കാമമോഹിതാഃ ॥ 11 ॥

മുഗ്ധാഃ സ്വയം സമായാംതി വൈഷ്ണവം ച ഭജംതി താഃ ।
രോഗീ രോഗാത്പ്രമുച്യേത ബദ്ധോ മുച്യേത ബംധനാത് ॥ 12 ॥

ഗര്ഭിണീ ജനയേത്പുത്രം കന്യാ വിംദതി സത്പതിമ് ।
രാജാനോ വശതാം യാംതി കിം പുനഃ ക്ഷുദ്രമാനുഷാഃ ॥ 13 ॥

സഹസ്രനാമശ്രവണാത് പഠനാത് പൂജനാത് പ്രിയേ ।
ധാരണാത് സർവമാപ്നോതി വൈഷ്ണവോ നാത്ര സംശയഃ ॥ 14 ॥

വംശീവടേ ചാന്യവടേ തഥാ പിപ്പലകേഽഥ വാ ।
കദംബപാദപതലേ ശ്രീഗോപാലസ്യ സന്നിധൌ ॥ 15 ॥

യഃ പഠേദ്വൈഷ്ണവോ നിത്യം സ യാതി ഹരിമംദിരമ് ।
കൃഷ്ണേനോക്തം രാധികായൈ തയാ പ്രോക്തം പുരാ ശിവേ ॥ 16 ॥

നാരദായ മയാ പ്രോക്തം നാരദേന പ്രകാശിതമ് ।
മയാ തവ വരാരോഹേ പ്രോക്തമേതത്സുദുര്ലഭമ് ॥ 17 ॥

ഗോപനീയം പ്രയത്നേന ന പ്രകാശ്യം കദാചന ।
ശഠായ പാപിനേ ചൈവ ലംപടായ വിശേഷതഃ ॥ 18 ॥

ന ദാതവ്യം ന ദാതവ്യം ന ദാതവ്യം കദാചന ।
ദേയം ശാംതായ ശിഷ്യായ വിഷ്ണുഭക്തിരതായ ച ॥ 19 ॥

ഗോദാനബ്രഹ്മയജ്ഞാദേർവാജപേയശതസ്യ ച ।
അശ്വമേധസഹസ്രസ്യ ഫലം പാഠേ ഭവേദ്ധ്രുവമ് ॥ 20 ॥

മോഹനം സ്തംഭനം ചൈവ മാരണോച്ചാടനാദികമ് ।
യദ്യദ്വാംഛതി ചിത്തേന തത്തത്പ്രാപ്നോതി വൈഷ്ണവഃ ॥ 21 ॥

ഏകാദശ്യാം നരഃ സ്നാത്വാ സുഗംധദ്രവ്യതൈലകൈഃ ।
ആഹാരം ബ്രാഹ്മണേ ദത്ത്വാ ദക്ഷിണാം സ്വര്ണഭൂഷണമ് ॥ 22 ॥

തതഃ പ്രാരംഭകര്താസൌ സർവം പ്രാപ്നോതി മാനവഃ ।
ശതാവൃത്ത സഹസ്രം ച യഃ പഠേദ്വൈഷ്ണവോ ജനഃ ॥ 23 ॥

ശ്രീബൃംദാവനചംദ്രസ്യ പ്രസാദാത്സർവമാപ്നുയാത് ।
യദ്ഗൃഹേ പുസ്തകം ദേവി പൂജിതം ചൈവ തിഷ്ഠതി ॥ 24 ॥

ന മാരീ ന ച ദുര്ഭിക്ഷം നോപസര്ഗഭയം ക്വചിത് ।
സര്പാദിഭൂതയക്ഷാദ്യാ നശ്യംതേ നാത്ര സംശയഃ ॥ 25 ॥

ശ്രീഗോപാലോ മഹാദേവി വസേത്തസ്യ ഗൃഹേ സദാ ।
യദ്ഗൃഹേ ച സഹസ്രം ച നാമ്നാം തിഷ്ഠതി പൂജിതമ് ॥ 26 ॥

ഇതി ശ്രീസമ്മോഹനതംത്രേ ഹരഗൌരീസംവാദേ ശ്രീഗോപാല സഹസ്രനാമസ്തോത്രമ് ।