ನಮೋ ಭೂತನಾಥಂ ನಮೋ ದೇವದೇವಂ
ನಮಃ ಕಾಲಕಾಲಂ ನಮೋ ದಿವ್ಯತೇಜಮ್ ।
ನಮಃ ಕಾಮಭಸ್ಮಂ ನಮಃ ಶಾನ್ತಶೀಲಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 1 ॥
ಸದಾ ತೀರ್ಥಸಿದ್ಧಂ ಸದಾ ಭಕ್ತರಕ್ಷಂ
ಸದಾ ಶೈವಪೂಜ್ಯಂ ಸದಾ ಶುಭ್ರಭಸ್ಮಮ್ ।
ಸದಾ ಧ್ಯಾನಯುಕ್ತಂ ಸದಾ ಜ್ಞಾನತಲ್ಪಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 2 ॥
ಶ್ಮಶಾನೇ ಶಯಾನಂ ಮಹಾಸ್ಥಾನವಾಸಂ
ಶರೀರಂ ಗಜಾನಾಂ ಸದಾ ಚರ್ಮವೇಷ್ಟಮ್ ।
ಪಿಶಾಚಾದಿನಾಥಂ ಪಶೂನಾಂ ಪ್ರತಿಷ್ಠಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 3 ॥
ಫಣೀನಾಗಕಣ್ಠೇ ಭುಜಙ್ಗಾದ್ಯನೇಕಂ
ಗಳೇ ರುಣ್ಡಮಾಲಂ ಮಹಾವೀರ ಶೂರಮ್ ।
ಕಟಿವ್ಯಾಘ್ರಚರ್ಮಂ ಚಿತಾಭಸ್ಮಲೇಪಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 4 ॥
ಶಿರಃ ಶುದ್ಧಗಙ್ಗಾ ಶಿವಾ ವಾಮಭಾಗಂ
ವಿಯದ್ದೀರ್ಘಕೇಶಂ ಸದಾ ಮಾಂ ತ್ರಿಣೇತ್ರಮ್ ।
ಫಣೀನಾಗಕರ್ಣಂ ಸದಾ ಫಾಲಚನ್ದ್ರಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 5 ॥
ಕರೇ ಶೂಲಧಾರಂ ಮಹಾಕಷ್ಟನಾಶಂ
ಸುರೇಶಂ ಪರೇಶಂ ಮಹೇಶಂ ಜನೇಶಮ್ ।
ಧನೇಶಾಮರೇಶಂ ಧ್ವಜೇಶಂ ಗಿರೀಶಂ [ಧನೇಶಸ್ಯಮಿತ್ರಂ]
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 6 ॥
ಉದಾಸಂ ಸುದಾಸಂ ಸುಕೈಲಾಸವಾಸಂ
ಧರಾನಿರ್ಝರೇ ಸಂಸ್ಥಿತಂ ಹ್ಯಾದಿದೇವಮ್ ।
ಅಜಂ ಹೇಮಕಲ್ಪದ್ರುಮಂ ಕಲ್ಪಸೇವ್ಯಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 7 ॥
ಮುನೀನಾಂ ವರೇಣ್ಯಂ ಗುಣಂ ರೂಪವರ್ಣಂ
ದ್ವಿಜೈಃ ಸಮ್ಪಠನ್ತಂ ಶಿವಂ ವೇದಶಾಸ್ತ್ರಮ್ ।
ಅಹೋ ದೀನವತ್ಸಂ ಕೃಪಾಲುಂ ಶಿವಂ ತಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 8 ॥
ಸದಾ ಭಾವನಾಥಂ ಸದಾ ಸೇವ್ಯಮಾನಂ
ಸದಾ ಭಕ್ತಿದೇವಂ ಸದಾ ಪೂಜ್ಯಮಾನಮ್ ।
ಮಹಾತೀರ್ಥವಾಸಂ ಸದಾ ಸೇವ್ಯಮೇಕಂ
ಭಜೇ ಪಾರ್ವತೀವಲ್ಲಭಂ ನೀಲಕಣ್ಠಮ್ ॥ 9 ॥
ಇತಿ ಶ್ರೀಮಚ್ಛಙ್ಕರಯೋಗೀನ್ದ್ರ ವಿರಚಿತಂ ಪಾರ್ವತೀವಲ್ಲಭಾಷ್ಟಕಂ ನಾಮ ನೀಲಕಣ್ಠ ಸ್ತವಃ ॥
