ದೇವರಾಜ-ಸೇವ್ಯಮಾನ-ಪಾವನಾಙ್ಘ್ರಿ-ಪಙ್ಕಜಂ
ವ್ಯಾಳಯಜ್ಞ-ಸೂತ್ರಮಿನ್ದು-ಶೇಖರಂ ಕೃಪಾಕರಮ್ ।
ನಾರದಾದಿ-ಯೋಗಿಬೃನ್ದ-ವನ್ದಿತಂ ದಿಗಮ್ಬರಂ
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 1 ॥
ಭಾನುಕೋಟಿ-ಭಾಸ್ವರಂ ಭವಬ್ಧಿತಾರಕಂ ಪರಂ
ನೀಲಕಣ್ಠ-ಮೀಪ್ಸಿತಾರ್ಥ-ದಾಯಕಂ ತ್ರಿಲೋಚನಮ್ ।
ಕಾಲಕಾಲ-ಮಮ್ಬುಜಾಕ್ಷ-ಮಕ್ಷಶೂಲ-ಮಕ್ಷರಂ
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 2 ॥
ಶೂಲಟಙ್ಕ-ಪಾಶದಣ್ಡ-ಪಾಣಿಮಾದಿ-ಕಾರಣಂ
ಶ್ಯಾಮಕಾಯ-ಮಾದಿದೇವ-ಮಕ್ಷರಂ ನಿರಾಮಯಮ್ ।
ಭೀಮವಿಕ್ರಮಂ ಪ್ರಭುಂ ವಿಚಿತ್ರ ತಾಣ್ಡವ ಪ್ರಿಯಂ
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 3 ॥
ಭುಕ್ತಿ-ಮುಕ್ತಿ-ದಾಯಕಂ ಪ್ರಶಸ್ತಚಾರು-ವಿಗ್ರಹಂ
ಭಕ್ತವತ್ಸಲಂ ಸ್ಥಿರಂ ಸಮಸ್ತಲೋಕ-ವಿಗ್ರಹಮ್ । [ಸ್ಥಿತಂ]
ನಿಕ್ವಣನ್-ಮನೋಜ್ಞ-ಹೇಮ-ಕಿಙ್ಕಿಣೀ-ಲಸತ್ಕಟಿಂ [ವಿನಿಕ್ವಣನ್]
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 4 ॥
ಧರ್ಮಸೇತು-ಪಾಲಕಂ ತ್ವಧರ್ಮಮಾರ್ಗ ನಾಶಕಂ [ನಾಶನಂ]
ಕರ್ಮಪಾಶ-ಮೋಚಕಂ ಸುಶರ್ಮ-ದಾಯಕಂ ವಿಭುಮ್ ।
ಸ್ವರ್ಣವರ್ಣ-ಕೇಶಪಾಶ-ಶೋಭಿತಾಙ್ಗ-ಮಣ್ಡಲಂ [ಶೆಷಪಾಶ, ನಿರ್ಮಲಂ]
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 5 ॥
ರತ್ನ-ಪಾದುಕಾ-ಪ್ರಭಾಭಿರಾಮ-ಪಾದಯುಗ್ಮಕಂ
ನಿತ್ಯ-ಮದ್ವಿತೀಯ-ಮಿಷ್ಟ-ದೈವತಂ ನಿರಞ್ಜನಮ್ ।
ಮೃತ್ಯುದರ್ಪ-ನಾಶನಂ ಕರಾಳದಂಷ್ಟ್ರ-ಮೋಕ್ಷದಂ [ಭೂಷಣಂ]
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 6 ॥
ಅಟ್ಟಹಾಸ-ಭಿನ್ನ-ಪದ್ಮಜಾಣ್ಡಕೋಶ-ಸನ್ತತಿಂ
ದೃಷ್ಟಿಪಾತ-ನಷ್ಟಪಾಪ-ಜಾಲಮುಗ್ರ-ಶಾಸನಮ್ ।
ಅಷ್ಟಸಿದ್ಧಿ-ದಾಯಕಂ ಕಪಾಲಮಾಲಿಕಾ-ಧರಂ
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 7 ॥
ಭೂತಸಙ್ಘ-ನಾಯಕಂ ವಿಶಾಲಕೀರ್ತಿ-ದಾಯಕಂ
ಕಾಶಿವಾಸಿ-ಲೋಕ-ಪುಣ್ಯಪಾಪ-ಶೋಧಕಂ ವಿಭುಮ್ । [ಕಶಿವಾಸ]
ನೀತಿಮಾರ್ಗ-ಕೋವಿದಂ ಪುರಾತನಂ ಜಗತ್ಪತಿಂ
ಕಾಶಿಕಾಪುರಾಧಿನಾಥ ಕಾಲಭೈರವಂ ಭಜೇ ॥ 8 ॥
ಕಾಲಭೈರವಾಷ್ಟಕಂ ಪಠನ್ತಿ ಯೇ ಮನೋಹರಂ
ಜ್ಞಾನಮುಕ್ತಿ-ಸಾಧಕಂ ವಿಚಿತ್ರ-ಪುಣ್ಯ-ವರ್ಧನಮ್ ।
ಶೋಕಮೋಹ-ಲೋಭದೈನ್ಯ-ಕೋಪತಾಪ-ನಾಶನಂ
ತೇ ಪ್ರಯಾನ್ತಿ ಕಾಲಭೈರವಾಙ್ಘ್ರಿ-ಸನ್ನಿಧಿಂ ಧ್ರುವಮ್ ॥
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚರ್ಯಸ್ಯ
ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಙ್ಕರಭಗವತಃ ಕೃತೌ
ಶ್ರೀ ಕಾಲಭೈರವಾಷ್ಟಕಂ ಸಮ್ಪೂರ್ಣಮ್ ।
