ಯಾ ತೇ॑ ರುದ್ರ ಶಿ॒ವಾ ತ॒ನೂರಘೋ॒ರಾ-ಽಪಾ॑ಪಕಾಶಿನೀ ।
ತಯಾ॑ ನ ಸ್ತ॒ನುವಾ॒ ಶನ್ತ॑ಮಯಾ॒ ಗಿರಿ॑ಶನ್ತಾ॒ಭಿ ಚಾ॑ಕಶೀಹಿ ।
ಶಿಖಾಯೈ ನಮಃ । 1

ಅ॒ಸ್ಮಿ-ನ್ಮ॑ಹ॒ತ್ಯ॑ರ್ಣ॒ವೇ᳚-ಽನ್ತರಿ॑ಖ್ಷೇ ಭ॒ವಾ ಅಧಿ॑ ।
ತೇಷಾಗ್ಂ॑ ಸಹಸ್ರಯೋಜ॒ನೇ-ಽವ॒ಧನ್ವಾ॑ನಿ ತನ್ಮಸಿ ।
ಶಿರಸೇ ನಮಃ । 2

ಸ॒ಹಸ್ರಾ॑ಣಿ ಸಹಸ್ರ॒ಶೋ ಯೇ ರು॒ದ್ರಾ ಅಧಿ॒ ಭೂಮ್ಯಾ᳚ಮ್ ।
ತೇಷಾಗ್ಂ॑ ಸಹಸ್ರ-ಯೋಜ॒ನೇ-ಽವ॒ಧನ್ವಾ॑ನಿ ತನ್ಮಸಿ ।
ಲಲಾಟಾಯ ನಮಃ । 3

ಹ॒ಗ್ಂ॒ಸ-ಶ್ಶು॑ಚಿ॒ಷ-ದ್ವಸು॑ರನ್ತರಿಖ್ಷ॒ಸದ್ಧೋತಾ॑ ವೇದಿ॒ಷದತಿ॑ಥಿ-ರ್ದುರೋಣ॒ಸತ್ ।
ನೃ॒ಷದ್ವ॑ರ॒-ಸದೃ॑ತ॒-ಸದ್ವ್ಯೋ॑ಮ॒ ಸದ॒ಬ್ಜಾ ಗೋ॒ಜಾ ಋ॑ತ॒ಜಾ ಅ॑ದ್ರಿ॒ಜಾ ಋ॒ತ-ಮ್ಬೃ॒ಹತ್ ।
ಭ್ರುವೋರ್ಮದ್ಧ್ಯಾಯ ನಮಃ । 4

ತ್ರ್ಯ॑ಬಙ್ಕಂ-ಯಁಜಾಮಹೇ ಸುಗ॒ನ್ಧಿ-ಮ್ಪು॑ಷ್ಟಿ॒ವರ್ಧ॑ನಮ್ ।
ಉ॒ರ್ವಾ॒ರು॒ಕಮಿ॑ವ॒ ಬನ್ಧ॑ನಾನ್
ಮೃ॒ತ್ಯೋ-ರ್ಮು॑ಖ್ಷೀಯ॒ ಮಾ-ಽಮೃತಾ᳚ತ್ ।
ನೇತ್ರಾಭ್ಯಾ-ನ್ನಮಃ । 5

ನಮ॒-ಸ್ಸ್ರುತ್ಯಾ॑ಯ ಚ॒ ಪಥ್ಯಾ॑ಯ ಚ॒ ನಮಃ॑ ಕಾ॒ಟ್ಯಾ॑ಯ ಚ ನೀ॒ಪ್ಯಾ॑ಯ ಚ ।
ಕರ್ಣಾಭ್ಯಾ-ನ್ನಮಃ । 6

ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ ।
ವೀ॒ರಾನ್ಮಾನೋ॑ ರುದ್ರ ಭಾಮಿ॒ತೋ ವ॑ಧೀರ್-ಹ॒ವಿಷ್ಮ॑ನ್ತೋ॒ ನಮ॑ಸಾ ವಿಧೇಮ ತೇ ।
ನಾಸಿಕಾಭ್ಯಾ-ನ್ನಮಃ । 7

ಅ॒ವ॒ತತ್ಯ॒ ಧನು॒ಸ್ತ್ವಗ್ಂ ಸಹ॑ಸ್ರಾಖ್ಷ॒ ಶತೇ॑ಷುಧೇ ।
ನಿ॒ಶೀರ್ಯ॑ ಶ॒ಲ್ಯಾನಾ॒-ಮ್ಮುಖಾ॑ ಶಿ॒ವೋ ನ॑-ಸ್ಸು॒ಮನಾ॑ ಭವ ।
ಮುಖಾಯ ನಮಃ । 8

ನೀಲ॑ಗ್ರೀವಾ ಶ್ಶಿತಿ॒ಕಣ್ಠಾ᳚-ಶ್ಶ॒ರ್ವಾ ಅ॒ಧಃ, ಖ್ಷ॑ಮಾಚ॒ರಾಃ ।
ತೇಷಾಗ್ಂ॑ ಸಹಸ್ರಯೋಜ॒ನೇ-ಽ ವ॒ಧನ್ವಾ॑ನಿ ತನ್ಮಸಿ ।
ಕಣ್ಠಾಯ ನಮಃ । 9.1

ನೀಲ॑ಗ್ರೀವಾ-ಶ್ಶಿತಿ॒ಕಣ್ಠಾ॒ ದಿವಗ್ಂ॑ ರು॒ದ್ರಾ ಉಪ॑ಶ್ರಿತಾಃ ।
ತೇಷಾಗ್ಂ॑ ಸಹಸ್ರಯೋಜ॒ನೇ-ಽ ವ॒ಧನ್ವಾ॑ನಿ ತನ್ಮಸಿ ।
ಉಪಕಣ್ಠಾಯ ನಮಃ । 9.2

ನಮ॑ಸ್ತೇ ಅ॒ಸ್ತ್ವಾಯು॑ಧಾ॒ಯಾ-ನಾ॑ತತಾಯ ಧೃ॒ಷ್ಣವೇ᳚ ।
ಉ॒ಭಾಭ್ಯಾ॑ಮು॒ತ ತೇ॒ ನಮೋ॑ ಬಾ॒ಹುಭ್ಯಾ॒-ನ್ತವ॒ ಧನ್ವ॑ನೇ ।
ಬಾಹುಭ್ಯಾ-ನ್ನಮಃ । 10

ಯಾ ತೇ॑ ಹೇ॒ತಿ-ರ್ಮೀ॑ಢುಷ್ಟಮ॒ ಹಸ್ತೇ॑ ಬ॒ಭೂವ॑ ತೇ॒ ಧನುಃ॑ ।
ತಯಾ॒-ಽಸ್ಮಾನ್ ವಿ॒ಶ್ವತ॒ಸ್ತ್ವ-ಮ॑ಯ॒ಖ್ಷ್ಮಯಾ॒ ಪರಿ॑ಬ್ಭುಜ ।
ಉಪಬಾಹುಭ್ಯಾ-ನ್ನಮಃ । 11

ಪರಿ॑ಣೋ ರು॒ದ್ರಸ್ಯ॑ ಹೇ॒ತಿ-ರ್ವೃ॑ಣಕ್ತು॒ ಪರಿ॑ತ್ವೇ॒ಷಸ್ಯ॑ ದುರ್ಮ॒ತಿರ॑ಘಾ॒ಯೋಃ ।
ಅವ॑ ಸ್ಥಿ॒ರಾ ಮ॒ಘವ॑ದ್ಭ್ಯಃ ತನುಷ್ವ॒ ಮೀಢ್ವ॑ಸ್ತೋ॒ಕಾಯ॒ ತನ॑ಯಾಯ ಮೃಡಯ ।
ಮಣಿಬನ್ಧಾಭ್ಯಾ-ನ್ನಮಃ । 12

ಯೇ ತೀ॒ರ್ಥಾನಿ॑ ಪ್ರ॒ಚರ॑ನ್ತಿ ಸೃ॒ಕಾವ॑ನ್ತೋ ನಿಷ॒ಙ್ಗಿಣಃ॑ ।
ತೇಷಾಗ್ಂ॑ ಸಹಸ್ರಯೋಜ॒ನೇ-ಽ ವ॒ಧನ್ವಾ॑ನಿ ತನ್ಮಸಿ ।
ಹಸ್ತಾಭ್ಯಾ-ನ್ನಮಃ । 13

ಸ॒ದ್ಯೋ ಜಾ॒ತ-ಮ್ಪ್ರ॑ಪದ್ಯಾ॒ಮಿ॒ ಸ॒ದ್ಯೋ ಜಾ॒ತಾಯ॒ ವೈ ನಮೋ॒ ನಮಃ॑ ।
ಭ॒ವೇ ಭ॑ವೇ॒ ನಾತಿ॑ ಭವೇ ಭವಸ್ವ॒ ಮಾಮ್ । ಭ॒ವೋ-ದ್ಭ॑ವಾಯ॒ ನಮಃ॑ ॥
ಅಗುಂಷ್ಠಾಭ್ಯಾ-ನ್ನಮಃ । 14.1

ವಾ॒ಮ॒ದೇ॒ವಾಯ॒ ನಮೋ᳚ ಜ್ಯೇ॒ಷ್ಠಾಯ॒ ನಮ॑-ಶ್ಶ್ರೇ॒ಷ್ಠಾಯ॒ ನಮೋ॑ ರು॒ದ್ರಾಯ॒ ನಮಃ॒ ಕಾಲಾ॑ಯ॒ ನಮಃ॒ ಕಲ॑ವಿಕರಣಾಯ॒ ನಮೋ॒ ಬಲ॑ವಿಕರಣಾಯ॒ ನಮೋ॒ ಬಲಾ॑ಯ॒ ನಮೋ॒ ಬಲ॑ಪ್ರಮಥನಾಯ॒ ನಮ॒-ಸ್ಸರ್ವ॑ಭೂತದಮನಾಯ॒ ನಮೋ॑ ಮ॒ನೋನ್ಮ॑ನಾಯ॒ ನಮಃ॑ ।
ತರ್ಜನೀಭ್ಯಾ-ನ್ನಮಃ । 14.2

ಅ॒ಘೋರೇ᳚ಭ್ಯೋ ಽಥ॒ಘೋರೇ᳚ಭ್ಯೋ॒ ಘೋರ॒ಘೋರ॑ತರೇಭ್ಯಃ ।
ಸರ್ವೇ᳚ಭ್ಯ-ಸ್ಸರ್ವ॒ ಶರ್ವೇ᳚ಭ್ಯೋ॒ ನಮ॑ಸ್ತೇ ಅಸ್ತು ರು॒ದ್ರ ರೂ॑ಪೇಭ್ಯಃ ॥
ಮದ್ಧ್ಯಮಾಭ್ಯಾ-ನ್ನಮಃ । 14.3

ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ ।
ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥
ಅನಾಮಿಕಾಭ್ಯಾ-ನ್ನಮಃ । 14.4

ಈಶಾನ-ಸ್ಸರ್ವ॑ವಿದ್ಯಾ॒ನಾ॒-ಮೀಶ್ವರ-ಸ್ಸರ್ವ॑ಭೂತಾ॒ನಾಂ॒
ರಹ್ಮಾಧಿ॑ಪತಿ॒-ರ್ಬ್ರಹ್ಮ॒ಣೋ ಽಧಿ॑ಪತಿ॒-ರ್ಬ್ರಹ್ಮಾ॑ ಶಿ॒ವೋ ಮೇ॑ ಅಸ್ತು ಸದಾಶಿ॒ವೋಮ್ ॥
ಕನಿಷ್ಠಿಕಾಭ್ಯಾ-ನ್ನಮಃ । 14.5

ನಮೋ॑ ವಃ ಕಿರಿ॒ಕೇಭ್ಯೋ॑ ದೇ॒ವಾನಾ॒ಗ್ಂ॒ ಹೃದ॑ಯೇಭ್ಯಃ ।
ಹೃದಯಾಯ ನಮಃ । 15

ನಮೋ॑ ಗ॒ಣೇಭ್ಯೋ॑ ಗ॒ಣಪ॑ತಿಭ್ಯಶ್ಚ ವೋ॒ ನಮಃ॑ ।
ಪೃಷ್ಠಾಯ ನಮಃ । 16

ನಮೋ॒ ಹಿರ॑ಣ್ಯಬಾಹವೇ ಸೇನಾ॒ನ್ಯೇ॑ ದಿ॒ಶಾಞ್ಚ॒ ಪತ॑ಯೇ॒ ನಮಃ॑ ।
ಪಾರ್​ಶ್ವಾಭ್ಯಾ-ನ್ನಮಃ । 17

ವಿಜ್ಯ॒-ನ್ಧನುಃ॑ ಕಪ॒ರ್ದಿನೋ॒ ವಿಶ॑ಲ್ಯೋ॒ ಬಾಣ॑ವಾಗ್ಂ ಉ॒ತ ।
ಅನೇ॑ಶನ್ನ॒ಸ್ಯೇಷ॑ವ ಆ॒ಭುರ॑ಸ್ಯ ನಿಷ॒ಙ್ಗಥಿಃ॑ ।
ಜಠರಾಯ ನಮಃ । 18

ಹಿ॒ರ॒ಣ್ಯ॒ಗ॒ರ್ಭ ಸ್ಸಮ॑ವರ್ತ॒ತಾಗ್ರೇ॑ ಭೂ॒ತಸ್ಯ॑ ಜಾ॒ತಃ ಪತಿ॒ರೇಕ॑ ಆಸೀತ್ ।
ಸದಾ॑ಧಾರ ಪೃಥಿ॒ವೀ-ನ್ದ್ಯಾಮು॒ತೇಮಾ-ಙ್ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ ।
ನಾಭ್ಯೈ ನಮಃ । 19

ಮೀಢು॑ಷ್ಟಮ॒ ಶಿವ॑ತಮ ಶಿ॒ವೋ ನ॑ಸ್ಸು॒ಮನಾ॑ ಭವ ।
ಪ॒ರ॒ಮೇ ವೃ॒ಖ್ಷ ಆಯು॑ಧ-ನ್ನಿ॒ಧಾಯ॒ ಕೃತ್ತಿಂ॒-ವಁಸಾ॑ನ॒ ಆಚ॑ರ॒ ಪಿನಾ॑ಕ॒-ಮ್ಬಿಭ್ರ॒ದಾಗ॑ಹಿ ।
ಕಠ್ಯೈ ನಮಃ । 20

ಯೇ ಭೂ॒ತಾನಾ॒-ಮಧಿ॑ಪತಯೋ ವಿಶಿ॒ಖಾಸಃ॑ ಕಪ॒ರ್ದಿ॑ನಃ ।
ತೇಷಾಗ್ಂ॑ ಸಹಸ್ರಯೋಜ॒ನೇ ಽವ॒ಧನ್ವಾ॑ನಿ ತನ್ಮಸಿ ।
ಗುಹ್ಯಾಯ ನಮಃ । 21

ಯೇ ಅನ್ನೇ॑ಷು ವಿ॒ವಿದ್ಧ್ಯ॑ನ್ತಿ॒ ಪಾತ್ರೇ॑ಷು॒ ಪಿಬ॑ತೋ॒ ಜನಾನ್॑ ।
ತೇಷಾಗ್ಂ॑ ಸಹಸ್ರಯೋಜ॒ನೇ-ಽ ವ॒ಧನ್ವಾ॑ನಿ ತನ್ಮಸಿ ।
ಅಣ್ಡಾಭ್ಯಾ-ನ್ನಮಃ । 22

ಸ॒ ಶಿ॒ರಾ ಜಾ॒ತವೇ॑ದಾ ಅ॒ಖ್ಷರ॑-ಮ್ಪರ॒ಮ-ಮ್ಪ॒ದಮ್ ।
ವೇದಾ॑ನಾ॒ಗ್ಂ॒ ಶಿರ॑ಸಿ ಮಾ॒ತಾ॒ ಆ॒ಯು॒ಷ್ಮನ್ತ॑-ಙ್ಕರೋತು॒ ಮಾಮ್ ।
ಅಪಾನಾಯ ನಮಃ । 23

ಮಾ ನೋ॑ ಮ॒ಹಾನ್ತ॑ಮು॒ತ ಮಾ ನೋ॑ ಅರ್ಭ॒ಕ-ಮ್ಮಾ ನ॒ ಉಖ್ಷ॑ನ್ತಮು॒ತ ಮಾ ನ॑ ಉಖ್ಷಿ॒ತಮ್ ।
ಮಾ ನೋ॑ ವಧೀಃ ಪಿ॒ತರ॒-ಮ್ಮೋತ ಮಾ॒ತರ॑-ಮ್ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷಃ ।
ಊರುಭ್ಯಾ-ನ್ನಮಃ । 24

ಏ॒ಷ ತೇ॑ ರುದ್ರಭಾ॒ಗ-ಸ್ತಞ್ಜು॑ಷಸ್ವ॒ ತೇನಾ॑ವ॒ಸೇನ॑ ಪ॒ರೋ
ಮೂಜ॑ವ॒ತೋ-ಽತೀ॒ಹ್ಯವ॑ತತ-ಧನ್ವಾ॒ ಪಿನಾ॑ಕಹಸ್ತಃ॒ ಕೃತ್ತಿ॑ವಾಸಾಃ ।
ಜಾನುಭ್ಯಾ-ನ್ನಮಃ । 25

ಸ॒ಗ್ಂ॒ ಸೃ॒ಷ್ಟ॒ಜಿಥ್ಸೋ॑ಮ॒ಪಾ ಬಾ॑ಹು-ಶ॒ರ್ಧ್ಯೂ᳚ರ್ಧ್ವ ಧ॑ನ್ವಾ॒ ಪ್ರತಿ॑ಹಿತಾ-ಭಿ॒ರಸ್ತಾ᳚ ।
ಬೃಹ॑ಸ್ಪತೇ॒ ಪರಿ॑ದೀಯಾ॒ ರಥೇ॑ನ ರಖ್ಷೋ॒ಹಾ-ಽಮಿತ್ರಾಗ್ಂ॑ ಅಪ॒ಬಾಧ॑ಮಾನಃ ।
ಜಙ್ಘಾಭ್ಯಾ-ನ್ನಮಃ । 26

ವಿಶ್ವ॑-ಮ್ಭೂ॒ತ-ಮ್ಭುವ॑ನ-ಞ್ಚಿ॒ತ್ರ-ಮ್ಬ॑ಹು॒ಧಾ ಜಾ॒ತ-ಞ್ಜಾಯ॑ಮಾನ-ಞ್ಚ॒ ಯತ್ ।
ಸರ್ವೋ॒ ಹ್ಯೇ॑ಷ ರು॒ದ್ರ-ಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ॥
ಗುಲ್ಫಾಭ್ಯಾ-ನ್ನಮಃ । 27

ಯೇ ಪ॒ಥಾ-ಮ್ಪ॑ಥಿ॒ರಖ್ಷ॑ಯ ಐಲಬೃ॒ದಾ ಯ॒ವ್ಯುಧಃ॑ ।
ತೇಷಾಗ್ಂ॑ ಸಹಸ್ರಯೋಜ॒ನೇ ಽವ॒ಧನ್ವಾ॑ನಿ ತನ್ಮಸಿ ।
ಪಾದಾಭ್ಯಾ-ನ್ನಮಃ । 28

ಅದ್ಧ್ಯ॑ವೋಚ-ದಧಿವ॒ಕ್ತಾ ಪ್ರ॑ಥ॒ಮೋ ದೈವ್ಯೋ॑ ಭಿ॒ಷಕ್ ।
ಅಹೀಗ್॑ಶ್ಚ॒ ಸರ್ವಾ᳚ನ್ ಜ॒ಭಂ​ಯಁ॒-ನ್ಥ್ಸರ್ವಾ᳚ಶ್ಚ ಯಾತು ಧಾ॒ನ್ಯಃ॑ ।
ಕವಚಾಯ ಹುಮ್ । 29

ನಮೋ॑ ಬಿ॒ಲ್ಮಿನೇ॑ ಚ ಕವ॒ಚಿನೇ॑ ಚ॒
ನಮ॑-ಶ್ಶ್ರು॒ತಾಯ॑ ಚ ಶ್ರುತಸೇ॒ನಾಯ॑ ಚ ।
ಉಪಕವಚಾಯ ಹುಮ್ । 30

ನಮೋ॑ ಅಸ್ತು॒ ನೀಲ॑ಗ್ರೀವಾಯ ಸಹಸ್ರಾ॒ಖ್ಷಾಯ॑ ಮೀ॒ಢುಷೇ᳚ ।
ಅಥೋ॒ ಯೇ ಅ॑ಸ್ಯ॒ ಸತ್ವಾ॑ನೋ॒-ಽಹ-ನ್ತೇಭ್ಯೋ॑-ಽಕರ॒ನ್ನಮಃ॑ ।
ತೃತೀಯ ನೇತ್ರಾಯ ನಮಃ । 31

ಪ್ರಮು॑ಞ್ಚ॒ ಧನ್ವ॑ನ॒ಸ್ತ್ವ-ಮು॒ಭಯೋ॒-ರಾರ್ತ್ನಿ॑ಯೋ॒ರ್ಜ್ಯಾಮ್ ।
ಯಾಶ್ಚ॑ ತೇ॒ ಹಸ್ತ॒ ಇಷ॑ವಃ॒ ಪರಾ॒ ತಾ ಭ॑ಗವೋ ವಪ ।
ಅಸ್ತ್ರಾಯ ಫಟ್ । 32

ಯ ಏ॒ತಾವ॑ನ್ತಶ್ಚ॒ ಭೂಯಾಗ್ಂ॑ಸಶ್ಚ॒ ದಿಶೋ॑ ರು॒ದ್ರಾ ವಿ॑ತಸ್ಥಿ॒ರೇ ।
ತೇಷಾಗ್ಂ॑॑ ಸಹಸ್ರಯೋಜ॒ನೇ ಽವ॒ಧನ್ವಾ॑ನಿ ತನ್ಮಸಿ ।
ಇತಿ ದಿಗ್ಬನ್ಧಃ । 33

-----------ಇತಿ ಪ್ರಥಮ ನ್ಯಾಸಃ------------
(ಶಿಖಾದಿ ಅಸ್ತ್ರಪರ್ಯನ್ತಂ ಏಕತ್ರಿಂಶದಙ್ಗನ್ಯಾಸಃ ದಿಗ್ಬನ್ಧ ಸಹಿತಃ ಪ್ರಥಮಃ)