(ಋಗ್ ವೇದ ಖಿಲ ಕಾಣ್ಡಂ 4.11 9.1)

ಯೇನೇ॒ದ-ಮ್ಭೂ॒ತ-ಮ್ಭುವ॑ನ-ಮ್ಭವಿ॒ಷ್ಯ-ತ್ಪರಿ॑ಗೃಹೀತ-ಮ॒ಮೃತೇ॑ನ॒ ಸರ್ವ᳚ಮ್ । ಯೇನ॑ ಯ॒ಜ್ಞಸ್ತಾ॑ಯತೇ
(ಯ॒ಜ್ಞಸ್ತ್ರಾ॑ಯತೇ) ಸ॒ಪ್ತಹೋ॑ತಾ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 1

ಯೇನ॒ ಕರ್ಮಾ॑ಣಿ ಪ್ರ॒ಚರ॑ನ್ತಿ॒ ಧೀರಾ॒ ಯತೋ॑ ವಾ॒ಚಾ ಮನ॑ಸಾ॒ ಚಾರು॒ಯನ್ತಿ॑ ।
ಯ-ಥ್ಸ॒ಮ್ಮಿತ॒ಮನು॑ ಸಂ॒​ಯಁನ್ತಿ॑ ಪ್ರಾ॒ಣಿನ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 2

ಯೇನ॒ ಕರ್ಮಾ᳚ಣ್ಯ॒ಪಸೋ॑ ಮನೀ॒ಷಿಣೋ॑ ಯ॒ಜ್ಞೇ ಕೃ॑ಣ್ವನ್ತಿ ವಿ॒ದಥೇ॑ಷು॒ ಧೀರಾಃ᳚ ।
ಯದ॑ಪೂ॒ರ್ವಂ-ಯಁ॒ಖ್ಷ್ಮಮ॒ನ್ತಃ ಪ್ರ॒ಜಾನಾ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 3

ಯತ್ಪ್ರ॒ಜ್ಞಾನ॑-ಮು॒ತ ಚೇತೋ॒ ಧೃತಿ॑ಶ್ಚ॒ ಯಜ್ಜ್ಯೋತಿ॑ ರ॒ನ್ತರ॒ಮೃತ॑-ಮ್ಪ್ರ॒ಜಾಸು॑ ।
ಯಸ್ಮಾ॒ನ್ನ ಋ॒ತೇ ಕಿಞ್ಚ॒ನ ಕರ್ಮ॑ ಕ್ರಿ॒ಯತೇ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 4

ಸು॒ಷಾ॒ರ॒ಥಿ-ರಶ್ವಾ॑ನಿವ॒ ಯನ್ಮ॑ನು॒ಷ್ಯಾ᳚ನ್ನೇ ನೀ॒ಯತೇ॑-ಽಭೀ॒ಶು॑ಭಿ ರ್ವಾ॒ಜಿನ॑ ಇವ ।
ಹೃತ್ಪ್ರ॑ತಿಷ್ಠಂ॒-ಯಁದ॑ಜಿರ॒-ಞ್ಜವಿ॑ಷ್ಠ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 5

ಯಸ್ಮಿ॒ನ್ ಋಚ॒ಸ್ಸಾಮ॒-ಯಜೂಗ್ಂ॑ಷಿ॒ ಯಸ್ಮಿ॑-ನ್ಪ್ರತಿಷ್ಠಿ॒ತಾ ರ॑ಥ॒ನಾಭಾ॑ ವಿ॒ವಾರಾಃ᳚ ।
ಯಸ್ಮಿಗ್ಗ್॑ಶ್ಚಿ॒ತ್ತಗ್ಂ ಸರ್ವ॒ಮೋತ॑-ಮ್ಪ್ರ॒ಜಾನಾ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 6

ಯದತ್ರ॑ ಷ॒ಷ್ಠ-ನ್ತ್ರಿ॒ಶತಗ್ಂ॑ ಸು॒ವೀರಂ॑-ಯಁ॒ಜ್ಞಸ್ಯ॑ ಗು॒ಹ್ಯ-ನ್ನವ॑ ನಾವ॒ಮಾಯ್ಯ᳚ಮ್ ।
ದಶ॒ ಪಞ್ಚ॑ ತ್ರಿ॒ಗ್ಂ॒ಶತಂ॒-ಯಁತ್ಪರ॑-ಞ್ಚ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 7

ಯಜ್ಜಾಗ್ರ॑ತೋ ದೂ॒ರಮು॒ದೈತಿ॒ ದೈವ॒-ನ್ತದು॑ ಸು॒ಪ್ತಸ್ಯ॒ ತಥೈ॒ವೈತಿ॑ ।
ದೂ॒ರ॒ಗ॒ಮ್ಮ-ಞ್ಜ್ಯೋತಿ॑ಷಾ॒-ಞ್ಜ್ಯೋತಿ॒ರೇಕ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 8

ಯೇನೇ॒ದಂ-ವಿಁಶ್ವ॒-ಞ್ಜಗ॑ತೋ ಬ॒ಭೂವ॒ ಯೇ ದೇ॒ವಾಪಿ॑ ಮಹ॒ತೋ ಜಾ॒ತವೇ॑ದಾಃ ।
ತದೇ॒ವಾಗ್ನಿ-ಸ್ತಮ॑ಸೋ॒ ಜ್ಯೋತಿ॒ರೇಕ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 9

ಯೇನ॒ ದ್ಯೌಃ ಪೃ॑ಥಿ॒ವೀ ಚಾ॒ನ್ತರಿ॑ಖ್ಷ-ಞ್ಚ॒ ಯೇ ಪರ್ವ॑ತಾಃ ಪ್ರ॒ದಿಶೋ॒ ದಿಶ॑ಶ್ಚ ।
ಯೇನೇ॒ದ-ಞ್ಜಗ॒-ದ್ವ್ಯಾಪ್ತ॑-ಮ್ಪ್ರ॒ಜಾನಾ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 10

ಯೇ ಮ॑ನೋ॒ ಹೃದ॑ಯಂ॒-ಯೇಁ ಚ॑ ದೇ॒ವಾ ಯೇ ದಿ॒ವ್ಯಾ ಆಪೋ॒ ಯೇ ಸೂರ್ಯ॑ರಶ್ಮಿಃ ।
ತೇ ಶ್ರೋತ್ರೇ॒ ಚಖ್ಷು॑ಷೀ ಸ॒ಞ್ಚರ॑ನ್ತ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 11

ಅಚಿ॑ನ್ತ್ಯ॒-ಞ್ಚಾ ಪ್ರ॑ಮೇಯ॒-ಞ್ಚ ವ್ಯ॒ಕ್ತಾ-ವ್ಯಕ್ತ॑ ಪರ॒-ಞ್ಚ ಯ॑ತ್ ।
ಸೂಖ್ಷ್ಮಾ᳚-ಥ್ಸೂಖ್ಷ್ಮತ॑ರ-ಞ್ಜ್ಞೇ॒ಯ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 12

ಏಕಾ॑ ಚ ದ॒ಶ ಶ॒ತ-ಞ್ಚ॑ ಸ॒ಹಸ್ರ॑-ಞ್ಚಾ॒ಯುತ॑-ಞ್ಚ ನಿ॒ಯುತ॑-ಞ್ಚ ಪ್ರ॒ಯುತಂ॒
ಚಾರ್ಬು॑ದ-ಞ್ಚ॒ ನ್ಯ॑ರ್ಬುದ-ಞ್ಚ ಸಮು॒ದ್ರಶ್ಚ॒ ಮದ್ಧ್ಯ॒-ಞ್ಚಾನ್ತ॑ಶ್ಚ ಪರಾ॒ರ್ಧಶ್ಚ॒ ತನ್ಮೇ॒ ಮನಃ॑
ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 13

ಯೇ ಪ॑ಞ್ಚ॒ ಪಞ್ಚ॑ ದಶ ಶ॒ತಗ್ಂ ಸ॒ಹಸ್ರ॑-ಮ॒ಯುತ॒-ನ್ನ್ಯ॑ರ್ಬುದ-ಞ್ಚ ।
ತೇ ಅ॑ಗ್ನಿ-ಚಿ॒ತ್ಯೇಷ್ಟ॑ಕಾ॒ಸ್ತಗ್ಂ ಶರೀ॑ರ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 14

ವೇದಾ॒ಹಮೇ॒ತ-ಮ್ಪು॑ರುಷ-ಮ್ಮ॒ಹಾನ್ತ॑-ಮಾದಿ॒ತ್ಯ-ವ॑ರ್ಣ॒-ನ್ತಮ॑ಸಃ॒ ಪರ॑ಸ್ತಾತ್ ।
ಯಸ್ಯ॒ ಯೋನಿ॒-ಮ್ಪರಿ॒ಪಶ್ಯ॑ನ್ತಿ॒ ಧೀರಾ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 15

ಯಸ್ಯೇ॒ದ-ನ್ಧೀರಾಃ᳚ ಪು॒ನನ್ತಿ॑ ಕ॒ವಯೋ᳚ ಬ್ರ॒ಹ್ಮಾಣ॑ಮೇ॒ತ-ನ್ತ್ವಾ॑ ವೃಣತ॒ ಇನ್ದು᳚ಮ್ ।
ಸ್ಥಾ॒ವ॒ರ-ಞ್ಜಙ್ಗ॑ಮಂ॒-ದ್ಯೌ॑ರಾಕಾ॒ಶ-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 16

ಪರಾ᳚-ತ್ಪ॒ರತ॑ರ-ಞ್ಚೈ॒ವ॒ ಯ॒-ತ್ಪರಾ᳚ಶ್ಚೈವ॒ ಯತ್ಪ॑ರಮ್ ।
ಯ॒ತ್ಪರಾ᳚-ತ್ಪರ॑ತೋ ಜ್ಞೇ॒ಯ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 17

ಪರಾ᳚-ತ್ಪರತ॑ರೋ ಬ್ರ॒ಹ್ಮಾ॒ ತ॒ತ್ಪರಾ᳚-ತ್ಪರ॒ತೋ ಹ॑ರಿಃ ।
ತ॒ತ್ಪರಾ᳚-ತ್ಪರ॑ತೋ ಽಧೀ॒ಶ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 18

ಯಾ ವೇ॑ದಾ॒ದಿಷು॑ ಗಾಯ॒ತ್ರೀ॒ ಸ॒ರ್ವ॒ವ್ಯಾಪಿ॑ ಮಹೇ॒ಶ್ವರೀ ।
ಋಗ್ ಯ॑ಜು-ಸ್ಸಾಮಾ-ಥರ್ವೈ॒ಶ್ಚ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 19

ಯೋ ವೈ॑ ದೇ॒ವ-ಮ್ಮ॑ಹಾದೇ॒ವ॒-ಮ್ಪ್ರ॒ಣವ॑-ಮ್ಪರ॒ಮೇಶ್ವ॑ರಮ್ ।
ಯ-ಸ್ಸರ್ವೇ॑ ಸರ್ವ॑ ವೇದೈ॒ಶ್ಚ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 20

ಪ್ರಯ॑ತಃ॒ ಪ್ರಣ॑ವೋಙ್ಕಾ॒ರ॒-ಮ್ಪ್ರ॒ಣವ॑-ಮ್ಪುರು॒ಷೋತ್ತ॑ಮಮ್ ।
ಓಕಾಂ॑ರ॒-ಮ್ಪ್ರಣ॑ವಾತ್ಮಾ॒ನ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 21

ಯೋ-ಽಸೌ॑ ಸ॒ರ್ವೇಷು॑ ವೇದೇ॒ಷು॒ ಪ॒ಠ್ಯತೇ᳚ ಹ್ಯಜ॒ ಈಶ್ವ॑ರಃ । ಅ॒ಕಾಯೋ॑ ನಿರ್ಗು॑ಣೋ ಹ್ಯಾ॒ತ್ಮಾ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 22

ಗೋಭಿ॒ ರ್ಜುಷ್ಟ॒-ನ್ಧನೇ॑ನ॒ ಹ್ಯಾಯು॑ಷಾ ಚ॒ ಬಲೇ॑ನ ಚ । ಪ್ರ॒ಜಯಾ॑ ಪ॒ಶುಭಿಃ॑ ಪುಷ್ಕರಾ॒ಖ್ಷ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 23

ಕೈಲಾ॑ಸ॒ ಶಿಖ॑ರೇ ರ॒ಮ್ಯೇ॒ ಶ॒ಙ್ಕರ॑ಸ್ಯ ಶಿ॒ವಾಲ॑ಯೇ ।
ದೇ॒ವತಾ᳚ಸ್ತತ್ರ॑ ಮೋದ॒ನ್ತೇ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 24

ತ್ರ್ಯ॑ಬಙ್ಕಂ-ಯಁಜಾಮಹೇ ಸುಗ॒ನ್ಧಿ-ಮ್ಪು॑ಷ್ಟಿ॒ವರ್ಧ॑ನಮ್ । ಉ॒ರ್ವಾ॒ರು॒ಕಮಿ॑ವ॒ ಬನ್ಧ॑ನಾ-ನ್ಮೃ॒ತ್ಯೋ-ರ್ಮು॑ಖ್ಷೀಯ॒ ಮಾ-ಽಮೃತಾ॒-ತ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 25
ವಿ॒ಶ್ವತ॑-ಶ್ಚಖ್ಷುರು॒ತ ವಿ॒ಶ್ವತೋ॑ ಮುಖೋ ವಿ॒ಶ್ವತೋ॑ ಹಸ್ತ ಉ॒ತ ವಿ॒ಶ್ವತ॑ಸ್ಪಾತ್ ।

ಸಮ್ಬಾ॒ಹುಭ್ಯಾಂ॒-ನಮ॑ತಿ॒ ಸಮ್ಪ॑ತತ್ರೈ॒ ರ್ದ್ಯಾವಾ॑ ಪೃಥಿ॒ವೀ ಜ॒ನಯ॑-ನ್ದೇ॒ವ ಏಕ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 26

ಚ॒ತುರೋ॑ ವೇ॒ದಾನ॑ಧೀಯೀ॒ತ॒ ಸ॒ರ್ವ ಶಾ᳚ಸ್ತ್ರಮ॒ಯಂ-ವಿಁ॑ದುಃ । ಇ॒ತಿ॒ಹಾ॒ಸ॒ ಪು॒ರಾ॒ಣಾ॒ನಾ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 27

ಮಾ ನೋ॑ ಮ॒ಹಾನ್ತ॑ಮು॒ತ ಮಾ ನೋ॑ ಅರ್ಭ॒ಕ-ಮ್ಮಾ ನ॒ ಉಖ್ಷ॑ನ್ತಮು॒ತ ಮಾ ನ॑ ಉಖ್ಷಿ॒ತಮ್ । ಮಾ ನೋ॑ ವಧೀಃ ಪಿ॒ತರ॒-ಮ್ಮೋತ ಮಾ॒ತರ॑-ಮ್ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 28

ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ ।
ವೀ॒ರಾನ್ಮಾನೋ॑ ರುದ್ರ ಭಾಮಿ॒ತೋವ॑ಧೀ ರ್​ಹ॒ವಿಷ್ಮ॑ನ್ತೋ॒ ನಮ॑ಸಾ ವಿಧೇಮ ತೇ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 29

ಋ॒ತಗ್ಂ ಸ॒ತ್ಯ-ಮ್ಪ॑ರ-ಮ್ಬ್ರ॒ಹ್ಮ॒ ಪು॒ರುಷ॑-ಙ್ಕೃಷ್ಣ॒ಪಿಙ್ಗ॑ಲಮ್ ।
ಊ॒ರ್ಧ್ವರೇ॑ತಂ-ವಿಁ॑ರೂಪಾ॒ಖ್ಷಂ॒-ವಿಁ॒ಶ್ವರೂ॑ಪಾಯ॒ ವೈ ನಮೋ॒ ನಮ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 30

ಕ-ದ್ರು॒ದ್ರಾಯ॒ ಪ್ರಚೇ॑ತಸೇ ಮೀ॒ಢುಷ್ಟ॑ಮಾಯ॒ ತವ್ಯ॑ಸೇ । ವೋ॒ಚೇಮ॒ ಶನ್ತ॑ಮಗ್ಂ ಹೃ॒ದೇ ।
ಸರ್ವೋ॒ ಹ್ಯೇ॑ಷ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 31

ಬ್ರಹ್ಮ॑ಜಜ್ಞಾ॒ನ-ಮ್ಪ್ರ॑ಥ॒ಮ-ಮ್ಪು॒ರಸ್ತಾ॒-ದ್ವಿಸೀ॑ಮ॒ತ-ಸ್ಸು॒ರುಚೋ॑ ವೇ॒ನ ಆ॑ವಃ ।
ಸ ಬು॒ಧ್ನಿಯಾ॑ ಉಪ॒ಮಾ ಅ॑ಸ್ಯ ವಿ॒ಷ್ಠಾ-ಸ್ಸ॒ತಶ್ಚ॒ ಯೋನಿ॒-ಮಸ॑ತಶ್ಚ॒ ವಿವ॒ಸ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 32

ಯಃ ಪ್ರಾ॑ಣ॒ತೋ ನಿ॑ಮಿಷ॒ತೋ ಮ॑ಹಿ॒ತ್ವೈಕ॒ ಇದ್ರಾಜಾ॒ ಜಗ॑ತೋ ಬ॒ಭೂವ॑ । ಯ ಈಶೇ॑ ಅ॒ಸ್ಯ ದ್ವಿ॒ಪದ॒-ಶ್ಚತು॑ಷ್ಪದಃ॒ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 33

ಯ ಆ᳚ತ್ಮ॒ದಾ ಬ॑ಲ॒ದಾ ಯಸ್ಯ॒ ವಿಶ್ವ॑ ಉ॒ಪಾಸ॑ತೇ ಪ್ರ॒ಶಿಷಂ॒-ಯಁಸ್ಯ॑ ದೇ॒ವಾಃ ।
ಯಸ್ಯ॑ ಛಾ॒ಯಾ-ಽಮೃತಂ॒-ಯಁಸ್ಯ॑ ಮೃ॒ತ್ಯುಃ ಕಸ್ಮೈ॑ ದೇ॒ವಾಯ॑ ಹ॒ವಿಷಾ॑ ವಿಧೇಮ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 34

ಯೋ ರು॒ದ್ರೋ ಅ॒ಗ್ನೌ ಯೋ ಅ॒ಫ್ಸು ಯ ಓಷ॑ಧೀಷು॒ ಯೋ ರು॒ದ್ರೋ ವಿಶ್ವಾ॒ ಭುವ॑ನಾ-ಽಽವಿ॒ವೇಶ॒ ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 35

ಗ॒ನ್ಧ॒ದ್ವಾ॒ರಾ-ನ್ದು॑ರಾಧ॒ರ್​ಷಾ॒-ನ್ನಿ॒ತ್ಯಪು॑ಷ್ಟಾ-ಙ್ಕರೀ॒ಷಿಣೀ᳚ಮ್ । ಈ॒ಶ್ವರೀಗ್ಂ॑ ಸರ್ವ॑ ಭೂತಾ॒ನಾ॒-ನ್ತಾಮಿ॒ಹೋಪ॑ಹ್ವಯೇ॒ ಶ್ರಿಯ॒-ನ್ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 36
ಯ ಇದಗ್ಂ॑ ಶಿವ॑ಸಙ್ಕ॒ಲ್ಪ॒ಗ್ಂ॒ ಸ॒ದಾ ಧ್ಯಾ॑ಯನ್ತಿ॒ ಬ್ರಾಹ್ಮ॑ಣಾಃ । ತೇ ಪ॑ರ-ಮ್ಮೋಖ್ಷ॑-ಙ್ಗಮಿಷ್ಯ॒ನ್ತಿ॒ ತನ್ಮೇ॒ ಮನ॑-ಶ್ಶಿ॒ವಸ॑ಙ್ಕ॒ಲ್ಪಮ॑ಸ್ತು ॥ 37

ಓ-ನ್ನಮೋ ಭಗವತೇ॑ ರುದ್ರಾ॒ಯ ॥ ಶಿವಸಙ್ಕಲ್ಪಗ್ಂ ಹೃದಯಾಯ ನಮಃ॑ ॥