ṛṣiruvācha ।
juṣṭaṃ batādyākhilasattvarāśēḥ
sāṃsidḥdhyamakṣṇōstava darśanānnaḥ ।
yaddarśanaṃ janmabhirīḍya sadbhi-
rāśāsatē yōginō rūḍhayōgāḥ ॥ 13 ॥
yē māyayā tē hatamēdhasastva-
tpādāravindaṃ bhavasindhupōtam ।
upāsatē kāmalavāya tēṣāṃ
rāsīśa kāmānnirayē'pi yē syuḥ ॥ 14 ॥
tathā sa chāhaṃ parivōḍhukāmaḥ
samānaśīlāṃ gṛhamēdhadhēnum ।
upēyivān mūlamaśēṣamūlaṃ
durāśayaḥ kāmadughāṅghripasya ॥ 15 ॥
prajāpatēstē vachasādhīśa tantyā
lōkaḥ kilāyaṃ kāmahatō'nubaddhaḥ ।
ahaṃ cha lōkānugatō vahāmi
baliṃ cha śuklānimiṣāya tubhyam ॥ 16 ॥
lōkāṃścha lōkānugatān paśūṃścha
hitvā śritāstē charaṇātapatram ।
parasparaṃ tvadguṇavādasīdhu-
pīyūṣaniryāpitadēhadharmāḥ ॥ 17 ॥
na tē'jarākṣabhramirāyurēṣāṃ
trayōdaśāraṃ triśataṃ ṣaṣṭiparva ।
ṣaṇnēmyanantachChadi yattriṇābhi-
karālasrōtō jagadāchChidya dhāvat ॥ 18 ॥
ēkaḥ svayaṃ san jagataḥ sisṛkṣayā
dvitīyayā'tmannadhiyōgamāyayā ।
sṛjasyadaḥ pāsi punargrasiṣyasē
yathōrṇanābhirbhagavan svaśaktibhiḥ ॥ 19 ॥
naitadbatādhīśa padaṃ tavēpsitaṃ
yanmāyayā nastanuṣē bhūtasūkṣmam ।
anugrahāyāstvapi yarhi māyayā
lasattulasyā tanuvā vilakṣitaḥ ॥ 20 ॥
taṃ tvānubhūtyōparatakriyārthaṃ
svamāyayā vartitalōkatantram ।
namāmyabhīkṣṇaṃ namanīyapāda-
sarōjamalpīyasi kāmavarṣam ॥ 21 ॥
iti śrīmadbhāgavatamahāpurāṇē tṛtīyaskandhē ēkaviṃśādhyāyāntargataṃ
kardamarṣikṛtaṃ viṣṇustōtraṃ samāptam ।
bhāgavatapurāṇa . adhyāya 3/21/13-21 . ।
