ઋષિરુવાચ ।
જુષ્ટં બતાદ્યાખિલસત્ત્વરાશેઃ
સાંસિદઃધ્યમક્ષ્ણોસ્તવ દર્શનાન્નઃ ।
યદ્દર્શનં જન્મભિરીડ્ય સદ્ભિ-
રાશાસતે યોગિનો રૂઢયોગાઃ ॥ 13 ॥
યે માયયા તે હતમેધસસ્ત્વ-
ત્પાદારવિંદં ભવસિંધુપોતમ્ ।
ઉપાસતે કામલવાય તેષાં
રાસીશ કામાન્નિરયેઽપિ યે સ્યુઃ ॥ 14 ॥
તથા સ ચાહં પરિવોઢુકામઃ
સમાનશીલાં ગૃહમેધધેનુમ્ ।
ઉપેયિવાન્ મૂલમશેષમૂલં
દુરાશયઃ કામદુઘાંઘ્રિપસ્ય ॥ 15 ॥
પ્રજાપતેસ્તે વચસાધીશ તંત્યા
લોકઃ કિલાયં કામહતોઽનુબદ્ધઃ ।
અહં ચ લોકાનુગતો વહામિ
બલિં ચ શુક્લાનિમિષાય તુભ્યમ્ ॥ 16 ॥
લોકાંશ્ચ લોકાનુગતાન્ પશૂંશ્ચ
હિત્વા શ્રિતાસ્તે ચરણાતપત્રમ્ ।
પરસ્પરં ત્વદ્ગુણવાદસીધુ-
પીયૂષનિર્યાપિતદેહધર્માઃ ॥ 17 ॥
ન તેઽજરાક્ષભ્રમિરાયુરેષાં
ત્રયોદશારં ત્રિશતં ષષ્ટિપર્વ ।
ષણ્નેમ્યનંતચ્છદિ યત્ત્રિણાભિ-
કરાલસ્રોતો જગદાચ્છિદ્ય ધાવત્ ॥ 18 ॥
એકઃ સ્વયં સન્ જગતઃ સિસૃક્ષયા
દ્વિતીયયાઽત્મન્નધિયોગમાયયા ।
સૃજસ્યદઃ પાસિ પુનર્ગ્રસિષ્યસે
યથોર્ણનાભિર્ભગવન્ સ્વશક્તિભિઃ ॥ 19 ॥
નૈતદ્બતાધીશ પદં તવેપ્સિતં
યન્માયયા નસ્તનુષે ભૂતસૂક્ષ્મમ્ ।
અનુગ્રહાયાસ્ત્વપિ યર્હિ માયયા
લસત્તુલસ્યા તનુવા વિલક્ષિતઃ ॥ 20 ॥
તં ત્વાનુભૂત્યોપરતક્રિયાર્થં
સ્વમાયયા વર્તિતલોકતંત્રમ્ ।
નમામ્યભીક્ષ્ણં નમનીયપાદ-
સરોજમલ્પીયસિ કામવર્ષમ્ ॥ 21 ॥
ઇતિ શ્રીમદ્ભાગવતમહાપુરાણે તૃતીયસ્કંધે એકવિંશાધ્યાયાંતર્ગતં
કર્દમર્ષિકૃતં વિષ્ણુસ્તોત્રં સમાપ્તમ્ ।
ભાગવતપુરાણ . અધ્યાય 3/21/13-21 . ।
