কৃষ্ণ যজুর্বেদীয তৈত্তিরীয ব্রাহ্মণে দ্বিতীযাষ্টকে ষষ্ঠঃ প্রপাঠকঃ - সৌত্রামণিঃ কৌকিলী হোত্র-ঞ্চ

ও-ন্নমঃ পরমাত্মনে, শ্রী মহাগণপতযে নমঃ,
শ্রী গুরুভ্যো নমঃ । হ॒রিঃ॒ ওম্ ॥

অনুবাকং 1 - গ্রহাঃ
স্বা॒দ্বী-ন্ত্বা᳚ স্বা॒দুনা᳚ । তী॒ব্রা-ন্তী॒ব্রেণ॑ । অ॒মৃতা॑-ম॒মৃতে॑ন । মধু॑মতী॒-ম্মধু॑মতা । সৃ॒জামি॒ সগ্​ম্ সোমে॑ন । সোমো᳚-ঽস্য॒শ্বিভ্যা᳚-ম্পচ্যস্ব । সর॑স্বত্যৈ পচ্যস্ব । ইন্দ্রা॑য সু॒ত্রাম্ণে॑ পচ্যস্ব ॥ পরী॒তোষি॑ঞ্চতা সু॒তম্ । সোমো॒ য উ॑ত্ত॒মগ্​ম্ হ॒বিঃ ॥ 1 ॥

দ॒ধ॒ন্বা যো নর্যো॑ অ॒ফ্স্ব॑ন্তরা । সু॒ষাব॒ সোম॒মদ্রি॑ভিঃ ॥ পু॒নাতু॑ তে পরি॒স্রুত᳚ম্ । সোম॒গ্​ম্॒ সূর্য॑স্য দুহি॒তা । বারে॑ণ॒ শশ্ব॑তা॒ তনা᳚ । বা॒যুঃ পূ॒তঃ প॒বিত্রে॑ণ । প্রাঙ্খ্সোমো॒ অতি॑দ্রুতঃ । ইন্দ্র॑স্য॒ যুজ্য॒-স্সখা᳚ ॥ বা॒যুঃ পূ॒তঃ প॒বিত্রে॑ণ । প্র॒ত্যঙ্খ্সোমো॒ আতি॑দ্রুতঃ ॥ 2 ॥

ইন্দ্র॑স্য॒ যুজ্য॒-স্সখা᳚ ॥ ব্রহ্ম॑ ক্ষ॒ত্র-ম্প॑বতে॒ তেজ॑ ইন্দ্রি॒যম্ । সুর॑যা॒ সোম॑-স্সু॒ত আসু॑তো॒ মদা॑য । শু॒ক্রেণ॑ দেব দে॒বতাঃ᳚ পিপৃগ্ধি । রসে॒নান্নং॒-যঁজ॑মানায ধেহি ॥ কু॒বিদ॒ঙ্গ যব॑মন্তো॒ যব॑-ঞ্চিত্ । যথা॒ দান্ত্য॑নুপূ॒র্বং-বিঁ॒যূয॑ । ই॒হেহৈ॑ষা-ঙ্কৃণুত॒ ভোজ॑নানি । যে ব॒র॒ঃইষো॒ নমো॑বৃক্তি॒-ন্ন জ॒গ্মুঃ ॥ উ॒প॒যা॒ম-গৃ॑হীতো-ঽস্য॒শ্বিভ্যা᳚-ন্ত্বা॒ জুষ্ট॑-ঙ্গৃহ্ণামি ॥ 3 ॥

সর॑স্বত্যা॒ ইন্দ্রা॑য সু॒ত্রাম্ণে᳚ ॥ এ॒ষ তে॒ যোনি॒স্তেজ॑সে ত্বা । বী॒র্যা॑য ত্বা॒ বলা॑য ত্বা ॥ তেজো॑-ঽসি॒ তেজো॒ মযি॑ ধেহি । বী॒র্য॑মসি বী॒র্য॑-ম্মযি॑ ধেহি । বল॑মসি॒ বল॒-ম্মযি॑ ধেহি ॥ নানা॒ হি বা᳚-ন্দে॒বহি॑ত॒গ্​ম্॒ সদঃ॑ কৃ॒তম্ । মা সগ্​ম্সৃ॑ক্ষাথা-ম্পর॒মে ব্যো॑মন্ন্ । সুরা॒ ত্বমসি॑ শু॒ষ্মিণী॒ সোম॑ এ॒ষঃ । মা মা॑ হিগ্​ম্সী॒-স্স্বাং-যোঁনি॑মাবি॒শন্ন্ ॥ 4 ॥

উ॒প॒যা॒মগৃ॑হীতো-ঽস্যাশ্বি॒ন-ন্তেজঃ॑ । সা॒র॒স্ব॒তং-বীঁ॒র্য᳚ম্ । ঐ॒ন্দ্র-ম্বল᳚ম্ ॥ এ॒ষ তে॒ যোনি॒র্মোদা॑য ত্বা । আ॒ন॒ন্দায॑ ত্বা॒ মহ॑সে ত্বা ॥ ওজো॒-ঽস্যোজো॒ মযি॑ ধেহি । ম॒ন্যুর॑সি ম॒ন্যু-ম্মযি॑ ধেহি । মহো॑-ঽসি॒ মহো॒ মযি॑ ধেহি । সহো॑-ঽসি॒ সহো॒ মযি॑ ধেহি ॥ যা ব্যা॒ঘ্রং-বিঁষূ॑চিকা । উ॒ভৌ বৃক॑-ঞ্চ॒ রক্ষ॑তি । শ্যে॒ন-ম্প॑ত॒ত্রিণগ্​ম্॑ সি॒গ্​ম্॒হম্ । সেম-ম্পা॒ত্বগ্​ম্হ॑সঃ ॥ স॒-ম্পৃচ॑-স্স্থ॒ স-ম্মা॑ ভ॒দ্রেণ॑ পৃঙ্ক্ত । বি॒পৃচ॑-স্স্থ॒ বি মা॑ পা॒প্মনা॑ পৃঙ্ক্ত ॥ 5 ॥
(হ॒বিঃ - প্র॒ত্যঙ্খ্সোমো॒ আতি॑দ্রুতো - গৃহ্ণা - ম্যাবি॒শন্ - বিষূ॑চিকা॒ পঞ্চ॑ চ) (অ. 1)

অনুবাকং 2 - গ্রহোপস্থানম্
সোমো॒ রাজা॒-ঽমৃতগ্​ম্॑ সু॒তঃ । ঋ॒জী॒ষেণা॑জহান্মৃ॒ত্যুম্ । ঋ॒তেন॑ স॒ত্যমি॑ন্দ্রি॒যম্ । বিপানগ্​ম্॑ শু॒ক্রমন্ধ॑সঃ । ইন্দ্র॑স্যেন্দ্রি॒যম্ । ই॒দ-ম্পযো॒-ঽমৃত॒-ম্মধু॑ ॥ সোম॑ম॒দ্ভ্যো ব্য॑পিবত্ । ছন্দ॑সা হ॒গ্​ম্॒স-শ্শু॑চি॒ষত্ । ঋ॒তেন॑ স॒ত্যমি॑ন্দ্রি॒যম্ । অ॒দ্ভ্যঃ, ক্ষী॒রং-ব্যঁ॑পিবত্ ॥ 6 ॥

ক্রুঙ্ঙা᳚ঙ্গির॒সো ধি॒যা । ঋ॒তেন॑ স॒ত্যমি॑ন্দ্রি॒যম্ । অন্না᳚-ত্পরি॒স্রুতো॒ রস᳚ম্ । ব্রহ্ম॑ণা॒ ব্য॑পিব-ত্ক্ষ॒ত্রম্ । ঋ॒তেন॑ স॒ত্যমি॑ন্দ্রি॒যম্ ॥ রেতো॒ মূত্রং॒-বিঁজ॑হাতি । যোনি॑-ম্প্রবি॒শদি॑ন্দ্রি॒যম্ । গর্ভো॑ জ॒রাযু॒ণা-ঽঽবৃ॑তঃ । উল্ব॑-ঞ্জহাতি॒ জন্ম॑না । ঋ॒তেন॑ স॒ত্যমি॑ন্দ্রি॒যম্ ॥ 7 ॥

বেদে॑ন রূ॒পে ব্য॑করোত্ । স॒তা॒স॒তী প্র॒জাপ॑তিঃ । ঋ॒তেন॑ স॒ত্যমি॑ন্দ্রি॒যম্ ॥ সোমে॑ন॒ সোমৌ॒ ব্য॑পিবত্ । সু॒তা॒সু॒তৌ প্র॒জাপ॑তিঃ । ঋ॒তেন॑ স॒ত্যমি॑ন্দ্রি॒যম্ । দৃ॒ষ্ট্বা রূ॒পে ব্যাক॑রোত্ । স॒ত্যা॒নৃ॒তে প্র॒জাপ॑তিঃ । অশ্র॑দ্ধা॒-মনৃ॒তে-ঽদ॑ধাত্ । শ্র॒দ্ধাগ্​ম্ স॒ত্যে প্র॒জাপ॑তিঃ । ঋ॒তেন॑ স॒ত্যমি॑ন্দ্রি॒যম্ ॥ দৃ॒ষ্ট্বা প॑রি॒স্রুতো॒ রস᳚ম্ । শু॒ক্রেণ॑ শু॒ক্রং-ব্যঁ॑পিবত্ । পয॒-স্সোম॑-ম্প্র॒জাপ॑তিঃ । ঋ॒তেন॑ স॒ত্যমি॑ন্দ্রি॒যম্ । বিপানগ্​ম্॑ শু॒ক্রমন্ধ॑সঃ । ইন্দ্র॑স্যেন্দ্রি॒যম্ । ই॒দ-ম্পযো॒-ঽমৃত॒-ম্মধু॑ ॥ 8 ॥
(অ॒দ্ভ্যঃ, ক্ষী॒রং-ব্যঁ॑পিব॒ - জ্জন্ম॑ন॒র্তেন॑ স॒ত্যমি॑ন্দ্রি॒যগ্গ্​ - শ্র॒দ্ধাগ্​ম্ স॒ত্যে প্র॒জাপ॑তির॒ষ্টৌ চ॑) (অ. 2)

(সোমো॒ রাজা॒ বিপান॒গ্​ম্॒ সোম॑ম॒দ্ভ্যো-ঽন্না॒-দ্রেতো॒ মূত্রং॒-বেঁদে॑ন সতাস॒তী সোমে॑ন সুতাসু॒তৌ দৃ॒ষ্ট্বা রূ॒পে দৃ॒ষ্ট্বা প॑রি॒স্রুতো॒ রসং॒-বিঁপান॒-ন্দশ॑ )

অনুবাকং 3 - গ্রহহোমঃ
সুরা॑বন্ত-ম্বর্​হি॒ষদগ্​ম্॑ সু॒বীর᳚ম্ । য॒জ্ঞগ্​ম্ হি॑ন্বন্তি মহি॒ষা নমো॑ভিঃ । দধা॑না॒-স্সোম॑-ন্দি॒বি দে॒বতা॑সু । মদে॒মেন্দ্রং॒-যঁজ॑মানা-স্স্ব॒র্কাঃ ॥ যস্তে॒ রস॒-স্সম্ভৃ॑ত॒ ওষ॑ধীষু । সোম॑স্য॒ শুষ্ম॒-স্সুর॑যা সু॒তস্য॑ । তেন॑ জিন্ব॒ যজ॑মান॒-ম্মদে॑ন । সর॑স্বতী-ম॒শ্বিনা॒-বিন্দ্র॑-ম॒গ্নিম্ ॥ যম॒শ্বিনা॒ নমু॑চেরাসু॒রাদধি॑ । সর॑স্ব॒ত্যস॑নোদিন্দ্রি॒যায॑ ॥ 9 ॥

ই॒ম-ন্তগ্​ম্ শু॒ক্র-ম্মধু॑মন্ত॒-মিন্দু᳚ম্ । সোম॒গ্​ম্॒ রাজা॑নমি॒হ ভ॑ক্ষযামি ॥ যদত্র॑ রি॒প্তগ্​ম্ র॒সিন॑-স্সু॒তস্য॑ । যদিন্দ্রো॒ অপি॑ব॒চ্ছচী॑ভিঃ । অ॒হ-ন্তদ॑স্য॒ মন॑সা শি॒বেন॑ । সোম॒গ্​ম্॒ রাজা॑নমি॒হ ভ॑ক্ষযামি ॥ পি॒তৃভ্য॑-স্স্বধা॒বিভ্য॑-স্স্ব॒ধা নমঃ॑ । পি॒তা॒ম॒হেভ্য॑-স্স্বধা॒বিভ্য॑-স্স্ব॒ধা নমঃ॑ । প্রপি॑তামহেভ্য-স্স্বধা॒বিভ্য॑-স্স্ব॒ধা নমঃ॑ । অক্ষ॑-ন্পি॒তরঃ॑ ॥ 10 ॥

অমী॑মদন্ত পি॒তরঃ॑ । অতী॑তৃপন্ত পি॒তরঃ॑ । অমী॑মৃজন্ত পি॒তরঃ॑ । পিত॑র॒-শ্শুন্ধ॑দ্ধ্বম্ ॥ পু॒নন্তু॑ মা পি॒তর॑-স্সো॒ম্যাসঃ॑ । পু॒নন্তু॑ মা পিতাম॒হাঃ । পু॒নন্তু॒ প্রপি॑তামহাঃ । প॒বিত্রে॑ণ শ॒তাযু॑ষা । পু॒নন্তু॑ মা পিতাম॒হাঃ । পু॒নন্তু॒ প্রপি॑তামহাঃ ॥ 11 ॥

প॒বিত্রে॑ণ শ॒তাযু॑ষা ॥ বিশ্ব॒মাযু॒-র্ব্য॑শ্নবৈ । অগ্ন॒ আযূগ্​ম্॑ষি পবস॒ আ সু॒বোর্জ॒মিষ॑-ঞ্চ নঃ । আ॒রে বা॑ধস্ব দু॒চ্ছুনা᳚ম্ ॥ অগ্নে॒ পব॑স্ব॒ স্বপা॑ অ॒স্মে বর্চ॑-স্সু॒বীর্য᳚ম্ । দধ॒-ত্পোষগ্​ম্॑ র॒যি-ম্মযি॑ ॥। পব॑মান॒-স্সুব॒র্জনঃ॑ । প॒বিত্রে॑ণ॒ বিচ॑র্​ষণিঃ । যঃ পোতা॒ স পু॑নাতু মা ॥ পু॒নন্তু॑ মা দেবজ॒নাঃ । পু॒নন্তু॒ মন॑ বো ধি॒যা । পু॒নন্তু॒ বিশ্ব॑ আ॒যবঃ॑ ॥। জাত॑বেদঃ প॒বিত্র॑বত্ । প॒বিত্রে॑ণ পুনাহি মা । শু॒ক্রেণ॑ দেব॒ দীদ্য॑ত্ । অগ্নে॒ ক্রত্বা॒ ক্রতূ॒গ্​ম্॒রনু॑ ॥ যত্তে॑ প॒বিত্র॑-ম॒র্চিষি॑ । অগ্নে॒ বিত॑তমন্ত॒রা । ব্রহ্ম॒ তেন॑ পুনীমহে ॥। উ॒ভাভ্যা᳚-ন্দেব সবিতঃ । প॒বিত্রে॑ণ স॒বেন॑ চ । ই॒দ-ম্ব্রহ্ম॑ পুনীমহে ॥ বৈ॒শ্ব॒দে॒বী পু॑ন॒তী দে॒ব্যাগা᳚ত্ । যস্যৈ॑ ব॒হ্বী-স্ত॒নুবো॑ বী॒তপৃ॑ষ্ঠাঃ । তযা॒ মদ॑ন্ত-স্সধ॒মাদ্যে॑ষু । ব॒যগ্গ্​ স্যা॑ম॒ পত॑যো রযী॒ণাম্ ॥॥ যে স॑মা॒না-স্সম॑নসঃ । পি॒তরো॑ যম॒রাজ্যে᳚ । তেষাং᳚-লোঁ॒ক-স্স্ব॒ধা নমঃ॑ । য॒জ্ঞো দে॒বেষু॑ কল্পতাম্ ॥ 12 ॥

যে স॑জা॒তা-স্সম॑নসঃ । জী॒বা জী॒বেষু॑ মাম॒কাঃ । তেষা॒গ্॒ শ্রীর্মযি॑ কল্পতাম্ । অ॒স্মিল্ ঁলো॒কে শ॒তগ্​ম্ সমাঃ᳚ ॥ দ্বে স্রু॒তী অ॑শৃণব-ম্পিতৃ॒ণাম্ । অ॒হ-ন্দে॒বানা॑মু॒ত মর্ত্যা॑নাম্ । যাভ্যা॑মি॒দং-বিঁশ্ব॒মেজ॒-থ্সমে॑তি । যদ॑ন্ত॒রা পি॒তর॑-ম্মা॒তর॑-ঞ্চ ॥ ই॒দগ্​ম্ হ॒বিঃ প্র॒জন॑ন-ম্মে অস্তু । দশ॑বীরগ্​ম্ স॒র্বগ॑ণগ্গ্​ স্ব॒স্তযে᳚ । আ॒ত্ম॒সনি॑ প্রজা॒সনি॑ । প॒শু॒সন্য॑ভয॒সনি॑ লোক॒সনি॑ । অ॒গ্নিঃ প্র॒জা-ম্ব॑হু॒লা-ম্মে॑ করোতু । অন্ন॒-ম্পযো॒ রেতো॑ অ॒স্মাসু॑ ধত্ত । রা॒যস্পোষ॒-মিষ॒মূর্জ॑ম॒স্মাসু॑ দীধর॒-থ্স্বাহা᳚ ॥ 13 ॥
(ই॒ন্দ্রি॒যায॑ - পি॒তরঃ॑ - শ॒তাযু॑ষা পু॒নন্তু॑ মা পিতাম॒হাঃ পু॒নন্তু॒ প্রপি॑তামহাঃ-কল্পতাগ্​-স্ব॒স্তযে॒ পঞ্চ॑ চ) (অ. 3)

অনুবাকং 4 - উপহোমাঃ
সীসে॑ন॒ তন্ত্র॒-ম্মন॑সা মনী॒ষিণঃ॑ । ঊ॒র্ণা॒সূ॒ত্রেণ॑ ক॒বযো॑ বযন্তি । অ॒শ্বিনা॑ য॒জ্ঞগ্​ম্ স॑বি॒তা সর॑স্বতী । ইন্দ্র॑স্য রূ॒পং-বঁরু॑ণো ভিষ॒জ্যন্ন্ ॥ তদ॑স্য রূ॒পম॒মৃত॒গ্​ম্॒ শচী॑ভিঃ । তি॒স্রো দ॑ধুর্দে॒বতা᳚-স্সগ্​ম্ররা॒ণাঃ । লোমা॑নি॒ শষ্পৈ᳚-র্বহু॒ধা ন তোক্ম॑ভিঃ । ত্বগ॑স্য মা॒গ্​ম্॒সম॑ভব॒ন্ন লা॒জাঃ ॥ তদ॒শ্বিনা॑ ভি॒ষজা॑ রু॒দ্রব॑র্তনী । সর॑স্বতী বযতি॒ পেশো॒ অন্ত॑রঃ ॥ 14 ॥

অস্থি॑ ম॒জ্জান॒-ম্মাস॑রৈঃ । কা॒রো॒ত॒রেণ॒ দধ॑তো॒ গবা᳚-ন্ত্ব॒চি ॥ সর॑স্বতী॒ মন॑সা পেশ॒লং-বঁসু॑ । নাস॑ত্যাভ্যাং-বঁযতি দর্​শ॒তং-বঁপুঃ॑ । রস॑-ম্পরি॒স্রুতা॒ ন রোহি॑তম্ । ন॒গ্নহু॒র্ধীর॒স্তস॑র॒-ন্ন বেম॑ ॥ পয॑সা শু॒ক্রম॒মৃত॑-ঞ্জ॒নিত্র᳚ম্ । সুর॑যা॒ মূত্রা᳚জ্জনযন্তি॒ রেতঃ॑ । অপাম॑তি-ন্দুর্ম॒তি-ম্বাধ॑মানাঃ । ঊব॑দ্ধ্যং॒-বাঁতগ্​ম্॑ স॒বুব॒-ন্তদা॒রাত্ ॥ 15 ॥

ইন্দ্র॑-স্সু॒ত্রামা॒ হৃদ॑যেন স॒ত্যম্ । পু॒রো॒ডাশে॑ন সবি॒তা জ॑জান । যকৃ॑-ত্ক্লো॒মানং॒-বঁরু॑ণো ভিষ॒জ্যন্ন্ । মত॑স্নে বায॒ব্যৈ᳚র্ন মি॑নাতি পি॒ত্তম্ ॥ আ॒ন্ত্রাণি॑ স্থা॒লী মধু॒ পিন্ব॑মানা । গুদা॒ পাত্রা॑ণি সু॒দুঘা॒ ন ধে॒নুঃ । শ্যে॒নস্য॒ পত্র॒-ন্ন প্লী॒হা শচী॑ভিঃ । আ॒স॒ন্দী নাভি॑রু॒দর॒-ন্ন মা॒তা ॥ কু॒ম্ভো ব॑নি॒ষ্ঠুর্জ॑নি॒তা শচী॑ভিঃ । যস্মি॒ন্নগ্রে॒ যোন্যা॒-ঙ্গর্ভো॑ অ॒ন্তঃ ॥ 16 ॥

প্লা॒শীর্ব্য॑ক্ত-শ্শ॒তধা॑র॒ উথ্সঃ॑ । দু॒হে ন কু॒ম্ভীগ্​ স্ব॒ধা-ম্পি॒তৃভ্যঃ॑ ॥ মুখ॒গ্​ম্॒ সদ॑স্য॒ শির॒ ইথ্সদে॑ন । জি॒হ্বা প॒বিত্র॑ম॒শ্বিনা॒ সগ্​ম্ সর॑স্বতী । চপ্প॒-ন্ন পা॒যুর্ভি॒ষগ॑স্য॒ বালঃ॑ । ব॒স্তির্ন শেপো॒ হর॑সা তর॒স্বী ॥ অ॒শ্বিভ্যা॒-ঞ্চক্ষু॑র॒মৃত॒-ঙ্গ্রহা᳚ভ্যাম্ । ছাগে॑ন॒ তেজো॑ হ॒বিষা॑ শৃ॒তেন॑ । পক্ষ্মা॑ণি গো॒ধূমৈঃ॒ ক্ব॑লৈরু॒তানি॑ । পেশো॒ ন শু॒ক্লমসি॑তং-বঁসাতে ॥ 17 ॥

অবি॒র্ন মে॒ষো ন॒সি বী॒র্যা॑য । প্রা॒ণস্য॒ পন্থা॑ অ॒মৃতো॒ গ্রহা᳚ভ্যাম্ । সর॑স্ব॒ত্যুপ॒বাকৈ᳚র্ব্যা॒নম্ । নস্যা॑নি ব॒র॒ঃই-র্বদ॑রৈ-র্জজান ॥ ইন্দ্র॑স্য রূ॒পমৃ॑ষ॒ভো বলা॑য । কর্ণা᳚ভ্যা॒গ্॒ শ্রোত্র॑ম॒মৃত॒-ঙ্গ্রহা᳚ভ্যাম্ । যবা॒ ন ব॒র॒ঃই-র্ভ্রু॒বি কেস॑রাণি । ক॒র্কন্ধু॑ জজ্ঞে॒ মধু॑ সার॒ঘ-ম্মুখা᳚ত্ ॥ আ॒ত্মন্নু॒পস্থে॒ ন বৃক॑স্য॒ লোম॑ । মুখে॒ শ্মশ্রূ॑ণি॒ ন ব্যা᳚ঘ্রলো॒মম্ ॥ 18 ॥

কেশা॒ ন শী॒র॒.ষন্. যশ॑সে শ্রি॒যৈ শিখা᳚ । সি॒গ্​ম্॒হস্য॒ লোম॒ ত্বিষি॑-রিন্দ্রি॒যাণি॑ ॥ অঙ্গা᳚ন্যা॒ত্মন্-ভি॒ষজা॒ তদ॒শ্বিনা᳚ । আ॒ত্মান॒মঙ্গৈ॒-স্সম॑ধা॒-থ্সর॑স্বতী । ইন্দ্র॑স্য রূ॒পগ্​ম্ শ॒তমা॑ন॒মাযুঃ॑ । চ॒ন্দ্রেণ॒ জ্যোতি॑র॒মৃত॒-ন্দধা॑না ॥ সর॑স্বতী॒ যোন্যা॒-ঙ্গর্ভ॑ম॒ন্তঃ । অ॒শ্বিভ্যা॒-ম্পত্নী॒ সুকৃ॑ত-ম্বিভর্তি । অ॒পাগ্​ম্ রসে॑ন॒ বরু॑ণো॒ ন সাম্না᳚ । ইন্দ্রগ্গ্॑ শ্রি॒যৈ জ॒নয॑ন্ন॒ফ্সু রাজা᳚ ॥ তেজঃ॑ পশূ॒নাগ্​ম্ হ॒বিরি॑ন্দ্রি॒যাব॑ত্ । প॒রি॒স্রুতা॒ পয॑সা সার॒ঘ-ম্মধু॑ । অ॒শ্বিভ্যা᳚-ন্দু॒গ্ধ-ম্ভি॒ষজা॒ সর॑স্বত্যা সুতাসু॒তাভ্যা᳚ম্ । অ॒মৃত॒-স্সোম॒ ইন্দুঃ॑ ॥ 19 ॥
(অন্ত॑র - আ॒রা - দ॒ন্ত--র্ ব॑সাতে - ব্যাঘ্রলো॒মগ্​ম্ - রাজা॑ চ॒ত্বারি॑ চ) (অ. 4)

অনুবাকং 5 - অভিষেকঃ
মি॒ত্রো॑-ঽসি॒ বরু॑ণো-ঽসি । সম॒হং-বিঁশ্বৈ᳚র্দে॒বৈঃ ॥ ক্ষ॒ত্রস্য॒ নাভি॑রসি । ক্ষ॒ত্রস্য॒ যোনি॑রসি ॥ স্যো॒নামাসী॑দ । সু॒ষদা॒মাসী॑দ । মা ত্বা॑ হিগ্​ম্সীত্ । মা মা॑ হিগ্​ম্সীত্ ॥ নিষ॑সাদ ধৃ॒তব্র॑তো॒ বরু॑ণঃ । প॒স্ত্যা᳚স্বা ॥ 20 ॥

সাম্রা᳚জ্যায সু॒ক্রতুঃ॑ ॥ দে॒বস্য॑ ত্বা সবি॒তুঃ প্র॑স॒বে । অ॒শ্বিনো᳚-র্বা॒হুভ্যা᳚ম্ । পূ॒ষ্ণো হস্তা᳚ভ্যাম্ । অ॒শ্বিনো॒-র্ভৈষ॑জ্যেন । তেজ॑সে ব্রহ্মবর্চ॒সাযা॒ভিষি॑ঞ্চামি ॥ দে॒বস্য॑ ত্বা সবি॒তুঃ প্র॑স॒বে । অ॒শ্বিনো᳚-র্বা॒হুভ্যা᳚ম্ । পূ॒ষ্ণো হস্তা᳚ভ্যাম্ । সর॑স্বত্যৈ॒ ভৈষ॑জ্যেন ॥ 21 ॥

বী॒র্যা॑যা॒ন্নাদ্যা॑যা॒ভিষি॑ঞ্চামি ॥ দে॒বস্য॑ ত্বা সবি॒তুঃ প্র॑স॒বে । অ॒শ্বিনো᳚-র্বা॒হুভ্যা᳚ম্ । পূ॒ষ্ণো হস্তা᳚ভ্যাম্ । ইন্দ্র॑স্যেন্দ্রি॒যেণ॑ । শ্রি॒যৈ যশ॑সে॒ বলা॑যা॒ভিষি॑ঞ্চামি ॥ কো॑-ঽসি কত॒মো॑-ঽসি । কস্মৈ᳚ ত্বা॒ কায॑ ত্বা ॥ সুশ্লো॒কাঁ(4) সুম॑ড্গ॒লাঁ(4) সত্য॑রা॒জা(3)ন্ ॥ শিরো॑ মে॒ শ্রীঃ ॥ 22 ॥

যশো॒ মুখ᳚ম্ । ত্বিষিঃ॒ কেশা᳚শ্চ॒ শ্মশ্রূ॑ণি । রাজা॑ মে প্রা॒ণো॑-ঽমৃত᳚ম্ । স॒ম্রাট্ চক্ষুঃ॑ । বি॒রাট্ছ্রোত্র᳚ম্ । জি॒হ্বা মে॑ ভ॒দ্রম্ । বাম্মহঃ॑ । মনো॑ ম॒ন্যুঃ । স্ব॒রাড্ভামঃ॑ । মোদাঃ᳚ প্রমো॒দা অ॒ঙ্গুলী॒রঙ্গা॑নি ॥ 23 ॥

চি॒ত্ত-ম্মে॒ সহঃ॑ । বা॒হূ মে॒ বল॑মিন্দ্রি॒যম্ । হস্তৌ॑ মে॒ কর্ম॑ বী॒র্য᳚ম্ । আ॒ত্মা ক্ষ॒ত্রমুরো॒ মম॑ । পৃ॒ষ্টীর্মে॑ রা॒ষ্ট্রমু॒দর॒মগ্​ম্সৌ᳚ । গ্রী॒বাশ্চ॒ শ্রোণ্যৌ᳚ । ঊ॒রূ অ॑র॒ত্নী জানু॑নী । বিশো॒ মে-ঽঙ্গা॑নি স॒র্বতঃ॑ । নাভি॑র্মে চি॒ত্তং-বিঁ॒জ্ঞান᳚ম্ । পা॒যুর্মে-ঽপ॑চিতির্ভ॒সত্ ॥ 24 ॥

আ॒ন॒ন্দ॒ন॒ন্দাবা॒ণ্ডৌ মে᳚ । ভগ॒-স্সৌভা᳚গ্য॒-ম্পসঃ॑ ॥ জঙ্ঘা᳚ভ্যা-ম্প॒দ্ভ্যা-ন্ধর্মো᳚-ঽস্মি । বি॒শি রাজা॒ প্রতি॑ষ্ঠিতঃ ॥ প্রতি॑ ক্ষ॒ত্রে প্রতি॑তিষ্ঠামি রা॒ষ্ট্রে । প্রত্যশ্বে॑ষু॒ প্রতি॑তিষ্ঠামি॒ গোষু॑ । প্রত্যঙ্গে॑ষু॒ প্রতি॑তিষ্ঠাম্যা॒ত্মন্ন্ । প্রতি॑ প্রা॒ণেষু॒ প্রতি॑তিষ্ঠামি পু॒ষ্টে । প্রতি॒ দ্যাবা॑পৃথি॒ব্যোঃ । প্রতিতি॑ষ্ঠামি য॒জ্ঞে ॥ 25 ॥

ত্র॒যা দে॒বা একা॑দশ । ত্র॒য॒স্ত্রি॒গ্​ম্॒শা-স্সু॒রাধ॑সঃ । বৃহ॒স্পতি॑ পুরোহিতাঃ । দে॒বস্য॑ সবি॒তু-স্স॒বে । দে॒বা দে॒বৈর॑বন্তু মা । প্র॒থ॒মা দ্বি॒তীযৈঃ᳚ । দ্বি॒তীযা᳚স্তৃ॒তীযৈঃ᳚ । তৃ॒তীযা᳚-স্স॒ত্যেন॑ । স॒ত্যং-যঁ॒জ্ঞেন॑ ।য॒জ্ঞো যজু॑র্ভিঃ ॥ 26 ॥

যজূগ্​ম্॑ষি॒ সাম॑ভিঃ । সামা᳚ন্যৃ॒গ্ভিঃ । ঋচো॑ যা॒জ্যা॑ভিঃ । যা॒জ্যা॑ বষট্কা॒রৈঃ । ব॒ষ॒ট্কা॒রা আহু॑তিভিঃ । আহু॑তযো মে॒ কামা॒ন্-থ্সম॑র্ধযন্তু ॥ ভূ-স্স্বাহা᳚ ॥ লোমা॑নি॒ প্রয॑তি॒র্মম॑ । ত্বম্ম॒ আন॑তি॒রাগ॑তিঃ । মা॒গ্​ম্॒স-ম্ম॒ উপ॑নতিঃ । ব স্বস্থি॑ । ম॒জ্জা ম॒ আন॑তিঃ ॥ 27 ॥
(প॒স্ত্যা᳚স্বা - সর॑স্বত্যৈ॒ ভৈষ॑জ্যেন॒ - শ্রী - রঙ্গা॑নি - ভ॒স--দ্য॒জ্ঞে - য॒জ্ঞো যজু॑র্ভি॒ - রুপ॑নতি॒র্দ্বে চ॑) (অ. 5)

অনুবাকং 6 - অবভৃথঃ
য-দ্দে॑বা দেব॒হেড॑নম্ । দেবা॑সশ্চকৃ॒মা ব॒যম্ । অ॒গ্নির্মা॒ তস্মা॒দেন॑সঃ । বিশ্বা᳚-ন্মুঞ্চ॒ত্বগ্​ম্হ॑সঃ ॥ যদি॒ দিবা॒ যদি॒ নক্ত᳚ম্ । এনাগ্​ম্॑সি চকৃ॒মা ব॒যম্ । বা॒যুর্মা॒ তস্মা॒দেন॑সঃ । বিশ্বা᳚-ন্মুঞ্চ॒ত্বগ্​ম্হ॑সঃ ॥ যদি॒ জাগ্র॒-দ্যদি॒ স্বপ্নে᳚ । এনাগ্​ম্॑সি চকৃ॒মা ব॒যম্ ॥ 28 ॥

সূর্যো॑ মা॒ তস্মা॒দেন॑সঃ । বিশ্বা᳚-ন্মুঞ্চ॒ত্বগ্​ম্হ॑সঃ ॥ যদ্গ্রামে॒ যদর॑ণ্যে । য-থ্স॒ভাযাং॒-যঁদি॑ন্দ্রি॒যে । যচ্ছূ॒দ্রে যদ॒র্যে᳚ । এন॑শ্চকৃ॒মা ব॒যম্ । যদেক॒স্যাধি॒ ধর্ম॑ণি । তস্যা॑ব॒যজ॑নমসি ॥ যদাপো॒ অঘ্নি॑যা॒ বরু॒ণেতি॒ শপা॑মহে । ততো॑ বরুণ নো মুঞ্চ ॥ 29 ॥

অব॑ভৃথ নিচঙ্কুণ নিচে॒রুর॑সি নিচঙ্কুণ । অব॑ দে॒বৈ-র্দে॒বকৃ॑ত॒মেনো॑-ঽযাট্ । অব॒ মর্ত্যৈ॒র্মর্ত্য॑কৃতম্ । উ॒রোরা নো॑ দেব রি॒ষস্পা॑হি ॥ সু॒মি॒ত্রা ন॒ আপ॒ ওষ॑ধয-স্সন্তু । দু॒র্মি॒ত্রাস্তস্মৈ॑ ভুযাসুঃ । যো᳚-ঽস্মা-ন্দ্বেষ্টি॑ । য-ঞ্চ॑ ব॒য-ন্দ্বি॒ষ্মঃ ॥ দ্রু॒প॒দাদি॒বে-ন্মু॑মুচা॒নঃ । স্বি॒ন্ন-স্স্না॒ত্বী মলা॑দিব ॥ 30 ॥

পূ॒ত-ম্প॒বিত্রে॑ণে॒বাজ্য᳚ম্ । আপ॑-শ্শুন্ধন্তু॒ মৈন॑সঃ ॥ উদ্ব॒য-ন্তম॑স॒স্পরি॑ । পশ্য॑ন্তো॒ জ্যোতি॒রুত্ত॑রম্ । দে॒ব-ন্দে॑ব॒ত্রা সূর্য᳚ম্ । অগ॑ন্ম॒ জ্যোতি॑রুত্ত॒মম্ ॥ প্রতি॑যুতো॒ বরু॑ণস্য॒ পাশঃ॑ । প্রত্য॑স্তো॒ বরু॑ণস্য॒ পাশঃ॑ ॥ এধো᳚-ঽস্যেধিষী॒মহি॑ । স॒মিদ॑সি ॥ 31 ॥

তেজো॑-ঽসি॒ তেজো॒ মযি॑ ধেহি ॥ অ॒পো অন্ব॑চারিষম্ । রসে॑ন॒ সম॑সৃক্ষ্মহি । পয॑স্বাগ্​ম্ অগ্ন॒ আ-ঽগ॑মম্ । ত-ম্মা॒ সগ্​ম্সৃ॑জ॒ বর্চ॑সা । প্র॒জযা॑ চ॒ ধনে॑ন চ ॥ স॒মাব॑বর্তি পৃথি॒বী । সমু॒ষাঃ । সমু॒ সূর্যঃ॑ । সমু॒ বিশ্ব॑মি॒দ-ঞ্জগ॑ত্ । বৈ॒শ্বা॒ন॒র জ্যো॑তি-র্ভূযাসম্ । বি॒ভু-ঙ্কামং॒-ব্যঁ॑শ্নবৈ ॥ ভূ-স্স্বাহা᳚ ॥ 32 ॥
(স্বপ্ন॒ এনাগ্​ম্॑সি চকৃ॒মা ব॒যং - মু॑ঞ্চ॒ - মলা॑দিব - স॒মিদ॑সি॒ - জগ॒-ত্ত্রীণি॑ চ) (অ. 6)

অনুবাকং 7 - ঐন্দ্রে প্রশ্নৌ প্রযাজানামেকাদশ মৈত্রাবরুণপ্রৈষাঃ
হোতা॑ যক্ষ-থ্স॒মিধেন্দ্র॑-মি॒ডস্প॒দে । নাভা॑ পৃথি॒ব্যা অধি॑ । দি॒বো বর্​ষ্ম॒ন্-থ্সমি॑দ্ধ্যতে । ওজি॑ষ্ঠশ্চর্​ষণী॒সহান্॑ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒ত্তনূ॒নপা॑তম্ । ঊ॒তিভি॒-র্জেতা॑র॒-মপ॑রাজিতম্ । ইন্দ্র॑-ন্দে॒বগ্​ম্ সু॑ব॒র্বিদ᳚ম্ । প॒থিভি॒-র্মধু॑মত্তমৈঃ । নরা॒শগ্​ম্সে॑ন॒ তেজ॑সা ॥ 33 ॥

বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒দিডা॑ভি॒-রিন্দ্র॑-মীডি॒তম্ । আ॒জুহ্বা॑ন॒-মম॑র্ত্যম্ । দে॒বো দে॒বৈ-স্সবী᳚র্যঃ । বজ্র॑হস্তঃ পুরন্দ॒রঃ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ-দ্ব॒র॒ঃইষীন্দ্র॑-ন্নিষদ্ব॒রম্ । বৃ॒ষ॒ভ-ন্নর্যা॑পসম্ । বসু॑ভী রু॒দ্রৈরা॑দি॒ত্যৈঃ । স॒যুগ্ভি॑-র্ব॒র॒ঃইরা ঽস॑দত্ ॥ 34 ॥

বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒দোজো॒ ন বী॒র্য᳚ম্ । সহো॒ দ্বার॒ ইন্দ্র॑মবর্ধযন্ন্ । সু॒প্রা॒য॒ণা বিশ্র॑যন্তামৃতা॒বৃধঃ॑ । দ্বার॒ ইন্দ্রা॑য মী॒ঢুষে᳚ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষদু॒ষে ইন্দ্র॑স্য ধে॒নূ । সু॒দুঘে॑ মা॒তরৌ॑ ম॒হী । সবা॒তরৌ॒ ন তেজ॑সী । ব॒থ্সমিন্দ্র॑-মবর্ধতাম্ ॥ 35 ॥

বী॒তামাজ্য॑স্য॒ হোত॒র্যজ॑ ॥ হোতা॑ যক্ষ॒-দ্দৈব্যা॒ হোতা॑রা । ভি॒ষজা॒ সখা॑যা । হ॒বিষেন্দ্র॑-ম্ভিষজ্যতঃ । ক॒বী দে॒বৌ প্রচে॑তসৌ । ইন্দ্রা॑য ধত্ত ইন্দ্রি॒যম্ । বী॒তামাজ্য॑স্য॒ হোত॒র্যজ॑ ॥ হোতা॑ যক্ষত্তি॒স্রো দে॒বীঃ । ত্রয॑স্ত্রি॒ধাত॑বো॒-ঽপসঃ॑ । ইডা॒ সর॑স্বতী॒ ভার॑তী ॥ 36 ॥

ম॒হীন্দ্র॑পত্নীর্-হ॒বিষ্ম॑তীঃ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒ত্ত্বষ্টা॑র॒-মিন্দ্র॑-ন্দে॒বম্ । ভি॒ষজগ্​ম্॑ সু॒যজ॑-ঙ্ঘৃত॒শ্রিয᳚ম্ । পু॒রু॒রূপগ্​ম্॑ সু॒রেত॑স-ম্ম॒ঘোনি᳚ম্ । ইন্দ্রা॑য॒ ত্বষ্টা॒ দধ॑দিন্দ্রি॒যাণি॑ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒-দ্বন॒স্পতি᳚ম্ । শ॒মি॒তারগ্​ম্॑ শ॒তক্র॑তুম্ । ধি॒যো জো॒ষ্টার॑-মিন্দ্রি॒যম্ ॥ 37 ॥

মদ্ধ্বা॑ সম॒ঞ্জন্প॒থিভি॑-স্সু॒গেভিঃ॑ । স্বদা॑তি হ॒ব্য-ম্মধু॑না ঘৃ॒তেন॑ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒দিন্দ্র॒গ্গ্॒ স্বাহা-ঽঽজ্য॑স্য । স্বাহা॒ মেদ॑সঃ । স্বাহা᳚ স্তো॒কানা᳚ম্ । স্বাহা॒ স্বাহা॑কৃতীনাম্ । স্বাহা॑ হ॒ব্যসূ᳚ক্তীনাম্ । স্বাহা॑ দে॒বাগ্​ম্ আ᳚জ্য॒পান্ । স্বাহেন্দ্রগ্​ম্॑ হো॒ত্রাজ্জু॑ষা॒ণাঃ । ইন্দ্র॒ আজ্য॑স্য বিযন্তু । হোত॒র্যজ॑ ॥ 38 ॥
(তেজ॑সা-ঽসদ-দবর্ধতাং॒-ভার॑তী-ন্দ্রি॒যং-জু॑ষা॒ণা দ্বে চ॑) (অ. 7)

(স॒মিধেন্দ্র॒-ন্তনূ॒নপা॑ত॒মিডা॑ভি-র্ব॒র্॒হিষ্যোজ॑ উ॒ষে দৈব্যা॑ তি॒স্রস্ত্বষ্টা॑রং॒-বঁন॒স্পতি॒মিন্দ্র᳚ম্ । স॒মিধেন্দ্র॑-ঞ্চ॒তুর্বেত্বেকো॑ বি॒যন্তু॒ দ্বির্বী॒তামেকো॑ বি॒যন্তু॒ দ্বির্বেত্বেকো॑ বি॒যন্তু॒ হোত॒র্যজ॑ )

অনুবাকং 8 - ঐন্দ্রে প্রশ্নৌ প্রযাজযাজ্যাঃ
সমি॑দ্ধ॒ ইন্দ্র॑ উ॒ষসা॒মনী॑কে । পু॒রো॒রুচা॑ পূর্ব॒কৃদ্বা॑বৃধা॒নঃ । ত্রি॒ভির্দে॒বৈস্ত্রি॒গ্​ম্॒শতা॒ বজ্র॑বাহুঃ । জ॒ঘান॑ বৃ॒ত্রং-বিঁ দুরো॑ ববার ॥ নরা॒শগ্​ম্সঃ॒ প্রতি॒ শূরো॒ মিমা॑নঃ । তনূ॒নপা॒ত্-প্রতি॑ য॒জ্ঞস্য॒ ধাম॑ । গোভি॑-র্ব॒পাবা॒-ন্মধু॑না সম॒ঞ্জন্ন্ । হির॑ণ্যৈশ্চ॒ন্দ্রী য॑জতি॒ প্রচে॑তাঃ ॥ ঈ॒ডি॒তো দে॒বৈর্​হরি॑বাগ্​ম্ অভি॒ষ্টিঃ । আ॒জুহ্বা॑নো হ॒বিষা॒ শর্ধ॑মানঃ ॥ 39 ॥

পু॒র॒দং॒রো ম॒ঘবা॒ন্॒. বজ্র॑বাহুঃ । আযা॑তু য॒জ্ঞমুপ॑ নো জুষা॒ণঃ ॥ জু॒ষা॒ণো ব॒র॒ঃইর্​হরি॑বান্ন॒ ইন্দ্রঃ॑ । প্রা॒চীনগ্​ম্॑ সীদত্প্র॒দিশা॑ পৃথি॒ব্যাঃ । উ॒রু॒ব্যচাঃ॒ প্রথ॑মানগ্গ্​ স্যো॒নম্ । আ॒দি॒ত্যৈর॒ক্তং-বঁসু॑ভি-স্স॒জোষাঃ᳚ ॥ ইন্দ্র॒-ন্দুরঃ॑ কব॒ষ্যো॑ ধাব॑মানাঃ । বৃষা॑ণং-যঁন্তু॒ জন॑য-স্সু॒পত্নীঃ᳚ । দ্বারো॑ দে॒বীর॒ভিতো॒ বিশ্র॑যন্তাম্ । সু॒বীরা॑ বী॒র-ম্প্রথ॑মানা॒ মহো॑ভিঃ ॥ 40 ॥

উ॒ষাসা॒ নক্তা॑ বৃহ॒তী বৃ॒হন্ত᳚ম্ । পয॑স্বতী সু॒দুঘে॒ শূর॒মিন্দ্র᳚ম্ । পেশ॑স্বতী॒ তন্তু॑না সং॒​ব্যঁয॑ন্তী । দে॒বানা᳚-ন্দে॒বং-যঁ॑জত-স্সুরু॒ক্মে ॥ দৈব্যা॒ মিমা॑না॒ মন॑সা পুরু॒ত্রা । হোতা॑রা॒বিন্দ্র॑-ম্প্রথ॒মা সু॒বাচা᳚ । মূ॒র্ধন্. য॒জ্ঞস্য॒ মধু॑না॒ দধা॑না । প্রা॒চীন॒-ঞ্জ্যোতি॑র্​হ॒বিষা॑ বৃধাতঃ ॥ তি॒স্রো দে॒বীর্​হ॒বিষা॒ বর্ধ॑মানাঃ । ইন্দ্র॑-ঞ্জুষা॒ণা বৃষ॑ণ॒-ন্ন পত্নীঃ᳚ ॥ 41 ॥

অচ্ছি॑ন্ন॒-ন্তন্তু॒-ম্পয॑সা॒ সর॑স্বতী । ইডা॑ দে॒বী ভার॑তী বি॒শ্বতূ᳚র্তিঃ ॥ ত্বষ্টা॒ দধ॒দিন্দ্রা॑য॒ শুষ্ম᳚ম্ । অপা॒কো-ঽচি॑ষ্টুর্য॒শসে॑ পু॒রূণি॑ । বৃষা॒ যজ॒ন্ বৃষ॑ণ॒-ম্ভূরি॑রেতাঃ । মূ॒র্ধন্. য॒জ্ঞস্য॒ সম॑নক্তু দে॒বান্ ॥ বন॒স্পতি॒-রব॑সৃষ্টো॒ ন পাশৈঃ᳚ । ত্মন্যা॑ সম॒ঞ্জঞ্ছ॑মি॒তা ন দে॒বঃ । ইন্দ্র॑স্য হ॒ব্যৈর্জ॒ঠর॑-ম্পৃণা॒নঃ । স্বদা॑তি হ॒ব্য-ম্মধু॑না ঘৃ॒তেন॑ ॥ স্তো॒কানা॒মিন্দু॒-ম্প্রতি॒ শূর॒ ইন্দ্রঃ॑ । বৃ॒ষা॒যমা॑ণো বৃষ॒ভ-স্তু॑রা॒ষাট্ । ঘৃ॒ত॒প্রুষা॒ মধু॑না হ॒ব্যমু॒ন্দন্ন্ । মূ॒র্ধন্. য॒জ্ঞস্য॑ জুষতা॒গ্॒ স্বাহা᳚ ॥ 42 ॥
(শর্ধ॑মানো॒ - মহো॑ভিঃ॒ - পত্নী᳚--র্ ঘৃ॒তেন॑ চ॒ত্বারি॑ চ) (অ. 8)

অনুবাকং 9 - ঐন্দ্রে প্রশ্নৌ বপাদীনাং-যাঁজ্যানুবাক্যাঃ
আচ॑র্​ষণি॒প্রা বৃ॑ষ॒ভো জনা॑নাম্ । রাজা॑ কৃষ্টী॒না-ম্পু॑রুহূ॒ত ইন্দ্রঃ॑ । স্তু॒ত-শ্শ্র॑ব॒স্যন্নব॒সোপ॑ম॒দ্রিক্ । যু॒ক্ত্বা হরী॒ বৃষ॒ণা ঽঽযা᳚হ্য॒র্বাম্ ॥, বি॒বেষ॒ যন্মা॑ ধি॒ষণা॑ জ॒জান॒ স্তবৈ॑ পু॒রা পার্যা॒দিন্দ্র॒ মহ্নঃ॑ । অগ্​ম্হ॑সো॒ যত্র॑ পী॒পর॒দ্যথা॑ নো না॒বেব॒ যান্ত॑ মু॒ভযে॑ হবন্তে ॥॥ তগ্​ম্ স॒ধ্রীচী॑রূ॒তযো॒ বৃষ্ণি॑যানি । পৌগ্গ্​স্যা॑নি নি॒যুত॑-স্সশ্চু॒রিন্দ্র᳚ম্ । স॒মু॒দ্র-ন্ন সিন্ধ॑ব উ॒ক্থশু॑ষ্মাঃ । উ॒রু॒ব্যচ॑স॒গিংর॒ আবি॑শন্তি ॥॥ স॒ত্যমিত্তন্ন ত্বাবাগ্​ম্॑ অ॒ন্যো অস্তি॑ । ইন্দ্র॑ দে॒বো ন মর্ত্যো॒ জ্যাযান্॑ । অহ॒ন্নহি॑-ম্পরি॒শযা॑ন॒মর্ণঃ॑ । অবা॑সৃজো॒-ঽপো অচ্ছা॑ সমু॒দ্রম্ ॥ প্রস॑সাহিষে পুরুহূত॒ শত্রূন্॑ । জ্যেষ্ঠ॑স্তে॒ শুষ্ম॑ ই॒হ রা॒তির॑স্তু । ইন্দ্রাভ॑র॒ দক্ষি॑ণেনা॒ বসূ॑নি । পতি॒-স্সিন্ধূ॑নামসি রে॒বতী॑নাম্ ॥ স শেবৃ॑ধ॒মধি॑ধা দ্যু॒ম্নম॒স্মে । মহি॑ ক্ষ॒ত্র-ঞ্জ॑না॒ষাডি॑ন্দ্র॒ তব্য᳚ম্ । রক্ষা॑ চ নো ম॒ঘোনঃ॑ পা॒হি সূ॒রীন্ । রা॒যে চ॑ ন-স্স্বপ॒ত্যা ই॒ষে ধাঃ᳚ ॥ 43 ॥
(রে॒বতী॑না-ঞ্চ॒ত্বারি॑ চ) (অ. 9)

অনুবাকং 10 - ঐন্দ্রে প্রশ্নৌ অনুযাজানামেকাদশ মৈত্রাবরুণপ্রৈষাঃ
দে॒ব-ম্ব॒র্॒হিরিন্দ্রগ্​ম্॑ সুদে॒ব-ন্দে॒বৈঃ । বী॒রব॑-থ্স্তী॒র্ণং-বেঁদ্যা॑মবর্ধযত্ । বস্তো᳚র্বৃ॒ত-ম্প্রাক্তো᳚র্ভৃ॒তম্ । রা॒যা ব॒র্॒হিষ্ম॒তো-ঽত্য॑গাত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒বীর্দ্বার॒ ইন্দ্রগ্​ম্॑ সঙ্ঘা॒তে । বি॒ড্বীর্যাম॑ন্নবর্ধযন্ন্ । আ ব॒থ্সেন॒ তরু॑ণেন কুমা॒রেণ॑ চ মীবি॒তা অপার্বা॑ণম্ । রে॒ণুক॑কাট-ন্নুদন্তাম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 44 ॥

দে॒বী উ॒ষাসা॒ নক্তা᳚ । ইন্দ্রং॑-যঁ॒জ্ঞে প্র॑য॒ত্য॑হ্বেতাম্ । দৈবী॒র্বিশঃ॒ প্রাযা॑সিষ্টাম্ । সুপ্রী॑তে॒ সুধি॑তে অভূতাম্ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ দে॒বী জোষ্ট্রী॒ বসু॑ধিতী । দে॒বমিন্দ্র॑মবর্ধতাম্ । অযা᳚ব্য॒ন্যা-ঽঘা দ্বেষাগ্​ম্॑সি । আ-ঽন্যা বা᳚ক্ষী॒-দ্বসু॒ বার্যা॑ণি । যজ॑মানায শিক্ষি॒তে ॥ 45 ॥

ব॒সু॒বনে॑ বসু॒ধেয॑স্য বীতাং॒-যঁজ॑ ॥ দে॒বী ঊ॒র্জাহু॑তী॒ দুঘে॑ সু॒দুঘে᳚ । পয॒সেন্দ্র॑মবর্ধতাম্ । ইষ॒মূর্জ॑ম॒ন্যা ঽবা᳚ক্ষীত্ । সগ্ধি॒গ্​ম্॒ সপী॑তিম॒ন্যা । নবে॑ন॒ পূর্ব॒-ন্দয॑মানে । পু॒রা॒ণেন॒ নব᳚ম্ । অধা॑তা॒-মূর্জ॑মূ॒র্জাহু॑তী॒ বসু॒ বার্যা॑ণি । যজ॑মানায শিক্ষি॒তে । ব॒সু॒বনে॑ বসু॒ধেয॑স্য বীতাং॒-যঁজ॑ ॥ 46 ॥

দে॒বা দৈব্যা॒ হোতা॑রা । দে॒বমিন্দ্র॑মবর্ধতাম্ । হ॒তাঘ॑শগ্​ম্ সা॒বাভা᳚র্​ষ্টাং॒-বঁসু॒ বার্যা॑ণি । যজ॑মানায শিক্ষি॒তৌ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ দে॒বীস্তি॒স্রস্তি॒স্রো দে॒বীঃ । পতি॒মিন্দ্র॑মবর্ধযন্ন্ । অস্পৃ॑ক্ষ॒দ্ভার॑তী॒ দিব᳚ম্ । রু॒দ্রৈর্য॒জ্ঞগ্​ম্ সর॑স্বতী । ইডা॒ বসু॑মতী গৃ॒হান্ ॥ 47 ॥

ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒ব ইন্দ্রো॒ নরা॒শগ্​ম্সঃ॑ । ত্রি॒ব॒রূ॒থ-স্ত্রি॑বন্ধু॒রঃ । দে॒বমিন্দ্র॑মবর্ধযত্ । শ॒তেন॑ শিতিপৃ॒ষ্ঠানা॒মাহি॑তঃ । স॒হস্রে॑ণ॒ প্রব॑র্ততে । মি॒ত্রাবরু॒ণেদ॑স্য হো॒ত্রমর্​হ॑তঃ । বৃহ॒স্পতি॑-স্স্তো॒ত্রম্ । অ॒শ্বিনা-ঽঽদ্ধ্ব॑র্যবম্ । ব॒সু॒বনে॑ বসু॒ধেয॑স্য বেতু॒ যজ॑ ॥ 48 ॥

দে॒ব ইন্দ্রো॒ বন॒স্পতিঃ॑ । হির॑ণ্যপর্ণো॒ মধু॑শাখ-স্সুপিপ্প॒লঃ । দে॒বমিন্দ্র॑মবর্ধযত্ । দিব॒মগ্রে॑ণাপ্রাত্ । আ-ঽন্তরি॑ক্ষ-ম্পৃথি॒বীম॑দৃগ্​ম্হীত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒ব-ম্ব॒র॒ঃইর্বারি॑তীনাম্ । দে॒বমিন্দ্র॑মবর্ধযত্ । স্বা॒স॒স্থ-মিন্দ্রে॒ণাস॑ন্নম্ । অ॒ন্যা ব॒র্॒হীগ্​ষ্য॒ভ্য॑ভূত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒বো অ॒গ্নি-স্স্বি॑ষ্ট॒কৃত্ । দে॒বমিন্দ্র॑মবর্ধযত্ । স্বি॑ষ্ট-ঙ্কু॒র্বন্-থ্স্বি॑ষ্ট॒কৃত্ । স্বি॑ষ্টম॒দ্য ক॑রোতু নঃ । ব॒সু॒বনে॑ বসু॒ধেয॑স্য বেতু॒ যজে॑ ॥ 49 ॥
(বি॒য॒ন্তু॒ যজ॑ - শিক্ষি॒তে - শি॑ক্ষি॒তে ব॑সু॒বনে॑ বসু॒ধেয॑স্য বীতাং॒-যঁজ॑-গৃ॒হান্.-বে॑তু॒ যজা॑-ভূ॒-থ্ষট্চ॑) (অ. 10)

দে॒ব-ম্ব॒র্॒হি-র্দে॒বীর্দ্বারো॑ দে॒বী উ॒ষাসা॒ নক্তা॑ দে॒বী জোষ্ট্রী॑ দে॒বী ঊ॒র্জাহু॑তী দে॒বা দৈব্যা॒ হোতা॑রা শিক্ষি॒তৌ দে॒বীস্তি॒স্রস্তি॒স্রো দে॒বীঃ পতি॑-ন্দে॒ব ইন্দ্রো॒ নরা॒শগ্​ম্সো॑ দে॒ব ইন্দ্রো॒ বন॒স্পতি॑-র্দে॒ব-ম্ব॒র্॒হির্বারি॑তীনা-ন্দে॒বো অ॒গ্নি-স্স্বি॑ষ্ট॒কৃ-দ্দে॒বম্ । বে॒তু॒ বি॒য॒ন্তু॒ চ॒তুর্বী॑তা॒মেকো॑ বিযন্তু চ॒তুর্বে॑তু । অ॒ব॒র্ধ॒য॒দ॒ব॒র্ধ॒য॒-ন্ত্রির॑বর্ধতা॒মেকো॑ ঽবর্ধযগ্গ্​ শ্চ॒তুর॑বর্ধযত্ । বস্তো॒রা ব॒থ্সেন॒ দৈবী॒রযা॒বীষগ্​ম্॑ হ॒তাস্পৃ॑ক্ষচ্ছ॒তেন॒ দিব॒মিন্দ্রগ্গ্॑ স্বাস॒স্থগ্গ্​ স্বি॑ষ্টম্ । শিক্ষি॒তে শি॑ক্ষি॒তে শি॑ক্ষি॒তৌ ।

অনুবাকং 11 - পশুত্রযে প্রয জার্থা মৈত্রাবরুণপ্রৈষাঃ
হোতা॑ যক্ষ-থ্স॒মিধা॒-ঽগ্নি-মি॒ডস্প॒দে । অ॒শ্বিনেন্দ্র॒গ্​ম্॒ সর॑স্বতীম্ । অ॒জো ধূ॒ম্রো ন গো॒ধূমৈঃ॒ ক্ব॑লৈর্ভেষ॒জম্ । মধু॒ শষ্পৈ॒র্ন তেজ॑ ইন্দ্রি॒যম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒ত্তনূ॒নপা॒-থ্সর॑স্বতী । অবি॑র্মে॒ষো ন ভে॑ষ॒জম্ । প॒থা মধু॑ম॒তা ঽঽভ॑রন্ন্ । অ॒শ্বিনেন্দ্রা॑য বী॒র্য᳚ম্ ॥ 50 ॥

বদ॑রৈরুপ॒বাকা॑ভি-র্ভেষ॒জ-ন্তোক্ম॑ভিঃ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒ন্নরা॒শগ্​ম্স॒ন-ন্ন॒গ্নহু᳚ম্ । পতি॒গ্​ম্॒ সুরা॑যৈ ভেষ॒জম্ । মে॒ষ-স্সর॑স্বতী ভি॒ষক্ । রথো॒ ন চ॒ন্দ্র্য॑শ্বিনো᳚র্ব॒পা ইন্দ্র॑স্য বী॒র্য᳚ম্ । বদ॑রৈরুপ॒বাকা॑ভি-র্ভেষ॒জ-ন্তোক্ম॑ভিঃ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ 51 ॥

হোতা॑ যক্ষদি॒ডেডি॒ত আ॒জুহ্বা॑ন॒-স্সর॑স্বতীম্ । ইন্দ্র॒-ম্বলে॑ন ব॒র্ধযন্ন্॑ । ঋ॒ষ॒ভেণ॒ গবে᳚ন্দ্রি॒যম্ । অ॒শ্বিনেন্দ্রা॑য বী॒র্য᳚ম্ । যবৈঃ᳚ ক॒র্কন্ধু॑ভিঃ । মধু॑ লা॒জৈর্ন মাস॑রম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ-দ্ব॒র॒ঃই-স্সু॒ষ্টরী॒মো-ঽর্ণ॑ম্রদাঃ । ভি॒ষন্নাস॑ত্যা ॥ 52 ॥

ভি॒ষজা॒-ঽশ্বিনা-ঽশ্বা॒ শিশু॑মতী । ভি॒ষগ্ধে॒নু-স্সর॑স্বতী । ভি॒ষগ্দু॒হ ইন্দ্রা॑য ভেষ॒জম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒দ্দুরো॒ দিশঃ॑ । ক॒ব॒ষ্যো॑ ন ব্যচ॑স্বতীঃ । অ॒শ্বিভ্যা॒-ন্ন দুরো॒ দিশঃ॑ । ইন্দ্রো॒ ন রোদ॑সী॒ দুঘে᳚ । দু॒হে কামা॒ন্-থ্সর॑স্বতী ॥ 53 ॥

অ॒শ্বিনেন্দ্রা॑য ভেষ॒জম্ । শু॒ক্র-ন্ন জ্যোতি॑রিন্দ্রি॒যম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ-থ্সু॒পেশ॑সো॒ষে নক্ত॒-ন্দিবা᳚ । অ॒শ্বিনা॑ সঞ্জানা॒নে । সম॑ঞ্জাতে॒ সর॑স্বত্যা । ত্বিষি॒মিন্দ্রে॒ ন ভে॑ষ॒জম্ । শ্যে॒নো ন রজ॑সা হৃ॒দা । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ ॥ 54 ॥

বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒দ্দৈব্যা॒ হোতা॑রা ভি॒ষজা॒-ঽশ্বিনা᳚ । ইন্দ্র॒-ন্ন জাগৃ॑বী॒ দিবা॒ নক্ত॒-ন্ন ভে॑ষ॒জৈঃ । শূষ॒গ্​ম্॒ সর॑স্বতী ভি॒ষক্ । সীসে॑ন দুহ ইন্দ্রি॒যম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ-ত্তি॒স্রো দে॒বীর্ন ভে॑ষ॒জম্ । ত্রয॑স্ত্রি॒ধাত॑বো॒-ঽপসঃ॑ । রূ॒পমিন্দ্রে॑ হির॒ণ্যয᳚ম্ ॥ 55 ॥

অ॒শ্বিনেডা॒ ন ভার॑তী । বা॒চা সর॑স্বতী । মহ॒ ইন্দ্রা॑য দধুরিন্দ্রি॒যম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒ত্ত্বষ্টা॑র॒-মিন্দ্র॑ম॒শ্বিনা᳚ । ভি॒ষজ॒-ন্ন সর॑স্বতীম্ । ওজো॒ ন জূ॒তিরি॑ন্দ্রি॒যম্ । বৃকো॒ ন র॑ভ॒সো ভি॒ষক্ । যশ॒-স্সুর॑যা ভেষ॒জম্ ॥ 56 ॥

শ্রি॒যা ন মাস॑রম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষ॒-দ্বন॒স্পতি᳚ম্ । শ॒মি॒তারগ্​ম্॑ শ॒তক্র॑তুম্ । ভী॒ম-ন্ন ম॒ন্যুগ্​ম্ রাজা॑নং-ব্যাঁ॒ঘ্র-ন্নম॑সা॒-ঽশ্বিনা॒ ভাম᳚ম্ । সর॑স্বতী ভি॒ষক্ । ইন্দ্রা॑য দুহ ইন্দ্রি॒যম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ 57 ॥

হোতা॑ যক্ষদ॒গ্নিগ্গ্​ স্বাহা-ঽঽজ্য॑স্য স্তো॒কানা᳚ম্ । স্বাহা॒ মেদ॑সা॒-ম্পৃথ॑ক্ । স্বাহা॒ ছাগ॑ম॒শ্বিভ্যা᳚ম্ । স্বাহা॑ মে॒ষগ্​ম্ সর॑স্বত্যৈ । স্বাহা॑র্​ষ॒ভ-মিন্দ্রা॑য সি॒গ্​ম্॒হায॒ সহ॑সেন্দ্রি॒যম্ । স্বাহা॒-ঽগ্নি-ন্ন ভে॑ষ॒জম্ । স্বাহা॒ সোম॑মিন্দ্রি॒যম্ । স্বাহেন্দ্রগ্​ম্॑ সু॒ত্রামা॑ণগ্​ম্ সবি॒তারং॒-বঁরু॑ণ-ম্ভি॒ষজা॒-ম্পতি᳚ম্ । স্বাহা॒ বন॒স্পতি॑-ম্প্রি॒য-ম্পাথো॒ ন ভে॑ষ॒জম্ । স্বাহা॑ দে॒বাগ্​ম্ আ᳚জ্য॒পান্ ॥ 58 ॥

স্বাহা॒-ঽগ্নিগ্​ম্ হো॒ত্রাজ্জু॑ষা॒ণো অ॒গ্নি-র্ভে॑ষ॒জম্ । পয॒-স্সোমঃ॑ পরি॒স্রুতা॑ ঘৃ॒ত-ম্মধু॑ । বি॒যন্ত্বাজ্য॑স্য॒ হোত॒র্যজ॑ ॥ হোতা॑ যক্ষদ॒শ্বিনা॒ সর॑স্বতী॒মিন্দ্রগ্​ম্॑ সু॒ত্রামা॑ণম্ । ই॒মে সোমা᳚-স্সু॒রামা॑ণঃ । ছাগৈ॒র্ন মে॒ষৈর্-ঋ॑ষ॒ভৈ-স্সু॒তাঃ । শষ্পৈ॒র্ন তোক্ম॑ভিঃ । লা॒জৈর্মহ॑স্বন্তঃ । মদা॒ মাস॑রেণ॒ পরি॑ষ্কৃতাঃ । শু॒ক্রাঃ পয॑স্বন্তো॒-ঽমৃতাঃ᳚ । প্রস্থি॑তা বো মধু॒শ্চুতঃ॑ । তান॒শ্বিনা॒ সর॑স্ব॒তীন্দ্র॑-স্সু॒ত্রামা॑ বৃত্র॒হা । জু॒ষন্তাগ্​ম্॑ সৌ॒ম্য-ম্মধু॑ । পিব॑ন্তু॒ মদ॑ন্তু বি॒যন্তু॒ সোম᳚ম্ । হোত॒র্যজ॑ ॥ 59 ॥
(বী॒র্যং - ঁবি॒যন্ত্বাজ্য॑স্য॒ হোত॒র্যজ॒ - নাস॑ত্যা॒ - সর॑স্বতী॒ - মধু॑ - হির॒ণ্যযং॑ - ভেষ॒জং - ঁবি॒যন্ত্বাজ্য॑স্য॒ হোত॒র্যজা᳚ - জ্য॒পা - ন॒মৃতাঃ॒ পঞ্চ॑ চ) (অ. 11)

স॒মিধা॒-ঽগ্নিগ্​ম্ ষট্ । তনূ॒নপা᳚-থ্স॒প্ত । নরা॒শগ্​ম্স॒মৃষিঃ॑ । ই॒ডেডি॒তো যবৈ॑র॒ষ্টৌ । ব॒র্॒হি-স্স॒প্ত । দুরো॒-ঽশ্বিনা॑ শু॒ক্রন্নব॑ । সু॒পেশ॑সো॒ষে নক্ত॒মৃষিঃ॑। দৈব্যা॒ হোতা॑রা॒ সীসে॑ন॒ রসঃ॑ । তি॒স্রস্ত্বষ্টা॑রম॒ষ্টাব॑ষ্টৌ । বন॒স্পতি॒মৃষিঃ॑ । অ॒গ্নি-ন্ত্রযো॑দশ । অ॒শ্বিনা॒ দ্বাদ॑শ॒ ত্রযো॑দশ । স॒মিধা॒-ঽগ্নি-ম্বদ॑রৈ॒-র্বদ॑রৈ॒-র্যবৈ॑র॒শ্বিনা॒ ত্বিষি॑ম॒শ্বিনা॒ ন ভে॑ষ॒জগ্​ম্ রূ॒পম॒শ্বিনা॑ ভী॒ম-ম্ভাম᳚ম্ ।

অনুবাকং 12 - পশুত্রযে প্রযাজযাজ্যা আপ্রিযঃ
সমি॑দ্ধো অ॒গ্নির॑শ্বিনা । ত॒প্তো ঘ॒র্মো বি॒রাট্-থ্সু॒তঃ । দু॒হে ধে॒নু-স্সর॑স্বতী । সোমগ্​ম্॑ শু॒ক্রমি॒হেন্দ্রি॒যম্ ॥ ত॒নূ॒পা ভি॒ষজা॑ সু॒তে । অ॒শ্বিনো॒ভা সর॑স্বতী । মদ্ধ্বা॒ রজাগ্​ম্॑সীন্দ্রি॒যম্ । ইন্দ্রা॑য প॒থিভি॑-র্বহান্ ॥ ইন্দ্রা॒যেন্দু॒গ্​ম্॒ সর॑স্বতী । নরা॒শগ্​ম্সে॑ন ন॒গ্নহুঃ॑ ॥ 60 ॥

অধা॑তাম॒শ্বিনা॒ মধু॑ । ভে॒ষ॒জ-ম্ভি॒ষজা॑ সু॒তে ॥ আ॒জুহ্বা॑না॒ সর॑স্বতী । ইন্দ্রা॑যেন্দ্রি॒যাণি॑ বী॒র্য᳚ম্ । ইডা॑ভিরশ্বিনা॒বিষ᳚ম্ । সমূর্জ॒গ্​ম্॒ সগ্​ম্ র॒যি-ন্দ॑ধুঃ ॥ অশ্বি॑না॒ নমু॑চে-স্সু॒তম্ । সোমগ্​ম্॑ শু॒ক্র-ম্প॑রি॒স্রুতা᳚ । সর॑স্বতী॒ তমাভ॑রত্ । ব॒র্॒হিষেন্দ্রা॑য॒ পাত॑বে ॥ 61 ॥

ক॒ব॒ষ্যো॑ ন ব্যচ॑স্বতীঃ । অ॒শ্বিভ্যা॒-ন্ন দুরো॒ দিশঃ॑ । ইন্দ্রো॒ ন রোদ॑সী॒ দুঘে᳚ । দু॒হে কামা॒ন্-থ্সর॑স্বতী ॥ উ॒ষাসা॒ নক্ত॑মশ্বিনা । দিবেন্দ্রগ্​ম্॑ সা॒যমি॑ন্দ্রি॒যৈঃ । স॒জা॒ন্না॒নে সু॒পেশ॑সা । সম॑ঞ্জাতে॒ সর॑স্বত্যা ॥ পা॒ত-ন্নো॑ অশ্বিনা॒ দিবা᳚ । পা॒হি নক্তগ্​ম্॑ সরস্বতি ॥ 62 ॥

দৈব্যা॑ হোতারা ভিষজা । পা॒তমিন্দ্র॒গ্​ম্॒ সচা॑ সু॒তে ॥ তি॒স্রস্ত্রে॒ধা সর॑স্বতী । অ॒শ্বিনা॒ ভার॒তীডা᳚ । তী॒ব্র-ম্প॑রি॒স্রুতা॒ সোম᳚ম্ । ইন্দ্রা॑য সুষবু॒র্মদ᳚ম্ ॥ অশ্বি॑না ভেষ॒জ-ম্মধু॑ । ভে॒ষ॒জ-ন্ন॒-স্সর॑স্বতী । ইন্দ্রে॒ ত্বষ্টা॒ যশ॒-শ্শ্রিয᳚ম্ । রূ॒পগ্​ম্ রূ॑পমধু-স্সু॒তে ॥ ঋ॒তু॒থেন্দ্রো॒ বন॒স্পতিঃ॑ । শ॒শ॒মা॒নঃ প॑রি॒স্রুতা᳚ । কী॒লাল॑ম॒শ্বিভ্যা॒-ম্মধু॑ । দু॒হে ধে॒নু-স্সর॑স্বতী ॥ গোভি॒র্ন সোম॑মশ্বিনা । মাস॑রেণ পরি॒ষ্কৃতা᳚ । সম॑ধাতা॒গ্​ম্॒ সর॑স্বত্যা । স্বাহেন্দ্রে॑ সু॒ত-ম্মধু॑ ॥ 63 ॥
(ন॒গ্নহুঃ॒ - পাত॑বে - সরস্ব - ত্যধু-স্সু॒তে᳚-ঽষ্টৌ চ॑) (অ. 12)

অনুবাকং 13 - পশুত্রযে বপাদীনাং-যাঁজ্যানুবাক্যাঃ
অ॒শ্বিনা॑ হ॒বিরি॑ন্দ্রি॒যম্ । নমু॑চের্ধি॒যা সর॑স্বতী । আ শু॒ক্রমা॑সু॒রাদ্ব॒সু । ম॒ঘমিন্দ্রা॑য জভ্রিরে ॥ যম॒শ্বিনা॒ সর॑স্বতী । হ॒বিষেন্দ্র॒-মব॑র্ধযন্ন্ । স বি॑ভেদ ব॒লং (ব॒লং) ম॒ঘম্ । নমু॑চাবাসু॒রে সচা᳚ । তমিন্দ্র॑-ম্প॒শব॒-স্সচা᳚ ॥ অ॒শ্বিনো॒ভা সর॑স্বতী ॥ 64 ॥

দধা॑না অ॒ভ্য॑নূষত । হ॒বিষা॑ য॒জ্ঞমি॑ন্দ্রি॒যম্ ॥ য ইন্দ্র॑ ইন্দ্রি॒য-ন্দ॒ধুঃ । স॒বি॒তা বরু॑ণো॒ ভগঃ॑ । স সু॒ত্রামা॑ হ॒বিষ্প॑তিঃ । যজ॑মানায সশ্চত ॥ স॒বি॒তা বরু॑ণো॒ দধ॑ত্ । যজ॑মানায দা॒শুষে᳚ । আদ॑ত্ত॒ নমু॑চে॒র্বসু॑ । সু॒ত্রামা॒ বল॑মিন্দ্রি॒যম্ ॥ 65 ॥

বরু॑ণঃ, ক্ষ॒ত্রমি॑ন্দ্রি॒যম্ । ভগে॑ন সবি॒তা শ্রিয᳚ম্ । সু॒ত্রামা॒ যশ॑সা॒ বল᳚ম্ । দধা॑না য॒জ্ঞমা॑শত ॥ অশ্বি॑না॒ গোভি॑রিন্দ্রি॒যম্ । অশ্বে॑ভি-র্বী॒র্য॑-ম্বল᳚ম্ । হ॒বিষেন্দ্র॒গ্​ম্॒ সর॑স্বতী । যজ॑মান-মবর্ধযন্ন্ ॥ তা নাস॑ত্যা সু॒পেশ॑সা । হির॑ণ্যবর্তনী॒ নরা᳚ । সর॑স্বতী হ॒বিষ্ম॑তী । ইন্দ্র॒ কম॑র্​সু নো-ঽবত ॥ তা ভি॒ষজা॑ সু॒কর্ম॑ণা । সা সু॒দুঘা॒ সর॑স্বতী । স বৃ॑ত্র॒হা শ॒তক্র॑তুঃ । ইন্দ্রা॑য দধুরিন্দ্রি॒যম্ ॥ 66 ॥
(উ॒ভা সর॑স্বতী॒ - বল॑মিন্দ্রি॒যং - নরা॒ ষট্চ॑) (অ. 13)

অনুবাকং 14 - পশুত্রযে অনূযাজপ্রৈষাঃ
দে॒ব-ম্ব॒র্॒হি-স্সর॑স্বতী । সু॒দে॒বমিন্দ্রে॑ অ॒শ্বিনা᳚ । তেজো॒ ন চক্ষু॑র॒ক্ষ্যোঃ । ব॒র্॒হিষা॑ দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒বীর্দ্বারো॑ অ॒শ্বিনা᳚ । ভি॒ষজেন্দ্রে॒ সর॑স্বতী । প্রা॒ণ-ন্ন বী॒র্য॑-ন্ন॒সি । দ্বারো॑ দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 67 ॥

দে॒বী উ॒ষাসা॑ব॒শ্বিনা᳚ । ভি॒ষজেন্দ্রে॒ সর॑স্বতী । বল॒-ন্ন বাচ॑মা॒স্যে᳚ । উ॒ষাভ্যা᳚-ন্দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒বী জোষ্ট্রী॑ অ॒শ্বিনা᳚ । সু॒ত্রামেন্দ্রে॒ সর॑স্বতী । শ্রোত্র॒-ন্ন কর্ণ॑যো॒র্যশঃ॑ । জোষ্ট্রী᳚ভ্যা-ন্দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 68 ॥

দে॒বী ঊ॒র্জাহু॑তী॒ দুঘে॑ সু॒দুঘে᳚ । পয॒সেন্দ্র॒গ্​ম্॒ সর॑স্বত্য॒শ্বিনা॑ ভি॒ষজা॑-ঽবত । শু॒ক্র-ন্ন জ্যোতি॒-স্স্তন॑যো॒রাহু॑তী ধত্ত ইন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒বা দে॒বানা᳚-ম্ভি॒ষজা᳚ । হোতা॑রা॒বিন্দ্র॑-ম॒শ্বিনা᳚ । ব॒ষ॒ট্কা॒রৈ-স্সর॑স্বতী । ত্বিষি॒-ন্ন হৃদ॑যে ম॒তিম্ । হোতৃ॑ভ্যা-ন্দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 69 ॥

দে॒বী-স্তি॒স্র-স্তি॒স্রো দে॒বীঃ । সর॑স্বত্য॒শ্বিনা॒ ভার॒তীডা᳚ । শূষ॒-ন্ন মদ্ধ্যে॒ নাভ্যা᳚ম্ । ইন্দ্রা॑য দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒ব ইন্দ্রো॒ নরা॒শগ্​ম্সঃ॑ । ত্রি॒ব॒রূ॒থ-স্সর॑স্বত্যা॒ ঽশ্বিভ্যা॑মীযতে॒ রথঃ॑ । রেতো॒ ন রূ॒পম॒মৃত॑-ঞ্জ॒নিত্র᳚ম্ । ইন্দ্রা॑য॒ ত্বষ্টা॒ দধ॑দিন্দ্রি॒যাণি॑ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 70 ॥

দে॒ব ইন্দ্রো॒ বন॒স্পতিঃ॑ । হির॑ণ্যপর্ণো অ॒শ্বিভ্যা᳚ম্ । সর॑স্বত্যা-স্সুপিপ্প॒লঃ । ইন্দ্রা॑য পচ্যতে॒ মধু॑ । ওজো॒ ন জূ॒তিমৃ॑ষ॒ভো ন ভাম᳚ম্ । বন॒স্পতি॑র্নো॒ দধ॑দিন্দ্রি॒যাণি॑ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒ব-ম্ব॒র্॒হির্বারি॑তীনাম্ । অ॒দ্ধ্ব॒রে স্তী॒র্ণম॒শ্বিভ্যা᳚ম্ । ঊর্ণ॑ম্রদা॒-স্সর॑স্বত্যাঃ ॥ 71 ॥

স্যো॒নমি॑ন্দ্র তে॒ সদঃ॑ । ঈ॒শাযৈ॑ ম॒ন্যুগ্​ম্ রাজা॑ন-ম্ব॒র্॒হিষা॑ দধুরিন্দ্রি॒যম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒বো অ॒গ্নি-স্স্বি॑ষ্ট॒কৃত্ । দে॒বান্.য॑ক্ষ-দ্যথায॒থম্ । হোতা॑রা॒-বিন্দ্র॑ম॒শ্বিনা᳚ । বা॒চা বাচ॒গ্​ম্॒ সর॑স্বতীম্ । অ॒গ্নিগ্​ম্ সোমগ্গ্॑ স্বিষ্ট॒কৃত্ । স্বি॑ষ্ট॒ ইন্দ্র॑-স্সু॒ত্রামা॑ সবি॒তা বরু॑ণো ভি॒ষক্ । ই॒ষ্টো দে॒বো বন॒স্পতিঃ॑ । স্বি॑ষ্টা দে॒বা আ᳚জ্য॒পাঃ । ই॒ষ্টো অ॒গ্নির॒গ্নিনা᳚ । হোতা॑ হো॒ত্রে স্বি॑ষ্ট॒কৃত্ । যশো॒ ন দধ॑দিন্দ্রি॒যম্ । ঊর্জ॒মপ॑চিতিগ্গ্​ স্ব॒ধাম্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 72 ॥
(দ্বারো॑ দধুরিন্দ্রি॒যং-বঁ॑সু॒বনে॑ বসু॒ধেয॑স্য বিযন্তু॒ যজ॒ - জোষ্ট্রী᳚ভ্যা-ন্দধুরিন্দ্রি॒যং-বঁ॑সু॒বনে॑ বসু॒ধেয॑স্য বিযন্তু॒ যজ॒ -হোতৃ॑ভ্যা-ন্দধুরিন্দ্রি॒যং-বঁ॑সু॒বনে॑ বসু॒ধেয॑স্য বিযন্তু॒ যজে᳚ - ন্দ্রি॒যাণি॑ বসু॒বনে॑ বসু॒ধেয॑স্য বিযন্তু॒ যজ॒ - সর॑স্বত্যা॒ - বন॒স্পতি॒-ষ্ষট্চ॑) (অ. 14)

(দে॒ব-ম্ব॒র্॒হি-র্দে॒বী-র্দ্বারো॑ দে॒বী উ॒ষাসা॑ব॒শ্বিনা॑ দে॒বী জোষ্ট্র॑ দে॒বী ঊ॒র্জাহূ॑তী দে॒বা দে॒বানা᳚-ম্ভি॒ষজা॑ বষট্কা॒রৈ-র্দে॒বীস্তিস্রস্তি॒স্রো দে॒বী-স্সর॑স্বতী দে॒ব ইন্দ্রো॒ নরা॒শগ্​ম্সো॑ দে॒ব ইন্দ্রো॒ বন॒স্পতি॑র্দে॒ব-ম্ব॒র্॒হির্বারি॑তীনা-ন্দে॒বোঅ॒গ্নি-স্স্বি॑ষ্ট॒কৃ-দ্দে॒বান্) ।

(স॒মিধা॒-ঽগ্নি-ন্দে॒ব-ম্ব॒র্॒হি-স্সর॑স্বত্যা॒শ্বিনা॒ সর্বং॑-বিঁযন্তু । দ্বার॑স্তি॒স্র-স্সংর্ব॑ বিযন্তু । অ॒জ ইন্দ্র॒মোজো॒-ঽগ্নি-ম্পর॒-স্সর॑স্বতীম্ । নক্ত॒ম্পূর্ব॒-স্সর॑স্বতি । অ॒ন্যত্র॒ সর॑স্বতি । ভি॒ষ-ক্পূর্ব॑-ন্দুহ ইন্দ্রি॒যম্ । অ॒ন্যত্র॑ দধুরিন্দ্রি॒যম্ । সৌ॒ত্রা॒ম॒ণ্যাগ্​ম্ সু॑তাসু॒তী । অ॒ঞ্জন্ত্য॒যং-যঁজ॑মানঃ)

অনুবাকং 15 - সূক্তবাকপ্রৈষঃ
অ॒গ্নিম॒দ্য হোতা॑রমবৃণীত । অ॒যগ্​ম্ সু॑তাসু॒তী যজ॑মানঃ । পচ॑-ন্প॒ক্তীঃ । পচ॑-ন্পুরো॒ডাশান্॑ । গৃ॒হ্ণ-ন্গ্রহান্॑ । ব॒দ্ধ্নন্ন॒শ্বিভ্যা॒-ঞ্ছাগ॒গ্​ম্॒ সর॑স্বত্যা॒ ইন্দ্রা॑য । ব॒দ্ধ্নন্-থ্সর॑স্বত্যৈ মে॒ষমিন্দ্রা॑যা॒শ্বিভ্যা᳚ম্ । ব॒দ্ধ্নন্নিন্দ্রা॑যর্​ষ॒ভ-ম॒শ্বিভ্যা॒গ্​ম্॒ সর॑স্বত্যৈ । সূ॒প॒স্থা অ॒দ্য দে॒বো বন॒স্পতি॑রভবত্ । অ॒শ্বিভ্যা॒-ঞ্ছাগে॑ন॒ সর॑স্বত্যা॒ ইন্দ্রা॑য ॥ 73 ॥

সর॑স্বত্যৈ মে॒ষেণেন্দ্রা॑যা॒শ্বিভ্যা᳚ম্ । ইন্দ্রা॑যর্​ষ॒ভেণা॒শ্বিভ্যা॒গ্​ম্॒ সর॑স্বত্যৈ । অক্ষ॒গ্গ্॒স্তান্মে॑দ॒স্তঃ প্রতি॑ পচ॒তা-ঽগ্র॑ভীষুঃ । অবী॑বৃধন্ত॒ গ্রহৈঃ᳚ । অপা॑তাম॒শ্বিনা॒ সর॑স্ব॒তীন্দ্র॑-স্সু॒ত্রামা॑ বৃত্র॒হা । সোমা᳚ন্-থ্সু॒রাম্ণঃ॑ । উপো॑ উক্থাম॒দা-শ্শ্রৌ॒দ্বিমদা॑ অদন্ন্ । অবী॑বৃধ-ন্তাঙ্গূ॒ষৈঃ । ত্বাম॒দ্যর্​ষ॑ আর্​ষেযর্​ষীণা-ন্নপাদবৃণীত । অ॒যগ্​ম্ সু॑তাসু॒তী যজ॑মানঃ । ব॒হুভ্য॒ আসঙ্গ॑তেভ্যঃ । এ॒ষ মে॑ দে॒বেষু॒ বসু॒ বার্যা য॑ক্ষ্যত॒ ইতি॑ । তা যা দে॒বা দে॑ব॒দানা॒ন্যদুঃ॑ । তান্য॑স্মা॒ আ চ॒ শাস্ব॑ । আ চ॑ গুরস্ব । ই॒ষি॒তশ্চ॑ হোত॒রসি॑ ভদ্র॒বাচ্যা॑য॒ প্রেষি॑তো॒ মানু॑ষঃ । সূ॒ক্ত॒বা॒কায॑ সূ॒ক্তা ব্রূ॑হি ॥ 74 ॥
(ইন্দ্রা॑য॒ - যজ॑মান-স্স॒প্ত চ॑) (অ. 15)

অনুবাকং 16 - পিতৃযজ্ঞযাজ্যানুবাক্যাঃ
উ॒শন্ত॑স্ত্বা হবামহ উ॒শন্ত॒-স্সমি॑ধীমহি । উ॒শন্নু॑শ॒ত আ ব॑হ পি॒তৄন্ হ॒বিষে॒ অত্ত॑বে ॥, আ নো॑ অগ্নে সুকে॒তুনা᳚ । র॒যিং-বিঁ॒শ্বাযু॑পোষসম্ । মা॒র্ডী॒ক-ন্ধে॑হি জী॒বসে᳚ ॥। ত্বগ্​ম্ সো॑ম ম॒হে ভগ᳚ম্ । ত্বং-যূঁন॑ ঋতায॒তে । দক্ষ॑-ন্দধাসি জী॒বসে᳚ ॥,ত্বগ্​ম্ সো॑ম॒ প্রচি॑কিতো মনী॒ষা ত্বগ্​ম্ রজি॑ষ্ঠ॒মনু॑ নেষি॒ পন্থা᳚ম্ । তব॒ প্রণী॑তী পি॒তরো॑ ন ইন্দো দে॒বেষু॒ রত্ন॑ম ভজন্ত॒ ধীরাঃ᳚ ॥। ত্বযা॒ হি নঃ॑ পি॒তর॑-স্সোম॒ পূর্বে॒ কর্মা॑ণি চ॒ক্রুঃ প॑বমান॒ ধীরাঃ᳚ । ব॒ন্বন্নবা॑তঃ পরি॒ধীগ্​ম্ রপো᳚র্ণু বী॒রেভি॒রশ্বৈ᳚র্ম॒ঘবা॑ ভবা নঃ ॥, ত্বগ্​ম্ সো॑ম পি॒তৃভি॑-স্সং​বিঁদা॒নো-ঽনু॒ দ্যাবা॑পৃথি॒বী আ ত॑তন্থ । তস্মৈ॑ ত ইন্দো হ॒বিষা॑ বিধেম ব॒যগ্গ্​ স্যা॑ম॒ পত॑যো রযী॒ণাম্ ॥ । বর্​হি॑ষদঃ পিতর ঊ॒ত্য॑র্বাগি॒মা বো॑ হ॒ব্যা চ॑কৃমা জু॒ষধ্ব᳚ম্ । ত আ গ॒তা-ঽব॑সা॒ শ-ন্ত॑মে॒নাথা॒স্মভ্য॒গ্​ম্॒ শং-যোঁর॑র॒পো দ॑ধাত ॥, আ-ঽহ-ম্পি॒তৄন্-থ্সু॑বি॒দত্রাগ্​ম্॑ অবিথ্সি॒ নপা॑ত-ঞ্চ বি॒ক্রম॑ণ-ঞ্চ॒ বিষ্ণোঃ᳚ । ব॒র্​হি॒ষদো॒ যে স্ব॒ধযা॑ সু॒তস্য॒ ভজ॑ন্ত পি॒ত্বস্ত ই॒হা-ঽঽ গ॑মিষ্ঠাঃ ॥ । উপ॑হূতাঃ পি॒তর॑-স্সো॒ম্যাসো॑ বর্​হি॒ষ্যে॑ষু নি॒ধিষু॑ প্রি॒যেষু॑ । ত আ গ॑মন্তু॒ ত ই॒হ শ্রু॑ব॒ন্ত্বধি॑ ব্রুবন্তু॒ তে অ॑বন্ত্ব॒স্মান্ ॥, অগ্নি॑ষ্বাত্তাঃ পিতর॒ এহ গ॑চ্ছত॒ সদ॑-স্সদ-স্সদত সুপ্রণীতযঃ । অ॒ত্তা হ॒বীগ্​ম্ষি॒ প্রয॑তানি ব॒র্॒হিষ্যথা॑ র॒যিগ্​ম্ সর্ব॑বীর-ন্দধাতন ॥ ॥ অ॒গ্নি॒ষ্বা॒ত্তানৃ॑তু॒মতো॑ হবামহে । নরা॒শগ্​ম্সে॑ সোমপী॒থং-যঁ আ॒শুঃ । তে নো॒ অর্ব॑ন্ত-স্সু॒হবা॑ ভবন্তু । শ-ন্নো॑ ভবন্তু দ্বি॒পদে॒ শ-ঞ্চতু॑ষ্পদে ॥ যে অ॑গ্নিষ্বা॒ত্তা যে-ঽন॑গ্নিষ্বাত্তাঃ ॥ 75 ॥

অ॒গ্​ম্॒হো॒মুচঃ॑ পি॒তর॑-স্সো॒ম্যাসঃ॑ । পরে-ঽব॑রে॒-ঽমৃতা॑সো॒ ভব॑ন্তঃ । অধি॑ব্রুবন্তু॒ তে অ॑বন্ত্ব॒স্মান্ ॥ বা॒ন্যা॑যৈ দু॒গ্ধে জু॒ষমা॑ণাঃ কর॒ম্ভম্ । উ॒দীরা॑ণা॒ অব॑রে॒ পরে॑ চ । অ॒গ্নি॒ষ্বা॒ত্তা ঋ॒তুভি॑-স্সং​বিঁদা॒নাঃ । ইন্দ্র॑বন্তো হ॒বিরি॒দ-ঞ্জু॑ষন্তাম্ ॥ যদ॑গ্নে কব্যবাহন পি॒তৄন্ যক্ষ্যৃ॑তা॒বৃধঃ॑ । প্র চ॑ হ॒ব্যানি॑ বক্ষ্যসি দে॒বেভ্য॑শ্চ পি॒তৃভ্য॒ আ ॥, ত্বম॑গ্ন ঈডি॒তো জা॑তবে॒দো-ঽবা᳚ড্ঢ॒ব্যানি॑ সুর॒ভীণি॑ কৃ॒ত্বা । প্রাদাঃ᳚ পি॒তৃভ্য॑-স্স্ব॒ধযা॒ তে অ॑ক্ষন্ন॒দ্ধি ত্ব-ন্দে॑ব॒ প্রয॑তা হ॒বীগ্​ম্ষি॑ । । মাত॑লী ক॒ব্যৈর্য॒মো অঙ্গি॑রোভি॒ র্বৃহ॒স্পতি॒র্-ঋক্ব॑ভি র্বাবৃধা॒নঃ । যাগ্​শ্চ॑ দে॒বা বা॑বৃ॒ধুর্যে চ॑ দে॒বান্-থ্স্বাহা॒-ঽন্যে স্ব॒ধযা॒-ঽন্যে ম॑দন্তি ॥ ॥ যে তা॑তৃ॒পুর্দে॑ব॒ত্রা জেহ॑মানাঃ । হো॒ত্রা॒বৃধ॒-স্স্তোম॑তষ্টাসো অ॒র্কৈঃ । আ-ঽগ্নে॑ যাহি সুবি॒দত্রে॑ভির॒র্বাম্ । স॒ত্যৈঃ ক॒ব্যৈঃ পি॒তৃভি॑-র্ঘর্ম॒সদ্ভিঃ॑ ॥ হ॒ব্য॒বাহ॑ম॒জর॑-ম্পুরুপ্রি॒যম্ । অ॒গ্নি-ঙ্ঘৃ॒তেন॑ হ॒বিষা॑ সপ॒র্যন্ন্ । উপা॑সদ-ঙ্কব্য॒বাহ॑-ম্পিতৃ॒ণাম্ । স নঃ॑ প্র॒জাং-বীঁ॒রব॑তী॒গ্​ম্॒ সমৃ॑ণ্বতু ॥ 76 ॥
(অন॑গ্নিষ্বাত্তা॒ - জেহ॑মানা-স্স॒প্ত চ॑) (অ. 16)

অনুবাকং 17 - ঐন্দ্রো পশৌ একাদশ প্রযাজাঃ
হোতা॑ যক্ষদি॒ডস্প॒দে । স॒মি॒ধা॒ন-ম্ম॒হদ্যশঃ॑ । সুষ॑মিদ্ধং॒-বঁরে᳚ণ্যম্ । অ॒গ্নিমিন্দ্রং॑-বঁযো॒ধস᳚ম্ । গা॒য॒ত্রী-ঞ্ছন্দ॑ ইন্দ্রি॒যম্ । ত্র্যবি॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒চ্ছুচি॑ব্রতম্ । তনূ॒নপা॑তমু॒দ্ভিদ᳚ম্ । য-ঙ্গর্ভ॒মদি॑তির্দ॒ধে ॥ 77 ॥

শুচি॒মিন্দ্রং॑-বঁযো॒ধস᳚ম্ । উ॒ষ্ণিহ॒-ঞ্ছন্দ॑ ইন্দ্রি॒যম্ । দি॒ত্য॒বাহ॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষদী॒ডেন্য᳚ম্ । ঈ॒ডি॒তং-বৃঁ॑ত্র॒হন্ত॑মম্ । ইডা॑ভি॒রীড্য॒গ্​ম্॒ সহঃ॑ । সোম॒মিন্দ্রং॑-বঁযো॒ধস᳚ম্ । অ॒নু॒ষ্টুভ॒-ঞ্ছন্দ॑ ইন্দ্রি॒যম্ । ত্রি॒ব॒থ্স-ঙ্গাং-বঁযো॒ দধ॑ত্ ॥ 78 ॥

বেত্বাজ্য॑স্য॒ হোত॒র্যজ॑ ॥ হোতা॑ যক্ষ-থ্সুবর্​হি॒ষদ᳚ম্ । পূ॒ষ॒ণ্বন্ত॒-মম॑র্ত্যম্ । সীদ॑ন্ত-ম্ব॒র্॒হিষি॑ প্রি॒যে । অ॒মৃতেন্দ্রং॑-বঁযো॒ধস᳚ম্ । বৃ॒হ॒তী-ঞ্ছন্দ॑ ইন্দ্রি॒যম্ । পঞ্চা॑বি॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒-দ্ব্যচ॑স্বতীঃ । সু॒প্রা॒য॒ণা ঋ॑তা॒বৃধঃ॑ ॥ 79 ॥

দ্বারো॑ দে॒বীর্​হি॑র॒ণ্যযীঃ᳚ । ব্র॒হ্মাণ॒ ইন্দ্রং॑-বঁযো॒ধস᳚ম্ । প॒ঙ্ক্তি-ঞ্ছন্দ॑ ই॒হেন্দ্রি॒যম্ । তু॒র্য॒বাহ॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ-থ্সু॒পেশ॑সে । সু॒শি॒ল্পে বৃ॑হ॒তী উ॒ভে । নক্তো॒ষাসা॒ ন দ॑র্​শ॒তে । বিশ্ব॒মিন্দ্রং॑-বঁযো॒ধস᳚ম্ । ত্রি॒ষ্টুভ॒-ঞ্ছন্দ॑ ইন্দ্রি॒যম্ ॥ 80 ॥

প॒ষ্ঠ॒বাহ॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒-ত্প্রচে॑তসা । দে॒বানা॑মুত্ত॒মং-যঁশঃ॑ । হোতা॑রা॒ দৈব্যা॑ ক॒বী । স॒যুজেন্দ্রং॑-বঁযো॒ধস᳚ম্ । জগ॑তী॒-ঞ্ছন্দ॑ ই॒হেন্দ্রি॒যম্ । অ॒ন॒ড্বাহ॒-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒-ত্পেশ॑স্বতীঃ ॥ 81 ॥

তি॒স্রো দে॒বীর্​হি॑র॒ণ্যযীঃ᳚ । ভার॑তী-র্বৃহ॒তীর্ম॒হীঃ । পতি॒মিন্দ্রং॑-বঁযো॒ধস᳚ম্ । বি॒রাজ॒-ঞ্ছন্দ॑ ই॒হেন্দ্রি॒যম্ । ধে॒নু-ঙ্গা-ন্ন বযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ-থ্সু॒রেত॑সম্ । ত্বষ্টা॑র-ম্পুষ্টি॒বর্ধ॑নম্ । রূ॒পাণি॒ বিভ্র॑ত॒-ম্পৃথ॑ক্ । পুষ্টি॒মিন্দ্রং॑-বঁযো॒ধস᳚ম্ ॥ 82 ॥

দ্বি॒পদ॒-ঞ্ছন্দ॑ ই॒হেন্দ্রি॒যম্ । উ॒ক্ষাণ॒-ঙ্গা-ন্ন বযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষচ্ছ॒তক্র॑তুম্ । হির॑ণ্যপর্ণ-মু॒ক্থিন᳚ম্ । র॒শ॒না-ম্বিভ্র॑তং-বঁ॒শিম্ । ভগ॒মিন্দ্রং॑-বঁযো॒ধস᳚ম্ । ক॒কুভ॒-ঞ্ছন্দ॑ ই॒হেন্দ্রি॒যম্ । ব॒শাং-বেঁ॒হত॒-ঙ্গা-ন্ন বযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ হোতা॑ যক্ষ॒-থ্স্বাহা॑কৃতীঃ । অ॒গ্নি-ঙ্গৃ॒হপ॑তি॒-ম্পৃথ॑ক্ । বরু॑ণ-ম্ভেষ॒জ-ঙ্ক॒বিম্ । ক্ষ॒ত্রমিন্দ্রং॑-বঁযো॒ধস᳚ম্ । অতি॑চ্ছন্দস॒-ঞ্ছন্দ॑ ইন্দ্রি॒যম্ । বৃ॒হদৃ॑ষ॒ভ-ঙ্গাং-বঁযো॒ দধ॑ত্ । বেত্বাজ্য॑স্য॒ হোত॒র্যজ॑ ॥ 83 ॥
(দ॒ধে - দধ॑-দ্- ঋতা॒বৃধ॑ - ইন্দ্রি॒যং - পেশ॑স্বতী--র্ বযো॒ধসং॒ - ঁবেত্বাজ্য॑স্য॒ হোত॒র্যজ॑ স॒প্ত চ॑) (অ. 17)

ই॒ডস্প॒দে᳚-ঽগ্নি-ঙ্গা॑য॒ত্রী-ন্ত্র্যবি᳚ম্ । শুচি॑ব্রত॒গ্​ম্॒ শুচি॑মু॒ষ্ণিহ॑-ন্দিত্য॒বাহ᳚ম্ । ঈ॒ডেন্য॒গ্​ম্॒ সোম॑-মন॒ষ্টুভ॑-ন্ত্রিব॒থ্সম্ । সু॒ব॒র॒ঃই॒ষদ॑ম॒মৃতেন্দ্র॑-ম্বৃহ॒তী-ম্পঞ্চা॑বিম্ । ব্যচ॑স্বতী-স্সুপ্রায॒ণা দ্বারো᳚ ব্রা॒হ্মাণঃ॑ পা॒ঙ্ক্তিমি॒হ তু॑র্য॒বাহ᳚ম্ । সু॒পেশ॑সে॒ বিশ্ব॒মিন্দ্র॑-ন্ত্রি॒ষ্টুভ॑-ম্পষ্ঠ॒বাহ᳚ম্ । প্রচে॑তসা স॒যুজেন্দ্র॒-ঞ্জগ॑তীমি॒হান॒ড্বাহ᳚ম্ । পেশ॑স্বতীস্তি॒স্ত্রো ভার॑তীঃ॒ পতিং॑-বিঁ॒রাজ॑মি॒হ ধে॒নু-ন্ন । সু॒রেত॑স॒-ন্ত্বষ্টা॑র॒-ম্পুষ্টি॑-ন্দ্বি॒পদ॑মি॒হোক্ষাণ॒-ন্ন । শ॒তক্র॑তু॒-ম্ভগ॒মিন্দ্র॑-ঙ্ক॒কুভ॑মি॒হ ব॒শাং-বেঁ॒হত॒-ঙ্গা-ন্ন । স্বাহা॑কৃতীঃ, ক্ষ॒ত্রমতি॑চ্ছন্দস-ম্বৃ॒হদৃ॑ষ॒ভ-ঙ্গাং-বঁযঃ॑ । ই॒ন্দ্রি॒যমুষি॑বসু॒নব॑দ॒শেহে᳚ন্দ্রিয॒মষ্ট॑ নব দশ॒ গা-ন্ন বযো॒ দধ॒-থ্সর্ব॑বেতু ।

অনুবাকং 18 - ঐন্দ্রো পশৌ প্রযাজযাজ্যাঃ
সমি॑দ্ধো অ॒গ্নি-স্স॒মিধা᳚ । সুষ॑মিদ্ধো॒ বরে᳚ণ্যঃ । গা॒য॒ত্রী ছন্দ॑ ইন্দ্রি॒যম্ । ত্র্যবি॒র্গৌর্বযো॑ দধুঃ ॥ তনূ॒নপা॒-চ্ছুচি॑ব্রতঃ । ত॒নূ॒নপাচ্চ॒ (ত॒নূ॒পাচ্চ) সর॑স্বতী । উ॒ষ্ণিক্ছন্দ॑ ইন্দ্রি॒যম্ । দি॒ত্য॒বাড্গৌর্বযো॑ দধুঃ ॥ ইডা॑ভির॒গ্নিরীড্যঃ॑ । সোমো॑ দে॒বো অম॑র্ত্যঃ ॥ 84 ॥

অ॒নু॒ষ্টুপ্ছন্দ॑ ইন্দ্রি॒যম্ । ত্রি॒ব॒থ্সো গৌর্বযো॑ দধুঃ ॥ সু॒ব॒র্॒হির॒গ্নিঃ পূ॑ষ॒ণ্বান্ । স্তী॒র্ণ-ব॑র্​হি॒রম॑র্ত্যঃ । বৃ॒হ॒তী ছন্দ॑ ইন্দ্রি॒যম্ । পঞ্চা॑বি॒-র্গৌর্বযো॑ দধুঃ ॥ দুরো॑ দে॒বীর্দিশো॑ ম॒হীঃ । ব্র॒হ্মা দে॒বো বৃহ॒স্পতিঃ॑ । প॒ঙ্ক্তি-শ্ছন্দ॑ ই॒হেন্দ্রি॒যম্ । তু॒র্য॒বাড্ গৌর্বযো॑ দধুঃ ॥ 85 ॥

উ॒ষে য॒হ্বী সু॒পেশ॑সা । বিশ্বে॑ দে॒বা অম॑র্ত্যাঃ । ত্রি॒ষ্টু-প্ছন্দ॑ ইন্দ্রি॒যম্ । প॒ষ্ঠ॒বাদ্গৌর্বযো॑ দধুঃ ॥ দৈব্যা॑ হোতারা ভিষজা । ইন্দ্রে॑ণ স॒যুজা॑ যু॒জা । জগ॑তী॒ ছন্দ॑ ই॒হেন্দ্রি॒যম্ । অ॒ন॒ড্বান্-গৌর্বযো॑ দধুঃ ॥ তি॒স্র ইডা॒ সর॑স্বতী । ভার॑তী ম॒রুতো॒ বিশঃ॑ ॥ 86 ॥

বি॒রাট্ছন্দ॑ ই॒হেন্দ্রি॒যম্ । ধে॒নুর্গৌর্ন বযো॑ দধুঃ ॥ ত্বষ্টা॑ তু॒রীপো॒ অদ্ভু॑তঃ । ই॒ন্দ্রা॒গ্নী পু॑ষ্টি॒বর্ধ॑না । দ্বি॒পাচ্ছন্দ॑ ই॒হেন্দ্রি॒যম্ । উ॒ক্ষা গৌর্ন বযো॑ দধুঃ ॥ শ॒মি॒তা নো॒ বন॒স্পতিঃ॑ । স॒বি॒তা প্র॑সু॒বন্ভগ᳚ম্ । ক॒কুচ্ছন্দ॑ ই॒হেন্দ্রি॒যম্ । ব॒শা বে॒হদ্গৌর্ন বযো॑ দধুঃ ॥ স্বাহা॑ য॒জ্ঞং-বঁরু॑ণঃ । সু॒ক্ষ॒ত্রো ভে॑ষ॒জ-ঙ্ক॑রত্ । অতি॑-শ্ছন্দা॒-শ্ছন্দ॑ ইন্দ্রি॒যম্ । বৃ॒হদৃ॑ষ॒ভো গৌর্বযো॑ দধুঃ ॥ 87 ॥
(অম॑র্ত্য - স্তুর্য॒বাড্গৌর্বযো॑ দধু॒--র্ বিশো॑ - ব॒শা বে॒হদ্গৌর্ন বযো॑ দধুশ্চ॒ত্বারি॑ চ) (অ. 18)

অনুবাকং 19 - ঐন্দ্রো পশৌ বপাদীনাং-যঁজ্যানুবাক্যাঃ
ব॒স॒ন্তেন॒র্তুনা॑ দে॒বাঃ । বস॑বস্ত্রি॒বৃতা᳚ স্তু॒তম্ । র॒থ॒ন্ত॒রেণ॒ তেজ॑সা । হ॒বিরিন্দ্রে॒ বযো॑ দধুঃ ॥ গ্রী॒ষ্মেণ॑ দে॒বা ঋ॒তুনা᳚ । রু॒দ্রাঃ প॑ঞ্চদ॒শে স্তু॒তম্ । বৃ॒হ॒তা যশ॑সা॒ বল᳚ম্ । হ॒বিরিন্দ্রে॒ বযো॑ দধুঃ ॥ ব॒র॒.ষাভি॑র্-ঋ॒তুনা॑-ঽঽদি॒ত্যাঃ । স্তোমে॑ সপ্তদ॒শে স্তু॒তম্ ॥ 88 ॥

বৈ॒রূ॒পেণ॑ বি॒শৌজ॑সা । হ॒বিরিন্দ্রে॒ বযো॑ দধুঃ ॥ শা॒র॒দেন॒র্তুনা॑ দে॒বাঃ । এ॒ক॒বি॒গ্​ম্॒শ ঋ॒ভব॑-স্স্তু॒তম্ । বৈ॒রা॒জেন॑ শ্রি॒যা শ্রিয᳚ম্ । হ॒বিরিন্দ্রে॒ বযো॑ দধুঃ ॥ হে॒ম॒ন্তেন॒র্তুনা॑ দে॒বাঃ । ম॒রুত॑স্ত্রিণ॒বে স্তু॒তম্ । বলে॑ন॒ শক্ব॑রী॒-স্সহঃ॑ । হ॒বিরিন্দ্রে॒ বযো॑ দধুঃ ॥ শৈ॒শি॒রেণ॒র্তুনা॑ দে॒বাঃ । ত্র॒য॒স্ত্রি॒গ্​ম্॒শে॑ ঽমৃতগ্গ্॑ স্তু॒তম্ । স॒ত্যেন॑ রে॒বতীঃ᳚, ক্ষ॒ত্রম্ । হ॒বিরিন্দ্রে॒ বযো॑ দধুঃ ॥ 89 ॥
(স্তোমে॑ সপ্তদ॒শে স্তু॒তগ্​ম্ - সহো॑ হ॒বিরিন্দ্রে॒ বযো॑ দধুশ্চ॒ত্বারি॑ চ) (অ. 19)

(ব॒স॒ন্তেন॑ গ্রী॒ষ্মেণ॑ ব॒র্॒ষাভি॑-শ্শার॒দেন॑ হেম॒ন্তেন॑ শৈশি॒রেণ॒ ষট্ )

অনুবাকং 20 - ঐন্দ্রো পশৌ অনূযাজানা-ম্মৈত্রাবরিণপ্রৈষাঃ
দে॒ব-ম্ব॒র্॒হিরিন্দ্রং॑-বঁযো॒ধস᳚ম্ । দে॒ব-ন্দে॒বম॑বর্ধযত্ । গা॒য॒ত্রি॒যা ছন্দ॑সেন্দ্রি॒যম্ । তেজ॒ ইন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒বীর্দ্বারো॑ দে॒বমিন্দ্রং॑-বঁযো॒ধস᳚ম্ । দে॒বীর্দে॒ব-ম॑বর্ধযন্ন্ । উ॒ষ্ণিহা॒ ছন্দ॑সেন্দ্রি॒যম্ । প্রা॒ণমিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ 90 ॥

দে॒বী দে॒বং-বঁ॑যো॒ধস᳚ম্ । উ॒ষে ইন্দ্র॑মবর্ধতাম্ । অ॒নু॒ষ্টুভা॒ ছন্দ॑সেন্দ্রি॒যম্ । বাচ॒মিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ দে॒বী জোষ্ট্রী॑ দে॒বমিন্দ্রং॑-বঁযো॒ধস᳚ম্ । দে॒বী দে॒বম॑বর্ধতাম্ । বৃ॒হ॒ত্যা ছন্দ॑সেন্দ্রি॒যম্ । শ্রোত্র॒মিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ 91 ॥

দে॒বী ঊ॒র্জাহু॑তী দে॒বমিন্দ্রং॑-বঁযো॒ধস᳚ম্ । দে॒বী দে॒বম॑বর্ধতাম্ । প॒ঙ্ক্ত্যা ছন্দ॑সেন্দ্রি॒যম্ । শু॒ক্রমিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ দে॒বা দৈব্যা॒ হোতা॑রা দে॒বমিন্দ্রং॑-বঁযো॒ধস᳚ম্ । দে॒বা দে॒বম॑বর্ধতাম্ । ত্রি॒ষ্টুভা॒ ছন্দ॑সেন্দ্রি॒যম্ । ত্বিষি॒মিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বীতাং॒-যঁজ॑ ॥ 92 ॥

দে॒বী-স্তি॒স্র-স্তি॒স্রো দে॒বীর্ব॑যো॒ধস᳚ম্ । পতি॒মিন্দ্র॑-মবর্ধযন্ন্ । জগ॑ত্যা॒ ছন্দ॑সেন্দ্রি॒যম্ । বল॒মিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বিযন্তু॒ যজ॑ ॥ দে॒বো নরা॒শগ্​ম্সো॑ দে॒বমিন্দ্রং॑-বঁযো॒ধস᳚ম্ । দে॒বো দে॒বম॑বর্ধযত্ । বি॒রাজা॒ ছন্দ॑সেন্দ্রি॒যম্ । রেত॒ ইন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বেতু॒ যজ॑ ॥ 93 ॥

দে॒বো বন॒স্পতি॑-র্দে॒বমিন্দ্রং॑-বঁযো॒ধস᳚ম্ । দে॒বো দে॒বম॑বর্ধযত্ । দ্বি॒পদা॒ ছন্দ॑সেন্দ্রি॒যম্ । ভগ॒মিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒ব-ম্ব॒র্॒হির্বারি॑তীনা-ন্দে॒বমিন্দ্রং॑-বঁযো॒ধস᳚ম্ । দে॒বো (দে॒বং) দে॒বম॑বর্ধযত্ । ক॒কুভা॒ ছন্দ॑সেন্দ্রি॒যম্ । যশ॒ ইন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বেতু॒ যজ॑ ॥ দে॒বো অ॒গ্নি-স্স্বি॑ষ্ট॒কৃ-দ্দে॒বমিন্দ্রং॑-বঁযো॒ধস᳚ম্ । দে॒বো দে॒বম॑বর্ধযত্ । অতি॑চ্ছন্দসা॒ ছন্দ॑সেন্দ্রি॒যম্ । ক্ষ॒ত্রমিন্দ্রে॒ বযো॒ দধ॑ত্ । ব॒সু॒বনে॑ বসু॒ধেয॑স্য বেতু॒ যজ॑ ॥ 94 ॥
(বি॒য॒ন্তু॒ যজ॑ - বীতাং॒-যঁজ॑-বীতাং॒-যঁজ॑-বেতু॒ যজ॑-বেতু॒ যজ॒ পঞ্চ॑ চ) (অ. 20)

(দে॒ব-ম্ব॒র্॒হি-র্গা॑যত্রি॒যা তেজঃ॑ । দে॒বীর্দ্বার॑ উ॒ষ্ণিহা᳚ প্রা॒ণম্ । দে॒বী দে॒বমু॒ষে অ॑নু॒ষ্টুভা॒ বাচ᳚ম্ । দে॒বী জোষ্ট্রী॑ বৃহ॒ত্যা শ্রোত্র᳚ম্ । দে॒বী ঊ॒র্জাহূ॑তী প॒ঙ্ক্ত্যা শু॒ক্রম্ । দে॒বা দৈব্যা॒ হোতা॑রা ত্রি॒ষ্টুভা॒ ত্বিষি᳚ম্ । দে॒বীস্তি॒স্রস্তি॒স্রো দে॒বীঃ পতি॒-ঞ্জগ॑ত্যা॒ বল᳚ম্ । দে॒বো নরা॒শগ্​ম্সো॑ বি॒রাজা॒ রেতঃ॑ । দে॒বো বন॒স্পতি॑-র্দ্বি॒পদা॒ ভগ᳚ম্ । দে॒ব-ম্ব॒র্॒হি-র্বারি॑তীনা-ঙ্ক॒কুভা॒ যশঃ॑ । দে॒বো অ॒গ্নি-স্স্বি॑ষ্ট॒কৃদতি॑চ্ছন্দসা ক্ষ॒ত্রম্ । বে॒তু॒ বি॒য॒ন্তু॒ চ॒তু-র্বী॑তা॒মেকো॑ বিযন্তু চ॒তুর্বে॑তু । অ॒ব॒র্ধ॒য॒দ॒ব॒র্ধ॒য॒গ্গ্॒ শ্চ॒তুর॑বর্ধতা॒মেকো॑ ঽবর্ধযগ্গ্​ শ্চ॒তুর॑বর্ধযত্ ।)

(স্বা॒দ্বী-ন্ত্বা॒ - সোমঃ॒ - সুরা॑বন্ত॒গ্​ম্॒ - সীসে॑ন - মি॒ত্রো॑-ঽসি॒ - য-দ্দে॑বা॒ - হোতা॑ যক্ষ-থ্স॒মিধেন্দ্র॒গ্​ম্॒ - সমি॑দ্ধ॒ ইন্দ্র॒ - আচ॑র্​ষণি॒প্রা - দে॒ব-ম্ব॒র্॒হিরিন্দ্রগ্​ম্॑ সুদে॒বগ্​ম্ - হোতা॑ যক্ষ-থ্স॒মিধা॒-ঽগ্নিগ্​ম্ - সমি॑দ্ধো অ॒গ্নির॑শ্বিনা॒ - ঽশ্বিনা॑ হ॒বিরি॑ন্দ্রি॒যং - দে॒ব-ম্ব॒র্॒হি-স্সর॑স্ব - ত্যা॒গ্নিম॒ - দ্যোশন্তো॒ - হোতা॑ যক্ষদি॒ডস্প॒দে - সমি॑দ্ধো অ॒গ্নি-স্স॒মিধা॑ - বস॒ন্তেন॑ - দে॒ব-ম্ব॒র্॒হিরিন্দ্রং॑-বঁযো॒ধসং॑-বিঁগ্​ম্শ॒তিঃ)

(স্বা॒দ্বী-ন্ত্বা-ঽ - মী॑ মদন্ত পি॒তরঃ॒ - সাম্রা᳚জ্যায - পূ॒ত-ম্প॒বিত্রে॑ণে॒ বাজ্য॑ - মু॒ষাসা॒নক্তা॒ - বদ॑রৈ॒ - রধা॑তাম॒শ্বিনা॑ - দে॒ব ইন্দ্রো॒ বন॒স্পতিঃ॑ - পষ্ঠ॒বাহ॒-ঙ্গাং - দে॒বী দে॒বং-বঁ॑যো॒ধস॒-ঞ্চতু॑র্নবতিঃ )

(স্বা॒দ্বীন্ত্বা॑ - বেতু॒ যজ॑)

॥ হরিঃ॑ ওম্ ॥

॥ কৃষ্ণ যজুর্বেদীয তৈত্তিরীয ব্রাহ্মণে দ্বিতীযাষ্টকে ষষ্ঠঃ প্রপাঠক-স্সমাপ্তঃ ॥