kṛṣṇa yajurvēdīya taittirīya brāhmaṇē dvitīyāṣṭakē ṣaṣṭhaḥ prapāṭhakaḥ - sautrāmaṇiḥ kaukilī hōtra-ñcha

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 - grahāḥ
svā̠dvī-ntvā̎ svā̠dunā̎ । tī̠vrā-ntī̠vrēṇa̍ । a̠mṛtā̍-ma̠mṛtē̍na । madhu̍matī̠-mmadhu̍matā । sṛ̠jāmi̠ sagṃ sōmē̍na । sōmō̎-'sya̠śvibhyā̎-mpachyasva । sara̍svatyai pachyasva । indrā̍ya su̠trāmṇē̍ pachyasva ॥ parī̠tōṣi̍ñchatā su̠tam । sōmō̠ ya u̍tta̠magṃ ha̠viḥ ॥ 1 ॥

da̠dha̠nvā yō naryō̍ a̠phsva̍ntarā । su̠ṣāva̠ sōma̠madri̍bhiḥ ॥ pu̠nātu̍ tē pari̠sruta̎m । sōma̠gṃ̠ sūrya̍sya duhi̠tā । vārē̍ṇa̠ śaśva̍tā̠ tanā̎ । vā̠yuḥ pū̠taḥ pa̠vitrē̍ṇa । prāṅkhsōmō̠ ati̍drutaḥ । indra̍sya̠ yujya̠-ssakhā̎ ॥ vā̠yuḥ pū̠taḥ pa̠vitrē̍ṇa । pra̠tyaṅkhsōmō̠ āti̍drutaḥ ॥ 2 ॥

indra̍sya̠ yujya̠-ssakhā̎ ॥ brahma̍ kṣa̠tra-mpa̍vatē̠ tēja̍ indri̠yam । sura̍yā̠ sōma̍-ssu̠ta āsu̍tō̠ madā̍ya । śu̠krēṇa̍ dēva dē̠vatā̎ḥ pipṛgdhi । rasē̠nānna̠ṃ yaja̍mānāya dhēhi ॥ ku̠vida̠ṅga yava̍mantō̠ yava̍-ñchit । yathā̠ dāntya̍nupū̠rvaṃ vi̠yūya̍ । i̠hēhai̍ṣā-ṅkṛṇuta̠ bhōja̍nāni । yē ba̠ra̠.hiṣō̠ namō̍vṛkti̠-nna ja̠gmuḥ ॥ u̠pa̠yā̠ma-gṛ̍hītō-'sya̠śvibhyā̎-ntvā̠ juṣṭa̍-ṅgṛhṇāmi ॥ 3 ॥

sara̍svatyā̠ indrā̍ya su̠trāmṇē̎ ॥ ē̠ṣa tē̠ yōni̠stēja̍sē tvā । vī̠ryā̍ya tvā̠ balā̍ya tvā ॥ tējō̍-'si̠ tējō̠ mayi̍ dhēhi । vī̠rya̍masi vī̠rya̍-mmayi̍ dhēhi । bala̍masi̠ bala̠-mmayi̍ dhēhi ॥ nānā̠ hi vā̎-ndē̠vahi̍ta̠gṃ̠ sada̍ḥ kṛ̠tam । mā sagṃsṛ̍kṣāthā-mpara̠mē vyō̍mann । surā̠ tvamasi̍ śu̠ṣmiṇī̠ sōma̍ ē̠ṣaḥ । mā mā̍ higṃsī̠-ssvāṃ yōni̍māvi̠śann ॥ 4 ॥

u̠pa̠yā̠magṛ̍hītō-'syāśvi̠na-ntēja̍ḥ । sā̠ra̠sva̠taṃ vī̠rya̎m । ai̠ndra-mbala̎m ॥ ē̠ṣa tē̠ yōni̠rmōdā̍ya tvā । ā̠na̠ndāya̍ tvā̠ maha̍sē tvā ॥ ōjō̠-'syōjō̠ mayi̍ dhēhi । ma̠nyura̍si ma̠nyu-mmayi̍ dhēhi । mahō̍-'si̠ mahō̠ mayi̍ dhēhi । sahō̍-'si̠ sahō̠ mayi̍ dhēhi ॥ yā vyā̠ghraṃ viṣū̍chikā । u̠bhau vṛka̍-ñcha̠ rakṣa̍ti । śyē̠na-mpa̍ta̠triṇagṃ̍ si̠gṃ̠ham । sēma-mpā̠tvagṃha̍saḥ ॥ sa̠-mpṛcha̍-sstha̠ sa-mmā̍ bha̠drēṇa̍ pṛṅkta । vi̠pṛcha̍-sstha̠ vi mā̍ pā̠pmanā̍ pṛṅkta ॥ 5 ॥
(ha̠viḥ - pra̠tyaṅkhsōmō̠ āti̍drutō - gṛhṇā - myāvi̠śan - viṣū̍chikā̠ pañcha̍ cha) (a. 1)

anuvākaṃ 2 - grahōpasthānam
sōmō̠ rājā̠-'mṛtagṃ̍ su̠taḥ । ṛ̠jī̠ṣēṇā̍jahānmṛ̠tyum । ṛ̠tēna̍ sa̠tyami̍ndri̠yam । vipānagṃ̍ śu̠kramandha̍saḥ । indra̍syēndri̠yam । i̠da-mpayō̠-'mṛta̠-mmadhu̍ ॥ sōma̍ma̠dbhyō vya̍pibat । Chanda̍sā ha̠gṃ̠sa-śśu̍chi̠ṣat । ṛ̠tēna̍ sa̠tyami̍ndri̠yam । a̠dbhyaḥ, kṣī̠raṃ vya̍pibat ॥ 6 ॥

kruṅṅā̎mgira̠sō dhi̠yā । ṛ̠tēna̍ sa̠tyami̍ndri̠yam । annā̎-tpari̠srutō̠ rasa̎m । brahma̍ṇā̠ vya̍piba-tkṣa̠tram । ṛ̠tēna̍ sa̠tyami̍ndri̠yam ॥ rētō̠ mūtra̠ṃ vija̍hāti । yōni̍-mpravi̠śadi̍ndri̠yam । garbhō̍ ja̠rāyu̠ṇā-''vṛ̍taḥ । ulba̍-ñjahāti̠ janma̍nā । ṛ̠tēna̍ sa̠tyami̍ndri̠yam ॥ 7 ॥

vēdē̍na rū̠pē vya̍karōt । sa̠tā̠sa̠tī pra̠jāpa̍tiḥ । ṛ̠tēna̍ sa̠tyami̍ndri̠yam ॥ sōmē̍na̠ sōmau̠ vya̍pibat । su̠tā̠su̠tau pra̠jāpa̍tiḥ । ṛ̠tēna̍ sa̠tyami̍ndri̠yam । dṛ̠ṣṭvā rū̠pē vyāka̍rōt । sa̠tyā̠nṛ̠tē pra̠jāpa̍tiḥ । aśra̍ddhā̠-manṛ̠tē-'da̍dhāt । śra̠ddhāgṃ sa̠tyē pra̠jāpa̍tiḥ । ṛ̠tēna̍ sa̠tyami̍ndri̠yam ॥ dṛ̠ṣṭvā pa̍ri̠srutō̠ rasa̎m । śu̠krēṇa̍ śu̠kraṃ vya̍pibat । paya̠-ssōma̍-mpra̠jāpa̍tiḥ । ṛ̠tēna̍ sa̠tyami̍ndri̠yam । vipānagṃ̍ śu̠kramandha̍saḥ । indra̍syēndri̠yam । i̠da-mpayō̠-'mṛta̠-mmadhu̍ ॥ 8 ॥
(a̠dbhyaḥ, kṣī̠raṃ vya̍piba̠ - jjanma̍na̠rtēna̍ sa̠tyami̍ndri̠yagg​ - śra̠ddhāgṃ sa̠tyē pra̠jāpa̍tira̠ṣṭau cha̍) (a. 2)

(sōmō̠ rājā̠ vipāna̠gṃ̠ sōma̍ma̠dbhyō-'nnā̠-drētō̠ mūtra̠ṃ vēdē̍na satāsa̠tī sōmē̍na sutāsu̠tau dṛ̠ṣṭvā rū̠pē dṛ̠ṣṭvā pa̍ri̠srutō̠ rasa̠ṃ vipāna̠-ndaśa̍ )

anuvākaṃ 3 - grahahōmaḥ
surā̍vanta-mbar​hi̠ṣadagṃ̍ su̠vīra̎m । ya̠jñagṃ hi̍nvanti mahi̠ṣā namō̍bhiḥ । dadhā̍nā̠-ssōma̍-ndi̠vi dē̠vatā̍su । madē̠mēndra̠ṃ yaja̍mānā-ssva̠rkāḥ ॥ yastē̠ rasa̠-ssambhṛ̍ta̠ ōṣa̍dhīṣu । sōma̍sya̠ śuṣma̠-ssura̍yā su̠tasya̍ । tēna̍ jinva̠ yaja̍māna̠-mmadē̍na । sara̍svatī-ma̠śvinā̠-vindra̍-ma̠gnim ॥ yama̠śvinā̠ namu̍chērāsu̠rādadhi̍ । sara̍sva̠tyasa̍nōdindri̠yāya̍ ॥ 9 ॥

i̠ma-ntagṃ śu̠kra-mmadhu̍manta̠-mindu̎m । sōma̠gṃ̠ rājā̍nami̠ha bha̍kṣayāmi ॥ yadatra̍ ri̠ptagṃ ra̠sina̍-ssu̠tasya̍ । yadindrō̠ api̍ba̠chChachī̍bhiḥ । a̠ha-ntada̍sya̠ mana̍sā śi̠vēna̍ । sōma̠gṃ̠ rājā̍nami̠ha bha̍kṣayāmi ॥ pi̠tṛbhya̍-ssvadhā̠vibhya̍-ssva̠dhā nama̍ḥ । pi̠tā̠ma̠hēbhya̍-ssvadhā̠vibhya̍-ssva̠dhā nama̍ḥ । prapi̍tāmahēbhya-ssvadhā̠vibhya̍-ssva̠dhā nama̍ḥ । akṣa̍-npi̠tara̍ḥ ॥ 10 ॥

amī̍madanta pi̠tara̍ḥ । atī̍tṛpanta pi̠tara̍ḥ । amī̍mṛjanta pi̠tara̍ḥ । pita̍ra̠-śśundha̍ddhvam ॥ pu̠nantu̍ mā pi̠tara̍-ssō̠myāsa̍ḥ । pu̠nantu̍ mā pitāma̠hāḥ । pu̠nantu̠ prapi̍tāmahāḥ । pa̠vitrē̍ṇa śa̠tāyu̍ṣā । pu̠nantu̍ mā pitāma̠hāḥ । pu̠nantu̠ prapi̍tāmahāḥ ॥ 11 ॥

pa̠vitrē̍ṇa śa̠tāyu̍ṣā ॥ viśva̠māyu̠-rvya̍śnavai । agna̠ āyūgṃ̍ṣi pavasa̠ ā su̠vōrja̠miṣa̍-ñcha naḥ । ā̠rē bā̍dhasva du̠chChunā̎m ॥ agnē̠ pava̍sva̠ svapā̍ a̠smē varcha̍-ssu̠vīrya̎m । dadha̠-tpōṣagṃ̍ ra̠yi-mmayi̍ ॥। pava̍māna̠-ssuva̠rjana̍ḥ । pa̠vitrē̍ṇa̠ vicha̍r​ṣaṇiḥ । yaḥ pōtā̠ sa pu̍nātu mā ॥ pu̠nantu̍ mā dēvaja̠nāḥ । pu̠nantu̠ mana̍ vō dhi̠yā । pu̠nantu̠ viśva̍ ā̠yava̍ḥ ॥। jāta̍vēdaḥ pa̠vitra̍vat । pa̠vitrē̍ṇa punāhi mā । śu̠krēṇa̍ dēva̠ dīdya̍t । agnē̠ kratvā̠ kratū̠gṃ̠ranu̍ ॥ yattē̍ pa̠vitra̍-ma̠rchiṣi̍ । agnē̠ vita̍tamanta̠rā । brahma̠ tēna̍ punīmahē ॥। u̠bhābhyā̎-ndēva savitaḥ । pa̠vitrē̍ṇa sa̠vēna̍ cha । i̠da-mbrahma̍ punīmahē ॥ vai̠śva̠dē̠vī pu̍na̠tī dē̠vyāgā̎t । yasyai̍ ba̠hvī-sta̠nuvō̍ vī̠tapṛ̍ṣṭhāḥ । tayā̠ mada̍nta-ssadha̠mādyē̍ṣu । va̠yagg​ syā̍ma̠ pata̍yō rayī̠ṇām ॥॥ yē sa̍mā̠nā-ssama̍nasaḥ । pi̠tarō̍ yama̠rājyē̎ । tēṣā̎ṃ lō̠ka-ssva̠dhā nama̍ḥ । ya̠jñō dē̠vēṣu̍ kalpatām ॥ 12 ॥

yē sa̍jā̠tā-ssama̍nasaḥ । jī̠vā jī̠vēṣu̍ māma̠kāḥ । tēṣā̠g̠ śrīrmayi̍ kalpatām । a̠smil ँlō̠kē śa̠tagṃ samā̎ḥ ॥ dvē sru̠tī a̍śṛṇava-mpitṛ̠ṇām । a̠ha-ndē̠vānā̍mu̠ta martyā̍nām । yābhyā̍mi̠daṃ viśva̠mēja̠-thsamē̍ti । yada̍nta̠rā pi̠tara̍-mmā̠tara̍-ñcha ॥ i̠dagṃ ha̠viḥ pra̠jana̍na-mmē astu । daśa̍vīragṃ sa̠rvaga̍ṇagg​ sva̠stayē̎ । ā̠tma̠sani̍ prajā̠sani̍ । pa̠śu̠sanya̍bhaya̠sani̍ lōka̠sani̍ । a̠gniḥ pra̠jā-mba̍hu̠lā-mmē̍ karōtu । anna̠-mpayō̠ rētō̍ a̠smāsu̍ dhatta । rā̠yaspōṣa̠-miṣa̠mūrja̍ma̠smāsu̍ dīdhara̠-thsvāhā̎ ॥ 13 ॥
(i̠ndri̠yāya̍ - pi̠tara̍ḥ - śa̠tāyu̍ṣā pu̠nantu̍ mā pitāma̠hāḥ pu̠nantu̠ prapi̍tāmahāḥ-kalpatāg​-sva̠stayē̠ pañcha̍ cha) (a. 3)

anuvākaṃ 4 - upahōmāḥ
sīsē̍na̠ tantra̠-mmana̍sā manī̠ṣiṇa̍ḥ । ū̠rṇā̠sū̠trēṇa̍ ka̠vayō̍ vayanti । a̠śvinā̍ ya̠jñagṃ sa̍vi̠tā sara̍svatī । indra̍sya rū̠paṃ varu̍ṇō bhiṣa̠jyann ॥ tada̍sya rū̠pama̠mṛta̠gṃ̠ śachī̍bhiḥ । ti̠srō da̍dhurdē̠vatā̎-ssagṃrarā̠ṇāḥ । lōmā̍ni̠ śaṣpai̎-rbahu̠dhā na tōkma̍bhiḥ । tvaga̍sya mā̠gṃ̠sama̍bhava̠nna lā̠jāḥ ॥ tada̠śvinā̍ bhi̠ṣajā̍ ru̠drava̍rtanī । sara̍svatī vayati̠ pēśō̠ anta̍raḥ ॥ 14 ॥

asthi̍ ma̠jjāna̠-mmāsa̍raiḥ । kā̠rō̠ta̠rēṇa̠ dadha̍tō̠ gavā̎-ntva̠chi ॥ sara̍svatī̠ mana̍sā pēśa̠laṃ vasu̍ । nāsa̍tyābhyāṃ vayati dar​śa̠taṃ vapu̍ḥ । rasa̍-mpari̠srutā̠ na rōhi̍tam । na̠gnahu̠rdhīra̠stasa̍ra̠-nna vēma̍ ॥ paya̍sā śu̠krama̠mṛta̍-ñja̠nitra̎m । sura̍yā̠ mūtrā̎jjanayanti̠ rēta̍ḥ । apāma̍ti-ndurma̠ti-mbādha̍mānāḥ । ūva̍ddhya̠ṃ vātagṃ̍ sa̠buva̠-ntadā̠rāt ॥ 15 ॥

indra̍-ssu̠trāmā̠ hṛda̍yēna sa̠tyam । pu̠rō̠ḍāśē̍na savi̠tā ja̍jāna । yakṛ̍-tklō̠māna̠ṃ varu̍ṇō bhiṣa̠jyann । mata̍snē vāya̠vyai̎rna mi̍nāti pi̠ttam ॥ ā̠ntrāṇi̍ sthā̠lī madhu̠ pinva̍mānā । gudā̠ pātrā̍ṇi su̠dughā̠ na dhē̠nuḥ । śyē̠nasya̠ patra̠-nna plī̠hā śachī̍bhiḥ । ā̠sa̠ndī nābhi̍ru̠dara̠-nna mā̠tā ॥ ku̠mbhō va̍ni̠ṣṭhurja̍ni̠tā śachī̍bhiḥ । yasmi̠nnagrē̠ yōnyā̠-ṅgarbhō̍ a̠ntaḥ ॥ 16 ॥

plā̠śīrvya̍kta-śśa̠tadhā̍ra̠ uthsa̍ḥ । du̠hē na ku̠mbhīg​ sva̠dhā-mpi̠tṛbhya̍ḥ ॥ mukha̠gṃ̠ sada̍sya̠ śira̠ ithsadē̍na । ji̠hvā pa̠vitra̍ma̠śvinā̠ sagṃ sara̍svatī । chappa̠-nna pā̠yurbhi̠ṣaga̍sya̠ vāla̍ḥ । va̠stirna śēpō̠ hara̍sā tara̠svī ॥ a̠śvibhyā̠-ñchakṣu̍ra̠mṛta̠-ṅgrahā̎bhyām । Chāgē̍na̠ tējō̍ ha̠viṣā̍ śṛ̠tēna̍ । pakṣmā̍ṇi gō̠dhūmai̠ḥ kva̍lairu̠tāni̍ । pēśō̠ na śu̠klamasi̍taṃ vasātē ॥ 17 ॥

avi̠rna mē̠ṣō na̠si vī̠ryā̍ya । prā̠ṇasya̠ panthā̍ a̠mṛtō̠ grahā̎bhyām । sara̍sva̠tyupa̠vākai̎rvyā̠nam । nasyā̍ni ba̠ra̠.hi-rbada̍rai-rjajāna ॥ indra̍sya rū̠pamṛ̍ṣa̠bhō balā̍ya । karṇā̎bhyā̠g̠ śrōtra̍ma̠mṛta̠-ṅgrahā̎bhyām । yavā̠ na ba̠ra̠.hi-rbhru̠vi kēsa̍rāṇi । ka̠rkandhu̍ jajñē̠ madhu̍ sāra̠gha-mmukhā̎t ॥ ā̠tmannu̠pasthē̠ na vṛka̍sya̠ lōma̍ । mukhē̠ śmaśrū̍ṇi̠ na vyā̎ghralō̠mam ॥ 18 ॥

kēśā̠ na śī̠ra̠.ṣan. yaśa̍sē śri̠yai śikhā̎ । si̠gṃ̠hasya̠ lōma̠ tviṣi̍-rindri̠yāṇi̍ ॥ aṅgā̎nyā̠tman-bhi̠ṣajā̠ tada̠śvinā̎ । ā̠tmāna̠maṅgai̠-ssama̍dhā̠-thsara̍svatī । indra̍sya rū̠pagṃ śa̠tamā̍na̠māyu̍ḥ । cha̠ndrēṇa̠ jyōti̍ra̠mṛta̠-ndadhā̍nā ॥ sara̍svatī̠ yōnyā̠-ṅgarbha̍ma̠ntaḥ । a̠śvibhyā̠-mpatnī̠ sukṛ̍ta-mbibharti । a̠pāgṃ rasē̍na̠ varu̍ṇō̠ na sāmnā̎ । indragg̍ śri̠yai ja̠naya̍nna̠phsu rājā̎ ॥ tēja̍ḥ paśū̠nāgṃ ha̠viri̍ndri̠yāva̍t । pa̠ri̠srutā̠ paya̍sā sāra̠gha-mmadhu̍ । a̠śvibhyā̎-ndu̠gdha-mbhi̠ṣajā̠ sara̍svatyā sutāsu̠tābhyā̎m । a̠mṛta̠-ssōma̠ indu̍ḥ ॥ 19 ॥
(anta̍ra - ā̠rā - da̠nta--r va̍sātē - vyāghralō̠magṃ - rājā̍ cha̠tvāri̍ cha) (a. 4)

anuvākaṃ 5 - abhiṣēkaḥ
mi̠trō̍-'si̠ varu̍ṇō-'si । sama̠haṃ viśvai̎rdē̠vaiḥ ॥ kṣa̠trasya̠ nābhi̍rasi । kṣa̠trasya̠ yōni̍rasi ॥ syō̠nāmāsī̍da । su̠ṣadā̠māsī̍da । mā tvā̍ higṃsīt । mā mā̍ higṃsīt ॥ niṣa̍sāda dhṛ̠tavra̍tō̠ varu̍ṇaḥ । pa̠styā̎svā ॥ 20 ॥

sāmrā̎jyāya su̠kratu̍ḥ ॥ dē̠vasya̍ tvā savi̠tuḥ pra̍sa̠vē । a̠śvinō̎-rbā̠hubhyā̎m । pū̠ṣṇō hastā̎bhyām । a̠śvinō̠-rbhaiṣa̍jyēna । tēja̍sē brahmavarcha̠sāyā̠bhiṣi̍ñchāmi ॥ dē̠vasya̍ tvā savi̠tuḥ pra̍sa̠vē । a̠śvinō̎-rbā̠hubhyā̎m । pū̠ṣṇō hastā̎bhyām । sara̍svatyai̠ bhaiṣa̍jyēna ॥ 21 ॥

vī̠ryā̍yā̠nnādyā̍yā̠bhiṣi̍ñchāmi ॥ dē̠vasya̍ tvā savi̠tuḥ pra̍sa̠vē । a̠śvinō̎-rbā̠hubhyā̎m । pū̠ṣṇō hastā̎bhyām । indra̍syēndri̠yēṇa̍ । śri̠yai yaśa̍sē̠ balā̍yā̠bhiṣi̍ñchāmi ॥ kō̍-'si kata̠mō̍-'si । kasmai̎ tvā̠ kāya̍ tvā ॥ suślō̠kāँ(4) suma̍ḍga̠lāँ(4) satya̍rā̠jā(3)n ॥ śirō̍ mē̠ śrīḥ ॥ 22 ॥

yaśō̠ mukha̎m । tviṣi̠ḥ kēśā̎ścha̠ śmaśrū̍ṇi । rājā̍ mē prā̠ṇō̍-'mṛta̎m । sa̠mrāṭ chakṣu̍ḥ । vi̠rāṭChrōtra̎m । ji̠hvā mē̍ bha̠dram । vāmmaha̍ḥ । manō̍ ma̠nyuḥ । sva̠rāḍbhāma̍ḥ । mōdā̎ḥ pramō̠dā a̠ṅgulī̠raṅgā̍ni ॥ 23 ॥

chi̠tta-mmē̠ saha̍ḥ । bā̠hū mē̠ bala̍mindri̠yam । hastau̍ mē̠ karma̍ vī̠rya̎m । ā̠tmā kṣa̠tramurō̠ mama̍ । pṛ̠ṣṭīrmē̍ rā̠ṣṭramu̠dara̠magṃsau̎ । grī̠vāścha̠ śrōṇyau̎ । ū̠rū a̍ra̠tnī jānu̍nī । viśō̠ mē-'ṅgā̍ni sa̠rvata̍ḥ । nābhi̍rmē chi̠ttaṃ vi̠jñāna̎m । pā̠yurmē-'pa̍chitirbha̠sat ॥ 24 ॥

ā̠na̠nda̠na̠ndāvā̠ṇḍau mē̎ । bhaga̠-ssaubhā̎gya̠-mpasa̍ḥ ॥ jaṅghā̎bhyā-mpa̠dbhyā-ndharmō̎-'smi । vi̠śi rājā̠ prati̍ṣṭhitaḥ ॥ prati̍ kṣa̠trē prati̍tiṣṭhāmi rā̠ṣṭrē । pratyaśvē̍ṣu̠ prati̍tiṣṭhāmi̠ gōṣu̍ । pratyaṅgē̍ṣu̠ prati̍tiṣṭhāmyā̠tmann । prati̍ prā̠ṇēṣu̠ prati̍tiṣṭhāmi pu̠ṣṭē । prati̠ dyāvā̍pṛthi̠vyōḥ । pratiti̍ṣṭhāmi ya̠jñē ॥ 25 ॥

tra̠yā dē̠vā ēkā̍daśa । tra̠ya̠stri̠gṃ̠śā-ssu̠rādha̍saḥ । bṛha̠spati̍ purōhitāḥ । dē̠vasya̍ savi̠tu-ssa̠vē । dē̠vā dē̠vaira̍vantu mā । pra̠tha̠mā dvi̠tīyai̎ḥ । dvi̠tīyā̎stṛ̠tīyai̎ḥ । tṛ̠tīyā̎-ssa̠tyēna̍ । sa̠tyaṃ ya̠jñēna̍ ।ya̠jñō yaju̍rbhiḥ ॥ 26 ॥

yajūgṃ̍ṣi̠ sāma̍bhiḥ । sāmā̎nyṛ̠gbhiḥ । ṛchō̍ yā̠jyā̍bhiḥ । yā̠jyā̍ vaṣaṭkā̠raiḥ । va̠ṣa̠ṭkā̠rā āhu̍tibhiḥ । āhu̍tayō mē̠ kāmā̠n-thsama̍rdhayantu ॥ bhū-ssvāhā̎ ॥ lōmā̍ni̠ praya̍ti̠rmama̍ । tvamma̠ āna̍ti̠rāga̍tiḥ । mā̠gṃ̠sa-mma̠ upa̍natiḥ । va svasthi̍ । ma̠jjā ma̠ āna̍tiḥ ॥ 27 ॥
(pa̠styā̎svā - sara̍svatyai̠ bhaiṣa̍jyēna̠ - śrī - raṅgā̍ni - bha̠sa--dya̠jñē - ya̠jñō yaju̍rbhi̠ - rupa̍nati̠rdvē cha̍) (a. 5)

anuvākaṃ 6 - avabhṛthaḥ
ya-ddē̍vā dēva̠hēḍa̍nam । dēvā̍saśchakṛ̠mā va̠yam । a̠gnirmā̠ tasmā̠dēna̍saḥ । viśvā̎-nmuñcha̠tvagṃha̍saḥ ॥ yadi̠ divā̠ yadi̠ nakta̎m । ēnāgṃ̍si chakṛ̠mā va̠yam । vā̠yurmā̠ tasmā̠dēna̍saḥ । viśvā̎-nmuñcha̠tvagṃha̍saḥ ॥ yadi̠ jāgra̠-dyadi̠ svapnē̎ । ēnāgṃ̍si chakṛ̠mā va̠yam ॥ 28 ॥

sūryō̍ mā̠ tasmā̠dēna̍saḥ । viśvā̎-nmuñcha̠tvagṃha̍saḥ ॥ yadgrāmē̠ yadara̍ṇyē । ya-thsa̠bhāyā̠ṃ yadi̍ndri̠yē । yachChū̠drē yada̠ryē̎ । ēna̍śchakṛ̠mā va̠yam । yadēka̠syādhi̠ dharma̍ṇi । tasyā̍va̠yaja̍namasi ॥ yadāpō̠ aghni̍yā̠ varu̠ṇēti̠ śapā̍mahē । tatō̍ varuṇa nō muñcha ॥ 29 ॥

ava̍bhṛtha nichaṅkuṇa nichē̠rura̍si nichaṅkuṇa । ava̍ dē̠vai-rdē̠vakṛ̍ta̠mēnō̍-'yāṭ । ava̠ martyai̠rmartya̍kṛtam । u̠rōrā nō̍ dēva ri̠ṣaspā̍hi ॥ su̠mi̠trā na̠ āpa̠ ōṣa̍dhaya-ssantu । du̠rmi̠trāstasmai̍ bhuyāsuḥ । yō̎-'smā-ndvēṣṭi̍ । ya-ñcha̍ va̠ya-ndvi̠ṣmaḥ ॥ dru̠pa̠dādi̠vē-nmu̍muchā̠naḥ । svi̠nna-ssnā̠tvī malā̍diva ॥ 30 ॥

pū̠ta-mpa̠vitrē̍ṇē̠vājya̎m । āpa̍-śśundhantu̠ maina̍saḥ ॥ udva̠ya-ntama̍sa̠spari̍ । paśya̍ntō̠ jyōti̠rutta̍ram । dē̠va-ndē̍va̠trā sūrya̎m । aga̍nma̠ jyōti̍rutta̠mam ॥ prati̍yutō̠ varu̍ṇasya̠ pāśa̍ḥ । pratya̍stō̠ varu̍ṇasya̠ pāśa̍ḥ ॥ ēdhō̎-'syēdhiṣī̠mahi̍ । sa̠mida̍si ॥ 31 ॥

tējō̍-'si̠ tējō̠ mayi̍ dhēhi ॥ a̠pō anva̍chāriṣam । rasē̍na̠ sama̍sṛkṣmahi । paya̍svāgṃ agna̠ ā-'ga̍mam । ta-mmā̠ sagṃsṛ̍ja̠ varcha̍sā । pra̠jayā̍ cha̠ dhanē̍na cha ॥ sa̠māva̍varti pṛthi̠vī । samu̠ṣāḥ । samu̠ sūrya̍ḥ । samu̠ viśva̍mi̠da-ñjaga̍t । vai̠śvā̠na̠ra jyō̍ti-rbhūyāsam । vi̠bhu-ṅkāma̠ṃ vya̍śnavai ॥ bhū-ssvāhā̎ ॥ 32 ॥
(svapna̠ ēnāgṃ̍si chakṛ̠mā va̠yaṃ - mu̍ñcha̠ - malā̍diva - sa̠mida̍si̠ - jaga̠-ttrīṇi̍ cha) (a. 6)

anuvākaṃ 7 - aindrē praśnau prayājānāmēkādaśa maitrāvaruṇapraiṣāḥ
hōtā̍ yakṣa-thsa̠midhēndra̍-mi̠ḍaspa̠dē । nābhā̍ pṛthi̠vyā adhi̍ । di̠vō var​ṣma̠n-thsami̍ddhyatē । ōji̍ṣṭhaśchar​ṣaṇī̠sahān̍ । vētvājya̍sya̠ hōta̠ryaja̍ ॥ hōtā̍ yakṣa̠ttanū̠napā̍tam । ū̠tibhi̠-rjētā̍ra̠-mapa̍rājitam । indra̍-ndē̠vagṃ su̍va̠rvida̎m । pa̠thibhi̠-rmadhu̍mattamaiḥ । narā̠śagṃsē̍na̠ tēja̍sā ॥ 33 ॥

vētvājya̍sya̠ hōta̠ryaja̍ ॥ hōtā̍ yakṣa̠diḍā̍bhi̠-rindra̍-mīḍi̠tam । ā̠juhvā̍na̠-mama̍rtyam । dē̠vō dē̠vai-ssavī̎ryaḥ । vajra̍hastaḥ puranda̠raḥ । vētvājya̍sya̠ hōta̠ryaja̍ ॥ hōtā̍ yakṣa-dba̠ra̠.hiṣīndra̍-nniṣadva̠ram । vṛ̠ṣa̠bha-nnaryā̍pasam । vasu̍bhī ru̠drairā̍di̠tyaiḥ । sa̠yugbhi̍-rba̠ra̠.hirā 'sa̍dat ॥ 34 ॥

vētvājya̍sya̠ hōta̠ryaja̍ ॥ hōtā̍ yakṣa̠dōjō̠ na vī̠rya̎m । sahō̠ dvāra̠ indra̍mavardhayann । su̠prā̠ya̠ṇā viśra̍yantāmṛtā̠vṛdha̍ḥ । dvāra̠ indrā̍ya mī̠ḍhuṣē̎ । vi̠yantvājya̍sya̠ hōta̠ryaja̍ ॥ hōtā̍ yakṣadu̠ṣē indra̍sya dhē̠nū । su̠dughē̍ mā̠tarau̍ ma̠hī । savā̠tarau̠ na tēja̍sī । va̠thsamindra̍-mavardhatām ॥ 35 ॥

vī̠tāmājya̍sya̠ hōta̠ryaja̍ ॥ hōtā̍ yakṣa̠-ddaivyā̠ hōtā̍rā । bhi̠ṣajā̠ sakhā̍yā । ha̠viṣēndra̍-mbhiṣajyataḥ । ka̠vī dē̠vau prachē̍tasau । indrā̍ya dhatta indri̠yam । vī̠tāmājya̍sya̠ hōta̠ryaja̍ ॥ hōtā̍ yakṣatti̠srō dē̠vīḥ । traya̍stri̠dhāta̍vō̠-'pasa̍ḥ । iḍā̠ sara̍svatī̠ bhāra̍tī ॥ 36 ॥

ma̠hīndra̍patnīr-ha̠viṣma̍tīḥ । vi̠yantvājya̍sya̠ hōta̠ryaja̍ ॥ hōtā̍ yakṣa̠ttvaṣṭā̍ra̠-mindra̍-ndē̠vam । bhi̠ṣajagṃ̍ su̠yaja̍-ṅghṛta̠śriya̎m । pu̠ru̠rūpagṃ̍ su̠rēta̍sa-mma̠ghōni̎m । indrā̍ya̠ tvaṣṭā̠ dadha̍dindri̠yāṇi̍ । vētvājya̍sya̠ hōta̠ryaja̍ ॥ hōtā̍ yakṣa̠-dvana̠spati̎m । śa̠mi̠tāragṃ̍ śa̠takra̍tum । dhi̠yō jō̠ṣṭāra̍-mindri̠yam ॥ 37 ॥

maddhvā̍ sama̠ñjanpa̠thibhi̍-ssu̠gēbhi̍ḥ । svadā̍ti ha̠vya-mmadhu̍nā ghṛ̠tēna̍ । vētvājya̍sya̠ hōta̠ryaja̍ ॥ hōtā̍ yakṣa̠dindra̠gg̠ svāhā-''jya̍sya । svāhā̠ mēda̍saḥ । svāhā̎ stō̠kānā̎m । svāhā̠ svāhā̍kṛtīnām । svāhā̍ ha̠vyasū̎ktīnām । svāhā̍ dē̠vāgṃ ā̎jya̠pān । svāhēndragṃ̍ hō̠trājju̍ṣā̠ṇāḥ । indra̠ ājya̍sya viyantu । hōta̠ryaja̍ ॥ 38 ॥
(tēja̍sā-'sada-davardhatā̠ṃ-bhāra̍tī-ndri̠yaṃ-ju̍ṣā̠ṇā dvē cha̍) (a. 7)

(sa̠midhēndra̠-ntanū̠napā̍ta̠miḍā̍bhi-rba̠r̠hiṣyōja̍ u̠ṣē daivyā̍ ti̠srastvaṣṭā̍ra̠ṃ vana̠spati̠mindra̎m । sa̠midhēndra̍-ñcha̠turvētvēkō̍ vi̠yantu̠ dvirvī̠tāmēkō̍ vi̠yantu̠ dvirvētvēkō̍ vi̠yantu̠ hōta̠ryaja̍ )

anuvākaṃ 8 - aindrē praśnau prayājayājyāḥ
sami̍ddha̠ indra̍ u̠ṣasā̠manī̍kē । pu̠rō̠ruchā̍ pūrva̠kṛdvā̍vṛdhā̠naḥ । tri̠bhirdē̠vaistri̠gṃ̠śatā̠ vajra̍bāhuḥ । ja̠ghāna̍ vṛ̠traṃ vi durō̍ vavāra ॥ narā̠śagṃsa̠ḥ prati̠ śūrō̠ mimā̍naḥ । tanū̠napā̠t-prati̍ ya̠jñasya̠ dhāma̍ । gōbhi̍-rva̠pāvā̠-nmadhu̍nā sama̠ñjann । hira̍ṇyaiścha̠ndrī ya̍jati̠ prachē̍tāḥ ॥ ī̠ḍi̠tō dē̠vair​hari̍vāgṃ abhi̠ṣṭiḥ । ā̠juhvā̍nō ha̠viṣā̠ śardha̍mānaḥ ॥ 39 ॥

pu̠ra̠da̠ṃrō ma̠ghavā̠n̠. vajra̍bāhuḥ । āyā̍tu ya̠jñamupa̍ nō juṣā̠ṇaḥ ॥ ju̠ṣā̠ṇō ba̠ra̠.hir​hari̍vānna̠ indra̍ḥ । prā̠chīnagṃ̍ sīdatpra̠diśā̍ pṛthi̠vyāḥ । u̠ru̠vyachā̠ḥ pratha̍mānagg​ syō̠nam । ā̠di̠tyaira̠ktaṃ vasu̍bhi-ssa̠jōṣā̎ḥ ॥ indra̠-ndura̍ḥ kava̠ṣyō̍ dhāva̍mānāḥ । vṛṣā̍ṇaṃ yantu̠ jana̍ya-ssu̠patnī̎ḥ । dvārō̍ dē̠vīra̠bhitō̠ viśra̍yantām । su̠vīrā̍ vī̠ra-mpratha̍mānā̠ mahō̍bhiḥ ॥ 40 ॥

u̠ṣāsā̠ naktā̍ bṛha̠tī bṛ̠hanta̎m । paya̍svatī su̠dughē̠ śūra̠mindra̎m । pēśa̍svatī̠ tantu̍nā sa̠ṃvyaya̍ntī । dē̠vānā̎-ndē̠vaṃ ya̍jata-ssuru̠kmē ॥ daivyā̠ mimā̍nā̠ mana̍sā puru̠trā । hōtā̍rā̠vindra̍-mpratha̠mā su̠vāchā̎ । mū̠rdhan. ya̠jñasya̠ madhu̍nā̠ dadhā̍nā । prā̠chīna̠-ñjyōti̍r​ha̠viṣā̍ vṛdhātaḥ ॥ ti̠srō dē̠vīr​ha̠viṣā̠ vardha̍mānāḥ । indra̍-ñjuṣā̠ṇā vṛṣa̍ṇa̠-nna patnī̎ḥ ॥ 41 ॥

achChi̍nna̠-ntantu̠-mpaya̍sā̠ sara̍svatī । iḍā̍ dē̠vī bhāra̍tī vi̠śvatū̎rtiḥ ॥ tvaṣṭā̠ dadha̠dindrā̍ya̠ śuṣma̎m । apā̠kō-'chi̍ṣṭurya̠śasē̍ pu̠rūṇi̍ । vṛṣā̠ yaja̠n vṛṣa̍ṇa̠-mbhūri̍rētāḥ । mū̠rdhan. ya̠jñasya̠ sama̍naktu dē̠vān ॥ vana̠spati̠-rava̍sṛṣṭō̠ na pāśai̎ḥ । tmanyā̍ sama̠ñjañCha̍mi̠tā na dē̠vaḥ । indra̍sya ha̠vyairja̠ṭhara̍-mpṛṇā̠naḥ । svadā̍ti ha̠vya-mmadhu̍nā ghṛ̠tēna̍ ॥ stō̠kānā̠mindu̠-mprati̠ śūra̠ indra̍ḥ । vṛ̠ṣā̠yamā̍ṇō vṛṣa̠bha-stu̍rā̠ṣāṭ । ghṛ̠ta̠pruṣā̠ madhu̍nā ha̠vyamu̠ndann । mū̠rdhan. ya̠jñasya̍ juṣatā̠g̠ svāhā̎ ॥ 42 ॥
(śardha̍mānō̠ - mahō̍bhi̠ḥ - patnī̎--r ghṛ̠tēna̍ cha̠tvāri̍ cha) (a. 8)

anuvākaṃ 9 - aindrē praśnau vapādīnāṃ yājyānuvākyāḥ
ācha̍r​ṣaṇi̠prā vṛ̍ṣa̠bhō janā̍nām । rājā̍ kṛṣṭī̠nā-mpu̍ruhū̠ta indra̍ḥ । stu̠ta-śśra̍va̠syannava̠sōpa̍ma̠drik । yu̠ktvā harī̠ vṛṣa̠ṇā ''yā̎hya̠rvām ॥, vi̠vēṣa̠ yanmā̍ dhi̠ṣaṇā̍ ja̠jāna̠ stavai̍ pu̠rā pāryā̠dindra̠ mahna̍ḥ । agṃha̍sō̠ yatra̍ pī̠para̠dyathā̍ nō nā̠vēva̠ yānta̍ mu̠bhayē̍ havantē ॥॥ tagṃ sa̠dhrīchī̍rū̠tayō̠ vṛṣṇi̍yāni । paugg​syā̍ni ni̠yuta̍-ssaśchu̠rindra̎m । sa̠mu̠dra-nna sindha̍va u̠kthaśu̍ṣmāḥ । u̠ru̠vyacha̍sa̠giṃra̠ āvi̍śanti ॥॥ sa̠tyamittanna tvāvāgṃ̍ a̠nyō asti̍ । indra̍ dē̠vō na martyō̠ jyāyān̍ । aha̠nnahi̍-mpari̠śayā̍na̠marṇa̍ḥ । avā̍sṛjō̠-'pō achChā̍ samu̠dram ॥ prasa̍sāhiṣē puruhūta̠ śatrūn̍ । jyēṣṭha̍stē̠ śuṣma̍ i̠ha rā̠tira̍stu । indrābha̍ra̠ dakṣi̍ṇēnā̠ vasū̍ni । pati̠-ssindhū̍nāmasi rē̠vatī̍nām ॥ sa śēvṛ̍dha̠madhi̍dhā dyu̠mnama̠smē । mahi̍ kṣa̠tra-ñja̍nā̠ṣāḍi̍ndra̠ tavya̎m । rakṣā̍ cha nō ma̠ghōna̍ḥ pā̠hi sū̠rīn । rā̠yē cha̍ na-ssvapa̠tyā i̠ṣē dhā̎ḥ ॥ 43 ॥
(rē̠vatī̍nā-ñcha̠tvāri̍ cha) (a. 9)

anuvākaṃ 10 - aindrē praśnau anuyājānāmēkādaśa maitrāvaruṇapraiṣāḥ
dē̠va-mba̠r̠hirindragṃ̍ sudē̠va-ndē̠vaiḥ । vī̠rava̍-thstī̠rṇaṃ vēdyā̍mavardhayat । vastō̎rvṛ̠ta-mprāktō̎rbhṛ̠tam । rā̠yā ba̠r̠hiṣma̠tō-'tya̍gāt । va̠su̠vanē̍ vasu̠dhēya̍sya vētu̠ yaja̍ ॥ dē̠vīrdvāra̠ indragṃ̍ saṅghā̠tē । vi̠ḍvīryāma̍nnavardhayann । ā va̠thsēna̠ taru̍ṇēna kumā̠rēṇa̍ cha mīvi̠tā apārvā̍ṇam । rē̠ṇuka̍kāṭa-nnudantām । va̠su̠vanē̍ vasu̠dhēya̍sya viyantu̠ yaja̍ ॥ 44 ॥

dē̠vī u̠ṣāsā̠ naktā̎ । indra̍ṃ ya̠jñē pra̍ya̠tya̍hvētām । daivī̠rviśa̠ḥ prāyā̍siṣṭām । suprī̍tē̠ sudhi̍tē abhūtām । va̠su̠vanē̍ vasu̠dhēya̍sya vītā̠ṃ yaja̍ ॥ dē̠vī jōṣṭrī̠ vasu̍dhitī । dē̠vamindra̍mavardhatām । ayā̎vya̠nyā-'ghā dvēṣāgṃ̍si । ā-'nyā vā̎kṣī̠-dvasu̠ vāryā̍ṇi । yaja̍mānāya śikṣi̠tē ॥ 45 ॥

va̠su̠vanē̍ vasu̠dhēya̍sya vītā̠ṃ yaja̍ ॥ dē̠vī ū̠rjāhu̍tī̠ dughē̍ su̠dughē̎ । paya̠sēndra̍mavardhatām । iṣa̠mūrja̍ma̠nyā 'vā̎kṣīt । sagdhi̠gṃ̠ sapī̍tima̠nyā । navē̍na̠ pūrva̠-ndaya̍mānē । pu̠rā̠ṇēna̠ nava̎m । adhā̍tā̠-mūrja̍mū̠rjāhu̍tī̠ vasu̠ vāryā̍ṇi । yaja̍mānāya śikṣi̠tē । va̠su̠vanē̍ vasu̠dhēya̍sya vītā̠ṃ yaja̍ ॥ 46 ॥

dē̠vā daivyā̠ hōtā̍rā । dē̠vamindra̍mavardhatām । ha̠tāgha̍śagṃ sā̠vābhā̎r​ṣṭā̠ṃ vasu̠ vāryā̍ṇi । yaja̍mānāya śikṣi̠tau । va̠su̠vanē̍ vasu̠dhēya̍sya vītā̠ṃ yaja̍ ॥ dē̠vīsti̠srasti̠srō dē̠vīḥ । pati̠mindra̍mavardhayann । aspṛ̍kṣa̠dbhāra̍tī̠ diva̎m । ru̠drairya̠jñagṃ sara̍svatī । iḍā̠ vasu̍matī gṛ̠hān ॥ 47 ॥

va̠su̠vanē̍ vasu̠dhēya̍sya viyantu̠ yaja̍ ॥ dē̠va indrō̠ narā̠śagṃsa̍ḥ । tri̠va̠rū̠tha-stri̍vandhu̠raḥ । dē̠vamindra̍mavardhayat । śa̠tēna̍ śitipṛ̠ṣṭhānā̠māhi̍taḥ । sa̠hasrē̍ṇa̠ prava̍rtatē । mi̠trāvaru̠ṇēda̍sya hō̠tramar​ha̍taḥ । bṛha̠spati̍-sstō̠tram । a̠śvinā-''ddhva̍ryavam । va̠su̠vanē̍ vasu̠dhēya̍sya vētu̠ yaja̍ ॥ 48 ॥

dē̠va indrō̠ vana̠spati̍ḥ । hira̍ṇyaparṇō̠ madhu̍śākha-ssupippa̠laḥ । dē̠vamindra̍mavardhayat । diva̠magrē̍ṇāprāt । ā-'ntari̍kṣa-mpṛthi̠vīma̍dṛgṃhīt । va̠su̠vanē̍ vasu̠dhēya̍sya vētu̠ yaja̍ ॥ dē̠va-mba̠ra̠.hirvāri̍tīnām । dē̠vamindra̍mavardhayat । svā̠sa̠stha-mindrē̠ṇāsa̍nnam । a̠nyā ba̠r̠hīg​ṣya̠bhya̍bhūt । va̠su̠vanē̍ vasu̠dhēya̍sya vētu̠ yaja̍ ॥ dē̠vō a̠gni-ssvi̍ṣṭa̠kṛt । dē̠vamindra̍mavardhayat । svi̍ṣṭa-ṅku̠rvan-thsvi̍ṣṭa̠kṛt । svi̍ṣṭama̠dya ka̍rōtu naḥ । va̠su̠vanē̍ vasu̠dhēya̍sya vētu̠ yajē̍ ॥ 49 ॥
(vi̠ya̠ntu̠ yaja̍ - śikṣi̠tē - śi̍kṣi̠tē va̍su̠vanē̍ vasu̠dhēya̍sya vītā̠ṃ yaja̍-gṛ̠hān.-vē̍tu̠ yajā̍-bhū̠-thṣaṭcha̍) (a. 10)

dē̠va-mba̠r̠hi-rdē̠vīrdvārō̍ dē̠vī u̠ṣāsā̠ naktā̍ dē̠vī jōṣṭrī̍ dē̠vī ū̠rjāhu̍tī dē̠vā daivyā̠ hōtā̍rā śikṣi̠tau dē̠vīsti̠srasti̠srō dē̠vīḥ pati̍-ndē̠va indrō̠ narā̠śagṃsō̍ dē̠va indrō̠ vana̠spati̍-rdē̠va-mba̠r̠hirvāri̍tīnā-ndē̠vō a̠gni-ssvi̍ṣṭa̠kṛ-ddē̠vam । vē̠tu̠ vi̠ya̠ntu̠ cha̠turvī̍tā̠mēkō̍ viyantu cha̠turvē̍tu । a̠va̠rdha̠ya̠da̠va̠rdha̠ya̠-ntrira̍vardhatā̠mēkō̍ 'vardhayagg​ ścha̠tura̍vardhayat । vastō̠rā va̠thsēna̠ daivī̠rayā̠vīṣagṃ̍ ha̠tāspṛ̍kṣachCha̠tēna̠ diva̠mindragg̍ svāsa̠sthagg​ svi̍ṣṭam । śikṣi̠tē śi̍kṣi̠tē śi̍kṣi̠tau ।

anuvākaṃ 11 - paśutrayē praya jārthā maitrāvaruṇapraiṣāḥ
hōtā̍ yakṣa-thsa̠midhā̠-'gni-mi̠ḍaspa̠dē । a̠śvinēndra̠gṃ̠ sara̍svatīm । a̠jō dhū̠mrō na gō̠dhūmai̠ḥ kva̍lairbhēṣa̠jam । madhu̠ śaṣpai̠rna tēja̍ indri̠yam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa̠ttanū̠napā̠-thsara̍svatī । avi̍rmē̠ṣō na bhē̍ṣa̠jam । pa̠thā madhu̍ma̠tā ''bha̍rann । a̠śvinēndrā̍ya vī̠rya̎m ॥ 50 ॥

bada̍rairupa̠vākā̍bhi-rbhēṣa̠ja-ntōkma̍bhiḥ । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa̠nnarā̠śagṃsa̠na-nna̠gnahu̎m । pati̠gṃ̠ surā̍yai bhēṣa̠jam । mē̠ṣa-ssara̍svatī bhi̠ṣak । rathō̠ na cha̠ndrya̍śvinō̎rva̠pā indra̍sya vī̠rya̎m । bada̍rairupa̠vākā̍bhi-rbhēṣa̠ja-ntōkma̍bhiḥ । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ 51 ॥

hōtā̍ yakṣadi̠ḍēḍi̠ta ā̠juhvā̍na̠-ssara̍svatīm । indra̠-mbalē̍na va̠rdhayann̍ । ṛ̠ṣa̠bhēṇa̠ gavē̎mdri̠yam । a̠śvinēndrā̍ya vī̠rya̎m । yavai̎ḥ ka̠rkandhu̍bhiḥ । madhu̍ lā̠jairna māsa̍ram । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa-dba̠ra̠.hi-ssu̠ṣṭarī̠mō-'rṇa̍mradāḥ । bhi̠ṣannāsa̍tyā ॥ 52 ॥

bhi̠ṣajā̠-'śvinā-'śvā̠ śiśu̍matī । bhi̠ṣagdhē̠nu-ssara̍svatī । bhi̠ṣagdu̠ha indrā̍ya bhēṣa̠jam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa̠ddurō̠ diśa̍ḥ । ka̠va̠ṣyō̍ na vyacha̍svatīḥ । a̠śvibhyā̠-nna durō̠ diśa̍ḥ । indrō̠ na rōda̍sī̠ dughē̎ । du̠hē kāmā̠n-thsara̍svatī ॥ 53 ॥

a̠śvinēndrā̍ya bhēṣa̠jam । śu̠kra-nna jyōti̍rindri̠yam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa-thsu̠pēśa̍sō̠ṣē nakta̠-ndivā̎ । a̠śvinā̍ sañjānā̠nē । sama̍ñjātē̠ sara̍svatyā । tviṣi̠mindrē̠ na bhē̍ṣa̠jam । śyē̠nō na raja̍sā hṛ̠dā । paya̠-ssōma̍ḥ pari̠srutā̍ ghṛ̠ta-mmadhu̍ ॥ 54 ॥

vi̠yantvājya̍sya̠ hōta̠ryaja̍ ॥ hōtā̍ yakṣa̠ddaivyā̠ hōtā̍rā bhi̠ṣajā̠-'śvinā̎ । indra̠-nna jāgṛ̍vī̠ divā̠ nakta̠-nna bhē̍ṣa̠jaiḥ । śūṣa̠gṃ̠ sara̍svatī bhi̠ṣak । sīsē̍na duha indri̠yam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa-tti̠srō dē̠vīrna bhē̍ṣa̠jam । traya̍stri̠dhāta̍vō̠-'pasa̍ḥ । rū̠pamindrē̍ hira̠ṇyaya̎m ॥ 55 ॥

a̠śvinēḍā̠ na bhāra̍tī । vā̠chā sara̍svatī । maha̠ indrā̍ya dadhurindri̠yam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa̠ttvaṣṭā̍ra̠-mindra̍ma̠śvinā̎ । bhi̠ṣaja̠-nna sara̍svatīm । ōjō̠ na jū̠tiri̍ndri̠yam । vṛkō̠ na ra̍bha̠sō bhi̠ṣak । yaśa̠-ssura̍yā bhēṣa̠jam ॥ 56 ॥

śri̠yā na māsa̍ram । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣa̠-dvana̠spati̎m । śa̠mi̠tāragṃ̍ śa̠takra̍tum । bhī̠ma-nna ma̠nyugṃ rājā̍naṃ vyā̠ghra-nnama̍sā̠-'śvinā̠ bhāma̎m । sara̍svatī bhi̠ṣak । indrā̍ya duha indri̠yam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ 57 ॥

hōtā̍ yakṣada̠gnigg​ svāhā-''jya̍sya stō̠kānā̎m । svāhā̠ mēda̍sā̠-mpṛtha̍k । svāhā̠ Chāga̍ma̠śvibhyā̎m । svāhā̍ mē̠ṣagṃ sara̍svatyai । svāhā̍r​ṣa̠bha-mindrā̍ya si̠gṃ̠hāya̠ saha̍sēndri̠yam । svāhā̠-'gni-nna bhē̍ṣa̠jam । svāhā̠ sōma̍mindri̠yam । svāhēndragṃ̍ su̠trāmā̍ṇagṃ savi̠tāra̠ṃ varu̍ṇa-mbhi̠ṣajā̠-mpati̎m । svāhā̠ vana̠spati̍-mpri̠ya-mpāthō̠ na bhē̍ṣa̠jam । svāhā̍ dē̠vāgṃ ā̎jya̠pān ॥ 58 ॥

svāhā̠-'gnigṃ hō̠trājju̍ṣā̠ṇō a̠gni-rbhē̍ṣa̠jam । paya̠-ssōma̍ḥ pari̠srutā̍ ghṛ̠ta-mmadhu̍ । vi̠yantvājya̍sya̠ hōta̠ryaja̍ ॥ hōtā̍ yakṣada̠śvinā̠ sara̍svatī̠mindragṃ̍ su̠trāmā̍ṇam । i̠mē sōmā̎-ssu̠rāmā̍ṇaḥ । Chāgai̠rna mē̠ṣair-ṛ̍ṣa̠bhai-ssu̠tāḥ । śaṣpai̠rna tōkma̍bhiḥ । lā̠jairmaha̍svantaḥ । madā̠ māsa̍rēṇa̠ pari̍ṣkṛtāḥ । śu̠krāḥ paya̍svantō̠-'mṛtā̎ḥ । prasthi̍tā vō madhu̠śchuta̍ḥ । tāna̠śvinā̠ sara̍sva̠tīndra̍-ssu̠trāmā̍ vṛtra̠hā । ju̠ṣantāgṃ̍ sau̠mya-mmadhu̍ । piba̍ntu̠ mada̍ntu vi̠yantu̠ sōma̎m । hōta̠ryaja̍ ॥ 59 ॥
(vī̠ryaṃ - ँvi̠yantvājya̍sya̠ hōta̠ryaja̠ - nāsa̍tyā̠ - sara̍svatī̠ - madhu̍ - hira̠ṇyaya̍ṃ - bhēṣa̠jaṃ - ँvi̠yantvājya̍sya̠ hōta̠ryajā̎ - jya̠pā - na̠mṛtā̠ḥ pañcha̍ cha) (a. 11)

sa̠midhā̠-'gnigṃ ṣaṭ । tanū̠napā̎-thsa̠pta । narā̠śagṃsa̠mṛṣi̍ḥ । i̠ḍēḍi̠tō yavai̍ra̠ṣṭau । ba̠r̠hi-ssa̠pta । durō̠-'śvinā̍ śu̠krannava̍ । su̠pēśa̍sō̠ṣē nakta̠mṛṣi̍ḥ। daivyā̠ hōtā̍rā̠ sīsē̍na̠ rasa̍ḥ । ti̠srastvaṣṭā̍rama̠ṣṭāva̍ṣṭau । vana̠spati̠mṛṣi̍ḥ । a̠gni-ntrayō̍daśa । a̠śvinā̠ dvāda̍śa̠ trayō̍daśa । sa̠midhā̠-'gni-mbada̍rai̠-rbada̍rai̠-ryavai̍ra̠śvinā̠ tviṣi̍ma̠śvinā̠ na bhē̍ṣa̠jagṃ rū̠pama̠śvinā̍ bhī̠ma-mbhāma̎m ।

anuvākaṃ 12 - paśutrayē prayājayājyā āpriyaḥ
sami̍ddhō a̠gnira̍śvinā । ta̠ptō gha̠rmō vi̠rāṭ-thsu̠taḥ । du̠hē dhē̠nu-ssara̍svatī । sōmagṃ̍ śu̠krami̠hēndri̠yam ॥ ta̠nū̠pā bhi̠ṣajā̍ su̠tē । a̠śvinō̠bhā sara̍svatī । maddhvā̠ rajāgṃ̍sīndri̠yam । indrā̍ya pa̠thibhi̍-rvahān ॥ indrā̠yēndu̠gṃ̠ sara̍svatī । narā̠śagṃsē̍na na̠gnahu̍ḥ ॥ 60 ॥

adhā̍tāma̠śvinā̠ madhu̍ । bhē̠ṣa̠ja-mbhi̠ṣajā̍ su̠tē ॥ ā̠juhvā̍nā̠ sara̍svatī । indrā̍yēndri̠yāṇi̍ vī̠rya̎m । iḍā̍bhiraśvinā̠viṣa̎m । samūrja̠gṃ̠ sagṃ ra̠yi-nda̍dhuḥ ॥ aśvi̍nā̠ namu̍chē-ssu̠tam । sōmagṃ̍ śu̠kra-mpa̍ri̠srutā̎ । sara̍svatī̠ tamābha̍rat । ba̠r̠hiṣēndrā̍ya̠ pāta̍vē ॥ 61 ॥

ka̠va̠ṣyō̍ na vyacha̍svatīḥ । a̠śvibhyā̠-nna durō̠ diśa̍ḥ । indrō̠ na rōda̍sī̠ dughē̎ । du̠hē kāmā̠n-thsara̍svatī ॥ u̠ṣāsā̠ nakta̍maśvinā । divēndragṃ̍ sā̠yami̍ndri̠yaiḥ । sa̠jā̠nnā̠nē su̠pēśa̍sā । sama̍ñjātē̠ sara̍svatyā ॥ pā̠ta-nnō̍ aśvinā̠ divā̎ । pā̠hi naktagṃ̍ sarasvati ॥ 62 ॥

daivyā̍ hōtārā bhiṣajā । pā̠tamindra̠gṃ̠ sachā̍ su̠tē ॥ ti̠srastrē̠dhā sara̍svatī । a̠śvinā̠ bhāra̠tīḍā̎ । tī̠vra-mpa̍ri̠srutā̠ sōma̎m । indrā̍ya suṣavu̠rmada̎m ॥ aśvi̍nā bhēṣa̠ja-mmadhu̍ । bhē̠ṣa̠ja-nna̠-ssara̍svatī । indrē̠ tvaṣṭā̠ yaśa̠-śśriya̎m । rū̠pagṃ rū̍pamadhu-ssu̠tē ॥ ṛ̠tu̠thēndrō̠ vana̠spati̍ḥ । śa̠śa̠mā̠naḥ pa̍ri̠srutā̎ । kī̠lāla̍ma̠śvibhyā̠-mmadhu̍ । du̠hē dhē̠nu-ssara̍svatī ॥ gōbhi̠rna sōma̍maśvinā । māsa̍rēṇa pari̠ṣkṛtā̎ । sama̍dhātā̠gṃ̠ sara̍svatyā । svāhēndrē̍ su̠ta-mmadhu̍ ॥ 63 ॥
(na̠gnahu̠ḥ - pāta̍vē - sarasva - tyadhu-ssu̠tē̎-'ṣṭau cha̍) (a. 12)

anuvākaṃ 13 - paśutrayē vapādīnāṃ yājyānuvākyāḥ
a̠śvinā̍ ha̠viri̍ndri̠yam । namu̍chērdhi̠yā sara̍svatī । ā śu̠kramā̍su̠rādva̠su । ma̠ghamindrā̍ya jabhrirē ॥ yama̠śvinā̠ sara̍svatī । ha̠viṣēndra̠-mava̍rdhayann । sa bi̍bhēda ba̠laṃ (va̠laṃ) ma̠gham । namu̍chāvāsu̠rē sachā̎ । tamindra̍-mpa̠śava̠-ssachā̎ ॥ a̠śvinō̠bhā sara̍svatī ॥ 64 ॥

dadhā̍nā a̠bhya̍nūṣata । ha̠viṣā̍ ya̠jñami̍ndri̠yam ॥ ya indra̍ indri̠ya-nda̠dhuḥ । sa̠vi̠tā varu̍ṇō̠ bhaga̍ḥ । sa su̠trāmā̍ ha̠viṣpa̍tiḥ । yaja̍mānāya saśchata ॥ sa̠vi̠tā varu̍ṇō̠ dadha̍t । yaja̍mānāya dā̠śuṣē̎ । āda̍tta̠ namu̍chē̠rvasu̍ । su̠trāmā̠ bala̍mindri̠yam ॥ 65 ॥

varu̍ṇaḥ, kṣa̠trami̍ndri̠yam । bhagē̍na savi̠tā śriya̎m । su̠trāmā̠ yaśa̍sā̠ bala̎m । dadhā̍nā ya̠jñamā̍śata ॥ aśvi̍nā̠ gōbhi̍rindri̠yam । aśvē̍bhi-rvī̠rya̍-mbala̎m । ha̠viṣēndra̠gṃ̠ sara̍svatī । yaja̍māna-mavardhayann ॥ tā nāsa̍tyā su̠pēśa̍sā । hira̍ṇyavartanī̠ narā̎ । sara̍svatī ha̠viṣma̍tī । indra̠ kama̍r​su nō-'vata ॥ tā bhi̠ṣajā̍ su̠karma̍ṇā । sā su̠dughā̠ sara̍svatī । sa vṛ̍tra̠hā śa̠takra̍tuḥ । indrā̍ya dadhurindri̠yam ॥ 66 ॥
(u̠bhā sara̍svatī̠ - bala̍mindri̠yaṃ - narā̠ ṣaṭcha̍) (a. 13)

anuvākaṃ 14 - paśutrayē anūyājapraiṣāḥ
dē̠va-mba̠r̠hi-ssara̍svatī । su̠dē̠vamindrē̍ a̠śvinā̎ । tējō̠ na chakṣu̍ra̠kṣyōḥ । ba̠r̠hiṣā̍ dadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ dē̠vīrdvārō̍ a̠śvinā̎ । bhi̠ṣajēndrē̠ sara̍svatī । prā̠ṇa-nna vī̠rya̍-nna̠si । dvārō̍ dadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ 67 ॥

dē̠vī u̠ṣāsā̍va̠śvinā̎ । bhi̠ṣajēndrē̠ sara̍svatī । bala̠-nna vācha̍mā̠syē̎ । u̠ṣābhyā̎-ndadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ dē̠vī jōṣṭrī̍ a̠śvinā̎ । su̠trāmēndrē̠ sara̍svatī । śrōtra̠-nna karṇa̍yō̠ryaśa̍ḥ । jōṣṭrī̎bhyā-ndadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ 68 ॥

dē̠vī ū̠rjāhu̍tī̠ dughē̍ su̠dughē̎ । paya̠sēndra̠gṃ̠ sara̍svatya̠śvinā̍ bhi̠ṣajā̍-'vata । śu̠kra-nna jyōti̠-sstana̍yō̠rāhu̍tī dhatta indri̠yam । va̠su̠vanē̍ vasu̠dhēya̍sya viyantu̠ yaja̍ ॥ dē̠vā dē̠vānā̎-mbhi̠ṣajā̎ । hōtā̍rā̠vindra̍-ma̠śvinā̎ । va̠ṣa̠ṭkā̠rai-ssara̍svatī । tviṣi̠-nna hṛda̍yē ma̠tim । hōtṛ̍bhyā-ndadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ 69 ॥

dē̠vī-sti̠sra-sti̠srō dē̠vīḥ । sara̍svatya̠śvinā̠ bhāra̠tīḍā̎ । śūṣa̠-nna maddhyē̠ nābhyā̎m । indrā̍ya dadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ dē̠va indrō̠ narā̠śagṃsa̍ḥ । tri̠va̠rū̠tha-ssara̍svatyā̠ 'śvibhyā̍mīyatē̠ ratha̍ḥ । rētō̠ na rū̠pama̠mṛta̍-ñja̠nitra̎m । indrā̍ya̠ tvaṣṭā̠ dadha̍dindri̠yāṇi̍ । va̠su̠vanē̍ vasu̠dhēya̍sya viyantu̠ yaja̍ ॥ 70 ॥

dē̠va indrō̠ vana̠spati̍ḥ । hira̍ṇyaparṇō a̠śvibhyā̎m । sara̍svatyā-ssupippa̠laḥ । indrā̍ya pachyatē̠ madhu̍ । ōjō̠ na jū̠timṛ̍ṣa̠bhō na bhāma̎m । vana̠spati̍rnō̠ dadha̍dindri̠yāṇi̍ । va̠su̠vanē̍ vasu̠dhēya̍sya viyantu̠ yaja̍ ॥ dē̠va-mba̠r̠hirvāri̍tīnām । a̠ddhva̠rē stī̠rṇama̠śvibhyā̎m । ūrṇa̍mradā̠-ssara̍svatyāḥ ॥ 71 ॥

syō̠nami̍ndra tē̠ sada̍ḥ । ī̠śāyai̍ ma̠nyugṃ rājā̍na-mba̠r̠hiṣā̍ dadhurindri̠yam । va̠su̠vanē̍ vasu̠dhēya̍sya viyantu̠ yaja̍ ॥ dē̠vō a̠gni-ssvi̍ṣṭa̠kṛt । dē̠vān.ya̍kṣa-dyathāya̠tham । hōtā̍rā̠-vindra̍ma̠śvinā̎ । vā̠chā vācha̠gṃ̠ sara̍svatīm । a̠gnigṃ sōmagg̍ sviṣṭa̠kṛt । svi̍ṣṭa̠ indra̍-ssu̠trāmā̍ savi̠tā varu̍ṇō bhi̠ṣak । i̠ṣṭō dē̠vō vana̠spati̍ḥ । svi̍ṣṭā dē̠vā ā̎jya̠pāḥ । i̠ṣṭō a̠gnira̠gninā̎ । hōtā̍ hō̠trē svi̍ṣṭa̠kṛt । yaśō̠ na dadha̍dindri̠yam । ūrja̠mapa̍chitigg​ sva̠dhām । va̠su̠vanē̍ vasu̠dhēya̍sya viyantu̠ yaja̍ ॥ 72 ॥
(dvārō̍ dadhurindri̠yaṃ va̍su̠vanē̍ vasu̠dhēya̍sya viyantu̠ yaja̠ - jōṣṭrī̎bhyā-ndadhurindri̠yaṃ va̍su̠vanē̍ vasu̠dhēya̍sya viyantu̠ yaja̠ -hōtṛ̍bhyā-ndadhurindri̠yaṃ va̍su̠vanē̍ vasu̠dhēya̍sya viyantu̠ yajē̎ - ndri̠yāṇi̍ vasu̠vanē̍ vasu̠dhēya̍sya viyantu̠ yaja̠ - sara̍svatyā̠ - vana̠spati̠-ṣṣaṭcha̍) (a. 14)

(dē̠va-mba̠r̠hi-rdē̠vī-rdvārō̍ dē̠vī u̠ṣāsā̍va̠śvinā̍ dē̠vī jōṣṭra̍ dē̠vī ū̠rjāhū̍tī dē̠vā dē̠vānā̎-mbhi̠ṣajā̍ vaṣaṭkā̠rai-rdē̠vīstisrasti̠srō dē̠vī-ssara̍svatī dē̠va indrō̠ narā̠śagṃsō̍ dē̠va indrō̠ vana̠spati̍rdē̠va-mba̠r̠hirvāri̍tīnā-ndē̠vōa̠gni-ssvi̍ṣṭa̠kṛ-ddē̠vān) ।

(sa̠midhā̠-'gni-ndē̠va-mba̠r̠hi-ssara̍svatyā̠śvinā̠ sarva̍ṃ viyantu । dvāra̍sti̠sra-ssaṃrva̍ viyantu । a̠ja indra̠mōjō̠-'gni-mpara̠-ssara̍svatīm । nakta̠mpūrva̠-ssara̍svati । a̠nyatra̠ sara̍svati । bhi̠ṣa-kpūrva̍-nduha indri̠yam । a̠nyatra̍ dadhurindri̠yam । sau̠trā̠ma̠ṇyāgṃ su̍tāsu̠tī । a̠ñjantya̠yaṃ yaja̍mānaḥ)

anuvākaṃ 15 - sūktavākapraiṣaḥ
a̠gnima̠dya hōtā̍ramavṛṇīta । a̠yagṃ su̍tāsu̠tī yaja̍mānaḥ । pacha̍-npa̠ktīḥ । pacha̍-npurō̠ḍāśān̍ । gṛ̠hṇa-ngrahān̍ । ba̠ddhnanna̠śvibhyā̠-ñChāga̠gṃ̠ sara̍svatyā̠ indrā̍ya । ba̠ddhnan-thsara̍svatyai mē̠ṣamindrā̍yā̠śvibhyā̎m । ba̠ddhnannindrā̍yar​ṣa̠bha-ma̠śvibhyā̠gṃ̠ sara̍svatyai । sū̠pa̠sthā a̠dya dē̠vō vana̠spati̍rabhavat । a̠śvibhyā̠-ñChāgē̍na̠ sara̍svatyā̠ indrā̍ya ॥ 73 ॥

sara̍svatyai mē̠ṣēṇēndrā̍yā̠śvibhyā̎m । indrā̍yar​ṣa̠bhēṇā̠śvibhyā̠gṃ̠ sara̍svatyai । akṣa̠gg̠stānmē̍da̠staḥ prati̍ pacha̠tā-'gra̍bhīṣuḥ । avī̍vṛdhanta̠ grahai̎ḥ । apā̍tāma̠śvinā̠ sara̍sva̠tīndra̍-ssu̠trāmā̍ vṛtra̠hā । sōmā̎m-thsu̠rāmṇa̍ḥ । upō̍ ukthāma̠dā-śśrau̠dvimadā̍ adann । avī̍vṛdha-ntāṅgū̠ṣaiḥ । tvāma̠dyar​ṣa̍ ār​ṣēyar​ṣīṇā-nnapādavṛṇīta । a̠yagṃ su̍tāsu̠tī yaja̍mānaḥ । ba̠hubhya̠ āsaṅga̍tēbhyaḥ । ē̠ṣa mē̍ dē̠vēṣu̠ vasu̠ vāryā ya̍kṣyata̠ iti̍ । tā yā dē̠vā dē̍va̠dānā̠nyadu̍ḥ । tānya̍smā̠ ā cha̠ śāsva̍ । ā cha̍ gurasva । i̠ṣi̠taścha̍ hōta̠rasi̍ bhadra̠vāchyā̍ya̠ prēṣi̍tō̠ mānu̍ṣaḥ । sū̠kta̠vā̠kāya̍ sū̠ktā brū̍hi ॥ 74 ॥
(indrā̍ya̠ - yaja̍māna-ssa̠pta cha̍) (a. 15)

anuvākaṃ 16 - pitṛyajñayājyānuvākyāḥ
u̠śanta̍stvā havāmaha u̠śanta̠-ssami̍dhīmahi । u̠śannu̍śa̠ta ā va̍ha pi̠tṝn ha̠viṣē̠ atta̍vē ॥, ā nō̍ agnē sukē̠tunā̎ । ra̠yiṃ vi̠śvāyu̍pōṣasam । mā̠rḍī̠ka-ndhē̍hi jī̠vasē̎ ॥। tvagṃ sō̍ma ma̠hē bhaga̎m । tvaṃ yūna̍ ṛtāya̠tē । dakṣa̍-ndadhāsi jī̠vasē̎ ॥,tvagṃ sō̍ma̠ prachi̍kitō manī̠ṣā tvagṃ raji̍ṣṭha̠manu̍ nēṣi̠ panthā̎m । tava̠ praṇī̍tī pi̠tarō̍ na indō dē̠vēṣu̠ ratna̍ma bhajanta̠ dhīrā̎ḥ ॥। tvayā̠ hi na̍ḥ pi̠tara̍-ssōma̠ pūrvē̠ karmā̍ṇi cha̠kruḥ pa̍vamāna̠ dhīrā̎ḥ । va̠nvannavā̍taḥ pari̠dhīgṃ rapō̎rṇu vī̠rēbhi̠raśvai̎rma̠ghavā̍ bhavā naḥ ॥, tvagṃ sō̍ma pi̠tṛbhi̍-ssaṃvidā̠nō-'nu̠ dyāvā̍pṛthi̠vī ā ta̍tantha । tasmai̍ ta indō ha̠viṣā̍ vidhēma va̠yagg​ syā̍ma̠ pata̍yō rayī̠ṇām ॥ । bar​hi̍ṣadaḥ pitara ū̠tya̍rvāgi̠mā vō̍ ha̠vyā cha̍kṛmā ju̠ṣadhva̎m । ta ā ga̠tā-'va̍sā̠ śa-nta̍mē̠nāthā̠smabhya̠gṃ̠ śaṃ yōra̍ra̠pō da̍dhāta ॥, ā-'ha-mpi̠tṝn-thsu̍vi̠datrāgṃ̍ avithsi̠ napā̍ta-ñcha vi̠krama̍ṇa-ñcha̠ viṣṇō̎ḥ । ba̠r​hi̠ṣadō̠ yē sva̠dhayā̍ su̠tasya̠ bhaja̍nta pi̠tvasta i̠hā-'' ga̍miṣṭhāḥ ॥ । upa̍hūtāḥ pi̠tara̍-ssō̠myāsō̍ bar​hi̠ṣyē̍ṣu ni̠dhiṣu̍ pri̠yēṣu̍ । ta ā ga̍mantu̠ ta i̠ha śru̍va̠ntvadhi̍ bruvantu̠ tē a̍vantva̠smān ॥, agni̍ṣvāttāḥ pitara̠ ēha ga̍chChata̠ sada̍-ssada-ssadata supraṇītayaḥ । a̠ttā ha̠vīgṃṣi̠ praya̍tāni ba̠r̠hiṣyathā̍ ra̠yigṃ sarva̍vīra-ndadhātana ॥ ॥ a̠gni̠ṣvā̠ttānṛ̍tu̠matō̍ havāmahē । narā̠śagṃsē̍ sōmapī̠thaṃ ya ā̠śuḥ । tē nō̠ arva̍nta-ssu̠havā̍ bhavantu । śa-nnō̍ bhavantu dvi̠padē̠ śa-ñchatu̍ṣpadē ॥ yē a̍gniṣvā̠ttā yē-'na̍gniṣvāttāḥ ॥ 75 ॥

a̠gṃ̠hō̠mucha̍ḥ pi̠tara̍-ssō̠myāsa̍ḥ । parē-'va̍rē̠-'mṛtā̍sō̠ bhava̍ntaḥ । adhi̍bruvantu̠ tē a̍vantva̠smān ॥ vā̠nyā̍yai du̠gdhē ju̠ṣamā̍ṇāḥ kara̠mbham । u̠dīrā̍ṇā̠ ava̍rē̠ parē̍ cha । a̠gni̠ṣvā̠ttā ṛ̠tubhi̍-ssaṃvidā̠nāḥ । indra̍vantō ha̠viri̠da-ñju̍ṣantām ॥ yada̍gnē kavyavāhana pi̠tṝn yakṣyṛ̍tā̠vṛdha̍ḥ । pra cha̍ ha̠vyāni̍ vakṣyasi dē̠vēbhya̍ścha pi̠tṛbhya̠ ā ॥, tvama̍gna īḍi̠tō jā̍tavē̠dō-'vā̎ḍḍha̠vyāni̍ sura̠bhīṇi̍ kṛ̠tvā । prādā̎ḥ pi̠tṛbhya̍-ssva̠dhayā̠ tē a̍kṣanna̠ddhi tva-ndē̍va̠ praya̍tā ha̠vīgṃṣi̍ । । māta̍lī ka̠vyairya̠mō aṅgi̍rōbhi̠ rbṛha̠spati̠r-ṛkva̍bhi rvāvṛdhā̠naḥ । yāg​ścha̍ dē̠vā vā̍vṛ̠dhuryē cha̍ dē̠vān-thsvāhā̠-'nyē sva̠dhayā̠-'nyē ma̍danti ॥ ॥ yē tā̍tṛ̠purdē̍va̠trā jēha̍mānāḥ । hō̠trā̠vṛdha̠-sstōma̍taṣṭāsō a̠rkaiḥ । ā-'gnē̍ yāhi suvi̠datrē̍bhira̠rvām । sa̠tyaiḥ ka̠vyaiḥ pi̠tṛbhi̍-rgharma̠sadbhi̍ḥ ॥ ha̠vya̠vāha̍ma̠jara̍-mpurupri̠yam । a̠gni-ṅghṛ̠tēna̍ ha̠viṣā̍ sapa̠ryann । upā̍sada-ṅkavya̠vāha̍-mpitṛ̠ṇām । sa na̍ḥ pra̠jāṃ vī̠rava̍tī̠gṃ̠ samṛ̍ṇvatu ॥ 76 ॥
(ana̍gniṣvāttā̠ - jēha̍mānā-ssa̠pta cha̍) (a. 16)

anuvākaṃ 17 - aindrō paśau ēkādaśa prayājāḥ
hōtā̍ yakṣadi̠ḍaspa̠dē । sa̠mi̠dhā̠na-mma̠hadyaśa̍ḥ । suṣa̍middha̠ṃ varē̎ṇyam । a̠gnimindra̍ṃ vayō̠dhasa̎m । gā̠ya̠trī-ñChanda̍ indri̠yam । tryavi̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa̠chChuchi̍vratam । tanū̠napā̍tamu̠dbhida̎m । ya-ṅgarbha̠madi̍tirda̠dhē ॥ 77 ॥

śuchi̠mindra̍ṃ vayō̠dhasa̎m । u̠ṣṇiha̠-ñChanda̍ indri̠yam । di̠tya̠vāha̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣadī̠ḍēnya̎m । ī̠ḍi̠taṃ vṛ̍tra̠hanta̍mam । iḍā̍bhi̠rīḍya̠gṃ̠ saha̍ḥ । sōma̠mindra̍ṃ vayō̠dhasa̎m । a̠nu̠ṣṭubha̠-ñChanda̍ indri̠yam । tri̠va̠thsa-ṅgāṃ vayō̠ dadha̍t ॥ 78 ॥

vētvājya̍sya̠ hōta̠ryaja̍ ॥ hōtā̍ yakṣa-thsubar​hi̠ṣada̎m । pū̠ṣa̠ṇvanta̠-mama̍rtyam । sīda̍nta-mba̠r̠hiṣi̍ pri̠yē । a̠mṛtēndra̍ṃ vayō̠dhasa̎m । bṛ̠ha̠tī-ñChanda̍ indri̠yam । pañchā̍vi̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa̠-dvyacha̍svatīḥ । su̠prā̠ya̠ṇā ṛ̍tā̠vṛdha̍ḥ ॥ 79 ॥

dvārō̍ dē̠vīr​hi̍ra̠ṇyayī̎ḥ । bra̠hmāṇa̠ indra̍ṃ vayō̠dhasa̎m । pa̠ṅkti-ñChanda̍ i̠hēndri̠yam । tu̠rya̠vāha̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa-thsu̠pēśa̍sē । su̠śi̠lpē bṛ̍ha̠tī u̠bhē । naktō̠ṣāsā̠ na da̍r​śa̠tē । viśva̠mindra̍ṃ vayō̠dhasa̎m । tri̠ṣṭubha̠-ñChanda̍ indri̠yam ॥ 80 ॥

pa̠ṣṭha̠vāha̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa̠-tprachē̍tasā । dē̠vānā̍mutta̠maṃ yaśa̍ḥ । hōtā̍rā̠ daivyā̍ ka̠vī । sa̠yujēndra̍ṃ vayō̠dhasa̎m । jaga̍tī̠-ñChanda̍ i̠hēndri̠yam । a̠na̠ḍvāha̠-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa̠-tpēśa̍svatīḥ ॥ 81 ॥

ti̠srō dē̠vīr​hi̍ra̠ṇyayī̎ḥ । bhāra̍tī-rbṛha̠tīrma̠hīḥ । pati̠mindra̍ṃ vayō̠dhasa̎m । vi̠rāja̠-ñChanda̍ i̠hēndri̠yam । dhē̠nu-ṅgā-nna vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa-thsu̠rēta̍sam । tvaṣṭā̍ra-mpuṣṭi̠vardha̍nam । rū̠pāṇi̠ bibhra̍ta̠-mpṛtha̍k । puṣṭi̠mindra̍ṃ vayō̠dhasa̎m ॥ 82 ॥

dvi̠pada̠-ñChanda̍ i̠hēndri̠yam । u̠kṣāṇa̠-ṅgā-nna vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣachCha̠takra̍tum । hira̍ṇyaparṇa-mu̠kthina̎m । ra̠śa̠nā-mbibhra̍taṃ va̠śim । bhaga̠mindra̍ṃ vayō̠dhasa̎m । ka̠kubha̠-ñChanda̍ i̠hēndri̠yam । va̠śāṃ vē̠hata̠-ṅgā-nna vayō̠ dadha̍t । vētvājya̍sya̠ hōta̠ryaja̍ ॥ hōtā̍ yakṣa̠-thsvāhā̍kṛtīḥ । a̠gni-ṅgṛ̠hapa̍ti̠-mpṛtha̍k । varu̍ṇa-mbhēṣa̠ja-ṅka̠vim । kṣa̠tramindra̍ṃ vayō̠dhasa̎m । ati̍chChandasa̠-ñChanda̍ indri̠yam । bṛ̠hadṛ̍ṣa̠bha-ṅgāṃ vayō̠ dadha̍t । vētvājya̍sya̠ hōta̠ryaja̍ ॥ 83 ॥
(da̠dhē - dadha̍-d- ṛtā̠vṛdha̍ - indri̠yaṃ - pēśa̍svatī--r vayō̠dhasa̠ṃ - ँvētvājya̍sya̠ hōta̠ryaja̍ sa̠pta cha̍) (a. 17)

i̠ḍaspa̠dē̎-'gni-ṅgā̍ya̠trī-ntryavi̎m । śuchi̍vrata̠gṃ̠ śuchi̍mu̠ṣṇiha̍-nditya̠vāha̎m । ī̠ḍēnya̠gṃ̠ sōma̍-mana̠ṣṭubha̍-ntriva̠thsam । su̠ba̠ra̠.hi̠ṣada̍ma̠mṛtēndra̍-mbṛha̠tī-mpañchā̍vim । vyacha̍svatī-ssuprāya̠ṇā dvārō̎ brā̠hmāṇa̍ḥ pā̠ṅktimi̠ha tu̍rya̠vāha̎m । su̠pēśa̍sē̠ viśva̠mindra̍-ntri̠ṣṭubha̍-mpaṣṭha̠vāha̎m । prachē̍tasā sa̠yujēndra̠-ñjaga̍tīmi̠hāna̠ḍvāha̎m । pēśa̍svatīsti̠strō bhāra̍tī̠ḥ pati̍ṃ vi̠rāja̍mi̠ha dhē̠nu-nna । su̠rēta̍sa̠-ntvaṣṭā̍ra̠-mpuṣṭi̍-ndvi̠pada̍mi̠hōkṣāṇa̠-nna । śa̠takra̍tu̠-mbhaga̠mindra̍-ṅka̠kubha̍mi̠ha va̠śāṃ vē̠hata̠-ṅgā-nna । svāhā̍kṛtīḥ, kṣa̠tramati̍chChandasa-mbṛ̠hadṛ̍ṣa̠bha-ṅgāṃ vaya̍ḥ । i̠ndri̠yamuṣi̍vasu̠nava̍da̠śēhē̎mdriya̠maṣṭa̍ nava daśa̠ gā-nna vayō̠ dadha̠-thsarva̍vētu ।

anuvākaṃ 18 - aindrō paśau prayājayājyāḥ
sami̍ddhō a̠gni-ssa̠midhā̎ । suṣa̍middhō̠ varē̎ṇyaḥ । gā̠ya̠trī Chanda̍ indri̠yam । tryavi̠rgaurvayō̍ dadhuḥ ॥ tanū̠napā̠-chChuchi̍vrataḥ । ta̠nū̠napāchcha̠ (ta̠nū̠pāchcha) sara̍svatī । u̠ṣṇikChanda̍ indri̠yam । di̠tya̠vāḍgaurvayō̍ dadhuḥ ॥ iḍā̍bhira̠gnirīḍya̍ḥ । sōmō̍ dē̠vō ama̍rtyaḥ ॥ 84 ॥

a̠nu̠ṣṭupChanda̍ indri̠yam । tri̠va̠thsō gaurvayō̍ dadhuḥ ॥ su̠ba̠r̠hira̠gniḥ pū̍ṣa̠ṇvān । stī̠rṇa-ba̍r​hi̠rama̍rtyaḥ । bṛ̠ha̠tī Chanda̍ indri̠yam । pañchā̍vi̠-rgaurvayō̍ dadhuḥ ॥ durō̍ dē̠vīrdiśō̍ ma̠hīḥ । bra̠hmā dē̠vō bṛha̠spati̍ḥ । pa̠ṅkti-śChanda̍ i̠hēndri̠yam । tu̠rya̠vāḍ gaurvayō̍ dadhuḥ ॥ 85 ॥

u̠ṣē ya̠hvī su̠pēśa̍sā । viśvē̍ dē̠vā ama̍rtyāḥ । tri̠ṣṭu-pChanda̍ indri̠yam । pa̠ṣṭha̠vādgaurvayō̍ dadhuḥ ॥ daivyā̍ hōtārā bhiṣajā । indrē̍ṇa sa̠yujā̍ yu̠jā । jaga̍tī̠ Chanda̍ i̠hēndri̠yam । a̠na̠ḍvān-gaurvayō̍ dadhuḥ ॥ ti̠sra iḍā̠ sara̍svatī । bhāra̍tī ma̠rutō̠ viśa̍ḥ ॥ 86 ॥

vi̠rāṭChanda̍ i̠hēndri̠yam । dhē̠nurgaurna vayō̍ dadhuḥ ॥ tvaṣṭā̍ tu̠rīpō̠ adbhu̍taḥ । i̠ndrā̠gnī pu̍ṣṭi̠vardha̍nā । dvi̠pāchChanda̍ i̠hēndri̠yam । u̠kṣā gaurna vayō̍ dadhuḥ ॥ śa̠mi̠tā nō̠ vana̠spati̍ḥ । sa̠vi̠tā pra̍su̠vanbhaga̎m । ka̠kuchChanda̍ i̠hēndri̠yam । va̠śā vē̠hadgaurna vayō̍ dadhuḥ ॥ svāhā̍ ya̠jñaṃ varu̍ṇaḥ । su̠kṣa̠trō bhē̍ṣa̠ja-ṅka̍rat । ati̍-śChandā̠-śChanda̍ indri̠yam । bṛ̠hadṛ̍ṣa̠bhō gaurvayō̍ dadhuḥ ॥ 87 ॥
(ama̍rtya - sturya̠vāḍgaurvayō̍ dadhu̠--r viśō̍ - va̠śā vē̠hadgaurna vayō̍ dadhuścha̠tvāri̍ cha) (a. 18)

anuvākaṃ 19 - aindrō paśau vapādīnāṃ yajyānuvākyāḥ
va̠sa̠ntēna̠rtunā̍ dē̠vāḥ । vasa̍vastri̠vṛtā̎ stu̠tam । ra̠tha̠nta̠rēṇa̠ tēja̍sā । ha̠virindrē̠ vayō̍ dadhuḥ ॥ grī̠ṣmēṇa̍ dē̠vā ṛ̠tunā̎ । ru̠drāḥ pa̍ñchada̠śē stu̠tam । bṛ̠ha̠tā yaśa̍sā̠ bala̎m । ha̠virindrē̠ vayō̍ dadhuḥ ॥ va̠ra̠.ṣābhi̍r-ṛ̠tunā̍-''di̠tyāḥ । stōmē̍ saptada̠śē stu̠tam ॥ 88 ॥

vai̠rū̠pēṇa̍ vi̠śauja̍sā । ha̠virindrē̠ vayō̍ dadhuḥ ॥ śā̠ra̠dēna̠rtunā̍ dē̠vāḥ । ē̠ka̠vi̠gṃ̠śa ṛ̠bhava̍-sstu̠tam । vai̠rā̠jēna̍ śri̠yā śriya̎m । ha̠virindrē̠ vayō̍ dadhuḥ ॥ hē̠ma̠ntēna̠rtunā̍ dē̠vāḥ । ma̠ruta̍striṇa̠vē stu̠tam । balē̍na̠ śakva̍rī̠-ssaha̍ḥ । ha̠virindrē̠ vayō̍ dadhuḥ ॥ śai̠śi̠rēṇa̠rtunā̍ dē̠vāḥ । tra̠ya̠stri̠gṃ̠śē̍ 'mṛtagg̍ stu̠tam । sa̠tyēna̍ rē̠vatī̎ḥ, kṣa̠tram । ha̠virindrē̠ vayō̍ dadhuḥ ॥ 89 ॥
(stōmē̍ saptada̠śē stu̠tagṃ - sahō̍ ha̠virindrē̠ vayō̍ dadhuścha̠tvāri̍ cha) (a. 19)

(va̠sa̠ntēna̍ grī̠ṣmēṇa̍ va̠r̠ṣābhi̍-śśāra̠dēna̍ hēma̠ntēna̍ śaiśi̠rēṇa̠ ṣaṭ )

anuvākaṃ 20 - aindrō paśau anūyājānā-mmaitrāvariṇapraiṣāḥ
dē̠va-mba̠r̠hirindra̍ṃ vayō̠dhasa̎m । dē̠va-ndē̠vama̍vardhayat । gā̠ya̠tri̠yā Chanda̍sēndri̠yam । tēja̠ indrē̠ vayō̠ dadha̍t । va̠su̠vanē̍ vasu̠dhēya̍sya vētu̠ yaja̍ ॥ dē̠vīrdvārō̍ dē̠vamindra̍ṃ vayō̠dhasa̎m । dē̠vīrdē̠va-ma̍vardhayann । u̠ṣṇihā̠ Chanda̍sēndri̠yam । prā̠ṇamindrē̠ vayō̠ dadha̍t । va̠su̠vanē̍ vasu̠dhēya̍sya viyantu̠ yaja̍ ॥ 90 ॥

dē̠vī dē̠vaṃ va̍yō̠dhasa̎m । u̠ṣē indra̍mavardhatām । a̠nu̠ṣṭubhā̠ Chanda̍sēndri̠yam । vācha̠mindrē̠ vayō̠ dadha̍t । va̠su̠vanē̍ vasu̠dhēya̍sya vītā̠ṃ yaja̍ ॥ dē̠vī jōṣṭrī̍ dē̠vamindra̍ṃ vayō̠dhasa̎m । dē̠vī dē̠vama̍vardhatām । bṛ̠ha̠tyā Chanda̍sēndri̠yam । śrōtra̠mindrē̠ vayō̠ dadha̍t । va̠su̠vanē̍ vasu̠dhēya̍sya vītā̠ṃ yaja̍ ॥ 91 ॥

dē̠vī ū̠rjāhu̍tī dē̠vamindra̍ṃ vayō̠dhasa̎m । dē̠vī dē̠vama̍vardhatām । pa̠ṅktyā Chanda̍sēndri̠yam । śu̠kramindrē̠ vayō̠ dadha̍t । va̠su̠vanē̍ vasu̠dhēya̍sya vītā̠ṃ yaja̍ ॥ dē̠vā daivyā̠ hōtā̍rā dē̠vamindra̍ṃ vayō̠dhasa̎m । dē̠vā dē̠vama̍vardhatām । tri̠ṣṭubhā̠ Chanda̍sēndri̠yam । tviṣi̠mindrē̠ vayō̠ dadha̍t । va̠su̠vanē̍ vasu̠dhēya̍sya vītā̠ṃ yaja̍ ॥ 92 ॥

dē̠vī-sti̠sra-sti̠srō dē̠vīrva̍yō̠dhasa̎m । pati̠mindra̍-mavardhayann । jaga̍tyā̠ Chanda̍sēndri̠yam । bala̠mindrē̠ vayō̠ dadha̍t । va̠su̠vanē̍ vasu̠dhēya̍sya viyantu̠ yaja̍ ॥ dē̠vō narā̠śagṃsō̍ dē̠vamindra̍ṃ vayō̠dhasa̎m । dē̠vō dē̠vama̍vardhayat । vi̠rājā̠ Chanda̍sēndri̠yam । rēta̠ indrē̠ vayō̠ dadha̍t । va̠su̠vanē̍ vasu̠dhēya̍sya vētu̠ yaja̍ ॥ 93 ॥

dē̠vō vana̠spati̍-rdē̠vamindra̍ṃ vayō̠dhasa̎m । dē̠vō dē̠vama̍vardhayat । dvi̠padā̠ Chanda̍sēndri̠yam । bhaga̠mindrē̠ vayō̠ dadha̍t । va̠su̠vanē̍ vasu̠dhēya̍sya vētu̠ yaja̍ ॥ dē̠va-mba̠r̠hirvāri̍tīnā-ndē̠vamindra̍ṃ vayō̠dhasa̎m । dē̠vō (dē̠vaṃ) dē̠vama̍vardhayat । ka̠kubhā̠ Chanda̍sēndri̠yam । yaśa̠ indrē̠ vayō̠ dadha̍t । va̠su̠vanē̍ vasu̠dhēya̍sya vētu̠ yaja̍ ॥ dē̠vō a̠gni-ssvi̍ṣṭa̠kṛ-ddē̠vamindra̍ṃ vayō̠dhasa̎m । dē̠vō dē̠vama̍vardhayat । ati̍chChandasā̠ Chanda̍sēndri̠yam । kṣa̠tramindrē̠ vayō̠ dadha̍t । va̠su̠vanē̍ vasu̠dhēya̍sya vētu̠ yaja̍ ॥ 94 ॥
(vi̠ya̠ntu̠ yaja̍ - vītā̠ṃ yaja̍-vītā̠ṃ yaja̍-vētu̠ yaja̍-vētu̠ yaja̠ pañcha̍ cha) (a. 20)

(dē̠va-mba̠r̠hi-rgā̍yatri̠yā tēja̍ḥ । dē̠vīrdvāra̍ u̠ṣṇihā̎ prā̠ṇam । dē̠vī dē̠vamu̠ṣē a̍nu̠ṣṭubhā̠ vācha̎m । dē̠vī jōṣṭrī̍ bṛha̠tyā śrōtra̎m । dē̠vī ū̠rjāhū̍tī pa̠ṅktyā śu̠kram । dē̠vā daivyā̠ hōtā̍rā tri̠ṣṭubhā̠ tviṣi̎m । dē̠vīsti̠srasti̠srō dē̠vīḥ pati̠-ñjaga̍tyā̠ bala̎m । dē̠vō narā̠śagṃsō̍ vi̠rājā̠ rēta̍ḥ । dē̠vō vana̠spati̍-rdvi̠padā̠ bhaga̎m । dē̠va-mba̠r̠hi-rvāri̍tīnā-ṅka̠kubhā̠ yaśa̍ḥ । dē̠vō a̠gni-ssvi̍ṣṭa̠kṛdati̍chChandasā kṣa̠tram । vē̠tu̠ vi̠ya̠ntu̠ cha̠tu-rvī̍tā̠mēkō̍ viyantu cha̠turvē̍tu । a̠va̠rdha̠ya̠da̠va̠rdha̠ya̠gg̠ ścha̠tura̍vardhatā̠mēkō̍ 'vardhayagg​ ścha̠tura̍vardhayat ।)

(svā̠dvī-ntvā̠ - sōma̠ḥ - surā̍vanta̠gṃ̠ - sīsē̍na - mi̠trō̍-'si̠ - ya-ddē̍vā̠ - hōtā̍ yakṣa-thsa̠midhēndra̠gṃ̠ - sami̍ddha̠ indra̠ - ācha̍r​ṣaṇi̠prā - dē̠va-mba̠r̠hirindragṃ̍ sudē̠vagṃ - hōtā̍ yakṣa-thsa̠midhā̠-'gnigṃ - sami̍ddhō a̠gnira̍śvinā̠ - 'śvinā̍ ha̠viri̍ndri̠yaṃ - dē̠va-mba̠r̠hi-ssara̍sva - tyā̠gnima̠ - dyōśantō̠ - hōtā̍ yakṣadi̠ḍaspa̠dē - sami̍ddhō a̠gni-ssa̠midhā̍ - vasa̠ntēna̍ - dē̠va-mba̠r̠hirindra̍ṃ vayō̠dhasa̍ṃ vigṃśa̠tiḥ)

(svā̠dvī-ntvā-' - mī̍ madanta pi̠tara̠ḥ - sāmrā̎jyāya - pū̠ta-mpa̠vitrē̍ṇē̠ vājya̍ - mu̠ṣāsā̠naktā̠ - bada̍rai̠ - radhā̍tāma̠śvinā̍ - dē̠va indrō̠ vana̠spati̍ḥ - paṣṭha̠vāha̠-ṅgāṃ - dē̠vī dē̠vaṃ va̍yō̠dhasa̠-ñchatu̍rnavatiḥ )

(svā̠dvīntvā̍ - vētu̠ yaja̍)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē dvitīyāṣṭakē ṣaṣṭhaḥ prapāṭhaka-ssamāptaḥ ॥