কৃষ্ণ যজুর্বেদীয তৈত্তিরীয ব্রাহ্মণে কাঠকে তৃতীযঃ প্রশ্নঃ - বৈশ্বসৃজচযনম্
ও-ন্নমঃ পরমাত্মনে, শ্রী মহাগণপতযে নমঃ,
শ্রী গুরুভ্যো নমঃ । হ॒রিঃ॒ ওম্ ॥
চাতুর্হোত্রচযনং-বৈঁশ্বসৃজচযন-ঞ্চ
অনুবাকং 1 - বৈশ্বসৃজচযনাঙ্গভূতাঃ দিবশ্শ্যেনয ইষ্টযঃ
তুভ্য॒-ন্তা অ॑ঙ্গিরস্তম॒ বিশ্বা᳚-স্সুক্ষি॒তযঃ॒ পৃথ॑ক্ । অগ্নে॒ কামা॑য যেমিরে ॥ অ॒শ্যাম॒ ত-ঙ্কাম॑মগ্নে॒ তবো॒ ত্য॑শ্যাম॑ র॒যিগ্ম্ র॑যিব-স্সু॒বীর᳚ম্ । অ॒শ্যাম॒ বাজ॑ম॒ভি বা॒জয॑ন্তো॒ ঽশ্যাম॑ দ্যু॒ম্নম॑জরা॒জর॑-ন্তে ॥ ।
আশা॑না-ন্ত্বা ঽঽশাপা॒লেভ্যঃ॑ । চ॒তুর্ভ্যো॑ অ॒মৃতে᳚ভ্যঃ । ই॒দ-ম্ভূ॒তস্যাধ্য॑ক্ষেভ্যঃ । বি॒ধেম॑ হ॒বিষা॑ ব॒যম্ ॥ বিশ্বা॒ আশা॒ মধু॑না॒ সগ্ম্সৃ॑জামি । অ॒ন॒মী॒বা আপ॒ ওষ॑ধযো ভবন্তু । অ॒যং-যঁজ॑মানো॒ মৃধো॒ ব্য॑স্যতাং অগৃ॑ভীতাঃ প॒শব॑-স্সন্তু॒ সর্বে᳚ ॥ ।
অনু॑ নো॒-ঽদ্যা-ঽনু॑মতির্য॒জ্ঞ-ন্দে॒বেষু॑ মন্যতাম্ । অ॒গ্নিশ্চ॑ হব্য॒বাহ॑নো॒ ভব॑তা-ন্দা॒শুষে॒ মযঃ॑ ॥ অন্বিদ॑নুমতে॒ ত্ব-ম্মন্যা॑সৈ॒ শঞ্চ॑নঃ কৃধি । ক্রত্বে॒ দক্ষা॑য নো হিনু॒ প্রণ॒ আযূগ্ম্॑ষি তারিষঃ ॥ ।
কামো॑ ভূ॒তস্য॒ ভব্য॑স্য । স॒ম্রাডেকো॒ বিরা॑জতি । স ই॒দ-ম্প্রতি॑ পপ্রথে । ঋ॒তূনু-থ্সৃ॑জতে ব॒শী ॥ কাম॒স্তদগ্রে॒ সম॑বর্ত॒তাধি॑ । মন॑সো॒ রেতঃ॑ প্রথ॒মং-যঁদাসী᳚ত্ । স॒তো বন্ধু॒মস॑তি॒ নির॑বিন্দন্ন্ । হৃ॒দি প্র॒তীষ্যা॑ ক॒বযো॑ মনী॒ষা ॥ ।
ব্রহ্ম॑ জজ্ঞা॒ন-ম্প্র॑থ॒ম-ম্পু॒রস্তা॒দ্বি সী॑ম॒ত-স্সু॒রুচো॑ বে॒ন আ॑বঃ । স বু॒ধ্নিযা॑ উপ॒মা অ॑স্য বি॒ষ্ঠা-স্স॒তশ্চ॒ যোনি॒মস॑তশ্চ॒ বিবঃ॑ ॥ পি॒তা বি॒রাজা॑মৃষ॒ভো র॑যী॒ণাম্ । অ॒ন্তরি॑ক্ষং-বিঁ॒শ্বরূ॑প॒ আবি॑বেশ । তম॒র্কৈ-র॒ভ্য॑র্চন্তি ব॒থ্সম্ । ব্রহ্ম॒ সন্ত॒-ম্ব্রহ্ম॑ণা ব॒র্ধয॑ন্তঃ ॥ ।
য॒জ্ঞো রা॒যো য॒জ্ঞ ঈ॑শে॒ বসূ॑নাম্ । য॒জ্ঞ-স্স॒স্যানা॑মু॒ত সু॑ক্ষিতী॒নাম্ । য॒জ্ঞ ই॒ষ্টঃ পূ॒র্বচি॑ত্তি-ন্দধাতু । য॒জ্ঞো ব্র॑হ্ম॒ণ্বাগ্ম্ অপ্যে॑তু দে॒বান্ ॥ অ॒যং-যঁ॒জ্ঞো ব॑র্ধতা॒-ঙ্গোভি॒রশ্বৈঃ᳚ । ই॒যং-বেঁদি॑-স্স্বপ॒ত্যা সু॒বীরা᳚ । ই॒দ-ম্ব॒র্॒হিরতি॑ ব॒র্॒হীগ্ষ্য॒ন্যা । ই॒মং-যঁ॒জ্ঞং-বিঁশ্বে॑ অবন্তু দে॒বাঃ ॥ । আপো॑ ভ॒দ্রা ঘৃ॒তমিদাপ॑ আসুর॒গ্নী-ষোমৌ॑ বিভ্র॒ত্যাপ॒ ই-ত্তাঃ । তী॒ব্রো রসো॑ মধু॒পৃচা॑ মরঙ্গ॒ম আ মা᳚ প্রা॒ণেন॑ স॒হ বর্চ॑সা গন্ন্ ॥ আদি-ত্প॑শ্যাম্যু॒ত বা॑ শৃণো॒ম্যা মা॒ ঘোষো॑ গচ্ছতি॒ বান্ন॑ আসাম্ । মন্যে॑ ভেজা॒নো অ॒মৃত॑স্য॒ তর্হি॒ হির॑ণ্যবর্ণা॒ অতৃ॑পং-যঁ॒দা বঃ॑ ॥ ।
তুভ্য॑-ম্ভরন্তি ক্ষি॒তযো॑ যবিষ্ঠ । ব॒লিম॑গ্নে॒ অন্তি॑ ত॒ ওত দূ॒রাত্ । আ ভন্দি॑ষ্ঠস্য সুম॒তি-ঞ্চি॑কিদ্ধি । বৃ॒হত্তে॑ অগ্নে॒ মহি॒ শর্ম॑ ভ॒দ্রম্ ॥ যো দে॒হ্যো অন॑মযদ্বধ॒স্নৈঃ । যো অর্য॑পত্নী-রু॒ষস॑শ্চ॒কার॑ । স নি॒রুধ্যা॒ নহু॑ষো য॒হ্বো অ॒গ্নিঃ । বিশ॑শ্চক্রে বলি॒হৃত॒-স্সহো॑ভিঃ ॥ ।
পূর্ব॑-ন্দেবা॒ অপ॑রেণা-নু॒পশ্য॒ঞ্জন্ম॑ভিঃ । জন্মা॒ন্যব॑রৈঃ॒ পরা॑ণি । বেদা॑নি দেবা অ॒যম॒স্মীতি॒ মাম্ । অ॒হগ্ম্ হি॒ত্বা শরী॑র-ঞ্জ॒রসঃ॑ প॒রস্তা᳚ত্ ॥ প্রা॒ণা॒পা॒নৌ চক্ষু॒-শ্শ্রোত্র᳚ম্ । বাচ॒-ম্মন॑সি॒ সম্ভৃ॑তাম্ । হি॒ত্বা শরী॑র-ঞ্জ॒রসঃ॑ প॒রস্তা᳚ত্ । আ ভূতি॒-ম্ভূতিং॑-বঁ॒যম॑শ্নবামহৈ ॥ ।
হ॒ব্য॒বাহ॑-মভিমাতি॒ষা-ঽহ᳚ম্ । র॒ক্ষো॒হণ॒-ম্পৃত॑নাসু জি॒ষ্ণুম্ । জ্যোতি॑ষ্মন্ত॒-ন্দীদ্য॑ত॒-ম্পুর॑ন্ধিম্ । অ॒গ্নিগ্গ্ স্বি॑ষ্ট॒কৃত॒মা হু॑বেম ॥ স্বি॑ষ্টমগ্নে অ॒ভি ত-ত্পৃ॑ণাহি । বিশ্বা॑ দেব॒ পৃত॑না অ॒ভিষ্য । উ॒রু-ন্নঃ॒ পন্থা᳚-ম্প্রদি॒শন্বি ভা॑হি । জ্যোতি॑ষ্মদ্ধেহ্য॒জর॑-ন্ন॒ আযুঃ॑ ॥ ॥ 1 ॥
তুভ্য॒-ন্দশ॑ (অ. 1)
অনুবাকং 2 - তাসা-ম্ব্রাহ্মণম্
দে॒বেভ্যো॒ বৈ স্ব॒র্গো লো॒কস্তি॒রো॑-ঽভবত্ ।
তে প্র॒জাপ॑তি-মব্রুবন্ন্ ।
প্রজা॑পতে স্ব॒র্গো বৈ নো॑ লো॒কস্তি॒রো॑-ঽভূত্ । তমন্বি॒চ্ছেতি॑ । তং-যঁ॑জ্ঞক্র॒তুভি॒-রন্বৈ᳚চ্ছত্ । তং-যঁ॑জ্ঞক্র॒তুভি॒-র্নান্ব॑বিন্দত্ ।
তমিষ্টি॑ভি॒-রন্বৈ᳚চ্ছত্ । তমিষ্টি॑ভি॒-রন্ব॑বিন্দত্ ।
তদিষ্টী॑না-মিষ্টি॒ত্বম্ । এষ্ট॑যো হ॒বৈ নাম॑ ।
তা ইষ্ট॑য॒ ইত্যাচ॑ক্ষতে প॒রোক্ষে॑ণ । প॒রোক্ষ॑ প্রিযা ইব॒ হি দে॒বাঃ ॥ 2 ॥
তমাশা᳚-ঽব্রবীত্ । প্রজা॑পত আ॒শযা॒ বৈ শ্রা᳚ম্যসি ।
অ॒হমু॒ বা আশা᳚-ঽস্মি । মা-ন্নু য॑জস্ব ।
অথ॑ তে স॒ত্যা-ঽঽশা॑ ভবিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ । স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ ।
আ॒শাযৈ॑ চ॒রুম্ । অনু॑মত্যৈ চ॒রুম্ । ততো॒ বৈ তস্য॑ স॒ত্যা-ঽঽশা॑ ঽভবত্ । অনু॑ স্ব॒র্গং-লোঁ॒ক-ম॑বিন্দত্ । স॒ত্যা হ॒ বা অ॒স্যাশা॑ ভবতি ।
অনু॑ স্ব॒র্গং-লোঁ॒কং-বিঁ॑ন্দতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ ॥ সো-ঽত্র॑ জুহোতি । অ॒গ্নযে॒ কামা॑য॒ স্বাহা॒-ঽঽশাযৈ॒ স্বাহা᳚ । অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 3 ॥
ত-ঙ্কামো᳚-ঽব্রবীত্ । প্রজা॑পতে॒ কামে॑ন॒ বৈ শ্রা᳚ম্যসি । অ॒হমু॒বৈ কামো᳚-ঽস্মি । মা-ন্নু য॑জস্ব । অথ॑ তে স॒ত্যঃ কামো॑ ভবিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ । স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ । কামা॑য চ॒রুম্ । অনু॑মত্যৈ চ॒রুম্ ।
ততো॒ বৈ তস্য॑ স॒ত্যঃ কামো॑-ঽভবত্ ।
অনু॑ স্ব॒র্গং-লোঁ॒কম॑বিন্দত্ ।
স॒ত্যো হ॒ বা অ॑স্য॒ কামো॑ ভবতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ কামা॑য॒ স্বাহা॒ কামা॑য॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 4 ॥
ত-ম্ব্রহ্মা᳚-ঽব্রবীত্ । প্রজা॑পতে॒ ব্রহ্ম॑ণা॒ বৈশ্রা᳚ম্যসি । অ॒হমু॒ বৈ ব্রহ্মা᳚-ঽস্মি ।
মা-ন্নু য॑জস্ব । অথ॑ তে ব্রহ্ম॒ণ্বান্. য॒জ্ঞো ভ॑বিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ । স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ । ব্রহ্ম॑ণে চ॒রুম্ । অনু॑মত্যৈ চ॒রুম্ । ততো॒ বৈ তস্য॑ ব্রহ্ম॒ণ্বান্. য॒জ্ঞো॑-ঽভবত্ । অনু॑ স্ব॒র্গং-লোঁ॒কম॑বিন্দত্ । ব্র॒হ্ম॒ণ্বান্. হ॒ বা অ॑স্য য॒জ্ঞো ভ॑বতি ।
অনু॑ স্ব॒র্গং-লোঁ॒কং-বিঁ॑ন্দতি । য এ॒তেন॑ হ॒বিষা॒ যজ॑তে । য উ॑চৈনদে॒বং-বেঁদ॑ । সো-ঽত্র॑ জুহোতি । অ॒গ্নযে॒ কামা॑য॒ স্বাহা॒ ব্রহ্ম॑ণে॒ স্বাহা᳚ । অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ । স্ব॒র্গায॑ লো॒কায॒ স্বাহা॒ ঽগ্নযে᳚ স্বিষ্ট॒কৃতে॒ স্বাহেতি॑ ॥ 5 ॥
তং-যঁ॒জ্ঞো᳚-ঽব্রবীত্ । প্রজা॑পতে য॒জ্ঞেন॒ বৈ শ্রা᳚ম্যসি । অ॒হমু॒ বৈ য॒জ্ঞো᳚-ঽস্মি ।
মা-ন্নু য॑জস্ব । অথ॑ তে স॒ত্যো য॒জ্ঞো ভ॑বষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ । য॒জ্ঞায॑ চ॒রুম্ । অনু॑মত্যৈ চ॒রুম্ । ততো॒ বৈ তস্য॑ স॒ত্যো য॒জ্ঞো॑-ঽভবত্ । অনু॑ স্ব॒র্গং-লোঁ॒কম॑বিন্দত্ । স॒ত্যো হ॒ বা অ॑স্য য॒জ্ঞো ভ॑বতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ কামা॑য॒ স্বাহা॑ য॒জ্ঞায॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 6 ॥
তমাপো᳚-ঽব্রুবন্ন্ । প্রজা॑পতে॒-ঽফ্সু বৈ সর্বে॒ কামা᳚-শ্শ্রি॒তাঃ । ব॒যমু॒ বা আপ॑স্স্মঃ । অ॒স্মান্নু য॑জস্ব । অথ॒ ত্বযি॒ সর্বে॒ কামা᳚-শ্শ্রযিষ্যন্তে । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ । অ॒দ্ভ্যশ্চ॒রুম্ ।
অনু॑মত্যৈ চ॒রুম্ । ততো॒ বৈ তস্মি॒ন্-থ্সর্বে॒ কামা॑ অশ্রযন্ত । অনু॑ স্ব॒র্গং-লোঁ॒কম॑বিন্দত্ । সর্বে॑ হ॒ বা অ॑স্মি॒ন্ কামা᳚-শ্শ্রযন্তে । অনু॑ স্ব॒র্গং-লোঁ॒কং-বিঁ॑ন্দতি । য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ কামা॑য॒ স্বাহা॒ ঽদ্ভ্য-স্স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 7 ॥
তম॒গ্নি র্ব॑লি॒মান॑ব্রবীত্ ।
প্রজা॑পতে॒ ঽগ্নযে॒ বৈ ব॑লি॒মতে॒ সর্বা॑ণি ভূ॒তানি॑ ব॒লিগ্ম্ হ॑রন্তি । অ॒হমু॒ বা অ॒গ্নি র্ব॑লি॒মান॑স্মি । মা-ন্নু য॑জস্ব ।
অথ॑ তে॒ সর্বা॑ণি ভূ॒তানি॑ ব॒লিগ্ম্ হ॑রিষ্যন্তি ।
অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ । অ॒গ্নযে॑ বলি॒মতে॑ চ॒রুম্ । অনু॑মত্যৈ চ॒রুম্ । ততো॒ বৈ তস্মৈ॒ সর্বা॑ণি ভূ॒তানি॑ ব॒লি-ম॑হরন্ন্ । অনু॑ স্ব॒র্গং-লোঁ॒কম॑বিন্দত্ । সর্বা॑ণি হ॒ বা অ॑স্মৈ ভূ॒তানি॑ ব॒লিগ্ম্ হ॑রন্তি । অনু॑ স্ব॒র্গং-লোঁ॒কং-বিঁ॑ন্দতি । য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ কামা॑য॒ স্বাহা॒ ঽগ্নযে॑ বলি॒মতে॒ স্বাহা᳚ । অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 8 ॥
তমনু॑বিত্তির-ব্রবীত্ । প্রজা॑পতে স্ব॒র্গং-বৈঁ লো॒কমনু॑-বিবিথ্সসি । অ॒হমু॒ বা অনু॑বিত্তিরস্মি । মা-ন্নু য॑জস্ব । অথ॑ তে স॒ত্যা ঽনু॑বিত্তি-র্ভবিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তম॒গ্নযে॒ কামা॑য পুরো॒ডাশ॑-ম॒ষ্টাক॑পাল॒-ন্নির॑বপত্ ।
অনু॑বিত্ত্যৈ চ॒রুম্ । অনু॑মত্যৈ চ॒রুম্ ।
ততো॒ বৈ তস্য॑ স॒ত্যা ঽনু॑বিত্তিরভবত্ ।
অনু॑ স্ব॒র্গং-লোঁ॒ক-ম॑বিন্দত্ ।
স॒ত্যা হ॒ বা অ॒স্যানু॑বিত্তি-র্ভবতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ কামা॑য॒ স্বাহা-ঽনু॑বিত্ত্যৈ॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 9 ॥
তা বা এ॒তা-স্স॒প্ত স্ব॒র্গস্য॑ লো॒কস্য॒ দ্বারঃ॑ ।
দি॒ব-শ্শ্যে॑ন॒যো ঽনু॑বিত্তযো॒ নাম॑ ।
আশা᳚ প্রথ॒মাগ্ম্ র॑ক্ষতি ।
কামো᳚ দ্বি॒তীযা᳚ম্ । ব্রহ্ম॑ তৃ॒তীযা᳚ম্ । য॒জ্ঞশ্চ॑তু॒র্থীম্ । আপঃ॑ পঞ্চ॒মীম্ ।
অ॒গ্নি র্ব॑লি॒মান্-থ্ষ॒ষ্ঠীম্ । অনু॑বিত্তি-স্সপ্ত॒মীম্ ।
অনু॑ হ॒ বৈ স্ব॒র্গং-লোঁ॒কং-বিঁ॑ন্দতি ।
কা॒ম॒চারো᳚-ঽস্য স্ব॒র্গে লো॒কে ভ॑বতি ।
য এ॒তাভি॒-রিষ্টি॑ভি॒-র্যজ॑তে ।
য উ॑চৈনা এ॒বং-বেঁদ॑ । তাস্ব॑ন্বি॒ষ্টি । প॒ষ্ঠৌ॒হী॒ ব॒রা-ন্দ॑দ্যা-ত্ক॒গ্ম্॒ সঞ্চ॑ ।
স্ত্রিযৈ॑ চাভা॒রগ্ম্ সমৃ॑দ্ধ্যৈ ॥ 10 ॥
অনুবাকং 3 - উপাঘা নামেষ্টযঃ
তপ॑সা দে॒বা দে॒বতা॒-মগ্র॑ আযন্ন্ । তপ॒সর্ষ॑য॒-স্স্ব॑রন্ব॑বিন্দন্ন্ ।
তপ॑সা স॒পত্না॒-ন্প্রণু॑দা॒মারা॑তীঃ ।
যেনে॒দং-বিঁশ্ব॒-ম্পরি॑ভূতং॒-যঁদস্তি॑ ॥
প্র॒থ॒ম॒জ-ন্দে॒বগ্ম্ হ॒বিষা॑ বিধেম । স্ব॒য॒ভু-ম্ব্রহ্ম॑ পর॒ম-ন্তপো॒ যত্ ।
স এ॒ব পু॒ত্র-স্স পি॒তা স মা॒তা ।
তপো॑ হ য॒ক্ষ-ম্প্র॑থ॒মগ্ম্ সম্ব॑ভূব ॥
শ্র॒দ্ধযা দে॑বো দেব॒ত্ব-ম॑শ্নুতে ।
শ্র॒দ্ধা প্র॑তি॒ষ্ঠা লো॒কস্য॑ দে॒বী ॥ 11 ॥
সা নো॑ জুষা॒ণোপ॑ য॒জ্ঞ-মাগা᳚ত্ ।
কাম॑বথ্সা॒ ঽমৃত॒-ন্দুহা॑না ॥
শ্র॒দ্ধা দে॒বী প্র॑থম॒জা ঋ॒তস্য॑ ।
বিশ্ব॑স্য ভ॒র্ত্রী জগ॑তঃ প্রতি॒ষ্ঠা ।
তাগ্ শ্র॒দ্ধাগ্ম্ হ॒বিষা॑ যজামহে ।
সা নো॑ লো॒ক-ম॒মৃত॑-ন্দধাতু ।
ঈশা॑না দে॒বী ভুব॑ন॒স্যাধি॑পত্নী ॥ আগা᳚থ্স॒ত্যগ্ম্ হ॒বিরি॒দ-ঞ্জু॑ষা॒ণম্ ।
যস্মা᳚দ্দে॒বা জ॑জ্ঞিরে॒ ভুব॑নঞ্চ॒ বিশ্বে᳚ ।
তস্মৈ॑ বিধেম হ॒বিষা॑ ঘৃ॒তেন॑ ॥ 12 ॥
যথা॑ দে॒বৈ-স্স॑ধ॒মাদ॑-ম্মদেম ॥
যস্য॑ প্রতি॒ষ্ঠো-র্ব॑ন্তরি॑ক্ষম্ ।
যস্মা᳚দ্দে॒বা জ॑জ্ঞিরে॒ ভুব॑নঞ্চ॒ সর্বে᳚ ।
তথ্স॒ত্য-মর্চ॒দুপ॑য॒জ্ঞ-ন্ন॒ আগা᳚ত্ । ব্রহ্মাহু॑তী॒-রুপ॒মোদ॑মানম্ ॥
মন॑সো॒ বশে॒ সর্ব॑মি॒দ-ম্ব॑ভূব ।
নান্যস্য॒ মনো॒ বশ॒মন্বি॑যায ।
ভী॒ষ্মো হি দে॒ব-স্সহ॑স॒-স্সহী॑যান্ ।
স নো॑ জুষা॒ণ উপ॑ য॒জ্ঞমাগা᳚ত্ ॥
আকূ॑তীনা॒-মধি॑পতি॒-ঞ্চেত॑সা-ঞ্চ ॥ 13 ॥
স॒ঙ্ক॒ল্পজূ॑তি-ন্দে॒বং-বিঁ॑প॒শ্চিম্ ।
মনো॒ রাজা॑নমি॒হ ব॒র্ধয॑ন্তঃ ।
উ॒প॒হ॒বে᳚ ঽস্য সুম॒তৌ স্যা॑ম ॥
চর॑ণ-ম্প॒বিত্রং॒-বিঁত॑ত-ম্পুরা॒ণম্ ।
যেন॑ পূ॒তস্তর॑তি দুষ্কৃ॒তানি॑ ।
তেন॑ প॒বিত্রে॑ণ শু॒দ্ধেন॑ পূ॒তাঃ ।
অতি॑ পা॒প্মান॒-মরা॑তি-ন্তরেম ॥
লো॒কস্য॒ দ্বার॑-মর্চি॒ম-ত্প॒বিত্র᳚ম্ ।
জ্যোতি॑ষ্ম॒-দ্ভ্রাজ॑মান॒-ম্মহ॑স্বত্ । অ॒মৃত॑স্য॒ ধারা॑ বহু॒ধা দোহ॑মানম্ ।
চর॑ণ-ন্নো লো॒কে সুধি॑তা-ন্দধাতু ॥
অ॒গ্নির্মূ॒র্ধা দি॒বঃ ক॒কু-ত্পতিঃ॑ পৃথি॒ব্যা অ॒যম্ । অ॒পাগ্ম্ রেতাগ্ম্॑সি জিন্বতি ॥ ভুবো॑ য॒জ্ঞস্য॒ রজ॑সশ্চ নে॒তা যত্রা॑ নি॒যুদ্ভি॒-স্সচ॑সে শি॒বাভিঃ॑ । দি॒বি মূ॒র্ধান॑-ন্দধিষে সুব॒র্॒ষা-ঞ্জি॒হ্বাম॑গ্নে চকৃষে হব্য॒বাহ᳚ম্ ॥ ॥
অনু॑ নো॒-ঽদ্যা-ঽনু॑মতির্য॒জ্ঞ-ন্দে॒বেষু॑ মন্যতাম্ । অ॒গ্নিশ্চ॑ হব্য॒বাহ॑নো॒ ভব॑তা-ন্দা॒শুষে॒ মযঃ॑ ॥ অন্বিদ॑নুমতে॒ ত্ব-ম্মন্যা॑সৈ॒ শঞ্চ॑নঃ কৃধি । ক্রত্বে॒ দক্ষা॑য নো হিনু॒ প্রণ॒ আযূগ্ম্॑ষি তারিষঃ ॥ ॥
হ॒ব্য॒বাহ॑-মভিমাতি॒ষা-ঽহ᳚ম্ । র॒ক্ষো॒হণ॒-ম্পৃত॑নাসু জি॒ষ্ণুম্ । জ্যোতি॑ষ্মন্ত॒-ন্দীদ্য॑ত॒-ম্পুর॑ন্ধিম্ । অ॒গ্নিগ্গ্ স্বি॑ষ্ট॒কৃত॒মা হু॑বেম ॥ স্বি॑ষ্টমগ্নে অ॒ভি ত-ত্পৃ॑ণাহি । বিশ্বা॑ দেব॒ পৃত॑না অ॒ভিষ্য । উ॒রু-ন্নঃ॒ পন্থা᳚-ম্প্রদি॒শন্বি ভা॑হি । জ্যোতি॑ষ্মদ্ধেহ্য॒জর॑-ন্ন॒ আযুঃ॑ ॥ ॥ 14 ॥
(দে॒বী - ঘৃ॒তেন॒ - চেত॑সা-ঞ্চ॒ - দোহ॑মান-ঞ্চ॒ত্বারি॑ চ) (অ. 3)
অনুবাকং 4 - তাসা-ম্ব্রাহ্মণম্
দে॒বেভ্যো॒ বৈ স্ব॒র্গো লো॒কস্তি॒রো॑ ঽভবত্ ।
তে প্র॒জাপ॑তি-মব্রুবন্ন্ । প্রজা॑পতে স্ব॒র্গো
বৈ নো॑ লো॒কস্তি॒রো॑-ঽভূত্ । তমন্বি॒চ্ছেতি॑ ।
তং-যঁ॑জ্ঞক্র॒তুভি॒-রন্বৈ᳚চ্ছত্ ।
তং-যঁ॑জ্ঞক্র॒তুভি॒ র্নান্ব॑বিন্দত্ ।
তমিষ্টি॑ভি॒-রন্বৈ᳚চ্ছত্ । তমিষ্টি॑ভি॒-রন্ব॑বিন্দত্ । তদিষ্টী॑না-মিষ্টি॒ত্বম্ । এষ্ট॑যো হ॒ বৈ নাম॑ । তা ইষ্ট॑য॒ ইত্যা চ॑ক্ষতে প॒রোক্ষে॑ণ ।
প॒রোক্ষ॑প্রিযা ইব॒ হি দে॒বাঃ ॥ 15 ॥
ত-ন্তপো᳚-ঽ ব্রবীত্ । প্রজা॑পতে॒ তপ॑সা॒ বৈ
শ্রা᳚ম্যসি । অ॒হমু॒ বৈ তপো᳚-ঽ স্মি ।
মা-ন্নু য॑জস্ব ।
অথ॑ তে স॒ত্য-ন্তপো॑ ভবিষ্যতি ।
অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তমা᳚গ্নে॒য-ম॒ষ্টাক॑পাল॒-ন্নির॑বপত্ । তপ॑সে চ॒রুম্ । অনু॑মত্যৈ চ॒রুম্ ।
ততো॒ বৈ তস্য॑ স॒ত্য-ন্তপো॑ ঽভবত্ ।
অনু॑ স্ব॒র্গং-লোঁ॒কম॑বিন্দত্ ।
স॒ত্য গ্ম্ হ॒ বা অ॑স্য॒ তপো॑ ভবতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি । অ॒গ্নযে॒ স্বাহা॒ তপ॑সে॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 16 ॥
তগ্গ্ শ্র॒দ্ধা-ঽব্র॑বীত্ । প্রজা॑পতে শ্র॒দ্ধযা॒ বৈ শ্রা᳚ম্যসি । অ॒হমু॒ বৈ শ্র॒দ্ধা-ঽস্মি॑ । মা-ন্নু য॑জস্ব । অথ॑ তে স॒ত্যা শ্র॒দ্ধা ভ॑বিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তমা᳚-ঽগ্নে॒য-ম॒ষ্টাক॑পাল॒-ন্নির॑বপত্ । শ্র॒দ্ধাযৈ॑ চ॒রুম্ । অনু॑মত্যৈ চ॒রুম্ । ততো॒ বৈ তস্য॑ স॒ত্যা শ্র॒দ্ধা-ঽভ॑বত্ ।
অনু॑ স্ব॒র্গং-লোঁ॒কম॑বিন্দত্ ।
স॒ত্যা হ॒ বা অ॑স্য শ্র॒দ্ধা ভ॑বতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি । অ॒গ্নযে॒ স্বাহা᳚ শ্র॒দ্ধাযৈ॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 17 ॥
তগ্ম্ স॒ত্য-ম॑ব্রবীত্ । প্রজা॑পতে স॒ত্যেন॒ বৈ শ্রা᳚ম্যসি । অ॒হমু॒ বৈ স॒ত্যম॑স্মি । মা-ন্নু য॑জস্ব । অথ॑ তে স॒ত্যগ্ম্ স॒ত্য-ম্ভ॑বিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তমা᳚-ঽগ্নে॒য-ম॒ষ্টাক॑পাল॒-ন্নির॑বপত্ । স॒ত্যায॑ চ॒রুম্ । অনু॑মত্যৈ চ॒রুম্ ।
ততো॒ বৈ তস্য॑ স॒ত্যগ্ম্ স॒ত্যম॑ভবত্ ।
অনু॑ স্ব॒র্গং-লোঁ॒কম॑বিন্দত্ ।
স॒ত্যগ্ম্ হ॒ বা অ॑স্য স॒ত্য-ম্ভ॑বতি ।
অনু॑ স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ স্বাহা॑ স॒ত্যায॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 18 ॥
ত-ম্মনো᳚-ঽব্রবীত্ । প্রজা॑পতে॒ মন॑সা॒ বৈ শ্রা᳚ম্যসি । অ॒হমু॒ বৈ মনো᳚-ঽস্মি ।
মা-ন্নু য॑জস্ব ।
অথ॑ তে স॒ত্য-ম্মনো॑ ভবিষ্যতি ।
অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তমা᳚-ঽগ্নে॒য-ম॒ষ্টাক॑পাল॒-ন্নির॑বপত্ । মন॑সে চ॒রুম্ । অনু॑মত্যৈ চ॒রুম্ । ততো॒ বৈ তস্য॑ স॒ত্য-ম্মনো॑-ঽভবত্ ।
অনু॑ স্ব॒র্গং-লোঁ॒কম॑বিন্দত্ । স॒ত্যগ্ম্ হ॒ বা অ॑স্য॒ মনো॑ ভবতি । অনু॑ স্ব॒র্গং-লোঁ॒কং-বিঁ॑ন্দতি । য এ॒তেন॑ হ॒বিষা॒ যজ॑তে ।
য উ॑চৈন দে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ স্বাহা॒ মন॑সে॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 19 ॥
ত-ঞ্চর॑ণ-মব্রবীত্ । প্রজা॑পতে॒ চর॑ণেন॒ বৈ শ্রা᳚ম্যসি । অ॒হমু॒ বৈ চর॑ণমস্মি । মা-ন্নু য॑জস্ব । অথ॑ তে স॒ত্য-ঞ্চর॑ণ-ম্ভবিষ্যতি । অনু॑ স্ব॒র্গং-লোঁ॒কং-বেঁ॒থ্স্যসীতি॑ ।
স এ॒তমা᳚-ঽগ্নে॒য-ম॒ষ্টাক॑পাল॒-ন্নির॑বপত্ । চর॑ণায চ॒রুম্ । অনু॑মত্যৈ চ॒রুম্ । ততো॒ বৈ তস্য॑ স॒ত্য-ঞ্চর॑ণমভবত্ ।
অনু॑ স্ব॒র্গং-লোঁ॒কম॑বিন্দত্ ।
স॒ত্যগ্ম্ হ॒ বা অ॑স্য॒ চর॑ণ-ম্ভবতি ।
অনু॑স্ব॒র্গং-লোঁ॒কং-বিঁ॑ন্দতি ।
য এ॒তেন॑ হ॒বিষা॒ যজ॑তে ।
য উ॑চৈনদে॒বং-বেঁদ॑ । সো-ঽত্র॑ জুহোতি ।
অ॒গ্নযে॒ স্বাহা॒ চর॑ণায॒ স্বাহা᳚ ।
অনু॑মত্যৈ॒ স্বাহা᳚ প্র॒জাপ॑তযে॒ স্বাহা᳚ ।
স্ব॒র্গায॑ লো॒কায॒ স্বাহা॒-ঽগ্নযে᳚ স্বিষ্ট॒কৃতে॒ স্বাহেতি॑ ॥ 20 ॥
তা বা এ॒তাঃ পঞ্চ॑ স্ব॒র্গস্য॑ লো॒কস্য॒ দ্বারঃ॑ ।
অপা॑ঘা॒ অনু॑বিত্তযো॒ নাম॑ । তপঃ॑ প্রথ॒মাগ্ম্ র॑ক্ষতি । শ্র॒দ্ধা দ্বি॒তীযা᳚ম্ । স॒ত্য-ন্তৃ॒তীযা᳚ম্ ।
মন॑শ্চতু॒র্থীম্ । চর॑ণ-ম্পঞ্চ॒মীম্ ।
অনু॑ হ॒ বৈ স্ব॒র্গং-লোঁ॒কং-বিঁ॑ন্দতি ।
কা॒ম॒চারো᳚-ঽস্য স্ব॒র্গে লো॒কে ভ॑বতি ।
য এ॒তাভি॒-রিষ্টি॑ভি॒-র্যজ॑তে ।
য উ॑চৈনা এ॒বং-বেঁদ॑ ।
অনুবাকং 5 - চাতুর্হোত্রচযনম্
ব্রহ্ম॒ বৈ চতু॑র্হোতারঃ । চতু॑র্হোতৃ॒ভ্যো-ঽধি॑ য॒জ্ঞো নির্মি॑তঃ । নৈনগ্ম্॑ শ॒প্তম্ । নাভিচ॑রিত॒-মাগ॑চ্ছতি । য এ॒বং-বেঁদ॑ ॥
যো হ॒ বৈ চতু॑র্হোতৃণা-ঞ্চতুর্হোতৃ॒ত্বং-বেঁদ॑ । অথো॒ পঞ্চ॑ হোতৃত্বম্ ।
সর্বা॑ হাস্মৈ॒ দিশঃ॑ কল্পন্তে ।
বা॒চস্পতি॒র্॒ হোতা॒ দশ॑হোতৄণাম্ ।
পৃ॒থি॒বী হোতা॒ চতু॑র্হোতৄণাম্ ॥ 22 ॥
অ॒গ্নির্-হোতা॒ পঞ্চ॑হোতৄণাম্ । বাঘোতা॒ ষড্ঢো॑তৄণাম্ ।
ম॒হাহ॑বি॒র্॒ হোতা॑ স॒প্তহো॑তৄণাম্ ।
এ॒তদ্বৈ চতু॑র্হোতৃণা-ঞ্চতুর্হোতৃ॒ত্বম্ ।
অথো॒ পঞ্চ॑হোতৃত্বম্ । সর্বা॑ হাস্মৈ॒ দিশঃ॑ কল্পন্তে । য এ॒বং-বেঁদ॑ ॥
এ॒ষা বৈ স॑র্ব বি॒দ্যা । এ॒ত-দ্ভে॑ষ॒জম্ ।
এ॒ষা প॒ঙ্ক্তি-স্স্ব॒র্গস্য॑ লো॒কস্যা᳚-ঞ্জ॒সায॑নি-স্স্রু॒তিঃ ॥ 23 ॥
এ॒তান্. যো-ঽদ্ধ্যৈ-ত্যছ॑দির্দ॒র্॒শে যাব॑ত্ত॒রস᳚ম্ । স্ব॑রেতি । অ॒ন॒প॒ব্র॒ব-স্সর্ব॒মাযু॑রেতি । বি॒ন্দতে᳚ প্র॒জাম্ । রা॒যস্পোষ॑-ঙ্গৌপ॒ত্যম্ ।
ব্র॒হ্ম॒ব॒র্চ॒সী ভ॑বতি ॥ এ॒তান্. যো-ঽদ্ধ্যৈতি॑ । স্পৃ॒ণোত্যা॒ত্মান᳚ম্ । প্র॒জা-ম্পি॒তৄন্ ॥
এ॒তান্. বা অ॑রু॒ণ ঔ॑পবে॒শি র্বি॒দাঞ্চ॑কার ॥ 24 ॥
এ॒তৈর॑ধিবা॒দমপা॑জযত্ । অথো॒ বিশ্ব॑-ম্পা॒প্মান᳚ম্ । স্ব॑র্যযৌ । এ॒তান্. যো-ঽদ্ধ্যৈতি॑ । অ॒ধি॒বা॒দ-ঞ্জ॑যতি । অথো॒ বিশ্ব॑-ম্পা॒প্মান᳚ম্ । স্ব॑রেতি ॥ এ॒তৈর॒গ্নি-ঞ্চি॑ন্বীত স্ব॒র্গকা॑মঃ ।
এ॒তৈরাযু॑ষ্কামঃ । প্র॒জা প॒শুকা॑মো বা ॥ 25 ॥
পু॒রস্তা॒-দ্দশ॑হোতার॒-মুদ॑ঞ্চ॒-মুপ॑দধাতি যাবত্প॒দম্ । হৃদ॑যং॒-যঁজু॑ষী॒ পত্ন্যৌ॑ চ । দ॒ক্ষি॒ণ॒তঃ প্রাঞ্চ॒-ঞ্চতু॑র্হোতারম্ ।
প॒শ্চাদুদ॑ঞ্চ॒-ম্পঞ্চ॑ হোতারম্ । উ॒ত্ত॒র॒তঃ প্রাঞ্চ॒গ্ম্॒ ষড্ঢো॑তারম্ ।
উ॒পরি॑ষ্টা॒-ত্প্রাঞ্চগ্ম্॑ স॒প্তহো॑তারম্ । হৃদ॑যং॒-যঁজূগ্ম্॑ষি॒ পত্ন্য॑শ্চ ।
য॒থা॒ব॒কা॒শ-ঙ্গ্রহান্॑ । য॒থা॒ব॒কা॒শ-ম্প্র॑তিগ্র॒হান্ ঁলো॑ক-ম্পৃ॒ণাশ্চ॑ ।
সর্বা॑ হাস্যৈ॒তা দে॒বতাঃ᳚ প্রী॒তা অ॒ভীষ্টা॑ ভবন্তি ॥ 26 ॥
সদে॑বম॒গ্নি-ঞ্চি॑নুতে ॥
র॒থস॑মিন্ত-শ্চেত॒ব্যঃ॑ । বজ্রো॒ বৈ রথঃ॑ ।
বজ্রে॑ণৈ॒ব পা॒প্মান॒-ম্ভ্রাতৃ॑ব্যগ্গ্ স্তৃণুতে । প॒ক্ষ-স্স॑মিন্ত-শ্চেত॒ব্যঃ॑ ।
এ॒তাবা॒ন্॒. বৈ রথঃ॑ । যাব॑ত্প॒ক্ষঃ । র॒থস॑মিন্তমে॒ব চি॑নুতে ॥
ই॒মমে॒ব লো॒ক-ম্প॑শুব॒ন্ধেনা॒ভিজ॑যতি ।
অথো॑ অগ্নিষ্টো॒মেন॑ ॥ 27 ॥
অ॒ন্তরি॑ক্ষ-মু॒ক্থ্যে॑ন । স্ব॑রতিরা॒ত্রেণ॑ । সর্বা᳚ন্ ঁলো॒কান॑হী॒নেন॑ । অথো॑ স॒ত্রেণ॑ ॥ বরো॒ দক্ষি॑ণা । বরে॑ণৈ॒ব বরগ্গ্॑ স্পৃণোতি ।
আ॒ত্মা হি বরঃ॑ ॥ এক॑বিগ্ম্শতি॒ র্দক্ষি॑ণা দদাতি ।
এ॒ক॒বি॒গ্ম্॒শো বা ই॒ত-স্স্ব॒র্গো লো॒কঃ । প্রস্ব॒র্গং-লোঁ॒কমা᳚প্নোতি ॥ 28 ॥
অ॒সাবা॑দি॒ত্য এ॑কবি॒গ্ম্॒শঃ । অ॒মুমে॒বা-দি॒ত্যমা᳚প্নোতি ॥ শ॒ত-ন্দ॑দাতি । শ॒তাযুঃ॒ পুরু॑ষ-শ্শ॒তেন্দ্রি॑যঃ । আযু॑ষ্যে॒বেন্দ্রি॒যে প্রতি॑তিষ্ঠতি ॥ স॒হস্র॑-ন্দদাতি ।
স॒হস্র॑ সম্মিত-স্স্ব॒র্গো লো॒কঃ ।
স্ব॒র্গস্য॑ লো॒কস্যা॒-ভিজি॑ত্যৈ ॥ অ॒ন্বি॒ষ্ট॒ক-ন্দক্ষি॑ণা দদাতি । সর্বা॑ণি॒ বযাগ্ম্॑সি ॥ 29 ॥
সর্ব॒স্যাপ্ত্যৈ᳚ । সর্ব॒স্যা-ব॑রুদ্ধ্যৈ ॥ যদি॒ ন বি॒ন্দেত॑ । ম॒ন্থানে॑তাব॒তো দ॑দ্যাদোদ॒নান্. বা᳚ । অ॒শ্নু॒তে ত-ঙ্কাম᳚ম্ । যস্মৈ॒ কামা॑যা॒-গ্নিশ্চী॒যতে᳚ ॥ প॒ষ্ঠৌ॒হী-ন্ত্ব॒ন্তর্ব॑তী-ন্দদ্যাত্ ।
সা হি সর্বা॑ণি॒ বযাগ্ম্॑সি । সর্ব॒স্যাপ্ত্যৈ᳚ । সর্ব॒স্যা-ব॑রুদ্ধ্যৈ ॥ 30 ॥
হির॑ণ্য-ন্দদাতি । হির॑ণ্য-জ্যোতিরে॒ব স্ব॒র্গং-লোঁ॒কমে॑তি ॥ বাসো॑ দদাতি । তেনাযুঃ॒ প্রতি॑রতে ॥ বে॒দি॒তৃ॒তী॒যে য॑জেত । ত্রিষ॑ত্যা॒ হি দে॒বাঃ ।
স স॑ত্যম॒গ্নি-ঞ্চি॑নুতে ॥ তদে॒ত-ত্প॑শুব॒ন্ধে ব্রাহ্ম॑ণ-ম্ব্রূযাত্ । নেত॑রেষু য॒জ্ঞেষু॑ ॥
যো হ॒ বৈ চতু॑র্হোতৄ-ননুসব॒ন-ন্ত॑র্পযিত॒ব্যান্॑. বেদ॑ ॥ 31 ॥
তৃপ্য॑তি প্র॒জযা॑ প॒শুভিঃ॑ ।
উপৈ॑নগ্ম্ সোমপী॒থো ন॑মতি ।
এ॒তে বৈ চতু॑র্হোতারো ঽনুসব॒ন-ন্ত॑র্পযিত॒ব্যাঃ᳚ । যে ব্রা᳚হ্ম॒ণা ব॑হু॒বিদঃ॑ ।
তেভ্যো॒ যদ্দক্ষি॑ণা॒ ন নযে᳚ত্ । দুরি॑ষ্টগ্গ্ স্যাত্ । অ॒গ্নিম॑স্য বৃঞ্জীরন্ন্ ।
তেভ্যো॑ যথা শ্র॒দ্ধ-ন্দ॑দ্যাত্ । স্বি॑ষ্টমে॒বৈতত্ক্রি॑যতে ।
নাস্যা॒গ্নিং-বৃঁ॑ঞ্জতে ॥ 32 ॥
হি॒র॒ণ্যে॒ষ্ট॒কো ভ॑বতি । যাব॑দুত্ত॒ম-ম॑ঙ্গুলি-কা॒ণ্ডং-যঁ॑জ্ঞ প॒রুষা॒ সম্মি॑তম্ ।
তেজো॒ হির॑ণ্যম্ ॥ যদি॒ হির॑ণ্য॒-ন্ন বি॒ন্দেত্ । শর্ক॑রা অ॒ক্তা উপ॑দদ্ধ্যাত্ । তেজো॑ ঘৃ॒তম্ । সতে॑জসমে॒-বাগ্নি-ঞ্চি॑নুতে ॥ অ॒গ্নিঞ্চি॒ত্বা সৌ᳚ত্রাম॒ণ্যা য॑জেত মৈত্রাবরু॒ণ্যা বা᳚ ।
বী॒র্যে॑ণ॒ বা এ॒ষ ব্যৃ॑দ্ধ্যতে ।
যো᳚-ঽগ্নিঞ্চি॑নু॒তে ॥ 33 ॥
যাব॑দে॒ব বী॒র্য᳚ম্ । তদ॑স্মি-ন্দধাতি ॥
ব্রহ্ম॑ণ॒-স্সাযু॑জ্যগ্ম্ সলো॒কতা॑-মাপ্নোতি ।
এ॒তাসা॑মে॒ব দে॒বতা॑না॒গ্ম্॒ সাযু॑জ্যম্ ।
সা॒র্ষ্টিতাগ্ম্॑ সমান লো॒কতা॑-মাপ্নোতি । য এ॒তম॒গ্নি-ঞ্চি॑নু॒তে । য উ॑চৈনমে॒বং-বেঁদ॑ ॥ এ॒তদে॒ব সা॑বি॒ত্রে ব্রাহ্ম॑ণম্ ।
অথো॑ নাচিকে॒তে ॥ 34 ॥
(হোতা॒ চতু॑র্হোতৄণাগ্ - স্রু॒তি - শ্চ॑কার - বা - ভবন্ত্য - গ্নিষ্টো॒মেনা᳚ - প্নোতি॒ - বযাগ্ম্॑সি॒ - বযাগ্ম্॑সি॒ - সর্ব॒স্যাপ্ত্যৈ॒ সর্ব॒স্যাব॑রুদ্ধ্যৈ॒ - বেদ॑ - বৃঞ্জতে - চিনু॒তে - +নব॑ চ) (অ. 5)
অনুবাকং 6 - বৈশ্বসৃজচযনম্
যচ্চা॒মৃতং॒-যঁচ্চ মর্ত্য᳚ম্ । যচ্চ॒ প্রাণি॑তি॒ যচ্চ॒ ন । সর্বা॒স্তা ইষ্ট॑কাঃ কৃ॒ত্বা ।
উপ॑ কাম॒দুঘা॑ দধে । তেনর্ষি॑ণা॒ তেন॒ ব্রহ্ম॑ণা । তযা॑ দে॒বত॑যা-ঽঙ্গির॒স্ব-দ্ধ্রু॒বা সী॑দ ॥ সর্বা॒-স্স্ত্রিয॒-স্সর্বা᳚-ন্পু॒গ্ম্॒সঃ । সর্ব॒-ন্ন স্ত্রী॑-পুমঞ্চ॒ যত্ ।
সর্বা॒স্তাঃ ॥ যাব॑ন্তঃ পা॒গ্ম্॒সবো॒ ভূমেঃ᳚ ॥ 35 ॥
সঙ্খ্যা॑তা দেবমা॒যযা᳚ । সর্বা॒স্তাঃ ॥ যাব॑ন্ত॒ ঊষাঃ᳚ পশূ॒নাম্ । পৃ॒থি॒ব্যা-ম্পুষ্টি॑ র্হি॒তাঃ । সর্বা॒স্তাঃ ॥ যাব॑তী॒-স্সিক॑তা॒-স্সর্বাঃ᳚ ।
অ॒ফ্স্ব॑ন্তশ্চ॒ যা-শ্শ্রি॒তাঃ । সর্বা॒স্তাঃ ॥ যাব॑তী॒-শ্শর্ক॑রা॒ ধৃত্যৈ᳚ । অ॒স্যা-ম্পৃ॑থি॒ব্যামধি॑ ॥ 36 ॥
সর্বা॒স্তাঃ ॥ যাব॒ন্তো-ঽশ্মা॑নো॒-ঽস্যা-ম্পৃ॑থি॒ব্যাম্ । প্র॒তি॒ষ্ঠাসু॒ প্রতি॑ষ্ঠিতাঃ । সর্বা॒স্তাঃ ॥ যাব॑তী র্বী॒রুধ॒-স্সর্বাঃ᳚ ।
বিষ্ঠি॑তাঃ পৃথি॒বীমনু॑ । সর্বা॒স্তাঃ ॥ যাব॑তী॒রোষ॑ধী॒-স্সর্বাঃ᳚ ।
বিষ্ঠি॑তাঃ পৃথি॒বীমনু॑ । সর্বা॒স্তাঃ ॥ 37 ॥
যাব॑ন্তো॒ বন॒স্পত॑যঃ । অ॒স্যা-ম্পৃ॑থি॒ব্যামধি॑ । সর্বা॒স্তাঃ ॥
যাব॑ন্তো গ্রা॒ম্যাঃ প॒শব॒-স্সর্বে᳚ । আ॒র॒ণ্যাশ্চ॒ যে । সর্বা॒স্তাঃ ॥ যে দ্বি॒পাদ॒-শ্চতু॑ষ্পাদঃ । অ॒পাদ॑ উদরস॒র্পিণঃ॑ ।
সর্বা॒স্তাঃ ॥ যাব॒দাঞ্জ॑-নমু॒চ্যতে᳚ ॥ 38 ॥
দে॒ব॒ত্রা যচ্চ॑ মানু॒ষম্ । সর্বা॒স্তাঃ ॥ যাব॑ত্কৃ॒ষ্ণায॑স॒গ্ম্॒ সর্ব᳚ম্ ।
দে॒ব॒ত্রা যচ্চ॑ মানু॒ষম্ । সর্বা॒স্তাঃ ॥
যাব॑ ল্লো॒হায॑স॒গ্ম্॒ সর্ব᳚ম্ ।
দে॒ব॒ত্রা যচ্চ॑ মানু॒ষম্ । সর্বা॒স্তাঃ ॥ সর্ব॒গ্ম্॒ সীস॒গ্ম্॒ সর্ব॒-ন্ত্রপু॑ ।
দে॒ব॒ত্রা যচ্চ॑ মানু॒ষম্ ॥ 39 ॥
সর্বা॒স্তাঃ ॥ সর্ব॒গ্ম্॒ হির॑ণ্যগ্ম্ রজ॒তম্ । দে॒ব॒ত্রা যচ্চ॑ মানু॒ষম্ ।
সর্বা॒স্তাঃ ॥ সর্ব॒গ্ম্॒ সুব॑র্ণ॒গ্ম্॒ হরি॑তম্ । দে॒ব॒ত্রা যচ্চ॑ মানু॒ষম্ ।
সর্বা॒স্তা ইষ্ট॑কাঃ কৃ॒ত্বা । উপ॑কাম॒দুঘা॑ দধে । তেনর্ষি॑ণা॒ তেন॒ ব্রহ্ম॑ণা ।
তযা॑ দে॒বত॑যা-ঽঙ্গির॒স্ব-দ্ধ্রু॒বা সী॑দ ॥ 40 ॥
[ভূমে॒ - রধি॒ - বিষ্ঠি॑তাঃ পৃথি॒বীমনু॒ সর্বা॒স্তা - উ॒চ্যত॑ - মানু॒ষগ্ম্ - সী॑দ ] (অ. 6)
(যচ্চ॒ স্ত্রিযঃ॑ পা॒গ্ম্॒সব॒ ঊষা॒-স্সিক॑তা॒-শ্শর্ক॑রা॒ অশ্মা॑নো বী॒রুধ॒ ওষ॑ধী॒-র্বন॒স্পত॑যো গ্রা॒ম্যা যে দ্বি॒পাদো॒ যাব॒দাঞ্জ॑নং॒-যাঁব॑-ত্কৃ॒ষ্ণায॑সং
ঁলো॒হায॑স॒গ্ম্॒ সীস॒গ্ম্॒ হির॑ণ্য॒গ্ম্॒ সুব॑র্ণ॒গ্ম্॒ হরি॑তম॒ষ্টাদ॑শ)
অনুবাকং 7 - বৈশ্বসৃজচযনম্
সর্বা॒ দিশো॑ দি॒ক্ষু । যচ্চা॒ন্ত র্ভূ॒ত-ম্প্রতি॑ষ্ঠিতম্ । সর্বা॒স্তা ইষ্ট॑কাঃ কৃ॒ত্বা ।
উপ॑ কাম॒দুঘা॑ দধে ।
তেনর্ষি॑ণা॒ তেন॒ ব্রহ্ম॑ণা ।
তযা॑ দে॒বত॑যা-ঽঙ্গির॒স্ব-দ্ধ্রু॒বা সী॑দ ॥
অ॒ন্তরি॑ক্ষঞ্চ॒ কেব॑লম্ ।
যচ্চা॒স্মি-ন্ন॑ন্ত॒রাহি॑তম্ ।
সর্বা॒স্তাঃ ॥ আ॒ন্ত॒রি॒ক্ষ্য॑শ্চ॒ যাঃ প্র॒জাঃ ॥ 41 ॥
গ॒ন্ধ॒র্বা॒-ফ্স॒রস॑শ্চ॒ যে । সর্বা॒স্তাঃ ॥ সর্বা॑-নুদা॒রান্-থ্স॒লিলান্॑ ।
অ॒ন্তরি॑ক্ষে॒ প্রতি॑ষ্ঠিতান্ । সর্বা॒স্তাঃ ॥
সর্বা॑-নুদা॒রান্-থ্স॑লি॒লান্ ।
স্থা॒ব॒রাঃ প্রো॒ষ্যা᳚শ্চ॒ যে । সর্বা॒স্তাঃ ॥ সর্বা॒-ন্ধুনি॒গ্ম্॒ সর্বা᳚ন্-ধ্ব॒গ্ম্॒সান্ ।
হি॒মো যচ্চ॑ শী॒যতে᳚ ॥ 42 ॥
সর্বা॒স্তাঃ ॥ সর্বা॒-ন্মরী॑চী॒ন্॒. বিত॑তান্ । নী॒হা॒রো যচ্চ॑ শী॒যতে᳚ । সর্বা॒স্তাঃ ॥ সর্বা॑ বি॒দ্যুত॒-স্সর্বা᳚ন্-থ্স্তনযি॒ত্নূন্ । হ্রা॒দুনী॒ র্যচ্চ॑ শী॒যতে᳚ । সর্বা॒স্তাঃ ॥ সর্বা॒-স্স্রব॑ন্তী-স্স॒রিতঃ॑ ।
সর্ব॑মফ্সু চ॒রঞ্চ॒ যত্ । সর্বা॒স্তাঃ ॥ 43 ॥
যাশ্চ॒ কূপ্যা॒ যাশ্চ॑ না॒দ্যা᳚-স্সমু॒দ্রিযাঃ᳚ । যাশ্চ॑ বৈশ॒ন্তীরু॒ত প্রা॑স॒চীর্যাঃ ।
সর্বা॒স্তাঃ ॥ যে চো॒ত্তিষ্ঠ॑ন্তি জী॒মূতাঃ᳚ ।
যাশ্চ॒ বর্ষ॑ন্তি বৃ॒ষ্টযঃ॑ । সর্বা॒স্তাঃ ॥ তপ॒স্তেজ॑ আকা॒শম্ । যচ্চা॑কা॒শে প্রতি॑ষ্ঠিতম্ ।
সর্বা॒স্তাঃ ॥ বা॒যুং-বঁযাগ্ম্॑সি॒ সর্বা॑ণি ॥ 44 ॥
অ॒ন্ত॒রি॒ক্ষ॒চ॒রঞ্চ॒ যত্ । সর্বা॒স্তাঃ ॥ অ॒গ্নিগ্ম্ সূর্য॑-ঞ্চ॒ন্দ্রম্ । মি॒ত্রং-বঁরু॑ণ॒-ম্ভগ᳚ম্ । সর্বা॒স্তাঃ ॥ স॒ত্যগ্গ্ শ্র॒দ্ধা-ন্তপো॒ দম᳚ম্ ।
নাম॑ রূ॒পঞ্চ॑ ভূ॒তানা᳚ম্ । সর্বা॒স্তা ইষ্ট॑কাঃ কৃ॒ত্বা । উপ॑ কাম॒দুঘা॑ দধে । তেনর্ষি॑ণা॒ তেন॒ ব্রহ্ম॑ণা ।
তযা॑ দে॒বত॑যা-ঽঙ্গির॒স্ব-দ্ধ্রু॒বা সী॑দ ॥ 45 ॥
(প্র॒জা-হি॒মো যচ্চ॑ শী॒যতে॒-সর্বা॒স্তাঃ-সর্বা॑ণি॒-ব্রহ্ম॒ণৈক॑-ঞ্চ) (অ. 7)
(দিশো॒-ঽন্তরি॑ক্ষমান্তরি॒ক্ষ্য॑ উদা॒রানু॑দা॒রা-ন্ধুনি॒-ম্মরী॑চীন্. বি॒দ্যুতঃ॒
স্রব॑ন্তী॒র্যাশ্চ॒ যে চ॒ তপো॑ বা॒যুম॒গ্নিগ্ম্ স॒ত্য-ম্পঞ্চ॑দশ)
অনুবাকং 8 - বৈশ্বসৃজচযনম্
সর্বা॒-ন্দিব॒গ্ম্॒ সর্বা᳚-ন্দে॒বা-ন্দি॒বি ।
যচ্চা॒ন্ত র্ভূ॒ত-ম্প্রতি॑ষ্ঠিতম্ ।
সর্বা॒স্তা ইষ্ট॑কাঃ কৃ॒ত্বা । উপ॑ কাম॒দুঘা॑ দধে । তেনর্ষি॑ণা॒ তেন॒ ব্রহ্ম॑ণা ।
তযা॑ দে॒বত॑যা-ঽঙ্গির॒স্বদ-ধ্রু॒বা সী॑দ ॥ যাব॑তী॒ স্তার॑কা॒-স্সর্বাঃ᳚ ।
বিত॑তা রোচ॒নে দি॒বি । সর্বা॒স্তাঃ ॥ ঋচো॒ যজূগ্ম্॑ষি॒ সামা॑নি ॥ 46 ॥
অ॒থ॒র্বা॒ঙ্গি॒রস॑শ্চ॒ যে । সর্বা॒স্তাঃ ॥ ই॒তি॒হা॒স॒পু॒রা॒ণঞ্চ॑ ।
স॒র্প॒দে॒ব॒জ॒নাশ্চ॒ যে । সর্বা॒স্তাঃ ॥
যে চ॑ লো॒কা যে চা॑লো॒কাঃ ।
অ॒ন্ত র্ভূ॒ত-ম্প্রতি॑ষ্ঠিতম্ । সর্বা॒স্তাঃ ॥
যচ্চ॒ ব্রহ্ম॒ যচ্চা᳚ব্র॒হ্ম ।
অ॒ন্ত র্ব্র॒হ্ম-ন্প্রতি॑ষ্ঠিতম্ ॥ 47 ॥
সর্বা॒স্তাঃ ॥ অ॒হো॒রা॒ত্রাণি॒ সর্বা॑ণি । অ॒দ্র্ধ॒মা॒সাগ্শ্চ॒ কেব॑লান্ ।
সর্বা॒স্তাঃ ॥ সর্বা॑নৃ॒তূন্-থ্সর্বা᳚-ন্মা॒সান্ । সং॒বঁ॒থ্স॒রঞ্চ॒ কেব॑লম্ ।
সর্বা॒স্তাঃ ॥ সর্ব॒-ম্ভূত॒গ্ম্॒ সর্ব॒-ম্ভব্য᳚ম্ । যচ্চা॒তো-ঽধি॑ ভবি॒ষ্যতি॑ ।
সর্বা॒স্তা ইষ্ট॑কাঃ কৃ॒ত্বা ।
উপ॑ কাম॒দুঘা॑ দধে ।
তেনর্ষি॑ণা॒ তেন॒ ব্রহ্ম॑ণা ।
তযা॑ দে॒বত॑যা-ঽঙ্গির॒স্ব-দ্ধ্রু॒বা সী॑দ ॥ 48 ॥
(সামা॑নি - ব্র॒হ্ম-ন্প্রতি॑ষ্ঠিতং - কৃ॒ত্বা ত্রীণি॑ চ) (অ. 8)
(দিব॒-ন্তার॑কা॒ ঋচ॑ ইতিহাসপুরা॒ণ-ঞ্চ॒ যে চ॒ যচ্চা॑হোরা॒ত্রাণ্যৃ॒তূ-ন্ভূত॒-ন্নব॑)
অনুবাকং 9 - ব্রহ্মা সদস্যাসীনো বৌশ্বসৃজান্ ব্যাচষ্টে
ঋ॒চা-ম্প্রাচী॑ মহ॒তী দিগু॑চ্যতে ।
দক্ষি॑ণা-মাহু॒ র্যজু॑ষামপা॒রাম্ ।
অথ॑র্বণা॒-মগ্ম্ই॑রসা-ম্প্র॒তীচী᳚ ।
সাম্না॒-মুদী॑চী মহ॒তী দিগু॑চ্যতে ॥
ঋ॒গ্ভিঃ পূ᳚র্বা॒হ্ণে দি॒বি দে॒ব ঈ॑যতে ।
য॒জু॒র্বে॒দে তি॑ষ্ঠতি॒ মদ্ধ্যে॒ অহ্নঃ॑ ।
সা॒ম॒বে॒দে-না᳚স্তম॒যে মহী॑যতে ।
বেদৈ॒-রশূ᳚ন্য-স্ত্রি॒ভিরে॑তি॒ সূর্যঃ॑ ॥
ঋ॒গ্ভ্যো জা॒তাগ্ম্ স॑র্ব॒শো মূর্তি॑-মাহুঃ ।
সর্বা॒ গতি॑ র্যাজু॒ষী হৈ॒ব শশ্ব॑ত্ ॥ 49 ॥
সর্ব॒-ন্তেজ॑ স্সামরূ॒প্যগ্ম্ হ॑ শশ্বত্ । সর্বগ্ম্॑ হে॒দ-ম্ব্রহ্ম॑ণা হৈ॒ব সৃ॒ষ্টম্ ॥
ঋ॒গ্ভ্যো জা॒তং-বৈঁশ্যং॒-বঁর্ণ॑-মাহুঃ । য॒জু॒র্বে॒দ-ঙ্ক্ষ॑ত্রি॒যস্যা॑-হু॒র্যোনি᳚ম্ ।
সা॒ম॒বে॒দো ব্রা᳚হ্ম॒ণানা॒-ম্প্রসূ॑তিঃ ।
পূর্বে॒ পূর্বে᳚ভ্যো॒ বচ॑ এ॒ত-দূ॑চুঃ ॥
আ॒দ॒র্॒শ-ম॒গ্নি-ঞ্চি॑ন্বা॒নাঃ ।
পূর্বে॑ বিশ্ব॒ সৃজো॒-ঽমৃতাঃ᳚ ।
শ॒তং-বঁ॑র্ষ সহ॒স্রাণি॑ । দী॒ক্ষি॒তা-স্স॒ত্র-মা॑সত ॥ 50 ॥
তপ॑ আসী-দ্গৃ॒হপ॑তিঃ । ব্রহ্ম॑ ব্র॒হ্মাভ॑ব-থ্স্ব॒যম্ । স॒ত্যগ্ম্ হ॒ হো তৈ॑ষা॒মাসী᳚ত্ ।
য-দ্বি॑শ্ব॒সৃজ॒ আস॑ত ॥
অ॒মৃত॑-মেভ্য॒ উদ॑গাযত্ ।
স॒হস্র॑-ম্পরিবথ্স॒রান্ ।
ভূ॒তগ্ম্ হ॑ প্রস্তো॒ তৈষা॒মাসী᳚ত্ ।
ভ॒বি॒ষ্য-ত্প্রতি॑ চাহরত্ ॥
প্রা॒ণো অ॑দ্ধ্ব॒র্যু-র॑ভবত্ ।
ই॒দগ্ম্ সর্ব॒গ্ম্॒ সিষা॑সতাম্ ॥ 51 ॥
অ॒পা॒নো বি॒দ্বা-না॒বৃতঃ॑ । প্রতি॒ প্রাতি॑ষ্ঠ-দদ্ধ্ব॒রে ॥ আ॒র্ত॒বা উ॑পগা॒তারঃ॑ । স॒দ॒স্যা॑ ঋ॒তবো॑-ঽভবন্ন্ । অ॒র্ধ॒মা॒সাশ্চ॒ মাসা᳚শ্চ । চ॒ম॒সা॒-দ্ধ্ব॒র্য॒বো-ঽভ॑বন্ন্ ॥
অশগ্ম্॑ স॒-দ্ব্রহ্ম॑ণ॒-স্তেজঃ॑ ।
অ॒চ্ছা॒বা॒কো ঽভ॑ব॒-দ্যশঃ॑ ।
ঋ॒ত-মে॑ষা-ম্প্রশা॒স্তা-ঽঽসী᳚ত্ ।
য-দ্বি॑শ্ব॒ সৃজ॒ আস॑ত ॥ 52 ॥
ঊর্গ্-রাজা॑ন॒-মুদ॑বহত্ । ধ্রু॒ব॒ গো॒প-স্সহো॑-ঽভবত্ । ওজো॒-ঽভ্য॑ষ্টৌ॒-দ্গ্রাব্.ণ্ণঃ॑ ।
য-দ্বি॑শ্ব॒ সৃজ॒ আস॑ত ॥
অপ॑চিতিঃ পো॒ত্রীযা॑-মযজত্ । নে॒ষ্ট্রীযা॑-মযজ॒-ত্ত্বিষিঃ॑ । আগ্নী᳚দ্ধ্রা-দ্বি॒দুষী॑ স॒ত্যম্ । শ্র॒দ্ধা হৈ॒বা য॑জ-থ্স্ব॒যম্ ॥ ইরা॒ পত্নী॑ বিশ্ব॒ সৃজা᳚ম্ । আকূ॑তি-রপিনড্ঢ॒বিঃ ॥ 53 ॥
ই॒দ্ধ্মগ্ম্ হ॒ ক্ষুচ্ চৈ᳚ভ্য উ॒গ্রে । তৃ॒ষ্ণা চা ব॑হতামু॒ভে ॥ বাগে॑ষাগ্ম্ সুব্রহ্ম॒ণ্যা-ঽঽসী᳚ত্ । ছ॒ন্দো॒ যো॒গান্. বি॑জান॒তী ।
ক॒ল্প॒ত॒ন্ত্রাণি॑ তন্বা॒না-ঽহঃ॑ । স॒গ্গ্॒স্থাশ্চ॑ সর্ব॒শঃ ॥ অ॒হো॒রা॒ত্রে প॑শুপা॒ল্যৌ । মু॒হূ॒র্তাঃ প্রে॒ষ্যা॑ অভবন্ন্ । মৃ॒ত্যুস্ তদ॑-ভব-দ্ধা॒তা । শ॒মি॒তো গ্রো বি॒শা-ম্পতিঃ॑ ॥ 54 ॥
বি॒শ্ব॒সৃজঃ॑ প্রথ॒মা-স্স॒ত্র-মা॑সত । স॒হস্র॑ সম॒-ম্প্রসু॑তেন॒ যন্তঃ॑ ।
ততো॑ হ জজ্ঞে॒ ভুব॑নস্য গো॒পাঃ । হি॒র॒ণ্ময॑-শ্শ॒কুনি॒ র্ব্রহ্ম॒ নাম॑ ॥ যেন॒ সূর্য॒-স্তপ॑তি॒ তেজ॑সে॒-দ্ধঃ । পি॒তা পু॒ত্রেণ॑ পিতৃ॒মান্. যোনি॑যোনৌ । নাবে॑দবি-ন্মনুতে॒ ত-ম্বৃ॒হন্ত᳚ম্ । স॒র্বা॒নু॒ভু-মা॒ত্মানগ্ম্॑ সম্পরা॒যে ॥
এ॒ষ নি॒ত্যো ম॑হি॒মা ব্রা᳚হ্ম॒ণস্য॑ ।
ন কর্ম॑ণা বর্ধতে॒ নো কনী॑যান্ ॥ 55 ॥
তস্যৈ॒বাত্মা প॑দ॒বিত্তং-বিঁ॑দিত্বা ।
ন কর্ম॑ণা লিপ্যতে॒ পাপ॑কেন ॥
পঞ্চ॑পঞ্চা॒শত॑-স্ত্রি॒বৃত॑-স্সংবঁথ্স॒রাঃ ।
পঞ্চ॑পঞ্চা॒শতঃ॑ পঞ্চদ॒শাঃ । পঞ্চ॑পঞ্চা॒শত॑-স্সপ্তদ॒শাঃ ।
পঞ্চ॑পঞ্চা॒শত॑ একবি॒গ্ম্॒শাঃ ।
বি॒শ্ব॒সৃজাগ্ম্॑ স॒হস্র॑ সংবঁথ্সরম্ ॥
এ॒তেন॒ বৈ বি॑শ্ব॒সৃজ॑ ই॒দং-বিঁশ্ব॑-মসৃজন্ত । য-দ্বিশ্ব॒-মসৃ॑জন্ত । তস্মা᳚-দ্বিশ্ব॒সৃজঃ॑ ॥
বিশ্ব॑-মেনা॒-ননু॒ প্রজা॑যতে । ব্রহ্ম॑ণ॒-স্সাযু॑জ্যগ্ম্ সলো॒কতাং᳚-যঁন্তি ।
এ॒তাসা॑মে॒ব দে॒বতা॑না॒গ্ম্॒ সাযু॑জ্যম্ । সা॒র্ষ্টিতাগ্ম্॑ সমান লো॒কতাং᳚-যঁন্তি ।
য এ॒ত-দু॑প॒যন্তি॑ । যে চৈ॑ন॒-ত্প্রাহুঃ॑ ।
যেভ্য॑-শ্চৈন॒-ত্প্রাহুঃ॑ ॥
ওম্ ॥ 56 ॥
(শশ্ব॑ - দাসত॒ - সিষা॑সতা॒ - মাস॑ত - হ॒বিষ্ - পতিঃ॒ - কনী॑যা॒ন্ - তস্মা᳚-দ্বিশ্ব॒সৃজো॒-ঽষ্টৌ চ॑) (অ. 9)
(তুভ্যং॑ - দে॒বেভ্য॒ - স্তপ॑সা - দে॒বেভ্যো॒ - ব্রহ্ম॒ বৈ চতু॑র্হোতারো॒ - যচ্চা॒মৃত॒গ্ম্॒ - সর্বা॒ দিশো॑ দি॒ক্ষু - সর্বা॒-ন্দিব॑ - মৃ॒চা-ম্প্রাচী॒ নব॑)
(তুভ্যং॒ - তপ॑সা॒ - তা বা এ॒তাঃ পঞ্চ॒ - হির॑ণ্য-ন্দদাতি॒ - সর্বা॒ দিশ॒ - স্তপ॑ আসীদ্গৃ॒হপ॑তি॒-ষ্ষট্প॑ঞ্চা॒শত্)
(তুভ্য॒-মোং)
॥ হরিঃ॑ ওম্ ॥
॥ তৈত্তিরীয যজুর্ব্রাহ্মণে কাঠকে তৃতীয প্রশ্ন-স্সমাপ্তঃ ॥
॥ ইতি তৈত্তিরীয যজুর্ব্রাহ্মণে কাঠকং সমাপ্তম্ ॥
