𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌸𑌪𑍍𑌤𑌮𑌃 𑌪𑍍𑌰𑌪𑌾𑌠𑌕𑌃 - 𑌸𑌵𑌾 𑌏𑌕𑌾𑌹𑌵𑌿𑌶𑍇𑌷𑌾𑌃

𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,
𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥

2.𑍭.1 𑌅𑌨𑍁𑌵𑌾𑌕𑌂 - 𑌬𑍃𑌹𑌸𑍍𑌪𑌤𑌿𑌸𑌵𑌃

𑌤𑍍𑌰𑌿॒𑌵𑍃-𑌥𑍍𑌸𑍍𑌤𑍋𑌮𑍋॑ 𑌭𑌵𑌤𑌿 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌂-𑌵𑍈𑌁 𑌤𑍍𑌰𑌿॒𑌵𑍃𑌤𑍍 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌅॒𑌗𑍍𑌨𑌿॒𑌷𑍍𑌟𑍋॒𑌮-𑌸𑍍𑌸𑍋𑌮𑍋॑ 𑌭𑌵𑌤𑌿 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌂-𑌵𑌾𑌁 𑌅॑𑌗𑍍𑌨𑌿𑌷𑍍𑌟𑍋॒𑌮𑌃 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌰॒𑌥॒𑌤𑌂𑌰॒𑌗𑍍​𑌮𑍍 𑌸𑌾𑌮॑ 𑌭𑌵𑌤𑌿 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌂-𑌵𑍈𑌁 𑌰॑𑌥𑌨𑍍𑌤॒𑌰𑌮𑍍 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌪॒𑌰𑌿॒𑌸𑍍𑌰॒𑌜𑍀 𑌹𑍋𑌤𑌾॑ 𑌭𑌵𑌤𑌿 ॥ 1 ॥

𑌅॒𑌰𑍁॒𑌣𑍋 𑌮𑌿॑𑌰𑍍𑌮𑌿॒𑌰𑌸𑍍𑌤𑍍𑌰𑌿𑌶𑍁॑𑌕𑍍𑌰𑌃 । 𑌏॒𑌤-𑌦𑍍𑌵𑍈 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑌸𑍍𑌯॑ 𑌰𑍂॒𑌪𑌮𑍍 । 𑌰𑍂॒𑌪𑍇𑌣𑍈॒𑌵 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑌮𑌵॑𑌰𑍁𑌨𑍍𑌧𑍇 ॥ 𑌬𑍃𑌹॒𑌸𑍍𑌪𑌤𑌿॑-𑌰𑌕𑌾𑌮𑌯𑌤 𑌦𑍇॒𑌵𑌾𑌨𑌾᳚-𑌮𑍍𑌪𑍁𑌰𑍋॒𑌧𑌾-𑌙𑍍𑌗॑𑌚𑍍𑌛𑍇𑌯॒𑌮𑌿𑌤𑌿॑ । 𑌸 𑌏॒𑌤-𑌮𑍍𑌬𑍃॑𑌹𑌸𑍍𑌪𑌤𑌿𑌸॒𑌵𑌮॑𑌪𑌶𑍍𑌯𑌤𑍍 । 𑌤𑌮𑌾-𑌽𑌹॑𑌰𑌤𑍍 । 𑌤𑍇𑌨𑌾॑𑌯𑌜𑌤 । 𑌤𑌤𑍋॒ 𑌵𑍈 𑌸 𑌦𑍇॒𑌵𑌾𑌨𑌾᳚-𑌮𑍍𑌪𑍁𑌰𑍋॒𑌧𑌾-𑌮॑𑌗𑌚𑍍𑌛𑌤𑍍 । 𑌯𑌃 𑌪𑍁॑𑌰𑍋॒𑌧𑌾𑌕𑌾॑𑌮॒-𑌸𑍍𑌸𑍍𑌯𑌾𑌤𑍍 । 𑌸 𑌬𑍃॑𑌹𑌸𑍍𑌪𑌤𑌿𑌸॒𑌵𑍇𑌨॑ 𑌯𑌜𑍇𑌤 ॥ 2 ॥

𑌪𑍁॒𑌰𑍋॒𑌧𑌾𑌮𑍇॒𑌵 𑌗॑𑌚𑍍𑌛𑌤𑌿 ॥ 𑌤𑌸𑍍𑌯॑ 𑌪𑍍𑌰𑌾𑌤𑌸𑍍𑌸𑌵॒𑌨𑍇 𑌸॒𑌨𑍍𑌨𑍇𑌷𑍁॑ 𑌨𑌾𑌰𑌾𑌶॒𑌗𑍍​𑌮𑍍॒𑌸𑍇𑌷𑍁॑ । 𑌏𑌕𑌾॑𑌦𑌶॒ 𑌦𑌕𑍍𑌷𑌿॑𑌣𑌾 𑌨𑍀𑌯𑌨𑍍𑌤𑍇 । 𑌏𑌕𑌾॑𑌦𑌶॒ 𑌮𑌾𑌦𑍍𑌧𑍍𑌯॑𑌦𑌿𑌨𑍍𑌨𑍇॒ 𑌸𑌵॑𑌨𑍇 𑌸॒𑌨𑍍𑌨𑍇𑌷𑍁॑ 𑌨𑌾𑌰𑌾𑌶॒𑌗𑍍​𑌮𑍍॒𑌸𑍇𑌷𑍁॑ । 𑌏𑌕𑌾॑𑌦𑌶 𑌤𑍃𑌤𑍀𑌯𑌸𑌵॒𑌨𑍇 𑌸॒𑌨𑍍𑌨𑍇𑌷𑍁॑ 𑌨𑌾𑌰𑌾𑌶॒𑌗𑍍​𑌮𑍍॒𑌸𑍇𑌷𑍁॑ । 𑌤𑍍𑌰𑌯॑𑌸𑍍𑌤𑍍𑌰𑌿𑌗𑍍​𑌮𑍍𑌶॒-𑌥𑍍𑌸𑌮𑍍𑌪॑𑌦𑍍𑌯𑌨𑍍𑌤𑍇 । 𑌤𑍍𑌰𑌯॑𑌸𑍍𑌤𑍍𑌰𑌿𑌗𑍍​𑌮𑍍𑌶॒-𑌦𑍍𑌵𑍈 𑌦𑍇॒𑌵𑌤𑌾𑌃᳚ । 𑌦𑍇॒𑌵𑌤𑌾॑ 𑌏॒𑌵𑌾𑌵॑𑌰𑍁𑌨𑍍𑌧𑍇 ॥ 𑌅𑌶𑍍𑌵॑𑌶𑍍𑌚𑌤𑍁𑌸𑍍𑌤𑍍𑌰𑌿॒𑌗𑍍​𑌮𑍍॒𑌶𑌃 । 𑌪𑍍𑌰𑌾॒𑌜𑌾॒𑌪॒𑌤𑍍𑌯𑍋 𑌵𑌾 𑌅𑌶𑍍𑌵𑌃॑ ॥ 3 ॥

𑌪𑍍𑌰॒𑌜𑌾𑌪॑𑌤𑌿-𑌶𑍍𑌚𑌤𑍁𑌸𑍍𑌤𑍍𑌰𑌿॒𑌗𑍍​𑌮𑍍॒𑌶𑍋 𑌦𑍇॒𑌵𑌤𑌾॑𑌨𑌾𑌮𑍍 । 𑌯𑌾𑌵॑𑌤𑍀𑌰𑍇॒𑌵 𑌦𑍇॒𑌵𑌤𑌾𑌃᳚ । 𑌤𑌾 𑌏॒𑌵𑌾𑌵॑𑌰𑍁𑌨𑍍𑌧𑍇 ॥ 𑌕𑍃॒𑌷𑍍𑌣𑌾॒𑌜𑌿॒𑌨𑍇॑ 𑌽𑌭𑌿𑌷𑌿॑𑌞𑍍𑌚𑌤𑌿 । 𑌬𑍍𑌰𑌹𑍍𑌮॑𑌣𑍋॒ 𑌵𑌾 𑌏॒𑌤-𑌦𑍍𑌰𑍂॒𑌪𑌮𑍍 । 𑌯-𑌤𑍍𑌕𑍃॑𑌷𑍍𑌣𑌾𑌜𑌿॒𑌨𑌮𑍍 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑍇𑌨𑍈॒𑌵𑍈𑌨॒𑌗𑍍​𑌮𑍍॒ 𑌸𑌮॑𑌰𑍍𑌧𑌯𑌤𑌿 ॥ 𑌆𑌜𑍍𑌯𑍇॑𑌨𑌾॒𑌭𑌿𑌷𑌿॑𑌞𑍍𑌚𑌤𑌿 । 𑌤𑍇𑌜𑍋॒ 𑌵𑌾 𑌆𑌜𑍍𑌯᳚𑌮𑍍 । 𑌤𑍇𑌜॑ 𑌏॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 ॥ 4 ॥
(𑌹𑍋𑌤𑌾॑ 𑌭𑌵𑌤𑌿 - 𑌯𑌜𑍇𑌤॒ - 𑌵𑌾 𑌅𑌶𑍍𑌵𑍋॑ - 𑌦𑌧𑌾𑌤𑌿) (𑌅. 1)

2.𑍭.2 𑌅𑌨𑍁𑌵𑌾𑌕𑌂 - 𑌵𑍈𑌶𑍍𑌯𑌸𑌵𑌃
𑌯𑌦𑌾᳚𑌗𑍍𑌨𑍇॒𑌯𑍋 𑌭𑌵॑𑌤𑌿 । 𑌅॒𑌗𑍍𑌨𑌿𑌮𑍁॑𑌖𑌾॒ 𑌹𑍍𑌯𑍃𑌦𑍍𑌧𑌿𑌃॑ ॥ 𑌅𑌥॒ 𑌯-𑌤𑍍𑌪𑍌॒𑌷𑍍𑌣𑌃 । 𑌪𑍁𑌷𑍍𑌟𑌿॒𑌰𑍍𑌵𑍈 𑌪𑍂॒𑌷𑌾 । 𑌪𑍁𑌷𑍍𑌟𑌿॒-𑌰𑍍𑌵𑍈𑌶𑍍𑌯॑𑌸𑍍𑌯 । 𑌪𑍁𑌷𑍍𑌟𑌿॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌪𑍍𑌰॒𑌸॒𑌵𑌾𑌯॑ 𑌸𑌾𑌵𑌿॒𑌤𑍍𑌰𑌃 ॥ 𑌅𑌥॒ 𑌯-𑌤𑍍𑌤𑍍𑌵𑌾॒𑌷𑍍𑌟𑍍𑌰𑌃 । 𑌤𑍍𑌵𑌷𑍍𑌟𑌾॒ 𑌹𑌿 𑌰𑍂॒𑌪𑌾𑌣𑌿॑ 𑌵𑌿𑌕॒𑌰𑍋𑌤𑌿॑ ॥ 𑌨𑌿॒𑌰𑍍𑌵॒𑌰𑍁॒𑌣॒𑌤𑍍𑌵𑌾𑌯॑ 𑌵𑌾𑌰𑍁॒𑌣𑌃 ॥ 5 ॥

𑌅𑌥𑍋॒ 𑌯 𑌏॒𑌵 𑌕𑌶𑍍𑌚॒ 𑌸𑌨𑍍​𑌥𑍍𑌸𑍂॒𑌯𑌤𑍇᳚ । 𑌸 𑌹𑌿 𑌵𑌾॑𑌰𑍁॒𑌣𑌃 ॥ 𑌅𑌥॒ 𑌯-𑌦𑍍𑌵𑍈᳚𑌶𑍍𑌵𑌦𑍇॒𑌵𑌃 । 𑌵𑍈॒𑌶𑍍𑌵॒𑌦𑍇॒𑌵𑍋 𑌹𑌿 𑌵𑍈𑌶𑍍𑌯𑌃॑ ॥ 𑌅𑌥॒ 𑌯-𑌨𑍍𑌮𑌾॑𑌰𑍁॒𑌤𑌃 । 𑌮𑌾॒𑌰𑍁॒𑌤𑍋 𑌹𑌿 𑌵𑍈𑌶𑍍𑌯𑌃॑ ॥ 𑌸॒𑌪𑍍𑌤𑍈𑌤𑌾𑌨𑌿॑ 𑌹॒𑌵𑍀𑌗𑍍​𑌮𑍍𑌷𑌿॑ 𑌭𑌵𑌨𑍍𑌤𑌿 । 𑌸॒𑌪𑍍𑌤𑌗॑𑌣𑌾॒ 𑌵𑍈 𑌮॒𑌰𑍁𑌤𑌃॑ ॥ 𑌪𑍃𑌶𑍍𑌨𑌿𑌃॑ 𑌪𑌷𑍍𑌠𑍌॒𑌹𑍀 𑌮𑌾॑𑌰𑍁॒𑌤𑍍𑌯𑌾𑌲॑𑌭𑍍𑌯𑌤𑍇 । 𑌵𑌿𑌡𑍍𑌵𑍈 𑌮॒𑌰𑍁𑌤𑌃॑ ॥ 𑌵𑌿𑌶॑ 𑌏॒𑌵𑍈𑌤-𑌨𑍍𑌮॑𑌦𑍍𑌧𑍍𑌯॒𑌤𑍋॑-𑌽𑌭𑌿𑌷𑌿॑𑌚𑍍𑌯𑌤𑍇 । 𑌤𑌸𑍍𑌮𑌾॒-𑌦𑍍𑌵𑌾 𑌏॒𑌷 𑌵𑌿॒𑌶𑌃 𑌪𑍍𑌰𑌿॒𑌯𑌃 । 𑌵𑌿॒𑌶𑍋 𑌹𑌿 𑌮॑𑌦𑍍𑌧𑍍𑌯॒𑌤𑍋॑-𑌽𑌭𑌿𑌷𑌿॒𑌚𑍍𑌯𑌤𑍇᳚ ॥ 𑌋॒𑌷॒𑌭॒𑌚॒𑌰𑍍𑌮𑍇-𑌽𑌦𑍍𑌧𑍍𑌯॒𑌭𑌿𑌷𑌿॑𑌞𑍍𑌚𑌤𑌿 । 𑌸 𑌹𑌿 𑌪𑍍𑌰॑𑌜𑌨𑌯𑌿॒𑌤𑌾 ॥ 𑌦॒𑌦𑍍𑌧𑍍𑌨𑌾-𑌽𑌭𑌿𑌷𑌿॑𑌞𑍍𑌚𑌤𑌿 । 𑌊𑌰𑍍𑌗𑍍𑌵𑌾 𑌅॒𑌨𑍍𑌨𑌾𑌦𑍍𑌯॒-𑌨𑍍𑌦𑌧𑌿॑ । 𑌊॒𑌰𑍍𑌜𑍈𑌵𑍈𑌨॑-𑌮॒𑌨𑍍𑌨𑌾𑌦𑍍𑌯𑍇॑𑌨॒ 𑌸𑌮॑𑌰𑍍𑌧𑌯𑌤𑌿 ॥ 6 ॥
(𑌵𑌾॒𑌰𑍁॒𑌣𑍋 - 𑌵𑌿𑌡𑍍𑌵𑍈 𑌮॒𑌰𑍁𑌤𑍋॒-𑌽𑌷𑍍𑌟𑍌 𑌚॑) (𑌅. 2)

𑌅𑌨𑍁𑌵𑌾𑌕𑌂 3 - 𑌬𑍍𑌰𑌾𑌹𑍍𑌮𑌣𑌸𑌵𑌃
𑌯𑌦𑌾᳚𑌗𑍍𑌨𑍇॒𑌯𑍋 𑌭𑌵॑𑌤𑌿 । 𑌆॒𑌗𑍍𑌨𑍇॒𑌯𑍋 𑌵𑍈 𑌬𑍍𑌰𑌾᳚𑌹𑍍𑌮॒𑌣𑌃 ॥ 𑌅𑌥॒ 𑌯-𑌥𑍍𑌸𑍌॒𑌮𑍍𑌯𑌃 । 𑌸𑍌॒𑌮𑍍𑌯𑍋 𑌹𑌿 𑌬𑍍𑌰𑌾᳚𑌹𑍍𑌮॒𑌣𑌃 ॥ 𑌪𑍍𑌰॒𑌸॒𑌵𑌾𑌯𑍈॒𑌵 𑌸𑌾॑𑌵𑌿॒𑌤𑍍𑌰𑌃 ॥ 𑌅𑌥॒ 𑌯-𑌦𑍍𑌬𑌾॑𑌰𑍍​𑌹𑌸𑍍𑌪॒𑌤𑍍𑌯𑌃 । 𑌏॒𑌤𑌦𑍍𑌵𑍈 𑌬𑍍𑌰𑌾᳚𑌹𑍍𑌮॒𑌣𑌸𑍍𑌯॑ 𑌵𑌾𑌕𑍍𑌪॒𑌤𑍀𑌯᳚𑌮𑍍 ॥ 𑌅𑌥॒ 𑌯𑌦॑𑌗𑍍𑌨𑍀𑌷𑍋॒𑌮𑍀𑌯𑌃॑ । 𑌆॒𑌗𑍍𑌨𑍇॒𑌯𑍋 𑌵𑍈 𑌬𑍍𑌰𑌾᳚𑌹𑍍𑌮॒𑌣𑌃 । 𑌤𑍌 𑌯॒𑌦𑌾 𑌸॒𑌗𑌞𑍍𑌚𑍍𑌛𑍇॑𑌤𑍇 ॥ 𑍭 ॥

𑌅𑌥॑ 𑌵𑍀॒𑌰𑍍𑌯𑌾॑𑌵𑌤𑍍𑌤𑌰𑍋 𑌭𑌵𑌤𑌿 ॥ 𑌅𑌥॒ 𑌯-𑌥𑍍𑌸𑌾॑𑌰𑌸𑍍𑌵॒𑌤𑌃 । 𑌏॒𑌤𑌦𑍍𑌧𑌿 𑌪𑍍𑌰॒𑌤𑍍𑌯𑌕𑍍𑌷॑-𑌮𑍍𑌬𑍍𑌰𑌾𑌹𑍍𑌮॒𑌣𑌸𑍍𑌯॑ 𑌵𑌾𑌕𑍍𑌪॒𑌤𑍀𑌯᳚𑌮𑍍 ॥ 𑌨𑌿॒𑌰𑍍𑌵॒𑌰𑍁॒𑌣॒𑌤𑍍𑌵𑌾𑌯𑍈॒𑌵 𑌵𑌾॑𑌰𑍁॒𑌣𑌃 । 𑌅𑌥𑍋॒ 𑌯 𑌏॒𑌵 𑌕𑌶𑍍𑌚॒ 𑌸𑌨𑍍​𑌥𑍍𑌸𑍂॒𑌯𑌤𑍇᳚ । 𑌸 𑌹𑌿 𑌵𑌾॑𑌰𑍁॒𑌣𑌃 ॥ 𑌅𑌥॒ 𑌯-𑌦𑍍𑌦𑍍𑌯𑌾॑𑌵𑌾𑌪𑍃𑌥𑌿॒𑌵𑍍𑌯𑌃॑ । 𑌇𑌨𑍍𑌦𑍍𑌰𑍋॑ 𑌵𑍃॒𑌤𑍍𑌰𑌾𑌯॒ 𑌵𑌜𑍍𑌰॒𑌮𑍁𑌦॑𑌯𑌚𑍍𑌛𑌤𑍍 । 𑌤-𑌨𑍍𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌨𑌾𑌨𑍍𑌵॑𑌮𑌨𑍍𑌯𑍇𑌤𑌾𑌮𑍍 । 𑌤𑌮𑍇॒𑌤𑍇𑌨𑍈॒𑌵 𑌭𑌾॑𑌗॒𑌧𑍇𑌯𑍇॒𑌨𑌾-𑌨𑍍𑌵॑𑌮𑌨𑍍𑌯𑍇𑌤𑌾𑌮𑍍 ॥ 𑍮 ॥

𑌵𑌜𑍍𑌰॑𑌸𑍍𑌯॒ 𑌵𑌾 𑌏॒𑌷𑍋॑-𑌽𑌨𑍁𑌮𑌾॒𑌨𑌾𑌯॑ । 𑌅𑌨𑍁॑𑌮𑌤𑌵𑌜𑍍𑌰-𑌸𑍍𑌸𑍂𑌯𑌾𑌤𑌾॒ 𑌇𑌤𑌿॑ ॥ 𑌅॒𑌷𑍍𑌟𑌾𑌵𑍇॒𑌤𑌾𑌨𑌿॑ 𑌹॒𑌵𑍀𑌗𑍍​𑌮𑍍𑌷𑌿॑ 𑌭𑌵𑌨𑍍𑌤𑌿 । 𑌅॒𑌷𑍍𑌟𑌾𑌕𑍍𑌷॑𑌰𑌾 𑌗𑌾𑌯॒𑌤𑍍𑌰𑍀 । 𑌗𑌾॒𑌯॒𑌤𑍍𑌰𑍀 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑌮𑍍 । 𑌗𑌾॒𑌯॒𑌤𑍍𑌰𑌿॒𑌯𑍈𑌵 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑌮𑌵॑𑌰𑍁𑌨𑍍𑌧𑍇 ॥ 𑌹𑌿𑌰॑𑌣𑍍𑌯𑍇𑌨 𑌘𑍃॒𑌤𑌮𑍁-𑌤𑍍𑌪𑍁॑𑌨𑌾𑌤𑌿 । 𑌤𑍇𑌜॑𑌸 𑌏॒𑌵 𑌰𑍁॒𑌚𑍇 ॥ 𑌕𑍃॒𑌷𑍍𑌣𑌾॒𑌜𑌿॒𑌨𑍇॑-𑌽𑌭𑌿𑌷𑌿॑𑌞𑍍𑌚𑌤𑌿 । 𑌬𑍍𑌰𑌹𑍍𑌮॑𑌣𑍋॒ 𑌵𑌾 𑌏॒𑌤𑌦𑍃॑𑌖𑍍𑌸𑌾॒𑌮𑌯𑍋॑ 𑌰𑍂॒𑌪𑌮𑍍 । 𑌯-𑌤𑍍𑌕𑍃॑𑌷𑍍𑌣𑌾𑌜𑌿॒𑌨𑌮𑍍 । 𑌬𑍍𑌰𑌹𑍍𑌮॑𑌨𑍍𑌨𑍇॒𑌵𑍈𑌨॑-𑌮𑍃𑌖𑍍𑌸𑌾॒𑌮𑌯𑍋॒-𑌰𑌦𑍍𑌧𑍍𑌯॒𑌭𑌿𑌷𑌿॑𑌞𑍍𑌚𑌤𑌿 ॥ 𑌘𑍃॒𑌤𑍇𑌨𑌾॒-𑌭𑌿𑌷𑌿॑𑌞𑍍𑌚𑌤𑌿 । 𑌤𑌥𑌾॑ 𑌵𑍀॒𑌰𑍍𑌯𑌾॑𑌵𑌤𑍍𑌤𑌰𑍋 𑌭𑌵𑌤𑌿 ॥ 𑍯 ॥
(𑌸॒𑌗𑌞𑍍𑌚𑍍𑌛𑍇॑𑌤𑍇 - 𑌭𑌾𑌗॒𑌧𑍇𑌯𑍇॒𑌨𑌾𑌨𑍍𑌵॑𑌮𑌨𑍍𑌯𑍇𑌤𑌾𑌗𑍍​𑌮𑍍 - 𑌰𑍂॒𑌪-𑌞𑍍𑌚॒𑌤𑍍𑌵𑌾𑌰𑌿॑ 𑌚) (𑌅. 3)

𑌅𑌨𑍁𑌵𑌾𑌕𑌂 4 - 𑌸𑍋𑌮𑌸𑌵𑌃
𑌨 𑌵𑍈 𑌸𑍋𑌮𑍇॑𑌨॒ 𑌸𑍋𑌮॑𑌸𑍍𑌯 𑌸॒𑌵𑍋᳚-𑌽𑌸𑍍𑌤𑌿 । 𑌹॒𑌤𑍋 𑌹𑍍𑌯𑍇॑𑌷𑌃 । 𑌅॒𑌭𑌿𑌷𑍁॑𑌤𑍋॒ 𑌹𑍍𑌯𑍇॑𑌷𑌃 । 𑌨 𑌹𑌿 𑌹॒𑌤-𑌸𑍍𑌸𑍂॒𑌯𑌤𑍇᳚ । 𑌸𑍌॒𑌮𑍀𑌗𑍍​𑌮𑍍 𑌸𑍂॒𑌤𑌵॑𑌶𑌾॒𑌮𑌾𑌲॑𑌭𑌤𑍇 । 𑌸𑍋𑌮𑍋॒ 𑌵𑍈 𑌰𑍇॑𑌤𑍋॒𑌧𑌾𑌃 । 𑌰𑍇𑌤॑ 𑌏॒𑌵 𑌤-𑌦𑍍𑌦॑𑌧𑌾𑌤𑌿 ॥ 𑌸𑍌॒𑌮𑍍𑌯𑌰𑍍𑌚𑌾 𑌽𑌭𑌿𑌷𑌿॑𑌞𑍍𑌚𑌤𑌿 । 𑌰𑍇॒𑌤𑍋॒𑌧𑌾 𑌹𑍍𑌯॑𑌷𑌾 । 𑌰𑍇𑌤॒-𑌸𑍍𑌸𑍋𑌮𑌃॑ । 𑌰𑍇𑌤॑ 𑌏॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 ॥ 𑌯-𑌤𑍍𑌕𑌿𑌞𑍍𑌚 𑌰𑌾𑌜॒𑌸𑍂𑌯॑𑌮𑍃॒𑌤𑍇 𑌸𑍋𑌮᳚𑌮𑍍 । 𑌤-𑌥𑍍𑌸𑌰𑍍𑌵॑-𑌮𑍍𑌭𑌵𑌤𑌿 ॥ 𑌅𑌷𑌾॑𑌢𑌂-𑌯𑍁𑌁॒𑌥𑍍𑌸𑍁 𑌪𑍃𑌤॑𑌨𑌾𑌸𑍁॒ 𑌪𑌪𑍍𑌰𑌿᳚𑌮𑍍 । 𑌸𑍁॒𑌵॒𑌰॒.𑌷𑌾𑌮॒𑌫𑍍𑌸𑍍𑌵𑌾𑌂-𑌵𑍃𑌁॒𑌜𑌨॑𑌸𑍍𑌯 𑌗𑍋॒𑌪𑌾𑌮𑍍 । 𑌭॒𑌰𑍇॒𑌷𑍁॒𑌜𑌾𑌗𑍍​𑌮𑍍 𑌸𑍁॑𑌕𑍍𑌷𑌿॒𑌤𑌿𑌗𑍍​𑌮𑍍 𑌸𑍁॒𑌶𑍍𑌰𑌵॑𑌸𑌮𑍍 । 𑌜𑌯॑𑌨𑍍𑌤॒-𑌨𑍍𑌤𑍍𑌵𑌾𑌮𑌨𑍁॑ 𑌮𑌦𑍇𑌮 𑌸𑍋𑌮 ॥ 10 ॥
(𑌰𑍇𑌤॒-𑌸𑍍𑌸𑍋𑌮॑-𑌸𑍍𑌸॒𑌪𑍍𑌤 𑌚॑ ) (𑌅. 4)

𑌅𑌨𑍁𑌵𑌾𑌕𑌂 5 - 𑌪𑍃𑌥𑌿𑌸𑌵𑌃
𑌯𑍋 𑌵𑍈 𑌸𑍋𑌮𑍇॑𑌨 𑌸𑍂॒𑌯𑌤𑍇᳚ । 𑌸 𑌦𑍇॑𑌵𑌸॒𑌵𑌃 । 𑌯𑌃 𑌪॒𑌶𑍁𑌨𑌾॑ 𑌸𑍂॒𑌯𑌤𑍇᳚ । 𑌸 𑌦𑍇॑𑌵𑌸॒𑌵𑌃 । 𑌯 𑌇𑌷𑍍𑌟𑍍𑌯𑌾॑ 𑌸𑍂॒𑌯𑌤𑍇᳚ । 𑌸 𑌮॑𑌨𑍁𑌷𑍍𑌯𑌸॒𑌵𑌃 । 𑌏॒𑌤𑌂-𑌵𑍈𑌁 𑌪𑍃𑌥॑𑌯𑍇 𑌦𑍇॒𑌵𑌾𑌃 𑌪𑍍𑌰𑌾𑌯॑𑌚𑍍𑌛𑌨𑍍𑌨𑍍 । 𑌤𑌤𑍋॒ 𑌵𑍈 𑌸𑍋-𑌽𑌪𑍍𑌯𑌾॑𑌰॒𑌣𑍍𑌯𑌾𑌨𑌾᳚-𑌮𑍍𑌪𑌶𑍂॒𑌨𑌾𑌮॑𑌸𑍂𑌯𑌤 । 𑌯𑌾𑌵॑𑌤𑍀𑌃॒ 𑌕𑌿𑌯॑𑌤𑍀𑌶𑍍𑌚 𑌪𑍍𑌰॒𑌜𑌾 𑌵𑌾𑌚𑌂॒-𑌵𑌁𑌦॑𑌨𑍍𑌤𑌿 । 𑌤𑌾𑌸𑌾॒𑌗𑍍​𑌮𑍍॒ 𑌸𑌰𑍍𑌵𑌾॑𑌸𑌾𑌗𑍍​𑌮𑍍 𑌸𑍂𑌯𑌤𑍇 ॥ 11 ॥

𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌨𑌾॒𑌰𑌾॒𑌶॒𑌗𑍍𑌗𑍍॒𑌸𑍍𑌯𑌰𑍍𑌚𑌾 𑌽𑌭𑌿𑌷𑌿॑𑌞𑍍𑌚𑌤𑌿 । 𑌮॒𑌨𑍁॒𑌷𑍍𑌯𑌾॑ 𑌵𑍈 𑌨𑌰𑌾॒𑌶𑌗𑍍​𑌮𑍍𑌸𑌃॑ । 𑌨𑌿॒𑌹𑍍𑌨𑍁𑌤𑍍𑌯॒ 𑌵𑌾𑌵𑍈𑌤𑌤𑍍 । 𑌅𑌥𑌾॒𑌭𑌿𑌷𑌿॑𑌞𑍍𑌚𑌤𑌿 ॥ 𑌯-𑌤𑍍𑌕𑌿𑌞𑍍𑌚॑ 𑌰𑌾𑌜॒𑌸𑍂𑌯॑-𑌮𑌨𑍁𑌤𑍍𑌤𑌰𑌵𑍇॒𑌦𑍀𑌕᳚𑌮𑍍 । 𑌤-𑌥𑍍𑌸𑌰𑍍𑌵॑-𑌮𑍍𑌭𑌵𑌤𑌿 ॥ 𑌯𑍇 𑌮𑍇॑ 𑌪𑌞𑍍𑌚𑌾॒𑌶𑌤॑-𑌨𑍍𑌦॒𑌦𑍁𑌃 । 𑌅𑌶𑍍𑌵𑌾॑𑌨𑌾𑌗𑍍​𑌮𑍍 𑌸॒𑌧𑌸𑍍𑌤𑍁॑𑌤𑌿𑌃 । 𑌦𑍍𑌯𑍁॒𑌮𑌦॑𑌗𑍍𑌨𑍇॒ 𑌮𑌹𑌿॒ 𑌶𑍍𑌰𑌵𑌃॑ । 𑌬𑍃॒𑌹-𑌤𑍍𑌕𑍃॑𑌧𑌿 𑌮॒𑌘𑍋𑌨𑌾᳚𑌮𑍍 । 𑌨𑍃॒𑌵𑌦॑𑌮𑍃𑌤 𑌨𑍃॒𑌣𑌾𑌮𑍍 ॥ 12 ॥
(𑌸𑍂॒𑌯॒𑌤𑍇॒ - 𑌸॒𑌧𑌸𑍍𑌤𑍁॑𑌤𑌿॒𑌸𑍍𑌤𑍍𑌰𑍀𑌣𑌿॑ 𑌚) (𑌅. 5)

𑌅𑌨𑍁𑌵𑌾𑌕𑌂 6 - 𑌗𑍋𑌸𑌵𑌃
𑌏॒𑌷 𑌗𑍋॑𑌸॒𑌵𑌃 । 𑌷॒𑌟𑍍𑌤𑍍𑌰𑌿॒𑌗𑍍​𑌮𑍍॒𑌶 𑌉॒𑌕𑍍𑌥𑍍𑌯𑍋॑ 𑌬𑍃॒𑌹-𑌥𑍍𑌸𑌾॑𑌮𑌾 । 𑌪𑌵॑𑌮𑌾𑌨𑍇 𑌕𑌣𑍍𑌵𑌰𑌥𑌨𑍍𑌤॒𑌰-𑌮𑍍𑌭॑𑌵𑌤𑌿 ॥ 𑌯𑍋 𑌵𑍈 𑌵𑌾॑𑌜॒𑌪𑍇𑌯𑌃॑ । 𑌸 𑌸॑𑌮𑍍𑌰𑌾𑌟𑍍𑌥𑍍𑌸॒𑌵𑌃 । 𑌯𑍋 𑌰𑌾॑𑌜॒𑌸𑍂𑌯𑌃॑ । 𑌸 𑌵॑𑌰𑍁𑌣𑌸॒𑌵𑌃 । 𑌪𑍍𑌰॒𑌜𑌾𑌪॑𑌤𑌿॒-𑌸𑍍𑌸𑍍𑌵𑌾𑌰𑌾᳚𑌜𑍍𑌯-𑌮𑍍𑌪𑌰𑌮𑍇॒𑌷𑍍𑌠𑍀 । 𑌸𑍍𑌵𑌾𑌰𑌾᳚𑌜𑍍𑌯॒-𑌙𑍍𑌗𑍌𑌰𑍇॒𑌵 ॥ 𑌗𑍌𑌰𑌿॑𑌵 𑌭𑌵𑌤𑌿 ॥ 13 ॥

𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌉॒𑌭𑍇 𑌬𑍃॑𑌹-𑌦𑍍𑌰𑌥𑌨𑍍𑌤॒𑌰𑍇 𑌭॑𑌵𑌤𑌃 । 𑌤𑌦𑍍𑌧𑌿 𑌸𑍍𑌵𑌾𑌰𑌾᳚𑌜𑍍𑌯𑌮𑍍 ॥ 𑌅॒𑌯𑍁𑌤॒-𑌨𑍍𑌦𑌕𑍍𑌷𑌿॑𑌣𑌾𑌃 । 𑌤𑌦𑍍𑌧𑌿 𑌸𑍍𑌵𑌾𑌰𑌾᳚𑌜𑍍𑌯𑌮𑍍 ॥ 𑌪𑍍𑌰॒𑌤𑌿॒𑌧𑍁𑌷𑌾॒ 𑌽𑌭𑌿𑌷𑌿॑𑌞𑍍𑌚𑌤𑌿 । 𑌤𑌦𑍍𑌧𑌿 𑌸𑍍𑌵𑌾𑌰𑌾᳚𑌜𑍍𑌯𑌮𑍍 ॥ 𑌅𑌨𑍁॑𑌦𑍍𑌧𑌤𑍇॒ 𑌵𑍇𑌦𑍍𑌯𑍈॑ 𑌦𑌕𑍍𑌷𑌿𑌣॒𑌤 𑌆॑𑌹𑌵॒𑌨𑍀𑌯॑𑌸𑍍𑌯 𑌬𑍃𑌹॒𑌤-𑌸𑍍𑌸𑍍𑌤𑍋॒𑌤𑍍𑌰-𑌮𑍍𑌪𑍍𑌰𑌤𑍍𑌯॒𑌭𑌿𑌷𑌿॑𑌞𑍍𑌚𑌤𑌿 । 𑌇॒𑌯𑌂-𑌵𑌾𑌁𑌵 𑌰॑𑌥𑌨𑍍𑌤॒𑌰𑌮𑍍 ॥ 14 ॥

𑌅॒𑌸𑍌 𑌬𑍃॒𑌹𑌤𑍍 । 𑌅॒𑌨𑌯𑍋॑𑌰𑍇॒𑌵𑍈𑌨॒-𑌮𑌨॑𑌨𑍍𑌤𑌰𑍍​𑌹𑌿𑌤-𑌮॒𑌭𑌿𑌷𑌿॑𑌞𑍍𑌚𑌤𑌿 ॥ 𑌪॒𑌶𑍁॒𑌸𑍍𑌤𑍋॒𑌮𑍋 𑌵𑌾 𑌏॒𑌷𑌃 । 𑌤𑍇𑌨॑ 𑌗𑍋𑌸॒𑌵𑌃 । 𑌷॒𑌟𑍍𑌤𑍍𑌰𑌿॒𑌗𑍍​𑌮𑍍॒𑌶-𑌸𑍍𑌸𑌰𑍍𑌵𑌃॑ ॥ 𑌰𑍇॒𑌵𑌜𑍍𑌜𑌾॒𑌤-𑌸𑍍𑌸𑌹॑𑌸𑌾 𑌵𑍃॒𑌦𑍍𑌧𑌃 । 𑌕𑍍𑌷॒𑌤𑍍𑌰𑌾𑌣𑌾᳚-𑌙𑍍𑌕𑍍𑌷𑌤𑍍𑌰॒𑌭𑍃𑌤𑍍𑌤॑𑌮𑍋 𑌵𑌯𑍋॒𑌧𑌾𑌃 । 𑌮॒𑌹𑌾-𑌨𑍍𑌮॑𑌹𑌿॒𑌤𑍍𑌵𑍇 𑌤॑𑌸𑍍𑌤𑌭𑌾॒𑌨𑌃 । 𑌕𑍍𑌷॒𑌤𑍍𑌰𑍇 𑌰𑌾॒𑌷𑍍𑌟𑍍𑌰𑍇 𑌚॑ 𑌜𑌾𑌗𑍃𑌹𑌿 । 𑌪𑍍𑌰॒𑌜𑌾𑌪॑𑌤𑍇𑌸𑍍𑌤𑍍𑌵𑌾 𑌪𑌰𑌮𑍇॒𑌷𑍍𑌠𑌿𑌨॒-𑌸𑍍𑌸𑍍𑌵𑌾𑌰𑌾᳚𑌜𑍍𑌯𑍇𑌨𑌾॒𑌭𑌿𑌷𑌿॑𑌞𑍍𑌚𑌾॒-𑌮𑍀𑌤𑍍𑌯𑌾॑𑌹 ॥ 𑌸𑍍𑌵𑌾𑌰𑌾᳚𑌜𑍍𑌯-𑌮𑍇॒𑌵𑍈𑌨॑-𑌙𑍍𑌗𑌮𑌯𑌤𑌿 ॥ 15 ॥
(𑌇॒𑌵॒ 𑌭॒𑌵॒𑌤𑌿॒ - 𑌰॒𑌥॒𑌨𑍍𑌤॒𑌰 - 𑌮𑌾॒𑌹𑍈𑌕॑-𑌞𑍍𑌚) (𑌅. 6)

𑌅𑌨𑍁𑌵𑌾𑌕𑌂 𑍭 - 𑌓𑌦𑌨𑌸𑌵𑌮𑌨𑍍𑌤𑍍𑌰𑌾𑌃
𑌸𑌿॒𑌗𑍍​𑌮𑍍॒𑌹𑍇 𑌵𑍍𑌯𑌾॒𑌘𑍍𑌰 𑌉॒𑌤 𑌯𑌾 𑌪𑍃𑌦𑌾॑𑌕𑍌 । 𑌤𑍍𑌵𑌿𑌷𑌿॑𑌰॒𑌗𑍍𑌨𑍌 𑌬𑍍𑌰𑌾᳚𑌹𑍍𑌮॒𑌣𑍇 𑌸𑍂𑌰𑍍𑌯𑍇॒ 𑌯𑌾 । 𑌇𑌨𑍍𑌦𑍍𑌰𑌂॒-𑌯𑌾𑌁 𑌦𑍇॒𑌵𑍀 𑌸𑍁॒𑌭𑌗𑌾॑ 𑌜॒𑌜𑌾𑌨॑ । 𑌸𑌾 𑌨॒ 𑌆𑌗॒𑌨𑍍 𑌵𑌰𑍍𑌚॑𑌸𑌾 𑌸𑌂​𑌵𑌿𑌁𑌦𑌾॒𑌨𑌾 ॥ 𑌯𑌾 𑌰𑌾॑𑌜॒𑌨𑍍𑌯𑍇॑ 𑌦𑍁𑌨𑍍𑌦𑍁॒𑌭𑌾𑌵𑌾𑌯॑𑌤𑌾𑌯𑌾𑌮𑍍 । 𑌅𑌶𑍍𑌵॑𑌸𑍍𑌯॒ 𑌕𑍍𑌰𑌨𑍍𑌦𑍍𑌯𑍇॒ 𑌪𑍁𑌰𑍁॑𑌷𑌸𑍍𑌯 𑌮𑌾॒𑌯𑍌 । 𑌇𑌨𑍍𑌦𑍍𑌰𑌂॒-𑌯𑌾𑌁 𑌦𑍇॒𑌵𑍀 𑌸𑍁॒𑌭𑌗𑌾॑ 𑌜॒𑌜𑌾𑌨॑ । 𑌸𑌾 𑌨॒ 𑌆𑌗॒𑌨𑍍 𑌵𑌰𑍍𑌚॑𑌸𑌾 𑌸𑌂​𑌵𑌿𑌁𑌦𑌾॒𑌨𑌾 ॥ 𑌯𑌾 𑌹॒𑌸𑍍𑌤𑌿𑌨𑌿॑ 𑌦𑍍𑌵𑍀॒𑌪𑌿𑌨𑌿॒ 𑌯𑌾 𑌹𑌿𑌰॑𑌣𑍍𑌯𑍇 । 𑌤𑍍𑌵𑌿𑌷𑌿॒-𑌰𑌶𑍍𑌵𑍇॑𑌷𑍁॒ 𑌪𑍁𑌰𑍁॑𑌷𑍇𑌷𑍁॒ 𑌗𑍋𑌷𑍁॑ ॥ 16 ॥

𑌇𑌨𑍍𑌦𑍍𑌰𑌂॒-𑌯𑌾𑌁 𑌦𑍇॒𑌵𑍀 𑌸𑍁॒𑌭𑌗𑌾॑ 𑌜॒𑌜𑌾𑌨॑ । 𑌸𑌾 𑌨॒ 𑌆𑌗॒𑌨𑍍 𑌵𑌰𑍍𑌚॑𑌸𑌾 𑌸𑌂​𑌵𑌿𑌁𑌦𑌾॒𑌨𑌾 ॥ 𑌰𑌥𑍇॑ 𑌅॒𑌕𑍍𑌷𑍇𑌷𑍁॑ 𑌵𑍃𑌷॒𑌭𑌸𑍍𑌯॒ 𑌵𑌾𑌜𑍇᳚ । 𑌵𑌾𑌤𑍇॑ 𑌪॒𑌰𑍍𑌜𑌨𑍍𑌯𑍇॒ 𑌵𑌰𑍁॑𑌣𑌸𑍍𑌯॒ 𑌶𑍁𑌷𑍍𑌮𑍇᳚ । 𑌇𑌨𑍍𑌦𑍍𑌰𑌂॒-𑌯𑌾𑌁 𑌦𑍇॒𑌵𑍀 𑌸𑍁॒𑌭𑌗𑌾॑ 𑌜॒𑌜𑌾𑌨॑ । 𑌸𑌾 𑌨॒ 𑌆𑌗॒𑌨𑍍 𑌵𑌰𑍍𑌚॑𑌸𑌾 𑌸𑌂​𑌵𑌿𑌁𑌦𑌾॒𑌨𑌾 ॥ 𑌰𑌾𑌡॑𑌸𑌿 𑌵𑌿॒𑌰𑌾𑌡॑𑌸𑌿 । 𑌸॒𑌮𑍍𑌰𑌾𑌡॑𑌸𑌿 𑌸𑍍𑌵॒𑌰𑌾𑌡॑𑌸𑌿 ॥ 𑌇𑌨𑍍𑌦𑍍𑌰𑌾॑𑌯 𑌤𑍍𑌵𑌾॒ 𑌤𑍇𑌜॑𑌸𑍍𑌵𑌤𑍇॒ 𑌤𑍇𑌜॑𑌸𑍍𑌵𑌨𑍍𑌤𑌗𑍍𑌗𑍍​ 𑌶𑍍𑌰𑍀𑌣𑌾𑌮𑌿 । 𑌇𑌨𑍍𑌦𑍍𑌰𑌾॑𑌯॒ 𑌤𑍍𑌵𑍌𑌜॑𑌸𑍍𑌵𑌤॒ 𑌓𑌜॑𑌸𑌵𑌨𑍍𑌤𑌗𑍍𑌗𑍍​ 𑌶𑍍𑌰𑍀𑌣𑌾𑌮𑌿 ॥ 1𑍭 ॥

𑌇𑌨𑍍𑌦𑍍𑌰𑌾॑𑌯 𑌤𑍍𑌵𑌾॒ 𑌪𑌯॑𑌸𑍍𑌵𑌤𑍇॒ 𑌪𑌯॑𑌸𑍍𑌵𑌨𑍍𑌤𑌗𑍍𑌗𑍍​ 𑌶𑍍𑌰𑍀𑌣𑌾𑌮𑌿 । 𑌇𑌨𑍍𑌦𑍍𑌰𑌾॑𑌯॒ 𑌤𑍍𑌵𑌾-𑌽𑌽𑌯𑍁॑𑌷𑍍𑌮𑌤॒ 𑌆𑌯𑍁॑𑌷𑍍𑌮𑌨𑍍𑌤𑌗𑍍𑌗𑍍​ 𑌶𑍍𑌰𑍀𑌣𑌾𑌮𑌿 ॥ 𑌤𑍇𑌜𑍋॑-𑌽𑌸𑌿 । 𑌤-𑌤𑍍𑌤𑍇॒ 𑌪𑍍𑌰𑌯॑𑌚𑍍𑌛𑌾𑌮𑌿 । 𑌤𑍇𑌜॑𑌸𑍍𑌵𑌦𑌸𑍍𑌤𑍁 𑌮𑍇॒ 𑌮𑍁𑌖᳚𑌮𑍍 । 𑌤𑍇𑌜॑𑌸𑍍𑌵॒𑌚𑍍𑌛𑌿𑌰𑍋॑ 𑌅𑌸𑍍𑌤𑍁 𑌮𑍇 । 𑌤𑍇𑌜॑𑌸𑍍𑌵𑌾𑌨𑍍. 𑌵𑌿॒𑌶𑍍𑌵𑌤𑌃॑ 𑌪𑍍𑌰॒𑌤𑍍𑌯𑌮𑍍 । 𑌤𑍇𑌜॑𑌸𑌾॒ 𑌸𑌮𑍍𑌪𑌿॑𑌪𑍃𑌗𑍍𑌧𑌿 𑌮𑌾 ॥ 𑌓𑌜𑍋॑-𑌽𑌸𑌿 । 𑌤-𑌤𑍍𑌤𑍇॒ 𑌪𑍍𑌰𑌯॑𑌚𑍍𑌛𑌾𑌮𑌿 ॥ 1𑍮 ॥

𑌓𑌜॑𑌸𑍍𑌵𑌦𑌸𑍍𑌤𑍁 𑌮𑍇॒ 𑌮𑍁𑌖᳚𑌮𑍍 । 𑌓𑌜॑𑌸𑍍𑌵॒𑌚𑍍𑌛𑌿𑌰𑍋॑ 𑌅𑌸𑍍𑌤𑍁 𑌮𑍇 । 𑌓𑌜॑𑌸𑍍𑌵𑌾𑌨𑍍. 𑌵𑌿॒𑌶𑍍𑌵𑌤𑌃॑ 𑌪𑍍𑌰॒𑌤𑍍𑌯𑌮𑍍 । 𑌓𑌜॑𑌸𑌾॒ 𑌸𑌮𑍍𑌪𑌿॑𑌪𑍃𑌗𑍍𑌧𑌿 𑌮𑌾 ॥ 𑌪𑌯𑍋॑-𑌽𑌸𑌿 । 𑌤𑌤𑍍𑌤𑍇॒ 𑌪𑍍𑌰𑌯॑𑌚𑍍𑌛𑌾𑌮𑌿 । 𑌪𑌯॑𑌸𑍍𑌵𑌦𑌸𑍍𑌤𑍁 𑌮𑍇॒ 𑌮𑍁𑌖᳚𑌮𑍍 । 𑌪𑌯॑𑌸𑍍𑌵॒𑌚𑍍𑌛𑌿𑌰𑍋॑ 𑌅𑌸𑍍𑌤𑍁 𑌮𑍇 । 𑌪𑌯॑𑌸𑍍𑌵𑌾𑌨𑍍. 𑌵𑌿॒𑌶𑍍𑌵𑌤𑌃॑ 𑌪𑍍𑌰॒𑌤𑍍𑌯𑌮𑍍 । 𑌪𑌯॑𑌸𑌾॒ 𑌸𑌮𑍍𑌪𑌿॑𑌪𑍃𑌗𑍍𑌧𑌿 𑌮𑌾 ॥ 1𑍯 ॥

𑌆𑌯𑍁॑𑌰𑌸𑌿 । 𑌤-𑌤𑍍𑌤𑍇॒ 𑌪𑍍𑌰𑌯॑𑌚𑍍𑌛𑌾𑌮𑌿 । 𑌆𑌯𑍁॑𑌷𑍍𑌮𑌦𑌸𑍍𑌤𑍁 𑌮𑍇॒ 𑌮𑍁𑌖᳚𑌮𑍍 । 𑌆𑌯𑍁॑𑌷𑍍𑌮॒𑌚𑍍𑌛𑌿𑌰𑍋॑ 𑌅𑌸𑍍𑌤𑍁 𑌮𑍇 । 𑌆𑌯𑍁॑𑌷𑍍𑌮𑌾𑌨𑍍. 𑌵𑌿॒𑌶𑍍𑌵𑌤𑌃॑ 𑌪𑍍𑌰॒𑌤𑍍𑌯𑌮𑍍 । 𑌆𑌯𑍁॑𑌷𑌾॒ 𑌸𑌮𑍍𑌪𑌿॑𑌪𑍃𑌗𑍍𑌧𑌿 𑌮𑌾 ॥ 𑌇॒𑌮𑌮॑𑌗𑍍𑌨॒ 𑌆𑌯𑍁॑𑌷𑍇॒ 𑌵𑌰𑍍𑌚॑𑌸𑍇 𑌕𑍃𑌧𑌿 । 𑌪𑍍𑌰𑌿॒𑌯𑌗𑍍​𑌮𑍍 𑌰𑍇𑌤𑍋॑ 𑌵𑌰𑍁𑌣 𑌸𑍋𑌮 𑌰𑌾𑌜𑌨𑍍𑌨𑍍 । 𑌮𑌾॒𑌤𑍇𑌵𑌾᳚𑌸𑍍𑌮𑌾 𑌅𑌦𑌿𑌤𑍇॒ 𑌶𑌰𑍍𑌮॑ 𑌯𑌚𑍍𑌛 । 𑌵𑌿𑌶𑍍𑌵𑍇॑ 𑌦𑍇𑌵𑌾॒ 𑌜𑌰॑𑌦𑌷𑍍𑌟𑌿॒𑌰𑍍𑌯𑌥𑌾 𑌽𑌸॑𑌤𑍍 ॥ 20 ॥

𑌆𑌯𑍁॑𑌰𑌸𑌿 𑌵𑌿॒𑌶𑍍𑌵𑌾𑌯𑍁॑𑌰𑌸𑌿 । 𑌸॒𑌰𑍍𑌵𑌾𑌯𑍁॑𑌰𑌸𑌿॒ 𑌸𑌰𑍍𑌵॒𑌮𑌾𑌯𑍁॑𑌰𑌸𑌿 ॥ 𑌯𑌤𑍋॒ 𑌵𑌾𑌤𑍋॒ 𑌮𑌨𑍋॑ 𑌜𑌵𑌾𑌃 । 𑌯𑌤𑌃॒, 𑌕𑍍𑌷𑌰॑𑌨𑍍𑌤𑌿॒ 𑌸𑌿𑌨𑍍𑌧॑𑌵𑌃 । 𑌤𑌾𑌸𑌾᳚-𑌨𑍍𑌤𑍍𑌵𑌾॒ 𑌸𑌰𑍍𑌵𑌾॑𑌸𑌾𑌗𑍍​𑌮𑍍 𑌰𑍁॒𑌚𑌾 । 𑌅॒𑌭𑌿𑌷𑌿॑𑌞𑍍𑌚𑌾𑌮𑌿॒ 𑌵𑌰𑍍𑌚॑𑌸𑌾 ॥ 𑌸॒𑌮𑍁॒𑌦𑍍𑌰 𑌇॑𑌵𑌾𑌸𑌿 𑌗॒𑌹𑍍𑌮𑌨𑌾᳚ । 𑌸𑍋𑌮॑ 𑌇𑌵𑌾॒𑌸𑍍𑌯𑌦𑌾᳚𑌭𑍍𑌯𑌃 । 𑌅॒𑌗𑍍𑌨𑌿𑌰𑌿॑𑌵 𑌵𑌿॒𑌶𑍍𑌵𑌤𑌃॑ 𑌪𑍍𑌰॒𑌤𑍍𑌯𑌮𑍍 । 𑌸𑍂𑌰𑍍𑌯॑ 𑌇𑌵॒ 𑌜𑍍𑌯𑍋𑌤𑌿॑𑌷𑌾 𑌵𑌿॒𑌭𑍂𑌃 ॥ 21 ॥

𑌅॒𑌪𑌾𑌂-𑌯𑍋𑌁 𑌦𑍍𑌰𑌵॑𑌣𑍇॒ 𑌰𑌸𑌃॑ । 𑌤𑌮॒𑌹𑌮॒𑌸𑍍𑌮𑌾 𑌆॑𑌮𑍁𑌷𑍍𑌯𑌾𑌯॒𑌣𑌾𑌯॑ । 𑌤𑍇𑌜॑𑌸𑍇 𑌬𑍍𑌰𑌹𑍍𑌮𑌵𑌰𑍍𑌚॒𑌸𑌾𑌯॑ 𑌗𑍃𑌹𑍍𑌣𑌾𑌮𑌿 । 𑌅॒𑌪𑌾𑌂-𑌯𑌁 𑌊॒𑌰𑍍𑌮𑍌 𑌰𑌸𑌃॑ । 𑌤𑌮॒𑌹𑌮॒𑌸𑍍𑌮𑌾 𑌆॑𑌮𑍁𑌷𑍍𑌯𑌾𑌯॒𑌣𑌾𑌯॑ । 𑌓𑌜॑𑌸𑍇 𑌵𑍀॒𑌰𑍍𑌯𑌾॑𑌯 𑌗𑍃𑌹𑍍𑌣𑌾𑌮𑌿 । 𑌅॒𑌪𑌾𑌂-𑌯𑍋𑌁 𑌮॑𑌦𑍍𑌧𑍍𑌯॒𑌤𑍋 𑌰𑌸𑌃॑ । 𑌤𑌮॒𑌹𑌮॒𑌸𑍍𑌮𑌾 𑌆॑𑌮𑍁𑌷𑍍𑌯𑌾𑌯॒𑌣𑌾𑌯॑ । 𑌪𑍁𑌷𑍍𑌟𑍍𑌯𑍈᳚ 𑌪𑍍𑌰॒𑌜𑌨॑𑌨𑌾𑌯 𑌗𑍃𑌹𑍍𑌣𑌾𑌮𑌿 । 𑌅॒𑌪𑌾𑌂-𑌯𑍋𑌁 𑌯॒𑌜𑍍𑌞𑌿𑌯𑍋॒ 𑌰𑌸𑌃॑ । 𑌤𑌮॒𑌹𑌮॒𑌸𑍍𑌮𑌾 𑌆॑𑌮𑍁𑌷𑍍𑌯𑌾𑌯॒𑌣𑌾𑌯॑ । 𑌆𑌯𑍁॑𑌷𑍇 𑌦𑍀𑌰𑍍𑌘𑌾𑌯𑍁॒𑌤𑍍𑌵𑌾𑌯॑ 𑌗𑍃𑌹𑍍𑌣𑌾𑌮𑌿 ॥ 22 ॥
(𑌗𑍋𑌷𑍍 - 𑌵𑍋𑌜॑𑌸𑍍𑌵𑌨𑍍𑌤𑌗𑍍𑌗𑍍​ 𑌶𑍍𑌰𑍀𑌣𑌾॒ - 𑌮𑍍𑌯𑍋𑌜𑍋॑-𑌽𑌸𑌿॒ 𑌤𑌤𑍍𑌤𑍇॒ 𑌪𑍍𑌰𑌯॑𑌚𑍍𑌛𑌾𑌮𑌿॒ - 𑌪𑌯॑𑌸𑌾॒ 𑌸𑌮𑍍𑌪𑌿॑𑌪𑍃𑌗𑍍𑌧𑌿॒ 𑌮𑌾-𑌸॑-𑌦𑍍- 𑌵𑌿॒𑌭𑍂--𑌰𑍍 𑌯॒𑌜𑍍𑌞𑌿𑌯𑍋॒ 𑌰𑌸𑍋॒ 𑌦𑍍𑌵𑍇 𑌚॑) (𑌅. 𑍭)

𑌅𑌨𑍁𑌵𑌾𑌕𑌂 𑍮 - 𑌓𑌦𑌨𑌸𑌵𑌗𑌤𑌾 𑌸𑍍𑌥𑌾𑌰𑍋𑌹𑌣𑌮𑌨𑍍𑌤𑍍𑌰𑌾𑌃
𑌅॒𑌭𑌿𑌪𑍍𑌰𑍇𑌹𑌿॑ 𑌵𑍀॒𑌰𑌯॑𑌸𑍍𑌵 । 𑌉॒𑌗𑍍𑌰𑌶𑍍𑌚𑍇𑌤𑍍𑌤𑌾॑ 𑌸𑌪𑌤𑍍𑌨॒𑌹𑌾 ॥ 𑌆𑌤𑌿॑𑌷𑍍𑌠 𑌮𑌿𑌤𑍍𑌰॒𑌵𑌰𑍍𑌧॑𑌨𑌃 । 𑌤𑍁𑌭𑍍𑌯॑-𑌨𑍍𑌦𑍇॒𑌵𑌾 𑌅𑌧𑌿॑𑌬𑍍𑌰𑌵𑌨𑍍𑌨𑍍 ॥ 𑌅॒𑌙𑍍𑌕𑍌𑌨𑍍𑌯॒𑌙𑍍𑌕𑌾 𑌵॒𑌭𑌿𑌤𑍋॒ 𑌰𑌥𑌂॒-𑌯𑍌𑌁 𑌧𑍍𑌵𑌾॒𑌨𑍍𑌤𑌂-𑌵𑌾𑌁॑𑌤𑌾॒𑌗𑍍𑌰𑌮𑌨𑍁॑ 𑌸॒𑌚𑌂𑌰॑𑌨𑍍𑌤𑍌 𑌦𑍂॒𑌰𑍇 𑌹𑍇॑𑌤𑌿𑌰𑌿𑌨𑍍𑌦𑍍𑌰𑌿॒𑌯𑌾𑌵𑌾᳚-𑌨𑍍𑌪𑌤॒𑌤𑍍𑌰𑍀 𑌤𑍇 𑌨𑍋॒-𑌽𑌗𑍍𑌨𑌯𑌃॒ 𑌪𑌪𑍍𑌰॑𑌯𑌃 𑌪𑌾𑌰𑌯𑌨𑍍𑌤𑍁 ॥ 𑌶𑌮𑍇 𑌅𑌸𑍍 𑌇𑌤𑍇-𑌨𑍍𑌨𑍋. ॥ 𑌆॒𑌤𑌿𑌷𑍍𑌠॑𑌨𑍍𑌤॒-𑌮𑍍𑌪𑌰𑌿॒ 𑌵𑌿𑌶𑍍𑌵𑍇॑ 𑌅𑌭𑍂𑌷𑌨𑍍𑌨𑍍 । 𑌶𑍍𑌰𑌿𑌯𑌂॒-𑌵𑌁𑌸𑌾॑𑌨𑌶𑍍𑌚𑌰𑌤𑌿॒ 𑌸𑍍𑌵𑌰𑍋॑𑌚𑌾𑌃 । 𑌮॒𑌹𑌤𑍍-𑌤𑌦॒𑌸𑍍𑌯𑌾𑌸𑍁॑𑌰𑌸𑍍𑌯॒ 𑌨𑌾𑌮॑ । 𑌆 𑌵𑌿॒𑌶𑍍𑌵𑌰𑍂॑𑌪𑍋 𑌅॒𑌮𑍃𑌤𑌾॑𑌨𑌿 𑌤𑌸𑍍𑌥𑍌 ॥ 𑌅𑌨𑍁॒ 𑌤𑍍𑌵𑍇𑌨𑍍𑌦𑍍𑌰𑍋॑ 𑌮𑌦॒𑌤𑍍𑌵𑌨𑍁॒ 𑌬𑍃𑌹॒𑌸𑍍𑌪𑌤𑌿𑌃॑ ॥ 23 ॥

𑌅𑌨𑍁॒ 𑌸𑍋𑌮𑍋॒ 𑌅𑌨𑍍𑌵॒𑌗𑍍𑌨𑌿𑌰𑌾॑𑌵𑍀𑌤𑍍 । 𑌅𑌨𑍁॑ 𑌤𑍍𑌵𑌾॒ 𑌵𑌿𑌶𑍍𑌵𑍇॑ 𑌦𑍇॒𑌵𑌾 𑌅॑𑌵𑌨𑍍𑌤𑍁 । 𑌅𑌨𑍁॑ 𑌸॒𑌪𑍍𑌤 𑌰𑌾𑌜𑌾॑𑌨𑍋॒ 𑌯 𑌉॒𑌤𑌾𑌭𑌿𑌷𑌿॑𑌕𑍍𑌤𑌾𑌃 ॥ 𑌅𑌨𑍁॑ 𑌤𑍍𑌵𑌾 𑌮𑌿॒𑌤𑍍𑌰𑌾𑌵𑌰𑍁॑𑌣𑌾𑌵𑌿॒𑌹𑌾𑌵॑𑌤𑌮𑍍 । 𑌅𑌨𑍁॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌵𑌿॒𑌶𑍍𑌵𑌶॑𑌭𑍂𑌮𑍍 । 𑌸𑍂𑌰𑍍𑌯𑍋॒ 𑌅𑌹𑍋॑𑌭𑌿॒𑌰𑌨𑍁॑ 𑌤𑍍𑌵𑌾-𑌽𑌵𑌤𑍁 । 𑌚॒𑌨𑍍𑌦𑍍𑌰𑌮𑌾॒ 𑌨𑌕𑍍𑌷॑𑌤𑍍𑌰𑍈॒𑌰𑌨𑍁॑ 𑌤𑍍𑌵𑌾-𑌽𑌵𑌤𑍁 ॥ 𑌦𑍍𑌯𑍌𑌶𑍍𑌚॑ 𑌤𑍍𑌵𑌾 𑌪𑍃𑌥𑌿॒𑌵𑍀 𑌚॒ 𑌪𑍍𑌰𑌚𑍇॑𑌤𑌸𑌾 । 𑌶𑍁॒𑌕𑍍𑌰𑍋 𑌬𑍃॒𑌹-𑌦𑍍𑌦𑌕𑍍𑌷𑌿॑𑌣𑌾 𑌤𑍍𑌵𑌾 𑌪𑌿𑌪𑌰𑍍𑌤𑍁 । 𑌅𑌨𑍁॑ 𑌸𑍍𑌵॒𑌧𑌾 𑌚𑌿॑𑌕𑌿𑌤𑌾॒𑌗𑍍​𑌮𑍍॒ 𑌸𑍋𑌮𑍋॑ 𑌅॒𑌗𑍍𑌨𑌿𑌃 । 𑌆-𑌽𑌯-𑌮𑍍𑌪𑍃॑𑌣𑌕𑍍𑌤𑍁॒ 𑌰𑌜॑𑌸𑍀 𑌉॒𑌪𑌸𑍍𑌥᳚𑌮𑍍 ॥ 24 ॥
(𑌬𑍃𑌹॒𑌸𑍍𑌪𑌤𑌿𑌃॒ - 𑌸𑍋𑌮𑍋॑ 𑌅॒𑌗𑍍𑌨𑌿𑌰𑍇𑌕॑-𑌞𑍍𑌚) (𑌅. 𑍮)

𑌅𑌨𑍁𑌵𑌾𑌕𑌂 𑍯 - 𑌓𑌦𑌨𑌸𑌵𑌃
𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌤𑌾 𑌅॑𑌸𑍍𑌮𑌾-𑌥𑍍𑌸𑍃॒𑌷𑍍𑌟𑌾𑌃 𑌪𑌰𑌾॑𑌚𑍀𑌰𑌾𑌯𑌨𑍍𑌨𑍍 । 𑌸 𑌏॒𑌤-𑌮𑍍𑌪𑍍𑌰॒𑌜𑌾𑌪॑𑌤𑌿𑌰𑍋𑌦॒𑌨-𑌮॑𑌪𑌶𑍍𑌯𑌤𑍍 । 𑌸𑍋-𑌽𑌨𑍍𑌨॑-𑌮𑍍𑌭𑍂॒𑌤𑍋॑-𑌽𑌤𑌿𑌷𑍍𑌠𑌤𑍍 । 𑌤𑌾 𑌅॒𑌨𑍍𑌯𑌤𑍍𑌰𑌾॒𑌨𑍍𑌨𑌾𑌦𑍍𑌯॒𑌮𑌵𑌿॑𑌤𑍍𑌤𑍍𑌵𑌾 । 𑌪𑍍𑌰॒𑌜𑌾𑌪॑𑌤𑌿-𑌮𑍍𑌪𑍍𑌰॒𑌜𑌾 𑌉॒𑌪𑌾𑌵॑𑌰𑍍𑌤𑌨𑍍𑌤 । 𑌅𑌨𑍍𑌨॑𑌮𑍇॒𑌵𑍈𑌨॑-𑌮𑍍𑌭𑍂॒𑌤-𑌮𑍍𑌪𑌶𑍍𑌯॑𑌨𑍍𑌤𑍀𑌃 𑌪𑍍𑌰॒𑌜𑌾 𑌉॒𑌪𑌾𑌵॑𑌰𑍍𑌤𑌨𑍍𑌤𑍇 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌸𑌰𑍍𑌵𑌾॒𑌣𑍍𑌯𑌨𑍍𑌨𑌾॑𑌨𑌿 𑌭𑌵𑌨𑍍𑌤𑌿 ॥ 25 ॥

𑌸𑌰𑍍𑌵𑍇॒ 𑌪𑍁𑌰𑍁॑𑌷𑌾𑌃 । 𑌸𑌰𑍍𑌵𑌾᳚𑌣𑍍𑌯𑍇॒𑌵𑌾𑌨𑍍𑌨𑌾॒𑌨𑍍𑌯𑌵॑𑌰𑍁𑌨𑍍𑌧𑍇 । 𑌸𑌰𑍍𑌵𑌾॒-𑌨𑍍𑌪𑍁𑌰𑍁॑𑌷𑌾𑌨𑍍 ॥ 𑌰𑌾𑌡॑𑌸𑌿 𑌵𑌿॒𑌰𑌾𑌡॒𑌸𑍀𑌤𑍍𑌯𑌾॑𑌹 । 𑌸𑍍𑌵𑌾𑌰𑌾᳚𑌜𑍍𑌯𑌮𑍇॒𑌵𑍈𑌨॑-𑌙𑍍𑌗𑌮𑌯𑌤𑌿 ॥ 𑌯𑌦𑍍𑌧𑌿𑌰॑𑌣𑍍𑌯॒-𑌨𑍍𑌦𑌦𑌾॑𑌤𑌿 । 𑌤𑍇𑌜॒𑌸𑍍𑌤𑍇𑌨𑌾𑌵॑𑌰𑍁𑌨𑍍𑌧𑍇 । 𑌯𑌤𑍍𑌤𑌿॑𑌸𑍃𑌧॒𑌨𑍍𑌵𑌮𑍍 । 𑌵𑍀॒𑌰𑍍𑌯॑-𑌨𑍍𑌤𑍇𑌨॑ । 𑌯𑌦𑌷𑍍𑌟𑍍𑌰𑌾᳚𑌮𑍍 ॥ 26 ॥

𑌪𑍁𑌷𑍍𑌟𑌿॒-𑌨𑍍𑌤𑍇𑌨॑ । 𑌯𑌤𑍍-𑌕॑𑌮॒𑌣𑍍𑌡𑌲𑍁᳚𑌮𑍍 । 𑌆𑌯𑍁॒𑌷𑍍𑌟𑍇𑌨॑ ॥ 𑌯𑌦𑍍𑌧𑌿𑌰॑𑌣𑍍𑌯𑌮𑌾𑌬॒𑌦𑍍𑌧𑍍𑌨𑌾𑌤𑌿॑ । 𑌜𑍍𑌯𑍋𑌤𑌿॒𑌰𑍍𑌵𑍈 𑌹𑌿𑌰॑𑌣𑍍𑌯𑌮𑍍 । 𑌜𑍍𑌯𑍋𑌤𑌿॑𑌰𑍇॒𑌵𑌾𑌸𑍍𑌮𑌿॑𑌨𑍍-𑌦𑌧𑌾𑌤𑌿 । 𑌅𑌥𑍋॒ 𑌤𑍇𑌜𑍋॒ 𑌵𑍈 𑌹𑌿𑌰॑𑌣𑍍𑌯𑌮𑍍 । 𑌤𑍇𑌜॑ 𑌏॒𑌵𑌾𑌤𑍍𑌮-𑌨𑍍𑌧॑𑌤𑍍𑌤𑍇 ॥ 𑌯𑌦𑍋॑𑌦॒𑌨-𑌮𑍍𑌪𑍍𑌰𑌾॒𑌶𑍍𑌨𑌾𑌤𑌿॑ । 𑌏॒𑌤𑌦𑍇॒𑌵 𑌸𑌰𑍍𑌵॑𑌮𑌵॒𑌰𑍁𑌦𑍍𑌧𑍍𑌯॑ ॥ 2𑍭 ॥

𑌤𑌦॑𑌸𑍍𑌮𑌿-𑌨𑍍𑌨𑍇𑌕॒𑌧𑌾-𑌽𑌧𑌾᳚𑌤𑍍 ॥ 𑌰𑍋॒𑌹𑌿॒𑌣𑍍𑌯𑌾-𑌙𑍍𑌕𑌾॒𑌰𑍍𑌯𑌃॑ । 𑌯𑌦𑍍𑌬𑍍𑌰𑌾᳚𑌹𑍍𑌮॒𑌣 𑌏॒𑌵 𑌰𑍋॑𑌹𑌿॒𑌣𑍀 । 𑌤𑌸𑍍𑌮𑌾॑𑌦𑍇॒𑌵 । 𑌅𑌥𑍋॒ 𑌵𑌰𑍍​𑌷𑍍𑌮𑍈॒𑌵𑍈𑌨𑌗𑍍​𑌮𑍍॑ 𑌸𑌮𑌾॒𑌨𑌾𑌨𑌾᳚-𑌙𑍍𑌕𑌰𑍋𑌤𑌿 ॥ 𑌉॒𑌦𑍍𑌯॒𑌤𑌾 𑌸𑍂𑌰𑍍𑌯𑍇॑𑌣 𑌕𑌾॒𑌰𑍍𑌯𑌃॑ । 𑌉॒𑌦𑍍𑌯𑌨𑍍𑌤𑌂॒-𑌵𑌾𑌁 𑌏॒𑌤𑌗𑍍​𑌮𑍍 𑌸𑌰𑍍𑌵𑌾𑌃᳚ 𑌪𑍍𑌰॒𑌜𑌾𑌃 𑌪𑍍𑌰𑌤𑌿॑𑌨𑌨𑍍𑌦𑌨𑍍𑌤𑌿 ॥ 𑌦𑌿॒𑌦𑍃॒𑌕𑍍𑌷𑍇𑌣𑍍𑌯𑍋॑ 𑌦𑌰𑍍​𑌶॒𑌨𑍀𑌯𑍋॑ 𑌭𑌵𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ ॥ 𑌬𑍍𑌰॒𑌹𑍍𑌮॒𑌵𑌾॒𑌦𑌿𑌨𑍋॑ 𑌵𑌦𑌨𑍍𑌤𑌿 ॥ 2𑍮 ॥

𑌅॒𑌵𑍇𑌤𑍍𑌯𑍋॑-𑌽𑌵𑌭𑍃॒𑌥𑌾(3) 𑌨𑌾(3) 𑌇𑌤𑌿॑ । 𑌯-𑌦𑍍𑌦॑𑌰𑍍𑌭𑌪𑍁𑌞𑍍𑌜𑍀॒𑌲𑍈𑌃 𑌪॒𑌵𑌯॑𑌤𑌿 । 𑌤-𑌥𑍍𑌸𑍍𑌵𑌿॑𑌦𑍇॒𑌵𑌾𑌵𑍈॑𑌤𑌿 । 𑌤𑌨𑍍𑌨𑌾𑌵𑍈॑𑌤𑌿 ॥ 𑌤𑍍𑌰𑌿॒𑌭𑌿𑌃 𑌪॑𑌵𑌯𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 । 𑌏॒𑌭𑌿𑌰𑍇॒𑌵𑍈𑌨𑌂॑-𑌲𑍋𑌁॒𑌕𑍈𑌃 𑌪॑𑌵𑌯𑌤𑌿 । 𑌅𑌥𑍋॑ 𑌅॒𑌪𑌾𑌂-𑌵𑌾𑌁 𑌏॒𑌤-𑌤𑍍𑌤𑍇𑌜𑍋॒ 𑌵𑌰𑍍𑌚𑌃॑ । 𑌯-𑌦𑍍𑌦॒𑌰𑍍𑌭𑌾𑌃 । 𑌯-𑌦𑍍𑌦॑𑌰𑍍𑌭𑌪𑍁𑌞𑍍𑌜𑍀॒𑌲𑍈𑌃 𑌪॒𑌵𑌯॑𑌤𑌿 । 𑌅॒𑌪𑌾𑌮𑍇॒𑌵𑍈𑌨॒-𑌨𑍍𑌤𑍇𑌜॑𑌸𑌾॒ 𑌵𑌰𑍍𑌚॑𑌸𑌾॒-𑌽𑌭𑌿𑌷𑌿॑𑌞𑍍𑌚𑌤𑌿 ॥ 2𑍯 ॥
(𑌭॒𑌵॒ - 𑌨𑍍𑌤𑍍𑌯𑌷𑍍𑌟𑍍𑌰𑌾॑ - 𑌮𑌵॒𑌰𑍁𑌦𑍍𑌧𑍍𑌯॑ - 𑌵𑌦𑌨𑍍𑌤𑌿 - 𑌦॒𑌰𑍍𑌭𑌾 𑌯-𑌦𑍍𑌦॑𑌰𑍍𑌭𑌪𑍁𑌞𑍍𑌜𑍀॒𑌲𑍈𑌃 𑌪॒𑌵𑌯॒𑌤𑍍𑌯𑍇𑌕॑-𑌞𑍍𑌚 ) (𑌅. 𑍯)

𑌅𑌨𑍁𑌵𑌾𑌕𑌂 10 - 𑌪𑌞𑍍𑌚𑌶𑌾𑌰𑌦𑍀𑌯𑌵𑌿𑌧𑌿𑌃
𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌬॒𑌹𑍋𑌰𑍍𑌭𑍂𑌯𑌾᳚𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌏॒𑌤-𑌮𑍍𑌪॑𑌞𑍍𑌚𑌶𑌾𑌰॒𑌦𑍀𑌯॑-𑌮𑌪𑌶𑍍𑌯𑌤𑍍 । 𑌤𑌮𑌾-𑌽𑌹॑𑌰𑌤𑍍 । 𑌤𑍇𑌨𑌾॑𑌯𑌜𑌤 । 𑌤𑌤𑍋॒ 𑌵𑍈 𑌸 𑌬॒𑌹𑍋𑌰𑍍𑌭𑍂𑌯𑌾॑-𑌨𑌭𑌵𑌤𑍍 । 𑌯𑌃 𑌕𑌾॒𑌮𑌯𑍇॑𑌤 𑌬॒𑌹𑍋𑌰𑍍𑌭𑍂𑌯𑌾᳚𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌪॑𑌞𑍍𑌚𑌶𑌾𑌰॒𑌦𑍀𑌯𑍇॑𑌨 𑌯𑌜𑍇𑌤 । 𑌬॒𑌹𑍋𑌰𑍇॒𑌵 𑌭𑍂𑌯𑌾᳚-𑌨𑍍𑌭𑌵𑌤𑌿 ॥ 𑌮॒𑌰𑍁॒-𑌥𑍍𑌸𑍍𑌤𑍋॒𑌮𑍋 𑌵𑌾 𑌏॒𑌷𑌃 । 𑌮॒𑌰𑍁𑌤𑍋॒ 𑌹𑌿 𑌦𑍇॒𑌵𑌾𑌨𑌾॒-𑌮𑍍𑌭𑍂𑌯𑌿॑𑌷𑍍𑌠𑌾𑌃 ॥ 30 ॥

𑌬॒𑌹𑍁𑌰𑍍𑌭॑𑌵𑌤𑌿 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌪॒𑌞𑍍𑌚॒𑌶𑌾॒𑌰॒𑌦𑍀𑌯𑍋॑ 𑌭𑌵𑌤𑌿 । 𑌪𑌞𑍍𑌚॒ 𑌵𑌾 𑌋॒𑌤𑌵॑-𑌸𑍍𑌸𑌂​𑌵𑌁𑌥𑍍𑌸॒𑌰𑌃 । 𑌋॒𑌤𑍁𑌷𑍍𑌵𑍇॒𑌵 𑌸𑌂॑​𑌵𑌁𑌥𑍍𑌸॒𑌰𑍇 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌥𑍋॒ 𑌪𑌞𑍍𑌚𑌾᳚𑌕𑍍𑌷𑌰𑌾 𑌪॒𑌙𑍍𑌕𑍍𑌤𑌿𑌃 । 𑌪𑌾𑌙𑍍𑌕𑍍𑌤𑍋॑ 𑌯॒𑌜𑍍𑌞𑌃 । 𑌯॒𑌜𑍍𑌞𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌸॒𑌪𑍍𑌤॒𑌦॒𑌶𑌗𑍍𑌗𑍍​ 𑌸𑍍𑌤𑍋𑌮𑌾॒ 𑌨𑌾𑌤𑌿॑𑌯𑌨𑍍𑌤𑌿 । 𑌸॒𑌪𑍍𑌤॒𑌦॒𑌶𑌃 𑌪𑍍𑌰॒𑌜𑌾𑌪॑𑌤𑌿𑌃 । 𑌪𑍍𑌰॒𑌜𑌾𑌪॑𑌤𑍇॒𑌰𑌾𑌪𑍍𑌤𑍍𑌯𑍈᳚ ॥ 31 ॥
(𑌭𑍂𑌯𑌿॑𑌷𑍍𑌠𑌾 - 𑌯𑌨𑍍𑌤𑌿॒ 𑌦𑍍𑌵𑍇 𑌚॑) (𑌅. 10)

𑌅𑌨𑍁𑌵𑌾𑌕𑌂 11 - 𑌪𑌞𑍍𑌚𑌶𑌾𑌰𑌦𑍀𑌯𑌗𑌤𑌪𑌶𑍁𑌵𑌿𑌧𑌿𑌃
𑌅॒𑌗𑌸𑍍𑌯𑍋॑ 𑌮॒𑌰𑍁𑌦𑍍𑌭𑍍𑌯॑ 𑌉॒𑌕𑍍𑌷𑍍𑌣𑌃 𑌪𑍍𑌰𑍌𑌕𑍍𑌷॑𑌤𑍍 । 𑌤𑌾𑌨𑌿𑌨𑍍𑌦𑍍𑌰॒ 𑌆𑌦॑𑌤𑍍𑌤 । 𑌤 𑌏॑𑌨𑌂॒-𑌵𑌁𑌜𑍍𑌰॑𑌮𑍁॒𑌦𑍍𑌯𑌤𑍍𑌯𑌾॒𑌭𑍍𑌯𑌾॑𑌯𑌨𑍍𑌤 । 𑌤𑌾𑌨॒𑌗𑌸𑍍𑌤𑍍𑌯॑𑌶𑍍𑌚𑍈॒𑌵𑍇𑌨𑍍𑌦𑍍𑌰॑𑌶𑍍𑌚 𑌕𑌯𑌾𑌶𑍁॒𑌭𑍀𑌯𑍇॑𑌨𑌾𑌶𑌮𑌯𑌤𑌾𑌮𑍍 । 𑌤𑌾𑌞𑍍𑌛𑌾॒-𑌨𑍍𑌤𑌾𑌨𑍁𑌪𑌾᳚𑌹𑍍𑌵𑌯𑌤 । 𑌯-𑌤𑍍𑌕॑𑌯𑌾𑌶𑍁॒𑌭𑍀𑌯॒-𑌮𑍍𑌭𑌵॑𑌤𑌿॒ 𑌶𑌾𑌨𑍍𑌤𑍍𑌯𑍈᳚ ॥ 𑌤𑌸𑍍𑌮𑌾॑𑌦𑍇॒𑌤 𑌐᳚𑌨𑍍𑌦𑍍𑌰𑌾 𑌮𑌾𑌰𑍁॒𑌤𑌾 𑌉॒𑌕𑍍𑌷𑌾𑌣॑-𑌸𑍍𑌸𑌵॒𑌨𑍀𑌯𑌾॑ 𑌭𑌵𑌨𑍍𑌤𑌿 । 𑌤𑍍𑌰𑌯𑌃॑ 𑌪𑍍𑌰𑌥॒𑌮𑍇-𑌽𑌹॒𑌨𑍍𑌨𑌾𑌲॑𑌭𑍍𑌯𑌨𑍍𑌤𑍇 । 𑌏॒𑌵-𑌨𑍍𑌦𑍍𑌵𑌿॒𑌤𑍀𑌯𑍇᳚ । 𑌏॒𑌵-𑌨𑍍𑌤𑍃॒𑌤𑍀𑌯𑍇᳚ ॥ 32 ॥

𑌏॒𑌵-𑌞𑍍𑌚॑𑌤𑍁॒𑌰𑍍𑌥𑍇 । 𑌪𑌞𑍍𑌚𑍋᳚𑌤𑍍𑌤॒𑌮𑍇-𑌽𑌹॒𑌨𑍍𑌨𑌾𑌲॑𑌭𑍍𑌯𑌨𑍍𑌤𑍇 । 𑌵𑌰𑍍​𑌷𑌿॑𑌷𑍍𑌠𑌮𑌿𑌵॒ 𑌹𑍍𑌯𑍇॑𑌤𑌦𑌹𑌃॑ ॥ 𑌵𑌰𑍍​𑌷𑌿॑𑌷𑍍𑌠-𑌸𑍍𑌸𑌮𑌾॒𑌨𑌾𑌨𑌾᳚-𑌮𑍍𑌭𑌵𑌤𑌿 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌸𑍍𑌵𑌾𑌰𑌾᳚𑌜𑍍𑌯𑌂॒-𑌵𑌾𑌁 𑌏॒𑌷 𑌯॒𑌜𑍍𑌞𑌃 । 𑌏॒𑌤𑍇𑌨॒ 𑌵𑌾 𑌏𑌕॒𑌯𑌾𑌵𑌾॑ 𑌕𑌾𑌨𑍍𑌦॒𑌮-𑌸𑍍𑌸𑍍𑌵𑌾𑌰𑌾᳚𑌜𑍍𑌯-𑌮𑌗𑌚𑍍𑌛𑌤𑍍 ॥ 𑌸𑍍𑌵𑌾𑌰𑌾᳚𑌜𑍍𑌯-𑌙𑍍𑌗𑌚𑍍𑌛𑌤𑌿 । 𑌯 𑌏॒𑌤𑍇𑌨॒ 𑌯𑌜॑𑌤𑍇 ॥ 33 ॥

𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌮𑌾॒𑌰𑍁॒𑌤𑍋 𑌵𑌾 𑌏॒𑌷 𑌸𑍍𑌤𑍋𑌮𑌃॑ । 𑌏॒𑌤𑍇𑌨॒ 𑌵𑍈 𑌮॒𑌰𑍁𑌤𑍋॑ 𑌦𑍇॒𑌵𑌾𑌨𑌾॒-𑌮𑍍𑌭𑍂𑌯𑌿॑𑌷𑍍𑌠𑌾 𑌅𑌭𑌵𑌨𑍍𑌨𑍍 । 𑌭𑍂𑌯𑌿॑𑌷𑍍𑌠-𑌸𑍍𑌸𑌮𑌾॒𑌨𑌾𑌨𑌾᳚-𑌮𑍍𑌭𑌵𑌤𑌿 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌪॒𑌞𑍍𑌚॒𑌶𑌾॒𑌰॒𑌦𑍀𑌯𑍋॒ 𑌵𑌾 𑌏॒𑌷 𑌯॒𑌜𑍍𑌞𑌃 । 𑌆 𑌪॑𑌞𑍍𑌚॒𑌮𑌾𑌤𑍍-𑌪𑍁𑌰𑍁॑𑌷𑌾॒𑌦𑌨𑍍𑌨॑𑌮𑌤𑍍𑌤𑌿 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌸॒𑌪𑍍𑌤॒𑌦॒𑌶𑌗𑍍𑌗𑍍​ 𑌸𑍍𑌤𑍋𑌮𑌾॒ 𑌨𑌾𑌤𑌿॑𑌯𑌨𑍍𑌤𑌿 । 𑌸॒𑌪𑍍𑌤॒𑌦॒𑌶𑌃 𑌪𑍍𑌰॒𑌜𑌾𑌪॑𑌤𑌿𑌃 । 𑌪𑍍𑌰॒𑌜𑌾𑌪॑𑌤𑍇𑌰𑍇॒𑌵 𑌨𑍈𑌤𑌿॑ ॥ 34 ॥
(𑌤𑍃॒𑌤𑍀𑌯𑍇॑ - 𑌗𑌚𑍍𑌛𑌤𑌿॒ 𑌯 𑌏॒𑌤𑍇𑌨॒ 𑌯𑌜॑𑌤𑍇 - 𑌽𑌤𑍍𑌤𑌿॒ 𑌯 𑌏॒𑌤𑍇𑌨॒ 𑌯𑌜॑𑌤𑍇॒ 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॒ 𑌤𑍍𑌰𑍀𑌣𑌿॑ 𑌚) (𑌅. 11)

(𑌅॒𑌗𑌸𑍍𑌤𑍍𑌯॒-𑌸𑍍𑌸𑍍𑌵𑌾𑌰𑌾᳚𑌜𑍍𑌯-𑌮𑍍𑌮𑌾𑌰𑍁॒𑌤𑌃 𑌪॑𑌞𑍍𑌚𑌶𑌾𑌰॒𑌦𑍀𑌯𑍋॒ 𑌵𑌾 𑌏॒𑌷 𑌯॒𑌜𑍍𑌞-𑌸𑍍𑌸॑𑌪𑍍𑌤𑌦॒𑌶𑌂
𑌪𑍍𑌰॒𑌜𑌾𑌪॑𑌤𑍇𑌰𑍇॒𑌵 𑌨𑍈𑌤𑌿॑)

𑌅𑌨𑍁𑌵𑌾𑌕𑌂 12 - 𑌅𑌗𑍍𑌨𑌿𑌷𑍍𑌟𑍁𑌦𑍍𑌯𑌾𑌗𑍇 𑌗𑍍𑌰𑌹𑌾𑌣𑌾-𑌮𑍍𑌪𑍁𑌰𑍋𑌰𑍁𑌚𑌃
𑌅॒𑌸𑍍𑌯𑌾𑌜𑌰𑌾॑𑌸𑍋 𑌦॒𑌮𑌾 𑌮॒𑌰𑌿𑌤𑍍𑌰𑌾𑌃᳚ । 𑌅॒𑌰𑍍𑌚𑌦𑍍𑌧𑍂॑𑌮𑌾𑌸𑍋 𑌅॒𑌗𑍍𑌨𑌯𑌃॑ 𑌪𑌾𑌵॒𑌕𑌾𑌃 । 𑌶𑍍𑌵𑌿॒𑌚𑍀॒𑌚𑌯॑-𑌶𑍍𑌶𑍍𑌵𑌾॒𑌤𑍍𑌰𑌾𑌸𑍋॑ 𑌭𑍁𑌰॒𑌣𑍍𑌯𑌵𑌃॑ । 𑌵॒𑌨॒𑌰॒.𑌷𑌦𑍋॑ 𑌵𑌾॒𑌯𑌵𑍋॒ 𑌨 𑌸𑍋𑌮𑌾𑌃᳚ ॥ 𑌯𑌜𑌾॑ 𑌨𑍋 𑌮𑌿॒𑌤𑍍𑌰𑌾𑌵𑌰𑍁॑𑌣𑌾 । 𑌯𑌜𑌾॑ 𑌦𑍇॒𑌵𑌾𑌗𑍍​𑌮𑍍 𑌋॒𑌤-𑌮𑍍𑌬𑍃॒𑌹𑌤𑍍 । 𑌅𑌗𑍍𑌨𑍇॒ 𑌯𑌕𑍍𑌷𑌿॒ 𑌸𑍍𑌵-𑌨𑍍𑌦𑌮᳚𑌮𑍍 ॥ 𑌅𑌶𑍍𑌵𑌿॑𑌨𑌾॒ 𑌪𑌿𑌬॑𑌤𑌗𑍍​𑌮𑍍 𑌸𑍁॒𑌤𑌮𑍍 । 𑌦𑍀𑌦𑍍𑌯॑𑌗𑍍𑌨𑍀 𑌶𑍁𑌚𑌿 𑌵𑍍𑌰𑌤𑌾 । 𑌋॒𑌤𑍁𑌨𑌾॑ 𑌯𑌜𑍍𑌞𑌵𑌾𑌹𑌸𑌾 ॥ 35 ॥

𑌦𑍍𑌵𑍇 𑌵𑌿𑌰𑍂॑𑌪𑍇 𑌚𑌰𑌤॒-𑌸𑍍𑌸𑍍𑌵𑌰𑍍𑌥𑍇᳚ । 𑌅॒𑌨𑍍𑌯𑌾-𑌽𑌨𑍍𑌯𑌾॑ 𑌵॒𑌥𑍍𑌸𑌮𑍁𑌪॑𑌧𑌾𑌪𑌯𑍇𑌤𑍇 । 𑌹𑌰𑌿॑𑌰॒𑌨𑍍𑌯𑌸𑍍𑌯𑌾॒-𑌮𑍍𑌭𑌵॑𑌤𑌿 𑌸𑍍𑌵॒𑌧𑌾𑌵𑌾𑌨𑍍॑ । 𑌶𑍁॒𑌕𑍍𑌰𑍋 𑌅॒𑌨𑍍𑌯𑌸𑍍𑌯𑌾᳚-𑌨𑍍𑌦𑌦𑍃𑌶𑍇 𑌸𑍁॒𑌵𑌰𑍍𑌚𑌾𑌃᳚ ॥ 𑌪𑍂॒𑌰𑍍𑌵𑌾॒𑌪॒𑌰-𑌞𑍍𑌚॑𑌰𑌤𑍋 𑌮𑌾॒𑌯𑌯𑍈॒𑌤𑍌 । 𑌶𑌿𑌶𑍂॒ 𑌕𑍍𑌰𑍀𑌡॑𑌨𑍍𑌤𑍌॒ 𑌪𑌰𑌿॑𑌯𑌾𑌤𑍋 𑌅𑌦𑍍𑌧𑍍𑌵॒𑌰𑌮𑍍 । 𑌵𑌿𑌶𑍍𑌵𑌾᳚𑌨𑍍𑌯॒𑌨𑍍𑌯𑍋 𑌭𑍁𑌵॑𑌨𑌾-𑌽𑌭𑌿॒𑌚𑌷𑍍𑌟𑍇᳚ । 𑌋॒𑌤𑍂𑌨॒𑌨𑍍𑌯𑍋 𑌵𑌿॒𑌦𑌧॑𑌜𑍍𑌜𑌾𑌯𑌤𑍇॒ 𑌪𑍁𑌨𑌃॑ ॥ 𑌤𑍍𑌰𑍀𑌣𑌿॑ 𑌶॒𑌤𑌾 𑌤𑍍𑌰𑍀𑌷॒𑌹𑌸𑍍𑌰𑌾᳚𑌣𑍍𑌯॒𑌗𑍍𑌨𑌿𑌮𑍍 । 𑌤𑍍𑌰𑌿॒𑌗𑍍​𑌮𑍍॒𑌶𑌚𑍍𑌚॑ 𑌦𑍇॒𑌵𑌾 𑌨𑌵॑ 𑌚𑌾𑌸𑌪𑌰𑍍𑌯𑌨𑍍𑌨𑍍 ॥ 36 ॥

𑌔𑌕𑍍𑌷॑𑌨𑍍-𑌘𑍃॒𑌤𑍈𑌰𑌾𑌸𑍍𑌤𑍃॑𑌣𑌨𑍍-𑌬॒𑌰𑍍॒𑌹𑌿𑌰॑𑌸𑍍𑌮𑍈 । 𑌆𑌦𑌿𑌦𑍍𑌧𑍋𑌤𑌾॑𑌰॒-𑌨𑍍𑌨𑍍𑌯॑𑌷𑌾𑌦𑌯𑌨𑍍𑌤 ॥ 𑌅॒𑌗𑍍𑌨𑌿𑌨𑌾॒-𑌽𑌗𑍍𑌨𑌿-𑌸𑍍𑌸𑌮𑌿॑𑌦𑍍𑌧𑍍𑌯𑌤𑍇 । 𑌕॒𑌵𑌿-𑌰𑍍𑌗𑍃॒𑌹𑌪॑𑌤𑌿॒𑌰𑍍𑌯𑍁𑌵𑌾᳚ । 𑌹॒𑌵𑍍𑌯॒𑌵𑌾𑌡𑍍-𑌜𑍁॒𑌹𑍍𑌵𑌾᳚𑌸𑍍𑌯𑌃 ॥ 𑌅॒𑌗𑍍𑌨𑌿-𑌰𑍍𑌦𑍇॒𑌵𑌾𑌨𑌾᳚-𑌞𑍍𑌜॒𑌠𑌰᳚𑌮𑍍 । 𑌪𑍂॒𑌤𑌦॑𑌕𑍍𑌷𑌃 𑌕॒𑌵𑌿𑌕𑍍𑌰॑𑌤𑍁𑌃 । 𑌦𑍇॒𑌵𑍋 𑌦𑍇॒𑌵𑍇𑌭𑌿॒𑌰𑌾𑌗॑𑌮𑌤𑍍 ॥ 𑌅॒𑌗𑍍𑌨𑌿॒𑌶𑍍𑌰𑌿𑌯𑍋॑ 𑌮॒𑌰𑍁𑌤𑍋॑ 𑌵𑌿॒𑌶𑍍𑌵𑌕𑍃॑𑌷𑍍𑌟𑌯𑌃 । 𑌆 𑌤𑍍𑌵𑍇॒𑌷𑌮𑍁॒𑌗𑍍𑌰𑌮𑌵॑ 𑌈𑌮𑌹𑍇 𑌵॒𑌯𑌮𑍍 ॥ 3𑍭 ॥

𑌤𑍇 𑌸𑍍𑌵𑌾॒𑌨𑌿𑌨𑍋॑ 𑌰𑍁॒𑌦𑍍𑌰𑌿𑌯𑌾॑ 𑌵॒𑌰॒.𑌷𑌨𑌿॑𑌰𑍍𑌣𑌿𑌜𑌃 । 𑌸𑌿॒𑌗𑍍​𑌮𑍍॒𑌹𑌾 𑌨 𑌹𑍇॒𑌷𑌕𑍍𑌰॑𑌤𑌵-𑌸𑍍𑌸𑍁॒𑌦𑌾𑌨॑𑌵𑌃 ॥ 𑌯𑌦𑍁॑𑌤𑍍𑌤॒𑌮𑍇 𑌮॑𑌰𑍁𑌤𑍋 𑌮𑌦𑍍𑌧𑍍𑌯॒𑌮𑍇 𑌵𑌾᳚ । 𑌯𑌦𑍍𑌵𑌾॑-𑌽𑌵॒𑌮𑍇 𑌸𑍁॑𑌭𑌗𑌾𑌸𑍋 𑌦𑌿॒𑌵𑌿𑌷𑍍𑌠 । 𑌤𑌤𑍋॑ 𑌨𑍋 𑌰𑍁𑌦𑍍𑌰𑌾 𑌉॒𑌤 𑌵𑌾॒-𑌽𑌨𑍍𑌵𑌸𑍍𑌯॑ । 𑌅𑌗𑍍𑌨𑍇॑ 𑌵𑌿॒𑌤𑍍𑌤𑌾𑌦𑍍𑌧॒𑌵𑌿𑌷𑍋॒ 𑌯𑌦𑍍𑌯𑌜𑌾॑𑌮𑌃 ॥ 𑌈𑌡𑍇॑ 𑌅॒𑌗𑍍𑌨𑌿𑌗𑍍𑌗𑍍​ 𑌸𑍍𑌵𑌵॑𑌸॒-𑌨𑍍𑌨𑌮𑍋॑𑌭𑌿𑌃 । 𑌇॒𑌹 𑌪𑍍𑌰॑𑌸॒𑌪𑍍𑌤𑍋 𑌵𑌿𑌚॑𑌯𑌤𑍍𑌕𑍃॒𑌤-𑌨𑍍𑌨𑌃॑ । 𑌰𑌥𑍈॑𑌰𑌿𑌵॒ 𑌪𑍍𑌰𑌭॑𑌰𑍇 𑌵𑌾𑌜॒𑌯𑌦𑍍𑌭𑌿𑌃॑ । 𑌪𑍍𑌰॒𑌦॒𑌕𑍍𑌷𑌿॒𑌣𑌿-𑌨𑍍𑌮॒𑌰𑍁𑌤𑌾॒𑌗𑍍॒ 𑌸𑍍𑌤𑍋𑌮॑𑌮𑍃𑌦𑍍𑌧𑍍𑌯𑌾𑌮𑍍 ॥ 3𑍮 ॥

𑌶𑍍𑌰𑍁॒𑌧𑌿 𑌶𑍍𑌰𑍁॑𑌤𑍍𑌕𑌰𑍍𑌣॒ 𑌵𑌹𑍍𑌨𑌿॑𑌭𑌿𑌃 । 𑌦𑍇॒𑌵𑍈𑌰॑𑌗𑍍𑌨𑍇 𑌸॒𑌯𑌾𑌵॑𑌭𑌿𑌃 । 𑌆𑌸𑍀॑𑌦𑌨𑍍𑌤𑍁 𑌬॒𑌰॒𑌃𑌇𑌷𑌿॑ । 𑌮𑌿॒𑌤𑍍𑌰𑍋 𑌵𑌰𑍁॑𑌣𑍋 𑌅𑌰𑍍𑌯॒𑌮𑌾 । 𑌪𑍍𑌰𑌾॒𑌤॒𑌰𑍍𑌯𑌾𑌵𑌾॑𑌣𑍋 𑌅𑌦𑍍𑌧𑍍𑌵॒𑌰𑌮𑍍 ॥ 𑌵𑌿𑌶𑍍𑌵𑍇॑𑌷𑌾॒-𑌮𑌦𑌿॑𑌤𑌿-𑌰𑍍𑌯॒𑌜𑍍𑌞𑌿𑌯𑌾॑𑌨𑌾𑌮𑍍 । 𑌵𑌿𑌶𑍍𑌵॑𑌷𑌾॒-𑌮𑌤𑌿॑𑌥𑌿॒-𑌰𑍍𑌮𑌾𑌨𑍁॑𑌷𑌾𑌣𑌾𑌮𑍍 । 𑌅॒𑌗𑍍𑌨𑌿-𑌰𑍍𑌦𑍇॒𑌵𑌾𑌨𑌾॒𑌮𑌵॑ 𑌆𑌵𑍃𑌣𑌾॒𑌨𑌃 । 𑌸𑍁॒𑌮𑍃॒𑌡𑍀॒𑌕𑍋 𑌭॑𑌵𑌤𑍁 𑌵𑌿॒𑌶𑍍𑌵𑌵𑍇॑𑌦𑌾𑌃 ॥ 𑌤𑍍𑌵𑍇 𑌅॑𑌗𑍍𑌨𑍇 𑌸𑍁𑌮॒𑌤𑌿-𑌮𑍍𑌭𑌿𑌕𑍍𑌷॑𑌮𑌾𑌣𑌾𑌃 ॥ 3𑍯 ॥

𑌦𑌿॒𑌵𑌿 𑌶𑍍𑌰𑌵𑍋॑ 𑌦𑌧𑌿𑌰𑍇 𑌯॒𑌜𑍍𑌞𑌿𑌯𑌾॑𑌸𑌃 । 𑌨𑌕𑍍𑌤𑌾॑ 𑌚 𑌚॒𑌕𑍍𑌰𑍁𑌰𑍁॒𑌷𑌸𑌾॒ 𑌵𑌿𑌰𑍂॑𑌪𑍇 । 𑌕𑍃॒𑌷𑍍𑌣-𑌞𑍍𑌚॒ 𑌵𑌰𑍍𑌣॑𑌮𑌰𑍁॒𑌣-𑌞𑍍𑌚॒ 𑌸𑌨𑍍𑌧𑍁𑌃॑ ॥ 𑌤𑍍𑌵𑌾𑌮॑𑌗𑍍𑌨 𑌆𑌦𑌿॒𑌤𑍍𑌯𑌾𑌸॑ 𑌆॒𑌸𑍍𑌯᳚𑌮𑍍 । 𑌤𑍍𑌵𑌾-𑌞𑍍𑌜𑌿॒𑌹𑍍𑌵𑌾𑌗𑍍​𑌮𑍍 𑌶𑍁𑌚॑𑌯𑌶𑍍𑌚𑌕𑍍𑌰𑌿𑌰𑍇 𑌕𑌵𑍇 । 𑌤𑍍𑌵𑌾𑌗𑍍​𑌮𑍍 𑌰𑌾॑𑌤𑌿॒𑌷𑌾𑌚𑍋॑ 𑌅𑌦𑍍𑌧𑍍𑌵॒𑌰𑍇𑌷𑍁॑ 𑌸𑌶𑍍𑌚𑌿𑌰𑍇 । 𑌤𑍍𑌵𑍇 𑌦𑍇॒𑌵𑌾 𑌹॒𑌵𑌿𑌰॑𑌦॒𑌨𑍍𑌤𑍍𑌯𑌾𑌹𑍁॑𑌤𑌮𑍍 ॥ 𑌨𑌿 𑌤𑍍𑌵𑌾॑ 𑌯॒𑌜𑍍𑌞𑌸𑍍𑌯॒ 𑌸𑌾𑌧॑𑌨𑌮𑍍 । 𑌅𑌗𑍍𑌨𑍇॒ 𑌹𑍋𑌤𑌾॑𑌰-𑌮𑍃॒𑌤𑍍𑌵𑌿𑌜᳚𑌮𑍍 । 𑌵॒𑌨𑍁॒𑌷𑍍𑌵-𑌦𑍍𑌦𑍇॑𑌵 𑌧𑍀𑌮𑌹𑌿॒ 𑌪𑍍𑌰𑌚𑍇॑𑌤𑌸𑌮𑍍 । 𑌜𑍀॒𑌰-𑌨𑍍𑌦𑍂॒𑌤𑌮𑌮॑𑌰𑍍𑌤𑍍𑌯𑌮𑍍 ॥ 40 ॥
(𑌯॒𑌜𑍍𑌞॒𑌵𑌾॒𑌹॒𑌸𑌾॒ - 𑌽𑌸॒𑌪॒𑌰𑍍𑌯॒𑌨𑍍 - 𑌵॒𑌯 - 𑌮𑍃॑𑌦𑍍𑌧𑍍𑌯𑌾𑌂॒ - 𑌭𑌿𑌕𑍍𑌷॑𑌮𑌾𑌣𑌾𑌃॒ - 𑌪𑍍𑌰𑌚𑍇॑𑌤𑌸॒𑌮𑍇𑌕॑-𑌞𑍍𑌚) (𑌅. 12)

𑌅𑌨𑍁𑌵𑌾𑌕𑌂 13 - 𑌇𑌨𑍍𑌦𑍍𑌰𑌸𑍍𑌤𑍁𑌦𑍍𑌯𑌾𑌗𑍇 𑌗𑍍𑌰𑌹𑌾𑌣𑌾-𑌮𑍍𑌪𑍁𑌰𑍋𑌰𑍁𑌚𑌃
𑌤𑌿𑌷𑍍𑌠𑌾॒ 𑌹𑌰𑍀॒ 𑌰𑌥॒ 𑌆 𑌯𑍁॒𑌜𑍍𑌯𑌮𑌾॑𑌨𑌾 𑌯𑌾॒𑌹𑌿 । 𑌵𑌾॒𑌯𑍁𑌰𑍍𑌨 𑌨𑌿॒𑌯𑍁𑌤𑍋॑ 𑌨𑍋॒ 𑌅𑌚𑍍𑌛॑ । 𑌪𑌿𑌬𑌾॒𑌸𑍍𑌯𑌨𑍍𑌧𑍋॑ 𑌅॒𑌭𑌿𑌸𑍃॑𑌷𑍍𑌟𑍋 𑌅॒𑌸𑍍𑌮𑍇 । 𑌇𑌨𑍍𑌦𑍍𑌰॒ 𑌸𑍍𑌵𑌾𑌹𑌾॑ 𑌰𑌰𑌿॒𑌮𑌾 𑌤𑍇॒ 𑌮𑌦𑌾॑𑌯 ॥ 𑌕𑌸𑍍𑌯॒ 𑌵𑍃𑌷𑌾॑ 𑌸𑍁॒𑌤𑍇 𑌸𑌚𑌾᳚ । 𑌨𑌿॒𑌯𑍁𑌤𑍍𑌵𑌾᳚𑌨𑍍 𑌵𑍃𑌷॒𑌭𑍋 𑌰॑𑌣𑌤𑍍 । 𑌵𑍃॒𑌤𑍍𑌰॒𑌹𑌾 𑌸𑍋𑌮॑𑌪𑍀𑌤𑌯𑍇 ॥ 𑌇𑌨𑍍𑌦𑍍𑌰𑌂॑-𑌵𑌁॒𑌯-𑌮𑍍𑌮॑𑌹𑌾𑌧॒𑌨𑍇 । 𑌇𑌨𑍍𑌦𑍍𑌰॒𑌮𑌰𑍍𑌭𑍇॑ 𑌹𑌵𑌾𑌮𑌹𑍇 । 𑌯𑍁𑌜𑌂॑-𑌵𑍃𑌁॒𑌤𑍍𑌰𑍇𑌷𑍁॑ 𑌵॒𑌜𑍍𑌰𑌿𑌣᳚𑌮𑍍 ॥ 41 ॥

𑌦𑍍𑌵𑌿॒𑌤𑌾𑌯𑍋 𑌵𑍃॑𑌤𑍍𑌰॒𑌹𑌨𑍍𑌤॑𑌮𑌃 । 𑌵𑌿॒𑌦 𑌇𑌨𑍍𑌦𑍍𑌰॑-𑌶𑍍𑌶॒𑌤𑌕𑍍𑌰॑𑌤𑍁𑌃 । 𑌉𑌪॑ 𑌨𑍋॒ 𑌹𑌰𑌿॑𑌭𑌿-𑌸𑍍𑌸𑍁॒𑌤𑌮𑍍 ॥ 𑌸 𑌸𑍂𑌰॒ 𑌆𑌜॒𑌨𑌯॒𑌞𑍍𑌜𑍍𑌯𑍋𑌤𑌿॒𑌰𑌿𑌨𑍍𑌦𑍍𑌰᳚𑌮𑍍 । 𑌅॒𑌯𑌾 𑌧𑌿॒𑌯𑌾 𑌤॒𑌰𑌣𑌿॒𑌰𑌦𑍍𑌰𑌿॑𑌬𑌰𑍍​𑌹𑌾𑌃 । 𑌋॒𑌤𑍇𑌨॑ 𑌶𑍁॒𑌷𑍍𑌮𑍀𑌨𑌵॑𑌮𑌾𑌨𑍋 𑌅॒𑌰𑍍𑌕𑍈𑌃 । 𑌵𑍍𑌯𑍁॑𑌸𑍍𑌰𑌿𑌧𑍋॑ 𑌅॒𑌸𑍍𑌰𑍋 𑌅𑌦𑍍𑌰𑌿॑𑌰𑍍𑌬𑌿𑌭𑍇𑌦 ॥ 𑌉॒𑌤 𑌤𑍍𑌯𑌦𑌾॒𑌶𑍍𑌵𑌶𑍍𑌵𑌿॑𑌯𑌮𑍍 । 𑌯𑌦𑌿॑𑌨𑍍𑌦𑍍𑌰॒ 𑌨𑌾𑌹𑍁॑𑌷𑍀॒𑌷𑍍𑌵𑌾 । 𑌅𑌗𑍍𑌰𑍇॑ 𑌵𑌿॒𑌕𑍍𑌷𑍁 𑌪𑍍𑌰𑌤𑍀𑌦॑𑌯𑌤𑍍 ॥ 42 ॥

𑌭𑌰𑍇॒𑌷𑍍𑌵𑌿𑌨𑍍𑌦𑍍𑌰𑌗𑍍​𑌮𑍍॑ 𑌸𑍁॒𑌹𑌵𑌗𑍍​𑌮𑍍॑ 𑌹𑌵𑌾𑌮𑌹𑍇 । 𑌅॒𑌗𑍍​𑌮𑍍॒𑌹𑍋॒𑌮𑍁𑌚𑌗𑍍​𑌮𑍍॑ 𑌸𑍁॒𑌕𑍃𑌤॒-𑌨𑍍𑌦𑍈𑌵𑍍𑌯॒𑌞𑍍𑌜𑌨᳚𑌮𑍍 । 𑌅॒𑌗𑍍𑌨𑌿-𑌮𑍍𑌮𑌿॒𑌤𑍍𑌰𑌂-𑌵𑌁𑌰𑍁॑𑌣𑌗𑍍​𑌮𑍍 𑌸𑌾॒𑌤𑌯𑍇॒ 𑌭𑌗᳚𑌮𑍍 । 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌮॒𑌰𑍁𑌤॑-𑌸𑍍𑌸𑍍𑌵॒𑌸𑍍𑌤𑌯𑍇᳚ ॥ 𑌮॒𑌹𑌿 𑌕𑍍𑌷𑍇𑌤𑍍𑌰॑-𑌮𑍍𑌪𑍁॒𑌰𑍁𑌶𑍍𑌚॒𑌨𑍍𑌦𑍍𑌰𑌂-𑌵𑌿𑌁𑌵𑌿॒𑌦𑍍𑌵𑌾𑌨𑍍 । 𑌆𑌦𑌿-𑌥𑍍𑌸𑌖𑌿॑𑌭𑍍𑌯𑌶𑍍𑌚॒ 𑌰𑌥॒𑌗𑍍​𑌮𑍍॒ 𑌸𑌮𑍈॑𑌰𑌤𑍍 । 𑌇𑌨𑍍𑌦𑍍𑌰𑍋॒ 𑌨𑍃𑌭𑌿॑𑌰𑌜𑌨॒-𑌦𑍍𑌦𑍀𑌦𑍍𑌯𑌾॑𑌨-𑌸𑍍𑌸𑌾॒𑌕𑌮𑍍 । 𑌸𑍂𑌰𑍍𑌯॑𑌮𑍁॒𑌷𑌸॑-𑌙𑍍𑌗𑌾॒𑌤𑍁𑌮॒𑌗𑍍𑌨𑌿𑌮𑍍 ॥ 𑌉॒𑌰𑍁-𑌨𑍍𑌨𑍋॑ 𑌲𑍋॒𑌕𑌮𑌨𑍁॑𑌨𑍇𑌷𑌿 𑌵𑌿॒𑌦𑍍𑌵𑌾𑌨𑍍 । 𑌸𑍁𑌵॑𑌰𑍍𑌵॒-𑌜𑍍𑌜𑍍𑌯𑍋𑌤𑌿॒𑌰𑌭॑𑌯𑌗𑍍𑌗𑍍​ 𑌸𑍍𑌵॒𑌸𑍍𑌤𑌿 ॥ 43 ॥

𑌋॒𑌷𑍍𑌵𑌾 𑌤॑ 𑌇𑌨𑍍𑌦𑍍𑌰॒ 𑌸𑍍𑌥𑌵𑌿॑𑌰𑌸𑍍𑌯 𑌬𑌾॒𑌹𑍂 । 𑌉𑌪॑𑌸𑍍𑌥𑍇𑌯𑌾𑌮 𑌶𑌰॒𑌣𑌾 𑌬𑍃॒𑌹𑌨𑍍𑌤𑌾᳚ ॥ 𑌆 𑌨𑍋॒ 𑌵𑌿𑌶𑍍𑌵𑌾॑𑌭𑌿𑌰𑍂॒𑌤𑌿𑌭𑌿॑-𑌸𑍍𑌸॒𑌜𑍋𑌷𑌾𑌃᳚ । 𑌬𑍍𑌰𑌹𑍍𑌮॑ 𑌜𑍁𑌷𑌾॒𑌣𑍋 𑌹॑𑌰𑍍𑌯𑌶𑍍𑌵 𑌯𑌾𑌹𑌿 । 𑌵𑌰𑍀॑𑌵𑍃𑌜॒-𑌥𑍍𑌸𑍍𑌥𑌵𑌿॑𑌰𑍇𑌭𑌿-𑌸𑍍𑌸𑍁𑌶𑌿𑌪𑍍𑌰 । 𑌅॒𑌸𑍍𑌮𑍇 𑌦𑌧॒-𑌦𑍍𑌵𑍃𑌷॑𑌣॒𑌗𑍍​𑌮𑍍॒ 𑌶𑍁𑌷𑍍𑌮॑𑌮𑌿𑌨𑍍𑌦𑍍𑌰 ॥ 𑌇𑌨𑍍𑌦𑍍𑌰𑌾॑𑌯॒ 𑌗𑌾𑌵॑ 𑌆॒𑌶𑌿𑌰᳚𑌮𑍍 । 𑌦𑍁॒𑌦𑍁॒𑌹𑍍𑌰𑍇 𑌵॒𑌜𑍍𑌰𑌿𑌣𑍇॒ 𑌮𑌧𑍁॑ । 𑌯-𑌥𑍍𑌸𑍀॑𑌮𑍁𑌪𑌹𑍍𑌵॒𑌰𑍇-𑌽𑌵𑌿॒𑌦𑌤𑍍 ॥ 𑌤𑌾𑌸𑍍𑌤𑍇॑ 𑌵𑌜𑍍𑌰𑌿-𑌨𑍍𑌧𑍇॒𑌨𑌵𑍋॑ 𑌜𑍋𑌜𑌯𑍁𑌰𑍍𑌨𑌃 ॥ 44 ॥

𑌗𑌭॑𑌸𑍍𑌤𑌯𑍋 𑌨𑌿॒𑌯𑍁𑌤𑍋॑ 𑌵𑌿॒𑌶𑍍𑌵𑌵𑌾॑𑌰𑌾𑌃 । 𑌅𑌹॑𑌰𑌹॒𑌰𑍍𑌭𑍂𑌯॒ 𑌇𑌜𑍍𑌜𑍋𑌗𑍁॑𑌵𑌾𑌨𑌾𑌃 । 𑌪𑍂॒𑌰𑍍𑌣𑌾 𑌇॑𑌨𑍍𑌦𑍍𑌰 𑌕𑍍𑌷𑍁॒𑌮𑌤𑍋॒ 𑌭𑍋𑌜॑𑌨𑌸𑍍𑌯 ॥ 𑌇॒𑌮𑌾-𑌨𑍍𑌤𑍇॒ 𑌧𑌿𑌯॒-𑌮𑍍𑌪𑍍𑌰𑌭॑𑌰𑍇 𑌮॒𑌹𑍋 𑌮॒𑌹𑍀𑌮𑍍 । 𑌅॒𑌸𑍍𑌯 𑌸𑍍𑌤𑍋॒𑌤𑍍𑌰𑍇 𑌧𑌿॒𑌷𑌣𑌾॒ 𑌯𑌤𑍍𑌤॑ 𑌆𑌨॒𑌜𑍇 । 𑌤𑌮𑍁॑𑌥𑍍𑌸॒𑌵𑍇 𑌚॑ 𑌪𑍍𑌰𑌸॒𑌵𑍇 𑌚॑ 𑌸𑌾𑌸॒𑌹𑌿𑌮𑍍 । 𑌇𑌨𑍍𑌦𑍍𑌰॑-𑌨𑍍𑌦𑍇॒𑌵𑌾𑌸॒-𑌶𑍍𑌶𑌵॑𑌸𑌾 𑌮𑌦॒𑌨𑍍𑌨𑌨𑍁॑ ॥ 45 ॥
(𑌵॒𑌜𑍍𑌰𑌿𑌣॑ - 𑌮𑌯𑌥𑍍 - 𑌸𑍍𑌵॒𑌸𑍍𑌤𑌿 - 𑌜𑍋॑𑌜𑌯𑍁𑌰𑍍𑌨𑌃 - +𑌸॒𑌪𑍍𑌤 𑌚॑) (𑌅. 13)

𑌅𑌨𑍁𑌵𑌾𑌕𑌂 14 - 𑌅𑌪𑍍𑌤𑍋𑌰𑍍𑌯𑌾𑌮𑌾𑌵𑌿𑌧𑌿𑌃
𑌪𑍍𑌰॒𑌜𑌾𑌪॑𑌤𑌿𑌃 𑌪॒𑌶𑍂𑌨॑𑌸𑍃𑌜𑌤 । 𑌤𑍇᳚-𑌽𑌸𑍍𑌮𑌾-𑌥𑍍𑌸𑍃॒𑌷𑍍𑌟𑌾𑌃 𑌪𑌰𑌾᳚𑌞𑍍𑌚 𑌆𑌯𑌨𑍍𑌨𑍍 । 𑌤𑌾𑌨॑𑌗𑍍𑌨𑌿𑌷𑍍𑌟𑍋॒𑌮𑍇𑌨॒ 𑌨𑌾𑌪𑍍𑌨𑍋᳚𑌤𑍍 । 𑌤𑌾𑌨𑍁॒𑌕𑍍𑌥𑍍𑌯𑍇॑𑌨॒ 𑌨𑌾𑌪𑍍𑌨𑍋᳚𑌤𑍍 । 𑌤𑌾𑌨𑍍-𑌥𑍍𑌷𑍋॑𑌡॒𑌶𑌿𑌨𑌾॒ 𑌨𑌾𑌪𑍍𑌨𑍋᳚𑌤𑍍 । 𑌤𑌾𑌨𑍍𑌰𑌾𑌤𑍍𑌰𑌿॑𑌯𑌾॒ 𑌨𑌾𑌪𑍍𑌨𑍋᳚𑌤𑍍 । 𑌤𑌾𑌨𑍍-𑌥𑍍𑌸॒𑌨𑍍𑌧𑌿𑌨𑌾॒ 𑌨𑌾𑌪𑍍𑌨𑍋᳚𑌤𑍍 । 𑌸𑍋᳚-𑌽𑌗𑍍𑌨𑌿𑌮॑𑌬𑍍𑌰𑌵𑍀𑌤𑍍 । 𑌇॒𑌮𑌾𑌨𑍍𑌮॑ 𑌈॒𑌫𑍍𑌸𑍇𑌤𑌿॑ । 𑌤𑌾𑌨॒𑌗𑍍𑌨𑌿𑌸𑍍𑌤𑍍𑌰𑌿॒𑌵𑍃𑌤𑌾॒ 𑌸𑍍𑌤𑍋𑌮𑍇॑𑌨॒ 𑌨𑌾𑌪𑍍𑌨𑍋᳚𑌤𑍍 ॥ 46 ॥

𑌸 𑌇𑌨𑍍𑌦𑍍𑌰॑𑌮𑌬𑍍𑌰𑌵𑍀𑌤𑍍 । 𑌇॒𑌮𑌾𑌨𑍍𑌮॑ 𑌈॒𑌫𑍍𑌸𑍇𑌤𑌿॑ । 𑌤𑌾𑌨𑌿𑌨𑍍𑌦𑍍𑌰𑌃॑ 𑌪𑌞𑍍𑌚𑌦॒𑌶𑍇𑌨॒ 𑌸𑍍𑌤𑍋𑌮𑍇॑𑌨॒ 𑌨𑌾𑌪𑍍𑌨𑍋᳚𑌤𑍍 । 𑌸 𑌵𑌿𑌶𑍍𑌵𑌾᳚-𑌨𑍍𑌦𑍇॒𑌵𑌾-𑌨॑𑌬𑍍𑌰𑌵𑍀𑌤𑍍 । 𑌇॒𑌮𑌾𑌨𑍍𑌮॑ 𑌈𑌫𑍍𑌸॒𑌤𑍇𑌤𑌿॑ । 𑌤𑌾𑌨𑍍. 𑌵𑌿𑌶𑍍𑌵𑍇॑ 𑌦𑍇॒𑌵𑌾-𑌸𑍍𑌸॑𑌪𑍍𑌤𑌦॒𑌶𑍇𑌨॒ 𑌸𑍍𑌤𑍋𑌮𑍇॑𑌨॒ 𑌨𑌾𑌪𑍍𑌨𑍁॑𑌵𑌨𑍍𑌨𑍍 । 𑌸 𑌵𑌿𑌷𑍍𑌣𑍁॑𑌮𑌬𑍍𑌰𑌵𑍀𑌤𑍍 । 𑌇॒𑌮𑌾𑌨𑍍𑌮॑ 𑌈॒𑌫𑍍𑌸𑍇𑌤𑌿॑ । 𑌤𑌾𑌨𑍍. 𑌵𑌿𑌷𑍍𑌣𑍁॑𑌰𑍇𑌕𑌵𑌿॒𑌗𑍍​𑌮𑍍॒𑌶𑍇𑌨॒ 𑌸𑍍𑌤𑍋𑌮𑍇॑𑌨𑌾𑌪𑍍𑌨𑍋𑌤𑍍 । 𑌵𑌾॒𑌰॒𑌵॒𑌨𑍍𑌤𑍀𑌯𑍇॑𑌨𑌾𑌵𑌾𑌰𑌯𑌤 ॥ 4𑍭 ॥

𑌇॒𑌦𑌂-𑌵𑌿𑌁𑌷𑍍𑌣𑍁॒-𑌰𑍍𑌵𑌿𑌚॑𑌕𑍍𑌰𑌮॒ 𑌇𑌤𑌿॒ 𑌵𑍍𑌯॑𑌕𑍍𑌰𑌮𑌤 ॥ 𑌯𑌸𑍍𑌮𑌾᳚-𑌤𑍍𑌪॒𑌶𑌵𑌃॒ 𑌪𑍍𑌰 𑌪𑍍𑌰𑍇𑌵॒ 𑌭𑍍𑌰𑌗𑍍​𑌮𑍍𑌶𑍇॑𑌰𑌨𑍍𑌨𑍍 । 𑌸 𑌏॒𑌤𑍇𑌨॑ 𑌯𑌜𑍇𑌤 ॥ 𑌯𑌦𑌾𑌪𑍍𑌨𑍋᳚𑌤𑍍 । 𑌤𑌦॒𑌪𑍍𑌤𑍋𑌰𑍍𑌯𑌾𑌮॑𑌸𑍍𑌯𑌾𑌪𑍍𑌤𑍋𑌰𑍍𑌯𑌾𑌮॒𑌤𑍍𑌵𑌮𑍍 ॥ 𑌏॒𑌤𑍇𑌨॒ 𑌵𑍈 𑌦𑍇॒𑌵𑌾 𑌜𑍈𑌤𑍍𑌵𑌾॑𑌨𑌿 𑌜𑌿॒𑌤𑍍𑌵𑌾 । 𑌯-𑌙𑍍𑌕𑌾𑌮॒-𑌮𑌕𑌾॑𑌮𑌯𑌨𑍍𑌤॒ 𑌤𑌮𑌾᳚𑌪𑍍𑌨𑍁𑌵𑌨𑍍𑌨𑍍 । 𑌯-𑌙𑍍𑌕𑌾𑌮॑-𑌙𑍍𑌕𑌾॒𑌮𑌯॑𑌤𑍇 । 𑌤𑌮𑍇॒𑌤𑍇𑌨𑌾᳚𑌪𑍍𑌨𑍋𑌤𑌿 ॥ 4𑍮 ॥
(𑌸𑍍𑌤𑍋𑌮𑍇॑𑌨॒ 𑌨𑌾𑌪𑍍𑌨𑍋॑ - 𑌦𑌵𑌾𑌰𑌯𑌤॒ - +𑌨𑌵॑ 𑌚) (𑌅. 14)

𑌅𑌨𑍁𑌵𑌾𑌕𑌂 15 - 𑌰𑌾𑌜𑌾𑌭𑌿𑌷𑍇𑌕𑌃
𑌵𑍍𑌯𑌾॒𑌘𑍍𑌰𑍋॑-𑌽𑌯𑌮॒𑌗𑍍𑌨𑍌 𑌚॑𑌰𑌤𑌿॒ 𑌪𑍍𑌰𑌵𑌿॑𑌷𑍍𑌟𑌃 । 𑌋𑌷𑍀॑𑌣𑌾-𑌮𑍍𑌪𑍁॒𑌤𑍍𑌰𑍋 𑌅॑𑌭𑌿𑌶𑌸𑍍𑌤𑌿॒𑌪𑌾 𑌅॒𑌯𑌮𑍍 । 𑌨॒𑌮॒𑌸𑍍𑌕𑌾॒𑌰𑍇𑌣॒ 𑌨𑌮॑𑌸𑌾 𑌤𑍇 𑌜𑍁𑌹𑍋𑌮𑌿 । 𑌮𑌾 𑌦𑍇॒𑌵𑌾𑌨𑌾᳚-𑌮𑍍𑌮𑌿𑌥𑍁॒𑌯𑌾 𑌕॑𑌰𑍍𑌮 𑌭𑌾॒𑌗𑌮𑍍 ॥ 𑌸𑌾𑌵𑍀॒𑌰॒𑌃𑌇 𑌦𑍇॑𑌵 𑌪𑍍𑌰𑌸॒𑌵𑌾𑌯॑ 𑌪𑌿𑌤𑍍𑌰𑍇 । 𑌵॒𑌰𑍍​𑌷𑍍𑌮𑌾𑌣॑𑌮𑌸𑍍𑌮𑍈 𑌵𑌰𑌿॒𑌮𑌾𑌣॑𑌮𑌸𑍍𑌮𑍈 । 𑌅𑌥𑌾॒𑌸𑍍𑌮𑌭𑍍𑌯𑌗𑍍​𑌮𑍍॑ 𑌸𑌵𑌿𑌤-𑌸𑍍𑌸॒𑌰𑍍𑌵𑌤𑌾॑𑌤𑌾 । 𑌦𑌿॒𑌵𑍇 𑌦𑌿॑𑌵॒ 𑌆𑌸𑍁॑𑌵𑌾॒ 𑌭𑍂𑌰𑌿॑𑌪॒𑌶𑍍𑌵𑌃 ॥ 𑌭𑍂॒𑌤𑍋 𑌭𑍂॒𑌤𑍇𑌷𑍁॑ 𑌚𑌰𑌤𑌿॒ 𑌪𑍍𑌰𑌵𑌿॑𑌷𑍍𑌟𑌃 । 𑌸 𑌭𑍂॒𑌤𑌾𑌨𑌾॒-𑌮𑌧𑌿॑𑌪𑌤𑌿-𑌰𑍍𑌬𑌭𑍂𑌵 ॥ 4𑍯 ॥

𑌤𑌸𑍍𑌯॑ 𑌮𑍃॒𑌤𑍍𑌯𑍌 𑌚॑𑌰𑌤𑌿 𑌰𑌾𑌜॒𑌸𑍂𑌯᳚𑌮𑍍 । 𑌸 𑌰𑌾𑌜𑌾॑ 𑌰𑌾॒𑌜𑍍𑌯-𑌮𑌨𑍁॑𑌮𑌨𑍍𑌯𑌤𑌾𑌮𑌿॒𑌦𑌮𑍍 ॥ 𑌯𑍇𑌭𑌿॒-𑌶𑍍𑌶𑌿𑌲𑍍𑌪𑍈𑌃᳚ 𑌪𑌪𑍍𑌰𑌥𑌾॒𑌨𑌾𑌮𑌦𑍃𑌗𑍍​𑌮𑍍॑𑌹𑌤𑍍 । 𑌯𑍇𑌭𑌿॒𑌦𑍍𑌰𑍍𑌯𑌾𑌮॒𑌭𑍍𑌯𑌪𑌿𑌗𑍍​𑌮𑍍॑𑌶𑌤𑍍-𑌪𑍍𑌰॒𑌜𑌾𑌪॑𑌤𑌿𑌃 । 𑌯𑍇𑌭𑌿॒𑌰𑍍𑌵𑌾𑌚𑌂॑-𑌵𑌿𑌁॒𑌶𑍍𑌵𑌰𑍂॑𑌪𑌾𑌗𑍍​𑌮𑍍 𑌸॒𑌮𑌵𑍍𑌯॑𑌯𑌤𑍍 । 𑌤𑍇𑌨𑍇॒𑌮𑌮॑𑌗𑍍𑌨 𑌇॒𑌹 𑌵𑌰𑍍𑌚॑𑌸𑌾॒ 𑌸𑌮॑𑌙𑍍𑌗𑍍𑌧𑌿 ॥ 𑌯𑍇𑌭𑌿॑𑌰𑌾𑌦𑌿॒𑌤𑍍𑌯𑌸𑍍𑌤𑌪॑𑌤𑌿॒ 𑌪𑍍𑌰𑌕𑍇॒𑌤𑍁𑌭𑌿𑌃॑ । 𑌯𑍇𑌭𑌿॒-𑌸𑍍𑌸𑍂𑌰𑍍𑌯𑍋॑ 𑌦𑌦𑍃॒𑌶𑍇 𑌚𑌿॒𑌤𑍍𑌰𑌭𑌾॑𑌨𑍁𑌃 । 𑌯𑍇𑌭𑌿॒𑌰𑍍𑌵𑌾𑌚॑-𑌮𑍍𑌪𑍁𑌷𑍍𑌕॒𑌲𑍇𑌭𑌿॒𑌰𑌵𑍍𑌯॑𑌯𑌤𑍍 । 𑌤𑍇𑌨𑍇॒𑌮𑌮॑𑌗𑍍𑌨 𑌇॒𑌹 𑌵𑌰𑍍𑌚॑𑌸𑌾॒ 𑌸𑌮॑𑌙𑍍𑌗𑍍𑌧𑌿 ॥ 50 ॥

𑌆-𑌽𑌯-𑌮𑍍𑌭𑌾॑𑌤𑍁॒ 𑌶𑌵॑𑌸𑌾॒ 𑌪𑌞𑍍𑌚॑ 𑌕𑍃॒𑌷𑍍𑌟𑍀𑌃 । 𑌇𑌨𑍍𑌦𑍍𑌰॑ 𑌇𑌵 𑌜𑍍𑌯𑍇॒𑌷𑍍𑌠𑍋 𑌭॑𑌵𑌤𑍁 𑌪𑍍𑌰॒𑌜𑌾𑌵𑌾𑌨𑍍॑ । 𑌅॒𑌸𑍍𑌮𑌾 𑌅॑𑌸𑍍𑌤𑍁 𑌪𑍁𑌷𑍍𑌕॒𑌲-𑌞𑍍𑌚𑌿॒𑌤𑍍𑌰𑌭𑌾॑𑌨𑍁 । 𑌆-𑌽𑌯-𑌮𑍍𑌪𑍃॑𑌣𑌕𑍍𑌤𑍁॒ 𑌰𑌜॑𑌸𑍀 𑌉॒𑌪𑌸𑍍𑌥᳚𑌮𑍍 ॥ 𑌯𑌤𑍍𑌤𑍇॒ 𑌶𑌿𑌲𑍍𑌪॑-𑌙𑍍𑌕𑌶𑍍𑌯𑌪 𑌰𑍋𑌚॒𑌨𑌾𑌵॑𑌤𑍍 । 𑌇॒𑌨𑍍𑌦𑍍𑌰𑌿॒𑌯𑌾𑌵॑𑌤𑍍-𑌪𑍁𑌷𑍍𑌕॒𑌲-𑌞𑍍𑌚𑌿॒𑌤𑍍𑌰𑌭𑌾॑𑌨𑍁 । 𑌯𑌸𑍍𑌮𑌿॒𑌨𑍍-𑌥𑍍𑌸𑍂𑌰𑍍𑌯𑌾॒ 𑌅𑌰𑍍𑌪𑌿॑𑌤𑌾-𑌸𑍍𑌸॒𑌪𑍍𑌤 𑌸𑌾॒𑌕𑌮𑍍 । 𑌤𑌸𑍍𑌮𑌿॒𑌨𑍍-𑌰𑌾𑌜𑌾॑𑌨॒-𑌮𑌧𑌿॒𑌵𑌿𑌶𑍍𑌰॑𑌯𑍇॒𑌮𑌮𑍍 ॥ 𑌦𑍍𑌯𑍌𑌰॑𑌸𑌿 𑌪𑍃𑌥𑌿॒𑌵𑍍𑌯॑𑌸𑌿 ॥ 𑌵𑍍𑌯𑌾॒𑌘𑍍𑌰𑍋 𑌵𑍈𑌯𑌾॒𑌘𑍍𑌰𑍇-𑌽𑌧𑌿॑ ॥ 51 ॥

𑌵𑌿𑌶𑍍𑌰॑𑌯𑌸𑍍𑌵॒ 𑌦𑌿𑌶𑍋॑ 𑌮॒𑌹𑍀𑌃 । 𑌵𑌿𑌶॑𑌸𑍍𑌤𑍍𑌵𑌾॒ 𑌸𑌰𑍍𑌵𑌾॑ 𑌵𑌾𑌞𑍍𑌛𑌨𑍍𑌤𑍁 । 𑌮𑌾 𑌤𑍍𑌵-𑌦𑍍𑌰𑌾॒𑌷𑍍𑌟𑍍𑌰𑌮𑌧𑌿॑𑌭𑍍𑌰𑌶𑌤𑍍 ॥ 𑌯𑌾 𑌦𑌿॒𑌵𑍍𑌯𑌾 𑌆𑌪𑌃॒ 𑌪𑌯॑𑌸𑌾 𑌸𑌮𑍍𑌬𑌭𑍂॒𑌵𑍁𑌃 । 𑌯𑌾 𑌅॒𑌨𑍍𑌤𑌰𑌿॑𑌕𑍍𑌷 𑌉॒𑌤 𑌪𑌾𑌰𑍍𑌥𑌿॑𑌵𑍀॒𑌰𑍍𑌯𑌾𑌃 । 𑌤𑌾 𑌸𑌾᳚-𑌨𑍍𑌤𑍍𑌵𑌾॒ 𑌸𑌰𑍍𑌵𑌾॑𑌸𑌾𑌗𑍍​𑌮𑍍 𑌰𑍁॒𑌚𑌾 । 𑌅॒𑌭𑌿𑌷𑌿॑𑌞𑍍𑌚𑌾𑌮𑌿॒ 𑌵𑌰𑍍𑌚॑𑌸𑌾 । 𑌅॒𑌭𑌿 𑌤𑍍𑌵𑌾॒ 𑌵𑌰𑍍𑌚॑𑌸𑌾 𑌸𑌿𑌚-𑌨𑍍𑌦𑌿॒𑌵𑍍𑌯𑍇𑌨॑ । 𑌪𑌯॑𑌸𑌾 𑌸॒𑌹 । 𑌯𑌥𑌾-𑌽𑌽𑌸𑌾॑ 𑌰𑌾𑌷𑍍𑌟𑍍𑌰॒𑌵𑌰𑍍𑌧॑𑌨𑌃 ॥ 52 ॥

𑌤𑌥𑌾᳚ 𑌤𑍍𑌵𑌾 𑌸𑌵𑌿॒𑌤𑌾 𑌕॑𑌰𑌤𑍍 । 𑌇𑌨𑍍𑌦𑍍𑌰𑌂॒-𑌵𑌿𑌁𑌶𑍍𑌵𑌾॑ 𑌅𑌵𑍀𑌵𑍃𑌧𑌨𑍍𑌨𑍍 । 𑌸॒𑌮𑍁॒𑌦𑍍𑌰 𑌵𑍍𑌯॑𑌚𑌸॒-𑌙𑍍𑌗𑌿𑌰𑌃॑ । 𑌰॒𑌥𑍀𑌤॑𑌮𑌗𑍍​𑌮𑍍 𑌰𑌥𑍀॒𑌨𑌾𑌮𑍍 । 𑌵𑌾𑌜𑌾॑𑌨𑌾॒𑌗𑍍​𑌮𑍍॒ 𑌸-𑌤𑍍𑌪॑𑌤𑌿॒-𑌮𑍍𑌪𑌤𑌿᳚𑌮𑍍 । 𑌵𑌸॑𑌵𑌸𑍍𑌤𑍍𑌵𑌾 𑌪𑍁॒𑌰𑌸𑍍𑌤𑌾॑𑌦॒𑌭𑌿𑌷𑌿॑𑌞𑍍𑌚𑌨𑍍𑌤𑍁 𑌗𑌾𑌯॒𑌤𑍍𑌰𑍇𑌣॒ 𑌛𑌨𑍍𑌦॑𑌸𑌾 । 𑌰𑍁॒𑌦𑍍𑌰𑌾𑌸𑍍𑌤𑍍𑌵𑌾॑ 𑌦𑌕𑍍𑌷𑌿𑌣॒𑌤𑍋॑-𑌽𑌭𑌿𑌷𑌿॑𑌞𑍍𑌚𑌨𑍍𑌤𑍁॒ 𑌤𑍍𑌰𑍈𑌷𑍍𑌟𑍁॑𑌭𑍇𑌨॒ 𑌛𑌨𑍍𑌦॑𑌸𑌾 । 𑌆॒𑌦𑌿॒𑌤𑍍𑌯𑌾𑌸𑍍𑌤𑍍𑌵𑌾॑ 𑌪॒𑌶𑍍𑌚𑌾𑌦॒𑌭𑌿𑌷𑌿॑𑌞𑍍𑌚𑌨𑍍𑌤𑍁॒ 𑌜𑌾𑌗॑𑌤𑍇𑌨॒ 𑌛𑌨𑍍𑌦॑𑌸𑌾 । 𑌵𑌿𑌶𑍍𑌵𑍇᳚ 𑌤𑍍𑌵𑌾 𑌦𑍇॒𑌵𑌾 𑌉॑𑌤𑍍𑌤𑌰॒𑌤𑍋॑-𑌽𑌭𑌿𑌷𑌿॑𑌞𑍍𑌚॒𑌨𑍍-𑌤𑍍𑌵𑌾𑌨𑍁॑𑌷𑍍𑌟𑍁𑌭𑍇𑌨॒ 𑌛𑌨𑍍𑌦॑𑌸𑌾 । 𑌬𑍃𑌹॒𑌸𑍍𑌪𑌤𑌿॑-𑌸𑍍𑌤𑍍𑌵𑍋॒𑌪𑌰𑌿॑𑌷𑍍𑌟𑌾-𑌦॒𑌭𑌿𑌷𑌿॑𑌞𑍍𑌚𑌤𑍁॒ 𑌪𑌾𑌙𑍍𑌕𑍍𑌤𑍇॑𑌨॒ 𑌛𑌨𑍍𑌦॑𑌸𑌾 ॥ 53 ॥

𑌅॒𑌰𑍁॒𑌣-𑌨𑍍𑌤𑍍𑌵𑌾॒ 𑌵𑍃𑌕॑𑌮𑍁॒𑌗𑍍𑌰-𑌙𑍍𑌖॑𑌜-𑌙𑍍𑌕॒𑌰𑌮𑍍 । 𑌰𑍋𑌚॑𑌮𑌾𑌨-𑌮𑍍𑌮॒𑌰𑍁𑌤𑌾॒𑌮𑌗𑍍𑌰𑍇॑ 𑌅॒𑌰𑍍𑌚𑌿𑌷𑌃॑ । 𑌸𑍂𑌰𑍍𑌯॑𑌵𑌨𑍍𑌤-𑌮𑍍𑌮॒𑌘𑌵𑌾॑𑌨𑌂-𑌵𑌿𑌁𑌷𑌾𑌸॒𑌹𑌿𑌮𑍍 । 𑌇𑌨𑍍𑌦𑍍𑌰॑𑌮𑍁॒𑌕𑍍𑌥𑍍𑌯𑍇𑌷𑍁॑ 𑌨𑌾𑌮॒𑌹𑍂𑌤॑𑌮𑌗𑍍​𑌮𑍍 𑌹𑍁𑌵𑍇𑌮 ॥ 𑌪𑍍𑌰 𑌬𑌾॒𑌹𑌵𑌾॑ 𑌸𑌿𑌸𑍃𑌤-𑌞𑍍𑌜𑍀॒𑌵𑌸𑍇॑ 𑌨𑌃 । 𑌆 𑌨𑍋॒ 𑌗𑌵𑍍𑌯𑍂॑𑌤𑌿𑌮𑍁𑌕𑍍𑌷𑌤-𑌙𑍍𑌘𑍃॒𑌤𑍇𑌨॑ । 𑌆 𑌨𑍋॒ 𑌜𑌨𑍇᳚ 𑌶𑍍𑌰𑌵𑌯𑌤𑌂-𑌯𑍁𑌁𑌵𑌾𑌨𑌾 । 𑌶𑍍𑌰𑍁॒𑌤-𑌮𑍍𑌮𑍇॑ 𑌮𑌿𑌤𑍍𑌰𑌾𑌵𑌰𑍁𑌣𑌾॒ 𑌹𑌵𑍇॒𑌮𑌾 ॥ 𑌇𑌨𑍍𑌦𑍍𑌰॑𑌸𑍍𑌯 𑌤𑍇 𑌵𑍀𑌰𑍍𑌯॒𑌕𑍃𑌤𑌃॑ । 𑌬𑌾॒𑌹𑍂 𑌉॒𑌪𑌾𑌵॑𑌹𑌰𑌾𑌮𑌿 ॥ 54 ॥
(𑌬॒𑌭𑍂॒ - 𑌵𑌾𑌵𑍍𑌯॑𑌯॒-𑌤𑍍𑌤𑍇𑌨𑍇॒𑌮𑌮॑𑌗𑍍𑌨 𑌇॒𑌹 𑌵𑌰𑍍𑌚॑𑌸𑌾॒ 𑌸𑌮॑𑌙𑍍𑌗𑍍𑌧𑌿॒ - 𑌵𑍈𑌯𑌾॒𑌘𑍍𑌰𑍇-𑌽𑌧𑌿॑ - 𑌰𑌾𑌷𑍍𑌟𑍍𑌰॒𑌵𑌰𑍍𑌧॑𑌨𑌃॒ - 𑌪𑌾𑌙𑍍𑌕𑍍𑌤𑍇॑𑌨॒ 𑌛𑌨𑍍𑌦॑𑌸𑍋॒ - 𑌪𑌾𑌵॑𑌹𑌰𑌾𑌮𑌿) (𑌅. 15)

𑌅𑌨𑍁𑌵𑌾𑌕𑌂 16 - 𑌰𑌾𑌜𑌾𑌭𑌿𑌷𑍇𑌕𑌾𑌙𑍍𑌗𑌂 𑌰𑌥𑌾𑌰𑍋𑌹𑌣𑌮𑍍
𑌅॒𑌭𑌿 𑌪𑍍𑌰𑍇𑌹𑌿॑ 𑌵𑍀॒𑌰𑌯॑𑌸𑍍𑌵 । 𑌉॒𑌗𑍍𑌰𑌶𑍍𑌚𑍇𑌤𑍍𑌤𑌾॑ 𑌸𑌪𑌤𑍍𑌨॒𑌹𑌾 ॥ 𑌆𑌤𑌿॑𑌷𑍍𑌠 𑌵𑍃𑌤𑍍𑌰॒𑌹𑌨𑍍𑌤॑𑌮𑌃 । 𑌤𑍁𑌭𑍍𑌯॑-𑌨𑍍𑌦𑍇॒𑌵𑌾 𑌅𑌧𑌿॑𑌬𑍍𑌰𑌵𑌨𑍍𑌨𑍍 ॥ 𑌅॒𑌙𑍍𑌕𑍌 𑌨𑍍𑌯॒𑌙𑍍𑌕𑌾𑌵॒𑌭𑌿𑌤𑍋॒ 𑌰𑌥𑌂॒-𑌯𑍌𑌁 । 𑌧𑍍𑌵𑌾॒𑌨𑍍𑌤𑌂-𑌵𑌾𑌁॑𑌤𑌾॒𑌗𑍍𑌰𑌮𑌨𑍁॑𑌸॒-𑌞𑍍𑌚𑌰॑𑌨𑍍𑌤𑍌 । 𑌦𑍂॒𑌰𑍇 𑌹𑍇॑𑌤𑌿-𑌰𑌿𑌨𑍍𑌦𑍍𑌰𑌿॒𑌯𑌾𑌵𑌾᳚-𑌨𑍍𑌪𑌤॒𑌤𑍍𑌰𑍀 । 𑌤𑍇 𑌨𑍋॒-𑌽𑌗𑍍𑌨𑌯𑌃॒ 𑌪𑌪𑍍𑌰॑𑌯𑌃 𑌪𑌾𑌰𑌯𑌨𑍍𑌤𑍁 ॥ 𑌨𑌮॑𑌸𑍍𑌤 𑌋𑌷𑍇 𑌗𑌦 । 𑌅𑌵𑍍𑌯॑𑌥𑌾𑌯𑍈 (𑌅𑌵𑍍𑌯॑𑌧𑌾𑌯𑍈) 𑌤𑍍𑌵𑌾 𑌸𑍍𑌵॒𑌧𑌾𑌯𑍈᳚ 𑌤𑍍𑌵𑌾 ॥ 55 ॥

𑌮𑌾 𑌨॑ 𑌇𑌨𑍍𑌦𑍍𑌰𑌾॒𑌭𑌿𑌤॒𑌸𑍍𑌤𑍍𑌵-𑌦𑍃॒𑌷𑍍𑌵𑌾𑌰𑌿॑𑌷𑍍𑌟𑌾𑌸𑌃 । 𑌏॒𑌵𑌾 𑌬𑍍𑌰॑𑌹𑍍𑌮॒𑌨𑍍𑌤𑌵𑍇𑌦॑𑌸𑍍𑌤𑍁 ॥ 𑌤𑌿𑌷𑍍𑌠𑌾॒ 𑌰𑌥𑍇॒ 𑌅𑌧𑌿॒ 𑌯-𑌦𑍍𑌵𑌜𑍍𑌰॑𑌹𑌸𑍍𑌤𑌃 ॥ 𑌆 𑌰॒𑌶𑍍𑌮𑍀𑌨𑍍𑌦𑍇॑𑌵 𑌯𑍁𑌵𑌸𑍇॒ 𑌸𑍍𑌵𑌶𑍍𑌵𑌃॑ ॥ 𑌅𑌬𑍋𑌵𑍇, 𑌆॒𑌤𑌿𑌷𑍍𑌠॑𑌨𑍍𑌤॒-𑌮𑍍𑌪𑌰𑌿॒ 𑌵𑌿𑌶𑍍𑌵𑍇॑ 𑌅𑌭𑍂𑌷𑌨𑍍𑌨𑍍 । 𑌶𑍍𑌰𑌿𑌯𑌂॒-𑌵𑌁𑌸𑌾॑𑌨𑌶𑍍𑌚𑌰𑌤𑌿॒ 𑌸𑍍𑌵𑌰𑍋॑𑌚𑌾𑌃 । 𑌮॒𑌹𑌤𑍍-𑌤𑌦॒𑌸𑍍𑌯𑌾𑌸𑍁॑𑌰𑌸𑍍𑌯॒ 𑌨𑌾𑌮॑ । 𑌆 𑌵𑌿॒𑌶𑍍𑌵𑌰𑍂॑𑌪𑍋 𑌅॒𑌮𑍃𑌤𑌾॑𑌨𑌿 𑌤𑌸𑍍𑌥𑍌 ॥ । 𑌅𑌨𑍁॒ 𑌤𑍍𑌵𑍇𑌨𑍍𑌦𑍍𑌰𑍋॑ 𑌮𑌦॒𑌤𑍍𑌵𑌨𑍁॒ 𑌬𑍃𑌹॒𑌸𑍍𑌪𑌤𑌿𑌃॑ । 𑌅𑌨𑍁॒ 𑌸𑍋𑌮𑍋॒ 𑌅𑌨𑍍𑌵॒𑌗𑍍𑌨𑌿𑌰𑌾॑𑌵𑍀𑌤𑍍 । 𑌅𑌨𑍁॑ 𑌤𑍍𑌵𑌾॒ 𑌵𑌿𑌶𑍍𑌵𑍇॑ 𑌦𑍇॒𑌵𑌾 𑌅॑𑌵𑌨𑍍𑌤𑍁 । 𑌅𑌨𑍁॑ 𑌸॒𑌪𑍍𑌤 𑌰𑌾𑌜𑌾॑𑌨𑍋॒ 𑌯 𑌉॒𑌤𑌾𑌭𑌿𑌷𑌿॑𑌕𑍍𑌤𑌾𑌃 ॥. 𑌅𑌨𑍁॑𑌤𑍍𑌵𑌾 𑌮𑌿॒𑌤𑍍𑌰𑌾𑌵𑌰𑍁॑𑌣𑌾𑌵𑌿॒𑌹𑌾𑌵॑𑌤𑌮𑍍 । 𑌅𑌨𑍁॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌵𑌿॒𑌶𑍍𑌵𑌶॑𑌭𑍂𑌮𑍍 । 𑌸𑍂𑌰𑍍𑌯𑍋॒ 𑌅𑌹𑍋॑𑌭𑌿॒𑌰𑌨𑍁॑ 𑌤𑍍𑌵𑌾-𑌽𑌵𑌤𑍁 । 𑌚॒𑌨𑍍𑌦𑍍𑌰𑌮𑌾॒ 𑌨𑌕𑍍𑌷॑𑌤𑍍𑌰𑍈॒𑌰𑌨𑍁॑ 𑌤𑍍𑌵𑌾 𑌽𑌵𑌤𑍁 ॥ ॥ 𑌦𑍍𑌯𑍌𑌶𑍍𑌚॑ 𑌤𑍍𑌵𑌾 𑌪𑍃𑌥𑌿॒𑌵𑍀 𑌚॒ 𑌪𑍍𑌰𑌚𑍇॑𑌤𑌸𑌾 । 𑌶𑍁॒𑌕𑍍𑌰𑍋 𑌬𑍃॒𑌹-𑌦𑍍𑌦𑌕𑍍𑌷𑌿॑𑌣𑌾 𑌤𑍍𑌵𑌾 𑌪𑌿𑌪𑌰𑍍𑌤𑍁 । 𑌅𑌨𑍁॑ 𑌸𑍍𑌵॒𑌧𑌾 𑌚𑌿𑌕𑌿𑌤𑌾॒𑌗𑍍​𑌮𑍍॒ 𑌸𑍋𑌮𑍋॑ 𑌅॒𑌗𑍍𑌨𑌿𑌃 । 𑌅𑌨𑍁॑ 𑌤𑍍𑌵𑌾-𑌽𑌵𑌤𑍁 𑌸𑌵𑌿॒𑌤𑌾 𑌸॒𑌵𑍇𑌨॑ ॥ 56 ॥

𑌇𑌨𑍍𑌦𑍍𑌰𑌂॒-𑌵𑌿𑌁𑌶𑍍𑌵𑌾॑ 𑌅𑌵𑍀𑌵𑍃𑌧𑌨𑍍𑌨𑍍 । 𑌸॒𑌮𑍁॒𑌦𑍍𑌰 𑌵𑍍𑌯॑𑌚𑌸॒-𑌙𑍍𑌗𑌿𑌰𑌃॑ । 𑌰॒𑌥𑍀𑌤॑𑌮𑌗𑍍​𑌮𑍍 𑌰𑌥𑍀॒𑌨𑌾𑌮𑍍 । 𑌵𑌾𑌜𑌾॑𑌨𑌾॒𑌗𑍍​𑌮𑍍॒ 𑌸-𑌤𑍍𑌪॑𑌤𑌿॒-𑌮𑍍𑌪𑌤𑌿᳚𑌮𑍍 ॥ 𑌪𑌰𑌿॑ 𑌮𑌾 𑌸𑍇॒𑌨𑍍𑌯𑌾 𑌘𑍋𑌷𑌾𑌃᳚ । 𑌜𑍍𑌯𑌾𑌨𑌾𑌂᳚-𑌵𑍃𑌁𑌞𑍍𑌜𑌨𑍍𑌤𑍁 𑌗𑍃॒𑌦𑍍𑌧𑍍𑌨𑌵𑌃॑ । 𑌮𑍇॒𑌥𑌿॒𑌷𑍍𑌠𑌾𑌃 𑌪𑌿𑌨𑍍𑌵॑𑌮𑌾𑌨𑌾 𑌇॒𑌹 । 𑌮𑌾-𑌙𑍍𑌗𑍋𑌪॑𑌤𑌿𑌮॒𑌭𑌿 𑌸𑌂​𑌵𑌿𑌁॑𑌶𑌨𑍍𑌤𑍁 ॥ 𑌤𑌨𑍍𑌮𑍇-𑌽𑌨𑍁॑𑌮𑌤𑌿॒-𑌰𑌨𑍁॑𑌮𑌨𑍍𑌯𑌤𑌾𑌮𑍍 । 𑌤𑌨𑍍𑌮𑌾॒𑌤𑌾 𑌪𑍃॑𑌥𑌿॒𑌵𑍀 𑌤-𑌤𑍍𑌪𑌿॒𑌤𑌾 𑌦𑍍𑌯𑍌𑌃 ॥ 5𑍭 ॥

𑌤𑌦𑍍𑌗𑍍𑌰𑌾𑌵𑌾॑𑌣-𑌸𑍍𑌸𑍋𑌮॒𑌸𑍁𑌤𑍋॑ 𑌮𑌯𑍋॒𑌭𑍁𑌵𑌃॑ । 𑌤𑌦॑𑌶𑍍𑌵𑌿𑌨𑌾 𑌶𑍃𑌣𑍁𑌤𑌗𑍍​𑌮𑍍 𑌸𑍌𑌭𑌗𑌾 𑌯𑍁॒𑌵𑌮𑍍 ॥ 𑌅𑌵॑ 𑌤𑍇॒ 𑌹𑍇𑌡𑍋॑ 𑌵𑌰𑍁𑌣॒ 𑌨𑌮𑍋॑𑌭𑌿॒𑌰𑌵॑ 𑌯॒𑌜𑍍𑌞𑍇𑌭𑌿॑𑌰𑍀𑌮𑌹𑍇 𑌹॒𑌵𑌿𑌰𑍍𑌭𑌿𑌃॑ । 𑌕𑍍𑌷𑌯॑𑌨𑍍𑌨॒𑌸𑍍𑌮𑌭𑍍𑌯॑𑌮𑌸𑍁𑌰 𑌪𑍍𑌰𑌚𑍇𑌤𑍋॒ 𑌰𑌾𑌜॒𑌨𑍍𑌨𑍇𑌨𑌾𑌗𑍍​𑌮𑍍॑𑌸𑌿 𑌶𑌿𑌶𑍍𑌰𑌥𑌃 𑌕𑍃॒𑌤𑌾𑌨𑌿॑ ॥, 𑌉𑌦𑍁॑𑌤𑍍𑌤॒𑌮𑌂-𑌵𑌁॑𑌰𑍁𑌣॒ 𑌪𑌾𑌶॑𑌮॒𑌸𑍍𑌮𑌦𑌵𑌾॑-𑌽𑌧॒𑌮𑌂-𑌵𑌿𑌁𑌮॑𑌧𑍍𑌯॒𑌮𑌗𑍍𑌗𑍍​ 𑌶𑍍𑌰॑𑌥𑌾𑌯 । 𑌅𑌥𑌾॑ 𑌵॒𑌯𑌮𑌾॑𑌦𑌿𑌤𑍍𑌯 𑌵𑍍𑌰॒𑌤𑍇 𑌤𑌵𑌾-𑌽𑌨𑌾॑𑌗𑌸𑍋॒ 𑌅𑌦𑌿॑𑌤𑌯𑍇 𑌸𑍍𑌯𑌾𑌮 ॥ ॥ 𑌏॒𑌨𑌾 𑌵𑍍𑌯𑌾॒𑌘𑍍𑌰-𑌮𑍍𑌪॑𑌰𑌿𑌷𑌸𑍍𑌵𑌜𑌾॒𑌨𑌾𑌃 । 𑌸𑌿॒𑌗𑍍​𑌮𑍍॒𑌹𑌗𑍍​𑌮𑍍 𑌹𑌿॑𑌨𑍍𑌵𑌨𑍍𑌤𑌿 𑌮𑌹॒𑌤𑍇 𑌸𑍌𑌭॑𑌗𑌾𑌯 । 𑌸॒𑌮𑍁॒𑌦𑍍𑌰-𑌨𑍍𑌨 𑌸𑍁॒𑌹𑌵॑-𑌨𑍍𑌤𑌸𑍍𑌥𑌿॒𑌵𑌾𑌗𑍍​𑌮𑍍𑌸᳚𑌮𑍍 । 𑌮॒𑌰𑍍𑌮𑍃॒𑌜𑍍𑌯𑌨𑍍𑌤𑍇᳚ 𑌦𑍍𑌵𑍀॒𑌪𑌿𑌨॑𑌮॒𑌫𑍍𑌸𑍍𑌵॑𑌨𑍍𑌤𑌃 ॥ 𑌉𑌦॒𑌸𑌾𑌵𑍇॑𑌤𑍁॒ 𑌸𑍂𑌰𑍍𑌯𑌃॑ । 𑌉𑌦𑌿॒𑌦-𑌮𑍍𑌮𑌾॑𑌮॒𑌕𑌂-𑌵𑌁𑌚𑌃॑ । 𑌉𑌦𑌿॑𑌹𑌿 𑌦𑍇𑌵 𑌸𑍂𑌰𑍍𑌯 । 𑌸॒𑌹 𑌵॒𑌗𑍍𑌨𑍁𑌨𑌾॒ 𑌮𑌮॑ । 𑌅॒𑌹𑌂-𑌵𑌾𑌁॒𑌚𑍋 𑌵𑌿॒𑌵𑌾𑌚॑𑌨𑌮𑍍 । 𑌮𑌯𑌿॒ 𑌵𑌾𑌗॑𑌸𑍍𑌤𑍁 𑌧𑌰𑍍𑌣॒𑌸𑌿𑌃 । 𑌯𑌨𑍍𑌤𑍁॑ 𑌨॒𑌦𑌯𑍋॒ 𑌵𑌰𑍍​𑌷॑𑌨𑍍𑌤𑍁 𑌪॒𑌰𑍍𑌜𑌨𑍍𑌯𑌾𑌃᳚ । 𑌸𑍁॒𑌪𑌿॒𑌪𑍍𑌪॒𑌲𑌾 𑌓𑌷॑𑌧𑌯𑍋 𑌭𑌵𑌨𑍍𑌤𑍁 ॥ 𑌅𑌨𑍍𑌨॑𑌵𑌤𑌾𑌮𑍋𑌦॒𑌨𑌵॑𑌤𑌾𑌮𑌾॒𑌮𑌿𑌕𑍍𑌷॑𑌵𑌤𑌾𑌮𑍍 । 𑌏॒𑌷𑌾𑌗𑍍​𑌮𑍍 𑌰𑌾𑌜𑌾॑ 𑌭𑍂𑌯𑌾𑌸𑌮𑍍 ॥ 5𑍮 ॥
(𑌸𑍍𑌵॒𑌧𑌾𑌯𑍈᳚ 𑌤𑍍𑌵𑌾 - 𑌸॒𑌵𑍇𑌨॒ - 𑌦𑍍𑌯𑍌𑌃 - 𑌸𑍁᳚𑌰𑍍𑌯 𑌸॒𑌪𑍍𑌤 𑌚॑) (𑌅. 16)

𑌅𑌨𑍁𑌵𑌾𑌕𑌂 1𑍭 - 𑌰𑌾𑌜𑌾𑌭𑌿𑌷𑍇𑌕𑌾𑌙𑍍𑌗𑌂-𑌵𑌁𑌪𑌨𑌮𑍍
𑌯𑍇 𑌕𑍇॒𑌶𑌿𑌨𑌃॑ 𑌪𑍍𑌰𑌥॒𑌮𑌾-𑌸𑍍𑌸॒𑌤𑍍𑌰𑌮𑌾𑌸॑𑌤 । 𑌯𑍇𑌭𑌿॒𑌰𑌾𑌭𑍃॑𑌤𑌂॒-𑌯𑌁𑌦𑌿॒𑌦𑌂-𑌵𑌿𑌁॒𑌰𑍋𑌚॑𑌤𑍇 । 𑌤𑍇𑌭𑍍𑌯𑍋॑ 𑌜𑍁𑌹𑍋𑌮𑌿 𑌬𑌹𑍁॒𑌧𑌾 𑌘𑍃॒𑌤𑍇𑌨॑ । 𑌰𑌾॒𑌯𑌸𑍍𑌪𑍋𑌷𑍇॑𑌣𑍇॒𑌮𑌂-𑌵𑌁𑌰𑍍𑌚॑𑌸𑌾॒ 𑌸𑌗𑍍​𑌮𑍍𑌸𑍃॑𑌜𑌾𑌥 ॥ 𑌨𑌰𑍍𑌤𑍇 𑌬𑍍𑌰𑌹𑍍𑌮॑𑌣॒𑌸𑍍𑌤𑌪॑𑌸𑍋 𑌵𑌿𑌮𑍋॒𑌕𑌃 । 𑌦𑍍𑌵𑌿॒𑌨𑌾𑌮𑍍𑌨𑍀॑ 𑌦𑍀॒𑌕𑍍𑌷𑌾 𑌵॒𑌶𑌿𑌨𑍀॒ 𑌹𑍍𑌯𑍁॑𑌗𑍍𑌰𑌾 । 𑌪𑍍𑌰𑌕𑍇𑌶𑌾᳚-𑌸𑍍𑌸𑍁॒𑌵𑌤𑍇॑ 𑌕𑌾॒𑌣𑍍𑌡𑌿𑌨𑍋॑ 𑌭𑌵𑌨𑍍𑌤𑌿 । 𑌤𑍇𑌷𑌾᳚-𑌮𑍍𑌬𑍍𑌰॒𑌹𑍍𑌮𑍇𑌦𑍀𑌶𑍇॒ 𑌵𑌪॑𑌨𑌸𑍍𑌯॒ 𑌨𑌾𑌨𑍍𑌯𑌃 ॥ 𑌆𑌰𑍋॑𑌹॒ 𑌪𑍍𑌰𑍋𑌷𑍍𑌠𑌂॒-𑌵𑌿𑌁𑌷॑𑌹𑌸𑍍𑌵॒ 𑌶𑌤𑍍𑌰𑍂𑌨𑍍॑ । 𑌅𑌵𑌾᳚𑌸𑍍𑌰𑌾𑌗𑍍𑌦𑍀॒𑌕𑍍𑌷𑌾 𑌵॒𑌶𑌿𑌨𑍀॒ 𑌹𑍍𑌯𑍁॑𑌗𑍍𑌰𑌾 ॥ 5𑍯 ॥

𑌦𑍇॒𑌹𑌿 𑌦𑌕𑍍𑌷𑌿॑𑌣𑌾॒-𑌮𑍍𑌪𑍍𑌰𑌤𑌿॑𑌰॒𑌸𑍍𑌵𑌾𑌯𑍁𑌃॑ । 𑌅𑌥𑌾॑ 𑌮𑍁𑌚𑍍𑌯𑌸𑍍𑌵॒ 𑌵𑌰𑍁॑𑌣𑌸𑍍𑌯॒ 𑌪𑌾𑌶𑌾᳚𑌤𑍍 ॥ 𑌯𑍇𑌨𑌾𑌵॑𑌪-𑌥𑍍𑌸𑌵𑌿॒𑌤𑌾 𑌕𑍍𑌷𑍁॒𑌰𑍇𑌣॑ । 𑌸𑍋𑌮॑𑌸𑍍𑌯॒ 𑌰𑌾𑌜𑍍𑌞𑍋॒ 𑌵𑌰𑍁॑𑌣𑌸𑍍𑌯 𑌵𑌿॒𑌦𑍍𑌵𑌾𑌨𑍍 । 𑌤𑍇𑌨॑ 𑌬𑍍𑌰𑌹𑍍𑌮𑌾𑌣𑍋 𑌵𑌪𑌤𑍇॒𑌦𑌮॒𑌸𑍍𑌯𑍋𑌰𑍍𑌜𑍇𑌮𑌮𑍍 । 𑌰॒𑌯𑍍𑌯𑌾 𑌵𑌰𑍍𑌚॑𑌸𑌾॒ 𑌸𑌗𑍍​𑌮𑍍𑌸𑍃॑𑌜𑌾𑌥 ॥ 𑌮𑌾 𑌤𑍇॒ 𑌕𑍇𑌶𑌾॒𑌨𑌨𑍁॑ 𑌗𑌾॒𑌦𑍍𑌵𑌰𑍍𑌚॑ 𑌏॒𑌤𑌤𑍍 । 𑌤𑌥𑌾॑ 𑌧𑌾॒𑌤𑌾 𑌕॑𑌰𑍋𑌤𑍁 𑌤𑍇 । 𑌤𑍁𑌭𑍍𑌯॒𑌮𑌿𑌨𑍍𑌦𑍍𑌰𑍋॒ 𑌬𑍃𑌹॒𑌸𑍍𑌪𑌤𑌿𑌃॑ । 𑌸॒𑌵𑌿॒𑌤𑌾 𑌵𑌰𑍍𑌚॒ 𑌆𑌦॑𑌧𑌾𑌤𑍍 ॥ 60 ॥

𑌤𑍇𑌭𑍍𑌯𑍋॑ 𑌨𑌿॒𑌧𑌾𑌨॑-𑌮𑍍𑌬𑌹𑍁॒𑌧𑌾 𑌵𑍍𑌯𑍈𑌚𑍍𑌛𑌨𑍍𑌨𑍍॑ । 𑌅॒𑌨𑍍𑌤॒𑌰𑌾 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌅॒𑌪-𑌸𑍍𑌸𑍁𑌵𑌃॑ । 𑌦॒𑌰𑍍𑌭॒𑌸𑍍𑌤॒𑌮𑍍𑌬𑍇 𑌵𑍀॒𑌰𑍍𑌯॑𑌕𑍃𑌤𑍇 𑌨𑌿॒𑌧𑌾𑌯॑ । 𑌪𑍌𑌗𑍍𑌗𑍍​𑌸𑍍𑌯𑍇॑𑌨𑍇॒𑌮𑌂-𑌵𑌁𑌰𑍍𑌚॑𑌸𑌾॒ 𑌸𑌗𑍍​𑌮𑍍𑌸𑍃॑𑌜𑌾𑌥 ॥ 𑌬𑌲॑-𑌨𑍍𑌤𑍇 𑌬𑌾𑌹𑍁॒𑌵𑍋-𑌸𑍍𑌸॑𑌵𑌿॒𑌤𑌾 𑌦॑𑌧𑌾𑌤𑍁 । 𑌸𑍋𑌮॑𑌸𑍍𑌤𑍍𑌵𑌾-𑌽𑌨𑌕𑍍𑌤𑍁॒ 𑌪𑌯॑𑌸𑌾 𑌘𑍃॒𑌤𑍇𑌨॑ । 𑌸𑍍𑌤𑍍𑌰𑍀॒𑌷𑍁 𑌰𑍂॒𑌪𑌮॑𑌶𑍍𑌵𑌿𑌨𑍈॒𑌤-𑌨𑍍𑌨𑌿𑌧॑𑌤𑍍𑌤𑌮𑍍 । 𑌪𑍌𑌗𑍍𑌗𑍍​𑌸𑍍𑌯𑍇॑𑌨𑍇॒𑌮𑌂-𑌵𑌁𑌰𑍍𑌚॑𑌸𑌾॒ 𑌸𑌗𑍍​𑌮𑍍𑌸𑍃॑𑌜𑌾𑌥 ॥ 𑌯-𑌥𑍍𑌸𑍀॒𑌮𑌨𑍍𑌤॒-𑌙𑍍𑌕𑌙𑍍𑌕॑𑌤𑌸𑍍𑌤𑍇 𑌲𑌿॒𑌲𑍇𑌖॑ । 𑌯𑌦𑍍𑌵𑌾᳚ 𑌕𑍍𑌷𑍁॒𑌰𑌃 𑌪॑𑌰𑌿𑌵॒𑌵𑌰𑍍𑌜॒ 𑌵𑌪𑌗𑍍𑌗𑍍॑𑌸𑍍𑌤𑍇 । 𑌸𑍍𑌤𑍍𑌰𑍀॒𑌷𑍁 𑌰𑍂॒𑌪𑌮॑𑌶𑍍𑌵𑌿𑌨𑍈॒𑌤-𑌨𑍍𑌨𑌿𑌧॑𑌤𑍍𑌤𑌮𑍍 । 𑌪𑍌𑌗𑍍𑌗𑍍​𑌸𑍍𑌯𑍇॑𑌨𑍇॒𑌮𑌗𑍍​𑌮𑍍 𑌸𑌗𑍍​𑌮𑍍𑌸𑍃॑𑌜𑌾𑌥𑍋 𑌵𑍀॒𑌰𑍍𑌯𑍇॑𑌣 ॥ 61 ॥
(𑌅𑌵𑌾᳚𑌸𑍍𑌰𑌾𑌗𑍍𑌦𑍀॒𑌕𑍍𑌷𑌾 𑌵𑌾॒𑌶𑌿𑌨𑍀॒ 𑌹𑍍𑌯𑍁॑𑌗𑍍𑌰𑌾-𑌽𑌽𑌦॑𑌧𑌾-𑌦𑍍𑌵॒𑌵𑌰𑍍𑌜॒ 𑌵𑌪𑌗𑍍𑌗𑍍॑𑌸𑍍𑌤𑍇॒ 𑌦𑍍𑌵𑍇 𑌚॑ ) (𑌅. 1𑍭)

(𑌯𑍇 𑌕𑍇॒𑌶𑌿𑌨𑍋॒ 𑌨𑌰𑍍𑌤𑍇 𑌮𑌾 𑌤𑍇॒ 𑌬𑌲𑌂॒-𑌯𑌁-𑌥𑍍𑌸𑍀॒𑌮𑌨𑍍𑌤॒-𑌮𑍍𑌪𑌞𑍍𑌚॑)

𑌅𑌨𑍁𑌵𑌾𑌕𑌂 1𑍮 - 𑌵𑌿𑌦𑍍𑌯𑌨𑌾𑌖𑍍𑌯 𑌏𑌕𑌾𑌹𑌵𑌿𑌶𑍇𑌷𑌃
𑌇𑌨𑍍𑌦𑍍𑌰𑌂॒-𑌵𑍈𑌁 𑌸𑍍𑌵𑌾 𑌵𑌿𑌶𑍋॑ 𑌮॒𑌰𑍁𑌤𑍋॒ 𑌨𑌾𑌪𑌾॑𑌚𑌾𑌯𑌨𑍍𑌨𑍍 । 𑌸𑍋-𑌽𑌨॑𑌪𑌚𑌾𑌯𑍍𑌯𑌮𑌾𑌨 𑌏॒𑌤𑌂-𑌵𑌿𑌁॑𑌘॒𑌨𑌮॑𑌪𑌶𑍍𑌯𑌤𑍍 । 𑌤𑌮𑌾-𑌽𑌹॑𑌰𑌤𑍍 । 𑌤𑍇𑌨𑌾॑𑌯𑌜𑌤 । 𑌤𑍇𑌨𑍈॒𑌵𑌾𑌸𑌾॒-𑌨𑍍𑌤𑌗𑍍​𑌮𑍍 𑌸𑌗𑍍𑌗𑍍॑𑌸𑍍𑌤॒𑌮𑍍𑌭𑌂-𑌵𑍍𑌯𑌁॑𑌹𑌨𑍍𑌨𑍍 । 𑌯-𑌦𑍍𑌵𑍍𑌯𑌹𑌨𑍍𑌨𑍍॑ । 𑌤-𑌦𑍍𑌵𑌿॑𑌘॒𑌨𑌸𑍍𑌯॑ 𑌵𑌿𑌘𑌨॒𑌤𑍍𑌵𑌮𑍍 ॥ 𑌵𑌿 𑌪𑌾॒𑌪𑍍𑌮𑌾𑌨॒-𑌮𑍍𑌭𑍍𑌰𑌾𑌤𑍃॑𑌵𑍍𑌯𑌗𑍍​𑌮𑍍 𑌹𑌤𑍇 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 62 ॥

𑌯𑌗𑍍​𑌮𑍍 𑌰𑌾𑌜𑌾॑𑌨𑌂॒-𑌵𑌿𑌁𑌶𑍋॒ 𑌨𑌾𑌪॒𑌚𑌾𑌯𑍇॑𑌯𑍁𑌃 । 𑌯𑍋 𑌵𑌾᳚ 𑌬𑍍𑌰𑌾𑌹𑍍𑌮॒𑌣𑌸𑍍𑌤𑌮॑𑌸𑌾 𑌪𑌾॒𑌪𑍍𑌮𑌨𑌾॒ 𑌪𑍍𑌰𑌾𑌵𑍃॑𑌤॒-𑌸𑍍𑌸𑍍𑌯𑌾𑌤𑍍 । 𑌸 𑌏॒𑌤𑍇𑌨॑ 𑌯𑌜𑍇𑌤 । 𑌵𑌿॒𑌘॒𑌨𑍇𑌨𑍈॒𑌵𑍈𑌨॑-𑌦𑍍𑌵𑌿॒𑌹𑌤𑍍𑌯॑ । 𑌵𑌿॒𑌶𑌾𑌮𑌾𑌧𑌿॑𑌪𑌤𑍍𑌯-𑌙𑍍𑌗𑌚𑍍𑌛𑌤𑌿 ॥ 𑌤𑌸𑍍𑌯॒ 𑌦𑍍𑌵𑍇 𑌦𑍍𑌵𑌾॑𑌦॒𑌶𑍇 𑌸𑍍𑌤𑍋॒𑌤𑍍𑌰𑍇 𑌭𑌵॑𑌤𑌃 । 𑌦𑍍𑌵𑍇 𑌚॑𑌤𑍁𑌰𑍍𑌵𑌿॒𑌗𑍍​𑌮𑍍॒𑌶𑍇 । 𑌔𑌦𑍍𑌭𑌿॑𑌦𑍍𑌯𑌮𑍇॒𑌵 𑌤𑌤𑍍 । 𑌏॒𑌤𑌦𑍍𑌵𑍈 𑌕𑍍𑌷॒𑌤𑍍𑌰𑌸𑍍𑌯𑍌𑌦𑍍𑌭𑌿॑𑌦𑍍𑌯𑌮𑍍 । 𑌯𑌦॑𑌸𑍍𑌮𑍈॒ 𑌸𑍍𑌵𑌾 𑌵𑌿𑌶𑍋॑ 𑌬॒𑌲𑌿𑌗𑍍​𑌮𑍍 𑌹𑌰॑𑌨𑍍𑌤𑌿 ॥ 63 ॥

𑌹𑌰॑𑌨𑍍𑌤𑍍𑌯𑌸𑍍𑌮𑍈॒ 𑌵𑌿𑌶𑍋॑ 𑌬॒𑌲𑌿𑌮𑍍 । 𑌐𑌨॒𑌮𑌪𑍍𑌰॑𑌤𑌿𑌖𑍍𑌯𑌾𑌤-𑌙𑍍𑌗𑌚𑍍𑌛𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ ॥ 𑌪𑍍𑌰॒𑌬𑌾𑌹𑍁॒𑌗𑍍𑌵𑌾 𑌅𑌗𑍍𑌰𑍇᳚ 𑌕𑍍𑌷॒𑌤𑍍𑌰𑌾𑌣𑍍𑌯𑌾𑌤𑍇॑𑌪𑍁𑌃 । 𑌤𑍇𑌷𑌾॒𑌮𑌿𑌨𑍍𑌦𑍍𑌰𑌃॑, 𑌕𑍍𑌷॒𑌤𑍍𑌰𑌾𑌣𑍍𑌯𑌾𑌦॑𑌤𑍍𑌤 । 𑌨 𑌵𑌾 𑌇॒𑌮𑌾𑌨𑌿॑ 𑌕𑍍𑌷॒𑌤𑍍𑌰𑌾𑌣𑍍𑌯॑ 𑌭𑍂𑌵॒𑌨𑍍𑌨𑌿𑌤𑌿॑ । 𑌤𑌨𑍍𑌨𑌕𑍍𑌷॑𑌤𑍍𑌰𑌾𑌣𑌾-𑌨𑍍𑌨𑌕𑍍𑌷𑌤𑍍𑌰॒𑌤𑍍𑌵𑌮𑍍 । 𑌆 𑌶𑍍𑌰𑍇𑌯॑𑌸𑍋॒ 𑌭𑍍𑌰𑌾𑌤𑍃॑𑌵𑍍𑌯𑌸𑍍𑌯॒ 𑌤𑍇𑌜॑ 𑌇𑌨𑍍𑌦𑍍𑌰𑌿॒𑌯-𑌨𑍍𑌦॑𑌤𑍍𑌤𑍇 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 64 ॥

𑌤-𑌦𑍍𑌯𑌥𑌾॑ 𑌹॒ 𑌵𑍈 𑌸॑𑌚𑌾॒𑌕𑍍𑌰𑌿𑌣𑍌॒ 𑌕𑌪𑍍𑌲॑𑌕𑌾𑌵𑍁॒𑌪𑌾-𑌵॑𑌹𑌿𑌤𑍌॒ 𑌸𑍍𑌯𑌾𑌤𑌾᳚𑌮𑍍 । 𑌏॒𑌵𑌮𑍇॒𑌤𑍌 𑌯𑍁॒𑌗𑍍𑌮𑌨𑍍𑌤𑍌॒ 𑌸𑍍𑌤𑍋𑌮𑍌᳚ । 𑌅॒𑌯𑍁𑌕𑍍𑌷𑍁॒ 𑌸𑍍𑌤𑍋𑌮𑍇॑𑌷𑍁 𑌕𑍍𑌰𑌿𑌯𑍇𑌤𑍇 । 𑌪𑌾॒𑌪𑍍𑌮𑌨𑍋-𑌽𑌪॑𑌹𑌤𑍍𑌯𑍈 ॥ 𑌅𑌪॑ 𑌪𑌾॒𑌪𑍍𑌮𑌾𑌨॒-𑌮𑍍𑌭𑍍𑌰𑌾𑌤𑍃॑𑌵𑍍𑌯𑌗𑍍​𑌮𑍍 𑌹𑌤𑍇 । 𑌯 𑌏॒𑌤𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌤-𑌦𑍍𑌯𑌥𑌾॑ 𑌹॒ 𑌵𑍈 𑌸𑍂॑𑌤𑌗𑍍𑌰𑌾𑌮॒𑌣𑍍𑌯𑌃॑ । 𑌏॒𑌵-𑌞𑍍𑌛𑌨𑍍𑌦𑌾𑌗𑍍​𑌮𑍍॑𑌸𑌿 । 𑌤𑍇𑌷𑍍𑌵॒𑌸𑌾𑌵𑌾॑𑌦𑌿॒𑌤𑍍𑌯𑍋 𑌬𑍃॑𑌹॒𑌤𑍀𑌰॒𑌭𑍍𑌯𑍂॑𑌢𑌃 ॥ 65 ॥

𑌸॒𑌤𑍋𑌬𑍃॑𑌹𑌤𑍀𑌷𑍁 𑌸𑍍𑌤𑍁𑌵𑌤𑍇 𑌸॒𑌤𑍋 𑌬𑍃॑𑌹𑌨𑍍𑌨𑍍 । 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑-𑌰𑌸𑌾॒𑌨𑍀𑌤𑍍𑌯𑍇॒𑌵 ॥ 𑌵𑍍𑌯𑌤𑌿॑𑌷𑌕𑍍𑌤𑌾𑌭𑌿-𑌸𑍍𑌸𑍍𑌤𑍁𑌵𑌤𑍇 । 𑌵𑍍𑌯𑌤𑌿॑𑌷𑌕𑍍𑌤𑌂॒-𑌵𑍈𑌁 𑌕𑍍𑌷॒𑌤𑍍𑌰𑌂-𑌵𑌿𑌁॒𑌶𑌾 । 𑌵𑌿॒𑌶𑍈𑌵𑍈𑌨॑-𑌙𑍍𑌕𑍍𑌷॒𑌤𑍍𑌰𑍇𑌣॒ 𑌵𑍍𑌯𑌤𑌿॑𑌷𑌜𑌤𑌿 ॥ 𑌵𑍍𑌯𑌤𑌿॑𑌷𑌕𑍍𑌤𑌾𑌭𑌿-𑌸𑍍𑌸𑍍𑌤𑍁𑌵𑌤𑍇 । 𑌵𑍍𑌯𑌤𑌿॑𑌷𑌕𑍍𑌤𑍋॒ 𑌵𑍈 𑌗𑍍𑌰𑌾॑𑌮॒𑌣𑍀-𑌸𑍍𑌸॑𑌜𑌾॒𑌤𑍈𑌃 । 𑌸॒𑌜𑌾॒𑌤𑍈𑌰𑍇॒𑌵𑍈𑌨𑌂॒-𑌵𑍍𑌯𑌁𑌤𑌿॑𑌷𑌜𑌤𑌿 ॥ 𑌵𑍍𑌯𑌤𑌿॑𑌷𑌕𑍍𑌤𑌾𑌭𑌿-𑌸𑍍𑌸𑍍𑌤𑍁𑌵𑌤𑍇 । 𑌵𑍍𑌯𑌤𑌿॑𑌷𑌕𑍍𑌤𑍋॒ 𑌵𑍈 𑌪𑍁𑌰𑍁॑𑌷𑌃 𑌪𑌾॒𑌪𑍍𑌮𑌭𑌿𑌃॑ । 𑌵𑍍𑌯𑌤𑌿॑𑌷𑌕𑍍𑌤𑌾-𑌭𑌿𑌰𑍇॒𑌵𑌾𑌸𑍍𑌯॑ 𑌪𑌾॒𑌪𑍍𑌮𑌨𑍋॑ 𑌨𑍁𑌦𑌤𑍇 ॥ 66 ॥
(𑌵𑍇𑌦॒ - 𑌹𑌰॑𑌨𑍍 - 𑌤𑍍𑌯𑍇𑌨𑌮𑍇॒𑌵𑌂-𑌵𑍇𑌁𑌦𑌾॒ - 𑌭𑍍𑌯𑍂॑𑌢𑌃 - 𑌪𑌾॒𑌪𑍍𑌮𑌭𑌿॒𑌰𑍇𑌕॑-𑌞𑍍𑌚) (𑌅. 1𑍮)

(𑌤𑍍𑌰𑌿॒𑌵𑍃--𑌦𑍍𑌯𑌦𑌾᳚𑌗𑍍𑌨𑍇॒𑌯𑍋᳚-𑌽𑌗𑍍𑌨𑌿𑌮𑍁॑𑌖𑌾॒ 𑌹𑍍𑌯𑍃𑌦𑍍𑌧𑌿॒--𑌰𑍍 𑌯𑌦𑌾᳚𑌗𑍍𑌨𑍇॒𑌯 𑌆᳚𑌗𑍍𑌨𑍇॒𑌯𑍋 - 𑌨 𑌵𑍈 𑌸𑍋𑌮𑍇॑𑌨॒ - 𑌯𑍋 𑌵𑍈 𑌸𑍋𑌮𑍇॑ - 𑌨𑍈॒𑌷 𑌗𑍋॑𑌸॒𑌵𑌃 - 𑌸𑌿॒𑌗𑍍​𑌮𑍍॒𑌹𑍇॑ - 𑌽𑌭𑌿𑌪𑍍𑌰𑍇𑌹𑌿॑ 𑌮𑌿𑌤𑍍𑌰॒𑌵𑌰𑍍𑌧॑𑌨𑌃 - 𑌪𑍍𑌰॒𑌜𑌾𑌪॑𑌤𑌿॒𑌸𑍍𑌤𑌾 𑌓॑𑌦॒𑌨𑌂 - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌬॒𑌹𑍋-𑌰𑍍𑌭𑍂𑌯𑌾॑ - 𑌨॒𑌗𑌸𑍍𑌤𑍍𑌯𑍋॒ - 𑌽𑌸𑍍𑌯𑌾𑌜𑌰𑌾॑𑌸॒ - 𑌸𑍍𑌤𑌿𑌷𑍍𑌠𑌾॒ 𑌹𑌰𑍀᳚ - 𑌪𑍍𑌰॒𑌜𑌾𑌪॑𑌤𑌿𑌃 𑌪॒𑌶𑍂𑌨𑍍 - 𑌵𑍍𑌯𑌾॒𑌘𑍍𑌰𑍋॑-𑌽𑌯𑌮॒ - 𑌭𑌿𑌪𑍍𑌰𑍇𑌹𑌿॑ 𑌵𑍃𑌤𑍍𑌰॒𑌹𑌨𑍍𑌤॑𑌮𑍋॒ - 𑌯𑍇 𑌕𑍇॒𑌶𑌿𑌨॒ - 𑌇𑌨𑍍𑌦𑍍𑌰𑌂॒-𑌵𑌾𑌁 𑌅॒𑌷𑍍𑌟𑌾𑌦॑𑌶 )

(𑌤𑍍𑌰𑌿॒𑌵𑍃--𑌦𑍍𑌯𑍋 𑌵𑍈 𑌸𑍋𑌮𑍇॒ - 𑌨𑌾𑌯𑍁॑𑌰𑌸𑌿 𑌵𑌿॒𑌶𑍍𑌵𑌾𑌯𑍁॑--𑌰𑍍 𑌬॒𑌹𑍁-𑌰𑍍𑌭॑𑌵𑌤𑌿॒ - 𑌤𑌿𑌷𑍍𑌠𑌾॒ 𑌹𑌰𑍀॒ 𑌰𑌥॒ - 𑌆-𑌽𑌯-𑌮𑍍𑌭𑌾॑𑌤𑍁॒ - 𑌤𑍇𑌭𑍍𑌯𑍋॑ 𑌨𑌿॒𑌧𑌾𑌨॒𑌗𑍍​𑌮𑍍॒ 𑌷𑌟𑍍𑌥𑍍𑌷॑𑌷𑍍𑌟𑌿𑌃)

(𑌤𑍍𑌰𑌿॒𑌵𑍃𑌤𑍍 - 𑌪𑌾॒𑌪𑍍𑌮𑌨𑍋॑ 𑌨𑍁𑌦𑌤𑍇)

॥ 𑌹𑌰𑌿𑌃॑ 𑌓𑌮𑍍 ॥

॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌸𑌪𑍍𑌤𑌮𑌃 𑌪𑍍𑌰𑌪𑌾𑌠𑌕-𑌸𑍍𑌸𑌮𑌾𑌪𑍍𑌤𑌃 ॥