𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌤𑍃𑌤𑍀𑌯𑌾𑌷𑍍𑌟𑌕𑍇 𑌨𑌵𑌮𑌃 𑌪𑍍𑌰𑌪𑌾𑌠𑌕𑌃 - 𑌅𑌷𑍍𑌟𑌾𑌦𑌶𑌿𑌨𑌾-𑌮𑍍𑌪𑌶𑍂𑌨𑌾-𑌮𑍍𑌪𑍍𑌰𑌯𑍋𑌗𑌃

𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,
𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥

(𑌅𑌶𑍍𑌵𑌮𑍇𑌧𑌸𑍍𑌯 𑌦𑍍𑌵𑌿𑌤𑍀𑌯-𑌤𑍃𑌤𑍀𑌯𑌾 𑌹𑌰𑍍𑌵𑌿𑌧𑌾𑌨𑌮𑍍)

𑌅𑌨𑍁𑌵𑌾𑌕𑌂 1 - 𑌅𑌷𑍍𑌟𑌾𑌦𑌶𑌿𑌨𑌾-𑌙𑍍𑌗𑍍𑌰𑌾𑌭𑍍𑌯𑌾𑌣𑌾𑌂 𑌆𑌰𑌣𑍍𑌯𑌾𑌨𑌾-𑌞𑍍𑌚 𑌪𑌶𑍂𑌨𑌾-𑌮𑍍𑌪𑍍𑌰𑌯𑍋𑌗𑌃
𑌪𑍍𑌰॒𑌜𑌾𑌪॑𑌤𑌿-𑌰𑌶𑍍𑌵𑌮𑍇॒𑌧𑌮॑𑌸𑍃𑌜𑌤 । 𑌸𑍋᳚-𑌽𑌸𑍍𑌮𑌾𑌥𑍍𑌸𑍃॒𑌷𑍍𑌟𑍋-𑌽𑌪𑌾᳚𑌕𑍍𑌰𑌾𑌮𑌤𑍍 ।
𑌤𑌮॑𑌷𑍍𑌟𑌾𑌦॒𑌶𑌿𑌭𑌿॒𑌰𑌨𑍁॒ 𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌮𑌾᳚𑌪𑍍𑌨𑍋𑌤𑍍 । 𑌤𑌮𑌾॒𑌪𑍍𑌤𑍍𑌵𑌾 𑌽𑌷𑍍𑌟𑌾॑𑌦॒𑌶𑌿𑌭𑌿॒𑌰𑌵𑌾॑𑌰𑍁𑌨𑍍𑌧 ।
𑌯𑌦॑𑌷𑍍𑌟𑌾𑌦॒𑌶𑌿𑌨॑ 𑌆𑌲॒𑌭𑍍𑌯𑌨𑍍𑌤𑍇᳚ । 𑌯॒𑌜𑍍𑌞𑌮𑍇॒𑌵 𑌤𑍈𑌰𑌾॒𑌪𑍍𑌤𑍍𑌵𑌾 𑌯𑌜॑𑌮𑌾॒𑌨𑍋-𑌽𑌵॑𑌰𑍁𑌨𑍍𑌧𑍇 ॥
𑌸𑌂॒​𑌵𑌁॒𑌥𑍍𑌸॒𑌰𑌸𑍍𑌯॒ 𑌵𑌾 𑌏॒𑌷𑌾 𑌪𑍍𑌰॑𑌤𑌿॒𑌮𑌾 । 𑌯𑌦॑𑌷𑍍𑌟𑌾𑌦॒𑌶𑌿𑌨𑌃॑ ।
𑌦𑍍𑌵𑌾𑌦॑𑌶॒ 𑌮𑌾𑌸𑌾𑌃॒ 𑌪𑌞𑍍𑌚॒𑌰𑍍𑌤𑌵𑌃॑ ॥ 1 ॥

𑌸𑌂॒​𑌵𑌁॒𑌥𑍍𑌸॒𑌰𑍋᳚-𑌽𑌷𑍍𑌟𑌾𑌦॒𑌶𑌃 । 𑌯𑌦॑𑌷𑍍𑌟𑌾𑌦॒𑌶𑌿𑌨॑ 𑌆𑌲॒𑌭𑍍𑌯𑌨𑍍𑌤𑍇॑ ।
𑌸𑌂॒​𑌵𑌁॒𑌥𑍍𑌸॒𑌰𑌮𑍇॒𑌵 𑌤𑍈𑌰𑌾॒𑌪𑍍𑌤𑍍𑌵𑌾
𑌯𑌜𑌮𑌾॒𑌨𑍋-𑌽𑌵॑𑌰𑍁𑌨𑍍𑌧𑍇 ॥
𑌅॒𑌗𑍍𑌨𑌿॒𑌷𑍍𑌠𑍇᳚ 𑌽𑌨𑍍𑌯𑌾-𑌨𑍍𑌪॒𑌶𑍂𑌨𑍁॑𑌪𑌾-𑌕॒𑌰𑍋𑌤𑌿॑ ।
𑌇𑌤॑𑌰𑍇𑌷𑍁॒ 𑌯𑍂𑌪𑍇᳚𑌷𑍍𑌵𑌷𑍍𑌟𑌾𑌦॒𑌶𑌿𑌨𑍋-𑌽𑌜𑌾॑𑌮𑌿𑌤𑍍𑌵𑌾𑌯 ॥
𑌨𑌵॑ 𑌨॒𑌵𑌾𑌲॑𑌭𑍍𑌯𑌨𑍍𑌤𑍇 𑌸𑌵𑍀𑌰𑍍𑌯॒𑌤𑍍𑌵𑌾𑌯॑ ॥ 𑌯𑌦𑌾॑𑌰॒𑌣𑍍𑌯𑍈-𑌸𑍍𑌸𑌗𑍍𑌗𑍍॑ 𑌸𑍍𑌥𑌾॒𑌪𑌯𑍇᳚𑌤𑍍 । 𑌵𑍍𑌯𑌵॑𑌸𑍍𑌯𑍇𑌤𑌾-𑌮𑍍𑌪𑌿𑌤𑌾 𑌪𑍁॒𑌤𑍍𑌰𑍌 । 𑌵𑍍𑌯𑌦𑍍𑌧𑍍𑌵𑌾॑𑌨𑌃 𑌕𑍍𑌰𑌾𑌮𑍇𑌯𑍁𑌃 ।
𑌵𑌿𑌦𑍂॑𑌰॒-𑌙𑍍𑌗𑍍𑌰𑌾𑌮॑𑌯𑍋 𑌰𑍍𑌗𑍍𑌰𑌾𑌮𑌾॒𑌨𑍍𑌤𑍌 𑌸𑍍𑌯𑌾॑𑌤𑌾𑌮𑍍 ॥ 2 ॥

𑌋॒𑌕𑍍𑌷𑍀𑌕𑌾𑌃᳚ 𑌪𑍁𑌰𑍁𑌷𑌵𑍍𑌯𑌾॒𑌘𑍍𑌰𑌾𑌃 𑌪॑𑌰𑌿𑌮𑍋॒𑌷𑌿𑌣॑ 𑌆𑌵𑍍𑌯𑌾॒𑌧𑌿𑌨𑍀॒-𑌸𑍍𑌤𑌸𑍍𑌕॑𑌰𑌾॒ 𑌅𑌰॑𑌣𑍍𑌯𑍇॒𑌷𑍍𑌵𑌾-𑌜𑌾॑𑌯𑍇𑌰𑌨𑍍𑌨𑍍 ॥
𑌤𑌦𑌾॑𑌹𑍁𑌃 । 𑌅𑌪॑𑌶𑌵𑍋॒ 𑌵𑌾 𑌏॒𑌤𑍇 । 𑌯𑌦𑌾॑𑌰॒𑌣𑍍𑌯𑌾𑌃 ।
𑌯𑌦𑌾॑𑌰॒𑌣𑍍𑌯𑍈-𑌸𑍍𑌸𑌗𑍍𑌗𑍍॑𑌸𑍍𑌥𑌾॒𑌪𑌯𑍇᳚𑌤 । 𑌕𑍍𑌷𑌿॒𑌪𑍍𑌰𑍇 𑌯𑌜॑𑌮𑌾𑌨॒-𑌮𑌰॑𑌣𑍍𑌯-𑌮𑍍𑌮𑍃॒𑌤𑌗𑍍​𑌮𑍍 𑌹॑𑌰𑍇𑌯𑍁𑌃 ।
𑌅𑌰॑𑌣𑍍𑌯𑌾𑌯𑌤𑌨𑌾॒ 𑌹𑍍𑌯𑌾॑𑌰॒𑌣𑍍𑌯𑌾𑌃 𑌪॒𑌶𑌵॒ 𑌇𑌤𑌿॑ । 𑌯𑌤𑍍𑌪॒𑌶𑍂𑌨𑍍𑌨𑌾𑌲𑌭𑍇॑𑌤 । 𑌅𑌨॑𑌵𑌰𑍁𑌦𑍍𑌧𑌾 𑌅𑌸𑍍𑌯 𑌪॒𑌶𑌵॑-𑌸𑍍𑌸𑍍𑌯𑍁𑌃 । 𑌯𑌤𑍍𑌪𑌰𑍍𑌯॑𑌗𑍍𑌨𑌿-𑌕𑍃𑌤𑌾𑌨𑍁𑌥𑍍𑌸𑍃॒𑌜𑍇𑌤𑍍 ॥ 3 ॥

𑌯॒𑌜𑍍𑌞॒𑌵𑍇॒𑌶॒𑌸-𑌙𑍍𑌕𑍁॑𑌰𑍍𑌯𑌾𑌤𑍍 ॥ 𑌯𑌤𑍍𑌪॒𑌶𑍂𑌨𑌾॒𑌲𑌭॑𑌤𑍇 । 𑌤𑍇𑌨𑍈॒𑌵 𑌪॒𑌶𑍂𑌨𑌵॑𑌰𑍁𑌨𑍍𑌧𑍇 ।
𑌯𑌤𑍍𑌪𑌰𑍍𑌯॑𑌗𑍍𑌨𑌿-𑌕𑍃𑌤𑌾𑌨𑍁𑌥𑍍𑌸𑍃॒𑌜𑌤𑍍𑌯-𑌯॑𑌜𑍍𑌞𑌵𑍇𑌶𑌸𑌾𑌯 ।
𑌅𑌵॑𑌰𑍁𑌦𑍍𑌧𑌾 𑌅𑌸𑍍𑌯 𑌪॒𑌶𑌵𑍋॒ 𑌭𑌵॑𑌨𑍍𑌤𑌿 ।
𑌨 𑌯॑𑌜𑍍𑌞𑌵𑍇𑌶॒ 𑌸𑌮𑍍𑌭॑𑌵𑌤𑌿 ।
𑌨 𑌯𑌜॑𑌮𑌾𑌨॒-𑌮𑌰॑𑌣𑍍𑌯-𑌮𑍍𑌮𑍃॒𑌤𑌗𑍍​𑌮𑍍 𑌹॑𑌰𑌨𑍍𑌤𑌿 ॥
𑌗𑍍𑌰𑌾॒𑌮𑍍𑌯𑍈-𑌸𑍍𑌸𑌗𑍍𑌗𑍍​𑌸𑍍𑌥𑌾॑𑌪𑌯𑌤𑌿 । 𑌏॒𑌤𑍇 𑌵𑍈 𑌪॒𑌶𑌵𑌃॒, 𑌕𑍍𑌷𑍇𑌮𑍋॒ 𑌨𑌾𑌮॑ । 𑌸-𑌮𑍍𑌪𑌿॑𑌤𑌾 𑌪𑍁॒𑌤𑍍𑌰𑌾𑌵 𑌵॑𑌸𑍍𑌯𑌤𑌃 । 𑌸𑌮𑌦𑍍𑌧𑍍𑌵𑌾॑𑌨𑌃 𑌕𑍍𑌰𑌾𑌮𑌨𑍍𑌤𑌿 ।
𑌸॒𑌮॒𑌨𑍍𑌤𑌿॒𑌕-𑌙𑍍𑌗𑍍𑌰𑌾𑌮॑𑌯𑍋-𑌰𑍍𑌗𑍍𑌰𑌾𑌮𑌾॒𑌨𑍍𑌤𑍌 𑌭॑𑌵𑌤𑌃 ।
𑌨𑌰𑍍𑌕𑍍𑌷𑍀𑌕𑌾𑌃᳚ 𑌪𑍁𑌰𑍁𑌷𑌵𑍍𑌯𑌾॒𑌘𑍍𑌰𑌾𑌃 𑌪॑𑌰𑌿𑌮𑍋॒𑌷𑌿𑌣॑ 𑌆𑌵𑍍𑌯𑌾॒𑌧𑌿𑌨𑍀॒-𑌸𑍍𑌤𑌸𑍍𑌕॑𑌰𑌾॒ 𑌅𑌰॑𑌣𑍍𑌯𑍇॒𑌷𑍍𑌵𑌾 𑌜𑌾॑𑌯𑌨𑍍𑌤𑍇 ॥ 4 ॥
(𑌋॒𑌤𑌵𑌃॑ - 𑌸𑍍𑌯𑌾𑌤𑌾 - 𑌮𑍁𑌥𑍍𑌸𑍃॒𑌜𑍇𑌥𑍍 - 𑌸𑍍𑌯॑𑌤॒𑌸𑍍𑌤𑍍𑌰𑍀𑌣𑌿॑ 𑌚)(𑌆1)

𑌅𑌨𑍁𑌵𑌾𑌕𑌂 2 - 𑌚𑌾𑌤𑍁𑌰𑍍𑌮𑌾𑌸𑍍𑌯𑌪𑌶𑍂𑌨𑌾-𑌮𑍍𑌪𑍍𑌰𑌯𑍋𑌗𑌃
𑌪𑍍𑌰॒𑌜𑌾𑌪॑𑌤𑌿𑌰-𑌕𑌾𑌮𑌯𑌤𑍋॒𑌭𑍌 𑌲𑍋॒𑌕𑌾𑌵-𑌵॑𑌰𑍁𑌨𑍍𑌧𑍀॒𑌯𑍇𑌤𑌿॑ ।
𑌸 𑌏॒𑌤𑌾𑌨𑍁॒𑌭𑌯𑌾᳚-𑌨𑍍𑌪॒𑌶𑍂𑌨॑ 𑌪𑌶𑍍𑌯𑌤𑍍 । 𑌗𑍍𑌰𑌾॒𑌮𑍍𑌯𑌾𑌗𑍍​𑌶𑍍𑌚𑌾॑-𑌰॒𑌣𑍍𑌯𑌾𑌗𑍍​𑌶𑍍𑌚॑ । 𑌤𑌾𑌨𑌾𑌲॑𑌭𑌤 ।
𑌤𑍈𑌰𑍍𑌵𑍈 𑌸 𑌉॒𑌭𑍌 𑌲𑍋॒𑌕𑌾𑌵 𑌵𑌾॑𑌰𑍁𑌨𑍍𑌧 । 𑌗𑍍𑌰𑌾॒𑌮𑍍𑌯𑍈𑌰𑍇॒𑌵 𑌪॒𑌶𑍁𑌭𑌿॑𑌰𑌿॒𑌮𑌂-𑌲𑍋𑌁॒𑌕𑌮 𑌵𑌾॑𑌰𑍁𑌨𑍍𑌧 ।
𑌆॒𑌰॒𑌣𑍍𑌯𑍈𑌰॒𑌮𑍁𑌮𑍍 । 𑌯𑌦𑍍𑌗𑍍𑌰𑌾॒𑌮𑍍𑌯𑌾-𑌨𑍍𑌪॒𑌶𑍂𑌨𑌾॒𑌲𑌭॑𑌤𑍇 ।
𑌇॒𑌮𑌮𑍇॒𑌵 𑌤𑍈𑌰𑍍𑌲𑍋॒𑌕𑌮𑌵॑𑌰𑍁𑌨𑍍𑌧𑍇 । 𑌯𑌦𑌾॑𑌰॒𑌣𑍍𑌯𑌾𑌨𑍍 ॥ 5 ॥

𑌅॒𑌮𑍁-𑌨𑍍𑌤𑍈𑌃 ॥ 𑌅𑌨॑𑌵𑌰𑍁𑌦𑍍𑌧𑍋॒ 𑌵𑌾 𑌏॒𑌤𑌸𑍍𑌯॑ 𑌸𑌂​𑌵𑌁𑌥𑍍𑌸॒𑌰 𑌇𑌤𑍍𑌯𑌾॑𑌹𑍁𑌃 । 𑌯 𑌇॒𑌤 𑌇॒𑌤𑌶𑍍𑌚𑌾𑌤𑍁𑌰𑍍𑌮𑌾॒𑌸𑍍𑌯𑌾𑌨𑌿॑ 𑌸𑌂॒​𑌵𑌁𑌥𑍍𑌸॒𑌰-𑌮𑍍𑌪𑍍𑌰॑𑌯𑍁॒𑌙𑍍𑌕𑍍𑌤 𑌇𑌤𑌿॑ ।
𑌏॒𑌤𑌾𑌵𑌾॒𑌨𑍍॒. 𑌵𑍈 𑌸𑌂॑​𑌵𑌁𑌥𑍍𑌸॒𑌰𑌃 । 𑌯𑌚𑍍𑌚𑌾॑𑌤𑍁𑌰𑍍𑌮𑌾॒𑌸𑍍𑌯𑌾𑌨𑌿॑ । 𑌯𑌦𑍇॒𑌤𑍇 𑌚𑌾𑌤𑍁॑𑌰𑍍𑌮𑌾॒𑌸𑍍𑌯𑌾𑌃 𑌪॒𑌶𑌵॑ 𑌆𑌲॒𑌭𑍍𑌯𑌨𑍍𑌤𑍇᳚ । 𑌪𑍍𑌰॒𑌤𑍍𑌯𑌕𑍍𑌷॑𑌮𑍇॒𑌵 𑌤𑍈-𑌸𑍍𑌸𑌂॑​𑌵𑌁𑌥𑍍𑌸॒𑌰𑌂-𑌯𑌁𑌜॑𑌮𑌾॒𑌨𑍋-𑌽𑌵॑𑌰𑍁𑌨𑍍𑌧𑍇 । ॥
𑌵𑌿 𑌵𑌾 𑌏॒𑌷 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑𑌰𑍍-𑌋𑌦𑍍𑌧𑍍𑌯𑌤𑍇 ।
𑌯-𑌸𑍍𑌸𑌂॑​𑌵𑌁𑌥𑍍𑌸॒𑌰-𑌮𑍍𑌪𑍍𑌰॑𑌯𑍁॒𑌙𑍍𑌕𑍍𑌤𑍇 । 𑌸𑌂॒​𑌵𑌁॒𑌥𑍍𑌸॒𑌰-𑌸𑍍𑌸𑍁॑𑌵॒𑌰𑍍𑌗𑍋 𑌲𑍋॒𑌕𑌃 ॥ 6 ॥

𑌸𑍁॒𑌵॒𑌰𑍍𑌗-𑌨𑍍𑌤𑍁 𑌲𑍋॒𑌕-𑌨𑍍𑌨𑌾𑌪॑𑌰𑌾𑌦𑍍𑌧𑍍𑌨𑍋𑌤𑌿 ।
𑌪𑍍𑌰॒𑌜𑌾 𑌵𑍈 𑌪॒𑌶𑌵॑ 𑌏𑌕𑌾𑌦॒𑌶𑌿𑌨𑍀᳚ ।
𑌯𑌦𑍇॒𑌤 𑌐॑𑌕𑌾𑌦𑌶𑌿॒𑌨𑌾𑌃 𑌪॒𑌶𑌵॑ 𑌆𑌲॒𑌭𑍍𑌯𑌨𑍍𑌤𑍇᳚ ।
𑌸𑌾॒𑌕𑍍𑌷𑌾𑌦𑍇॒𑌵 𑌪𑍍𑌰॒𑌜𑌾-𑌮𑍍𑌪॒𑌶𑍂𑌨𑍍. 𑌯𑌜॑𑌮𑌾॒𑌨𑍋-𑌽𑌵॑𑌰𑍁𑌨𑍍𑌧𑍇 ॥ 𑌪𑍍𑌰॒𑌜𑌾𑌪॑𑌤𑌿-𑌰𑍍𑌵𑌿॒𑌰𑌾𑌜॑𑌮𑌸𑍃𑌜𑌤 ।
𑌸𑌾 𑌸𑍃॒𑌷𑍍𑌟𑌾-𑌽𑌶𑍍𑌵॑𑌮𑍇॒𑌧-𑌮𑍍𑌪𑍍𑌰𑌾𑌵𑌿॑𑌶𑌤𑍍 ।
𑌤𑌾-𑌨𑍍𑌦॒𑌶𑌿𑌭𑌿॒𑌰𑌨𑍁॒ 𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌾𑌮𑌾᳚𑌪𑍍𑌨𑍋𑌤𑍍 ।
𑌤𑌾𑌮𑌾॒𑌪𑍍𑌤𑍍𑌵𑌾 𑌦॒𑌶𑌿𑌭𑌿॒𑌰𑌵𑌾॑𑌰𑍁𑌨𑍍𑌧 । 𑌯𑌦𑍍𑌦॒𑌶𑌿𑌨॑ 𑌆𑌲॒𑌭𑍍𑌯𑌨𑍍𑌤𑍇᳚ ॥ 𑍭 ॥

𑌵𑌿॒𑌰𑌾𑌜॑𑌮𑍇॒𑌵 𑌤𑍈𑌰𑌾॒𑌪𑍍𑌤𑍍𑌵𑌾 𑌯𑌜॑𑌮𑌾॒𑌨𑍋-𑌽𑌵॑𑌰𑍁𑌨𑍍𑌧𑍇 ॥
𑌏𑌕𑌾॑𑌦𑌶 𑌦॒𑌶𑌤॒ 𑌆𑌲॑𑌭𑍍𑌯𑌨𑍍𑌤𑍇 । 𑌏𑌕𑌾॑𑌦𑌶𑌾𑌕𑍍𑌷𑌰𑌾 𑌤𑍍𑌰𑌿॒𑌷𑍍𑌟𑍁𑌪𑍍 । 𑌤𑍍𑌰𑍈𑌷𑍍𑌟𑍁॑𑌭𑌾𑌃 𑌪॒𑌶𑌵𑌃॑ । 𑌪॒𑌶𑍂𑌨𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌵𑍈॒𑌶𑍍𑌵॒𑌦𑍇॒𑌵𑍋 𑌵𑌾 𑌅𑌶𑍍𑌵𑌃॑। 𑌨𑌾॒𑌨𑌾॒𑌦𑍇॒𑌵॒𑌤𑍍𑌯𑌾𑌃᳚ 𑌪॒𑌶𑌵𑍋॑ 𑌭𑌵𑌨𑍍𑌤𑌿 ।
𑌅𑌶𑍍𑌵॑𑌸𑍍𑌯 𑌸𑌰𑍍𑌵॒𑌤𑍍𑌵𑌾𑌯॑ । 𑌨𑌾𑌨𑌾॑𑌰𑍂𑌪𑌾 𑌭𑌵𑌨𑍍𑌤𑌿 । 𑌤𑌸𑍍𑌮𑌾॒𑌨𑍍𑌨𑌾𑌨𑌾॑𑌰𑍂𑌪𑌾𑌃 𑌪॒𑌶𑌵𑌃॑( ) ।
𑌬॒𑌹𑍁॒𑌰𑍂॒𑌪𑌾 𑌭॑𑌵𑌨𑍍𑌤𑌿 । 𑌤𑌸𑍍𑌮𑌾᳚-𑌦𑍍𑌬𑌹𑍁𑌰𑍂॒𑌪𑌾𑌃 𑌪॒𑌶𑌵॒-𑌸𑍍𑌸𑌮𑍃॑𑌦𑍍𑌧𑍍𑌯𑍈 ॥ 𑍮 ॥
(𑌆॒𑌰॒𑌣𑍍𑌯𑌾𑌨𑍍-𑌁𑌲𑍋॒𑌕𑍋-𑌦॒𑌶𑌿𑌨॑ 𑌆𑌲॒𑌭𑍍𑌯𑌨𑍍𑌤𑍇॒-𑌨𑌾𑌨𑌾॑𑌰𑍂𑌪𑌾𑌃 𑌪॒𑌶𑌵𑍋॒ 𑌦𑍍𑌵𑍇 𑌚॑) (𑌅. 2)

𑌅𑌨𑍁𑌵𑌾𑌕𑌂 3 - 𑌰𑍋𑌹𑌿𑌤𑌾𑌦𑍀𑌨𑌾-𑌮𑍍𑌪𑌶𑍂𑌨𑌾𑌂-𑌵𑌁𑌪𑌾𑌹𑍋𑌮𑌸𑌾𑌹𑌿𑌤𑍍𑌯𑌮𑍍
𑌅॒𑌸𑍍𑌮𑍈 𑌵𑍈 𑌲𑍋॒𑌕𑌾𑌯॑ 𑌗𑍍𑌰𑌾॒𑌮𑍍𑌯𑌾𑌃 𑌪॒𑌶𑌵॒ 𑌆𑌲॑𑌭𑍍𑌯𑌨𑍍𑌤𑍇 । 𑌅॒𑌮𑍁𑌷𑍍𑌮𑌾॑ 𑌆𑌰॒𑌣𑍍𑌯𑌾𑌃 । 𑌯𑌦𑍍𑌗𑍍𑌰𑌾॒𑌮𑍍𑌯𑌾-𑌨𑍍𑌪॒𑌶𑍂𑌨𑌾॒𑌲𑌭॑𑌤𑍇 । 𑌇॒𑌮𑌮𑍇॒𑌵 𑌤𑍈𑌰𑍍𑌲𑍋॒𑌕𑌮𑌵॑𑌰𑍁𑌨𑍍𑌧𑍇 । 𑌯𑌦𑌾॑𑌰॒𑌣𑍍𑌯𑌾𑌨𑍍 । 𑌅॒𑌮𑍁-𑌨𑍍𑌤𑍈𑌃 । 𑌉॒𑌭𑌯𑌾᳚-𑌨𑍍𑌪॒𑌶𑍂𑌨𑌾𑌲॑𑌭𑌤𑍇 । 𑌗𑍍𑌰𑌾॒𑌮𑍍𑌯𑌾𑌗𑍍​𑌶𑍍𑌚𑌾॑-𑌰॒𑌣𑍍𑌯𑌾𑌗𑍍​𑌶𑍍𑌚॑ ।
𑌉॒𑌭𑌯𑍋᳚-𑌰𑍍𑌲𑍋॒𑌕𑌯𑍋॒𑌰 𑌵॑𑌰𑍁𑌦𑍍𑌧𑍍𑌯𑍈 । 𑌉॒𑌭𑌯𑌾᳚-𑌨𑍍𑌪॒𑌶𑍂𑌨𑌾𑌲॑𑌭𑌤𑍇 ॥ 𑍯 ॥

𑌗𑍍𑌰𑌾॒𑌮𑍍𑌯𑌾𑌗𑍍​𑌶𑍍𑌚𑌾॑-𑌰॒𑌣𑍍𑌯𑌾𑌗𑍍​𑌶𑍍𑌚॑ । 𑌉॒𑌭𑌯॑𑌸𑍍𑌯𑌾॒-𑌨𑍍𑌨𑌾𑌦𑍍𑌯॒𑌸𑍍𑌯𑌾-𑌵॑𑌰𑍁𑌦𑍍𑌧𑍍𑌯𑍈 । 𑌉𑌭𑌯𑌾᳚-𑌨𑍍𑌪॒𑌶𑍂𑌨𑌾𑌲𑌭𑌤𑍇 । 𑌗𑍍𑌰𑌾𑌮𑍍𑌯𑌾𑌗𑍍​𑌶𑍍𑌚𑌾॑𑌰॒𑌣𑍍𑌯𑌾𑌗𑍍​𑌶𑍍𑌚॑ ।
𑌉॒𑌭𑌯𑍇॑𑌷𑌾-𑌮𑍍𑌪𑌶𑍂॒𑌨𑌾𑌮𑌵॑𑌰𑍁𑌦𑍍𑌧𑍍𑌯𑍈 ॥
𑌤𑍍𑌰𑌯॑𑌸𑍍𑌤𑍍𑌰𑌯𑍋 𑌭𑌵𑌨𑍍𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 ।
𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॒𑌮𑌾𑌪𑍍𑌤𑍍𑌯𑍈᳚ ॥ 𑌬𑍍𑌰॒𑌹𑍍𑌮॒𑌵𑌾॒𑌦𑌿𑌨𑍋॑ 𑌵𑌦𑌨𑍍𑌤𑌿 । 𑌕𑌸𑍍𑌮𑌾᳚𑌥𑍍𑌸॒𑌤𑍍𑌯𑌾𑌤𑍍 ॥ 10 ॥

𑌅॒𑌸𑍍𑌮𑌿𑌨𑍍 𑌁𑌲𑍋॒𑌕𑍇 𑌬॒𑌹𑌵𑌃॒ 𑌕𑌾𑌮𑌾॒ 𑌇𑌤𑌿॑ ।
𑌯𑌥𑍍𑌸॑𑌮𑌾॒𑌨𑍀𑌭𑍍𑌯𑍋॑ 𑌦𑍇॒𑌵𑌤𑌾᳚𑌭𑍍𑌯𑍋॒-𑌽𑌨𑍍𑌯𑍇᳚-𑌽𑌨𑍍𑌯𑍇 𑌪॒𑌶𑌵॑ 𑌆𑌲॒𑌭𑍍𑌯𑌨𑍍𑌤𑍇᳚ । 𑌅॒𑌸𑍍𑌮𑌿𑌨𑍍𑌨𑍇॒𑌵 𑌤𑌲𑍍𑌲𑍋॒𑌕𑍇 𑌕𑌾𑌮𑌾᳚𑌨𑍍𑌦𑌧𑌾𑌤𑌿 । 𑌤𑌸𑍍𑌮𑌾॑𑌦॒𑌸𑍍𑌮𑌿𑌨𑍍-𑌁𑌲𑍋॒𑌕𑍇 𑌬॒𑌹𑌵𑌃॒ 𑌕𑌾𑌮𑌾𑌃᳚ ॥ 𑌤𑍍𑌰॒𑌯𑌾॒𑌣𑌾-𑌨𑍍𑌤𑍍𑌰॑𑌯𑌾𑌣𑌾𑌗𑍍​𑌮𑍍 𑌸॒𑌹 𑌵॒𑌪𑌾 𑌜𑍁॑𑌹𑍋𑌤𑌿 । 𑌤𑍍𑌰𑍍𑌯𑌾॑𑌵𑍃𑌤𑍋॒ 𑌵𑍈 𑌦𑍇॒𑌵𑌾𑌃 ।
𑌤𑍍𑌰𑍍𑌯𑌾॑𑌵𑍃𑌤 𑌇॒𑌮𑍇 𑌲𑍋॒𑌕𑌾𑌃 । 𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॒𑌮𑌾𑌪𑍍𑌤𑍍𑌯𑍈᳚ । 𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॒-𑌙𑍍𑌕𑍍𑌲𑍃𑌪𑍍𑌤𑍍𑌯𑍈᳚ ॥ 𑌪𑌰𑍍𑌯॑𑌗𑍍𑌨𑌿-𑌕𑍃𑌤𑌾-𑌨𑌾𑌰॒𑌣𑍍𑌯𑌾-𑌨𑍁𑌥𑍍𑌸𑍃॑𑌜॒𑌨𑍍𑌤𑍍𑌯𑌹𑌿𑌗𑍍​𑌮𑍍॑𑌸𑌾𑌯𑍈 ॥ 11 ॥
(𑌅𑌵॑𑌰𑍁𑌦𑍍𑌧𑍍𑌯𑌾 𑌉॒𑌭𑌯𑌾᳚-𑌨𑍍𑌪॒𑌶𑍂𑌨𑌾𑌲॑𑌭𑌤𑍇 - 𑌸॒𑌤𑍍𑌯𑌾 - 𑌦𑌹𑌿𑌗𑍍​𑌮𑍍॑𑌸𑌾𑌯𑍈)(𑌆3)

𑌅𑌨𑍁𑌵𑌾𑌕𑌂 4 - 𑌅𑌶𑍍𑌵𑌸𑍍𑌯 𑌰𑌥𑌯𑍋𑌜𑌨𑌾𑌲𑌙𑍍𑌕𑌾𑌰𑌾𑌦𑌯𑌃
𑌯𑍁॒𑌞𑍍𑌜𑌨𑍍𑌤𑌿॑ 𑌬𑍍𑌰॒𑌦𑍍𑌧𑍍𑌨𑌮𑌿𑌤𑍍𑌯𑌾॑𑌹 । 𑌅॒𑌸𑍌 𑌵𑌾 𑌆॑𑌦𑌿॒𑌤𑍍𑌯𑍋 𑌬𑍍𑌰॒𑌦𑍍𑌧𑍍𑌨𑌃 । 𑌆॒𑌦𑌿॒𑌤𑍍𑌯-𑌮𑍇॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 । 𑌅॒𑌰𑍁॒𑌷𑌮𑌿𑌤𑍍𑌯𑌾॑𑌹 । 𑌅॒𑌗𑍍𑌨𑌿𑌰𑍍𑌵𑌾 𑌅॑𑌰𑍁॒𑌷𑌃 ।
𑌅॒𑌗𑍍𑌨𑌿𑌮𑍇॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 । 𑌚𑌰॑𑌨𑍍𑌤॒𑌮𑌿𑌤𑍍𑌯𑌾॑𑌹 । 𑌵𑌾॒𑌯𑍁𑌰𑍍𑌵𑍈 𑌚𑌰𑌨𑍍𑌨𑍍॑ । 𑌵𑌾॒𑌯𑍁𑌮𑍇॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 । 𑌪𑌰𑌿॑𑌤॒𑌸𑍍𑌥𑍁𑌷॒ 𑌇𑌤𑍍𑌯𑌾॑𑌹 ॥ 12 ॥

𑌇॒𑌮𑍇 𑌵𑍈 𑌲𑍋॒𑌕𑌾𑌃 𑌪𑌰𑌿॑𑌤॒𑌸𑍍𑌥𑍁𑌷𑌃॑ । 𑌇॒𑌮𑌨𑍇॒𑌵𑌾𑌸𑍍𑌮𑍈॑ 𑌲𑍋॒𑌕𑌾𑌨𑍍. 𑌯𑍁॑𑌨𑌕𑍍𑌤𑌿 ॥ 𑌰𑍋𑌚॑𑌨𑍍𑌤𑍇 𑌰𑍋𑌚॒𑌨𑌾 𑌦𑌿॒𑌵𑍀𑌤𑍍𑌯𑌾॑𑌹 । 𑌨𑌕𑍍𑌷॑𑌤𑍍𑌰𑌾𑌣𑌿॒ 𑌵𑍈 𑌰𑍋॑𑌚॒𑌨𑌾 𑌦𑌿॒𑌵𑌿 ।
𑌨𑌕𑍍𑌷॑𑌤𑍍𑌰𑌾𑌣𑍍𑌯𑍇॒𑌵𑌾𑌸𑍍𑌮𑍈॑ 𑌰𑍋𑌚𑌯𑌤𑌿 ॥ 𑌯𑍁॒𑌞𑍍𑌜𑌨𑍍𑌤𑍍𑌯॑𑌸𑍍𑌯॒ 𑌕𑌾𑌮𑍍𑌯𑍇𑌤𑍍𑌯𑌾॑𑌹 । 𑌕𑌾𑌮𑌾॑𑌨𑍇॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 ॥ 𑌹𑌰𑍀॒ 𑌵𑌿𑌪॑𑌕𑍍𑌷॒𑌸𑍇𑌤𑍍𑌯𑌾॑𑌹 ।
𑌇॒𑌮𑍇 𑌵𑍈 𑌹𑌰𑍀॒ 𑌵𑌿𑌪॑𑌕𑍍𑌷𑌸𑌾 । 𑌇॒𑌮𑍇 𑌏॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 ॥ 13 ॥

𑌶𑍋𑌣𑌾॑ 𑌧𑍃॒𑌷𑍍𑌣𑍂 𑌨𑍃॒𑌵𑌾𑌹॒𑌸𑍇𑌤𑍍𑌯𑌾॑𑌹 । 𑌅॒𑌹𑍋॒𑌰𑌾॒𑌤𑍍𑌰𑍇 𑌵𑍈 𑌨𑍃॒𑌵𑌾𑌹॑𑌸𑌾 । 𑌅॒𑌹𑍋॒𑌰𑌾॒𑌤𑍍𑌰𑍇 𑌏॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 ॥ 𑌏॒𑌤𑌾 𑌏॒𑌵𑌾𑌸𑍍𑌮𑍈॑ 𑌦𑍇॒𑌵𑌤𑌾॑ 𑌯𑍁𑌨𑌕𑍍𑌤𑌿 ।
𑌸𑍁॒𑌵॒𑌰𑍍𑌗𑌸𑍍𑌯॑ 𑌲𑍋॒𑌕𑌸𑍍𑌯॒ 𑌸𑌮॑𑌷𑍍𑌟𑍍𑌯𑍈 ॥
𑌕𑍇॒𑌤𑍁-𑌙𑍍𑌕𑍃॒𑌣𑍍𑌵𑌨𑍍𑌨॑-𑌕𑍇॒𑌤𑌵॒ 𑌇𑌤𑌿॑ 𑌦𑍍𑌧𑍍𑌵॒𑌜-𑌮𑍍𑌪𑍍𑌰𑌤𑌿॑𑌮𑍁𑌞𑍍𑌚𑌤𑌿 । 𑌯𑌶॑ 𑌏॒𑌵𑍈𑌨॒𑌗𑍍​𑌮𑍍॒ 𑌰𑌾𑌜𑍍𑌞𑌾᳚-𑌙𑍍𑌗𑌮𑌯𑌤𑌿 ॥ 𑌜𑍀॒𑌮𑍂𑌤॑𑌸𑍍𑌯𑍇𑌵 𑌭𑌵𑌤𑌿॒ 𑌪𑍍𑌰𑌤𑍀॑𑌕॒𑌮𑌿𑌤𑍍𑌯𑌾॑𑌹 । 𑌯॒𑌥𑌾॒ 𑌯॒𑌜𑍁𑌰𑍇॒𑌵𑍈𑌤𑌤𑍍 ॥ 𑌯𑍇 𑌤𑍇॒ 𑌪𑌨𑍍𑌥𑌾॑𑌨-𑌸𑍍𑌸𑌵𑌿𑌤𑌃 𑌪𑍂॒𑌰𑍍𑌵𑍍𑌯𑌾𑌸॒ 𑌇𑌤𑍍𑌯॑𑌦𑍍𑌧𑍍𑌵॒𑌰𑍍𑌯𑍁-𑌰𑍍𑌯𑌜॑𑌮𑌾𑌨𑌂
𑌁𑌵𑌾𑌚𑌯𑌤𑍍𑌯॒𑌭𑌿𑌜𑌿॑𑌤𑍍𑌯𑍈 ॥ 14 ॥

𑌪𑌰𑌾॒ 𑌵𑌾 𑌏॒𑌤𑌸𑍍𑌯॑ 𑌯॒𑌜𑍍𑌞 𑌏॑𑌤𑌿 । 𑌯𑌸𑍍𑌯॑ 𑌪॒𑌶𑍁𑌰𑍁॒𑌪𑌾-𑌕𑍃॑𑌤𑍋॒-𑌽𑌨𑍍𑌯𑌤𑍍𑌰॒ 𑌵𑍇𑌦𑍍𑌯𑌾॒ 𑌏𑌤𑌿॑ । 𑌏𑌤𑌗𑍍𑌗𑍍​ 𑌸𑍍𑌤𑍋॑𑌤𑌰𑍇॒𑌤𑍇𑌨॑ 𑌪॒𑌥𑌾 𑌪𑍁𑌨॒𑌰𑌶𑍍𑌵॒-𑌮𑌾𑌵॑𑌰𑍍𑌤𑌯𑌾𑌸𑌿 𑌨॒ 𑌇𑌤𑍍𑌯𑌾॑𑌹 ।
𑌵𑌾॒𑌯𑍁𑌰𑍍𑌵𑍈 𑌸𑍍𑌤𑍋𑌤𑌾᳚ । 𑌵𑌾॒𑌯𑍁𑌮𑍇॒𑌵𑌾𑌸𑍍𑌯॑ 𑌪॒𑌰𑌸𑍍𑌤𑌾᳚-𑌦𑍍𑌦𑌧𑌾॒𑌤𑍍𑌯𑌾𑌵𑍃॑𑌤𑍍𑌤𑍍𑌯𑍈 ॥ 𑌯𑌥𑌾॒ 𑌵𑍈 𑌹॒𑌵𑌿𑌷𑍋॑ 𑌗𑍃𑌹𑍀॒𑌤𑌸𑍍𑌯॒ 𑌸𑍍𑌕𑌨𑍍𑌦॑𑌤𑌿 । 𑌏॒𑌵𑌂-𑌵𑌾𑌁 𑌏॒𑌤𑌦𑌶𑍍𑌵॑𑌸𑍍𑌯 𑌸𑍍𑌕𑌨𑍍𑌦𑌤𑌿 । 𑌯𑌦॑𑌸𑍍𑌯𑍋॒𑌪𑌾𑌕𑍃॑𑌤𑌸𑍍𑌯॒ 𑌲𑍋𑌮𑌾॑𑌨𑌿॒ 𑌶𑍀𑌯॑𑌨𑍍𑌤𑍇 । 𑌯𑌦𑍍𑌵𑌾𑌲𑍇॑𑌷𑍁 𑌕𑌾॒𑌚𑌾𑌨𑌾॒𑌵𑌯॑𑌨𑍍𑌤𑌿 ।
𑌲𑍋𑌮𑌾᳚𑌨𑍍𑌯𑍇॒𑌵𑌾𑌸𑍍𑌯॒ 𑌤𑌥𑍍𑌸𑌮𑍍𑌭॑𑌰𑌨𑍍𑌤𑌿 ॥ 15 ॥

𑌭𑍂𑌰𑍍𑌭𑍁𑌵॒𑌸𑍍𑌸𑍁𑌵॒𑌰𑌿𑌤𑌿॑ 𑌪𑍍𑌰𑌾𑌜𑌾𑌪॒𑌤𑍍𑌯𑌾-𑌭𑌿॒𑌰𑌾𑌵॑𑌯𑌨𑍍𑌤𑌿 । 𑌪𑍍𑌰𑌾॒𑌜𑌾॒𑌪॒𑌤𑍍𑌯𑍋 𑌵𑌾 𑌅𑌶𑍍𑌵𑌃॑ ।
𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌸𑌮॑𑌦𑍍𑌰𑍍𑌧𑌯𑌨𑍍𑌤𑌿 ॥ 𑌭𑍂𑌰𑌿𑌤𑌿॒ 𑌮𑌹𑌿॑𑌷𑍀 । 𑌭𑍁𑌵॒ 𑌇𑌤𑌿॑ 𑌵𑌾॒𑌵𑌾𑌤𑌾᳚ ।
𑌸𑍁𑌵॒𑌰𑌿𑌤𑌿॑ 𑌪𑌰𑌿𑌵𑍃॒𑌕𑍍𑌤𑍀 । 𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॑-𑌮॒𑌭𑌿𑌜𑌿॑𑌤𑍍𑌯𑍈 ॥ 𑌹𑌿॒𑌰॒𑌣𑍍𑌯𑌯𑌾𑌃᳚ 𑌕𑌾॒𑌚𑌾 𑌭॑𑌵𑌨𑍍𑌤𑌿 । 𑌜𑍍𑌯𑍋𑌤𑌿॒𑌰𑍍𑌵𑍈 𑌹𑌿𑌰॑𑌣𑍍𑌯𑌮𑍍 । 𑌰𑌾॒𑌷𑍍𑌟𑍍𑌰𑌮॑𑌶𑍍𑌵𑌮𑍇॒𑌧𑌃 ॥ 16 ॥

𑌜𑍍𑌯𑍋𑌤𑌿॑𑌶𑍍𑌚𑍈॒𑌵𑌾𑌸𑍍𑌮𑍈॑ 𑌰𑌾॒𑌷𑍍𑌟𑍍𑌰-𑌞𑍍𑌚॑ 𑌸॒𑌮𑍀𑌚𑍀॑ 𑌦𑌧𑌾𑌤𑌿 ॥ 𑌸॒𑌹𑌸𑍍𑌰॑-𑌮𑍍𑌭𑌵𑌨𑍍𑌤𑌿 । 𑌸॒𑌹𑌸𑍍𑌰॑ 𑌸𑌮𑍍𑌮𑌿𑌤-𑌸𑍍𑌸𑍁𑌵॒𑌰𑍍𑌗𑍋 𑌲𑍋॒𑌕𑌃 । 𑌸𑍁॒𑌵॒𑌰𑍍𑌗𑌸𑍍𑌯॑ 𑌲𑍋॒𑌕𑌸𑍍𑌯𑌾॒-𑌭𑌿𑌜𑌿॑𑌤𑍍𑌯𑍈 ॥
𑌅𑌪॒ 𑌵𑌾 𑌏॒𑌤𑌸𑍍𑌮𑌾॒𑌤𑍍𑌤𑍇𑌜॑ 𑌇𑌨𑍍𑌦𑍍𑌰𑌿॒𑌯-𑌮𑍍𑌪॒𑌶𑌵॒-𑌶𑍍𑌶𑍍𑌰𑍀𑌃 𑌕𑍍𑌰𑌾॑𑌮𑌨𑍍𑌤𑌿 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌵𑌸॑𑌵𑌸𑍍𑌤𑍍𑌵𑌾-𑌽𑌞𑍍𑌜𑌨𑍍𑌤𑍁 𑌗𑌾𑌯॒𑌤𑍍𑌰𑍇𑌣॒ 𑌛𑌨𑍍𑌦॒𑌸𑍇𑌤𑌿॒ 𑌮𑌹𑌿॑𑌷𑍍𑌯॒𑌭𑍍𑌯॑𑌨𑌕𑍍𑌤𑌿 । 𑌤𑍇𑌜𑍋॒ 𑌵𑌾 𑌆𑌜𑍍𑌯᳚𑌮𑍍 । 𑌤𑍇𑌜𑍋॑ 𑌗𑌾𑌯॒𑌤𑍍𑌰𑍀 । 𑌤𑍇𑌜॑𑌸𑍈॒𑌵𑌾𑌸𑍍𑌮𑍈॒ 𑌤𑍇𑌜𑍋-𑌽𑌵॑𑌰𑍁𑌨𑍍𑌧𑍇 ॥ 1𑍭 ॥

𑌰𑍁॒𑌦𑍍𑌰𑌾𑌸𑍍𑌤𑍍𑌵𑌾᳚-𑌽𑌞𑍍𑌜𑌨𑍍𑌤𑍁॒ 𑌤𑍍𑌰𑍈𑌷𑍍𑌟𑍁॑𑌭𑍇𑌨॒ 𑌛𑌨𑍍𑌦॒𑌸𑍇𑌤𑌿॑ 𑌵𑌾॒𑌵𑌾𑌤𑌾᳚ । 𑌤𑍇𑌜𑍋॒ 𑌵𑌾 𑌆𑌜𑍍𑌯᳚𑌮𑍍 । 𑌇॒𑌨𑍍𑌦𑍍𑌰𑌿॒𑌯-𑌨𑍍𑌤𑍍𑌰𑌿॒𑌷𑍍𑌟𑍁𑌪𑍍 । 𑌤𑍇𑌜॑𑌸𑍈॒𑌵𑌾𑌸𑍍𑌮𑌾॑ 𑌇𑌨𑍍𑌦𑍍𑌰𑌿॒𑌯𑌮𑌵॑𑌰𑍁𑌨𑍍𑌧𑍇 ।
𑌆॒𑌦𑌿॒𑌤𑍍𑌯𑌾-𑌸𑍍𑌤𑍍𑌵𑌾᳚-𑌽𑌞𑍍𑌜𑌨𑍍𑌤𑍁॒ 𑌜𑌾𑌗॑𑌤𑍇𑌨॒ 𑌛𑌨𑍍𑌦॒𑌸𑍇𑌤𑌿॑ 𑌪𑌰𑌿𑌵𑍃॒𑌕𑍍𑌤𑍀 । 𑌤𑍇𑌜𑍋॒ 𑌵𑌾 𑌆𑌜𑍍𑌯᳚𑌮𑍍 । 𑌪॒𑌶𑌵𑍋॒ 𑌜𑌗॑𑌤𑍀 ।
𑌤𑍇𑌜॑𑌸𑍈॒𑌵𑌾𑌸𑍍𑌮𑍈॑ 𑌪॒𑌶𑍂𑌨𑌵॑𑌰𑍁𑌨𑍍𑌧𑍇 ॥
𑌪𑌤𑍍𑌨॑𑌯𑍋॒-𑌽𑌭𑍍𑌯॑𑌞𑍍𑌜𑌨𑍍𑌤𑌿 । 𑌶𑍍𑌰𑌿॒𑌯𑌾 𑌵𑌾 𑌏॒𑌤-𑌦𑍍𑌰𑍂॒𑌪𑌮𑍍 ॥ 1𑍮 ॥

𑌯𑌤𑍍𑌪𑌤𑍍𑌨॑𑌯𑌃 । 𑌶𑍍𑌰𑌿𑌯॑-𑌮𑍇॒𑌵𑌾𑌸𑍍𑌮𑌿॒-𑌨𑍍𑌤𑌦𑍍𑌦॑𑌧𑌤𑌿 ।
𑌨𑌾𑌸𑍍𑌮𑌾॒𑌤𑍍𑌤𑍇𑌜॑ 𑌇𑌨𑍍𑌦𑍍𑌰𑌿॒𑌯-𑌮𑍍𑌪॒𑌶𑌵॒-𑌶𑍍𑌶𑍍𑌰𑍀𑌰𑌪॑𑌕𑍍𑌰𑌾𑌮𑌨𑍍𑌤𑌿 ॥
𑌲𑌾𑌜𑍀(3)𑌞𑍍𑌛𑌾𑌚𑍀(3)𑌨𑍍. 𑌯𑌶𑍋॑ 𑌮॒𑌮𑌾𑌁(4) 𑌇𑌤𑍍𑌯𑌤𑌿॑𑌰𑌿𑌕𑍍𑌤॒-𑌮𑌨𑍍𑌨॒𑌮𑌶𑍍𑌵𑌾॑𑌯𑍋॒ 𑌪𑌾𑌹॑𑌰𑌨𑍍𑌤𑌿 ।
𑌪𑍍𑌰॒𑌜𑌾𑌮𑍇॒𑌵𑌾𑌨𑍍𑌨𑌾॒𑌦𑍀-𑌙𑍍𑌕𑍁॑𑌰𑍍𑌵𑌤𑍇 ॥
𑌏॒𑌤𑌦𑍍𑌦𑍇॑𑌵𑌾॒ 𑌅𑌨𑍍𑌨॑𑌮𑌤𑍍𑌤𑍈॒𑌤-𑌦𑌨𑍍𑌨॑𑌮𑌦𑍍𑌧𑌿 𑌪𑍍𑌰𑌜𑌾𑌪𑌤॒ 𑌇𑌤𑍍𑌯𑌾॑𑌹 । 𑌪𑍍𑌰॒𑌜𑌾𑌯𑌾॑𑌮𑍇॒𑌵𑌾𑌨𑍍𑌨𑌾𑌦𑍍𑌯॑-𑌨𑍍𑌦𑌧𑌤𑍇 ॥
𑌯𑌦𑌿॒ 𑌨𑌾𑌵॒𑌜𑌿𑌘𑍍𑌰᳚𑌤𑍍 । 𑌅॒𑌗𑍍𑌨𑌿𑌃 𑌪॒𑌶𑍁𑌰𑌾॑𑌸𑍀॒𑌦𑌿𑌤𑍍𑌯𑌵॑-𑌘𑍍𑌰𑌾𑌪𑌯𑍇𑌤𑍍 । 𑌅𑌵॑ 𑌹𑍈॒𑌵 𑌜𑌿॑𑌘𑍍𑌰𑌤𑌿 ॥
𑌆𑌕𑍍𑌰𑌾𑌨॑. 𑌵𑌾॒𑌜𑍀 𑌕𑍍𑌰𑌮𑍈॒𑌰𑌤𑍍𑌯॑-𑌕𑍍𑌰𑌮𑍀𑌦𑍍𑌵𑌾॒𑌜𑍀 𑌦𑍍𑌯𑍌𑌸𑍍𑌤𑍇॑ 𑌪𑍃॒𑌷𑍍𑌠-𑌮𑍍𑌪𑍃॑𑌥𑌿॒𑌵𑍀
𑌸॒𑌧𑌸𑍍𑌥॒𑌮𑌿𑌤𑍍𑌯𑌶𑍍𑌵॒-𑌮𑌨𑍁॑𑌮𑌨𑍍𑌤𑍍𑌰𑌯𑌤𑍇 ।
𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॑-𑌮॒𑌭𑌿𑌜𑌿॑𑌤𑍍𑌯𑍈 ॥
𑌸𑌮𑌿॑𑌦𑍍𑌧𑍋 𑌅॒𑌞𑍍𑌜𑌨𑍍𑌕𑍃𑌦॑𑌰-𑌮𑍍𑌮𑌤𑍀॒𑌨𑌾-𑌮𑌿𑌤𑍍𑌯𑌶𑍍𑌵॑𑌸𑍍𑌯𑌾॒ 𑌪𑍍𑌰𑌿𑌯𑍋॑ 𑌭𑌵𑌨𑍍𑌤𑌿 𑌸𑌰𑍂𑌪॒𑌤𑍍𑌵𑌾𑌯॑ ॥ 1𑍯 ॥
(𑌪𑌰𑌿॑𑌤॒𑌸𑍍𑌥𑍁𑌷॒ 𑌇𑌤𑍍𑌯𑌾॑𑌹𑍇॒ - 𑌮𑍇 𑌏॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑍍𑌯॒ - 𑌭𑌿𑌜𑌿॑𑌤𑍍𑌯𑍈-𑌭𑌰-𑌨𑍍𑌤𑍍𑌯𑌶𑍍𑌵𑌮𑍇॒𑌧𑍋 - 𑌰𑍁॑𑌨𑍍𑌧𑍇 - 𑌰𑍂॒𑌪𑌮𑍍 - 𑌜𑌿॑𑌘𑍍𑌰𑌤𑌿॒ 𑌤𑍍𑌰𑍀𑌣𑌿॑ 𑌚) (𑌅. 4)

𑌅𑌨𑍁𑌵𑌾𑌕𑌂 5 - 𑌬𑍍𑌰𑌹𑍍𑌮𑍋𑌦𑍍𑌯𑌨𑌾𑌮𑌕𑌃 𑌹𑍋𑌤𑍃𑌬𑍍𑌰𑌾𑌹𑍍𑌮𑌣𑍋𑌸𑍍𑌸𑌂​𑌵𑌾𑌁𑌦𑌃
𑌤𑍇𑌜॑𑌸𑌾॒ 𑌵𑌾 𑌏॒𑌷 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑍇𑌨॒ 𑌵𑍍𑌯𑍃॑𑌦𑍍𑌧𑍍𑌯𑌤𑍇 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌹𑍋𑌤𑌾॑ 𑌚 𑌬𑍍𑌰॒𑌹𑍍𑌮𑌾 𑌚॑ 𑌬𑍍𑌰॒𑌹𑍍𑌮𑍋𑌦𑍍𑌯𑌂॑-𑌵𑌁𑌦𑌤𑌃 ।
𑌤𑍇𑌜॑𑌸𑌾 𑌚𑍈॒𑌵𑍈𑌨॑-𑌮𑍍𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ 𑌚॒ 𑌸𑌮॑𑌦𑍍𑌰𑍍𑌧𑌯𑌤𑌃 ॥ 𑌦॒𑌕𑍍𑌷𑌿॒𑌣॒𑌤𑍋 𑌬𑍍𑌰॒𑌹𑍍𑌮𑌾 𑌭॑𑌵𑌤𑌿 ।
𑌦॒𑌕𑍍𑌷𑌿॒𑌣॒𑌤 𑌆॑𑌯𑌤𑌨𑍋॒ 𑌵𑍈 𑌬𑍍𑌰॒𑌹𑍍𑌮𑌾 । 𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯𑍋 𑌵𑍈 𑌬𑍍𑌰॒𑌹𑍍𑌮𑌾 ।
𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌸𑍍𑌯॑ 𑌦𑌕𑍍𑌷𑌿𑌣॒𑌤𑍋 (𑌦𑌕𑍍𑌷𑌿॒𑌣𑌤𑍋) 𑌦॑𑌧𑌾𑌤𑌿 ।
𑌤𑌸𑍍𑌮𑌾॒-𑌦𑍍𑌦𑌕𑍍𑌷𑌿॒𑌣𑍋-𑌽𑌦𑍍𑌰𑍍𑌧𑍋᳚ 𑌬𑍍𑌰𑌹𑍍𑌮𑌵𑌰𑍍𑌚॒𑌸𑌿𑌤॑𑌰𑌃 ॥
𑌉॒𑌤𑍍𑌤॒𑌰॒𑌤𑍋 𑌹𑍋𑌤𑌾॑ 𑌭𑌵𑌤𑌿 ॥ 20 ॥

𑌉॒𑌤𑍍𑌤॒𑌰॒𑌤 𑌆॑𑌯𑌤𑌨𑍋॒ 𑌵𑍈 𑌹𑍋𑌤𑌾᳚ । 𑌆॒𑌗𑍍𑌨𑍇॒𑌯𑍋 𑌵𑍈 𑌹𑍋𑌤𑌾᳚ । 𑌤𑍇𑌜𑍋॒ 𑌵𑌾 𑌅॒𑌗𑍍𑌨𑌿𑌃 । 𑌤𑍇𑌜॑ 𑌏॒𑌵𑌾𑌸𑍍𑌯𑍋᳚𑌤𑍍𑌤𑌰॒𑌤𑍋 𑌦॑𑌧𑌾𑌤𑌿 । 𑌤𑌸𑍍𑌮𑌾॒𑌦𑍁𑌤𑍍𑌤॒𑌰𑍋-𑌽𑌦𑍍𑌰𑍍𑌧॑-𑌸𑍍𑌤𑍇𑌜॒𑌸𑍍𑌵𑌿𑌤॑𑌰𑌃 ॥
𑌯𑍂𑌪॑𑌮॒𑌭𑌿𑌤𑍋॑ 𑌵𑌦𑌤𑌃 । 𑌯॒𑌜॒𑌮𑌾॒𑌨॒𑌦𑍇॒𑌵॒𑌤𑍍𑌯𑍋॑ 𑌵𑍈 𑌯𑍂𑌪𑌃॑ । 𑌯𑌜॑𑌮𑌾𑌨𑌮𑍇॒𑌵 𑌤𑍇𑌜॑𑌸𑌾 𑌚 𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ 𑌚॒ 𑌸𑌮॑𑌦𑍍𑌰𑍍𑌧𑌯𑌤𑌃 ॥
𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑌾𑌸𑍀𑌤𑍍-𑌪𑍂॒𑌰𑍍𑌵𑌚𑌿॑𑌤𑍍𑌤𑌿॒-𑌰𑌿𑌤𑍍𑌯𑌾॑𑌹 ।
𑌦𑍍𑌯𑍌𑌰𑍍𑌵𑍈 𑌵𑍃𑌷𑍍𑌟𑌿𑌃॑ 𑌪𑍂॒𑌰𑍍𑌵𑌚𑌿॑𑌤𑍍𑌤𑌿𑌃 ॥ 21 ॥

𑌦𑌿𑌵॑𑌮𑍇॒𑌵 𑌵𑍃𑌷𑍍𑌟𑌿॒𑌮𑌵॑𑌰𑍁𑌨𑍍𑌧𑍇 ॥ 𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑌾𑌸𑍀-𑌦𑍍𑌬𑍃॒𑌹𑌦𑍍𑌵𑌯॒ 𑌇𑌤𑍍𑌯𑌾॑𑌹 । 𑌅𑌶𑍍𑌵𑍋॒ 𑌵𑍈 𑌬𑍃॒𑌹𑌦𑍍𑌵𑌯𑌃॑ । 𑌅𑌶𑍍𑌵॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑌾𑌸𑍀𑌤𑍍-𑌪𑌿𑌶𑌙𑍍𑌗𑌿॒𑌲𑍇𑌤𑍍𑌯𑌾॑𑌹 । 𑌰𑌾𑌤𑍍𑌰𑌿॒𑌰𑍍𑌵𑍈 𑌪𑌿॑𑌶𑌙𑍍𑌗𑌿॒𑌲𑌾 ।
𑌰𑌾𑌤𑍍𑌰𑌿॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑌾𑌸𑍀𑌤𑍍-𑌪𑌿𑌲𑌿𑌪𑍍𑌪𑌿॒𑌲𑍇𑌤𑍍𑌯𑌾॑𑌹 । 𑌶𑍍𑌰𑍀𑌰𑍍𑌵𑍈 𑌪𑌿॑𑌲𑌿𑌪𑍍𑌪𑌿॒𑌲𑌾 । 𑌅॒𑌨𑍍𑌨𑌾𑌦𑍍𑌯॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 22 ॥

𑌕-𑌸𑍍𑌸𑍍𑌵𑌿॑𑌦𑍇𑌕𑌾॒𑌕𑍀 𑌚॑𑌰॒𑌤𑍀𑌤𑍍𑌯𑌾॑𑌹 । 𑌅॒𑌸𑍌 𑌵𑌾 𑌆॑𑌦𑌿॒𑌤𑍍𑌯 𑌏॑𑌕𑌾॒𑌕𑍀 𑌚॑𑌰𑌤𑌿 । 𑌤𑍇𑌜॑ 𑌏॒𑌵𑌾𑌵॑𑌰𑍁𑌨𑍍𑌧𑍇 ॥
𑌕 𑌉॑ 𑌸𑍍𑌵𑌿𑌜𑍍𑌜𑌾𑌯𑌤𑍇॒ 𑌪𑍁𑌨॒𑌰𑌿𑌤𑍍𑌯𑌾॑𑌹 ।
𑌚॒𑌨𑍍𑌦𑍍𑌰𑌮𑌾॒ 𑌵𑍈 𑌜𑌾॑𑌯𑌤𑍇॒ 𑌪𑍁𑌨𑌃॑ ।
𑌆𑌯𑍁॑𑌰𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑍍𑌧𑌿॒𑌮𑌸𑍍𑌯॑ 𑌭𑍇𑌷॒𑌜𑌮𑌿𑌤𑍍𑌯𑌾॑𑌹 ।
𑌅॒𑌗𑍍𑌨𑌿𑌰𑍍𑌵𑍈 𑌹𑌿॒𑌮𑌸𑍍𑌯॑ 𑌭𑍇𑌷॒𑌜𑌮𑍍 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌕𑌿𑌗𑍍𑌗𑍍​ 𑌸𑍍𑌵𑌿॑𑌦𑌾॒-𑌵𑌪॑𑌨-𑌮𑍍𑌮॒𑌹𑌦𑌿𑌤𑍍𑌯𑌾॑𑌹 ॥ 23 ॥

𑌅॒𑌯𑌂-𑌵𑍈𑌁 𑌲𑍋॒𑌕 𑌆॒𑌵𑌪॑𑌨-𑌮𑍍𑌮॒𑌹𑌤𑍍 ।
𑌅॒𑌸𑍍𑌮𑌿𑌨𑍍𑌨𑍇॒𑌵 𑌲𑍋॒𑌕𑍇 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥
𑌪𑍃॒𑌚𑍍𑌛𑌾𑌮𑌿॑ 𑌤𑍍𑌵𑌾॒ 𑌪𑌰॒𑌮𑌨𑍍𑌤॑-𑌮𑍍𑌪𑍃𑌥𑌿॒𑌵𑍍𑌯𑌾 𑌇𑌤𑍍𑌯𑌾॑𑌹 । 𑌵𑍇𑌦𑌿॒𑌰𑍍𑌵𑍈 𑌪𑌰𑍋-𑌽𑌨𑍍𑌤𑌃॑ 𑌪𑍃𑌥𑌿॒𑌵𑍍𑌯𑌾𑌃 ।
𑌵𑍇𑌦𑌿॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌪𑍃॒𑌚𑍍𑌛𑌾𑌮𑌿॑ 𑌤𑍍𑌵𑌾॒ 𑌭𑍁𑌵॑𑌨𑌸𑍍𑌯॒ 𑌨𑌾𑌭𑌿॒𑌮𑌿𑌤𑍍𑌯𑌾॑𑌹 ।
𑌯॒𑌜𑍍𑌞𑍋 𑌵𑍈 𑌭𑍁𑌵॑𑌨𑌸𑍍𑌯॒ 𑌨𑌾𑌭𑌿𑌃॑ । 𑌯॒𑌜𑍍𑌞𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌪𑍃॒𑌚𑍍𑌛𑌾𑌮𑌿॑ 𑌤𑍍𑌵𑌾॒ 𑌵𑍃𑌷𑍍𑌣𑍋॒ 𑌅𑌶𑍍𑌵॑𑌸𑍍𑌯॒ 𑌰𑍇𑌤॒ 𑌇𑌤𑍍𑌯𑌾॑𑌹 ।
𑌸𑍋𑌮𑍋॒ 𑌵𑍈 𑌵𑍃𑌷𑍍𑌣𑍋॒ 𑌅𑌶𑍍𑌵॑𑌸𑍍𑌯॒ 𑌰𑍇𑌤𑌃॑ । 𑌸𑍋॒𑌮॒𑌪𑍀॒𑌥-𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌪𑍃॒𑌚𑍍𑌛𑌾𑌮𑌿॑ 𑌵𑌾॒𑌚𑌃 𑌪॑𑌰॒𑌮𑌂-𑌵𑍍𑌯𑍋𑌁॑𑌮𑍇𑌤𑍍𑌯𑌾॑𑌹 । 𑌬𑍍𑌰𑌹𑍍𑌮॒ 𑌵𑍈 𑌵𑌾॒𑌚𑌃 𑌪॑𑌰॒𑌮𑌂-𑌵𑍍𑌯𑍋𑌁॑𑌮 ।
𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸-𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 24 ॥
(𑌹𑍋𑌤𑌾॑ 𑌭𑌵𑌤𑌿॒ - 𑌵𑍈 𑌵𑍃𑌷𑍍𑌟𑌿𑌃॑ 𑌪𑍂॒𑌰𑍍𑌵𑌚𑌿॑𑌤𑍍𑌤𑌿 - 𑌰॒𑌨𑍍𑌨𑌾𑌦𑍍𑌯॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 - 𑌮॒𑌹𑌦𑌿𑌤𑍍𑌯𑌾॑𑌹॒ - 𑌸𑍋𑌮𑍋॒ 𑌵𑍈 𑌵𑍃𑌷𑍍𑌣𑍋॒ 𑌅𑌶𑍍𑌵॑𑌸𑍍𑌯॒ 𑌰𑍇𑌤॑𑌶𑍍𑌚॒𑌤𑍍𑌵𑌾𑌰𑌿॑ 𑌚) (𑌅. 5)

𑌅𑌨𑍁𑌵𑌾𑌕𑌂 6 - 𑌅𑌶𑍍𑌵𑌸𑍍𑌯 𑌮𑍃𑌤𑍋𑌪𑌚𑌾𑌰-𑌸𑍍𑌸𑌞𑍍𑌜𑍍𑌞𑌪𑌨𑌪𑍍𑌰𑌕𑌾𑌰𑌃
𑌅𑌪॒ 𑌵𑌾 𑌏॒𑌤𑌸𑍍𑌮𑌾᳚-𑌤𑍍𑌪𑍍𑌰𑌾॒𑌣𑌾𑌃 𑌕𑍍𑌰𑌾॑𑌮𑌨𑍍𑌤𑌿 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌪𑍍𑌰𑌾॒𑌣𑌾𑌯॒ 𑌸𑍍𑌵𑌾𑌹𑌾᳚ 𑌵𑍍𑌯𑌾॒𑌨𑌾𑌯॒ 𑌸𑍍𑌵𑌾𑌹𑍇𑌤𑌿॑ 𑌸𑌞𑍍𑌜𑍍𑌞॒𑌪𑍍𑌯𑌮𑌾॑𑌨॒ 𑌆𑌹𑍁॑𑌤𑍀-𑌰𑍍𑌜𑍁𑌹𑍋𑌤𑌿 ।
𑌪𑍍𑌰𑌾॒𑌣𑌾𑌨𑍇॒𑌵𑌾𑌸𑍍𑌮𑌿॑𑌨𑍍𑌦𑌧𑌾𑌤𑌿 । 𑌨𑌾𑌸𑍍𑌮𑌾᳚𑌤𑍍𑌪𑍍𑌰𑌾॒𑌣𑌾 𑌅𑌪॑𑌕𑍍𑌰𑌾𑌮𑌨𑍍𑌤𑌿 ॥ 𑌅𑌵॑𑌨𑍍𑌤𑍀𑌃॒-𑌸𑍍𑌥𑌾𑌵॑𑌨𑍍𑌤𑍀-𑌸𑍍𑌤𑍍𑌵𑌾-𑌽𑌵𑌨𑍍𑌤𑍁 । 𑌪𑍍𑌰𑌿॒𑌯-𑌨𑍍𑌤𑍍𑌵𑌾᳚ 𑌪𑍍𑌰𑌿॒𑌯𑌾𑌣𑌾᳚𑌮𑍍 । 𑌵𑌰𑍍​𑌷𑌿॑𑌷𑍍𑌠॒𑌮𑌾𑌪𑍍𑌯𑌾𑌨𑌾𑌮𑍍 । 𑌨𑌿॒𑌧𑍀॒𑌨𑌾-𑌨𑍍𑌤𑍍𑌵𑌾॑ 𑌨𑌿𑌧𑌿॒𑌪𑌤𑌿𑌗𑍍​𑌮𑍍॑ 𑌹𑌵𑌾𑌮𑌹𑍇
𑌵𑌸𑍋𑌮॒-𑌮𑍇𑌤𑍍𑌯𑌾॑𑌹 ।
𑌅𑌪𑍈॒𑌵𑌾𑌸𑍍𑌮𑍈॒ 𑌤𑌦𑍍𑌧𑍍𑌨𑍁॑𑌵𑌤𑍇 ॥ 25 ॥

𑌅𑌥𑍋॑ 𑌧𑍁॒𑌵𑌨𑍍𑌤𑍍𑌯𑍇॒𑌵𑍈𑌨᳚𑌮𑍍 । 𑌅𑌥𑍋॒ 𑌨𑍍𑌯𑍇॑𑌵𑌾𑌸𑍍𑌮𑍈᳚ 𑌹𑍍𑌨𑍁𑌵𑌤𑍇 ॥ 𑌤𑍍𑌰𑌿𑌃 𑌪𑌰𑌿॑𑌯𑌨𑍍𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 । 𑌏॒𑌭𑍍𑌯 𑌏॒𑌵𑍈𑌨𑌂॑-𑌲𑍋𑌁॒𑌕𑍇𑌭𑍍𑌯𑍋॑ 𑌧𑍁𑌵𑌤𑍇 ॥ 𑌤𑍍𑌰𑌿𑌃 𑌪𑍁𑌨𑌃॒ 𑌪𑌰𑌿॑𑌯𑌨𑍍𑌤𑌿 । 𑌷𑌟𑍍-𑌥𑍍𑌸𑌮𑍍𑌪॑𑌦𑍍𑌯𑌨𑍍𑌤𑍇 । 𑌷𑌡𑍍𑌵𑌾 𑌋॒𑌤𑌵𑌃॑ ।
𑌋॒𑌤𑍁𑌭𑌿॑𑌰𑍇॒𑌵𑍈𑌨॑-𑌨𑍍𑌧𑍁𑌵𑌤𑍇 ॥ 𑌅𑌪॒ 𑌵𑌾 𑌏॒𑌤𑍇𑌭𑍍𑌯𑌃॑ 𑌪𑍍𑌰𑌾॒𑌣𑌾𑌃 𑌕𑍍𑌰𑌾॑𑌮𑌨𑍍𑌤𑌿 ॥ 26 ॥

𑌯𑍇 𑌯॒𑌜𑍍𑌞𑍇 𑌧𑍁𑌵॑𑌨-𑌨𑍍𑌤॒𑌨𑍍𑌵𑌤𑍇᳚ । 𑌨॒𑌵॒𑌕𑍃𑌤𑍍𑌵𑌃॒ 𑌪𑌰𑌿॑𑌯𑌨𑍍𑌤𑌿 । 𑌨𑌵॒ 𑌵𑍈 𑌪𑍁𑌰𑍁॑𑌷𑍇 𑌪𑍍𑌰𑌾॒𑌣𑌾𑌃 ।
𑌪𑍍𑌰𑌾॒𑌣𑌾𑌨𑍇॒𑌵𑌾𑌤𑍍𑌮𑌨𑍍𑌦॑𑌧𑌤𑍇 । 𑌨𑍈𑌭𑍍𑌯𑌃॑ 𑌪𑍍𑌰𑌾॒𑌣𑌾 𑌅𑌪॑𑌕𑍍𑌰𑌾𑌮𑌨𑍍𑌤𑌿 ॥ 𑌅𑌮𑍍𑌬𑍇॒ 𑌅𑌮𑍍𑌬𑌾॒𑌲𑍍𑌯𑌮𑍍𑌬𑌿॑𑌕॒ 𑌇𑌤𑌿॒ 𑌪𑌤𑍍𑌨𑍀॑𑌮𑍁॒𑌦𑌾𑌨॑𑌯𑌤𑌿 । 𑌅𑌹𑍍𑌵॑𑌤𑍈॒𑌵𑍈𑌨𑌾᳚𑌮𑍍 ॥
𑌸𑍁𑌭॑𑌗𑍇॒ 𑌕𑌾𑌮𑍍𑌪𑍀॑𑌲-𑌵𑌾𑌸𑌿॒𑌨𑍀𑌤𑍍𑌯𑌾॑𑌹 । 𑌤𑌪॑ 𑌏॒𑌵𑍈𑌨𑌾॒-𑌮𑍁𑌪॑𑌨𑌯𑌤𑌿 ॥ 𑌸𑍁॒𑌵॒𑌰𑍍𑌗𑍇 𑌲𑍋॒𑌕𑍇 𑌸𑌮𑍍𑌪𑍍𑌰𑍋𑌰𑍍𑌣𑍍𑌵𑌾॑𑌥𑌾॒-𑌮𑌿𑌤𑍍𑌯𑌾॑𑌹 ॥ 2𑍭 ॥

𑌸𑍁॒𑌵॒𑌰𑍍𑌗𑌮𑍇॒𑌵𑍈𑌨𑌾𑌂᳚-𑌲𑍋𑌁॒𑌕-𑌙𑍍𑌗॑𑌮𑌯𑌤𑌿 ॥
𑌆-𑌽𑌹𑌮॑𑌜𑌾𑌨𑌿 𑌗𑌰𑍍𑌭॒𑌧𑌮𑌾 𑌤𑍍𑌵𑌮॑𑌜𑌾𑌸𑌿 𑌗𑌰𑍍𑌭॒𑌧𑌮𑌿𑌤𑍍𑌯𑌾॑𑌹 । 𑌪𑍍𑌰॒𑌜𑌾 𑌵𑍈 𑌪॒𑌶𑌵𑍋॒ 𑌗𑌰𑍍𑌭𑌃॑ । 𑌪𑍍𑌰॒𑌜𑌾𑌮𑍇॒𑌵 𑌪॒𑌶𑍂𑌨𑌾॒𑌤𑍍𑌮𑌨𑍍𑌧॑𑌤𑍍𑌤𑍇 ॥
𑌦𑍇॒𑌵𑌾 𑌵𑌾 𑌅॑𑌶𑍍𑌵𑌮𑍇॒𑌧𑍇 𑌪𑌵॑𑌮𑌾𑌨𑍇 । 𑌸𑍁॒𑌵॒𑌰𑍍𑌗𑌂-𑌲𑍋𑌁॒𑌕-𑌨𑍍𑌨 𑌪𑍍𑌰𑌾𑌜𑌾॑𑌨𑌨𑍍𑌨𑍍 । 𑌤𑌮𑌶𑍍𑌵𑌃॒ 𑌪𑍍𑌰𑌾𑌜𑌾॑𑌨𑌾𑌤𑍍 । 𑌯𑌥𑍍𑌸𑍂॒𑌚𑍀𑌭𑌿॑-𑌰𑌸𑌿𑌪॒𑌥𑌾-𑌨𑍍𑌕॒𑌲𑍍𑌪𑌯॑𑌨𑍍𑌤𑌿 ।
𑌸𑍁॒𑌵॒𑌰𑍍𑌗𑌸𑍍𑌯॑ 𑌲𑍋॒𑌕𑌸𑍍𑌯॒ 𑌪𑍍𑌰𑌜𑍍𑌞𑌾᳚𑌤𑍍𑌯𑍈 ॥ 𑌗𑌾॒𑌯॒𑌤𑍍𑌰𑍀 𑌤𑍍𑌰𑌿॒𑌷𑍍𑌟𑍁𑌬𑍍𑌜𑌗॒𑌤𑍀𑌤𑍍𑌯𑌾॑𑌹 ॥ 2𑍮 ॥

𑌯॒𑌥𑌾॒ 𑌯॒𑌜𑍁𑌰𑍇॒𑌵𑍈𑌤𑌤𑍍 ॥ 𑌤𑍍𑌰॒𑌯𑍍𑌯-𑌸𑍍𑌸𑍂॒𑌚𑍍𑌯𑍋॑ 𑌭𑌵𑌨𑍍𑌤𑌿 ।
𑌅॒𑌯॒𑌸𑍍𑌮𑌯𑍍𑌯𑍋॑ 𑌰𑌜॒𑌤𑌾 𑌹𑌰𑌿॑𑌣𑍍𑌯𑌃 । 𑌅॒𑌸𑍍𑌯 𑌵𑍈 𑌲𑍋॒𑌕𑌸𑍍𑌯॑ 𑌰𑍂॒𑌪𑌮॑𑌯॒𑌸𑍍𑌮𑌯𑍍𑌯𑌃॑ । 𑌅॒𑌨𑍍𑌤𑌰𑌿॑𑌕𑍍𑌷𑌸𑍍𑌯 𑌰𑌜॒𑌤𑌾𑌃 । 𑌦𑌿॒𑌵𑍋 𑌹𑌰𑌿॑𑌣𑍍𑌯𑌃 । 𑌦𑌿𑌶𑍋॒ 𑌵𑌾 𑌅॑𑌯॒𑌸𑍍𑌮𑌯𑍍𑌯𑌃॑ ।
𑌅॒𑌵𑌾॒𑌨𑍍𑌤॒𑌰॒𑌦𑌿॒𑌶𑌾 𑌰॑𑌜॒𑌤𑌾𑌃 । 𑌊॒𑌦𑍍𑌰𑍍𑌧𑍍𑌵𑌾 𑌹𑌰𑌿॑𑌣𑍍𑌯𑌃 ।
𑌦𑌿𑌶॑ 𑌏॒𑌵𑌾𑌸𑍍𑌮𑍈॑ 𑌕𑌲𑍍𑌪𑌯𑌤𑌿 ॥
𑌕𑌸𑍍𑌤𑍍𑌵𑌾᳚-𑌛𑍍𑌯𑌤𑌿॒ 𑌕𑌸𑍍𑌤𑍍𑌵𑌾॒ 𑌵𑌿𑌶𑌾॒𑌸𑍍𑌤𑍀-𑌤𑍍𑌯𑌾॒𑌹𑌾 𑌹𑌿𑌗𑍍​𑌮𑍍॑𑌸𑌾𑌯𑍈 ॥ 2𑍯 ॥
(𑌹𑍍𑌨𑍁॒𑌵॒𑌤𑍇॒-𑌕𑍍𑌰𑌾॒𑌮॒-𑌨𑍍𑌤𑍍𑌯𑍂॒𑌰𑍍𑌣𑍍𑌵𑌾॒𑌥𑌾॒𑌮𑌿𑌤𑍍𑌯𑌾॑𑌹॒-𑌜𑌗॒𑌤𑍀𑌤𑍍𑌯𑌾॑𑌹-𑌕𑌲𑍍𑌪𑌯॒𑌤𑍍𑌯𑍇𑌕॑-𑌞𑍍𑌚) (𑌅. 6)

𑌅𑌨𑍁𑌵𑌾𑌕𑌂 𑍭 - 𑌤𑌤𑍍𑌰 𑌮𑌨𑍍𑌤𑍍𑌰𑌾𑌃
𑌅𑌪॒ 𑌵𑌾 𑌏॒𑌤𑌸𑍍𑌮𑌾॒𑌚𑍍𑌛𑍍𑌰𑍀 𑌰𑌾॒𑌷𑍍𑌟𑍍𑌰-𑌙𑍍𑌕𑍍𑌰𑌾॑𑌮𑌤𑌿 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌊॒𑌦𑍍𑌰𑍍𑌧𑍍𑌵𑌾𑌮𑍇॑𑌨𑌾॒-𑌮𑍁𑌚𑍍𑌛𑍍𑌰॑𑌯𑌤𑌾॒-𑌦𑌿𑌤𑍍𑌯𑌾॑𑌹 ।
𑌶𑍍𑌰𑍀𑌰𑍍𑌵𑍈 𑌰𑌾॒𑌷𑍍𑌟𑍍𑌰𑌮॑𑌶𑍍𑌵𑌮𑍇॒𑌧𑌃 ।
𑌶𑍍𑌰𑌿𑌯॑𑌮𑍇॒𑌵𑌾𑌸𑍍𑌮॑ 𑌰𑌾॒𑌷𑍍𑌟𑍍𑌰𑌮𑍂॒𑌦𑍍𑌰𑍍𑌧𑍍𑌵-𑌮𑍁𑌚𑍍𑌛𑍍𑌰॑𑌯𑌤𑌿 ॥ 𑌵𑍇॒𑌣𑍁॒𑌭𑌾॒𑌰-𑌙𑍍𑌗𑌿॒𑌰𑌾𑌵𑌿॒-𑌵𑍇𑌤𑍍𑌯𑌾॑𑌹 ।
𑌰𑌾॒𑌷𑍍𑌟𑍍𑌰𑌂-𑌵𑍈𑌁 𑌭𑌾॒𑌰𑌃 । 𑌰𑌾॒𑌷𑍍𑌟𑍍𑌰𑌮𑍇॒𑌵𑌾𑌸𑍍𑌮𑍈॒ 𑌪𑌰𑍍𑌯𑍂॑𑌹𑌤𑌿 ॥ 𑌅𑌥𑌾᳚𑌸𑍍𑌯𑌾॒ 𑌮𑌦𑍍𑌧𑍍𑌯॑𑌮𑍇𑌧𑌤𑌾॒-𑌮𑌿𑌤𑍍𑌯𑌾॑𑌹 । 𑌶𑍍𑌰𑍀𑌰𑍍𑌵𑍈 𑌰𑌾॒𑌷𑍍𑌟𑍍𑌰𑌸𑍍𑌯॒ 𑌮𑌦𑍍𑌧𑍍𑌯᳚𑌮𑍍 ॥ 30 ॥

𑌶𑍍𑌰𑌿𑌯॑𑌮𑍇॒𑌵𑌾-𑌵॑𑌰𑍁𑌨𑍍𑌧𑍇 ॥ 𑌶𑍀॒𑌤𑍇 𑌵𑌾𑌤𑍇॑ 𑌪𑍁॒𑌨𑌨𑍍𑌨𑌿॒-𑌵𑍇𑌤𑍍𑌯𑌾॑𑌹 । 𑌕𑍍𑌷𑍇𑌮𑍋॒ 𑌵𑍈 𑌰𑌾॒𑌷𑍍𑌟𑍍𑌰𑌸𑍍𑌯॑ 𑌶𑍀॒𑌤𑍋 𑌵𑌾𑌤𑌃॑ । 𑌕𑍍𑌷𑍇𑌮॑𑌮𑍇॒𑌵𑌾-𑌵॑𑌰𑍁𑌨𑍍𑌧𑍇 ॥ 𑌯𑌦𑍍𑌧॑𑌰𑌿॒𑌣𑍀 𑌯𑌵॒𑌮𑌤𑍍𑌤𑍀𑌤𑍍𑌯𑌾॑𑌹 । 𑌵𑌿𑌡𑍍𑌵𑍈 𑌹॑𑌰𑌿॒𑌣𑍀 । 𑌰𑌾॒𑌷𑍍𑌟𑍍𑌰𑌂-𑌯𑌁𑌵𑌃॑ । 𑌵𑌿𑌶॑-𑌞𑍍𑌚𑍈॒𑌵𑌾𑌸𑍍𑌮𑍈॑ 𑌰𑌾॒𑌷𑍍𑌟𑍍𑌰-𑌞𑍍𑌚॑ 𑌸॒𑌮𑍀𑌚𑍀॑ 𑌦𑌧𑌾𑌤𑌿 ॥
𑌨 𑌪𑍁॒𑌷𑍍𑌟-𑌮𑍍𑌪॒𑌶𑍁 𑌮॑𑌨𑍍𑌯𑌤॒ 𑌇𑌤𑍍𑌯𑌾॑𑌹 ।
𑌤𑌸𑍍𑌮𑌾॒-𑌦𑍍𑌰𑌾𑌜𑌾॑ 𑌪॒𑌶𑍂𑌨𑍍𑌨 𑌪𑍁𑌷𑍍𑌯॑𑌤𑌿 ॥ 31 ॥

𑌶𑍂॒𑌦𑍍𑌰𑌾 𑌯𑌦𑌰𑍍𑌯॑𑌜𑌾𑌰𑌾॒ 𑌨 𑌪𑍋𑌷𑌾॑𑌯 𑌧𑌨𑌾𑌯॒𑌤𑍀𑌤𑍍𑌯𑌾॑𑌹 ।
𑌤𑌸𑍍𑌮𑌾᳚-𑌦𑍍𑌵𑍈𑌶𑍀𑌪𑍁॒𑌤𑍍𑌰-𑌨𑍍𑌨𑌾𑌭𑌿𑌷𑌿॑𑌞𑍍𑌚𑌨𑍍𑌤𑍇 ॥ 𑌇॒𑌯𑌂-𑌯𑌁॒𑌕𑌾 𑌶॑𑌕𑍁𑌨𑍍𑌤𑌿॒𑌕𑍇𑌤𑍍𑌯𑌾॑𑌹 । 𑌵𑌿𑌡𑍍𑌵𑍈 𑌶॑𑌕𑍁𑌨𑍍𑌤𑌿॒𑌕𑌾 । 𑌰𑌾॒𑌷𑍍𑌟𑍍𑌰𑌮॑𑌶𑍍𑌵𑌮𑍇॒𑌧𑌃 । 𑌵𑌿𑌶॑-𑌞𑍍𑌚𑍈॒𑌵𑌾𑌸𑍍𑌮𑍈॑ 𑌰𑌾॒𑌷𑍍𑌟𑍍𑌰-𑌞𑍍𑌚॑ 𑌸॒𑌮𑍀𑌚𑍀॑ 𑌦𑌧𑌾𑌤𑌿 ॥
𑌆॒𑌹𑌲॒𑌮𑌿𑌤𑌿॒ 𑌸𑌰𑍍𑌪॒𑌤𑍀𑌤𑍍𑌯𑌾॑𑌹 । 𑌤𑌸𑍍𑌮𑌾᳚-𑌦𑍍𑌰𑌾॒𑌷𑍍𑌟𑍍𑌰𑌾𑌯॒ 𑌵𑌿𑌶॑-𑌸𑍍𑌸𑌰𑍍𑌪𑌨𑍍𑌤𑌿 ॥ 𑌆𑌹॑𑌤-𑌙𑍍𑌗॒𑌭𑍇 𑌪𑌸॒ 𑌇𑌤𑍍𑌯𑌾॑𑌹 । 𑌵𑌿𑌡𑍍𑌵𑍈 𑌗𑌭𑌃॑ ॥ 32 ॥

𑌰𑌾॒𑌷𑍍𑌟𑍍𑌰-𑌮𑍍𑌪𑌸𑌃॑ । 𑌰𑌾॒𑌷𑍍𑌟𑍍𑌰𑌮॒𑌵 𑌵𑌿॒𑌶𑍍𑌯𑌾𑌹॑𑌨𑍍𑌤𑌿 । 𑌤𑌸𑍍𑌮𑌾᳚-𑌦𑍍𑌰𑌾॒𑌷𑍍𑌟𑍍𑌰𑌂-𑌵𑌿𑌁𑌶॒-𑌙𑍍𑌘𑌾𑌤𑍁॑𑌕𑌮𑍍 ॥
𑌮𑌾॒𑌤𑌾 𑌚॑ 𑌤𑍇 𑌪𑌿॒𑌤𑌾 𑌚॑ 𑌤॒ 𑌇𑌤𑍍𑌯𑌾॑𑌹 । 𑌇॒𑌯𑌂-𑌵𑍈𑌁 𑌮𑌾॒𑌤𑌾 । 𑌅॒𑌸𑍌 𑌪𑌿॒𑌤𑌾 । 𑌆॒𑌭𑍍𑌯𑌾𑌮𑍇॒𑌵𑍈𑌨॒-𑌮𑍍𑌪𑌰𑌿॑𑌦𑌦𑌾𑌤𑌿 ॥
𑌅𑌗𑍍𑌰𑌂॑-𑌵𑍃𑌁॒𑌕𑍍𑌷𑌸𑍍𑌯॑ 𑌰𑍋𑌹𑌤॒ 𑌇𑌤𑍍𑌯𑌾॑𑌹 ।
𑌶𑍍𑌰𑍀𑌰𑍍𑌵𑍈 𑌵॒𑌕𑍍𑌷𑌸𑍍𑌯𑌾𑌗𑍍𑌰᳚𑌮𑍍 । 𑌶𑍍𑌰𑌿𑌯॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 33 ॥

𑌪𑍍𑌰𑌸𑍁॑𑌲𑌾॒𑌮𑍀𑌤𑌿॑ 𑌤𑍇 𑌪𑌿॒𑌤𑌾 𑌗॒𑌭𑍇 𑌮𑍁॒𑌷𑍍𑌟𑌿𑌮॑𑌤𑌗𑍍​𑌮𑍍𑌸𑌯॒-𑌦𑌿𑌤𑍍𑌯𑌾॑𑌹 । 𑌵𑌿𑌡𑍍𑌵𑍈 𑌗𑌭𑌃॑ । 𑌰𑌾॒𑌷𑍍𑌟𑍍𑌰-𑌮𑍍𑌮𑍁॒𑌷𑍍𑌟𑌿𑌃 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌵𑌿॒𑌶𑍍𑌯𑌾𑌹॑𑌨𑍍𑌤𑌿 । 𑌤𑌸𑍍𑌮𑌾᳚-𑌦𑍍𑌰𑌾॒𑌷𑍍𑌟𑍍𑌰𑌂-𑌵𑌿𑌁𑌶॒-𑌙𑍍𑌘𑌾𑌤𑍁॑𑌕𑌮𑍍 ॥ 𑌅𑌪॒ 𑌵𑌾 𑌏॒𑌤𑍇𑌭𑍍𑌯𑌃॑ 𑌪𑍍𑌰𑌾॒𑌣𑌾𑌃 𑌕𑍍𑌰𑌾॑𑌮𑌨𑍍𑌤𑌿 । 𑌯𑍇 𑌯॒𑌜𑍍𑌞𑍇-𑌽𑌪𑍂॑𑌤𑌂॒-𑌵𑌁𑌦॑𑌨𑍍𑌤𑌿 ।
𑌦॒𑌧𑌿॒𑌕𑍍𑌰𑌾𑌵𑍍.𑌣𑍍𑌣𑍋॑ 𑌅𑌕𑌾𑌰𑌿𑌷॒𑌮𑌿𑌤𑌿॑ 𑌸𑍁𑌰𑌭𑌿॒-𑌮𑌤𑍀॒𑌮𑍃𑌚𑌂॑-𑌵𑌁𑌦𑌨𑍍𑌤𑌿 ।
𑌪𑍍𑌰𑌾॒𑌣𑌾 𑌵𑍈 𑌸𑍁॑𑌰॒𑌭𑌯𑌃॑ । 𑌪𑍍𑌰𑌾॒𑌣𑌾𑌨𑍇॒𑌵𑌾𑌤𑍍𑌮𑌨𑍍𑌦॑𑌧𑌤𑍇 । 𑌨𑍈𑌭𑍍𑌯𑌃॑ 𑌪𑍍𑌰𑌾॒𑌣𑌾 𑌅𑌪॑𑌕𑍍𑌰𑌾𑌮𑌨𑍍𑌤𑌿 ॥
𑌆𑌪𑍋॒ 𑌹𑌿𑌷𑍍𑌠𑌾 𑌮॑𑌯𑍋॒𑌭𑍁𑌵॒ 𑌇𑌤𑍍𑌯॒𑌦𑍍𑌭𑌿𑌰𑍍𑌮𑌾᳚𑌰𑍍𑌜𑌯𑌨𑍍𑌤𑍇 । 𑌆𑌪𑍋॒ 𑌵𑍈 𑌸𑌰𑍍𑌵𑌾॑ 𑌦𑍇॒𑌵𑌤𑌾𑌃᳚ ।
𑌦𑍇॒𑌵𑌤𑌾॑𑌭𑌿𑌰𑍇॒-𑌵𑌾𑌤𑍍𑌮𑌾𑌨॑-𑌮𑍍𑌪𑌵𑌯𑌨𑍍𑌤𑍇 ॥ 34 ॥
(𑌰𑌾॒𑌷𑍍𑌟𑍍𑌰𑌸𑍍𑌯॒ 𑌮𑌦𑍍𑌧𑍍𑌯॒𑌮𑍍 - 𑌪𑍁𑌷𑍍𑌯॑𑌤𑌿॒ - 𑌗𑌭𑍋॑ - 𑌰𑍁𑌨𑍍𑌧𑍇 - 𑌦𑌧𑌤𑍇 𑌚॒𑌤𑍍𑌵𑌾𑌰𑌿॑ 𑌚) (𑌅. 𑍭)

𑌅𑌨𑍁𑌵𑌾𑌕𑌂 𑍮 - 𑌅𑌶𑍍𑌵𑌮𑍇𑌧𑌸𑍍𑌯 𑌤𑌤𑍍𑌪𑌶𑍂𑌨𑌾-𑌞𑍍𑌚 𑌪𑍍𑌰𑌶𑌂𑌸𑌾
𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾-𑌸𑍍𑌸𑍃॒𑌷𑍍𑌟𑍍𑌵𑌾 𑌪𑍍𑌰𑍇॒𑌣𑌾-𑌽𑌨𑍁॒ 𑌪𑍍𑌰𑌾𑌵𑌿॑𑌶𑌤𑍍 । 𑌤𑌾𑌭𑍍𑌯𑌃॒ 𑌪𑍁𑌨॒-𑌸𑍍𑌸𑌮𑍍𑌭॑𑌵𑌿𑌤𑍁॒-𑌨𑍍𑌨𑌾𑌶॑𑌕𑍍𑌨𑍋𑌤𑍍 । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌋॒𑌦𑍍𑌧𑍍𑌨𑌵॒𑌦𑌿𑌥𑍍𑌸𑌃 । 𑌯𑍋 𑌮𑍇॒𑌤𑌃 𑌪𑍁𑌨॑-𑌸𑍍𑌸॒𑌭𑌂𑌰॒𑌦𑌿𑌤𑌿॑ । 𑌤-𑌨𑍍𑌦𑍇॒𑌵𑌾 𑌅॑𑌶𑍍𑌵𑌮𑍇॒𑌧𑍇𑌨𑍈॒𑌵 𑌸𑌮॑𑌭𑌰𑌨𑍍𑌨𑍍 । 𑌤𑌤𑍋॒ 𑌵𑍈 𑌤 𑌆᳚𑌦𑍍𑌰𑍍𑌧𑍍𑌨𑍁𑌵𑌨𑍍𑌨 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌪𑍍𑌰॒𑌜𑌾𑌪॑𑌤𑌿𑌮𑍇॒𑌵 𑌸𑌮𑍍𑌭॑𑌰𑌤𑍍𑌯𑍃॒𑌦𑍍𑌧𑍍𑌨𑍋𑌤𑌿॑ ॥ 𑌪𑍁𑌰𑍁॑𑌷॒𑌮𑌾𑌲॑𑌭𑌤𑍇 ॥ 35 ॥

𑌵𑍈॒𑌰𑌾॒𑌜𑍋 𑌵𑍈 𑌪𑍁𑌰𑍁॑𑌷𑌃 । 𑌵𑌿॒𑌰𑌾𑌜॑-𑌮𑍇॒𑌵𑌾𑌲॑𑌭𑌤𑍇 । 𑌅𑌥𑍋॒ 𑌅𑌨𑍍𑌨𑌂॒-𑌵𑍈𑌁 𑌵𑌿॒𑌰𑌾𑌟𑍍 । 𑌅𑌨𑍍𑌨॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌅𑌶𑍍𑌵॒𑌮𑌾𑌲॑𑌭𑌤𑍇 । 𑌪𑍍𑌰𑌾॒𑌜𑌾॒𑌪॒𑌤𑍍𑌯𑍋 𑌵𑌾 𑌅𑌶𑍍𑌵𑌃॑ ।
𑌪𑍍𑌰॒𑌜𑌾𑌪॑𑌤𑌿-𑌮𑍇॒𑌵𑌾𑌲॑𑌭𑌤𑍇 । 𑌅𑌥𑍋॒ 𑌶𑍍𑌰𑍀𑌰𑍍𑌵𑌾 𑌏𑌕॑𑌶𑌫𑌮𑍍 ।
𑌶𑍍𑌰𑌿𑌯॑-𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌗𑌾𑌮𑌾𑌲॑𑌭𑌤𑍇 ॥ 36 ॥

𑌯॒𑌜𑍍𑌞𑍋 𑌵𑍈 𑌗𑍌𑌃 । 𑌯॒𑌜𑍍𑌞𑌮𑍇॒𑌵𑌾𑌲॑𑌭𑌤𑍇 ।
𑌅𑌥𑍋॒ 𑌅𑌨𑍍𑌨𑌂॒-𑌵𑍈𑌁 𑌗𑍌𑌃 । 𑌅𑌨𑍍𑌨॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌅॒𑌜𑌾॒𑌵𑍀 𑌆𑌲॑𑌭𑌤𑍇 𑌭𑍂॒𑌮𑍍𑌨𑍇 । 𑌅𑌥𑍋॒ 𑌪𑍁𑌷𑍍𑌟𑌿॒𑌰𑍍𑌵𑍈 𑌭𑍂॒𑌮𑌾 ।
𑌪𑍁𑌷𑍍𑌟𑌿॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌪𑌰𑍍𑌯॑𑌗𑍍𑌨𑌿𑌕𑍃𑌤॒-𑌮𑍍𑌪𑍁𑌰𑍁॑𑌷-𑌞𑍍𑌚𑌾𑌰॒𑌣𑍍𑌯𑌾𑌗𑍍​-𑌶𑍍𑌚𑍋-𑌥𑍍𑌸𑍃॑𑌜॒𑌨𑍍𑌤𑍍𑌯𑌹𑌿𑌗𑍍​𑌮𑍍॑𑌸𑌾𑌯𑍈 ॥ 𑌉॒𑌭𑍌 𑌵𑌾 𑌏॒𑌤𑍌 𑌪॒𑌶𑍂 𑌆𑌲॑𑌭𑍍𑌯𑍇𑌤𑍇 । 𑌯𑌶𑍍𑌚𑌾॑𑌵॒𑌮𑍋 𑌯𑌶𑍍𑌚॑ 𑌪𑌰॒𑌮𑌃 ।
𑌤𑍇᳚-𑌽𑌸𑍍𑌯𑍋॒𑌭𑌯𑍇॑ 𑌯॒𑌜𑍍𑌞𑍇 𑌬॒𑌦𑍍𑌧𑌾𑌃 । 𑌅॒𑌭𑍀𑌷𑍍𑌟𑌾॑ 𑌅॒𑌭𑌿𑌪𑍍𑌰𑍀॑𑌤𑌾𑌃 । 𑌅॒𑌭𑌿𑌜𑌿॑𑌤𑌾 𑌅॒𑌭𑌿𑌹𑍁॑𑌤𑌾 𑌭𑌵𑌨𑍍𑌤𑌿 ॥ 𑌨𑍈𑌨॑-𑌨𑍍𑌦॒𑌙𑍍𑌕𑍍𑌷𑍍𑌣𑌵𑌃॑ 𑌪॒𑌶𑌵𑍋॑ 𑌯॒𑌜𑍍𑌞𑍇 𑌬॒𑌦𑍍𑌧𑌾𑌃 ।
𑌅॒𑌭𑍀𑌷𑍍𑌟𑌾॑ 𑌅॒𑌭𑌿𑌪𑍍𑌰𑍀॑𑌤𑌾𑌃 । 𑌅॒𑌭𑌿𑌜𑌿॑𑌤𑌾 𑌅॒𑌭𑌿𑌹𑍁॑𑌤𑌾 𑌹𑌿𑌗𑍍​𑌮𑍍𑌸𑌨𑍍𑌤𑌿 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 3𑍭 ॥
(𑌲॒𑌭॒𑌤𑍇॒ - 𑌗𑌾𑌮𑌾𑌲॑𑌭𑌤𑍇 - 𑌪𑌰॒𑌮𑍋᳚-𑌽𑌷𑍍𑌟𑍌 𑌚॑) (𑌅. 𑍮)

𑌅𑌨𑍁𑌵𑌾𑌕𑌂 𑍯 - 𑌉𑌤𑍍𑌤𑌮𑍇-𑌽𑌹𑌨𑌿 𑌪𑍍𑌰𑌶𑌵𑌃
𑌪𑍍𑌰॒𑌥॒𑌮𑍇𑌨॒ 𑌵𑌾 𑌏॒𑌷 𑌸𑍍𑌤𑍋𑌮॑𑌨 𑌰𑌾॒𑌦𑍍𑌧𑍍𑌵𑌾 ।
𑌚॒𑌤𑍁॒𑌷𑍍𑌟𑍋॒𑌮𑍇𑌨॑ 𑌕𑍃॒𑌤𑍇𑌨𑌾𑌯𑌾॑𑌨𑌾॒-𑌮𑍁𑌤𑍍𑌤॒𑌰𑍇-𑌽𑌹𑌨𑍍𑌨𑍍॑ ।
𑌏॒𑌕॒𑌵𑌿॒𑌗𑍍​𑌮𑍍॒𑌶𑍇 𑌪𑍍𑌰॑𑌤𑌿॒𑌷𑍍𑌠𑌾𑌯𑌾॒-𑌮𑍍𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥
𑌏॒𑌕॒𑌵𑌿॒𑌗𑍍​𑌮𑍍॒𑌶𑌾-𑌤𑍍𑌪𑍍𑌰॑𑌤𑌿॒𑌷𑍍𑌠𑌾𑌯𑌾॑ 𑌋॒𑌤𑍂𑌨॒𑌨𑍍𑌵𑌾𑌰𑍋॑𑌹𑌤𑌿 । 𑌋॒𑌤𑌵𑍋॒ 𑌵𑍈 𑌪𑍃॒𑌷𑍍𑌠𑌾𑌨𑌿॑ । 𑌋॒𑌤𑌵॑-𑌸𑍍𑌸𑌂​𑌵𑌁𑌥𑍍𑌸॒𑌰𑌃 । 𑌋॒𑌤𑍁𑌷𑍍𑌵𑍇॒𑌵 𑌸𑌂॑​𑌵𑌁𑌥𑍍𑌸॒𑌰𑍇 𑌪𑍍𑌰॑𑌤𑌿॒𑌷𑍍𑌠𑌾𑌯॑ । 𑌦𑍇॒𑌵𑌤𑌾॑ 𑌅॒𑌭𑍍𑌯𑌾𑌰𑍋॑𑌹𑌤𑌿 । 𑌶𑌕𑍍𑌵॑𑌰𑌯𑌃 𑌪𑍃॒𑌷𑍍𑌠-𑌮𑍍𑌭॑𑌵𑌨𑍍𑌤𑍍𑌯॒-𑌨𑍍𑌯𑌦॑𑌨𑍍𑌯॒-𑌚𑍍𑌛𑌨𑍍𑌦𑌃॑ । 𑌅॒𑌨𑍍𑌯𑍇᳚-𑌽𑌨𑍍𑌯𑍇॒ 𑌵𑌾 𑌏॒𑌤𑍇 𑌪॒𑌶𑌵॒ 𑌆𑌲॑𑌭𑍍𑌯𑌨𑍍𑌤𑍇 ॥ 3𑍮 ॥

𑌉॒𑌤𑍇𑌵॑ 𑌗𑍍𑌰𑌾॒𑌮𑍍𑌯𑌾𑌃 । 𑌉॒𑌤𑍇𑌵𑌾॑𑌰॒𑌣𑍍𑌯𑌾𑌃 । 𑌅𑌹॑𑌰𑍇॒𑌵 𑌰𑍂॒𑌪𑍇𑌣॒ 𑌸𑌮॑𑌦𑍍𑌰𑍍𑌧𑌯𑌤𑌿 । 𑌅𑌥𑍋॒ 𑌅𑌹𑍍𑌨॑ 𑌏॒𑌵𑍈𑌷 𑌬॒𑌲𑌿𑌰𑍍​𑌹𑍍𑌰𑌿॑𑌯𑌤𑍇 ॥ 𑌤𑌦𑌾॑𑌹𑍁𑌃 । 𑌅𑌪॑𑌶𑌵𑍋॒ 𑌵𑌾 𑌏॒𑌤𑍇 ।
𑌯𑌦॑𑌜𑌾॒-𑌵𑌯॑𑌶𑍍𑌚𑌾𑌰॒𑌣𑍍𑌯𑌾𑌶𑍍𑌚॑ । 𑌏॒𑌤𑍇 𑌵𑍈 𑌸𑌰𑍍𑌵𑍇॑ 𑌪॒𑌶𑌵𑌃॑ । 𑌯𑌦𑍍𑌗॒𑌵𑍍𑌯𑌾 𑌇𑌤𑌿॑ ।
𑌗॒𑌵𑍍𑌯𑌾-𑌨𑍍𑌪॒𑌶𑍂𑌨𑍁॑𑌤𑍍𑌤॒𑌮𑍇-𑌽𑌹॒𑌨𑍍𑌨𑌾𑌲॑𑌭𑌤𑍇 ॥ 3𑍯 ॥

𑌤𑍇𑌨𑍈॒𑌵𑍋𑌭𑌯𑌾᳚-𑌨𑍍𑌪॒𑌶𑍂𑌨𑌵॑𑌰𑍁𑌨𑍍𑌧𑍇 ॥ 𑌪𑍍𑌰𑌾॒𑌜𑌾॒𑌪॒𑌤𑍍𑌯𑌾 𑌭॑𑌵𑌨𑍍𑌤𑌿 । 𑌅𑌨॑𑌭𑌿𑌜𑌿𑌤𑌸𑍍𑌯𑌾॒-𑌭𑌿𑌜𑌿॑𑌤𑍍𑌯𑍈 ॥ 𑌸𑍌॒𑌰𑍀𑌰𑍍𑌨𑌵॑ 𑌶𑍍𑌵𑍇॒𑌤𑌾𑌵॒𑌶𑌾 𑌅॑𑌨𑍂𑌬॒𑌨𑍍𑌧𑍍𑌯𑌾॑ 𑌭𑌵𑌨𑍍𑌤𑌿 ।
𑌅॒𑌨𑍍𑌤॒𑌤 𑌏॒𑌵 𑌬॑𑌹𑍍𑌮𑌵𑌰𑍍𑌚॒𑌸𑌮𑌵॑𑌰𑍁𑌨𑍍𑌧𑍇 ॥
𑌸𑍋𑌮𑌾॑𑌯 𑌸𑍍𑌵॒𑌰𑌾𑌜𑍍𑌞𑍇॑-𑌽𑌨𑍋𑌵𑌾॒𑌹𑌾-𑌵॑𑌨॒𑌡𑍍𑌵𑌾𑌹𑌾॒𑌵𑌿𑌤𑌿॑ 𑌦𑍍𑌵॒𑌨𑍍𑌦𑍍𑌵𑌿𑌨𑌃॑ 𑌪॒𑌶𑍂𑌨𑌾𑌲॑𑌭𑌤𑍇 ।
𑌅॒𑌹𑍋॒𑌰𑌾॒𑌤𑍍𑌰𑌾𑌣𑌾॑-𑌮॒𑌭𑌿𑌜𑌿॑𑌤𑍍𑌯𑍈 ॥ 𑌪॒𑌶𑍁𑌭𑌿॒𑌰𑍍𑌵𑌾 𑌏॒𑌷 𑌵𑍍𑌯𑍃॑𑌦𑍍𑌧𑍍𑌯𑌤𑍇 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌛॒𑌗॒𑌲-𑌙𑍍𑌕॒𑌲𑍍𑌮𑌾𑌷॑-𑌙𑍍𑌕𑌿𑌕𑌿𑌦𑍀॒𑌵𑌿𑌂-𑌵𑌿𑌁॑𑌦𑍀॒𑌗𑌯॒𑌮𑌿𑌤𑌿॑ 𑌤𑍍𑌵𑌾॒𑌷𑍍𑌟𑍍𑌰𑌾-𑌨𑍍𑌪॒𑌶𑍂𑌨𑌾𑌲॑𑌭𑌤𑍇 ।
𑌪॒𑌶𑍁𑌭𑌿॑𑌰𑍇॒𑌵𑌾𑌤𑍍𑌮𑌾𑌨॒𑌗𑍍​𑌮𑍍॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌋॒𑌤𑍁𑌭𑌿॒𑌰𑍍𑌵𑌾 𑌏॒𑌷 𑌵𑍍𑌯𑍃॑𑌦𑍍𑌧𑍍𑌯𑌤𑍇 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌪𑌿॒𑌶𑌙𑍍𑌗𑌾॒-𑌸𑍍𑌤𑍍𑌰𑌯𑍋॑ 𑌵𑌾𑌸॒𑌨𑍍𑌤𑌾 𑌇𑌤𑍍𑌯𑍃॑𑌤𑍁-𑌪॒𑌶𑍂𑌨𑌾𑌲॑𑌭𑌤𑍇 । 𑌋॒𑌤𑍁𑌭𑌿॑𑌰𑍇॒-𑌵𑌾𑌤𑍍𑌮𑌾𑌨॒𑌗𑍍​𑌮𑍍॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌆 𑌵𑌾 𑌏॒𑌷 𑌪॒𑌶𑍁𑌭𑍍𑌯𑍋॑ 𑌵𑍃𑌶𑍍𑌚𑍍𑌯𑌤𑍇 ।
𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌪𑌰𑍍𑌯॑𑌗𑍍𑌨𑌿𑌕𑍃𑌤𑌾॒ 𑌉𑌥𑍍𑌸𑍃॑𑌜॒𑌨𑍍𑌤𑍍𑌯𑌨𑌾᳚𑌵𑍍𑌰𑌸𑍍𑌕𑌾𑌯 ॥ 40 ॥
(𑌲॒𑌭𑍍𑌯॒𑌨𑍍𑌤𑍇॒ - 𑌲॒𑌭॒𑌤𑍇॒ - 𑌤𑍍𑌵𑌾॒𑌷𑍍𑌟𑍍𑌰𑌾-𑌨𑍍𑌪॒𑌶𑍂𑌨𑌾𑌲॑𑌭𑌤𑍇॒-𑌽𑌷𑍍𑌟𑍌 𑌚॑) (𑌅. 𑍯)

𑌅𑌨𑍁𑌵𑌾𑌕𑌂 10 - 𑌮𑌹𑌿𑌮𑌾𑌭𑌿𑌧𑌾𑌨𑍌 𑌪𑍍𑌰𑌹𑍌
𑌪𑍍𑌰॒𑌜𑌾𑌪॑𑌤𑌿-𑌰𑌕𑌾𑌮𑌯𑌤 𑌮॒𑌹𑌾𑌨॑𑌨𑍍𑌨𑌾॒𑌦-𑌸𑍍𑌸𑍍𑌯𑌾॒𑌮𑌿𑌤𑌿॑ ।
𑌸 𑌏॒𑌤𑌾𑌵॑𑌶𑍍𑌵𑌮𑍇॒𑌧𑍇 𑌮॑𑌹𑌿॒𑌮𑌾𑌨𑌾॑𑌵𑌪𑌶𑍍𑌯𑌤𑍍 । 𑌤𑌾𑌵॑𑌗𑍃𑌹𑍍𑌣𑍀𑌤 । 𑌤𑌤𑍋॒ 𑌵𑍈 𑌸 𑌮॒𑌹𑌾𑌨॑𑌨𑍍𑌨𑌾॒𑌦𑍋॑-𑌽𑌭𑌵𑌤𑍍 । 𑌯𑌃 𑌕𑌾॒𑌮𑌯𑍇॑𑌤 𑌮॒𑌹𑌾𑌨॑𑌨𑍍𑌨𑌾॒𑌦-𑌸𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌏॒𑌤𑌾𑌵॑𑌶𑍍𑌵𑌮𑍇॒𑌧𑍇 𑌮॑𑌹𑌿॒𑌮𑌾𑌨𑍌॑ 𑌗𑍃𑌹𑍍𑌣𑍀𑌤 ।
𑌮॒𑌹𑌾𑌨𑍇॒𑌵𑌾𑌨𑍍𑌨𑌾॒𑌦𑍋 𑌭॑𑌵𑌤𑌿 ॥ 𑌯॒𑌜॒𑌮𑌾॒𑌨॒𑌦𑍇॒𑌵॒𑌤𑍍𑌯𑌾॑ 𑌵𑍈 𑌵॒𑌪𑌾 । 𑌰𑌾𑌜𑌾॑ 𑌮𑌹𑌿॒𑌮𑌾 ।
𑌯𑌦𑍍𑌵॒𑌪𑌾-𑌮𑍍𑌮॑𑌹𑌿॒𑌮𑍍𑌨𑍋𑌭॒𑌯𑌤𑌃॑ 𑌪𑌰𑌿॒𑌯𑌜॑𑌤𑌿 ।
𑌯𑌜॑𑌮𑌾𑌨𑌮𑍇॒𑌵 𑌰𑌾॒𑌜𑍍𑌯𑍇𑌨𑍋॑𑌭॒𑌯𑌤𑌃॒ 𑌪𑌰𑌿॑𑌗𑍃𑌹𑍍𑌣𑌾𑌤𑌿 ॥
𑌪𑍁॒𑌰𑌸𑍍𑌤𑌾᳚-𑌥𑍍𑌸𑍍𑌵𑌾𑌹𑌾𑌕𑌾𑌰𑌾॒ 𑌵𑌾 𑌅॒𑌨𑍍𑌯𑍇 𑌦𑍇॒𑌵𑌾𑌃 ।
𑌉॒𑌪𑌰𑌿॑𑌷𑍍𑌟𑌾-𑌥𑍍𑌸𑍍𑌵𑌾𑌹𑌾𑌕𑌾𑌰𑌾 𑌅॒𑌨𑍍𑌯𑍇 । 𑌤𑍇 𑌵𑌾 𑌏॒𑌤𑍇-𑌽𑌶𑍍𑌵॑ 𑌏॒𑌵 𑌮𑍇𑌦𑍍𑌧𑍍𑌯॑ 𑌉॒𑌭𑌯𑍇-𑌽𑌵॑𑌰𑍁𑌦𑍍𑌧𑍍𑌯𑌨𑍍𑌤𑍇 ।
𑌯𑌦𑍍𑌵॒𑌪𑌾-𑌮𑍍𑌮॑𑌹𑌿॒𑌮𑍍𑌨𑍋𑌭॒𑌯𑌤𑌃॑ 𑌪𑌰𑌿॒𑌯𑌜॑𑌤𑌿 । 𑌤𑌾𑌨𑍇॒𑌵𑍋𑌭𑌯𑌾᳚-𑌨𑍍𑌪𑍍𑌰𑍀𑌣𑌾𑌤𑌿 ॥ 41 ॥
(𑌪॒𑌰𑌿॒𑌯𑌜॑𑌤𑌿॒ 𑌷𑌟𑍍𑌚॑) (𑌅. 10)

𑌅𑌨𑍁𑌵𑌾𑌕𑌂 11 - 𑌶𑌰𑍀𑌰𑌹𑍋𑌮𑌾-𑌸𑍍𑌸𑍍𑌵𑌿𑌷𑍍𑌟𑌕𑍃𑌦𑌾𑌦𑌯𑌶𑍍𑌚
𑌵𑍈॒𑌶𑍍𑌵॒𑌦𑍇॒𑌵𑍋 𑌵𑌾 𑌅𑌶𑍍𑌵𑌃॑ । 𑌤𑌂-𑌯𑌁𑌤𑍍𑌪𑍍𑌰𑌾॑𑌜𑌾𑌪॒𑌤𑍍𑌯-𑌙𑍍𑌕𑍁॒𑌰𑍍𑌯𑌾𑌤𑍍 । 𑌯𑌾 𑌦𑍇॒𑌵𑌤𑌾॒ 𑌅𑌪𑌿॑𑌭𑌾𑌗𑌾𑌃 ।
𑌤𑌾 𑌭𑌾॑𑌗॒𑌧𑍇𑌯𑍇॑𑌨॒ 𑌵𑍍𑌯॑𑌦𑍍𑌰𑍍𑌧𑌯𑍇𑌤𑍍 । 𑌦𑍇॒𑌵𑌤𑌾᳚𑌭𑍍𑌯-𑌸𑍍𑌸॒𑌮𑌦॑-𑌨𑍍𑌦𑌦𑍍𑌧𑍍𑌯𑌾𑌤𑍍 । 𑌸𑍍𑌤𑍇॒𑌗𑌾𑌨𑍍-𑌦𑌗𑍍𑌗𑍍​𑌷𑍍𑌟𑍍𑌰𑌾᳚𑌭𑍍𑌯𑌾-𑌮𑍍𑌮॒𑌣𑍍𑌡𑍂𑌕𑌾॒-𑌞𑍍𑌜𑌮𑍍𑌭𑍍𑌯𑍇॑-𑌭𑌿॒𑌰𑌿𑌤𑌿॑ ।
𑌆𑌜𑍍𑌯॑-𑌮𑌵॒𑌦𑌾𑌨॑-𑌙𑍍𑌕𑍃॒𑌤𑍍𑌵𑌾 𑌪𑍍𑌰𑌤𑌿॑𑌸॒𑌙𑍍𑌖𑍍𑌯𑌾𑌯॒-𑌮𑌾𑌹𑍁॑𑌤𑍀-𑌰𑍍𑌜𑍁𑌹𑍋𑌤𑌿 । 𑌯𑌾 𑌏॒𑌵 𑌦𑍇॒𑌵𑌤𑌾॒ 𑌅𑌪𑌿॑𑌭𑌾𑌗𑌾𑌃 । 𑌤𑌾 𑌭𑌾॑𑌗॒𑌧𑍇𑌯𑍇॑𑌨॒ 𑌸𑌮॑𑌦𑍍𑌰𑍍𑌧𑌯𑌤𑌿 ।
𑌨 𑌦𑍇॒𑌵𑌤𑌾᳚𑌭𑍍𑌯-𑌸𑍍𑌸॒𑌮𑌦॑-𑌨𑍍𑌦𑌧𑌾𑌤𑌿 ॥ 42 ॥

𑌚𑌤𑍁॑𑌰𑍍𑌦𑌶𑍈॒𑌤𑌾-𑌨॑𑌨𑍁𑌵𑌾॒𑌕𑌾𑌞𑍍𑌜𑍁॑𑌹𑍋॒𑌤𑍍𑌯-𑌨॑𑌨𑍍𑌤𑌰𑌿𑌤𑍍𑌯𑍈 ॥
𑌪𑍍𑌰॒𑌯𑌾॒𑌸𑌾𑌯॒ 𑌸𑍍𑌵𑌾𑌹𑍇𑌤𑌿॑ 𑌪𑌞𑍍𑌚𑌦॒𑌶𑌮𑍍 । 𑌪𑌞𑍍𑌚॑𑌦𑌶॒ 𑌵𑌾 𑌅॑𑌦𑍍𑌰𑍍𑌧𑌮𑌾॒𑌸𑌸𑍍𑌯॒ 𑌰𑌾𑌤𑍍𑌰॑𑌯𑌃 ।
𑌅॒𑌦𑍍𑌰𑍍𑌧॒𑌮𑌾॒𑌸॒𑌶-𑌸𑍍𑌸𑌂॑​𑌵𑌁𑌥𑍍𑌸॒𑌰 𑌆᳚𑌪𑍍𑌯𑌤𑍇 ॥ 𑌦𑍇॒𑌵𑌾॒𑌸𑍁॒𑌰𑌾-𑌸𑍍𑌸𑌂​𑌯𑌁॑𑌨𑍍𑌤𑍍𑌤𑌾 𑌆𑌸𑌨𑍍𑌨𑍍 ।
𑌤𑍇᳚-𑌽𑌬𑍍𑌰𑍁𑌵𑌨𑍍𑌨॒𑌗𑍍𑌨𑌯॑-𑌸𑍍𑌸𑍍𑌵𑌿𑌷𑍍𑌟॒𑌕𑍃𑌤𑌃॑ । 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌵॒𑌯𑌮𑍁॑𑌦𑍍𑌧𑌾॒𑌰-𑌮𑍁𑌦𑍍𑌧॑𑌰𑌾𑌮𑌹𑍈 ।
𑌅𑌥𑍈॒𑌤𑌾𑌨॒𑌭𑌿-𑌭॑𑌵𑌾॒𑌮𑍇𑌤𑌿॑ । 𑌤𑍇 𑌲𑍋𑌹𑌿॑𑌤॒-𑌮𑍁𑌦॑𑌹𑌰𑌨𑍍𑌤 ।
𑌤𑌤𑍋॑ 𑌦𑍇॒𑌵𑌾 𑌅𑌭॑𑌵𑌨𑍍𑌨𑍍 ॥ 43 ॥

𑌪𑌰𑌾-𑌽𑌸𑍁॑𑌰𑌾𑌃 । 𑌯𑌥𑍍𑌸𑍍𑌵𑌿॑𑌷𑍍𑌟॒𑌕𑍃𑌦𑍍𑌭𑍍𑌯𑍋॒ 𑌲𑍋𑌹𑌿॑𑌤-𑌞𑍍𑌜𑍁॒𑌹𑍋𑌤𑌿॒ 𑌭𑍍𑌰𑌾𑌤𑍃॑𑌵𑍍𑌯𑌾𑌭𑌿𑌭𑍂𑌤𑍍𑌯𑍈 । 𑌭𑌵॑𑌤𑍍𑌯𑌾॒𑌤𑍍𑌮𑌨𑌾᳚ । 𑌪𑌰𑌾᳚-𑌽𑌸𑍍𑌯॒ 𑌭𑍍𑌰𑌾𑌤𑍃॑𑌵𑍍𑌯𑍋 𑌭𑌵𑌤𑌿 ॥
𑌗𑍋॒𑌮𑍃॒𑌗॒𑌕॒𑌣𑍍𑌠𑍇𑌨॑ 𑌪𑍍𑌰𑌥॒𑌮𑌾-𑌮𑌾𑌹𑍁॑𑌤𑌿-𑌞𑍍𑌜𑍁𑌹𑍋𑌤𑌿 ।
𑌪॒𑌶𑌵𑍋॒ 𑌵𑍈 𑌗𑍋॑𑌮𑍃॒𑌗𑌃 । 𑌰𑍁॒𑌦𑍍𑌰𑍋᳚-𑌽𑌗𑍍𑌨𑌿-𑌸𑍍𑌸𑍍𑌵𑌿॑𑌷𑍍𑌟॒𑌕𑍃𑌤𑍍 । 𑌰𑍁॒𑌦𑍍𑌰𑌾𑌦𑍇॒𑌵 𑌪॒𑌶𑍂𑌨॒𑌨𑍍𑌤𑌰𑍍𑌦॑𑌧𑌾𑌤𑌿 । 𑌅𑌥𑍋॒ 𑌯𑌤𑍍𑌰𑍈॒𑌷𑌾-𑌽𑌽𑌹𑍁॑𑌤𑌿𑌰𑍍-𑌹𑍂॒𑌯𑌤𑍇᳚ ।
𑌨 𑌤𑌤𑍍𑌰॑ 𑌰𑍁॒𑌦𑍍𑌰𑌃 𑌪॒𑌶𑍂𑌨॒𑌭𑌿𑌮॑𑌨𑍍𑌯𑌤𑍇 ॥ 44 ॥

𑌅॒𑌶𑍍𑌵॒𑌶॒𑌫𑍇𑌨॑ 𑌦𑍍𑌵𑌿॒𑌤𑍀𑌯𑌾॒-𑌮𑌾𑌹𑍁॑𑌤𑌿-𑌞𑍍𑌜𑍁𑌹𑍋𑌤𑌿 । 𑌪॒𑌶𑌵𑍋॒ 𑌵𑌾 𑌏𑌕॑𑌶𑌫𑌮𑍍 । 𑌰𑍁॒𑌦𑍍𑌰𑍋᳚-𑌽𑌗𑍍𑌨𑌿-𑌸𑍍𑌸𑍍𑌵𑌿॑𑌷𑍍𑌟॒𑌕𑍃𑌤𑍍 । 𑌰𑍁॒𑌦𑍍𑌰𑌾𑌦𑍇॒𑌵 𑌪॒𑌶𑍂𑌨॒𑌨𑍍𑌤𑌰𑍍𑌦॑𑌧𑌾𑌤𑌿 ।
𑌅𑌥𑍋॒ 𑌯𑌤𑍍𑌰𑍈॒𑌷𑌾-𑌽𑌽𑌹𑍁॑𑌤𑌿𑌰𑌃𑌅॒𑌯𑌤𑍇᳚ ।
𑌨 𑌤𑌤𑍍𑌰॑ 𑌰𑍁॒𑌦𑍍𑌰𑌃 𑌪॒𑌶𑍂𑌨॒𑌭𑌿𑌮॑𑌨𑍍𑌯𑌤𑍇 ॥
𑌅॒𑌯॒𑌸𑍍𑌮𑌯𑍇॑𑌨 𑌕𑌮॒𑌣𑍍𑌡𑌲𑍁॑𑌨𑌾 𑌤𑍃॒𑌤𑍀𑌯𑌾᳚𑌮𑍍 ।
𑌆𑌹𑍁॑𑌤𑌿-𑌞𑍍𑌜𑍁𑌹𑍋𑌤𑍍𑌯𑌾-𑌯॒𑌸𑍍𑌯𑍋॑ 𑌵𑍈 𑌪𑍍𑌰॒𑌜𑌾𑌃 । 𑌰𑍁॒𑌦𑍍𑌰𑍋᳚-𑌽𑌗𑍍𑌨𑌿-𑌸𑍍𑌸𑍍𑌵𑌿॑𑌷𑍍𑌟॒𑌕𑍃𑌤𑍍 । 𑌰𑍁॒𑌦𑍍𑌰𑌾𑌦𑍇॒𑌵 𑌪𑍍𑌰॒𑌜𑌾 𑌅॒𑌨𑍍𑌤𑌰𑍍𑌦॑𑌧𑌾𑌤𑌿 । 𑌅𑌥𑍋॒ 𑌯𑌤𑍍𑌰𑍈॒𑌷𑌾-𑌽𑌽𑌹𑍁॑𑌤𑌿𑌰𑍍-𑌹𑍂॒𑌯𑌤𑍇᳚ ।
𑌨 𑌤𑌤𑍍𑌰॑ 𑌰𑍁॒𑌦𑍍𑌰𑌃 𑌪𑍍𑌰॒𑌜𑌾 𑌅॒𑌭𑌿𑌮॑𑌨𑍍𑌯𑌤𑍇 ॥ 45 ॥
(𑌦॒𑌧𑌾॒ - 𑌤𑍍𑌯𑌭॑𑌵𑌨𑍍 - 𑌮𑌨𑍍𑌯𑌤𑍇 - 𑌪𑍍𑌰॒𑌜𑌾 𑌅॒𑌨𑍍𑌤-𑌰𑍍𑌦॑𑌧𑌾𑌤𑌿॒ 𑌦𑍍𑌵𑍇 𑌚॑) (𑌅. 11)

𑌅𑌨𑍁𑌵𑌾𑌕𑌂 12 - 𑌤𑌦𑍁𑌭𑌯𑌹𑍋𑌮𑌮𑌧𑍍𑌯𑌵𑌰𑍍𑌤𑍍𑌯𑌶𑍍𑌚𑌸𑍍𑌤𑍋𑌮𑍀𑌯𑌹𑍋𑌮𑌃
𑌅𑌶𑍍𑌵॑𑌸𑍍𑌯॒ 𑌵𑌾 𑌆𑌲॑𑌬𑍍𑌧𑌸𑍍𑌯॒ 𑌮𑍇𑌧॒ 𑌉𑌦॑𑌕𑍍𑌰𑌾𑌮𑌤𑍍 । 𑌤𑌦॑𑌶𑍍𑌵𑌸𑍍𑌤𑍋॒𑌮𑍀𑌯॑-𑌮𑌭𑌵𑌤𑍍 ।
𑌯𑌦॑𑌶𑍍𑌵𑌸𑍍𑌤𑍋॒𑌮𑍀𑌯॑-𑌞𑍍𑌜𑍁॒𑌹𑍋𑌤𑌿॑ । 𑌸𑌮𑍇॑𑌧𑌮𑍇॒𑌵𑍈𑌨॒-𑌮𑌾𑌲॑𑌭𑌤𑍇 ॥ 𑌆𑌜𑍍𑌯𑍇॑𑌨 𑌜𑍁𑌹𑍋𑌤𑌿 । 𑌮𑍇𑌧𑍋॒ 𑌵𑌾 𑌆𑌜𑍍𑌯᳚𑌮𑍍 । 𑌮𑍇𑌧𑍋᳚-𑌽𑌶𑍍𑌵𑌸𑍍𑌤𑍋॒𑌮𑍀𑌯᳚𑌮𑍍 । 𑌮𑍇𑌧𑍇॑𑌨𑍈॒𑌵𑌾𑌸𑍍𑌮𑌿॒-𑌨𑍍𑌮𑍇𑌧॑-𑌨𑍍𑌦𑌧𑌾𑌤𑌿 ॥ 𑌷𑌟𑌤𑍍𑌰𑌗𑍍​𑌮𑍍॑𑌶𑌤-𑌞𑍍𑌜𑍁𑌹𑍋𑌤𑌿 ।
𑌷𑌟𑌤𑍍𑌰𑌗𑍍​𑌮𑍍॑𑌶𑌦𑌕𑍍𑌷𑌰𑌾 𑌬𑍃𑌹॒𑌤𑍀 ॥ 46 ॥

𑌬𑌾𑌰𑍍​𑌹॑𑌤𑌾𑌃 𑌪॒𑌶𑌵𑌃॑ । 𑌸𑌾 𑌪॑𑌶𑍂॒𑌨𑌾-𑌮𑍍𑌮𑌾𑌤𑍍𑌰𑌾᳚ । 𑌪॒𑌶𑍂𑌨𑍇॒𑌵 𑌮𑌾𑌤𑍍𑌰॑𑌯𑌾॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌤𑌾 𑌯𑌦𑍍𑌭𑍂𑌯॑𑌸𑍀𑌰𑍍𑌵𑌾॒ 𑌕𑌨𑍀॑𑌯𑌸𑍀𑌰𑍍𑌵𑌾 𑌜𑍁𑌹𑍁॒𑌯𑌾𑌤𑍍 । 𑌪॒𑌶𑍂𑌨𑍍𑌮𑌾𑌤𑍍𑌰॑𑌯𑌾॒ 𑌵𑍍𑌯॑𑌦𑍍𑌰𑍍𑌧𑌯𑍇𑌤𑍍 ।
𑌷𑌟𑌤𑍍𑌰𑌗𑍍​𑌮𑍍॑𑌶𑌤-𑌞𑍍𑌜𑍁𑌹𑍋𑌤𑌿 । 𑌷𑌟𑌤𑍍𑌰𑌗𑍍​𑌮𑍍॑𑌶𑌦𑌕𑍍𑌷𑌰𑌾 𑌬𑍃𑌹॒𑌤𑍀 । 𑌬𑌾𑌰𑍍​𑌹॑𑌤𑌾𑌃 𑌪॒𑌶𑌵𑌃॑ ।
𑌸𑌾 𑌪॑𑌶𑍂॒𑌨𑌾-𑌮𑍍𑌮𑌾𑌤𑍍𑌰𑌾᳚ । 𑌪॒𑌶𑍂𑌨𑍇॒𑌵 𑌮𑌾𑌤𑍍𑌰॑𑌯𑌾॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥ 4𑍭 ॥

𑌅॒𑌶𑍍𑌵॒𑌸𑍍𑌤𑍋॒𑌮𑍀𑌯𑌗𑍍​𑌮𑍍॑ 𑌹𑍁॒𑌤𑍍𑌵𑌾 𑌦𑍍𑌵𑌿॒𑌪𑌦𑌾॑ 𑌜𑍁𑌹𑍋𑌤𑌿 । 𑌦𑍍𑌵𑌿॒𑌪𑌾𑌦𑍍𑌵𑍈 𑌪𑍁𑌰𑍁॑𑌷𑍋॒ 𑌦𑍍𑌵𑌿𑌪𑍍𑌰॑𑌤𑌿𑌷𑍍𑌠𑌃 ।
𑌤𑌦𑍇॑𑌨-𑌮𑍍𑌪𑍍𑌰𑌤𑌿॒𑌷𑍍𑌠𑌯𑌾॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥ 𑌤𑌦𑌾॑𑌹𑍁𑌃 । 𑌅॒𑌶𑍍𑌵॒𑌸𑍍𑌤𑍋॒𑌮𑍀𑌯॒-𑌮𑍍𑌪𑍂𑌰𑍍𑌵𑌗𑍍​𑌮𑍍॑ 𑌹𑍋𑌤॒𑌵𑍍𑌯𑌾(3)-𑌨𑍍𑌦𑍍𑌵𑌿॒𑌪𑌦𑌾(3) 𑌇𑌤𑌿॑ । 𑌅𑌶𑍍𑌵𑍋॒ 𑌵𑌾 𑌅॑𑌶𑍍𑌵𑌸𑍍𑌤𑍋॒𑌮𑍀𑌯᳚𑌮𑍍 । 𑌪𑍁𑌰𑍁॑𑌷𑍋 𑌦𑍍𑌵𑌿॒𑌪𑌦𑌾𑌃᳚ । 𑌅॒𑌶𑍍𑌵॒𑌸𑍍𑌤𑍋॒𑌮𑍀𑌯𑌗𑍍​𑌮𑍍॑ 𑌹𑍁॒𑌤𑍍𑌵𑌾 𑌦𑍍𑌵𑌿॒𑌪𑌦𑌾॑ 𑌜𑍁𑌹𑍋𑌤𑌿 । 𑌤𑌸𑍍𑌮𑌾᳚-𑌦𑍍𑌦𑍍𑌵𑌿॒𑌪𑌾𑌚𑍍𑌚𑌤𑍁॑𑌷𑍍𑌪𑌾𑌦𑌮𑌤𑍍𑌤𑌿 ।
𑌅𑌥𑍋᳚ 𑌦𑍍𑌵𑌿॒𑌪𑌦𑍍𑌯𑍇॒𑌵 𑌚𑌤𑍁॑𑌷𑍍𑌪𑌦𑌃॒ 𑌪𑍍𑌰𑌤𑌿॑𑌷𑍍𑌠𑌾𑌪𑌯𑌤𑌿 ॥ 𑌦𑍍𑌵𑌿॒𑌪𑌦𑌾॑ 𑌹𑍁॒𑌤𑍍𑌵𑌾 । 𑌨𑌾𑌨𑍍𑌯𑌾𑌮𑍁𑌤𑍍𑌤॑𑌰𑌾॒-𑌮𑌾𑌹𑍁॑𑌤𑌿-𑌞𑍍𑌜𑍁𑌹𑍁𑌯𑌾𑌤𑍍 । 𑌯𑌦॒𑌨𑍍𑌯𑌾𑌮𑍁𑌤𑍍𑌤॑𑌰𑌾॒-𑌮𑌾𑌹𑍁॑𑌤𑌿-𑌞𑍍𑌜𑍁𑌹𑍁॒𑌯𑌾𑌤𑍍 ।
𑌪𑍍𑌰 𑌪𑍍𑌰॑𑌤𑌿॒𑌷𑍍𑌠𑌾𑌯𑌾᳚𑌶𑍍𑌚𑍍𑌯𑌵𑍇𑌤 । 𑌦𑍍𑌵𑌿॒𑌪𑌦𑌾॑ 𑌅𑌨𑍍𑌤॒𑌤𑍋 𑌜॑𑌹𑍋𑌤𑌿॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 ॥ 4𑍮 ॥
(𑌬𑍃॒𑌹॒ - 𑌤𑍍𑌯॑𑌦𑍍𑌰𑍍𑌧𑌯𑌤𑌿 - 𑌸𑍍𑌥𑌾𑌪𑌯𑌤𑌿॒ 𑌪𑌞𑍍𑌚॑ 𑌚) (𑌅. 12)

𑌅𑌨𑍁𑌵𑌾𑌕𑌂 13 - 𑌸𑌂​𑌵𑌁𑌥𑍍𑌸𑌰𑌾𑌨𑍁𑌷𑍍𑌠𑌾𑌨𑌮𑌿𑌷𑍍𑌟𑍀𑌨𑌾𑌮𑍍
𑌪𑍍𑌰॒𑌜𑌾𑌪॑𑌤𑌿-𑌰𑌶𑍍𑌵𑌮𑍇॒𑌧-𑌮॑𑌸𑍃𑌜𑌤 ।
𑌸𑍋᳚-𑌽𑌸𑍍𑌮𑌾𑌥𑍍𑌸𑍃॒𑌷𑍍𑌟𑍋-𑌽𑌪𑌾᳚𑌕𑍍𑌰𑌾𑌮𑌤𑍍 ।
𑌤𑌂-𑌯𑌁॑𑌜𑍍𑌞-𑌕𑍍𑌰॒𑌤𑍁𑌭𑌿॒-𑌰𑌨𑍍𑌵𑍈᳚𑌚𑍍𑌛𑌤𑍍 । 𑌤𑌂-𑌯𑌁॑𑌜𑍍𑌞-𑌕𑍍𑌰॒𑌤𑍁𑌭𑌿॒-𑌰𑍍𑌨𑌾𑌨𑍍𑌵॑𑌵𑌿𑌨𑍍𑌦𑌤𑍍 । 𑌤𑌮𑌿𑌷𑍍𑌟𑌿॑𑌭𑌿॒-𑌰𑌨𑍍𑌵𑍈᳚𑌚𑍍𑌛𑌤𑍍 । 𑌤𑌮𑌿𑌷𑍍𑌟𑌿॑𑌭𑌿॒-𑌰𑌨𑍍𑌵॑𑌵𑌿𑌨𑍍𑌦𑌤𑍍 । 𑌤𑌦𑌿𑌷𑍍𑌟𑍀॑𑌨𑌾-𑌮𑌿𑌷𑍍𑌟𑌿॒𑌤𑍍𑌵𑌮𑍍 ।
𑌯𑌥𑍍𑌸𑌂॑​𑌵𑌁𑌥𑍍𑌸॒𑌰-𑌮𑌿𑌷𑍍𑌟𑌿॑𑌭𑌿॒-𑌰𑍍𑌯𑌜॑𑌤𑍇 । 𑌅𑌶𑍍𑌵॑𑌮𑍇॒𑌵 𑌤𑌦𑌨𑍍𑌵𑌿॑𑌚𑍍𑌛𑌤𑌿 ॥
𑌸𑌾॒𑌵𑌿॒𑌤𑍍𑌰𑌿𑌯𑍋॑ 𑌭𑌵𑌨𑍍𑌤𑌿 ॥ 4𑍯 ॥

𑌇॒𑌯𑌂-𑌵𑍈𑌁 𑌸॑𑌵𑌿॒𑌤𑌾 । 𑌯𑍋 𑌵𑌾 𑌅॒𑌸𑍍𑌯𑌾-𑌨𑍍𑌨𑌶𑍍𑌯॑𑌤𑌿॒ 𑌯𑍋 𑌨𑌿॒𑌲𑌯॑𑌤𑍇 । 𑌅॒𑌸𑍍𑌯𑌾𑌂-𑌵𑌾𑌁𑌵 𑌤𑌂-𑌵𑌿𑌁॑𑌨𑍍𑌦𑌨𑍍𑌤𑌿 । 𑌨 𑌵𑌾 𑌇॒𑌮𑌾-𑌙𑍍𑌕𑌶𑍍𑌚॒𑌨𑍇𑌤𑍍𑌯𑌾॑𑌹𑍁𑌃 । 𑌤𑌿॒𑌰𑍍𑌯𑌨𑍍𑌨𑍋𑌦𑍍𑌰𑍍𑌧𑍍𑌵𑍋-𑌽𑌤𑍍𑌯𑍇॑𑌤𑍁𑌮𑌰𑍍​𑌹॒𑌤𑍀𑌤𑌿॑ । 𑌯𑌥𑍍𑌸𑌾॑𑌵𑌿॒𑌤𑍍𑌰𑌿𑌯𑍋॒ 𑌭𑌵॑𑌨𑍍𑌤𑌿 ।
𑌸॒𑌵𑌿॒𑌤𑍃-𑌪𑍍𑌰॑𑌸𑍂𑌤 𑌏॒𑌵𑍈𑌨॑𑌮𑌿𑌚𑍍𑌛𑌤𑌿 ॥
𑌈॒𑌶𑍍𑌵॒𑌰𑍋 𑌵𑌾 𑌅𑌶𑍍𑌵𑌃॒ 𑌪𑍍𑌰𑌮𑍁॑𑌕𑍍𑌤𑌃॒ 𑌪𑌰𑌾᳚-𑌮𑍍𑌪𑌰𑌾॒𑌵𑌤॒-𑌙𑍍𑌗𑌨𑍍𑌤𑍋𑌃᳚ । 𑌯𑌥𑍍𑌸𑌾॒𑌯-𑌨𑍍𑌧𑍃𑌤𑍀᳚𑌰𑍍𑌜𑍁॒𑌹𑍋𑌤𑌿॑ । 𑌅𑌶𑍍𑌵॑𑌸𑍍𑌯॒ 𑌯𑌤𑍍𑌯𑍈॒ 𑌧𑍃𑌤𑍍𑌯𑍈᳚ ॥ 50 ॥

𑌯𑌤𑍍𑌪𑍍𑌰𑌾॒𑌤𑌰𑌿𑌷𑍍𑌟𑌿॑𑌭𑌿॒-𑌰𑍍𑌯𑌜॑𑌤𑍇 । 𑌅𑌶𑍍𑌵॑𑌮𑍇॒𑌵 𑌤𑌦𑌨𑍍𑌵𑌿॑𑌚𑍍𑌛𑌤𑌿 । 𑌯𑌥𑍍𑌸𑌾॒𑌯-𑌨𑍍𑌧𑍃𑌤𑍀᳚𑌰𑍍𑌜𑍁॒𑌹𑍋𑌤𑌿॑ । 𑌅𑌶𑍍𑌵॑𑌸𑍍𑌯𑍈॒𑌵 𑌯𑌤𑍍𑌯𑍈॒ 𑌧𑍃𑌤𑍍𑌯𑍈᳚ । 𑌤𑌸𑍍𑌮𑌾᳚𑌥𑍍𑌸𑌾॒𑌯-𑌮𑍍𑌪𑍍𑌰॒𑌜𑌾𑌃, 𑌕𑍍𑌷𑍇॒𑌮𑍍𑌯𑌾॑
𑌭𑌵𑌨𑍍𑌤𑌿 ॥ 𑌯𑌤𑍍𑌪𑍍𑌰𑌾॒𑌤-𑌰𑌿𑌷𑍍𑌟𑌿॑𑌭𑌿॒-𑌰𑍍𑌯𑌜॑𑌤𑍇 ।
𑌅𑌶𑍍𑌵॑𑌮𑍇॒𑌵 𑌤𑌦𑌨𑍍𑌵𑌿॑𑌚𑍍𑌛𑌤𑌿 । 𑌤𑌸𑍍𑌮𑌾॒𑌦𑍍𑌦𑌿𑌵𑌾॑ 𑌨𑌷𑍍𑌟𑍈॒𑌷 𑌏॑𑌤𑌿 ॥ 𑌯𑌤𑍍𑌪𑍍𑌰𑌾॒𑌤𑌰𑌿𑌷𑍍𑌟𑌿॑𑌭𑌿॒-𑌰𑍍𑌯𑌜॑𑌤𑍇 𑌸𑌾॒𑌯-𑌨𑍍𑌧𑍃𑌤𑍀᳚𑌰𑍍𑌜𑍁॒𑌹𑍋𑌤𑌿॑ । 𑌅॒𑌹𑍋॒𑌰𑌾॒𑌤𑍍𑌰𑌾𑌭𑍍𑌯𑌾॑-𑌮𑍇॒𑌵𑍈𑌨॒-𑌮𑌨𑍍𑌵𑌿॑𑌚𑍍𑌛𑌤𑌿 । 𑌅𑌥𑍋॑ 𑌅𑌹𑍋𑌰𑌾॒𑌤𑍍𑌰𑌾𑌭𑍍𑌯𑌾॑-𑌮𑍇॒𑌵𑌾𑌸𑍍𑌮𑍈॑ 𑌯𑍋𑌗𑌕𑍍𑌷𑍇॒𑌮-𑌙𑍍𑌕॑𑌲𑍍𑌪𑌯𑌤𑌿 ॥ 51 ॥
(𑌭॒𑌵॒𑌨𑍍𑌤𑌿॒ - 𑌧𑍃𑌤𑍍𑌯𑌾॑ - 𑌏𑌨॒ 𑌮𑌨𑍍𑌵𑌿॑𑌚𑍍𑌛॒𑌤𑍍𑌯𑍇𑌕॑-𑌞𑍍𑌚) (𑌅. 13)

𑌅𑌨𑍁𑌵𑌾𑌕𑌂 14 - 𑌤𑌾𑌸𑍍𑌵𑌿𑌷𑍍𑌟𑌿𑌷𑍁 𑌬𑍍𑌰𑌾𑌹𑍍𑌮𑌣𑌰𑌾𑌜𑌨𑍍𑌯𑌯𑍋𑌰𑍍𑌗𑌾𑌨𑌮𑍍
𑌅𑌪॒ 𑌵𑌾 𑌏॒𑌤𑌸𑍍𑌮𑌾॒𑌚𑍍𑌛𑍍𑌰𑍀 𑌰𑌾॒𑌷𑍍𑌟𑍍𑌰-𑌙𑍍𑌕𑍍𑌰𑌾॑𑌮𑌤𑌿 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌬𑍍𑌰𑌾॒𑌹𑍍𑌮॒𑌣𑍌 𑌵𑍀॑𑌣𑌾𑌗𑌾॒𑌥𑌿𑌨𑍌॑ 𑌗𑌾𑌯𑌤𑌃 । 𑌶𑍍𑌰𑌿॒𑌯𑌾 𑌵𑌾 𑌏॒𑌤-𑌦𑍍𑌰𑍂॒𑌪𑌮𑍍 । 𑌯𑌦𑍍𑌵𑍀𑌣𑌾᳚ । 𑌶𑍍𑌰𑌿𑌯॑-𑌮𑍇॒𑌵𑌾𑌸𑍍𑌮𑌿॒-𑌨𑍍𑌤𑌦𑍍𑌧॑𑌤𑍍𑌤𑌃 । 𑌯॒𑌦𑌾 𑌖𑌲𑍁॒ 𑌵𑍈 𑌪𑍁𑌰𑍁॑𑌷॒-𑌶𑍍𑌶𑍍𑌰𑌿𑌯॑𑌮𑌶𑍍𑌨𑍁॒𑌤𑍇 ।
𑌵𑍀𑌣𑌾᳚-𑌽𑌸𑍍𑌮𑍈 𑌵𑌾𑌦𑍍𑌯𑌤𑍇 ॥ 𑌤𑌦𑌾॑𑌹𑍁𑌃 ।
𑌯𑌦𑍁॒𑌭𑍌 𑌬𑍍𑌰𑌾᳚𑌹𑍍𑌮॒𑌣𑍌 𑌗𑌾𑌯𑍇॑𑌤𑌾𑌮𑍍 ॥ 52 ॥

𑌪𑍍𑌰॒𑌭𑍍𑌰𑌗𑍍​𑌮𑍍𑌶𑍁॑𑌕𑌾-𑌽𑌸𑍍𑌮𑌾॒𑌚𑍍𑌛𑍍𑌰𑍀-𑌸𑍍𑌸𑍍𑌯𑌾᳚𑌤𑍍 ।
𑌨 𑌵𑍈 𑌬𑍍𑌰𑌾᳚𑌹𑍍𑌮॒𑌣𑍇 𑌶𑍍𑌰𑍀 𑌰॑𑌮𑌤॒ 𑌇𑌤𑌿॑ ।
𑌬𑍍𑌰𑌾॒𑌹𑍍𑌮॒𑌣𑍋᳚-𑌽𑌨𑍍𑌯𑍋 𑌗𑌾𑌯𑍇᳚𑌤𑍍 । 𑌰𑌾॒𑌜॒𑌨𑍍𑌯𑍋᳚-𑌽𑌨𑍍𑌯𑌃 ।
𑌬𑍍𑌰𑌹𑍍𑌮॒ 𑌵𑍈 𑌬𑍍𑌰𑌾᳚𑌹𑍍𑌮॒𑌣𑌃 । 𑌕𑍍𑌷॒𑌤𑍍𑌰𑌗𑍍​𑌮𑍍 𑌰𑌾॑𑌜॒𑌨𑍍𑌯𑌃॑ ।
𑌤𑌥𑌾॑ 𑌹𑌾𑌸𑍍𑌯॒ 𑌬𑍍𑌰𑌹𑍍𑌮॑𑌣𑌾 𑌚 𑌕𑍍𑌷॒𑌤𑍍𑌰𑍇𑌣॑ 𑌚𑍋𑌭॒𑌯𑌤॒-𑌶𑍍𑌶𑍍𑌰𑍀𑌃 𑌪𑌰𑌿॑𑌗𑍃𑌹𑍀𑌤𑌾 𑌭𑌵𑌤𑌿 ॥
𑌤𑌦𑌾॑𑌹𑍁𑌃 । 𑌯𑌦𑍁॒𑌭𑍌 𑌦𑌿𑌵𑌾॒ 𑌗𑌾𑌯𑍇॑𑌤𑌾𑌮𑍍 ।
𑌅𑌪𑌾᳚𑌸𑍍𑌮𑌾-𑌦𑍍𑌰𑌾॒𑌷𑍍𑌟𑍍𑌰-𑌙𑍍𑌕𑍍𑌰𑌾॑𑌮𑍇𑌤𑍍 ॥ 53 ॥

𑌨 𑌵𑍈 𑌬𑍍𑌰𑌾᳚𑌹𑍍𑌮॒𑌣𑍇 𑌰𑌾॒𑌷𑍍𑌟𑍍𑌰𑌗𑍍​𑌮𑍍 𑌰॑𑌮𑌤॒ 𑌇𑌤𑌿॑ । 𑌯॒𑌦𑌾 𑌖𑌲𑍁॒ 𑌵𑍈 𑌰𑌾𑌜𑌾॑ 𑌕𑌾॒𑌮𑌯॑𑌤𑍇 । 𑌅𑌥॑ 𑌬𑍍𑌰𑌾𑌹𑍍𑌮॒𑌣-𑌞𑍍𑌜𑌿॑𑌨𑌾𑌤𑌿 । 𑌦𑌿𑌵𑌾᳚ 𑌬𑍍𑌰𑌾𑌹𑍍𑌮॒𑌣𑍋 𑌗𑌾॑𑌯𑍇𑌤𑍍 । 𑌨𑌕𑍍𑌤𑌗𑍍​𑌮𑍍॑ 𑌰𑌾𑌜॒𑌨𑍍𑌯𑌃॑ ।
𑌬𑍍𑌰𑌹𑍍𑌮॑𑌣𑍋॒ 𑌵𑍈 𑌰𑍂॒𑌪𑌮𑌹𑌃॑ । 𑌕𑍍𑌷॒𑌤𑍍𑌰𑌸𑍍𑌯॒ 𑌰𑌾𑌤𑍍𑌰𑌿𑌃॑ ।
𑌤𑌥𑌾॑ 𑌹𑌾𑌸𑍍𑌯॒ 𑌬𑍍𑌰𑌹𑍍𑌮॑𑌣𑌾 𑌚 𑌕𑍍𑌷॒𑌤𑍍𑌰𑍇𑌣॑ 𑌚𑍋𑌭॒𑌯𑌤𑍋॑ 𑌰𑌾॒𑌷𑍍𑌟𑍍𑌰-𑌮𑍍𑌪𑌰𑌿॑𑌗𑍃𑌹𑍀𑌤-𑌮𑍍𑌭𑌵𑌤𑌿 ॥ 𑌇𑌤𑍍𑌯॑𑌦𑌦𑌾॒ 𑌇𑌤𑍍𑌯॑𑌯𑌜𑌥𑌾॒ 𑌇𑌤𑍍𑌯॑𑌪𑌚॒ 𑌇𑌤𑌿॑ 𑌬𑍍𑌰𑌾𑌹𑍍𑌮॒𑌣𑍋 𑌗𑌾𑌯𑍇᳚𑌤𑍍 ।
𑌇॒𑌷𑍍𑌟𑌾॒𑌪𑍂॒𑌰𑍍𑌤𑌂-𑌵𑍈𑌁 𑌬𑍍𑌰𑌾᳚𑌹𑍍𑌮॒𑌣𑌸𑍍𑌯॑ ॥ 54 ॥

𑌇॒𑌷𑍍𑌟𑌾॒𑌪𑍂॒𑌰𑍍𑌤𑍇-𑌨𑍈॒𑌵𑍈𑌨॒𑌗𑍍​𑌮𑍍॒ 𑌸 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌇𑌤𑍍𑌯॑𑌜𑌿𑌨𑌾॒ 𑌇𑌤𑍍𑌯॑𑌯𑍁𑌦𑍍𑌧𑍍𑌯𑌥𑌾॒ 𑌇𑌤𑍍𑌯॒𑌮𑍁𑌗𑍍​𑌮𑍍 𑌸॑𑌗𑍍𑌰𑌾॒𑌮𑍍𑌮-𑌮॑𑌹॒𑌨𑍍𑌨𑌿𑌤𑌿॑ 𑌰𑌾𑌜॒𑌨𑍍𑌯𑌃॑ । 𑌯𑍁॒𑌦𑍍𑌧𑌂-𑌵𑍈𑌁 𑌰𑌾॑𑌜॒𑌨𑍍𑌯॑𑌸𑍍𑌯 । 𑌯𑍁॒𑌦𑍍𑌧𑍇𑌨𑍈॒𑌵𑍈𑌨॒𑌗𑍍​𑌮𑍍॒ 𑌸 𑌸𑌮॑𑌦𑍍𑌰𑍍𑌧𑌯𑌤𑌿 ॥ 𑌅𑌕𑍍𑌲𑍃॑𑌪𑍍𑌤𑌾॒ 𑌵𑌾 𑌏॒𑌤𑌸𑍍𑌯॒𑌰𑍍𑌤𑌵॒ 𑌇𑌤𑍍𑌯𑌾॑𑌹𑍁𑌃 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤॒ 𑌇𑌤𑌿॑ ।
𑌤𑌿॒𑌸𑍍𑌰𑍋᳚-𑌽𑌨𑍍𑌯𑍋 𑌗𑌾𑌯॑𑌤𑌿 𑌤𑌿॒𑌸𑍍𑌰𑍋᳚-𑌽𑌨𑍍𑌯𑌃 । 𑌷𑌟𑍍𑌥𑍍𑌸𑌮𑍍𑌪॑𑌦𑍍𑌯𑌨𑍍𑌤𑍇 । 𑌷𑌡𑍍𑌵𑌾 𑌋॒𑌤𑌵𑌃॑ ।
𑌋॒𑌤𑍂𑌨𑍇॒𑌵𑌾𑌸𑍍𑌮𑍈॑ 𑌕𑌲𑍍𑌪𑌯𑌤𑌃 ॥ 𑌤𑌾𑌭𑍍𑌯𑌾𑌗𑍍​𑌮𑍍॑ 𑌸॒𑌗𑍍𑌗𑍍॒𑌸𑍍𑌥𑌾𑌯𑌾᳚𑌮𑍍 । 𑌅॒𑌨𑍋॒𑌯𑍁॒𑌕𑍍𑌤𑍇 𑌚॑ 𑌶॒𑌤𑍇 𑌚॑ 𑌦𑌦𑌾𑌤𑌿 । 𑌶॒𑌤𑌾𑌯𑍁𑌃॒ 𑌪𑍁𑌰𑍁॑𑌷-𑌶𑍍𑌶॒𑌤𑍇𑌨𑍍𑌦𑍍𑌰𑌿॑𑌯𑌃 ।
𑌆𑌯𑍁॑𑌷𑍍𑌯𑍇॒𑌵𑍇𑌨𑍍𑌦𑍍𑌰𑌿॒𑌯𑍇 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥ 55 ॥
(𑌗𑌾𑌯𑍇॑𑌤𑌾𑌮𑍍 - 𑌕𑍍𑌰𑌾𑌮𑍇-𑌦𑍍- 𑌬𑍍𑌰𑌾𑌹𑍍𑌮॒𑌣𑌸𑍍𑌯॑ - 𑌕𑌲𑍍𑌪𑌯𑌤𑌶𑍍𑌚॒𑌤𑍍𑌵𑌾𑌰𑌿॑ 𑌚) (𑌅. 14)

𑌅𑌨𑍁𑌵𑌾𑌕𑌂 15 - 𑌅𑌵𑌭𑍃𑌥𑌹𑍋𑌮𑌵𑌿𑌶𑍇𑌷𑌾𑌃
𑌸𑌰𑍍𑌵𑍇॑𑌷𑍁॒ 𑌵𑌾 𑌏॒𑌷𑍁 𑌲𑍋॒𑌕𑍇𑌷𑍁॑ 𑌮𑍃॒𑌤𑍍𑌯𑌵𑍋॒-𑌽𑌨𑍍𑌵𑌾𑌯॑𑌤𑍍𑌤𑌾𑌃 । 𑌤𑍇𑌭𑍍𑌯𑍋॒ 𑌯𑌦𑌾𑌹𑍁॑𑌤𑍀॒𑌰𑍍𑌨 𑌜𑍁॑𑌹𑍁॒𑌯𑌾𑌤𑍍 । 𑌲𑍋॒𑌕𑍇 𑌲𑍋॑𑌕 𑌏𑌨-𑌮𑍍𑌮𑍃॒𑌤𑍍𑌯𑍁𑌰𑍍𑌵𑌿॑𑌨𑍍𑌦𑍇𑌤𑍍 ।
𑌮𑍃॒𑌤𑍍𑌯𑌵𑍇॒ 𑌸𑍍𑌵𑌾𑌹𑌾॑ 𑌮𑍃॒𑌤𑍍𑌯𑌵𑍇॒ 𑌸𑍍𑌵𑌾𑌹𑍇𑌤𑍍𑌯॑𑌭𑌿 𑌪𑍂॒𑌰𑍍𑌵𑌮𑌾𑌹𑍁॑𑌤𑍀-𑌰𑍍𑌜𑍁𑌹𑍋𑌤𑌿 ।
𑌲𑍋॒𑌕𑌾𑌲𑍍𑌲𑍋॑𑌕𑌾𑌦𑍇॒𑌵 𑌮𑍃॒𑌤𑍍𑌯𑍁𑌮𑌵॑𑌯𑌜𑌤𑍇 ।
𑌨𑍈𑌨𑌂॑-𑌲𑍋𑌁॒𑌕𑍇 𑌲𑌾॑𑌕𑍇 𑌮𑍃॒𑌤𑍍𑌯𑍁𑌰𑍍𑌵𑌿॑𑌨𑍍𑌦𑌤𑌿 ॥
𑌯𑌦॒𑌮𑍁𑌷𑍍𑌮𑍈॒ 𑌸𑍍𑌵𑌾𑌹𑌾॒-𑌽𑌮𑍁𑌷𑍍𑌮𑍈॒ 𑌸𑍍𑌵𑌾𑌹𑍇𑌤𑌿॒ 𑌜𑍁𑌹𑍍𑌵॑𑌥𑍍𑌸॒-𑌞𑍍𑌚𑌕𑍍𑌷𑍀॑𑌤 । 𑌬॒𑌹𑍁-𑌮𑍍𑌮𑍃॒𑌤𑍍𑌯𑍁𑌮॒𑌮𑌿𑌤𑍍𑌰॑-𑌙𑍍𑌕𑍁𑌰𑍍𑌵𑍀𑌤 । 𑌮𑍃॒𑌤𑍍𑌯𑌵𑍇॒ 𑌸𑍍𑌵𑌾𑌹𑍇𑌤𑍍𑌯𑍇𑌕॑𑌸𑍍𑌮𑌾 𑌏॒𑌵𑍈𑌕𑌾᳚-𑌞𑍍𑌜𑍁𑌹𑍁𑌯𑌾𑌤𑍍 । 𑌏𑌕𑍋॒ 𑌵𑌾 𑌅॒𑌮𑍁𑌷𑍍𑌮𑌿॑𑌨𑍍 𑌁𑌲𑌾॒𑌕𑍇 𑌮𑍃॒𑌤𑍍𑌯𑍁𑌃 ॥ 56 ॥

𑌅॒𑌶॒𑌨॒𑌯𑌾॒ 𑌮𑍃॒𑌤𑍍𑌯𑍁𑌰𑍇॒𑌵 । 𑌤𑌮𑍇॒𑌵𑌾𑌮𑍁𑌷𑍍𑌮𑌿॑𑌨𑍍 𑌁𑌲𑍋॒𑌕𑍇-𑌽𑌵॑𑌯𑌜𑌤𑍇 ॥ 𑌭𑍍𑌰𑍂॒𑌣॒𑌹॒𑌤𑍍𑌯𑌾𑌯𑍈॒ 𑌸𑍍𑌵𑌾𑌹𑍇𑌤𑍍𑌯॑𑌵𑌭𑍃॒𑌥 𑌆𑌹𑍁॑𑌤𑌿-𑌞𑍍𑌜𑍁𑌹𑍋𑌤𑌿 ।
𑌭𑍍𑌰𑍂॒𑌣॒𑌹॒𑌤𑍍𑌯𑌾𑌮𑍇॒ 𑌵𑌾 𑌵॑𑌯𑌜𑌤𑍇 ॥ 𑌤𑌦𑌾॑𑌹𑍁𑌃 । 𑌯𑌦𑍍𑌭𑍍𑌰𑍂॑𑌣𑌹॒𑌤𑍍𑌯𑌾 𑌽𑌪𑌾॒𑌤𑍍𑌰𑍍𑌯𑌾-𑌽𑌥॑ ।
𑌕𑌸𑍍𑌮𑌾᳚-𑌦𑍍𑌯॒𑌜𑍍𑌞𑍇-𑌽𑌪𑌿॑ 𑌕𑍍𑌰𑌿𑌯𑌤॒ 𑌇𑌤𑌿॑ ॥
𑌅𑌮𑍃॑𑌤𑍍𑌯𑍁॒𑌰𑍍𑌵𑌾 𑌅॒𑌨𑍍𑌯𑍋 𑌭𑍍𑌰𑍂॑𑌣𑌹॒𑌤𑍍𑌯𑌾𑌯𑌾॒ 𑌇𑌤𑍍𑌯𑌾॑𑌹𑍁𑌃 ।
𑌭𑍍𑌰𑍂॒𑌣॒𑌹॒𑌤𑍍𑌯𑌾 𑌵𑌾𑌵 𑌮𑍃॒𑌤𑍍𑌯𑍁𑌰𑌿𑌤𑌿॑ ।
𑌯𑌦𑍍𑌭𑍍𑌰𑍂॑𑌣𑌹॒𑌤𑍍𑌯𑌾𑌯𑍈॒ 𑌸𑍍𑌵𑌾𑌹𑍇𑌤𑍍𑌯॑𑌵𑌭𑍃॒𑌥 𑌆𑌹𑍁𑌤𑌿॑-𑌞𑍍𑌜𑍁॒𑌹𑍋𑌤𑌿॑ ॥ 5𑍭 ॥

𑌮𑍃॒𑌤𑍍𑌯𑍁𑌮𑍇॒ 𑌵𑌾 𑌹𑍁॑𑌤𑍍𑌯𑌾 𑌤𑌰𑍍𑌪𑌯𑌿॒𑌤𑍍𑌵𑌾 𑌪॑𑌰𑌿॒𑌪𑌾𑌣॑-𑌙𑍍𑌕𑍃॒𑌤𑍍𑌵𑌾 ।
𑌭𑍍𑌰𑍂॒𑌣॒𑌘𑍍𑌨𑍇 𑌭𑍇॑𑌷॒𑌜-𑌙𑍍𑌕॑𑌰𑍋𑌤𑌿 ॥ 𑌏॒𑌤𑌾𑌗𑍍​𑌮𑍍 𑌹॒ 𑌵𑍈 𑌮𑍁॑𑌣𑍍𑌡𑌿॒𑌭 𑌔॑𑌦𑌨𑍍𑌯॒𑌵𑌃 ।
𑌭𑍍𑌰𑍂॒𑌣॒𑌹॒𑌤𑍍𑌯𑌾𑌯𑍈॒ 𑌪𑍍𑌰𑌾𑌯॑𑌶𑍍𑌚𑌿𑌤𑍍𑌤𑌿𑌂-𑌵𑌿𑌁॒𑌦𑌾𑌞𑍍𑌚॑𑌕𑌾𑌰 ।
𑌯𑍋 𑌹𑌾॒𑌸𑍍𑌯𑌾𑌪𑌿॑ 𑌪𑍍𑌰॒𑌜𑌾𑌯𑌾᳚-𑌮𑍍𑌬𑍍𑌰𑌾𑌹𑍍𑌮॒𑌣𑌗𑍍​𑌮𑍍 𑌹𑌨𑍍𑌤𑌿॑ । 𑌸𑌰𑍍𑌵॑𑌸𑍍𑌮𑍈॒ 𑌤𑌸𑍍𑌮𑍈॑ 𑌭𑍇𑌷॒𑌜-𑌙𑍍𑌕॑𑌰𑍋𑌤𑌿 ॥
𑌜𑍁॒𑌮𑍍𑌬॒𑌕𑌾𑌯॒ 𑌸𑍍𑌵𑌾𑌹𑍇𑌤𑍍𑌯॑𑌵𑌭𑍃॒𑌥 𑌉॑𑌤𑍍𑌤॒𑌮𑌾𑌮𑌾𑌹𑍁॑𑌤𑌿-𑌞𑍍𑌜𑍁𑌹𑍋𑌤𑌿 । 𑌵𑌰𑍁॑𑌣𑍋॒ 𑌵𑍈 𑌜𑍁॑𑌮𑍍𑌬॒𑌕𑌃 । 𑌅॒𑌨𑍍𑌤॒𑌤 𑌏॒𑌵 𑌵𑌰𑍁॑𑌣॒-𑌮𑌵॑𑌯𑌜𑌤𑍇 ॥ 𑌖॒𑌲॒𑌤𑍇𑌰𑍍𑌵𑌿॑𑌕𑍍𑌲𑌿॒𑌧𑌸𑍍𑌯॑ 𑌶𑍁॒𑌕𑍍𑌲𑌸𑍍𑌯॑ 𑌪𑌿𑌙𑍍𑌗𑌾॒𑌕𑍍𑌷𑌸𑍍𑌯॑ 𑌮𑍂॒𑌦𑍍𑌰𑍍𑌧𑌞𑍍𑌜𑍁॑𑌹𑍋𑌤𑌿 ।
𑌏॒𑌤𑌦𑍍𑌵𑍈 𑌵𑌰𑍁॑𑌣𑌸𑍍𑌯 𑌰𑍂॒𑌪𑌮𑍍 । 𑌰𑍂॒𑌪𑍇𑌣𑍈॒𑌵 𑌵𑌰𑍁॑𑌣॒𑌮𑌵॑𑌯𑌜𑌤𑍇 ॥ 5𑍮 ॥
(𑌲𑍋॒𑌕𑍇 𑌮𑍃॒𑌤𑍍𑌯𑍁--𑌰𑍍 𑌜𑍁॒𑌹𑍋𑌤𑌿॑ - 𑌮𑍂॒𑌦𑍍𑌰𑍍𑌧𑌞𑍍𑌜𑍁॑𑌹𑍋𑌤𑌿॒ 𑌦𑍍𑌵𑍇 𑌚॑) (𑌅. 15)

𑌅𑌨𑍁𑌵𑌾𑌕𑌂 16 - 𑌉𑌪𑌾𑌕𑌰𑌣𑌮𑌨𑍍𑌤𑍍𑌰𑌵𑍍𑌯𑌾𑌖𑍍𑌯𑌾𑌨𑌾𑌦𑌿𑌃
𑌵𑌾॒𑌰𑍁॒𑌣𑍋 𑌵𑌾 𑌅𑌶𑍍𑌵𑌃॑ । 𑌤-𑌨𑍍𑌦𑍇॒𑌵𑌤॑𑌯𑌾॒ 𑌵𑍍𑌯॑𑌦𑍍𑌰𑍍𑌧𑌯𑌤𑌿 । 𑌯𑌤𑍍𑌪𑍍𑌰𑌾॑𑌜𑌾𑌪॒𑌤𑍍𑌯-𑌙𑍍𑌕॒𑌰𑍋𑌤𑌿॑ ।
𑌨𑌮𑍋॒ 𑌰𑌾𑌜𑍍𑌞𑍇॒ 𑌨𑌮𑍋॒ 𑌵𑌰𑍁॑𑌣𑌾॒𑌯𑍇𑌤𑍍𑌯𑌾॑𑌹 । 𑌵𑌾॒𑌰𑍁॒𑌣𑍋 𑌵𑌾 𑌅𑌶𑍍𑌵𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥ 𑌨𑌮𑍋-𑌽𑌶𑍍𑌵𑌾॑𑌯॒ 𑌨𑌮𑌃॑ 𑌪𑍍𑌰॒𑌜𑌾𑌪॑𑌤𑌯॒ 𑌇𑌤𑍍𑌯𑌾॑𑌹 । 𑌪𑍍𑌰𑌾॒𑌜𑌾॒𑌪॒𑌤𑍍𑌯𑍋 𑌵𑌾 𑌅𑌶𑍍𑌵𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌨𑌮𑍋-𑌽𑌧𑌿॑𑌪𑌤𑌯॒ 𑌇𑌤𑍍𑌯𑌾॑𑌹 ॥ 5𑍯 ॥

𑌧𑌰𑍍𑌮𑍋॒ 𑌵𑌾 𑌅𑌧𑌿॑𑌪𑌤𑌿𑌃 । 𑌧𑌰𑍍𑌮॑𑌮𑍇॒𑌵𑌾-𑌵॑𑌰𑍁𑌨𑍍𑌧𑍇 ॥
𑌅𑌧𑌿॑𑌪𑌤𑌿-𑌰॒𑌸𑍍𑌯𑌧𑌿॑𑌪𑌤𑌿-𑌮𑍍𑌮𑌾 𑌕𑍁॒𑌰𑍍𑌵𑌧𑌿॑𑌪𑌤𑌿𑌰॒𑌹-𑌮𑍍𑌪𑍍𑌰॒𑌜𑌾𑌨𑌾᳚-𑌮𑍍𑌭𑍂𑌯𑌾𑌸॒-𑌮𑌿𑌤𑍍𑌯𑌾॑𑌹 ।
𑌅𑌧𑌿॑𑌪𑌤𑌿-𑌮॒𑌵𑍈𑌨𑌗𑍍​𑌮𑍍॑ 𑌸𑌮𑌾॒𑌨𑌾𑌨𑌾᳚-𑌙𑍍𑌕𑌰𑍋𑌤𑌿 ॥
𑌮𑌾-𑌨𑍍𑌧॑𑌹𑌿॒ 𑌮𑌯𑌿॑ 𑌧॒𑌹𑍀𑌤𑍍𑌯𑌾॑𑌹 ।
𑌆॒𑌶𑌿𑌷॑𑌮𑍇॒𑌵𑍈𑌤𑌾𑌮𑌾𑌶𑌾᳚𑌸𑍍𑌤𑍇 ॥
𑌉॒𑌪𑌾𑌕𑍃॑𑌤𑌾𑌯॒ 𑌸𑍍𑌵𑌾𑌹𑍇𑌤𑍍𑌯𑍁॒𑌪𑌾𑌕𑍃॑𑌤𑍇 𑌜𑍁𑌹𑍋𑌤𑌿 ।
𑌆𑌲॑𑌬𑍍𑌧𑌾𑌯॒ 𑌸𑍍𑌵𑌾𑌹𑍇𑌤𑌿॒ 𑌨𑌿𑌯𑍁॑𑌕𑍍𑌤𑍇 𑌜𑍁𑌹𑍋𑌤𑌿 ।
𑌹𑍁॒𑌤𑌾𑌯॒ 𑌸𑍍𑌵𑌾𑌹𑍇𑌤𑌿॑ 𑌹𑍁॒𑌤𑍇 𑌜𑍁॑𑌹𑍋𑌤𑌿 ।
𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॑-𑌮॒𑌭𑌿𑌜𑌿॑𑌤𑍍𑌯𑍈 ॥ 60 ॥
𑌪𑍍𑌰 𑌵𑌾 𑌏॒𑌷 𑌏॒𑌭𑍍𑌯𑍋 𑌲𑍋॒𑌕𑍇𑌭𑍍𑌯॑𑌶𑍍𑌚𑍍𑌯𑌵𑌤𑍇 । 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ।
𑌆॒𑌗𑍍𑌨𑍇॒𑌯-𑌮𑍈᳚𑌨𑍍𑌦𑍍𑌰𑌾॒𑌗𑍍𑌨-𑌮𑌾᳚𑌶𑍍𑌵𑌿॒𑌨𑌮𑍍 ।
𑌤𑌾-𑌨𑍍𑌪॒𑌶𑍂𑌨𑌾𑌲॑𑌭𑌤𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 ॥
𑌯𑌦𑌾᳚-𑌽𑌗𑍍𑌨𑍇॒𑌯𑍋 𑌭𑌵॑𑌤𑌿 । 𑌅॒𑌗𑍍𑌨𑌿-𑌸𑍍𑌸𑌰𑍍𑌵𑌾॑ 𑌦𑍇॒𑌵𑌤𑌾𑌃᳚ । 𑌦𑍇॒𑌵𑌤𑌾॑ 𑌏॒𑌵𑌾𑌵॑𑌰𑍁𑌨𑍍𑌧𑍇 ॥
𑌬𑍍𑌰𑌹𑍍𑌮॒ 𑌵𑌾 𑌅॒𑌗𑍍𑌨𑌿𑌃 । 𑌕𑍍𑌷॒𑌤𑍍𑌰𑌮𑌿𑌨𑍍𑌦𑍍𑌰𑌃॑ । 𑌯𑌦𑍈᳚𑌨𑍍𑌦𑍍𑌰𑌾॒𑌗𑍍𑌨𑍋 𑌭𑌵॑𑌤𑌿 ॥ 61 ॥

𑌬𑍍𑌰॒𑌹𑍍𑌮॒𑌕𑍍𑌷॒𑌤𑍍𑌰𑍇 𑌏॒𑌵𑌾𑌵॑𑌰𑍁𑌨𑍍𑌧𑍇 ॥
𑌯𑌦𑌾᳚-𑌽𑌶𑍍𑌵𑌿॒𑌨𑍋 𑌭𑌵॑𑌤𑌿 । 𑌆॒𑌶𑌿𑌷𑌾॒𑌮𑌵॑𑌰𑍁𑌦𑍍𑌧𑍍𑌯𑍈 ॥
𑌤𑍍𑌰𑌯𑍋॑ 𑌭𑌵𑌨𑍍𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 ।
𑌏॒𑌷𑍍𑌵𑍇॑𑌵 𑌲𑍋॒𑌕𑍇𑌷𑍁॒ 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥
𑌅॒𑌗𑍍𑌨𑌯𑍇-𑌽𑌗𑍍​𑌮𑍍॑𑌹𑍋॒𑌮𑍁𑌚𑍇॒-𑌽𑌷𑍍𑌟𑌾𑌕॑𑌪𑌾𑌲॒ 𑌇𑌤𑌿॒ 𑌦𑌶॑𑌹𑌵𑌿𑌷॒𑌮𑌿𑌷𑍍𑌟𑌿॒-𑌨𑍍𑌨𑌿𑌰𑍍𑌵॑𑌪𑌤𑌿 ।
𑌦𑌶𑌾᳚𑌕𑍍𑌷𑌰𑌾 𑌵𑌿॒𑌰𑌾𑌟𑍍 । 𑌅𑌨𑍍𑌨𑌂॑-𑌵𑌿𑌁॒𑌰𑌾𑌟𑍍 ।
𑌵𑌿॒𑌰𑌾𑌜𑍈॒-𑌵𑌾𑌨𑍍𑌨𑌾𑌦𑍍𑌯॒-𑌮𑌵॑𑌰𑍁𑌨𑍍𑌧𑍇 ॥
𑌅॒𑌗𑍍𑌨𑍇𑌰𑍍𑌮॑𑌨𑍍𑌵𑍇 𑌪𑍍𑌰𑌥॒𑌮𑌸𑍍𑌯॒ 𑌪𑍍𑌰𑌚𑍇॑𑌤𑌸॒ 𑌇𑌤𑌿॑ 𑌯𑌾𑌜𑍍𑌯𑌾𑌨𑍁𑌵𑌾॒𑌕𑍍𑌯𑌾॑ 𑌭𑌵𑌨𑍍𑌤𑌿 𑌸𑌰𑍍𑌵॒𑌤𑍍𑌵𑌾𑌯॑ ॥ 62 ॥
(𑌅𑌧𑌿॑𑌪𑌤𑌯॒ 𑌇𑌤𑍍𑌯𑌾॑ - 𑌹𑌾॒𑌭𑌿𑌜𑌿॑𑌤𑍍𑌯𑌾 - 𑌐𑌨𑍍𑌦𑍍𑌰𑌾॒𑌗𑍍𑌨𑍋 𑌭𑌵॑𑌤𑌿 - 𑌰𑍁𑌨𑍍𑌧॒ 𑌏𑌕॑-𑌞𑍍𑌚) (𑌅. 16)

𑌅𑌨𑍁𑌵𑌾𑌕𑌂 1𑍭 - 𑌅𑌶𑍍𑌵𑌸𑍍𑌯 𑌰𑍋𑌗𑌾𑌦𑌿𑌨𑌿𑌮𑌿𑌤𑍍𑌤-𑌮𑍍𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌮𑍍
𑌯𑌦𑍍𑌯𑌶𑍍𑌵॑𑌮𑍁𑌪॒𑌤𑌪॑𑌦𑍍𑌵𑌿॒𑌨𑍍𑌦𑍇𑌤𑍍 ।
𑌆॒𑌗𑍍𑌨𑍇॒𑌯-𑌮॒𑌷𑍍𑌟𑌾𑌕॑𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑍇𑌤𑍍 ।
𑌸𑍌॒𑌮𑍍𑌯-𑌞𑍍𑌚॒𑌰𑍁𑌮𑍍 । 𑌸𑌾॒𑌵𑌿॒𑌤𑍍𑌰-𑌮॒𑌷𑍍𑌟𑌾𑌕॑𑌪𑌾𑌲𑌮𑍍 ॥ 𑌯𑌦𑌾᳚𑌗𑍍𑌨𑍇॒𑌯𑍋 𑌭𑌵॑𑌤𑌿 ।
𑌅॒𑌗𑍍𑌨𑌿-𑌸𑍍𑌸𑌰𑍍𑌵𑌾॑ 𑌦𑍇॒𑌵𑌤𑌾𑌃᳚ । 𑌦𑍇॒𑌵𑌤𑌾॑-𑌭𑌿𑌰𑍇॒𑌵𑍈𑌨॑-𑌮𑍍𑌭𑌿𑌷𑌜𑍍𑌯𑌤𑌿 ॥ 𑌯𑌥𑍍𑌸𑍌॒𑌮𑍍𑌯𑍋 𑌭𑌵॑𑌤𑌿 ।
𑌸𑍋𑌮𑍋॒ 𑌵𑌾 𑌓𑌷॑𑌧𑍀𑌨𑌾॒𑌗𑍍​𑌮𑍍॒ 𑌰𑌾𑌜𑌾᳚ ।
𑌯𑌾𑌭𑍍𑌯॑ 𑌏॒𑌵𑍈𑌨𑌂॑-𑌵𑌿𑌁॒𑌨𑍍𑌦𑌤𑌿॑ ॥ 63 ॥

𑌤𑌾𑌭𑌿॑𑌰𑍇॒𑌵𑍈𑌨॑-𑌮𑍍𑌭𑌿𑌷𑌜𑍍𑌯𑌤𑌿 ॥ 𑌯𑌥𑍍𑌸𑌾॑𑌵𑌿॒𑌤𑍍𑌰𑍋 𑌭𑌵॑𑌤𑌿 ।
𑌸॒𑌵𑌿॒𑌤𑍃𑌪𑍍𑌰॑𑌸𑍂𑌤 𑌏॒𑌵𑍈𑌨॑-𑌮𑍍𑌭𑌿𑌷𑌜𑍍𑌯𑌤𑌿 ॥ 𑌏॒𑌤𑌾𑌭𑌿॑𑌰𑍇॒𑌵𑍈𑌨॑-𑌨𑍍𑌦𑍇॒𑌵𑌤𑌾॑𑌭𑌿-𑌰𑍍𑌭𑌿𑌷𑌜𑍍𑌯𑌤𑌿 ।
𑌅॒𑌗॒𑌦𑍋 𑌹𑍈॒𑌵 𑌭॑𑌵𑌤𑌿 ॥ 𑌪𑍌॒𑌷𑍍𑌣-𑌞𑍍𑌚॒𑌰𑍁-𑌨𑍍𑌨𑌿𑌰𑍍𑌵॑𑌪𑍇𑌤𑍍 । 𑌯𑌦𑌿॑ 𑌶𑍍𑌲𑍋॒𑌣-𑌸𑍍𑌸𑍍𑌯𑌾𑌤𑍍 । 𑌪𑍂॒𑌷𑌾 𑌵𑍈 𑌶𑍍𑌲𑍌𑌣𑍍𑌯॑𑌸𑍍𑌯 𑌭𑌿॒𑌷𑌕𑍍 । 𑌸 𑌏॒𑌵𑍈𑌨॑-𑌮𑍍𑌭𑌿𑌷𑌜𑍍𑌯𑌤𑌿 । 𑌅𑌶𑍍𑌲𑍋॑𑌣𑍋 𑌹𑍈॒𑌵 𑌭॑𑌵𑌤𑌿 ॥ 64 ॥

𑌰𑍌॒𑌦𑍍𑌰-𑌞𑍍𑌚॒𑌰𑍁-𑌨𑍍𑌨𑌿𑌰𑍍𑌵॑𑌪𑍇𑌤𑍍 । 𑌯𑌦𑌿॑ 𑌮𑌹॒𑌤𑍀 𑌦𑍇॒𑌵𑌤𑌾॑-𑌽𑌭𑌿॒𑌮𑌨𑍍𑌯𑍇॑𑌤 । 𑌏॒𑌤॒𑌦𑍍𑌦𑍇॒𑌵॒𑌤𑍍𑌯𑍋॑ 𑌵𑌾 𑌅𑌶𑍍𑌵𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾 𑌭𑌿𑌷𑌜𑍍𑌯𑌤𑌿 ।
𑌅॒𑌗॒𑌦𑍋 𑌹𑍈॒𑌵 𑌭॑𑌵𑌤𑌿 ॥ 𑌵𑍈॒𑌶𑍍𑌵𑌾॒𑌨॒𑌰-𑌨𑍍𑌦𑍍𑌵𑌾𑌦॑𑌶-𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑍇𑌨𑍍𑌮𑍃𑌗𑌾𑌖॒𑌰𑍇 𑌯𑌦𑌿॒ 𑌨𑌾𑌗𑌚𑍍𑌛𑍇᳚𑌤𑍍 ।
𑌇॒𑌯𑌂-𑌵𑌾𑌁 𑌅॒𑌗𑍍𑌨𑌿𑌰𑍍𑌵𑍈᳚𑌶𑍍𑌵𑌾𑌨॒𑌰𑌃 । 𑌇॒𑌯𑌮𑍇॒𑌵𑍈𑌨॑-𑌮॒𑌰𑍍𑌚𑌿𑌭𑍍𑌯𑌾᳚-𑌮𑍍𑌪𑌰𑌿॒𑌰𑍋𑌧॒𑌮𑌾𑌨॑𑌯𑌤𑌿 ।
𑌆 𑌹𑍈॒𑌵 𑌸𑍁𑌤𑍍𑌯॒𑌮𑌹॑-𑌰𑍍𑌗𑌚𑍍𑌛𑌤𑌿 ॥ 𑌯𑌦𑍍𑌯॑𑌧𑍀॒𑌯𑌾𑌤𑍍 ॥ 65 ॥

𑌅॒𑌗𑍍𑌨𑌯𑍇-𑌽𑌗𑍍​𑌮𑍍॑𑌹𑍋॒𑌮𑍁𑌚𑍇॒-𑌽𑌷𑍍𑌟𑌾𑌕॑𑌪𑌾𑌲𑌃 । 𑌸𑍌॒𑌰𑍍𑌯-𑌮𑍍𑌪𑌯𑌃॑ । 𑌵𑌾॒𑌯॒𑌵𑍍𑌯॑ 𑌆𑌜𑍍𑌯॑𑌭𑌾𑌗𑌃 ॥ 𑌯𑌜॑𑌮𑌾𑌨𑍋॒ 𑌵𑌾 𑌅𑌶𑍍𑌵𑌃॑ । 𑌅𑌗𑍍​𑌮𑍍𑌹॑𑌸𑌾॒ 𑌵𑌾 𑌏॒𑌷 𑌗𑍃॑𑌹𑍀॒𑌤𑌃 ।
𑌯𑌸𑍍𑌯𑌾𑌶𑍍𑌵𑍋॒ 𑌮𑍇𑌧𑌾॑𑌯॒ 𑌪𑍍𑌰𑍋𑌕𑍍𑌷𑌿॑𑌤𑍋॒-𑌽𑌦𑍍𑌧𑍍𑌯𑍇𑌤𑌿॑ । 𑌯𑌦𑌗𑍍​𑌮𑍍॑𑌹𑍋॒𑌮𑍁𑌚𑍇॑ 𑌨𑌿॒𑌰𑍍𑌵𑌪॑𑌤𑌿 ।
𑌅𑌗𑍍​𑌮𑍍𑌹॑𑌸 𑌏॒𑌵 𑌤𑍇𑌨॑ 𑌮𑍁𑌚𑍍𑌯𑌤𑍇 ॥ 𑌯𑌜॑𑌮𑌾𑌨𑍋॒ 𑌵𑌾 𑌅𑌶𑍍𑌵𑌃॑ । 𑌰𑍇𑌤॑𑌸𑌾॒ 𑌵𑌾 𑌏॒𑌷 𑌵𑍍𑌯𑍃॑𑌦𑍍𑌧𑍍𑌯𑌤𑍇 ॥ 66 ॥

𑌯𑌸𑍍𑌯𑌾𑌶𑍍𑌵𑍋॒ 𑌮𑍇𑌧𑌾॑𑌯॒ 𑌪𑍍𑌰𑍋𑌕𑍍𑌷𑌿॑𑌤𑍋॒-𑌽𑌦𑍍𑌧𑍍𑌯𑍇𑌤𑌿॑ । 𑌸𑍌॒𑌰𑍍𑌯𑌗𑍍​𑌮𑍍 𑌰𑍇𑌤𑌃॑ । 𑌯𑌥𑍍𑌸𑍌॒𑌰𑍍𑌯-𑌮𑍍𑌪𑌯𑍋॒ 𑌭𑌵॑𑌤𑌿 । 𑌰𑍇𑌤॑𑌸𑍈॒𑌵𑍈𑌨॒𑌗𑍍​𑌮𑍍॒ 𑌸 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌯𑌜॑𑌮𑌾𑌨𑍋॒ 𑌵𑌾 𑌅𑌶𑍍𑌵𑌃॑ । 𑌗𑌰𑍍𑌭𑍈॒𑌰𑍍𑌵𑌾 𑌏॒𑌷 𑌵𑍍𑌯𑍃॑𑌦𑍍𑌧𑍍𑌯𑌤𑍇 । 𑌯𑌸𑍍𑌯𑌾𑌶𑍍𑌵𑍋॒ 𑌮𑍇𑌧𑌾॑𑌯॒ 𑌪𑍍𑌰𑍋𑌕𑍍𑌷𑌿॑𑌤𑍋॒-𑌽𑌦𑍍𑌧𑍍𑌯𑍇𑌤𑌿॑ । 𑌵𑌾॒𑌯॒𑌵𑍍𑌯𑌾॑ 𑌗𑌰𑍍𑌭𑌾𑌃᳚ ।
𑌯𑌦𑍍𑌵𑌾॑𑌯॒𑌵𑍍𑌯॑ 𑌆𑌜𑍍𑌯॑𑌭𑌾𑌗𑍋॒ 𑌭𑌵॑𑌤𑌿 । 𑌗𑌰𑍍𑌭𑍈॑𑌰𑍇॒𑌵𑍈𑌨॒𑌗𑍍​𑌮𑍍॒ 𑌸 𑌸𑌮॑𑌦𑍍𑌰𑍍𑌧𑌯𑌤𑌿 ॥
𑌅𑌥𑍋॒ 𑌯𑌸𑍍𑌯𑍈॒𑌷𑌾-𑌽𑌶𑍍𑌵॑𑌮𑍇॒𑌧𑍇 𑌪𑍍𑌰𑌾𑌯॑𑌶𑍍𑌚𑌿𑌤𑍍𑌤𑌃 𑌕𑍍𑌰𑌿॒𑌯𑌤𑍇᳚ । 𑌇॒𑌷𑍍𑌟𑍍𑌵𑌾 𑌵𑌸𑍀॑𑌯𑌾-𑌨𑍍𑌭𑌵𑌤𑌿 ॥ 6𑍭 ॥
(𑌵𑌿॒𑌨𑍍𑌦 - 𑌤𑍍𑌯𑌶𑍍𑌲𑍋॑𑌣𑍋 𑌹𑍈॒𑌵 𑌭॑𑌵 - 𑌤𑍍𑌯𑌧𑍀॒𑌯𑌾 - 𑌦𑍃॑𑌦𑍍𑌧𑍍𑌯𑌤𑍇॒ - 𑌗𑌰𑍍𑌭𑍈॑𑌰𑍇॒𑌵𑍈𑌨॒𑌗𑍍​𑌮𑍍॒ 𑌸 𑌸𑌮॑𑌦𑍍𑌰𑍍𑌧𑌯𑌤𑌿॒ 𑌦𑍍𑌵𑍇 𑌚॑) (𑌅. 1𑍭)

𑌅𑌨𑍁𑌵𑌾𑌕𑌂 1𑍮 - 𑌬𑍍𑌰𑌹𑍍𑌮𑍌𑌦𑌨𑌾 𑌉𑌚𑍍𑌯𑌨𑍍𑌤𑍇
𑌤𑌦𑌾॑𑌹𑍁𑌃 । 𑌦𑍍𑌵𑌾𑌦॑𑌶 𑌬𑍍𑌰𑌹𑍍𑌮𑍌𑌦॒𑌨𑌾-𑌨𑍍𑌥𑍍𑌸𑌗𑍍𑌗𑍍​𑌸𑍍𑌥𑌿॑𑌤॒ 𑌨𑌿𑌰𑍍𑌵॑𑌪𑍇𑌤𑍍 । 𑌦𑍍𑌵𑌾॒𑌦॒𑌶𑌭𑌿॒𑌰𑍍𑌵𑍇𑌷𑍍𑌟𑌿॑𑌭𑌿॒-𑌰𑍍𑌯𑌜𑍇॒𑌤𑍇𑌤𑌿॑ ॥ 𑌯𑌦𑌿𑌷𑍍𑌟𑌿॑-𑌭𑌿॒𑌰𑍍𑌯𑌜𑍇॑𑌤 । 𑌉॒𑌪॒𑌨𑌾𑌮𑍁॑𑌕 𑌏𑌨𑌂-𑌯𑌁॒𑌜𑍍𑌞-𑌸𑍍𑌸𑍍𑌯𑌾᳚𑌤𑍍 । 𑌪𑌾𑌪𑍀॑𑌯𑌾॒𑌗𑍍॒𑌸𑍍𑌤𑍁 𑌸𑍍𑌯𑌾᳚𑌤𑍍 ।
𑌆॒𑌪𑍍𑌤𑌾𑌨𑌿॒ 𑌵𑌾 𑌏॒𑌤𑌸𑍍𑌯॒ 𑌛𑌨𑍍𑌦𑌾𑌗𑍍​𑌮𑍍॑𑌸𑌿 । 𑌯 𑌈॑𑌜𑌾॒𑌨𑌃 ।
𑌤𑌾𑌨𑌿॒ 𑌕 𑌏॒𑌤𑌾𑌵॑𑌦𑌾𑌶𑍁॒ 𑌪𑍁𑌨𑌃॒ 𑌪𑍍𑌰𑌯𑍁॑𑌞𑍍𑌜𑍀॒𑌤𑍇𑌤𑌿॑ ।
𑌸𑌰𑍍𑌵𑌾॒ 𑌵𑍈 𑌸𑌗𑍍𑌗𑍍​𑌸𑍍𑌥𑌿॑𑌤𑍇 𑌯॒𑌜𑍍𑌞𑍇 𑌵𑌾𑌗𑌾᳚𑌪𑍍𑌯𑌤𑍇 ॥ 6𑍮 ॥

𑌸𑌾-𑌽𑌽𑌪𑍍𑌤𑌾 𑌭॑𑌵𑌤𑌿 𑌯𑌾॒𑌤𑌯𑌾᳚𑌮𑍍𑌨𑍀 । 𑌕𑍍𑌰𑍂॒𑌰𑍀𑌕𑍃॑𑌤𑍇𑌵॒ 𑌹𑌿 𑌭𑌵॒𑌤𑍍𑌯𑌰𑍁॑𑌷𑍍𑌕𑍃𑌤𑌾 । 𑌸𑌾 𑌨 𑌪𑍁𑌨𑌃॑ 𑌪𑍍𑌰॒𑌯𑍁𑌜𑍍𑌯𑍇𑌤𑍍𑌯𑌾॑𑌹𑍁𑌃 ॥ 𑌦𑍍𑌵𑌾𑌦॑𑌶𑍈॒𑌵 𑌬𑍍𑌰॑𑌹𑍍𑌮𑍌𑌦॒𑌨𑌾-𑌨𑍍𑌥𑍍𑌸𑌗𑍍𑌗𑍍​𑌸𑍍𑌥𑌿॑𑌤𑍇॒ 𑌨𑌿𑌰𑍍𑌵॑𑌪𑍇𑌤𑍍 । 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑌾 𑌓॑𑌦॒𑌨𑌃 । 𑌯॒𑌜𑍍𑌞𑌃 𑌪𑍍𑌰॒𑌜𑌾𑌪॑𑌤𑌿𑌃 । 𑌉॒𑌪॒𑌨𑌾𑌮𑍁॑𑌕 𑌏𑌨𑌂-𑌯𑌁॒𑌜𑍍𑌞𑍋 𑌭॑𑌵𑌤𑌿 ।
𑌨 𑌪𑌾𑌪𑍀॑𑌯𑌾-𑌨𑍍𑌭𑌵𑌤𑌿 ॥ 𑌦𑍍𑌵𑌾𑌦॑𑌶 𑌭𑌵𑌨𑍍𑌤𑌿 ।
𑌦𑍍𑌵𑌾𑌦॑𑌶॒ 𑌮𑌾𑌸𑌾᳚-𑌸𑍍𑌸𑌂​𑌵𑌁𑌥𑍍𑌸॒𑌰𑌃 ।
𑌸𑌂॒​𑌵𑌁॒𑌥𑍍𑌸॒𑌰 𑌏॒𑌵 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥ 6𑍯 ॥
(𑌆॒𑌪𑍍𑌯॒𑌤𑍇॒ - 𑌸𑌂॒​𑌵𑌁॒𑌥𑍍𑌸॒𑌰 𑌏𑌕॑-𑌞𑍍𑌚) (𑌅. 1𑍮)

𑌅𑌨𑍁𑌵𑌾𑌕𑌂 1𑍯 - 𑌵𑌿𑌭𑍁𑌤𑍍𑌵𑌾𑌦𑌿𑌭𑌿𑌃 𑌦𑍍𑌵𑌾𑌦𑌶𑌭𑌿𑌰𑍍𑌗𑍁𑌣𑍌𑌰𑌶𑍍𑌵𑌮𑍇𑌧𑌪𑍍𑌰𑌶𑌂𑌸𑌾
𑌏॒𑌷 𑌵𑍈 𑌵𑌿॒𑌭𑍂𑌰𑍍𑌨𑌾𑌮॑ 𑌯॒𑌜𑍍𑌞𑌃 । 𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॑ 𑌵𑌿॒𑌭𑍁 𑌭॑𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑌏॒𑌷 𑌵𑍈 𑌪𑍍𑌰॒𑌭𑍂𑌰𑍍𑌨𑌾𑌮॑ 𑌯॒𑌜𑍍𑌞𑌃 । 𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॑ 𑌪𑍍𑌰॒𑌭𑍁 𑌭॑𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑌏॒𑌷 𑌵𑌾 𑌊𑌰𑍍𑌜॑𑌸𑍍𑌵𑌾॒𑌨𑍍𑌨𑌾𑌮॑ 𑌯॒𑌜𑍍𑌞𑌃 । 𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰𑍋𑌰𑍍𑌜॑𑌸𑍍𑌵-𑌦𑍍𑌭𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑌏॒𑌷 𑌵𑍈 𑌪𑌯॑𑌸𑍍𑌵𑌾॒𑌨𑍍𑌨𑌾𑌮॑ 𑌯॒𑌜𑍍𑌞𑌃 ॥ 𑍭0 ॥

𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॒ 𑌪𑌯॑𑌸𑍍𑌵-𑌦𑍍𑌭𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑍈 𑌵𑌿𑌧𑍃॑𑌤𑍋॒ 𑌨𑌾𑌮॑ 𑌯॒𑌜𑍍𑌞𑌃 ।
𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॒ 𑌵𑌿𑌧𑍃॑𑌤-𑌮𑍍𑌭𑌵𑌤𑌿 ।
𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑌏॒𑌷 𑌵𑍈 𑌵𑍍𑌯𑌾𑌵𑍃॑𑌤𑍍𑌤𑍋॒ 𑌨𑌾𑌮॑ 𑌯॒𑌜𑍍𑌞𑌃 ।
𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॒ 𑌵𑍍𑌯𑌾𑌵𑍃॑𑌤𑍍𑌤-𑌮𑍍𑌭𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑍈 𑌪𑍍𑌰𑌤𑌿॑𑌷𑍍𑌠𑌿𑌤𑍋॒ 𑌨𑌾𑌮॑ 𑌯॒𑌜𑍍𑌞𑌃 ।
𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॒ 𑌪𑍍𑌰𑌤𑌿॑𑌷𑍍𑌠𑌿𑌤-𑌮𑍍𑌭𑌵𑌤𑌿 ॥ 𑍭1 ॥
𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑌏॒𑌷 𑌵𑍈 𑌤𑍇॑𑌜॒𑌸𑍍𑌵𑍀 𑌨𑌾𑌮॑ 𑌯॒𑌜𑍍𑌞𑌃 । 𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॑ 𑌤𑍇𑌜॒𑌸𑍍𑌵𑌿 𑌭॑𑌵𑌤𑌿 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑍈 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑍀 𑌨𑌾𑌮॑ 𑌯॒𑌜𑍍𑌞𑌃 ।
𑌆 𑌹॒ 𑌵𑍈 𑌤𑌤𑍍𑌰॑ 𑌬𑍍𑌰𑌾𑌹𑍍𑌮॒𑌣𑍋 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑍀 𑌜𑌾॑𑌯𑌤𑍇 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑌾 𑌅॑𑌤𑌿𑌵𑍍𑌯𑌾॒𑌧𑍀 𑌨𑌾𑌮॑ 𑌯॒𑌜𑍍𑌞𑌃 ।
𑌆 𑌹॒ 𑌵𑍈 𑌤𑌤𑍍𑌰॑ 𑌰𑌾𑌜॒𑌨𑍍𑌯𑍋॑-𑌽𑌤𑌿𑌵𑍍𑌯𑌾॒𑌧𑍀 𑌜𑌾॑𑌯𑌤𑍇 । 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑍈 𑌦𑍀॒𑌰𑍍𑌘𑍋 𑌨𑌾𑌮॑ 𑌯॒𑌜𑍍𑌞𑌃 ।
𑌦𑍀॒𑌰𑍍𑌘𑌾𑌯𑍁॑𑌷𑍋 𑌹॒ 𑌵𑍈 𑌤𑌤𑍍𑌰॑ 𑌮𑌨𑍁॒𑌷𑍍𑌯𑌾॑ 𑌭𑌵𑌨𑍍𑌤𑌿 ।
𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥
𑌏॒𑌷 𑌵𑍈 𑌕𑍍𑌲𑍃॒𑌪𑍍𑌤𑍋 𑌨𑌾𑌮॑ 𑌯॒𑌜𑍍𑌞𑌃 ।
𑌕𑌲𑍍𑌪॑𑌤𑍇 𑌹॒ 𑌵𑍈 𑌤𑌤𑍍𑌰॑ 𑌪𑍍𑌰॒𑌜𑌾𑌭𑍍𑌯𑍋॑ 𑌯𑍋𑌗𑌕𑍍𑌷𑍇॒𑌮𑌃 ।
𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇 ॥ 𑍭2 ॥
(𑌪𑌯॑𑌸𑍍𑌵𑌾॒𑌨𑍍𑌨𑌾𑌮॑ 𑌯॒𑌜𑍍𑌞𑌃 - 𑌪𑍍𑌰𑌤𑌿॑𑌷𑍍𑌠𑌿𑌤-𑌮𑍍𑌭𑌵𑌤𑌿॒ - 𑌯𑌤𑍍𑌰𑍈॒𑌤𑍇𑌨॑ 𑌯॒𑌜𑍍𑌞𑍇𑌨॒ 𑌯𑌜॑𑌨𑍍𑌤𑍇॒ 𑌷𑌟𑍍𑌚॑) (𑌅. 1𑍯)

(𑌏॒𑌷 𑌵𑍈 𑌵𑌿॒𑌭𑍂𑌃 𑌪𑍍𑌰॒𑌭𑍂𑌰𑍂𑌰𑍍𑌜॑𑌸𑍍𑌵𑌾॒-𑌨𑍍𑌪𑌯॑𑌸𑍍𑌵𑌾॒𑌨𑍍॒. 𑌵𑌿𑌧𑍃॑𑌤𑍋॒ 𑌵𑍍𑌯𑌾𑌵𑍃॑𑌤𑍍𑌤𑌃॒ 𑌪𑍍𑌰𑌤𑌿॑𑌷𑍍𑌠𑌿𑌤𑌸𑍍𑌤𑍇𑌜॒𑌸𑍍𑌵𑍀 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑍍𑌯॑𑌤𑌿𑌵𑍍𑌯𑌾॒𑌧𑍀 𑌦𑍀॒𑌰𑍍𑌘𑌃 𑌕𑍍𑌲𑍁॒𑌪𑍍𑌤𑍋 𑌦𑍍𑌵𑌾𑌦॑𑌶)

𑌅𑌨𑍁𑌵𑌾𑌕𑌂 20 - 𑌅𑌶𑍍𑌵𑌸𑌞𑍍𑌜𑍍𑌞𑌪𑌨𑌪𑍍𑌰𑌕𑌾𑌰𑌃
𑌤𑌾॒𑌰𑍍𑌪𑍍𑌯𑍇𑌣𑌾𑌶𑍍𑌵॒𑌗𑍍​𑌮𑍍॒ 𑌸𑌞𑍍𑌜𑍍𑌞॑𑌪𑌯𑌨𑍍𑌤𑌿 । 𑌯॒𑌜𑍍𑌞𑍋 𑌵𑍈 𑌤𑌾॒𑌰𑍍𑌪𑍍𑌯𑌮𑍍 । 𑌯॒𑌜𑍍𑌞𑍇𑌨𑍈॒𑌵𑍈𑌨॒𑌗𑍍​𑌮𑍍॒ 𑌸𑌮॑𑌦𑍍𑌰𑍍𑌧𑌯𑌨𑍍𑌤𑌿 ॥ 𑌯𑌾॒𑌮𑍇𑌨॒ 𑌸𑌾𑌮𑍍𑌨𑌾᳚ 𑌪𑍍𑌰𑌸𑍍𑌤𑍋॒𑌤𑌾-𑌽𑌨𑍂𑌪॑𑌤𑌿𑌷𑍍𑌠𑌤𑍇 ।
𑌯॒𑌮॒𑌲𑍋॒𑌕-𑌮𑍇॒𑌵𑍈𑌨॑-𑌙𑍍𑌗𑌮𑌯𑌤𑌿 ॥
𑌤𑌾॒𑌰𑍍𑌪𑍍𑌯𑍇 𑌚॑ 𑌕𑍃𑌤𑍍𑌤𑍍𑌯𑌧𑍀𑌵𑌾॒𑌸𑍇 𑌚𑌾𑌶𑍍𑌵॒𑌗𑍍​𑌮𑍍॒ 𑌸𑌞𑍍𑌜𑍍𑌞॑𑌪𑌯𑌨𑍍𑌤𑌿 । 𑌏॒𑌤𑌦𑍍𑌵𑍈 𑌪॑𑌶𑍂॒𑌨𑌾𑌗𑍍​𑌮𑍍 𑌰𑍂॒𑌪𑌮𑍍 । 𑌰𑍂॒𑌪𑍇𑌣𑍈॒𑌵 𑌪॒𑌶𑍂𑌨𑌵॑𑌰𑍁𑌨𑍍𑌧𑍇 ॥
𑌹𑌿॒𑌰॒𑌣𑍍𑌯॒𑌕॒𑌶𑌿॒𑌪𑍁 𑌭॑𑌵𑌤𑌿 । 𑌤𑍇𑌜॒𑌸𑍋-𑌽𑌵॑𑌰𑍁𑌦𑍍𑌧𑍍𑌯𑍈 ॥ 𑍭3 ॥

𑌰𑍁॒𑌕𑍍𑌮𑍋 𑌭॑𑌵𑌤𑌿 । 𑌸𑍁॒𑌵॒𑌰𑍍𑌗𑌸𑍍𑌯॑ 𑌲𑍋॒𑌕𑌸𑍍𑌯𑌾-𑌨𑍁॑𑌖𑍍𑌯𑌾𑌤𑍍𑌯𑍈 ॥ 𑌅𑌶𑍍𑌵𑍋॑ 𑌭𑌵𑌤𑌿 । 𑌪𑍍𑌰॒𑌜𑌾𑌪॑𑌤𑍇॒-𑌰𑌾𑌪𑍍𑌤𑍍𑌯𑍈᳚ ॥ 𑌅॒𑌸𑍍𑌯 𑌵𑍈 𑌲𑍋॒𑌕𑌸𑍍𑌯॑ 𑌰𑍂॒𑌪-𑌨𑍍𑌤𑌾॒𑌰𑍍𑌪𑍍𑌯𑌮𑍍 । 𑌅॒𑌨𑍍𑌤𑌰𑌿॑𑌕𑍍𑌷𑌸𑍍𑌯 𑌕𑍃𑌤𑍍𑌤𑍍𑌯𑌧𑍀𑌵𑌾॒𑌸𑌃 । 𑌦𑌿॒𑌵𑍋 𑌹𑌿॑𑌰𑌣𑍍𑌯𑌕𑌶𑌿॒𑌪𑍁 ।
𑌆॒𑌦𑌿॒𑌤𑍍𑌯𑌸𑍍𑌯॑ 𑌰𑍁॒𑌕𑍍𑌮𑌃 । 𑌪𑍍𑌰॒𑌜𑌾𑌪॑𑌤𑍇॒𑌰𑌶𑍍𑌵𑌃॑ ।
𑌇॒𑌮𑌮𑍇॒𑌵 𑌲𑍋॒𑌕-𑌨𑍍𑌤𑌾॒𑌰𑍍𑌪𑍍𑌯𑍇𑌣𑌾᳚𑌪𑍍𑌨𑍋𑌤𑌿 ॥ 𑍭4 ॥

𑌅॒𑌨𑍍𑌤𑌰𑌿॑𑌕𑍍𑌷-𑌙𑍍𑌕𑍃𑌤𑍍𑌯𑌧𑍀𑌵𑌾॒𑌸𑍇𑌨॑ । 𑌦𑌿𑌵𑌗𑍍​𑌮𑍍॑ 𑌹𑌿𑌰𑌣𑍍𑌯𑌕𑌶𑌿॒𑌪𑍁𑌨𑌾᳚ । 𑌆॒𑌦𑌿॒𑌤𑍍𑌯𑌗𑍍​𑌮𑍍 𑌰𑍁॒𑌕𑍍𑌮𑍇𑌣॑ ।
𑌅𑌶𑍍𑌵𑍇॑𑌨𑍈॒𑌵 𑌮𑍇𑌦𑍍𑌧𑍍𑌯𑍇॑𑌨 𑌪𑍍𑌰॒𑌜𑌾𑌪॑𑌤𑍇॒-𑌸𑍍𑌸𑌾𑌯𑍁॑𑌜𑍍𑌯𑌗𑍍​𑌮𑍍 𑌸𑌲𑍋॒𑌕𑌤𑌾॑-𑌮𑌾𑌪𑍍𑌨𑍋𑌤𑌿 ॥ 𑌏॒𑌤𑌾𑌸𑌾॑𑌮𑍇॒𑌵 𑌦𑍇॒𑌵𑌤𑌾॑𑌨𑌾॒𑌗𑍍​𑌮𑍍॒ 𑌸𑌾𑌯𑍁॑𑌜𑍍𑌯𑌮𑍍 ।
𑌸𑌾॒𑌰𑍍​𑌷𑍍𑌟𑌿𑌤𑌾𑌗𑍍​𑌮𑍍॑ 𑌸𑌮𑌾𑌨 𑌲𑍋॒𑌕𑌤𑌾॑𑌮𑌾𑌪𑍍𑌨𑍋𑌤𑌿 ।
𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑍭5 ॥
(𑌅𑌵॑𑌰𑍁𑌦𑍍𑌧𑍍𑌯𑌾 - 𑌆𑌪𑍍𑌨𑍋𑌤𑍍𑌯॒ -+𑌷𑍍𑌟𑍌 𑌚॑) (𑌅. 20)

𑌅𑌨𑍁𑌵𑌾𑌕𑌂 21 - 𑌉𑌤𑍍𑌤𑌰𑌵𑍇𑌦𑍍𑌯𑍁𑌪𑌵𑌾𑌪𑌃
𑌆॒𑌦𑌿॒𑌤𑍍𑌯𑌾𑌶𑍍𑌚𑌾𑌙𑍍𑌗𑌿॑𑌰𑌸𑌶𑍍𑌚 𑌸𑍁𑌵॒𑌰𑍍𑌗𑍇 𑌲𑍋॒𑌕𑍇᳚-𑌽𑌸𑍍𑌪𑌦𑍍𑌰𑍍𑌧𑌨𑍍𑌤 । 𑌤𑍇-𑌽𑌙𑍍𑌗𑌿॑𑌰𑌸 𑌆𑌦𑌿॒𑌤𑍍𑌯𑍇𑌭𑍍𑌯𑌃॑ ।
𑌅॒𑌮𑍁𑌮𑌾॑𑌦𑌿॒𑌤𑍍𑌯-𑌮𑌶𑍍𑌵𑌗𑍍𑌗𑍍॑ 𑌶𑍍𑌵𑍇॒𑌤-𑌮𑍍𑌭𑍂॒𑌤-𑌨𑍍𑌦𑌕𑍍𑌷𑌿॑𑌣𑌾-𑌮𑌨𑌯𑌨𑍍𑌨𑍍 । 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 ।
𑌯-𑌨𑍍𑌨𑍋-𑌽𑌨᳚𑌷𑍍𑌟 । 𑌸 𑌵𑌰𑍍𑌯𑍋॑-𑌽𑌭𑍂॒𑌦𑌿𑌤𑌿॑ । 𑌤𑌸𑍍𑌮𑌾॒𑌦𑌶𑍍𑌵॒𑌗𑍍​𑌮𑍍॒ 𑌸𑌵॒𑌰𑍍𑌯𑍇𑌤𑍍𑌯𑌾-𑌹𑍍𑌵॑𑌯𑌨𑍍𑌤𑌿 ।
𑌤𑌸𑍍𑌮𑌾᳚𑌦𑍍𑌯॒𑌜𑍍𑌞𑍇 𑌵𑌰𑍋॑ 𑌦𑍀𑌯𑌤𑍇 ॥ 𑌯𑌤𑍍𑌪𑍍𑌰॒𑌜𑌾𑌪॑𑌤𑌿॒-𑌰𑌾𑌲॒𑌬𑍍𑌧𑍋-𑌽𑌶𑍍𑌵𑍋-𑌽𑌭॑𑌵𑌤𑍍 ।
𑌤𑌸𑍍𑌮𑌾॒𑌦𑌶𑍍𑌵𑍋॒ 𑌨𑌾𑌮॑ ॥ 𑍭6 ॥

𑌯𑌚𑍍𑌛𑍍𑌵𑌯॒𑌦𑌰𑍁॒𑌰𑌾𑌸𑍀᳚𑌤𑍍 । 𑌤𑌸𑍍𑌮𑌾॒𑌦𑌰𑍍𑌵𑌾॒ 𑌨𑌾𑌮॑ ॥
𑌯𑌥𑍍𑌸॒𑌦𑍍𑌯𑍋 𑌵𑌾𑌜𑌾᳚-𑌨𑍍𑌥𑍍𑌸॒𑌮𑌜॑𑌯𑌤𑍍 । 𑌤𑌸𑍍𑌮𑌾᳚𑌦𑍍𑌵𑌾॒𑌜𑍀 𑌨𑌾𑌮॑ ॥ 𑌯𑌦𑌸𑍁॑𑌰𑌾𑌣𑌾𑌂-𑌲𑍋𑌁॒𑌕𑌾𑌨𑌾𑌦॑𑌤𑍍𑌤 । 𑌤𑌸𑍍𑌮𑌾॑𑌦𑌾𑌦𑌿॒𑌤𑍍𑌯𑍋 𑌨𑌾𑌮॑ ॥ 𑌅॒𑌗𑍍𑌨𑌿𑌰𑍍𑌵𑌾 𑌅॑𑌶𑍍𑌵𑌮𑍇॒𑌧𑌸𑍍𑌯॒ 𑌯𑍋𑌨𑌿॑𑌰𑌾॒𑌯𑌤॑𑌨𑌮𑍍 । 𑌸𑍂𑌰𑍍𑌯𑍋॒-𑌽𑌗𑍍𑌨𑍇𑌰𑍍𑌯𑍋𑌨𑌿॑-𑌰𑌾॒𑌯𑌤॑𑌨𑌮𑍍 ।
𑌯𑌦॑𑌶𑍍𑌵𑌮𑍇॒𑌧𑍇᳚-𑌽𑌗𑍍𑌨𑍌 𑌚𑌿𑌤𑍍𑌯॑ 𑌉𑌤𑍍𑌤𑌰𑌵𑍇॒𑌦𑌿-𑌮𑍁॑𑌪॒𑌵𑌪॑𑌤𑌿 । 𑌯𑍋𑌨𑌿॑-𑌮𑌨𑍍𑌤𑌮𑍇॒𑌵𑍈𑌨॑-𑌮𑌾॒𑌯𑌤॑𑌨𑌵𑌨𑍍𑌤-𑌙𑍍𑌕𑌰𑍋𑌤𑌿 ॥ 𑍭𑍭 ॥

𑌯𑍋𑌨𑌿॑-𑌮𑌾𑌨𑌾॒𑌯𑌤॑𑌨𑌵𑌾-𑌨𑍍𑌭𑌵𑌤𑌿 । 𑌸 𑌏॒𑌵𑌂-𑌵𑍇𑌁𑌦॑ ॥
𑌪𑍍𑌰𑌾॒𑌣𑌾॒𑌪𑌾॒𑌨𑍌 𑌵𑌾 𑌏॒𑌤𑍌 𑌦𑍇॒𑌵𑌾𑌨𑌾᳚𑌮𑍍 । 𑌯𑌦॑𑌰𑍍𑌕𑌾𑌶𑍍𑌵𑌮𑍇॒𑌧𑍌 । 𑌪𑍍𑌰𑌾॒𑌣𑌾॒𑌪𑌾॒𑌨𑌾𑌵𑍇॒𑌵𑌾𑌵॑𑌰𑍁𑌨𑍍𑌧𑍇 ॥ 𑌓𑌜𑍋॒ 𑌬𑌲𑌂॒-𑌵𑌾𑌁 𑌏॒𑌤𑍌 𑌦𑍇॒𑌵𑌾𑌨𑌾᳚𑌮𑍍 ।
𑌯𑌦॑𑌰𑍍𑌕𑌾𑌶𑍍𑌵𑌮𑍇॒𑌧𑍌 । 𑌓𑌜𑍋॒ 𑌬𑌲॑𑌮𑍇॒𑌵𑌾𑌵॑𑌰𑍁𑌨𑍍𑌧𑍇 ॥
𑌅॒𑌗𑍍𑌨𑌿𑌰𑍍𑌵𑌾 𑌅॑𑌶𑍍𑌵𑌮𑍇॒𑌧𑌸𑍍𑌯॒ 𑌯𑍋𑌨𑌿॑-𑌰𑌾॒𑌯𑌤॑𑌨𑌮𑍍 ।
𑌸𑍂𑌰𑍍𑌯𑍋॒-𑌽𑌗𑍍𑌨𑍇𑌰𑍍𑌯𑍋𑌨𑌿॑-𑌰𑌾॒𑌯𑌤॑𑌨𑌮𑍍 ।
𑌯𑌦॑𑌶𑍍𑌵𑌮𑍇॒𑌧𑍇᳚-𑌽𑌗𑍍𑌨𑍌 𑌚𑌿𑌤𑍍𑌯॑ 𑌉𑌤𑍍𑌤𑌰𑌵𑍇॒𑌦𑌿-𑌞𑍍𑌚𑌿॒𑌨𑍋𑌤𑌿॑ ।
𑌤𑌾𑌵॑𑌰𑍍𑌕𑌾𑌶𑍍𑌵𑌮𑍇॒𑌧𑍌 । 𑌅॒𑌰𑍍𑌕𑌾॒𑌶𑍍𑌵॒𑌮𑍇॒𑌧𑌾𑌵𑍇॒𑌵𑌾 𑌵॑𑌰𑍁𑌨𑍍𑌧𑍇 । 𑌅𑌥𑍋॑ 𑌅𑌰𑍍𑌕𑌾𑌶𑍍𑌵-𑌮𑍇॒𑌧𑌯𑍋॑𑌰𑍇॒𑌵 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 ॥ 𑍭𑍮 ॥
(𑌨𑌾𑌮॑ - 𑌕𑌰𑍋𑌤𑌿॒ - 𑌸𑍂𑌰𑍍𑌯𑍋॒-𑌽𑌗𑍍𑌨𑍇𑌰𑍍𑌯𑍋𑌨𑌿॑𑌰𑌾॒𑌯𑌤॑𑌨-𑌞𑍍𑌚॒𑌤𑍍𑌵𑌾𑌰𑌿॑ 𑌚) (𑌅. 21)

𑌅𑌨𑍁𑌵𑌾𑌕𑌂 22 - 𑌋𑌷𑌭𑌾𑌲𑌮𑍍𑌭𑌃
𑌪𑍍𑌰॒𑌜𑌾𑌪॑𑌤𑌿𑌂॒-𑌵𑍈𑌁 𑌦𑍇॒𑌵𑌾𑌃 𑌪𑌿॒𑌤𑌰᳚𑌮𑍍 ।
𑌪॒𑌶𑍁-𑌮𑍍𑌭𑍂॒𑌤-𑌮𑍍𑌮𑍇𑌧𑌾॒𑌯𑌾𑌲॑𑌭𑌨𑍍𑌤 ।
𑌤𑌮𑌾॒𑌲𑌭𑍍𑌯𑍋𑌪𑌾॑𑌵𑌸𑌨𑍍𑌨𑍍 । 𑌪𑍍𑌰𑌾॒𑌤𑌰𑍍𑌯𑌷𑍍𑌟𑌾᳚𑌸𑍍𑌮𑌹॒ 𑌇𑌤𑌿॑ ।
𑌏𑌕𑌂॒-𑌵𑌾𑌁 𑌏॒𑌤𑌦𑍍𑌦𑍇॒𑌵𑌾𑌨𑌾॒𑌮𑌹𑌃॑ । 𑌯𑌥𑍍𑌸𑌂॑​𑌵𑌁𑌥𑍍𑌸॒𑌰𑌃 । 𑌤𑌸𑍍𑌮𑌾॒𑌦𑌶𑍍𑌵𑌃॑ 𑌪𑍁॒𑌰𑌸𑍍𑌤𑌾᳚-𑌥𑍍𑌸𑌂​𑌵𑌁𑌥𑍍𑌸॒𑌰 𑌆𑌲॑𑌭𑍍𑌯𑌤𑍇 ॥
𑌯𑌤𑍍𑌪𑍍𑌰॒𑌜𑌾𑌪॑𑌤𑌿॒-𑌰𑌾𑌲॒𑌬𑍍𑌧𑍋-𑌽𑌶𑍍𑌵𑍋-𑌽𑌭॑𑌵𑌤𑍍 । 𑌤𑌸𑍍𑌮𑌾॒𑌦𑌶𑍍𑌵𑌃॑ । 𑌯𑌥𑍍𑌸॒𑌦𑍍𑌯𑍋 𑌮𑍇𑌧𑍋-𑌽𑌭॑𑌵𑌤𑍍 ॥ 𑍭𑍯 ॥

𑌤𑌸𑍍𑌮𑌾॑𑌦𑌶𑍍𑌵𑌮𑍇॒𑌧𑌃 ॥ 𑌵𑍇𑌦𑍁॒𑌕𑍋-𑌽𑌶𑍍𑌵॑𑌮𑌾॒𑌶𑍁-𑌮𑍍𑌭॑𑌵𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ ॥ 𑌯𑌦𑍍𑌵𑍈 𑌤𑌤𑍍𑌪𑍍𑌰॒𑌜𑌾𑌪॑𑌤𑌿॒-𑌰𑌾𑌲॒𑌬𑍍𑌧𑍋-𑌽𑌶𑍍𑌵𑍋-𑌽𑌭॑𑌵𑌤𑍍 । 𑌤𑌸𑍍𑌮𑌾॒𑌦𑌶𑍍𑌵𑌃॑ 𑌪𑍍𑌰॒𑌜𑌾𑌪॑𑌤𑍇𑌃 𑌪𑌶𑍂॒𑌨𑌾-𑌮𑌨𑍁॑𑌰𑍂𑌪𑌤𑌮𑌃 ॥
𑌆-𑌽𑌸𑍍𑌯॑ 𑌪𑍁॒𑌤𑍍𑌰𑌃 𑌪𑍍𑌰𑌤𑌿॑𑌰𑍂𑌪𑍋 𑌜𑌾𑌯𑌤𑍇 । 𑌯 𑌏॒𑌵𑌂-𑌵𑍇𑌁𑌦॑ ॥ 𑌸𑌰𑍍𑌵𑌾॑𑌣𑌿 𑌭𑍂॒𑌤𑌾𑌨𑌿॑ 𑌸॒𑌭𑍃𑌨𑍍𑌤𑍍𑌯𑌾𑌲॑𑌭𑌤𑍇 ।
𑌸𑌮𑍇॑𑌨-𑌨𑍍𑌦𑍇॒𑌵𑌾-𑌸𑍍𑌤𑍇𑌜॑𑌸𑍇 𑌬𑍍𑌰𑌹𑍍𑌮𑌵𑌰𑍍𑌚॒𑌸𑌾𑌯॑ 𑌭𑌰𑌨𑍍𑌤𑌿 ।
𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 ॥ 𑍮0 ॥

𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑌏॒𑌤𑌦𑍍𑌵𑍈 𑌤𑌦𑍍𑌦𑍇॒𑌵𑌾 𑌏॒𑌤𑌾-𑌨𑍍𑌦𑍇॒𑌵𑌤𑌾᳚𑌮𑍍 । 𑌪॒𑌶𑍁-𑌮𑍍𑌭𑍂॒𑌤-𑌮𑍍𑌮𑍇𑌧𑌾॒𑌯𑌾𑌲॑𑌭𑌨𑍍𑌤 । 𑌯॒𑌜𑍍𑌞𑌮॒𑌵 । 𑌯॒𑌜𑍍𑌞𑍇𑌨॑ 𑌯॒𑌜𑍍𑌞𑌮॑𑌯𑌜𑌨𑍍𑌤 𑌦𑍇॒𑌵𑌾𑌃 । 𑌕𑌾॒𑌮॒𑌪𑍍𑌰𑌂-𑌯𑌁॒𑌜𑍍𑌞𑌮॑ 𑌕𑍁𑌰𑍍𑌵𑌤 । 𑌤𑍇॑-𑌽𑌮𑍃𑌤॒𑌤𑍍𑌵𑌮॑𑌕𑌾𑌮𑌯𑌨𑍍𑌤 ।
𑌤॑-𑌽𑌮𑍃𑌤॒𑌤𑍍𑌵-𑌮॑𑌗𑌚𑍍𑌛𑌨𑍍𑌨𑍍 ॥ 𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌦𑍇॒𑌵𑌾𑌨𑌾॑𑌮𑍇॒𑌵𑌾-𑌯॑𑌨𑍇𑌨𑍈𑌤𑌿 ॥ 𑍮1 ॥

𑌪𑍍𑌰𑌾॒𑌜𑌾॒𑌪॒𑌤𑍍𑌯𑍇𑌨𑍈॒𑌵 𑌯॒𑌜𑍍𑌞𑍇𑌨॑ 𑌯𑌜𑌤𑍇 𑌕𑌾𑌮॒𑌪𑍍𑌰𑍇𑌣॑ । 𑌅𑌪𑍁॑𑌨𑌰𑍍𑌮𑌾𑌰𑌮𑍇॒𑌵 𑌗॑𑌚𑍍𑌛𑌤𑌿 ॥ 𑌏॒𑌤𑌸𑍍𑌯॒ 𑌵𑍈 𑌰𑍂॒𑌪𑍇𑌣॑ 𑌪𑍁॒𑌰𑌸𑍍𑌤𑌾᳚-𑌤𑍍𑌪𑍍𑌰𑌾𑌜𑌾𑌪॒𑌤𑍍𑌯-𑌮𑍃॑𑌷॒𑌭-𑌨𑍍𑌤𑍂॑𑌪॒𑌰𑌂
𑌬॑𑌹𑍁𑌰𑍂॒𑌪-𑌮𑌾𑌲॑𑌭𑌤𑍇 । 𑌸𑌰𑍍𑌵𑍇᳚𑌭𑍍𑌯𑌃॒ 𑌕𑌾𑌮𑍇᳚𑌭𑍍𑌯𑌃 । 𑌸𑌰𑍍𑌵॒𑌸𑍍𑌯𑌾𑌪𑍍𑌤𑍍𑌯𑍈᳚ । 𑌸𑌰𑍍𑌵॑𑌸𑍍𑌯॒ 𑌜𑌿𑌤𑍍𑌯𑍈᳚ ॥ 𑌸𑌰𑍍𑌵॑𑌮𑍇॒𑌵 𑌤𑍇𑌨𑌾᳚𑌪𑍍𑌨𑍋𑌤𑌿 । 𑌸𑌰𑍍𑌵॑-𑌞𑍍𑌜𑌯𑌤𑌿 ।
𑌯𑍋᳚-𑌽𑌶𑍍𑌵𑌮𑍇॒𑌧𑍇𑌨॒ 𑌯𑌜॑𑌤𑍇 । 𑌯 𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ ॥ 𑍮2 ॥
(𑌮𑍇𑌧𑍋-𑌽𑌭॑𑌵॒--𑌦𑍍𑌯𑌜॑𑌤 - 𑌏𑌤𑌿॒ - 𑌵𑍇𑌦॑) (𑌅. 22)

𑌅𑌨𑍁𑌵𑌾𑌕𑌂 23 - 𑌅𑌶𑍍𑌵𑌾𑌵𑌯𑌵𑍇𑌷𑍂𑌪𑌾𑌸𑌨𑌮𑍍
𑌯𑍋 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮॑𑌨𑍀॒ 𑌵𑍇𑌦॑ ।
𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮𑌂॑-𑌲𑍋𑌁𑌮𑌞𑍍𑌜𑍁𑌹𑍋𑌤𑌿 ।
𑌅॒𑌹𑍋॒𑌰𑌾॒𑌤𑍍𑌰𑍇 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮॑𑌨𑍀 । 𑌯𑌥𑍍𑌸𑌾॒𑌯-𑌮𑍍𑌪𑍍𑌰𑌾॑𑌤𑌰𑍍𑌜𑍁॒𑌹𑍋𑌤𑌿॑ । 𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮𑌂॑-𑌲𑍋𑌁𑌮𑌞𑍍𑌜𑍁𑌹𑍋𑌤𑌿 ।
𑌏॒𑌤𑌦॑𑌨𑍁𑌕𑍃𑌤𑌿 𑌹𑌸𑍍𑌮॒ 𑌵𑍈 𑌪𑍁॒𑌰𑌾 । 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮𑌂॑-𑌲𑍋𑌁𑌮𑌞𑍍𑌜𑍁𑌹𑍍𑌵𑌤𑌿 ॥
𑌯𑍋 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌪॒𑌦𑍇 𑌵𑍇𑌦॑ ।
𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯 𑌪॒𑌦𑍇 𑌪॑𑌦𑍇 𑌜𑍁𑌹𑍋𑌤𑌿 ।
𑌦॒𑌰𑍍॒𑌶॒𑌪𑍂॒𑌰𑍍𑌣॒𑌮𑌾॒𑌸𑍌 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌪॒𑌦𑍇 ॥ 𑍮3 ॥

𑌯𑌦𑍍𑌦॑𑌰𑍍​𑌶𑌪𑍂𑌰𑍍𑌣𑌮𑌾॒𑌸𑍌 𑌯𑌜॑𑌤𑍇 ।
𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯 𑌪॒𑌦𑍇 𑌪॑𑌦𑍇 𑌜𑍁𑌹𑍋𑌤𑌿 ।
𑌏॒𑌤𑌦॑𑌨𑍁𑌕𑍃𑌤𑌿 𑌹 𑌸𑍍𑌮॒ 𑌵𑍈 𑌪𑍁॒𑌰𑌾 ।
𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌪॒𑌦𑍇 𑌪॑𑌦𑍇 𑌜𑍁𑌹𑍍𑌵𑌤𑌿 ॥
𑌯𑍋 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌵𑌿॒𑌵𑌰𑍍𑌤॑𑌨𑌂॒-𑌵𑍇𑌁𑌦॑ । 𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯 𑌵𑌿॒𑌵𑌰𑍍𑌤॑𑌨𑍇 𑌵𑌿𑌵𑌰𑍍𑌤𑌨𑍇 𑌜𑍁𑌹𑍋𑌤𑌿 । 𑌅॒𑌸𑍌 𑌵𑌾 𑌆॑𑌦𑌿॒𑌤𑍍𑌯𑍋-𑌽𑌶𑍍𑌵𑌃॑ । 𑌸 𑌆॑𑌹𑌵॒𑌨𑍀𑌯॒-𑌮𑌾𑌗॑𑌚𑍍𑌛𑌤𑌿 । 𑌤𑌦𑍍𑌵𑌿𑌵॑𑌰𑍍𑌤𑌤𑍇 ।
𑌯𑌦॑𑌗𑍍𑌨𑌿𑌹𑍋॒𑌤𑍍𑌰-𑌞𑍍𑌜𑍁॒𑌹𑍋𑌤𑌿॑ ।
𑌅𑌶𑍍𑌵॑𑌸𑍍𑌯𑍈॒𑌵 𑌮𑍇𑌦𑍍𑌧𑍍𑌯॑𑌸𑍍𑌯 𑌵𑌿॒𑌵𑌰𑍍𑌤॑𑌨𑍇 𑌵𑌿𑌵𑌰𑍍𑌤𑌨𑍇 𑌜𑍁𑌹𑍋𑌤𑌿 । 𑌏॒𑌤𑌦॑𑌨𑍁𑌕𑍃𑌤𑌿 𑌹 𑌸𑍍𑌮॒ 𑌵𑍈 𑌪𑍁॒𑌰𑌾 ।
𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯 𑌵𑌿॒𑌵𑌰𑍍𑌤॑𑌨𑍇 𑌵𑌿𑌵𑌰𑍍𑌤𑌨𑍇 𑌜𑍁𑌹𑍍𑌵𑌤𑌿 ॥ 𑍮4 ॥
(𑌪॒𑌦𑍇 - 𑌅॑𑌗𑍍𑌨𑌿𑌹𑍋॒𑌤𑍍𑌰-𑌞𑍍𑌜𑍁॒𑌹𑍋𑌤𑌿॒ 𑌤𑍍𑌰𑍀𑌣𑌿॑ 𑌚) (𑌅. 23)

(𑌪𑍍𑌰॒𑌜𑌾𑌪॑𑌤𑌿॒𑌸𑍍𑌤𑌮॑𑌷𑍍𑌟𑌾𑌦॒𑌶𑌿𑌭𑌿𑌃॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤𑍋॒𑌭𑌾 - 𑌵॒𑌸𑍍𑌮𑍈 - 𑌯𑍁॒𑌞𑍍𑌜𑌨𑍍𑌤𑌿॒-𑌤𑍇𑌜॒𑌸𑌾 - 𑌽𑌪॑ 𑌪𑍍𑌰𑌾॒𑌣𑌾 - 𑌅𑌪॒ 𑌶𑍍𑌰𑍀𑌰𑍂॒𑌦𑍍𑌰𑍍𑌧𑍍𑌵𑌮𑍍 - 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰𑍇॒𑌣𑌾-𑌽𑌨𑍁॑ - 𑌪𑍍𑌰𑌥॒𑌮𑍇𑌨॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌮॒𑌹𑌾𑌨𑍍. - 𑌵𑍈᳚𑌶𑍍𑌵𑌦𑍇॒𑌵𑍋 𑌵𑌾 𑌅𑌶𑍍𑌵𑍋 - 𑌽𑌶𑍍𑌵॑𑌸𑍍𑌯 - 𑌪𑍍𑌰॒𑌜𑌾𑌪॑𑌤𑌿॒𑌸𑍍𑌤𑌂-𑌯𑌁॑𑌜𑍍𑌞𑌕𑍍𑌰॒𑌤𑍁𑌭𑌿॒ - 𑌰𑌪॒ 𑌶𑍍𑌰𑍀𑌰𑍍𑌬𑍍𑌰𑌾᳚𑌹𑍍𑌮॒𑌣𑍌 - 𑌸𑌰𑍍𑌵𑍇॑𑌷𑍁- 𑌵𑌾𑌰𑍁॒𑌣𑍋 - 𑌯𑌦𑍍𑌯𑌶𑍍𑌵॒𑌮𑍍 - 𑌤𑌦𑌾॑𑌹𑍁- 𑌰𑍇॒𑌷 𑌵𑍈 𑌵𑌿॒𑌭𑍂 - 𑌸𑍍𑌤𑌾॒𑌰𑍍𑌪𑍍𑌯𑍇𑌣𑌾॑- 𑌦𑌿॒𑌤𑍍𑌯𑌾𑌃 - 𑌪𑍍𑌰॒𑌜𑌾𑌪॑𑌤𑌿-𑌮𑍍𑌪𑌿॒𑌤𑌰𑌂॒ - 𑌁𑌯𑍋 𑌵𑌾 𑌅𑌶𑍍𑌵॑𑌸𑍍𑌯॒ 𑌮𑍇𑌦𑍍𑌧𑍍𑌯॑𑌸𑍍𑌯॒ 𑌲𑍋𑌮॑𑌨𑍀॒ 𑌤𑍍𑌰𑌯𑍋॑𑌵𑌿𑌗𑍍​𑌮𑍍𑌶𑌤𑌿𑌃)

(𑌪𑍍𑌰॒𑌜𑌾𑌪॑𑌤𑌿𑌰॒ - 𑌸𑍍𑌮𑌿𑌨𑍍 𑌁𑌲𑍋॒𑌕𑍇 - 𑌉॑𑌤𑍍𑌤𑌰॒𑌤𑌃 - 𑌶𑍍𑌰𑌿𑌯॑𑌮𑍇॒𑌵 - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌮॒𑌹𑌾𑌨𑍍.-𑌯-𑌤𑍍𑌪𑍍𑌰𑌾॒𑌤 - 𑌪𑍍𑌰 𑌵𑌾 𑌏॒𑌷 𑌏॒𑌭𑍍𑌯𑍋
𑌲𑍋॒𑌕𑍇𑌭𑍍𑌯𑌃॒- 𑌸𑌰𑍍𑌵𑌗𑍍​𑌮𑍍॑ 𑌹॒ 𑌵𑍈 𑌤𑌤𑍍𑌰॒ 𑌪𑌯॑𑌸𑍍𑌵॒𑌦𑍍𑌯 -𑌉॑ 𑌚𑍈𑌨𑌮𑍇॒𑌵𑌂-𑌵𑍇𑌁𑌦॑ 𑌚॒𑌤𑍍𑌵𑌾𑌰𑍍𑌯𑌶𑍀॑𑌤𑌿𑌃)

(𑌪𑍍𑌰॒𑌜𑌾𑌪॑𑌤𑌿𑌰𑌶𑍍𑌵𑌮𑍇॒𑌧𑌂 - 𑌜𑍁॑𑌹𑍍𑌵𑌤𑌿)

॥ 𑌹𑌰𑌿𑌃 𑌓𑌮𑍍 ॥

॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌤𑍃𑌤𑍀𑌯𑌾𑌷𑍍𑌟𑌕𑍇 𑌨𑌵𑌮𑌃 𑌪𑍍𑌰𑌪𑌾𑌠𑌕-𑌸𑍍𑌸𑌮𑌾𑌪𑍍𑌤𑌃 ॥
++++++++++++++++++++