𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌪𑌞𑍍𑌚𑌮𑌃 𑌪𑍍𑌰𑌪𑌾𑌠𑌕𑌃 - 𑌉𑌪𑌹𑍋𑌮𑌶𑍇𑌷𑌃

𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,
𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥

2.5.1 𑌉𑌪𑌹𑍋𑌮𑌾𑌃
𑌪𑍍𑌰𑌾॒𑌣𑍋 𑌰॑𑌕𑍍𑌷𑌤𑌿॒ 𑌵𑌿𑌶𑍍𑌵॒𑌮𑍇𑌜॑𑌤𑍍 । 𑌇𑌰𑍍𑌯𑍋॑ 𑌭𑍂॒𑌤𑍍𑌵𑌾 𑌬॑𑌹𑍁॒𑌧𑌾 𑌬॒𑌹𑍂𑌨𑌿॑ । 𑌸 𑌇𑌥𑍍𑌸𑌰𑍍𑌵𑌂॒-𑌵𑍍𑌯𑌾𑌁॑𑌨𑌶𑍇 ॥ 𑌯𑍋 𑌦𑍇॒𑌵𑍋 𑌦𑍇॒𑌵𑍇𑌷𑍁॑ 𑌵𑌿॒𑌭𑍂𑌰॒𑌨𑍍𑌤𑌃 । 𑌆𑌵𑍃॑𑌦𑍂॒𑌦𑌾-𑌤𑍍𑌕𑍍𑌷𑍇𑌤𑍍𑌰𑌿𑌯॑𑌦𑍍𑌧𑍍𑌵॒𑌗𑌦𑍍𑌵𑍃𑌷𑌾᳚ । 𑌤𑌮𑌿-𑌤𑍍𑌪𑍍𑌰𑌾॒𑌣-𑌮𑍍𑌮𑌨॒𑌸𑍋 𑌪॑𑌶𑌿𑌕𑍍𑌷𑌤 । 𑌅𑌗𑍍𑌰॑-𑌨𑍍𑌦𑍇॒𑌵𑌾𑌨𑌾॑-𑌮𑌿॒𑌦𑌮॑𑌤𑍍𑌤𑍁 𑌨𑍋 𑌹॒𑌵𑌿𑌃 ॥ 𑌮𑌨॑𑌸॒𑌶𑍍𑌚𑌿𑌤𑍍𑌤𑍇॒𑌦𑌮𑍍 । 𑌭𑍂॒𑌤-𑌮𑍍𑌭𑌵𑍍𑌯॑-𑌞𑍍𑌚 𑌗𑍁𑌪𑍍𑌯𑌤𑍇 । 𑌤𑌦𑍍𑌧𑌿 𑌦𑍇॒𑌵𑍇𑌷𑍍𑌵॑𑌗𑍍𑌰𑌿॒𑌯𑌮𑍍 ॥ 1 ॥

𑌆 𑌨॑ 𑌏𑌤𑍁 𑌪𑍁𑌰𑌶𑍍𑌚॒𑌰𑌮𑍍 । 𑌸॒𑌹 𑌦𑍇॒𑌵𑍈𑌰𑌿॒𑌮𑌗𑍍​𑌮𑍍 𑌹𑌵᳚𑌮𑍍 । 𑌮𑌨॒-𑌶𑍍𑌶𑍍𑌰𑍇𑌯॑𑌸𑌿 𑌶𑍍𑌰𑍇𑌯𑌸𑌿 । 𑌕𑌰𑍍𑌮॑𑌨𑍍. 𑌯॒𑌜𑍍𑌞𑌪॑𑌤𑌿॒-𑌨𑍍𑌦𑌧॑𑌤𑍍 ॥ 𑌜𑍁॒𑌷𑌤𑌾᳚-𑌮𑍍𑌮𑍇॒ 𑌵𑌾𑌗𑌿॒𑌦𑌗𑍍​𑌮𑍍 𑌹॒𑌵𑌿𑌃 । 𑌵𑌿॒𑌰𑌾𑌡𑍍𑌦𑍇॒𑌵𑍀 𑌪𑍁॒𑌰𑍋𑌹𑌿॑𑌤𑌾 । 𑌹॒𑌵𑍍𑌯॒𑌵𑌾𑌡𑌨॑ 𑌪𑌾𑌯𑌿𑌨𑍀 ॥ 𑌯𑌯𑌾॑ 𑌰𑍂॒𑌪𑌾𑌣𑌿॑ 𑌬𑌹𑍁॒𑌧𑌾 𑌵𑌦॑𑌨𑍍𑌤𑌿 । 𑌪𑍇𑌶𑌾𑌗𑍍​𑌮𑍍॑𑌸𑌿 𑌦𑍇॒𑌵𑌾𑌃 𑌪॑𑌰॒𑌮𑍇 𑌜॒𑌨𑌿𑌤𑍍𑌰𑍇᳚ । 𑌸𑌾𑌨𑍋॑ 𑌵𑌿॒𑌰𑌾𑌡𑌨॑𑌪𑌸𑍍𑌫𑍁𑌰𑌨𑍍𑌤𑍀 ॥ 2 ॥

𑌵𑌾𑌗𑍍𑌦𑍇॒𑌵𑍀 𑌜𑍁॑𑌷𑌤𑌾𑌮𑌿॒𑌦𑌗𑍍​𑌮𑍍 𑌹॒𑌵𑌿𑌃 ॥ 𑌚𑌕𑍍𑌷𑍁॑-𑌰𑍍𑌦𑍇॒𑌵𑌾𑌨𑌾॒-𑌞𑍍𑌜𑍍𑌯𑍋𑌤𑌿॑𑌰॒𑌮𑍃𑌤𑍇॒ 𑌨𑍍𑌯॑𑌕𑍍𑌤𑌮𑍍 । 𑌅॒𑌸𑍍𑌯 𑌵𑌿॒𑌜𑍍𑌞𑌾𑌨𑌾॑𑌯 𑌬𑌹𑍁॒𑌧𑌾 𑌨𑌿𑌧𑍀॑𑌯𑌤𑍇 । 𑌤𑌸𑍍𑌯॑ 𑌸𑍁॒𑌮𑍍𑌨-𑌮॑𑌶𑍀𑌮𑌹𑌿 । 𑌮𑌾 𑌨𑍋॑ 𑌹𑌾𑌸𑍀-𑌦𑍍𑌵𑌿𑌚𑌕𑍍𑌷॒𑌣𑌮𑍍 ॥ 𑌆𑌯𑍁॒𑌰𑌿𑌨𑍍𑌨𑌃॒ 𑌪𑍍𑌰𑌤𑍀᳚𑌰𑍍𑌯𑌤𑌾𑌮𑍍 । 𑌅𑌨॑𑌨𑍍𑌧𑌾॒-𑌶𑍍𑌚𑌕𑍍𑌷𑍁॑𑌷𑌾 𑌵॒𑌯𑌮𑍍 । 𑌜𑍀॒𑌵𑌾 𑌜𑍍𑌯𑍋𑌤𑌿॑𑌰𑌶𑍀𑌮𑌹𑌿 । 𑌸𑍁𑌵॒𑌰𑍍𑌜𑍍𑌯𑍋𑌤𑌿॑-𑌰𑍁॒𑌤𑌾𑌮𑍃𑌤᳚𑌮𑍍 ॥ 𑌶𑍍𑌰𑍋𑌤𑍍𑌰𑍇॑𑌣 𑌭॒𑌦𑍍𑌰 𑌮𑍁॒𑌤 𑌶𑍃॑𑌣𑍍𑌵𑌨𑍍𑌤𑌿 𑌸॒𑌤𑍍𑌯𑌮𑍍 । 𑌶𑍍𑌰𑍋𑌤𑍍𑌰𑍇॑𑌣॒ 𑌵𑌾𑌚॑-𑌮𑍍𑌬𑌹𑍁॒𑌧𑍋𑌦𑍍𑌯 𑌮𑌾॑𑌨𑌾𑌮𑍍 । 𑌶𑍍𑌰𑍋𑌤𑍍𑌰𑍇॑𑌣॒ 𑌮𑍋𑌦॑𑌶𑍍𑌚॒ 𑌮𑌹॑𑌶𑍍𑌚 𑌶𑍍𑌰𑍂𑌯𑌤𑍇 । 𑌶𑍍𑌰𑍋𑌤𑍍𑌰𑍇॑𑌣॒ 𑌸𑌰𑍍𑌵𑌾॒ 𑌦𑌿𑌶॒ 𑌆𑌶𑍃॑𑌣𑍋𑌮𑌿 ॥ 𑌯𑍇𑌨॒ 𑌪𑍍𑌰𑌾𑌚𑍍𑌯𑌾॑ 𑌉॒𑌤 𑌦॑𑌕𑍍𑌷𑌿॒𑌣𑌾 । 𑌪𑍍𑌰॒𑌤𑍀𑌚𑍍𑌯𑍈॑ 𑌦𑌿॒𑌶-𑌶𑍍𑌶𑍃॒𑌣𑍍𑌵𑌨𑍍𑌤𑍍𑌯𑍁॑𑌤𑍍𑌤॒𑌰𑌾𑌤𑍍 । 𑌤𑌦𑌿𑌚𑍍𑌛𑍍𑌰𑍋𑌤𑍍𑌰॑-𑌮𑍍𑌬𑌹𑍁॒𑌧𑍋𑌦𑍍𑌯𑌮𑌾॑𑌨𑌮𑍍 । 𑌅॒𑌰𑌾𑌨𑍍𑌨 𑌨𑍇॒𑌮𑌿𑌃 𑌪𑌰𑌿॒ 𑌸𑌰𑍍𑌵॑-𑌮𑍍𑌬𑌭𑍂𑌵 ॥ 3 ॥
(𑌅॒𑌗𑍍𑌰𑌿॒ - 𑌯𑌮𑌨॑𑌪𑌸𑍍𑌫𑍁𑌰𑌨𑍍𑌤𑍀 - 𑌸॒𑌤𑍍𑌯𑌗𑍍​𑌮𑍍 𑌸॒𑌪𑍍𑌤 𑌚॑) (𑌅. 1)

2.5.2 𑌉𑌪𑌹𑍋𑌮𑌾𑌃
𑌉॒𑌦𑍇𑌹𑌿॑ 𑌵𑌾𑌜𑌿॒𑌨𑍍𑌯𑍋 𑌅॑𑌸𑍍𑌯॒𑌫𑍍𑌸𑍍𑌵॑𑌨𑍍𑌤𑌃 । 𑌇॒𑌦𑌗𑍍​𑌮𑍍 𑌰𑌾॒𑌷𑍍𑌟𑍍𑌰𑌮𑌾𑌵𑌿॑𑌶 𑌸𑍂॒𑌨𑍃𑌤𑌾॑𑌵𑌤𑍍 । 𑌯𑍋 𑌰𑍋𑌹𑌿॑𑌤𑍋॒ 𑌵𑌿𑌶𑍍𑌵॑𑌮𑌿॒𑌦-𑌞𑍍𑌜॒𑌜𑌾𑌨॑ । 𑌸 𑌨𑍋॑ 𑌰𑌾॒𑌷𑍍𑌟𑍍𑌰𑍇𑌷𑍁॒ 𑌸𑍁𑌧𑌿॑𑌤𑌾𑌨𑍍𑌦𑌧𑌾𑌤𑍁 ॥ 𑌰𑍋𑌹𑌗𑍍​𑌮𑍍॑ 𑌰𑍋𑌹॒𑌗𑍍​𑌮𑍍॒ 𑌰𑍋𑌹𑌿॑𑌤॒ 𑌆𑌰𑍁॑𑌰𑍋𑌹 । 𑌪𑍍𑌰॒𑌜𑌾𑌭𑌿॒𑌰𑍍𑌵𑍃𑌦𑍍𑌧𑌿॑-𑌞𑍍𑌜॒𑌨𑍁𑌷𑌾॑𑌮𑍁॒𑌪𑌸𑍍𑌥᳚𑌮𑍍 । 𑌤𑌾𑌭𑌿॒-𑌸𑍍𑌸𑌗𑍍​𑌮𑍍𑌰॑𑌬𑍍𑌧𑍋 𑌅𑌵𑌿𑌦॒𑌥𑍍𑌷𑌡𑍁॒𑌰𑍍𑌵𑍀𑌃 । 𑌗𑌾॒𑌤𑍁-𑌮𑍍𑌪𑍍𑌰॒𑌪𑌶𑍍𑌯॑𑌨𑍍𑌨𑌿॒𑌹 𑌰𑌾॒𑌷𑍍𑌟𑍍𑌰𑌮𑌾𑌹𑌾𑌃᳚ ॥ 𑌆𑌹𑌾॑𑌰𑍍​𑌷𑍀-𑌦𑍍𑌰𑌾॒𑌷𑍍𑌟𑍍𑌰𑌮𑌿॒𑌹 𑌰𑍋𑌹𑌿॑𑌤𑌃 । 𑌮𑍃𑌧𑍋॒ 𑌵𑍍𑌯𑌾᳚𑌸𑍍𑌥॒𑌦𑌭॑𑌯-𑌨𑍍𑌨𑍋 𑌅𑌸𑍍𑌤𑍁 ॥ 4 ॥

𑌅॒𑌸𑍍𑌮𑌭𑍍𑌯॑-𑌨𑍍𑌦𑍍𑌯𑌾𑌵𑌾𑌪𑍃𑌥𑌿𑌵𑍀॒ 𑌶𑌕𑍍𑌵॑𑌰𑍀𑌭𑌿𑌃 । 𑌰𑌾॒𑌷𑍍𑌟𑍍𑌰-𑌨𑍍𑌦𑍁॑𑌹𑌾𑌥𑌾𑌮𑌿॒𑌹 𑌰𑍇॒𑌵𑌤𑍀॑𑌭𑌿𑌃 ॥ 𑌵𑌿𑌮॑𑌮𑌰𑍍​𑌶॒ 𑌰𑍋𑌹𑌿॑𑌤𑍋 𑌵𑌿॒𑌶𑍍𑌵𑌰𑍂॑𑌪𑌃 । 𑌸॒𑌮𑌾॒𑌚॒𑌕𑍍𑌰𑌾॒𑌣𑌃 𑌪𑍍𑌰॒𑌰𑍁𑌹𑍋॒ 𑌰𑍁𑌹॑𑌶𑍍𑌚 । 𑌦𑌿𑌵॑𑌗॒𑌨𑍍𑌤𑍍𑌵𑌾𑌯॑ 𑌮𑌹॒𑌤𑌾 𑌮॑𑌹𑌿॒𑌮𑍍𑌨𑌾 । 𑌵𑌿 𑌨𑍋॑ 𑌰𑌾॒𑌷𑍍𑌟𑍍𑌰𑌮𑍁॑𑌨𑌤𑍍𑌤𑍁॒ 𑌪𑌯॑𑌸𑌾॒ 𑌸𑍍𑌵𑍇𑌨॑ ॥ 𑌯𑌾𑌸𑍍𑌤𑍇॒ 𑌵𑌿𑌶॒𑌸𑍍𑌤𑌪॑𑌸𑌾 𑌸𑌮𑍍𑌬𑌭𑍂॒𑌵𑍁𑌃 । 𑌗𑌾॒𑌯॒𑌤𑍍𑌰𑌂-𑌵𑌁॒𑌥𑍍𑌸𑌮𑌨𑍁॒ 𑌤𑌾𑌸𑍍𑌤॒ 𑌆𑌗𑍁𑌃॑ । 𑌤𑌾𑌸𑍍𑌤𑍍𑌵𑌾 𑌵𑌿॑𑌶𑌨𑍍𑌤𑍁॒ 𑌮𑌹॑𑌸𑌾॒ 𑌸𑍍𑌵𑍇𑌨॑ । 𑌸-𑌮𑍍𑌮𑌾॑𑌤𑌾 𑌪𑍁॒𑌤𑍍𑌰𑍋 𑌅॒𑌭𑍍𑌯𑍇॑𑌤𑍁॒ 𑌰𑍋𑌹𑌿॑𑌤𑌃 ॥ 5 ॥

𑌯𑍂॒𑌯𑌮𑍁॑𑌗𑍍𑌰𑌾 𑌮𑌰𑍁𑌤𑌃 𑌪𑍃𑌶𑍍𑌨𑌿𑌮𑌾𑌤𑌰𑌃 । 𑌇𑌨𑍍𑌦𑍍𑌰𑍇॑𑌣 𑌸॒𑌯𑍁𑌜𑌾॒ 𑌪𑍍𑌰𑌮𑍃॑𑌣𑍀𑌥॒ 𑌶𑌤𑍍𑌰𑍂𑌨𑍍॑ । 𑌆 𑌵𑍋॒ 𑌰𑍋𑌹𑌿॑𑌤𑍋 𑌅𑌶𑍃𑌣𑍋𑌦𑌭𑌿𑌦𑍍𑌯𑌵𑌃 । 𑌤𑍍𑌰𑌿𑌸॑𑌪𑍍𑌤𑌾𑌸𑍋 𑌮𑌰𑍁𑌤-𑌸𑍍𑌸𑍍𑌵𑌾𑌦𑍁𑌸𑌮𑍍𑌮𑍁𑌦𑌃 ॥ 𑌰𑍋𑌹𑌿॑𑌤𑍋॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌜॑𑌜𑌾𑌨 । 𑌤𑌸𑍍𑌮𑌿॒𑌗𑍍𑌗𑍍॒𑌸𑍍𑌤𑌨𑍍𑌤𑍁॑-𑌮𑍍𑌪𑌰𑌮𑍇॒𑌷𑍍𑌠𑍀 𑌤॑𑌤𑌾𑌨 । 𑌤𑌸𑍍𑌮𑌿॑𑌞𑍍𑌛𑌿𑌶𑍍𑌰𑌿𑌯𑍇 𑌅॒𑌜 𑌏𑌕॑𑌪𑌾𑌤𑍍 । 𑌅𑌦𑍃𑌗𑍍​𑌮𑍍॑ 𑌹॒𑌦𑍍𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌬𑌲𑍇॑𑌨 ॥ 𑌰𑍋𑌹𑌿॑𑌤𑍋॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌅॑𑌦𑍃𑌗𑍍​𑌮𑍍𑌹𑌤𑍍 । 𑌤𑍇𑌨॒ 𑌸𑍁𑌵॑-𑌸𑍍𑌸𑍍𑌤𑌭𑌿॒𑌤-𑌨𑍍𑌤𑍇𑌨॒ 𑌨𑌾𑌕𑌃॑ ॥ 6 ॥

𑌸𑍋 𑌅॒𑌨𑍍𑌤𑌰𑌿॑𑌕𑍍𑌷𑍇॒ 𑌰𑌜॑𑌸𑍋 𑌵𑌿॒𑌮𑌾𑌨𑌃॑ । 𑌤𑍇𑌨॑ 𑌦𑍇॒𑌵𑌾-𑌸𑍍𑌸𑍁𑌵॒𑌰𑌨𑍍𑌵॑𑌵𑌿𑌨𑍍𑌦𑌨𑍍𑌨𑍍 ॥ 𑌸𑍁॒𑌶𑍇𑌵॑-𑌨𑍍𑌤𑍍𑌵𑌾 𑌭𑌾॒𑌨𑌵𑍋॑ 𑌦𑍀𑌦𑌿॒𑌵𑌾𑌗𑍍​𑌮𑍍𑌸᳚𑌮𑍍 । 𑌸𑌮॑𑌗𑍍𑌰𑌾𑌸𑍋 𑌜𑍁॒𑌹𑍍𑌵𑍋॑ 𑌜𑌾𑌤𑌵𑍇𑌦𑌃 । 𑌉॒𑌕𑍍𑌷𑌨𑍍𑌤𑌿॑ 𑌤𑍍𑌵𑌾 𑌵𑌾॒𑌜𑌿𑌨॒𑌮𑌾 𑌘𑍃॒𑌤𑍇𑌨॑ । 𑌸𑌗𑍍​𑌮𑍍𑌸॑𑌮𑌗𑍍𑌨𑍇 𑌯𑍁𑌵𑌸𑍇॒ 𑌭𑍋𑌜॑𑌨𑌾𑌨𑌿 ॥ 𑌅𑌗𑍍𑌨𑍇॒ 𑌶𑌰𑍍𑌧॑ 𑌮𑌹॒𑌤𑍇 𑌸𑍌𑌭॑𑌗𑌾𑌯 । 𑌤𑌵॑ 𑌦𑍍𑌯𑍁॒𑌮𑍍𑌨𑌾-𑌨𑍍𑌯𑍁॑𑌤𑍍𑌤॒𑌮𑌾𑌨𑌿॑ 𑌸𑌨𑍍𑌤𑍁 । 𑌸-𑌞𑍍𑌜𑌾᳚𑌸𑍍𑌪॒𑌤𑍍𑌯𑌗𑍍​𑌮𑍍 𑌸𑍁॒𑌯𑌮॒𑌮𑌾𑌕𑍃॑𑌣𑍁𑌷𑍍𑌵 । 𑌶॒𑌤𑍍𑌰𑍂॒𑌯॒𑌤𑌾𑌮॒𑌭𑌿𑌤𑌿॑𑌷𑍍𑌠𑌾॒ 𑌮𑌹𑌾॑𑌸𑌿 ॥ 𑍭 ॥
(𑌅॒- 𑌸𑍍𑌤𑍍𑌵𑍇॒𑌤𑍁॒ 𑌰𑍋𑌹𑌿॑𑌤𑍋॒ - 𑌨𑌾𑌕𑍋॒ - 𑌮𑌹𑌾𑌗𑍍​𑌮𑍍॑𑌸𑌿) (𑌅. 2)

2.5.3 𑌉𑌪𑌹𑍋𑌮𑌾𑌃
𑌪𑍁𑌨॑𑌰𑍍𑌨॒ 𑌇𑌨𑍍𑌦𑍍𑌰𑍋॑ 𑌮॒𑌘𑌵𑌾॑ 𑌦𑌦𑌾𑌤𑍁 । 𑌧𑌨𑌾॑𑌨𑌿 𑌶॒𑌕𑍍𑌰𑍋 𑌘𑌨𑍍𑌯॑-𑌸𑍍𑌸𑍁॒𑌰𑌾𑌧𑌾𑌃᳚ । 𑌅॒𑌰𑍍𑌵𑌾॒𑌚𑍀𑌨॑-𑌙𑍍𑌕𑍃𑌣𑍁𑌤𑌾𑌂-𑌯𑌾𑌁𑌚𑌿॒𑌤𑍋 𑌮𑌨𑌃॑ । 𑌶𑍍𑌰𑍁॒𑌷𑍍𑌟𑍀 𑌨𑍋॑ 𑌅॒𑌸𑍍𑌯 𑌹॒𑌵𑌿𑌷𑍋॑ 𑌜𑍁𑌷𑌾॒𑌣𑌃 ॥ 𑌯𑌾𑌨𑌿॑ 𑌨𑍋 𑌜𑌿॒𑌨-𑌨𑍍𑌧𑌨𑌾॑𑌨𑌿 । 𑌜॒𑌹𑌰𑍍𑌥॑ 𑌶𑍂𑌰 𑌮॒𑌨𑍍𑌯𑍁𑌨𑌾᳚ । 𑌇𑌨𑍍𑌦𑍍𑌰𑌾𑌨𑍁॑𑌵𑌿𑌨𑍍𑌦 𑌨॒𑌸𑍍𑌤𑌾𑌨𑌿॑ । 𑌅॒𑌨𑍇𑌨॑ 𑌹॒𑌵𑌿𑌷𑌾॒ 𑌪𑍁𑌨𑌃॑ ॥ 𑌇𑌨𑍍𑌦𑍍𑌰॒ 𑌆𑌶𑌾᳚𑌭𑍍𑌯𑌃॒ 𑌪𑌰𑌿॑ । 𑌸𑌰𑍍𑌵𑌾॒𑌭𑍍𑌯𑍋-𑌽𑌭॑𑌯-𑌙𑍍𑌕𑌰𑌤𑍍 ॥ 𑍮 ॥

𑌜𑍇𑌤𑌾॒ 𑌶𑌤𑍍𑌰𑍂॒𑌨𑍍॒. 𑌵𑌿𑌚॑𑌰𑍍​𑌷𑌣𑌿𑌃 ॥ 𑌆𑌕𑍂᳚𑌤𑍍𑌯𑍈 𑌤𑍍𑌵𑌾॒ 𑌕𑌾𑌮𑌾॑𑌯 𑌤𑍍𑌵𑌾 𑌸॒𑌮𑍃𑌧𑍇᳚ 𑌤𑍍𑌵𑌾 । 𑌪𑍁॒𑌰𑍋 𑌦॑𑌧𑍇 𑌅𑌮𑍃𑌤॒𑌤𑍍𑌵𑌾𑌯॑ 𑌜𑍀॒𑌵𑌸𑍇᳚ ॥ 𑌆𑌕𑍂॑𑌤𑌿𑌮॒𑌸𑍍𑌯𑌾𑌵॑𑌸𑍇 । 𑌕𑌾𑌮॑𑌮𑌸𑍍𑌯॒ 𑌸𑌮𑍃॑𑌦𑍍𑌧𑍍𑌯𑍈 । 𑌇𑌨𑍍𑌦𑍍𑌰॑𑌸𑍍𑌯 𑌯𑍁𑌞𑍍𑌜𑌤𑍇॒ 𑌧𑌿𑌯𑌃॑ ॥ 𑌆𑌕𑍂॑𑌤𑌿-𑌨𑍍𑌦𑍇॒𑌵𑍀-𑌮𑍍𑌮𑌨॑𑌸𑌃 𑌪𑍁॒𑌰𑍋 𑌦॑𑌧𑍇 । 𑌯॒𑌜𑍍𑌞𑌸𑍍𑌯॑ 𑌮𑌾॒𑌤𑌾 𑌸𑍁॒𑌹𑌵𑌾॑ 𑌮𑍇 𑌅𑌸𑍍𑌤𑍁 । 𑌯𑌦𑌿॒𑌚𑍍𑌛𑌾𑌮𑌿॒ 𑌮𑌨॑𑌸𑌾॒ 𑌸𑌕𑌾॑𑌮𑌃 । 𑌵𑌿॒𑌦𑍇𑌯॑𑌮𑍇𑌨॒𑌦𑍍𑌧𑍃𑌦॑𑌯𑍇॒ 𑌨𑌿𑌵𑌿॑𑌷𑍍𑌟𑌮𑍍 ॥ 𑍯 ॥

𑌸𑍇𑌦॒𑌗𑍍𑌨𑌿𑌰॒𑌗𑍍𑌨𑍀𑌗𑍍​𑌮𑍍 𑌰𑌤𑍍𑌯𑍇᳚𑌤𑍍𑌯॒𑌨𑍍𑌯𑌾𑌨𑍍 । 𑌯𑌤𑍍𑌰॑ 𑌵𑌾॒𑌜𑍀 𑌤𑌨॑𑌯𑍋 𑌵𑍀॒𑌡𑍁𑌪𑌾॑𑌣𑌿𑌃 । 𑌸॒𑌹𑌸𑍍𑌰॑𑌪𑌾𑌥𑌾 𑌅॒𑌕𑍍𑌷𑌰𑌾॑ 𑌸॒𑌮𑍇𑌤𑌿॑ ॥ 𑌆𑌶𑌾॑𑌨𑌾-𑌨𑍍𑌤𑍍𑌵𑌾 𑌽𑌽𑌶𑌾𑌪𑌾॒𑌲𑍇𑌭𑍍𑌯𑌃॑ । 𑌚॒𑌤𑍁𑌰𑍍𑌭𑍍𑌯𑍋॑ 𑌅॒𑌮𑍃𑌤𑍇᳚𑌭𑍍𑌯𑌃 । 𑌇॒𑌦-𑌮𑍍𑌭𑍂॒𑌤𑌸𑍍𑌯𑌾𑌦𑍍𑌧𑍍𑌯॑𑌕𑍍𑌷𑍇𑌭𑍍𑌯𑌃 । 𑌵𑌿॒𑌧𑍇𑌮॑ 𑌹॒𑌵𑌿𑌷𑌾॑ 𑌵॒𑌯𑌮𑍍 ॥ 𑌵𑌿𑌶𑍍𑌵𑌾॒ 𑌆𑌶𑌾॒ 𑌮𑌧𑍁॑𑌨𑌾॒ 𑌸𑌗𑍍​𑌮𑍍𑌸𑍃॑𑌜𑌾𑌮𑌿 । 𑌅॒𑌨॒𑌮𑍀॒𑌵𑌾 𑌆𑌪॒ 𑌓𑌷॑𑌧𑌯𑍋 𑌭𑌵𑌨𑍍𑌤𑍁 । 𑌅॒𑌯𑌂-𑌯𑌁𑌜॑𑌮𑌾𑌨𑍋॒ 𑌮𑍃𑌧𑍋॒ 𑌵𑍍𑌯॑𑌸𑍍𑌯𑌤𑌾𑌮𑍍 ॥ 10 ॥

𑌅𑌗𑍃॑𑌭𑍀𑌤𑌾𑌃 𑌪॒𑌶𑌵॑-𑌸𑍍𑌸𑌨𑍍𑌤𑍁॒ 𑌸𑌰𑍍𑌵𑍇᳚ ॥ 𑌅॒𑌗𑍍𑌨𑌿-𑌸𑍍𑌸𑍋𑌮𑍋॒ 𑌵𑌰𑍁॑𑌣𑍋 𑌮𑌿॒𑌤𑍍𑌰 𑌇𑌨𑍍𑌦𑍍𑌰𑌃॑ । 𑌬𑍃𑌹॒𑌸𑍍𑌪𑌤𑌿॑-𑌸𑍍𑌸𑌵𑌿॒𑌤𑌾 𑌯-𑌸𑍍𑌸॑𑌹॒𑌸𑍍𑌰𑍀 । 𑌪𑍂॒𑌷𑌾 𑌨𑍋॒ 𑌗𑍋𑌭𑌿॒𑌰𑌵॑𑌸𑌾॒ 𑌸𑌰॑𑌸𑍍𑌵𑌤𑍀 । 𑌤𑍍𑌵𑌷𑍍𑌟𑌾॑ 𑌰𑍂॒𑌪𑌾𑌣𑌿॒ 𑌸𑌮॑𑌨𑌕𑍍𑌤𑍁 𑌯॒𑌜𑍍𑌞𑍈𑌃 ॥ 𑌤𑍍𑌵𑌷𑍍𑌟𑌾॑ 𑌰𑍂॒𑌪𑌾𑌣𑌿॒ 𑌦𑌧॑𑌤𑍀॒ 𑌸𑌰॑𑌸𑍍𑌵𑌤𑍀 । 𑌪𑍂॒𑌷𑌾 𑌭𑌗𑌗𑍍​𑌮𑍍॑ 𑌸𑌵𑌿॒𑌤𑌾 𑌨𑍋॑ 𑌦𑌦𑌾𑌤𑍁 । 𑌬𑍃𑌹॒𑌸𑍍𑌪𑌤𑌿॒-𑌰𑍍𑌦𑌦॒𑌦𑌿𑌨𑍍𑌦𑍍𑌰॑-𑌸𑍍𑌸॒𑌹𑌸𑍍𑌰᳚𑌮𑍍 । 𑌮𑌿॒𑌤𑍍𑌰𑍋 𑌦𑌾॒𑌤𑌾 𑌵𑌰𑍁॑𑌣॒-𑌸𑍍𑌸𑍋𑌮𑍋॑ 𑌅॒𑌗𑍍𑌨𑌿𑌃 ॥ 11 ॥
(𑌕॒𑌰॒𑌨𑍍 - 𑌨𑌿𑌵𑌿॑𑌷𑍍𑌟 - 𑌮𑌸𑍍𑌯𑌤𑌾𑌂॒ - +𑌨𑌵॑ 𑌚) (𑌅. 3)

2.5.4 𑌉𑌪𑌹𑍋𑌮𑌾𑌃
𑌆 𑌨𑍋॑ 𑌭𑌰॒ 𑌭𑌗॑𑌮𑌿𑌨𑍍𑌦𑍍𑌰 𑌦𑍍𑌯𑍁॒𑌮𑌨𑍍𑌤᳚𑌮𑍍 । 𑌨𑌿 𑌤𑍇॑ 𑌦𑍇॒𑌷𑍍𑌣𑌸𑍍𑌯॑ 𑌧𑍀𑌮𑌹𑌿 𑌪𑍍𑌰𑌰𑍇॒𑌕𑍇 । 𑌉॒𑌰𑍍𑌵 𑌇॑𑌵 𑌪𑌪𑍍𑌰𑌥𑍇॒ 𑌕𑌾𑌮𑍋॑ 𑌅॒𑌸𑍍𑌮𑍇 । 𑌤𑌮𑌾𑌪𑍃॑𑌣𑌾 𑌵𑌸𑍁𑌪𑌤𑍇॒ 𑌵𑌸𑍂॑𑌨𑌾𑌮𑍍 ॥ 𑌇॒𑌮-𑌙𑍍𑌕𑌾𑌮॑-𑌮𑍍𑌮𑌨𑍍𑌦𑌯𑌾॒ 𑌗𑍋𑌭𑌿॒𑌰𑌶𑍍𑌵𑍈𑌃᳚ । 𑌚॒𑌨𑍍𑌦𑍍𑌰𑌵॑𑌤𑌾॒ 𑌰𑌾𑌧॑𑌸𑌾 𑌪॒𑌪𑍍𑌰𑌥॑𑌶𑍍𑌚 । 𑌸𑍁॒𑌵॒𑌰𑍍𑌯𑌵𑍋॑ 𑌮॒𑌤𑌿𑌭𑌿॒𑌸𑍍𑌤𑍁𑌭𑍍𑌯𑌂॒-𑌵𑌿𑌁𑌪𑍍𑌰𑌾𑌃᳚ । 𑌇𑌨𑍍𑌦𑍍𑌰𑌾॑𑌯॒ 𑌵𑌾𑌹𑌃॑ 𑌕𑍁𑌶𑌿॒𑌕𑌾𑌸𑍋॑ 𑌅𑌕𑍍𑌰𑌨𑍍𑌨𑍍 ॥ 𑌇𑌨𑍍𑌦𑍍𑌰॑𑌸𑍍𑌯॒ 𑌨𑍁 𑌵𑍀॒𑌰𑍍𑌯𑌾॑𑌣𑌿॒ 𑌪𑍍𑌰𑌵𑍋॑𑌚𑌮𑍍 । 𑌯𑌾𑌨𑌿॑ 𑌚॒𑌕𑌾𑌰॑ 𑌪𑍍𑌰𑌥॒𑌮𑌾𑌨𑌿॑ 𑌵॒𑌜𑍍𑌰𑍀 ॥ 12 ॥

𑌅𑌹॒-𑌨𑍍𑌨𑌹𑌿॒𑌮𑌨𑍍𑌵॒𑌪𑌸𑍍𑌤॑𑌤𑌰𑍍𑌦 । 𑌪𑍍𑌰 𑌵॒𑌕𑍍𑌷𑌣𑌾॑ 𑌅𑌭𑌿𑌨॒-𑌤𑍍𑌪𑌰𑍍𑌵॑𑌤𑌾𑌨𑌾𑌮𑍍 ॥ 𑌅𑌹॒𑌨𑍍𑌨𑌹𑌿॒-𑌮𑍍𑌪𑌰𑍍𑌵॑𑌤𑍇 𑌶𑌿𑌶𑍍𑌰𑌿𑌯𑌾॒𑌣𑌮𑍍 । 𑌤𑍍𑌵𑌷𑍍𑌟𑌾᳚-𑌽𑌸𑍍𑌮𑍈॒ 𑌵𑌜𑍍𑌰𑌗𑍍𑌗𑍍॑ 𑌸𑍍𑌵॒𑌰𑍍𑌯॑-𑌨𑍍𑌤𑌤𑌕𑍍𑌷 । 𑌵𑌾॒𑌶𑍍𑌰𑌾 𑌇॑𑌵 𑌧𑍇॒𑌨𑌵॒-𑌸𑍍𑌸𑍍𑌯𑌨𑍍𑌦॑𑌮𑌾𑌨𑌾𑌃 । 𑌅𑌞𑍍𑌜॑-𑌸𑍍𑌸𑌮𑍁॒𑌦𑍍𑌰-𑌮𑌵॑𑌜𑌗𑍍𑌮𑍁॒𑌰𑌾𑌪𑌃॑ ॥ 𑌵𑍃॒𑌷𑌾॒𑌯𑌮𑌾॑𑌣𑍋-𑌽𑌵𑍃𑌣𑍀𑌤॒ 𑌸𑍋𑌮᳚𑌮𑍍 । 𑌤𑍍𑌰𑌿𑌕॑𑌦𑍍𑌰𑍁𑌕𑍇𑌷𑍍𑌵-𑌪𑌿𑌬-𑌥𑍍𑌸𑍁॒𑌤𑌸𑍍𑌯॑ । 𑌆 𑌸𑌾𑌯॑𑌕-𑌮𑍍𑌮॒𑌘𑌵𑌾॑ 𑌦𑌤𑍍𑌤॒ 𑌵𑌜𑍍𑌰᳚𑌮𑍍 । 𑌅𑌹॑𑌨𑍍𑌨𑍇𑌨-𑌮𑍍𑌪𑍍𑌰𑌥𑌮॒𑌜𑌾 𑌮𑌹𑍀॑𑌨𑌾𑌮𑍍 ॥ 13 ॥

𑌯𑌦𑌿𑌨𑍍𑌦𑍍𑌰𑌾𑌹॑𑌨𑍍-𑌪𑍍𑌰𑌥𑌮॒𑌜𑌾 𑌮𑌹𑍀॑𑌨𑌾𑌮𑍍 । 𑌆𑌨𑍍𑌮𑌾॒𑌯𑌿𑌨𑌾॒𑌮𑌮𑌿॑𑌨𑌾𑌃॒ 𑌪𑍍𑌰𑍋𑌤 𑌮𑌾॒𑌯𑌾𑌃 । 𑌆-𑌥𑍍𑌸𑍂𑌰𑍍𑌯॑-𑌞𑍍𑌜॒𑌨𑌯॒-𑌨𑍍𑌦𑍍𑌯𑌾𑌮𑍁॒𑌷𑌾𑌸᳚𑌮𑍍 । 𑌤𑌾॒𑌦𑍀𑌕𑍍𑌨𑌾॒ 𑌶𑌤𑍍𑌰𑍂॒𑌨𑍍𑌨 𑌕𑌿𑌲𑌾॑𑌵𑌿𑌵𑌿𑌥𑍍𑌸𑍇 ॥ 𑌅𑌹॑𑌨𑍍 𑌵𑍃॒𑌤𑍍𑌰𑌂-𑌵𑍃𑌁॑𑌤𑍍𑌰॒𑌤𑌰𑌂॒-𑌵𑍍𑌯𑌁𑌗𑍍​𑌮𑍍𑌸᳚𑌮𑍍 । 𑌇𑌨𑍍𑌦𑍍𑌰𑍋॒ 𑌵𑌜𑍍𑌰𑍇॑𑌣 𑌮𑌹॒𑌤𑌾 𑌵॒𑌧𑍇𑌨॑ । 𑌸𑍍𑌕𑌨𑍍𑌧𑌾𑌗𑍍​𑌮𑍍॑𑌸𑍀𑌵॒ 𑌕𑍁𑌲𑌿॑𑌶𑍇𑌨𑌾॒ 𑌵𑌿𑌵𑍃॑𑌕𑍍𑌣𑌾 । 𑌅𑌹𑌿॑-𑌶𑍍𑌶𑌯𑌤 𑌉𑌪॒𑌪𑍃𑌕𑍍-𑌪𑍃॑𑌥𑌿॒𑌵𑍍𑌯𑌾𑌮𑍍 ॥ 𑌅॒𑌯𑍋॒𑌦𑍍𑌧𑍍𑌯𑍇𑌵 𑌦𑍁॒𑌰𑍍𑌮𑌦॒ 𑌆 𑌹𑌿 𑌜𑍁॒𑌹𑍍𑌵𑍇 । 𑌮॒𑌹𑌾॒𑌵𑍀॒𑌰-𑌨𑍍𑌤𑍁॑ 𑌵𑌿𑌬𑌾॒𑌧-𑌮𑍃॑𑌜𑍀॒𑌷𑌮𑍍 ॥ 14 ॥

𑌨𑌾𑌤𑌾॑𑌰𑍀𑌰𑌸𑍍𑌯॒ 𑌸𑌮𑍃॑𑌤𑌿𑌂-𑌵𑌁॒𑌧𑌾𑌨𑌾᳚𑌮𑍍 । 𑌸𑌗𑍍​𑌮𑍍 𑌰𑍁॒𑌜𑌾𑌨𑌾𑌃᳚ 𑌪𑌿𑌪𑌿𑌷॒ 𑌇𑌨𑍍𑌦𑍍𑌰॑𑌶𑌤𑍍𑌰𑍁𑌃 ॥ 𑌵𑌿𑌶𑍍𑌵𑍋॒ 𑌵𑌿𑌹𑌾॑𑌯𑌾 𑌅𑌰॒𑌤𑌿𑌃 । 𑌵𑌸𑍁॑𑌰𑍍𑌦𑌧𑍇॒ 𑌹𑌸𑍍𑌤𑍇॒ 𑌦𑌕𑍍𑌷𑌿॑𑌣𑍇 । 𑌤॒𑌰𑌣𑌿॒𑌰𑍍𑌨 𑌶𑌿॑𑌶𑍍𑌰𑌥𑌤𑍍 । 𑌶𑍍𑌰॒𑌵॒𑌸𑍍𑌯॑𑌯𑌾॒ 𑌨 𑌶𑌿॑𑌶𑍍𑌰𑌥𑌤𑍍 । 𑌵𑌿𑌶𑍍𑌵॑𑌸𑍍𑌮𑌾॒ 𑌇𑌦𑌿॑𑌷𑍁𑌦𑍍𑌧𑍍𑌯॒𑌸𑍇 । 𑌦𑍇॒𑌵॒𑌤𑍍𑌰𑌾 𑌹॒𑌵𑍍𑌯𑌮𑍂𑌹𑌿॑𑌷𑍇 । 𑌵𑌿𑌶𑍍𑌵॑𑌸𑍍𑌮𑌾॒ 𑌇𑌥𑍍𑌸𑍁॒𑌕𑍃𑌤𑍇॒ 𑌵𑌾𑌰॑𑌮𑍃𑌣𑍍𑌵𑌤𑌿 । 𑌅॒𑌗𑍍𑌨𑌿-𑌰𑍍𑌦𑍍𑌵𑌾𑌰𑌾॒ 𑌵𑍍𑌯𑍃॑𑌣𑍍𑌵𑌤𑌿 ॥ 15 ॥

𑌉𑌦𑍁॒𑌜𑍍𑌜𑌿𑌹𑌾॑𑌨𑍋 𑌅॒𑌭𑌿 𑌕𑌾𑌮॑𑌮𑍀॒𑌰𑌯𑌨𑍍𑌨𑍍॑ । 𑌪𑍍𑌰॒𑌪𑍃॒𑌞𑍍𑌚𑌨𑍍 𑌵𑌿𑌶𑍍𑌵𑌾॒ 𑌭𑍁𑌵॑𑌨𑌾𑌨𑌿 𑌪𑍂॒𑌰𑍍𑌵𑌥𑌾᳚ । 𑌆 𑌕𑍇॒𑌤𑍁𑌨𑌾॒ 𑌸𑍁𑌷॑𑌮𑌿𑌦𑍍𑌧𑍋॒ 𑌯𑌜𑌿॑𑌷𑍍𑌠𑌃 । 𑌕𑌾𑌮॑-𑌨𑍍𑌨𑍋 𑌅𑌗𑍍𑌨𑍇 𑌅॒𑌭𑌿𑌹॑𑌰𑍍𑌯 𑌦𑌿॒𑌗𑍍𑌭𑍍𑌯𑌃 ॥ 𑌜𑍁॒𑌷𑌾॒𑌣𑍋 𑌹॒𑌵𑍍𑌯𑌮॒𑌮𑍃𑌤𑍇॑𑌷𑍁 𑌦𑍂॒𑌢𑍍𑌯𑌃॑ । 𑌆 𑌨𑍋॑ 𑌰॒𑌯𑌿-𑌮𑍍𑌬॑𑌹𑍁॒𑌲𑌾-𑌙𑍍𑌗𑍋𑌮॑𑌤𑍀॒𑌮𑌿𑌷᳚𑌮𑍍 । 𑌨𑌿𑌧𑍇॑𑌹𑌿॒ 𑌯𑌕𑍍𑌷॑𑌦॒𑌮𑍃𑌤𑍇॑𑌷𑍁॒ 𑌭𑍂𑌷𑌨𑍍𑌨𑍍॑ ॥ 𑌅𑌶𑍍𑌵𑌿॑𑌨𑌾 𑌯॒𑌜𑍍𑌞𑌮𑌾𑌗॑𑌤𑌮𑍍 । 𑌦𑌾॒𑌶𑍁𑌷𑌃॒ 𑌪𑍁𑌰𑍁॑𑌦𑌗𑍍​𑌮𑍍𑌸𑌸𑌾 । 𑌪𑍂॒𑌷𑌾 𑌰॑𑌕𑍍𑌷𑌤𑍁 𑌨𑍋 𑌰॒𑌯𑌿𑌮𑍍 ॥ 16 ॥

𑌇॒𑌮𑌂-𑌯𑌁॒𑌜𑍍𑌞𑌮॒𑌶𑍍𑌵𑌿𑌨𑌾॑ 𑌵॒𑌰𑍍𑌧𑌯॑𑌨𑍍𑌤𑌾 । 𑌇॒𑌮𑍌 𑌰॒𑌯𑌿𑌂-𑌯𑌁𑌜॑𑌮𑌾𑌨𑌾𑌯 𑌧𑌤𑍍𑌤𑌮𑍍 । 𑌇॒𑌮𑍌 𑌪॒𑌶𑍂-𑌨𑍍𑌰॑𑌕𑍍𑌷𑌤𑌾𑌂-𑌵𑌿𑌁॒𑌶𑍍𑌵𑌤𑍋॑ 𑌨𑌃 । 𑌪𑍂॒𑌷𑌾 𑌨𑌃॑ 𑌪𑌾𑌤𑍁॒ 𑌸𑌦॒𑌮-𑌪𑍍𑌰॑𑌯𑍁𑌚𑍍𑌛𑌨𑍍𑌨𑍍 ॥ 𑌪𑍍𑌰 𑌤𑍇॑ 𑌮॒𑌹𑍇 𑌸॑𑌰𑌸𑍍𑌵𑌤𑌿 । 𑌸𑍁𑌭॑𑌗𑍇॒ 𑌵𑌾𑌜𑌿॑𑌨𑍀𑌵𑌤𑌿 । 𑌸॒𑌤𑍍𑌯॒𑌵𑌾𑌚𑍇॑ 𑌭𑌰𑍇 𑌮॒𑌤𑌿𑌮𑍍 ॥ 𑌇॒𑌦-𑌨𑍍𑌤𑍇॑ 𑌹॒𑌵𑍍𑌯-𑌙𑍍𑌘𑍃॒𑌤𑌵॑-𑌥𑍍𑌸𑌰𑌸𑍍𑌵𑌤𑌿 । 𑌸॒𑌤𑍍𑌯॒𑌵𑌾𑌚𑍇॒ 𑌪𑍍𑌰𑌭॑𑌰𑍇𑌮𑌾 𑌹॒𑌵𑍀𑌗𑍍​𑌮𑍍𑌷𑌿॑ । 𑌇॒𑌮𑌾𑌨𑌿॑ 𑌤𑍇 𑌦𑍁𑌰𑌿॒𑌤𑌾 𑌸𑍌𑌭॑𑌗𑌾𑌨𑌿 । 𑌤𑍇𑌭𑌿॑𑌰𑍍𑌵॒𑌯𑌗𑍍​𑌮𑍍 𑌸𑍁॒𑌭𑌗𑌾॑𑌸-𑌸𑍍𑌸𑍍𑌯𑌾𑌮 ॥ 1𑍭 ॥
(𑌵॒𑌜𑍍 - 𑌯𑍍𑌰𑌹𑍀॑𑌨𑌾 - 𑌮𑍃𑌜𑍀॒𑌷𑌂 - 𑌁𑌵𑍍𑌯𑍃॑𑌣𑍍𑌵𑌤𑌿 - 𑌰𑌕𑍍𑌷𑌤𑍁 𑌨𑍋 𑌰॒𑌯𑌿𑌗𑍍​𑌮𑍍 - 𑌸𑍌𑌭॑𑌗𑌾॒𑌨𑍍𑌯𑍇𑌕॑-𑌞𑍍𑌚) (𑌅. 4)

2.5.5 𑌉𑌪𑌹𑍋𑌮𑌾𑌃
𑌯॒𑌜𑍍𑌞𑍋 𑌰𑌾॒𑌯𑍋 𑌯॒𑌜𑍍𑌞 𑌈॑𑌶𑍇॒ 𑌵𑌸𑍂॑𑌨𑌾𑌮𑍍 । 𑌯॒𑌜𑍍𑌞-𑌸𑍍𑌸॒𑌸𑍍𑌯𑌾𑌨𑌾॑𑌮𑍁॒𑌤 𑌸𑍁॑𑌕𑍍𑌷𑌿𑌤𑍀॒𑌨𑌾𑌮𑍍 । 𑌯॒𑌜𑍍𑌞 𑌇॒𑌷𑍍𑌟𑌃 𑌪𑍂॒𑌰𑍍𑌵𑌚𑌿॑𑌤𑍍𑌤𑌿-𑌨𑍍𑌦𑌧𑌾𑌤𑍁 । 𑌯॒𑌜𑍍𑌞𑍋 𑌬𑍍𑌰॑𑌹𑍍𑌮॒𑌣𑍍𑌵𑌾𑌗𑍍​𑌮𑍍 𑌅𑌪𑍍𑌯𑍇॑𑌤𑍁 𑌦𑍇॒𑌵𑌾𑌨𑍍 ॥ 𑌅॒𑌯𑌂-𑌯𑌁॒𑌜𑍍𑌞𑍋 𑌵॑𑌰𑍍𑌧𑌤𑌾॒-𑌙𑍍𑌗𑍋𑌭𑌿॒𑌰𑌶𑍍𑌵𑍈𑌃᳚ । 𑌇॒𑌯𑌂-𑌵𑍇𑌁𑌦𑌿॑-𑌸𑍍𑌸𑍍𑌵𑌪॒𑌤𑍍𑌯𑌾 𑌸𑍁॒𑌵𑍀𑌰𑌾᳚ । 𑌇॒𑌦-𑌮𑍍𑌬॒𑌰𑍍॒𑌹𑌿𑌰𑌤𑌿॑ 𑌬॒𑌰॒𑌃𑌈𑌗𑍍​𑌷𑍍𑌯॒𑌨𑍍𑌯𑌾 । 𑌇॒𑌮𑌂-𑌯𑌁॒𑌜𑍍𑌞𑌂-𑌵𑌿𑌁𑌶𑍍𑌵𑍇॑ 𑌅𑌵𑌨𑍍𑌤𑍁 𑌦𑍇॒𑌵𑌾𑌃 ॥ 𑌭𑌗॑ 𑌏॒𑌵 𑌭𑌗॑𑌵𑌾𑌗𑍍​𑌮𑍍 𑌅𑌸𑍍𑌤𑍁 𑌦𑍇𑌵𑌾𑌃 । 𑌤𑍇𑌨॑ 𑌵॒𑌯-𑌮𑍍𑌭𑌗॑𑌵𑌨𑍍𑌤-𑌸𑍍𑌸𑍍𑌯𑌾𑌮 ॥ 1𑍮 ॥

𑌤-𑌨𑍍𑌤𑍍𑌵𑌾॑ 𑌭𑌗॒ 𑌸𑌰𑍍𑌵॒ 𑌇𑌜𑍍𑌜𑍋॑𑌹𑌵𑍀𑌮𑌿 । 𑌸 𑌨𑍋॑ 𑌭𑌗 𑌪𑍁𑌰 𑌏॒𑌤𑌾 𑌭॑𑌵𑍇॒𑌹 ॥ 𑌭𑌗॒ 𑌪𑍍𑌰𑌣𑍇॑𑌤॒-𑌰𑍍𑌭𑌗॒ 𑌸𑌤𑍍𑌯॑𑌰𑌾𑌧𑌃 । 𑌭𑌗𑍇॒𑌮𑌾-𑌨𑍍𑌧𑌿𑌯॒𑌮𑍁𑌦॑𑌵॒ 𑌦𑌦॑𑌨𑍍𑌨𑌃 । 𑌭𑌗॒ 𑌪𑍍𑌰𑌣𑍋॑ 𑌜𑌨𑌯॒ 𑌗𑍋𑌭𑌿॒𑌰𑌶𑍍𑌵𑍈𑌃᳚ । 𑌭𑌗॒ 𑌪𑍍𑌰 𑌨𑍃𑌭𑌿॑-𑌰𑍍𑌨𑍃॒𑌵𑌨𑍍𑌤॑-𑌸𑍍𑌸𑍍𑌯𑌾𑌮 ॥ 𑌶𑌶𑍍𑌵॑𑌤𑍀॒-𑌸𑍍𑌸𑌮𑌾॒ 𑌉𑌪॑𑌯𑌨𑍍𑌤𑌿 𑌲𑍋॒𑌕𑌾𑌃 । 𑌶𑌶𑍍𑌵॑𑌤𑍀॒-𑌸𑍍𑌸𑌮𑌾॒ 𑌉𑌪॑𑌯॒𑌨𑍍𑌤𑍍𑌯𑌾𑌪𑌃॑ । 𑌇॒𑌷𑍍𑌟-𑌮𑍍𑌪𑍂॒𑌰𑍍𑌤𑌗𑍍​𑌮𑍍 𑌶𑌶𑍍𑌵॑𑌤𑍀𑌨𑌾॒𑌗𑍍​𑌮𑍍॒ 𑌸𑌮𑌾॑𑌨𑌾𑌗𑍍​𑌮𑍍 𑌶𑌾𑌶𑍍𑌵॒𑌤𑍇𑌨॑ । 𑌹॒𑌵𑌿𑌷𑍇॒𑌷𑍍𑌟𑍍𑌵𑌾 𑌽𑌨॒𑌨𑍍𑌤𑌂-𑌲𑍋𑌁॒𑌕-𑌮𑍍𑌪𑌰॒𑌮𑌾𑌰𑍁॑𑌰𑍋𑌹 ॥ 1𑍯 ॥

𑌇॒𑌯𑌮𑍇॒𑌵 𑌸𑌾 𑌯𑌾 𑌪𑍍𑌰॑𑌥॒𑌮𑌾 𑌵𑍍𑌯𑍌𑌚𑍍𑌛॑𑌤𑍍 । 𑌸𑌾 𑌰𑍂॒𑌪𑌾𑌣𑌿॑ 𑌕𑍁𑌰𑍁𑌤𑍇॒ 𑌪𑌞𑍍𑌚॑ 𑌦𑍇॒𑌵𑍀 ॥ 𑌦𑍍𑌵𑍇 𑌸𑍍𑌵𑌸𑌾॑𑌰𑍌 𑌵𑌯𑌤॒𑌸𑍍𑌤𑌨𑍍𑌤𑍍𑌰॑𑌮𑍇॒𑌤𑌤𑍍 । 𑌸॒𑌨𑌾॒𑌤𑌨𑌂॒-𑌵𑌿𑌁𑌤॑𑌤॒𑌗𑍍​𑌮𑍍॒ 𑌷𑌣𑍍𑌮॑𑌯𑍂𑌖𑌮𑍍 । 𑌅𑌵𑌾॒𑌨𑍍𑌯𑌾𑌗𑍍​ 𑌸𑍍𑌤𑌨𑍍𑌤𑍂᳚𑌨𑍍 𑌕𑌿॒𑌰𑌤𑍋॑ 𑌧॒𑌤𑍍𑌤𑍋 𑌅॒𑌨𑍍𑌯𑌾𑌨𑍍 । 𑌨𑌾𑌵॑𑌪𑍃॒𑌜𑍍𑌯𑌾𑌤𑍇॒ 𑌨 𑌗॑𑌮𑌾𑌤𑍇॒ 𑌅𑌨𑍍𑌤᳚𑌮𑍍 ॥ 𑌆 𑌵𑍋॑ 𑌯𑌨𑍍𑌤𑍂𑌦𑌵𑌾॒𑌹𑌾𑌸𑍋॑ 𑌅॒𑌦𑍍𑌯 । 𑌵𑍃𑌷𑍍𑌟𑌿𑌂॒-𑌯𑍇𑌁 𑌵𑌿𑌶𑍍𑌵𑍇॑ 𑌮॒𑌰𑍁𑌤𑍋॑ 𑌜𑍁॒𑌨𑌨𑍍𑌤𑌿॑ । 𑌅॒𑌯𑌂-𑌯𑍋𑌁 𑌅॒𑌗𑍍𑌨𑌿-𑌰𑍍𑌮॑𑌰𑍁𑌤॒-𑌸𑍍𑌸𑌮𑌿॑𑌦𑍍𑌧𑌃 । 𑌏॒𑌤-𑌞𑍍𑌜𑍁॑𑌷𑌦𑍍𑌧𑍍𑌵-𑌙𑍍𑌕𑌵𑌯𑍋 𑌯𑍁𑌵𑌾𑌨𑌃 ॥ 20 ॥

𑌧𑌾॒𑌰𑌾॒𑌵॒𑌰𑌾 𑌮॒𑌰𑍁𑌤𑍋॑ 𑌧𑍃॒𑌷𑍍𑌣𑍁𑌵𑍋॑𑌜𑌸𑌃 । 𑌮𑍃॒𑌗𑌾 𑌨 𑌭𑍀॒𑌮𑌾𑌸𑍍𑌤॑𑌵𑌿॒𑌷𑍇𑌭𑌿॑-𑌰𑍂॒𑌰𑍍𑌮𑌿𑌭𑌿𑌃॑ । 𑌅॒𑌗𑍍𑌨𑌯𑍋॒ 𑌨 𑌶𑍁॑𑌶𑍁𑌚𑌾॒𑌨𑌾 𑌋॑𑌜𑍀॒𑌷𑌿𑌣𑌃॑ । 𑌭𑍍𑌰𑍁𑌮𑌿॒-𑌨𑍍𑌧𑌮॑𑌨𑍍𑌤॒ 𑌉𑌪॒ 𑌗𑌾 𑌅॑𑌵𑍃𑌣𑍍𑌵𑌤 ॥ 𑌵𑌿𑌚॑𑌕𑍍𑌰𑌮𑍇 𑌪𑍃𑌥𑌿॒𑌵𑍀𑌮𑍇॒𑌷 𑌏॒𑌤𑌾𑌮𑍍 । 𑌕𑍍𑌷𑍇𑌤𑍍𑌰𑌾॑𑌯॒ 𑌵𑌿𑌷𑍍𑌣𑍁॒-𑌰𑍍𑌮𑌨𑍁॑𑌷𑍇 𑌦𑌶॒𑌸𑍍𑌯𑌨𑍍𑌨𑍍 । 𑌧𑍍𑌰𑍁॒𑌵𑌾𑌸𑍋॑ 𑌅𑌸𑍍𑌯 𑌕𑍀॒𑌰𑌯𑍋॒ 𑌜𑌨𑌾॑𑌸𑌃 । 𑌉॒𑌰𑍁॒𑌕𑍍𑌷𑌿॒𑌤𑌿𑌗𑍍​𑌮𑍍 𑌸𑍁॒𑌜𑌨𑌿॑𑌮𑌾 𑌚𑌕𑌾𑌰 ॥, 𑌤𑍍𑌰𑌿𑌰𑍍𑌦𑍇॒𑌵𑌃 𑌪𑍃॑𑌥𑌿॒𑌵𑍀𑌮𑍇॒𑌷 𑌏॒𑌤𑌾𑌮𑍍 । 𑌵𑌿𑌚॑𑌕𑍍𑌰𑌮𑍇 𑌶॒𑌤𑌰𑍍𑌚॑𑌸-𑌮𑍍𑌮𑌹𑌿॒𑌤𑍍𑌵𑌾 । 𑌪𑍍𑌰 𑌵𑌿𑌷𑍍𑌣𑍁॑-𑌰𑌸𑍍𑌤𑍁 𑌤॒𑌵𑌸॒𑌸𑍍𑌤 𑌵𑍀॑𑌯𑌾𑌨𑍍 । 𑌤𑍍𑌵𑍇॒𑌷𑌗𑍍𑌗𑍍​ 𑌹𑍍𑌯॑𑌸𑍍𑌯॒ 𑌸𑍍𑌥𑌵𑌿॑𑌰𑌸𑍍𑌯॒ 𑌨𑌾𑌮॑ ॥॥ 𑌆𑌵𑍇॒𑌧𑌸॒-𑌨𑍍𑌨𑍀𑌲॑𑌪𑍃𑌷𑍍𑌠-𑌮𑍍𑌬𑍃॒𑌹𑌨𑍍𑌤᳚𑌮𑍍 । 𑌬𑍃𑌹॒𑌸𑍍𑌪𑌤𑌿॒𑌗𑍍​𑌮𑍍॒ 𑌸𑌦॑𑌨𑍇 𑌸𑌾𑌦𑌯𑌦𑍍𑌧𑍍𑌵𑌮𑍍 । 𑌸𑌾॒𑌦𑌦𑍍𑌯𑍋॑𑌨𑌿॒-𑌨𑍍𑌦𑌮॒ 𑌆𑌦𑍀॑𑌦𑌿॒𑌵𑌾𑌗𑍍​𑌮𑍍𑌸᳚𑌮𑍍 । 𑌹𑌿𑌰॑𑌣𑍍𑌯𑌵𑌰𑍍𑌣𑌮𑌰𑍁॒𑌷𑌗𑍍​𑌮𑍍 𑌸॑𑌪𑍇𑌮 ॥ 𑌸 𑌹𑌿 𑌶𑍁𑌚𑌿॑-𑌶𑍍𑌶॒𑌤𑌪॑𑌤𑍍𑌰॒-𑌸𑍍𑌸 𑌶𑍁॒𑌨𑍍𑌧𑍍𑌯𑍂𑌃 ॥ 21 ॥

𑌹𑌿𑌰॑𑌣𑍍𑌯𑌵𑌾𑌶𑍀𑌰𑌿𑌷𑌿॒𑌰-𑌸𑍍𑌸𑍁॑𑌵॒𑌰॒.𑌷𑌾𑌃 । 𑌬𑍃𑌹॒𑌸𑍍𑌪𑌤𑌿॒-𑌸𑍍𑌸 𑌸𑍍𑌵𑌾॑𑌵𑍇॒𑌶 𑌋॒𑌷𑍍𑌵𑌾𑌃 । 𑌪𑍂॒𑌰𑍂 𑌸𑌖𑌿॑𑌭𑍍𑌯 𑌆 𑌸𑍁॒𑌤𑌿-𑌙𑍍𑌕॑𑌰𑌿𑌷𑍍𑌠𑌃 ॥ 𑌪𑍂𑌷॒𑌗𑍍𑌗𑍍॒𑌸𑍍𑌤𑌵॑ 𑌵𑍍𑌰॒𑌤𑍇 𑌵॒𑌯𑌮𑍍 । 𑌨 𑌰𑌿॑𑌷𑍍𑌯𑍇𑌮 𑌕॒𑌦𑌾 𑌚॒𑌨 । 𑌸𑍍𑌤𑍋॒𑌤𑌾𑌰॑𑌸𑍍𑌤 𑌇॒𑌹 𑌸𑍍𑌮॑𑌸𑌿 ॥ 𑌯𑌾𑌸𑍍𑌤𑍇॑ 𑌪𑍂𑌷॒𑌨𑍍𑌨𑌾𑌵𑍋॑ 𑌅॒𑌨𑍍𑌤-𑌸𑍍𑌸॑𑌮𑍁॒𑌦𑍍𑌰𑍇 । 𑌹𑌿॒𑌰॒𑌣𑍍𑌯𑌯𑍀॑𑌰॒𑌨𑍍𑌤𑌰𑌿॑𑌕𑍍𑌷𑍇॒ 𑌚𑌰॑𑌨𑍍𑌤𑌿 । 𑌯𑌾𑌭𑌿॑𑌰𑍍𑌯𑌾𑌸𑌿 𑌦𑍂॒𑌤𑍍𑌯𑌾𑌗𑍍​𑌮𑍍 𑌸𑍂𑌰𑍍𑌯॑𑌸𑍍𑌯 । 𑌕𑌾𑌮𑍇॑𑌨 𑌕𑍃॒𑌤-𑌶𑍍𑌶𑍍𑌰𑌵॑ 𑌇॒𑌚𑍍𑌛𑌮𑌾॑𑌨𑌃 ॥ 22 ॥

𑌅𑌰॑𑌣𑍍𑌯𑌾॒𑌨𑍍𑌯𑌰॑𑌣𑍍𑌯𑌾𑌨𑍍𑌯॒𑌸𑍌 । 𑌯𑌾 𑌪𑍍𑌰𑍇𑌵॒ 𑌨𑌶𑍍𑌯॑𑌸𑌿 । 𑌕॒𑌥𑌾 𑌗𑍍𑌰𑌾𑌮॒-𑌨𑍍𑌨 𑌪𑍃॑𑌚𑍍𑌛𑌸𑌿 । 𑌨 𑌤𑍍𑌵𑌾॒ 𑌭𑍀𑌰𑌿॑𑌵 𑌵𑌿𑌨𑍍𑌦𑌤𑍀(3) ॥ 𑌵𑍃॒𑌷𑌾॒𑌰॒𑌵𑌾𑌯॒ 𑌵𑌦॑𑌤𑍇 । 𑌯𑌦𑍁॒𑌪𑌾𑌵॑𑌤𑌿 𑌚𑌿𑌚𑍍𑌚𑌿॒𑌕𑌃 । 𑌆॒𑌘𑌾॒𑌟𑍀𑌭𑌿॑𑌰𑌿𑌵 𑌧𑌾॒𑌵𑌯𑌨𑍍𑌨𑍍॑ । 𑌅॒𑌰॒𑌣𑍍𑌯𑌾॒𑌨𑌿-𑌰𑍍𑌮॑𑌹𑍀𑌯𑌤𑍇 ॥ 𑌉॒𑌤 𑌗𑌾𑌵॑ 𑌇𑌵𑌾𑌦𑌨𑍍𑌨𑍍 । 𑌉॒𑌤𑍋 𑌵𑍇𑌶𑍍𑌮𑍇॑𑌵 𑌦𑍃𑌶𑍍𑌯𑌤𑍇 ॥ 23 ॥

𑌉॒𑌤𑍋 𑌅॑𑌰𑌣𑍍𑌯𑌾॒𑌨𑌿-𑌸𑍍𑌸𑌾॒𑌯𑌮𑍍 । 𑌶॒𑌕॒𑌟𑍀𑌰𑌿॑𑌵 𑌸𑌰𑍍𑌜𑌤𑌿 ॥ 𑌗𑌾𑌮॒𑌙𑍍𑌗𑍈𑌷॒ 𑌆𑌹𑍍𑌵॑𑌯𑌤𑌿 । 𑌦𑌾𑌰𑍍𑌵॒𑌙𑍍𑌗𑍈𑌷॒ 𑌉𑌪𑌾॑𑌵𑌧𑍀𑌤𑍍 । 𑌵𑌸॑𑌨𑍍𑌨𑌰𑌣𑍍𑌯𑌾॒𑌨𑍍𑌯𑌾𑌗𑍍​𑌮𑍍 𑌸𑌾॒𑌯𑌮𑍍 । 𑌅𑌕𑍍𑌰𑍁॑𑌕𑍍𑌷॒𑌦𑌿𑌤𑌿॑ 𑌮𑌨𑍍𑌯𑌤𑍇 ॥ 𑌨 𑌵𑌾 𑌅॑𑌰𑌣𑍍𑌯𑌾॒𑌨𑌿𑌰𑍍​𑌹॑𑌨𑍍𑌤𑌿 । 𑌅॒𑌨𑍍𑌯𑌶𑍍𑌚𑍇𑌨𑍍𑌨𑌾𑌭𑌿॒𑌗𑌚𑍍𑌛॑𑌤𑌿 । 𑌸𑍍𑌵𑌾॒𑌦𑍋𑌃 𑌫𑌲॑𑌸𑍍𑌯 𑌜॒𑌗𑍍𑌧𑍍𑌵𑌾 । 𑌯𑌤𑍍𑌰॒ 𑌕𑌾𑌮॒-𑌨𑍍𑌨𑌿𑌪॑𑌦𑍍𑌯𑌤𑍇 ॥ 𑌆𑌞𑍍𑌜॑𑌨𑌗𑌨𑍍𑌧𑍀𑌗𑍍​𑌮𑍍 𑌸𑍁𑌰॒𑌭𑍀𑌮𑍍 । 𑌬॒𑌹𑍍𑌵॒𑌨𑍍𑌨𑌾𑌮𑌕𑍃॑𑌷𑍀𑌵𑌲𑌾𑌮𑍍 । 𑌪𑍍𑌰𑌾𑌹-𑌮𑍍𑌮𑍃॒𑌗𑌾𑌣𑌾᳚-𑌮𑍍𑌮𑌾॒𑌤𑌰᳚𑌮𑍍 । 𑌅॒𑌰॒𑌣𑍍𑌯𑌾॒𑌨𑍀𑌮॑𑌶𑌗𑍍​𑌮𑍍-𑌸𑌿𑌷𑌮𑍍 ॥ 24 ॥
(𑌸𑍍𑌯𑌾॒𑌮॒ - 𑌰𑍁॒𑌰𑍋॒𑌹॒ - 𑌯𑍁॒𑌵𑌾॒𑌨𑌃॒ - 𑌶𑍁॒𑌨𑍍𑌧𑍍 - 𑌯𑍂𑌰𑌿॒𑌚𑍍𑌛𑌮𑌾॑𑌨𑍋 - 𑌦𑍃𑌶𑍍𑌯𑌤𑍇॒ - 𑌨𑌿𑌪॑𑌦𑍍𑌯𑌤𑍇 𑌚॒𑌤𑍍𑌵𑌾𑌰𑌿॑ 𑌚) (𑌅. 5)

2.5.6 𑌉𑌪𑌹𑍋𑌮𑌾𑌃
𑌵𑌾𑌰𑍍𑌤𑍍𑌰॑𑌹𑌤𑍍𑌯𑌾𑌯॒ 𑌶𑌵॑𑌸𑍇 । 𑌪𑍃॒𑌤॒𑌨𑌾॒-𑌸𑌾𑌹𑍍𑌯𑌾॑𑌯 𑌚 । 𑌇𑌨𑍍𑌦𑍍𑌰॒𑌤𑍍𑌵𑌾-𑌽𑌽𑌵॑𑌰𑍍𑌤𑌯𑌾𑌮𑌸𑌿 ॥ 𑌸𑍁॒𑌬𑍍𑌰𑌹𑍍𑌮𑌾॑𑌣𑌂-𑌵𑍀𑌁॒𑌰𑌵॑𑌨𑍍𑌤-𑌮𑍍𑌬𑍃॒𑌹𑌨𑍍𑌤᳚𑌮𑍍 । 𑌉॒𑌰𑍁-𑌙𑍍𑌗॑𑌭𑍀॒𑌰-𑌮𑍍𑌪𑍃॒𑌥𑍁𑌬𑍁॑𑌦𑍍𑌧𑍍𑌨𑌮𑌿𑌨𑍍𑌦𑍍𑌰 । 𑌶𑍍𑌰𑍁॒𑌤𑌰𑍍​𑌷𑌿॑-𑌮𑍁॒𑌗𑍍𑌰𑌮॑𑌭𑌿-𑌮𑌾𑌤𑌿॒𑌷𑌾𑌹᳚𑌮𑍍 । 𑌅॒𑌸𑍍𑌮𑌭𑍍𑌯॑-𑌞𑍍𑌚𑌿॒𑌤𑍍𑌰𑌂-𑌵𑍃𑌁𑌷॑𑌣𑌗𑍍​𑌮𑍍 𑌰॒𑌯𑌿-𑌨𑍍𑌦𑌾𑌃᳚ ॥ 𑌕𑍍𑌷𑍇॒𑌤𑍍𑌰𑌿॒𑌯𑍈 𑌤𑍍𑌵𑌾॒ 𑌨𑌿𑌰𑍍-𑌋॑𑌤𑍍𑌯𑍈 𑌤𑍍𑌵𑌾 । 𑌦𑍍𑌰𑍁॒𑌹𑍋 𑌮𑍁॑𑌞𑍍𑌚𑌾𑌮𑌿॒ 𑌵𑌰𑍁॑𑌣𑌸𑍍𑌯॒ 𑌪𑌾𑌶𑌾᳚𑌤𑍍 । 𑌅॒𑌨𑌾॒𑌗𑌸॒-𑌮𑍍𑌬𑍍𑌰𑌹𑍍𑌮॑𑌣𑍇 𑌤𑍍𑌵𑌾 𑌕𑌰𑍋𑌮𑌿 ॥ 25 ॥

𑌶𑌿॒𑌵𑍇 𑌤𑍇॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌉॒𑌭𑍇 𑌇॒𑌮𑍇 ॥ 𑌶-𑌨𑍍𑌤𑍇॑ 𑌅॒𑌗𑍍𑌨𑌿-𑌸𑍍𑌸॒𑌹𑌾𑌦𑍍𑌭𑌿𑌰॑𑌸𑍍𑌤𑍁 । 𑌶-𑌨𑍍𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌸॒𑌹𑍌𑌷॑𑌧𑍀𑌭𑌿𑌃 । 𑌶𑌮॒𑌨𑍍𑌤𑌰𑌿॑𑌕𑍍𑌷𑌗𑍍​𑌮𑍍 𑌸॒𑌹 𑌵𑌾𑌤𑍇॑𑌨 𑌤𑍇 । 𑌶-𑌨𑍍𑌤𑍇॒ 𑌚𑌤॑𑌸𑍍𑌰𑌃 𑌪𑍍𑌰॒𑌦𑌿𑌶𑍋॑ 𑌭𑌵𑌨𑍍𑌤𑍁 ॥ 𑌯𑌾 𑌦𑍈𑌵𑍀॒𑌶𑍍𑌚𑌤॑𑌸𑍍𑌰𑌃 𑌪𑍍𑌰॒𑌦𑌿𑌶𑌃॑ । 𑌵𑌾𑌤॑𑌪𑌤𑍍𑌨𑍀𑌰॒𑌭𑌿 𑌸𑍂𑌰𑍍𑌯𑍋॑ 𑌵𑌿𑌚॒𑌷𑍍𑌟𑍇 । 𑌤𑌾𑌸𑌾᳚-𑌨𑍍𑌤𑍍𑌵𑌾 𑌜॒𑌰𑌸॒ 𑌆𑌦॑𑌧𑌾𑌮𑌿 । 𑌪𑍍𑌰 𑌯𑌕𑍍𑌷𑍍𑌮॑ 𑌏𑌤𑍁॒ 𑌨𑌿𑌰𑍍-𑌋॑𑌤𑌿-𑌮𑍍𑌪𑌰𑌾॒𑌚𑍈𑌃 ॥ 𑌅𑌮𑍋॑𑌚𑌿॒ 𑌯𑌕𑍍𑌷𑍍𑌮𑌾᳚-𑌦𑍍𑌦𑍁𑌰𑌿॒𑌤𑌾-𑌦𑌵॑𑌰𑍍𑌤𑍍𑌯𑍈 ॥ 26 ॥

𑌦𑍍𑌰𑍁॒𑌹𑌃 𑌪𑌾𑌶𑌾॒𑌨𑍍𑌨𑌿𑌰𑍍-𑌋॑𑌤𑍍𑌯𑍈॒ 𑌚𑍋𑌦॑𑌮𑍋𑌚𑌿 । 𑌅𑌹𑌾॒ 𑌅𑌵॑𑌰𑍍𑌤𑌿॒𑌮𑌵𑌿॑𑌦-𑌥𑍍𑌸𑍍𑌯𑍋॒𑌨𑌮𑍍 । 𑌅𑌪𑍍𑌯॑𑌭𑍂-𑌦𑍍𑌭॒𑌦𑍍𑌰𑍇 𑌸𑍁॑𑌕𑍃॒𑌤𑌸𑍍𑌯॑ 𑌲𑍋॒𑌕𑍇 ॥ 𑌸𑍂𑌰𑍍𑌯॑𑌮𑍃॒𑌤-𑌨𑍍𑌤𑌮॑𑌸𑍋॒ 𑌗𑍍𑌰𑌾𑌹𑍍𑌯𑌾॒ 𑌯𑌤𑍍 । 𑌦𑍇॒𑌵𑌾 𑌅𑌮𑍁॑𑌞𑍍𑌚॒-𑌨𑍍𑌨𑌸𑍃॑𑌜॒𑌨𑍍𑌵𑍍𑌯𑍇॑𑌨𑌸𑌃 । 𑌏॒𑌵𑌮॒𑌹𑌮𑌿॒𑌮-𑌙𑍍𑌕𑍍𑌷𑍇᳚𑌤𑍍𑌰𑌿॒𑌯𑌾𑌜𑍍𑌜𑌾॑𑌮𑌿𑌶॒𑌗𑍍​𑌮𑍍॒𑌸𑌾𑌤𑍍 । 𑌦𑍍𑌰𑍁॒𑌹𑍋 𑌮𑍁॑𑌞𑍍𑌚𑌾𑌮𑌿॒ 𑌵𑌰𑍁॑𑌣𑌸𑍍𑌯॒ 𑌪𑌾𑌶𑌾᳚𑌤𑍍 ॥ 𑌬𑍃𑌹॑𑌸𑍍𑌪𑌤𑍇 𑌯𑍁॒𑌵𑌮𑌿𑌨𑍍𑌦𑍍𑌰॑𑌶𑍍𑌚॒ 𑌵𑌸𑍍𑌵𑌃॑ । 𑌦𑌿॒𑌵𑍍𑌯𑌸𑍍𑌯𑍇॑𑌶𑌾𑌥𑍇 𑌉॒𑌤 𑌪𑌾𑌰𑍍𑌥𑌿॑𑌵𑌸𑍍𑌯 । 𑌧॒𑌤𑍍𑌤𑌗𑍍​𑌮𑍍 𑌰॒𑌯𑌿𑌗𑍍𑌗𑍍​ 𑌸𑍍𑌤𑍁॑𑌵॒𑌤𑍇 𑌕𑍀॒𑌰𑌯𑍇॑ 𑌚𑌿𑌤𑍍 ॥ 2𑍭 ॥

𑌯𑍂॒𑌯-𑌮𑍍𑌪𑌾॑𑌤 𑌸𑍍𑌵॒𑌸𑍍𑌤𑌿𑌭𑌿॒-𑌸𑍍𑌸𑌦𑌾॑ 𑌨𑌃 ॥ 𑌦𑍇॒𑌵𑌾॒𑌯𑍁𑌧॒𑌮𑌿𑌨𑍍𑌦𑍍𑌰॒𑌮𑌾𑌜𑍋𑌹𑍁॑𑌵𑌾𑌨𑌾𑌃 । 𑌵𑌿॒𑌶𑍍𑌵𑌾॒𑌵𑍃𑌧॑𑌮॒𑌭𑌿 𑌯𑍇 𑌰𑌕𑍍𑌷॑𑌮𑌾𑌣𑌾𑌃 । 𑌯𑍇𑌨॑ 𑌹॒𑌤𑌾 𑌦𑍀॒𑌰𑍍𑌘𑌮𑌦𑍍𑌧𑍍𑌵𑌾॑𑌨॒𑌮𑌾𑌯𑌨𑍍𑌨𑍍॑ । 𑌅॒𑌨॒𑌨𑍍𑌤𑌮𑌰𑍍𑌥॒𑌮𑌨𑌿॑𑌵𑌰𑍍-𑌥𑍍𑌸𑍍𑌯𑌮𑌾𑌨𑌾𑌃 ॥ 𑌯𑌤𑍍𑌤𑍇॑ 𑌸𑍁𑌜𑌾𑌤𑍇 𑌹𑌿॒𑌮𑌵॑𑌥𑍍𑌸𑍁 𑌭𑍇𑌷॒𑌜𑌮𑍍 । 𑌮॒𑌯𑍋॒𑌭𑍂-𑌶𑍍𑌶𑌨𑍍𑌤॑𑌮𑌾॒ 𑌯𑌦𑍍𑌧𑍃॒𑌦𑍋-𑌽𑌸𑌿॑ । 𑌤𑌤𑍋॑ 𑌨𑍋 𑌦𑍇𑌹𑌿 𑌸𑍀𑌬𑌲𑍇 ॥ 𑌅॒𑌦𑍋 𑌗𑌿॒𑌰𑌿𑌭𑍍𑌯𑍋॒ 𑌅𑌧𑌿॒ 𑌯𑌤𑍍𑌪𑍍𑌰॒𑌧𑌾𑌵॑𑌸𑌿 । 𑌸॒𑌗𑍍​𑌮𑍍॒𑌶𑍋𑌭॑𑌮𑌾𑌨𑌾 𑌕॒𑌨𑍍𑌯𑍇॑𑌵 𑌶𑍁𑌭𑍍𑌰𑍇 ॥ 2𑍮 ॥

𑌤𑌾-𑌨𑍍𑌤𑍍𑌵𑌾॒ 𑌮𑍁𑌦𑍍𑌗॑𑌲𑌾 𑌹॒𑌵𑌿𑌷𑌾॑ 𑌵𑌰𑍍𑌧𑌯𑌨𑍍𑌤𑌿 । 𑌸𑌾 𑌨॑-𑌸𑍍𑌸𑍀𑌬𑌲𑍇 𑌰॒𑌯𑌿𑌮𑌾𑌭𑌾॑𑌜𑌯𑍇॒𑌹 ॥ 𑌪𑍂𑌰𑍍𑌵॑-𑌨𑍍𑌦𑍇𑌵𑌾॒ 𑌅𑌪॑𑌰𑍇𑌣𑌾-𑌨𑍁॒𑌪𑌶𑍍𑌯॒𑌞𑍍𑌜𑌨𑍍𑌮॑𑌭𑌿𑌃 । 𑌜𑌨𑍍𑌮𑌾॒𑌨𑍍𑌯𑌵॑𑌰𑍈𑌃॒ 𑌪𑌰𑌾॑𑌣𑌿 । 𑌵𑍇𑌦𑌾॑𑌨𑌿 𑌦𑍇𑌵𑌾 𑌅॒𑌯𑌮॒𑌸𑍍𑌮𑍀𑌤𑌿॒ 𑌮𑌾𑌮𑍍 । 𑌅॒𑌹𑌗𑍍​𑌮𑍍 𑌹𑌿॒𑌤𑍍𑌵𑌾 𑌶𑌰𑍀॑𑌰-𑌞𑍍𑌜॒𑌰𑌸𑌃॑ 𑌪॒𑌰𑌸𑍍𑌤𑌾᳚𑌤𑍍 ॥ 𑌪𑍍𑌰𑌾॒𑌣𑌾॒𑌪𑌾॒𑌨𑍌 𑌚𑌕𑍍𑌷𑍁॒-𑌶𑍍𑌶𑍍𑌰𑍋𑌤𑍍𑌰᳚𑌮𑍍 । 𑌵𑌾𑌚॒-𑌮𑍍𑌮𑌨॑𑌸𑌿॒ 𑌸𑌮𑍍𑌭𑍃॑𑌤𑌾𑌮𑍍 । 𑌹𑌿॒𑌤𑍍𑌵𑌾 𑌶𑌰𑍀॑𑌰-𑌞𑍍𑌜॒𑌰𑌸𑌃॑ 𑌪॒𑌰𑌸𑍍𑌤𑌾᳚𑌤𑍍 । 𑌆 𑌭𑍂𑌤𑌿॒-𑌮𑍍𑌭𑍂𑌤𑌿𑌂॑-𑌵𑌁॒𑌯𑌮॑𑌶𑍍𑌨𑌵𑌾𑌮𑌹𑍈 ॥ 𑌇॒𑌮𑌾 𑌏॒𑌵 𑌤𑌾 𑌉॒𑌷𑌸𑍋॒ 𑌯𑌾𑌃 𑌪𑍍𑌰॑𑌥॒𑌮𑌾 𑌵𑍍𑌯𑍌𑌚𑍍𑌛𑌨𑍍𑌨𑍍॑ । 𑌤𑌾 𑌦𑍇॒𑌵𑍍𑌯𑌃॑ 𑌕𑍁𑌰𑍍𑌵𑌤𑍇॒ 𑌪𑌞𑍍𑌚॑ 𑌰𑍂॒𑌪𑌾 । 𑌶𑌶𑍍𑌵॑𑌤𑍀॒𑌰𑍍𑌨𑌾𑌵॑𑌪𑍃𑌜𑍍𑌯𑌨𑍍𑌤𑌿 । 𑌨 𑌗॑𑌮॒𑌨𑍍𑌤𑍍𑌯𑌨𑍍𑌤᳚𑌮𑍍 ॥ 2𑍯 ॥
(𑌕॒𑌰𑍋॒ - 𑌮𑍍𑌯𑌵॑𑌰𑍍𑌤𑍍𑌯𑍈 - 𑌚𑌿 - 𑌚𑍍𑌛𑍁𑌭𑍍𑌰𑍇 - 𑌽𑌶𑍍𑌨𑌵𑌾𑌮𑌹𑍈 𑌚॒𑌤𑍍𑌵𑌾𑌰𑌿॑ 𑌚) (𑌅. 6)

2.5.𑍭 𑌉𑌪𑌹𑍋𑌮𑌾𑌃
𑌵𑌸𑍂॑𑌨𑌾॒-𑌨𑍍𑌤𑍍𑌵𑌾-𑌽𑌽𑌧𑍀॑𑌤𑍇𑌨 । 𑌰𑍁॒𑌦𑍍𑌰𑌾𑌣𑌾॑𑌮𑍂॒𑌰𑍍𑌮𑍍𑌯𑌾 । 𑌆॒𑌦𑌿॒𑌤𑍍𑌯𑌾𑌨𑌾॒-𑌨𑍍𑌤𑍇𑌜॑𑌸𑌾 । 𑌵𑌿𑌶𑍍𑌵𑍇॑𑌷𑌾-𑌨𑍍𑌦𑍇॒𑌵𑌾𑌨𑌾॒-𑌙𑍍𑌕𑍍𑌰𑌤𑍁॑𑌨𑌾 । 𑌮॒𑌰𑍁𑌤𑌾॒𑌮𑍇𑌮𑍍𑌨𑌾॑ 𑌜𑍁𑌹𑍋𑌮𑌿॒ 𑌸𑍍𑌵𑌾𑌹𑌾᳚ ॥ 𑌅॒𑌭𑌿𑌭𑍂॑𑌤𑌿-𑌰॒𑌹𑌮𑌾𑌗॑𑌮𑌮𑍍 । 𑌇𑌨𑍍𑌦𑍍𑌰॑𑌸𑌖𑌾 𑌸𑍍𑌵𑌾॒𑌯𑍁𑌧𑌃॑ । 𑌆𑌸𑍍𑌵𑌾𑌶𑌾॑𑌸𑍁 𑌦𑍁॒𑌷𑍍𑌷𑌹𑌃॑ ॥ 𑌇॒𑌦𑌂-𑌵𑌁𑌰𑍍𑌚𑍋॑ 𑌅॒𑌗𑍍𑌨𑌿𑌨𑌾॑ 𑌦॒𑌤𑍍𑌤𑌮𑌾𑌗𑌾᳚𑌤𑍍 । 𑌯𑌶𑍋॒ 𑌭𑌰𑍍𑌗॒-𑌸𑍍𑌸𑌹॒ 𑌓𑌜𑍋॒ 𑌬𑌲॑-𑌞𑍍𑌚 ॥ 30 ॥

𑌦𑍀॒𑌰𑍍𑌘𑌾॒𑌯𑍁॒𑌤𑍍𑌵𑌾𑌯॑ 𑌶॒𑌤𑌶𑌾॑𑌰𑌦𑌾𑌯 । 𑌪𑍍𑌰𑌤𑌿॑𑌗𑍃𑌭𑍍𑌣𑌾𑌮𑌿 𑌮𑌹॒𑌤𑍇 𑌵𑍀॒𑌰𑍍𑌯𑌾॑𑌯 ॥ 𑌆𑌯𑍁॑𑌰𑌸𑌿 𑌵𑌿॒𑌶𑍍𑌵𑌾𑌯𑍁॑𑌰𑌸𑌿 । 𑌸॒𑌰𑍍𑌵𑌾𑌯𑍁॑𑌰𑌸𑌿॒ 𑌸𑌰𑍍𑌵॒𑌮𑌾𑌯𑍁॑𑌰𑌸𑌿 । 𑌸𑌰𑍍𑌵॑-𑌮𑍍𑌮॒ 𑌆𑌯𑍁॑𑌰𑍍𑌭𑍂𑌯𑌾𑌤𑍍 । 𑌸𑌰𑍍𑌵॒𑌮𑌾𑌯𑍁॑𑌰𑍍𑌗𑍇𑌷𑌮𑍍 ॥ 𑌭𑍂𑌰𑍍𑌭𑍁𑌵॒-𑌸𑍍𑌸𑍁𑌵𑌃॑ ॥ 𑌅॒𑌗𑍍𑌨𑌿-𑌰𑍍𑌧𑌰𑍍𑌮𑍇॑𑌣𑌾𑌨𑍍𑌨𑌾॒𑌦𑌃 । 𑌮𑍃॒𑌤𑍍𑌯𑍁-𑌰𑍍𑌧𑌰𑍍𑌮𑍇॒𑌣𑌾𑌨𑍍𑌨॑𑌪𑌤𑌿𑌃 । 𑌬𑍍𑌰𑌹𑍍𑌮॑ 𑌕𑍍𑌷॒𑌤𑍍𑌰𑌗𑍍𑌗𑍍​ 𑌸𑍍𑌵𑌾𑌹𑌾᳚ ॥ 31 ॥

𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰𑌣𑍇॒𑌤𑌾 । 𑌬𑍃𑌹॒𑌸𑍍𑌪𑌤𑌿𑌃॑ 𑌪𑍁𑌰 𑌏॒𑌤𑌾 । 𑌯॒𑌮𑌃 𑌪𑌨𑍍𑌥𑌾𑌃᳚ । 𑌚॒𑌨𑍍𑌦𑍍𑌰𑌮𑌾𑌃᳚ 𑌪𑍁𑌨𑌰॒𑌸𑍁-𑌸𑍍𑌸𑍍𑌵𑌾𑌹𑌾᳚ ॥ 𑌅॒𑌗𑍍𑌨𑌿𑌰॑𑌨𑍍𑌨𑌾॒𑌦𑍋-𑌽𑌨𑍍𑌨॑𑌪𑌤𑌿𑌃 । 𑌅॒𑌨𑍍𑌨𑌾𑌦𑍍𑌯॑𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌸𑍋𑌮𑍋॒ 𑌰𑌾𑌜𑌾॒ 𑌰𑌾𑌜॑𑌪𑌤𑌿𑌃 । 𑌰𑌾॒𑌜𑍍𑌯𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌵𑌰𑍁॑𑌣-𑌸𑍍𑌸॒𑌮𑍍𑌰𑌾-𑌟𑍍𑌥𑍍𑌸॒𑌮𑍍𑌰𑌾𑌟𑍍𑌪॑𑌤𑌿𑌃 । 𑌸𑌾𑌮𑍍𑌰𑌾᳚𑌜𑍍𑌯𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 32 ॥

𑌮𑌿॒𑌤𑍍𑌰𑌃, 𑌕𑍍𑌷॒𑌤𑍍𑌰-𑌙𑍍𑌕𑍍𑌷॒𑌤𑍍𑌰𑌪॑𑌤𑌿𑌃 । 𑌕𑍍𑌷॒𑌤𑍍𑌰𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌇𑌨𑍍𑌦𑍍𑌰𑍋॒ 𑌬𑌲॒-𑌮𑍍𑌬𑌲॑𑌪𑌤𑌿𑌃 । 𑌬𑌲॑𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌬𑍃𑌹॒𑌸𑍍𑌪𑌤𑌿॒-𑌰𑍍𑌬𑍍𑌰𑌹𑍍𑌮॒ 𑌬𑍍𑌰𑌹𑍍𑌮॑𑌪𑌤𑌿𑌃 । 𑌬𑍍𑌰𑌹𑍍𑌮𑌾॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌸॒𑌵𑌿॒𑌤𑌾 𑌰𑌾॒𑌷𑍍𑌟𑍍𑌰𑌗𑍍​𑌮𑍍 𑌰𑌾॒𑌷𑍍𑌟𑍍𑌰𑌪॑𑌤𑌿𑌃 । 𑌰𑌾॒𑌷𑍍𑌟𑍍𑌰𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌪𑍂॒𑌷𑌾 𑌵𑌿॒𑌶𑌾𑌂-𑌵𑌿𑌁𑌟𑍍𑌪॑𑌤𑌿𑌃 । 𑌵𑌿𑌶॑𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌸𑌰॑𑌸𑍍𑌵𑌤𑍀॒ 𑌪𑍁𑌷𑍍𑌟𑌿𑌃॒ 𑌪𑍁𑌷𑍍𑌟𑌿॑𑌪𑌤𑍍𑌨𑍀 । 𑌪𑍁𑌷𑍍𑌟𑌿॑𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 𑌤𑍍𑌵𑌷𑍍𑌟𑌾॑ 𑌪𑌶𑍂॒𑌨𑌾-𑌮𑍍𑌮𑌿॑𑌥𑍁॒𑌨𑌾𑌨𑌾𑌗𑍍​𑌮𑍍॑ 𑌰𑍂𑌪॒𑌕𑍃-𑌦𑍍𑌰𑍂॒𑌪𑌪॑𑌤𑌿𑌃 । 𑌰𑍂॒𑌪𑍇𑌣𑌾॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌪॒𑌶𑍂-𑌨𑍍𑌦॑𑌦𑌾𑌤𑍁॒ 𑌸𑍍𑌵𑌾𑌹𑌾᳚ ॥ 33 ॥
(𑌚 - 𑌸𑍍𑌵𑌾𑌹𑌾॒ - 𑌸𑌾𑌮𑍍𑌰𑌾᳚𑌜𑍍𑌯𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾॒ - 𑌵𑌿𑌶॑𑌮॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌯𑌜॑𑌮𑌾𑌨𑌾𑌯 𑌦𑌦𑌾𑌤𑍁॒ 𑌸𑍍𑌵𑌾𑌹𑌾॑ 𑌚॒𑌤𑍍𑌵𑌾𑌰𑌿॑ 𑌚) (𑌅. 𑍭)

(𑌅॒𑌗𑍍𑌨𑌿-𑌸𑍍𑌸𑍋𑌮𑍋॒ 𑌵𑌰𑍁॑𑌣𑍋 𑌮𑌿॒𑌤𑍍𑌰 𑌇𑌨𑍍𑌦𑍍𑌰𑍋॒ 𑌬𑍃𑌹॒𑌸𑍍𑌪𑌤𑌿॑-𑌸𑍍𑌸𑌵𑌿॒𑌤𑌾 𑌪𑍂॒𑌷𑌾 𑌸𑌰𑌸𑍍𑌵𑌤𑍀॒ 𑌤𑍍𑌵𑌷𑍍𑌟𑌾॒ 𑌦𑌶॑)

2.5.𑍮 𑌉𑌪𑌹𑍋𑌮𑌾𑌃
𑌸 𑌈᳚-𑌮𑍍𑌪𑌾𑌹𑌿॒ 𑌯 𑌋॑𑌜𑍀॒𑌷𑍀 𑌤𑌰𑍁॑𑌤𑍍𑌰𑌃 । 𑌯-𑌶𑍍𑌶𑌿𑌪𑍍𑌰॑𑌵𑌾𑌨𑍍 𑌵𑍃𑌷॒𑌭𑍋 𑌯𑍋 𑌮॑𑌤𑍀॒𑌨𑌾𑌮𑍍 । 𑌯𑍋 𑌗𑍋᳚𑌤𑍍𑌰॒𑌭𑌿-𑌦𑍍𑌵॑𑌜𑍍𑌰॒𑌭𑍃𑌦𑍍𑌯𑍋 𑌹॑𑌰𑌿॒𑌷𑍍𑌠𑌾𑌃 । 𑌸 𑌇॑𑌨𑍍𑌦𑍍𑌰 𑌚𑌿॒𑌤𑍍𑌰𑌾𑌗𑍍​𑌮𑍍 𑌅॒𑌭𑌿𑌤𑍃॑𑌨𑍍𑌧𑌿॒ 𑌵𑌾𑌜𑌾𑌨𑍍॑ ॥ 𑌆 𑌤𑍇॒ 𑌶𑍁𑌷𑍍𑌮𑍋॑ 𑌵𑍃𑌷॒𑌭 𑌏॑𑌤𑍁 𑌪॒𑌶𑍍𑌚𑌾𑌤𑍍 । 𑌓𑌤𑍍𑌤॒𑌰𑌾𑌦॑𑌧॒𑌰𑌾𑌗𑌾 𑌪𑍁॒𑌰𑌸𑍍𑌤𑌾᳚𑌤𑍍 । 𑌆 𑌵𑌿॒𑌶𑍍𑌵𑌤𑍋॑ 𑌅॒𑌭𑌿 𑌸𑌮𑍇᳚𑌤𑍍𑌵॒𑌰𑍍𑌵𑌾𑌮𑍍 । 𑌇𑌨𑍍𑌦𑍍𑌰॑ 𑌦𑍍𑌯𑍁॒𑌮𑍍𑌨𑌗𑍍​𑌮𑍍 𑌸𑍁𑌵॑𑌰𑍍𑌵𑌦𑍍𑌧𑍇𑌹𑍍𑌯॒𑌸𑍍𑌮𑍇 ॥ 𑌪𑍍𑌰𑍋𑌷𑍍𑌵॑𑌸𑍍𑌮𑍈 𑌪𑍁𑌰𑍋𑌰॒𑌥𑌮𑍍 । 𑌇𑌨𑍍𑌦𑍍𑌰𑌾॑𑌯 𑌶𑍂॒𑌷𑌮॑𑌰𑍍𑌚𑌤 ॥ 34 ॥

𑌅॒𑌭𑍀𑌕𑍇॑ 𑌚𑌿𑌦𑍁 𑌲𑍋𑌕॒𑌕𑍃𑌤𑍍 । 𑌸॒𑌙𑍍𑌗𑍇 𑌸॒𑌮𑌥𑍍𑌸𑍁॑ 𑌵𑍃𑌤𑍍𑌰॒𑌹𑌾 । 𑌅॒𑌸𑍍𑌮𑌾𑌕॑-𑌮𑍍𑌬𑍋𑌧𑌿 𑌚𑍋𑌦𑌿॒𑌤𑌾 । 𑌨𑌭॑𑌨𑍍𑌤𑌾-𑌮𑌨𑍍𑌯॒𑌕𑍇𑌷𑌾᳚𑌮𑍍 । 𑌜𑍍𑌯𑌾॒𑌕𑌾 𑌅𑌧𑌿॒ 𑌧𑌨𑍍𑌵॑𑌸𑍁 ॥ 𑌇𑌨𑍍𑌦𑍍𑌰𑌂॑-𑌵𑌁॒𑌯𑌗𑍍​𑌮𑍍 𑌶𑍁॑𑌨𑌾॒𑌸𑍀𑌰᳚𑌮𑍍 । 𑌅॒𑌸𑍍𑌮𑌿𑌨𑍍. 𑌯॒𑌜𑍍𑌞𑍇 𑌹॑𑌵𑌾𑌮𑌹𑍇 । 𑌆𑌵𑌾𑌜𑍈॒𑌰𑍁𑌪॑ 𑌨𑍋 𑌗𑌮𑌤𑍍 ॥ 𑌇𑌨𑍍𑌦𑍍𑌰𑌾॑𑌯॒ 𑌶𑍁𑌨𑌾॒𑌸𑍀𑌰𑌾॑𑌯 । 𑌸𑍍𑌰𑍁॒𑌚𑌾 𑌜𑍁॑𑌹𑍁𑌤 𑌨𑍋 𑌹॒𑌵𑌿𑌃 ॥ 35 ॥

𑌜𑍁॒𑌷𑌤𑌾॒-𑌮𑍍𑌪𑍍𑌰𑌤𑌿॒ 𑌮𑍇𑌧𑌿॑𑌰𑌃 ॥ 𑌪𑍍𑌰 𑌹॒𑌵𑍍𑌯𑌾𑌨𑌿॑ 𑌘𑍃॒𑌤𑌵॑𑌨𑍍𑌤𑍍𑌯𑌸𑍍𑌮𑍈 । 𑌹𑌰𑍍𑌯॑𑌶𑍍𑌵𑌾𑌯 𑌭𑌰𑌤𑌾 𑌸॒𑌜𑍋𑌷𑌾𑌃᳚ । 𑌇𑌨𑍍𑌦𑍍𑌰॒𑌰𑍍𑌤𑍁𑌭𑌿॒-𑌰𑍍𑌬𑍍𑌰𑌹𑍍𑌮॑𑌣𑌾 𑌵𑌾𑌵𑍃𑌧𑌾॒𑌨𑌃 । 𑌶𑍁॒𑌨𑌾॒𑌸𑍀॒𑌰𑍀 𑌹॒𑌵𑌿𑌰𑌿॒𑌦-𑌞𑍍𑌜𑍁॑𑌷𑌸𑍍𑌵 ॥ 𑌵𑌯॑-𑌸𑍍𑌸𑍁𑌪॒𑌰𑍍𑌣𑌾 𑌉𑌪॑𑌸𑍇𑌦𑍁॒𑌰𑌿𑌨𑍍𑌦𑍍𑌰᳚𑌮𑍍 । 𑌪𑍍𑌰𑌿॒𑌯𑌮𑍇॑𑌧𑌾॒ 𑌋𑌷॑𑌯𑍋॒ 𑌨𑌾𑌧॑𑌮𑌾𑌨𑌾𑌃 । 𑌅𑌪॑ 𑌧𑍍𑌵𑌾॒𑌨𑍍𑌤𑌮𑍂᳚𑌰𑍍𑌣𑍁॒𑌹𑌿 𑌪𑍂॒𑌰𑍍𑌧𑌿 𑌚𑌕𑍍𑌷𑍁𑌃॑ । 𑌮𑍁॒𑌮𑍁॒𑌗𑍍𑌧𑍍𑌯॑𑌸𑍍𑌮𑌾-𑌨𑍍𑌨𑌿॒𑌧𑌯𑍇॑𑌵 𑌬॒𑌦𑍍𑌧𑌾𑌨𑍍 ॥ 𑌬𑍃॒𑌹𑌦𑌿𑌨𑍍𑌦𑍍𑌰𑌾॑𑌯 𑌗𑌾𑌯𑌤 ॥ 36 ॥

𑌮𑌰𑍁॑𑌤𑍋 𑌵𑍃𑌤𑍍𑌰॒𑌹𑌨𑍍𑌤॑𑌮𑌮𑍍 । 𑌯𑍇𑌨॒ 𑌜𑍍𑌯𑍋𑌤𑌿॒-𑌰𑌜॑𑌨𑌯𑌨𑍍𑌨𑍃𑌤𑌾॒𑌵𑍃𑌧𑌃॑ । 𑌦𑍇॒𑌵-𑌨𑍍𑌦𑍇॒𑌵𑌾𑌯॒ 𑌜𑌾𑌗𑍃॑𑌵𑌿 ॥ 𑌕𑌾 𑌮𑌿॒𑌹𑍈𑌕𑌾𑌃॒ 𑌕 𑌇॒𑌮𑍇 𑌪॑𑌤॒𑌙𑍍𑌗𑌾𑌃 । 𑌮𑌾॒𑌨𑍍𑌥𑌾॒𑌲𑌾𑌃 𑌕𑍁𑌲𑌿॒ 𑌪𑌰𑌿॑ 𑌮𑌾 𑌪𑌤𑌨𑍍𑌤𑌿 । 𑌅𑌨𑌾॑𑌵𑍃𑌤𑍈𑌨𑌾॒𑌨𑍍-𑌪𑍍𑌰𑌧॑𑌮𑌨𑍍𑌤𑍁 𑌦𑍇॒𑌵𑌾𑌃 । 𑌸𑍌𑌪॑𑌰𑍍𑌣॒-𑌞𑍍𑌚𑌕𑍍𑌷𑍁॑𑌸𑍍𑌤॒𑌨𑍁𑌵𑌾॑ 𑌵𑌿𑌦𑍇𑌯 ॥ 𑌏॒𑌵𑌾 𑌵॑𑌨𑍍𑌦𑌸𑍍𑌵॒ 𑌵𑌰𑍁॑𑌣-𑌮𑍍𑌬𑍃॒𑌹𑌨𑍍𑌤᳚𑌮𑍍 । 𑌨॒𑌮॒𑌸𑍍𑌯𑌾 𑌧𑍀𑌰॑𑌮॒𑌮𑍃𑌤॑𑌸𑍍𑌯 𑌗𑍋॒𑌪𑌾𑌮𑍍 । 𑌸 𑌨॒-𑌶𑍍𑌶𑌰𑍍𑌮॑ 𑌤𑍍𑌰𑌿॒𑌵𑌰𑍂॑𑌥𑌂॒-𑌵𑌿𑌁𑌯𑌗𑍍​𑌮𑍍॑𑌸𑌤𑍍 ॥ 3𑍭 ॥

𑌯𑍂॒𑌯-𑌮𑍍𑌪𑌾॑𑌤 𑌸𑍍𑌵॒𑌸𑍍𑌤𑌿𑌭𑌿॒-𑌸𑍍𑌸𑌦𑌾॑ 𑌨𑌃 ॥ 𑌨𑌾𑌕𑍇॑ 𑌸𑍁𑌪॒𑌰𑍍𑌣𑌮𑍁𑌪॒ 𑌯𑌤𑍍-𑌪𑌤॑𑌨𑍍𑌤𑌮𑍍 । 𑌹𑍃॒𑌦𑌾 𑌵𑍇𑌨॑𑌨𑍍𑌤𑍋 𑌅॒𑌭𑍍𑌯𑌚॑𑌕𑍍𑌷𑌤 𑌤𑍍𑌵𑌾 । 𑌹𑌿𑌰॑𑌣𑍍𑌯𑌪𑌕𑍍𑌷𑌂॒-𑌵𑌁𑌰𑍁॑𑌣𑌸𑍍𑌯 𑌦𑍂॒𑌤𑌮𑍍 । 𑌯॒𑌮𑌸𑍍𑌯॒ 𑌯𑍋𑌨𑍌॑ 𑌶𑌕𑍁॒𑌨-𑌮𑍍𑌭𑍁॑𑌰॒𑌣𑍍𑌯𑍁𑌮𑍍 ॥ 𑌶-𑌨𑍍𑌨𑍋॑ 𑌦𑍇॒𑌵𑍀𑌰॒𑌭𑌿𑌷𑍍𑌟॑𑌯𑍇 । 𑌆𑌪𑍋॑ 𑌭𑌵𑌨𑍍𑌤𑍁 𑌪𑍀॒𑌤𑌯𑍇᳚ । 𑌶𑌂-𑌯𑍋𑌁𑌰॒𑌭𑌿𑌸𑍍𑌰॑𑌵𑌨𑍍𑌤𑍁 𑌨𑌃 ॥ 𑌈𑌶𑌾॑𑌨𑌾॒ 𑌵𑌾𑌰𑍍𑌯𑌾॑𑌣𑌾𑌮𑍍 । 𑌕𑍍𑌷𑌯॑𑌨𑍍𑌤𑍀-𑌶𑍍𑌚𑌰𑍍​𑌷𑌣𑍀॒𑌨𑌾𑌮𑍍 ॥ 3𑍮 ॥

𑌅॒𑌪𑍋 𑌯𑌾॑𑌚𑌾𑌮𑌿 𑌭𑍇𑌷॒𑌜𑌮𑍍 ॥ 𑌅॒𑌫𑍍𑌸𑍁 𑌮𑍇॒ 𑌸𑍋𑌮𑍋॑ 𑌅𑌬𑍍𑌰𑌵𑍀𑌤𑍍 । 𑌅॒𑌨𑍍𑌤-𑌰𑍍𑌵𑌿𑌶𑍍𑌵𑌾॑𑌨𑌿 𑌭𑍇𑌷॒𑌜𑌾 । 𑌅॒𑌗𑍍𑌨𑌿-𑌞𑍍𑌚॑ 𑌵𑌿॒𑌶𑍍𑌵𑌶॑𑌮𑍍𑌭𑍁𑌵𑌮𑍍 । 𑌆𑌪॑𑌶𑍍𑌚 𑌵𑌿॒𑌶𑍍𑌵𑌭𑍇॑𑌷𑌜𑍀𑌃 ॥ 𑌯𑌦॒𑌫𑍍𑌸𑍁 𑌤𑍇॑ 𑌸𑌰𑌸𑍍𑌵𑌤𑌿 । 𑌗𑍋𑌷𑍍𑌵𑌶𑍍𑌵𑍇॑𑌷𑍁॒ 𑌯𑌨𑍍𑌮𑌧𑍁॑ । 𑌤𑍇𑌨॑ 𑌮𑍇 𑌵𑌾𑌜𑌿𑌨𑍀𑌵𑌤𑌿 । 𑌮𑍁𑌖॑𑌮𑌙𑍍𑌗𑍍𑌧𑌿 𑌸𑌰𑌸𑍍𑌵𑌤𑌿 ॥ 𑌯𑌾 𑌸𑌰॑𑌸𑍍𑌵𑌤𑍀 𑌵𑍈𑌶𑌮𑍍𑌭॒𑌲𑍍𑌯𑌾 ॥ 3𑍯 ॥

𑌤𑌸𑍍𑌯𑌾᳚-𑌮𑍍𑌮𑍇 𑌰𑌾𑌸𑍍𑌵 । 𑌤𑌸𑍍𑌯𑌾᳚𑌸𑍍𑌤𑍇 𑌭𑌕𑍍𑌷𑍀𑌯 । 𑌤𑌸𑍍𑌯𑌾᳚𑌸𑍍𑌤𑍇 𑌭𑍂𑌯𑌿𑌷𑍍𑌠॒𑌭𑌾𑌜𑍋॑ 𑌭𑍂𑌯𑌾𑌸𑍍𑌮 ॥ 𑌅॒𑌹-𑌨𑍍𑌤𑍍𑌵𑌦॑𑌸𑍍𑌮𑌿॒ 𑌮𑌦॑𑌸𑌿॒ 𑌤𑍍𑌵𑌮𑍇॒𑌤𑌤𑍍 । 𑌮𑌮𑌾॑𑌸𑌿॒ 𑌯𑍋𑌨𑌿॒𑌸𑍍𑌤𑌵॒ 𑌯𑍋𑌨𑌿॑𑌰𑌸𑍍𑌮𑌿 । 𑌮𑌮𑍇॒𑌵 𑌸𑌨𑍍𑌵𑌹॑ 𑌹॒𑌵𑍍𑌯𑌾𑌨𑍍𑌯॑𑌗𑍍𑌨𑍇 । 𑌪𑍁॒𑌤𑍍𑌰𑌃 𑌪𑌿॒𑌤𑍍𑌰𑍇 𑌲𑍋॑𑌕॒𑌕𑍃𑌜𑍍𑌜𑌾॑𑌤𑌵𑍇𑌦𑌃 ॥ 𑌇॒𑌹𑍈𑌵 𑌸𑌨𑍍𑌤𑌤𑍍𑌰॒ 𑌸𑌨𑍍𑌤॑-𑌨𑍍𑌤𑍍𑌵𑌾 𑌽𑌗𑍍𑌨𑍇 । 𑌪𑍍𑌰𑌾॒𑌣𑍇𑌨॑ 𑌵𑌾॒𑌚𑌾 𑌮𑌨॑𑌸𑌾 𑌬𑌿𑌭𑌰𑍍𑌮𑌿 । 𑌤𑌿॒𑌰𑍋 𑌮𑌾॒ 𑌸𑌨𑍍𑌤॒𑌮𑌾𑌯𑍁॒𑌰𑍍𑌮𑌾 𑌪𑍍𑌰𑌹𑌾॑𑌸𑍀𑌤𑍍 ॥ 40 ॥

𑌜𑍍𑌯𑍋𑌤𑌿॑𑌷𑌾 𑌤𑍍𑌵𑌾 𑌵𑍈𑌶𑍍𑌵𑌾𑌨॒𑌰𑍇𑌣𑍋𑌪॑𑌤𑌿𑌷𑍍𑌠𑍇 ॥ 𑌅॒𑌯-𑌨𑍍𑌤𑍇॒ 𑌯𑍋𑌨𑌿॑𑌰𑍍-𑌋॒𑌤𑍍𑌵𑌿𑌯𑌃॑ । 𑌯𑌤𑍋॑ 𑌜𑌾॒𑌤𑍋 𑌅𑌰𑍋॑𑌚𑌥𑌾𑌃 । 𑌤-𑌞𑍍𑌜𑌾॒𑌨𑌨𑍍𑌨॑𑌗𑍍𑌨॒ 𑌆𑌰𑍋॑𑌹 । 𑌅𑌥𑌾॑ 𑌨𑍋 𑌵𑌰𑍍𑌧𑌯𑌾 𑌰॒𑌯𑌿𑌮𑍍 ॥ 𑌯𑌾 𑌤𑍇॑ 𑌅𑌗𑍍𑌨𑍇 𑌯॒𑌜𑍍𑌞𑌿𑌯𑌾॑ 𑌤॒𑌨𑍂𑌸𑍍𑌤𑌯𑍇-𑌹𑍍𑌯𑌾𑌰𑍋॑𑌹𑌾॒𑌤𑍍𑌮𑌾-𑌽𑌽𑌤𑍍𑌮𑌾𑌨᳚𑌮𑍍 । 𑌅𑌚𑍍𑌛𑌾॒ 𑌵𑌸𑍂॑𑌨𑌿 𑌕𑍃॒𑌣𑍍𑌵𑌨𑍍𑌨॒𑌸𑍍𑌮𑍇 𑌨𑌰𑍍𑌯𑌾॑ 𑌪𑍁॒𑌰𑍂𑌣𑌿॑ । 𑌯॒𑌜𑍍𑌞𑍋 𑌭𑍂॒𑌤𑍍𑌵𑌾 𑌯॒𑌜𑍍𑌞𑌮𑌾𑌸𑍀॑𑌦॒ 𑌸𑍍𑌵𑌾𑌂-𑌯𑍋𑌁𑌨𑌿᳚𑌮𑍍 । 𑌜𑌾𑌤॑𑌵𑍇𑌦𑍋॒ 𑌭𑍁𑌵॒ 𑌆𑌜𑌾𑌯॑𑌮𑌾𑌨॒-𑌸𑍍𑌸𑌕𑍍𑌷॑𑌯॒ 𑌏𑌹𑌿॑ ॥ 𑌉॒𑌪𑌾𑌵॑𑌰𑍋𑌹 𑌜𑌾𑌤𑌵𑍇𑌦𑌃॒ 𑌪𑍁𑌨॒𑌸𑍍𑌤𑍍𑌵𑌮𑍍 ॥ 41 ॥

𑌦𑍇॒𑌵𑍇𑌭𑍍𑌯𑍋॑ 𑌹॒𑌵𑍍𑌯𑌂-𑌵𑌁॑𑌹 𑌨𑌃 𑌪𑍍𑌰𑌜𑌾॒𑌨𑌨𑍍𑌨𑍍 । 𑌆𑌯𑍁𑌃॑ 𑌪𑍍𑌰॒𑌜𑌾𑌗𑍍​𑌮𑍍 𑌰॒𑌯𑌿𑌮॒𑌸𑍍𑌮𑌾𑌸𑍁॑ 𑌧𑍇𑌹𑌿 । 𑌅𑌜॑𑌸𑍍𑌰𑍋 𑌦𑍀𑌦𑌿𑌹𑌿 𑌨𑍋 𑌦𑍁𑌰𑍋॒𑌣𑍇 ॥ 𑌤𑌮𑌿𑌨𑍍𑌦𑍍𑌰॑-𑌞𑍍𑌜𑍋𑌹𑌵𑍀𑌮𑌿 𑌮॒𑌘𑌵𑌾॑𑌨𑌮𑍁॒𑌗𑍍𑌰𑌮𑍍 । 𑌸॒𑌤𑍍𑌰𑌾𑌦𑌧𑌾॑𑌨॒-𑌮𑌪𑍍𑌰॑𑌤𑌿𑌷𑍍𑌕𑍁𑌤॒𑌗𑍍​𑌮𑍍॒ 𑌶𑌵𑌾𑌗𑍍​𑌮𑍍॑𑌸𑌿 । 𑌮𑌗𑍍​𑌮𑍍𑌹𑌿॑𑌷𑍍𑌠𑍋 𑌗𑍀॒𑌰𑍍𑌭𑌿𑌰𑌾 𑌚॑ 𑌯॒𑌜𑍍𑌞𑌿𑌯𑍋॑ 𑌽𑌵॒𑌵𑌰𑍍𑌤॑𑌤𑍍 । 𑌰𑌾॒𑌯𑍇 𑌨𑍋॒ 𑌵𑌿𑌶𑍍𑌵𑌾॑ 𑌸𑍁॒𑌪𑌥𑌾॑ 𑌕𑍃𑌣𑍋𑌤𑍁 𑌵॒𑌜𑍍𑌰𑍀 ॥ 𑌤𑍍𑌰𑌿𑌕॑𑌦𑍍𑌰𑍁𑌕𑍇𑌷𑍁 𑌮𑌹𑌿॒𑌷𑍋 𑌯𑌵𑌾॑𑌶𑌿𑌰-𑌨𑍍𑌤𑍁𑌵𑌿॒𑌶𑍁𑌷𑍍𑌮॑𑌸𑍍𑌤𑍃॒𑌪𑌤𑍍 । 𑌸𑍋𑌮॑𑌮𑌪𑌿𑌬॒-𑌦𑍍𑌵𑌿𑌷𑍍𑌣𑍁॑𑌨𑌾 𑌸𑍁॒𑌤𑌂-𑌯𑌁𑌥𑌾𑌵॑𑌶𑌤𑍍 । 𑌸 𑌈᳚-𑌮𑍍𑌮𑌮𑌾𑌦॒ 𑌮𑌹𑌿॒ 𑌕𑌰𑍍𑌮॒ 𑌕𑌰𑍍𑌤॑𑌵𑍇 𑌮॒𑌹𑌾𑌮𑍁॒𑌰𑍁𑌮𑍍 ॥ 42 ॥

𑌸𑍈𑌨𑌗𑍍​𑌮𑍍॑ 𑌸𑌶𑍍𑌚-𑌦𑍍𑌦𑍇॒𑌵-𑌨𑍍𑌦𑍇॒𑌵-𑌸𑍍𑌸॒𑌤𑍍𑌯𑌮𑌿𑌨𑍍𑌦𑍁𑌗𑍍​𑌮𑍍॑ 𑌸॒𑌤𑍍𑌯 𑌇𑌨𑍍𑌦𑍍𑌰𑌃॑ ॥ 𑌵𑌿॒𑌦𑌦𑍍𑌯𑌤𑍀॑ 𑌸॒𑌰𑌮𑌾॑ 𑌰𑍁॒𑌗𑍍𑌣𑌮𑌦𑍍𑌰𑍇𑌃᳚ । 𑌮𑌹𑌿॒ 𑌪𑌾𑌥𑌃॑ 𑌪𑍂॒𑌰𑍍𑌵𑍍𑌯𑌗𑍍​𑌮𑍍 𑌸॒𑌦𑍍𑌧𑍍𑌰𑌿𑌯॑𑌕𑍍𑌕𑌃 । 𑌅𑌗𑍍𑌰॑-𑌨𑍍𑌨𑌯-𑌥𑍍𑌸𑍁॒𑌪𑌦𑍍𑌯𑌕𑍍𑌷॑𑌰𑌾𑌣𑌾𑌮𑍍 । 𑌅𑌚𑍍𑌛𑌾॒ 𑌰𑌵॑-𑌮𑍍𑌪𑍍𑌰𑌥॒𑌮𑌾 𑌜𑌾॑𑌨॒𑌤𑍀 𑌗𑌾᳚𑌤𑍍 ॥ 𑌵𑌿॒𑌦-𑌦𑍍𑌗𑌵𑍍𑌯𑌗𑍍​𑌮𑍍॑ 𑌸॒𑌰𑌮𑌾॑ 𑌦𑍃॒𑌢𑌮𑍂॒𑌰𑍍𑌵𑌮𑍍 । 𑌯𑍇𑌨𑌾॒ 𑌨𑍁𑌕॒-𑌮𑍍𑌮𑌾𑌨𑍁॑𑌷𑍀॒ 𑌭𑍋𑌜॑𑌤𑍇॒ 𑌵𑌿𑌟𑍍 । 𑌆 𑌯𑍇 𑌵𑌿𑌶𑍍𑌵𑌾᳚ 𑌸𑍍𑌵𑌪॒𑌤𑍍𑌯𑌾𑌨𑌿॑ 𑌚॒𑌕𑍍𑌰𑍁𑌃 । 𑌕𑍃॒𑌣𑍍𑌵𑌾॒𑌨𑌾𑌸𑍋॑ 𑌅𑌮𑍃𑌤॒𑌤𑍍𑌵𑌾𑌯॑ 𑌗𑌾॒𑌤𑍁𑌮𑍍 ॥ 𑌤𑍍𑌵-𑌨𑍍𑌨𑍃𑌭𑌿॑𑌰𑍍𑌨𑍃𑌪𑌤𑍇 𑌦𑍇॒𑌵𑌹𑍂॑𑌤𑍌 ॥ 43 ॥

𑌭𑍂𑌰𑍀॑𑌣𑌿 𑌵𑍃॒𑌤𑍍𑌵𑌾 𑌹॑𑌰𑍍𑌯𑌶𑍍𑌵 𑌹𑌗𑍍​𑌮𑍍𑌸𑌿 । 𑌤𑍍𑌵-𑌨𑍍𑌨𑌿𑌦॑𑌸𑍍𑌯𑍁॒-𑌞𑍍𑌚𑍁𑌮𑍁॑𑌰𑌿𑌮𑍍 । 𑌧𑍁𑌨𑌿॒-𑌞𑍍𑌚𑌾𑌸𑍍𑌵𑌾॑𑌪𑌯𑍋 𑌦॒𑌭𑍀𑌤॑𑌯𑍇 𑌸𑍁॒𑌹𑌨𑍍𑌤𑍁॑ ॥ 𑌏॒𑌵𑌾 𑌪𑌾॑𑌹𑌿 𑌪𑍍𑌰॒𑌤𑍍𑌨𑌥𑌾॒ 𑌮𑌨𑍍𑌦॑𑌤𑍁 𑌤𑍍𑌵𑌾 । 𑌶𑍍𑌰𑍁॒𑌧𑌿 𑌬𑍍𑌰𑌹𑍍𑌮॑ 𑌵𑌾𑌵𑍃𑌧𑌸𑍍𑌵𑍋॒𑌤 𑌗𑍀॒𑌰𑍍𑌭𑌿𑌃 । 𑌆॒𑌵𑌿-𑌸𑍍𑌸𑍂𑌰𑍍𑌯॑-𑌙𑍍𑌕𑍃𑌣𑍁॒𑌹𑌿 𑌪𑍀॒𑌪𑌿𑌹𑍀॒𑌷𑌃 । 𑌜॒𑌹𑌿 𑌶𑌤𑍍𑌰𑍂𑌗𑍍​𑌮𑍍॑𑌰॒𑌭𑌿 𑌗𑌾 𑌇॑𑌨𑍍𑌦𑍍𑌰 𑌤𑍃𑌨𑍍𑌧𑌿 ॥ 𑌅𑌗𑍍𑌨𑍇॒ 𑌬𑌾𑌧॑𑌸𑍍𑌵॒ 𑌵𑌿𑌮𑍃𑌧𑍋॑ 𑌨𑍁𑌦𑌸𑍍𑌵 । 𑌅𑌪𑌾𑌮𑍀॑𑌵𑌾॒ 𑌅𑌪॒ 𑌰𑌕𑍍𑌷𑌾𑌗𑍍​𑌮𑍍॑𑌸𑌿 𑌸𑍇𑌧 । 𑌅॒𑌸𑍍𑌮𑌾-𑌥𑍍𑌸॑𑌮𑍁॒𑌦𑍍𑌰𑌾-𑌦𑍍𑌬𑍃॑𑌹॒𑌤𑍋 𑌦𑌿॒𑌵𑍋 𑌨𑌃॑ ॥ 44 ॥

𑌅॒𑌪𑌾-𑌮𑍍𑌭𑍂॒𑌮𑌾𑌨॒𑌮𑍁𑌪॑ 𑌨-𑌸𑍍𑌸𑍃𑌜𑍇॒𑌹 ॥ 𑌯𑌜𑍍𑌞॒ 𑌪𑍍𑌰𑌤𑌿॑𑌤𑌿𑌷𑍍𑌠 𑌸𑍁𑌮॒𑌤𑍌 𑌸𑍁॒𑌶𑍇𑌵𑌾॒ 𑌆 𑌤𑍍𑌵𑌾᳚ । 𑌵𑌸𑍂॑𑌨𑌿 𑌪𑍁𑌰𑍁॒𑌧𑌾 𑌵𑌿॑𑌶𑌨𑍍𑌤𑍁 । 𑌦𑍀॒𑌰𑍍𑌘𑌮𑌾𑌯𑍁॒-𑌰𑍍𑌯𑌜॑𑌮𑌾𑌨𑌾𑌯 𑌕𑍃॒𑌣𑍍𑌵𑌨𑍍𑌨𑍍 । 𑌅𑌥𑌾॒𑌮𑍃𑌤𑍇॑𑌨 𑌜𑌰𑌿॒𑌤𑌾𑌰॑𑌮𑌙𑍍𑌗𑍍𑌧𑌿 ॥ 𑌇𑌨𑍍𑌦𑍍𑌰॑-𑌶𑍍𑌶𑍁॒𑌨𑌾𑌵॒-𑌦𑍍𑌵𑌿𑌤॑𑌨𑍋𑌤𑌿॒ 𑌸𑍀𑌰᳚𑌮𑍍 । 𑌸𑌂॒​𑌵𑌁॒𑌥𑍍𑌸॒𑌰𑌸𑍍𑌯॑ 𑌪𑍍𑌰𑌤𑌿॒𑌮𑌾𑌣॑𑌮𑍇॒𑌤𑌤𑍍 । 𑌅॒𑌰𑍍𑌕𑌸𑍍𑌯॒ 𑌜𑍍𑌯𑍋𑌤𑌿॒𑌸𑍍𑌤𑌦𑌿𑌦𑌾॑𑌸॒ 𑌜𑍍𑌯𑍇𑌷𑍍𑌠᳚𑌮𑍍 । 𑌸𑌂॒​𑌵𑌁॒𑌥𑍍𑌸॒𑌰𑌗𑍍​𑌮𑍍 𑌶𑍁॒𑌨𑌵॒𑌥𑍍𑌸𑍀𑌰॑𑌮𑍇॒𑌤𑌤𑍍 ॥ 𑌇𑌨𑍍𑌦𑍍𑌰॑𑌸𑍍𑌯॒ 𑌰𑌾𑌧𑌃॒ 𑌪𑍍𑌰𑌯॑𑌤-𑌮𑍍𑌪𑍁॒𑌰𑍁 𑌤𑍍𑌮𑌨𑌾᳚ । 𑌤𑌦॑𑌰𑍍𑌕𑌰𑍂॒𑌪𑌂-𑌵𑌿𑌁॒𑌮𑌿𑌮𑌾॑𑌨𑌮𑍇𑌤𑌿 । 𑌦𑍍𑌵𑌾𑌦॑𑌶𑌾𑌰𑍇॒ 𑌪𑍍𑌰𑌤𑌿॑𑌤𑌿𑌷𑍍𑌠॒𑌤𑍀-𑌦𑍍𑌵𑍃𑌷𑌾᳚ ॥ 𑌅॒𑌶𑍍𑌵𑌾॒𑌯𑌨𑍍𑌤𑍋॑ 𑌗॒𑌵𑍍𑌯𑌨𑍍𑌤𑍋॑ 𑌵𑌾॒𑌜𑌯॑𑌨𑍍𑌤𑌃 । 𑌹𑌵𑌾॑𑌮𑌹𑍇॒ 𑌤𑍍𑌵𑍋𑌪॑𑌗𑌨𑍍𑌤॒ 𑌵𑌾 𑌉॑ । 𑌆॒𑌭𑍂𑌷॑𑌨𑍍𑌤𑌸𑍍𑌤𑍍𑌵𑌾 𑌸𑍁𑌮॒𑌤𑍌 𑌨𑌵𑌾॑𑌯𑌾𑌮𑍍 । 𑌵॒𑌯𑌮𑌿॑𑌨𑍍𑌦𑍍𑌰 𑌤𑍍𑌵𑌾 𑌶𑍁॒𑌨𑌗𑍍​𑌮𑍍 𑌹𑍁॑𑌵𑍇𑌮 ॥ 45 ॥
(𑌅॒𑌰𑍍𑌚॒𑌤॒ - 𑌹॒𑌵𑌿--𑌰𑍍 𑌗𑌾॑𑌯𑌤 - 𑌯𑌗𑍍​𑌮𑍍𑌸𑌚𑍍 - 𑌚𑌰𑍍​𑌷𑌣𑍀॒𑌨𑌾𑌂 - 𑌁𑌵𑍈॑𑌶𑌮𑍍𑌭॒𑌲𑍍𑌯𑌾 - 𑌹𑌾॑𑌸𑍀॒𑌤𑍍 - 𑌤𑍍𑌵 - 𑌮𑍁॒𑌰𑍁𑌂 - 𑌦𑍇॒𑌵𑌹𑍂॑𑌤𑍌 - 𑌨𑌃॒ - 𑌤𑍍𑌮𑌨𑌾॒ 𑌷𑌟𑍍 𑌚॑) (𑌅. 𑍮)

(𑌪𑍍𑌰𑌾॒𑌣 - 𑌉॒𑌦𑍇𑌹𑌿॒ - 𑌪𑍁𑌨॑𑌰𑍍𑌨॒ - 𑌆 𑌨𑍋॑ 𑌭𑌰 - 𑌯॒𑌜𑍍𑌞𑍋 𑌰𑌾॒𑌯𑍋 - 𑌵𑌾𑌰𑍍𑌤𑍍𑌰॑𑌹𑌤𑍍𑌯𑌾𑌯॒ - 𑌵𑌸𑍂॑𑌨𑌾॒𑌗𑍍​𑌮𑍍॒ - 𑌸 𑌈॑-𑌮𑍍𑌪𑌾𑌹𑍍𑌯॒ 𑌷𑍍𑌟𑍌)

(𑌪𑍍𑌰𑌾॒𑌣𑍋 𑌰॑𑌕𑍍𑌷॒ - 𑌤𑍍𑌯𑌗𑍃॑𑌭𑍀𑌤𑌾 - 𑌧𑌾𑌰𑌾𑌵॒𑌰𑌾 𑌮॒𑌰𑍁𑌤𑍋॑ - 𑌦𑍀𑌰𑍍𑌘𑌾𑌯𑍁॒𑌤𑍍𑌵𑌾𑌯॒ - 𑌜𑍍𑌯𑍋𑌤𑌿॑𑌷𑌾 𑌤𑍍𑌵𑌾॒ 𑌪𑌞𑍍𑌚॑𑌚𑌤𑍍𑌵𑌾𑌰𑌿𑌗𑍍​𑌮𑍍𑌶𑌤𑍍 )

(𑌪𑍍𑌰𑌾॒𑌣𑌃 - 𑌶𑍁॒𑌨𑌗𑍍​𑌮𑍍 𑌹𑍁॑𑌵𑍇𑌮)

॥ 𑌹𑌰𑌿𑌃॑ 𑌓𑌮𑍍 ॥

॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌪𑌞𑍍𑌚𑌮𑌃 𑌪𑍍𑌰𑌪𑌾𑌠𑌕-𑌸𑍍𑌸𑌮𑌾𑌪𑍍𑌤𑌃 ॥