અસ્ય શ્રીશીતલાસ્તોત્રસ્ય મહાદેવ ઋષિઃ અનુષ્ટુપ્ છંદઃ શીતલા દેવતા લક્ષ્મીર્બીજં ભવાની શક્તિઃ સર્વવિસ્ફોટકનિવૃત્યર્થે જપે વિનિયોગઃ ॥
ઈશ્વર ઉવાચ ।
વંદેઽહં શીતલાં દેવીં રાસભસ્થાં દિગંબરામ્ ।
માર્જનીકલશોપેતાં શૂર્પાલંકૃતમસ્તકામ્ ॥ 1 ॥
વંદેઽહં શીતલાં દેવીં સર્વરોગભયાપહામ્ ।
યામાસાદ્ય નિવર્તેત વિસ્ફોટકભયં મહત્ ॥ 2 ॥
શીતલે શીતલે ચેતિ યો બ્રૂયાદ્દાહપીડિતઃ ।
વિસ્ફોટકભયં ઘોરં ક્ષિપ્રં તસ્ય પ્રણશ્યતિ ॥ 3 ॥
યસ્ત્વામુદકમધ્યે તુ ધ્યાત્વા સંપૂજયેન્નરઃ ।
વિસ્ફોટકભયં ઘોરં ગૃહે તસ્ય ન જાયતે ॥ 4 ॥
શીતલે જ્વરદગ્ધસ્ય પૂતિગંધયુતસ્ય ચ ।
પ્રણષ્ટચક્ષુષઃ પુંસસ્ત્વામાહુર્જીવનૌષધમ્ ॥ 5 ॥
શીતલે તનુજાન્ રોગાન્ નૃણાં હરસિ દુસ્ત્યજાન્ ।
વિસ્ફોટકવિદીર્ણાનાં ત્વમેકાઽમૃતવર્ષિણી ॥ 6 ॥
ગલગંડગ્રહા રોગા યે ચાન્યે દારુણા નૃણામ્ ।
ત્વદનુધ્યાનમાત્રેણ શીતલે યાંતિ સંક્ષયમ્ ॥ 7 ॥
ન મંત્રો નૌષધં તસ્ય પાપરોગસ્ય વિદ્યતે ।
ત્વામેકાં શીતલે ધાત્રીં નાન્યાં પશ્યામિ દેવતામ્ ॥ 8 ॥
મૃણાલતંતુસદૃશીં નાભિહૃન્મધ્યસંસ્થિતામ્ ।
યસ્ત્વાં સંચિંતયેદ્દેવિ તસ્ય મૃત્યુર્ન જાયતે ॥ 9 ॥
અષ્ટકં શીતલાદેવ્યા યો નરઃ પ્રપઠેત્સદા ।
વિસ્ફોટકભયં ઘોરં ગૃહે તસ્ય ન જાયતે ॥ 10 ॥
શ્રોતવ્યં પઠિતવ્યં ચ શ્રદ્ધાભક્તિસમન્વિતૈઃ ।
ઉપસર્ગવિનાશાય પરં સ્વસ્ત્યયનં મહત્ ॥ 11 ॥
શીતલે ત્વં જગન્માતા શીતલે ત્વં જગત્પિતા ।
શીતલે ત્વં જગદ્ધાત્રી શીતલાયૈ નમો નમઃ ॥ 12 ॥
રાસભો ગર્દભશ્ચૈવ ખરો વૈશાખનંદનઃ ।
શીતલાવાહનશ્ચૈવ દૂર્વાકંદનિકૃંતનઃ ॥ 13 ॥
એતાનિ ખરનામાનિ શીતલાગ્રે તુ યઃ પઠેત્ ।
તસ્ય ગેહે શિશૂનાં ચ શીતલારુઙ્ ન જાયતે ॥ 14 ॥
શીતલાષ્ટકમેવેદં ન દેયં યસ્યકસ્યચિત્ ।
દાતવ્યં ચ સદા તસ્મૈ શ્રદ્ધાભક્તિયુતાય વૈ ॥ 15 ॥
ઇતિ શ્રીસ્કાંદપુરાણે શીતલાષ્ટકમ્ ॥
