asya śrīśītalāstōtrasya mahādēva ṛṣiḥ anuṣṭup Chandaḥ śītalā dēvatā lakṣmīrbījaṃ bhavānī śaktiḥ sarvavisphōṭakanivṛtyarthē japē viniyōgaḥ ॥
īśvara uvācha ।
vandē'haṃ śītalāṃ dēvīṃ rāsabhasthāṃ digambarām ।
mārjanīkalaśōpētāṃ śūrpālaṅkṛtamastakām ॥ 1 ॥
vandē'haṃ śītalāṃ dēvīṃ sarvarōgabhayāpahām ।
yāmāsādya nivartēta visphōṭakabhayaṃ mahat ॥ 2 ॥
śītalē śītalē chēti yō brūyāddāhapīḍitaḥ ।
visphōṭakabhayaṃ ghōraṃ kṣipraṃ tasya praṇaśyati ॥ 3 ॥
yastvāmudakamadhyē tu dhyātvā sampūjayēnnaraḥ ।
visphōṭakabhayaṃ ghōraṃ gṛhē tasya na jāyatē ॥ 4 ॥
śītalē jvaradagdhasya pūtigandhayutasya cha ।
praṇaṣṭachakṣuṣaḥ puṃsastvāmāhurjīvanauṣadham ॥ 5 ॥
śītalē tanujān rōgān nṛṇāṃ harasi dustyajān ।
visphōṭakavidīrṇānāṃ tvamēkā'mṛtavarṣiṇī ॥ 6 ॥
galagaṇḍagrahā rōgā yē chānyē dāruṇā nṛṇām ।
tvadanudhyānamātrēṇa śītalē yānti saṅkṣayam ॥ 7 ॥
na mantrō nauṣadhaṃ tasya pāparōgasya vidyatē ।
tvāmēkāṃ śītalē dhātrīṃ nānyāṃ paśyāmi dēvatām ॥ 8 ॥
mṛṇālatantusadṛśīṃ nābhihṛnmadhyasaṃsthitām ।
yastvāṃ sañchintayēddēvi tasya mṛtyurna jāyatē ॥ 9 ॥
aṣṭakaṃ śītalādēvyā yō naraḥ prapaṭhētsadā ।
visphōṭakabhayaṃ ghōraṃ gṛhē tasya na jāyatē ॥ 10 ॥
śrōtavyaṃ paṭhitavyaṃ cha śraddhābhaktisamanvitaiḥ ।
upasargavināśāya paraṃ svastyayanaṃ mahat ॥ 11 ॥
śītalē tvaṃ jaganmātā śītalē tvaṃ jagatpitā ।
śītalē tvaṃ jagaddhātrī śītalāyai namō namaḥ ॥ 12 ॥
rāsabhō gardabhaśchaiva kharō vaiśākhanandanaḥ ।
śītalāvāhanaśchaiva dūrvākandanikṛntanaḥ ॥ 13 ॥
ētāni kharanāmāni śītalāgrē tu yaḥ paṭhēt ।
tasya gēhē śiśūnāṃ cha śītalāruṅ na jāyatē ॥ 14 ॥
śītalāṣṭakamēvēdaṃ na dēyaṃ yasyakasyachit ।
dātavyaṃ cha sadā tasmai śraddhābhaktiyutāya vai ॥ 15 ॥
iti śrīskāndapurāṇē śītalāṣṭakam ॥
