ଶ୍ରୀଭୈରଵ୍ୟୁଵାଚ
ଭଗଵନ୍ ଶ୍ରୋତୁମିଚ୍ଛାମି ମାତଂଗ୍ୟାଃ ଶତନାମକମ୍ ।
ୟଦ୍ଗୁହ୍ୟଂ ସର୍ଵତଂତ୍ରେଷୁ କେନାପି ନ ପ୍ରକାଶିତମ୍ ॥ 1 ॥
ଶ୍ରୀଭୈରଵ ଉଵାଚ
ଶୃଣୁ ଦେଵି ପ୍ରଵକ୍ଷ୍ୟାମି ରହସ୍ୟାତିରହସ୍ୟକମ୍ ।
ନାଖ୍ୟେୟଂ ୟତ୍ର କୁତ୍ରାପି ପଠନୀୟଂ ପରାତ୍ପରମ୍ ॥ 2 ॥
ୟସ୍ୟୈକଵାରପଠନାତ୍ସର୍ଵେ ଵିଘ୍ନା ଉପଦ୍ରଵାଃ ।
ନଶ୍ୟଂତି ତତ୍କ୍ଷଣାଦ୍ଦେଵି ଵହ୍ନିନା ତୂଲରାଶିଵତ୍ ॥ 3 ॥
ପ୍ରସନ୍ନା ଜାୟତେ ଦେଵୀ ମାତଂଗୀ ଚାସ୍ୟ ପାଠତଃ ।
ସହସ୍ରନାମପଠନେ ୟତ୍ଫଲଂ ପରିକୀର୍ତିତମ୍ ।
ତତ୍କୋଟିଗୁଣିତଂ ଦେଵୀନାମାଷ୍ଟଶତକଂ ଶୁଭମ୍ ॥ 4 ॥
ଅସ୍ୟ ଶ୍ରୀମାତଂଗ୍ୟଷ୍ଟୋତ୍ତରଶତନାମସ୍ତୋତ୍ରସ୍ୟ ଭଗଵାନ୍ମତଂଗ ଋଷିଃ ଅନୁଷ୍ଟୁପ୍ଛଂଦଃ ଶ୍ରୀମାତଂଗୀ ଦେଵତା ଶ୍ରୀମାତଂଗୀ ପ୍ରୀତୟେ ଜପେ ଵିନିୟୋଗଃ ।
ମହାମତ୍ତମାତଂଗିନୀ ସିଦ୍ଧିରୂପା
ତଥା ୟୋଗିନୀ ଭଦ୍ରକାଳୀ ରମା ଚ ।
ଭଵାନୀ ଭଵପ୍ରୀତିଦା ଭୂତିୟୁକ୍ତା
ଭଵାରାଧିତା ଭୂତିସଂପତ୍କରୀ ଚ ॥ 1 ॥
ଧନାଧୀଶମାତା ଧନାଗାରଦୃଷ୍ଟି-
-ର୍ଧନେଶାର୍ଚିତା ଧୀରଵାପୀ ଵରାଂଗୀ ।
ପ୍ରକୃଷ୍ଟା ପ୍ରଭାରୂପିଣୀ କାମରୂପା
ପ୍ରହୃଷ୍ଟା ମହାକୀର୍ତିଦା କର୍ଣନାଲୀ ॥ 2 ॥
କରାଳୀ ଭଗା ଘୋରରୂପା ଭଗାଂଗୀ
ଭଗାହ୍ଵା ଭଗପ୍ରୀତିଦା ଭୀମରୂପା ।
ଭଵାନୀ ମହାକୌଶିକୀ କୋଶପୂର୍ଣା
କିଶୋରୀ କିଶୋରପ୍ରିୟା ନଂଦୀହା ॥ 3 ॥
ମହାକାରଣାଽକାରଣା କର୍ମଶୀଲା
କପାଲୀ ପ୍ରସିଦ୍ଧା ମହାସିଦ୍ଧଖଂଡା ।
ମକାରପ୍ରିୟା ମାନରୂପା ମହେଶୀ
ମଲୋଲ୍ଲାସିନୀ ଲାସ୍ୟଲୀଲାଲୟାଂଗୀ ॥ 4 ॥
କ୍ଷମା କ୍ଷେମଶୀଲା କ୍ଷପାକାରିଣୀ ଚା-
-ଽକ୍ଷୟପ୍ରୀତିଦା ଭୂତିୟୁକ୍ତା ଭଵାନୀ ।
ଭଵାରାଧିତା ଭୂତିସତ୍ୟାତ୍ମିକା ଚ
ପ୍ରଭୋଦ୍ଭାସିତା ଭାନୁଭାସ୍ଵତ୍କରା ଚ ॥ 5 ॥
ଧରାଧୀଶମାତା ଧରାଗାରଦୃଷ୍ଟି-
-ର୍ଧରେଶାର୍ଚିତା ଧୀଵରା ଧୀଵରାଂଗୀ ।
ପ୍ରକୃଷ୍ଟା ପ୍ରଭାରୂପିଣୀ ପ୍ରାଣରୂପା
ପ୍ରକୃଷ୍ଟସ୍ଵରୂପା ସ୍ଵରୂପପ୍ରିୟା ଚ ॥ 6 ॥
ଚଲତ୍କୁଂଡଲା କାମିନୀ କାଂତୟୁକ୍ତା
କପାଲାଽଚଲା କାଲକୋଦ୍ଧାରିଣୀ ଚ ।
କଦଂବପ୍ରିୟା କୋଟରୀ କୋଟଦେହା
କ୍ରମା କୀର୍ତିଦା କର୍ଣରୂପା ଚ କାକ୍ଷ୍ମୀଃ ॥ 7 ॥
କ୍ଷମାଂଗୀ କ୍ଷୟପ୍ରେମରୂପା କ୍ଷୟା ଚ
କ୍ଷୟାକ୍ଷା କ୍ଷୟାହ୍ଵା କ୍ଷୟପ୍ରାଂତରା ଚ ।
କ୍ଷଵତ୍କାମିନୀ କ୍ଷାରିଣୀ କ୍ଷୀରପୂର୍ଣା
ଶିଵାଂଗୀ ଚ ଶାକଂଭରୀ ଶାକଦେହା ॥ 8 ॥
ମହାଶାକୟଜ୍ଞା ଫଲପ୍ରାଶକା ଚ
ଶକାହ୍ଵାଽଶକାହ୍ଵା ଶକାଖ୍ୟା ଶକା ଚ ।
ଶକାକ୍ଷାଂତରୋଷା ସୁରୋଷା ସୁରେଖା
ମହାଶେଷୟଜ୍ଞୋପଵୀତପ୍ରିୟା ଚ ॥ 9 ॥
ଜୟଂତୀ ଜୟା ଜାଗ୍ରତୀ ୟୋଗ୍ୟରୂପା
ଜୟାଂଗା ଜପଧ୍ୟାନସଂତୁଷ୍ଟସଂଜ୍ଞା ।
ଜୟପ୍ରାଣରୂପା ଜୟସ୍ଵର୍ଣଦେହା
ଜୟଜ୍ଵାଲିନୀ ୟାମିନୀ ୟାମ୍ୟରୂପା ॥ 10 ॥
ଜଗନ୍ମାତୃରୂପା ଜଗଦ୍ରକ୍ଷଣା ଚ
ସ୍ଵଧାଵୌଷଡଂତା ଵିଲଂବାଽଵିଲଂବା ।
ଷଡଂଗା ମହାଲଂବରୂପାସିହସ୍ତା-
ପଦାହାରିଣୀହାରିଣୀ ହାରିଣୀ ଚ ॥ 11 ॥
ମହାମଂଗଳା ମଂଗଳପ୍ରେମକୀର୍ତି-
-ର୍ନିଶୁଂଭଚ୍ଛିଦା ଶୁଂଭଦର୍ପାପହା ଚ ।
ତଥାଽଽନଂଦବୀଜାଦିମୁକ୍ତିସ୍ଵରୂପା
ତଥା ଚଂଡମୁଂଡାପଦା ମୁଖ୍ୟଚଂଡା ॥ 12 ॥
ପ୍ରଚଂଡାଽପ୍ରଚଂଡା ମହାଚଂଡଵେଗା
ଚଲଚ୍ଚାମରା ଚାମରା ଚଂଦ୍ରକୀର୍ତିଃ ।
ସୁଚାମୀକରା ଚିତ୍ରଭୂଷୋଜ୍ଜ୍ଵଲାଂଗୀ
ସୁସଂଗୀତଗୀତା ଚ ପାୟାଦପାୟାତ୍ ॥ 13 ॥
ଇତି ତେ କଥିତଂ ଦେଵି ନାମ୍ନାମଷ୍ଟୋତ୍ତରଂ ଶତମ୍ ।
ଗୋପ୍ୟଂ ଚ ସର୍ଵତଂତ୍ରେଷୁ ଗୋପନୀୟଂ ଚ ସର୍ଵଦା ॥ 14 ॥
ଏତସ୍ୟ ସତତାଭ୍ୟାସାତ୍ସାକ୍ଷାଦ୍ଦେଵୋ ମହେଶ୍ଵରଃ ।
ତ୍ରିସଂଧ୍ୟଂ ଚ ମହାଭକ୍ତ୍ୟା ପଠନୀୟଂ ସୁଖୋଦୟମ୍ ॥ 15 ॥
ନ ତସ୍ୟ ଦୁଷ୍କରଂ କିଂଚିଜ୍ଜାୟତେ ସ୍ପର୍ଶତଃ କ୍ଷଣାତ୍ ।
ସୁକୃତଂ ୟତ୍ତଦେଵାପ୍ତଂ ତସ୍ମାଦାଵର୍ତୟେତ୍ସଦା ॥ 16 ॥
ସଦୈଵ ସନ୍ନିଧୌ ତସ୍ୟ ଦେଵୀ ଵସତି ସାଦରମ୍ ।
ଅୟୋଗା ୟେ ତ ଏଵାଗ୍ରେ ସୁୟୋଗାଶ୍ଚ ଭଵଂତି ଵୈ ॥ 17 ॥
ତ ଏଵ ମିତ୍ରଭୂତାଶ୍ଚ ଭଵଂତି ତତ୍ପ୍ରସାଦତଃ ।
ଵିଷାଣି ନୋପସର୍ପଂତି ଵ୍ୟାଧୟୋ ନ ସ୍ପୃଶଂତି ତାନ୍ ॥ 18 ॥
ଲୂତାଵିସ୍ଫୋଟକାଃ ସର୍ଵେ ଶମଂ ୟାଂତି ଚ ତତ୍କ୍ଷଣାତ୍ ।
ଜରାପଲିତନିର୍ମୁକ୍ତଃ କଲ୍ପଜୀଵୀ ଭଵେନ୍ନରଃ ॥ 19 ॥
ଅପି କିଂ ବହୁନୋକ୍ତେନ ସାନ୍ନିଧ୍ୟଂ ଫଲମାପ୍ନୁୟାତ୍ ।
ୟାଵନ୍ମୟା ପୁରା ପ୍ରୋକ୍ତଂ ଫଲଂ ସାହସ୍ରନାମକମ୍ ।
ତତ୍ସର୍ଵଂ ଲଭତେ ମର୍ତ୍ୟୋ ମହାମାୟାପ୍ରସାଦତଃ ॥ 20 ॥
ଇତି ଶ୍ରୀରୁଦ୍ରୟାମଲେ ଶ୍ରୀମାତଂଗୀଶତନାମସ୍ତୋତ୍ରମ୍ ।
