ଧ୍ୟାନମ୍
ଗଲଦ୍ରକ୍ତମୁଂଡାଵଲୀକଂଠମାଲା
ମହାଘୋରରାଵା ସୁଦଂଷ୍ଟ୍ରା କରାଲା ।
ଵିଵସ୍ତ୍ରା ଶ୍ମଶାନାଲୟା ମୁକ୍ତକେଶୀ
ମହାକାଲକାମାକୁଲା କାଲିକେୟମ୍ ॥ 1 ॥
ଭୁଜେ ଵାମୟୁଗ୍ମେ ଶିରୋଽସିଂ ଦଧାନା
ଵରଂ ଦକ୍ଷୟୁଗ୍ମେଽଭୟଂ ଵୈ ତଥୈଵ ।
ସୁମଧ୍ୟାଽପି ତୁଂଗସ୍ତନା ଭାରନମ୍ରା
ଲସଦ୍ରକ୍ତସୃକ୍କଦ୍ଵୟା ସୁସ୍ମିତାସ୍ୟା ॥ 2 ॥
ଶଵଦ୍ଵଂଦ୍ଵକର୍ଣାଵତଂସା ସୁକେଶୀ
ଲସତ୍ପ୍ରେତପାଣିଂ ପ୍ରୟୁକ୍ତୈକକାଂଚୀ ।
ଶଵାକାରମଂଚାଧିରୂଢା ଶିଵାଭିଃ
ଚତୁର୍ଦିକ୍ଷୁଶବ୍ଦାୟମାନାଽଭିରେଜେ ॥ 3 ॥
ସ୍ତୁତିଃ
ଵିରଂଚ୍ୟାଦିଦେଵାସ୍ତ୍ରୟସ୍ତେ ଗୁଣାସ୍ତ୍ରୀନ୍
ସମାରାଧ୍ୟ କାଲୀଂ ପ୍ରଧାନା ବଭୂଵୁଃ ।
ଅନାଦିଂ ସୁରାଦିଂ ମଖାଦିଂ ଭଵାଦିଂ
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 1 ॥
ଜଗନ୍ମୋହିନୀୟଂ ତୁ ଵାଗ୍ଵାଦିନୀୟଂ
ସୁହୃତ୍ପୋଷିଣୀ ଶତ୍ରୁସଂହାରଣୀୟମ୍ ।
ଵଚସ୍ତଂଭନୀୟଂ କିମୁଚ୍ଚାଟନୀୟଂ
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 2 ॥
ଇୟଂ ସ୍ଵର୍ଗଦାତ୍ରୀ ପୁନଃ କଲ୍ପଵଲ୍ଲୀ
ମନୋଜାସ୍ତୁ କାମାନ୍ ୟଥାର୍ଥଂ ପ୍ରକୁର୍ୟାତ୍ ।
ତଥା ତେ କୃତାର୍ଥା ଭଵଂତୀତି ନିତ୍ୟଂ
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 3 ॥
ସୁରାପାନମତ୍ତା ସୁଭକ୍ତାନୁରକ୍ତା
ଲସତ୍ପୂତଚିତ୍ତେ ସଦାଵିର୍ଭଵତ୍ତେ ।
ଜପଧ୍ୟାନପୂଜାସୁଧାଧୌତପଂକା
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 4 ॥
ଚିଦାନଂଦକଂଦଂ ହସନ୍ମଂଦମଂଦଂ
ଶରଚ୍ଚଂଦ୍ରକୋଟିପ୍ରଭାପୁଂଜବିଂବମ୍ ।
ମୁନୀନାଂ କଵୀନାଂ ହୃଦି ଦ୍ୟୋତୟଂତଂ
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 5 ॥
ମହାମେଘକାଲୀ ସୁରକ୍ତାପି ଶୁଭ୍ରା
କଦାଚିଦ୍ଵିଚିତ୍ରାକୃତିର୍ୟୋଗମାୟା ।
ନ ବାଲା ନ ଵୃଦ୍ଧା ନ କାମାତୁରାପି
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 6 ॥
କ୍ଷମସ୍ଵାପରାଧଂ ମହାଗୁପ୍ତଭାଵଂ
ମୟା ଲୋକମଧ୍ୟେ ପ୍ରକାଶୀକୃତଂ ୟତ୍ ।
ତଵ ଧ୍ୟାନପୂତେନ ଚାପଲ୍ୟଭାଵାତ୍
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 7 ॥
ୟଦି ଧ୍ୟାନୟୁକ୍ତଂ ପଠେଦ୍ୟୋ ମନୁଷ୍ୟଃ
ତଦା ସର୍ଵଲୋକେ ଵିଶାଲୋ ଭଵେଚ୍ଚ ।
ଗୃହେ ଚାଷ୍ଟସିଦ୍ଧିର୍ମୃତେ ଚାପି ମୁକ୍ତିଃ
ସ୍ଵରୂପଂ ତ୍ଵଦୀୟଂ ନ ଵିଂଦଂତି ଦେଵାଃ ॥ 8 ॥
ଇତି ଶ୍ରୀମଚ୍ଛଂକରାଚାର୍ୟଵିରଚିତଂ ଶ୍ରୀକାଲିକାଷ୍ଟକମ୍ ।
