আলোক্য় শৈলোদ্ধরণাদিরূপং প্রভাবমুচ্চৈস্তব গোপলোকাঃ ।
বিশ্বেশ্বরং ত্বামভিমত্য় বিশ্বে নংদং ভবজ্জাতকমন্বপৃচ্ছন্ ॥1॥
গর্গোদিতো নির্গদিতো নিজায় বর্গায় তাতেন তব প্রভাবঃ ।
পূর্বাধিকস্ত্বয়্যনুরাগ এষামৈধিষ্ট তাবত্ বহুমানভারঃ ॥2॥
ততোঽবমানোদিততত্ত্ববোধঃ সুরাধিরাজঃ সহ দিব্যগব্য়া।
উপেত্য় তুষ্টাব স নষ্টগর্বঃ স্পৃষ্ট্বা পদাব্জং মণিমৌলিনা তে ॥3॥
স্নেহস্নুতৈস্ত্বাং সুরভিঃ পয়োভির্গোবিংদনামাংকিতমভ্যষিংচত্ ।
ঐরাবতোপাহৃতদিব্যগংগাপাথোভিরিংদ্রোঽপি চ জাতহর্ষঃ ॥4॥
জগত্ত্রয়েশে ত্বয়ি গোকুলেশে তথাঽভিষিক্তে সতি গোপবাটঃ ।
নাকেঽপি বৈকুংঠপদেঽপ্যলভ্য়াং শ্রিয়ং প্রপেদে ভবতঃ প্রভাবাত্ ॥5॥
কদাচিদংতর্যমুনং প্রভাতে স্নাযন্ পিতা বারুণপূরুষেণ ।
নীতস্তমানেতুমগাঃ পুরীং ত্বং তাং বারুণীং কারণমর্ত্যরূপঃ ॥6॥
সসংভ্রমং তেন জলাধিপেন প্রপূজিতস্ত্বং প্রতিগৃহ্য় তাতম্ ।
উপাগতস্তত্ক্ষণমাত্মগেহং পিতাঽবদত্তচ্চরিতং নিজেভ্য়ঃ ॥7॥
হরিং বিনিশ্চিত্য় ভবংতমেতান্ ভবত্পদালোকনবদ্ধতৃষ্ণান্ ॥
নিরীক্ষ্য় বিষ্ণো পরমং পদং তদ্দুরাপমন্য়ৈস্ত্বমদীদৃশস্তান্ ॥8॥
স্ফুরত্পরানংদরসপ্রবাহপ্রপূর্ণকৈবল্যমহাপয়োধৌ ।
চিরং নিমগ্নাঃ খলু গোপসংঘাস্ত্বয়ৈব ভূমন্ পুনরুদ্ধৃতাস্তে ॥9॥
করবদরবদেবং দেব কুত্রাবতারে
নিজপদমনবাপ্য়ং দর্শিতং ভক্তিভাজাম্ ।
তদিহ পশুপরূপী ত্বং হি সাক্ষাত্ পরাত্মা
পবনপুরনিবাসিন্ পাহি মামাময়েভ্য়ঃ ॥10॥
