അ॒ഹമ॑സ്മി പ്രഥ॒മജാ ഋ॒തസ്യ॑ ।
പൂർവം॑ ദേ॒വേഭ്യോ॑ അ॒മൃത॑സ്യ॒ നാഭിഃ॑ ।
യോ മാ॒ ദദാ॑തി॒ സ ഇദേ॒വ മാഽഽവാഃ᳚ ।
അ॒ഹമന്ന॒മന്ന॑മ॒ദംത॑മദ്മി ।
പൂർവ॑മ॒ഗ്നേരപി॑ ദഹ॒ത്യന്ന᳚മ് ।
യ॒ത്തൌ ഹാ॑ഽഽസാതേ അഹമുത്ത॒രേഷു॑ ।
വ്യാത്ത॑മസ്യ പ॒ശവഃ॑ സു॒ജംഭ᳚മ് ।
പശ്യം॑തി॒ ധീരാഃ॒ പ്രച॑രംതി॒ പാകാഃ᳚ ।
ജഹാ᳚മ്യ॒ന്യം ന ജ॑ഹാമ്യ॒ന്യമ് ।
അ॒ഹമന്നം॒-വഁശ॒മിച്ച॑രാമി ॥ 1
സ॒മാ॒നമര്ഥം॒ പര്യേ॑മി ഭും॒ജത് ।
കോ മാമന്നം॑ മനു॒ഷ്യോ॑ ദയേത ।
പരാ॑കേ॒ അന്നം॒ നിഹി॑തം-ലോഁ॒ക ഏ॒തത് ।
വിശ്വൈ᳚ര്ദേ॒വൈഃ പി॒തൃഭി॑ര്ഗു॒പ്തമന്ന᳚മ് ।
യദ॒ദ്യതേ॑ ലു॒പ്യതേ॒ യത്പ॑രോ॒പ്യതേ᳚ ।
ശ॒ത॒ത॒മീ സാ ത॒നൂര്മേ॑ ബഭൂവ ।
മ॒ഹാംതൌ॑ ച॒രൂ സ॑കൃദ്ദു॒ഗ്ധേന॑ പപ്രൌ ।
ദിവം॑ ച॒ പൃശ്നി॑ പൃഥി॒വീം ച॑ സാ॒കമ് ।
തത്സം॒പിബം॑തോ॒ ന മി॑നംതി വേ॒ധസഃ॑ ।
നൈതദ്ഭൂയോ॒ ഭവ॑തി॒ നോ കനീ॑യഃ ॥ 2
അന്നം॑ പ്രാ॒ണമന്ന॑മപാ॒നമാ॑ഹുഃ ।
അന്നം॑ മൃ॒ത്യും തമു॑ ജീ॒വാതു॑മാഹുഃ ।
അന്നം॑ ബ്ര॒ഹ്മാണോ॑ ജ॒രസം॑-വഁദംതി ।
അന്ന॑മാഹുഃ പ്ര॒ജന॑നം പ്ര॒ജാനാ᳚മ് ।
മോഘ॒മന്നം॑-വിംഁദതേ॒ അപ്ര॑ചേതാഃ ।
സ॒ത്യം ബ്ര॑വീമി വ॒ധ ഇത്സ തസ്യ॑ ।
നാര്യ॒മണം॒ പുഷ്യ॑തി॒ നോ സഖാ॑യമ് ।
കേവ॑ലാഘോ ഭവതി കേവലാ॒ദീ ।
അ॒ഹം മേ॒ഘഃ സ്ത॒നയ॒ന്വര്ഷ॑ന്നസ്മി ।
മാമ॑ദംത്യ॒ഹമ॑ദ്മ്യ॒ന്യാന് ॥ 3
[അഹ॒ഗ്മ് സദ॒മൃതോ॑ ഭവാമി ।
മദാ॑ദി॒ത്യാ അധി॒ സർവേ॑ തപംതി ।]
