ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಚತುರ್ಥಃ ಪ್ರಪಾಠಕಃ - ಪ್ರವರ್ಗ್ಯ ಮನ್ತ್ರಾಃ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಅನುವಾಕಂ 1
ನಮೋ॑ ವಾ॒ಚೇ ಯಾ ಚೋ॑ದಿ॒ತಾ ಯಾ ಚಾನು॑ದಿತಾ॒ ತಸ್ಯೈ॑ ವಾ॒ಚೇ ನಮೋ॒ ನಮೋ॑ ವಾ॒ಚೇ ನಮೋ॑ ವಾ॒ಚಸ್ಪತ॑ಯೇ॒ ನಮ॒ ಋಷಿ॑ಭ್ಯೋ ಮನ್ತ್ರ॒ಕೃದ್ಭ್ಯೋ॒ ಮನ್ತ್ರ॑ಪತಿಭ್ಯೋ॒ ಮಾ ಮಾಮೃಷ॑ಯೋ ಮನ್ತ್ರ॒ಕೃತೋ॑ ಮನ್ತ್ರ॒ಪತ॑ಯಃ॒ ಪರಾ॑ದು॒ರ್ಮಾ-ಽಹಮೃಷೀ᳚-ನ್ಮನ್ತ್ರ॒ಕೃತೋ॑ ಮನ್ತ್ರ॒ಪತೀ॒-ನ್ಪರಾ॑ದಾಂ-ವೈಁಶ್ವದೇ॒ವೀಂ-ವಾಁಚ॑ಮುದ್ಯಾಸಗ್ಂ ಶಿ॒ವಾಮದ॑ಸ್ತಾ॒-ಞ್ಜುಷ್ಟಾ᳚-ನ್ದೇ॒ವೇಭ್ಯ॒-ಶ್ಶರ್ಮ॑ ಮೇ॒ ದ್ಯೌ-ಶ್ಶರ್ಮ॑ ಪೃಥಿ॒ವೀ ಶರ್ಮ॒ ವಿಶ್ವ॑ಮಿ॒ದ-ಞ್ಜಗ॑ತ್ ।
ಶರ್ಮ॑ ಚ॒ನ್ದ್ರಶ್ಚ॒ ಸೂರ್ಯ॑ಶ್ಚ॒ ಶರ್ಮ॑ ಬ್ರಹ್ಮಪ್ರಜಾಪ॒ತೀ ॥
ಭೂ॒ತಂ-ವಁ॑ದಿಷ್ಯೇ॒ ಭುವ॑ನಂ-ವಁದಿಷ್ಯೇ॒ ತೇಜೋ॑ ವದಿಷ್ಯೇ॒ ಯಶೋ॑ ವದಿಷ್ಯೇ॒ ತಪೋ॑ ವದಿಷ್ಯೇ॒ ಬ್ರಹ್ಮ॑ ವದಿಷ್ಯೇ ಸ॒ತ್ಯಂ-ವಁ॑ದಿಷ್ಯೇ॒ ತಸ್ಮಾ॑ ಅ॒ಹಮಿ॒ದ-ಮು॑ಪ॒ಸ್ತರ॑ಣ॒-ಮುಪ॑ಸ್ತೃಣ ಉಪ॒ಸ್ತರ॑ಣ-ಮ್ಮೇ ಪ್ರ॒ಜಾಯೈ॑ ಪಶೂ॒ನಾ-ಮ್ಭೂ॑ಯಾ-ದುಪ॒ಸ್ತರ॑ಣಮ॒ಹ-ಮ್ಪ್ರ॒ಜಾಯೈ॑ ಪಶೂ॒ನಾ-ಮ್ಭೂ॑ಯಾಸ॒-ಮ್ಪ್ರಾಣಾ॑ಪಾನೌ ಮೃ॒ತ್ಯೋರ್ಮಾ॑ ಪಾತ॒-ಮ್ಪ್ರಾಣಾ॑ಪಾನೌ॒ ಮಾ ಮಾ॑ ಹಾಸಿಷ್ಟ॒-ಮ್ಮಧು॑ ಮನಿಷ್ಯೇ॒ ಮಧು॑ ಜನಿಷ್ಯೇ॒ ಮಧು॑ ವಖ್ಷ್ಯಾಮಿ॒ ಮಧು॑ ವದಿಷ್ಯಾಮಿ॒ ಮಧು॑ಮತೀ-ನ್ದೇ॒ವೇಭ್ಯೋ॒ ವಾಚ॑ಮುದ್ಯಾಸಗ್ಂ ಶುಶ್ರೂ॒ಷೇಣ್ಯಾ᳚-ಮ್ಮನು॒ಷ್ಯೇ᳚ಭ್ಯ॒ಸ್ತ-ಮ್ಮಾ॑ ದೇ॒ವಾ ಅ॑ವನ್ತು ಶೋ॒ಭಾಯೈ॑ ಪಿ॒ತರೋ-ಽನು॑ಮದನ್ತು ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 1 ॥ (ಅ. 1)
ಅನುವಾಕಂ 2
ಯು॒ಞ್ಜತೇ॒ ಮನ॑ ಉ॒ತ ಯು॑ಞ್ಜತೇ॒ ಧಿಯಃ॑ । ವಿಪ್ರಾ॒ ವಿಪ್ರ॑ಸ್ಯ ಬೃಹ॒ತೋ ವಿ॑ಪ॒ಶ್ಚಿತಃ॑ । ವಿ ಹೋತ್ರಾ॑ ದಧೇ ವಯುನಾ॒ವಿದೇಕ॒ ಇತ್ । ಮ॒ಹೀ ದೇ॒ವಸ್ಯ॑ ಸವಿ॒ತುಃ ಪರಿ॑ಷ್ಟುತಿಃ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾದ॑ದೇ ॥ ಅಭ್ರಿ॑ರಸಿ॒ ನಾರಿ॑ರಸಿ ।
ಅ॒ದ್ಧ್ವ॒ರ॒ಕೃ-ದ್ದೇ॒ವೇಭ್ಯಃ॑ । ಉತ್ತಿ॑ಷ್ಠ ಬ್ರಹ್ಮಣಸ್ಪತೇ ॥ 2 ॥
ದೇ॒ವ॒ಯನ್ತ॑ಸ್ತ್ವೇಮಹೇ । ಉಪ॒ ಪ್ರಯ॑ನ್ತು ಮ॒ರುತ॑-ಸ್ಸು॒ದಾನ॑ವಃ । ಇನ್ದ್ರ॑ ಪ್ರಾ॒ಶೂರ್ಭ॑ವಾ॒ ಸಚಾ᳚ ॥ ಪ್ರೈತು॒ ಬ್ರಹ್ಮ॑ಣ॒ಸ್ಪತಿಃ॑ । ಪ್ರ ದೇ॒ವ್ಯೇ॑ತು ಸೂ॒ನೃತಾ᳚ ।
ಅಚ್ಛಾ॑ ವೀ॒ರನ್ನರ್ಯ॑-ಮ್ಪ॒ಙ್ಕ್ತಿರಾ॑ಧಸಮ್ । ದೇ॒ವಾ ಯ॒ಜ್ಞನ್ನ॑ಯನ್ತು ನಃ ॥ ದೇವೀ᳚ ದ್ಯಾವಾಪೃಥಿವೀ॒ ಅನು॑ ಮೇ ಮಗ್ಂಸಾಥಾಮ್ । ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 3 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಇಯ॒ತ್ಯಗ್ರ॑ ಆಸೀಃ ।
ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ । ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ದೇವೀ᳚-ರ್ವಮ್ರೀರ॒ಸ್ಯ ಭೂ॒ತಸ್ಯ॑ ಪ್ರಥಮಜಾ ಋತಾವರೀಃ ॥ ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 4 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಇನ್ದ್ರ॒ಸ್ಯೌಜೋ॑-ಽಸಿ ।
ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ । ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಅ॒ಗ್ನಿ॒ಜಾ ಅ॑ಸಿ ಪ್ರ॒ಜಾಪ॑ತೇ॒ ರೇತಃ॑ । ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 5 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಆಯು॑-ರ್ಧೇಹಿ ಪ್ರಾ॒ಣ-ನ್ಧೇ॑ಹಿ । ಅ॒ಪಾ॒ನ-ನ್ಧೇ॑ಹಿ ವ್ಯಾ॒ನ-ನ್ಧೇ॑ಹಿ । ಚಖ್ಷು॑-ರ್ಧೇಹಿ॒ ಶ್ರೋತ್ರ॑-ನ್ಧೇಹಿ । ಮನೋ॑ ಧೇಹಿ॒ ವಾಚ॑-ನ್ಧೇಹಿ । ಆ॒ತ್ಮಾನ॑-ನ್ಧೇಹಿ ಪ್ರತಿ॒ಷ್ಠಾ-ನ್ಧೇ॑ಹಿ ।
ಮಾ-ನ್ಧೇ॑ಹಿ॒ ಮಯಿ॑ ಧೇಹಿ ॥ ಮಧು॑ ತ್ವಾ ಮಧು॒ಲಾ ಕ॑ರೋತು ।
ಮ॒ಖಸ್ಯ॒ ಶಿರೋ॑-ಽಸಿ ॥ 6 ॥
ಯ॒ಜ್ಞಸ್ಯ॑ ಪ॒ದೇ ಸ್ಥಃ॑ । ಗಾ॒ಯ॒ತ್ರೇಣ॑ ತ್ವಾ॒ ಛನ್ದ॑ಸಾ ಕರೋಮಿ । ತ್ರೈಷ್ಟು॑ಭೇನ ತ್ವಾ॒ ಛನ್ದ॑ಸಾ ಕರೋಮಿ । ಜಾಗ॑ತೇನ ತ್ವಾ॒ ಛನ್ದ॑ಸಾ ಕರೋಮಿ ॥ ಮ॒ಖಸ್ಯ॒ ರಾಸ್ನಾ॑-ಽಸಿ । ಅದಿ॑ತಿಸ್ತೇ॒ ಬಿಲ॑ಙ್ಗೃಹ್ಣಾತು । ಪಾಙ್ಕ್ತೇ॑ನ॒ ಛನ್ದ॑ಸಾ ।
ಸೂರ್ಯ॑ಸ್ಯ॒ ಹರ॑ಸಾ ಶ್ರಾಯ । ಮ॒ಖೋ॑-ಽಸಿ ॥ 7 ॥
(ಪ॒ತೇ॒ - ಶಿರ॑ - ಋತಾವರೀರ್-ಋದ್ಧ್ಯಾಸ॑ಮ॒ದ್ಯ ಮ॒ಖಸ್ಯ॒ ಶಿರಃ॒ - ಶಿರಃ॒ - ಶಿರೋ॑-ಽಸಿ॒ - +ನವ॑ ಚ) (ಅ. 2)
(ಇಯ॑ತಿ॒ ದೇವೀ॒ರಿನ್ದ್ರ॒ಸ್ಯೌಜೋ᳚-ಽಸ್ಯಗ್ನಿ॒ಜಾ ಅ॒ಸ್ಯಾಯು॑ರ್ಧೇಹಿ ಪ್ರಾ॒ಣ-ಮ್ಪಞ್ಚ॑)
ಅನುವಾಕಂ 3
ವೃಷ್ಣೋ॒ ಅಶ್ವ॑ಸ್ಯ ನಿ॒ಷ್ಪದ॑ಸಿ । ವರು॑ಣಸ್ತ್ವಾ ಧೃ॒ತವ್ರ॑ತ॒ ಆಧೂ॑ಪಯತು । ಮಿ॒ತ್ರಾವರು॑ಣಯೋರ್
ಧ್ರು॒ವೇಣ॒ ಧರ್ಮ॑ಣಾ ॥ ಅ॒ರ್ಚಿಷೇ᳚ ತ್ವಾ । ಶೋ॒ಚಿಷೇ᳚ ತ್ವಾ ।
ಜ್ಯೋತಿ॑ಷೇ ತ್ವಾ । ತಪ॑ಸೇ ತ್ವಾ ॥ ಅ॒ಭೀಮ-ಮ್ಮ॑ಹಿ॒ನಾ ದಿವ᳚ಮ್ ।
ಮಿ॒ತ್ರೋ ಬ॑ಭೂವ ಸ॒ಪ್ರಥಾಃ᳚ । ಉ॒ತ ಶ್ರವ॑ಸಾ ಪೃಥಿ॒ವೀಮ್ ॥ 8 ॥
ಮಿ॒ತ್ರಸ್ಯ॑ ಚರ್ಷಣೀ॒ಧೃತಃ॑ ।
ಶ್ರವೋ॑ ದೇ॒ವಸ್ಯ॑ ಸಾನ॒ಸಿಮ್ । ದ್ಯು॒ಮ್ನಞ್ಚಿ॒ತ್ರಶ್ರ॑ವಸ್ತಮಮ್ ॥ ಸಿದ್ಧ್ಯೈ᳚ ತ್ವಾ । ದೇ॒ವಸ್ತ್ವಾ॑ ಸವಿ॒ತೋದ್ವ॑ಪತು ।
ಸು॒ಪಾ॒ಣಿ-ಸ್ಸ್ವ॑ಙ್ಗು॒ರಿಃ । ಸು॒ಬಾ॒ಹುರು॒ತ ಶಕ್ತ್ಯಾ᳚ ॥ ಅಪ॑ದ್ಯಮಾನಃ ಪೃಥಿ॒ವ್ಯಾಮ್ । ಆಶಾ॒ ದಿಶ॒ ಆ ಪೃ॑ಣ । ಉತ್ತಿ॑ಷ್ಠ ಬೃ॒ಹ-ನ್ಭ॑ವ ॥ 9 ॥
ಊ॒ರ್ಧ್ವಸ್ತಿ॑ಷ್ಠ ಧ್ರು॒ವಸ್ತ್ವಮ್ ॥ ಸೂರ್ಯ॑ಸ್ಯ ತ್ವಾ॒ ಚಖ್ಷು॒ಷಾ-ಽನ್ವೀ᳚ಖ್ಷೇ । ಋ॒ಜವೇ᳚ ತ್ವಾ । ಸಾ॒ಧವೇ᳚ ತ್ವಾ । ಸು॒ಖ್ಷಿ॒ತ್ಯೈ ತ್ವಾ॒ ಭೂತ್ಯೈ᳚ ತ್ವಾ ॥
ಇ॒ದಮ॒ಹಮ॒ಮುಮಾ॑ಮುಷ್ಯಾಯ॒ಣಂ-ವಿಁ॒ಶಾ ಪ॒ಶುಭಿ॑-ರ್ಬ್ರಹ್ಮವರ್ಚ॒ಸೇನ॒ ಪರ್ಯೂ॑ಹಾಮಿ ।
ಗಾ॒ಯ॒ತ್ರೇಣ॑ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ । ತ್ರೈಷ್ಟು॑ಭೇನ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ ।
ಜಾಗ॑ತೇನ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ । ಛೃ॒ಣತ್ತು॑ ತ್ವಾ॒ ವಾಕ್ । ಛೃ॒ಣತ್ತು॒ ತ್ವೋರ್ಕ್ । ಛೃ॒ಣತ್ತು॑ ತ್ವಾ ಹ॒ವಿಃ ।
ಛೃ॒ನ್ಧಿ ವಾಚ᳚ಮ್ । ಛೃ॒ನ್ಧ್ಯೂರ್ಜ᳚ಮ್ । ಛೃ॒ನ್ಧಿ ಹ॒ವಿಃ ॥
ದೇವ॑ ಪುರಶ್ಚರ ಸ॒ಘ್ಯಾಸ॑ನ್ತ್ವಾ ॥ 10 ॥
(ಪೃ॒ಥಿ॒ವೀಮ್ - ಭ॑ವ॒ - ವಾ-ಖ್ಷಟ್ಚ॑) (ಅ. 3)
ಅನುವಾಕಂ 4
ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ ಪ್ರಚ॑ರಿಷ್ಯಾಮಃ ।
ಹೋತ॑-ರ್ಘ॒ರ್ಮಮ॒ಭಿಷ್ಟು॑ಹಿ । ಅಗ್ನೀ॒ದ್ರೌಹಿ॑ಣೌ ಪುರೋ॒ಡಾಶಾ॒ವಧಿ॑ಶ್ರಯ । ಪ್ರತಿ॑ಪ್ರಸ್ಥಾತ॒ರ್ವಿಹ॑ರ ।
ಪ್ರಸ್ತೋ॑ತ॒-ಸ್ಸಾಮಾ॑ನಿ ಗಾಯ ॥ ಯಜು॑ರ್ಯುಕ್ತ॒ಗ್ಂ॒ ಸಾಮ॑ಭಿ॒ರಾಕ್ತ॑ಖನ್ತ್ವಾ । ವಿಶ್ವೈ᳚-ರ್ದೇ॒ವೈರನು॑ಮತ-ಮ್ಮ॒ರುದ್ಭಿಃ॑ । ದಖ್ಷಿ॑ಣಾಭಿಃ॒ ಪ್ರತ॑ತ-ಮ್ಪಾರಯಿ॒ಷ್ಣುಮ್ ।
ಸ್ತುಭೋ॑ ವಹನ್ತು ಸುಮನ॒ಸ್ಯಮಾ॑ನಮ್ । ಸ ನೋ॒ ರುಚ॑ನ್ಧೇ॒ಹ್ಯಹೃ॑ಣೀಯಮಾನಃ । ಭೂರ್ಭುವ॒ಸ್ಸುವಃ॑ ।
ಓಮಿನ್ದ್ರ॑ವನ್ತಃ॒ ಪ್ರಚ॑ರತ ॥ 11 ॥
(ಅಹೃ॑ಣೀಯಮಾನೋ॒ ದ್ವೇ ಚ॑) (ಅ. 4)
ಅನುವಾಕಂ 5
ಬ್ರಹ್ಮ॒-ನ್ಪ್ರಚ॑ರಿಷ್ಯಾಮಃ । ಹೋತ॑-ರ್ಘ॒ರ್ಮಮ॒ಭಿಷ್ಟು॑ಹಿ ॥ ಯ॒ಮಾಯ॑ ತ್ವಾ ಮ॒ಖಾಯ॑ ತ್ವಾ । ಸೂರ್ಯ॑ಸ್ಯ॒ ಹರ॑ಸೇ ತ್ವಾ ॥ ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹಾ॑ ಽಪಾ॒ನಾಯ॒ ಸ್ವಾಹಾ᳚ ।
ಚಖ್ಷು॑ಷೇ॒ ಸ್ವಾಹಾ॒ ಶ್ರೋತ್ರಾ॑ಯ॒ ಸ್ವಾಹಾ᳚ । ಮನ॑ಸೇ॒ ಸ್ವಾಹಾ॑ ವಾ॒ಚೇ ಸರ॑ಸ್ವತ್ಯೈ॒ ಸ್ವಾಹಾ᳚ । ದಖ್ಷಾ॑ಯ॒ ಸ್ವಾಹಾ॒ ಕ್ರತ॑ವೇ॒ ಸ್ವಾಹಾ᳚ । ಓಜ॑ಸೇ॒ ಸ್ವಾಹಾ॒ ಬಲಾ॑ಯ॒ ಸ್ವಾಹಾ᳚ ॥
ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನಕ್ತು ॥ 12 ॥
ಪೃ॒ಥಿ॒ವೀ-ನ್ತಪ॑ಸಸ್ತ್ರಾಯಸ್ವ । ಅ॒ರ್ಚಿರ॑ಸಿ ಶೋ॒ಚಿರ॑ಸಿ॒ ಜ್ಯೋತಿ॑ರಸಿ॒ ತಪೋ॑-ಽಸಿ । ಸಗ್ಂಸೀ॑ದಸ್ವ ಮ॒ಹಾಗ್ಂ ಅ॑ಸಿ । ಶೋಚ॑ಸ್ವ ದೇವ॒ವೀತ॑ಮಃ । ವಿ ಧೂ॒ಮಮ॑ಗ್ನೇ ಅರು॒ಷ-ಮ್ಮಿ॑ಯೇದ್ಧ್ಯ । ಸೃ॒ಜ ಪ್ರ॑ಶಸ್ತ ದರ್ಶ॒ತಮ್ ॥
ಅ॒ಞ್ಜನ್ತಿ॒ ಯ-ಮ್ಪ್ರ॒ಥಯ॑ನ್ತೋ॒ ನ ವಿಪ್ರಾಃ᳚ । ವ॒ಪಾವ॑ನ್ತ॒ನ್ನಾಗ್ನಿನಾ॒ ತಪ॑ನ್ತಃ ।
ಪಿ॒ತುರ್ನ ಪು॒ತ್ರ ಉಪ॑ಸಿ॒ ಪ್ರೇಷ್ಠಃ॑ । ಆ ಘ॒ರ್ಮೋ ಅ॒ಗ್ನಿಮೃ॒ತಯ॑ನ್ನಸಾದೀತ್ ॥ 13 ॥
ಅ॒ನಾ॒ಧೃ॒ಷ್ಯಾ ಪು॒ರಸ್ತಾ᳚ತ್ । ಅ॒ಗ್ನೇರಾಧಿ॑ಪತ್ಯೇ ।
ಆಯು॑ರ್ಮೇ ದಾಃ । ಪು॒ತ್ರವ॑ತೀ ದಖ್ಷಿಣ॒ತಃ । ಇನ್ದ್ರ॒ಸ್ಯಾಧಿ॑ಪತ್ಯೇ । ಪ್ರ॒ಜಾ-ಮ್ಮೇ॑ ದಾಃ । ಸು॒ಷದಾ॑ ಪ॒ಶ್ಚಾತ್ । ದೇ॒ವಸ್ಯ॑ ಸವಿ॒ತುರಾಧಿ॑ಪತ್ಯೇ । ಪ್ರಾ॒ಣ-ಮ್ಮೇ॑ ದಾಃ । ಆಶ್ರು॑ತಿರುತ್ತರ॒ತಃ ॥ 14 ॥
ಮಿ॒ತ್ರಾವರು॑ಣಯೋ॒ರಾಧಿ॑ಪತ್ಯೇ । ಶ್ರೋತ್ರ॑-ಮ್ಮೇ ದಾಃ । ವಿಧೃ॑ತಿರು॒ಪರಿ॑ಷ್ಟಾತ್ । ಬೃಹ॒ಸ್ಪತೇ॒ರಾಧಿ॑ಪತ್ಯೇ ।
ಬ್ರಹ್ಮ॑ ಮೇ ದಾಃ, ಖ್ಷ॒ತ್ರ-ಮ್ಮೇ॑ ದಾಃ । ತೇಜೋ॑ ಮೇ ಧಾ॒ ವರ್ಚೋ॑ ಮೇ ಧಾಃ । ಯಶೋ॑ ಮೇ ಧಾ॒ ಸ್ತಪೋ॑ ಮೇ ಧಾಃ ।
ಮನೋ॑ ಮೇ ಧಾಃ ॥ ಮನೋ॒ರಶ್ವಾ॑-ಽಸಿ॒ ಭೂರಿ॑ಪುತ್ರಾ ।
ವಿಶ್ವಾ᳚ಭ್ಯೋ ಮಾ ನಾ॒ಷ್ಟ್ರಾಭ್ಯಃ॑ ಪಾಹಿ ॥ 15 ॥
ಸೂ॒ಪ॒ಸದಾ॑ ಮೇ ಭೂಯಾ॒ ಮಾ ಮಾ॑ ಹಿಗ್ಂಸೀಃ ॥ ತಪೋ॒ ಷ್ವ॑ಗ್ನೇ॒ ಅನ್ತ॑ರಾಗ್ಂ ಅ॒ಮಿತ್ರಾನ್॑ ।
ತಪಾ॒ಶಗ್ಂಸ॑ಮರ॒ರುಷಃ॒ ಪರ॑ಸ್ಯ । ತಪಾ॑ ವಸೋ ಚಿಕಿತಾ॒ನೋ ಅ॒ಚಿತ್ತಾನ್॑ । ವಿ ತೇ॑ ತಿಷ್ಠನ್ತಾಮ॒ಜರಾ॑ ಅ॒ಯಾಸಃ॑ ॥ ಚಿತ॑-ಸ್ಸ್ಥ ಪರಿ॒ಚಿತಃ॑ । ಸ್ವಾಹಾ॑ ಮ॒ರುದ್ಭಿಃ॒ ಪರಿ॑ಶ್ರಯಸ್ವ । ಮಾ ಅ॑ಸಿ । ಪ್ರ॒ಮಾ ಅ॑ಸಿ । ಪ್ರ॒ತಿ॒ಮಾ ಅ॑ಸಿ ॥ 16 ॥
ಸ॒ಮ್ಮಾ ಅ॑ಸಿ । ವಿ॒ಮಾ ಅ॑ಸಿ । ಉ॒ನ್ಮಾ ಅ॑ಸಿ । ಅ॒ನ್ತರಿ॑ಖ್ಷಸ್ಯಾನ್ತ॒ರ್ಧಿರ॑ಸಿ ॥
ದಿವ॒ನ್ತಪ॑ಸಸ್ತ್ರಾಯಸ್ವ । ಆ॒ಭಿ-ರ್ಗೀ॒ರ್ಭಿ-ರ್ಯದತೋ॑ ನ ಊ॒ನಮ್ ।
ಆಪ್ಯಾ॑ಯಯ ಹರಿವೋ॒ ವರ್ಧ॑ಮಾನಃ । ಯ॒ದಾ ಸ್ತೋ॒ತೃಭ್ಯೋ॒ ಮಹಿ॑ ಗೋ॒ತ್ರಾ ರು॒ಜಾಸಿ॑ । ಭೂ॒ಯಿ॒ಷ್ಠ॒ಭಾಜೋ॒ ಅಧ॑ ತೇ ಸ್ಯಾಮ ॥ ಶು॒ಕ್ರನ್ತೇ॑ ಅ॒ನ್ಯ-ದ್ಯ॑ಜ॒ತನ್ತೇ॑ ಅ॒ನ್ಯತ್ ॥ 17 ॥
ವಿಷು॑ರೂಪೇ॒ ಅಹ॑ನೀ॒ ದ್ಯೌರಿ॑ವಾಸಿ । ವಿಶ್ವಾ॒ ಹಿ ಮಾ॒ಯಾ ಅವ॑ಸಿ ಸ್ವಧಾವಃ । ಭ॒ದ್ರಾ ತೇ॑ ಪೂಷನ್ನಿ॒ಹ ರಾ॒ತಿರ॑ಸ್ತು ॥ ಅರ್ಹ॑-ನ್ಬಿಭರ್ಷಿ॒ ಸಾಯ॑ಕಾನಿ॒ ಧನ್ವ॑ । ಅರ್ಹ॑ನ್ನಿ॒ಷ್ಕಂ-ಯಁ॑ಜ॒ತಂ-ವಿಁ॒ಶ್ವರೂ॑ಪಮ್ । ಅರ್ಹ॑ನ್ನಿ॒ದ-ನ್ದ॑ಯಸೇ॒ ವಿಶ್ವ॒-ಮಬ್ಭು॑ವಮ್ । ನ ವಾ ಓಜೀ॑ಯೋ ರುದ್ರ॒ ತ್ವದ॑ಸ್ತಿ ॥ ಗಾ॒ಯ॒ತ್ರಮ॑ಸಿ । ತ್ರೈಷ್ಟು॑ಭಮಸಿ । ಜಾಗ॑ತಮಸಿ । ಮಧು॒ ಮಧು॒ ಮಧು॑ ॥ 18 ॥
(ಅ॒ನ॒ - ಕ್ತ್ವ॒ಸಾ॒ದೀ॒ - ದು॒ತ್ತ॒ರ॒ತಃ - ಪಾ॑ಹಿ - ಪ್ರತಿ॒ಮಾ ಅ॑ಸಿ - ಯಜ॒ತನ್ತೇ॑ ಅ॒ನ್ಯಜ್ - ಜಾಗ॑ತಮ॒ಸ್ಯೇಕ॑-ಞ್ಚ) (ಅ. 5)
ಅನುವಾಕಂ 6
ದಶ॒ ಪ್ರಾಚೀ॒ರ್ದಶ॑ ಭಾಸಿ ದಖ್ಷಿ॒ಣಾ । ದಶ॑ ಪ್ರ॒ತೀಚೀ॒ರ್ದಶ॑ ಭಾ॒ಸ್ಯುದೀ॑ಚೀಃ । ದಶೋ॒ರ್ಧ್ವಾ ಭಾ॑ಸಿ ಸುಮನ॒ಸ್ಯಮಾ॑ನಃ । ಸ ನೋ॒ ರುಚ॑ನ್ಧೇ॒ಹ್ಯಹೃ॑ಣೀಯಮಾನಃ ॥
ಅ॒ಗ್ನಿಷ್ಟ್ವಾ॒ ವಸು॑ಭಿಃ ಪು॒ರಸ್ತಾ᳚-ದ್ರೋಚಯತು ಗಾಯ॒ತ್ರೇಣ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ ॥ ಇನ್ದ್ರ॑ಸ್ತ್ವಾ ರು॒ದ್ರೈ-ರ್ದ॑ಖ್ಷಿಣ॒ತೋ ರೋ॑ಚಯತು॒ ತ್ರೈಷ್ಟು॑ಭೇನ॒ ಛನ್ದ॑ಸಾ ।
ಸ ಮಾ॑ ರುಚಿ॒ತೋ ರೋ॑ಚಯ । ವರು॑ಣಸ್ತ್ವಾ-ಽಽದಿ॒ತ್ಯೈಃ ಪ॒ಶ್ಚಾ-ದ್ರೋ॑ಚಯತು॒ ಜಾಗ॑ತೇನ॒ ಛನ್ದ॑ಸಾ ।
ಸ ಮಾ॑ ರುಚಿ॒ತೋ ರೋ॑ಚಯ ॥ 19 ॥
ದ್ಯು॒ತಾ॒ನಸ್ತ್ವಾ॑ ಮಾರು॒ತೋ ಮ॒ರುದ್ಭಿ॑ರುತ್ತರ॒ತೋ ರೋ॑ಚಯ॒ತ್ವಾನು॑ಷ್ಟುಭೇನ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ । ಬೃಹ॒ಸ್ಪತಿ॑ಸ್ತ್ವಾ॒ ವಿಶ್ವೈ᳚-ರ್ದೇ॒ವೈರು॒ಪರಿ॑ಷ್ಟಾ-ದ್ರೋಚಯತು॒ ಪಾಙ್ಕ್ತೇ॑ನ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ ॥ ರೋ॒ಚಿ॒ತಸ್ತ್ವ-ನ್ದೇ॑ವ ಘರ್ಮ ದೇ॒ವೇಷ್ವಸಿ॑ ।
ರೋ॒ಚಿ॒ಷೀ॒ಯಾಹ-ಮ್ಮ॑ನು॒ಷ್ಯೇ॑ಷು ॥
ಸಮ್ರಾ᳚ಡ್ ಘರ್ಮ ರುಚಿ॒ತಸ್ತ್ವಂ ಏ॒ವೇಷ್ವಾಯು॑ಷ್ಮಾಗ್ಸ್ತೇಜ॒ಸ್ವೀ ಬ್ರ॑ಹ್ಮವರ್ಚ॒ಸ್ಯ॑ಸಿ । ರು॒ಚಿ॒ತೋ॑-ಽಹ-ಮ್ಮ॑ನು॒ಷ್ಯೇ᳚ಷ್ವಾಯು॑ಷ್ಮಾಗ್-ಸ್ತೇಜ॒ಸ್ವೀ ಬ್ರ॑ಹ್ಮವರ್ಚ॒ಸೀ ಭೂ॑ಯಾಸಮ್ ॥ ರುಗ॑ಸಿ । ರುಚ॒-ಮ್ಮಯಿ॑ ಧೇಹಿ ॥ 20 ॥
ಮಯಿ॒ ರುಕ್ ॥ ದಶ॑ ಪು॒ರಸ್ತಾ᳚-ದ್ರೋಚಸೇ । ದಶ॑ ದಖ್ಷಿ॒ಣಾ । ದಶ॑ ಪ್ರ॒ತ್ಯಮ್ಮ್ । ದಶೋದಙ್ಙ್॑ । ದಶೋ॒ರ್ಧ್ವೋ ಭಾ॑ಸಿ ಸುಮನ॒ಸ್ಯಮಾ॑ನಃ । ಸ ನ॑-ಸ್ಸಮ್ರಾ॒ಡಿಷ॒ಮೂರ್ಜ॑-ನ್ಧೇಹಿ । ವಾ॒ಜೀ ವಾ॒ಜಿನೇ॑ ಪವಸ್ವ । ರೋ॒ಚಿ॒ತೋ ಘ॒ರ್ಮೋ ರು॑ಚೀ॒ಯ ॥ 21 ॥
(ರೋ॒ಚ॒ಯ॒ - ಧೇ॒ಹಿ॒ - +ನವ॑ ಚ) (ಅ. 6)
ಅನುವಾಕಂ 7
ಅಪ॑ಶ್ಯಙ್ಗೋ॒ಪಾಮನಿ॑ಪದ್ಯಮಾನಮ್ । ಆ ಚ॒ ಪರಾ॑ ಚ ಪ॒ಥಿಭಿ॒ಶ್ಚರ॑ನ್ತಮ್ । ಸ ಸ॒ದ್ಧ್ರೀಚೀ॒-ಸ್ಸ ವಿಷೂ॑ಚೀ॒ರ್ವಸಾ॑ನಃ । ಆ ವ॑ರೀವರ್ತಿ॒ ಭುವ॑ನೇಷ್ವ॒ನ್ತಃ ॥ ಅತ್ರ॑ ಪ್ರಾ॒ವೀಃ । ಮಧು॒ ಮಾದ್ಧ್ವೀ᳚ಭ್ಯಾ॒-ಮ್ಮಧು॒ ಮಾಧೂ॑ಚೀಭ್ಯಾಮ್ । ಅನು॑ ವಾ-ನ್ದೇ॒ವವೀ॑ತಯೇ ॥ ಸಮ॒ಗ್ನಿರ॒ಗ್ನಿನಾ॑ ಗತ । ಸ-ನ್ದೇ॒ವೇನ॑ ಸವಿ॒ತ್ರಾ । ಸಗ್ಂ ಸೂರ್ಯೇ॑ಣ ರೋಚತೇ ॥ 22 ॥
ಸ್ವಾಹಾ॒ ಸಮ॒ಗ್ನಿಸ್ತಪ॑ಸಾ ಗತ । ಸ-ನ್ದೇ॒ವೇನ॑ ಸವಿ॒ತ್ರಾ ।
ಸಗ್ಂ ಸೂರ್ಯೇ॑ಣಾರೋಚಿಷ್ಟ ॥ ಧ॒ರ್ತಾ ದಿ॒ವೋ ವಿಭಾ॑ಸಿ॒ ರಜ॑ಸಃ । ಪೃ॒ಥಿ॒ವ್ಯಾ ಧ॒ರ್ತಾ । ಉ॒ರೋರ॒ನ್ತರಿ॑ಖ್ಷಸ್ಯ ಧ॒ರ್ತಾ । ಧ॒ರ್ತಾ ದೇ॒ವೋ ದೇ॒ವಾನಾ᳚ಮ್ । ಅಮ॑ರ್ತ್ಯಸ್ತಪೋ॒ಜಾಃ ॥ ಹೃ॒ದೇ ತ್ವಾ॒ ಮನ॑ಸೇ ತ್ವಾ । ದಿ॒ವೇ ತ್ವಾ॒ ಸೂರ್ಯಾ॑ಯ ತ್ವಾ ॥ 23 ॥
ಊ॒ರ್ಧ್ವಮಿ॒ಮ-ಮ॑ದ್ಧ್ವ॒ರಙ್ಕೃ॑ಧಿ । ದಿ॒ವಿ ದೇ॒ವೇಷು॒ ಹೋತ್ರಾ॑ ಯಚ್ಛ ॥ ವಿಶ್ವಾ॑ಸಾ-ಮ್ಭುವಾ-ಮ್ಪತೇ । ವಿಶ್ವ॑ಸ್ಯ ಭುವನಸ್ಪತೇ । ವಿಶ್ವ॑ಸ್ಯ ಮನಸಸ್ಪತೇ । ವಿಶ್ವ॑ಸ್ಯ ವಚಸಸ್ಪತೇ । ವಿಶ್ವ॑ಸ್ಯ ತಪಸಸ್ಪತೇ । ವಿಶ್ವ॑ಸ್ಯ ಬ್ರಹ್ಮಣಸ್ಪತೇ । ದೇ॒ವ॒ಶ್ರೂಸ್ತ್ವನ್ದೇ॑ವ ಘರ್ಮ ದೇ॒ವಾ-ನ್ಪಾ॑ಹಿ ॥ ತ॒ಪೋ॒ಜಾಂ-ವಾಁಚ॑ಮ॒ಸ್ಮೇ ನಿಯ॑ಚ್ಛ ದೇವಾ॒ಯುವ᳚ಮ್ ॥ 24 ॥
ಗರ್ಭೋ॑ ದೇ॒ವಾನಾ᳚ಮ್ ॥ ಪಿ॒ತಾ ಮ॑ತೀ॒ನಾಮ್ ॥
ಪತಿಃ॑ ಪ್ರ॒ಜಾನಾ᳚ಮ್ ॥ ಮತಿಃ॑ ಕವೀ॒ನಾಮ್ ॥
ಸನ್ದೇ॒ವೋ ದೇ॒ವೇನ॑ ಸವಿ॒ತ್ರಾ-ಽಯ॑ತಿಷ್ಟ । ಸಗ್ಂ ಸೂರ್ಯೇ॑ಣಾರುಕ್ತ ॥ ಆ॒ಯು॒ರ್ದಾಸ್ತ್ವಮ॒ಸ್ಮಭ್ಯ॑-ಙ್ಘರ್ಮ ವರ್ಚೋ॒ದಾ ಅ॑ಸಿ ॥ ಪಿ॒ತಾ ನೋ॑-ಽಸಿ ಪಿ॒ತಾ ನೋ॑ ಬೋಧ ॥ ಆ॒ಯು॒ರ್ಧಾಸ್ತ॑ನೂ॒ಧಾಃ ಪ॑ಯೋ॒ಧಾಃ ।
ವ॒ರ್ಚೋ॒ದಾ ವ॑ರಿವೋ॒ದಾ ದ್ರ॑ವಿಣೋ॒ದಾಃ ॥ 25 ॥
ಅ॒ನ್ತ॒ರಿ॒ಖ್ಷ॒ಪ್ರ॒ ಉ॒ರೋರ್ವರೀ॑ಯಾನ್ । ಅ॒ಶೀ॒ಮಹಿ॑ ತ್ವಾ॒ ಮಾ ಮಾ॑ ಹಿಗ್ಂಸೀಃ ॥ ತ್ವಮ॑ಗ್ನೇ ಗೃ॒ಹಪ॑ತಿ-ರ್ವಿ॒ಶಾಮ॑ಸಿ । ವಿಶ್ವಾ॑ಸಾ॒-ಮ್ಮಾನು॑ಷೀಣಾಮ್ । ಶ॒ತ-ಮ್ಪೂ॒ರ್ಭಿರ್ಯ॑ವಿಷ್ಠ ಪಾ॒ಹ್ಯಗ್ಂಹ॑ಸಃ । ಸ॒ಮೇ॒ದ್ಧಾರಗ್ಂ॑ ಶ॒ತಗ್ಂ ಹಿಮಾಃ᳚ ।
ತ॒-ನ್ದ್ರಾ॒ವಿಣಗ್ಂ॑ ಹಾರ್ದಿವಾ॒ನಮ್ । ಇ॒ಹೈವ ರಾ॒ತಯ॑-ಸ್ಸನ್ತು ॥ ತ್ವಷ್ಟೀ॑ಮತೀ ತೇ ಸಪೇಯ । ಸು॒ರೇತಾ॒ ರೇತೋ॒ ದಧಾ॑ನಾ ।
ವೀ॒ರಂ-ವಿಁ॑ದೇಯ॒ ತವ॑ ಸ॒ನ್ದೃಶಿ॑ ।
ಮಾ-ಽಹಗ್ಂ ರಾ॒ಯಸ್ಪೋಷೇ॑ಣ॒ ವಿ ಯೋ॑ಷಮ್ ॥ 26 ॥
(ರೋ॒ಚ॒ತೇ॒-ಸೂರ್ಯ॑ಯ ತ್ವಾ - ದೇವಾ॒ಯುವಂ॑ - ದ್ರವಿಣೋ॒ದಾ - ದಧಾ॑ನಾ॒ ದ್ವೇ ಚ॑) (ಅ. 7)
ಅನುವಾಕಂ 8
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾ ದ॑ದೇ ॥ ಅದಿ॑ತ್ಯೈ॒ ರಾಸ್ನಾ॑-ಽಸಿ । ಇಡ॒ ಏಹಿ॑ । ಅದಿ॑ತ॒ ಏಹಿ॑ । ಸರ॑ಸ್ವ॒ತ್ಯೇಹಿ॑ । ಅಸಾ॒ವೇಹಿ॑ ।
ಅಸಾ॒ವೇಹಿ॑ । ಅಸಾ॒ವೇಹಿ॑ ॥ 27 ॥
ಅದಿ॑ತ್ಯಾ ಉ॒ಷ್ಣೀಷ॑ಮಸಿ । ವಾ॒ಯುರ॑ಸ್ಯೈ॒ಡಃ । ಪೂ॒ಷಾ ತ್ವೋ॒ಪಾವ॑ಸೃಜತು । ಅ॒ಶ್ವಿಭ್ಯಾ॒-ಮ್ಪ್ರ ದಾ॑ಪಯ । ಯಸ್ತೇ॒ ಸ್ತನ॑-ಶ್ಶಶ॒ಯೋ ಯೋ ಮ॑ಯೋ॒ಭೂಃ । ಯೇನ॒ ವಿಶ್ವಾ॒ ಪುಷ್ಯ॑ಸಿ॒ ವಾರ್ಯಾ॑ಣಿ । ಯೋ ರ॑ತ್ನ॒ಧಾ ವ॑ಸು॒ವಿದ್ಯ-ಸ್ಸು॒ದತ್ರಃ॑ ।
ಸರ॑ಸ್ವತಿ॒ ತಮಿ॒ಹ ಧಾತ॑ವೇ-ಽಕಃ ॥ ಉಸ್ರ॑ ಘ॒ರ್ಮಗ್ಂ ಶಿಗ್ಂ॑ಷ । ಉಸ್ರ॑ ಘ॒ರ್ಮ-ಮ್ಪಾ॑ಹಿ ॥ 28 ॥
ಘ॒ರ್ಮಾಯ॑ ಶಿಗ್ಂಷ । ಬೃಹ॒ಸ್ಪತಿ॒ಸ್ತ್ವೋಪ॑ಸೀದತು । ದಾನ॑ವ-ಸ್ಸ್ಥ॒ ಪೇರ॑ವಃ । ವಿ॒ಷ್ವ॒ಗ್ವೃತೋ॒ ಲೋಹಿ॑ತೇನ । ಅ॒ಶ್ವಿಭ್ಯಾ᳚-ಮ್ಪಿನ್ವಸ್ವ । ಸರ॑ಸ್ವತ್ಯೈ ಪಿನ್ವಸ್ವ ।
ಪೂ॒ಷ್ಣೇ ಪಿ॑ನ್ವಸ್ವ । ಬೃಹ॒ಸ್ಪತ॑ಯೇ ಪಿನ್ವಸ್ವ । ಇನ್ದ್ರಾ॑ಯ ಪಿನ್ವಸ್ವ । ಇನ್ದ್ರಾ॑ಯ ಪಿನ್ವಸ್ವ ॥ 29 ॥
ಗಾ॒ಯ॒ತ್ರೋ॑-ಽಸಿ । ತ್ರೈಷ್ಟು॑ಭೋ-ಽಸಿ । ಜಾಗ॑ತಮಸಿ । ಸ॒ಹೋರ್ಜೋ ಭಾ॒ಗೇನೋಪ॒ ಮೇಹಿ॑ । ಇನ್ದ್ರಾ᳚ಶ್ವಿನಾ॒ ಮಧು॑ನ-ಸ್ಸಾರ॒ಘಸ್ಯ॑ । ಘ॒ರ್ಮ-ಮ್ಪಾ॑ತ ವಸವೋ॒ ಯಜ॑ತಾ॒ ವಟ್ । ಸ್ವಾಹಾ᳚ ತ್ವಾ॒ ಸೂರ್ಯ॑ಸ್ಯ ರ॒ಶ್ಮಯೇ॑ ವೃಷ್ಟಿ॒ವನ॑ಯೇ ಜುಹೋಮಿ । ಮಧು॑ ಹ॒ವಿರ॑ಸಿ । ಸೂರ್ಯ॑ಸ್ಯ॒ ತಪ॑ಸ್ತಪ । ದ್ಯಾವಾ॑ಪೃಥಿ॒ವೀಭ್ಯಾ᳚-ನ್ತ್ವಾ॒ ಪರಿ॑ಗೃಹ್ಣಾಮಿ ॥ 30 ॥
ಅ॒ನ್ತರಿ॑ಖ್ಷೇಣ॒ ತ್ವೋಪ॑ಯಚ್ಛಾಮಿ । ದೇ॒ವಾನಾ᳚-ನ್ತ್ವಾ ಪಿತೃ॒ಣಾಮನು॑ಮತೋ॒ ಭರ್ತುಗ್ಂ॑ ಶಕೇಯಮ್ । ತೇಜೋ॑-ಽಸಿ ।
ತೇಜೋ-ಽನು॒ಪ್ರೇಹಿ॑ । ದಿ॒ವಿ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ ।
ಅ॒ನ್ತ॒ರಿ॒ಖ್ಷ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ । ಪೃ॒ಥಿ॒ವಿ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ ।
ಸುವ॑ರಸಿ॒ ಸುವ॑ರ್ಮೇ ಯಚ್ಛ ।
ದಿವಂ॑-ಯಁಚ್ಛ ದಿ॒ವೋ ಮಾ॑ ಪಾಹಿ ॥ 31 ॥
(ಏಹಿ॑ - ಪಾಹಿ - ಪಿನ್ವಸ್ವ - ಗೃಹ್ಣಾಮಿ॒ - +ನವ॑ ಚ) (ಅ. 8)
ಅನುವಾಕಂ 9
ಸ॒ಮು॒ದ್ರಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಸ॒ಲಿ॒ಲಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ನಾ॒ಧೃ॒ಷ್ಯಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ಪ್ರ॒ತಿ॒ಧೃ॒ಷ್ಯಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ ।
ಅ॒ವ॒ಸ್ಯವೇ᳚ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ದುವ॑ಸ್ವತೇ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಶಿಮಿ॑ದ್ವತೇ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ಗ್ನಯೇ᳚ ತ್ವಾ॒ ವಸು॑ಮತೇ॒ ಸ್ವಾಹಾ᳚ ।
ಸೋಮಾ॑ಯ ತ್ವಾ ರು॒ದ್ರವ॑ತೇ॒ ಸ್ವಾಹಾ᳚ ।
ವರು॑ಣಾಯ ತ್ವಾ-ಽಽದಿ॒ತ್ಯವ॑ತೇ॒ ಸ್ವಾಹಾ᳚ ॥ 32 ॥
ಬೃಹ॒ಸ್ಪತ॑ಯೇ ತ್ವಾ ವಿ॒ಶ್ವದೇ᳚ವ್ಯಾವತೇ॒ ಸ್ವಾಹಾ᳚ ।
ಸ॒ವಿ॒ತ್ರೇ ತ್ವ॑ರ್ಭು॒ಮತೇ॑ ವಿಭು॒ಮತೇ᳚ ಪ್ರಭು॒ಮತೇ॒ ವಾಜ॑ವತೇ॒ ಸ್ವಾಹಾ᳚ । ಯ॒ಮಾಯ॒ ತ್ವಾ-ಽಙ್ಗಿ॑ರಸ್ವತೇ ಪಿತೃ॒ಮತೇ॒ ಸ್ವಾಹಾ᳚ ॥ ವಿಶ್ವಾ॒ ಆಶಾ॑ ದಖ್ಷಿಣ॒ಸತ್ । ವಿಶ್ವಾ᳚-ನ್ದೇ॒ವಾನ॑ಯಾಡಿ॒ಹ । ಸ್ವಾಹಾ॑ಕೃತಸ್ಯ ಘ॒ರ್ಮಸ್ಯ॑ । ಮಧೋಃ᳚ ಪಿಬತಮಶ್ವಿನಾ ।
ಸ್ವಾಹಾ॒-ಽಗ್ನಯೇ॑ ಯ॒ಜ್ಞಿಯಾ॑ಯ । ಶಂ-ಯಁಜು॑ರ್ಭಿಃ ॥
ಅಶ್ವಿ॑ನಾ ಘ॒ರ್ಮ-ಮ್ಪಾ॑ತಗ್ಂ ಹಾರ್ದಿವಾ॒ನಮ್ ॥ 33 ॥
ಅಹ॑-ರ್ದಿ॒ವಾಭಿ॑-ರೂ॒ತಿಭಿಃ॑ । ಅನು॑ ವಾ॒-ನ್ದ್ಯಾವಾ॑ಪೃಥಿ॒ವೀ ಮಗ್ಂ॑ಸಾತಾಮ್ । ಸ್ವಾಹೇನ್ದ್ರಾ॑ಯ ॥ ಸ್ವಾಹೇನ್ದ್ರಾ॒ವಟ್ । ಘ॒ರ್ಮಮ॑ಪಾತಮಶ್ವಿನಾ ಹಾರ್ದಿವಾ॒ನಮ್ ।
ಅಹ॑-ರ್ದಿ॒ವಾಭಿ॑ರೂ॒ತಿಭಿಃ॑ । ಅನು॑ ವಾ॒-ನ್ದ್ಯಾವಾ॑ಪೃಥಿ॒ವೀ ಅ॑ಮಗ್ಂಸಾತಾಮ್ । ತ-ಮ್ಪ್ರಾ॒ವ್ಯಂ॑-ಯಁಥಾ॒ ವಟ್ । ನಮೋ॑ ದಿ॒ವೇ । ನಮಃ॑ ಪೃಥಿ॒ವ್ಯೈ ॥ 34 ॥
ದಿ॒ವಿ ಧಾ॑ ಇ॒ಮಂ-ಯಁ॒ಜ್ಞಮ್ । ಯ॒ಜ್ಞಮಿ॒ಮ-ನ್ದಿ॒ವಿ ಧಾಃ᳚ । ದಿವ॑ಙ್ಗಚ್ಛ । ಅ॒ನ್ತರಿ॑ಖ್ಷಙ್ಗಚ್ಛ । ಪೃ॒ಥಿ॒ವೀಙ್ಗ॑ಚ್ಛ । ಪಞ್ಚ॑ ಪ್ರ॒ದಿಶೋ॑ ಗಚ್ಛ । ದೇ॒ವಾ-ನ್ಘ॑ರ್ಮ॒ಪಾ-ನ್ಗ॑ಚ್ಛ । ಪಿ॒ತೄ-ನ್ಘ॑ರ್ಮ॒ಪಾ-ನ್ಗ॑ಚ್ಛ ॥ 35 ॥
(ಆ॒ದಿ॒ತ್ಯವ॑ತೇ॒ ಸ್ವಾಹಾ॑-ಹಾರ್ದಿವಾ॒ನಮ್-ಪೃ॑ಥಿ॒ವ್ಯಾ-+ಅ॒ಷ್ಟೌ ಚ॑) (ಅ. 9)
ಅನುವಾಕಂ 10
ಇ॒ಷೇ ಪೀ॑ಪಿಹಿ । ಊ॒ರ್ಜೇ ಪೀ॑ಪಿಹಿ । ಬ್ರಹ್ಮ॑ಣೇ ಪೀಪಿಹಿ । ಖ್ಷ॒ತ್ರಾಯ॑ ಪೀಪಿಹಿ । ಅ॒ದ್ಭ್ಯಃ ಪೀ॑ಪಿಹಿ । ಓಷ॑ಧೀಭ್ಯಃ ಪೀಪಿಹಿ । ವನ॒ಸ್ಪತಿ॑ಭ್ಯಃ ಪೀಪಿಹಿ । ದ್ಯಾವಾ॑ಪೃಥಿ॒ವೀಭ್ಯಾ᳚-ಮ್ಪೀಪಿಹಿ । ಸು॒ಭೂ॒ತಾಯ॑ ಪೀಪಿಹಿ । ಬ್ರ॒ಹ್ಮ॒ವ॒ರ್ಚ॒ಸಾಯ॑ ಪೀಪಿಹಿ ॥ 36 ॥
ಯಜ॑ಮಾನಾಯ ಪೀಪಿಹಿ । ಮಹ್ಯ॒ಞ್ಜ್ಯೈಷ್ಠ್ಯಾ॑ಯ ಪೀಪಿಹಿ ॥ ತ್ವಿಷ್ಯೈ᳚ ತ್ವಾ । ದ್ಯು॒ಮ್ನಾಯ॑ ತ್ವಾ । ಇ॒ನ್ದ್ರಿ॒ಯಾಯ॑ ತ್ವಾ॒ ಭೂತ್ಯೈ᳚ ತ್ವಾ । ಧರ್ಮಾ॑-ಽಸಿ ಸು॒ಧರ್ಮಾ ಮೇ᳚ ನ್ಯ॒ಸ್ಮೇ । ಬ್ರಹ್ಮಾ॑ಣಿ ಧಾರಯ । ಖ್ಷ॒ತ್ರಾಣಿ॑ ಧಾರಯ । ವಿಶ॑ನ್ಧಾರಯ ।
ನೇತ್ತ್ವಾ॒ ವಾತ॑-ಸ್ಸ್ಕ॒ನ್ದಯಾ᳚ತ್ ॥ 37 ॥
ಅ॒ಮುಷ್ಯ॑ ತ್ವಾ ಪ್ರಾ॒ಣೇ ಸಾ॑ದಯಾಮಿ । ಅ॒ಮುನಾ॑ ಸ॒ಹ ನಿ॑ರ॒ರ್ಥಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಪೂ॒ಷ್ಣೇ ಶರ॑ಸೇ॒ ಸ್ವಾಹಾ᳚ ।
ಗ್ರಾವ॑ಭ್ಯ॒-ಸ್ಸ್ವಾಹಾ᳚ । ಪ್ರ॒ತಿ॒ರೇಭ್ಯ॒-ಸ್ಸ್ವಾಹಾ᳚ । ದ್ಯಾವಾ॑ಪೃಥಿ॒ವೀಭ್ಯಾ॒ಗ್॒ ಸ್ವಾಹಾ᳚ ।
ಪಿ॒ತೃಭ್ಯೋ॑ ಘರ್ಮ॒ಪೇಭ್ಯ॒-ಸ್ಸ್ವಾಹಾ᳚ ॥
ರು॒ದ್ರಾಯ॑ ರು॒ದ್ರಹೋ᳚ತ್ರೇ॒ ಸ್ವಾಹಾ᳚ ॥ 38 ॥
ಅಹ॒-ರ್ಜ್ಯೋತಿಃ॑ ಕೇ॒ತುನಾ॑ ಜುಷತಾಮ್ । ಸು॒ಜ್ಯೋ॒ತಿ-ರ್ಜ್ಯೋತಿ॑ಷಾ॒ಗ್॒ ಸ್ವಾಹಾ᳚ । ರಾತ್ರಿ॒ರ್ಜ್ಯೋತಿಃ॑ ಕೇ॒ತುನಾ॑ ಜುಷತಾಮ್ । ಸು॒ಜ್ಯೋ॒ತಿ-ರ್ಜ್ಯೋತಿ॑ಷಾ॒ಗ್॒ ಸ್ವಾಹಾ᳚ । ಅಪೀ॑ಪರೋ॒ ಮಾ-ಽಹ್ನೋ॒ ರಾತ್ರಿ॑ಯೈ ಮಾ ಪಾಹಿ । ಏ॒ಷಾ ತೇ॑ ಅಗ್ನೇ ಸ॒ಮಿತ್ । ತಯಾ॒ ಸಮಿ॑ದ್ಧ್ಯಸ್ವ । ಆಯು॑ರ್ಮೇ ದಾಃ । ವರ್ಚ॑ಸಾ ಮಾ-ಽಞ್ಜೀಃ । ಅಪೀ॑ಪರೋ ಮಾ॒ ರಾತ್ರಿ॑ಯಾ॒ ಅಹ್ನೋ॑ ಮಾ ಪಾಹಿ ॥ 39 ॥
ಏ॒ಷಾ ತೇ॑ ಅಗ್ನೇ ಸ॒ಮಿತ್ । ತಯಾ॒ ಸಮಿ॑ದ್ಧ್ಯಸ್ವ । ಆಯು॑ರ್ಮೇ ದಾಃ । ವರ್ಚ॑ಸಾ ಮಾ-ಽಞ್ಜೀಃ । ಅ॒ಗ್ನಿ-ರ್ಜ್ಯೋತಿ॒-ರ್ಜ್ಯೋತಿ॑ರ॒ಗ್ನಿ-ಸ್ಸ್ವಾಹಾ᳚ ।
ಸೂರ್ಯೋ॒ ಜ್ಯೋತಿ॒-ರ್ಜ್ಯೋತಿ॒-ಸ್ಸೂರ್ಯ॒-ಸ್ಸ್ವಾಹಾ᳚ । ಭೂ-ಸ್ಸ್ವಾಹಾ᳚ । ಹು॒ತಗ್ಂ ಹ॒ವಿಃ । ಮಧು॑ ಹ॒ವಿಃ । ಇನ್ದ್ರ॑ತಮೇ॒-ಽಗ್ನೌ ॥ 40 ॥
ಪಿ॒ತಾ ನೋ॑-ಽಸಿ॒ ಮಾ ಮಾ॑ ಹಿಗ್ಂಸೀಃ । ಅ॒ಶ್ಯಾಮ॑ ತೇ ದೇವಘರ್ಮ ।
ಮಧು॑ಮತೋ॒ ವಾಜ॑ವತಃ ಪಿತು॒ಮತಃ॑ । ಅಙ್ಗಿ॑ರಸ್ವತ-ಸ್ಸ್ವಧಾ॒ವಿನಃ॑ । ಅ॒ಶೀ॒ಮಹಿ॑ ತ್ವಾ॒ ಮಾ ಮಾ॑ ಹಿಗ್ಂಸೀಃ ॥ ಸ್ವಾಹಾ᳚ ತ್ವಾ॒ ಸೂರ್ಯ॑ಸ್ಯ ರ॒ಶ್ಮಿಭ್ಯಃ॑ । ಸ್ವಾಹಾ᳚ ತ್ವಾ॒ ನಖ್ಷ॑ತ್ರೇಭ್ಯಃ ॥ 41 ॥
(ಬ್ರ॒ಹ್ಮ॒ವ॒ರ್ಚ॒ಸಾಯ॑ ಪೀಪಿಹಿ - ಸ್ಕ॒ನ್ದಯಾ᳚-ದ್- ರು॒ದ್ರಾಯ॑ ರು॒ದ್ರಹೋ᳚ತ್ರೇ॒ ಸ್ವಾಹಾ - ಽಹ್ನೋ॑ ಮಾ ಪಾಹ್ - ಯ॒ಗ್ನೌ - +ಸ॒ಪ್ತ ಚ॑) (ಅ. 10)
ಅನುವಾಕಂ 11
ಘರ್ಮ॒ ಯಾ ತೇ॑ ದಿ॒ವಿ ಶುಕ್ । ಯಾ ಗಾ॑ಯ॒ತ್ರೇ ಛನ್ದ॑ಸಿ । ಯಾ ಬ್ರಾ᳚ಹ್ಮ॒ಣೇ । ಯಾ ಹ॑ವಿ॒ರ್ಧಾನೇ᳚ । ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ ಘರ್ಮ॒ ಯಾ ತೇ॒-ಽನ್ತರಿ॑ಖ್ಷೇ॒ ಶುಕ್ ।
ಯಾ ತ್ರೈಷ್ಟು॑ಭೇ॒ ಛನ್ದ॑ಸಿ । ಯಾ ರಾ॑ಜ॒ನ್ಯೇ᳚ । ಯಾ-ಽಽಗ್ನೀ᳚ದ್ಧ್ರೇ ।
ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ 42 ॥
ಘರ್ಮ॒ ಯಾ ತೇ॑ ಪೃಥಿ॒ವ್ಯಾಗ್ಂ ಶುಕ್ । ಯಾ ಜಾಗ॑ತೇ॒ ಛನ್ದ॑ಸಿ । ಯಾ ವೈಶ್ಯೇ᳚ । ಯಾ ಸದ॑ಸಿ । ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಾ-ನ್ದಾ॒ಶುಷೇ॒ ಮಯಃ॑ ॥ ಅನ್ವಿದ॑ನುಮತೇ॒ ತ್ವ-ಮ್ಮನ್ಯಾ॑ಸೈ॒ ಶಞ್ಚ॑ನಃ ಕೃಧಿ । ಕ್ರತ್ವೇ॒ ದಖ್ಷಾ॑ಯ ನೋ ಹಿನು॒ ಪ್ರಣ॒ ಆಯೂಗ್ಂ॑ಷಿ ತಾರಿಷಃ ॥ ದಿ॒ವಸ್ತ್ವಾ॑ ಪರ॒ಸ್ಪಾಯಾಃ᳚ । ಅ॒ನ್ತರಿ॑ಖ್ಷಸ್ಯ ತ॒ನುವಃ॑ ಪಾಹಿ । ಪೃ॒ಥಿ॒ವ್ಯಾಸ್ತ್ವಾ॒ ಧರ್ಮ॑ಣಾ ॥ 43 ॥
ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ಬ್ರಹ್ಮ॑ಣಸ್ತ್ವಾ ಪರ॒ಸ್ಪಾಯಾಃ᳚ । ಖ್ಷ॒ತ್ರಸ್ಯ॑ ತ॒ನುವಃ॑ ಪಾಹಿ । ವಿ॒ಶಸ್ತ್ವಾ॒ ಧರ್ಮ॑ಣಾ । ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ಪ್ರಾ॒ಣಸ್ಯ॑ ತ್ವಾ ಪರ॒ಸ್ಪಾಯೈ᳚ । ಚಖ್ಷು॑ಷಸ್ತ॒ನುವಃ॑ ಪಾಹಿ । ಶ್ರೋತ್ರ॑ಸ್ಯ ತ್ವಾ॒ ಧರ್ಮ॑ಣಾ । ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ವ॒ಲ್ಗುರ॑ಸಿ ಶಂ॒-ಯುಁಧಾ॑ಯಾಃ ॥ 44 ॥
ಶಿಶು॒-ರ್ಜನ॑ಧಾಯಾಃ ॥ ಶಞ್ಚ॒ ವಖ್ಷಿ॒ ಪರಿ॑ ಚ॒ ವಖ್ಷಿ॑ ।
ಚತು॑-ಸ್ಸ್ರಕ್ತಿ॒ರ್ನಾಭಿ॑ರ್-ಋ॒ತಸ್ಯ॑ । ಸದೋ॑ ವಿ॒ಶ್ವಾಯು॒-ಶ್ಶರ್ಮ॑ ಸ॒ಪ್ರಥಾಃ᳚ । ಅಪ॒ ದ್ವೇಷೋ॒ ಅಪ॒ ಹ್ವರಃ॑ । ಅ॒ನ್ಯದ್ವ್ರ॑ತಸ್ಯ ಸಶ್ಚಿಮ । ಘರ್ಮೈ॒ತ-ತ್ತೇ-ಽನ್ನ॑ಮೇ॒ತ-ತ್ಪುರೀ॑ಷಮ್ । ತೇನ॒ ವರ್ಧ॑ಸ್ವ॒ ಚಾ ಚ॑ ಪ್ಯಾಯಸ್ವ । ವ॒ರ್ಧಿ॒ಷೀ॒ಮಹಿ॑ ಚ ವ॒ಯಮ್ । ಆ ಚ॑ ಪ್ಯಾಸಿಷೀ॒ಮಹಿ॑ ॥ 45 ॥
ರನ್ತಿ॒-ರ್ನಾಮಾ॑ಸಿ ದಿ॒ವ್ಯೋ ಗ॑ನ್ಧ॒ರ್ವಃ । ತಸ್ಯ॑ ತೇ ಪ॒ದ್ವದ್ಧ॑ವಿ॒ರ್ಧಾನ᳚ಮ್ । ಅ॒ಗ್ನಿರದ್ಧ್ಯ॑ಖ್ಷಾಃ । ರು॒ದ್ರೋ-ಽಧಿ॑ಪತಿಃ ॥ ಸಮ॒ಹಮಾಯು॑ಷಾ । ಸ-ಮ್ಪ್ರಾ॒ಣೇನ॑ ।
ಸಂ-ವಁರ್ಚ॑ಸಾ । ಸ-ಮ್ಪಯ॑ಸಾ । ಸಙ್ಗೌ॑ಪ॒ತ್ಯೇನ॑ । ಸಗ್ಂ ರಾ॒ಯಸ್ಪೋಷೇ॑ಣ ॥ 46 ॥
ವ್ಯ॑ಸೌ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಅಚಿ॑ಕ್ರದ॒ದ್ವೃಷಾ॒ ಹರಿಃ॑ । ಮ॒ಹಾ-ನ್ಮಿ॒ತ್ರೋ ನ ದ॑ರ್ಶ॒ತಃ । ಸಗ್ಂ ಸೂರ್ಯೇ॑ಣ ರೋಚತೇ ॥ ಚಿದ॑ಸಿ ಸಮು॒ದ್ರಯೋ॑ನಿಃ । ಇನ್ದು॒-ರ್ದಖ್ಷ॑-ಶ್ಶ್ಯೇ॒ನ ಋ॒ತಾವಾ᳚ । ಹಿರ॑ಣ್ಯಪಖ್ಷ-ಶ್ಶಕು॒ನೋ ಭು॑ರ॒ಣ್ಯುಃ । ಮ॒ಹಾನ್-ಥ್ಸ॒ಧಸ್ಥೇ᳚ ಧ್ರು॒ವ ಆನಿಷ॑ತ್ತಃ ॥ 47 ॥
ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ ವಿ॒ಶ್ವಾವ॑ಸುಗ್ಂ ಸೋಮ ಗನ್ಧ॒ರ್ವಮ್ । ಆಪೋ॑ ದದೃ॒ಶುಷೀಃ᳚ । ತದೃ॒ತೇನಾ॒ ವ್ಯಾ॑ಯನ್ನ್ । ತದ॒ನ್ವವೈ᳚ತ್ । ಇನ್ದ್ರೋ॑ ರಾರಹಾ॒ಣ ಆ॑ಸಾಮ್ । ಪರಿ॒ ಸೂರ್ಯ॑ಸ್ಯ ಪರಿ॒ಧೀಗ್ಂ ರ॑ಪಶ್ಯತ್ ॥ ವಿ॒ಶ್ವಾವ॑ಸುರ॒ಭಿ ತನ್ನೋ॑ ಗೃಣಾತು । ದಿ॒ವ್ಯೋ ಗ॑ನ್ಧ॒ರ್ವೋ ರಜ॑ಸೋ ವಿ॒ಮಾನಃ॑ ।
ಯದ್ವಾ॑ ಘಾ ಸ॒ತ್ಯಮು॒ತ ಯನ್ನ ವಿ॒ದ್ಮ ॥ 48 ॥
ಧಿಯೋ॑ ಹಿನ್ವಾ॒ನೋ ಧಿಯ॒ ಇನ್ನೋ॑ ಅವ್ಯಾತ್ ॥ ಸಸ್ನಿ॑ಮವಿನ್ದ॒ಚ್ಚರ॑ಣೇ ನ॒ದೀನಾ᳚ಮ್ ।
ಅಪಾ॑ವೃಣೋ॒-ದ್ದುರೋ॒ ಅಶ್ಮ॑ವ್ರಜಾನಾಮ್ । ಪ್ರಾಸಾ᳚-ನ್ಗನ್ಧ॒ರ್ವೋ ಅ॒ಮೃತಾ॑ನಿ ವೋಚತ್ । ಇನ್ದ್ರೋ॒ ದಖ್ಷ॒-ಮ್ಪರಿ॑ಜಾನಾದ॒ಹೀನ᳚ಮ್ ॥ ಏ॒ತತ್ತ್ವ-ನ್ದೇ॑ವ ಘರ್ಮ ದೇ॒ವೋ ದೇ॒ವಾನುಪಾ॑ಗಾಃ ।
ಇ॒ದಮ॒ಹ-ಮ್ಮ॑ನು॒ಷ್ಯೋ॑ ಮನು॒ಷ್ಯಾನ್॑ । ಸೋಮ॑ಪೀ॒ಥಾನು॒ ಮೇಹಿ॑ । ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॑ಣ ॥
ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು ॥ 49 ॥
ದು॒ರ್ಮಿ॒ತ್ರಾಸ್ತಸ್ಮೈ॑ ಭೂಯಾಸುಃ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ । ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಖ್ಷು॑ ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ ॥ ಇ॒ಮಮೂ॒ ಷು ತ್ಯಮ॒ಸ್ಮಭ್ಯಗ್ಂ॑ ಸ॒ನಿಮ್ । ಗಾ॒ಯ॒ತ್ರನ್ನವೀ॑ಯಾಗ್ಂಸಮ್ ।
ಅಗ್ನೇ॑ ದೇ॒ವೇಷು॒ ಪ್ರವೋ॑ಚಃ ॥ 50 ॥
(ಯಾ-ಽಽಗ್ನೀ᳚ದ್ಧ್ರೇ॒ ತಾನ್ತಾ॑ ಏ॒ತೇನಾವ॑ಯಜೇ॒ ಸ್ವಾಹಾ॒ - ಧರ್ಮ॑ಣಾ - ಶಂ॒-ಯುಁಧಾ॑ಯಾಃ - ಪ್ಯಾಸಿಷೀ॒ಮಹಿ॒-ಪೋಷೇ॑ಣ॒-ನಿಷ॑ತ್ತೋ-ವಿ॒ದ್ಮ-ಸ॑ನ್-+ತ್ವ॒ಷ್ಟೌ ಚ॑) (ಅ. 11)
ಅನುವಾಕಂ 12
ಮ॒ಹೀ॒ನಾ-ಮ್ಪಯೋ॑-ಽಸಿ॒ ವಿಹಿ॑ತ-ನ್ದೇವ॒ತ್ರಾ ।
ಜ್ಯೋ॒ತಿ॒ರ್ಭಾ ಅ॑ಸಿ॒ ವನ॒ಸ್ಪತೀ॑ನಾ॒ಮೋಷ॑ಧೀನಾ॒ಗ್ಂ॒ ರಸಃ॑ ।
ವಾ॒ಜಿನ॑-ನ್ತ್ವಾ ವಾ॒ಜಿನೋ-ಽವ॑ ನಯಾಮಃ ।
ಊ॒ರ್ಧ್ವ-ಮ್ಮನ॑-ಸ್ಸುವ॒ರ್ಗಮ್ ॥ 51 ॥ (ಅ. 12)
ಅನುವಾಕಂ 13
ಅಸ್ಕಾ॒-ನ್ದ್ಯೌಃ ಪೃ॑ಥಿ॒ವೀಮ್ । ಅಸ್ಕಾ॑ನೃಷ॒ಭೋ ಯುವಾ॒ ಗಾಃ ।
ಸ್ಕ॒ನ್ನೇಮಾ ವಿಶ್ವಾ॒ ಭುವ॑ನಾ । ಸ್ಕ॒ನ್ನೋ ಯ॒ಜ್ಞಃ ಪ್ರಜ॑ನಯತು ॥ ಅಸ್ಕಾ॒ನಜ॑ನಿ॒ ಪ್ರಾಜ॑ನಿ । ಆ ಸ್ಕ॒ನ್ನಾಜ್ಜಾ॑ಯತೇ॒ ವೃಷಾ᳚ ।
ಸ್ಕ॒ನ್ನಾ-ತ್ಪ್ರಜ॑ನಿಷೀಮಹಿ ॥ 52 ॥ (ಅ. 13)
ಅನುವಾಕಂ 14
ಯಾ ಪು॒ರಸ್ತಾ᳚-ದ್ವಿ॒ದ್ಯುದಾಪ॑ತತ್ । ತಾನ್ತ॑ ಏ॒ತೇನಾವ॑ ಯಜೇ॒ ಸ್ವಾಹಾ᳚ । ಯಾ ದ॑ಖ್ಷಿಣ॒ತಃ । ಯಾ ಪ॒ಶ್ಚಾತ್ । ಯೋತ್ತ॑ರ॒ತಃ । ಯೋಪರಿ॑ಷ್ಟಾ-ದ್ವಿ॒ದ್ಯುದಾಪ॑ತತ್ । ತಾನ್ತ॑ ಏ॒ತೇನಾವ॑ ಯಜೇ॒ ಸ್ವಾಹಾ᳚ ॥ 53 ॥ (ಅ. 14)
ಅನುವಾಕಂ 15
ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹಾ॑ ಽಪಾ॒ನಾಯ॒ ಸ್ವಾಹಾ᳚ ।
ಚಖ್ಷು॑ಷೇ॒ ಸ್ವಾಹಾ॒ ಶ್ರೋತ್ರಾ॑ಯ॒ ಸ್ವಾಹಾ᳚ ।
ಮನ॑ಸೇ॒ ಸ್ವಾಹಾ॑ ವಾ॒ಚೇ ಸರ॑ಸ್ವತ್ಯೈ॒ ಸ್ವಾಹಾ᳚ ॥ 54 ॥ (ಅ. 15)
ಅನುವಾಕಂ 16
ಪೂ॒ಷ್ಣೇ ಸ್ವಾಹಾ॑ ಪೂ॒ಷ್ಣೇ ಶರ॑ಸೇ॒ ಸ್ವಾಹಾ᳚ ।
ಪೂ॒ಷ್ಣೇ ಪ್ರ॑ಪ॒ತ್ಥ್ಯಾ॑ಯ॒ ಸ್ವಾಹಾ॑ ಪೂ॒ಷ್ಣೇ ನ॒ರನ್ಧಿ॑ಷಾಯ॒ ಸ್ವಾಹಾ᳚ । ಪೂ॒ಷ್ಣೇ-ಽಙ್ಘೃ॑ಣಯೇ॒ ಸ್ವಾಹಾ॑ ಪೂ॒ಷ್ಣೇ ನ॒ರುಣಾ॑ಯ॒ ಸ್ವಾಹಾ᳚ ।
ಪೂ॒ಷ್ಣೇ ಸಾ॑ಕೇ॒ತಾಯ॒ ಸ್ವಾಹಾ᳚ ॥ 55 ॥ (ಅ. 16)
ಅನುವಾಕಂ 17
ಉದ॑ಸ್ಯ॒ ಶುಷ್ಮಾ᳚-ದ್ಭಾ॒ನುರ್ನಾರ್ತ॒ ಬಿಭ॑ರ್ತಿ । ಭಾ॒ರ-ಮ್ಪೃ॑ಥಿ॒ವೀ ನ ಭೂಮ॑ । ಪ್ರ ಶು॒ಕ್ರೈತು॑ ದೇ॒ವೀ ಮ॑ನೀ॒ಷಾ । ಅ॒ಸ್ಮ-ಥ್ಸುತ॑ಷ್ಟೋ॒ ರಥೋ॒ ನ ವಾ॒ಜೀ । ಅರ್ಚ॑ನ್ತ॒ ಏಕೇ॒ ಮಹಿ॒ ಸಾಮ॑ ಮನ್ವತ । ತೇನ॒ ಸೂರ್ಯ॑ಮಧಾರಯನ್ನ್ ।
ತೇನ॒ ಸೂರ್ಯ॑ಮರೋಚಯನ್ನ್ । ಘ॒ರ್ಮ-ಶ್ಶಿರ॒ಸ್ತದ॒ಯಮ॒ಗ್ನಿಃ ।
ಪುರೀ॑ಷಮಸಿ॒ ಸಮ್ಪ್ರಿ॑ಯ-ಮ್ಪ್ರ॒ಜಯಾ॑ ಪ॒ಶುಭಿ॑ರ್ಭುವತ್ । ಪ್ರ॒ಜಾಪತಿ॑ಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 56 ॥ (ಅ. 17)
ಅನುವಾಕಂ 18
ಯಾಸ್ತೇ॑ ಅಗ್ನ ಆ॒ರ್ದ್ರಾ ಯೋನ॑ಯೋ॒ ಯಾಃ ಕು॑ಲಾ॒ಯಿನೀಃ᳚ ।
ಯೇ ತೇ॑ ಅಗ್ನ॒ ಇನ್ದ॑ವೋ॒ ಯಾ ಉ॒ ನಾಭ॑ಯಃ । ಯಾಸ್ತೇ॑ ಅಗ್ನೇ ತ॒ನುವ॒ ಊರ್ಜೋ॒ ನಾಮ॑ । ತಾಭಿ॒ಸ್ತ್ವಮು॒ಭಯೀ॑ಭಿ-ಸ್ಸಂವಿಁದಾ॒ನಃ । ಪ್ರ॒ಜಾಭಿ॑ರಗ್ನೇ॒ ದ್ರವಿ॑ಣೇ॒ಹ ಸೀ॑ದ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 57 ॥ (ಅ. 18)
ಅನುವಾಕಂ 19
ಅ॒ಗ್ನಿರ॑ಸಿ ವೈಶ್ವಾನ॒ರೋ॑-ಽಸಿ । ಸಂ॒ವಁ॒ಥ್ಸ॒ರೋ॑-ಽಸಿ ಪರಿವಥ್ಸ॒ರೋ॑-ಽಸಿ । ಇ॒ದಾ॒ವ॒ಥ್ಸ॒ರೋ॑-ಽಸೀದುವಥ್ಸ॒ರೋ॑-ಽಸಿ । ಇ॒ದ್ವ॒ಥ್ಸ॒ರೋ॑-ಽಸಿ ವಥ್ಸ॒ರೋ॑-ಽಸಿ । ತಸ್ಯ॑ ತೇ ವಸ॒ನ್ತ-ಶ್ಶಿರಃ॑ । ಗ್ರೀ॒ಷ್ಮೋ ದಖ್ಷಿ॑ಣಃ ಪ॒ಖ್ಷಃ । ವ॒ರ್॒ಷಾಃ ಪುಚ್ಛ᳚ಮ್ ।
ಶ॒ರದುತ್ತ॑ರಃ ಪ॒ಖ್ಷಃ । ಹೇ॒ಮ॒ನ್ತೋ ಮದ್ಧ್ಯ᳚ಮ್ । ಪೂ॒ರ್ವ॒ಪ॒ಖ್ಷಾಶ್ಚಿತ॑ಯಃ । ಅ॒ಪ॒ರ॒ಪ॒ಖ್ಷಾಃ ಪುರೀ॑ಷಮ್ । ಅ॒ಹೋ॒ರಾ॒ತ್ರಾಣೀಷ್ಟ॑ಕಾಃ । ತಸ್ಯ॑ ತೇ॒ ಮಾಸಾ᳚ಶ್ಚಾರ್ಧಮಾ॒ಸಾಶ್ಚ॑ ಕಲ್ಪನ್ತಾಮ್ ।
ಋ॒ತವ॑ಸ್ತೇ ಕಲ್ಪನ್ತಾಮ್ । ಸಂ॒ವಁ॒ಥ್ಸ॒ರಸ್ತೇ॑ ಕಲ್ಪತಾಮ್ ।
ಅ॒ಹೋ॒ರಾ॒ತ್ರಾಣಿ॑ ತೇ ಕಲ್ಪನ್ತಾಮ್ । ಏತಿ॒ ಪ್ರೇತಿ॒ ವೀತಿ॒ ಸಮಿತ್ಯುದಿತಿ॑ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 58 ॥
(ಚಿತ॑ಯೋ॒ ನವ॑ ಚ) (ಅ. 19)
ಅನುವಾಕಂ 20
ಭೂರ್ಭುವ॒ಸ್ಸುವಃ॑ । ಊ॒ರ್ಧ್ವ ಊ॒ ಷುಣ॑ ಊ॒ತಯೇ᳚ । ಊ॒ರ್ಧ್ವೋ ನಃ॑ ಪಾ॒ಹ್ಯಗ್ಂಹ॑ಸಃ ॥
ವಿ॒ಧುನ್ದ॑ದ್ರಾ॒ಣಗ್ಂ ಸಮ॑ನೇ ಬಹೂ॒ನಾಮ್ । ಯುವಾ॑ನ॒ಗ್ಂ॒ ಸನ್ತ॑-ಮ್ಪಲಿ॒ತೋ ಜ॑ಗಾರ । ದೇ॒ವಸ್ಯ॑ ಪಶ್ಯ॒ ಕಾವ್ಯ॑-ಮ್ಮಹಿ॒ತ್ವಾ-ಽದ್ಯಾ ಮ॒ಮಾರ॑ । ಸ ಹ್ಯ॒-ಸ್ಸಮಾ॑ನ ॥
ಯದೃ॒ತೇ ಚಿ॑ದಭಿ॒ಶ್ರಿಷಃ॑ । ಪು॒ರಾ ಜ॒ರ್ತೃಭ್ಯ॑ ಆ॒ತೃದಃ॑ ।
ಸನ್ಧಾ॑ತಾ ಸ॒ನ್ಧಿ-ಮ್ಮ॒ಘವಾ॑ ಪುರೋ॒ವಸುಃ॑ ॥ 59 ॥
ನಿಷ್ಕ॑ರ್ತಾ॒ ವಿಹ್ರು॑ತ॒-ಮ್ಪುನಃ॑ ॥ ಪುನ॑ರೂ॒ರ್ಜಾ ನಿ ವ॑ರ್ತಸ್ವ॒ ಪುನ॑ರಗ್ನ ಇ॒ಷಾ-ಽಽಯು॑ಷಾ । ಪುನ॑ರ್ನಃ ಪಾಹಿ ವಿ॒ಶ್ವತಃ॑ ॥ ಸ॒ಹ ರ॒ಯ್ಯಾ ನಿ ವ॑ರ್ತ॒ಸ್ವಾಗ್ನೇ॒ ಪಿನ್ವ॑ಸ್ವ॒ ಧಾರ॑ಯಾ । ವಿ॒ಶ್ವಫ್ಸ್ನಿ॑ಯಾ ವಿ॒ಶ್ವತ॒ಸ್ಪರಿ॑ ॥ ಮಾ ನೋ॑ ಘರ್ಮ ವ್ಯಥಿ॒ತೋ ವಿ॑ವ್ಯಥೋ ನಃ । ಮಾ ನಃ॒ ಪರ॒ಮಧ॑ರ॒ಮ್ಮಾ ರಜೋ॑-ಽನೈಃ । ಮೋಷ್ವ॑ಸ್ಮಾಗ್ ಸ್ತಮ॑ಸ್ಯನ್ತ॒ರಾ ಧಾಃ᳚ । ಮಾ ರು॒ದ್ರಿಯಾ॑ಸೋ ಅ॒ಭಿಗು॑ರ್ವೃ॒ಧಾನಃ॑ ॥ ಮಾ ನಃ॒ ಕ್ರತು॑ಭಿರ್-ಹೀಡಿ॒ತೇಭಿ॑ರ॒ಸ್ಮಾನ್ । ದ್ವಿಷಾ॑ ಸುನೀತೇ॒ ಮಾ ಪರಾ॑ದಾಃ ।
ಮಾ ನೋ॑ ರು॒ದ್ರೋ ನಿರ್-ಋ॑ತಿ॒ರ್ಮಾ ನೋ॒ ಅಸ್ತಾ᳚ ।
ಮಾ ದ್ಯಾವಾ॑ಪೃಥಿ॒ವೀ ಹೀ॑ಡಿಷಾತಾಮ್ ॥ 60 ॥
ಉಪ॑ ನೋ ಮಿತ್ರಾವರುಣಾವಿ॒ಹಾವ॑ತಮ್ । ಅ॒ನ್ವಾದೀ᳚ದ್ಧ್ಯಾಥಾಮಿ॒ಹ ನ॑-ಸ್ಸಖಾಯಾ । ಆ॒ದಿ॒ತ್ಯಾನಾ॒-ಮ್ಪ್ರಸಿ॑ತಿರ್ಹೇ॒ತಿಃ । ಉ॒ಗ್ರಾ ಶ॒ತಾಪಾ᳚ಷ್ಠಾ ಘ॒ ವಿಷಾ॒ ಪರಿ॑ಣೋ ವೃಣಕ್ತು ॥
ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥ ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ದ್ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥
ಸ ತ್ವನ್ನೋ॑ ಅನ್ಗೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಖ್ಷ್ವ ನೋ॒ ವರು॑ಣ॒ಗ್ಂ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ । ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥
ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ । ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಖ್ಷು॑ ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ ॥
ವಯ॑-ಸ್ಸುಪ॒ರ್ಣಾ ಉಪ॑ಸೇದು॒ರಿನ್ದ್ರ᳚ಮ್ । ಪ್ರಿ॒ಯಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ । ಅಪ॑ ಧ್ವಾ॒ನ್ತಮೂ᳚ರ್ಣು॒ಹಿ ಪೂ॒ರ್ಧಿ ಚಖ್ಷುಃ॑ । ಮು॒ಮು॒ಗ್ಧ್ಯ॑ಸ್ಮಾ-ನ್ನಿ॒ಧಯೇ॑ವ ಬ॒ದ್ಧಾನ್ ॥ 61 ॥
(ಪು॒ರೋ॒ವಸು॑ರ್ಹೀಡಿಷಾತಾಗ್ಂ ಸುಪ॒ರ್ಣಾಃ) (ಅ. 20)
ಅನುವಾಕಂ 21
ಭೂರ್ಭುವ॒ಸ್ಸುವಃ॑ । ಮಯಿ॒ ತ್ಯದಿ॑ನ್ದ್ರಿ॒ಯ-ಮ್ಮ॒ಹತ್ । ಮಯಿ॒ ದಖ್ಷೋ॒ ಮಯಿ॒ ಕ್ರತುಃ॑ । ಮಯಿ॑ ಧಾಯಿ ಸು॒ವೀರ್ಯ᳚ಮ್ । ತ್ರಿಶು॑ಗ್ಘ॒ರ್ಮೋ ವಿಭಾ॑ತು ಮೇ । ಆಕೂ᳚ತ್ಯಾ॒ ಮನ॑ಸಾ ಸ॒ಹ ।
ವಿ॒ರಾಜಾ॒ ಜ್ಯೋತಿ॑ಷಾ ಸ॒ಹ । ಯ॒ಜ್ಞೇನ॒ ಪಯ॑ಸಾ ಸ॒ಹ । ಬ್ರಹ್ಮ॑ಣಾ॒ ತೇಜ॑ಸಾ ಸ॒ಹ । ಖ್ಷ॒ತ್ರೇಣ॒ ಯಶ॑ಸಾ ಸ॒ಹ । ಸ॒ತ್ಯೇನ॒ ತಪ॑ಸಾ ಸ॒ಹ । ತಸ್ಯ॒ ದೋಹ॑ಮಶೀಮಹಿ ।
ತಸ್ಯ॑ ಸು॒ಮ್ನಮ॑ಶೀಮಹಿ । ತಸ್ಯ॑ ಭ॒ಖ್ಷಮ॑ಶೀಮಹಿ ।
ತಸ್ಯ॑ ತ॒ ಇನ್ದ್ರೇ॑ಣ ಪೀ॒ತಸ್ಯ॒ ಮಧು॑ಮತಃ ।
ಉಪ॑ಹೂತ॒ಸ್ಯೋಪ॑ಹೂತೋ ಭಖ್ಷಯಾಮಿ ॥ 62 ॥
(ಯಶ॑ಸಾ ಸ॒ಹ ಷಟ್ಚ॑) (ಅ. 21)
ಅನುವಾಕಂ 22
ಯಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ । ಖ್ಷುಚ್ಚ॒ ತೃಷ್ಣಾ॑ ಚ । ಅಸ್ನು॒ಕ್ಚಾನಾ॑ಹುತಿಶ್ಚ । ಅ॒ಶ॒ನ॒ಯಾ ಚ॑ ಪಿಪಾ॒ಸಾ ಚ॑ । ಸೇ॒ದಿಶ್ಚಾಮ॑ತಿಶ್ಚ । ಏ॒ತಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ ।
ತಾಭಿ॑ರ॒ಮುಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 63 ॥ (ಅ. 22)
ಅನುವಾಕಂ 23
ಸ್ನಿಕ್ಚ॒ ಸ್ನೀಹಿ॑ತಿಶ್ಚ॒ ಸ್ನಿಹಿ॑ತಿಶ್ಚ । ಉ॒ಷ್ಣಾ ಚ॑ ಶೀ॒ತಾ ಚ॑ ।
ಉ॒ಗ್ರಾ ಚ॑ ಭೀ॒ಮಾ ಚ॑ । ಸ॒ದಾಮ್ನೀ॑ ಸೇ॒ದಿರನಿ॑ರಾ । ಏ॒ತಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ । ತಾಭಿ॑ರ॒ಮುಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 64 ॥ (ಅ. 23)
ಅನುವಾಕಂ 24
ಧುನಿ॑ಶ್ಚ ಧ್ವಾ॒ನ್ತಶ್ಚ॑ ಧ್ವ॒ನಶ್ಚ॑ ಧ್ವ॒ನಯಗ್ಗ್॑ಶ್ಚ ।
ನಿ॒ಲಿ॒ಮ್ಪಶ್ಚ॑ ವಿಲಿ॒ಮ್ಪಶ್ಚ॑ ವಿಖ್ಷಿ॒ಪಃ ॥ 65 ॥ (ಅ. 24)
ಅನುವಾಕಂ 25
ಉ॒ಗ್ರಶ್ಚ॒ ಧುನಿ॑ಶ್ಚ ಧ್ವಾ॒ನ್ತಶ್ಚ॑ ಧ್ವ॒ನಶ್ಚ॑ ಧ್ವ॒ನಯಗ್ಗ್॑ಶ್ಚ । ಸ॒ಹ॒ಸ॒ಹ್ವಾಗ್ಶ್ಚ॒ ಸಹ॑ಮಾನಶ್ಚ॒ ಸಹ॑ಸ್ವಾಗ್ಶ್ಚ॒ ಸಹೀ॑ಯಾಗ್ಶ್ಚ ।
ಏತ್ಯ॒ ಪ್ರೇತ್ಯ॑ ವಿಖ್ಷಿ॒ಪಃ ॥ 66 ॥ (ಅ. 25)
ಅನುವಾಕಂ 26
ಅ॒ಹೋ॒ರಾ॒ತ್ರೇ ತ್ವೋದೀ॑ರಯತಾಮ್ । ಅ॒ರ್ಧ॒ಮಾ॒ಸಾಸ್ತ್ವೋದೀ᳚-ಞ್ಜಯನ್ತು । ಮಾಸಾ᳚ಸ್ತ್ವಾ ಶ್ರಪಯನ್ತು । ಋ॒ತವ॑ಸ್ತ್ವಾ ಪಚನ್ತು ।
ಸಂ॒ವಁ॒ಥ್ಸ॒ರಸ್ತ್ವಾ॑ ಹನ್ತ್ವಸೌ ॥ 67 ॥ (ಅ. 26)
ಅನುವಾಕಂ 27
ಖಟ್ ಫ-ಡ್ಜ॒ಹಿ । ಛಿ॒ನ್ಧೀ ಭಿ॒ನ್ಧೀ ಹ॒ನ್ಧೀ ಕಟ್ ।
ಇತಿ॒ ವಾಚಃ॑ ಕ್ರೂರಾ॒ಣಿ ॥ 68 ॥ (ಅ. 27)
ಅನುವಾಕಂ 28
ವಿಗಾ ಇ॑ನ್ದ್ರ ವಿ॒ಚರ᳚ನ್-ಥ್ಸ್ಪಾಶಯಸ್ವ । ಸ್ವ॒ಪನ್ತ॑ಮಿನ್ದ್ರ ಪಶು॒ಮನ್ತ॑ಮಿಚ್ಛ । ವಜ್ರೇ॑ಣಾ॒ಮು-ಮ್ಬೋ॑ಧಯ ದುರ್ವಿ॒ದತ್ರ᳚ಮ್ । ಸ್ವ॒ಪ॒ತೋ᳚-ಽಸ್ಯ॒ ಪ್ರಹ॑ರ॒ ಭೋಜ॑ನೇಭ್ಯಃ ॥
ಅಗ್ನೇ॑ ಅ॒ಗ್ನಿನಾ॒ ಸಂವಁ॑ದಸ್ವ । ಮೃತ್ಯೋ॑ ಮೃ॒ತ್ಯುನಾ॒ ಸಂವಁ॑ದಸ್ವ । ನಮ॑ಸ್ತೇ ಅಸ್ತು ಭಗವಃ ॥ ಸ॒ಕೃತ್ತೇ॑ ಅಗ್ನೇ॒ ನಮಃ॑ । ದ್ವಿಸ್ತೇ॒ ನಮಃ॑ । ತ್ರಿಸ್ತೇ॒ ನಮಃ॑ । ಚ॒ತುಸ್ತೇ॒ ನಮಃ॑ । ಪ॒ಞ್ಚ॒ಕೃತ್ವ॑ಸ್ತೇ॒ ನಮಃ॑ ।
ದ॒ಶ॒ಕೃತ್ವ॑ಸ್ತೇ॒ ನಮಃ॑ । ಶ॒ತ॒ಕೃತ್ವ॑ಸ್ತೇ॒ ನಮಃ॑ । ಆ॒ಸ॒ಹ॒ಸ್ರ॒ಕೃತ್ವ॑ಸ್ತೇ॒ ನಮಃ॑ । ಅ॒ಪ॒ರಿ॒ಮಿ॒ತ॒ಕೃತ್ವ॑ಸ್ತೇ॒ ನಮಃ॑ । ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ 69 ॥
(ತ್ರಿಸ್ತೇ॒ ನಮ॑-ಸ್ಸ॒ಪ್ತ ಚ॑) (ಅ. 28)
ಅನುವಾಕಂ 29
ಅಸೃ॑-ನ್ಮುಖೋ ರುಧಿ॒ರೇಣಾ॒ವ್ಯ॑ಕ್ತಃ । ಯ॒ಮಸ್ಯ॑ ದೂ॒ತ-ಶ್ಶ್ವಪಾ॒-ದ್ವಿಧಾ॑ವಸಿ । ಗೃದ್ಧ್ರ॑-ಸ್ಸುಪ॒ರ್ಣಃ ಕು॒ಣಪ॒ನ್ನಿಷೇ॑ವಸೇ ।
ಯ॒ಮಸ್ಯ॑ ದೂ॒ತಃ ಪ್ರಹಿ॑ತೋ ಭ॒ವಸ್ಯ॑ ಚೋ॒ಭಯೋಃ᳚ ॥ 70 ॥ (ಅ. 29)
ಅನುವಾಕಂ 30
ಯದೇ॒ತ-ದ್ವೃ॑ಕ॒ಸೋ ಭೂ॒ತ್ವಾ । ವಾಗ್ ದೇ᳚ವ್ಯಭಿ॒ರಾಯ॑ಸಿ । ದ್ವಿ॒ಷನ್ತ॑-ಮ್ಮೇ॒-ಽಭಿರಾ॑ಯ । ತ-ಮ್ಮೃ॑ತ್ಯೋ ಮೃ॒ತ್ಯವೇ॑ ನಯ । ಸ ಆರ್ತ್ಯಾ-ಽಽರ್ತಿ॒ಮಾರ್ಚ್ಛ॑ತು ॥ 71 ॥ (ಅ. 30)
ಅನುವಾಕಂ 31
ಯದೀ॑ಷಿ॒ತೋ ಯದಿ॑ ವಾ ಸ್ವಕಾ॒ಮೀ । ಭ॒ಯೇಡ॑ಕೋ॒ ವದ॑ತಿ॒ ವಾಚ॑ಮೇ॒ತಾಮ್ । ತಾಮಿ॑ನ್ದ್ರಾ॒ಗ್ನೀ ಬ್ರಹ್ಮ॑ಣಾ ಸಂವಿಁದಾ॒ನೌ ।
ಶಿ॒ವಾಮ॒ಸ್ಮಭ್ಯ॑-ಙ್ಕೃಣುತಙ್ಗೃ॒ಹೇಷು॑ ॥ 72 ॥ (ಅ. 31)
ಅನುವಾಕಂ 32
ದೀರ್ಘ॑ಮುಖಿ॒ ದುರ್ಹ॑ಣು । ಮಾ ಸ್ಮ॑ ದಖ್ಷಿಣ॒ತೋ ವ॑ದಃ ।
ಯದಿ॑ ದಖ್ಷಿಣ॒ತೋ ವದಾ᳚-ದ್ದ್ವಿ॒ಷನ್ತ॒-ಮ್ಮೇ-ಽವ॑ ಬಾಧಾಸೈ ॥ 73 ॥ (ಅ. 32)
ಅನುವಾಕಂ 33
ಇ॒ತ್ಥಾದುಲೂ॑ಕ॒ ಆಪ॑ಪ್ತತ್ । ಹಿ॒ರ॒ಣ್ಯಾ॒ಖ್ಷೋ ಅಯೋ॑ಮುಖಃ ।
ರಖ್ಷ॑ಸಾನ್ದೂ॒ತ ಆಗ॑ತಃ । ತಮಿ॒ತೋ ನಾ॑ಶಯಾಗ್ನೇ ॥ 74 ॥ (ಅ. 33)
ಅನುವಾಕಂ 34
ಯದೇ॒ತ-ದ್ಭೂ॒ತಾನ್ಯ॑ನ್ವಾ॒ವಿಶ್ಯ॑ । ದೈವೀಂ॒-ವಾಁಚಂ॑-ವಁ॒ದಸಿ॑ । ದ್ವಿ॒ಷತೋ॑ ನಃ॒ ಪರಾ॑ವದ । ತಾ-ನ್ಮೃ॑ತ್ಯೋ ಮೃ॒ತ್ಯವೇ॑ ನಯ । ತ ಆರ್ತ್ಯಾ-ಽಽರ್ತಿ॒ಮಾರ್ಚ್ಛ॑ನ್ತು ।
ಅ॒ಗ್ನಿನಾ॒-ಽಗ್ನಿ-ಸ್ಸಂವಁ॑ದತಾಮ್ ॥ 75 ॥ (ಅ. 34)
ಅನುವಾಕಂ 35
ಪ್ರ॒ಸಾರ್ಯ॑ ಸ॒ಕ್ಥ್ಯೌ॑ ಪತ॑ಸಿ । ಸ॒ವ್ಯಮಖ್ಷಿ॑ ನಿ॒ಪೇಪಿ॑ ಚ ।
ಮೇಹ ಕ॑ಸ್ಯಚ॒ನಾಮ॑ಮತ್ ॥ 76 ॥ (ಅ. 35)
ಅನುವಾಕಂ 36
ಅತ್ರಿ॑ಣಾ ತ್ವಾ ಕ್ರಿಮೇ ಹನ್ಮಿ । ಕಣ್ವೇ॑ನ ಜ॒ಮದ॑ಗ್ನಿನಾ ।
ವಿ॒ಶ್ವಾವ॑ಸೋ॒-ರ್ಬ್ರಹ್ಮ॑ಣಾ ಹ॒ತಃ । ಕ್ರಿಮೀ॑ಣಾ॒ಗ್ಂ॒ ರಾಜಾ᳚ ।
ಅಪ್ಯೇ॑ಷಾಗ್ ಸ್ಥ॒ಪತಿ॑ರ್ಹ॒ತಃ । ಅಥೋ॑ ಮಾ॒ತಾ-ಽಥೋ॑ ಪಿ॒ತಾ ।
ಅಥೋ᳚ ಸ್ಥೂ॒ರಾ ಅಥೋ᳚ ಖ್ಷು॒ದ್ರಾಃ । ಅಥೋ॑ ಕೃ॒ಷ್ಣಾ ಅಥೋ᳚ ಶ್ವೇ॒ತಾಃ । ಅಥೋ॑ ಆ॒ಶಾತಿ॑ಕಾ ಹ॒ತಾಃ ।
ಶ್ವೇ॒ತಾಭಿ॑-ಸ್ಸ॒ಹ ಸರ್ವೇ॑ ಹ॒ತಾಃ ॥ 77 ॥ (ಅ. 36)
ಅನುವಾಕಂ 37
ಆಹ॒ರಾವ॑ದ್ಯ । ಶೃ॒ತಸ್ಯ॑ ಹ॒ವಿಷೋ॒ ಯಥಾ᳚ । ತ-ಥ್ಸ॒ತ್ಯಮ್ ।
ಯದ॒ಮುಂ-ಯಁ॒ಮಸ್ಯ॒ ಜಮ್ಭ॑ಯೋಃ । ಆದ॑ಧಾಮಿ॒ ತಥಾ॒ ಹಿ ತತ್ । ಖಣ್ಫಣ್ಮ್ರಸಿ॑ ॥ 78 ॥ (ಅ. 37)
ಅನುವಾಕಂ 38
ಬ್ರಹ್ಮ॑ಣಾ ತ್ವಾ ಶಪಾಮಿ । ಬ್ರಹ್ಮ॑ಣಸ್ತ್ವಾ ಶ॒ಪಥೇ॑ನ ಶಪಾಮಿ । ಘೋ॒ರೇಣ॑ ತ್ವಾ॒ ಭೃಗೂ॑ಣಾ॒ಞ್ಚಖ್ಷು॑ಷಾ॒ ಪ್ರೇಖ್ಷೇ᳚ । ರೌ॒ದ್ರೇಣ॒ ತ್ವಾಙ್ಗಿ॑ರಸಾ॒-ಮ್ಮನ॑ಸಾ ಧ್ಯಾಯಾಮಿ ।
ಅ॒ಘಸ್ಯ॑ ತ್ವಾ॒ ಧಾರ॑ಯಾ ವಿದ್ಧ್ಯಾಮಿ ।
ಅಧ॑ರೋ॒ ಮ-ತ್ಪ॑ದ್ಯಸ್ವಾಸೌ ॥ 79 ॥ (ಅ. 38)
ಅನುವಾಕಂ 39
ಉತ್ತು॑ದ ಶಿಮಿಜಾವರಿ । ತಲ್ಪೇ॑ಜೇ॒ ತಲ್ಪ॒ ಉತ್ತು॑ದ । ಗಿ॒ರೀಗ್ಂ ರನು॒ ಪ್ರವೇ॑ಶಯ । ಮರೀ॑ಚೀ॒ರುಪ॒ ಸನ್ನು॑ದ ।
ಯಾವ॑ದಿ॒ತಃ ಪು॒ರಸ್ತಾ॑ದು॒ದಯಾ॑ತಿ॒ ಸೂರ್ಯಃ॑ ।
ತಾವ॑ದಿ॒ತೋ॑-ಽಮುನ್ನಾ॑ಶಯ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 80 ॥ (ಅ. 39)
ಅನುವಾಕಂ 40
ಭೂರ್ಭುವ॒ಸ್ಸುವೋ॒ ಭೂರ್ಭುವ॒ಸ್ಸುವೋ॒ ಭೂರ್ಭುವ॒ಸ್ಸುವಃ॑ ।
ಭುವೋ᳚-ಽದ್ಧಾಯಿ॒ ಭುವೋ᳚-ಽದ್ಧಾಯಿ॒ ಭುವೋ᳚-ಽದ್ಧಾಯಿ ।
ನೃ॒ಮ್ಣಾಯಿ ನೃ॒ಮ್ಣ-ನ್ನೃ॒ಮ್ಣಾಯಿ ನೃ॒ಮ್ಣ-ನ್ನೃ॒ಮ್ಣಾಯಿ ನೃ॒ಮ್ಣಮ್ । ನಿ॒ಧಾ ಯ್ಯೋ॑-ಽವಾಯಿ ನಿ॒ಧಾ ಯ್ಯೋ॑-ಽವಾಯಿ ನಿ॒ಧಾ ಯ್ಯೋ॑-ಽವಾಯಿ । ಏ ಅ॒ಸ್ಮೇ ಅ॒ಸ್ಮೇ । ಸುವ॒ರ್ನ ಜ್ಯೋತೀಃ᳚ ॥ 81 ॥ (ಅ. 40)
ಅನುವಾಕಂ 41
ಪೃ॒ಥಿ॒ವೀ ಸ॒ಮಿತ್ । ತಾಮ॒ಗ್ನಿ-ಸ್ಸಮಿ॑ನ್ಧೇ । ಸಾ-ಽಗ್ನಿಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ॥
ಅ॒ನ್ತರಿ॑ಖ್ಷಗ್ಂ ಸ॒ಮಿತ್ ॥ 82 ॥
ತಾಂ-ವಾಁ॒ಯು-ಸ್ಸಮಿ॑ನ್ಧೇ । ಸಾ ವಾ॒ಯುಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ।
ದ್ಯೌ-ಸ್ಸ॒ಮಿತ್ । ತಾಮಾ॑ದಿ॒ತ್ಯ-ಸ್ಸಮಿ॑ನ್ಧೇ ॥ 83 ॥
ಸಾ-ಽಽದಿ॒ತ್ಯಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ॥ ಪ್ರಾ॒ಜಾ॒ಪ॒ತ್ಯಾ ಮೇ॑ ಸ॒ಮಿದ॑ಸಿ ಸಪತ್ನ॒ಖ್ಷಯ॑ಣೀ ।
ಭ್ರಾ॒ತೃ॒ವ್ಯ॒ಹಾ ಮೇ॑-ಽಸಿ॒ ಸ್ವಾಹಾ᳚ ॥ ಅಗ್ನೇ᳚ ವ್ರತಪತೇ ವ್ರ॒ತಞ್ಚ॑ರಿಷ್ಯಾಮಿ ॥ 84 ॥
ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ । ವಾಯೋ᳚ ವ್ರತಪತ॒ ಆದಿ॑ತ್ಯ ವ್ರತಪತೇ । ವ್ರ॒ತಾನಾಂ᳚-ವ್ರಁತಪತೇ ವ್ರ॒ತಞ್ಚ॑ರಿಷ್ಯಾಮಿ । ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ ॥ ದ್ಯೌ-ಸ್ಸ॒ಮಿತ್ । ತಾಮಾ॑ದಿ॒ತ್ಯ-ಸ್ಸಮಿ॑ನ್ಧೇ । ಸಾ-ಽಽದಿ॒ತ್ಯಗ್ಂ ಸಮಿ॑ನ್ಧೇ ।
ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ ॥ 85 ॥
ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ।
ಅ॒ನ್ತರಿ॑ಖ್ಷಗ್ಂ ಸ॒ಮಿತ್ । ತಾಂ-ವಾಁ॒ಯು-ಸ್ಸಮಿ॑ನ್ಧೇ । ಸಾ ವಾ॒ಯುಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ ॥ 86 ॥
ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ । ಪೃ॒ಥಿ॒ವೀ ಸ॒ಮಿತ್ । ತಾಮ॒ಗ್ನಿ-ಸ್ಸಮಿ॑ನ್ಧೇ । ಸಾ-ಽಗ್ನಿಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ ।
ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ ।
ಯಶ॑ಸಾ ಬ್ರಹ್ಮವರ್ಚ॒ಸೇನ॑ ॥ 87 ॥
ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ । ಪ್ರಾ॒ಜಾ॒ಪ॒ತ್ಯಾ ಮೇ॑ ಸ॒ಮಿದ॑ಸಿ ಸಪತ್ನ॒ಖ್ಷಯ॑ಣೀ । ಭ್ರಾ॒ತೃ॒ವ್ಯ॒ಹಾ ಮೇ॑-ಽಸಿ॒ ಸ್ವಾಹಾ᳚ । ಆದಿ॑ತ್ಯ ವ್ರತಪತೇ ವ್ರ॒ತಮ॑ಚಾರಿಷಮ್ ।
ತದ॑ಶಕ॒-ನ್ತನ್ಮೇ॑-ಽರಾಧಿ । ವಾಯೋ᳚ ವ್ರತಪ॒ತೇ-ಽಗ್ನೇ᳚ ವ್ರತಪತೇ । ವ್ರ॒ತಾನಾಂ᳚-ವ್ರಁತಪತೇ ವ್ರ॒ತಮ॑ಚಾರಿಷಮ್ । ತದ॑ಶಕ॒-ನ್ತನ್ಮೇ॑-ಽರಾಧಿ ॥ 88 ॥
(ಸ॒ಮಿಥ್ - ಸಮಿ॑ನ್ಧೇ - ವ್ರ॒ತಞ್ಚ॑ರಿಷ್ಯಾ॒ - ಮ್ಯಾಯು॑ಷಾ॒ ತೇಜ॑ಸಾ॒ - ವರ್ಚ॑ಸಾ ಶ್ರಿ॒ಯಾ - ಯಶ॑ಸಾ ಬ್ರಹ್ಮವರ್ಚ॒ಸೇನಾ॒ - +ಷ್ಟೌ ಚ॑) (ಅ. 41)
ಅನುವಾಕಂ 42
ಶನ್ನೋ॒ ವಾತಃ॑ ಪವತಾ-ಮ್ಮಾತ॒ರಿಶ್ವಾ॒ ಶನ್ನ॑ಸ್ತಪತು॒ ಸೂರ್ಯಃ॑ । ಅಹಾ॑ನಿ॒ ಶ-ಮ್ಭ॑ವನ್ತು ನ॒-ಶ್ಶಗ್ಂ ರಾತ್ರಿಃ॒ ಪ್ರತಿ॑ಧೀಯತಾಮ್ ॥ ಶಮು॒ಷಾ ನೋ॒ ವ್ಯು॑ಚ್ಛತು॒ ಶಮಾ॑ದಿ॒ತ್ಯ ಉದೇ॑ತು ನಃ । ಶಿ॒ವಾ ನ॒-ಶ್ಶನ್ತ॑ಮಾ ಭವ ಸುಮೃಡೀ॒ಕಾ ಸರ॑ಸ್ವತಿ । ಮಾ ತೇ॒ ವ್ಯೋ॑ಮ ಸ॒ನ್ದೃಶಿ॑ ॥
ಇಡಾ॑ಯೈ॒ ವಾಸ್ತ್ವ॑ಸಿ ವಾಸ್ತು॒ಮ-ದ್ವಾ᳚ಸ್ತು॒ಮನ್ತೋ॑ ಭೂಯಾಸ್ಮ॒ ಮಾ ವಾಸ್ತೋ᳚-ಶ್ಛಿಥ್ಸ್ಮಹ್ಯ ವಾ॒ಸ್ತು-ಸ್ಸ ಭೂ॑ಯಾ॒-ದ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಪ್ರ॒ತಿ॒ಷ್ಠಾ-ಽಸಿ॑ ಪ್ರತಿ॒ಷ್ಠಾವ॑ನ್ತೋ ಭೂಯಾಸ್ಮ॒ ಮಾ ಪ್ರ॑ತಿ॒ಷ್ಠಾಯಾ᳚- ಶ್ಛಿಥ್ಸ್ಮಹ್ಯ ಪ್ರತಿ॒ಷ್ಠಃ
ಸ ಭೂ॑ಯಾ॒-ದ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಆ ವಾ॑ತ ವಾಹಿ ಭೇಷ॒ಜಮ್ ಁವಿ ವಾ॑ತ ವಾಹಿ॒ ಯದ್ರಪಃ॑ ।
ತ್ವಗ್ಂ ಹಿ ವಿ॒ಶ್ವಭೇ॑ಷಜೋ ದೇ॒ವಾನಾ᳚-ನ್ದೂ॒ತ ಈಯ॑ಸೇ ॥
ದ್ವಾವಿ॒ಮೌ ವಾತೌ॑ ವಾತ॒ ಆ ಸಿನ್ಧಾ॒ರಾ ಪ॑ರಾ॒ವತಃ॑ ॥ 89 ॥
ದಖ್ಷ॑-ಮ್ಮೇ ಅ॒ನ್ಯ ಆ॒ವಾತು॒ ಪರಾ॒-ಽನ್ಯೋ ವಾ॑ತು॒ ಯ-ದ್ರಪಃ॑ ॥
ಯದ॒ದೋ ವಾ॑ತ ತೇ ಗೃ॒ಹೇ॑-ಽಮೃತ॑ಸ್ಯ ನಿ॒ಧಿರ್ಹಿ॒ತಃ ।
ತತೋ॑ ನೋ ದೇಹಿ ಜೀ॒ವಸೇ॒ ತತೋ॑ ನೋ ಧೇಹಿ ಭೇಷ॒ಜಮ್ ॥
ತತೋ॑ ನೋ॒ ಮಹ॒ ಆವ॑ಹ॒ ವಾತ॒ ಆವಾ॑ತು ಭೇಷ॒ಜಮ್ ।
ಶ॒ಮ್ಭೂ-ರ್ಮ॑ಯೋ॒ಭೂರ್ನೋ॑ ಹೃ॒ದೇ ಪ್ರ ಣ॒ ಆಯೂಗ್ಂ॑ಷಿ ತಾರಿಷತ್ ॥ ಇನ್ದ್ರ॑ಸ್ಯ ಗೃ॒ಹೋ॑-ಽಸಿ॒ ತ-ನ್ತ್ವಾ॒ ಪ್ರಪ॑ದ್ಯೇ॒ ಸಗು॒ಸ್ಸಾಶ್ವಃ॑ । ಸ॒ಹ ಯನ್ಮೇ॒ ಅಸ್ತಿ॒ ತೇನ॑ ॥
ಭೂಃ ಪ್ರಪ॑ದ್ಯೇ॒ ಭುವಃ॒ ಪ್ರಪ॑ದ್ಯೇ॒ ಸುವಃ॒ ಪ್ರಪ॑ದ್ಯೇ॒ ಭೂರ್ಭುವ॒ಸ್ಸುವಃ॒ ಪ್ರಪ॑ದ್ಯೇ ವಾ॒ಯುಮ್
ಪ್ರಪ॒ದ್ಯೇ-ಽನಾ᳚ರ್ತಾ-ನ್ದೇ॒ವತಾ॒-ಮ್ಪ್ರಪ॒ದ್ಯೇ ಽಶ್ಮಾ॑ನಮಾಖ॒ಣ-ಮ್ಪ್ರಪ॑ದ್ಯೇ ಪ್ರ॒ಜಾಪ॑ತೇರ್
ಬ್ರಹ್ಮಕೋ॒ಶ-ಮ್ಬ್ರಹ್ಮ॒ ಪ್ರಪ॑ದ್ಯ॒ ಓ-ಮ್ಪ್ರಪ॑ದ್ಯೇ ॥
ಅ॒ನ್ತರಿ॑ಖ್ಷ-ಮ್ಮ ಉ॒ರ್ವ॑ನ್ತರ॑-ಮ್ಬೃ॒ಹದ॒ಗ್ನಯಃ॒ ಪರ್ವ॑ತಾಶ್ಚ॒ ಯಯಾ॒ ವಾತ॑-ಸ್ಸ್ವ॒ಸ್ತ್ಯಾ ಸ್ವ॑ಸ್ತಿ॒ಮಾನ್ತಯಾ᳚ ಸ್ವ॒ಸ್ತ್ಯಾ ಸ್ವ॑ಸ್ತಿ॒ ಮಾನ॑ಸಾನಿ ॥
ಪ್ರಾಣಾ॑ಪಾನೌ ಮೃ॒ತ್ಯೋರ್ಮಾ॑ ಪಾತ॒-ಮ್ಪ್ರಾಣಾ॑ಪಾನೌ॒ ಮಾ ಮಾ॑ ಹಾಸಿಷ್ಟ॒-ಮ್ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯ್ಯ॒ಗ್ನಿ ಸ್ತೇಜೋ॑ ದಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯೀನ್ದ್ರ॑ ಇನ್ದ್ರಿ॒ಯ-ನ್ದ॑ಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯಿ॒ ಸೂರ್ಯೋ॒
ಭ್ರಾಜೋ॑ ದಧಾತು ॥ 90 ॥
ದ್ಯು॒ಭಿರ॒ಕ್ತುಭಿಃ॒ ಪರಿ॑ಪಾತ-ಮ॒ಸ್ಮಾನರಿ॑ಷ್ಟೇಭಿ-ರಶ್ವಿನಾ॒ ಸೌಭ॑ಗೇಭಿಃ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹನ್ತಾ॒ ಮದಿ॑ತಿ॒-ಸ್ಸಿನ್ಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥
ಕಯಾ॑ ನಶ್ಚಿ॒ತ್ರ ಆಭು॑ವದೂ॒ತೀ ಸ॒ದಾವೃ॑ಧ॒-ಸ್ಸಖಾ᳚ । ಕಯಾ॒ ಶಚಿ॑ಷ್ಠಯಾ ವೃ॒ತಾ ॥ ಕಸ್ತ್ವಾ॑ ಸ॒ತ್ಯೋ ಮದಾ॑ನಾ॒-ಮ್ಮಗ್ಂಹಿ॑ಷ್ಠೋ ಮಥ್ಸ॒ದನ್ಧ॑ಸಃ ।
ದೃ॒ಢಾ ಚಿ॑ದಾ॒ರುಜೇ॒ ವಸು॑ ॥ ಅ॒ಭೀ ಷು ಣ॒-ಸ್ಸಖೀ॑ನಾಮವಿ॒ತಾ ಜ॑ರಿತೄ॒ಣಾಮ್ । ಶ॒ತ-ಮ್ಭ॑ವಾಸ್ಯೂ॒ತಿಭಿಃ॑ ॥
ವಯ॑-ಸ್ಸುಪ॒ರ್ಣಾ ಉಪ॑ಸೇದು॒ರಿನ್ದ್ರ॑-ಮ್ಪ್ರಿ॒ಯಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ ।
ಅಪ॑ ಧ್ವಾ॒ನ್ತಮೂ᳚ರ್ಣು॒ಹಿ ಪೂ॒ರ್ಧಿ ಚಖ್ಷು॑-ರ್ಮುಮು॒ಗ್ಧ್ಯ॑ಸ್ಮಾ-ನ್ನಿ॒ಧಯೇ॑ವ ಬ॒ದ್ಧಾನ್ ॥ 91 ॥
ಶನ್ನೋ॑ ದೇ॒ವೀರ॒ಭಿಷ್ಟ॑ಯ॒ ಆಪೋ॑ ಭವನ್ತು ಪೀ॒ತಯೇ᳚ । ಶಂ-ಯೋಁರ॒ಭಿಸ್ರ॑ವನ್ತು ನಃ ॥ ಈಶಾ॑ನಾ॒ ವಾರ್ಯಾ॑ಣಾ॒-ಙ್ಖ್ಷಯ॑ನ್ತೀಶ್ಚರ್ಷಣೀ॒ನಾಮ್ । ಅ॒ಪೋ ಯಾ॑ಚಾಮಿ ಭೇಷ॒ಜಮ್ ॥
ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು ದುರ್ಮಿ॒ತ್ರಾಸ್ತಸ್ಮೈ॑ ಭೂಯಾಸು॒-ರ್ಯೋ᳚-ಽಸ್ಮಾನ್-ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಆಪೋ॒ ಹಿ ಷ್ಠಾ ಮ॑ಯೋ॒ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ । ಮ॒ಹೇ ರಣಾ॑ಯ॒ ಚಖ್ಷ॑ಸೇ ॥ ಯೋ ವ॑-ಶ್ಶಿ॒ವತ॑ಮೋ॒ ರಸ॒ಸ್ತಸ್ಯ॑ ಭಾಜಯತೇ॒ಹ ನಃ॑ । ಉ॒ಶ॒ತೀರಿ॑ವ ಮಾ॒ತರಃ॑ ॥
ತಸ್ಮಾ॒ ಅರ॑-ಙ್ಗಮಾಮ ವೋ॒ ಯಸ್ಯ॒ ಖ್ಷಯಾ॑ಯ॒ ಜಿನ್ವ॑ಥ ॥ 92 ॥
ಆಪೋ॑ ಜ॒ನಯ॑ಥಾ ಚ ನಃ ॥
ಪೃ॒ಥಿ॒ವೀ ಶಾ॒ನ್ತಾ ಸಾ-ಽಗ್ನಿನಾ॑ ಶಾ॒ನ್ತಾ ಸಾ ಮೇ॑ ಶಾ॒ನ್ತಾ ಶುಚಗ್ಂ॑ ಶಮಯತು ॥ ಅ॒ನ್ತರಿ॑ಖ್ಷಗ್ಂ ಶಾ॒ನ್ತ-ನ್ತ-ದ್ವಾ॒ಯುನಾ॑ ಶಾ॒ನ್ತ-ನ್ತನ್ಮೇ॑ ಶಾ॒ನ್ತಗ್ಂ ಶುಚಗ್ಂ॑ ಶಮಯತು ।
ದ್ಯೌ-ಶ್ಶಾ॒ನ್ತಾ ಸಾ-ಽಽದಿ॒ತ್ಯೇನ॑ ಶಾ॒ನ್ತಾ ಸಾ ಮೇ॑ ಶಾ॒ನ್ತಾ ಶುಚಗ್ಂ॑ ಶಮಯತು ॥ ಪೃ॒ಥಿ॒ವೀ ಶಾನ್ತಿ॑ರ॒ನ್ತರಿ॑ಖ್ಷ॒ಗ್ಂ॒ ಶಾನ್ತಿ॒-ರ್ದ್ಯೌ-ಶ್ಶಾನ್ತಿ॒-ರ್ದಿಶ॒-ಶ್ಶಾನ್ತಿ॑ ರವಾನ್ತರದಿ॒ಶಾ-ಶ್ಶಾನ್ತಿ॑ ರ॒ಗ್ನಿ-ಶ್ಶಾನ್ತಿ॑-ರ್ವಾ॒ಯು-ಶ್ಶಾನ್ತಿ॑ ರಾದಿ॒ತ್ಯ-ಶ್ಶಾನ್ತಿ॑
ಶ್ಚ॒ನ್ದ್ರಮಾ॒-ಶ್ಶಾನ್ತಿ॒-ರ್ನಖ್ಷ॑ತ್ರಾಣಿ॒ ಶಾನ್ತಿ॒ ರಾಪ॒-ಶ್ಶಾನ್ತಿ॒ ರೋಷ॑ಧಯ॒-ಶ್ಶಾನ್ತಿ॒-ರ್ವನ॒ಸ್ಪತ॑ಯ॒-ಶ್ಶಾನ್ತಿ॒-ರ್ಗೌ-ಶ್ಶಾನ್ತಿ॑ ರ॒ಜಾ ಶಾನ್ತಿ॒ ರಶ್ವ॒-ಶ್ಶಾನ್ತಿಃ॒ ಪುರು॑ಷ॒-ಶ್ಶಾನ್ತಿ॒-ರ್ಬ್ರಹ್ಮ॒ ಶಾನ್ತಿ॑-ರ್ಬ್ರಾಹ್ಮ॒ಣ-ಶ್ಶಾನ್ತಿ॒-ಶ್ಶಾನ್ತಿ॑ರೇ॒ವ ಶಾನ್ತಿ॒-ಶ್ಶಾನ್ತಿ॑ರ್ಮೇ ಅಸ್ತು॒ ಶಾನ್ತಿಃ॑ ॥
ತಯಾ॒-ಽಹಗ್ಂ ಶಾ॒ನ್ತ್ಯಾ ಸ॑ರ್ವಶಾ॒ನ್ತ್ಯಾ ಮಹ್ಯ॑-ನ್ದ್ವಿ॒ಪದೇ॒ ಚತು॑ಷ್ಪದೇ ಚ॒ ಶಾನ್ತಿ॑-ಙ್ಕರೋಮಿ॒ ಶಾನ್ತಿ॑ರ್ಮೇ ಅಸ್ತು॒ ಶಾನ್ತಿಃ॑ ॥
ಏಹ॒ ಶ್ರೀಶ್ಚ॒ ಹ್ರೀಶ್ಚ॒ ಧೃತಿ॑ಶ್ಚ॒ ತಪೋ॑ ಮೇ॒ಧಾ ಪ್ರ॑ತಿ॒ಷ್ಠಾ ಶ್ರ॒ದ್ಧಾ ಸ॒ತ್ಯ-ನ್ಧರ್ಮ॑ಶ್ಚೈ॒ತಾನಿ॒ ಮೋತ್ತಿ॑ಷ್ಠನ್ತ॒-ಮನೂತ್ತಿ॑ಷ್ಠನ್ತು॒ ಮಾ ಮಾ॒ಗ್॒ ಶ್ರೀಶ್ಚ॒ ಹ್ರೀಶ್ಚ॒ ಧೃತಿ॑ಶ್ಚ॒ ತಪೋ॑ ಮೇ॒ಧಾ ಪ್ರ॑ತಿ॒ಷ್ಠಾ ಶ್ರ॒ದ್ಧಾ ಸ॒ತ್ಯ-ನ್ಧರ್ಮ॑ಶ್ಚೈ॒ತಾನಿ॑ ಮಾ॒ ಮಾ ಹಾ॑ಸಿಷುಃ ॥
ಉದಾಯು॑ಷಾ ಸ್ವಾ॒ಯುಷೋದೋಷ॑ಧೀನಾ॒ಗ್ಂ॒ ರಸೇ॒ನೋ-ತ್ಪ॒ರ್ಜನ್ಯ॑ಸ್ಯ॒ ಶುಷ್ಮೇ॒ಣೋದ॑ಸ್ಥಾ-ಮ॒ಮೃತಾ॒ಗ್ಂ॒ ಅನು॑ ॥ ತಚ್ಚಖ್ಷು॑-ರ್ದೇ॒ವಹಿ॑ತ-ಮ್ಪು॒ರಸ್ತಾ᳚ ಚ್ಛು॒ಕ್ರಮು॒ಚ್ಚರ॑ತ್ ।
ಪಶ್ಯೇ॑ಮ ಶ॒ರದ॑-ಶ್ಶ॒ತ-ಞ್ಜೀವೇ॑ಮ ಶ॒ರದ॑-ಶ್ಶ॒ತ-ನ್ನನ್ದಾ॑ಮ ಶ॒ರದ॑-ಶ್ಶ॒ತ-ಮ್ಮೋದಾ॑ಮ ಶ॒ರದ॑-ಶ್ಶ॒ತ-ಮ್ಭವಾ॑ಮ ಶ॒ರದ॑-ಶ್ಶ॒ತಗ್ಂ ಶೃ॒ಣವಾ॑ಮ ಶ॒ರದ॑-ಶ್ಶ॒ತ-ಮ್ಪ್ರಬ್ರ॑ವಾಮ ಶ॒ರದ॑-ಶ್ಶ॒ತ ಮಜೀ॑ತಾ-ಸ್ಸ್ಯಾಮ ಶ॒ರದ॑-ಶ್ಶ॒ತ-ಞ್ಜ್ಯೋಕ್ಚ॒ ಸೂರ್ಯ॑-ನ್ದೃ॒ಶೇ ॥ 93 ॥
ಯ ಉದ॑ಗಾ-ನ್ಮಹ॒ತೋ-ಽರ್ಣವಾ᳚-ದ್ವಿ॒ಭ್ರಾಜ॑ಮಾನ-ಸ್ಸರಿ॒ರಸ್ಯ॒ ಮದ್ಧ್ಯಾ॒ಥ್ಸ ಮಾ॑ ವೃಷ॒ಭೋ ಲೋ॑ಹಿತಾ॒ಖ್ಷ-ಸ್ಸೂರ್ಯೋ॑ ವಿಪ॒ಶ್ಚಿ-ನ್ಮನ॑ಸಾ ಪುನಾತು ॥ ಬ್ರಹ್ಮ॑ಣ॒-ಶ್ಶ್ಚೋತ॑ನ್ಯಸಿ॒ ಬ್ರಹ್ಮ॑ಣ ಆ॒ಣೀ ಸ್ಥೋ॒ ಬ್ರಹ್ಮ॑ಣ ಆ॒ವಪ॑ನಮಸಿ ಧಾರಿ॒ತೇಯ-ಮ್ಪೃ॑ಥಿ॒ವೀ ಬ್ರಹ್ಮ॑ಣಾ ಮ॒ಹೀ ಧಾ॑ರಿ॒ತಮೇ॑ನೇನ ಮ॒ಹದ॒ನ್ತರಿ॑ಖ್ಷ॒-ನ್ದಿವ॑-ನ್ದಾಧಾರ ಪೃಥಿ॒ವೀಗ್ಂ ಸದೇ॑ವಾಂ॒-ಯಁದ॒ಹಂ-ವೇಁದ॒ ತದ॒ಹ-ನ್ಧಾ॑ರಯಾಣಿ॒ ಮಾ ಮದ್ವೇದೋ-ಽಧಿ॒ ವಿಸ್ರ॑ಸತ್ ॥ ಮೇ॒ಧಾ॒ಮ॒ನೀ॒ಷೇ ಮಾ-ಽಽವಿ॑ಶತಾಗ್ಂ ಸ॒ಮೀಚೀ॑ ಭೂ॒ತಸ್ಯ॒ ಭವ್ಯ॒ಸ್ಯಾವ॑ರುದ್ಧ್ಯೈ॒ ಸರ್ವ॒ಮಾಯು॑ರಯಾಣಿ॒
ಸರ್ವ॒ಮಾಯು॑ರಯಾಣಿ ॥ ಆ॒ಭಿ-ರ್ಗೀ॒ರ್ಭಿ-ರ್ಯದತೋ॑ ನ ಊ॒ನಮಾಪ್ಯಾ॑ಯಯ ಹರಿವೋ॒ ವರ್ಧ॑ಮಾನಃ ।
ಯ॒ದಾ ಸ್ತೋ॒ತೃಭ್ಯೋ॒ ಮಹಿ॑ ಗೋ॒ತ್ರಾ ರು॒ಜಾಸಿ॑ ಭೂಯಿಷ್ಠ॒ಭಾಜೋ॒ ಅಧ॑ ತೇ ಸ್ಯಾಮ ॥ ಬ್ರಹ್ಮ॒ ಪ್ರಾವಾ॑ದಿಷ್ಮ॒ ತನ್ನೋ॒ ಮಾ ಹಾ॑ಸೀತ್ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 94 ॥
(ಪ॒ರಾ॒ವತೋ॑-ದಧಾತು-ಬ॒ದ್ಧಾನ್-ಜಿನ್ವ॑ಥ-ದೃ॒ಶೇ-+ಸ॒ಪ್ತ ಚ॑) (ಅ. 42)
(ನಮೋ॑ - ಯು॒ಞ್ಜತೇ॒ - ವೃಷ್ಣೋ॒ ಅಶ್ವ॑ಸ್ಯ॒ - ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ - ಬ್ರಹ್ಮ॒-ನ್ಪ್ರಚ॑ರಿಷ್ಯಾಮೋ॒ - ದಶ॒ ಪ್ರಾಚೀ॒ - ರಪ॑ಶ್ಯಙ್ಗೋ॒ಪಾಮ್ - ದೇ॒ವಸ್ಯ॑ - ಸಮು॒ದ್ರಾ - ಯೇ॒ಷೇ ಪೀ॑ಪಿಹಿ॒ - ಘರ್ಮ॒ ಯಾ ತೇ॑ - ಮಹೀ॒ನಾ-ಞ್ಚ॒ತ್ವಾ - ರ್ಯಸ್ಕಾ॒ನ್॒. - ಯಾ ಪು॒ರಸ್ತಾ᳚-ಥ್ಸ॒ಪ್ತ ಸ॑ಪ್ತ - ಪ್ರಾ॒ಣಾಯ॒ ತ್ರೀಣಿ॑ - ಪೂ॒ಷ್ಣೇ ಚ॒ತ್ವಾ-ರ್ಯು - ದ॒ಸ್ಯೈಕಾ॑ದಶ॒ - ಯಾಸ್ತೇ॑ ಸ॒ಪ್ತಾ - ಗ್ನಿ-ರ್ಧ್ರು॒ವಸೀಃ॒ ದೈಕಾ॒ನ್ನ ವಿಗ್ಂ॑ಶತಿ॒--ರ್ ಭೂರೂ॒ರ್ಧ್ವ ಸ್ತ್ರಿ॒ಗ್ಂ॒ಶತ-ದ್- ಭೂ-ರ್ಮಯಿ॒ ಷೋಡ॑ಶ॒ - ಯಾಸ್ತೇ॑ ಘೋ॒ರಾ ನವ॒ - ಸ್ನಿಕ್ಚಾ॒ಷ್ಟೌ - ಧುನಿ॑ಶ್ಚ॒ ದ್ವೇ - ಉ॒ಗ್ರಶ್ಚ॒ ತ್ರೀಣ್ಯ॑ - ಹೋರಾ॒ತ್ರೇ ಪಞ್ಚ॒ - ಖ-ಟ್ತ್ರೀಣಿ॒ - ವಿಗಾ-ಸ್ಸ॒ಪ್ತದ॒ಶಾ - ಸೃ॑-ನ್ಮುಖ-ಶ್ಚ॒ತ್ವಾರಿ॒ - ಯದೇ॒ತ-ದ್ವೃ॑ಕ॒ಸಃ ಪಞ್ಚ॒ - ಯದೀ॑ಷಿ॒ತ ಶ್ಚ॒ತ್ವಾರಿ॒ - ದೀರ್ಘ॑ಮುಖಿ॒ ತ್ರೀಣೀ॒ - ತ್ಥಾ ಚ್ಚ॒ತ್ವಾರಿ॒ - ಯದೇ॒ತ-ದ್ಭೂ॒ತಾನಿ॒ ಷಟ್ - ಪ್ರ॒ಸಾರ್ಯ॒ ತ್ರೀಣ್ಯ - ತ್ರಿ॑ಣಾ॒ ದಶಾ- ಹ॒ರಾವ॑ದ್ಯ॒ - ಬ್ರಹ್ಮ॑ಣಾ॒ ಷಟ್-ಥ್ಷಡ್ - ಉತ್ತು॑ದಾ॒ಷ್ಟೌ - ಭೂ-ಷ್ಷಟ್ - ಪೃ॑ಥಿ॒ವ್ಯ॑ಷ್ಟ ಷ॑ಷ್ಟಿಃ॒ - ಶನ್ನ॑-ಸ್ಸ॒ಪ್ತಪ॑ಞ್ಚಾ॒ಶ-ದ್ದ್ವಿಚ॑ತ್ವಾರಿಗ್ಂಶತ್ )
(ನಮೋ॑ ವಾ॒ಚೇ - ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ - ಮಯಿ॒ ರು - ಗ॒ನ್ತರಿ॑ಖ್ಷೇಣ - ಪಿ॒ತಾ ನೋ॑-ಽಸಿ - ಮಹೀ॒ನಾ - ಮುಪ॑ ನೋ॒ - ಯದೇ॒ತ-ದ್- ಭೂ--ರ್ ದ್ಯೂ॒ಭಿ ಶ್ಚತು॑-ರ್ನವತಿಃ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಚತುರ್ಥಃ ಪ್ರಪಾಠಕ-ಸ್ಸಮಾಪ್ತಃ ॥
