ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಸಪ್ತಮಃ ಪ್ರಪಾಠಕಃ - ಸವಾ ಏಕಾಹವಿಶೇಷಾಃ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

2.7.1 ಅನುವಾಕಂ - ಬೃಹಸ್ಪತಿಸವಃ

ತ್ರಿ॒ವೃ-ಥ್ಸ್ತೋಮೋ॑ ಭವತಿ । ಬ್ರ॒ಹ್ಮ॒ವ॒ರ್ಚ॒ಸಂ-ವೈಁ ತ್ರಿ॒ವೃತ್ । ಬ್ರ॒ಹ್ಮ॒ವ॒ರ್ಚ॒ಸಮೇ॒ವಾವ॑ರುನ್ಧೇ ॥ ಅ॒ಗ್ನಿ॒ಷ್ಟೋ॒ಮ-ಸ್ಸೋಮೋ॑ ಭವತಿ । ಬ್ರ॒ಹ್ಮ॒ವ॒ರ್ಚ॒ಸಂ-ವಾಁ ಅ॑ಗ್ನಿಷ್ಟೋ॒ಮಃ । ಬ್ರ॒ಹ್ಮ॒ವ॒ರ್ಚ॒ಸಮೇ॒ವಾವ॑ರುನ್ಧೇ ॥ ರ॒ಥ॒ತಂರ॒ಗ್ಂ ಸಾಮ॑ ಭವತಿ । ಬ್ರ॒ಹ್ಮ॒ವ॒ರ್ಚ॒ಸಂ-ವೈಁ ರ॑ಥನ್ತ॒ರಮ್ । ಬ್ರ॒ಹ್ಮ॒ವ॒ರ್ಚ॒ಸಮೇ॒ವಾವ॑ರುನ್ಧೇ ॥ ಪ॒ರಿ॒ಸ್ರ॒ಜೀ ಹೋತಾ॑ ಭವತಿ ॥ 1 ॥

ಅ॒ರು॒ಣೋ ಮಿ॑ರ್ಮಿ॒ರಸ್ತ್ರಿಶು॑ಕ್ರಃ । ಏ॒ತ-ದ್ವೈ ಬ್ರ॑ಹ್ಮವರ್ಚ॒ಸಸ್ಯ॑ ರೂ॒ಪಮ್ । ರೂ॒ಪೇಣೈ॒ವ ಬ್ರ॑ಹ್ಮವರ್ಚ॒ಸಮವ॑ರುನ್ಧೇ ॥ ಬೃಹ॒ಸ್ಪತಿ॑-ರಕಾಮಯತ ದೇ॒ವಾನಾ᳚-ಮ್ಪುರೋ॒ಧಾ-ಙ್ಗ॑ಚ್ಛೇಯ॒ಮಿತಿ॑ । ಸ ಏ॒ತ-ಮ್ಬೃ॑ಹಸ್ಪತಿಸ॒ವಮ॑ಪಶ್ಯತ್ । ತಮಾ-ಽಹ॑ರತ್ । ತೇನಾ॑ಯಜತ । ತತೋ॒ ವೈ ಸ ದೇ॒ವಾನಾ᳚-ಮ್ಪುರೋ॒ಧಾ-ಮ॑ಗಚ್ಛತ್ । ಯಃ ಪು॑ರೋ॒ಧಾಕಾ॑ಮ॒-ಸ್ಸ್ಯಾತ್ । ಸ ಬೃ॑ಹಸ್ಪತಿಸ॒ವೇನ॑ ಯಜೇತ ॥ 2 ॥

ಪು॒ರೋ॒ಧಾಮೇ॒ವ ಗ॑ಚ್ಛತಿ ॥ ತಸ್ಯ॑ ಪ್ರಾತಸ್ಸವ॒ನೇ ಸ॒ನ್ನೇಷು॑ ನಾರಾಶ॒ಗ್ಂ॒ಸೇಷು॑ । ಏಕಾ॑ದಶ॒ ದಖ್ಷಿ॑ಣಾ ನೀಯನ್ತೇ । ಏಕಾ॑ದಶ॒ ಮಾದ್ಧ್ಯ॑ದಿನ್ನೇ॒ ಸವ॑ನೇ ಸ॒ನ್ನೇಷು॑ ನಾರಾಶ॒ಗ್ಂ॒ಸೇಷು॑ । ಏಕಾ॑ದಶ ತೃತೀಯಸವ॒ನೇ ಸ॒ನ್ನೇಷು॑ ನಾರಾಶ॒ಗ್ಂ॒ಸೇಷು॑ । ತ್ರಯ॑ಸ್ತ್ರಿಗ್ಂಶ॒-ಥ್ಸಮ್ಪ॑ದ್ಯನ್ತೇ । ತ್ರಯ॑ಸ್ತ್ರಿಗ್ಂಶ॒-ದ್ವೈ ದೇ॒ವತಾಃ᳚ । ದೇ॒ವತಾ॑ ಏ॒ವಾವ॑ರುನ್ಧೇ ॥ ಅಶ್ವ॑ಶ್ಚತುಸ್ತ್ರಿ॒ಗ್ಂ॒ಶಃ । ಪ್ರಾ॒ಜಾ॒ಪ॒ತ್ಯೋ ವಾ ಅಶ್ವಃ॑ ॥ 3 ॥

ಪ್ರ॒ಜಾಪ॑ತಿ-ಶ್ಚತುಸ್ತ್ರಿ॒ಗ್ಂ॒ಶೋ ದೇ॒ವತಾ॑ನಾಮ್ । ಯಾವ॑ತೀರೇ॒ವ ದೇ॒ವತಾಃ᳚ । ತಾ ಏ॒ವಾವ॑ರುನ್ಧೇ ॥ ಕೃ॒ಷ್ಣಾ॒ಜಿ॒ನೇ॑ ಽಭಿಷಿ॑ಞ್ಚತಿ । ಬ್ರಹ್ಮ॑ಣೋ॒ ವಾ ಏ॒ತ-ದ್ರೂ॒ಪಮ್ । ಯ-ತ್ಕೃ॑ಷ್ಣಾಜಿ॒ನಮ್ । ಬ್ರ॒ಹ್ಮ॒ವ॒ರ್ಚ॒ಸೇನೈ॒ವೈನ॒ಗ್ಂ॒ ಸಮ॑ರ್ಧಯತಿ ॥ ಆಜ್ಯೇ॑ನಾ॒ಭಿಷಿ॑ಞ್ಚತಿ । ತೇಜೋ॒ ವಾ ಆಜ್ಯ᳚ಮ್ । ತೇಜ॑ ಏ॒ವಾಸ್ಮಿ॑-ನ್ದಧಾತಿ ॥ 4 ॥
(ಹೋತಾ॑ ಭವತಿ - ಯಜೇತ॒ - ವಾ ಅಶ್ವೋ॑ - ದಧಾತಿ) (ಅ. 1)

2.7.2 ಅನುವಾಕಂ - ವೈಶ್ಯಸವಃ
ಯದಾ᳚ಗ್ನೇ॒ಯೋ ಭವ॑ತಿ । ಅ॒ಗ್ನಿಮು॑ಖಾ॒ ಹ್ಯೃದ್ಧಿಃ॑ ॥ ಅಥ॒ ಯ-ತ್ಪೌ॒ಷ್ಣಃ । ಪುಷ್ಟಿ॒ರ್ವೈ ಪೂ॒ಷಾ । ಪುಷ್ಟಿ॒-ರ್ವೈಶ್ಯ॑ಸ್ಯ । ಪುಷ್ಟಿ॑ಮೇ॒ವಾವ॑ರುನ್ಧೇ ॥ ಪ್ರ॒ಸ॒ವಾಯ॑ ಸಾವಿ॒ತ್ರಃ ॥ ಅಥ॒ ಯ-ತ್ತ್ವಾ॒ಷ್ಟ್ರಃ । ತ್ವಷ್ಟಾ॒ ಹಿ ರೂ॒ಪಾಣಿ॑ ವಿಕ॒ರೋತಿ॑ ॥ ನಿ॒ರ್ವ॒ರು॒ಣ॒ತ್ವಾಯ॑ ವಾರು॒ಣಃ ॥ 5 ॥

ಅಥೋ॒ ಯ ಏ॒ವ ಕಶ್ಚ॒ ಸನ್​ಥ್ಸೂ॒ಯತೇ᳚ । ಸ ಹಿ ವಾ॑ರು॒ಣಃ ॥ ಅಥ॒ ಯ-ದ್ವೈ᳚ಶ್ವದೇ॒ವಃ । ವೈ॒ಶ್ವ॒ದೇ॒ವೋ ಹಿ ವೈಶ್ಯಃ॑ ॥ ಅಥ॒ ಯ-ನ್ಮಾ॑ರು॒ತಃ । ಮಾ॒ರು॒ತೋ ಹಿ ವೈಶ್ಯಃ॑ ॥ ಸ॒ಪ್ತೈತಾನಿ॑ ಹ॒ವೀಗ್ಂಷಿ॑ ಭವನ್ತಿ । ಸ॒ಪ್ತಗ॑ಣಾ॒ ವೈ ಮ॒ರುತಃ॑ ॥ ಪೃಶ್ನಿಃ॑ ಪಷ್ಠೌ॒ಹೀ ಮಾ॑ರು॒ತ್ಯಾಲ॑ಭ್ಯತೇ । ವಿಡ್ವೈ ಮ॒ರುತಃ॑ ॥ ವಿಶ॑ ಏ॒ವೈತ-ನ್ಮ॑ದ್ಧ್ಯ॒ತೋ॑-ಽಭಿಷಿ॑ಚ್ಯತೇ । ತಸ್ಮಾ॒-ದ್ವಾ ಏ॒ಷ ವಿ॒ಶಃ ಪ್ರಿ॒ಯಃ । ವಿ॒ಶೋ ಹಿ ಮ॑ದ್ಧ್ಯ॒ತೋ॑-ಽಭಿಷಿ॒ಚ್ಯತೇ᳚ ॥ ಋ॒ಷ॒ಭ॒ಚ॒ರ್ಮೇ-ಽದ್ಧ್ಯ॒ಭಿಷಿ॑ಞ್ಚತಿ । ಸ ಹಿ ಪ್ರ॑ಜನಯಿ॒ತಾ ॥ ದ॒ದ್ಧ್ನಾ-ಽಭಿಷಿ॑ಞ್ಚತಿ । ಊರ್ಗ್ವಾ ಅ॒ನ್ನಾದ್ಯ॒-ನ್ದಧಿ॑ । ಊ॒ರ್ಜೈವೈನ॑-ಮ॒ನ್ನಾದ್ಯೇ॑ನ॒ ಸಮ॑ರ್ಧಯತಿ ॥ 6 ॥
(ವಾ॒ರು॒ಣೋ - ವಿಡ್ವೈ ಮ॒ರುತೋ॒-ಽಷ್ಟೌ ಚ॑) (ಅ. 2)

ಅನುವಾಕಂ 3 - ಬ್ರಾಹ್ಮಣಸವಃ
ಯದಾ᳚ಗ್ನೇ॒ಯೋ ಭವ॑ತಿ । ಆ॒ಗ್ನೇ॒ಯೋ ವೈ ಬ್ರಾ᳚ಹ್ಮ॒ಣಃ ॥ ಅಥ॒ ಯ-ಥ್ಸೌ॒ಮ್ಯಃ । ಸೌ॒ಮ್ಯೋ ಹಿ ಬ್ರಾ᳚ಹ್ಮ॒ಣಃ ॥ ಪ್ರ॒ಸ॒ವಾಯೈ॒ವ ಸಾ॑ವಿ॒ತ್ರಃ ॥ ಅಥ॒ ಯ-ದ್ಬಾ॑ರ್​ಹಸ್ಪ॒ತ್ಯಃ । ಏ॒ತದ್ವೈ ಬ್ರಾ᳚ಹ್ಮ॒ಣಸ್ಯ॑ ವಾಕ್ಪ॒ತೀಯ᳚ಮ್ ॥ ಅಥ॒ ಯದ॑ಗ್ನೀಷೋ॒ಮೀಯಃ॑ । ಆ॒ಗ್ನೇ॒ಯೋ ವೈ ಬ್ರಾ᳚ಹ್ಮ॒ಣಃ । ತೌ ಯ॒ದಾ ಸ॒ಗಞ್ಚ್ಛೇ॑ತೇ ॥ 7 ॥

ಅಥ॑ ವೀ॒ರ್ಯಾ॑ವತ್ತರೋ ಭವತಿ ॥ ಅಥ॒ ಯ-ಥ್ಸಾ॑ರಸ್ವ॒ತಃ । ಏ॒ತದ್ಧಿ ಪ್ರ॒ತ್ಯಖ್ಷ॑-ಮ್ಬ್ರಾಹ್ಮ॒ಣಸ್ಯ॑ ವಾಕ್ಪ॒ತೀಯ᳚ಮ್ ॥ ನಿ॒ರ್ವ॒ರು॒ಣ॒ತ್ವಾಯೈ॒ವ ವಾ॑ರು॒ಣಃ । ಅಥೋ॒ ಯ ಏ॒ವ ಕಶ್ಚ॒ ಸನ್​ಥ್ಸೂ॒ಯತೇ᳚ । ಸ ಹಿ ವಾ॑ರು॒ಣಃ ॥ ಅಥ॒ ಯ-ದ್ದ್ಯಾ॑ವಾಪೃಥಿ॒ವ್ಯಃ॑ । ಇನ್ದ್ರೋ॑ ವೃ॒ತ್ರಾಯ॒ ವಜ್ರ॒ಮುದ॑ಯಚ್ಛತ್ । ತ-ನ್ದ್ಯಾವಾ॑ಪೃಥಿ॒ವೀ ನಾನ್ವ॑ಮನ್ಯೇತಾಮ್ । ತಮೇ॒ತೇನೈ॒ವ ಭಾ॑ಗ॒ಧೇಯೇ॒ನಾ-ನ್ವ॑ಮನ್ಯೇತಾಮ್ ॥ 8 ॥

ವಜ್ರ॑ಸ್ಯ॒ ವಾ ಏ॒ಷೋ॑-ಽನುಮಾ॒ನಾಯ॑ । ಅನು॑ಮತವಜ್ರ-ಸ್ಸೂಯಾತಾ॒ ಇತಿ॑ ॥ ಅ॒ಷ್ಟಾವೇ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ । ಅ॒ಷ್ಟಾಖ್ಷ॑ರಾ ಗಾಯ॒ತ್ರೀ । ಗಾ॒ಯ॒ತ್ರೀ ಬ್ರ॑ಹ್ಮವರ್ಚ॒ಸಮ್ । ಗಾ॒ಯ॒ತ್ರಿ॒ಯೈವ ಬ್ರ॑ಹ್ಮವರ್ಚ॒ಸಮವ॑ರುನ್ಧೇ ॥ ಹಿರ॑ಣ್ಯೇನ ಘೃ॒ತಮು-ತ್ಪು॑ನಾತಿ । ತೇಜ॑ಸ ಏ॒ವ ರು॒ಚೇ ॥ ಕೃ॒ಷ್ಣಾ॒ಜಿ॒ನೇ॑-ಽಭಿಷಿ॑ಞ್ಚತಿ । ಬ್ರಹ್ಮ॑ಣೋ॒ ವಾ ಏ॒ತದೃ॑ಖ್ಸಾ॒ಮಯೋ॑ ರೂ॒ಪಮ್ । ಯ-ತ್ಕೃ॑ಷ್ಣಾಜಿ॒ನಮ್ । ಬ್ರಹ್ಮ॑ನ್ನೇ॒ವೈನ॑-ಮೃಖ್ಸಾ॒ಮಯೋ॒-ರದ್ಧ್ಯ॒ಭಿಷಿ॑ಞ್ಚತಿ ॥ ಘೃ॒ತೇನಾ॒-ಭಿಷಿ॑ಞ್ಚತಿ । ತಥಾ॑ ವೀ॒ರ್ಯಾ॑ವತ್ತರೋ ಭವತಿ ॥ 9 ॥
(ಸ॒ಗಞ್ಚ್ಛೇ॑ತೇ - ಭಾಗ॒ಧೇಯೇ॒ನಾನ್ವ॑ಮನ್ಯೇತಾಗ್ಂ - ರೂ॒ಪ-ಞ್ಚ॒ತ್ವಾರಿ॑ ಚ) (ಅ. 3)

ಅನುವಾಕಂ 4 - ಸೋಮಸವಃ
ನ ವೈ ಸೋಮೇ॑ನ॒ ಸೋಮ॑ಸ್ಯ ಸ॒ವೋ᳚-ಽಸ್ತಿ । ಹ॒ತೋ ಹ್ಯೇ॑ಷಃ । ಅ॒ಭಿಷು॑ತೋ॒ ಹ್ಯೇ॑ಷಃ । ನ ಹಿ ಹ॒ತ-ಸ್ಸೂ॒ಯತೇ᳚ । ಸೌ॒ಮೀಗ್ಂ ಸೂ॒ತವ॑ಶಾ॒ಮಾಲ॑ಭತೇ । ಸೋಮೋ॒ ವೈ ರೇ॑ತೋ॒ಧಾಃ । ರೇತ॑ ಏ॒ವ ತ-ದ್ದ॑ಧಾತಿ ॥ ಸೌ॒ಮ್ಯರ್ಚಾ ಽಭಿಷಿ॑ಞ್ಚತಿ । ರೇ॒ತೋ॒ಧಾ ಹ್ಯ॑ಷಾ । ರೇತ॒-ಸ್ಸೋಮಃ॑ । ರೇತ॑ ಏ॒ವಾಸ್ಮಿ॑-ನ್ದಧಾತಿ ॥ ಯ-ತ್ಕಿಞ್ಚ ರಾಜ॒ಸೂಯ॑ಮೃ॒ತೇ ಸೋಮ᳚ಮ್ । ತ-ಥ್ಸರ್ವ॑-ಮ್ಭವತಿ ॥ ಅಷಾ॑ಢಂ-ಯುಁ॒ಥ್ಸು ಪೃತ॑ನಾಸು॒ ಪಪ್ರಿ᳚ಮ್ । ಸು॒ವ॒ರ॒.ಷಾಮ॒ಫ್ಸ್ವಾಂ-ವೃಁ॒ಜನ॑ಸ್ಯ ಗೋ॒ಪಾಮ್ । ಭ॒ರೇ॒ಷು॒ಜಾಗ್ಂ ಸು॑ಖ್ಷಿ॒ತಿಗ್ಂ ಸು॒ಶ್ರವ॑ಸಮ್ । ಜಯ॑ನ್ತ॒-ನ್ತ್ವಾಮನು॑ ಮದೇಮ ಸೋಮ ॥ 10 ॥
(ರೇತ॒-ಸ್ಸೋಮ॑-ಸ್ಸ॒ಪ್ತ ಚ॑ ) (ಅ. 4)

ಅನುವಾಕಂ 5 - ಪೃಥಿಸವಃ
ಯೋ ವೈ ಸೋಮೇ॑ನ ಸೂ॒ಯತೇ᳚ । ಸ ದೇ॑ವಸ॒ವಃ । ಯಃ ಪ॒ಶುನಾ॑ ಸೂ॒ಯತೇ᳚ । ಸ ದೇ॑ವಸ॒ವಃ । ಯ ಇಷ್ಟ್ಯಾ॑ ಸೂ॒ಯತೇ᳚ । ಸ ಮ॑ನುಷ್ಯಸ॒ವಃ । ಏ॒ತಂ-ವೈಁ ಪೃಥ॑ಯೇ ದೇ॒ವಾಃ ಪ್ರಾಯ॑ಚ್ಛನ್ನ್ । ತತೋ॒ ವೈ ಸೋ-ಽಪ್ಯಾ॑ರ॒ಣ್ಯಾನಾ᳚-ಮ್ಪಶೂ॒ನಾಮ॑ಸೂಯತ । ಯಾವ॑ತೀಃ॒ ಕಿಯ॑ತೀಶ್ಚ ಪ್ರ॒ಜಾ ವಾಚಂ॒-ವಁದ॑ನ್ತಿ । ತಾಸಾ॒ಗ್ಂ॒ ಸರ್ವಾ॑ಸಾಗ್ಂ ಸೂಯತೇ ॥ 11 ॥

ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ನಾ॒ರಾ॒ಶ॒ಗ್ಗ್॒ಸ್ಯರ್ಚಾ ಽಭಿಷಿ॑ಞ್ಚತಿ । ಮ॒ನು॒ಷ್ಯಾ॑ ವೈ ನರಾ॒ಶಗ್ಂಸಃ॑ । ನಿ॒ಹ್ನುತ್ಯ॒ ವಾವೈತತ್ । ಅಥಾ॒ಭಿಷಿ॑ಞ್ಚತಿ ॥ ಯ-ತ್ಕಿಞ್ಚ॑ ರಾಜ॒ಸೂಯ॑-ಮನುತ್ತರವೇ॒ದೀಕ᳚ಮ್ । ತ-ಥ್ಸರ್ವ॑-ಮ್ಭವತಿ ॥ ಯೇ ಮೇ॑ ಪಞ್ಚಾ॒ಶತ॑-ನ್ದ॒ದುಃ । ಅಶ್ವಾ॑ನಾಗ್ಂ ಸ॒ಧಸ್ತು॑ತಿಃ । ದ್ಯು॒ಮದ॑ಗ್ನೇ॒ ಮಹಿ॒ ಶ್ರವಃ॑ । ಬೃ॒ಹ-ತ್ಕೃ॑ಧಿ ಮ॒ಘೋನಾ᳚ಮ್ । ನೃ॒ವದ॑ಮೃತ ನೃ॒ಣಾಮ್ ॥ 12 ॥
(ಸೂ॒ಯ॒ತೇ॒ - ಸ॒ಧಸ್ತು॑ತಿ॒ಸ್ತ್ರೀಣಿ॑ ಚ) (ಅ. 5)

ಅನುವಾಕಂ 6 - ಗೋಸವಃ
ಏ॒ಷ ಗೋ॑ಸ॒ವಃ । ಷ॒ಟ್ತ್ರಿ॒ಗ್ಂ॒ಶ ಉ॒ಕ್ಥ್ಯೋ॑ ಬೃ॒ಹ-ಥ್ಸಾ॑ಮಾ । ಪವ॑ಮಾನೇ ಕಣ್ವರಥನ್ತ॒ರ-ಮ್ಭ॑ವತಿ ॥ ಯೋ ವೈ ವಾ॑ಜ॒ಪೇಯಃ॑ । ಸ ಸ॑ಮ್ರಾಟ್ಥ್ಸ॒ವಃ । ಯೋ ರಾ॑ಜ॒ಸೂಯಃ॑ । ಸ ವ॑ರುಣಸ॒ವಃ । ಪ್ರ॒ಜಾಪ॑ತಿ॒-ಸ್ಸ್ವಾರಾ᳚ಜ್ಯ-ಮ್ಪರಮೇ॒ಷ್ಠೀ । ಸ್ವಾರಾ᳚ಜ್ಯ॒-ಙ್ಗೌರೇ॒ವ ॥ ಗೌರಿ॑ವ ಭವತಿ ॥ 13 ॥

ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಉ॒ಭೇ ಬೃ॑ಹ-ದ್ರಥನ್ತ॒ರೇ ಭ॑ವತಃ । ತದ್ಧಿ ಸ್ವಾರಾ᳚ಜ್ಯಮ್ ॥ ಅ॒ಯುತ॒-ನ್ದಖ್ಷಿ॑ಣಾಃ । ತದ್ಧಿ ಸ್ವಾರಾ᳚ಜ್ಯಮ್ ॥ ಪ್ರ॒ತಿ॒ಧುಷಾ॒ ಽಭಿಷಿ॑ಞ್ಚತಿ । ತದ್ಧಿ ಸ್ವಾರಾ᳚ಜ್ಯಮ್ ॥ ಅನು॑ದ್ಧತೇ॒ ವೇದ್ಯೈ॑ ದಖ್ಷಿಣ॒ತ ಆ॑ಹವ॒ನೀಯ॑ಸ್ಯ ಬೃಹ॒ತ-ಸ್ಸ್ತೋ॒ತ್ರ-ಮ್ಪ್ರತ್ಯ॒ಭಿಷಿ॑ಞ್ಚತಿ । ಇ॒ಯಂ-ವಾಁವ ರ॑ಥನ್ತ॒ರಮ್ ॥ 14 ॥

ಅ॒ಸೌ ಬೃ॒ಹತ್ । ಅ॒ನಯೋ॑ರೇ॒ವೈನ॒-ಮನ॑ನ್ತರ್​ಹಿತ-ಮ॒ಭಿಷಿ॑ಞ್ಚತಿ ॥ ಪ॒ಶು॒ಸ್ತೋ॒ಮೋ ವಾ ಏ॒ಷಃ । ತೇನ॑ ಗೋಸ॒ವಃ । ಷ॒ಟ್ತ್ರಿ॒ಗ್ಂ॒ಶ-ಸ್ಸರ್ವಃ॑ ॥ ರೇ॒ವಜ್ಜಾ॒ತ-ಸ್ಸಹ॑ಸಾ ವೃ॒ದ್ಧಃ । ಖ್ಷ॒ತ್ರಾಣಾ᳚-ಙ್ಖ್ಷತ್ರ॒ಭೃತ್ತ॑ಮೋ ವಯೋ॒ಧಾಃ । ಮ॒ಹಾ-ನ್ಮ॑ಹಿ॒ತ್ವೇ ತ॑ಸ್ತಭಾ॒ನಃ । ಖ್ಷ॒ತ್ರೇ ರಾ॒ಷ್ಟ್ರೇ ಚ॑ ಜಾಗೃಹಿ । ಪ್ರ॒ಜಾಪ॑ತೇಸ್ತ್ವಾ ಪರಮೇ॒ಷ್ಠಿನ॒-ಸ್ಸ್ವಾರಾ᳚ಜ್ಯೇನಾ॒ಭಿಷಿ॑ಞ್ಚಾ॒-ಮೀತ್ಯಾ॑ಹ ॥ ಸ್ವಾರಾ᳚ಜ್ಯ-ಮೇ॒ವೈನ॑-ಙ್ಗಮಯತಿ ॥ 15 ॥
(ಇ॒ವ॒ ಭ॒ವ॒ತಿ॒ - ರ॒ಥ॒ನ್ತ॒ರ - ಮಾ॒ಹೈಕ॑-ಞ್ಚ) (ಅ. 6)

ಅನುವಾಕಂ 7 - ಓದನಸವಮನ್ತ್ರಾಃ
ಸಿ॒ಗ್ಂ॒ಹೇ ವ್ಯಾ॒ಘ್ರ ಉ॒ತ ಯಾ ಪೃದಾ॑ಕೌ । ತ್ವಿಷಿ॑ರ॒ಗ್ನೌ ಬ್ರಾ᳚ಹ್ಮ॒ಣೇ ಸೂರ್ಯೇ॒ ಯಾ । ಇನ್ದ್ರಂ॒-ಯಾಁ ದೇ॒ವೀ ಸು॒ಭಗಾ॑ ಜ॒ಜಾನ॑ । ಸಾ ನ॒ ಆಗ॒ನ್ ವರ್ಚ॑ಸಾ ಸಂ​ವಿಁದಾ॒ನಾ ॥ ಯಾ ರಾ॑ಜ॒ನ್ಯೇ॑ ದುನ್ದು॒ಭಾವಾಯ॑ತಾಯಾಮ್ । ಅಶ್ವ॑ಸ್ಯ॒ ಕ್ರನ್ದ್ಯೇ॒ ಪುರು॑ಷಸ್ಯ ಮಾ॒ಯೌ । ಇನ್ದ್ರಂ॒-ಯಾಁ ದೇ॒ವೀ ಸು॒ಭಗಾ॑ ಜ॒ಜಾನ॑ । ಸಾ ನ॒ ಆಗ॒ನ್ ವರ್ಚ॑ಸಾ ಸಂ​ವಿಁದಾ॒ನಾ ॥ ಯಾ ಹ॒ಸ್ತಿನಿ॑ ದ್ವೀ॒ಪಿನಿ॒ ಯಾ ಹಿರ॑ಣ್ಯೇ । ತ್ವಿಷಿ॒-ರಶ್ವೇ॑ಷು॒ ಪುರು॑ಷೇಷು॒ ಗೋಷು॑ ॥ 16 ॥

ಇನ್ದ್ರಂ॒-ಯಾಁ ದೇ॒ವೀ ಸು॒ಭಗಾ॑ ಜ॒ಜಾನ॑ । ಸಾ ನ॒ ಆಗ॒ನ್ ವರ್ಚ॑ಸಾ ಸಂ​ವಿಁದಾ॒ನಾ ॥ ರಥೇ॑ ಅ॒ಖ್ಷೇಷು॑ ವೃಷ॒ಭಸ್ಯ॒ ವಾಜೇ᳚ । ವಾತೇ॑ ಪ॒ರ್ಜನ್ಯೇ॒ ವರು॑ಣಸ್ಯ॒ ಶುಷ್ಮೇ᳚ । ಇನ್ದ್ರಂ॒-ಯಾಁ ದೇ॒ವೀ ಸು॒ಭಗಾ॑ ಜ॒ಜಾನ॑ । ಸಾ ನ॒ ಆಗ॒ನ್ ವರ್ಚ॑ಸಾ ಸಂ​ವಿಁದಾ॒ನಾ ॥ ರಾಡ॑ಸಿ ವಿ॒ರಾಡ॑ಸಿ । ಸ॒ಮ್ರಾಡ॑ಸಿ ಸ್ವ॒ರಾಡ॑ಸಿ ॥ ಇನ್ದ್ರಾ॑ಯ ತ್ವಾ॒ ತೇಜ॑ಸ್ವತೇ॒ ತೇಜ॑ಸ್ವನ್ತಗ್ಗ್​ ಶ್ರೀಣಾಮಿ । ಇನ್ದ್ರಾ॑ಯ॒ ತ್ವೌಜ॑ಸ್ವತ॒ ಓಜ॑ಸವನ್ತಗ್ಗ್​ ಶ್ರೀಣಾಮಿ ॥ 17 ॥

ಇನ್ದ್ರಾ॑ಯ ತ್ವಾ॒ ಪಯ॑ಸ್ವತೇ॒ ಪಯ॑ಸ್ವನ್ತಗ್ಗ್​ ಶ್ರೀಣಾಮಿ । ಇನ್ದ್ರಾ॑ಯ॒ ತ್ವಾ-ಽಽಯು॑ಷ್ಮತ॒ ಆಯು॑ಷ್ಮನ್ತಗ್ಗ್​ ಶ್ರೀಣಾಮಿ ॥ ತೇಜೋ॑-ಽಸಿ । ತ-ತ್ತೇ॒ ಪ್ರಯ॑ಚ್ಛಾಮಿ । ತೇಜ॑ಸ್ವದಸ್ತು ಮೇ॒ ಮುಖ᳚ಮ್ । ತೇಜ॑ಸ್ವ॒ಚ್ಛಿರೋ॑ ಅಸ್ತು ಮೇ । ತೇಜ॑ಸ್ವಾನ್. ವಿ॒ಶ್ವತಃ॑ ಪ್ರ॒ತ್ಯಮ್ । ತೇಜ॑ಸಾ॒ ಸಮ್ಪಿ॑ಪೃಗ್ಧಿ ಮಾ ॥ ಓಜೋ॑-ಽಸಿ । ತ-ತ್ತೇ॒ ಪ್ರಯ॑ಚ್ಛಾಮಿ ॥ 18 ॥

ಓಜ॑ಸ್ವದಸ್ತು ಮೇ॒ ಮುಖ᳚ಮ್ । ಓಜ॑ಸ್ವ॒ಚ್ಛಿರೋ॑ ಅಸ್ತು ಮೇ । ಓಜ॑ಸ್ವಾನ್. ವಿ॒ಶ್ವತಃ॑ ಪ್ರ॒ತ್ಯಮ್ । ಓಜ॑ಸಾ॒ ಸಮ್ಪಿ॑ಪೃಗ್ಧಿ ಮಾ ॥ ಪಯೋ॑-ಽಸಿ । ತತ್ತೇ॒ ಪ್ರಯ॑ಚ್ಛಾಮಿ । ಪಯ॑ಸ್ವದಸ್ತು ಮೇ॒ ಮುಖ᳚ಮ್ । ಪಯ॑ಸ್ವ॒ಚ್ಛಿರೋ॑ ಅಸ್ತು ಮೇ । ಪಯ॑ಸ್ವಾನ್. ವಿ॒ಶ್ವತಃ॑ ಪ್ರ॒ತ್ಯಮ್ । ಪಯ॑ಸಾ॒ ಸಮ್ಪಿ॑ಪೃಗ್ಧಿ ಮಾ ॥ 19 ॥

ಆಯು॑ರಸಿ । ತ-ತ್ತೇ॒ ಪ್ರಯ॑ಚ್ಛಾಮಿ । ಆಯು॑ಷ್ಮದಸ್ತು ಮೇ॒ ಮುಖ᳚ಮ್ । ಆಯು॑ಷ್ಮ॒ಚ್ಛಿರೋ॑ ಅಸ್ತು ಮೇ । ಆಯು॑ಷ್ಮಾನ್. ವಿ॒ಶ್ವತಃ॑ ಪ್ರ॒ತ್ಯಮ್ । ಆಯು॑ಷಾ॒ ಸಮ್ಪಿ॑ಪೃಗ್ಧಿ ಮಾ ॥ ಇ॒ಮಮ॑ಗ್ನ॒ ಆಯು॑ಷೇ॒ ವರ್ಚ॑ಸೇ ಕೃಧಿ । ಪ್ರಿ॒ಯಗ್ಂ ರೇತೋ॑ ವರುಣ ಸೋಮ ರಾಜನ್ನ್ । ಮಾ॒ತೇವಾ᳚ಸ್ಮಾ ಅದಿತೇ॒ ಶರ್ಮ॑ ಯಚ್ಛ । ವಿಶ್ವೇ॑ ದೇವಾ॒ ಜರ॑ದಷ್ಟಿ॒ರ್ಯಥಾ ಽಸ॑ತ್ ॥ 20 ॥

ಆಯು॑ರಸಿ ವಿ॒ಶ್ವಾಯು॑ರಸಿ । ಸ॒ರ್ವಾಯು॑ರಸಿ॒ ಸರ್ವ॒ಮಾಯು॑ರಸಿ ॥ ಯತೋ॒ ವಾತೋ॒ ಮನೋ॑ ಜವಾಃ । ಯತಃ॒, ಖ್ಷರ॑ನ್ತಿ॒ ಸಿನ್ಧ॑ವಃ । ತಾಸಾ᳚-ನ್ತ್ವಾ॒ ಸರ್ವಾ॑ಸಾಗ್ಂ ರು॒ಚಾ । ಅ॒ಭಿಷಿ॑ಞ್ಚಾಮಿ॒ ವರ್ಚ॑ಸಾ ॥ ಸ॒ಮು॒ದ್ರ ಇ॑ವಾಸಿ ಗ॒ಹ್ಮನಾ᳚ । ಸೋಮ॑ ಇವಾ॒ಸ್ಯದಾ᳚ಭ್ಯಃ । ಅ॒ಗ್ನಿರಿ॑ವ ವಿ॒ಶ್ವತಃ॑ ಪ್ರ॒ತ್ಯಮ್ । ಸೂರ್ಯ॑ ಇವ॒ ಜ್ಯೋತಿ॑ಷಾ ವಿ॒ಭೂಃ ॥ 21 ॥

ಅ॒ಪಾಂ-ಯೋಁ ದ್ರವ॑ಣೇ॒ ರಸಃ॑ । ತಮ॒ಹಮ॒ಸ್ಮಾ ಆ॑ಮುಷ್ಯಾಯ॒ಣಾಯ॑ । ತೇಜ॑ಸೇ ಬ್ರಹ್ಮವರ್ಚ॒ಸಾಯ॑ ಗೃಹ್ಣಾಮಿ । ಅ॒ಪಾಂ-ಯಁ ಊ॒ರ್ಮೌ ರಸಃ॑ । ತಮ॒ಹಮ॒ಸ್ಮಾ ಆ॑ಮುಷ್ಯಾಯ॒ಣಾಯ॑ । ಓಜ॑ಸೇ ವೀ॒ರ್ಯಾ॑ಯ ಗೃಹ್ಣಾಮಿ । ಅ॒ಪಾಂ-ಯೋಁ ಮ॑ದ್ಧ್ಯ॒ತೋ ರಸಃ॑ । ತಮ॒ಹಮ॒ಸ್ಮಾ ಆ॑ಮುಷ್ಯಾಯ॒ಣಾಯ॑ । ಪುಷ್ಟ್ಯೈ᳚ ಪ್ರ॒ಜನ॑ನಾಯ ಗೃಹ್ಣಾಮಿ । ಅ॒ಪಾಂ-ಯೋಁ ಯ॒ಜ್ಞಿಯೋ॒ ರಸಃ॑ । ತಮ॒ಹಮ॒ಸ್ಮಾ ಆ॑ಮುಷ್ಯಾಯ॒ಣಾಯ॑ । ಆಯು॑ಷೇ ದೀರ್ಘಾಯು॒ತ್ವಾಯ॑ ಗೃಹ್ಣಾಮಿ ॥ 22 ॥
(ಗೋಷ್ - ವೋಜ॑ಸ್ವನ್ತಗ್ಗ್​ ಶ್ರೀಣಾ॒ - ಮ್ಯೋಜೋ॑-ಽಸಿ॒ ತತ್ತೇ॒ ಪ್ರಯ॑ಚ್ಛಾಮಿ॒ - ಪಯ॑ಸಾ॒ ಸಮ್ಪಿ॑ಪೃಗ್ಧಿ॒ ಮಾ-ಸ॑-ದ್- ವಿ॒ಭೂ--ರ್ ಯ॒ಜ್ಞಿಯೋ॒ ರಸೋ॒ ದ್ವೇ ಚ॑) (ಅ. 7)

ಅನುವಾಕಂ 8 - ಓದನಸವಗತಾ ಸ್ಥಾರೋಹಣಮನ್ತ್ರಾಃ
ಅ॒ಭಿಪ್ರೇಹಿ॑ ವೀ॒ರಯ॑ಸ್ವ । ಉ॒ಗ್ರಶ್ಚೇತ್ತಾ॑ ಸಪತ್ನ॒ಹಾ ॥ ಆತಿ॑ಷ್ಠ ಮಿತ್ರ॒ವರ್ಧ॑ನಃ । ತುಭ್ಯ॑-ನ್ದೇ॒ವಾ ಅಧಿ॑ಬ್ರವನ್ನ್ ॥ ಅ॒ಙ್ಕೌನ್ಯ॒ಙ್ಕಾ ವ॒ಭಿತೋ॒ ರಥಂ॒-ಯೌಁ ಧ್ವಾ॒ನ್ತಂ-ವಾಁ॑ತಾ॒ಗ್ರಮನು॑ ಸ॒ಚಂರ॑ನ್ತೌ ದೂ॒ರೇ ಹೇ॑ತಿರಿನ್ದ್ರಿ॒ಯಾವಾ᳚-ನ್ಪತ॒ತ್ರೀ ತೇ ನೋ॒-ಽಗ್ನಯಃ॒ ಪಪ್ರ॑ಯಃ ಪಾರಯನ್ತು ॥ ಶಮೇ ಅಸ್ ಇತೇ-ನ್ನೋ. ॥ ಆ॒ತಿಷ್ಠ॑ನ್ತ॒-ಮ್ಪರಿ॒ ವಿಶ್ವೇ॑ ಅಭೂಷನ್ನ್ । ಶ್ರಿಯಂ॒-ವಁಸಾ॑ನಶ್ಚರತಿ॒ ಸ್ವರೋ॑ಚಾಃ । ಮ॒ಹತ್-ತದ॒ಸ್ಯಾಸು॑ರಸ್ಯ॒ ನಾಮ॑ । ಆ ವಿ॒ಶ್ವರೂ॑ಪೋ ಅ॒ಮೃತಾ॑ನಿ ತಸ್ಥೌ ॥ ಅನು॒ ತ್ವೇನ್ದ್ರೋ॑ ಮದ॒ತ್ವನು॒ ಬೃಹ॒ಸ್ಪತಿಃ॑ ॥ 23 ॥

ಅನು॒ ಸೋಮೋ॒ ಅನ್ವ॒ಗ್ನಿರಾ॑ವೀತ್ । ಅನು॑ ತ್ವಾ॒ ವಿಶ್ವೇ॑ ದೇ॒ವಾ ಅ॑ವನ್ತು । ಅನು॑ ಸ॒ಪ್ತ ರಾಜಾ॑ನೋ॒ ಯ ಉ॒ತಾಭಿಷಿ॑ಕ್ತಾಃ ॥ ಅನು॑ ತ್ವಾ ಮಿ॒ತ್ರಾವರು॑ಣಾವಿ॒ಹಾವ॑ತಮ್ । ಅನು॒ ದ್ಯಾವಾ॑ಪೃಥಿ॒ವೀ ವಿ॒ಶ್ವಶ॑ಭೂಮ್ । ಸೂರ್ಯೋ॒ ಅಹೋ॑ಭಿ॒ರನು॑ ತ್ವಾ-ಽವತು । ಚ॒ನ್ದ್ರಮಾ॒ ನಖ್ಷ॑ತ್ರೈ॒ರನು॑ ತ್ವಾ-ಽವತು ॥ ದ್ಯೌಶ್ಚ॑ ತ್ವಾ ಪೃಥಿ॒ವೀ ಚ॒ ಪ್ರಚೇ॑ತಸಾ । ಶು॒ಕ್ರೋ ಬೃ॒ಹ-ದ್ದಖ್ಷಿ॑ಣಾ ತ್ವಾ ಪಿಪರ್ತು । ಅನು॑ ಸ್ವ॒ಧಾ ಚಿ॑ಕಿತಾ॒ಗ್ಂ॒ ಸೋಮೋ॑ ಅ॒ಗ್ನಿಃ । ಆ-ಽಯ-ಮ್ಪೃ॑ಣಕ್ತು॒ ರಜ॑ಸೀ ಉ॒ಪಸ್ಥ᳚ಮ್ ॥ 24 ॥
(ಬೃಹ॒ಸ್ಪತಿಃ॒ - ಸೋಮೋ॑ ಅ॒ಗ್ನಿರೇಕ॑-ಞ್ಚ) (ಅ. 8)

ಅನುವಾಕಂ 9 - ಓದನಸವಃ
ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ತಾ ಅ॑ಸ್ಮಾ-ಥ್ಸೃ॒ಷ್ಟಾಃ ಪರಾ॑ಚೀರಾಯನ್ನ್ । ಸ ಏ॒ತ-ಮ್ಪ್ರ॒ಜಾಪ॑ತಿರೋದ॒ನ-ಮ॑ಪಶ್ಯತ್ । ಸೋ-ಽನ್ನ॑-ಮ್ಭೂ॒ತೋ॑-ಽತಿಷ್ಠತ್ । ತಾ ಅ॒ನ್ಯತ್ರಾ॒ನ್ನಾದ್ಯ॒ಮವಿ॑ತ್ತ್ವಾ । ಪ್ರ॒ಜಾಪ॑ತಿ-ಮ್ಪ್ರ॒ಜಾ ಉ॒ಪಾವ॑ರ್ತನ್ತ । ಅನ್ನ॑ಮೇ॒ವೈನ॑-ಮ್ಭೂ॒ತ-ಮ್ಪಶ್ಯ॑ನ್ತೀಃ ಪ್ರ॒ಜಾ ಉ॒ಪಾವ॑ರ್ತನ್ತೇ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಸರ್ವಾ॒ಣ್ಯನ್ನಾ॑ನಿ ಭವನ್ತಿ ॥ 25 ॥

ಸರ್ವೇ॒ ಪುರು॑ಷಾಃ । ಸರ್ವಾ᳚ಣ್ಯೇ॒ವಾನ್ನಾ॒ನ್ಯವ॑ರುನ್ಧೇ । ಸರ್ವಾ॒-ನ್ಪುರು॑ಷಾನ್ ॥ ರಾಡ॑ಸಿ ವಿ॒ರಾಡ॒ಸೀತ್ಯಾ॑ಹ । ಸ್ವಾರಾ᳚ಜ್ಯಮೇ॒ವೈನ॑-ಙ್ಗಮಯತಿ ॥ ಯದ್ಧಿರ॑ಣ್ಯ॒-ನ್ದದಾ॑ತಿ । ತೇಜ॒ಸ್ತೇನಾವ॑ರುನ್ಧೇ । ಯತ್ತಿ॑ಸೃಧ॒ನ್ವಮ್ । ವೀ॒ರ್ಯ॑-ನ್ತೇನ॑ । ಯದಷ್ಟ್ರಾ᳚ಮ್ ॥ 26 ॥

ಪುಷ್ಟಿ॒-ನ್ತೇನ॑ । ಯತ್-ಕ॑ಮ॒ಣ್ಡಲು᳚ಮ್ । ಆಯು॒ಷ್ಟೇನ॑ ॥ ಯದ್ಧಿರ॑ಣ್ಯಮಾಬ॒ದ್ಧ್ನಾತಿ॑ । ಜ್ಯೋತಿ॒ರ್ವೈ ಹಿರ॑ಣ್ಯಮ್ । ಜ್ಯೋತಿ॑ರೇ॒ವಾಸ್ಮಿ॑ನ್-ದಧಾತಿ । ಅಥೋ॒ ತೇಜೋ॒ ವೈ ಹಿರ॑ಣ್ಯಮ್ । ತೇಜ॑ ಏ॒ವಾತ್ಮ-ನ್ಧ॑ತ್ತೇ ॥ ಯದೋ॑ದ॒ನ-ಮ್ಪ್ರಾ॒ಶ್ನಾತಿ॑ । ಏ॒ತದೇ॒ವ ಸರ್ವ॑ಮವ॒ರುದ್ಧ್ಯ॑ ॥ 27 ॥

ತದ॑ಸ್ಮಿ-ನ್ನೇಕ॒ಧಾ-ಽಧಾ᳚ತ್ ॥ ರೋ॒ಹಿ॒ಣ್ಯಾ-ಙ್ಕಾ॒ರ್ಯಃ॑ । ಯದ್ಬ್ರಾ᳚ಹ್ಮ॒ಣ ಏ॒ವ ರೋ॑ಹಿ॒ಣೀ । ತಸ್ಮಾ॑ದೇ॒ವ । ಅಥೋ॒ ವರ್​ಷ್ಮೈ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತಿ ॥ ಉ॒ದ್ಯ॒ತಾ ಸೂರ್ಯೇ॑ಣ ಕಾ॒ರ್ಯಃ॑ । ಉ॒ದ್ಯನ್ತಂ॒-ವಾಁ ಏ॒ತಗ್ಂ ಸರ್ವಾಃ᳚ ಪ್ರ॒ಜಾಃ ಪ್ರತಿ॑ನನ್ದನ್ತಿ ॥ ದಿ॒ದೃ॒ಖ್ಷೇಣ್ಯೋ॑ ದರ್​ಶ॒ನೀಯೋ॑ ಭವತಿ । ಯ ಏ॒ವಂ-ವೇಁದ॑ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ ॥ 28 ॥

ಅ॒ವೇತ್ಯೋ॑-ಽವಭೃ॒ಥಾ(3) ನಾ(3) ಇತಿ॑ । ಯ-ದ್ದ॑ರ್ಭಪುಞ್ಜೀ॒ಲೈಃ ಪ॒ವಯ॑ತಿ । ತ-ಥ್ಸ್ವಿ॑ದೇ॒ವಾವೈ॑ತಿ । ತನ್ನಾವೈ॑ತಿ ॥ ತ್ರಿ॒ಭಿಃ ಪ॑ವಯತಿ । ತ್ರಯ॑ ಇ॒ಮೇ ಲೋ॒ಕಾಃ । ಏ॒ಭಿರೇ॒ವೈನಂ॑-ಲೋಁ॒ಕೈಃ ಪ॑ವಯತಿ । ಅಥೋ॑ ಅ॒ಪಾಂ-ವಾಁ ಏ॒ತ-ತ್ತೇಜೋ॒ ವರ್ಚಃ॑ । ಯ-ದ್ದ॒ರ್ಭಾಃ । ಯ-ದ್ದ॑ರ್ಭಪುಞ್ಜೀ॒ಲೈಃ ಪ॒ವಯ॑ತಿ । ಅ॒ಪಾಮೇ॒ವೈನ॒-ನ್ತೇಜ॑ಸಾ॒ ವರ್ಚ॑ಸಾ॒-ಽಭಿಷಿ॑ಞ್ಚತಿ ॥ 29 ॥
(ಭ॒ವ॒ - ನ್ತ್ಯಷ್ಟ್ರಾ॑ - ಮವ॒ರುದ್ಧ್ಯ॑ - ವದನ್ತಿ - ದ॒ರ್ಭಾ ಯ-ದ್ದ॑ರ್ಭಪುಞ್ಜೀ॒ಲೈಃ ಪ॒ವಯ॒ತ್ಯೇಕ॑-ಞ್ಚ ) (ಅ. 9)

ಅನುವಾಕಂ 10 - ಪಞ್ಚಶಾರದೀಯವಿಧಿಃ
ಪ್ರ॒ಜಾಪ॑ತಿರಕಾಮಯತ ಬ॒ಹೋರ್ಭೂಯಾ᳚ನ್-ಥ್ಸ್ಯಾ॒ಮಿತಿ॑ । ಸ ಏ॒ತ-ಮ್ಪ॑ಞ್ಚಶಾರ॒ದೀಯ॑-ಮಪಶ್ಯತ್ । ತಮಾ-ಽಹ॑ರತ್ । ತೇನಾ॑ಯಜತ । ತತೋ॒ ವೈ ಸ ಬ॒ಹೋರ್ಭೂಯಾ॑-ನಭವತ್ । ಯಃ ಕಾ॒ಮಯೇ॑ತ ಬ॒ಹೋರ್ಭೂಯಾ᳚ನ್-ಥ್ಸ್ಯಾ॒ಮಿತಿ॑ । ಸ ಪ॑ಞ್ಚಶಾರ॒ದೀಯೇ॑ನ ಯಜೇತ । ಬ॒ಹೋರೇ॒ವ ಭೂಯಾ᳚-ನ್ಭವತಿ ॥ ಮ॒ರು॒-ಥ್ಸ್ತೋ॒ಮೋ ವಾ ಏ॒ಷಃ । ಮ॒ರುತೋ॒ ಹಿ ದೇ॒ವಾನಾ॒-ಮ್ಭೂಯಿ॑ಷ್ಠಾಃ ॥ 30 ॥

ಬ॒ಹುರ್ಭ॑ವತಿ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಪ॒ಞ್ಚ॒ಶಾ॒ರ॒ದೀಯೋ॑ ಭವತಿ । ಪಞ್ಚ॒ ವಾ ಋ॒ತವ॑-ಸ್ಸಂ​ವಁಥ್ಸ॒ರಃ । ಋ॒ತುಷ್ವೇ॒ವ ಸಂ॑​ವಁಥ್ಸ॒ರೇ ಪ್ರತಿ॑ತಿಷ್ಠತಿ । ಅಥೋ॒ ಪಞ್ಚಾ᳚ಖ್ಷರಾ ಪ॒ಙ್ಕ್ತಿಃ । ಪಾಙ್ಕ್ತೋ॑ ಯ॒ಜ್ಞಃ । ಯ॒ಜ್ಞಮೇ॒ವಾವ॑ರುನ್ಧೇ ॥ ಸ॒ಪ್ತ॒ದ॒ಶಗ್ಗ್​ ಸ್ತೋಮಾ॒ ನಾತಿ॑ಯನ್ತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ 31 ॥
(ಭೂಯಿ॑ಷ್ಠಾ - ಯನ್ತಿ॒ ದ್ವೇ ಚ॑) (ಅ. 10)

ಅನುವಾಕಂ 11 - ಪಞ್ಚಶಾರದೀಯಗತಪಶುವಿಧಿಃ
ಅ॒ಗಸ್ಯೋ॑ ಮ॒ರುದ್ಭ್ಯ॑ ಉ॒ಖ್ಷ್ಣಃ ಪ್ರೌಖ್ಷ॑ತ್ । ತಾನಿನ್ದ್ರ॒ ಆದ॑ತ್ತ । ತ ಏ॑ನಂ॒-ವಁಜ್ರ॑ಮು॒ದ್ಯತ್ಯಾ॒ಭ್ಯಾ॑ಯನ್ತ । ತಾನ॒ಗಸ್ತ್ಯ॑ಶ್ಚೈ॒ವೇನ್ದ್ರ॑ಶ್ಚ ಕಯಾಶು॒ಭೀಯೇ॑ನಾಶಮಯತಾಮ್ । ತಾಞ್ಛಾ॒-ನ್ತಾನುಪಾ᳚ಹ್ವಯತ । ಯ-ತ್ಕ॑ಯಾಶು॒ಭೀಯ॒-ಮ್ಭವ॑ತಿ॒ ಶಾನ್ತ್ಯೈ᳚ ॥ ತಸ್ಮಾ॑ದೇ॒ತ ಐ᳚ನ್ದ್ರಾ ಮಾರು॒ತಾ ಉ॒ಖ್ಷಾಣ॑-ಸ್ಸವ॒ನೀಯಾ॑ ಭವನ್ತಿ । ತ್ರಯಃ॑ ಪ್ರಥ॒ಮೇ-ಽಹ॒ನ್ನಾಲ॑ಭ್ಯನ್ತೇ । ಏ॒ವ-ನ್ದ್ವಿ॒ತೀಯೇ᳚ । ಏ॒ವ-ನ್ತೃ॒ತೀಯೇ᳚ ॥ 32 ॥

ಏ॒ವ-ಞ್ಚ॑ತು॒ರ್ಥೇ । ಪಞ್ಚೋ᳚ತ್ತ॒ಮೇ-ಽಹ॒ನ್ನಾಲ॑ಭ್ಯನ್ತೇ । ವರ್​ಷಿ॑ಷ್ಠಮಿವ॒ ಹ್ಯೇ॑ತದಹಃ॑ ॥ ವರ್​ಷಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಸ್ವಾರಾ᳚ಜ್ಯಂ॒-ವಾಁ ಏ॒ಷ ಯ॒ಜ್ಞಃ । ಏ॒ತೇನ॒ ವಾ ಏಕ॒ಯಾವಾ॑ ಕಾನ್ದ॒ಮ-ಸ್ಸ್ವಾರಾ᳚ಜ್ಯ-ಮಗಚ್ಛತ್ ॥ ಸ್ವಾರಾ᳚ಜ್ಯ-ಙ್ಗಚ್ಛತಿ । ಯ ಏ॒ತೇನ॒ ಯಜ॑ತೇ ॥ 33 ॥

ಯ ಉ॑ ಚೈನಮೇ॒ವಂ-ವೇಁದ॑ ॥ ಮಾ॒ರು॒ತೋ ವಾ ಏ॒ಷ ಸ್ತೋಮಃ॑ । ಏ॒ತೇನ॒ ವೈ ಮ॒ರುತೋ॑ ದೇ॒ವಾನಾ॒-ಮ್ಭೂಯಿ॑ಷ್ಠಾ ಅಭವನ್ನ್ । ಭೂಯಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಪ॒ಞ್ಚ॒ಶಾ॒ರ॒ದೀಯೋ॒ ವಾ ಏ॒ಷ ಯ॒ಜ್ಞಃ । ಆ ಪ॑ಞ್ಚ॒ಮಾತ್-ಪುರು॑ಷಾ॒ದನ್ನ॑ಮತ್ತಿ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ಸ॒ಪ್ತ॒ದ॒ಶಗ್ಗ್​ ಸ್ತೋಮಾ॒ ನಾತಿ॑ಯನ್ತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇರೇ॒ವ ನೈತಿ॑ ॥ 34 ॥
(ತೃ॒ತೀಯೇ॑ - ಗಚ್ಛತಿ॒ ಯ ಏ॒ತೇನ॒ ಯಜ॑ತೇ - ಽತ್ತಿ॒ ಯ ಏ॒ತೇನ॒ ಯಜ॑ತೇ॒ ಯ ಉ॑ ಚೈನಮೇ॒ವಂ-ವೇಁದ॒ ತ್ರೀಣಿ॑ ಚ) (ಅ. 11)

(ಅ॒ಗಸ್ತ್ಯ॒-ಸ್ಸ್ವಾರಾ᳚ಜ್ಯ-ಮ್ಮಾರು॒ತಃ ಪ॑ಞ್ಚಶಾರ॒ದೀಯೋ॒ ವಾ ಏ॒ಷ ಯ॒ಜ್ಞ-ಸ್ಸ॑ಪ್ತದ॒ಶಂ
ಪ್ರ॒ಜಾಪ॑ತೇರೇ॒ವ ನೈತಿ॑)

ಅನುವಾಕಂ 12 - ಅಗ್ನಿಷ್ಟುದ್ಯಾಗೇ ಗ್ರಹಾಣಾ-ಮ್ಪುರೋರುಚಃ
ಅ॒ಸ್ಯಾಜರಾ॑ಸೋ ದ॒ಮಾ ಮ॒ರಿತ್ರಾಃ᳚ । ಅ॒ರ್ಚದ್ಧೂ॑ಮಾಸೋ ಅ॒ಗ್ನಯಃ॑ ಪಾವ॒ಕಾಃ । ಶ್ವಿ॒ಚೀ॒ಚಯ॑-ಶ್ಶ್ವಾ॒ತ್ರಾಸೋ॑ ಭುರ॒ಣ್ಯವಃ॑ । ವ॒ನ॒ರ॒.ಷದೋ॑ ವಾ॒ಯವೋ॒ ನ ಸೋಮಾಃ᳚ ॥ ಯಜಾ॑ ನೋ ಮಿ॒ತ್ರಾವರು॑ಣಾ । ಯಜಾ॑ ದೇ॒ವಾಗ್ಂ ಋ॒ತ-ಮ್ಬೃ॒ಹತ್ । ಅಗ್ನೇ॒ ಯಖ್ಷಿ॒ ಸ್ವ-ನ್ದಮ᳚ಮ್ ॥ ಅಶ್ವಿ॑ನಾ॒ ಪಿಬ॑ತಗ್ಂ ಸು॒ತಮ್ । ದೀದ್ಯ॑ಗ್ನೀ ಶುಚಿ ವ್ರತಾ । ಋ॒ತುನಾ॑ ಯಜ್ಞವಾಹಸಾ ॥ 35 ॥

ದ್ವೇ ವಿರೂ॑ಪೇ ಚರತ॒-ಸ್ಸ್ವರ್ಥೇ᳚ । ಅ॒ನ್ಯಾ-ಽನ್ಯಾ॑ ವ॒ಥ್ಸಮುಪ॑ಧಾಪಯೇತೇ । ಹರಿ॑ರ॒ನ್ಯಸ್ಯಾ॒-ಮ್ಭವ॑ತಿ ಸ್ವ॒ಧಾವಾನ್॑ । ಶು॒ಕ್ರೋ ಅ॒ನ್ಯಸ್ಯಾ᳚-ನ್ದದೃಶೇ ಸು॒ವರ್ಚಾಃ᳚ ॥ ಪೂ॒ರ್ವಾ॒ಪ॒ರ-ಞ್ಚ॑ರತೋ ಮಾ॒ಯಯೈ॒ತೌ । ಶಿಶೂ॒ ಕ್ರೀಡ॑ನ್ತೌ॒ ಪರಿ॑ಯಾತೋ ಅದ್ಧ್ವ॒ರಮ್ । ವಿಶ್ವಾ᳚ನ್ಯ॒ನ್ಯೋ ಭುವ॑ನಾ-ಽಭಿ॒ಚಷ್ಟೇ᳚ । ಋ॒ತೂನ॒ನ್ಯೋ ವಿ॒ದಧ॑ಜ್ಜಾಯತೇ॒ ಪುನಃ॑ ॥ ತ್ರೀಣಿ॑ ಶ॒ತಾ ತ್ರೀಷ॒ಹಸ್ರಾ᳚ಣ್ಯ॒ಗ್ನಿಮ್ । ತ್ರಿ॒ಗ್ಂ॒ಶಚ್ಚ॑ ದೇ॒ವಾ ನವ॑ ಚಾಸಪರ್ಯನ್ನ್ ॥ 36 ॥

ಔಖ್ಷ॑ನ್-ಘೃ॒ತೈರಾಸ್ತೃ॑ಣನ್-ಬ॒ರ್॒ಹಿರ॑ಸ್ಮೈ । ಆದಿದ್ಧೋತಾ॑ರ॒-ನ್ನ್ಯ॑ಷಾದಯನ್ತ ॥ ಅ॒ಗ್ನಿನಾ॒-ಽಗ್ನಿ-ಸ್ಸಮಿ॑ದ್ಧ್ಯತೇ । ಕ॒ವಿ-ರ್ಗೃ॒ಹಪ॑ತಿ॒ರ್ಯುವಾ᳚ । ಹ॒ವ್ಯ॒ವಾಡ್-ಜು॒ಹ್ವಾ᳚ಸ್ಯಃ ॥ ಅ॒ಗ್ನಿ-ರ್ದೇ॒ವಾನಾ᳚-ಞ್ಜ॒ಠರ᳚ಮ್ । ಪೂ॒ತದ॑ಖ್ಷಃ ಕ॒ವಿಕ್ರ॑ತುಃ । ದೇ॒ವೋ ದೇ॒ವೇಭಿ॒ರಾಗ॑ಮತ್ ॥ ಅ॒ಗ್ನಿ॒ಶ್ರಿಯೋ॑ ಮ॒ರುತೋ॑ ವಿ॒ಶ್ವಕೃ॑ಷ್ಟಯಃ । ಆ ತ್ವೇ॒ಷಮು॒ಗ್ರಮವ॑ ಈಮಹೇ ವ॒ಯಮ್ ॥ 37 ॥

ತೇ ಸ್ವಾ॒ನಿನೋ॑ ರು॒ದ್ರಿಯಾ॑ ವ॒ರ॒.ಷನಿ॑ರ್ಣಿಜಃ । ಸಿ॒ಗ್ಂ॒ಹಾ ನ ಹೇ॒ಷಕ್ರ॑ತವ-ಸ್ಸು॒ದಾನ॑ವಃ ॥ ಯದು॑ತ್ತ॒ಮೇ ಮ॑ರುತೋ ಮದ್ಧ್ಯ॒ಮೇ ವಾ᳚ । ಯದ್ವಾ॑-ಽವ॒ಮೇ ಸು॑ಭಗಾಸೋ ದಿ॒ವಿಷ್ಠ । ತತೋ॑ ನೋ ರುದ್ರಾ ಉ॒ತ ವಾ॒-ಽನ್ವಸ್ಯ॑ । ಅಗ್ನೇ॑ ವಿ॒ತ್ತಾದ್ಧ॒ವಿಷೋ॒ ಯದ್ಯಜಾ॑ಮಃ ॥ ಈಡೇ॑ ಅ॒ಗ್ನಿಗ್ಗ್​ ಸ್ವವ॑ಸ॒-ನ್ನಮೋ॑ಭಿಃ । ಇ॒ಹ ಪ್ರ॑ಸ॒ಪ್ತೋ ವಿಚ॑ಯತ್ಕೃ॒ತ-ನ್ನಃ॑ । ರಥೈ॑ರಿವ॒ ಪ್ರಭ॑ರೇ ವಾಜ॒ಯದ್ಭಿಃ॑ । ಪ್ರ॒ದ॒ಖ್ಷಿ॒ಣಿ-ನ್ಮ॒ರುತಾ॒ಗ್॒ ಸ್ತೋಮ॑ಮೃದ್ಧ್ಯಾಮ್ ॥ 38 ॥

ಶ್ರು॒ಧಿ ಶ್ರು॑ತ್ಕರ್ಣ॒ ವಹ್ನಿ॑ಭಿಃ । ದೇ॒ವೈರ॑ಗ್ನೇ ಸ॒ಯಾವ॑ಭಿಃ । ಆಸೀ॑ದನ್ತು ಬ॒ರ॒ಃಇಷಿ॑ । ಮಿ॒ತ್ರೋ ವರು॑ಣೋ ಅರ್ಯ॒ಮಾ । ಪ್ರಾ॒ತ॒ರ್ಯಾವಾ॑ಣೋ ಅದ್ಧ್ವ॒ರಮ್ ॥ ವಿಶ್ವೇ॑ಷಾ॒-ಮದಿ॑ತಿ-ರ್ಯ॒ಜ್ಞಿಯಾ॑ನಾಮ್ । ವಿಶ್ವ॑ಷಾ॒-ಮತಿ॑ಥಿ॒-ರ್ಮಾನು॑ಷಾಣಾಮ್ । ಅ॒ಗ್ನಿ-ರ್ದೇ॒ವಾನಾ॒ಮವ॑ ಆವೃಣಾ॒ನಃ । ಸು॒ಮೃ॒ಡೀ॒ಕೋ ಭ॑ವತು ವಿ॒ಶ್ವವೇ॑ದಾಃ ॥ ತ್ವೇ ಅ॑ಗ್ನೇ ಸುಮ॒ತಿ-ಮ್ಭಿಖ್ಷ॑ಮಾಣಾಃ ॥ 39 ॥

ದಿ॒ವಿ ಶ್ರವೋ॑ ದಧಿರೇ ಯ॒ಜ್ಞಿಯಾ॑ಸಃ । ನಕ್ತಾ॑ ಚ ಚ॒ಕ್ರುರು॒ಷಸಾ॒ ವಿರೂ॑ಪೇ । ಕೃ॒ಷ್ಣ-ಞ್ಚ॒ ವರ್ಣ॑ಮರು॒ಣ-ಞ್ಚ॒ ಸನ್ಧುಃ॑ ॥ ತ್ವಾಮ॑ಗ್ನ ಆದಿ॒ತ್ಯಾಸ॑ ಆ॒ಸ್ಯ᳚ಮ್ । ತ್ವಾ-ಞ್ಜಿ॒ಹ್ವಾಗ್ಂ ಶುಚ॑ಯಶ್ಚಕ್ರಿರೇ ಕವೇ । ತ್ವಾಗ್ಂ ರಾ॑ತಿ॒ಷಾಚೋ॑ ಅದ್ಧ್ವ॒ರೇಷು॑ ಸಶ್ಚಿರೇ । ತ್ವೇ ದೇ॒ವಾ ಹ॒ವಿರ॑ದ॒ನ್ತ್ಯಾಹು॑ತಮ್ ॥ ನಿ ತ್ವಾ॑ ಯ॒ಜ್ಞಸ್ಯ॒ ಸಾಧ॑ನಮ್ । ಅಗ್ನೇ॒ ಹೋತಾ॑ರ-ಮೃ॒ತ್ವಿಜ᳚ಮ್ । ವ॒ನು॒ಷ್ವ-ದ್ದೇ॑ವ ಧೀಮಹಿ॒ ಪ್ರಚೇ॑ತಸಮ್ । ಜೀ॒ರ-ನ್ದೂ॒ತಮಮ॑ರ್ತ್ಯಮ್ ॥ 40 ॥
(ಯ॒ಜ್ಞ॒ವಾ॒ಹ॒ಸಾ॒ - ಽಸ॒ಪ॒ರ್ಯ॒ನ್ - ವ॒ಯ - ಮೃ॑ದ್ಧ್ಯಾಂ॒ - ಭಿಖ್ಷ॑ಮಾಣಾಃ॒ - ಪ್ರಚೇ॑ತಸ॒ಮೇಕ॑-ಞ್ಚ) (ಅ. 12)

ಅನುವಾಕಂ 13 - ಇನ್ದ್ರಸ್ತುದ್ಯಾಗೇ ಗ್ರಹಾಣಾ-ಮ್ಪುರೋರುಚಃ
ತಿಷ್ಠಾ॒ ಹರೀ॒ ರಥ॒ ಆ ಯು॒ಜ್ಯಮಾ॑ನಾ ಯಾ॒ಹಿ । ವಾ॒ಯುರ್ನ ನಿ॒ಯುತೋ॑ ನೋ॒ ಅಚ್ಛ॑ । ಪಿಬಾ॒ಸ್ಯನ್ಧೋ॑ ಅ॒ಭಿಸೃ॑ಷ್ಟೋ ಅ॒ಸ್ಮೇ । ಇನ್ದ್ರ॒ ಸ್ವಾಹಾ॑ ರರಿ॒ಮಾ ತೇ॒ ಮದಾ॑ಯ ॥ ಕಸ್ಯ॒ ವೃಷಾ॑ ಸು॒ತೇ ಸಚಾ᳚ । ನಿ॒ಯುತ್ವಾ᳚ನ್ ವೃಷ॒ಭೋ ರ॑ಣತ್ । ವೃ॒ತ್ರ॒ಹಾ ಸೋಮ॑ಪೀತಯೇ ॥ ಇನ್ದ್ರಂ॑-ವಁ॒ಯ-ಮ್ಮ॑ಹಾಧ॒ನೇ । ಇನ್ದ್ರ॒ಮರ್ಭೇ॑ ಹವಾಮಹೇ । ಯುಜಂ॑-ವೃಁ॒ತ್ರೇಷು॑ ವ॒ಜ್ರಿಣ᳚ಮ್ ॥ 41 ॥

ದ್ವಿ॒ತಾಯೋ ವೃ॑ತ್ರ॒ಹನ್ತ॑ಮಃ । ವಿ॒ದ ಇನ್ದ್ರ॑-ಶ್ಶ॒ತಕ್ರ॑ತುಃ । ಉಪ॑ ನೋ॒ ಹರಿ॑ಭಿ-ಸ್ಸು॒ತಮ್ ॥ ಸ ಸೂರ॒ ಆಜ॒ನಯ॒ಞ್ಜ್ಯೋತಿ॒ರಿನ್ದ್ರ᳚ಮ್ । ಅ॒ಯಾ ಧಿ॒ಯಾ ತ॒ರಣಿ॒ರದ್ರಿ॑ಬರ್​ಹಾಃ । ಋ॒ತೇನ॑ ಶು॒ಷ್ಮೀನವ॑ಮಾನೋ ಅ॒ರ್ಕೈಃ । ವ್ಯು॑ಸ್ರಿಧೋ॑ ಅ॒ಸ್ರೋ ಅದ್ರಿ॑ರ್ಬಿಭೇದ ॥ ಉ॒ತ ತ್ಯದಾ॒ಶ್ವಶ್ವಿ॑ಯಮ್ । ಯದಿ॑ನ್ದ್ರ॒ ನಾಹು॑ಷೀ॒ಷ್ವಾ । ಅಗ್ರೇ॑ ವಿ॒ಖ್ಷು ಪ್ರತೀದ॑ಯತ್ ॥ 42 ॥

ಭರೇ॒ಷ್ವಿನ್ದ್ರಗ್ಂ॑ ಸು॒ಹವಗ್ಂ॑ ಹವಾಮಹೇ । ಅ॒ಗ್ಂ॒ಹೋ॒ಮುಚಗ್ಂ॑ ಸು॒ಕೃತ॒-ನ್ದೈವ್ಯ॒ಞ್ಜನ᳚ಮ್ । ಅ॒ಗ್ನಿ-ಮ್ಮಿ॒ತ್ರಂ-ವಁರು॑ಣಗ್ಂ ಸಾ॒ತಯೇ॒ ಭಗ᳚ಮ್ । ದ್ಯಾವಾ॑ಪೃಥಿ॒ವೀ ಮ॒ರುತ॑-ಸ್ಸ್ವ॒ಸ್ತಯೇ᳚ ॥ ಮ॒ಹಿ ಖ್ಷೇತ್ರ॑-ಮ್ಪು॒ರುಶ್ಚ॒ನ್ದ್ರಂ-ವಿಁವಿ॒ದ್ವಾನ್ । ಆದಿ-ಥ್ಸಖಿ॑ಭ್ಯಶ್ಚ॒ ರಥ॒ಗ್ಂ॒ ಸಮೈ॑ರತ್ । ಇನ್ದ್ರೋ॒ ನೃಭಿ॑ರಜನ॒-ದ್ದೀದ್ಯಾ॑ನ-ಸ್ಸಾ॒ಕಮ್ । ಸೂರ್ಯ॑ಮು॒ಷಸ॑-ಙ್ಗಾ॒ತುಮ॒ಗ್ನಿಮ್ ॥ ಉ॒ರು-ನ್ನೋ॑ ಲೋ॒ಕಮನು॑ನೇಷಿ ವಿ॒ದ್ವಾನ್ । ಸುವ॑ರ್ವ॒-ಜ್ಜ್ಯೋತಿ॒ರಭ॑ಯಗ್ಗ್​ ಸ್ವ॒ಸ್ತಿ ॥ 43 ॥

ಋ॒ಷ್ವಾ ತ॑ ಇನ್ದ್ರ॒ ಸ್ಥವಿ॑ರಸ್ಯ ಬಾ॒ಹೂ । ಉಪ॑ಸ್ಥೇಯಾಮ ಶರ॒ಣಾ ಬೃ॒ಹನ್ತಾ᳚ ॥ ಆ ನೋ॒ ವಿಶ್ವಾ॑ಭಿರೂ॒ತಿಭಿ॑-ಸ್ಸ॒ಜೋಷಾಃ᳚ । ಬ್ರಹ್ಮ॑ ಜುಷಾ॒ಣೋ ಹ॑ರ್ಯಶ್ವ ಯಾಹಿ । ವರೀ॑ವೃಜ॒-ಥ್ಸ್ಥವಿ॑ರೇಭಿ-ಸ್ಸುಶಿಪ್ರ । ಅ॒ಸ್ಮೇ ದಧ॒-ದ್ವೃಷ॑ಣ॒ಗ್ಂ॒ ಶುಷ್ಮ॑ಮಿನ್ದ್ರ ॥ ಇನ್ದ್ರಾ॑ಯ॒ ಗಾವ॑ ಆ॒ಶಿರ᳚ಮ್ । ದು॒ದು॒ಹ್ರೇ ವ॒ಜ್ರಿಣೇ॒ ಮಧು॑ । ಯ-ಥ್ಸೀ॑ಮುಪಹ್ವ॒ರೇ-ಽವಿ॒ದತ್ ॥ ತಾಸ್ತೇ॑ ವಜ್ರಿ-ನ್ಧೇ॒ನವೋ॑ ಜೋಜಯುರ್ನಃ ॥ 44 ॥

ಗಭ॑ಸ್ತಯೋ ನಿ॒ಯುತೋ॑ ವಿ॒ಶ್ವವಾ॑ರಾಃ । ಅಹ॑ರಹ॒ರ್ಭೂಯ॒ ಇಜ್ಜೋಗು॑ವಾನಾಃ । ಪೂ॒ರ್ಣಾ ಇ॑ನ್ದ್ರ ಖ್ಷು॒ಮತೋ॒ ಭೋಜ॑ನಸ್ಯ ॥ ಇ॒ಮಾ-ನ್ತೇ॒ ಧಿಯ॒-ಮ್ಪ್ರಭ॑ರೇ ಮ॒ಹೋ ಮ॒ಹೀಮ್ । ಅ॒ಸ್ಯ ಸ್ತೋ॒ತ್ರೇ ಧಿ॒ಷಣಾ॒ ಯತ್ತ॑ ಆನ॒ಜೇ । ತಮು॑ಥ್ಸ॒ವೇ ಚ॑ ಪ್ರಸ॒ವೇ ಚ॑ ಸಾಸ॒ಹಿಮ್ । ಇನ್ದ್ರ॑-ನ್ದೇ॒ವಾಸ॒-ಶ್ಶವ॑ಸಾ ಮದ॒ನ್ನನು॑ ॥ 45 ॥
(ವ॒ಜ್ರಿಣ॑ - ಮಯಥ್ - ಸ್ವ॒ಸ್ತಿ - ಜೋ॑ಜಯುರ್ನಃ - +ಸ॒ಪ್ತ ಚ॑) (ಅ. 13)

ಅನುವಾಕಂ 14 - ಅಪ್ತೋರ್ಯಾಮಾವಿಧಿಃ
ಪ್ರ॒ಜಾಪ॑ತಿಃ ಪ॒ಶೂನ॑ಸೃಜತ । ತೇ᳚-ಽಸ್ಮಾ-ಥ್ಸೃ॒ಷ್ಟಾಃ ಪರಾ᳚ಞ್ಚ ಆಯನ್ನ್ । ತಾನ॑ಗ್ನಿಷ್ಟೋ॒ಮೇನ॒ ನಾಪ್ನೋ᳚ತ್ । ತಾನು॒ಕ್ಥ್ಯೇ॑ನ॒ ನಾಪ್ನೋ᳚ತ್ । ತಾನ್-ಥ್ಷೋ॑ಡ॒ಶಿನಾ॒ ನಾಪ್ನೋ᳚ತ್ । ತಾನ್ರಾತ್ರಿ॑ಯಾ॒ ನಾಪ್ನೋ᳚ತ್ । ತಾನ್-ಥ್ಸ॒ನ್ಧಿನಾ॒ ನಾಪ್ನೋ᳚ತ್ । ಸೋ᳚-ಽಗ್ನಿಮ॑ಬ್ರವೀತ್ । ಇ॒ಮಾನ್ಮ॑ ಈ॒ಫ್ಸೇತಿ॑ । ತಾನ॒ಗ್ನಿಸ್ತ್ರಿ॒ವೃತಾ॒ ಸ್ತೋಮೇ॑ನ॒ ನಾಪ್ನೋ᳚ತ್ ॥ 46 ॥

ಸ ಇನ್ದ್ರ॑ಮಬ್ರವೀತ್ । ಇ॒ಮಾನ್ಮ॑ ಈ॒ಫ್ಸೇತಿ॑ । ತಾನಿನ್ದ್ರಃ॑ ಪಞ್ಚದ॒ಶೇನ॒ ಸ್ತೋಮೇ॑ನ॒ ನಾಪ್ನೋ᳚ತ್ । ಸ ವಿಶ್ವಾ᳚-ನ್ದೇ॒ವಾ-ನ॑ಬ್ರವೀತ್ । ಇ॒ಮಾನ್ಮ॑ ಈಫ್ಸ॒ತೇತಿ॑ । ತಾನ್. ವಿಶ್ವೇ॑ ದೇ॒ವಾ-ಸ್ಸ॑ಪ್ತದ॒ಶೇನ॒ ಸ್ತೋಮೇ॑ನ॒ ನಾಪ್ನು॑ವನ್ನ್ । ಸ ವಿಷ್ಣು॑ಮಬ್ರವೀತ್ । ಇ॒ಮಾನ್ಮ॑ ಈ॒ಫ್ಸೇತಿ॑ । ತಾನ್. ವಿಷ್ಣು॑ರೇಕವಿ॒ಗ್ಂ॒ಶೇನ॒ ಸ್ತೋಮೇ॑ನಾಪ್ನೋತ್ । ವಾ॒ರ॒ವ॒ನ್ತೀಯೇ॑ನಾವಾರಯತ ॥ 47 ॥

ಇ॒ದಂ-ವಿಁಷ್ಣು॒-ರ್ವಿಚ॑ಕ್ರಮ॒ ಇತಿ॒ ವ್ಯ॑ಕ್ರಮತ ॥ ಯಸ್ಮಾ᳚-ತ್ಪ॒ಶವಃ॒ ಪ್ರ ಪ್ರೇವ॒ ಭ್ರಗ್ಂಶೇ॑ರನ್ನ್ । ಸ ಏ॒ತೇನ॑ ಯಜೇತ ॥ ಯದಾಪ್ನೋ᳚ತ್ । ತದ॒ಪ್ತೋರ್ಯಾಮ॑ಸ್ಯಾಪ್ತೋರ್ಯಾಮ॒ತ್ವಮ್ ॥ ಏ॒ತೇನ॒ ವೈ ದೇ॒ವಾ ಜೈತ್ವಾ॑ನಿ ಜಿ॒ತ್ವಾ । ಯ-ಙ್ಕಾಮ॒-ಮಕಾ॑ಮಯನ್ತ॒ ತಮಾ᳚ಪ್ನುವನ್ನ್ । ಯ-ಙ್ಕಾಮ॑-ಙ್ಕಾ॒ಮಯ॑ತೇ । ತಮೇ॒ತೇನಾ᳚ಪ್ನೋತಿ ॥ 48 ॥
(ಸ್ತೋಮೇ॑ನ॒ ನಾಪ್ನೋ॑ - ದವಾರಯತ॒ - +ನವ॑ ಚ) (ಅ. 14)

ಅನುವಾಕಂ 15 - ರಾಜಾಭಿಷೇಕಃ
ವ್ಯಾ॒ಘ್ರೋ॑-ಽಯಮ॒ಗ್ನೌ ಚ॑ರತಿ॒ ಪ್ರವಿ॑ಷ್ಟಃ । ಋಷೀ॑ಣಾ-ಮ್ಪು॒ತ್ರೋ ಅ॑ಭಿಶಸ್ತಿ॒ಪಾ ಅ॒ಯಮ್ । ನ॒ಮ॒ಸ್ಕಾ॒ರೇಣ॒ ನಮ॑ಸಾ ತೇ ಜುಹೋಮಿ । ಮಾ ದೇ॒ವಾನಾ᳚-ಮ್ಮಿಥು॒ಯಾ ಕ॑ರ್ಮ ಭಾ॒ಗಮ್ ॥ ಸಾವೀ॒ರ॒ಃಇ ದೇ॑ವ ಪ್ರಸ॒ವಾಯ॑ ಪಿತ್ರೇ । ವ॒ರ್​ಷ್ಮಾಣ॑ಮಸ್ಮೈ ವರಿ॒ಮಾಣ॑ಮಸ್ಮೈ । ಅಥಾ॒ಸ್ಮಭ್ಯಗ್ಂ॑ ಸವಿತ-ಸ್ಸ॒ರ್ವತಾ॑ತಾ । ದಿ॒ವೇ ದಿ॑ವ॒ ಆಸು॑ವಾ॒ ಭೂರಿ॑ಪ॒ಶ್ವಃ ॥ ಭೂ॒ತೋ ಭೂ॒ತೇಷು॑ ಚರತಿ॒ ಪ್ರವಿ॑ಷ್ಟಃ । ಸ ಭೂ॒ತಾನಾ॒-ಮಧಿ॑ಪತಿ-ರ್ಬಭೂವ ॥ 49 ॥

ತಸ್ಯ॑ ಮೃ॒ತ್ಯೌ ಚ॑ರತಿ ರಾಜ॒ಸೂಯ᳚ಮ್ । ಸ ರಾಜಾ॑ ರಾ॒ಜ್ಯ-ಮನು॑ಮನ್ಯತಾಮಿ॒ದಮ್ ॥ ಯೇಭಿ॒-ಶ್ಶಿಲ್ಪೈಃ᳚ ಪಪ್ರಥಾ॒ನಾಮದೃಗ್ಂ॑ಹತ್ । ಯೇಭಿ॒ದ್ರ್ಯಾಮ॒ಭ್ಯಪಿಗ್ಂ॑ಶತ್-ಪ್ರ॒ಜಾಪ॑ತಿಃ । ಯೇಭಿ॒ರ್ವಾಚಂ॑-ವಿಁ॒ಶ್ವರೂ॑ಪಾಗ್ಂ ಸ॒ಮವ್ಯ॑ಯತ್ । ತೇನೇ॒ಮಮ॑ಗ್ನ ಇ॒ಹ ವರ್ಚ॑ಸಾ॒ ಸಮ॑ಙ್ಗ್ಧಿ ॥ ಯೇಭಿ॑ರಾದಿ॒ತ್ಯಸ್ತಪ॑ತಿ॒ ಪ್ರಕೇ॒ತುಭಿಃ॑ । ಯೇಭಿ॒-ಸ್ಸೂರ್ಯೋ॑ ದದೃ॒ಶೇ ಚಿ॒ತ್ರಭಾ॑ನುಃ । ಯೇಭಿ॒ರ್ವಾಚ॑-ಮ್ಪುಷ್ಕ॒ಲೇಭಿ॒ರವ್ಯ॑ಯತ್ । ತೇನೇ॒ಮಮ॑ಗ್ನ ಇ॒ಹ ವರ್ಚ॑ಸಾ॒ ಸಮ॑ಙ್ಗ್ಧಿ ॥ 50 ॥

ಆ-ಽಯ-ಮ್ಭಾ॑ತು॒ ಶವ॑ಸಾ॒ ಪಞ್ಚ॑ ಕೃ॒ಷ್ಟೀಃ । ಇನ್ದ್ರ॑ ಇವ ಜ್ಯೇ॒ಷ್ಠೋ ಭ॑ವತು ಪ್ರ॒ಜಾವಾನ್॑ । ಅ॒ಸ್ಮಾ ಅ॑ಸ್ತು ಪುಷ್ಕ॒ಲ-ಞ್ಚಿ॒ತ್ರಭಾ॑ನು । ಆ-ಽಯ-ಮ್ಪೃ॑ಣಕ್ತು॒ ರಜ॑ಸೀ ಉ॒ಪಸ್ಥ᳚ಮ್ ॥ ಯತ್ತೇ॒ ಶಿಲ್ಪ॑-ಙ್ಕಶ್ಯಪ ರೋಚ॒ನಾವ॑ತ್ । ಇ॒ನ್ದ್ರಿ॒ಯಾವ॑ತ್-ಪುಷ್ಕ॒ಲ-ಞ್ಚಿ॒ತ್ರಭಾ॑ನು । ಯಸ್ಮಿ॒ನ್-ಥ್ಸೂರ್ಯಾ॒ ಅರ್ಪಿ॑ತಾ-ಸ್ಸ॒ಪ್ತ ಸಾ॒ಕಮ್ । ತಸ್ಮಿ॒ನ್-ರಾಜಾ॑ನ॒-ಮಧಿ॒ವಿಶ್ರ॑ಯೇ॒ಮಮ್ ॥ ದ್ಯೌರ॑ಸಿ ಪೃಥಿ॒ವ್ಯ॑ಸಿ ॥ ವ್ಯಾ॒ಘ್ರೋ ವೈಯಾ॒ಘ್ರೇ-ಽಧಿ॑ ॥ 51 ॥

ವಿಶ್ರ॑ಯಸ್ವ॒ ದಿಶೋ॑ ಮ॒ಹೀಃ । ವಿಶ॑ಸ್ತ್ವಾ॒ ಸರ್ವಾ॑ ವಾಞ್ಛನ್ತು । ಮಾ ತ್ವ-ದ್ರಾ॒ಷ್ಟ್ರಮಧಿ॑ಭ್ರಶತ್ ॥ ಯಾ ದಿ॒ವ್ಯಾ ಆಪಃ॒ ಪಯ॑ಸಾ ಸಮ್ಬಭೂ॒ವುಃ । ಯಾ ಅ॒ನ್ತರಿ॑ಖ್ಷ ಉ॒ತ ಪಾರ್ಥಿ॑ವೀ॒ರ್ಯಾಃ । ತಾ ಸಾ᳚-ನ್ತ್ವಾ॒ ಸರ್ವಾ॑ಸಾಗ್ಂ ರು॒ಚಾ । ಅ॒ಭಿಷಿ॑ಞ್ಚಾಮಿ॒ ವರ್ಚ॑ಸಾ । ಅ॒ಭಿ ತ್ವಾ॒ ವರ್ಚ॑ಸಾ ಸಿಚ-ನ್ದಿ॒ವ್ಯೇನ॑ । ಪಯ॑ಸಾ ಸ॒ಹ । ಯಥಾ-ಽಽಸಾ॑ ರಾಷ್ಟ್ರ॒ವರ್ಧ॑ನಃ ॥ 52 ॥

ತಥಾ᳚ ತ್ವಾ ಸವಿ॒ತಾ ಕ॑ರತ್ । ಇನ್ದ್ರಂ॒-ವಿಁಶ್ವಾ॑ ಅವೀವೃಧನ್ನ್ । ಸ॒ಮು॒ದ್ರ ವ್ಯ॑ಚಸ॒-ಙ್ಗಿರಃ॑ । ರ॒ಥೀತ॑ಮಗ್ಂ ರಥೀ॒ನಾಮ್ । ವಾಜಾ॑ನಾ॒ಗ್ಂ॒ ಸ-ತ್ಪ॑ತಿ॒-ಮ್ಪತಿ᳚ಮ್ । ವಸ॑ವಸ್ತ್ವಾ ಪು॒ರಸ್ತಾ॑ದ॒ಭಿಷಿ॑ಞ್ಚನ್ತು ಗಾಯ॒ತ್ರೇಣ॒ ಛನ್ದ॑ಸಾ । ರು॒ದ್ರಾಸ್ತ್ವಾ॑ ದಖ್ಷಿಣ॒ತೋ॑-ಽಭಿಷಿ॑ಞ್ಚನ್ತು॒ ತ್ರೈಷ್ಟು॑ಭೇನ॒ ಛನ್ದ॑ಸಾ । ಆ॒ದಿ॒ತ್ಯಾಸ್ತ್ವಾ॑ ಪ॒ಶ್ಚಾದ॒ಭಿಷಿ॑ಞ್ಚನ್ತು॒ ಜಾಗ॑ತೇನ॒ ಛನ್ದ॑ಸಾ । ವಿಶ್ವೇ᳚ ತ್ವಾ ದೇ॒ವಾ ಉ॑ತ್ತರ॒ತೋ॑-ಽಭಿಷಿ॑ಞ್ಚ॒ನ್-ತ್ವಾನು॑ಷ್ಟುಭೇನ॒ ಛನ್ದ॑ಸಾ । ಬೃಹ॒ಸ್ಪತಿ॑-ಸ್ತ್ವೋ॒ಪರಿ॑ಷ್ಟಾ-ದ॒ಭಿಷಿ॑ಞ್ಚತು॒ ಪಾಙ್ಕ್ತೇ॑ನ॒ ಛನ್ದ॑ಸಾ ॥ 53 ॥

ಅ॒ರು॒ಣ-ನ್ತ್ವಾ॒ ವೃಕ॑ಮು॒ಗ್ರ-ಙ್ಖ॑ಜ-ಙ್ಕ॒ರಮ್ । ರೋಚ॑ಮಾನ-ಮ್ಮ॒ರುತಾ॒ಮಗ್ರೇ॑ ಅ॒ರ್ಚಿಷಃ॑ । ಸೂರ್ಯ॑ವನ್ತ-ಮ್ಮ॒ಘವಾ॑ನಂ-ವಿಁಷಾಸ॒ಹಿಮ್ । ಇನ್ದ್ರ॑ಮು॒ಕ್ಥ್ಯೇಷು॑ ನಾಮ॒ಹೂತ॑ಮಗ್ಂ ಹುವೇಮ ॥ ಪ್ರ ಬಾ॒ಹವಾ॑ ಸಿಸೃತ-ಞ್ಜೀ॒ವಸೇ॑ ನಃ । ಆ ನೋ॒ ಗವ್ಯೂ॑ತಿಮುಖ್ಷತ-ಙ್ಘೃ॒ತೇನ॑ । ಆ ನೋ॒ ಜನೇ᳚ ಶ್ರವಯತಂ-ಯುಁವಾನಾ । ಶ್ರು॒ತ-ಮ್ಮೇ॑ ಮಿತ್ರಾವರುಣಾ॒ ಹವೇ॒ಮಾ ॥ ಇನ್ದ್ರ॑ಸ್ಯ ತೇ ವೀರ್ಯ॒ಕೃತಃ॑ । ಬಾ॒ಹೂ ಉ॒ಪಾವ॑ಹರಾಮಿ ॥ 54 ॥
(ಬ॒ಭೂ॒ - ವಾವ್ಯ॑ಯ॒-ತ್ತೇನೇ॒ಮಮ॑ಗ್ನ ಇ॒ಹ ವರ್ಚ॑ಸಾ॒ ಸಮ॑ಙ್ಗ್ಧಿ॒ - ವೈಯಾ॒ಘ್ರೇ-ಽಧಿ॑ - ರಾಷ್ಟ್ರ॒ವರ್ಧ॑ನಃ॒ - ಪಾಙ್ಕ್ತೇ॑ನ॒ ಛನ್ದ॑ಸೋ॒ - ಪಾವ॑ಹರಾಮಿ) (ಅ. 15)

ಅನುವಾಕಂ 16 - ರಾಜಾಭಿಷೇಕಾಙ್ಗಂ ರಥಾರೋಹಣಮ್
ಅ॒ಭಿ ಪ್ರೇಹಿ॑ ವೀ॒ರಯ॑ಸ್ವ । ಉ॒ಗ್ರಶ್ಚೇತ್ತಾ॑ ಸಪತ್ನ॒ಹಾ ॥ ಆತಿ॑ಷ್ಠ ವೃತ್ರ॒ಹನ್ತ॑ಮಃ । ತುಭ್ಯ॑-ನ್ದೇ॒ವಾ ಅಧಿ॑ಬ್ರವನ್ನ್ ॥ ಅ॒ಙ್ಕೌ ನ್ಯ॒ಙ್ಕಾವ॒ಭಿತೋ॒ ರಥಂ॒-ಯೌಁ । ಧ್ವಾ॒ನ್ತಂ-ವಾಁ॑ತಾ॒ಗ್ರಮನು॑ಸ॒-ಞ್ಚರ॑ನ್ತೌ । ದೂ॒ರೇ ಹೇ॑ತಿ-ರಿನ್ದ್ರಿ॒ಯಾವಾ᳚-ನ್ಪತ॒ತ್ರೀ । ತೇ ನೋ॒-ಽಗ್ನಯಃ॒ ಪಪ್ರ॑ಯಃ ಪಾರಯನ್ತು ॥ ನಮ॑ಸ್ತ ಋಷೇ ಗದ । ಅವ್ಯ॑ಥಾಯೈ (ಅವ್ಯ॑ಧಾಯೈ) ತ್ವಾ ಸ್ವ॒ಧಾಯೈ᳚ ತ್ವಾ ॥ 55 ॥

ಮಾ ನ॑ ಇನ್ದ್ರಾ॒ಭಿತ॒ಸ್ತ್ವ-ದೃ॒ಷ್ವಾರಿ॑ಷ್ಟಾಸಃ । ಏ॒ವಾ ಬ್ರ॑ಹ್ಮ॒ನ್ತವೇದ॑ಸ್ತು ॥ ತಿಷ್ಠಾ॒ ರಥೇ॒ ಅಧಿ॒ ಯ-ದ್ವಜ್ರ॑ಹಸ್ತಃ ॥ ಆ ರ॒ಶ್ಮೀನ್ದೇ॑ವ ಯುವಸೇ॒ ಸ್ವಶ್ವಃ॑ ॥ ಅಬೋವೇ, ಆ॒ತಿಷ್ಠ॑ನ್ತ॒-ಮ್ಪರಿ॒ ವಿಶ್ವೇ॑ ಅಭೂಷನ್ನ್ । ಶ್ರಿಯಂ॒-ವಁಸಾ॑ನಶ್ಚರತಿ॒ ಸ್ವರೋ॑ಚಾಃ । ಮ॒ಹತ್-ತದ॒ಸ್ಯಾಸು॑ರಸ್ಯ॒ ನಾಮ॑ । ಆ ವಿ॒ಶ್ವರೂ॑ಪೋ ಅ॒ಮೃತಾ॑ನಿ ತಸ್ಥೌ ॥ । ಅನು॒ ತ್ವೇನ್ದ್ರೋ॑ ಮದ॒ತ್ವನು॒ ಬೃಹ॒ಸ್ಪತಿಃ॑ । ಅನು॒ ಸೋಮೋ॒ ಅನ್ವ॒ಗ್ನಿರಾ॑ವೀತ್ । ಅನು॑ ತ್ವಾ॒ ವಿಶ್ವೇ॑ ದೇ॒ವಾ ಅ॑ವನ್ತು । ಅನು॑ ಸ॒ಪ್ತ ರಾಜಾ॑ನೋ॒ ಯ ಉ॒ತಾಭಿಷಿ॑ಕ್ತಾಃ ॥. ಅನು॑ತ್ವಾ ಮಿ॒ತ್ರಾವರು॑ಣಾವಿ॒ಹಾವ॑ತಮ್ । ಅನು॒ ದ್ಯಾವಾ॑ಪೃಥಿ॒ವೀ ವಿ॒ಶ್ವಶ॑ಭೂಮ್ । ಸೂರ್ಯೋ॒ ಅಹೋ॑ಭಿ॒ರನು॑ ತ್ವಾ-ಽವತು । ಚ॒ನ್ದ್ರಮಾ॒ ನಖ್ಷ॑ತ್ರೈ॒ರನು॑ ತ್ವಾ ಽವತು ॥ ॥ ದ್ಯೌಶ್ಚ॑ ತ್ವಾ ಪೃಥಿ॒ವೀ ಚ॒ ಪ್ರಚೇ॑ತಸಾ । ಶು॒ಕ್ರೋ ಬೃ॒ಹ-ದ್ದಖ್ಷಿ॑ಣಾ ತ್ವಾ ಪಿಪರ್ತು । ಅನು॑ ಸ್ವ॒ಧಾ ಚಿಕಿತಾ॒ಗ್ಂ॒ ಸೋಮೋ॑ ಅ॒ಗ್ನಿಃ । ಅನು॑ ತ್ವಾ-ಽವತು ಸವಿ॒ತಾ ಸ॒ವೇನ॑ ॥ 56 ॥

ಇನ್ದ್ರಂ॒-ವಿಁಶ್ವಾ॑ ಅವೀವೃಧನ್ನ್ । ಸ॒ಮು॒ದ್ರ ವ್ಯ॑ಚಸ॒-ಙ್ಗಿರಃ॑ । ರ॒ಥೀತ॑ಮಗ್ಂ ರಥೀ॒ನಾಮ್ । ವಾಜಾ॑ನಾ॒ಗ್ಂ॒ ಸ-ತ್ಪ॑ತಿ॒-ಮ್ಪತಿ᳚ಮ್ ॥ ಪರಿ॑ ಮಾ ಸೇ॒ನ್ಯಾ ಘೋಷಾಃ᳚ । ಜ್ಯಾನಾಂ᳚-ವೃಁಞ್ಜನ್ತು ಗೃ॒ದ್ಧ್ನವಃ॑ । ಮೇ॒ಥಿ॒ಷ್ಠಾಃ ಪಿನ್ವ॑ಮಾನಾ ಇ॒ಹ । ಮಾ-ಙ್ಗೋಪ॑ತಿಮ॒ಭಿ ಸಂ​ವಿಁ॑ಶನ್ತು ॥ ತನ್ಮೇ-ಽನು॑ಮತಿ॒-ರನು॑ಮನ್ಯತಾಮ್ । ತನ್ಮಾ॒ತಾ ಪೃ॑ಥಿ॒ವೀ ತ-ತ್ಪಿ॒ತಾ ದ್ಯೌಃ ॥ 57 ॥

ತದ್ಗ್ರಾವಾ॑ಣ-ಸ್ಸೋಮ॒ಸುತೋ॑ ಮಯೋ॒ಭುವಃ॑ । ತದ॑ಶ್ವಿನಾ ಶೃಣುತಗ್ಂ ಸೌಭಗಾ ಯು॒ವಮ್ ॥ ಅವ॑ ತೇ॒ ಹೇಡೋ॑ ವರುಣ॒ ನಮೋ॑ಭಿ॒ರವ॑ ಯ॒ಜ್ಞೇಭಿ॑ರೀಮಹೇ ಹ॒ವಿರ್ಭಿಃ॑ । ಖ್ಷಯ॑ನ್ನ॒ಸ್ಮಭ್ಯ॑ಮಸುರ ಪ್ರಚೇತೋ॒ ರಾಜ॒ನ್ನೇನಾಗ್ಂ॑ಸಿ ಶಿಶ್ರಥಃ ಕೃ॒ತಾನಿ॑ ॥, ಉದು॑ತ್ತ॒ಮಂ-ವಁ॑ರುಣ॒ ಪಾಶ॑ಮ॒ಸ್ಮದವಾ॑-ಽಧ॒ಮಂ-ವಿಁಮ॑ಧ್ಯ॒ಮಗ್ಗ್​ ಶ್ರ॑ಥಾಯ । ಅಥಾ॑ ವ॒ಯಮಾ॑ದಿತ್ಯ ವ್ರ॒ತೇ ತವಾ-ಽನಾ॑ಗಸೋ॒ ಅದಿ॑ತಯೇ ಸ್ಯಾಮ ॥ ॥ ಏ॒ನಾ ವ್ಯಾ॒ಘ್ರ-ಮ್ಪ॑ರಿಷಸ್ವಜಾ॒ನಾಃ । ಸಿ॒ಗ್ಂ॒ಹಗ್ಂ ಹಿ॑ನ್ವನ್ತಿ ಮಹ॒ತೇ ಸೌಭ॑ಗಾಯ । ಸ॒ಮು॒ದ್ರ-ನ್ನ ಸು॒ಹವ॑-ನ್ತಸ್ಥಿ॒ವಾಗ್ಂಸ᳚ಮ್ । ಮ॒ರ್ಮೃ॒ಜ್ಯನ್ತೇ᳚ ದ್ವೀ॒ಪಿನ॑ಮ॒ಫ್ಸ್ವ॑ನ್ತಃ ॥ ಉದ॒ಸಾವೇ॑ತು॒ ಸೂರ್ಯಃ॑ । ಉದಿ॒ದ-ಮ್ಮಾ॑ಮ॒ಕಂ-ವಁಚಃ॑ । ಉದಿ॑ಹಿ ದೇವ ಸೂರ್ಯ । ಸ॒ಹ ವ॒ಗ್ನುನಾ॒ ಮಮ॑ । ಅ॒ಹಂ-ವಾಁ॒ಚೋ ವಿ॒ವಾಚ॑ನಮ್ । ಮಯಿ॒ ವಾಗ॑ಸ್ತು ಧರ್ಣ॒ಸಿಃ । ಯನ್ತು॑ ನ॒ದಯೋ॒ ವರ್​ಷ॑ನ್ತು ಪ॒ರ್ಜನ್ಯಾಃ᳚ । ಸು॒ಪಿ॒ಪ್ಪ॒ಲಾ ಓಷ॑ಧಯೋ ಭವನ್ತು ॥ ಅನ್ನ॑ವತಾಮೋದ॒ನವ॑ತಾಮಾ॒ಮಿಖ್ಷ॑ವತಾಮ್ । ಏ॒ಷಾಗ್ಂ ರಾಜಾ॑ ಭೂಯಾಸಮ್ ॥ 58 ॥
(ಸ್ವ॒ಧಾಯೈ᳚ ತ್ವಾ - ಸ॒ವೇನ॒ - ದ್ಯೌಃ - ಸು᳚ರ್ಯ ಸ॒ಪ್ತ ಚ॑) (ಅ. 16)

ಅನುವಾಕಂ 17 - ರಾಜಾಭಿಷೇಕಾಙ್ಗಂ-ವಁಪನಮ್
ಯೇ ಕೇ॒ಶಿನಃ॑ ಪ್ರಥ॒ಮಾ-ಸ್ಸ॒ತ್ರಮಾಸ॑ತ । ಯೇಭಿ॒ರಾಭೃ॑ತಂ॒-ಯಁದಿ॒ದಂ-ವಿಁ॒ರೋಚ॑ತೇ । ತೇಭ್ಯೋ॑ ಜುಹೋಮಿ ಬಹು॒ಧಾ ಘೃ॒ತೇನ॑ । ರಾ॒ಯಸ್ಪೋಷೇ॑ಣೇ॒ಮಂ-ವಁರ್ಚ॑ಸಾ॒ ಸಗ್ಂಸೃ॑ಜಾಥ ॥ ನರ್ತೇ ಬ್ರಹ್ಮ॑ಣ॒ಸ್ತಪ॑ಸೋ ವಿಮೋ॒ಕಃ । ದ್ವಿ॒ನಾಮ್ನೀ॑ ದೀ॒ಖ್ಷಾ ವ॒ಶಿನೀ॒ ಹ್ಯು॑ಗ್ರಾ । ಪ್ರಕೇಶಾ᳚-ಸ್ಸು॒ವತೇ॑ ಕಾ॒ಣ್ಡಿನೋ॑ ಭವನ್ತಿ । ತೇಷಾ᳚-ಮ್ಬ್ರ॒ಹ್ಮೇದೀಶೇ॒ ವಪ॑ನಸ್ಯ॒ ನಾನ್ಯಃ ॥ ಆರೋ॑ಹ॒ ಪ್ರೋಷ್ಠಂ॒-ವಿಁಷ॑ಹಸ್ವ॒ ಶತ್ರೂನ್॑ । ಅವಾ᳚ಸ್ರಾಗ್ದೀ॒ಖ್ಷಾ ವ॒ಶಿನೀ॒ ಹ್ಯು॑ಗ್ರಾ ॥ 59 ॥

ದೇ॒ಹಿ ದಖ್ಷಿ॑ಣಾ॒-ಮ್ಪ್ರತಿ॑ರ॒ಸ್ವಾಯುಃ॑ । ಅಥಾ॑ ಮುಚ್ಯಸ್ವ॒ ವರು॑ಣಸ್ಯ॒ ಪಾಶಾ᳚ತ್ ॥ ಯೇನಾವ॑ಪ-ಥ್ಸವಿ॒ತಾ ಖ್ಷು॒ರೇಣ॑ । ಸೋಮ॑ಸ್ಯ॒ ರಾಜ್ಞೋ॒ ವರು॑ಣಸ್ಯ ವಿ॒ದ್ವಾನ್ । ತೇನ॑ ಬ್ರಹ್ಮಾಣೋ ವಪತೇ॒ದಮ॒ಸ್ಯೋರ್ಜೇಮಮ್ । ರ॒ಯ್ಯಾ ವರ್ಚ॑ಸಾ॒ ಸಗ್ಂಸೃ॑ಜಾಥ ॥ ಮಾ ತೇ॒ ಕೇಶಾ॒ನನು॑ ಗಾ॒ದ್ವರ್ಚ॑ ಏ॒ತತ್ । ತಥಾ॑ ಧಾ॒ತಾ ಕ॑ರೋತು ತೇ । ತುಭ್ಯ॒ಮಿನ್ದ್ರೋ॒ ಬೃಹ॒ಸ್ಪತಿಃ॑ । ಸ॒ವಿ॒ತಾ ವರ್ಚ॒ ಆದ॑ಧಾತ್ ॥ 60 ॥

ತೇಭ್ಯೋ॑ ನಿ॒ಧಾನ॑-ಮ್ಬಹು॒ಧಾ ವ್ಯೈಚ್ಛನ್ನ್॑ । ಅ॒ನ್ತ॒ರಾ ದ್ಯಾವಾ॑ಪೃಥಿ॒ವೀ ಅ॒ಪ-ಸ್ಸುವಃ॑ । ದ॒ರ್ಭ॒ಸ್ತ॒ಮ್ಬೇ ವೀ॒ರ್ಯ॑ಕೃತೇ ನಿ॒ಧಾಯ॑ । ಪೌಗ್ಗ್​ಸ್ಯೇ॑ನೇ॒ಮಂ-ವಁರ್ಚ॑ಸಾ॒ ಸಗ್ಂಸೃ॑ಜಾಥ ॥ ಬಲ॑-ನ್ತೇ ಬಾಹು॒ವೋ-ಸ್ಸ॑ವಿ॒ತಾ ದ॑ಧಾತು । ಸೋಮ॑ಸ್ತ್ವಾ-ಽನಕ್ತು॒ ಪಯ॑ಸಾ ಘೃ॒ತೇನ॑ । ಸ್ತ್ರೀ॒ಷು ರೂ॒ಪಮ॑ಶ್ವಿನೈ॒ತ-ನ್ನಿಧ॑ತ್ತಮ್ । ಪೌಗ್ಗ್​ಸ್ಯೇ॑ನೇ॒ಮಂ-ವಁರ್ಚ॑ಸಾ॒ ಸಗ್ಂಸೃ॑ಜಾಥ ॥ ಯ-ಥ್ಸೀ॒ಮನ್ತ॒-ಙ್ಕಙ್ಕ॑ತಸ್ತೇ ಲಿ॒ಲೇಖ॑ । ಯದ್ವಾ᳚ ಖ್ಷು॒ರಃ ಪ॑ರಿವ॒ವರ್ಜ॒ ವಪಗ್ಗ್॑ಸ್ತೇ । ಸ್ತ್ರೀ॒ಷು ರೂ॒ಪಮ॑ಶ್ವಿನೈ॒ತ-ನ್ನಿಧ॑ತ್ತಮ್ । ಪೌಗ್ಗ್​ಸ್ಯೇ॑ನೇ॒ಮಗ್ಂ ಸಗ್ಂಸೃ॑ಜಾಥೋ ವೀ॒ರ್ಯೇ॑ಣ ॥ 61 ॥
(ಅವಾ᳚ಸ್ರಾಗ್ದೀ॒ಖ್ಷಾ ವಾ॒ಶಿನೀ॒ ಹ್ಯು॑ಗ್ರಾ-ಽಽದ॑ಧಾ-ದ್ವ॒ವರ್ಜ॒ ವಪಗ್ಗ್॑ಸ್ತೇ॒ ದ್ವೇ ಚ॑ ) (ಅ. 17)

(ಯೇ ಕೇ॒ಶಿನೋ॒ ನರ್ತೇ ಮಾ ತೇ॒ ಬಲಂ॒-ಯಁ-ಥ್ಸೀ॒ಮನ್ತ॒-ಮ್ಪಞ್ಚ॑)

ಅನುವಾಕಂ 18 - ವಿದ್ಯನಾಖ್ಯ ಏಕಾಹವಿಶೇಷಃ
ಇನ್ದ್ರಂ॒-ವೈಁ ಸ್ವಾ ವಿಶೋ॑ ಮ॒ರುತೋ॒ ನಾಪಾ॑ಚಾಯನ್ನ್ । ಸೋ-ಽನ॑ಪಚಾಯ್ಯಮಾನ ಏ॒ತಂ-ವಿಁ॑ಘ॒ನಮ॑ಪಶ್ಯತ್ । ತಮಾ-ಽಹ॑ರತ್ । ತೇನಾ॑ಯಜತ । ತೇನೈ॒ವಾಸಾ॒-ನ್ತಗ್ಂ ಸಗ್ಗ್॑ಸ್ತ॒ಮ್ಭಂ-ವ್ಯಁ॑ಹನ್ನ್ । ಯ-ದ್ವ್ಯಹನ್ನ್॑ । ತ-ದ್ವಿ॑ಘ॒ನಸ್ಯ॑ ವಿಘನ॒ತ್ವಮ್ ॥ ವಿ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯಗ್ಂ ಹತೇ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ 62 ॥

ಯಗ್ಂ ರಾಜಾ॑ನಂ॒-ವಿಁಶೋ॒ ನಾಪ॒ಚಾಯೇ॑ಯುಃ । ಯೋ ವಾ᳚ ಬ್ರಾಹ್ಮ॒ಣಸ್ತಮ॑ಸಾ ಪಾ॒ಪ್ಮನಾ॒ ಪ್ರಾವೃ॑ತ॒-ಸ್ಸ್ಯಾತ್ । ಸ ಏ॒ತೇನ॑ ಯಜೇತ । ವಿ॒ಘ॒ನೇನೈ॒ವೈನ॑-ದ್ವಿ॒ಹತ್ಯ॑ । ವಿ॒ಶಾಮಾಧಿ॑ಪತ್ಯ-ಙ್ಗಚ್ಛತಿ ॥ ತಸ್ಯ॒ ದ್ವೇ ದ್ವಾ॑ದ॒ಶೇ ಸ್ತೋ॒ತ್ರೇ ಭವ॑ತಃ । ದ್ವೇ ಚ॑ತುರ್ವಿ॒ಗ್ಂ॒ಶೇ । ಔದ್ಭಿ॑ದ್ಯಮೇ॒ವ ತತ್ । ಏ॒ತದ್ವೈ ಖ್ಷ॒ತ್ರಸ್ಯೌದ್ಭಿ॑ದ್ಯಮ್ । ಯದ॑ಸ್ಮೈ॒ ಸ್ವಾ ವಿಶೋ॑ ಬ॒ಲಿಗ್ಂ ಹರ॑ನ್ತಿ ॥ 63 ॥

ಹರ॑ನ್ತ್ಯಸ್ಮೈ॒ ವಿಶೋ॑ ಬ॒ಲಿಮ್ । ಐನ॒ಮಪ್ರ॑ತಿಖ್ಯಾತ-ಙ್ಗಚ್ಛತಿ । ಯ ಏ॒ವಂ-ವೇಁದ॑ ॥ ಪ್ರ॒ಬಾಹು॒ಗ್ವಾ ಅಗ್ರೇ᳚ ಖ್ಷ॒ತ್ರಾಣ್ಯಾತೇ॑ಪುಃ । ತೇಷಾ॒ಮಿನ್ದ್ರಃ॑, ಖ್ಷ॒ತ್ರಾಣ್ಯಾದ॑ತ್ತ । ನ ವಾ ಇ॒ಮಾನಿ॑ ಖ್ಷ॒ತ್ರಾಣ್ಯ॑ ಭೂವ॒ನ್ನಿತಿ॑ । ತನ್ನಖ್ಷ॑ತ್ರಾಣಾ-ನ್ನಖ್ಷತ್ರ॒ತ್ವಮ್ । ಆ ಶ್ರೇಯ॑ಸೋ॒ ಭ್ರಾತೃ॑ವ್ಯಸ್ಯ॒ ತೇಜ॑ ಇನ್ದ್ರಿ॒ಯ-ನ್ದ॑ತ್ತೇ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ 64 ॥

ತ-ದ್ಯಥಾ॑ ಹ॒ ವೈ ಸ॑ಚಾ॒ಕ್ರಿಣೌ॒ ಕಪ್ಲ॑ಕಾವು॒ಪಾ-ವ॑ಹಿತೌ॒ ಸ್ಯಾತಾ᳚ಮ್ । ಏ॒ವಮೇ॒ತೌ ಯು॒ಗ್ಮನ್ತೌ॒ ಸ್ತೋಮೌ᳚ । ಅ॒ಯುಖ್ಷು॒ ಸ್ತೋಮೇ॑ಷು ಕ್ರಿಯೇತೇ । ಪಾ॒ಪ್ಮನೋ-ಽಪ॑ಹತ್ಯೈ ॥ ಅಪ॑ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯಗ್ಂ ಹತೇ । ಯ ಏ॒ತೇನ॒ ಯಜ॑ತೇ । ಯ ಉ॑ ಚೈನಮೇ॒ವಂ-ವೇಁದ॑ ॥ ತ-ದ್ಯಥಾ॑ ಹ॒ ವೈ ಸೂ॑ತಗ್ರಾಮ॒ಣ್ಯಃ॑ । ಏ॒ವ-ಞ್ಛನ್ದಾಗ್ಂ॑ಸಿ । ತೇಷ್ವ॒ಸಾವಾ॑ದಿ॒ತ್ಯೋ ಬೃ॑ಹ॒ತೀರ॒ಭ್ಯೂ॑ಢಃ ॥ 65 ॥

ಸ॒ತೋಬೃ॑ಹತೀಷು ಸ್ತುವತೇ ಸ॒ತೋ ಬೃ॑ಹನ್ನ್ । ಪ್ರ॒ಜಯಾ॑ ಪ॒ಶುಭಿ॑-ರಸಾ॒ನೀತ್ಯೇ॒ವ ॥ ವ್ಯತಿ॑ಷಕ್ತಾಭಿ-ಸ್ಸ್ತುವತೇ । ವ್ಯತಿ॑ಷಕ್ತಂ॒-ವೈಁ ಖ್ಷ॒ತ್ರಂ-ವಿಁ॒ಶಾ । ವಿ॒ಶೈವೈನ॑-ಙ್ಖ್ಷ॒ತ್ರೇಣ॒ ವ್ಯತಿ॑ಷಜತಿ ॥ ವ್ಯತಿ॑ಷಕ್ತಾಭಿ-ಸ್ಸ್ತುವತೇ । ವ್ಯತಿ॑ಷಕ್ತೋ॒ ವೈ ಗ್ರಾ॑ಮ॒ಣೀ-ಸ್ಸ॑ಜಾ॒ತೈಃ । ಸ॒ಜಾ॒ತೈರೇ॒ವೈನಂ॒-ವ್ಯಁತಿ॑ಷಜತಿ ॥ ವ್ಯತಿ॑ಷಕ್ತಾಭಿ-ಸ್ಸ್ತುವತೇ । ವ್ಯತಿ॑ಷಕ್ತೋ॒ ವೈ ಪುರು॑ಷಃ ಪಾ॒ಪ್ಮಭಿಃ॑ । ವ್ಯತಿ॑ಷಕ್ತಾ-ಭಿರೇ॒ವಾಸ್ಯ॑ ಪಾ॒ಪ್ಮನೋ॑ ನುದತೇ ॥ 66 ॥
(ವೇದ॒ - ಹರ॑ನ್ - ತ್ಯೇನಮೇ॒ವಂ-ವೇಁದಾ॒ - ಭ್ಯೂ॑ಢಃ - ಪಾ॒ಪ್ಮಭಿ॒ರೇಕ॑-ಞ್ಚ) (ಅ. 18)

(ತ್ರಿ॒ವೃ--ದ್ಯದಾ᳚ಗ್ನೇ॒ಯೋ᳚-ಽಗ್ನಿಮು॑ಖಾ॒ ಹ್ಯೃದ್ಧಿ॒--ರ್ ಯದಾ᳚ಗ್ನೇ॒ಯ ಆ᳚ಗ್ನೇ॒ಯೋ - ನ ವೈ ಸೋಮೇ॑ನ॒ - ಯೋ ವೈ ಸೋಮೇ॑ - ನೈ॒ಷ ಗೋ॑ಸ॒ವಃ - ಸಿ॒ಗ್ಂ॒ಹೇ॑ - ಽಭಿಪ್ರೇಹಿ॑ ಮಿತ್ರ॒ವರ್ಧ॑ನಃ - ಪ್ರ॒ಜಾಪ॑ತಿ॒ಸ್ತಾ ಓ॑ದ॒ನಂ - ಪ್ರ॒ಜಾಪ॑ತಿರಕಾಮಯತ ಬ॒ಹೋ-ರ್ಭೂಯಾ॑ - ನ॒ಗಸ್ತ್ಯೋ॒ - ಽಸ್ಯಾಜರಾ॑ಸ॒ - ಸ್ತಿಷ್ಠಾ॒ ಹರೀ᳚ - ಪ್ರ॒ಜಾಪ॑ತಿಃ ಪ॒ಶೂನ್ - ವ್ಯಾ॒ಘ್ರೋ॑-ಽಯಮ॒ - ಭಿಪ್ರೇಹಿ॑ ವೃತ್ರ॒ಹನ್ತ॑ಮೋ॒ - ಯೇ ಕೇ॒ಶಿನ॒ - ಇನ್ದ್ರಂ॒-ವಾಁ ಅ॒ಷ್ಟಾದ॑ಶ )

(ತ್ರಿ॒ವೃ--ದ್ಯೋ ವೈ ಸೋಮೇ॒ - ನಾಯು॑ರಸಿ ವಿ॒ಶ್ವಾಯು॑--ರ್ ಬ॒ಹು-ರ್ಭ॑ವತಿ॒ - ತಿಷ್ಠಾ॒ ಹರೀ॒ ರಥ॒ - ಆ-ಽಯ-ಮ್ಭಾ॑ತು॒ - ತೇಭ್ಯೋ॑ ನಿ॒ಧಾನ॒ಗ್ಂ॒ ಷಟ್ಥ್ಷ॑ಷ್ಟಿಃ)

(ತ್ರಿ॒ವೃತ್ - ಪಾ॒ಪ್ಮನೋ॑ ನುದತೇ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಸಪ್ತಮಃ ಪ್ರಪಾಠಕ-ಸ್ಸಮಾಪ್ತಃ ॥