ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಅಷ್ಟಮಃ ಪ್ರಪಾಠಕಃ - ಅಶ್ವಮೇಧಬ್ರಾಹ್ಮಣಂ-ವೈಁಶ್ವದೇವ-ಙ್ಕಾಣ್ಡಮ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
(ಅಶ್ವಮೇಧಬ್ರಾಹ್ಮಣಂ-ವೈಁಶ್ವದೇವ-ಙ್ಕಾಣ್ಡಂ)
ಅನುವಾಕಂ 1 - ಸಾಙ್ಗ್ರಹಣ್ಯೇಷ್ಟ್ಯಾದಯಃ ಯಾಜಮಾನಸಂಸ್ಕಾರಾಃ
ಸಾ॒ಗ್ರಂ॒ಹ॒ಣ್ಯೇಷ್ಟ್ಯಾ॑ ಯಜತೇ । ಇ॒ಮಾ-ಞ್ಜ॒ನತಾ॒ಗ್ಂ॒ ಸಙ್ಗ॑ಹ್ಣಾ॒ನೀತಿ॑ ॥ ದ್ವಾದ॑ಶಾರತ್ನೀ ರಶ॒ನಾ ಭ॑ವತಿ । ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರಃ ।
ಸಂ॒ವಁ॒ಥ್ಸ॒ರಮೇ॒ವಾ ವ॑ರುನ್ಧೇ । ಮೌ॒ಞ್ಜೀ ಭ॑ವತಿ । ಊರ್ಗ್ವೈ ಮುಞ್ಜಾಃ᳚ । ಊರ್ಜ॑ಮೇ॒ ವಾ ವ॑ರುನ್ಧೇ ॥ ಚಿ॒ತ್ರಾ ನಖ್ಷ॑ತ್ರ-ಮ್ಭವತಿ । ಚಿ॒ತ್ರಂ-ವಾಁ ಏ॒ತತ್ಕರ್ಮ॑ ॥ 1 ॥
ಯದ॑ಶ್ವಮೇ॒ಧ-ಸ್ಸಮೃ॑ದ್ಧ್ಯೈ ॥ ಪುಣ್ಯ॑ನಾಮ ದೇವ॒ಯಜ॑ನ-ಮ॒ದ್ಧ್ಯವ॑ಸ್ಯತಿ । ಪುಣ್ಯಾ॑ಮೇ॒ವ ತೇನ॑ ಕೀ॒ರ್ತಿಮ॒ಭಿಜ॑ಯತಿ ॥ ಅಪ॑ದಾತೀ-ನೃ॒ತ್ವಿಜ॑-ಸ್ಸ॒ಮಾವ॑ಹ॒ನ್ತ್ಯಾ ಸು॑ಬ್ರಹ್ಮ॒ಣ್ಯಾಯಾಃ᳚ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ಕೇ॒ಶ॒ಶ್ಮ॒ಶ್ರು ವ॑ಪತೇ । ನ॒ಖಾನಿ॒ ನಿಕೃ॑ನ್ತತೇ । ದ॒ತೋ ಧಾ॑ವತೇ । ಸ್ನಾತಿ॑ । ಅಹ॑ತಂ॒-ವಾಁಸಃ॒ ಪರಿ॑ಧತ್ತೇ । ಪಾ॒ಪ್ಮನೋ-ಽಪ॑ಹತ್ಯೈ ।
ವಾಚಂ॑-ಯಁ॒ತ್ವೋಪ॑ವಸತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಗುಪ್ತ್ಯೈ᳚ । ರಾತ್ರಿ॑-ಞ್ಜಾಗ॒ರಯ॑ನ್ತ ಆಸತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 2 ॥
(ಕರ್ಮ॑ - ಧತ್ತೇ॒ ಪಞ್ಚ॑ ಚ) (ಅ. 1)
ಅನುವಾಕಂ 2 - ಬ್ರಹ್ಮೌದನಾಭಿಧಾನಮ್
ಚತು॑ಷ್ಟಯ್ಯ॒ ಆಪೋ॑ ಭವನ್ತಿ ।
ಚತು॑ಶ್ಶಫೋ॒ ವಾ ಅಶ್ವಃ॑ ಪ್ರಾಜಾಪ॒ತ್ಯ-ಸ್ಸಮೃ॑ದ್ಧ್ಯೈ ॥
ತಾ ದಿ॒ಗ್ಭ್ಯ-ಸ್ಸ॒ಮಾಭೃ॑ತಾ ಭವನ್ತಿ । ದಿ॒ಖ್ಷು ವಾ ಆಪಃ॑ ।
ಅನ್ನಂ॒-ವಾಁ ಆಪಃ॑ । ಅ॒ದ್ಭ್ಯೋ ವಾ ಅನ್ನ॑-ಞ್ಜಾಯತೇ । ಯದೇ॒ವಾದ್ಭ್ಯೋ-ಽನ್ನ॒-ಞ್ಜಾಯ॑ತೇ । ತದವ॑ರುನ್ಧೇ ॥ ತಾಸು॑ ಬ್ರಹ್ಮೌದ॒ನ-ಮ್ಪ॑ಚತಿ । ರೇತ॑ ಏ॒ವ ತದ್ದ॑ಧಾತಿ ॥ 3 ॥
ಚತು॑ಶ್ಶರಾವೋ ಭವತಿ । ದಿ॒ಖ್ಷ್ವೇ॑ವ ಪ್ರತಿ॑ತಿಷ್ಠತಿ ॥ ಉ॒ಭ॒ಯತೋ॑ ರು॒ಕ್ಮೌ ಭ॑ವತಃ । ಉ॒ಭ॒ಯತ॑ ಏ॒ವಾಸ್ಮಿ॒ನ್-ರುಚ॑-ನ್ದಧಾತಿ । ಉದ್ಧ॑ರತಿ ಶೃತ॒ತ್ವಾಯ॑ ।
ಸ॒ರ್ಪಿಷ್ವಾ᳚-ನ್ಭವತಿ ಮೇದ್ಧ್ಯ॒ತ್ವಾಯ॑ । ಚ॒ತ್ವಾರ॑ ಆರ್ಷೇ॒ಯಾಃ ಪ್ರಾಶ್ನ॑ನ್ತಿ । ದಿ॒ಶಾಮೇ॒ವ ಜ್ಯೋತಿ॑ಷಿ ಜುಹೋತಿ । ಚ॒ತ್ವಾರಿ॒ ಹಿರ॑ಣ್ಯಾನಿ ದದಾತಿ । ದಿ॒ಶಾಮ॒ವ ಜ್ಯೋತೀ॒ಗ್॒ಷ್ಯ ವ॑ರುನ್ಧೇ ॥ 4 ॥
ಯದಾಜ್ಯ॑-ಮು॒ಚ್ಛಿಷ್ಯ॑ತೇ । ತಸ್ಮಿ॑ನ್-ರಶ॒ನಾ-ನ್ನ್ಯು॑ನತ್ತಿ । ಪ್ರ॒ಜಾಪ॑ತಿ॒ರ್ವಾ ಓ॑ದ॒ನಃ । ರೇತ॒ ಆಜ್ಯ᳚ಮ್ । ಯದಾಜ್ಯೇ॑ ರಶ॒ನಾ-ನ್ನ್ಯು॒ನತ್ತಿ॑ । ಪ್ರ॒ಜಾಪ॑ತಿಮೇ॒ವ ರೇತ॑ಸಾ॒ ಸಮ॑ರ್ಧಯತಿ ॥ ದ॒ರ್ಭ॒ಮಯೀ॑ ರಶ॒ನಾ ಭ॑ವತಿ ।
ಬ॒ಹು ವಾ ಏ॒ಷ ಕು॑ಚ॒ರೋ॑-ಽಮೇ॒ದ್ಧ್ಯಮುಪ॑ಗಚ್ಛತಿ ।
ಯದಶ್ವಃ॑ । ಪ॒ವಿತ್ರಂ॒-ವೈಁ ದ॒ರ್ಭಾಃ ॥ 5 ॥
ಯದ್ದ॑ರ್ಭ॒ಮಯೀ॑ ರಶ॒ನಾ ಭವ॑ತಿ । ಪು॒ನಾತ್ಯೇ॒ವೈನ᳚ಮ್ । ಪೂ॒ತಮೇ॑ನ॒-ಮ್ಮೇದ್ಧ್ಯ॒-ಮಾಲ॑ಭತೇ ॥
ಅಶ್ವ॑ಸ್ಯ॒ ವಾ ಆಲ॑ಬ್ಧಸ್ಯ ಮಹಿ॒ಮೋದ॑-ಕ್ರಾಮತ್ ।
ಸ ಮ॒ಹರ್ತ್ವಿ॑ಜಃ॒ ಪ್ರಾವಿ॑ಶತ್ । ತನ್ಮ॒ಹರ್ತ್ವಿ॑ಜಾ-ಮ್ಮಹರ್ತ್ವಿ॒ಕ್ತ್ವಮ್ । ಯನ್ಮ॒ಹರ್ತ್ವಿ॑ಜಃ ಪ್ರಾ॒ಶ್ಞನ್ತಿ॑ ।
ಮ॒ಹಿ॒ಮಾನ॑-ಮೇ॒ವಾಸ್ಮಿ॒ನ್-ತದ್ದ॑ಧತಿ ॥
ಅಶ್ವ॑ಸ್ಯ॒ ವಾ ಆಲ॑ಬ್ಧಸ್ಯ॒ ರೇತ॒ ಉದ॑ಕ್ರಾಮತ್ ।
ತಥ್ಸು॒ವರ್ಣ॒ಗ್ಂ॒ ಹಿರ॑ಣ್ಯ-ಮಭವತ್ । ಯಥ್ಸು॒ವರ್ಣ॒ಗ್ಂ॒ ಹಿರ॑ಣ್ಯ॒-ನ್ದದಾ॑ತಿ ।
ರೇತ॑ ಏ॒ವ ತದ್ದ॑ಧಾತಿ ॥ ಓ॒ದ॒ನೇ ದ॑ದಾತಿ । ರೇತೋ॒ ವಾ ಓ॑ದ॒ನಃ । ರೇತೋ॒ ಹಿರ॑ಣ್ಯಮ್ । ರೇತ॑ಸೈ॒ವಾಸ್ಮಿ॒-ನ್ರೇತೋ॑ ದಧಾತಿ ॥ 6 ॥
(ದ॒ಧಾ॒ತಿ॒ - ರು॒ನ್ಧೇ॒ - ದ॒ರ್ಭಾ - ಅ॑ಭವ॒-ಥ್ಷಟ್ಚ॑) (ಅ. 2)
ಅನುವಾಕಂ 3 - ರಶನಯಾ-ಽಶ್ವಬನ್ಧನಮ್
ಯೋ ವೈ ಬ್ರಹ್ಮ॑ಣೇ ದೇ॒ವೇಭ್ಯಃ॑ ಪ್ರ॒ಜಾಪ॑ತ॒ಯೇ-ಽಪ್ರ॑ತಿ-ಪ್ರೋ॒ಚ್ಯಾಶ್ವ॒-ಮ್ಮೇದ್ಧ್ಯ॑-ಮ್ಬ॒ದ್ಧ್ನಾತಿ॑ ।
ಆ ದೇ॒ವತಾ᳚ಭ್ಯೋ ವೃಶ್ಚ್ಯತೇ । ಪಾಪೀ॑ಯಾನ್ಭವತಿ । ಯಃ ಪ್ರ॑ತಿ॒ಪ್ರೋಚ್ಯ॑ । ನ ದೇ॒ವತಾ᳚ಭ್ಯ॒ ಆವೃ॑ಶ್ಚ್ಯತೇ । ವಸೀ॑ಯಾನ್ಭವತಿ ॥ ಯದಾಹ॑ । ಬ್ರಹ್ಮ॒ನ್ನಶ್ವ॒-ಮ್ಮೇದ್ಧ್ಯ॑-ಮ್ಭನ್ಥ್ಸ್ಯಾಮಿ ದೇ॒ವೇಭ್ಯಃ॑ ಪ್ರ॒ಜಾಪ॑ತಯೇ॒ ತೇನ॑ ರಾದ್ಧ್ಯಾಸ॒ಮಿತಿ॑ । ಬ್ರಹ್ಮ॒ ವೈ ಬ್ರ॒ಹ್ಮಾ ।
ಬ್ರಹ್ಮ॑ಣ ಏ॒ವ ದೇ॒ವೇಭ್ಯಃ॑ ಪ್ರ॒ಜಾಪ॑ತಯೇ ಪ್ರತಿ॒ಪ್ರೋಚ್ಯಾಶ್ವ॒-ಮ್ಮೇದ್ಧ್ಯ॑-ಮ್ಬದ್ಧ್ನಾತಿ ॥ 7 ॥
ನ ದೇ॒ವತಾ᳚ಭ್ಯ॒ ಆವೃ॑ಶ್ಚ್ಯತೇ । ವಸೀ॑ಯಾ-ನ್ಭವತಿ ॥
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॑ ರಶ॒ನಾ-ಮಾದ॑ತ್ತೇ॒ ಪ್ರಸೂ᳚ತ್ಯೈ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒-ಮಿತ್ಯಾ॑ಹ । ಅ॒ಶ್ವಿನೌ॒ ಹಿ ದೇ॒ವಾನಾ॑-ಮದ್ಧ್ವ॒ರ್ಯೂ ಆಸ್ತಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒-ಮಿತ್ಯಾ॑ಹ॒ ಯತ್ಯೈ᳚ ॥
ವ್ಯೃ॑ದ್ಧಂ॒-ವಾಁ ಏ॒ತದ್ಯ॒ಜ್ಞಸ್ಯ॑ । ಯದ॑ಯ॒ಜುಷ್ಕೇ॑ಣ ಕ್ರಿ॒ಯತೇ᳚ ।
ಇ॒ಮಾಮ॑ಗೃಭ್ಣನ್-ರಶ॒ನಾ-ಮೃ॒ತಸ್ಯೇ-ತ್ಯಧಿ॑ ವದತಿ॒ ಯಜು॑ಷ್ಕೃತ್ಯೈ । ಯ॒ಜ್ಞಸ್ಯ॒ ಸಮೃ॑ದ್ಧ್ಯೈ ॥ 8 ॥
ತದಾ॑ಹುಃ । ದ್ವಾದ॑ಶಾರತ್ನೀ ರಶ॒ನಾ ಕ॑ರ್ತ॒ವ್ಯಾ(3) ತ್ರಯೋ॑ದಶಾರ॒ತ್ನೀ(3)ರಿತಿ॑ । ಋ॒ಷ॒ಭೋ ವಾ ಏ॒ಷ ಋ॑ತೂ॒ನಾಮ್ । ಯಥ್ಸಂ॑ವಁಥ್ಸ॒ರಃ ।
ತಸ್ಯ॑ ತ್ರಯೋದ॒ಶೋ ಮಾಸೋ॑ ವಿ॒ಷ್ಟಪ᳚ಮ್ । ಋ॒ಷ॒ಭ ಏ॒ಷ ಯ॒ಜ್ಞಾನಾ᳚ಮ್ । ಯದ॑ಶ್ವಮೇ॒ಧಃ । ಯಥಾ॒ ವಾ ಋ॑ಷ॒ಭಸ್ಯ॑ ವಿ॒ಷ್ಟಪ᳚ಮ್ । ಏ॒ವಮೇ॒ತಸ್ಯ॑ ವಿ॒ಷ್ಟಪ᳚ಮ್ । ತ್ರ॒ಯೋ॒ದ॒ಶಮ॑ರ॒ತ್ನಿಗ್ಂ ರ॑ಶ॒ನಾಯಾ॑-ಮು॒ಪಾದ॑ಧಾತಿ ॥ 9 ॥
ಯಥ॑ರ್ಷ॒ಭಸ್ಯ॑ ವಿ॒ಷ್ಟಪಗ್ಂ॑ ಸಗ್ಗ್ಸ್ಕ॒ರೋತಿ॑ । ತಾ॒ದೃಗೇ॒ವ ತತ್ ॥ ಪೂರ್ವ॒ ಆಯು॑ಷಿ ವಿ॒ದಥೇ॑ಷು ಕ॒ವ್ಯೇತ್ಯಾ॑ಹ । ಆಯು॑ರೇ॒ವಾಸ್ಮಿ॑-ನ್ದಧಾತಿ ॥
ತಯಾ॑ ದೇ॒ವಾ-ಸ್ಸು॒ತಮಾಬ॑ಭೂವು॒-ರಿತ್ಯಾ॑ಹ । ಭೂತಿ॑ಮೇ॒ವೋಪಾವ॑ರ್ತತೇ ॥ ಋ॒ತಸ್ಯ॒ ಸಾಮನ᳚-ಥ್ಸ॒ರಮಾ॒ರಪ॒ನ್ತೀತ್ಯಾ॑ಹ । ಸ॒ತ್ಯಂ-ವಾಁ ಋ॒ತಮ್ ।
ಸ॒ತ್ಯೇನೈ॒ವೈನ॑ ಮೃ॒ತೇನಾರ॑ಭತೇ ॥ ಅ॒ಭಿ॒ಧಾ ಅ॒ಸೀತ್ಯಾ॑ಹ ॥ 10 ॥
ತಸ್ಮಾ॑-ದಶ್ವಮೇಧಯಾ॒ಜೀ ಸರ್ವಾ॑ಣಿ ಭೂ॒ತಾನ್ಯ॒ಭಿ ಭ॑ವತಿ । ಭುವ॑ನ-ಮ॒ಸೀತ್ಯಾ॑ಹ ।
ಭೂ॒ಮಾನ॑-ಮೇ॒ವೋಪ॑ತಿ । ಯ॒ನ್ತಾ-ಽಸೀತ್ಯಾ॑ಹ । ಯ॒ನ್ತಾರ॑ಮೇ॒ವೈನ॑-ಙ್ಕರೋತಿ ।
ಧ॒ರ್ತಾ-ಽಸೀತ್ಯಾ॑ಹ । ಧ॒ರ್ತಾರ॑ಮೇ॒ವೈನ॑-ಙ್ಕರೋತಿ । ಸೋ᳚-ಽಗ್ನಿಂ-ವೈಁ᳚ಶ್ವಾನ॒ರ-ಮಿತ್ಯಾ॑ಹ ।
ಅ॒ಗ್ನಾ-ವೇ॒ವೈನಂ॑-ವೈಁಶ್ವಾನ॒ರೇ ಜು॑ಹೋತಿ । ಸಪ್ರ॑ಥಸ॒ಮಿತ್ಯಾ॑ಹ ॥ 11 ॥
ಪ್ರ॒ಜಯೈ॒ವೈನ॑-ಮ್ಪ॒ಶುಭಿಃ॑ ಪ್ರಥಯತಿ ।
ಸ್ವಾಹಾ॑ಕೃತ॒ ಇತ್ಯಾ॑ಹ । ಹೋಮ॑ ಏ॒ವಾಸ್ಯ॒ಷಃ ।
ಪೃ॒ಥಿ॒ವ್ಯಾ-ಮಿತ್ಯಾ॑ಹ । ಅ॒ಸ್ಯಾಮೇ॒ವೈನ॒-ಮ್ಪ್ರತಿ॑ಷ್ಠಾಪಯತಿ । ಯ॒ನ್ತಾ ರಾಡ್ಯ॒ನ್ತಾ-ಽಸಿ॒ ಯಮ॑ನೋ ಧ॒ರ್ತಾ-ಽಸಿ॑ ಧ॒ರುಣ॒ ಇತ್ಯಾ॑ಹ ।
ರೂ॒ಪಮೇ॒ವಾಸ್ಯೈ॒-ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ।
ಕೃ॒ಷ್ಯೈ ತ್ವಾ॒ ಖ್ಷೇಮಾ॑ಯ ತ್ವಾ ರ॒ಯ್ಯೈ ತ್ವಾ॒ ಪೋಷಾ॑ಯ॒ ತ್ವೇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥
ಸ್ವ॒ಗಾ ತ್ವಾ॑ ದೇ॒ವೇಭ್ಯ॒ ಇತ್ಯಾ॑ಹ ।
ದೇ॒ವೇಭ್ಯ॑ ಏ॒ವೈನಗ್ಗ್॑ ಸ್ವ॒ಗಾ ಕ॑ರೋತಿ ।
ಸ್ವಾಹಾ᳚ ತ್ವಾ ಪ್ರ॒ಜಾಪ॑ತಯ॒ ಇತ್ಯಾ॑ಹ । ಪ್ರಾ॒ಜಾ॒ಪ॒ತ್ಯೋ ವಾ ಅಶ್ವಃ॑ ।
ಯಸ್ಯಾ॑ ಏ॒ವ ದೇ॒ವತಾ॑ಯಾ ಆಲ॒ಭ್ಯತ᳚ । ತಯೈ॒ವೈನ॒ಗ್ಂ॒ ಸಮ॑ರ್ಧಯತಿ ॥ 12 ॥
(ಬ॒ಧ್ನಾ॒ತಿ॒ - ಸಮೃ॑ದ್ಧ್ಯಾ - ಉ॒ಪದ॑ಧಾ - ತ್ಯ॒ಸೀತ್ಯಾ॑ಹ॒ - ಸಪ್ರ॑ಥಸ॒ಮೀತ್ಯಾ॑ಹ - ದೇ॒ವೇಭ್ಯ॒ ಇತ್ಯಾ॑ಹ॒ ಪಞ್ಚ॑ ಚ) (ಅ. 3)
ಅನುವಾಕಂ 4 - ಅಶ್ವಸ್ಯ ಜಲೇ-ಽವಗಾಹನಮ್
ಯಃ ಪಿ॒ತುರ॑ನು॒ಜಾಯಾಃ᳚ ಪು॒ತ್ರಃ । ಸ ಪು॒ರಸ್ತಾ᳚ನ್ನಯತಿ ।
ಯೋ ಮಾ॒ತುರ॑ನು॒ಜಾಯಾಃ᳚ ಪು॒ತ್ರಃ । ಸ ಪ॒ಶ್ಚಾನ್ನ॑ಯತಿ ।
ವಿಷ್ವ॑ಞ್ಚಮೇ॒ವಾಸ್ಮಾ᳚ತ್-ಪಾ॒ಪ್ಮಾನಂ॒-ವಿಁವೃ॑ಹತಃ ॥ ಯೋ ಅರ್ವ॑ನ್ತ॒-ಞ್ಜಿಘಾಗ್ಂ॑ಸತಿ॒ ತಮ॒ಭ್ಯ॑ಮೀತಿ॒ ವರು॑ಣ॒ ಇತಿ॒ ಶ್ವಾನ॑-ಞ್ಚತುರ॒ಖ್ಷ-ಮ್ಪ್ರಸೌ॑ತಿ ।
ಪ॒ರೋ ಮರ್ತಃ॑ ಪ॒ರ-ಶ್ಶ್ವೇತಿ॒ ಶುನ॑ಶ್ಚತು-ರ॒ಖ್ಷಸ್ಯ॒ ಪ್ರಹ॑ನ್ತಿ । ಶ್ವೇವ॒ ವೈ ಪಾ॒ಪ್ಮಾ ಭ್ರಾತೃ॑ವ್ಯಃ । ಪಾ॒ಪ್ಮಾನ॑-ಮೇ॒ವಾಸ್ಯ॒ ಭ್ರಾತೃ॑ವ್ಯಗ್ಂ ಹನ್ತಿ ॥
ಸೈ॒ದ್ಧ್ರ॒ಕ-ಮ್ಮುಸ॑ಲ-ಮ್ಭವತಿ ॥ 13 ॥
ಕರ್ಮ॑ ಕರ್ಮೈ॒ವಾಸ್ಮೈ॑ ಸಾಧಯತಿ ॥ ಪೌ॒ಗ್ಗ್॒ಶ್ಚ॒ಲೇ॒ಯೋ ಹ॑ನ್ತಿ ।
ಪು॒ಗ್ಗ್॒ಶ್ಚ॒ಲ್ವಾಂ-ವೈಁ ದೇ॒ವಾ-ಶ್ಶುಚ॒-ನ್ನ್ಯ॑ದಧುಃ । ಶು॒ಚೈವಾಸ್ಯ॒ ಶುಚಗ್ಂ॑ ಹನ್ತಿ ॥
ಪಾ॒ಪ್ಮಾ ವಾ ಏ॒ತಮೀ᳚ಫ್ಸ॒-ತೀತ್ಯಾ॑ಹುಃ । ಯೋ᳚-ಽಶ್ವಮೇ॒ಧೇನ॒ ಯಜ॑ತ॒ ಇತಿ॑ ।
ಅಶ್ವ॑ಸ್ಯಾಧಸ್ಪ॒ದಮುಪಾ᳚ಸ್ಯತಿ ।
ವ॒ಜ್ರೀ ವಾ ಅಶ್ವಃ॑ ಪ್ರಾಜಾಪ॒ತ್ಯಃ ।
ವಜ್ರೇ॑ಣೈ॒ವ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯ॒-ಮವ॑ಕ್ರಾಮತಿ ॥ ದ॒ಖ್ಷಿ॒ಣಾ-ಽಪ॑ಪ್ಲಾವಯತಿ ॥ 14 ॥
ಪಾ॒ಪ್ಮಾನ॑-ಮೇ॒ವಾಸ್ಮಾ॒-ಚ್ಛಮ॑ಲ॒-ಮಪ॑ಪ್ಲಾವಯತಿ ॥ ಐ॒ಷೀ॒ಕ ಉ॑ದೂ॒ಹೋ ಭ॑ವತಿ । ಆಯು॒ರ್ವಾ ಇ॒ಷೀಕಾಃ᳚ । ಆಯು॑ರೇ॒-ವಾಸ್ಮಿ॑-ನ್ದಧತಿ । ಅ॒ಮೃತಂ॒-ವಾಁ ಇ॒ಷೀಕಾಃ᳚ । ಅ॒ಮೃತ॑ಮೇ॒-ವಾಸ್ಮಿ॑-ನ್ದಧತಿ ॥ ವೇ॒ತ॒ಸ॒ಶಾ॒ಖೋಪ॒ಸಮ್ಬ॑ದ್ಧಾ ಭವತಿ ।
ಅ॒ಫ್ಸು-ಯೋ॑ನಿ॒ರ್ವಾ ಅಶ್ವಃ॑ । ಅ॒ಫ್ಸು॒ಜೋ ವೇ॑ತ॒ಸಃ ।
ಸ್ವಾದೇ॒ವೈನಂ॒-ಯೋಁನೇ॒ರ್ನಿರ್ಮಿ॑ಮೀತೇ ॥
ಪು॒ರಸ್ತಾ᳚ತ್-ಪ್ರ॒ತ್ಯಞ್ಚ॑-ಮ॒ಭ್ಯುದೂ॑ಹತಿ ।
ಪು॒ರಸ್ತಾ॑-ದೇ॒ವಾಸ್ಮಿ॑-ನ್ಪ್ರ॒ತೀಚ್ಯ॒ ಮೃತ॑-ನ್ದಧಾತಿ ॥
ಅ॒ಹ-ಞ್ಚ॒ ತ್ವ-ಞ್ಚ॑ ವೃತ್ರಹ॒ನ್ನಿತಿ॑ ಬ್ರ॒ಹ್ಮಾ ಯಜ॑ಮಾನಸ್ಯ॒ ಹಸ್ತ॑-ಙ್ಗೃಹ್ಣಾತಿ ।
ಬ್ರ॒ಹ್ಮ॒ಖ್ಷ॒ತ್ರೇ ಏ॒ವ ಸನ್ದ॑ಧಾತಿ ।
ಅ॒ಭಿ ಕ್ರತ್ವೇ᳚ನ್ದ್ರ ಭೂ॒ರಧ॒ ಜ್ಮನ್ನಿತ್ಯ॑-ಧ್ವ॒ರ್ಯು-ರ್ಯಜ॑ಮಾನಂ-ವಾಁಚಯತ್ಯ॒-ಭಿಜಿ॑ತ್ಯೈ ॥ 15 ॥
(ಭ॒ವ॒ತಿ॒ - ಪ್ಲಾ॒ವ॒ಯ॒ತಿ॒ - ಮಿ॒ಮೀ॒ತೇ॒ ಪಞ್ಚ॑ ಚ) (ಅ. 4)
ಅನುವಾಕಂ 5 - ಅಶ್ವಸ್ಯ ಪ್ರೋಖ್ಷಣ-ಮ್ಮಹರ್ತ್ವಿಜಾಮ್
ಚ॒ತ್ವಾರ॑ ಋ॒ತ್ವಿಜ॒-ಸ್ಸಮು॑ಖ್ಷನ್ತಿ ।
ಆ॒ಭ್ಯ ಏ॒ವೈನ॑-ಞ್ಚತ॒ಸೃಭ್ಯೋ॑ ದಿ॒ಗ್ಭ್ಯೋ॑-ಽಭಿಸಮೀ॑ರಯನ್ತಿ ॥ ಶ॒ತೇನ॑ ರಾಜಪು॒ತ್ರೈ-ಸ್ಸ॒ಹಾದ್ಧ್ವ॒ರ್ಯುಃ । ಪು॒ರಸ್ತಾ᳚ತ್-ಪ್ರ॒ತ್ಯನ್ತಿಷ್ಠ॒-ನ್ಪ್ರೋಖ್ಷ॑ತಿ । ಅ॒ನೇನಾಶ್ವೇ॑ನ॒ ಮೇದ್ಧ್ಯೇ॑ನೇ॒ಷ್ಟ್ವಾ ।
ಅ॒ಯಗ್ಂ ರಾಜಾ॑ ವೃ॒ತ್ರಂ-ವಁ॑ದ್ಧ್ಯಾ॒ದಿತಿ॑ । ರಾ॒ಜ್ಯಂ-ವಾಁ ಅ॑ದ್ಧ್ವ॒ರ್ಯುಃ । ಖ್ಷ॒ತ್ರಗ್ಂ ರಾ॑ಜಪು॒ತ್ರಃ । ರಾ॒ಜ್ಯೇನೈ॒-ವಾಸ್ಮಿ॑ನ್ ಖ್ಷ॒ತ್ರ-ನ್ದ॑ಧಾತಿ ॥
ಶ॒ತೇನಾ॑-ರಾ॒ಜಭಿ॑ರು॒ಗ್ರೈ-ಸ್ಸ॒ಹ ಬ್ರ॒ಹ್ಮಾ ॥ 16 ॥
ದ॒ಖ್ಷಿ॒ಣ॒ತ ಉದ॒ನ್ತಿಷ್ಠ॒-ನ್ಪ್ರೋಖ್ಷ॑ತಿ । ಅ॒ನೇನಾಶ್ವೇ॑ನ॒ ಮೇದ್ಧ್ಯೇ॑ನೇ॒ಷ್ಟ್ವಾ ।
ಅ॒ಯಗ್ಂ ರಾಜಾ᳚-ಽಪ್ರತಿಧೃ॒ಷ್ಯೋ᳚-ಽಸ್ತ್ವಿತಿ॑ । ಬಲಂ॒-ವೈಁ ಬ್ರ॒ಹ್ಮಾ । ಬಲ॑ಮರಾ॒ಜೋಗ್ರಃ । ಬಲ॑ನೈ॒-ವಾಸ್ಮಿ॒-ನ್ಬಲ॑-ನ್ದಧಾತಿ ॥ ಶ॒ತೇನ॑ ಸೂತಗ್ರಾಮ॒ಣಿಭಿ॑-ಸ್ಸ॒ಹ ಹೋತಾ᳚ । ಪ॒ಶ್ಚಾತ್-ಪ್ರಾನ್ತಿಷ್ಠ॒-ನ್ಪ್ರೋಖ್ಷ॑ತಿ ।
ಅ॒ನೇನಾಶ್ವೇ॑ನ॒ ಮೇದ್ಧ್ಯೇ॑ನೇ॒ಷ್ಟ್ವಾ । ಅ॒ಯಗ್ಂ ರಾಜಾ॒-ಽಸ್ಯೈ ವಿ॒ಶಃ ॥ 17 ॥
ಬ॒ಹು॒ಗ್ವೈ ಬ॑ಹ್ವ॒ಶ್ವಾಯೈ॑ ಬಹ್ವಜಾವಿ॒ಕಾಯೈ᳚ । ಬ॒ಹು॒ವ್ರೀ॒ಹಿ॒ಯ॒ವಾಯೈ॑ ಬಹುಮಾಷತಿ॒ಲಾಯೈ᳚ ।
ಬ॒ಹು॒ಹಿ॒ರ॒ಣ್ಯಾಯೈ॑ ಬಹುಹ॒ಸ್ತಿಕಾ॑ಯೈ । ಬ॒ಹು॒ದಾ॒ಸ॒ಪೂ॒ರು॒ಷಾಯೈ॑ ರಯಿ॒ಮತ್ಯೈ॒ ಪುಷ್ಟಿ॑ಮತ್ಯೈ । ಬ॒ಹು॒ರಾ॒ಯ॒ಸ್ಪೋ॒ಷಾಯೈ॒ ರಾಜಾ॒-ಽಸ್ತ್ವಿತಿ॑ । ಭೂ॒ಮಾ ವೈ ಹೋತಾ᳚ । ಭೂ॒ಮಾ ಸೂ॑ತಗ್ರಾಮ॒ಣ್ಯಃ॑ । ಭೂ॒ಮ್ನೈವಾಸ್ಮಿ॑-ನ್ಭೂ॒ಮಾನ॑-ನ್ದಧಾತಿ ॥ ಶ॒ತೇನ॑ ಖ್ಷತ್ತ-ಸಙ್ಗ್ರಹೀ॒ತೃಭಿ॑-ಸ್ಸ॒ಹೋದ್ಗಾ॒ತಾ । ಉ॒ತ್ತ॒ರ॒ತೋ ದ॑ಖ್ಷಿ॒ಣಾ ತಿಷ್ಠ॒-ನ್ಪ್ರೋಖ್ಷ॑ತಿ ॥ 18 ॥
ಅ॒ನೇನಾಶ್ವೇ॑ನ॒ ಮೇದ್ಧ್ಯೇ॑ ನೇ॒ಷ್ಟ್ವಾ ।
ಅ॒ಯಗ್ಂ ರಾಜಾ॒ ಸರ್ವ॒ಮಾಯು॑ರೇ॒ತ್ವಿತಿ॑ ।
ಆಯು॒ರ್ವಾ ಉ॑ದ್ಗಾ॒ತಾ । ಆಯುಃ॑, ಖ್ಷತ್ತ-ಸಙ್ಗ್ರಹೀ॒ತಾರಃ॑ ।
ಆಯು॑ಷೈ॒-ವಾಸ್ಮಿ॒ನ್ನಾಯು॑-ರ್ದಧಾತಿ ॥ ಶ॒ತಗ್ಂ ಶ॑ತ-ಮ್ಭವನ್ತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ ।
ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠತಿ ॥ ಚ॒ತು॒-ಶ್ಶ॒ತಾ ಭ॑ವನ್ತಿ । ಚತ॑ಸ್ರೋ॒ ದಿಶಃ॑ । ದಿ॒ಖ್ಷ್ವೇ॑ವ ಪ್ರತಿ॑ತಿಷ್ಠತಿ ॥ 19 ॥
(ಬ್ರ॒ಹ್ಮಾ - ವಿ॒ಶ - ಉ॑ಖ್ಷತಿ॒ - ದಿಶ॒ ಏಕ॑-ಞ್ಚ) (ಅ. 5)
ಅನುವಾಕಂ 6 - ಭೂಮೌ ಪತತಾ-ಮ್ಬಿನ್ದೂನಾಮಭಿಮನ್ತ್ರಣಮ್
ಯಥಾ॒ ವೈ ಹ॒ವಿಷೋ॑ ಗೃಹೀ॒ತಸ್ಯ॒ ಸ್ಕನ್ದ॑ತಿ । ಏ॒ವಂ-ವಾಁ ಏ॒ತದಶ್ವ॑ಸ್ಯ ಸ್ಕನ್ದತಿ ।
ಯನ್ನಿ॒ಕ್ತಮನಾ॑-ಲಬ್ಧ-ಮುಥ್ಸೃ॒ಜನ್ತಿ॑ । ಯಥ್ಸ್ತೋಕ್ಯಾ॑ ಅ॒ನ್ವಾಹ॑ । ಸ॒ರ್ವ॒ಹುತ॑-ಮೇ॒ವೈನ॑-ಙ್ಕರೋ॒ತ್ಯ-ಸ್ಕ॑ನ್ದಾಯ । ಅಸ್ಕ॑ನ್ನ॒ಗ್ಂ॒ ಹಿ ತತ್ ।
ಯದ್ಧು॒ತಸ್ಯ॒ ಸ್ಕನ್ದ॑ತಿ ॥ ಸ॒ಹಸ್ರ॒-ಮನ್ವಾ॑ಹ । ಸ॒ಹಸ್ರ॑ ಸಮ್ಮಿತ-ಸ್ಸುವ॒ರ್ಗೋ ಲೋ॒ಕಃ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ॒-ಭಿಜಿ॑ತ್ಯೈ ॥ 20 ॥
ಯತ್ಪರಿ॑ಮಿತಾ ಅನುಬ್ರೂ॒ಯಾತ್ । ಪರಿ॑ಮಿತ॒ಮವ॑ರುನ್ಧೀತ । ಅಪ॑ರಿಮಿತಾ॒ ಅನ್ವಾ॑ಹ । ಅಪ॑ರಿಮಿತ-ಸ್ಸುವ॒ರ್ಗೋ ಲೋ॒ಕಃ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥
ಸ್ತೋಕ್ಯಾ॑ ಜುಹೋತಿ । ಯಾ ಏ॒ವ ವರ್ಷ್ಯಾ॒ ಆಪಃ॑ । ತಾ ಅವ॑ರುನ್ಧೇ ॥ ಅ॒ಸ್ಯಾ-ಞ್ಜು॑ಹೋತಿ । ಇ॒ಯಂ-ವಾಁ ಅ॒ಗ್ನಿರ್ವೈ᳚ಶ್ವಾನ॒ರಃ ॥ 21 ॥
ಅ॒ಸ್ಯಾಮೇ॒ವೈನಾಃ॒ ಪ್ರತಿ॑ಷ್ಠಾಪಯತಿ ॥ ಉ॒ವಾಚ॑ ಹ ಪ್ರ॒ಜಾಪ॑ತಿಃ । ಸ್ತೋಕ್ಯಾ॑ಸು॒ ವಾ ಅ॒ಹಮ॑ಶ್ವಮೇ॒ಧಗ್ಂ ಸಗ್ಗ್ಸ್ಥಾ॑ಪಯಾಮಿ । ತೇನ॒ ತತ॒-ಸ್ಸಗ್ಗ್ಸ್ಥಿ॑ತೇನ ಚರಾ॒ಮೀತಿ॑ ॥ ಅ॒ಗ್ನಯೇ॒ ಸ್ವಾಹೇತ್ಯಾ॑ಹ ।
ಅ॒ಗ್ನಯ॑ ಏ॒ವೈನ॑-ಞ್ಜುಹೋತಿ ॥ ಸೋಮಾ॑ಯ॒ ಸ್ವಾಹೇತ್ಯಾ॑ಹ । ಸೋಮಾ॑ಯೈ॒ವೈನ॑-ಞ್ಜುಹೋತಿ । ಸ॒ವಿ॒ತ್ರೇ ಸ್ವಾಹೇತ್ಯಾ॑ಹ । ಸ॒ವಿ॒ತ್ರ ಏ॒ವೈನ॑-ಞ್ಜುಹೋತಿ ॥ 22 ॥
ಸರ॑ಸ್ವತ್ಯೈ॒ ಸ್ವಾಹೇತ್ಯಾ॑ಹ । ಸರ॑ಸ್ವತ್ಯಾ ಏ॒ವೈನ॑-ಞ್ಜುಹೋತಿ । ಪೂ॒ಷ್ಣೇ ಸ್ವಾಹೇತ್ಯಾ॑ಹ । ಪೂ॒ಷ್ಣ ಏ॒ವೈನ॑-ಞ್ಜುಹೋತಿ । ಬೃಹ॒ಸ್ಪತ॑ಯೇ॒ ಸ್ವಾಹೇತ್ಯಾ॑ಹ ।
ಬೃಹ॒ಸ್ಪತ॑ಯ ಏ॒ವೈನ॑-ಞ್ಜುಹೋತಿ । ಅ॒ಪಾ-ಮ್ಮೋದಾ॑ಯ॒ ಸ್ವಾಹೇತ್ಯಾ॑ಹ । ಅ॒ದ್ಭ್ಯ ಏ॒ವೈನ॑-ಞ್ಜುಹೋತಿ । ವಾ॒ಯವೇ॒ ಸ್ವಾಹೇತ್ಯಾ॑ಹ । ವಾ॒ಯವ॑ ಏ॒ವೈನ॑-ಞ್ಜುಹೋತಿ ॥ 23 ॥
ಮಿ॒ತ್ರಾಯ॒ ಸ್ವಾಹೇತ್ಯಾ॑ಹ । ಮಿ॒ತ್ರಾಯೈ॒ವೈನ॑-ಞ್ಜುಹೋತಿ । ವರು॑ಣಾಯ॒ ಸ್ವಾಹೇತ್ಯಾ॑ಹ । ವರು॑ಣಾಯೈ॒ವೈನ॑-ಞ್ಜುಹೋತಿ ॥ ಏ॒ತಾಭ್ಯ॑ ಏ॒ವೈನ॑-ನ್ದೇ॒ವತಾ᳚ಭ್ಯೋ ಜುಹೋತಿ ॥
ದಶ॑ ದಶ ಸ॒ಪಾನ್ದ॑-ಞ್ಜುಹೋತಿ । ದಶಾ᳚ಖ್ಷರಾ ವಿ॒ರಾಟ್ । ಅನ್ನಂ॑-ವಿಁ॒ರಾಟ್ । ವಿ॒ರಾಜೈ॒-ವಾನ್ನಾದ್ಯ॒ಮವ॑ರುನ್ಧೇ ॥ ಪ್ರ ವಾ ಏ॒ಷೋ᳚-ಽಸ್ಮಾಲ್ಲೋ॒ಕಾ-ಚ್ಚ್ಯ॑ವತೇ ।
ಯಃ ಪರಾ॑ಚೀ॒ರಾಹು॑ತೀ-ರ್ಜು॒ಹೋತಿ॑ ।
ಪುನಃ॑ ಪುನರಭ್ಯಾ॒ವರ್ತ॑-ಞ್ಜುಹೋತಿ ।
ಅ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ ॥
ಏ॒ತಾಗ್ಂ ಹ॒ ವಾವ ಸೋ᳚-ಽಶ್ವಮೇ॒ಧಸ್ಯ॒ ಸಗ್ಗ್ಸ್ಥಿ॑ತಿ ಮುವಾ॒ಚಾ-ಸ್ಕ॑ನ್ದಾಯ । ಅಸ್ಕ॑ನ್ನ॒ಗ್ಂ॒ ಹಿ ತತ್ ।
ಯದ್ಯ॒ಜ್ಞಸ್ಯ॒ ಸಗ್ಗ್ಸ್ಥಿ॑ತಸ್ಯ॒ ಸ್ಕನ್ದ॑ತಿ ॥ 24 ॥
(ಅ॒ಭಿಜಿ॑ತ್ಯೈ - ವೈಶ್ವಾನ॒ರಃ - ಸ॑ವಿ॒ತ್ರ ಏ॒ವೈನ॑-ಞ್ಜುಹೋತಿ - ವಾ॒ಯವ॑ ಏ॒ವೈನ॑-ಞ್ಜುಹೋತಿ - ಚ್ಯವತೇ॒ ಷಟ್ಚ॑) (ಅ. 6)
ಅನುವಾಕಂ 7 - ಅಥಾಧ್ವರ್ಯುಪ್ರೋಖ್ಷಣಮ್
ಪ್ರ॒ಜಾಪ॑ತಯೇ ತ್ವಾ॒ ಜುಷ್ಟ॒-ಮ್ಪ್ರೋಖ್ಷಾ॒ಮೀತಿ॑ ಪುರ॒ಸ್ತಾ᳚ತ್-ಪ॒ತ್ಯನ್ತಿಷ್ಠ॒-ನ್ಪ್ರೋಖ್ಷ॑ತಿ ।
ಪ್ರ॒ಜಾಪ॑ತಿ॒ರ್ವೈ ದೇ॒ವಾನಾ॑-ಮನ್ನಾ॒ದೋ ವೀ॒ರ್ಯಾ॑ವಾನ್ ।
ಅ॒ನ್ನಾದ್ಯ॑-ಮೇ॒ವಾಸ್ಮಿ॑ನ್ ವೀ॒ರ್ಯ॑-ನ್ದಧಾತಿ ।
ತಸ್ಮಾ॒ದಶ್ವಃ॑ ಪಶೂ॒ನಾ-ಮ॑ನ್ನಾ॒ದೋ ವೀ॒ರ್ಯಾ॑ವತ್ತಮಃ ॥ ಇ॒ನ್ದ್ರಾ॒ಗ್ನಿಭ್ಯಾ॒-ನ್ತ್ವೇತಿ॑ ದಖ್ಷಿಣ॒ತಃ ।
ಇ॒ನ್ದ್ರಾ॒ಗ್ನೀ ವೈ ದೇ॒ವಾನಾ॒ಮೋಜಿ॑ಷ್ಠೌ॒ ಬಲಿ॑ಷ್ಠೌ । ಓಜ॑ ಏ॒ವಾಸ್ಮಿ॒-ನ್ಬಲ॑-ನ್ದಧಾತಿ । ತಸ್ಮಾ॒ದಶ್ವಃ॑ ಪಶೂ॒ನಾಮೋಜಿ॑ಷ್ಠೋ॒ ಬಲಿ॑ಷ್ಠಃ ॥ ವಾ॒ಯವೇ॒ ತ್ವೇತಿ॑ ಪ॒ಶ್ಚಾತ್ । ವಾ॒ಯುರ್ವೈ ದೇ॒ವಾನಾ॑ಮಾ॒ಶು-ಸ್ಸಾ॑ರಸಾ॒ರಿತ॑ಮಃ ॥ 25 ॥
ಜ॒ವಮೇ॒ವಾಸ್ಮಿ॑ನ್ದಧಾತಿ । ತಸ್ಮಾ॒ದಶ್ವಃ॑ ಪಶೂ॒ನಾಮಾ॒ಶು-ಸ್ಸಾ॑ರಸಾ॒ರಿತ॑ಮಃ ॥
ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯ॒ ಇತ್ಯು॑ತ್ತರ॒ತಃ ।
ವಿಶ್ವೇ॒ ವೈ ದೇ॒ವಾ ದೇ॒ವಾನಾಂ᳚-ಯಁಶ॒ಸ್ವಿತ॑ಮಾಃ ।
ಯಶ॑ ಏ॒ವಾಸ್ಮಿ॑ನ್ದಧಾತಿ । ತಸ್ಮಾ॒ದಶ್ವಃ॑ ಪಶೂ॒ನಾಂ-ಯಁ॑ಶ॒ಸ್ವಿತ॑ಮಃ ॥ ದೇ॒ವೇಭ್ಯ॒-ಸ್ತ್ವೇತ್ಯ॒ಧಸ್ತಾ᳚ತ್ । ದೇ॒ವಾ ವೈ ದೇ॒ವಾನಾ॒-ಮಪ॑ಚಿತತಮಾಃ ।
ಅಪ॑ಚಿತಿ-ಮೇ॒ವಾಸ್ಮಿ॑-ನ್ದಧಾತಿ ।
ತಸ್ಮಾ॒ದಶ್ವಃ॑ ಪಶೂ॒ನಾ-ಮಪ॑ಚಿತತಮಃ ॥ 26 ॥
ಸರ್ವೇ᳚ಭ್ಯಸ್ತ್ವಾ ದೇ॒ವೇಭ್ಯ॒ ಇತ್ಯು॒ಪರಿ॑ಷ್ಟಾತ್ ।
ಸರ್ವೇ॒ ವೈ ದೇ॒ವಾಸ್ತ್ವಿಷಿ॑ಮನ್ತೋ ಹರ॒ಸ್ವಿನಃ॑ ।
ತ್ವಿಷಿ॑ಮೇ॒-ವಾಸ್ಮಿ॒ನ್॒. ಹರೋ॑ ದಧಾತಿ ।
ತಸ್ಮಾ॒ದಶ್ವಃ॑ ಪಶೂ॒ನಾ-ನ್ತ್ವಿಷಿ॑ಮಾನ್ ಹರ॒ಸ್ವಿತ॑ಮಃ ॥ ದಿ॒ವೇ ತ್ವಾ॒-ಽನ್ತರಿ॑ಖ್ಷಾಯ ತ್ವಾ ಪೃಥಿ॒ವ್ಯೈ ತ್ವೇತ್ಯಾ॑ಹ ।
ಏ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॒ ಪ್ರೋಖ್ಷ॑ತಿ ॥
ಸ॒ತೇ ತ್ವಾ-ಽಸ॑ತೇ ತ್ವಾ॒-ಽದ್ಭ್ಯಸ್ತ್ವೌ-ಷ॑ಧೀಭ್ಯಸ್ತ್ವಾ॒ ವಿಶ್ವೇ᳚ಭ್ಯಸ್ತ್ವಾ ಭೂ॒ತೇಭ್ಯ॒ ಇತ್ಯಾ॑ಹ ।
ತಸ್ಮಾ॑ದಶ್ವಮೇಧಯಾ॒ಜಿನ॒ಗ್ಂ॒ ಸರ್ವಾ॑ಣಿ ಭೂ॒ತಾನ್ಯುಪ॑ ಜೀವನ್ತಿ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಯತ್ಪ್ರಾ॑ಜಾಪ॒ತ್ಯೋ-ಽಶ್ವಃ॑ । ಅಥ॒ ಕಸ್ಮಾ॑ದೇನ-ಮ॒ನ್ಯಾಭ್ಯೋ॑ ದೇ॒ವತಾ॒ಭ್ಯೋ-ಽಪಿ॒ ಪ್ರೋಖ್ಷ॒ತೀತಿ॑ ।
ಅಶ್ವೇ॒ ವೈ ಸರ್ವಾ॑ ದೇ॒ವತಾ॑ ಅ॒ನ್ವಾಯ॑ತ್ತಾಃ ।
ತಂ-ಯಁದ್ವಿಶ್ವೇ᳚ಭ್ಯಸ್ತ್ವಾ ಭೂ॒ತೇಭ್ಯ॒ ಇತಿ॑ ಪ್ರಾ॒ಖ್ಷತಿ॑ ।
ದೇ॒ವತಾ॑ ಏ॒ವಾಸ್ಮಿ॑-ನ್ನ॒ನ್ವಾಯಾ॑ತಯತಿ ।
ತಸ್ಮಾ॒ದಶ್ವೇ॒ ಸರ್ವಾ॑ ದೇ॒ವತಾ॑ ಅ॒ನ್ವಾಯ॑ತ್ತಾಃ ॥ 27 ॥
(ಸಾ॒ರ॒ಸಾ॒ರಿತ॒ಮೋ - ಽಪ॑ಚಿತತಮಃ - ಪ್ರಾಜಾಪ॒ತ್ಯೋ-ಽಶ್ವ॒ ಪಞ್ಚ॑ ಚ) (ಅ. 7)
ಅನುವಾಕಂ 8 - ಅಶ್ವಚರಿತಾನಾಮಶ್ವರೂಪಾಣಾ-ಞ್ಚ ಹೋಮಾಃ
ಯಥಾ॒ ವೈ ಹ॒ವಿಷೋ॑ ಗೃಹೀ॒ತಸ್ಯ॒ ಸ್ಕನ್ದ॑ತಿ ।
ಏ॒ವಂ-ವಾಁ ಏ॒ತದಶ್ವ॑ಸ್ಯ ಸ್ಕನ್ದತಿ ।
ಯತ್ಪ್ರೋಖ್ಷಿ॑ತ॒-ಮನಾ॑ಲಬ್ಧ-ಮುಥ್ಸೃ॒ಜನ್ತಿ॑ । ಯದ॑ಶ್ವ-ಚರಿ॒ತಾನಿ॑ ಜು॒ಹೋತಿ॑ । ಸ॒ರ್ವ॒ಹುತ॑-ಮೇ॒ವೈನ॑-ಙ್ಕರೋ॒ತ್ಯ-ಸ್ಕ॑ನ್ದಾಯ । ಅಸ್ಕ॑ನ್ನ॒ಗ್ಂ॒ ಹಿ ತತ್ । ಯದ್ಧು॒ತಸ್ಯ॒ ಸ್ಕನ್ದ॑ತಿ ॥ ಈ॒ಙ್ಕಾ॒ರಾಯ॒ ಸ್ವಾಹೇ-ಙ್ಕೃ॑ತಾಯ॒ ಸ್ವಾಹೇತ್ಯಾ॑ಹ । ಏ॒ತಾನಿ॒ ವಾ ಅ॑ಶ್ವಚರಿ॒ತಾನಿ॑ । ಚ॒ರಿ॒ತೈರೇ॒ವೈನ॒ಗ್ಂ॒ ಸಮ॑ರ್ಧಯತಿ ॥ 28 ॥
ತದಾ॑ಹುಃ । ಅನಾ॑ಹುತಯೋ॒ ವಾ ಅ॑ಶ್ವಚರಿ॒ತಾನಿ॑ ।
ನೈತಾ ಹೋ॑ತ॒ವ್ಯಾ॑ ಇತಿ॑ । ಅಥೋ॒ ಖಲ್ವಾ॑ಹುಃ । ಹೋ॒ತ॒ವ್ಯಾ॑ ಏ॒ವ । ಅತ್ರ॒ ವಾವೈವಂ-ವಿಁ॒ದ್ವಾನ॑ಶ್ವಮೇ॒ಧಗ್ಂ
ಸಗ್ಗ್ಸ್ಥಾ॑ಪಯತಿ । ಯದ॑ಶ್ವ-ಚರಿ॒ತಾನಿ॑ ಜು॒ಹೋತಿ॑ । ತಸ್ಮಾ᳚-ದ್ಧೋತ॒ವ್ಯಾ॑ ಇತಿ॑ ॥ ಬ॒ಹಿ॒ರ್ಧಾ ವಾ ಏ॑ನಮೇ॒ತದಾ॒ಯತ॑ನಾ-ದ್ದಧಾತಿ ।
ಭ್ರಾತೃ॑ವ್ಯಮಸ್ಮೈ ಜನಯತಿ ॥ 29 ॥
ಯಸ್ಯಾ॑ ನಾಯತ॒ನೇ᳚-ಽನ್ಯತ್ರಾ॒ಗ್ನೇ-ರಾಹು॑ತೀ-ರ್ಜು॒ಹೋತಿ॑ ।
ಸಾ॒ವಿ॒ತ್ರಿ॒ಯಾ ಇಷ್ಟ್ಯಾಃ᳚ ಪು॒ರಸ್ತಾ᳚ಥ್ಸ್ವಿಷ್ಟ॒ ಕೃತಃ॑ ।
ಆ॒ಹ॒ವ॒ನೀಯೇ᳚-ಽಶ್ವಚರಿ॒ತಾನಿ॑ ಜುಹೋತಿ । ಆ॒ಯತ॑ನ ಏ॒ವಾಸ್ಯಾಹು॑ತೀ-ರ್ಜುಹೋತಿ । ನಾಸ್ಮೈ॒ ಭ್ರಾತೃ॑ವ್ಯ-ಞ್ಜನಯತಿ ॥ ತದಾ॑ಹುಃ । ಯ॒ಜ್ಞ॒ಮು॒ಖೇ ಯ॑ಜ್ಞಮುಖೇ ಹೋತ॒ವ್ಯಾಃ᳚ । ಯ॒ಜ್ಞಸ್ಯ॒ ಕ್ಲೃಪ್ತ್ಯೈ᳚ । ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ-ನು॑ಖ್ಯಾತ್ಯಾ॒ ಇತಿ॑ ॥ ಅಥೋ॒ ಖಲ್ವಾ॑ಹುಃ ॥ 30 ॥
ಯದ್ಯ॑ಜ್ಞಮು॒ಖೇ ಯ॑ಜ್ಞಮುಖೇ ಜುಹು॒ಯಾತ್ ।
ಪ॒ಶುಭಿ॒-ರ್ಯಜ॑ಮಾನಂ॒-ವ್ಯಁ॑ದ್ರ್ಧಯೇತ್ ।
ಅವ॑ ಸುವ॒ರ್ಗಾಲ್ಲೋ॒ಕಾ-ತ್ಪ॑ದ್ಯೇತ । ಪಾಪೀ॑ಯಾ-ನ್ಥ್ಸ್ಯಾ॒ದಿತಿ॑ ।
ಸ॒ಕೃದೇ॒ವ ಹೋ॑ತ॒ವ್ಯಾಃ᳚ । ನ ಯಜ॑ಮಾನ-ಮ್ಪ॒ಶುಭಿ॒-ರ್ವ್ಯ॑ದ್ರ್ಧಯತಿ । ಅ॒ಭಿ ಸು॑ವ॒ರ್ಗಂ-ಲೋಁ॒ಕ-ಞ್ಜ॑ಯತಿ । ನ ಪಾಪೀ॑ಯಾ-ನ್ಭವತಿ ॥ ಅ॒ಷ್ಟಾಚ॑ತ್ವಾರಿಗ್ಂಶತಮಶ್ವ ರೂ॒ಪಾಣಿ॑ ಜುಹೋತಿ । ಅ॒ಷ್ಟಾಚ॑ತ್ವಾರಿಗ್ಂಶದಖ್ಷರಾ॒ ಜಗ॑ತೀ । ಜಾಗ॒ತೋ-ಽಶ್ವಃ॑ ಪ್ರಾಜಾಪ॒ತ್ಯ-ಸ್ಸಮೃ॑ದ್ಧ್ಯೈ ॥ ಏಕ॒ಮತಿ॑ರಿಕ್ತ-ಞ್ಜುಹೋತಿ । ತಸ್ಮಾ॒ದೇಕಃ॑ ಪ್ರ॒ಜಾಸ್ವದ್ರ್ಧು॑ಕಃ ॥ 31 ॥
(ಅ॒ದ್ರ್ಧ॒ಯ॒ತಿ॒ - ಜ॒ನ॒ಯ॒ತಿ॒ - ಖಲ್ವಾ॑ಹು॒--ರ್ ಜಗ॑ತೀ॒ ತ್ರೀಣಿ॑ ಚ) (ಅ. 8)
ಅನುವಾಕಂ 9 - ಅಶ್ವಸ್ಯ ನಾಮ್ನಾಮಭಿವಾಚನಮ್, ಉಥ್ಸರ್ಗಶ್ಚ
ವಿ॒ಭೂರ್ಮಾ॒ತ್ರಾ ಪ್ರ॒ಭೂಃ ಪಿ॒ತ್ರೇತ್ಯಾ॑ಹ । ಇ॒ಯಂ-ವೈಁ ಮಾ॒ತಾ । ಅ॒ಸೌ ಪಿ॒ತಾ । ಆ॒ಭ್ಯಾಮೇ॒ವೈನ॒-ಮ್ಪರಿ॑ದದಾತಿ ॥ ಅಶ್ವೋ॑-ಽಸಿ॒ ಹಯೋ॒-ಽಸೀತ್ಯಾ॑ಹ । ಶಾಸ್ತ್ಯೇ॒ವೈನ॑ಮೇ॒ತತ್ । ತಸ್ಮಾ᳚ಚ್ಛಿ॒ಷ್ಟಾಃ ಪ್ರ॒ಜಾ ಜಾ॑ಯನ್ತೇ ॥ ಅತ್ಯೋ॒-ಽಸೀತ್ಯಾ॑ಹ ।
ತಸ್ಮಾ॒ದಶ್ವ॒-ಸ್ಸರ್ವಾ᳚-ನ್ಪ॒ಶೂನತ್ಯೇ॑-ಽತಿ ।
ತಸ್ಮಾ॒ದಶ್ವ॒-ಸ್ಸರ್ವೇ॑ಷಾ-ಮ್ಪಶೂ॒ನಾಗ್ ಶ್ರೈಷ್ಠ್ಯ॑-ಙ್ಗಚ್ಛತಿ ॥ 32 ॥
ಪ್ರ ಯಶ॒-ಶ್ಶ್ರೈಷ್ಠ್ಯ॑ಮಾಪ್ನೋತಿ । ಯ ಏ॒ವಂ-ವೇಁದ॑ ॥ ನರೋ॒-ಽಸ್ಯರ್ವಾ॑-ಽಸಿ॒ ಸಪ್ತಿ॑ರಸಿ ವಾ॒ಜ್ಯ॑ಸೀತ್ಯಾ॑ಹ ।
ರೂ॒ಪಮೇ॒ವಾಸ್ಯೈ॒ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ॥
ಯಯು॒ರ್ನಾಮಾ॒-ಽಸೀತ್ಯಾ॑ಹ । ಏ॒ತದ್ವಾ ಅಶ್ವ॑ಸ್ಯ ಪ್ರಿ॒ಯ-ನ್ನಾ॑ಮ॒ಧೇಯ᳚ಮ್ । ಪ್ರಿ॒ಯೇಣೈ॒ವೈನ॑-ನ್ನಾಮ॒ಧೇಯೇ॑ನಾ॒ಭಿವ॑ದತಿ । ತಸ್ಮಾ॒ದಪ್ಯಾ॑ಮಿ॒ತ್ರೌ ಸ॒ಗನ್ತ್ಯ॑ । ನಾಮ್ನಾ॒ ಚೇದ್ಧ್ವಯೇ॑ತೇ । ಮಿ॒ತ್ರಮೇ॒ವ ಭ॑ವತಃ ॥ 33 ॥
ಆ॒ದಿ॒ತ್ಯಾನಾ॒-ಮ್ಪತ್ವಾ-ಽನ್ವಿ॒ಹೀತ್ಯಾ॑ಹ । ಆ॒ದಿ॒ತ್ಯಾನೇ॒ವೈನ॑-ಙ್ಗಮಯತಿ ॥
ಅ॒ಗ್ನಯೇ॒ ಸ್ವಾಹಾ॒ ಸ್ವಾಹೇ᳚ನ್ದ್ರಾ॒ಗ್ನಿಭ್ಯಾ॒ಮಿತಿ॑ ಪೂರ್ವಹೋ॒ಮಾ-ಞ್ಜು॑ಹೋತಿ । ಪೂವ॑ ಏ॒ವ ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒-ಮತಿ॑ಕ್ರಾಮತಿ ॥ ಭೂರ॑ಸಿ ಭು॒ವೇ ತ್ವಾ॒ ಭವ್ಯಾ॑ಯ ತ್ವಾ ಭವಿಷ್ಯ॒ತೇ ತ್ವೇತ್ಯುಥ್ಸೃ॑ಜತಿ ಸರ್ವ॒ತ್ವಾಯ॑ ॥ ದೇವಾ॑ ಆಶಾಪಾಲಾ ಏ॒ತ-ನ್ದೇ॒ವೇಭ್ಯೋ-ಽಶ್ವ॒-ಮ್ಮೇಧಾ॑ಯ॒ ಪ್ರೋಖ್ಷಿ॑ತ-ಙ್ಗೋಪಾಯ॒ತೇತ್ಯಾ॑ಹ । ಶ॒ತಂ-ವೈಁ ತಲ್ಪ್ಯಾ॑ ರಾಜಪು॒ತ್ರಾ ದೇ॒ವಾ ಆ॑ಶಾಪಾ॒ಲಾಃ । ತೇಭ್ಯ॑ ಏ॒ವೈನ॒-ಮ್ಪರಿ॑ದದಾತಿ ॥
ಈ॒ಶ್ವ॒ರೋ ವಾ ಅಶ್ವಃ॒ ಪ್ರಮು॑ಕ್ತಃ॒ ಪರಾ᳚-ಮ್ಪರಾ॒ವತ॒-ಙ್ಗನ್ತೋಃ᳚ । ಇ॒ಹ ಧೃತಿ॒-ಸ್ಸ್ವಾಹೇ॒ಹ ವಿಧೃ॑ತಿ॒-ಸ್ಸ್ವಾಹೇ॒ಹ ರನ್ತಿ॒-ಸ್ಸ್ವಾಹೇ॒ಹ ರಮ॑ತಿಃ॒
ಸ್ವಾಹೇತಿ॑ ಚತೃ॒ಷು ಪ॒ಥ್ಸು ಜು॑ಹೋತಿ ॥ 34 ॥
ಏ॒ತಾ ವಾ ಅಶ್ವ॑ಸ್ಯ॒ ಬನ್ಧ॑ನಮ್ ।
ತಾಭಿ॑ರೇ॒ವೈನ॑-ಮ್ಬದ್ಧ್ನಾತಿ ।
ತಸ್ಮಾ॒ದಶ್ವಃ॒ ಪ್ರಮು॑ಕ್ತೋ॒ ಬನ್ಧ॑ನ॒-ಮಾಗ॑ಚ್ಛತಿ ।
ತಸ್ಮಾ॒ದಶ್ವಃ॒ ಪ್ರಮು॑ಕ್ತೋ॒ ಬನ್ಧ॑ನ॒-ನ್ನ ಜ॑ಹಾತಿ ॥
ರಾ॒ಷ್ಟ್ರಂ-ವಾಁ ಅ॑ಶ್ವಮೇ॒ಧಃ । ರಾ॒ಷ್ಟ್ರೇ ಖಲು॒ ವಾ ಏ॒ತೇ ವ್ಯಾಯ॑ಚ್ಛನ್ತೇ । ಯೇ-ಽಶ್ವ॒-ಮ್ಮೇದ್ಧ್ಯ॒ಗ್ಂ॒ ರಖ್ಷ॑ನ್ತಿ । ತೇಷಾಂ॒-ಯಁ ಉ॒ದೃಚ॒-ಙ್ಗಚ್ಛ॑ನ್ತಿ ।
ರಾ॒ಷ್ಟ್ರಾದೇ॒ವ ತೇ ರಾ॒ಷ್ಟ್ರ-ಙ್ಗ॑ಚ್ಛನ್ತಿ । ಅ॒ಥ ಯ ಉ॒ದೃಚ॒-ನ್ನ ಗಚ್ಛ॑ನ್ತಿ ॥ 35 ॥
ರಾ॒ಷ್ಟ್ರಾದೇ॒ವ ತೇ ವ್ಯವ॑ಚ್ಛಿದ್ಯನ್ತೇ । ಪರಾ॒ ವಾ ಏ॒ಷ ಸಿ॑ಚ್ಯತೇ । ಯೋ॑-ಽಬ॒ಲೋ᳚-ಽಶ್ವಮೇ॒ಧೇನ॒ ಯಜ॑ತೇ । ಯದ॒ಮಿತ್ರಾ॒ ಅಶ್ವಂ॑-ವಿಁ॒ನ್ದೇರನ್ನ್॑ ।
ಹ॒ನ್ಯೇತಾ᳚ಸ್ಯ ಯ॒ಜ್ಞಃ । ಚ॒ತು॒ಶ್ಶ॒ತಾ ರ॑ಖ್ಷನ್ತಿ । ಯ॒ಜ್ಞಸ್ಯಾಘಾತಾಯ ॥ ಅಥಾ॒ನ್ಯ-ಮಾ॒ನೀಯ॒ ಪ್ರೋಖ್ಷೇ॑ಯುಃ । ಸೈವ ತತಃ॒ ಪ್ರಾಯ॑ಶ್ಚಿತ್ತಿಃ ॥ 36 ॥
(ಗ॒ಚ್ಛ॒ತಿ॒ - ಭ॒ವ॒ತಃ॒ - ಪ॒ಥ್ಸು ಜು॑ಹೋತಿ॒ - ನ ಗಚ್ಛ॑ನ್ತಿ॒ - +ನವ॑ ಚ) (ಅ. 9)
ಅನುವಾಕಂ 10 - ದೀಖ್ಷಾಭಿಧಾನ-ನ್ತತ್ರ ವೈಶ್ವದೇವಹೋಮಃ
ಪ್ರ॒ಜಾಪ॑ತಿ-ರಕಾಮಯತಾಶ್ವಮೇ॒ಧೇನ॑ ಯಜೇ॒ಯೇತಿ॑ । ಸ ತಪೋ॑-ಽತಪ್ಯತ । ತಸ್ಯ॑ ತೇಪಾ॒ನಸ್ಯ॑ । ಸ॒ಪ್ತಾತ್ಮನೋ॑ ದೇ॒ವತಾ॒ ಉದ॑ಕ್ರಾಮನ್ನ್ । ಸಾ ದೀ॒ಖ್ಷಾ-ಽಭ॑ವತ್ । ಸ ಏ॒ತಾನಿ॑ ವೈಶ್ವದೇ॒ವಾನ್ಯ॑ಪಶ್ಯತ್ । ತಾನ್ಯ॑ ಜುಹೋತ್ ।
ತೈರ್ವೈ ಸ ದೀ॒ಖ್ಷಾಮವಾ॑ರುನ್ಧ । ಯದ್ವೈ᳚ಶ್ವ ದೇ॒ವಾನಿ॑ ಜು॒ಹೋತಿ॑ । ದೀ॒ಖ್ಷಾಮೇ॒ವ-ತೈರ್ಯಜ॑ಮಾ॒ನೋ-ಽವ॑ರುನ್ಧೇ ॥ 37 ॥
ಸ॒ಪ್ತ ಜು॑ಹೋತಿ । ಸ॒ಪ್ತ ಹಿ ತಾ ದೇ॒ವತಾ॑ ಉ॒ದಕ್ರಾ॑ಮನ್ನ್ ॥ ಅ॒ನ್ವ॒ಹ-ಞ್ಜು॑ಹೋತಿ । ಅ॒ನ್ವ॒ಹಮೇ॒ವ ದೀ॒ಖ್ಷಾಮವ॑ರುನ್ಧೇ ॥ ತ್ರೀಣಿ॑ ವೈಶ್ವದೇ॒ವಾನಿ॑ ಜುಹೋತಿ ।
ಚ॒ತ್ವಾರ್ಯೌ᳚ದ್ಗ್ರಹ॒ಣಾನಿ॑ । ಸ॒ಪ್ತ ಸಮ್ಪ॑ದ್ಯನ್ತೇ । ಸ॒ಪ್ತ ವೈ ಶೀ॑ರ.ಷ॒ಣ್ಯಾಃ᳚ ಪ್ರಾ॒ಣಾಃ ।
ಪ್ರಾ॒ಣಾ ದೀ॒ಖ್ಷಾ । ಪ್ರಾ॒ಣೈರೇ॒ವ ಪ್ರಾ॒ಣಾನ್ದೀ॒ಖ್ಷಾಮವ॑ರುನ್ಧೇ ॥ 38 ॥
ಏಕ॑ವಿಗ್ಂಶತಿಂ-ವೈಁಶ್ವದೇ॒ವಾನಿ॑ ಜುಹೋತಿ । ಏಕ॑ವಿಗ್ಂಶತಿ॒ರ್ವೈ ದೇ॑ವಲೋ॒ಕಾಃ ।
ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವಃ॑ । ತ್ರಯ॑ ಇ॒ಮೇ ಲೋ॒ಕಾಃ । ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ ॥ ಏ॒ಷ ಸು॑ವ॒ರ್ಗೋ ಲೋ॒ಕಃ । ತದ್ದೈವ್ಯ॑-ಙ್ಖ್ಷ॒ತ್ತ್ರಮ್ ।
ಸಾ ಶ್ರೀಃ । ತದ್ಬ್ರ॒ದ್ಧ್ನಸ್ಯ॑ ವಿ॒ಷ್ಟಪ᳚ಮ್ । ತಥ್ಸ್ವಾರಾ᳚ಜ್ಯ-ಮುಚ್ಯತೇ ॥ 39 ॥
ತ್ರಿ॒ಗ್ಂ॒ಶತ॑ಮೌದ್ಗ್ರಹ॒ಣಾನಿ॑ ಜುಹೋತಿ । ತ್ರಿ॒ಗ್ಂ॒ಶದ॑ಖ್ಷರಾ ವಿ॒ರಾಟ್ । ಅನ್ನಂ॑-ವಿಁ॒ರಾಟ್ । ವಿ॒ರಾಜೈ॒ವಾನ್ನಾದ್ಯ॒ಮವ॑ರುನ್ಧೇ ॥
ತ್ರೇ॒ಧಾ ವಿ॒ಭಜ್ಯ॑ ದೇ॒ವತಾ᳚-ಞ್ಜುಹೋತಿ । ತ್ರ್ಯಾ॑ವೃತೋ॒ ವೈ ದೇ॒ವಾಃ । ತ್ರ್ಯಾ॑ವೃತ ಇ॒ಮೇ ಲೋ॒ಕಾಃ । ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ᳚ । ಏ॒ಷಾಂ-ಲೋಁ॒ಕಾನಾ॒-ಙ್ಕ್ಲೃಪ್ತ್ಯೈ᳚ ॥ ಅಪ॒ ವಾ ಏ॒ತಸ್ಮಾ᳚ತ್ಪ್ರಾ॒ಣಾಃ ಕ್ರಾ॑ಮನ್ತಿ ॥ 40 ॥
ಯೋ ದೀ॒ಖ್ಷಾಮ॑ತಿ-ರೇ॒ಚಯ॑ತಿ । ಸ॒ಪ್ತಾ॒ಹ-ಮ್ಪ್ರಚ॑ರನ್ತಿ ।
ಸ॒ಪ್ತ ವೈ ಶೀ॑ರ್ಷ॒ಣ್ಯಾಃ᳚ ಪ್ರಾ॒ಣಾಃ । ಪ್ರಾ॒ಣಾ ದೀ॒ಖ್ಷಾ ।
ಪ್ರಾ॒ಣೈರೇ॒ವ ಪ್ರಾ॒ಣಾನ್ದೀ॒ಖ್ಷಾಮವ॑ರುನ್ಧೇ ॥ ಪೂ॒ರ್ಣಾ॒ಹು॒ತಿ-ಮು॑ತ್ತ॒ಮಾ-ಞ್ಜು॑ಹೋತಿ ।
ಸರ್ವಂ॒-ವೈಁ ಪೂ᳚ರ್ಣಾಹು॒ತಿಃ । ಸರ್ವ॑ಮೇ॒ವಾಪ್ನೋ॑ತಿ । ಅಥೋ॑ ಇ॒ಯಂ-ವೈಁ ಪೂ᳚ರ್ಣಾಹು॒ತಿಃ ।
ಅ॒ಸ್ಯಾಮೇ॒ವ ಪ್ರತಿ॑ತಿಷ್ಠತಿ ॥ 41 ॥
(ರು॒ನ್ಧೇ॒ - ಪ್ರಾ॒ಣಾ-ನ್ದೀ॒ಖ್ಷಾಮವ॑ರುನ್ಧ - ಉಚ್ಯತೇ - ಕ್ರಾಮನ್ತಿ - ತಿಷ್ಠತಿ) (ಅ. 10)
ಅನುವಾಕಂ 11 - ವೈಶ್ವದೇವಹೋಮಮನ್ತ್ರವ್ಯಾಖ್ಯಾನಮ್
ಪ್ರಜಾಪ॑ತಿ-ರಶ್ವಮೇ॒ಧ-ಮ॑ಸೃಜತ । ತಗ್ಂ ಸೃ॒ಷ್ಟ-ನ್ನ ಕಿಞ್ಚ॒ನೋದ॑ಯಚ್ಛತ್ ।
ತಂ-ವೈಁ᳚ಶ್ವದೇ॒ವಾನ್ಯೇ॒-ವೋದ॑ಯಚ್ಛನ್ನ್ । ಯದ್ವೈ᳚ಶ್ವದೇ॒ವಾನಿ॑ ಜು॒ಹೋತಿ॑ ।
ಯ॒ಜ್ಞಸ್ಯೋದ್ಯ॑ತ್ಯೈ ॥ ಸ್ವಾಹಾ॒-ಽಽಧಿಮಾಧೀ॑ತಾಯ॒ ಸ್ವಾಹಾ᳚ । ಸ್ವಾಹಾ-ಽಽಧೀ॑ತ॒-ಮ್ಮನ॑ಸೇ॒ ಸ್ವಾಹಾ᳚ ।
ಸ್ವಾಹಾ॒ ಮನಃ॑ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಕಾಯ॒ ಸ್ವಾಹಾ॒ ಕಸ್ಮೈ॒ ಸ್ವಾಹಾ॑ ಕತ॒ಮಸ್ಮೈ॒ ಸ್ವಾಹೇತಿ॑ ಪ್ರಾಜಾಪ॒ತ್ಯೇ ಮುಖ್ಯೇ॑ ಭವತಃ ।
ಪ್ರ॒ಜಾಪ॑ತಿ-ಮುಖಾಭಿರೇ॒ವೈನ॑-ನ್ದೇ॒ವತಾ॑ಭಿ॒ರುದ್ಯ॑ಚ್ಛತೇ ॥ 42 ॥
ಅದಿ॑ತ್ಯೈ॒ ಸ್ವಾಹಾ-ಽದಿ॑ತ್ಯೈ ಮ॒ಹ್ಯೈ᳚ ಸ್ವಾಹಾ-ಽದಿ॑ತ್ಯೈ ಸುಮೃಡೀ॒ಕಾಯೈ॒ ಸ್ವಾಹೇತ್ಯಾ॑ಹ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾ ಏ॒ವೈನ॑-ಮ್ಪ್ರತಿ॒ಷ್ಠಾಯೋದ್ಯ॑ಚ್ಛತೇ ॥
ಸರ॑ಸ್ವತ್ಯೈ॒ ಸ್ವಾಹಾ॒ ಸರ॑ಸ್ವತ್ಯೈ ಬೃಹ॒ತ್ಯೈ᳚ ಸ್ವಾಹಾ॒ ಸರ॑ಸ್ವತ್ಯೈ ಪಾವ॒ಕಾಯೈ॒ ಸ್ವಾಹೇತ್ಯಾ॑ಹ ।
ವಾಗ್ವೈ ಸರ॑ಸ್ವತೀ । ವಾ॒ಚೈವೈನ॒ಮುದ್ಯ॑ಚ್ಛತೇ ॥
ಪೂ॒ಷ್ಣೇ ಸ್ವಾಹಾ॑ ಪೂ॒ಷ್ಣೇ ಪ್ರ॑ಪ॒ಥ್ಯಾ॑ಯ॒ ಸ್ವಾಹಾ॑ ಪೂ॒ಷ್ಣೇ ನ॒ರನ್ಧಿ॑ಷಾಯ॒ ಸ್ವಾಹೇತ್ಯಾ॑ಹ ।
ಪ॒ಶವೋ॒ ವೈ ಪೂ॒ಷಾ । ಪ॒ಶುಭಿ॑ರೇ॒ವೈನ॒-ಮುದ್ಯ॑ಚ್ಛತೇ ॥ ತ್ವಷ್ಟ್ರೇ॒ ಸ್ವಾಹಾ॒ ತ್ವಷ್ಟ್ರ॑ ತು॒ರೀಪಾ॑ಯ॒ ಸ್ವಾಹಾ॒ ತ್ವಷ್ಟ್ರೇ॑ ಪುರು॒ರೂಪಾ॑ಯ॒ ಸ್ವಾಹೇತ್ಯಾ॑ಹ । ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಗ್ಂ॑ ರೂಪ॒ಕೃತ್ । ರೂ॒ಪಮೇ॒ವ ಪ॒ಶುಷು॑ ದಧಾತಿ । ಅಥೋ॑ ರೂ॒ಪೈರೇ॒ವೈನ॒-ಮುದ್ಯ॑ಚ್ಛತೇ ॥
ವಿಷ್ಣ॑ವೇ॒ ಸ್ವಾಹಾ॒ ವಿಷ್ಣ॑ವೇ ನಿಖುರ್ಯ॒ಪಾಯ॒ ಸ್ವಾಹಾ॒ ವಿಷ್ಣ॑ವೇ ನಿಭೂಯ॒ಪಾಯ॒ ಸ್ವಾಹೇತ್ಯಾ॑ಹ ।
ಯ॒ಜ್ಞೋ ವೈ ವಿಷ್ಣುಃ॑ । ಯ॒ಜ್ಞಾಯೈ॒ವೈನ॒-ಮುದ್ಯ॑ಚ್ಛತೇ ॥ ಪೂ॒ರ್ಣಾ॒ಹು॒ತಿ-ಮು॑ತ್ತ॒ಮಾ-ಞ್ಜು॑ಹೋತಿ । ಪ್ರತ್ಯುತ್ತ॑ಬ್ಧ್ಯೈ ಸಯ॒ತ್ವಾಯ॑ ॥ 43 ॥
(ಯ॒ಚ್ಛ॒ತೇ॒ - ಪು॒ರು॒ರೂಪಾ॑ಯ॒ ಸ್ವಾಹೇತ್ಯಾ॑ಹಾ॒ಷ್ಟೌ ಚ॑) (ಅ. 11)
ಅನುವಾಕಂ 12 - ಅಶ್ವಸಞ್ಚರಣವಥ್ಸರೇ ಪ್ರತಿದಿನ-ನ್ದೇವಯಜನದೇಶೇ ಕರ್ತವ್ಯಮಿಷ್ಟಿತ್ರಯಮಭಿಧೀಯತೇ
ಸಾ॒ವಿ॒ತ್ರ-ಮ॒ಷ್ಟಕ॑ಪಾಲ-ಮ್ಪ್ರಾ॒ತರ್ನಿರ್ವ॑ಪತಿ । ಅ॒ಷ್ಟಾಖ್ಷ॑ರಾ ಗಾಯ॒ತ್ರೀ ।
ಗಾ॒ಯ॒ತ್ರ-ಮ್ಪ್ರಾ॑ತಸ್ಸವ॒ನಮ್ ।
ಪ್ರಾ॒ತ॒ಸ್ಸ॒ವ॒ನಾ ದೇ॒ವೈನ॑-ಙ್ಗಾಯತ್ರಿ॒ಯಾ ॑007ಆ;ಛನ್ದ॒ಸೋ-ಽಧಿ॒ ನಿರ್ಮಿ॑ಮೀತೇ ।
ಅಥೋ᳚ ಪ್ರಾತಸ್ಸವ॒ನಮೇ॒ವ ತೇನಾ᳚ಪ್ನೋತಿ । ಗಾ॒ಯ॒ತ್ರೀ-ಞ್ಛನ್ದಃ॑ ॥ ಸ॒ವಿ॒ತ್ರೇ ಪ್ರ॑ಸವಿ॒ತ್ರ ಏಕಾ॑ದಶ-ಕಪಾಲ-ಮ್ಮ॒ದ್ಧ್ಯನ್ದಿ॑ನೇ । ಏಕಾ॑ದಶಾಖ್ಷರಾ ತ್ರಿ॒ಷ್ಟುಪ್ ।
ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನಮ್ ।
ಮಾದ್ಧ್ಯ॑ನ್ದಿನಾ-ದೇ॒ವೈನ॒ಗ್ಂ॒ ಸವ॑ನಾತ್ತ್ರಿ॒ಷ್ಟುಭಃ॒-ಛನ್ದ॒ಸೋ-ಽಧಿ॒ ನಿರ್ಮಿ॑ಮೀತೇ ॥ 44 ॥
ಅಥೋ॒ ಮಾದ್ಧ್ಯ॑ನ್ದಿನಮೇ॒ವ ಸವ॑ನ॒-ನ್ತೇನಾ᳚ಪ್ನೋತಿ । ತ್ರಿ॒ಷ್ಟುಭ॒-ಞ್ಛನ್ದಃ॑ ॥ ಸ॒ವಿ॒ತ್ರ ಆ॑ಸವಿ॒ತ್ರೇ ದ್ವಾದ॑ಶ-ಕಪಾಲ-ಮಪರಾ॒ಹ್ಣೇ । ದ್ವಾದ॑ಶಾಖ್ಷರಾ॒ ಜಗ॑ತೀ । ಜಾಗ॑ತ-ನ್ತೃತೀಯ ಸವ॒ನಮ್ ।
ತೃ॒ತೀ॒ಯ॒ ಸ॒ವ॒ನಾದೇ॒ವೈನ॒-ಞ್ಜಗ॑ತ್ಯಾ॒ ॑007ಆ;ಛನ್ದ॒ಸೋ-ಽಧಿ॒ ನಿರ್ಮಿ॑ಮೀತೇ ।
ಅಥೋ॑ ತೃತೀಯ ಸವ॒ನಮೇ॒ವ ತೇನಾ᳚ಪ್ನೋತಿ ।
ಜಗ॑ತೀ॒-ಞ್ಛನ್ದಃ॑ ॥ ಈ॒ಶ್ವ॒ರೋ ವಾ ಅಶ್ವಃ॒ ಪ್ರಮು॑ಕ್ತಃ॒ ಪರಾ᳚-ಮ್ಪರಾ॒ವತ॒-ಙ್ಗನ್ತೋಃ᳚ ।
ಇ॒ಹ ಧೃತಿ॒-ಸ್ಸ್ವಾಹೇ॒ಹ ವಿಧೃ॑ತಿ॒-ಸ್ಸ್ವಾಹೇ॒ಹ ರನ್ತಿ॒-ಸ್ಸ್ವಾಹೇ॒ಹ ರಮ॑ತಿ॒-ಸ್ಸ್ವಾಹೇತಿ॒ ಚತ॑ಸ್ರ॒ ಆಹು॑ತೀ-ರ್ಜುಹೋತಿ
( ) ॥ 45 ॥
ಚತ॑ಸ್ರೋ॒ ದಿಶಃ॑ । ದಿ॒ಗ್ಭಿರೇ॒ವೈನ॒-ಮ್ಪರಿ॑ಗೃಹ್ಣಾತಿ ॥ ಆಶ್ವ॑ತ್ಥೋ ವ್ರ॒ಜೋ ಭ॑ವತಿ । ಪ್ರ॒ಜಾಪ॑ತಿ-ರ್ದೇ॒ವೇಭ್ಯೋ॒ ನಿಲಾ॑ಯತ । ಅಶ್ವೋ॑ ರೂ॒ಪ-ಙ್ಕೃ॒ತ್ವಾ ।
ಸೋ᳚-ಽಶ್ವ॒ತ್ಥೇ ಸಂ॑ವಁಥ್ಸ॒ರ-ಮ॑ತಿಷ್ಠತ್ । ತದ॑ಶ್ವ॒ತ್ಥಸ್ಯಾ᳚-ಶ್ವತ್ಥ॒ತ್ವಮ್ ।
ಯದಾಶ್ವ॑ತ್ಥೋ ವ್ರ॒ಜೋ ಭವ॑ತಿ । ಸ್ವ ಏ॒ವೈನಂ॒-ಯೋಁನೌ॒ ಪ್ರತಿ॑ಷ್ಠಾಪಯತಿ ॥ 46 ॥
(ತ್ರಿ॒ಷ್ಟುಭ॒ ॑ಶ್ಛನ್ದ॒ಸೋ-ಽಧಿ॒ ನಿರ್ಮಿ॑ಮೀತೇ - ಜುಹೋತಿ॒ - ನವ॑ ಚ) (ಅ. 12)
ಅನುವಾಕಂ 13 - ಸಂವಁಥ್ಸರಾದ್ರ್ಧ್ವಮುಖ್ಯಸ್ಯಾಗ್ರೇರೂಪಸ್ಥಾನಮ್
ಆ ಬ್ರ॑ಹ್ಮ-ನ್ಬ್ರಾಹ್ಮ॒ಣೋ ಬ್ರ॑ಹ್ಮವರ್ಚ॒ಸೀ ಜಾ॑ಯತಾ॒-ಮಿತ್ಯಾ॑ಹ । ಬ್ರಾ॒ಹ್ಮ॒ಣ ಏ॒ವ ಬ್ರ॑ಹ್ಮವರ್ಚ॒ಸ-ನ್ದಧಾತಿ । ತಸ್ಮಾ᳚ತ್ಪು॒ರಾ ಬ್ರಾ᳚ಹ್ಮ॒ಣೋ ಬ್ರ॑ಹ್ಮವರ್ಚ॒ಸ್ಯ॑ ಜಾಯತ ॥ ಆ-ಽಸ್ಮಿ-ನ್ರಾ॒ಷ್ಟ್ರೇ ರಾ॑ಜ॒ನ್ಯ॑ ಇಷ॒ವ್ಯ॑-ಶ್ಶೂರೋ॑ ಮಹಾರ॒ಥೋ ಜಾ॑ಯತಾ॒-ಮಿತ್ಯಾ॑ಹ । ರಾ॒ಜ॒ನ್ಯ॑ ಏ॒ವ ಶೌ॒ರ್ಯ-ಮ್ಮ॑ಹಿ॒ಮಾನ॑-ನ್ದಧಾತಿ । ತಸ್ಮಾ᳚ತ್ಪು॒ರಾ ರಾ॑ಜ॒ನ್ಯ॑ ಇಷ॒ವ್ಯ॑-ಶ್ಶೂರೋ॑ ಮಹಾರ॒ಥೋ॑-ಽಜಾಯತ ॥
ದೋಗ್ಧ್ರೀ॑ ಧೇ॒ನುರಿತ್ಯಾ॑ಹ । ಧೇ॒ನ್ವಾಮೇ॒ವ ಪಯೋ॑ ದಧಾತಿ । ತಸ್ಮಾ᳚ತ್ಪು॒ರಾ ದೋಗ್ಧ್ರೀ॑ ಧೇ॒ನುರ॑ಜಾಯತ । ವೋಢಾ॑-ಽನ॒ಡ್ವಾ-ನಿತ್ಯಾ॑ಹ ॥ 47 ॥
ಅ॒ನ॒ಡುಹ್ಯೇ॒ವ ವೀ॒ರ್ಯ॑-ನ್ದಧಾತಿ । ತಸ್ಮಾ᳚ತ್ಪು॒ರಾ ವೋಢಾ॑-ಽನ॒ಡ್ವಾನ॑ಜಾಯತ । ಆ॒ಶು-ಸ್ಸಪ್ತಿ॒ರಿತ್ಯಾ॑ಹ । ಅಶ್ವ॑ ಏ॒ವ ಜ॒ವ-ನ್ದ॑ಧಾತಿ । ತಸ್ಮಾ᳚ತ್ಪು॒ರಾ-ಽಽಶುರಶ್ವೋ॑-ಽಜಾಯತ । ಪುರ॑ಧಿಂ॒ರ್ಯೋಷೇತ್ಯಾ॑ಹ ।
ಯೋ॒ಷಿತ್ಯೇ॒ವ ರೂ॒ಪ-ನ್ದ॑ಧಾತಿ । ತಸ್ಮಾ॒ಥ್ಸ್ತ್ರೀ ಯು॑ವ॒ತಿಃ ಪ್ರಿ॒ಯಾ ಭಾವು॑ಕಾ ॥ ಜಿ॒ಷ್ಣೂ ರ॑ಥೇ॒ಷ್ಠಾ ಇತ್ಯಾ॑ಹ । ಆ ಹ॒ ವೈ ತತ್ರ॑ ಜಿ॒ಷ್ಣೂ ರ॑ಥೇ॒ಷ್ಠಾ ಜಾ॑ಯತೇ ॥ 48 ॥
ಯತ್ರೈ॒ತೇನ॑ ಯ॒ಜ್ಞೇನ॒ ಯಜ॑ನ್ತೇ ॥ ಸ॒ಭೇಯೋ॒ ಯುವೇತ್ಯಾ॑ಹ । ಯೋ ವೈ ಪೂ᳚ರ್ವವಯ॒ಸೀ ।
ಸ ಸ॒ಭೇಯೋ॒ ಯುವಾ᳚ । ತಸ್ಮಾ॒ದ್ಯುವಾ॒ ಪುಮಾ᳚-ನ್ಪ್ರಿ॒ಯೋ ಭಾವು॑ಕಃ ॥ ಆ-ಽಸ್ಯ ಯಜ॑ಮಾನಸ್ಯ ವೀ॒ರೋ ಜಾ॑ಯತಾ॒-ಮಿತ್ಯಾ॑ಹ । ಆ ಹ॒ ವೈ ತತ್ರ॒ ಯಜ॑ಮಾನಸ್ಯ ವೀ॒ರೋ ಜಾ॑ಯತೇ ।
ಯತ್ರೈ॒ತೇನ॑ ಯ॒ಜ್ಞೇನ॒ ಯಜ॑ನ್ತೇ ॥ ನಿ॒ಕಾ॒ಮೇನಿ॑ಕಾಮೇ ನಃ ಪ॒ರ್ಜನ್ಯೋ॑ ವರ್ಷ॒ತ್ವಿತ್ಯಾ॑ಹ ।
ನಿ॒ಕಾ॒ಮೇನಿ॑ಕಾಮೇ ಹ॒ ವೈ ತತ್ರ॑ ಪ॒ರ್ಜನ್ಯೋ॑ ವರ್ಷತಿ । ಯತ್ರೈ॒ತೇನ॑ ಯ॒ಜ್ಞೇನ॒ ಯಜ॑ನ್ತೇ ॥ ಫ॒ಲಿನ್ಯೋ॑ ನ॒ ಓಷ॑ಧಯಃ ಪಚ್ಯನ್ತಾ॒-ಮಿತ್ಯಾ॑ಹ ।
ಫ॒ಲಿನ್ಯೋ॑ ಹ॒ ವೈ ತತ್ರೌಷ॑ಧಯಃ ಪಚ್ಯನ್ತೇ । ಯತ್ರೈ॒ತೇನ॑ ಯ॒ಜ್ಞೇನ॒ ಯಜ॑ನ್ತೇ ।
ಯೋ॒ಗ॒ಖ್ಷೇ॒ಮೋ ನಃ॑ ಕಲ್ಪತಾ॒-ಮಿತ್ಯಾ॑ಹ ।
ಕಲ್ಪ॑ತೇ ಹ॒ ವೈ ತತ್ರ॑ ಪ್ರ॒ಜಾಭ್ಯೋ॑ ಯೋಗಖ್ಷೇ॒ಮಃ ।
ಯತ್ರೈ॒ತೇನ॑ ಯ॒ಜ್ಞೇನ॒ ಯಜ॑ನ್ತೇ ॥ 49 ॥
(ಅ॒ನ॒ಡ್ವಾನಿತ್ಯಾ॑ಹ - ಜಾಯತೇ - ವರ್ಷತಿ ಸ॒ಪ್ತ ಚ॑) (ಅ. 13)
ಅನುವಾಕಂ 14 - ಅನ್ನಹೋಮಾಃ. ತ್ರಿರಾತ್ರರೂಪಸ್ಯಾಶ್ವಮೇಧಸ್ಯ ಪ್ರಥಮದಿನರಾತ್ರೌ
ಪ್ರ॒ಜಾಪ॑ತಿ-ರ್ದೇ॒ವೇಭ್ಯೋ॑ ಯ॒ಜ್ಞಾನ್ ವ್ಯಾದಿ॑ಶತ್ ।
ಸ ಆ॒ತ್ಮ-ನ್ನ॑ಶ್ವಮೇ॒ಧಮ॑ಧತ್ತ ।
ತ-ನ್ದೇ॒ವಾ ಅ॑ಬ್ರುವನ್ನ್ । ಏ॒ಷ ವಾವ ಯ॒ಜ್ಞಃ । ಯದ॑ಶ್ವಮೇ॒ಧಃ । ಅಪ್ಯೇ॒ವ ನೋ-ಽತ್ರಾ॒ಸ್ತ್ವಿತಿ॑ ।
ತೇಭ್ಯ॑ ಏ॒ತಾನ॑ನ್ನಹೋ॒ಮಾ-ನ್ಪ್ರಾಯ॑ಚ್ಛತ್ ।
ತಾನ॑ಜುಹೋತ್ । ತೈರ್ವೈ ಸ ದೇ॒ವಾನ॑ ಪ್ರೀಣಾತ್ ।
ಯದ॑ನ್ನ-ಹೋ॒ಮಾಞ್ಜು॒ಹೋತಿ॑ ॥ 50 ॥
ದೇ॒ವಾನೇ॒ವ ತೈರ್ಯಜ॑ಮಾನಃ ಪ್ರೀಣಾತಿ ॥ ಆಜ್ಯೇ॑ನ ಜುಹೋತಿ ।
ಅ॒ಗ್ನೇರ್ವಾ ಏ॒ತದ್ರೂ॒ಪಮ್ । ಯದಾಜ್ಯ᳚ಮ್ । ಯದಾಜ್ಯೇ॑ನ ಜು॒ಹೋತಿ॑ । ಅ॒ಗ್ನಿಮೇ॒ವ ತತ್ಪ್ರೀ॑ಣಾತಿ ॥ ಮಧು॑ನಾ ಜುಹೋತಿ ।
ಮ॒ಹ॒ತ್ಯೈ ವಾ ಏ॒ತದ್ದೇ॒ವತಾ॑ಯೈ ರೂ॒ಪಮ್ । ಯನ್ಮಧು॑ । ಯನ್ಮಧು॑ನಾ ಜು॒ಹೋತಿ॑ ॥ 51 ॥
ಮ॒ಹ॒ತೀಮೇ॒ವ ತದ್ದೇ॒ವತಾ᳚-ಮ್ಪ್ರೀಣಾತಿ । ತ॒ಣ್ಡು॒ಲೈ-ರ್ಜು॑ಹೋತಿ । ವಸೂ॑ನಾಂ॒-ವಾಁ ಏ॒ತದ್ರೂ॒ಪಮ್ । ಯತ್ತ॑ಣ್ಡು॒ಲಾಃ । ಯತ್ತ॑ಣ್ಡು॒ಲೈ-ರ್ಜು॒ಹೋತಿ॑ ।
ವಸೂ॑ನೇ॒ವ ತತ್ಪ್ರೀ॑ಣಾತಿ । ಪೃಥು॑ಕೈ-ರ್ಜು॒ಹೋತಿ॑ (ರ್ಜುಹೋತಿ) ।
ರು॒ದ್ರಾಣಾಂ॒-ವಾಁ ಏ॒ತದ್ರೂ॒ಪಮ್ । ಯತ್ಪೃಥು॑ಕಾಃ । ಯತ್ಪೃಥು॑ಕೈ-ರ್ಜು॒ಹೋತಿ॑ ॥ 52 ॥
ರು॒ದ್ರಾನೇ॒ವ ತತ್ಪ್ರೀ॑ಣಾತಿ । ಲಾ॒ಜೈರ್ಜು॑ಹೋತಿ । ಆ॒ದಿ॒ತ್ಯಾನಾಂ॒-ವಾಁ ಏ॒ತದ್ರೂ॒ಪಮ್ । ಯಲ್ಲಾ॒ಜಾಃ । ಯಲ್ಲಾ॒ಜೈ-ರ್ಜು॒ಹೋತಿ॑ । ಆ॒ದಿ॒ತ್ಯಾನೇ॒ವ ತತ್ಪ್ರೀ॑ಣಾತಿ । ಕ॒ರಮ್ಬೈ᳚-ರ್ಜುಹೋತಿ । ವಿಶ್ವೇ॑ಷಾಂ॒-ವಾಁ ಏ॒ತದ್ದೇ॒ವಾನಾಗ್ಂ॑ ರೂ॒ಪಮ್ । ಯತ್ಕ॒ರಮ್ಬಾಃ᳚ । ಯತ್ಕ॒ರಮ್ಬೈ᳚-ರ್ಜು॒ಹೋತಿ॑ ॥ 53 ॥
ವಿಶ್ವಾ॑ನೇ॒ವ ತದ್ದೇ॒ವಾ-ನ್ಪ್ರೀ॑ಣಾತಿ । ಧಾ॒ನಾಭಿ॑-ರ್ಜುಹೋತಿ ।
ನಖ್ಷ॑ತ್ರಾಣಾಂ॒-ವಾಁ ಏ॒ತದ್ರೂ॒ಪಮ್ । ಯದ್ಧಾ॒ನಾಃ । ಯದ್ಧಾ॒ನಾಭಿ॑-ರ್ಜು॒ಹೋತಿ॑ । ನಖ್ಷ॑ತ್ರಾಣ್ಯೇ॒ವ ತತ್ಪ್ರೀ॑ಣಾತಿ । ಸಕ್ತು॑ಭಿ-ರ್ಜುಹೋತಿ । ಪ್ರ॒ಜಾಪ॑ತೇ॒ರ್ವಾ ಏ॒ತದ್ರೂ॒ಪಮ್ ।
ಯಥ್ಸಕ್ತ॑ವಃ । ಯಥ್ಸಕ್ತು॑ಭಿ-ರ್ಜು॒ಹೋತಿ॑ ॥ 54 ॥
ಪ್ರ॒ಜಾಪ॑ತಿಮೇ॒ವ ತತ್ಪ್ರೀ॑ಣಾತಿ । ಮ॒ಸೂಸ್ಯೈ᳚ರ್ಜುಹೋತಿ ।
ಸರ್ವಾ॑ಸಾಂ॒-ವಾಁ ಏ॒ತದ್ದೇ॒ವತಾ॑ನಾಗ್ಂ ರೂ॒ಪಮ್ । ಯನ್ಮ॒ಸೂಸ್ಯಾ॑ನಿ । ಯನ್ಮ॒ಸೂಸ್ಯೈ᳚-ರ್ಜು॒ಹೋತಿ॑ । ಸರ್ವಾ॑ ಏ॒ವ ತದ್ದೇ॒ವತಾಃ᳚ ಪ್ರೀಣಾತಿ । ಪ್ರಿ॒ಯ॒ಙ್ಗು॒ತ॒ಣ್ಡು॒ಲೈ-ರ್ಜು॑ಹೋತಿ । ಪ್ರಿ॒ಯಾಙ್ಗಾ॑ ಹ॒ ವೈ ನಾಮೈ॒ತೇ ।
ಏ॒ತೈರ್ವೈ ದೇ॒ವಾ ಅಶ್ವ॒ಸ್ಯಾಙ್ಗಾ॑ನಿ॒ ಸಮ॑ದಧುಃ । ಯತ್ಪ್ರಿ॑ಯಙ್ಗುತಣ್ಡು॒ಲೈ-ರ್ಜು॒ಹೋತಿ॑ । ಅಶ್ವ॑ಸ್ಯೈ॒ವಾಙ್ಗಾ॑ನಿ॒ ಸನ್ದ॑ಧಾತಿ ॥ ದಶಾನ್ನಾ॑ನಿ ಜುಹೋತಿ । ದಶಾ᳚ಖ್ಷರಾ ವಿ॒ರಾಟ್ ।
ವಿ॒ರಾಟ್-ಕೃ॒ಥ್ಸ್ನಸ್ಯಾ॒-ನ್ನಾದ್ಯ॒ಸ್ಯಾ-ವ॑ರುದ್ಧ್ಯೈ ॥ 55 ॥
(ಜು॒ಹೋತಿ॒ - ಮಧು॑ನಾ ಜು॒ಹೋತಿ॒ - ಪೃಥು॑ಕೈರ್ಜು॒ಹೋತಿ॑ - ಕ॒ರಮ್ಬೈ᳚ರ್ಜು॒ಹೋತಿ॒ - ಸಕ್ತು॑ಭಿರ್ಜು॒ಹೋತಿ॑ - ಪ್ರಿಯಙ್ಗುತಣ್ಡು॒ಲೈರ್ಜು॒ಹೋತಿ॑ ಚ॒ತ್ವಾರಿ॑ ಚ) (ಅ. 14)
(ಅ॒ನ್ನ॒ಹೋ॒ಮಾನಾಜ್ಯೇ॑ನಾ॒ಗ್ನೇರ್ಮಧು॑ನಾ ತಣ್ಡು॒ಲೈಃ ಪೃಥು॑ಕೈರ್ಲಾ॒ಜೈಃ ಕ॒ರಮ್ಬೈ᳚ದ್ರ್ಧಾ॒ನಾಭಿ॒-ಸ್ಸಕ್ತು॑ಭಿರ್ಮ॒ಸೂಸ್ಯೈಃ᳚ ಪ್ರಿಯಙ್ಗುತಣ್ಡು॒ಲೈ-ರ್ದಶಾನ್ನಾ॑ನಿ॒ ದ್ವಾದ॑ಶ)
ಅನುವಾಕಂ 15 - ತತ್ಪ್ರಕಾರವಿಶೇಷ
ಪ್ರ॒ಜಾಪ॑ತಿ-ರಶ್ವಮೇ॒ಧಮ॑ಸೃಜತ । ತಗ್ಂ ಸೃ॒ಷ್ಟಗ್ಂ ರಖ್ಷಾಗ್॑ಸ್ಯ ಜಿಘಾಗ್ಂಸನ್ನ್ ।
ಸ ಏ॒ತಾ-ನ್ಪ್ರ॒ಜಾಪ॑ತಿರ್ನಕ್ತಗ್ಂ ಹೋ॒ಮಾನ॑-ಪಶ್ಯತ್ । ತಾನ॑ ಜುಹೋತ್ । ತೈರ್ವೈ ಸ ಯ॒ಜ್ಞಾ-ದ್ರಖ್ಷಾ॒ಗ್॒ಸ್ಯಪಾ॑ಹನ್ನ್ । ಯನ್ನ॑ಕ್ತಗ್ಂ ಹೋ॒ಮಾಞ್ಜು॒ಹೋತಿ॑ । ಯ॒ಜ್ಞಾದೇ॒ವ ತೈರ್ಯಜ॑ಮಾನೋ॒ ರಖ್ಷಾ॒ಗ್॒ಸ್ಯಪ॑ಹನ್ತಿ ॥ ಆಜ್ಯೇ॑ನ ಜುಹೋತಿ ।
ವಜ್ರೋ॒ ವಾ ಆಜ್ಯ᳚ಮ್ । ವಜ್ರೇ॑ಣೈ॒ವ ಯ॒ಜ್ಞಾ-ದ್ರಖ್ಷಾ॒ಗ್॒ಸ್ಯಪ॑ಹನ್ತಿ ॥ 56 ॥
ಆಜ್ಯ॑ಸ್ಯ ಪ್ರತಿ॒ಪದ॑-ಙ್ಕರೋತಿ । ಪ್ರಾ॒ಣೋ ವಾ ಆಜ್ಯ᳚ಮ್ ।
ಮು॒ಖ॒ತ ಏ॒ವಾಸ್ಯ॑ ಪ್ರಾ॒ಣ-ನ್ದ॑ಧಾತಿ ॥ ಅ॒ನ್ನ॒ಹೋ॒ಮಾ-ಞ್ಜು॑ಹೋತಿ । ಶರೀ॑ರವದೇ॒ವಾವ॑ರುನ್ಧೇ ॥ ವ್ಯ॒ತ್ಯಾಸ॑-ಞ್ಜುಹೋತಿ । ಉ॒ಭಯ॒ಸ್ಯಾ ವ॑ರುದ್ಧ್ಯೈ ॥
ನಕ್ತ॑-ಞ್ಜುಹೋತಿ । ರಖ್ಷ॑ಸಾ॒ಮಪ॑ಹತ್ಯೈ ॥ ಆಜ್ಯೇ॑ನಾ-ನ್ತ॒ತೋ ಜು॑ಹೋತಿ ॥ 57 ॥
ಪ್ರಾ॒ಣೋ ವಾ ಆಜ್ಯ᳚ಮ್ । ಉ॒ಭ॒ಯತ॑ ಏ॒ವಾಸ್ಯ॑ ಪ್ರಾ॒ಣ-ನ್ದ॑ಧಾತಿ । ಪು॒ರಸ್ತಾ᳚-ಚ್ಚೋ॒ಪರಿ॑ಷ್ಟಾಚ್ಚ ॥ ಏಕ॑ಸ್ಮೈ॒ ಸ್ವಾಹೇತ್ಯಾ॑ಹ । ಅ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ । ದ್ವಾಭ್ಯಾ॒ಗ್॒ ಸ್ವಾಹೇತ್ಯಾ॑ಹ । ಅ॒ಮುಷ್ಮಿ॑ನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ । ಉ॒ಭಯೋ॑ರೇ॒ವ ಲೋ॒ಕಯಾಃ॒ ಪ್ರತಿ॑ತಿಷ್ಠತಿ । ಅ॒ಸ್ಮಿಗ್ಗ್ಶ್ಚಾ॒-ಮುಷ್ಮಿಗ್ಗ್॑ಶ್ಚ ॥ ಶ॒ತಾಯ॒ ಸ್ವಾಹೇತ್ಯಾ॑ಹ । ಶ॒ತಾಯು॒ರ್ವೈ ಪುರು॑ಷ-ಶ್ಶ॒ತವೀ᳚ರ್ಯಃ । ಆಯು॑ರೇ॒ವ ವೀ॒ರ್ಯ॑ಮವ॑ರುನ್ಧೇ ।
ಸ॒ಹಸ್ರಾ॑ಯ॒ ಸ್ವಾಹೇತ್ಯಾ॑ಹ । ಆಯು॒ರ್ವೈ ಸ॒ಹಸ್ರ᳚ಮ್ । ಆಯು॑ರೇ॒ವಾ-ವ॑ರುನ್ಧೇ ॥
ಸರ್ವ॑ಸ್ಮೈ॒ ಸ್ವಾಹೇತ್ಯಾ॑ಹ । ಅಪ॑ರಿಮಿತಮೇ॒ವಾ ವ॑ರುನ್ಧೇ ॥ 58 ॥
(ಏ॒ವ ಯ॒ಜ್ಞ-ದ್ರಖ್ಷಾ॒ಗ್॒ಸ್ಯಪ॑ಹನ್ - ತ್ಯನ್ತ॒ತೋ ಜು॑ಹೋತಿ - ಶ॒ತಾಯ॒ ಸ್ವಾಹೇತ್ಯಾ॑ಹ ಸಪ್ತ ಚ॑) (ಅ. 15)
ಅನುವಾಕಂ 16 - ವಿವರಣಮೇತಯೋಃ
ಪ್ರ॒ಜಾಪ॑ತಿಂ॒-ವಾಁ ಏ॒ಷ ಈ᳚ಫ್ಸ॒ತೀತ್ಯಾ॑ಹುಃ । ಯೋ᳚-ಽಶ್ವಮೇ॒ಧೇನ॒ ಯಜ॑ತ॒ ಇತಿ॑ ।
ಅಥೋ॑ ಆಹುಃ । ಸರ್ವಾ॑ಣಿ ಭೂ॒ತಾನೀತಿ॑ ॥
ಏಕ॑ಸ್ಮೈ॒ ಸ್ವಾಹೇತ್ಯಾ॑ಹ । ಪ್ರ॒ಜಾಪ॑ತಿ॒ರ್ವಾ ಏಕಃ॑ । ತಮೇ॒ವಾಪ್ನೋ॑ತಿ ॥ ಏಕ॑ಸ್ಮೈ॒ ಸ್ವಾಹಾ॒ ದ್ವಾಭ್ಯಾ॒ಗ್॒ ಸ್ವಾಹೇತ್ಯ॑ಭಿ-ಪೂ॒ರ್ವಮಾಹು॑ತೀ-ರ್ಜುಹೋತಿ ।
ಅ॒ಭಿ॒ಪೂ॒ರ್ವಮೇ॒ವ ಸ॑ವ॒ರ್ಗಂ-ಲೋಁ॒ಕಮೇ॑ತಿ ॥ ಏ॒ಕೋ॒ತ್ತ॒ರ-ಞ್ಜು॑ಹೋತಿ ॥ 59 ॥
ಏ॒ಕ॒ವದೇ॒ವ ಸು॑ವ॒ರ್ಗಂ-ಲೋಁ॒ಕಮೇ॑ತಿ ॥ ಸನ್ತ॑ತ-ಞ್ಜುಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸನ್ತ॑ತ್ಯೈ ॥ ಶ॒ತಾಯ॒ ಸ್ವಾಹೇತ್ಯಾ॑ಹ । ಶ॒ತಾಯು॒ರ್ವೈ ಪುರು॑ಷ-ಶ್ಶ॒ತವೀ᳚ರ್ಯಃ । ಆಯು॑ರೇ॒ವ ವೀ॒ರ್ಯ॑ಮವ॑ರುನ್ಧೇ । ಸ॒ಹಸ್ರಾ॑ಯ॒ ಸ್ವಾಹೇತ್ಯಾ॑ಹ । ಆಯು॒ರ್ವೈ ಸ॒ಹಸ್ರ᳚ಮ್ । ಆಯು॑ರೇ॒ವಾ ವ॑ರುನ್ಧೇ ॥ ಅ॒ಯುತಾ॑ಯ॒ ಸ್ವಾಹಾ॑ ನಿ॒ಯುತಾ॑ಯ॒ ಸ್ವಾಹಾ᳚ ಪ್ರ॒ಯುತಾ॑ಯ॒ ಸ್ವಾಹೇತ್ಯಾ॑ಹ ॥ 60 ॥
ತ್ರಯ॑ ಇ॒ಮೇ ಲೋ॒ಕಾಃ । ಇ॒ಮಾನೇ॒ವ ಲೋ॒ಕಾನವ॑ರುನ್ಧೇ ॥ ಅರ್ಬು॑ದಾಯ॒ ಸ್ವಾಹೇತ್ಯಾ॑ಹ । ವಾಗ್ವಾ ಅರ್ಬು॑ದಮ್ । ವಾಚ॑ಮೇ॒ವಾ ವ॑ರುನ್ಧೇ ॥ ನ್ಯ॑ರ್ಬುದಾಯ॒ ಸ್ವಾಹೇತ್ಯಾ॑ಹ ।
ಯೋ ವೈ ವಾ॒ಚೋ ಭೂ॒ಮಾ । ತನ್ನ್ಯ॑ರ್ಬುದಮ್ ।
ವಾ॒ಚ ಏ॒ವ ಭೂ॒ಮಾನ॒ಮವ॑ರುನ್ಧೇ ॥
ಸ॒ಮು॒ದ್ರಾಯ॒ ಸ್ವಾಹೇತ್ಯಾ॑ಹ ॥ 61 ॥
ಸ॒ಮು॒ದ್ರಮೇ॒ವಾಪ್ನೋ॑ತಿ । ಮದ್ಧ್ಯಾ॑ಯ॒ ಸ್ವಾಹೇತ್ಯಾ॑ಹ । ಮದ್ಧ್ಯ॑ಮೇ॒ವಾಪ್ನೋ॑ತಿ । ಅನ್ತಾ॑ಯ॒ ಸ್ವಾಹೇತ್ಯಾ॑ಹ । ಅನ್ತ॑ಮೇ॒-ವಾಪ್ನೋ॑ತಿ । ಪ॒ರಾ॒ದ್ರ್ಧಾಯ॒ ಸ್ವಾಹೇತ್ಯಾ॑ಹ ।
ಪ॒ರಾ॒ದ್ರ್ಧಮೇ॒ವಾಪ್ನೋ॑ತಿ ॥ ಉ॒ಷಸೇ॒ ಸ್ವಾಹಾ॒ ವ್ಯು॑ಷ್ಟ್ಯೈ॒ ಸ್ವಾಹೇತ್ಯಾ॑ಹ । ರಾತ್ರಿ॒ರ್ವಾ ಉ॒ಷಾಃ ।
ಅಹ॒ರ್ವ್ಯು॑ಷ್ಟಿಃ । ಅ॒ಹೋ॒ರಾ॒ತ್ರೇ ಏ॒ವಾವ॑ರುನ್ಧೇ ।
ಅಥೋ॑ ಅಹೋರಾ॒ತ್ರಯೋ॑ರೇ॒ವ ಪ್ರತಿ॑ತಿಷ್ಠತಿ ॥
ತಾ ಯದು॒ಭಯೀ॒ರ್ದಿವಾ॑ ವಾ॒ ನಕ್ತಂ॑-ವಾಁ ಜುಹು॒ಯಾತ್ । ಅ॒ಹೋ॒ರಾ॒ತ್ರೇ ಮೋ॑ಹಯೇತ್ । ಉ॒ಷಸೇ॒ ಸ್ವಾಹಾ॒ ವ್ಯು॑ಷ್ಟ್ಯೈ॒ ಸ್ವಾಹೋ॑ದೇಷ್ಯ॒ತೇ ಸ್ವಾಹೋ᳚ದ್ಯ॒ತೇ
ಸ್ವಾಹೇತ್ಯನು॑ದಿತೇ ಜುಹೋತಿ । ಉದಿ॑ತಾಯ॒ ಸ್ವಾಹಾ॑ ಸುವ॒ರ್ಗಾಯ॒ ಸ್ವಾಹಾ॑ ಲೋ॒ಕಾಯ॒ ಸ್ವಾಹೇತ್ಯುದಿ॑ತೇ ಜುಹೋತಿ ।
ಅ॒ಹೋ॒ರಾ॒ತ್ರಯೋ॒-ರವ್ಯ॑ತಿಮೋಹಾಯ ॥ 62 ॥
(ಏ॒ಕೋ॒ತ್ತ॒ರ-ಞ್ಜು॑ಹೋತಿ - ಪ್ರ॒ಯುತಾ॑ಯ॒ ಸ್ವಾಹೇತ್ಯಾ॑ಹ - ಸಮು॒ದ್ರಾಯ॒ ಸ್ವಾಹೇತ್ಯಾ॒ಹಾಹ॒--ರ್ ವ್ಯು॑ಷ್ಟಿ-ಸ್ಸ॒ಪ್ತ ಚ॑) (ಅ. 16)
ಅನುವಾಕಂ 17 - ಸಪ್ತಮಕಾಣ್ಡಗತಾನ್ನಹೋಮಾನುವಾಕಾ ವ್ಯಾಖ್ಯಾಯನ್ತೇ
ವಿ॒ಭೂರ್ಮಾ॒ತ್ರಾ ಪ್ರ॒ಭೂಃ ಪಿ॒ತ್ರೇತ್ಯ॑ಶ್ವ-ನಾ॒ಮಾನಿ॑ ಜುಹೋತಿ ।
ಉ॒ಭಯೋ॑ರೇ॒ವೈನಂ॑-ಲೋಁ॒ಕಯೋ᳚-ರ್ನಾಮ॒ಧೇಯ॑-ಙ್ಗಮಯತಿ ॥ ಆಯ॑ನಾಯ॒ ಸ್ವಾಹಾ॒ ಪ್ರಾಯ॑ಣಾಯ॒ ಸ್ವಾಹೇತ್ಯು॑-ದ್ದ್ರಾ॒ವಾಞ್ಜು॑ಹೋತಿ । ಸರ್ವ॑ಮೇ॒ವೈನ॒-ಮಸ್ಕ॑ನ್ನಗ್ಂ ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ ॥
ಅ॒ಗ್ನಯೇ॒ ಸ್ವಾಹಾ॒ ಸೋಮಾ॑ಯ॒ ಸ್ವಾಹೇತಿ॑ ಪೂರ್ವಹಾ॒ಮಾ-ಞ್ಜು॑ಹೋತಿ । ಪೂರ್ವ॑ ಏ॒ವ ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒-ಮತಿ॑ಕ್ರಾಮತಿ ॥
ಪೃ॒ಥಿ॒ವ್ಯೈ ಸ್ವಾಹಾ॒-ಽನ್ತರಿ॑ಖ್ಷಾಯ॒ ಸ್ವಾಹೇತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈತತ್ ॥ ಅ॒ಗ್ನಯೇ॒ ಸ್ವಾಹಾ॒ ಸೋಮಾ॑ಯ॒ ಸ್ವಾಹೇತಿ॑ ಪೂರ್ವದೀ॒ಖ್ಷಾ ಜು॑ಹೋತಿ ।
ಪೂರ್ವ॑ ಏ॒ವ ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒-ಮತಿ॑ಕ್ರಾಮತಿ ॥ 63 ॥
ಪೃ॒ಥಿ॒ವ್ಯೈ ಸ್ವಾಹಾ॒-ಽನ್ತರಿ॑ಖ್ಷಾಯ॒ ಸ್ವಾಹೇತ್ಯೇ॑-ಕವಿ॒ಗ್ಂ॒ಶಿನೀ᳚-ನ್ದೀ॒ಖ್ಷಾ-ಞ್ಜು॑ಹೋತಿ ।
ಏಕ॑ವಿಗ್ಂಶತಿ॒ರ್ವೈ ದೇ॑ವಲೋ॒ಕಾಃ । ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವಃ॑ । ತ್ರಯ॑ ಇ॒ಮೇ ಲೋ॒ಕಾಃ । ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ । ಏ॒ಷ ಸು॑ವ॒ರ್ಗೋ ಲೋ॒ಕಃ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥
ಭುವೋ॑ ದೇ॒ವಾನಾ॒-ಙ್ಕರ್ಮ॒ಣೇತ್ಯೃ॑ತು-ದೀ॒ಖ್ಷಾ ಜು॑ಹೋತಿ ।
ಋ॒ತೂನೇ॒-ವಾಸ್ಮೈ॑ ಕಲ್ಪಯತಿ ॥ ಅ॒ಗ್ನಯೇ॒ ಸ್ವಾಹಾ॑ ವಾ॒ಯವೇ॒ ಸ್ವಾಹೇತಿ॑ ಜುಹೋ॒ತ್ಯ-ನ॑ನ್ತರಿತ್ಯೈ ॥ 64 ॥
ಅ॒ರ್ವಾಂಯಁ॒ಜ್ಞ-ಸ್ಸಙ್ಕ್ರಾ॑ಮ॒ತ್ವಿ-ತ್ಯಾಪ್ತೀ᳚-ರ್ಜುಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯಾಪ್ತ್ಯೈ᳚ ॥ ಭೂ॒ತ-ಮ್ಭವ್ಯ॑-ಮ್ಭವಿ॒ಷ್ಯದಿತಿ॒ ಪರ್ಯಾ᳚ಪ್ತೀ-ರ್ಜುಹೋತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಪರ್ಯಾ᳚ಪ್ತ್ಯೈ ॥
ಆ ಮೇ॑ ಗೃ॒ಹಾ ಭ॑ವ॒ನ್ತ್ವಿತ್ಯಾ॒ಭೂ-ರ್ಜು॑ಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ ಭೂ᳚ತ್ಯೈ ॥
ಅ॒ಗ್ನಿನಾ॒ ತಪೋ-ಽನ್ವ॑ಭವ॒ದಿತ್ಯ॑ನು॒ಭೂ-ರ್ಜು॑ಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯಾನು॑ಭೂತ್ಯೈ ॥
ಸ್ವಾಹಾ॒-ಽಽಧಿಮಾಧೀ॑ತಾಯ॒ ಸ್ವಾಹೇತಿ॒ ಸಮ॑ಸ್ತಾನಿ ವೈಶ್ವದೇ॒ವಾನಿ॑ ಜುಹೋತಿ । ಸಮ॑ಸ್ತಮೇ॒ವ ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒-ಮತಿ॑ಕ್ರಾಮತಿ ॥ 65 ॥
ದ॒ದ್ಭ್ಯ-ಸ್ಸ್ವಾಹಾ॒ ಹನೂ᳚ಭ್ಯಾ॒ಗ್॒ ಸ್ವಾಹೇತ್ಯ॑ಙ್ಗಹೋ॒ಮಾ-ಞ್ಜು॑ಹೋತಿ ।
ಅಙ್ಗೇ॑ ಅಙ್ಗೇ॒ ವೈ ಪುರು॑ಷಸ್ಯ ಪಾ॒ಪ್ಮೋಪ॑ಶ್ಲಿಷ್ಟಃ ।
ಅಙ್ಗಾ॑ದಙ್ಗಾ ದೇ॒ವೈನ॑-ಮ್ಪಾ॒ಪ್ಮನ॒ಸ್ತೇನ॑ ಮುಞ್ಚತಿ ॥ ಅ॒ಞ್ಜ್ಯೇ॒ತಾಯ॒ ಸ್ವಾಹಾ॑ ಕೃ॒ಷ್ಣಾಯ॒ ಸ್ವಾಹಾ᳚ ಶ್ವೇ॒ತಾಯ॒ ಸ್ವಾಹೇತ್ಯ॑-ಶ್ವರೂ॒ಪಾಣಿ॑ ಜುಹೋತಿ ।
ರೂ॒ಪೈರೇ॒ವೈನ॒ಗ್ಂ॒ ಸಮ॑ದ್ರ್ಧಯತಿ ॥
ಓಷ॑ಧೀಭ್ಯ॒-ಸ್ಸ್ವಾಹಾ॒ ಮೂಲೇ᳚ಭ್ಯ॒-ಸ್ಸ್ವಾಹೇತ್ಯೋ॑ಷಧಿ ಹೋ॒ಮಾಞ್ಜು॑ಹೋತಿ । ದ್ವ॒ಯ್ಯೋ ವಾ ಓಷ॑ಧಯಃ । ಪುಷ್ಪೇ᳚ಭ್ಯೋ॒-ಽನ್ಯಾಃ ಫಲ॑-ಙ್ಗೃ॒ಹ್ಣನ್ತಿ॑ ।
ಮೂಲೇ᳚ಭ್ಯೋ॒-ಽನ್ಯಾಃ । ತಾ ಏ॒ವೋಭಯೀ॒ರವ॑ರುನ್ಧೇ ॥ 66 ॥
ವನ॒ಸ್ಪತಿ॑ಭ್ಯ॒-ಸ್ಸ್ವಾಹೇತಿ॑ ವನಸ್ಪತಿ-ಹೋ॒ಮಾಞ್ಜು॑ಹೋತಿ ।
ಆ॒ರ॒ಣ್ಯಸ್ಯಾ॒ನ್ನಾದ್ಯ॒ಸ್ಯಾವ॑ರುದ್ಧ್ಯೈ ॥
ಮೇ॒ಷಸ್ತ್ವಾ॑ ಪಚ॒ತೈ-ರ॑ವ॒ತ್ವಿತ್ಯ-ಪಾ᳚ವ್ಯಾನಿ ಜುಹೋತಿ ।
ಪ್ರಾ॒ಣಾ ವೈ ದೇ॒ವಾ ಅಪಾ᳚ವ್ಯಾಃ । ಪ್ರಾ॒ಣಾನೇ॒ವಾವ॑ರುನ್ಧೇ ॥ ಕೂಪ್ಯಾ᳚ಭ್ಯ॒-ಸ್ಸ್ವಾಹಾ॒-ಽದ್ಭ್ಯ-ಸ್ಸ್ವಾಹೇತ್ಯ॒ಪಾಗ್ಂ ಹೋಮಾ᳚ಞ್ಜುಹೋತಿ । ಅ॒ಫ್ಸು ವಾ ಆಪಃ॑ । ಅನ್ನಂ॒-ವಾಁ ಆಪಃ॑ । ಅ॒ದ್ಭ್ಯೋ ವಾ ಅನ್ನ॑-ಞ್ಜಾಯತೇ । ಯದೇ॒ವಾದ್ಭ್ಯೋ-ಽನ್ನ॒-ಞ್ಜಾಯ॑ತೇ । ತದವ॑ರುನ್ಧೇ ॥ 67 ॥
(ಪೂ॒ರ್ವ॒ದೀ॒ಖ್ಷಾ ಜು॑ಹೋತಿ॒ ಪೂರ್ವ॑ ಏ॒ವ ದ್ವಿ॒ಷನ್ತ॒-ಮ್ಭ್ರಾತೃ॑ವ್ಯ॒ಮತಿ॑ಕ್ರಾಮ॒ - ತ್ಯನ॑ನ್ತರಿತ್ಯೈ - ಕ್ರಾಮತಿ - ರುನ್ಧೇ॒ - ಜಾಯ॑ತ॒ ಏಕ॑-ಞ್ಚ) (ಅ. 17)
ಅನುವಾಕಂ 18 - ಸಪ್ತಮಕಾಣ್ಡಗತಾನ್ನಹೋಮಾನುವಾಕಾ ವ್ಯಾಖ್ಯಾಯನ್ತೇ
ಅಮ್ಭಾಗ್ಂ॑ಸಿ ಜುಹೋತಿ । ಅ॒ಯಂ-ವೈಁ ಲೋ॒ಕೋ-ಽಮ್ಭಾಗ್ಂ॑ಸಿ ।
ತಸ್ಯ॒ ವಸ॒ವೋ-ಽಧಿ॑ಪತಯಃ । ಅ॒ಗ್ನಿರ್ಜ್ಯೋತಿಃ॑ । ಯದಮ್ಭಾಗ್ಂ॑ಸಿ ಜು॒ಹೋತಿ॑ ।
ಇ॒ಮಮೇ॒ವ ಲೋ॒ಕಮವ॑ರುನ್ಧೇ । ವಸೂ॑ನಾ॒ಗ್ಂ॒ ಸಾಯು॑ಜ್ಯ-ಙ್ಗಚ್ಛತಿ । ಅ॒ಗ್ನಿ-ಞ್ಜ್ಯೋತಿ॒ರವ॑ರುನ್ಧೇ ॥ ನಭಾಗ್ಂ॑ಸಿ ಜುಹೋತಿ । ಅ॒ನ್ತರಿ॑ಖ್ಷಂ-ವೈಁ ನಭಾಗ್ಂ॑ಸಿ ॥ 68 ॥
ತಸ್ಯ॑ ರು॒ದ್ರಾ ಅಧಿ॑ಪತಯಃ । ವಾ॒ಯುರ್ಜ್ಯೋತಿಃ॑ । ಯನ್ನಭಾಗ್ಂ॑ಸಿ ಜು॒ಹೋತಿ॑ । ಅ॒ನ್ತರಿ॑ಖ್ಷಮೇ॒ವಾ-ವ॑ರುನ್ಧೇ । ರು॒ದ್ರಾಣಾ॒ಗ್ಂ॒ ಸಾಯು॑ಜ್ಯ-ಙ್ಗಚ್ಛತಿ ।
ವಾ॒ಯು-ಞ್ಜ್ಯೋತಿ॒ರವ॑ರುನ್ಧೇ । ಮಹಾಗ್ಂ॑ಸಿ ಜುಹೋತಿ । ಅ॒ಸೌ ವೈ ಲೋ॒ಕೋ ಮಹಾಗ್ಂ॑ಸಿ । ತಸ್ಯಾ॑ದಿ॒ತ್ಯಾ ಅಧಿ॑ಪತಯಃ। ಸೂರ್ಯೋ॒ ಜ್ಯೋತಿಃ॑ ॥ 69 ॥
ಯನ್ಮಹಾಗ್ಂ॑ಸಿ ಜು॒ಹೋತಿ॑ । ಅ॒ಮುಮೇ॒ವ ಲೋ॒ಕಮವ॑ರುನ್ಧೇ । ಆ॒ದಿ॒ತ್ಯಾನಾ॒ಗ್ಂ॒ ಸಾಯು॑ಜ್ಯ-ಙ್ಗಚ್ಛತಿ । ಸೂರ್ಯ॒-ಞ್ಜ್ಯೋತಿ॒ರವ॑ರುನ್ಧೇ ॥
ನಮೋ॒ ರಾಜ್ಞ॒ ನಮೋ॒ ವರು॑ಣಾ॒ಯೇತಿ॑ ಯ॒ವ್ಯಾನಿ॑ ಜುಹೋತಿ ।
ಅ॒ನ್ನಾದ್ಯ॒ಸ್ಯಾವ॑ರುದ್ಧ್ಯೈ ॥ ಮ॒ಯೋ॒ಭೂರ್ವಾತೋ॑ ಅ॒ಭಿ ವಾ॑ತೂ॒ಸ್ರಾ ಇತಿ॑ ಗ॒ವ್ಯಾನಿ॑ ಜುಹೋತಿ ।
ಪ॒ಶೂ॒ನಾಮವ॑ರುದ್ಧ್ಯೈ ॥
ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹೇತಿ॑ ಸನ್ತತಿ-ಹೋ॒ಮಾಞ್ಜು॑ಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸನ್ತ॑ತ್ಯೈ ॥ 70 ॥
ಸಿ॒ತಾಯ॒ ಸ್ವಾಹಾ-ಽಸಿ॑ತಾಯ॒ ಸ್ವಾಹೇತಿ॒ ಪ್ರಮು॑ಕ್ತೀ-ರ್ಜುಹೋತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಪ್ರಮು॑ಕ್ತ್ಯೈ ॥ ಪೃ॒ಥಿ॒ವ್ಯೈ ಸ್ವಾಹಾ॒-ಽನ್ತರಿ॑ಖ್ಷಾಯ॒ ಸ್ವಾಹೇತ್ಯಾ॑ಹ ।
ಯ॒ಥಾ॒ ಯ॒ಜುರೇ॒ವೈತತ್ ॥
ದ॒ತ್ತ್ವತೇ॒ ಸ್ವಾಹಾ॑-ಽದ॒ನ್ತಕಾ॑ಯ॒ ಸ್ವಾಹೇತಿ॑ ಶರೀರ-ಹೋ॒ಮಾಞ್ಜು॑ಹೋತಿ । ಪಿ॒ತೃ॒ಲೋ॒ಕಮೇ॒ವ ತೈರ್ಯಜ॑ಮಾ॒ನೋ-ಽವ॑ರುನ್ಧೇ ॥ ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॑ ಯುನ॒ಕ್ತ್ವಿತಿ॑ ಪರಿ॒ಧೀನ್. ಯು॑ನಕ್ತಿ । ಇ॒ಮೇ ವೈ ಲೋ॒ಕಾಃ ಪ॑ರಿ॒ಧಯಃ॑ । ಇ॒ಮಾನೇ॒ವಾಸ್ಮೈ॑ ಲೋ॒ಕಾನ್. ಯು॑ನಕ್ತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 71 ॥
ಯಃ ಪ್ರಾ॑ಣ॒ತೋ ಯ ಆ᳚ತ್ಮ॒ದಾ ಇತಿ॑ ಮಹಿ॒ಮಾನೌ॑ ಜುಹೋತಿ ।
ಸು॒ವ॒ರ್ಗೋ ವೈ ಲೋ॒ಕೋ ಮಹಃ॑ । ಸು॒ವ॒ರ್ಗಮೇ॒ವ ತಾಭ್ಯಾಂ᳚-ಲೋಁ॒ಕಂ-ಯಁಜ॑ಮಾ॒ನೋ-ಽವ॑ರುನ್ಧೇ ॥
ಆ ಬ್ರಹ್ಮ॑-ನ್ಬ್ರಾಹ್ಮ॒ಣೋ ಬ್ರ॑ಹ್ಮವಚ॒ರ್ಸೀ ಜಾ॑ಯತಾ॒ಮಿತಿ॒ ಸಮ॑ಸ್ತಾನಿ ಬ್ರಹ್ಮವರ್ಚ॒ಸಾನಿ॑ ಜುಹೋತಿ ।
ಬ್ರ॒ಹ್ಮ॒ವ॒ರ್ಚ॒ಸಮೇ॒ವ ತೈರ್ಯಜ॑ಮಾ॒ನೋ
-ಽವ॑ರುನ್ಧೇ ॥ ಜಜ್ಞಿ॒ ಬೀಜ॒ಮಿತಿ॑ ಜುಹೋ॒ತ್ಯ-ನ॑ನ್ತರಿತ್ಯೈ ॥
ಅ॒ಗ್ನಯೇ॒ ಸಮ॑ನಮ-ತ್ಪೃಥಿ॒ವ್ಯೈ ಸಮನ॑ಮ॒ದಿತಿ॑ ಸನ್ನತಿ ಹೋ॒ಮಾಞ್ಜು॑ಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸನ್ನ॑ತ್ಯೈ ॥ ಭೂ॒ತಾಯ॒ ಸ್ವಾಹಾ॑ ಭವಿಷ್ಯ॒ತೇ ಸ್ವಾಹೇತಿ॑ ಭೂತಾಭ॒ವ್ಯೌ ಹೋಮೌ॑ ಜುಹೋತಿ ।
ಅ॒ಯಂ-ವೈಁ ಲೋ॒ಕೋ ಭೂ॒ತಮ್ ॥ 72 ॥
ಅಸೌ ಭ॑ವಿ॒ಷ್ಯತ್ । ಅ॒ನಯೋ॑ರೇ॒ವ ಲೋ॒ಕಯೋಃ॒ ಪ್ರತಿ॑ತಿಷ್ಠತಿ । ಸರ್ವ॒ಸ್ಯಾಪ್ತ್ಯೈ᳚ । ಸರ್ವ॒ಸ್ಯಾವ॑ರುದ್ಧ್ಯೈ ॥ ಯದಕ್ರ॑ನ್ದಃ ಪ್ರಥ॒ಮ-ಞ್ಜಾಯ॑ಮಾನ॒ ಇತ್ಯ॑ಶ್ವಸ್ತೋ॒ಮೀಯ॑-ಞ್ಜುಹೋತಿ । ಸರ್ವ॒ಸ್ಯಾಪ್ತ್ಯೈ᳚ । ಸರ್ವ॑ಸ್ಯ॒ ಜಿತ್ಯೈ᳚ ॥ ಸರ್ವ॑ಮೇ॒ವ ತೇನಾ᳚ಪ್ನೋತಿ ।
ಸರ್ವ॑-ಞ್ಜಯತಿ । ಯೋ᳚-ಽಶ್ವಮೇ॒ಧೇನ॒ ಯಜ॑ತೇ ॥ 73 ॥
ಯ ಉ॑ ಚೈನಮೇ॒ವಂ-ವೇಁದ॑ ॥ ಯ॒ಜ್ಞಗ್ಂ ರಖ್ಷಾಗ್॑ಸ್ಯ ಜಿಘಾಗ್ಂಸನ್ನ್ । ಸ ಏ॒ತಾ-ನ್ಪ್ರ॒ಜಾಪ॑ತಿ-ರ್ನಕ್ತಗ್ಂ ಹೋ॒ಮಾನ॑ಪಶ್ಯತ್ । ತಾನ॑ಜುಹೋತ್ ।
ತೈರ್ವೈ ಸ ಯ॒ಜ್ಞಾದ್ರಖ್ಷಾ॒ಗ್॒ಸ್ಯಪಾ॑ಹನ್ನ್ । ಯನ್ನ॑ಕ್ತಗ್ಂ ಹೋ॒ಮಾಞ್ಜು॒ಹೋತಿ॑ ।
ಯ॒ಜ್ಞಾದೇ॒ವ ತೈರ್ಯಜ॑ಮಾನೋ॒
ರಖ್ಷಾ॒ಗ್॒ಸ್ಯಪ॑ಹನ್ತಿ ॥ ಉ॒ಷಸೇ॒ ಸ್ವಾಹಾ॒ ವ್ಯು॑ಷ್ಟ್ಯೈ॒ ಸ್ವಾಹೇತ್ಯ॑ನ್ತ॒ತೋ ಜು॑ಹೋತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 74 ॥
(ವೈ ನಭಾಗ್ಂ॑ಸಿ॒ - ಸೂರ್ಯೋ॒ ಜ್ಯೋತಿಃ॒ - ಸನ್ತ॑ತ್ಯೈ॒ - ಸಮ॑ಷ್ಟ್ಯೈ - ಭು॒ತಮ್ - ಁಯಜ॑ತೇ॒ - +ನವ॑ ಚ) (ಅ. 18)
ಅನುವಾಕಂ 19 - ಔಪಸಥ್ಯದಿನೇ ಯೂಪಪ್ರಯೋಗಾಃ
ಏ॒ಕ॒ಯೂ॒ಪೋ ವೈ॑ಕಾದ॒ಶಿನೀ॑ ವಾ । ಅ॒ನ್ಯೇಷಾಂ᳚-ಯಁ॒ಜ್ಞಾನಾಂ॒-ಯೂಁಪಾ॑ ಭವನ್ತಿ ।
ಏ॒ಕ॒ವಿ॒ಶಿನ್ಯ॑-ಶ್ವಮೇ॒ಧಸ್ಯ॑ । ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ॒-ಭಿಜಿ॑ತ್ಯೈ ॥ ಬೈ॒ಲ॒.ವೋ ವಾ॑ ಖಾದಿ॒ರೋ ವಾ॑ ಪಾಲಾ॒ಶೋ ವಾ᳚ । ಅ॒ನ್ಯೇಷಾಂ᳚-ಯಁಜ್ಞಕ್ರತೂ॒ನಾಂ-ಯೂಁಪಾ॑ ಭವನ್ತಿ । ರಾಜ್ಜು॑ದಾಲ॒ ಏಕ॑ವಿಗ್ಂಶತ್ಯ-ರತ್ನಿರಶ್ವಮೇ॒ಧಸ್ಯ॑ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ನಾನ್ಯೇಷಾ᳚-ಮ್ಪಶೂ॒ನಾ-ನ್ತೇ॑ಜ॒ನ್ಯಾ ಅ॑ವ॒ದ್ಯನ್ತಿ॑ । ಅವ॑ದ್ಯ॒ನ್ತ್ಯಶ್ವ॑ಸ್ಯ ॥ 75 ॥
ಪಾ॒ಪ್ಮಾ ವೈ ತೇ॑ಜ॒ನೀ । ಪಾ॒ಪ್ಮನೋ-ಽಪ॑ಹತ್ಯೈ ॥
ಪ್ಲ॒ಖ್ಷ॒ಶಾ॒ಖಾಯಾ॑ಮ॒ನ್ಯೇಷಾ᳚-ಮ್ಪಶೂ॒ನಾಮ॑ವ॒ದ್ಯನ್ತಿ॑ । ವೇ॒ತ॒ಸ॒-ಶಾ॒ಖಾಯಾ॒-ಮಶ್ವ॑ಸ್ಯ । ಅ॒ಫ್ಸುಯೋ॑ನಿ॒ರ್ವಾ ಅಶ್ವಃ॑ । ಅ॒ಫ್ಸು॒ಜೋ ವೇ॑ತ॒ಸಃ । ಸ್ವ ಏ॒ವಾಸ್ಯ॒ ಯೋನಾ॒ವ-ವ॑ದ್ಯತಿ ॥
ಯೂಪೇ॑ಷು ಗ್ರಾ॒ಮ್ಯಾ-ನ್ಪ॒ಶೂನ್ನಿ॑-ಯು॒ಞ್ಜನ್ತಿ॑ । ಆ॒ರೋ॒ಕೇಷ್ವಾ॑-ರ॒ಣ್ಯಾನ್ಧಾ॑ರಯನ್ತಿ ।
ಪ॒ಶೂ॒ನಾಂ-ವ್ಯಾಁವೃ॑ತ್ತ್ಯೈ ॥ ಆ ಗ್ರಾ॒ಮ್ಯಾ-ನ್ಪ॒ಶೂನ್-ಁಲಭ॑ನ್ತೇ । ಪ್ರಾರ॒ಣ್ಯಾನ್ಥ್ಸೃ॑ಜನ್ತಿ । ಪಾ॒ಪ್ಮನೋ-ಽಪ॑ಹತ್ಯೈ ॥ 76 ॥
(ಅಶ್ವ॑ಸ್ಯ॒ - ವ್ಯಾವೃ॑ತ್ತ್ಯ॒ ತ್ರೀಣಿ॑ ಚ) (ಅ. 19)
ಅನುವಾಕಂ 20 - ಯೂಪಾನಾಂ ಸ್ಥಾನಾದಯಃ
ರಾಜ್ಜು॑ದಾಲ-ಮಗ್ನಿ॒ಷ್ಠ-ಮ್ಮಿ॑ನೋತಿ । ಭ್ರೂ॒ಣ॒ಹ॒ತ್ಯಾಯಾ॒ ಅಪ॑ಹತ್ಯೈ ॥ ಪೌತು॑ದ್ರವಾವ॒ಭಿತೋ॑ ಭವತಃ । ಪುಣ್ಯ॑ಸ್ಯ ಗ॒ನ್ಧಸ್ಯಾವ॑ರುದ್ಧ್ಯೈ ।
ಭ್ರೂ॒ಣ॒ಹ॒ತ್ಯಾ-ಮೇ॒ವಾಸ್ಮಾ॑-ದಪ॒ಹತ್ಯ॑ । ಪುಣ್ಯೇ॑ನ ಗ॒ನ್ಧೇನೋ॑ಭ॒ಯತಃ॒ ಪರಿ॑ಗೃಹ್ಣಾತಿ ॥
ಷಡ್ಬೈ॒ಲ್॒.ವಾ ಭ॑ವನ್ತಿ । ಬ್ರ॒ಹ್ಮ॒ವ॒ರ್ಚ॒ಸಸ್ಯಾ-ವ॑ರುದ್ಧ್ಯೈ ॥ ಷಟ್ಖಾ॑ದಿ॒ರಾಃ ।
ತೇಜ॒ಸೋ-ಽವ॑ರುದ್ಧ್ಯೈ ॥ 77 ॥
ಷಟ್ಪಾ॑ಲಾ॒ಶಾಃ । ಸೋ॒ಮ॒ಪೀ॒ಥಸ್ಯಾ-ವ॑ರುದ್ಧ್ಯೈ ॥ ಏಕ॑ವಿಗ್ಂಶತಿ॒-ಸ್ಸಮ್ಪ॑ದ್ಯನ್ತೇ ।
ಏಕ॑ವಿಗ್ಂಶತಿ॒ರ್ವೈ ದೇ॑ವಲೋ॒ಕಾಃ । ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವಃ॑ । ತ್ರಯ॑ ಇ॒ಮೇ ಲೋ॒ಕಾಃ । ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ । ಏ॒ಷ ಸು॑ವ॒ರ್ಗೋ ಲೋ॒ಕಃ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ಶ॒ತ-ಮ್ಪ॒ಶವೋ॑ ಭವನ್ತಿ ॥ 78 ॥
ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠತಿ ॥
ಸರ್ವಂ॒-ವಾಁ ಅ॑ಶ್ವಮೇ॒ದ್ಧ್ಯಾಪ್ನೋ॑ತಿ । ಅಪ॑ರಿಮಿತಾ ಭವನ್ತಿ । ಅಪ॑ರಿಮಿತ॒ಸ್ಯಾ-ವ॑ರುದ್ಧ್ಯೈ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಕಸ್ಮಾ᳚ಥ್ಸ॒ತ್ಯಾತ್ ।
ದ॒ಖ್ಷಿ॒ಣ॒ತೋ᳚-ಽನ್ಯೇಷಾ᳚-ಮ್ಪಶೂ॒ನಾಮ॑ವ॒ದ್ಯನ್ತಿ॑ । ಉ॒ತ್ತ॒ರ॒ತೋ-ಽಶ್ವ॒ಸ್ಯೇತಿ॑ । ವಾ॒ರು॒ಣೋ ವಾ ಅಶ್ವಃ॑ ॥ 79 ॥
ಏ॒ಷಾ ವೈ ವರು॑ಣಸ್ಯ॒ ದಿಕ್ । ಸ್ವಾಯಾ॑ಮೇ॒ವಾಸ್ಯ॑ ದಿ॒ಶ್ಯವ॑ದ್ಯತಿ । ಯದಿತ॑ರೇಷಾ-ಮ್ಪಶೂ॒ನಾಮ॑ವ॒ದ್ಯತಿ॑ । ಶ॒ತ॒ದೇ॒ವ॒ತ್ಯ॑-ನ್ತೇನಾವ॑ರುನ್ಧೇ ॥
ಚಿ॒ತೇ᳚-ಽಗ್ನಾ-ವಧಿ॑ವೈತ॒ಸೇ ಕಟೇ-ಽಶ್ವ॑-ಞ್ಚಿನೋತಿ ।
ಅ॒ಫ್ಸು-ಯೋ॑ನಿ॒ರ್ವಾ ಅಶ್ವಃ॑ ।
ಅ॒ಫ್ಸು॒ಜೋ ವೇ॑ತ॒ಸಃ । ಸ್ವ ಏ॒ವೈನಂ॒-ಯೋಁನೌ॒ ಪ್ರತಿ॑ಷ್ಠಾಪಯತಿ ॥ ಪು॒ರಸ್ತಾ᳚-ತ್ಪ್ರ॒ತ್ಯಞ್ಚ॑-ನ್ತೂಪ॒ರ-ಞ್ಚಿ॑ನೋತಿ । ಪ॒ಶ್ಚಾತ್ಪ್ರಾ॒ಚೀನ॑-ಙ್ಗೋಮೃ॒ಗಮ್ ॥ 80 ॥
ಪ್ರಾ॒ಣಾ॒ಪಾ॒ನಾ-ವೇ॒ವಾಸ್ಮಿನ᳚ ಥ್ಸ॒ಮ್ಯಞ್ಚೌ॑ ದಧಾತಿ ॥
ಅಶ್ವ॑-ನ್ತೂಪ॒ರ-ಙ್ಗೋ॑ಮೃ॒ಗಮಿತಿ॑ ಸರ್ವ॒ಹುತ॑ ಏ॒ತಾಞ್ಜು॑ಹೋತಿ । ಏ॒ಷಾಂ-ಲೋಁ॒ಕಾನಾ॑-ಮ॒ಭಿಜಿ॑ತ್ಯೈ ॥ ಆ॒ತ್ಮನಾ॒-ಽಭಿಜು॑ಹೋತಿ । ಸಾತ್ಮಾ॑ನಮೇ॒ವೈನ॒ಗ್ಂ॒ ಸತ॑ನು-ಙ್ಕರೋತಿ ॥ ಸಾತ್ಮಾ॒-ಽಮುಷ್ಮಿ॑ನ್ ಁಲಾ॒ಕೇ ಭ॑ವತಿ ।
ಯ ಏ॒ವಂ-ವೇಁದ॑ । ಅಥೋ॒ ವಸೋ॑ರೇ॒ವ ಧಾರಾ॒-ನ್ತೇನಾವ॑ರುನ್ಧೇ ॥ ಇ॒ಲು॒ವರ್ದಾ॑ಯ॒ ಸ್ವಾಹಾ॑ ಬಲಿ॒ವರ್ದಾ॑ಯ॒ ಸ್ವಾಹೇತ್ಯಾ॑ಹ । ಸಂ॒ವಁ॒ಥ್ಸ॒ರೋ ವಾ ಇ॑ಲು॒ವರ್ದಃ॑ ।
ಪ॒ರಿ॒ವ॒ಥ್ಸ॒ರೋ ಬ॑ಲಿ॒ವರ್ದಃ॑ । ಸಂ॒ವಁ॒ಥ್ಸ॒ರಾದೇ॒ವ ಪ॑ರಿವಥ್ಸ॒ರಾದಾಯು॒ರ ವ॑ರುನ್ಧೇ । ಆಯು॑ರೇ॒ವಾಸ್ಮಿ॑ನ್-ದಧಾತಿ ।
ತಸ್ಮಾ॑ದಶ್ವ-ಮೇಧಯಾ॒ಜೀ ಜ॒ರಸಾ॑ ವಿ॒ಸ್ರಸಾ॒-ಽಮುಂ-ಲೋಁ॒ಕಮೇ॑ತಿ ॥ 81 ॥
(ತೇಜ॒ಸೋ-ಽವ॑ರುದ್ಧೈ - ಭವ॒ನ್ - ತ್ಯಶ್ವೋ॑ - ಗೋಮೃ॒ಗ - ಮಿ॑ಲು॒ವರ್ದ॑ ಶ್ಚ॒ತ್ವಾರಿ॑ ಚ) (ಅ. 20)
ಅನುವಾಕಂ 21 - ಚೇತವ್ಯಾಗ್ನಯಾದೇರ್ವಿಶೇಷಃ
ಏ॒ಕ॒ವಿ॒ಗ್ಂ॒ಶೋ᳚-ಽಗ್ನಿರ್ಭ॑ವತಿ । ಏ॒ಕ॒ವಿ॒ಗ್ಂ॒ಶ-ಸ್ಸ್ತೋಮಃ॑ । ಏಕ॑ವಿಗ್ಂಶತಿ॒ರ್ಯೂಪಾಃ᳚ ॥
ಯಥಾ॒ ವಾ ಅಶ್ವಾ॑ ವರ್ರ್ಷ॒ಭಾ ವಾ॒ ವೃಷಾ॑ಣ-ಸ್ಸಗ್ಗ್ಸ್ಫು॒ರೇರನ್ನ್॑ । ಏ॒ವಮೇ॒ತಥ್ಸ್ತೋಮಾ॒-ಸ್ಸಗ್ಗ್ಸ್ಫು॑ರನ್ತೇ । ಯದೇ॑ಕವಿ॒ಗ್ಂ॒ಶಾಃ । ತೇ ಯಥ್ಸ॑ಮೃ॒ಚ್ಛೇರನ್ನ್॑ । ಹ॒ನ್ಯೇತಾ᳚ಸ್ಯ ಯ॒ಜ್ಞಃ ॥ ದ್ವಾ॒ದ॒ಶ ಏ॒ವಾಗ್ನಿ-ಸ್ಸ್ಯಾ॒ದಿತ್ಯಾ॑ಹುಃ ।
ದ್ವಾ॒ದ॒ಶ-ಸ್ಸ್ತೋಮಃ॑ ॥ 82 ॥
ಏಕಾ॑ದಶ॒ ಯೂಪಾಃ᳚ ॥ ಯದ್ದ್ವಾ॑ದ॒ಶೋ᳚-ಽಗ್ನಿರ್ಭವ॑ತಿ । ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರಃ ।
ಸಂ॒ವಁ॒ಥ್ಸ॒ರೇಣೈ॒ವಾಸ್ಮಾ॒ ಅನ್ನ॒ಮವ॑ರುನ್ಧೇ ॥ ಯದ್ದಶ॒ ಯೂಪಾ॒ ಭವ॑ನ್ತಿ । ದಶಾ᳚ಖ್ಷರಾ ವಿ॒ರಾಟ್ । ಅನ್ನಂ॑-ವಿಁ॒ರಾಟ್ । ವಿ॒ರಾಜೈ॒ವಾನ್ನಾದ್ಯ॒-ಮವ॑ರುನ್ಧೇ ।
ಯ ಏ॑ಕಾದ॒ಶಃ । ಸ್ತನ॑ ಏ॒ವಾಸ್ಯೈ॒ ಸಃ ॥ 83 ॥
ದು॒ಹ ಏ॒ವೈನಾ॒-ನ್ತೇನ॑ ॥ ತದಾ॑ಹುಃ ।
ಯದ್ದ್ವಾ॑ದ॒ಶೋ᳚-ಽಗ್ನಿ-ಸ್ಸ್ಯಾ᳚ದ್ದ್ವಾದ॒ಶ-ಸ್ಸ್ತೋಮ॒ ಏಕಾ॑ದಶ॒ ಯೂಪಾಃ᳚ । ಯಥಾ॒ ಸ್ಥೂರಿ॑ಣಾ ಯಾ॒ಯಾತ್ । ತಾ॒ದೃಕ್ತತ್ ॥ ಏ॒ಕ॒ವಿ॒ಗ್ಂ॒ಶ ಏ॒ವಾಗ್ನಿಃ
ಸ್ಯಾ॒ದಿತ್ಯಾ॑ಹುಃ । ಏ॒ಕ॒ವಿ॒ಗ್ಂ॒ಶ-ಸ್ಸ್ತೋಮಃ॑ ।
ಏಕ॑ವಿಗ್ಂಶತಿ॒ರ್ಯೂಪಾಃ᳚ । ಯಥಾ॒ ಪ್ರಷ್ಟಿ॑ಭಿ॒ರ್ಯಾತಿ॑ ।
ತಾ॒ದೃಗೇ॒ವ ತತ್ ॥ 84 ॥
ಯೋ ವಾ ಅ॑ಶ್ವಮೇ॒ಧೇ ತಿ॒ಸ್ರಃ ಕ॒ಕುಭೋ॒ ವೇದ॑ । ಕ॒ಕುದ್ಧ॒ ರಾಜ್ಞಾ᳚-ಮ್ಭವತಿ ।
ಏ॒ಕ॒ವಿ॒ಗ್ಂ॒ಶೋ᳚-ಽಗ್ನಿರ್ಭ॑ವತಿ । ಏ॒ಕ॒ವಿ॒ಗ್ಂ॒ಶ-ಸ್ಸ್ತೋಮಃ॑ । ಏಕ॑ವಿಗ್ಂಶತಿ॒ರ್ಯೂಪಾಃ᳚ ।
ಏ॒ತಾ ವಾ ಅ॑ಶ್ವಮ॒ಧೇ ತಿ॒ಸ್ರಃ ಕ॒ಕುಭಃ॑ ।
ಯ ಏ॒ವಂ-ವೇಁದ॑ । ಕ॒ಕುದ್ಧ॒ ರಾಜ್ಞಾ᳚-ಮ್ಭವತಿ ॥
ಯೋ ವಾ ಅ॑ಶ್ವಮೇ॒ಧೇ ತ್ರೀಣಿ॑ ಶೀ॒ರ್॒ಷಾಣಿ॒ ವೇದ॑ ।
ಶಿರೋ॑ ಹ॒ ರಾಜ್ಞಾ᳚-ಮ್ಭವತಿ ।
ಏ॒ಕ॒ವಿ॒ಗ್ಂ॒ಶೋ᳚-ಽಗ್ನಿರ್ಭ॑ವತಿ । ಏ॒ಕ॒ವಿ॒ಗ್ಂ॒ಶ-ಸ್ಸ್ತೋಮಃ॑ । ಏಕ॑ವಿಗ್ಂಶತಿ॒ರ್ಯೂಪಾಃ᳚ ।
ಏ॒ತಾನಿ॒ ವಾ ಅ॑ಶ್ವಮೇ॒ಧೇ ತ್ರೀಣಿ॑ ಶೀ॒ರ॒.ಷಾಣಿ॑ ।
ಯ ಏ॒ವಂ-ವೇಁದ॑ । ಶಿರೋ॑ ಹ॒ ರಾಜ್ಞಾ᳚-ಮ್ಭವತಿ ॥ 85 ॥
(ದ್ವಾ॒ದ॒ಶ-ಸ್ಸ್ತೋಮಃ॒-ಸ- ಏ॒ವ ತಚ್ - ಛಿರೋ॑ ಹ॒ ರಾಜ್ಞಾ᳚-ಮ್ಭವತಿ॒ ಷಟ್ಚ॑) (ಅ. 21)
ಅನುವಾಕಂ 22 - ಉಕ್ಥ್ಯಾಖ್ಯೇ ದ್ವಿತೀಯೇ-ಽಹನಿ ಬಹಿಷ್ಪವಮಾನೇ ಅಶ್ವಸ್ಯೋದ್ರಾತೃತ್ವಮ್
ದೇ॒ವಾ ವಾ ಅ॑ಶ್ವಮೇ॒ಧೇ ಪವ॑ಮಾನೇ । ಸು॒ವ॒ರ್ಗಂ-ಲೋಁ॒ಕ-ನ್ನ ಪ್ರಾಜಾ॑ನನ್ನ್ । ತಮಶ್ವಃ॒ ಪ್ರಾಜಾ॑ನಾತ್ ।
ಯದ॑ಶ್ವಮ॒ಧೇ-ಽಶ್ವೇ॑ನ॒ ಮೇದ್ಧ್ಯೇ॒ನೋದ॑ಞ್ಚೋ ಬಹಿಷ್ಪವಮಾ॒ನಗ್ಂ ಸರ್ಪ॑ನ್ತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಪ್ರಜ್ಞಾ᳚ತ್ಯೈ । ನ ವೈ ಮ॑ನು॒ಷ್ಯ॑-ಸ್ಸುವ॒ರ್ಗಂ-ಲೋಁ॒ಕಮಞ್ಜ॑ಸಾ ವೇದ ।
ಅಶ್ವೋ॒ ವೈ ಸು॑ವ॒ರ್ಗಂ-ಲೋಁ॒ಕಮಞ್ಜ॑ಸಾ ವೇದ ॥ ಯದು॑ದ್ಗಾ॒-ತೋದ್ಗಾಯೇ᳚ತ್ । ಯಥಾ-ಽಖ್ಷೇ᳚ತ್ರಜ್ಞೋ॒-ಽನ್ಯೇನ॑ ಪ॒ಥಾ ಪ್ರ॑ತಿಪಾ॒ದಯೇ᳚ತ್ । ತಾ॒ದೃಕ್ತತ್ ॥ 86 ॥
ಉ॒ದ್ಗಾ॒ತಾರ॑-ಮಪ॒ರುದ್ಧ್ಯ॑ । ಅಶ್ವ॑-ಮುದ್ಗೀ॒ಥಾಯ॑ ವೃಣೀತೇ । ಯಥಾ᳚ ಖ್ಷೇತ್ರ॒ಜ್ಞೋ-ಽಞ್ಜ॑ಸಾ॒ ನಯ॑ತಿ ।
ಏ॒ವಮೇ॒ವೈನ॒ಮಶ್ವ॑-ಸ್ಸುವ॒ರ್ಗಂ-ಲೋಁ॒ಕಮಞ್ಜ॑ಸಾ ನಯತಿ ॥ ಪುಚ್ಛ॑ಮ॒ನ್ವಾರ॑ಭನ್ತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ಹಿ-ಙ್ಕ॑ರೋತಿ । ಸಾಮೈ॒ವಾಕಃ॑ ।
ಹಿ-ಙ್ಕ॑ರೋತಿ । ಉ॒ದ್ಗೀ॒ಥ ಏ॒ವಾಸ್ಯ॒ ಸಃ ॥ 87 ॥
ವಡ॑ಬಾ॒ ಉಪ॑ ರುನ್ಧನ್ತಿ । ಮಿ॒ಥು॒ನ॒ತ್ವಾಯ॒ ಪ್ರಜಾ᳚ತ್ಯೈ ।
ಅಥೋ॒ ಯಥೋ॑ಪಗಾ॒ತಾರ॑ ಉಪ॒ಗಾಯ॑ನ್ತಿ । ತಾ॒ದೃಗೇ॒ವ ತತ್ ॥ ಉದ॑ಗಾಸೀ॒ದಶ್ವೋ॒ ಮೇದ್ಧ್ಯ॒ ಇತ್ಯಾ॑ಹ । ಪ್ರಾ॒ಜಾ॒ಪ॒ತ್ಯೋ ವಾ ಅಶ್ವಃ॑ । ಪ್ರ॒ಜಾಪ॑ತಿ-ರುದ್ಗೀ॒ಥಃ । ಉ॒ದ್ಗೀ॒ಥಮೇ॒ವಾವ॑ರುನ್ಧೇ । ಅಥೋ॑ ಋಖ್ಸಾ॒ಮಯೋ॑ರೇ॒ವ ಪ್ರತಿ॑ತಿಷ್ಠತಿ ॥ ಹಿರ॑ಣ್ಯೇನೋ॒ಪಾಕ॑ರೋತಿ ।
ಜ್ಯೋತಿ॒ರ್ವೈ ಹಿರ॑ಣ್ಯಮ್ । ಜ್ಯೋತಿ॑ರೇ॒ವ ಮು॑ಖ॒ತೋ ದ॑ಧಾತಿ ।
ಯಜ॑ಮಾನೇ ಚ ಪ್ರ॒ಜಾಸು॑ ಚ । ಅಥೋ॒ ಹಿರ॑ಣ್ಯಜ್ಯೋತಿರೇ॒ವ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ॥ 88 ॥
(ತಥ್ - ಸ - ಉ॒ಪಾಕ॑ರೋತಿ ಚ॒ತ್ವಾರಿ॑ ಚ) (ಅ. 22)
ಅನುವಾಕಂ 23 - ಅಶ್ವೇ ಪರ್ಯಗ್ನ್ಯಪ್ರಯನ್ತಾನಾ-ಮ್ಪಶೂನಾ-ನ್ನಿಯೋಜನಂ
ಪುರು॑ಷೋ॒ ವೈ ಯ॒ಜ್ಞಃ । ಯ॒ಜ್ಞಃ ಪ್ರ॒ಜಾಪ॑ತಿಃ । ಯದಶ್ವೇ॑ ಪ॒ಶೂನ್ನಿ॑ಯು॒ಞ್ಜನ್ತಿ॑ ।
ಯ॒ಜ್ಞಾದೇ॒ವ ತದ್ಯ॒ಜ್ಞ-ಮ್ಪ್ರಯು॑ಙ್ಕ್ತೇ ॥ ಅಶ್ವ॑-ನ್ತೂಪ॒ರ-ಙ್ಗೋ॑ಮೃ॒ಗಮ್ । ತಾನ॑ಗ್ನಿ॒ಷ್ಠ ಆಲ॑ಭತೇ ।
ಸೇ॒ನಾ॒ಮು॒ಖಮೇ॒ವ ತಥ್ಸಗ್ಗ್ಶ್ಯ॑ತಿ । ತಸ್ಮಾ᳚-ದ್ರಾಜಮು॒ಖ-ಮ್ಭೀ॒ಷ್ಮ-ಮ್ಭಾವು॑ಕಮ್ ॥
ಆ॒ಗ್ನೇ॒ಯ-ಙ್ಕೃ॒ಷ್ಣಗ್ರೀ॑ವ-ಮ್ಪು॒ರಸ್ತಾ᳚-ಲ್ಲ॒ಲಾಟೇ᳚ । ಪೂ॒ರ್ವಾ॒ಗ್ನಿಮೇ॒ವ ತ-ಙ್ಕು॑ರುತೇ ॥ 89 ॥
ತಸ್ಮಾ᳚-ತ್ಪೂರ್ವಾ॒ಗ್ನಿ-ಮ್ಪು॒ರಸ್ತಾ᳚-ಥ್ಸ್ಥಾಪಯನ್ತಿ ॥ ಪೌ॒ಷ್ಣಮ॒ನ್ವಞ್ಚ᳚ಮ್ । ಅನ್ನಂ॒-ವೈಁ ಪೂ॒ಷಾ । ತಸ್ಮಾ᳚-ತ್ಪೂರ್ವಾ॒ಗ್ನಾ-ವಾ॑ಹಾ॒ರ್ಯ॑-ಮಾಹ॑ರನ್ತಿ ॥
ಐ॒ನ್ದ್ರಾ॒ಪೌ॒ಷ್ಣ ಮು॒ಪರಿ॑ಷ್ಟಾತ್ । ಐ॒ನ್ದ್ರೋ ವೈ ರಾ॑ಜ॒ನ್ಯೋ-ಽನ್ನ॑-ಮ್ಪೂ॒ಷಾ ।
ಅ॒ನ್ನಾದ್ಯೇ॑ನೈ॒ವೈನ॑-ಮುಭ॒ಯತಃ॒ ಪರಿ॑ಗೃಹ್ಣಾತಿ । ತಸ್ಮಾ᳚-ದ್ರಾಜ॒ನ್ಯೋ᳚ನ್ನಾ॒ದೋ ಭಾವು॑ಕಃ ॥
ಆ॒ಗ್ನೇ॒ಯೌ ಕೃ॒ಷ್ಣಗ್ರೀ॑ವೌ ಬಾಹು॒ವೋಃ । ಬಾ॒ಹು॒ವೋರೇ॒ವ ವೀ॒ರ್ಯ॑-ನ್ಧತ್ತೇ ॥ 90 ॥
ತಸ್ಮಾ᳚-ದ್ರಾಜ॒ನ್ಯೋ॑ ಬಾಹುಬ॒ಲೀ ಭಾವು॑ಕಃ ॥
ತ್ವಾ॒ಷ್ಟ್ರೌ ಲೋ॑ಮಶಸ॒ಕ್ಥೌ ಸ॒ಕ್ಥ್ಯೋಃ ।
ಸ॒ಕ್ಥ್ಯೋರೇ॒ವ ವೀ॒ರ್ಯ॑-ನ್ಧತ್ತೇ । ತಸ್ಮಾ᳚-ದ್ರಾಜ॒ನ್ಯ॑ ಊರುಬ॒ಲೀ ಭಾವು॑ಕಃ ॥ ಶಿ॒ತಿ॒ಪೃ॒ಷ್ಠೌ ಬಾ॑ರ್ಹಸ್ಪ॒ತ್ಯೌ ಪೃ॒ಷ್ಠೇ ।
ಬ್ರ॒ಹ್ಮ॒ವ॒ರ್ಚ॒ಸ-ಮೇ॒ವೋಪರಿ॑ಷ್ಟಾದ್ಧತ್ತೇ ।
ಅಥೋ॑ ಕ॒ವಚೇ॑ ಏ॒ವೈತೇ ಅ॒ಭಿತಃ॒ ಪರ್ಯೂ॑ಹತೇ ।
ತಸ್ಮಾ᳚-ದ್ರಾಜ॒ನ್ಯ॑-ಸ್ಸನ್ನ॑ದ್ಧೋ ವೀ॒ರ್ಯ॑-ಙ್ಕರೋತಿ ॥ ಧಾ॒ತ್ರೇ ಪೃ॑ಷೋದ॒ರ-ಮ॒ಧಸ್ತಾ᳚ತ್ ।
ಪ್ರ॒ತಿ॒ಷ್ಠಾಮೇ॒ವೈತಾ-ಙ್ಕು॑ರುತೇ ।
ಅಥೋ॑ ಇ॒ಯಂ-ವೈಁ ಧಾ॒ತಾ ।
ಅ॒ಸ್ಯಾಮೇ॒ವ ಪ್ರತಿ॑ತಿಷ್ಠತಿ ॥ ಸೌ॒ರ್ಯ-ಮ್ಬ॒ಲಖ್ಷ॒-ಮ್ಪುಚ್ಛೇ᳚ । ಉ॒ಥ್ಸೇ॒ಧಮೇ॒ವ ತ-ಙ್ಕು॑ರುತೇ ।
ತಸ್ಮಾ॑ದುಥ್ಸೇ॒ಧ-ಮ್ಭ॒ಯೇ ಪ್ರ॒ಜಾ
ಅ॒ಭಿಸಗ್ಗ್ಶ್ರ॑ಯನ್ತಿ ॥ 91 ॥
(ಕು॒ರು॒ತೇ॒ - ಧ॒ತ್ತೇ॒ - ಕು॒ರು॒ತೇ॒ ಪಞ್ಚ॑ ಚ) (ಅ. 23)
(ಸಾ॒ಗ್ರಂ॒ಹ॒ಣ್ಯಾ - ಚತು॑ಷ್ಟಯ್ಯೋ॒ - ಯೋ ವೈ - ಯಃ ಪಿ॒ತು - ಶ್ಚ॒ತ್ವಾರಾ॒ - ಯಥಾ॑ ನಿ॒ಕ್ತಮ್ - ಪ್ರ॒ಜಾಪ॑ತಯೇ ತ್ವಾ॒- ಯಥಾ॒ ಪ್ರೋಖ್ಷಿ॑ತಂ - ವಿ॒ಭೂರಾ॑ಹ- ಪ್ರ॒ಜಾಪ॑ತಿರಕಾಮಯತಾಶ್ವಮೇ॒ಧೇನ॑ - ಪ್ರ॒ಜಾಪ॑ತಿ॒ರ್ನ ಕಿಞ್ಚ॒ ನ - ಸಾ॑ವಿ॒ತ್ರ - ಮಾ ಬ್ರಹ್ಮ॑ನ್ - ಪ್ರ॒ಜಾಪ॑ತಿ-ರ್ದೇ॒ವೇಭ್ಯಃ॑ - ಪ್ರ॒ಜಾಪ॑ತಿ॒ ರಖ್ಷಾಗ್ಂ॑ಸಿ - ಪ್ರ॒ಜಾಪ॑ತಿಮೀಫ್ಸತಿ - ವಿ॒ಭುರ॑ಶ್ವನಾ॒ಮಾನ್ಯ - ಮ್ಭಾಗ್॑ - ಸ್ಯೇಕಯೂ॒ಪೋ - ರಾಜ್ಜು॑ದಾಲ - ಮೇಕವಿ॒ಗ್ಂ॒ಶೋ - ದೇ॒ವಾಃ - ಪುರು॑ಷ॒ ಸ್ತ್ರಯೋ॑ವಿಗ್ಂಶತಿಃ)
(ಸಾ॒ಗ್ರಂ॒ಹ॒ಣ್ಯಾ - ತಸ್ಮಾ॑ದಶ್ವಮೇಧಯಾ॒ಜೀ - ಯ-ತ್ಪರಿ॑ಮಿತಾ॒ - ಯ-ದ್ಯ॑ಜ್ಞಮು॒ಖೇ - ಯೋ ದೀ॒ಖ್ಷಾಮ್ - ದೇ॒ವಾನೇ॒ವ - ತ್ರಯ॑ ಇ॒ಮೇ - ಸಿ॒ತಾಯ॑ - ಪ್ರಾಣಾಪಾ॒ನಾವೇ॒ವಾಸ್ಮಿ॒ನ್ - ತಸ್ಮಾ᳚-ದ್ರಾಜ॒ನ್ಯ॑ ಏಕ॑ನವತಿಃ)
(ಸಾ॒ಗ್ರಂ॒ಹ॒ಣ್ಯಾ - ಸಗ್ಗ್ಶ್ರ॑ಯನ್ತಿ)
॥ ಹರಿಃ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಅಷ್ಟಮಃ ಪ್ರಪಾಠಕ-ಸ್ಸಮಾಪ್ತಃ ॥
+++++++++++++++++++++++++++
