ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಷಷ್ಠಃ ಪ್ರಪಾಠಕಃ - ರಾಜಸೂಯಾನುಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಅನುಮತ್ಯಾದ್ಯಾ ಇಷ್ಟಯಃ

ಅನು॑ಮತ್ಯೈ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪತಿ । ಯೇ ಪ್ರ॒ತ್ಯಞ್ಚ॒-ಶ್ಶಮ್ಯಾ॑ಯಾ ಅವ॒ಶೀಯ॑ನ್ತೇ । ತನ್ನೈರ್॑​ಋ॒ತ-ಮೇಕ॑ಕಪಾಲಮ್ । ಇ॒ಯಂ-ವಾಁ ಅನು॑ಮತಿಃ । ಇ॒ಯ-ನ್ನಿರ್-ಋ॑ತಿಃ । ನೈ॒ರ್॒ಋ॒ತೇನ॒ ಪೂರ್ವೇ॑ಣ॒ ಪ್ರಚ॑ರತಿ । ಪಾ॒ಪ್ಮಾನ॑ಮೇ॒ವ ನಿರ್-ಋ॑ತಿ॒-ಮ್ಪೂರ್ವಾ᳚-ನ್ನಿ॒ರವ॑ದಯತೇ । ಏಕ॑ ಕಪಾಲೋ ಭವತಿ । ಏ॒ಕ॒ಧೈವ ನಿರ್-ಋ॑ತಿ-ನ್ನಿ॒ರವ॑ದಯತೇ । ಯದಹು॑ತ್ವಾ॒ ಗಾರ್​ಹ॑ಪತ್ಯ ಈ॒ಯುಃ ॥ 1 ॥

ರು॒ದ್ರೋ ಭೂ॒ತ್ವಾ-ಽಗ್ನಿರ॑ನೂ॒ತ್ಥಾಯ॑ । ಅ॒ದ್ಧ್ವ॒ರ್ಯು-ಞ್ಚ॒ ಯಜ॑ಮಾನ-ಞ್ಚ ಹನ್ಯಾತ್ । ವೀಹಿ॒ ಸ್ವಾಹಾ ಽಽಹು॑ತಿ-ಞ್ಜುಷಾ॒ಣ ಇತ್ಯಾ॑ಹ । ಆಹು॑ತ್ಯೈ॒ವೈನಗ್ಂ॑ ಶಮಯತಿ । ನಾರ್ತಿ॒ಮಾರ್ಚ್ಛ॑-ತ್ಯದ್ಧ್ವ॒ರ್ಯುರ್ನ ಯಜ॑ಮಾನಃ । ಏ॒ಕೋ॒ಲ್ಮು॒ಕೇನ॑ ಯನ್ತಿ । ತದ್ಧಿ ನಿರ್-ಋ॑ತ್ಯೈ ಭಾಗ॒ಧೇಯ᳚ಮ್ । ಇ॒ಮಾ-ನ್ದಿಶಂ॑-ಯಁನ್ತಿ । ಏ॒ಷಾ ವೈ ನಿರ್-ಋ॑ತ್ಯೈ॒ ದಿಕ್ । ಸ್ವಾಯಾ॑ಮೇ॒ವ ದಿ॒ಶಿ ನಿರ್-ಋ॑ತಿ-ನ್ನಿ॒ರವ॑ದಯತೇ ॥ 2 ॥

ಸ್ವಕೃ॑ತ॒ ಇರಿ॑ಣೇ ಜುಹೋತಿ ಪ್ರದ॒ರೇ ವಾ᳚ । ಏ॒ತದ್ವೈ ನಿರ್-ಋ॑ತ್ಯಾ ಆ॒ಯತ॑ನಮ್ । ಸ್ವ ಏ॒ವಾಯತ॑ನೇ॒ ನಿರ್-ಋ॑ತಿ-ನ್ನಿ॒ರವ॑ದಯತೇ । ಏ॒ಷ ತೇ॑ ನಿರ್-ಋತೇ ಭಾ॒ಗ ಇತ್ಯಾ॑ಹ । ನಿರ್ದಿ॑ಶತ್ಯೇ॒ವೈನಾ᳚ಮ್ । ಭೂತೇ॑ ಹ॒ವಿಷ್ಮ॑ತ್ಯ॒ಸೀತ್ಯಾ॑ಹ । ಭೂತಿ॑ಮೇ॒ವೋಪಾವ॑ರ್ತತೇ । ಮು॒ಞ್ಚೇಮಮಗ್ಂಹ॑ಸ॒ ಇತ್ಯಾ॑ಹ । ಅಗ್ಂಹ॑ಸ ಏ॒ವೈನ॑-ಮ್ಮುಞ್ಚತಿ । ಅ॒ಙ್ಗು॒ಷ್ಠಾಭ್ಯಾ᳚-ಞ್ಜುಹೋತಿ ॥ 3 ॥

ಅ॒ನ್ತ॒ತ ಏ॒ವ ನಿರ್-ಋ॑ತಿ-ನ್ನಿ॒ರವ॑ದಯತೇ । ಕೃ॒ಷ್ಣಂ-ವಾಁಸಃ॑ ಕೃ॒ಷ್ಣತೂ॑ಷ॒-ನ್ದಖ್ಷಿ॑ಣಾ । ಏ॒ತ-ದ್ವೈ ನಿರ್-ಋ॑ತ್ಯೈ ರೂ॒ಪಮ್ । ರೂ॒ಪೇಣೈ॒ವ ನಿರ್-ಋ॑ತಿ-ನ್ನಿ॒ರವ॑ದಯತೇ । ಅಪ್ರ॑ತೀಖ್ಷ॒ಮಾಯ॑ನ್ತಿ । ನಿರ್-ಋ॑ತ್ಯಾ ಅ॒ನ್ತರ್​ಹಿ॑ತ್ಯೈ । ಸ್ವಾಹಾ॒ ನಮೋ॒ ಯ ಇ॒ದ-ಞ್ಚ॒ಕಾರೇತಿ॒ ಪುನ॒ರೇತ್ಯ॒ ಗಾರ್​ಹ॑ಪತ್ಯೇ ಜುಹೋತಿ । ಆಹು॑ತ್ಯೈ॒ವ ನ॑ಮ॒ಸ್ಯನ್ತೋ॒ ಗಾರ್​ಹ॑ಪತ್ಯ-ಮು॒ಪಾವ॑ರ್ತನ್ತೇ । ಆ॒ನು॒ಮ॒ತೇನ॒ ಪ್ರಚ॑ರತಿ । ಇ॒ಯಂ-ವಾಁ ಅನು॑ಮತಿಃ ॥ 4 ॥

ಇ॒ಯಮೇ॒ವಾಸ್ಮೈ॑ ರಾ॒ಜ್ಯಮನು॑ಮನ್ಯತೇ । ಧೇ॒ನು-ರ್ದಖ್ಷಿ॑ಣಾ । ಇ॒ಮಾಮೇ॒ವ ಧೇ॒ನು-ಙ್ಕು॑ರುತೇ । ಆ॒ದಿ॒ತ್ಯ-ಞ್ಚ॒ರು-ನ್ನಿರ್ವ॑ಪತಿ । ಉ॒ಭಯೀ᳚ಷ್ವೇ॒ವ ಪ್ರ॒ಜಾಸ್ವ॒ಭಿಷಿ॑ಚ್ಯತೇ । ದೈವೀ॑ಷು ಚ॒ ಮಾನು॑ಷೀಷು ಚ । ವರೋ॒ ದಖ್ಷಿ॑ಣಾ । ವರೋ॒ ಹಿ ರಾ॒ಜ್ಯಗ್ಂ ಸಮೃ॑ದ್ಧ್ಯೈ । ಆ॒ಗ್ನಾ॒ವೈ॒ಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪತಿ । ಅ॒ಗ್ನಿ-ಸ್ಸರ್ವಾ॑ ದೇ॒ವತಾಃ᳚ ॥ 5 ॥

ವಿಷ್ಣು॑ರ್ಯ॒ಜ್ಞಃ । ದೇ॒ವತಾ᳚ಶ್ಚೈ॒ವ ಯ॒ಜ್ಞ-ಞ್ಚಾವ॑ ರುನ್ಧೇ । ವಾ॒ಮ॒ನೋ ವ॒ಹೀ ದಖ್ಷಿ॑ಣಾ । ಯ-ದ್ವ॒ಹೀ । ತೇನಾ᳚ಗ್ನೇ॒ಯಃ । ಯ-ದ್ವಾ॑ಮ॒ನಃ । ತೇನ॑ ವೈಷ್ಣ॒ವ-ಸ್ಸಮೃ॑ದ್ಧ್ಯೈ । ಅ॒ಗ್ನೀ॒ಷೋ॒ಮೀಯ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪತಿ । ಅ॒ಗ್ನೀಷೋಮಾ᳚ಭ್ಯಾಂ॒-ವಾಁ ಇನ್ದ್ರೋ॑ ವೃ॒ತ್ರಮ॑ಹ॒ನ್ನಿತಿ॑ । ಯದ॑ಗ್ನೀಷೋ॒ಮೀಯ॒-ಮೇಕಾ॑ದಶಕಪಾಲ-ನ್ನಿ॒ರ್ವಪ॑ತಿ ॥ 6 ॥

ವಾರ್ತ್ರ॑ಘ್ನಮೇ॒ವ ವಿಜಿ॑ತ್ಯೈ । ಹಿರ॑ಣ್ಯ॒-ನ್ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ । ದೇ॒ವತಾ॑ಭಿಶ್ಚೇನ್ದ್ರಿ॒ಯೇಣ॑ ಚ॒ ವ್ಯಾ᳚ರ್ಧ್ಯತ । ಸ ಏ॒ತಮೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ-ಮಪಶ್ಯತ್ । ತನ್ನಿರ॑ವಪತ್ । ತೇನ॒ ವೈ ಸ ದೇ॒ವತಾ᳚ಶ್ಚೇನ್ದ್ರಿ॒ಯ-ಞ್ಚಾವಾ॑ರುನ್ಧ । ಯದೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ-ನ್ನಿ॒ರ್ವಪ॑ತಿ । ದೇ॒ವತಾ᳚ಶ್ಚೈ॒ವ ತೇನೇ᳚ನ್ದ್ರಿ॒ಯ-ಞ್ಚ॒ ಯಜ॑ಮಾ॒ನೋ-ಽವ॑ ರುನ್ಧೇ । ಋ॒ಷ॒ಭೋ ವ॒ಹೀ ದಖ್ಷಿ॑ಣಾ ॥ 7 ॥

ಯ-ದ್ವ॒ಹೀ । ತೇನಾ᳚ಗ್ನೇ॒ಯಃ । ಯದೃ॑ಷ॒ಭಃ । ತೇನೈ॒ನ್ದ್ರ-ಸ್ಸಮೃ॑ದ್ಧ್ಯೈ । ಆ॒ಗ್ನೇ॒ಯಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪತಿ । ಐ॒ನ್ದ್ರ-ನ್ದಧಿ॑ । ಯದಾ᳚ಗ್ನೇ॒ಯೋ ಭವ॑ತಿ । ಅ॒ಗ್ನಿರ್ವೈ ಯ॑ಜ್ಞಮು॒ಖಮ್ । ಯ॒ಜ್ಞ॒ಮು॒ಖಮೇ॒ವರ್ಧಿ॑-ಮ್ಪು॒ರಾಸ್ತಾ᳚ದ್ಧತ್ತೇ । ಯದೈ॒ನ್ದ್ರ-ನ್ದಧಿ॑ ॥ 8 ॥

ಇ॒ನ್ದ್ರಿ॒ಯಮೇ॒ವಾವ॑ ರುನ್ಧೇ । ಋ॒ಷ॒ಭೋ ವ॒ಹೀ ದಖ್ಷಿ॑ಣಾ । ಯದ್ವ॒ಹೀ । ತೇನಾ᳚ಗ್ನೇ॒ಯಃ । ಯದೃ॑ಷ॒ಭಃ । ತೇನೈ॒ನ್ದ್ರ-ಸ್ಸಮೃ॑ದ್ಧ್ಯೈ । ಯಾವ॑ತೀ॒ರ್ವೈ ಪ್ರ॒ಜಾ ಓಷ॑ಧೀನಾ॒-ಮಹು॑ತಾನಾ॒-ಮಾಶ್ಞನ್ನ್॑ । ತಾಃ ಪರಾ॑-ಽಭವನ್ನ್ । ಆ॒ಗ್ರ॒ಯ॒ಣ-ಮ್ಭ॑ವತಿ ಹು॒ತಾದ್ಯಾ॑ಯ । ಯಜ॑ಮಾನ॒ಸ್ಯಾಪ॑ರಾಭಾವಾಯ ॥ 9 ॥

ದೇ॒ವಾ ವಾ ಓಷ॑ಧೀಷ್ವಾ॒ಜಿಮ॑ಯುಃ । ತಾ ಇ॑ನ್ದ್ರಾ॒ಗ್ನೀ ಉದ॑ಜಯತಾಮ್ । ತಾವೇ॒ತಮೈ᳚ನ್ದ್ರಾ॒ಗ್ನ-ನ್ದ್ವಾದ॑ಶಕಪಾಲ॒-ನ್ನಿರ॑ವೃಣಾತಾಮ್ । ಯದೈ᳚ನ್ದ್ರಾ॒ಗ್ನೋ ಭವ॒ತ್ಯುಜ್ಜಿ॑ತ್ಯೈ । ದ್ವಾದ॑ಶಕಪಾಲೋ ಭವತಿ । ದ್ವಾದ॑ಶ॒ ಮಾಸಾ᳚-ಸ್ಸಂ​ವಁಥ್ಸ॒ರಃ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಮಾ॒ ಅನ್ನ॒ಮವ॑ರುನ್ಧೇ । ವೈ॒ಶ್ವ॒ದೇ॒ವಶ್ಚ॒ರು-ರ್ಭ॑ವತಿ । ವೈ॒ಶ್ವ॒ದೇ॒ವಂ-ವಾಁ ಅನ್ನ᳚ಮ್ । ಅನ್ನ॑ಮೇ॒ವಾಸ್ಮೈ᳚ ಸ್ವದಯತಿ ॥ 10 ॥

ಪ್ರ॒ಥ॒ಮ॒ಜೋ ವ॒ಥ್ಸೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಸೌ॒ಮ್ಯಗ್ಗ್​ ಶ್ಯಾ॑ಮಾ॒ಕ-ಞ್ಚ॒ರು-ನ್ನಿರ್ವ॑ಪತಿ । ಸೋಮೋ॒ ವಾ ಅ॑ಕೃಷ್ಟಪ॒ಚ್ಯಸ್ಯ॒ ರಾಜಾ᳚ । ಅ॒ಕೃ॒ಷ್ಟ॒ಪ॒ಚ್ಯಮೇ॒ವಾಸ್ಮೈ᳚ ಸ್ವದಯತಿ । ವಾಸೋ॒ ದಖ್ಷಿ॑ಣಾ । ಸೌ॒ಮ್ಯಗ್ಂಹಿ ದೇ॒ವತ॑ಯಾ॒ ವಾಸ॒-ಸ್ಸಮೃ॑ದ್ಧ್ಯೈ । ಸರ॑ಸ್ವತ್ಯೈ ಚ॒ರು-ನ್ನಿರ್ವ॑ಪತಿ । ಸರ॑ಸ್ವತೇ ಚ॒ರುಮ್ । ಮಿ॒ಥು॒ನಮೇ॒ವಾವ॑ ರುನ್ಧೇ । ಮಿ॒ಥು॒ನೌ ಗಾವೌ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಏತಿ॒ ವಾ ಏ॒ಷ ಯ॑ಜ್ಞಮು॒ಖಾದೃದ್ಧ್ಯಾಃ᳚ । ಯೋ᳚-ಽಗ್ನೇರ್ದೇ॒ವತಾ॑ಯಾ॒ ಏತಿ॑ । ಅ॒ಷ್ಟಾವೇ॒ತಾನಿ॑ ಹ॒ವೀಗ್ಂಷಿ॑ ಭವನ್ತಿ । ಅ॒ಷ್ಟಾಖ್ಷ॑ರಾ ಗಾಯ॒ತ್ರೀ । ಗಾ॒ಯ॒ತ್ರೋ᳚-ಽಗ್ನಿಃ । ತೇನೈ॒ವ ಯ॑ಜ್ಞಮು॒ಖಾದೃದ್ಧ್ಯಾ॑ ಅ॒ಗ್ನೇರ್ದೇ॒ವತಾ॑ಯೈ॒ ನೈತಿ॑ ॥ 11 ॥
(ಈ॒ಯು--ರ್ ನಿ॒ರವ॑ದಯತೇ - ಽಙ್ಗು॒ಷ್ಠಾಭ್ಯಾ᳚-ಞ್ಜುಹೋ॒ - ತ್ಯನು॑ಮತಿ--ರ್ ದೇ॒ವತಾ॑ - ನಿ॒ರ್ವಪ॑ತಿ - ವ॒ಹೀ ದಖ್ಷಿ॑ಣಾ॒ - ಯದೈ॒ನ್ದ್ರ-ನ್ದ - ಧ್ಯಪ॑ರಾಭಾವಾಯ - ಸ್ವದಯತಿ॒ - ಗಾವೌ॒ ದಖ್ಷಿ॑ಣಾ॒ ಸಮೃ॑ದ್ಧ್ಯೈ॒ ಷಟ್ಚ॑) (ಅ. 1)

ಅನುವಾಕಂ 2 - ಚಾತುರ್ಮಾಸ್ಯೇ ವೈಶ್ವದೇವಹವೀಂಷಿ
ವೈ॒ಶ್ವ॒ದೇ॒ವೇನ॒ ವೈ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ತಾ-ಸ್ಸೃ॒ಷ್ಟಾ ನ ಪ್ರಾಜಾ॑ಯನ್ತ । ಸೋ᳚-ಽಗ್ನಿರ॑ಕಾಮಯತ । ಅ॒ಹಮಿ॒ಮಾಃ ಪ್ರಜ॑ನಯೇಯ॒ಮಿತಿ॑ । ಸ ಪ್ರ॒ಜಾಪ॑ತಯೇ॒ ಶುಚ॑ಮದಧಾತ್ । ಸೋ॑-ಽಶೋಚತ್-ಪ್ರ॒ಜಾಮಿ॒ಚ್ಛಮಾ॑ನಃ । ತಸ್ಮಾ॒ದ್ಯ-ಞ್ಚ॑ ಪ್ರ॒ಜಾ ಭು॒ನಕ್ತಿ॒ ಯ-ಞ್ಚ॒ ನ । ತಾವು॒ಭೌ ಶೋ॑ಚತಃ ಪ್ರ॒ಜಾಮಿ॒ಚ್ಛಮಾ॑ನೌ । ತಾಸ್ವ॒ಗ್ನಿಮಪ್ಯ॑ ಸೃಜತ್ । ತಾ ಅ॒ಗ್ನಿರದ್ಧ್ಯೈ᳚ತ್ ॥ 12 ॥

ಸೋಮೋ॒ ರೇತೋ॑-ಽದಧಾತ್ । ಸ॒ವಿ॒ತಾ ಪ್ರಾಜ॑ನಯತ್ । ಸರ॑ಸ್ವತೀ॒ ವಾಚ॑ಮದಧಾತ್ । ಪೂ॒ಷಾ ಽಪೋ॑ಷಯತ್ । ತೇ ವಾ ಏ॒ತೇ ತ್ರಿ-ಸ್ಸಂ॑​ವಁಥ್ಸ॒ರಸ್ಯ॒ ಪ್ರಯು॑ಜ್ಯನ್ತೇ । ಯೇ ದೇ॒ವಾಃ ಪುಷ್ಟಿ॑ಪತಯಃ । ಸಂ॒​ವಁ॒ಥ್ಸ॒ರೋ ವೈ ಪ್ರ॒ಜಾಪ॑ತಿಃ । ಸಂ॒​ವಁ॒ಥ್ಸ॒ರೇಣೈ॒ವಾಸ್ಮೈ᳚ ಪ್ರ॒ಜಾಃ ಪ್ರಾಜ॑ನಯತ್ । ತಾಃ ಪ್ರ॒ಜಾ ಜಾ॒ತಾ ಮ॒ರುತೋ᳚ ಘ್ನನ್ನ್ । ಅ॒ಸ್ಮಾನಪಿ॒ ನ ಪ್ರಾಯು॑ಖ್ಷ॒ತೇತಿ॑ ॥ 13 ॥

ಸ ಏ॒ತ-ಮ್ಪ್ರ॒ಜಾಪ॑ತಿರ್ಮಾರು॒ತಗ್ಂ ಸ॒ಪ್ತಕ॑ಪಾಲ-ಮಪಶ್ಯತ್ । ತ-ನ್ನಿರ॑ವಪತ್ । ತತೋ॒ ವೈ ಪ್ರ॒ಜಾಭ್ಯೋ॑ಕಲ್ಪತ । ಯನ್ಮಾ॑ರು॒ತೋ ನಿ॑ರು॒ಪ್ಯತೇ᳚ । ಯ॒ಜ್ಞಸ್ಯ॒ ಕ್ಲೃಪ್ತ್ಯೈ᳚ । ಪ್ರ॒ಜಾನಾ॒-ಮಘಾ॑ತಾಯ । ಸ॒ಪ್ತಕ॑ಪಾಲೋ ಭವತಿ । ಸ॒ಪ್ತಗ॑ಣಾ॒ ವೈ ಮ॒ರುತಃ॑ । ಗ॒ಣ॒ಶ ಏ॒ವಾಸ್ಮೈ॒ ವಿಶ॑-ಙ್ಕಲ್ಪಯತಿ । ಸ ಪ್ರ॒ಜಾಪ॑ತಿ-ರಶೋಚತ್ ॥ 14 ॥

ಯಾಃ ಪೂರ್ವಾಃ᳚ ಪ್ರ॒ಜಾ ಅಸೃ॑ಖ್ಷಿ । ಮ॒ರುತ॒ಸ್ತಾ ಅ॑ವಧಿಷುಃ । ಕ॒ಥಮಪ॑ರಾ-ಸ್ಸೃಜೇ॒ಯೇತಿ॑ । ತಸ್ಯ॒ ಶುಷ್ಮ॑ ಆ॒ಣ್ಡ-ಮ್ಭೂ॒ತ-ನ್ನಿರ॑ವರ್ತತ । ತದ್ವ್ಯುದ॑ಹರತ್ । ತದ॑ಪೋಷಯತ್ । ತ-ತ್ಪ್ರಾಜಾ॑ಯತ । ಆ॒ಣ್ಡಸ್ಯ॒ ವಾ ಏ॒ತ-ದ್ರೂ॒ಪಮ್ । ಯದಾ॒ಮಿಖ್ಷಾ᳚ । ಯದ್ವ್ಯು॒ದ್ಧರ॑ತಿ ॥ 15 ॥

ಪ್ರ॒ಜಾ ಏ॒ವ ತ-ದ್ಯಜ॑ಮಾನಃ ಪೋಷಯತಿ । ವೈ॒ಶ್ವ॒ದೇ॒ವ್ಯಾ॑ಮಿಖ್ಷಾ॑ ಭವತಿ । ವೈ॒ಶ್ವ॒ದೇ॒ವ್ಯೋ॑ ವೈ ಪ್ರ॒ಜಾಃ । ಪ್ರ॒ಜಾ ಏ॒ವಾಸ್ಮೈ॒ ಪ್ರಜ॑ನಯತಿ । ವಾಜಿ॑ನ॒ಮಾನ॑ಯತಿ । ಪ್ರ॒ಜಾಸ್ವೇ॒ವ ಪ್ರಜಾ॑ತಾಸು॒ ರೇತೋ॑ ದಧಾತಿ । ದ್ಯಾ॒ವಾ॒ಪೃ॒ಥಿ॒ವ್ಯ॑ ಏಕ॑ಕಪಾಲೋ ಭವತಿ । ಪ್ರ॒ಜಾ ಏ॒ವ ಪ್ರಜಾ॑ತಾ॒ ದ್ಯಾವಾ॑ಪೃಥಿ॒ವೀಭ್ಯಾ॑-ಮುಭ॒ಯತಃ॒ ಪರಿ॑ ಗೃಹ್ಣಾತಿ । ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ಸಾ᳚-ಽಗ್ನಿರ॑ಬ್ರವೀತ್ ॥ 16 ॥

ಮಾಮಗ್ರೇ॑ ಯಜತ । ಮಯಾ॒ ಮುಖೇ॒ನಾಸು॑ರಾ-ಞ್ಜೇಷ್ಯ॒ಥೇತಿ॑ । ಮಾ-ನ್ದ್ವಿ॒ತೀಯ॒ಮಿತಿ॒ ಸೋಮೋ᳚-ಽಬ್ರವೀತ್ । ಮಯಾ॒ ರಾಜ್ಞಾ॑ ಜೇಷ್ಯ॒ಥೇತಿ॑ । ಮಾ-ನ್ತೃ॒ತೀಯ॒ಮಿತಿ॑ ಸವಿ॒ತಾ । ಮಯಾ॒ ಪ್ರಸೂ॑ತಾ ಜೇಷ್ಯ॒ಥೇತಿ॑ । ಮಾ-ಞ್ಚ॑ತು॒ರ್ಥೀಮಿತಿ॒ ಸರ॑ಸ್ವತೀ । ಇ॒ನ್ದ್ರಿ॒ಯಂ-ವೋಁ॒-ಽಹ-ನ್ಧಾ᳚ಸ್ಯಾ॒ಮೀತಿ॑ । ಮಾ-ಮ್ಪ॑ಞ್ಚ॒ಮಮಿತಿ॑ ಪೂ॒ಷಾ । ಮಯಾ᳚ ಪ್ರತಿ॒ಷ್ಠಯಾ॑ ಜೇಷ್ಯ॒ಥೇತಿ॑ ॥ 17 ॥

ತೇ᳚-ಽಗ್ನಿನಾ॒ ಮುಖೇ॒ನಾಸು॑ರಾನಜಯನ್ನ್ । ಸೋಮೇ॑ನ॒ ರಾಜ್ಞಾ᳚ । ಸ॒ವಿ॒ತ್ರಾ ಪ್ರಸೂ॑ತಾಃ । ಸರ॑ಸ್ವತೀನ್ದ್ರಿ॒ಯ-ಮ॑ದಧಾತ್ । ಪೂ॒ಷಾ ಪ್ರ॑ತಿ॒ಷ್ಠಾ ಽಽಸೀ᳚ತ್ । ತತೋ॒ ವೈ ದೇ॒ವಾ ವ್ಯ॑ಜಯನ್ತ । ಯದೇ॒ತಾನಿ॑ ಹ॒ವೀಗ್ಂಷಿ॑ ನಿರು॒ಪ್ಯನ್ತೇ॒ ವಿಜಿ॑ತ್ಯೈ । ನೋತ್ತ॑ರವೇ॒ದಿಮುಪ॑- ವಪತಿ । ಪ॒ಶವೋ॒ ವಾ ಉ॑ತ್ತರವೇ॒ದಿಃ । ಅಜಾ॑ತಾ ಇವ॒ ಹ್ಯೇ॑ತರ್​ಹಿ॑ ಪ॒ಶವಃ॑ ॥ 18 ॥
(ಐ॒-ದ್- ಇತ್ಯ॑ - ಶೋಚ-ದ್- ವ್ಯು॒ದ್ಧರ॑ - ತ್ಯಬ್ರವೀತ್ - ಪ್ರತಿ॒ಷ್ಠಯಾ॑ ಜೇಷ್ಯ॒ಥೇ ॒ ತ್ಯೇ॒ತರಃಇ॑ ಪ॒ಶವಃ॑) (ಅ. 2)

ಅನುವಾಕಂ 3 - ವೈಶ್ವದೇವಪರ್ಗತಾನಿ ವಿಶ್ವೇಷಾಙ್ಗಾನಿ
ತ್ರಿ॒ವೃ-ದ್ಬ॒ರ್॒ಹಿ-ರ್ಭ॑ವತಿ । ಮಾ॒ತಾ ಪಿ॒ತಾ ಪು॒ತ್ರಃ । ತದೇ॒ವ ತ-ನ್ಮಿ॑ಥು॒ನಮ್ । ಉಲ್ಬ॒-ಙ್ಗರ್ಭೋ॑ ಜ॒ರಾಯು॑ । ತದೇ॒ವ ತ-ನ್ಮಿ॑ಥು॒ನಮ್ । ತ್ರೇ॒ಧಾ ಬ॒ರ್॒ಹಿ-ಸ್ಸನ್ನ॑ದ್ಧ-ಮ್ಭವತಿ । ತ್ರಯ॑ ಇ॒ಮೇ ಲೋ॒ಕಾಃ । ಏ॒ಷ್ವೇ॑ವ ಲೋ॒ಕೇಷು॒ ಪ್ರತಿ॑ ತಿಷ್ಠತಿ । ಏ॒ಕ॒ಧಾ ಪುನ॒-ಸ್ಸನ್ನ॑ದ್ಧ-ಮ್ಭವತಿ । ಏಕ॑ ಇವ॒ ಹ್ಯ॑ಯಂ-ಲೋಁ॒ಕಃ ॥ 19 ॥

ಅ॒ಸ್ಮಿನ್ನೇ॒ವ ತೇನ॑ ಲೋ॒ಕೇ ಪ್ರತಿ॑ ತಿಷ್ಠತಿ । ಪ್ರ॒ಸುವೋ॑ ಭವನ್ತಿ । ಪ್ರ॒ಥ॒ಮ॒ಜಾಮೇ॒ವ ಪುಷ್ಟಿ॒ಮವ॑ ರುನ್ಧೇ । ಪ್ರ॒ಥ॒ಮ॒ಜೋ ವ॒ಥ್ಸೋ ದಖ್ಷಿ॑ಣಾ॒ ಸಮೃ॑ದ್ಧ್ಯೈ । ಪೃ॒ಷ॒ದಾ॒ಜ್ಯ-ಙ್ಗೃ॑ಹ್ಣಾತಿ । ಪ॒ಶವೋ॒ ವೈ ಪೃ॑ಷದಾ॒ಜ್ಯಮ್ । ಪ॒ಶೂನೇ॒ವಾವ॑ ರುನ್ಧೇ । ಪ॒ಞ್ಚ॒ಗೃ॒ಹೀ॒ತ-ಮ್ಭ॑ವತಿ । ಪಾಙ್ಕ್ತಾ॒ ಹಿ ಪ॒ಶವಃ॑ । ಬ॒ಹು॒ರೂ॒ಪ-ಮ್ಭ॑ವತಿ ॥ 20 ॥

ಬ॒ಹು॒ರೂ॒ಪಾ ಹಿ ಪ॒ಶವ॒-ಸ್ಸಮೃ॑ದ್ಧ್ಯೈ । ಅ॒ಗ್ನಿ-ಮ್ಮ॑ನ್ಥನ್ತಿ । ಅ॒ಗ್ನಿಮು॑ಖಾ॒ ವೈ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ಯದ॒ಗ್ನಿ-ಮ್ಮನ್ಥ॑ನ್ತಿ । ಅ॒ಗ್ನಿಮು॑ಖಾ ಏ॒ವ ತ-ತ್ಪ್ರ॒ಜಾ ಯಜ॑ಮಾನ-ಸ್ಸೃಜತೇ । ನವ॑ ಪ್ರಯಾ॒ಜಾ ಇ॑ಜ್ಯನ್ತೇ । ನವಾ॑ನೂಯಾ॒ಜಾಃ । ಅ॒ಷ್ಟೌ ಹ॒ವೀಗ್ಂಷಿ॑ । ದ್ವಾವಾ॑ಘಾ॒ರೌ । ದ್ವಾವಾಜ್ಯ॑ಭಾಗೌ ॥ 21 ॥

ತ್ರಿ॒ಗ್ಂ॒ಶ-ಥ್ಸಮ್ಪ॑ದ್ಯನ್ತೇ । ತ್ರಿ॒ಗ್ಂ॒ಶದ॑ಖ್ಷರಾ ವಿ॒ರಾಟ್ । ಅನ್ನಂ॑-ವಿಁ॒ರಾಟ್ । ವಿ॒ರಾಜೈ॒ವಾನ್ನಾದ್ಯ॒ಮವ॑ ರುನ್ಧೇ । ಯಜ॑ಮಾನೋ॒ ವಾ ಏಕ॑ಕಪಾಲಃ । ತೇಜ॒ ಆಜ್ಯ᳚ಮ್ । ಯದೇಕ॑ಕಪಾಲ॒ ಆಜ್ಯ॑ಮಾ॒ನಯ॑ತಿ । ಯಜ॑ಮಾನಮೇ॒ವ ತೇಜ॑ಸಾ॒ ಸಮ॑ರ್ಧಯತಿ । ಯಜ॑ಮಾನೋ॒ ವಾ ಏಕ॑ಕಪಾಲಃ । ಪ॒ಶವ॒ ಆಜ್ಯ᳚ಮ್ ॥ 22 ॥

ಯದೇಕ॑ಕಪಾಲ॒ ಆಜ್ಯ॑ಮಾ॒ನಯ॑ತಿ । ಯಜ॑ಮಾನಮೇ॒ವ ಪ॒ಶುಭಿ॒-ಸ್ಸಮ॑ರ್ಧಯತಿ । ಯದಲ್ಪ॑ಮಾ॒ನಯೇ᳚ತ್ । ಅಲ್ಪಾ॑ ಏನ-ಮ್ಪ॒ಶವೋ॑ ಭು॒ಞ್ಜನ್ತ॒ ಉಪ॑ತಿಷ್ಠೇರನ್ನ್ । ಯ-ದ್ಬ॒ಹ್ವಾ॑ನಯೇ᳚ತ್ । ಬ॒ಹವ॑ ಏನ-ಮ್ಪ॒ಶವೋ ಭು॑ಞ್ಜನ್ತ॒ ಉಪ॑ತಿಷ್ಠೇರನ್ನ್ । ಬ॒ಹ್ವಾ॑ನೀಯಾ॒ವಿಃ ಪೃ॑ಷ್ಠ-ಙ್ಕುರ್ಯಾತ್ । ಬ॒ಹವ॑ ಏ॒ವೈನ॑-ಮ್ಪ॒ಶವೋ॑ ಭು॒ಞ್ಜನ್ತ॒ ಉಪ॑ತಿಷ್ಠನ್ತೇ । ಯಜ॑ಮಾನೋ॒ ವಾ ಏಕ॑ಕಪಾಲಃ । ಯದೇಕ॑ಕಪಾಲಸ್ಯಾವ॒ದ್ಯೇತ್ ॥ 23 ॥

ಯಜ॑ಮಾನ॒ಸ್ಯಾವ॑ದ್ಯೇತ್ । ಉದ್ವಾ॒ ಮಾದ್ಯೇ॒-ದ್ಯಜ॑ಮಾನಃ । ಪ್ರ ವಾ॑ ಮೀಯೇತ । ಸ॒ಕೃದೇ॒ವ ಹೋ॑ತ॒ವ್ಯಃ॑ । ಸ॒ಕೃದಿ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ । ಹು॒ತ್ವಾ-ಽಭಿ ಜು॑ಹೋತಿ । ಯಜ॑ಮಾನಮೇ॒ವ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯಿ॒ತ್ವಾ । ತೇಜ॑ಸಾ॒ ಸಮ॑ರ್ಧಯತಿ । ಯಜ॑ಮಾನೋ॒ ವಾ ಏಕ॑ಕಪಾಲಃ । ಸು॒ವ॒ರ್ಗೋ ಲೋ॒ಕ ಆ॑ಹವ॒ನೀಯಃ॑ ॥ 24 ॥

ಯದೇಕ॑ಕಪಾಲ-ಮಾಹವ॒ನೀಯೇ॑ ಜು॒ಹೋತಿ॑ । ಯಜ॑ಮಾನಮೇ॒ವ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ । ಯದ್ಧಸ್ತೇ॑ನ ಜುಹು॒ಯಾತ್ । ಸು॒ವ॒ರ್ಗಾ-ಲ್ಲೋ॒ಕಾ-ದ್ಯಜ॑ಮಾನ॒-ಮವ॑ವಿದ್ಧ್ಯೇತ್ । ಸ್ರು॒ಚಾ ಜು॑ಹೋತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ । ಯ-ತ್ಪ್ರಾಮ್ಪದ್ಯೇ॑ತ । ದೇ॒ವ॒ಲೋ॒ಕಮ॒ಭಿ ಜ॑ಯೇತ್ । ಯ-ದ್ದ॑ಖ್ಷಿ॒ಣಾ ಪಿ॑ತೃಲೋ॒ಕಮ್ । ಯ-ತ್ಪ್ರ॒ತ್ಯಕ್ ॥ 25 ॥

ರಖ್ಷಾಗ್ಂ॑ಸಿ ಯ॒ಜ್ಞಗ್ಂ ಹ॑ನ್ಯುಃ । ಯದುದಙ್ಙ್॑ । ಮ॒ನು॒ಷ್ಯ॒ಲೋ॒ಕ-ಮ॒ಭಿಜ॑ಯೇತ್ । ಪ್ರತಿ॑ಷ್ಠಿತೋ ಹೋತ॒ವ್ಯಃ॑ । ಏಕ॑ಕಪಾಲಂ॒-ವೈಁ ಪ್ರ॑ತಿ॒ತಿಷ್ಠ॑ನ್ತ॒-ನ್ದ್ಯಾವಾ॑ಪೃಥಿ॒ವೀ ಅನು॒ ಪ್ರತಿ॑ತಿಷ್ಠತಃ । ದ್ಯಾವಾ॑ಪೃಥಿ॒ವೀ ಋ॒ತವಃ॑ । ಋ॒ತೂನ್. ಯ॒ಜ್ಞಃ । ಯ॒ಜ್ಞಂ-ಯಁಜ॑ಮಾನಃ । ಯಜ॑ಮಾನ-ಮ್ಪ್ರ॒ಜಾಃ । ತಸ್ಮಾ॒ತ್-ಪ್ರತಿ॑ಷ್ಠಿತೋ ಹೋತ॒ವ್ಯಃ॑ ॥ 26 ॥

ವಾ॒ಜಿನೋ॑ ಯಜತಿ । ಅ॒ಗ್ನಿರ್ವಾ॒ಯು-ಸ್ಸೂರ್ಯಃ॑ । ತೇ ವೈ ವಾ॒ಜಿನಃ॑ । ತಾನೇ॒ವ ತ-ದ್ಯ॑ಜತಿ । ಅಥೋ॒ ಖಲ್ವಾ॑ಹುಃ । ಛನ್ದಾಗ್ಂ॑ಸಿ॒ ವೈ ವಾ॒ಜಿನ॒ ಇತಿ॑ । ತಾನ್ಯೇ॒ವ ತ-ದ್ಯ॑ಜತಿ । ಋ॒ಖ್ಸಾ॒ಮೇ ವಾ ಇನ್ದ್ರ॑ಸ್ಯ॒ ಹರೀ॑ ಸೋಮ॒ಪಾನೌ᳚ । ತಯೋಃ᳚ ಪರಿ॒ಧಯ॑ ಆ॒ಧಾನ᳚ಮ್ । ವಾಜಿ॑ನ-ಮ್ಭಾಗ॒ಧೇಯ᳚ಮ್ ॥ 27 ॥

ಯದಪ್ರ॑ಹೃತ್ಯ ಪರಿ॒ಧೀಞ್ಜು॑ಹು॒ಯಾತ್ । ಅ॒ನ್ತರಾ॑ಧಾನಾಭ್ಯಾ-ಙ್ಘಾ॒ಸ-ಮ್ಪ್ರಯ॑ಚ್ಛೇತ್ । ಪ್ರ॒ಹೃತ್ಯ॑ ಪರಿ॒ಧೀಞ್ಜು॑ಹೋತಿ । ನಿರಾ॑ಧಾನಾಭ್ಯಾಮೇ॒ವ ಘಾ॒ಸ-ಮ್ಪ್ರಯ॑ಚ್ಛತಿ । ಬ॒ರ್॒ಹಿಷಿ॑ ವಿಷಿ॒ಞ್ಚನ್ವಾಜಿ॑ನ॒-ಮಾನ॑ಯತಿ । ಪ್ರ॒ಜಾ ವೈ ಬ॒ರ॒ಃಇಃ । ರೇತೋ॒ ವಾಜಿ॑ನಮ್ । ಪ್ರ॒ಜಾಸ್ವೇ॒ವ ರೇತೋ॑ ದಧಾತಿ । ಸ॒ಮು॒ಪ॒ಹೂಯ॑ ಭಖ್ಷಯನ್ತಿ । ಏ॒ತ-ಥ್ಸೋ॑ಮಪೀಥಾ॒ ಹ್ಯೇ॑ತೇ । ಅಥೋ॑ ಆ॒ತ್ಮನ್ನೇ॒ವ ರೇತೋ॑ ದಧತೇ । ಯಜ॑ಮಾನ ಉತ್ತ॒ಮೋ ಭ॑ಖ್ಷಯತಿ । ಪ॒ಶವೋ॒ ವೈ ವಾಜಿ॑ನಮ್ । ಯಜ॑ಮಾನ ಏ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯನ್ತಿ ॥ 28 ॥
(ಲೋ॒ಕೋ - ಬ॑ಹುರೂ॒ಪ-ಮ್ಭ॑ವ॒ - ತ್ಯಾಜ್ಯ॑ಭಾಗೌ - ಪ॒ಶವ॒ ಆಜ್ಯ॑ - ಮವ॒ದ್ಯೇ - ದಾ॑ಹವ॒ನೀಯಃ॑ - ಪ್ರ॒ತ್ಯಕ್ - ತಸ್ಮಾ॒-ತ್ಪ್ರತಿ॑ಷ್ಠಿತೋ ಹೋತ॒ವ್ಯೋ॑ - ಭಾಗ॒ಧೇಯ॑ - ಮೇ॒ತೇ ಚ॒ತ್ವಾರಿ॑ ಚ) (ಅ. 3)

ಅನುವಾಕಂ 4 - ವರುಣಪ್ರಘಾಸಾಃ
ಪ್ರ॒ಜಾಪ॑ತಿ-ಸ್ಸವಿ॒ತಾ ಭೂ॒ತ್ವಾ ಪ್ರ॒ಜಾ ಅ॑ಸೃಜತ । ತಾ ಏ॑ನ॒ಮತ್ಯ॑ಮನ್ಯನ್ತ । ತಾ ಅ॑ಸ್ಮಾ॒ದಪಾ᳚ಕ್ರಾಮನ್ನ್ । ತಾ ವರು॑ಣೋ ಭೂ॒ತ್ವಾ ಪ್ರ॒ಜಾ ವರು॑ಣೇನಾಗ್ರಾಹಯತ್ । ತಾಃ ಪ್ರ॒ಜಾ ವರು॑ಣಗೃಹೀತಾಃ । ಪ್ರ॒ಜಾಪ॑ತಿ॒-ಮ್ಪುನ॒ರುಪಾ॑ಧಾವನ್ನಾ॒ಥ-ಮಿ॒ಚ್ಛಮಾ॑ನಾಃ । ಸ ಏ॒ತಾನ್-ಪ್ರ॒ಜಾಪ॑ತಿ-ರ್ವರುಣ ಪ್ರಘಾ॒ಸಾನ॑ಪಶ್ಯತ್ । ತಾನ್ನಿರ॑ವಪತ್ । ತೈರ್ವೈ ಸ ಪ್ರ॒ಜಾ ವ॑ರುಣ-ಪಾ॒ಶಾದ॑ಮುಞ್ಚತ್ । ಯ-ದ್ವ॑ರುಣ-ಪ್ರಘಾ॒ಸಾ ನಿ॑ರು॒ಪ್ಯನ್ತೇ᳚ ॥ 29 ॥

ಪ್ರ॒ಜಾನಾ॒ಮವ॑ರುಣಗ್ರಾಹಾಯ । ತಾಸಾ॒-ನ್ದಖ್ಷಿ॑ಣೋ ಬಾ॒ಹು-ರ್ನ್ಯ॑ಕ್ನ॒ ಆಸೀ᳚ತ್ । ಸ॒ವ್ಯಃ ಪ್ರಸೃ॑ತಃ । ಸ ಏ॒ತಾ-ನ್ದ್ವಿ॒ತೀಯಾ᳚-ನ್ದಖ್ಷಿಣ॒ತೋ ವೇದಿ॒ಮುದ॑ಹನ್ನ್ । ತತೋ॒ ವೈ ಸ ಪ್ರ॒ಜಾನಾ॒-ನ್ದಖ್ಷಿ॑ಣ-ಮ್ಬಾ॒ಹು-ಮ್ಪ್ರಾಸಾ॑ರಯತ್ । ಯ-ದ್ದ್ವಿ॒ತೀಯಾ᳚-ನ್ದಖ್ಷಿಣ॒ತೋ ವೇದಿ॑ಮು॒ದ್ಧನ್ತಿ॑ । ಪ್ರ॒ಜಾನಾ॑ಮೇ॒ವ ತ-ದ್ಯಜ॑ಮಾನೋ॒ ದಖ್ಷಿ॑ಣ-ಮ್ಬಾ॒ಹು-ಮ್ಪ್ರಸಾ॑ರಯತಿ । ತಸ್ಮಾ᳚ಚ್ಚಾತುರ್ಮಾಸ್ಯಯಾ॒ಜ್ಯ॑ಮುಷ್ಮಿ॑ನ್ ಁಲೋ॒ಕ ಉ॑ಭ॒ಯಾಬಾ॑ಹುಃ । ಯ॒ಜ್ಞಾಭಿ॑ಜಿತ॒ಗ್ಗ್॒ ಹ್ಯ॑ಸ್ಯ । ಪೃ॒ಥ॒ಮಾ॒ತ್ರಾ-ದ್ವೇದೀ॒ ಅಸ॑ಭಿನ್ನ್ನೇ ಭವತಃ ॥ 30 ॥

ತಸ್ಮಾ᳚ತ್-ಪೃಥಮಾ॒ತ್ರಂ-ವ್ಯಁಗ್ಂಸೌ᳚ । ಉತ್ತ॑ರಸ್ಯಾಂ॒-ವೇಁದ್ಯಾ॑ಮುತ್ತರವೇ॒ದಿಮುಪ॑ ವಪತಿ । ಪ॒ಶವೋ॒ ವಾ ಉ॑ತ್ತರವೇ॒ದಿಃ । ಪ॒ಶೂನೇ॒ವಾವ॑ ರುನ್ಧೇ । ಅಥೋ॑ ಯಜ್ಞಪ॒ರುಷೋ-ಽನ॑ನ್ತರಿತ್ಯೈ । ಏ॒ತ-ದ್ಬ್ರಾ᳚ಹ್ಮಣಾನ್ಯೇ॒ವ ಪಞ್ಚ॑ ಹ॒ವೀಗ್ಂಷಿ॑ । ಅಥೈ॒ಷ ಐ᳚ನ್ದ್ರಾ॒ಗ್ನೋ ಭ॑ವತಿ । ಪ್ರಾ॒ಣಾ॒ಪಾ॒ನೌ ವಾ ಏ॒ತೌ ದೇ॒ವಾನಾ᳚ಮ್ । ಯದಿ॑ನ್ದ್ರಾ॒ಗ್ನೀ । ಯದೈ᳚ನ್ದ್ರಾ॒ಗ್ನೋ ಭವ॑ತಿ ॥ 31 ॥

ಪ್ರಾ॒ಣಾ॒ಪಾ॒ನಾವೇ॒ವಾವ॑ ರುನ್ಧೇ । ಓಜೋ॒ ಬಲಂ॒-ವಾಁ ಏ॒ತೌ ದೇ॒ವಾನಾ᳚ಮ್ । ಯದಿ॑ನ್ದ್ರಾ॒ಗ್ನೀ । ಯದೈ᳚ನ್ದ್ರಾ॒ಗ್ನೋ ಭವ॑ತಿ । ಓಜೋ॒ ಬಲ॑ಮೇ॒ವಾವ॑ ರುನ್ಧೇ । ಮಾ॒ರು॒ತ್ಯಾ॑ಮಿಖ್ಷಾ॑ ಭವತಿ । ವಾ॒ರು॒ಣ್ಯಾ॑ಮಿಖ್ಷಾ᳚ । ಮೇ॒ಷೀ ಚ॑ ಮೇ॒ಷಶ್ಚ॑ ಭವತಃ । ಮಿ॒ಥು॒ನಾ ಏ॒ವ ಪ್ರ॒ಜಾ ವ॑ರುಣಪಾ॒ಶಾ-ನ್ಮು॑ಞ್ಚತಿ । ಲೋ॒ಮ॒ಶೌ ಭ॑ವತೋ ಮೇದ್ಧ್ಯ॒ತ್ವಾಯ॑ ॥ 32 ॥

ಶ॒ಮೀ॒ಪ॒ರ್ಣಾನ್ಯುಪ॑ ವಪತಿ । ಘಾ॒ಸಮೇ॒ವಾಭ್ಯಾ॒ಮಪಿ॑ ಯಚ್ಛತಿ । ಪ್ರ॒ಜಾಪ॑ತಿಮ॒ನ್ನಾದ್ಯ॒-ನ್ನೋಪಾ॑ನಮತ್ । ಸ ಏ॒ತೇನ॑ ಶ॒ತೇದ್ಧ್ಮೇ॑ನ ಹ॒ವಿಷಾ॒ ಽನ್ನಾದ್ಯ॒ಮ-ವಾ॑ರುನ್ಧ । ಯ-ತ್ಪ॑ರ-ಶ್ಶ॒ತಾನಿ॑ ಶಮೀಪ॒ರ್ಣಾನಿ॒ ಭವ॑ನ್ತಿ । ಅ॒ನ್ನಾದ್ಯ॒ಸ್ಯಾವ॑-ರುದ್ಧ್ಯೈ । ಸೌ॒ಮ್ಯಾನಿ॒ ವೈ ಕ॒ರೀರಾ॑ಣಿ । ಸೌ॒ಮ್ಯಾ ಖಲು॒ ವಾ ಆಹು॑ತಿ-ರ್ದಿ॒ವೋ ವೃಷ್ಟಿ॑-ಞ್ಚ್ಯಾವಯತಿ । ಯತ್-ಕ॒ರೀರಾ॑ಣಿ॒ ಭವ॑ನ್ತಿ । ಸೌ॒ಮ್ಯಯೈ॒ವಾಹು॑ತ್ಯಾ ದಿ॒ವೋ ವೃಷ್ಟಿ॒ಮವ॑ ರುನ್ಧೇ । ಕಾ॒ಯ ಏಕ॑ಕಪಾಲೋ ಭವತಿ । ಪ್ರ॒ಜಾನಾ᳚-ಙ್ಕ॒ತ್ವಾಂ​ಯಁ॑ । ಪ್ರ॒ತಿ॒ಪೂ॒ರು॒ಷ-ಙ್ಕ॑ರಮ್ಭ ಪಾ॒ತ್ರಾಣಿ॑ ಭವನ್ತಿ । ಜಾ॒ತಾ ಏ॒ವ ಪ್ರ॒ಜಾ ವ॑ರುಣಪಾ॒ಶಾ-ನ್ಮು॑ಞ್ಚತಿ । ಏಕ॒-ಮತಿ॑ರಿಕ್ತಮ್ । ಜ॒ನಿ॒ಷ್ಯಮಾ॑ಣಾ ಏ॒ವ ಪ್ರ॒ಜಾ ವ॑ರುಣಪಾ॒ಶಾ-ನ್ಮು॑ಞ್ಚತಿ ॥ 33 ॥
(ನಿ॒ರು॒ಪ್ಯನ್ತೇ॑- ಭವತೋ॒ - ಭವ॑ತಿ - ಮೇದ್ಧ್ಯ॒ತ್ವಾಯ॑ - ರುನ್ಧೇ॒ ಷಟ್ಚ॑) (ಅ. 4)

ಅನುವಾಕಂ 5 - ತಚ್ಛೇಷಃ
ಉತ್ತ॑ರಸ್ಯಾಂ॒-ವೇಁದ್ಯಾ॑ಮ॒ನ್ಯಾನಿ॑ ಹ॒ವೀಗ್ಂಷಿ॑ ಸಾದಯತಿ । ದಖ್ಷಿ॑ಣಾಯಾ-ಮ್ಮಾರು॒ತೀಮ್ । ಅ॒ಪ॒ಧು॒ರಮೇ॒ವೈನಾ॑ ಯುನಕ್ತಿ । ಅಥೋ॒ ಓಜ॑ ಏ॒ವಾಸಾ॒ಮವ॑ಹರತಿ । ತಸ್ಮಾ॒-ದ್ಬ್ರಹ್ಮ॑ಣಶ್ಚ ಖ್ಷ॒ತ್ರಾಚ್ಚ॒ ವಿಶೋ᳚-ಽನ್ಯತೋ-ಽಪಕ್ರ॒ಮಿಣೀಃ᳚ । ಮಾ॒ರು॒ತ್ಯಾ ಪೂರ್ವ॑ಯಾ॒ ಪ್ರಚ॑ರತಿ । ಅನೃ॑ತಮೇ॒ವಾವ॑ ಯಜತೇ । ವಾ॒ರು॒ಣ್ಯೋತ್ತ॑ರಯಾ । ಅ॒ನ್ತ॒ತ ಏ॒ವ ವರು॑ಣ॒ಮವ॑-ಯಜತೇ । ಯದೇ॒ವಾದ್ಧ್ವ॒ರ್ಯುಃ ಕ॒ರೋತಿ॑ ॥ 34 ॥

ತ-ತ್ಪ್ರ॑ತಿಪ್ರಸ್ಥಾ॒ತಾ ಕ॑ರೋತಿ । ತಸ್ಮಾ॒-ದ್ಯಚ್ಛ್ರೇಯಾ᳚ನ್-ಕ॒ರೋತಿ॑ । ತ-ತ್ಪಾಪೀ॑ಯಾನ್-ಕರೋತಿ । ಪತ್ನೀಂ᳚ ಁವಾಚಯತಿ । ಮೇದ್ಧ್ಯಾ॑ಮೇ॒ವೈನಾ᳚-ಙ್ಕರೋತಿ । ಅಥೋ॒ ತಪ॑ ಏ॒ವೈನಾ॒ಮುಪ॑ ನಯತಿ । ಯಜ್ಜಾ॒ರಗ್ಂ ಸನ್ತ॒-ನ್ನ ಪ್ರ॑ಬ್ರೂ॒ಯಾತ್ । ಪ್ರಿ॒ಯ-ಞ್ಜ್ಞಾ॒ತಿಗ್ಂ ರು॑ನ್ಧ್ಯಾತ್ । ಅ॒ಸೌ ಮೇ॑ ಜಾ॒ರ ಇತಿ॒ ನಿರ್ದಿ॑ಶೇತ್ । ನಿ॒ರ್ದಿಶ್ಯೈ॒ವೈನಂ॑-ವಁರುಣಪಾ॒ಶೇನ॑ ಗ್ರಾಹಯತಿ ॥ 35 ॥

ಪ್ರ॒ಘಾ॒ಸ್ಯಾನ್॑. ಹವಾಮಹ॒ ಇತಿ॒ ಪತ್ನೀ॑-ಮು॒ದಾನ॑ಯತಿ । ಅಹ್ವ॑ತೈ॒ವೈನಾ᳚ಮ್ । ಯತ್-ಪತ್ನೀ॑ ಪುರೋನುವಾ॒ಕ್ಯಾ॑ಮನು ಬ್ರೂ॒ಯಾತ್ । ನಿರ್ವೀ᳚ರ್ಯೋ॒ ಯಜ॑ಮಾನ-ಸ್ಸ್ಯಾತ್ । ಯಜ॑ಮಾ॒ನೋ ಽನ್ವಾ॑ಹ । ಆ॒ತ್ಮನ್ನೇ॒ವ ವೀ॒ರ್ಯ॑-ನ್ಧತ್ತೇ । ಉ॒ಭೌ ಯಾ॒ಜ್ಯಾಗ್ಂ॑ ಸವೀರ್ಯ॒ತ್ವಾಯ॑ । ಯದ್ಗ್ರಾಮೇ॒ ಯದರ॑ಣ್ಯ॒ ಇತ್ಯಾ॑ಹ । ಯ॒ಥೋ॒ದಿ॒ತಮೇ॒ವ ವರು॑ಣ॒ಮವ॑ ಯಜತೇ । ಯ॒ಜ॒ಮಾ॒ನ॒ದೇ॒ವ॒ತ್ಯೋ॑ ವಾ ಆ॑ಹವ॒ನೀಯಃ॑ ॥ 36 ॥

ಭ್ರಾ॒ತೃ॒ವ್ಯ॒ ದೇ॒ವ॒ತ್ಯೋ॑ ದಖ್ಷಿ॑ಣಃ । ಯದಾ॑ಹವ॒ನೀಯೇ॑ ಜುಹು॒ಯಾತ್ । ಯಜ॑ಮಾನಂ-ವಁರುಣಪಾ॒ಶೇನ॑ ಗ್ರಾಹಯೇತ್ । ದಖ್ಷಿ॑ಣೇ॒ ಽಗ್ನೌ ಜು॑ಹೋತಿ । ಭ್ರಾತೃ॑ವ್ಯಮೇ॒ವ ವ॑ರುಣಪಾ॒ಶೇನ॑ ಗ್ರಾಹಯತಿ । ಶೂರ್ಪೇ॑ಣ ಜುಹೋತಿ । ಅನ್ಯ॑ಮೇ॒ವ ವರು॑ಣ॒ಮವ॑ಯಜತೇ । ಶೀ॒ರ್॒ಷನ್ನ॑ಧಿ ನಿ॒ಧಾಯ॑ ಜುಹೋತಿ । ಶೀ॒ರ್॒ಷ॒ತ ಏ॒ವ ವರು॑ಣ॒ಮವ॑ ಯಜತೇ । ಪ್ರ॒ತ್ಯನ್ತಿಷ್ಠ॑ಞ್ಜುಹೋತಿ ॥ 37 ॥

ಪ್ರ॒ತ್ಯಙ್ಙೇ॒ವ ವರು॑ಣಪಾ॒ಶಾ-ನ್ನಿರ್ಮು॑ಚ್ಯತೇ । ಅಕ್ರ॒ನ್ಕರ್ಮ॑ ಕರ್ಮ॒ಕೃತ॒ ಇತ್ಯಾ॑ಹ । ದೇ॒ವಾನೃ॒ಣ-ನ್ನಿ॑ರವ॒ದಾಯ॑ । ಅ॒ನೃ॒ಣಾ ಗೃ॒ಹಾನುಪ॒-ಪ್ರೇತೇತಿ॒ ವಾವೈತದಾ॑ಹ । ವರು॑ಣ ಗೃಹೀತಂ॒-ವಾಁ ಏ॒ತ-ದ್ಯ॒ಜ್ಞಸ್ಯ॑ । ಯ-ದ್ಯಜು॑ಷಾ ಗೃಹೀ॒ತಸ್ಯಾ॑ತಿ॒ರಿಚ್ಯ॑ತೇ । ತುಷಾ᳚ಶ್ಚ ನಿಷ್ಕಾ॒ಸಶ್ಚ॑ । ತುಷೈ᳚ಶ್ಚ ನಿಷ್ಕಾ॒ಸೇನ॑ ಚಾವಭೃ॒ಥಮವೈ॑ತಿ । ವರು॑ಣ-ಗೃಹೀತೇನೈ॒ವ ವರು॑ಣ॒ಮವ॑ಯಜತೇ । ಅ॒ಪೋ॑-ಽವಭೃ॒ಥಮವೈ॑ತಿ ॥ 38 ॥

ಅ॒ಫ್ಸು ವೈ ವರು॑ಣಃ । ಸಾ॒ಖ್ಷಾದೇ॒ವ ವರು॑ಣ॒ಮವ॑ ಯಜತೇ । ಪ್ರತಿ॑ಯುತೋ॒ ವರು॑ಣಸ್ಯ॒ ಪಾಶ॒ ಇತ್ಯಾ॑ಹ । ವ॒ರು॒ಣ॒ಪಾ॒ಶಾದೇ॒ವ ನಿರ್ಮು॑ಚ್ಯತೇ । ಅಪ್ರ॑ತೀಖ್ಷ॒-ಮಾಯ॑ನ್ತಿ । ವರು॑ಣಸ್ಯಾ॒ನ್ತರ್​ಹಿ॑ತ್ಯೈ । ಏಧೋ᳚-ಽಸ್ಯೇಧಿಷೀ॒ಮಹೀತ್ಯಾ॑ಹ । ಸ॒ಮಿಧೈ॒ವಾಗ್ನಿ-ನ್ನ॑ಮ॒ಸ್ಯನ್ತ॑ ಉ॒ಪಾಯ॑ನ್ತಿ । ತೇಜೋ॑-ಽಸಿ॒ ತೇಜೋ॒ ಮಯಿ॑ ಧೇ॒ಹೀತ್ಯಾ॑ಹ । ತೇಜ॑ ಏ॒ವಾತ್ಮನ್ಧ॑ತ್ತೇ ॥ 39 ॥
(ಕ॒ರೋತಿ॑ - ಗ್ರಾಹಯ - ತ್ಯಾಹವ॒ನೀಯ॒ - ಸ್ತಿಷ್ಠ॑ಞ್ಜುಹೋ - ತ್ಯ॒ಪೋ॑-ಽವಭೃ॒ಥಮವೈ॑ತಿ - ಧತ್ತೇ) (ಅ. 5)

ಅನುವಾಕಂ 6 - ಸಾಕಮೇಧಾಃ
ದೇ॒ವಾ॒ಸು॒ರಾ-ಸ್ಸಂ​ಯಁ॑ತ್ತಾ ಆಸನ್ನ್ । ಸೋ᳚-ಽಗ್ನಿರ॑ಬ್ರವೀತ್ । ಮಮೇ॒ಯ-ಮನೀ॑ಕವತೀ ತ॒ನೂಃ । ತಾ-ಮ್ಪ್ರೀ॑ಣೀತ । ಅಥಾಸು॑ರಾನ॒ಭಿ ಭ॑ವಿಷ್ಯ॒ಥೇತಿ॑ । ತೇ ದೇ॒ವಾ ಅ॒ಗ್ನಯೇ-ಽನೀ॑ಕವತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ॑ವಪನ್ನ್ । ಸೋ᳚-ಽಗ್ನಿರನೀ॑ಕವಾ॒ನ್-ಥ್ಸ್ವೇನ॑ ಭಾಗ॒ಧೇಯೇ॑ನ ಪ್ರೀ॒ತಃ । ಚ॒ತು॒ರ್ಧಾ ಽನೀ॑ಕಾ-ನ್ಯಜನಯತ । ತತೋ॑ ದೇ॒ವಾ ಅಭ॑ವನ್ನ್ । ಪರಾ ಽಸು॑ರಾಃ ॥ 40 ॥

ಯದ॒ಗ್ನಯೇ-ಽನೀ॑ಕವತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ-ನ್ನಿ॒ರ್ವಪ॑ತಿ । ಅ॒ಗ್ನಿಮೇ॒ವಾನೀ॑ಕವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॑ನ ಪ್ರೀಣಾತಿ । ಸೋ᳚-ಽಗ್ನಿರನೀ॑ಕವಾ॒ನ್-ಥ್ಸ್ವೇನ॑ ಭಾಗ॒ಧೇಯೇ॑ನ ಪ್ರೀ॒ತಃ । ಚ॒ತು॒ರ್ಧಾ ಽನೀ॑ಕಾನಿ ಜನಯತೇ । ಅ॒ಸೌ ವಾ ಆ॑ದಿ॒ತ್ಯೋ᳚-ಽಗ್ನಿ-ರನೀ॑ಕವಾನ್ । ತಸ್ಯ॑ ರ॒ಶ್ಮಯೋ-ಽನೀ॑ಕಾನಿ । ಸಾ॒ಕಗ್ಂ ಸೂರ್ಯೇ॑ಣೋದ್ಯ॒ತಾ ನಿರ್ವ॑ಪತಿ । ಸಾ॒ಖ್ಷಾದೇ॒ವಾಸ್ಮಾ॒ ಅನೀ॑ಕಾನಿ ಜನಯತಿ । ತೇ-ಽಸು॑ರಾಃ॒ ಪರಾ॑ಜಿತಾ॒ ಯನ್ತಃ॑ । ದ್ಯಾವಾ॑ಪೃಥಿ॒ವೀ ಉಪಾ᳚ಶ್ರಯನ್ನ್ ॥ 41 ॥

ತೇ ದೇ॒ವಾ ಮ॒ರುದ್ಭ್ಯ॑-ಸ್ಸಾನ್ತಪ॒ನೇಭ್ಯ॑ಶ್ಚ॒ರು-ನ್ನಿರ॑ವಪನ್ನ್ । ತಾ-ನ್ದ್ಯಾವಾ॑ಪೃಥಿ॒ವೀಭ್ಯಾ॑-ಮೇ॒ವೋಭ॒ಯತ॒-ಸ್ಸಮ॑ತಪನ್ನ್ । ಯನ್ಮ॒ರುದ್ಭ್ಯ॑-ಸ್ಸಾನ್ತಪ॒ನೇಭ್ಯ॑ಶ್ಚ॒ರು-ನ್ನಿ॒ರ್ವಪ॑ತಿ । ದ್ಯಾವಾ॑ಪೃಥಿ॒ವೀಭ್ಯಾ॑ಮೇ॒ವ ತದು॑ಭ॒ಯತೋ॒ ಯಜ॑ಮಾನೋ॒ ಭ್ರಾತೃ॑ವ್ಯಾ॒ನ್-ಥ್ಸನ್ತ॑ಪತಿ । ಮ॒ದ್ಧ್ಯನ್ದಿ॑ನೇ॒ ನಿರ್ವ॑ಪತಿ । ತರ್​ಹಿ॒ ಹಿ ತೇ-ಽಖ್ಷ್ಣಿ॑ಷ್ಠ॒-ನ್ತಪ॑ತಿ । ಚ॒ರುರ್ಭ॑ವತಿ । ಸ॒ರ್ವತ॑ ಏ॒ವೈನಾ॒ನ್-ಥ್ಸನ್ತ॑ಪತಿ । ತೇ ದೇ॒ವಾ-ಶ್ಶ್ವೋ॑ ವಿಜ॒ಯಿನ॒-ಸ್ಸನ್ತಃ॑ । ಸರ್ವಾ॑ಸಾ-ನ್ದು॒ಗ್ಧೇ ಗೃ॑ಹಮೇ॒ಧೀಯ॑-ಞ್ಚ॒ರು-ನ್ನಿರ॑ವಪನ್ನ್ ॥ 42 ॥

ಆಶಿ॑ತಾ ಏ॒ವಾದ್ಯೋಪ॑ವಸಾಮ । ಕಸ್ಯ॒ ವಾ-ಽಹೇ॒ದಮ್ । ಕಸ್ಯ॑ ವಾ॒ ಶ್ವೋ ಭ॑ವಿ॒ತೇತಿ॑ । ಸ ಶೃ॒ತೋ॑-ಽಭವತ್ । ತಸ್ಯಾಹು॑ತಸ್ಯ॒ ನಾಶ್ಞನ್ನ್॑ । ನ ಹಿ ದೇ॒ವಾ ಅಹು॑ತಸ್ಯಾ॒ಶ್ಞನ್ತಿ॑ । ತೇ᳚-ಽಬ್ರುವನ್ನ್ । ಕಸ್ಮಾ॑ ಇ॒ಮಗ್ಂ ಹೋ᳚ಷ್ಯಾಮ॒ ಇತಿ॑ । ಮ॒ರುದ್ಭ್ಯೋ॑ ಗೃಹಮೇ॒ಧಿಭ್ಯ॒ ಇತ್ಯ॑ಬ್ರುವನ್ನ್ । ತ-ಮ್ಮ॒ರುದ್ಭ್ಯೋ॑ ಗೃಹಮೇ॒ಧಿಭ್ಯೋ॑-ಽಜುಹವುಃ ॥ 43 ॥

ತತೋ॑ ದೇ॒ವಾ ಅಭ॑ವನ್ನ್ । ಪರಾ-ಽಸು॑ರಾಃ । ಯಸ್ಯೈ॒ವಂ-ವಿಁ॒ದುಷೋ॑ ಮ॒ರುದ್ಭ್ಯೋ॑ ಗೃಹಮೇ॒ಧಿಭ್ಯೋ॑ ಗೃ॒ಹೇ ಜುಹ್ವ॑ತಿ । ಭವ॑ತ್ಯಾ॒ತ್ಮನಾ᳚ । ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ । ಯದ್ವೈ ಯ॒ಜ್ಞಸ್ಯ॑ ಪಾಕ॒ತ್ರಾ ಕ್ರಿ॒ಯತೇ᳚ । ಪ॒ಶ॒ವ್ಯ॑-ನ್ತತ್ । ಪಾ॒ಕ॒ತ್ರಾ ವಾ ಏ॒ತತ್ಕ್ರಿ॑ಯತೇ । ಯನ್ನೇದ್ಧ್ಮಾಬ॒ರ್॒ಹಿ-ರ್ಭವ॑ತಿ । ನ ಸಾ॑ಮಿಧೇ॒ನೀ-ರ॒ನ್ವಾಹ॑ ॥ 44 ॥

ನ ಪ್ರ॑ಯಾ॒ಜಾ ಇ॒ಜ್ಯನ್ತೇ᳚ । ನಾನೂ॑ಯಾ॒ಜಾಃ । ಯ ಏ॒ವಂ-ವೇಁದ॑ । ಪ॒ಶು॒ಮಾ-ನ್ಭ॑ವತಿ । ಆಜ್ಯ॑ಭಾಗೌ ಯಜತಿ । ಯ॒ಜ್ಞಸ್ಯೈ॒ವ ಚಖ್ಷು॑ಷೀ॒ ನಾನ್ತರೇ॑ತಿ । ಮ॒ರುತೋ॑ ಗೃಹಮೇ॒ಧಿನೋ॑ ಯಜತಿ । ಭಾ॒ಗ॒ಧೇಯೇ॑-ನೈ॒ವೈನಾ॒ನ್-ಥ್ಸಮ॑ರ್ಧಯತಿ । ಅ॒ಗ್ನಿಗ್ಗ್​ ಸ್ವಿ॑ಷ್ಟ॒ಕೃತಂ॑-ಯಁಜತಿ॒ ಪ್ರತಿ॑ಷ್ಠಿತ್ಯೈ । ಇಡಾ᳚ನ್ತೋ ಭವತಿ । ಪ॒ಶವೋ॒ ವಾ ಇಡಾ᳚ । ಪ॒ಶುಷ್ವೇ॒ವೋಪರಿ॑ಷ್ಟಾ॒-ತ್ಪ್ರತಿ॑ ತಿಷ್ಠತಿ ॥ 45 ॥
(ಅಸು॑ರಾ - ಅಶ್ರಯನ್ - ಗೃಹಮೇ॒ಧೀಯಂ॑ ಚ॒ರು-ನ್ನಿರ॑ವಪನ್ - ನಜುಹವು - ರ॒ನ್ವಾ - ಹೇಡಾ᳚ನ್ತೋ ಭವತಿ॒ ದ್ವೇ ಚ॑) (ಅ. 6)

ಅನುವಾಕಂ 7 - ತಚ್ಛೇಷಃ
ಯತ್ಪತ್ನೀ॑ ಗೃಹಮೇ॒ಧೀಯ॑-ಸ್ಯಾಶ್ಞೀ॒ಯಾತ್ । ಗೃ॒ಹ॒ಮೇ॒ದ್ಧ್ಯೇ॑ವ ಸ್ಯಾ᳚ತ್ । ವಿ ತ್ವ॑ಸ್ಯ ಯ॒ಜ್ಞ ಋ॑ಧ್ಯೇತ । ಯನ್ನಾಶ್ಞೀ॒ಯಾತ್ । ಅಗೃ॑ಹಮೇಧೀ ಸ್ಯಾತ್ । ನಾಸ್ಯ॑ ಯ॒ಜ್ಞೋ ವ್ಯೃ॑ದ್ಧ್ಯೇತ । ಪ್ರತಿ॑ವೇಶ-ಮ್ಪಚೇಯುಃ । ತಸ್ಯಾ᳚ಶ್ಞೀಯಾತ್ । ಗೃ॒ಹ॒ಮೇ॒ದ್ಧ್ಯೇ॑ವ ಭ॑ವತಿ । ನಾಸ್ಯ॑ ಯ॒ಜ್ಞೋ ವ್ಯೃ॑ದ್ಧ್ಯತೇ ॥ 46 ॥

ತೇ ದೇ॒ವಾ ಗೃ॑ಹಮೇ॒ಧೀಯೇ॑ನೇ॒ಷ್ಟ್ವಾ । ಆಶಿ॑ತಾ ಅಭವನ್ನ್ । ಆಞ್ಜ॑ತಾ॒ಭ್ಯ॑ಞ್ಜತ । ಅನು॑ ವ॒ಥ್ಸಾ-ನ॑ವಾಸಯನ್ನ್ । ತೇಭ್ಯೋ-ಽಸು॑ರಾಃ॒, ಖ್ಷುಧ॒-ಮ್ಪ್ರಾಹಿ॑ಣ್ವನ್ನ್ । ಸಾ ದೇ॒ವೇಷು॑ ಲೋ॒ಕಮವಿ॑ತ್ತ್ವಾ । ಅಸು॑ರಾ॒ನ್-ಪುನ॑ರಗಚ್ಛತ್ । ಗೃ॒ಹ॒ಮೇ॒ಧೀಯೇ॑ನೇ॒ಷ್ಟ್ವಾ । ಆಶಿ॑ತಾ ಭವನ್ತಿ । ಆಞ್ಜ॑ತೇ॒-ಽಭ್ಯ॑ಞ್ಜತೇ ॥ 47 ॥

ಅನು॑ ವ॒ಥ್ಸಾನ್. ವಾ॑ಸಯನ್ತಿ । ಭ್ರಾತೃ॑ವ್ಯಾಯೈ॒ವ ತ-ದ್ಯಜ॑ಮಾನಃ॒, ಖ್ಷುಧ॒-ಮ್ಪ್ರಹಿ॑ಣೋತಿ । ತೇ ದೇ॒ವಾ ಗೃ॑ಹಮೇ॒ಧೀಯೇ॑ನೇ॒ಷ್ಟ್ವಾ । ಇನ್ದ್ರಾ॑ಯ ನಿಷ್ಕಾ॒ಸ-ನ್ನ್ಯ॑ದಧುಃ । ಅ॒ಸ್ಮಾನೇ॒ವ ಶ್ವ ಇನ್ದ್ರೋ॒ ನಿಹಿ॑ತಭಾಗ ಉಪಾವರ್ತಿ॒ತೇತಿ॑ । ತಾನಿನ್ದ್ರೋ॒ ನಿಹಿ॑ತಭಾಗ ಉ॒ಪಾವ॑ರ್ತತ । ಗೃ॒ಹ॒ಮೇ॒ಧೀಯೇ॑ನೇ॒ಷ್ಟ್ವಾ । ಇನ್ದ್ರಾ॑ಯ ನಿಷ್ಕಾ॒ಸ-ನ್ನಿದ॑ದ್ಧ್ಯಾತ್ । ಇನ್ದ್ರ॑ ಏ॒ವೈನ॒-ನ್ನಿಹಿ॑ತಭಾಗ ಉ॒ಪಾವ॑ರ್ತತೇ । ಗಾರ್​ಹ॑ಪತ್ಯೇ ಜುಹೋತಿ ॥ 48 ॥

ಭಾ॒ಗ॒ಧೇಯೇ॑ನೇ॒ವೈನ॒ಗ್ಂ॒ ಸಮ॑ರ್ಧಯತಿ । ಋ॒ಷ॒ಭಮಾಹ್ವ॑ಯತಿ । ವ॒ಷ॒ಟ್ಕಾ॒ರ ಏ॒ವಾಸ್ಯ॒ ಸಃ । ಅಥೋ॑ ಇನ್ದ್ರಿ॒ಯಮೇ॒ವ ತ-ದ್ವೀ॒ರ್ಯಂ॑-ಯಁಜ॑ಮಾನೋ॒ ಭ್ರಾತೃ॑ವ್ಯಸ್ಯ ವೃಙ್ಕ್ತೇ । ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ । ಪರಾ᳚-ಮ್ಪರಾ॒ವತ॑-ಮಗಚ್ಛತ್ । ಅಪಾ॑ರಾಧ॒ಮಿತಿ॒ ಮನ್ಯ॑ಮಾನಃ । ಸೋ᳚-ಽಬ್ರವೀತ್ । ಕ ಇ॒ದಂ-ವೇಁ॑ದಿಷ್ಯ॒ತೀತಿ॑ । ತೇ᳚-ಽಬ್ರುವ-ನ್ಮ॒ರುತೋ॒ ವರಂ॑-ವೃಁಣಾಮಹೈ ॥ 49 ॥

ಅಥ॑ ವ॒ಯಂ-ವೇಁ॑ದಾಮ । ಅ॒ಸ್ಮಭ್ಯ॑ಮೇ॒ವ ಪ್ರ॑ಥ॒ಮಗ್ಂ ಹ॒ವಿರ್ನಿರು॑ಪ್ಯಾತಾ॒ ಇತಿ॑ । ತ ಏ॑ನ॒ಮದ್ಧ್ಯ॑-ಕ್ರೀಡನ್ನ್ । ತತ್ಕ್ರೀ॒ಡಿನಾ᳚-ಙ್ಕ್ರೀಡಿ॒ತ್ವಮ್ । ಯ-ನ್ಮ॒ರುದ್ಭ್ಯಃ॑ ಕ್ರೀ॒ಡಿಭ್ಯಃ॑ ಪ್ರಥ॒ಮಗ್ಂ ಹ॒ವಿರ್ನಿ॑ರು॒ಪ್ಯತೇ॒ ವಿಜಿ॑ತ್ಯೈ । ಸಾ॒ಕಗ್ಂ ಸೂರ್ಯೇ॑ಣೋದ್ಯ॒ತಾ ನಿರ್ವ॑ಪತಿ । ಏ॒ತಸ್ಮಿ॒ನ್ ವೈ ಲೋ॒ಕ ಇನ್ದ್ರೋ॑ ವೃ॒ತ್ರಮ॑ಹ॒ನ್-ಥ್ಸಮೃ॑ದ್ಧ್ಯೈ । ಏ॒ತ-ದ್ಬ್ರಾ᳚ಹ್ಮಣಾನ್ಯೇ॒ವ ಪಞ್ಚ॑ ಹ॒ವೀಗ್ಂಷಿ॑ । ಏ॒ತ-ದ್ಬ್ರಾ᳚ಹ್ಮಣ ಐನ್ದ್ರಾ॒ಗ್ನಃ । ಅಥೈ॒ಷ ಐ॒ನ್ದ್ರಶ್ಚ॒ರು-ರ್ಭ॑ವತಿ ॥ 50 ॥

ಉ॒ದ್ಧಾ॒ರಂ-ವಾಁ ಏ॒ತಮಿನ್ದ್ರ॒ ಉದ॑ಹರತ । ವೃ॒ತ್ರಗ್ಂ ಹ॒ತ್ವಾ । ಅ॒ನ್ಯಾಸು॑ ದೇ॒ವತಾ॒ಸ್ವಧಿ॑ । ಯದೇ॒ಷ ಐ॒ನ್ದ್ರ-ಶ್ಚ॒ರು-ರ್ಭವ॑ತಿ । ಉ॒ದ್ಧಾ॒ರಮೇ॒ವ ತಂ-ಯಁಜ॑ಮಾನ॒ ಉದ್ಧ॑ರತೇ । ಅ॒ನ್ಯಾಸು॑ ಪ್ರ॒ಜಾಸ್ವಧಿ॑ । ವೈ॒ಶ್ವ॒ಕ॒ರ್ಮ॒ಣ ಏಕ॑ಕಪಾಲೋ ಭವತಿ । ವಿಶ್ವಾ᳚ನ್ಯೇ॒ವ ತೇನ॒ ಕರ್ಮಾ॑ಣಿ॒ ಯಜ॑ಮಾ॒ನೋ ಽವ॑ರುನ್ಧೇ ॥ 51 ॥
(ಋ॒ದ್ಧ್ಯ॒ತೇ॒-ಽ-ಭ್ಯ॑ಞ್ಜತೇ-ಜುಹೋತಿ-ವೃಣಾಮಹೈ-ಭವತ್ಯ॒- +ಷ್ಟೌ ಚ॑) (ಅ. 7)

ಅನುವಾಕಂ 8 - ಪಿತೃಯಜ್ಞಃ
ವೈ॒ಶ್ವ॒ದೇ॒ವೇನ॒ ವೈ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ । ತಾ ವ॑ರುಣ-ಪ್ರಘಾ॒ಸೈ-ರ್ವ॑ರುಣಪಾ॒ಶಾದ॑ಮುಞ್ಚತ್ । ಸಾ॒ಕ॒ಮೇ॒ಧೈಃ ಪ್ರತ್ಯ॑ಸ್ಥಾಪಯತ್ । ತ್ರ್ಯ॑ಮ್ಬಕೈ ರು॒ದ್ರ-ನ್ನಿ॒ರವಾ॑ದಯತ । ಪಿ॒ತೃ॒ಯ॒ಜ್ಞೇನ॑ ಸುವ॒ರ್ಗಂ-ಲೋಁ॒ಕಮ॑ಗಮಯತ್ । ಯ-ದ್ವೈ᳚ಶ್ವದೇ॒ವೇನ॒ ಯಜ॑ತೇ । ಪ್ರ॒ಜಾ ಏ॒ವ ತ-ದ್ಯಜ॑ಮಾನ-ಸ್ಸೃಜತೇ । ತಾ ವ॑ರುಣ-ಪ್ರಘಾ॒ಸೈ-ರ್ವ॑ರುಣಪಾ॒ಶಾ-ನ್ಮು॑ಞ್ಚತಿ । ಸಾ॒ಕ॒ಮೇ॒ಧೈಃ ಪ್ರತಿ॑ಷ್ಠಾಪಯತಿ । ತ್ರ್ಯ॑ಮ್ಬಕೈರು॒ದ್ರ-ನ್ನಿ॒ರವ॑ದಯತೇ ॥ 52 ॥

ಪಿ॒ತೃ॒ಯ॒ಜ್ಞೇನ॑ ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ । ದ॒ಖ್ಷಿ॒ಣ॒ತಃ ಪ್ರಾ॑ಚೀನಾವೀ॒ತೀ ನಿರ್ವ॑ಪತಿ । ದ॒ಖ್ಷಿ॒ಣಾವೃ॒ದ್ಧಿ ಪಿ॑ತೃ॒ಣಾಮ್ । ಅನಾ॑ದೃತ್ಯ॒ ತತ್ । ಉ॒ತ್ತ॒ರ॒ತ ಏ॒ವೋಪ॒ವೀಯ॒ ನಿರ್ವ॑ಪೇತ್ । ಉ॒ಭಯೇ॒ ಹಿ ದೇ॒ವಾಶ್ಚ॑ ಪಿ॒ತರ॑ಶ್ಚೇ॒ಜ್ಯನ್ತೇ᳚ । ಅಥೋ॒ ಯದೇ॒ವ ದ॑ಖ್ಷಿಣಾ॒ರ್ಧೇ॑-ಽಧಿ॒ ಶ್ರಯ॑ತಿ । ತೇನ॑ ದಖ್ಷಿ॒ಣಾವೃ॑ತ್ । ಸೋಮಾ॑ಯ ಪಿತೃ॒ಮತೇ॑ ಪುರೋ॒ಡಾಶ॒ಗ್ಂ॒ ಷಟ್ಕ॑ಪಾಲ॒-ನ್ನಿರ್ವ॑ಪತಿ । ಸಂ॒​ವಁ॒ಥ್ಸ॒ರೋ ವೈ ಸೋಮಃ॑ ಪಿತೃ॒ಮಾನ್ ॥ 53 ॥

ಸಂ॒​ವಁ॒ಥ್ಸ॒ರಮೇ॒ವ ಪ್ರೀ॑ಣಾತಿ । ಪಿ॒ತೃಭ್ಯೋ॑ ಬರ್​ಹಿ॒ಷದ್ಭ್ಯೋ॑ ಧಾ॒ನಾಃ । ಮಾಸಾ॒ ವೈ ಪಿ॒ತರೋ॑ ಬರ್​ಹಿ॒ಷದಃ॑ । ಮಾಸಾ॑ನೇ॒ವ ಪ್ರೀ॑ಣಾತಿ । ಯಸ್ಮಿ॒ನ್ ವಾ ಋ॒ತೌ ಪುರು॑ಷಃ ಪ್ರ॒ಮೀಯ॑ತೇ । ಸೋ᳚-ಽಸ್ಯಾ॒ಮುಷ್ಮಿ॑ನ್ ಁಲೋ॒ಕೇ ಭ॑ವತಿ । ಬ॒ಹು॒ರೂ॒ಪಾ ಧಾ॒ನಾ ಭ॑ವನ್ತಿ । ಅ॒ಹೋ॒ರಾ॒ತ್ರಾಣಾ॑-ಮ॒ಭಿಜಿ॑ತ್ಯೈ । ಪಿ॒ತೃಭ್ಯೋ᳚ ಽಗ್ನಿಷ್ವಾ॒ತ್ತೇಭ್ಯೋ॑ ಮ॒ನ್ಥಮ್ । ಅ॒ರ್ಧ॒ಮಾ॒ಸಾ ವೈ ಪಿ॒ತರೋ᳚-ಽಗ್ನಿಷ್ವಾ॒ತ್ತಾಃ ॥ 54 ॥

ಅ॒ರ್ಧ॒ಮಾ॒ಸಾನೇ॒ವ ಪ್ರೀ॑ಣಾತಿ । ಅ॒ಭಿ॒ವಾ॒ನ್ಯಾ॑ಯೈ ದು॒ಗ್ಧೇ ಭ॑ವತಿ । ಸಾ ಹಿ ಪಿ॑ತೃದೇವ॒ತ್ಯ॑-ನ್ದು॒ಹೇ । ಯ-ತ್ಪೂ॒ರ್ಣಮ್ । ತ-ನ್ಮ॑ನು॒ಷ್ಯಾ॑ಣಾಮ್ । ಉ॒ಪ॒ರ್ಯ॒ರ್ಧೋ ದೇ॒ವಾನಾ᳚ಮ್ । ಅ॒ರ್ಧಃ ಪಿ॑ತೃ॒ಣಾಮ್ । ಅ॒ರ್ಧ ಉಪ॑ಮನ್ಥತಿ । ಅ॒ರ್ಧೋ ಹಿ ಪಿ॑ತೃ॒ಣಾಮ್ । ಏಕ॒ಯೋಪ॑ಮನ್ಥತಿ ॥ 55 ॥

ಏಕಾ॒ ಹಿ ಪಿ॑ತೃ॒ಣಾಮ್ । ದ॒ಖ್ಷಿ॒ಣೋಪ॑ಮನ್ಥತಿ । ದ॒ಖ್ಷಿ॒ಣಾ ವೃ॒ದ್ಧಿ ಪಿ॑ತೃ॒ಣಾಮ್ । ಅನಾ॑ರ॒ಭ್ಯೋಪ॑ಮನ್ಥತಿ । ತದ್ಧಿ ಪಿ॒ತೄನ್-ಗಚ್ಛ॑ತಿ । ಇ॒ಮಾ-ನ್ದಿಶಂ॒-ವೇಁದಿ॒ಮುದ್ಧ॑ನ್ತಿ । ಉ॒ಭಯೇ॒ ಹಿ ದೇ॒ವಾಶ್ಚ॑ ಪಿ॒ತರ॑ಶ್ಚೇ॒ಜ್ಯನ್ತೇ᳚ । ಚತು॑-ಸ್ಸ್ರಕ್ತಿರ್ಭವತಿ । ಸರ್ವಾ॒ ಹ್ಯನು॒ ದಿಶಃ॑ ಪಿ॒ತರಃ॑ । ಅಖಾ॑ತಾ ಭವತಿ ॥ 56 ॥

ಖಾ॒ತಾ ಹಿ ದೇ॒ವಾನಾ᳚ಮ್ । ಮ॒ದ್ಧ್ಯ॒ತೋ᳚ ಽಗ್ನಿರಾಧೀ॑ಯತೇ । ಅ॒ನ್ತ॒ತೋ ಹಿ ದೇ॒ವಾನಾ॑-ಮಾಧೀ॒ಯತೇ᳚ । ವರ್​ಷೀ॑ಯಾನಿ॒ದ್ಧ್ಮ ಇ॒ದ್ಧ್ಮಾ-ದ್ಭ॑ವತಿ॒ ವ್ಯಾವೃ॑ತ್ತ್ಯೈ । ಪರಿ॑ ಶ್ರಯತಿ । ಅ॒ನ್ತರ್​ಹಿ॑ತೋ॒ ಹಿ ಪಿ॑ತೃಲೋ॒ಕೋ ಮ॑ನುಷ್ಯಲೋ॒ಕಾತ್ । ಯತ್-ಪರು॑ಷಿ ದಿ॒ನಮ್ । ತ-ದ್ದೇ॒ವಾನಾ᳚ಮ್ । ಯದ॑ನ್ತ॒ರಾ । ತ-ನ್ಮ॑ನು॒ಷ್ಯಾ॑ಣಾಮ್ ॥ 57 ॥

ಯ-ಥ್ಸಮೂ॑ಲಮ್ । ತ-ತ್ಪಿ॑ತೃ॒ಣಾಮ್ । ಸಮೂ॑ಲ-ಮ್ಬ॒ರ್॒ಹಿ-ರ್ಭ॑ವತಿ॒ ವ್ಯಾವೃ॑ತ್ತ್ಯೈ । ದ॒ಖ್ಷಿ॒ಣಾ ಸ್ತೃ॑ಣಾತಿ । ದ॒ಖ್ಷಿ॒ಣಾ ವೃ॒ದ್ಧಿ ಪಿ॑ತೃ॒ಣಾಮ್ । ತ್ರಿಃ ಪರ್ಯೇ॑ತಿ । ತೃ॒ತೀಯೇ॒ ವಾ ಇ॒ತೋ ಲೋ॒ಕೇ ಪಿ॒ತರಃ॑ । ತಾನೇ॒ವ ಪ್ರೀ॑ಣಾತಿ । ತ್ರಿಃ ಪುನಃ॒ ಪರ್ಯೇ॑ತಿ । ಷಟ್ಥ್ಸಮ್ಪ॑ದ್ಯನ್ತೇ ॥ 58 ॥

ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ । ಯ-ತ್ಪ್ರ॑ಸ್ತ॒ರಂ-ಯಁಜು॑ಷಾ ಗೃಹ್ಣೀ॒ಯಾತ್ । ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾತ್ । ಯನ್ನ ಗೃ॑ಹ್ಣೀ॒ಯಾತ್ । ಅ॒ನಾ॒ಯ॒ತ॒ನ-ಸ್ಸ್ಯಾ᳚ತ್ । ತೂ॒ಷ್ಣೀಮೇ॒ವ ನ್ಯ॑ಸ್ಯೇತ್ । ನ ಪ್ರ॒ಮಾಯು॑ಕೋ॒ ಭವ॑ತಿ । ನಾನಾ॑ಯತ॒ನಃ । ಯತ್-ತ್ರೀನ್-ಪ॑ರಿ॒ಧೀ-ನ್ಪ॑ರಿದ॒ದ್ಧ್ಯಾತ್ ॥ 59 ॥

ಮೃ॒ತ್ಯುನಾ॒ ಯಜ॑ಮಾನ॒-ಮ್ಪರಿ॑ ಗೃಹ್ಣೀಯಾತ್ । ಯನ್ನ ಪ॑ರಿ-ದ॒ದ್ಧ್ಯಾತ್ । ರಖ್ಷಾಗ್ಂ॑ಸಿ ಯ॒ಜ್ಞಗ್ಂ ಹ॑ನ್ಯುಃ । ದ್ವೌ ಪ॑ರಿ॒ಧೀ ಪರಿ॑ದಧಾತಿ । ರಖ್ಷ॑ಸಾ॒-ಮಪ॑ಹತ್ಯೈ । ಅಥೋ॑ ಮೃ॒ತ್ಯೋರೇ॒ವ ಯಜ॑ಮಾನ॒-ಮುಥ್ಸೃ॑ಜತಿ । ಯ-ತ್ತ್ರೀಣಿ॑ ತ್ರೀಣಿ ಹ॒ವೀಗ್​ಷ್ಯು॑ದಾ॒ಹರೇ॑ಯುಃ । ತ್ರಯ॑ಸ್ತ್ರಯ ಏಷಾಗ್ಂ ಸಾ॒ಕ-ಮ್ಪ್ರಮೀ॑ಯೇರನ್ನ್ । ಏಕೈ॑ಕ-ಮನೂ॒ಚೀನಾ᳚-ನ್ಯು॒ದಾಹ॑ರನ್ತಿ । ಏಕೈ॑ಕ ಏ॒ವೈಷಾ॑ಮ॒ನ್ವಞ್ಚಃ॒ ಪ್ರಮೀ॑ಯತೇ । ಕ॒ಶಿಪು॑ ಕಶಿಪ॒ವ್ಯಾ॑ಯ । ಉ॒ಪ॒ಬರ್​ಹ॑ಣ-ಮುಪಬರ್​ಹ॒ಣ್ಯಾ॑ಯ । ಆಞ್ಜ॑ನ-ಮಾಞ್ಜ॒ನ್ಯಾ॑ಯ । ಅ॒ಭ್ಯಞ್ಜ॑ನ-ಮಭ್ಯಞ್ಜ॒ನ್ಯಾ॑ಯ । ಯ॒ಥಾ॒ಭಾ॒ಗಮೇ॒ವೈನಾ᳚-ನ್ಪ್ರೀಣಾತಿ ॥ 60 ॥

(ನಿ॒ರವ॑ದಯತೇ - ಪಿತೃ॒ಮಾ - ನ॑ಗ್ನಿಷ್ವಾ॒ತ್ತಾ - ಏಕ॒ಯೋಪ॑ ಮನ್ಥ॒ - ತ್ಯಖಾ॑ತಾ ಭವತಿ-ಮನು॒ಷ್ಯಾ॑ಣಾಂ - ಪದ್ಯನ್ತೇ - ಪರಿದ॒ದ್ಧ್ಯಾನ್ - ಮೀ॑ಯತೇ॒ ಪಞ್ಚ॑ ಚ) (ಅ. 8)

ಅನುವಾಕಂ 9 - ತಚ್ಛೇಷಃ
ಅ॒ಗ್ನಯೇ॑ ದೇ॒ವೇಭ್ಯಃ॑ ಪಿ॒ತೃಭ್ಯ॑-ಸ್ಸಮಿ॒ದ್ಧ್ಯಮಾ॑ನಾ॒ಯಾನು॑ಬ್ರೂ॒ಹೀತ್ಯಾ॑ಹ ।
ಉ॒ಭಯೇ॒ ಹಿ ದೇ॒ವಾಶ್ಚ॑ ಪಿ॒ತರ॑ಶ್ಚೇ॒ಜ್ಯನ್ತೇ᳚ । ಏಕಾ॒ಮನ್ವಾ॑ಹ । ಏಕಾ॒ ಹಿ ಪಿ॑ತೃ॒ಣಾಮ್ । ತ್ರಿರನ್ವಾ॑ಹ । ತ್ರಿರ್​ಹಿ ದೇ॒ವಾನಾ᳚ಮ್ । ಆ॒ಘಾ॒ರಾವಾಘಾ॑ರಯತಿ । ಯ॒ಜ್ಞ॒ ಪ॒ರುಷೋ॒ರನ॑ನ್ತರಿತ್ಯೈ । ನಾರ್​ಷೇ॒ಯಂ-ವೃಁ॑ಣೀತೇ । ನ ಹೋತಾ॑ರಮ್ ॥ 61 ॥

ಯದಾ॑ರ್​ಷೇ॒ಯಂ-ವೃಁ॑ಣೀ॒ತ । ಯದ್ಧೋತಾ॑ರಮ್ । ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾತ್ । ಪ್ರ॒ಮಾಯು॑ಕೋ॒ ಹೋತಾ᳚ । ತಸ್ಮಾ॒ನ್ನ ವೃ॑ಣೀತೇ । ಯಜ॑ಮಾನಸ್ಯ॒ ಹೋತು॑-ರ್ಗೋಪೀ॒ಥಾಯ॑ । ಅಪ॑ಬರ್​ಹಿಷಃ ಪ್ರಯಾ॒ಜಾನ್.-ಯ॑ಜತಿ । ಪ್ರ॒ಜಾ ವೈ ಬ॒ರ್॒ಹಿಃ । ಪ್ರ॒ಜಾ ಏ॒ವ ಮೃ॒ತ್ಯೋರುಥ್ಸೃ॑ಜತಿ । ಆಜ್ಯ॑ಭಾಗೌ ಯಜತಿ ॥ 62 ॥

ಯ॒ಜ್ಞಸ್ಯೈ॒ವ ಚಖ್ಷು॑ಷೀ॒ ನಾನ್ತರೇ॑ತಿ । ಪ್ರಾ॒ಚೀ॒ನಾ॒ವೀ॒ತೀ ಸೋಮಂ॑-ಯಁಜತಿ । ಪಿ॒ತೃ॒ದೇ॒ವ॒ತ್ಯಾ॑ ಹಿ । ಏ॒ಷಾ ಽಽಹು॑ತಿಃ । ಪಞ್ಚ॒ ಕೃತ್ವೋ-ಽವ॑ದ್ಯತಿ । ಪಞ್ಚ॒ ಹ್ಯೇ॑ತಾ ದೇ॒ವತಾಃ᳚ । ದ್ವೇ ಪು॑ರೋ-ಽನುವಾ॒ಕ್ಯೇ᳚ । ಯಾ॒ಜ್ಯಾ॑ ದೇ॒ವತಾ॑ ವಷಟ್ಕಾ॒ರಃ । ತಾ ಏ॒ವ ಪ್ರೀ॑ಣಾತಿ । ಸನ್ತ॑ತ॒ಮವ॑ ದ್ಯತಿ ॥ 63 ॥

ಋ॒ತೂ॒ನಾಗ್ಂ ಸನ್ತ॑ತ್ಯೈ । ಪ್ರೈವೈಭ್ಯಃ॒ ಪೂರ್ವ॑ಯಾ ಪುರೋ-ಽನುವಾ॒ಕ್ಯ॑ಯಾ ಽಽಹ । ಪ್ರಣ॑ಯತಿ ದ್ವಿ॒ತೀಯ॑ಯಾ । ಗ॒ಮಯ॑ತಿ ಯಾ॒ಜ್ಯ॑ಯಾ । ತೃ॒ತೀಯೇ॒ ವಾ ಇ॒ತೋ ಲೋ॒ಕೇ ಪಿ॒ತರಃ॑ । ಅಹ್ನ॑ ಏ॒ವೈನಾ॒-ನ್ಪೂರ್ವ॑ಯಾ ಪುರೋ-ಽನುವಾ॒ಕ್ಯ॑ಯಾ॒ ಽತ್ಯಾನ॑ಯತಿ । ರಾತ್ರಿ॑ಯೈ ದ್ವಿ॒ತೀಯ॑ಯಾ । ಐವೈನಾನ್॑. ಯಾ॒ಜ್ಯ॑ಯಾ ಗಮಯತಿ । ದ॒ಖ್ಷಿ॒ಣ॒ತೋ॑-ಽವ॒ದಾಯ॑ । ಉದ॒ಙ್ಙತಿ॑ ಕ್ರಾಮತಿ॒ ವ್ಯಾವೃ॑ತ್ತ್ಯೈ ॥ 64 ॥

ಆ ಸ್ವ॒ಧೇತ್ಯಾ-ಶ್ರಾ॑ವಯತಿ । ಅಸ್ತು॑ ಸ್ವ॒ಧೇತಿ॑ ಪ್ರ॒ತ್ಯಾಶ್ರಾ॑ವಯತಿ । ಸ್ವ॒ಧಾ ನಮ॒ ಇತಿ॒ ವಷ॑ಟ್ಕರೋತಿ । ಸ್ವ॒ಧಾ॒ಕಾ॒ರೋ ಹಿ ಪಿ॑ತೃ॒ಣಾಮ್ । ಸೋಮ॒ಮಗ್ರೇ॑ ಯಜತಿ । ಸೋಮ॑ ಪ್ರಯಾಜಾ॒ ಹಿ ಪಿ॒ತರಃ॑ । ಸೋಮ॑-ಮ್ಪಿತೃ॒ಮನ್ತಂ॑-ಯಁಜತಿ । ಸಂ॒​ವಁ॒ಥ್ಸ॒ರೋ ವೈ ಸೋಮಃ॑ ಪಿತೃ॒ಮಾನ್ । ಸಂ॒​ವಁ॒ಥ್ಸ॒ರಮೇ॒ವ ತ-ದ್ಯ॑ಜತಿ । ಪಿ॒ತೄನ್-ಬ॑ರ್​ಹಿ॒ಷದೋ॑ ಯಜತಿ ॥ 65 ॥

ಯೇ ವೈ ಯಜ್ವಾ॑ನಃ । ತೇ ಪಿ॒ತರೋ॑ ಬರ್​ಹಿ॒ಷದಃ॑ । ತಾನೇ॒ವ ತ-ದ್ಯ॑ಜತಿ । ಪಿ॒ತೄನ॑ಗ್ನಿಷ್ವಾ॒ತ್ತಾನ್. ಯ॑ಜತಿ । ಯೇ ವಾ ಅಯ॑ಜ್ವಾನೋ ಗೃಹಮೇ॒ಧಿನಃ॑ । ತೇ ಪಿ॒ತರೋ᳚-ಽಗ್ನಿಷ್ವಾ॒ತ್ತಾಃ । ತಾನೇ॒ವ ತ-ದ್ಯ॑ಜತಿ । ಅ॒ಗ್ನಿ-ಙ್ಕ॑ವ್ಯ॒ವಾಹ॑ನಂ-ಯಁಜತಿ । ಯ ಏ॒ವ ಪಿ॑ತೃ॒ಣಾಮ॒ಗ್ನಿಃ । ತಮೇ॒ವ ತ-ದ್ಯ॑ಜತಿ ॥ 66 ॥

ಅಥೋ॒ ಯಥಾ॒-ಽಗ್ನಿಗ್ಗ್​ ಸ್ವಿ॑ಷ್ಟ॒ಕೃತಂ॒-ಯಁಜ॑ತಿ । ತಾ॒ದೃಗೇ॒ವ ತತ್ । ಏ॒ತತ್ತೇ॑ ತತ॒ ಯೇ ಚ॒ ತ್ವಾಮನ್ವಿತಿ॑ ತಿ॒ಸೃಷು॑ ಸ್ರ॒ಕ್ತೀಷು॒ ನಿದ॑ಧಾತಿ । ತಸ್ಮಾ॒ದಾ ತೃ॒ತೀಯಾ॒-ತ್ಪುರು॑ಷಾ॒ನ್ನಾಮ॒ ನ ಗೃ॑ಹ್ಣನ್ತಿ । ಏ॒ತಾವ॑ನ್ತೋ॒ ಹೀಜ್ಯನ್ತೇ᳚ । ಅತ್ರ॑ ಪಿತರೋ ಯಥಾಭಾ॒ಗ-ಮ್ಮ॑ನ್ದದ್ಧ್ವ॒ಮಿತ್ಯಾ॑ಹ । ಹ್ಲೀಕಾ॒ ಹಿ ಪಿ॒ತರಃ॑ । ಉದ॑ಞ್ಚೋ॒ ನಿಷ್ಕ್ರಾ॑ಮನ್ತಿ । ಏ॒ಷಾ ವೈ ಮ॑ನು॒ಷ್ಯಾ॑ಣಾ॒-ನ್ದಿಕ್ । ಸ್ವಾಮೇ॒ವ ತ-ದ್ದಿಶ॒ಮನು॒ ನಿಷ್ಕ್ರಾ॑ಮನ್ತಿ ॥ 67 ॥

ಆ॒ಹ॒ವ॒ನೀಯ॒-ಮುಪ॑ತಿಷ್ಠನ್ತೇ । ನ್ಯೇ॑ವಾಸ್ಮೈ॒ ತದ್ಧ್ನು॑ವತೇ । ಯಥ್ಸ॒ತ್ಯಾ॑ಹವ॒ನೀಯೇ᳚ । ಅಥಾ॒ನ್ಯತ್ರ॒ ಚರ॑ನ್ತಿ । ಆತಮಿ॑ತೋ॒ರುಪ॑ತಿಷ್ಠನ್ತೇ । ಅ॒ಗ್ನಿಮೇ॒ವೋಪ॑ದ್ರ॒ಷ್ಟಾರ॑-ಙ್ಕೃ॒ತ್ವಾ । ಪಿ॒ತೄ-ನ್ನಿ॒ರವ॑ದಯನ್ತೇ । ಅನ್ತಂ॒-ವಾಁ ಏ॒ತೇ ಪ್ರಾ॒ಣಾನಾ᳚-ಙ್ಗಚ್ಛನ್ತಿ । ಯ ಆತಮಿ॑ತೋರುಪ॒ತಿಷ್ಠ॑ನ್ತೇ । ಸು॒ಸ॒ನ್ದೃಶ॑-ನ್ತ್ವಾ ವ॒ಯಮಿತ್ಯಾ॑ಹ ॥ 68 ॥

ಪ್ರಾ॒ಣೋ ವೈ ಸು॑ಸ॒ನ್ದೃಕ್ । ಪ್ರಾ॒ಣಮೇ॒ವಾತ್ಮನ್-ದ॑ಧತೇ । ಯೋಜಾ॒ ನ್ವಿ॑ನ್ದ್ರ ತೇ॒ ಹರೀ॒ ಇತ್ಯಾ॑ಹ । ಪ್ರಾ॒ಣಮೇ॒ವ ಪುನ॑ರಯುಕ್ತ । ಅಖ್ಷ॒ನ್ನಮೀ॑ಮದನ್ತ॒ ಹೀತಿ॒ ಗಾರ್​ಹ॑ಪತ್ಯ॒-ಮುಪ॑ತಿಷ್ಠನ್ತೇ । ಅಖ್ಷ॒ನ್ನಮೀ॑ಮದ॒ನ್ತಾಥ॒ ತ್ವೋಪ॑ತಿಷ್ಠಾಮಹ॒ ಇತಿ॒ ವಾವೈತದಾ॑ಹ । ಅಮೀ॑ಮದನ್ತ ಪಿ॒ತರ॑-ಸ್ಸೋ॒ಮ್ಯಾ ಇತ್ಯ॒ಭಿ ಪ್ರಪ॑ದ್ಯನ್ತೇ । ಅಮೀ॑ಮದನ್ತ ಪಿ॒ತರೋ-ಽಥ॑ ತ್ವಾ॒-ಽಭಿ ಪ್ರಪ॑ದ್ಯಾಮಹ॒ ಇತಿ॒ ವಾವೈತದಾ॑ಹ । ಅ॒ಪಃ ಪರಿ॑ಷಿಞ್ಚತಿ । ಮಾ॒ರ್ಜಯ॑ತ್ಯೇ॒ವೈನಾನ್॑ ॥ 69 ॥

ಅಥೋ॑ ತ॒ರ್ಪಯ॑ತ್ಯೇ॒ವ । ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ । ಯ ಏ॒ವಂ-ವೇಁದ॑ । ಅಪ॑ ಬರ್​ಹಿಷಾವನೂಯಾ॒ಜೌ ಯ॑ಜತಿ । ಪ್ರ॒ಜಾ ವೈ ಬ॒ರ್॒ಹಿಃ । ಪ್ರ॒ಜಾ ಏ॒ವ ಮೃ॒ತ್ಯೋರುಥ್ಸೃ॑ಜತಿ । ಚ॒ತುರಃ॑ ಪ್ರಯಾ॒ಜಾನ್. ಯ॑ಜತಿ । ದ್ವಾವ॑ನೂಯಾ॒ಜೌ । ಷಟ್ಥ್ಸಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ ॥ 70 ॥

ಋ॒ತೂನೇ॒ವ ಪ್ರೀ॑ಣಾತಿ । ನ ಪತ್ನ್ಯನ್ವಾ᳚ಸ್ತೇ । ನ ಸಂ​ಯಾಁ॑ಜಯನ್ತಿ । ಯತ್ಪತ್ನ್ಯ॒ನ್ವಾಸೀ॑ತ । ಯಥ್ಸಂ॑​ಯಾಁ॒ಜಯೇ॑ಯುಃ । ಪ್ರ॒ಮಾಯು॑ಕಾ ಸ್ಯಾತ್ । ತಸ್ಮಾ॒ನ್ನಾನ್ವಾ᳚ಸ್ತೇ । ನ ಸಂ​ಯಾಁ॑ಜಯನ್ತಿ । ಪತ್ನಿ॑ಯೈ ಗೋಪೀ॒ಥಾಯ॑ ॥ 71 ॥
(ಹೋತಾ॑ರ॒ - ಮಾಜ್ಯ॑ಭಾಗೌ ಯಜತಿ॒ - ಸನ್ತ॑ತ॒ಮವ॑ದ್ಯತಿ॒ - ವ್ಯಾವೃ॑ತ್ತ್ಯೈ - ಬರ್​ಹಿ॒ಷದೋ॑ ಯಜತಿ॒ - ತಮೇ॒ವ ತ-ದ್ಯ॑ಜ॒- ತ್ಯನು॒ ನಿಷ್ಕ್ರಾ॑ಮನ್ತ್ಯಾ - ಹೈ - ನಾನ್ - ಋ॒ತವೋ॒ - +ನವ॑ ಚ) (ಅ. 9)

ಅನುವಾಕಂ 10 - ತ್ರ್ಯಮ್ಬಕಹವೀಂಷಿ
ಪ್ರ॒ತಿ॒ಪೂ॒ರು॒ಷಮೇಕ॑ಕಪಾಲಾ॒-ನ್ನಿರ್ವ॑ಪತಿ । ಜಾ॒ತಾ ಏ॒ವ ಪ್ರ॒ಜಾ ರು॒ದ್ರಾನ್ನಿ॒ರವ॑ದಯತೇ । ಏಕ॒ಮತಿ॑ರಿಕ್ತಮ್ । ಜ॒ನಿ॒ಷ್ಯಮಾ॑ಣಾ ಏ॒ವ ಪ್ರ॒ಜಾ ರು॒ದ್ರಾನ್ನಿ॒ರವ॑ದಯತೇ । ಏಕ॑ಕಪಾಲಾ ಭವನ್ತಿ । ಏ॒ಕ॒ಧೈವ ರು॒ದ್ರ-ನ್ನಿ॒ರವ॑ದಯತೇ । ನಾಭಿಘಾ॑ರಯತಿ । ಯದ॑ಭಿಘಾ॒ರಯೇ᳚ತ್ । ಅ॒ನ್ತ॒ರ॒ವ॒ಚಾ॒ರಿಣಗ್ಂ॑ ರು॒ದ್ರ-ಙ್ಕು॑ರ್ಯಾತ್ । ಏ॒ಕೋ॒ಲ್ಮು॒ಕೇನ॑ ಯನ್ತಿ ॥ 72 ॥

ತದ್ಧಿ ರು॒ದ್ರಸ್ಯ॑ ಭಾಗ॒ಧೇಯ᳚ಮ್ । ಇ॒ಮಾ-ನ್ದಿಶಂ॑-ಯಁನ್ತಿ । ಏ॒ಷಾ ವೈ ರು॒ದ್ರಸ್ಯ॒ ದಿಕ್ । ಸ್ವಾಯಾ॑ಮೇ॒ವ ದಿ॒ಶಿ ರು॒ದ್ರ-ನ್ನಿ॒ರವ॑ದಯತೇ । ರು॒ದ್ರೋ ವಾ ಅ॑ಪ॒ಶುಕಾ॑ಯಾ॒ ಆಹು॑ತ್ಯೈ॒ ನಾತಿ॑ಷ್ಠತ । ಅ॒ಸೌ ತೇ॑ ಪ॒ಶುರಿತಿ॒ ನಿರ್ದಿ॑ಶೇ॒ದ್ಯ-ನ್ದ್ವಿ॒ಷ್ಯಾತ್ । ಯಮೇ॒ವ ದ್ವೇಷ್ಟಿ॑ । ತಮ॑ಸ್ಮೈ ಪ॒ಶು-ನ್ನಿರ್ದಿ॑ಶತಿ । ಯದಿ॒ ನ ದ್ವಿ॒ಷ್ಯಾತ್ । ಆ॒ಖುಸ್ತೇ॑ ಪ॒ಶುರಿತಿ॑ ಬ್ರೂಯಾತ್ ॥ 73 ॥

ನ ಗ್ರಾ॒ಮ್ಯಾ-ನ್ಪ॒ಶೂನ್. ಹಿ॒ನಸ್ತಿ॑ । ನಾರ॒ಣ್ಯಾನ್ । ಚ॒ತು॒ಷ್ಪ॒ಥೇ ಜು॑ಹೋತಿ । ಏ॒ಷ ವಾ ಅ॑ಗ್ನೀ॒ನಾ-ಮ್ಪಡ್ಬೀ॑ಶೋ॒ ನಾಮ॑ । ಅ॒ಗ್ನಿ॒ವತ್ಯೇ॒ವ ಜು॑ಹೋತಿ । ಮ॒ದ್ಧ್ಯ॒ಮೇನ॑ ಪ॒ರ್ಣೇನ॑ ಜುಹೋತಿ । ಸ್ರುಗ್ಘ್ಯೇ॑ಷಾ । ಅಥೋ॒ ಖಲು॑ । ಅ॒ನ್ತ॒ಮೇನೈ॒ವ ಹೋ॑ತ॒ವ್ಯ᳚ಮ್ । ಅ॒ನ್ತ॒ತ ಏ॒ವ ರು॒ದ್ರ-ನ್ನಿ॒ರವ॑ದಯತೇ ॥ 74 ॥

ಏ॒ಷ ತೇ॑ ರುದ್ರ ಭಾ॒ಗ-ಸ್ಸ॒ಹ ಸ್ವಸ್ರಾ-ಽಮ್ಬಿ॑ಕ॒ಯೇತ್ಯಾ॑ಹ । ಶ॒ರದ್ವಾ ಅ॒ಸ್ಯಾಮ್ಬಿ॑ಕಾ॒ ಸ್ವಸಾ᳚ । ತಯಾ॒ ವಾ ಏ॒ಷ ಹಿ॑ನಸ್ತಿ । ಯಗ್ಂ ಹಿ॒ನಸ್ತಿ॑ । ತಯೈ॒ವೈನಗ್ಂ॑ ಸ॒ಹ ಶ॑ಮಯತಿ । ಭೇ॒ಷ॒ಜ-ಙ್ಗವ॒ ಇತ್ಯಾ॑ಹ । ಯಾವ॑ನ್ತ ಏ॒ವ ಗ್ರಾ॒ಮ್ಯಾಃ ಪ॒ಶವಃ॑ । ತೇಭ್ಯೋ॑ ಭೇಷ॒ಜ-ಙ್ಕ॑ರೋತಿ । ಅವಾ᳚ಮ್ಬ ರು॒ದ್ರಮ॑ದಿಮ॒ಹೀತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥ 75 ॥

ತ್ರ್ಯ॑ಮ್ಬಕಂ-ಯಁಜಾಮಹ॒ ಇತ್ಯಾ॑ಹ । ಮೃ॒ತ್ಯೋ-ರ್ಮು॑ಖ್ಷೀಯ॒ ಮಾ ಽಮೃತಾ॒ದಿತಿ॒ ವಾವೈತದಾ॑ಹ । ಉತ್ಕಿ॑ರನ್ತಿ । ಭಗ॑ಸ್ಯ ಲೀಫ್ಸನ್ತೇ । ಮೂತೇ॑ ಕೃ॒ತ್ವಾ-ಽಽಸ॑ಜನ್ತಿ । ಯಥಾ॒ ಜನಂ॑-ಯಁ॒ತೇ॑-ಽವ॒ಸ-ಙ್ಕ॒ರೋತಿ॑ । ತಾ॒ದೃಗೇ॒ವತತ್ । ಏ॒ಷ ತೇ॑ ರುದ್ರ ಭಾ॒ಗ ಇತ್ಯಾ॑ಹ ನಿ॒ರವ॑ತ್ತ್ಯೈ । ಅಪ್ರ॑ತೀಖ್ಷ॒ಮಾಯ॑ನ್ತಿ । ಅ॒ಪಃ ಪರಿ॑ಷಿಞ್ಚತಿ । ರು॒ದ್ರಸ್ಯಾ॒ನ್ತರ್​ಹಿ॑ತ್ಯೈ । ಪ್ರ ವಾ ಏ॒ತೇ᳚-ಽಸ್ಮಾ-ಲ್ಲೋ॒ಕಾಚ್ಚ್ಯ॑ವನ್ತೇ । ಯೇ ತ್ರ್ಯ॑ಮ್ಬಕೈ॒ಶ್ಚರ॑ನ್ತಿ । ಆ॒ದಿ॒ತ್ಯ-ಞ್ಚ॒ರು-ಮ್ಪುನ॒ರೇತ್ಯ॒ ನಿರ್ವ॑ಪತಿ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾಮೇ॒ವ ಪ್ರತಿ॑ ತಿಷ್ಠನ್ತಿ ॥ 76 ॥
(ಯ॒ನ್ತಿ॒ - ಬ್ರೂ॒ಯಾ॒ನ್ - ನಿ॒ರವ॑ದಯತೇ - ಶಾಸ್ತೇ - ಸಿಞ್ಚತಿ॒ ಷಟ್ಚ॑) (ಅ. 10)

(ಅನು॑ಮತ್ಯೈ - ವೈಶ್ವದೇ॒ವೇನ॒ ತಾ-ಸ್ಸೃ॒ಷ್ಟಾ - ಸ್ತ್ರಿ॒ವೃತ್ - ಪ್ರ॒ಜಾಪ॑ತಿ-ಸ್ಸವಿ॒ - ತೋತ್ತ॑ರಸ್ಯಾಂ - ದೇವಾಸು॒ರಾ-ಸ್ಸೋ᳚-ಽಗ್ನಿ--ರ್ ಯ-ತ್ಪತ್ನೀ॑ -ವೈಶ್ವದೇ॒ವೇನ॒ ತಾ ವ॑ರುಣಪ್ರಘಾ॒ಸೈ - ರ॒ಗ್ನಯೇ॑ ದೇ॒ವೇಭ್ಯಃ॑ - ಪ್ರತಿಪೂರು॒ಷ-ನ್ದಶ॑)

(ಅನು॑ಮತ್ಯೈ - ಪ್ರಥಮ॒ಜೋ ವ॒ಥ್ಸೋ - ಬ॑ಹುರೂ॒ಪಾ ಹಿ ಪ॒ಶವ॒ - ಸ್ತಸ್ಮಾ᳚-ತ್ಪೃಥಮಾ॒ತ್ರಂ - ಁಯದ॒ಗ್ನಯೇ-ಽನೀ॑ಕವತ - ಉದ್ಧಾ॒ರಂ-ವಾಁ - ಅ॒ಗ್ನಯೇ॑ ದೇ॒ವೇಭ್ಯ॑ - ಋ॒ತೂನೇ॒ವ ಷಟ್ಥ್ಸ॑ಪ್ತತಿಃ)

(ಅನು॑ಮತ್ಯೈ॒ - ಪ್ರತಿ॑ ತಿಷ್ಠನ್ತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಷಷ್ಠಃ ಪ್ರಪಾಠಕ-ಸ್ಸಮಾಪ್ತಃ ॥