ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಷಷ್ಠಃ ಪ್ರಪಾಠಕಃ - ಪಿತೃಮೇಧಮನ್ತ್ರಾಃ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1
ಪ॒ರೇ॒ಯು॒ವಾಗ್ಂಸ॑-ಮ್ಪ್ರ॒ವತೋ॑ ಮ॒ಹೀರನು॑ ಬ॒ಹುಭ್ಯಃ॒ ಪನ್ಥಾ॑ಮನಪಸ್ಪಶಾ॒ನಮ್ । ವೈ॒ವ॒ಸ್ವ॒ತಗ್ಂ ಸ॒ಙ್ಗಮ॑ನ॒-ಞ್ಜನಾ॑ನಾಮ್ ಁಯ॒ಮಗ್ಂ ರಾಜಾ॑ನಗ್ಂ ಹ॒ವಿಷಾ॑ ದುವಸ್ಯತ ॥ ಇ॒ದ-ನ್ತ್ವಾ॒ ವಸ್ತ್ರ॑-ಮ್ಪ್ರಥ॒ಮ-ನ್ನ್ವಾಗ॒ನ್ನಪೈ॒ತದೂ॑ಹ॒ ಯದಿ॒ಹಾಬಿ॑ಭಃ ಪು॒ರಾ ।
ಇ॒ಷ್ಟಾ॒ಪೂ॒ರ್ತಮನು॒ ಸಮ್ಪ॑ಶ್ಯ॒ ದಖ್ಷಿ॑ಣಾ॒ಮ್ ಁಯಥಾ॑ ತೇ ದ॒ತ್ತ-ಮ್ಬ॑ಹು॒ಧಾ ವಿ ಬ॑ನ್ಧುಷು ॥
ಇ॒ಮೌ ಯು॑ನಜ್ಮಿ ತೇ ವ॒ಹ್ನೀ ಅಸು॑ನೀಥಾಯ ವೋ॒ಢವೇ᳚ ।
ಯಾಭ್ಯಾ᳚ಮ್ ಁಯ॒ಮಸ್ಯ॒ ಸಾದ॑ನಗ್ಂ ಸು॒ಕೃತಾ॒-ಞ್ಚಾಪಿ॑ ಗಚ್ಛತಾತ್ ॥ ಪೂ॒ಷಾ ತ್ವೇ॒ತಶ್ಚ್ಯಾ॑ವಯತು॒ ಪ್ರವಿ॒ದ್ವಾ-ನನ॑ಷ್ಟಪಶು॒-ರ್ಭುವ॑ನಸ್ಯ ಗೋ॒ಪಾಃ ।
ಸ ತ್ವೈ॒ತೇಭ್ಯಃ॒ ಪರಿ॑ದದಾ-ತ್ಪಿ॒ತೃಭ್ಯೋ॒-ಽಗ್ನಿರ್ದೇ॒ವೇಭ್ಯ॑-ಸ್ಸುವಿ॒ದತ್ರೇ᳚ಭ್ಯಃ ॥ ಪೂ॒ಷೇಮಾ ಆಶಾ॒ ಅನು॑ವೇದ॒ ಸರ್ವಾ॒-ಸ್ಸೋ ಅ॒ಸ್ಮಾಗ್ಂ ಅಭ॑ಯತಮೇನ ನೇಷತ್ ।
ಸ್ವ॒ಸ್ತಿ॒ದಾ ಅಘೃ॑ಣಿ॒-ಸ್ಸರ್ವ॑ವೀ॒ರೋ-ಽಪ್ರ॑ಯುಚ್ಛನ್ಪು॒ರ ಏ॑ತು॒ ಪ್ರವಿ॒ದ್ವಾನ್ ॥ 1 ॥

ಆಯು॑-ರ್ವಿ॒ಶ್ವಾಯುಃ॒ ಪರಿ॑ಪಾಸತಿ ತ್ವಾ ಪೂ॒ಷಾ ತ್ವಾ॑ ಪಾತು॒ ಪ್ರಪ॑ಥೇ ಪು॒ರಸ್ತಾ᳚ತ್ । ಯತ್ರಾಸ॑ತೇ ಸು॒ಕೃತೋ॒ ಯತ್ರ॒ ತೇ ಯ॒ಯುಸ್ತತ್ರ॑ ತ್ವಾ ದೇ॒ವ-ಸ್ಸ॑ವಿ॒ತಾ ದ॑ಧಾತು ॥
ಭುವ॑ನಸ್ಯ ಪತ ಇ॒ದಗ್ಂ ಹ॒ವಿಃ ॥ ಅ॒ಗ್ನಯೇ॑ ರಯಿ॒ಮತೇ॒ ಸ್ವಾಹಾ᳚ ॥ ಪುರು॑ಷಸ್ಯ ಸಯಾವ॒ರ್ಯಪೇದ॒ಘಾನಿ॑ ಮೃಜ್ಮಹೇ ।
ಯಥಾ॑ ನೋ॒ ಅತ್ರ॒ ನಾಪ॑ರಃ ಪು॒ರಾ ಜ॒ರಸ॒ ಆಯ॑ತಿ ॥
ಪುರು॑ಷಸ್ಯ ಸಯಾವರಿ॒ ವಿ ತೇ᳚ ಪ್ರಾ॒ಣಮ॑ಸಿ ಸ್ರಸಮ್ ।
ಶರೀ॑ರೇಣ ಮ॒ಹೀಮಿಹಿ॑ ಸ್ವ॒ಧಯೇಹಿ॑ ಪಿ॒ತೄನುಪ॑ ಪ್ರ॒ಜಯಾ॒-ಽಸ್ಮಾನಿ॒ಹಾವ॑ಹ ॥ ಮೈವ॑-ಮ್ಮಾ॒ಗ್॒ಸ್ತಾ ಪ್ರಿ॑ಯೇ॒-ಽಹ-ನ್ದೇ॒ವೀ ಸ॒ತೀ ಪಿ॑ತೃಲೋ॒ಕಮ್ ಁಯದೈಷಿ॑ ।
ವಿ॒ಶ್ವವಾ॑ರಾ॒ ನಭ॑ಸಾ॒ ಸಂ​ವ್ಯಁ॑ಯನ್ತ್ಯು॒ಭೌ ನೋ॑ ಲೋ॒ಕೌ
ಪಯ॑ಸಾ॒-ಽಭ್ಯಾವ॑ವೃಥ್ಸ್ವ ॥ 2 ॥

ಇ॒ಯ-ನ್ನಾರೀ॑ ಪತಿಲೋ॒ಕಮ್ ಁವೃ॑ಣಾ॒ನಾ ನಿಪ॑ದ್ಯತ॒ ಉಪ॑ ತ್ವಾ ಮರ್ತ್ಯ॒ ಪ್ರೇತ᳚ಮ್ । ವಿಶ್ವ॑-ಮ್ಪುರಾ॒ಣಮನು॑ ಪಾ॒ಲಯ॑ನ್ತೀ॒ ತಸ್ಯೈ᳚ ಪ್ರ॒ಜಾ-ನ್ದ್ರವಿ॑ಣ-ಞ್ಚೇ॒ಹ ಧೇ॑ಹಿ ॥ ಉದೀ᳚ರ್​ಷ್ವ ನಾರ್ಯ॒ಭಿ ಜೀ॑ವಲೋ॒ಕಮಿ॒ತಾಸು॑ಮೇ॒ತಮುಪ॑ಶೇಷ॒ ಏಹಿ॑ ।
ಹ॒ಸ್ತ॒ಗ್ರಾ॒ಭಸ್ಯ॑ ದಿಧಿ॒ಷೋಸ್ತ್ವಮೇ॒ತ-ತ್ಪತ್ಯು॑ರ್ಜನಿ॒ತ್ವಮ॒ಭಿ ಸಮ್ಬ॑ಭೂವ ॥
ಸು॒ವರ್ಣ॒ಗ್ಂ॒ ಹಸ್ತಾ॑ದಾ॒ದದಾ॑ನಾ ಮೃ॒ತಸ್ಯ॑ ಶ್ರಿ॒ಯೈ ಬ್ರಹ್ಮ॑ಣೇ॒ ತೇಜ॑ಸೇ॒ ಬಲಾ॑ಯ । ಅತ್ರೈ॒ವ ತ್ವಮಿ॒ಹ ವ॒ಯಗ್ಂ ಸು॒ಶೇವಾ॒ ವಿಶ್ವಾ॒-ಸ್ಸ್ಪೃಧೋ॑ ಅ॒ಭಿಮಾ॑ತೀರ್ಜಯೇಮ ॥
ಧನು॒ರ್॒ ಹಸ್ತಾ॑ದಾ॒ದದಾ॑ನಾ ಮೃ॒ತಸ್ಯ॑ ಶ್ರಿ॒ಯೈ ಖ್ಷ॒ತ್ರಾಯೌಜ॑ಸೇ॒ ಬಲಾ॑ಯ । ಅತ್ರೈ॒ವ ತ್ವಮಿ॒ಹ ವ॒ಯಗ್ಂ ಸು॒ಶೇವಾ॒ ವಿಶ್ವಾ॒-ಸ್ಸ್ಪೃಧೋ॑ ಅ॒ಭಿಮಾ॑ತೀರ್ಜಯೇಮ ।
ಮಣಿ॒ಗ್ಂ॒ ಹಸ್ತಾ॑ದಾ॒ದದಾ॑ನಾ ಮೃ॒ತಸ್ಯ॑ ಶ್ರಿ॒ಯೈ ವಿ॒ಶೇ ಪುಷ್ಟ್ಯೈ॒ ಬಲಾ॑ಯ । ಅತ್ರೈ॒ವ ತ್ವಮಿ॒ಹ ವ॒ಯಗ್ಂ ಸು॒ಶೇವಾ॒ ವಿಶ್ವಾ॒-ಸ್ಸ್ಪೃಧೋ॑ ಅ॒ಭಿಮಾ॑ತೀರ್ಜಯೇಮ ॥ 3 ॥

ಇ॒ಮಮ॑ಗ್ನೇ ಚಮ॒ಸ-ಮ್ಮಾ ವಿಜೀ᳚ಹ್ವರಃ ಪ್ರಿ॒ಯೋ ದೇ॒ವಾನಾ॑ಮು॒ತ ಸೋ॒ಮ್ಯಾನಾ᳚ಮ್ । ಏ॒ಷ ಯಶ್ಚ॑ಮ॒ಸೋ ದೇ॑ವ॒ಪಾನ॒ಸ್ತಸ್ಮಿ॑-ನ್ದೇ॒ವಾ ಅ॒ಮೃತಾ॑ ಮಾದಯನ್ತಾಮ್ ॥
ಅ॒ಗ್ನೇರ್ವರ್ಮ॒ ಪರಿ॒ ಗೋಭಿ॑ರ್ವ್ಯಯಸ್ವ॒ ಸಮ್ಪ್ರೋರ್ಣು॑ಷ್ವ॒ ಮೇದ॑ಸಾ॒ ಪೀವ॑ಸಾ ಚ । ನೇತ್ತ್ವಾ॑ ಧೃ॒ಷ್ಣುರ್-ಹರ॑ಸಾ॒ ಜರ್​ಹೃ॑ಷಾಣೋ॒ ದಧ॑-ದ್ವಿಧ॒ಖ್ಷ್ಯನ್-ಪರ್ಯ॒ಙ್ಖಯಾ॑ತೈ ॥
ಮೈನ॑ಮಗ್ನೇ॒ ವಿದ॑ಹೋ॒ ಮಾ-ಽಭಿಶೋ॑ಚೋ॒ ಮಾ-ಽಸ್ಯ॒ ತ್ವಚ॑-ಞ್ಚಿಖ್ಷಿಪೋ॒ ಮಾ ಶರೀ॑ರಮ್ । ಯ॒ದಾ ಶೃ॒ತ-ಙ್ಕ॒ರವೋ॑ ಜಾತವೇ॒ದೋ-ಽಥೇ॑ಮೇನ॒-ಮ್ಪ್ರಹಿ॑ಣುತಾ-ತ್ಪಿ॒ತೃಭ್ಯಃ॑ ॥
ಶೃ॒ತಮ್ ಁಯ॒ದಾ ಕ॒ರಸಿ॑ ಜಾತವೇ॒ದೋ-ಽಥೇ॑ಮೇನ॒-ಮ್ಪರಿ॑ದತ್ತಾ-ತ್ಪಿ॒ತೃಭ್ಯಃ॑ । ಯ॒ದಾ ಗಚ್ಛಾ॒ತ್ಯಸು॑ನೀತಿಮೇ॒ತಾಮಥಾ॑ ದೇ॒ವಾನಾ᳚ಮ್ ಁವಶ॒ನೀರ್ಭ॑ವಾತಿ ॥ ಸೂರ್ಯ॑-ನ್ತೇ॒ ಚಖ್ಷು॑-ರ್ಗಚ್ಛತು॒ ವಾತ॑ಮಾ॒ತ್ಮಾ ದ್ಯಾ-ಞ್ಚ॒ ಗಚ್ಛ॑ ಪೃಥಿ॒ವೀ-ಞ್ಚ॒ ಧರ್ಮ॑ಣಾ ।
ಅ॒ಪೋ ವಾ॑ ಗಚ್ಛ॒ ಯದಿ॒ ತತ್ರ॑ ತೇ ಹಿ॒ತಮೋಷ॑ಧೀಷು॒ ಪ್ರತಿ॑ತಿಷ್ಠಾ॒ ಶರೀ॑ರೈಃ ॥ ಅ॒ಜೋ ಭಾ॒ಗಸ್ತಪ॑ಸಾ॒ ತ-ನ್ತ॑ಪಸ್ವ॒ ತ-ನ್ತೇ॑ ಶೋ॒ಚಿಸ್ತ॑ಪತು॒ ತ-ನ್ತೇ॑ ಅ॒ರ್ಚಿಃ ।
ಯಾಸ್ತೇ॑ ಶಿ॒ವಾಸ್ತ॒ನುವೋ॑ ಜಾತವೇದ॒ಸ್ತಾಭಿ॑-ರ್ವಹೇ॒ಮಗ್ಂ ಸು॒ಕೃತಾ॒ಮ್ ಁಯತ್ರ॑ ಲೋ॒ಕಾಃ ॥ ಅ॒ಯಮ್ ಁವೈ ತ್ವಮ॒ಸ್ಮಾದಧಿ॒ ತ್ವಮೇ॒ತದ॒ಯಮ್ ಁವೈ ತದ॑ಸ್ಯ॒ ಯೋನಿ॑ರಸಿ । ವೈ॒ಶ್ವಾ॒ನ॒ರಃ ಪು॒ತ್ರಃ ಪಿ॒ತ್ರೇ ಲೋ॑ಕ॒ಕೃ-ಜ್ಜಾ॑ತವೇದೋ॒ ವಹೇ॑ಮಗ್ಂ ಸು॒ಕೃತಾ॒ಮ್ ಁಯತ್ರ॑ ಲೋ॒ಕಾಃ ॥ 4 ॥
(ವಿ॒ದ್ವಾ-ನ॒ಭ್ಯಾವ॑ವೃಥ್ಸ್ವಾ॒ - ಭಿಮಾ॑ತೀರ್ಜಯೇಮ॒ - ಶರೀ᳚ರೈಶ್ಚ॒ತ್ವಾರಿ॑ ಚ ) (ಅ. 1)

ಅನುವಾಕಂ 2
ಯ ಏ॒ತಸ್ಯ॑ ಪ॒ಥೋ ಗೋ॒ಪ್ತಾರ॒ಸ್ತೇಭ್ಯ॒-ಸ್ಸ್ವಾಹಾ॒ ಯ ಏ॒ತಸ್ಯ॑ ಪ॒ಥೋ ರ॑ಖ್ಷಿ॒ತಾರ॒ಸ್ತೇಭ್ಯ॒-ಸ್ಸ್ವಾಹಾ॒ ಯ ಏ॒ತಸ್ಯ॑ ಪ॒ಥೋ॑-ಽಭಿರ॑ಖ್ಷಿ॒ತಾರ॒ಸ್ತೇಭ್ಯ॒-ಸ್ಸ್ವಾಹಾ᳚-ಽಽಖ್ಯಾ॒ತ್ರೇ ಸ್ವಾಹಾ॑-ಽಪಾಖ್ಯಾ॒ತ್ರೇ ಸ್ವಾಹಾ॑-ಽಭಿ॒ಲಾಲ॑ಪತೇ॒ ಸ್ವಾಹಾ॑-ಽಪ॒ಲಾಲ॑ಪತೇ॒ ಸ್ವಾಹಾ॒-ಽಗ್ನಯೇ॑ ಕರ್ಮ॒ಕೃತೇ॒ ಸ್ವಾಹಾ॒ ಯಮತ್ರ॒ ನಾಧೀ॒ಮಸ್ತಸ್ಮೈ॒ ಸ್ವಾಹಾ᳚ ॥
ಯಸ್ತ॑ ಇ॒ದ್ಧ್ಮ-ಞ್ಜ॒ಭರ॑-ಥ್ಸಿಷ್ವಿದಾ॒ನೋ ಮೂ॒ರ್ಧಾನ॑ಮ್ ಁವಾ ತ॒ತಪ॑ತೇ ತ್ವಾ॒ಯಾ । ದಿವೋ॒ ವಿಶ್ವ॑ಸ್ಮಾ-ಥ್ಸೀಮಘಾಯ॒ತ ಉ॑ರುಷ್ಯಃ ॥ ಅ॒ಸ್ಮಾತ್ತ್ವಮಧಿ॑ ಜಾ॒ತೋ॑-ಽಸಿ॒ ತ್ವದ॒ಯ-ಞ್ಜಾ॑ಯತಾ॒-ಮ್ಪುನಃ॑ । ಅ॒ಗ್ನಯೇ॑ ವೈಶ್ವಾನ॒ರಾಯ॑ ಸುವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ᳚ ॥ 5 ॥
(ಯ ಏ॒ತಸ್ಯ॒ ತ್ವ-ತ್ಪಞ್ಚ॑ ) (ಅ. 2)

ಅನುವಾಕಂ 3
ಪ್ರ ಕೇ॒ತುನಾ॑ ಬೃಹ॒ತಾ ಭಾ᳚ತ್ಯ॒ಗ್ನಿರಾ॒ವಿ-ರ್ವಿಶ್ವಾ॑ನಿ ವೃಷ॒ಭೋ ರೋ॑ರವೀತಿ । ದಿ॒ವಶ್ಚಿ॒ದನ್ತಾ॒ದುಪ॒ ಮಾಮು॒ದಾನ॑ಡ॒ಪಾಮು॒ಪಸ್ಥೇ॑ ಮಹಿ॒ಷೋ ವ॑ವರ್ಧ ॥
ಇ॒ದನ್ತ॒ ಏಕ॑-ಮ್ಪ॒ರ ಊ॑ತ॒ ಏಕ॑-ನ್ತೃ॒ತೀಯೇ॑ನ॒ ಜ್ಯೋತಿ॑ಷಾ॒ ಸಂ​ವಿಁ॑ಶಸ್ವ । ಸಂ॒​ವೇಁಶ॑ನಸ್ತ॒ನುವೈ॒ ಚಾರು॑ರೇಧಿ ಪ್ರಿ॒ಯೋ ದೇ॒ವಾನಾ᳚-ಮ್ಪರ॒ಮೇ ಸ॒ಧಸ್ಥೇ᳚ ॥
ನಾಕೇ॑ ಸುಪ॒ರ್ಣಮುಪ॒ ಯ-ತ್ಪತ॑ನ್ತಗ್ಂ ಹೃ॒ದಾ ವೇನ॑ನ್ತೋ ಅ॒ಭ್ಯಚ॑ಖ್ಷತ ತ್ವಾ । ಹಿರ॑ಣ್ಯಪಖ್ಷ॒ಮ್ ಁವರು॑ಣಸ್ಯ ದೂ॒ತಮ್ ಁಯ॒ಮಸ್ಯ॒ ಯೋನೌ॑ ಶಕು॒ನ-ಮ್ಭು॑ರ॒ಣ್ಯುಮ್ ॥
ಅತಿ॑ದ್ರವ ಸಾರಮೇ॒ಯೌ ಶ್ವಾನೌ॑ ಚತುರ॒ಖ್ಷೌ ಶ॒ಬಲೌ॑ ಸಾ॒ಧುನಾ॑ ಪ॒ಥಾ । ಅಥಾ॑ ಪಿ॒ತೄನ್-ಥ್ಸು॑ವಿ॒ದತ್ರಾ॒ಗ್ಂ॒ ಅಪೀ॑ಹಿ ಯ॒ಮೇನ॒ ಯೇ ಸ॑ಧ॒ಮಾದ॒-ಮ್ಮದ॑ನ್ತಿ ॥
ಯೌ ತೇ॒ ಶ್ವಾನೌ॑ ಯಮ ರಖ್ಷಿ॒ತಾರೌ॑ ಚತುರ॒ಖ್ಷೌ ಪ॑ಥಿ॒ರಖ್ಷೀ॑ ನೃ॒ಚಖ್ಷ॑ಸಾ ।
ತಾಭ್ಯಾಗ್ಂ॑ ರಾಜ॒-ನ್ಪರಿ॑ ದೇಹ್ಯೇನಗ್ಗ್​ ಸ್ವ॒ಸ್ತಿ ಚಾ᳚ಸ್ಮಾ ಅನಮೀ॒ವ-ಞ್ಚ॑ ಧೇಹಿ ॥ 6 ॥

ಉ॒ರು॒ಣ॒ಸಾ-ವ॑ಸು॒ತೃಪಾ॑-ವುಲುಮ್ಬ॒ಲೌ ಯ॒ಮಸ್ಯ॑ ದೂ॒ತೌ ಚ॑ರತೋ॒ ವಶಾ॒ಗ್ಂ॒ ಅನು॑ । ತಾವ॒ಸ್ಮಭ್ಯ॑-ನ್ದೃ॒ಶಯೇ॒ ಸೂರ್ಯಾ॑ಯ॒ ಪುನ॑ರ್ದ-ತ್ತಾ॒ವಸು॑ಮ॒ದ್ಯೇಹ ಭ॒ದ್ರಮ್ ॥
ಸೋಮ॒ ಏಕೇ᳚ಭ್ಯಃ ಪವತೇ ಘೃ॒ತಮೇಕ॒ ಉಪಾ॑ಸತೇ ।
ಯೇಭ್ಯೋ॒ ಮಧು॑ ಪ್ರ॒ಧಾವ॑ತಿ॒ ತಾಗ್​-ಶ್ಚಿ॑ದೇ॒ವಾಪಿ॑ಗಚ್ಛತಾತ್ ॥
ಯೇ ಯುದ್ಧ್ಯ॑ನ್ತೇ ಪ್ರ॒ಧನೇ॑ಷು॒ ಶೂರಾ॑ಸೋ॒ ಯೇ ತ॑ನು॒ತ್ಯಜಃ॑ । ಯೇ ವಾ॑ ಸ॒ಹಸ್ರ॑ದಖ್ಷಿಣಾ॒ಸ್ತಾಗ್​ ಶ್ಚಿ॑ದೇ॒ವಾಪಿ॑ಗಚ್ಛತಾತ್ ॥
ತಪ॑ಸಾ॒ ಯೇ ಅ॑ನಾಧೃ॒ಷ್ಯಾ-ಸ್ತಪ॑ಸಾ॒ ಯೇ ಸುವ॑ರ್ಗ॒ತಾಃ ।
ತಪೋ॒ ಯೇ ಚ॑ಕ್ರಿ॒ರೇ ಮ॒ಹ-ತ್ತಾಗ್​-ಶ್ಚಿ॑ದೇ॒ವಾಪಿ॑ಗಚ್ಛತಾತ್ ॥
ಅಶ್ಮ॑ನ್ವತೀ ರೇವತೀ॒-ಸ್ಸಗ್ಂರ॑ಭದ್ಧ್ವ॒-ಮುತ್ತಿ॑ಷ್ಠತ॒ ಪ್ರತ॑ರತಾ ಸಖಾಯಃ । ಅತ್ರಾ॑ ಜಹಾಮ॒ ಯೇ ಅಸ॒ನ್ನಶೇ॑ವಾ-ಶ್ಶಿ॒ವಾನ್. ವ॒ಯಮ॒ಭಿ ವಾಜಾ॒ನುತ್ತ॑ರೇಮ ॥ 7 ॥

ಯದ್ವೈ ದೇ॒ವಸ್ಯ॑ ಸವಿ॒ತುಃ ಪ॒ವಿತ್ರಗ್ಂ॑ ಸ॒ಹಸ್ರ॑ಧಾರ॒ಮ್ ಁವಿತ॑ತಮ॒ನ್ತರಿ॑ಖ್ಷೇ । ಯೇನಾಪು॑ನಾ॒ದಿನ್ದ್ರ॒ಮನಾ᳚ರ್ತ॒-ಮಾರ್ತ್ಯೈ॒ ತೇನಾ॒ಹ-ಮ್ಮಾಗ್ಂ ಸ॒ರ್ವತ॑ನು-ಮ್ಪುನಾಮಿ ॥
ಯಾ ರಾ॒ಷ್ಟ್ರಾ-ತ್ಪ॒ನ್ನಾದಪ॒ ಯನ್ತಿ॒ ಶಾಖಾ॑ ಅ॒ಭಿಮೃ॑ತಾ ನೃ॒ಪತಿ॑ಮಿ॒ಚ್ಛಮಾ॑ನಾಃ । ಧಾ॒ತುಸ್ತಾ-ಸ್ಸರ್ವಾಃ॒ ಪವ॑ನೇನ ಪೂ॒ತಾಃ ಪ್ರ॒ಜಯಾ॒-ಽಸ್ಮಾನ್-ರ॒ಯ್ಯಾ ವರ್ಚ॑ಸಾ॒ ಸಗ್ಂಸೃ॑ಜಾಥ ॥
ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ ।
ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥
ಧಾ॒ತಾ ಪು॑ನಾತು ಸವಿ॒ತಾ ಪು॑ನಾತು । ಅ॒ಗ್ನೇಸ್ತೇಜ॑ಸಾ॒ ಸೂರ್ಯ॑ಸ್ಯ॒ ವರ್ಚ॑ಸಾ ॥ 8 ॥
(ಧೇ॒ - ಹ್ಯುತ್ತ॑ರೇ - ಮಾ॒ಷ್ಟೌ ಚ॑) (ಅ. 3)

ಅನುವಾಕಂ 4
ಯ-ನ್ತೇ॑ ಅ॒ಗ್ನಿಮಮ॑ನ್ಥಾಮ ವೃಷ॒ಭಾಯೇ॑ವ॒ ಪಕ್ತ॑ವೇ ।
ಇ॒ಮ-ನ್ತಗ್ಂ ಶ॑ಮಯಾಮಸಿ ಖ್ಷೀ॒ರೇಣ॑ ಚೋದ॒ಕೇನ॑ ಚ ॥
ಯನ್ತ್ವಮ॑ಗ್ನೇ ಸ॒ಮದ॑ಹ॒ಸ್ತ್ವಮು॒ ನಿರ್ವಾ॑ಪಯಾ॒ ಪುನಃ॑ ।
ಕ್ಯಾ॒ಮ್ಬೂರತ್ರ॑ ಜಾಯತಾ-ಮ್ಪಾಕದೂ॒ರ್ವಾ ವ್ಯ॑ಲ್ಕಶಾ ॥
ಶೀತಿ॑ಕೇ॒ ಶೀತಿ॑ಕಾವತಿ॒ ಹ್ಲಾದು॑ಕೇ॒ ಹ್ಲಾದು॑ಕಾವತಿ ।
ಮ॒ಣ್ಡೂ॒ಕ್ಯಾ॑ ಸುಸಙ್ಗ॒ಮಯೇ॒ಮಗ್ಗ್​ ಸ್ವ॑ಗ್ನಿಗ್ಂ ಶ॒ಮಯ॑ ॥ ಶ-ನ್ತೇ॑ ಧನ್ವ॒ನ್ಯಾ ಆಪ॒-ಶ್ಶಮು॑ ತೇ ಸನ್ತ್ವನೂ॒ಕ್ಯಾಃ᳚ । ಶ-ನ್ತೇ॑ ಸಮು॒ದ್ರಿಯಾ॒ ಆಪ॒-ಶ್ಶಮು॑ ತೇ ಸನ್ತು॒ ವರ್​ಷ್ಯಾಃ᳚ ॥
ಶ-ನ್ತೇ॒ ಸ್ರವ॑ನ್ತೀ-ಸ್ತ॒ನುವೇ॒ ಶಮು॑ ತೇ ಸನ್ತು॒ ಕೂಪ್ಯಾಃ᳚ ।
ಶ-ನ್ತೇ॑ ನೀಹಾ॒ರೋ ವ॑ರ್​ಷತು॒ ಶಮು॒ ಪೃಷ್ವಾ-ಽವ॑ಶೀಯತಾಮ್ ॥ 9 ॥

ಅವ॑ ಸೃಜ॒ ಪುನ॑ರಗ್ನೇ ಪಿ॒ತೃಭ್ಯೋ॒ ಯಸ್ತ॒ ಆಹು॑ತ॒ಶ್ಚರ॑ತಿ ಸ್ವ॒ಧಾಭಿಃ॑ । ಆಯು॒ರ್ವಸಾ॑ನ॒ ಉಪ॑ ಯಾತು॒ ಶೇಷ॒ಗ್ಂ॒ ಸಙ್ಗ॑ಚ್ಛತಾ-ನ್ತ॒ನುವಾ॑ ಜಾತವೇದಃ ॥
ಸಙ್ಗ॑ಚ್ಛಸ್ವ ಪಿ॒ತೃಭಿ॒-ಸ್ಸಗ್ಗ್​ ಸ್ವ॒ಧಾಭಿ॒-ಸ್ಸಮಿ॑ಷ್ಟಾಪೂ॒ರ್ತೇನ॑ ಪರ॒ಮೇ ವ್ಯೋ॑ಮನ್ನ್ ।
ಯತ್ರ॒ ಭೂಮ್ಯೈ॑ ವೃ॒ಣಸೇ॒ ತತ್ರ॑ ಗಚ್ಛ॒ ತತ್ರ॑ ತ್ವಾ ದೇ॒ವ-ಸ್ಸ॑ವಿ॒ತಾ ದ॑ಧಾತು ॥ ಯತ್ತೇ॑ ಕೃ॒ಷ್ಣ-ಶ್ಶ॑ಕು॒ನ ಆ॑ತು॒ತೋದ॑ ಪಿಪೀ॒ಲ-ಸ್ಸ॒ರ್ಪ ಉ॒ತ ವಾ॒ ಶ್ವಾಪ॑ದಃ ।
ಅ॒ಗ್ನಿಷ್ಟ-ದ್ವಿಶ್ವಾ॑ದನೃ॒ಣ-ಙ್ಕೃ॑ಣೋತು॒ ಸೋಮ॑ಶ್ಚ॒ ಯೋ ಬ್ರಾ᳚ಹ್ಮ॒ಣಮಾ॑ವಿ॒ವೇಶ॑ ॥ ಉತ್ತಿ॒ಷ್ಠಾತ॑-ಸ್ತ॒ನುವ॒ಗ್ಂ॒ ಸಮ್ಭ॑ರಸ್ವ॒ ಮೇಹ ಗಾತ್ರ॒ಮವ॑ಹಾ॒ ಮಾ ಶರೀ॑ರಮ್ ।
ಯತ್ರ॒ ಭೂಮ್ಯೈ॑ ವೃ॒ಣಸೇ॒ ತತ್ರ॑ ಗಚ್ಛ॒ ತತ್ರ॑ ತ್ವಾ ದೇ॒ವ-ಸ್ಸ॑ವಿ॒ತಾ ದ॑ಧಾತು ॥ ಇ॒ದ-ನ್ತ॒ ಏಕ॑-ಮ್ಪ॒ರ ಊ॑ತ॒ ಏಕ॑-ನ್ತೃ॒ತೀಯೇ॑ನ॒ ಜ್ಯೋತಿ॑ಷಾ॒ ಸಂ​ವಿಁ॑ಶಸ್ವ ।
ಸಂ॒​ವೇಁಶ॑ನ-ಸ್ತ॒ನುವೈ॒ ಚಾರು॑ರೇಧಿ ಪ್ರಿ॒ಯೋ ದೇ॒ವಾನಾ᳚-ಮ್ಪರ॒ಮೇ ಸ॒ಧಸ್ಥೇ᳚ ॥ ಉತ್ತಿ॑ಷ್ಠ॒ ಪ್ರೇಹಿ॒ ಪ್ರದ್ರ॒ವೌಕಃ॑ ಕೃಣುಷ್ವ ಪರ॒ಮೇ ವ್ಯೋ॑ಮನ್ನ್ । ಯ॒ಮೇನ॒ ತ್ವಮ್ ಁಯ॒ಮ್ಯಾ॑ ಸಂ​ವಿಁದಾ॒ನೋತ್-ತ॒ಮ-ನ್ನಾಕ॒ಮಧಿ॑ ರೋಹೇ॒ಮಮ್ ॥
ಅಶ್ಮ॑ನ್ವತೀ ರೇವತೀ॒-ಸ್ಸಗ್ಂ ರ॑ಭದ್ಧ್ವ॒ ಮುತ್ತಿ॑ಷ್ಠತ॒ ಪ್ರತ॑ರತಾ ಸಖಾಯಃ । ಅತ್ರಾ॑ ಜಹಾಮ॒ ಯೇ ಅಸ॒ನ್ನಶೇ॑ವಾ-ಶ್ಶಿ॒ವಾನ್ ವ॒ಯಮ॒ಭಿ ವಾಜಾ॒ನುತ್ತ॑ರೇಮ ॥ ಯದ್ವೈ ದೇ॒ವಸ್ಯ॑ ಸವಿ॒ತುಃ ಪ॒ವಿತ್ರಗ್ಂ॑ ಸ॒ಹಸ್ರ॑ಧಾರ॒ಮ್ ಁವಿತ॑ತಮ॒ನ್ತರಿ॑ಖ್ಷೇ । ಯೇನಾಪು॑ನಾ॒ದಿನ್ದ್ರ॒ಮನಾ॑ರ್ತ॒-ಮಾರ್ತ್ಯೈ॒ ತೇನಾ॒ಹ-ಮ್ಮಾಗ್ಂ ಸ॒ರ್ವತ॑ನು-ಮ್ಪುನಾಮಿ ॥ ಯಾ ರಾ॒ಷ್ಟ್ರಾ-ತ್ಪ॒ನ್ನಾದಪ॒ ಯನ್ತಿ॒ ಶಾಖಾ॑ ಅ॒ಭಿಮೃ॑ತಾ ನೃ॒ಪತಿ॑ಮಿ॒ಚ್ಛಮಾ॑ನಾಃ । ಧಾ॒ತುಸ್ತಾ-ಸ್ಸರ್ವಾಃ॒ ಪವ॑ನೇನ ಪೂ॒ತಾಃ ಪ್ರ॒ಜಯಾ॒-ಽಸ್ಮಾನ್-ರ॒ಯ್ಯಾ ವರ್ಚ॑ಸಾ॒ ಸಗ್ಂಸೃ॑ಜಾಥ ॥ ಯಾ ರಾ॒ಷ್ಟ್ರಾ-ತ್ಪ॒ನ್ನಾದಪ॒ ಯನ್ತಿ॒ ಶಾಖಾ॑ ಅ॒ಭಿಮೃ॑ತಾ ನೃ॒ಪತಿ॑ಮಿ॒ಚ್ಛಮಾ॑ನಾಃ । ಧಾ॒ತುಸ್ತಾ-ಸ್ಸರ್ವಾಃ॒ ಪವ॑ನೇನ ಪೂ॒ತಾಃ ಪ್ರ॒ಜಯಾ॒-ಽಸ್ಮಾನ್-ರ॒ಯ್ಯಾ ವರ್ಚ॑ಸಾ॒ ಸಗ್ಂಸೃ॑ಜಾಥ ॥ ಧಾ॒ತಾ ಪು॑ನಾತು ಸವಿ॒ತಾ ಪು॑ನಾತು । ಅ॒ಗ್ನೇಸ್ತೇಜ॑ಸಾ॒ ಸೂರ್ಯ॑ಸ್ಯ॒ ವರ್ಚ॑ಸಾ ॥
ಅ॒ಸ್ಮಾತ್ತ್ವಮಧಿ॑ ಜಾ॒ತೋ᳚-ಽಸ್ಯ॒ಯ-ನ್ತ್ವದಧಿ॑ಜಾಯತಾಮ್ ।
ಅ॒ಗ್ನಯೇ॑ ವೈಶ್ವಾನ॒ರಾಯ॑ ಸುವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ᳚ ॥ 10 ॥
(ಅವ॑ಶೀಯತಾಗ್ಂ - ಸ॒ಧಸ್ಥೇ॒ ಪಞ್ಚ॑ ಚ) (ಅ. 4)

ಅನುವಾಕಂ 5
ಆಯಾ॑ತು ದೇ॒ವ-ಸ್ಸು॒ಮನಾ॑ಭಿ-ರೂ॒ತಿಭಿ॑-ರ್ಯ॒ಮೋ ಹ॑ವೇ॒ಹ ಪ್ರಯ॑ತಾಭಿರ॒ಕ್ತಾ । ಆಸೀ॑ದತಾಗ್ಂ ಸುಪ್ರ॒ಯತೇ॑ಹ ಬ॒ರ್॒ಹಿಷ್ಯೂರ್ಜಾ॑ಯ ಜಾ॒ತ್ಯೈ ಮಮ॑ ಶತ್ರು॒ಹತ್ಯೈ᳚ ॥
ಯ॒ಮೇ ಇ॑ವ॒ ಯತ॑ಮಾನೇ॒ ಯದೈತ॒-ಮ್ಪ್ರವಾ᳚ಮ್ಭರ॒-ನ್ಮಾನು॑ಷಾ ದೇವ॒ಯನ್ತಃ॑ । ಆಸೀ॑ದತ॒ಗ್ಗ್॒ ಸ್ವಮು॑ ಲೋ॒ಕಮ್ ಁವಿದಾ॑ನೇ ಸ್ವಾಸ॒ಸ್ಥೇ ಭ॑ವತ॒ಮಿನ್ದ॑ವೇ ನಃ ॥
ಯ॒ಮಾಯ॒ ಸೋಮಗ್ಂ॑ ಸುನುತ ಯ॒ಮಾಯ॑ ಜುಹುತಾ ಹ॒ವಿಃ ।
ಯ॒ಮಗ್ಂ ಹ॑ ಯ॒ಜ್ಞೋ ಗ॑ಚ್ಛತ್ಯ॒ಗ್ನಿದೂ॑ತೋ॒ ಅರ॑ಙ್ಕೃತಃ ॥
ಯ॒ಮಾಯ॑ ಘೃ॒ತವ॑ದ್ಧ॒ವಿರ್ಜು॒ಹೋತ॒ ಪ್ರ ಚ॑ ತಿಷ್ಠತ ।
ಸ ನೋ॑ ದೇ॒ವೇಷ್ವಾಯ॑ಮ-ದ್ದೀ॒ರ್ಘಮಾಯುಃ॒ ಪ್ರ ಜೀ॒ವಸೇ᳚ ॥
ಯ॒ಮಾಯ॒ ಮಧು॑ಮತ್ತಮ॒ಗ್ಂ॒ ರಾಜ್ಞೇ॑ ಹ॒ವ್ಯ-ಞ್ಜು॑ಹೋತನ । ಇ॒ದ-ನ್ನಮ॒ ಋಷಿ॑ಭ್ಯಃ ಪೂರ್ವ॒ಜೇಭ್ಯಃ॒ ಪೂರ್ವೇ᳚ಭ್ಯಃ ಪಥಿ॒ಕೃದ್ಭ್ಯಃ॑ ॥ 11 ॥

ಯೋ-ಽಸ್ಯ॒ ಕೌಷ್ಠ್ಯ॒ ಜಗ॑ತಃ॒ ಪಾರ್ಥಿ॑ವ॒ಸ್ಯೈಕ॑ ಇದ್ವ॒ಶೀ ।
ಯ॒ಮ-ಮ್ಭ॑ಙ್ಗ್ಯಶ್ರ॒ವೋ ಗಾ॑ಯ॒ ಯೋ ರಾಜಾ॑-ಽನಪ॒ರೋದ್ಧ್ಯಃ॑ ॥ ಯ॒ಮ-ಙ್ಗಾಯ॑ ಭಙ್ಗ್ಯ॒ಶ್ರವೋ॒ ಯೋ ರಾಜಾ॑-ಽನಪ॒ರೋದ್ಧ್ಯಃ॑ । ಯೇನಾ॒ಪೋ ನ॒ದ್ಯೋ॑ ಧನ್ವಾ॑ನಿ॒ ಯೇನ॒ ದ್ಯೌಃ ಪೃ॑ಥಿ॒ವೀ ದೃ॒ಢಾ ॥ ಹಿ॒ರ॒ಣ್ಯ॒ಕ॒ಖ್ಷ್ಯಾನ್-ಥ್ಸು॒ಧುರಾನ್॑. ಹಿರಣ್ಯಾ॒ಖ್ಷಾ-ನ॑ಯಶ್ಶ॒ಫಾನ್ । ಅಶ್ವಾ॑-ನ॒ನಶ್ಯ॑ತೋ ದಾ॒ನ॒ಮ್ ಁಯ॒ಮೋ ರಾ॑ಜಾ-ಽಭಿ॒ತಿಷ್ಠ॑ತಿ ॥ ಯ॒ಮೋ ದಾ॑ಧಾರ ಪೃಥಿ॒ವೀಂ-ಯಁ॒ಮೋ ವಿಶ್ವ॑ಮಿ॒ದ-ಞ್ಜಗ॑ತ್ । ಯ॒ಮಾಯ॒ ಸರ್ವ॒ಮಿತ್ರ॑ಸ್ಥೇ॒ ಯ-ತ್ಪ್ರಾ॒ಣ-ದ್ವಾ॒ಯುರ॑ಖ್ಷಿ॒ತಮ್ ॥ ಯಥಾ॒ ಪಞ್ಚ॒ ಯಥಾ॒ ಷಡ್ ಯ॒ಥಾ ಪಞ್ಚ॑ ದ॒ಶರ್​ಷ॑ಯಃ । ಯ॒ಮಮ್ ಁಯೋ ವಿ॑ದ್ಯಾ॒ಥ್ಸ ಬ್ರೂ॑ಯಾದ್ಯ॒ಥೈಕ ಋಷಿ॑ರ್ವಿಜಾನ॒ತೇ ॥ 12 ॥

ತ್ರಿಕ॑ದ್ರುಕೇಭಿಃ॒ ಪತ॑ತಿ॒ ಷಡು॒ರ್ವೀ-ರೇಕ॒ಮಿ-ದ್ಬೃ॒ಹತ್ ।
ಗಾ॒ಯ॒ತ್ರೀ ತ್ರಿ॒ಷ್ಟುಪ್ಛನ್ದಾಗ್ಂ॑ಸಿ॒ ಸರ್ವಾ॒ ತಾ ಯ॒ಮ ಆಹಿ॑ತಾ ॥
ಅಹ॑ರಹ॒ರ್ನಯ॑ಮಾನೋ॒ ಗಾಮಶ್ವ॒-ಮ್ಪುರು॑ಷ॒-ಞ್ಜಗ॑ತ್ ।
ವೈವ॑ಸ್ವತೋ॒ ನ ತೃ॑ಪ್ಯತಿ॒ ಪಞ್ಚ॑ಭಿ॒ರ್ಮಾನ॑ವೈರ್ಯ॒ಮಃ ॥
ವೈವ॑ಸ್ವತೇ॒ ವಿವಿ॑ಚ್ಯನ್ತೇ॒ ಯಮೇ॒ ರಾಜ॑ನಿ ತೇ ಜ॒ನಾಃ ।
ಯೇ ಚೇ॒ಹ ಸ॒ತ್ಯೇನೇಚ್ಛ॑ನ್ತೇ॒ ಯ ಉ॒ ಚಾನೃ॑ತವಾದಿ॒ನಃ ॥
ತೇ ರಾ॑ಜನ್ನಿ॒ಹ ವಿವಿ॑ಚ್ಯನ್ತೇ॒-ಽಥಾ ಯ॑ನ್ತಿ ತ್ವಾ॒ಮುಪ॑ ।
ದೇ॒ವಾಗ್​ಶ್ಚ॒ ಯೇ ನ॑ಮ॒ಸ್ಯನ್ತಿ॒ ಬ್ರಾಹ್ಮ॑ಣಾಗ್​ಶ್ಚಾಪ॒ಚಿತ್ಯ॑ತಿ ॥
ಯಸ್ಮಿ॑ನ್ ವೃ॒ಖ್ಷೇ ಸು॑ಪಲಾ॒ಶೇ ದೇ॒ವೈ-ಸ್ಸ॒ಪಿಮ್ಬ॑ತೇ ಯ॒ಮಃ ।
ಅತ್ರಾ॑ ನೋ ವಿ॒ಶ್ಪತಿಃ॑ ಪಿ॒ತಾ ಪು॑ರಾ॒ಣಾ ಅನು॑ವೇನತಿ ॥ 13 ॥
(ಪ॒ಥಿ॒ಕೃದ್ಭ್ಯೋ॑ - ವಿಜಾನ॒ತೇ - ಽನು॑ವೇನತಿ) (ಅ. 5)

ಅನುವಾಕಂ 6
ವೈ॒ಶ್ವಾ॒ನ॒ರೇ ಹ॒ವಿರಿ॒ದ-ಞ್ಜು॑ಹೋಮಿ ಸಾಹ॒ಸ್ರ-ಮುಥ್ಸಗ್ಂ॑ ಶ॒ತಧಾ॑ರಮೇ॒ತಮ್ । ತಸ್ಮಿ॑ನ್ನೇ॒ಷ ಪಿ॒ತರ॑-ಮ್ಪಿತಾಮ॒ಹ-ಮ್ಪ್ರಪಿ॑ತಾಮಹ-ಮ್ಬಿಭರ॒-ತ್ಪಿನ್ವ॑ಮಾನೇ ॥
ದ್ರ॒ಫ್ಸಶ್ಚ॑ಸ್ಕನ್ದ ಪೃಥಿ॒ವೀಮನು॒ ದ್ಯಾಮಿ॒ಮಞ್ಚ॒ ಯೋನಿ॒ಮನು॒ ಯಶ್ಚ॒ ಪೂರ್ವಃ॑ ।
ತೃ॒ತೀಯ॒ಮ್ ಁಯೋನಿ॒ಮನು॑ ಸ॒ಞ್ಚರ॑ನ್ತ-ನ್ದ್ರ॒ಫ್ಸ-ಞ್ಜು॑ಹೋ॒ಮ್ಯನು॑ ಸ॒ಪ್ತ ಹೋತ್ರಾಃ᳚ ॥
ಇ॒ಮಗ್ಂ ಸ॑ಮು॒ದ್ರಗ್ಂ ಶ॒ತಧಾ॑ರ॒ಮುಥ್ಸ॑ಮ್ ಁವ್ಯ॒ಚ್ಯಮಾ॑ನ॒-ಮ್ಭುವ॑ನಸ್ಯ॒ ಮದ್ಧ್ಯೇ᳚ ।
ಘೃ॒ತ-ನ್ದುಹಾ॑ನಾ॒ಮದಿ॑ತಿ॒-ಞ್ಜನಾ॒ಯಾಗ್ನೇ॒ ಮಾ ಹಿಗ್ಂ॑ಸೀಃ ಪರ॒ಮೇ ವ್ಯೋ॑ಮನ್ನ್ ॥ ಅಪೇ॑ತ॒ ವೀತ॒ ವಿ ಚ॑ ಸರ್ಪ॒ತಾತೋ॒ ಯೇ-ಽತ್ರ॒ ಸ್ಥ ಪು॑ರಾ॒ಣಾ ಯೇ ಚ॒ ನೂತ॑ನಾಃ ।
ಅಹೋ॑ಭಿರ॒ದ್ಭಿ-ರ॒ಕ್ತುಭಿ॒-ರ್ವ್ಯ॑ಕ್ತಮ್ ಁಯ॒ಮೋ ದ॑ದಾ-ತ್ವವ॒ಸಾನ॑ಮಸ್ಮೈ ॥ ಸ॒ವಿ॒ತೈತಾನಿ॒ ಶರೀ॑ರಾಣಿ ಪೃಥಿ॒ವ್ಯೈ ಮಾ॒ತುರು॒ಪಸ್ಥ॒ ಆದ॑ಧೇ ।
ತೇಭಿ॑-ರ್ಯುಜ್ಯನ್ತಾ-ಮಘ್ನಿ॒ಯಾಃ ॥ 14 ॥

ಶು॒ನಮ್ ಁವಾ॒ಹಾ-ಶ್ಶು॒ನ-ನ್ನಾ॒ರಾ-ಶ್ಶು॒ನ-ಙ್ಕೃ॑ಷತು॒ ಲಾಙ್ಗ॑ಲಮ್ ।
ಶು॒ನಮ್ ಁವ॑ರ॒ತ್ರಾ ಬ॑ದ್ಧ್ಯನ್ತಾಗ್ಂ ಶು॒ನ-ಮಷ್ಟ್ರಾ॒-ಮುದಿ॑ಙ್ಗಯ॒ ಶುನಾ॑ಸೀರಾ ಶು॒ನಮ॒ಸ್ಮಾಸು॑ ಧತ್ತಮ್ ॥
ಶುನಾ॑ಸೀರಾವಿ॒ಮಾಮ್ ಁವಾಚ॒ಮ್ ಁಯ-ದ್ದಿ॒ವಿ ಚ॑ಕ್ರ॒ಥುಃ ಪಯಃ॑ । ತೇನೇ॒ಮಾ-ಮುಪ॑ಸಿಞ್ಚತಮ್ ॥
ಸೀತೇ॒ ವನ್ದಾ॑ಮಹೇ ತ್ವಾ॒-ಽರ್ವಾಚೀ॑ ಸುಭಗೇ ಭವ ।
ಯಥಾ॑ ನ-ಸ್ಸು॒ಭಗಾ ಸ॑ಸಿ॒ ಯಥಾ॑ ನ-ಸ್ಸು॒ಫಲಾ ಸ॑ಸಿ ॥
ಸ॒ವಿ॒ತೈತಾನಿ॒ ಶರೀ॑ರಾಣಿ ಪೃಥಿ॒ವ್ಯೈ ಮಾ॒ತುರು॒ಪಸ್ಥ॒ ಆದ॑ಧೇ । ತೇಭಿ॑ರದಿತೇ॒ ಶ-ಮ್ಭ॑ವ ॥
ವಿಮು॑ಚ್ಯದ್ಧ್ವ-ಮಘ್ನಿ॒ಯಾ ದೇ॑ವ॒ಯಾನಾ॒ ಅತಾ॑ರಿಷ್ಮ॒ ತಮ॑ಸಸ್ಪಾ॒ರಮ॒ಸ್ಯ ।
ಜ್ಯೋತಿ॑ರಾಪಾಮ॒ ಸುವ॑ರಗನ್ಮ ॥ 15 ॥

ಪ್ರ ವಾತಾ॒ ವಾನ್ತಿ॑ ಪ॒ತಯ॑ನ್ತಿ ವಿ॒ದ್ಯುತ॒ ಉದೋಷ॑ಧೀರ್ಜಿಹತೇ॒ ಪಿನ್ವ॑ತೇ॒ ಸುವಃ॑ । ಇರಾ॒ ವಿಶ್ವ॑ಸ್ಮೈ॒ ಭುವ॑ನಾಯ ಜಾಯತೇ॒ ಯ-ತ್ಪ॒ರ್ಜನ್ಯಃ॑ ಪೃಥಿ॒ವೀಗ್ಂ ರೇತ॒ಸಾ-ಽವ॑ತಿ ॥
ಯಥಾ॑ ಯ॒ಮಾಯ॑ ಹಾ॒ರ್ಮ್ಯ-ಮವ॑ಪ॒-ನ್ಪಞ್ಚ॑ಮಾನ॒ವಾಃ ।
ಏ॒ವಮ್ ಁವ॑ಪಾಮಿ ಹಾ॒ರ್ಮ್ಯಮ್ ಁಯಥಾ-ಽಸಾ॑ಮ ಜೀವಲೋ॒ಕೇ ಭೂರ॑ಯಃ ॥ ಚಿತ॑-ಸ್ಸ್ಥ ಪರಿ॒ಚಿತ॑ ಊರ್ಧ್ವ॒ಚಿತ॑-ಶ್ಶ್ರಯದ್ಧ್ವ-ಮ್ಪಿ॒ತರೋ॑ ದೇ॒ವತಾ᳚ ।
ಪ್ರ॒ಜಾಪ॑ತಿರ್ವ-ಸ್ಸಾದಯತು॒ ತಯಾ॑ ದೇ॒ವತ॑ಯಾ ॥
ಆ ಪ್ಯಾ॑ಯಸ್ವ॒ ಸಮೆ॑ತು ತೇ ವಿ॒ಶ್ವತ॑-ಸ್ಸೋಮ॒ ವೃಷ್ಣಿ॑ಯಮ್ । ಭವಾ॒ ವಾಜ॑ಸ್ಯ ಸಙ್ಗ॒ಥೇ ॥ ಸ-ನ್ತೇ॒ ಪಯಾಗ್ಂ॑ಸಿ॒ ಸಮು॑ ಯನ್ತು॒ ವಾಜಾ॒-ಸ್ಸಂ-ವೃಁಷ್ಣಿ॑ಯಾ-ನ್ಯಭಿಮಾತಿ॒ಷಾಹಃ॑ । ಆ॒ಪ್ಯಾಯ॑ಮಾನೋ ಅ॒ಮೃತಾ॑ಯ ಸೋಮ ದಿ॒ವಿ ಶ್ರವಾಗ್॑ಸ್ಯುತ್ತ॒ಮಾನಿ॑ ಧಿಷ್ವ ॥ 16 ॥
(ಅ॒ಘ್ನಿ॒ಯಾ - ಅ॑ಗನ್ಮ - +ಸ॒ಪ್ತ ಚ॑) (ಅ. 6)

ಅನುವಾಕಂ 7
ಉತ್ತೇ॑ ತಭ್ನೋಮಿ ಪೃಥಿ॒ವೀ-ನ್ತ್ವತ್ಪರೀ॒ಮಮ್ ಁಲೋ॒ಕ-ನ್ನಿ॒ದಧ॒ನ್ಮೋ ಅ॒ಹಗ್ಂ ರಿ॑ಷಮ್ । ಏ॒ತಾಗ್​ ಸ್ಥೂಣಾ᳚-ಮ್ಪಿ॒ತರೋ॑ ಧಾರಯನ್ತು॒ ತೇ-ಽತ್ರಾ॑ ಯ॒ಮ-ಸ್ಸಾದ॑ನಾತ್ತೇ ಮಿನೋತು ॥
ಉಪ॑ಸರ್ಪ ಮಾ॒ತರ॒-ಮ್ಭೂಮಿ॑ಮೇ॒ತಾ-ಮು॑ರು॒ವ್ಯಚ॑ಸ-ಮ್ಪೃಥಿ॒ವೀಗ್ಂ ಸು॒ಶೇವಾ᳚ಮ್ । ಊರ್ಣ॑ಮ್ರದಾ ಯುವ॒ತಿ-ರ್ದಖ್ಷಿ॑ಣಾವತ್ಯೇ॒ಷಾ ತ್ವಾ॑ ಪಾತು॒ ನಿರ್-ಋ॑ತ್ಯಾ ಉ॒ಪಸ್ಥೇ᳚ ॥
ಉಚ್ಛ್ಮ॑ಞ್ಚಸ್ವ ಪೃಥಿವಿ॒ ಮಾ ವಿಬಾ॑ಧಿಥಾ-ಸ್ಸೂಪಾಯ॒ನಾ-ಽಸ್ಮೈ॑ ಭವ ಸೂಪವಞ್ಚ॒ನಾ । ಮಾ॒ತಾ ಪು॒ತ್ರಮ್ ಁಯಥಾ॑ ಸಿ॒ಚಾ-ಽಭ್ಯೇ॑ನ-ಮ್ಭೂಮಿ ವೃಣು ॥ ಉ॒ಚ್ಛ್ಮಞ್ಚ॑ಮಾನಾ ಪೃಥಿ॒ವೀ ಹಿ ತಿಷ್ಠ॑ಸಿ ಸ॒ಹಸ್ರ॒ಮ್ಮಿತ॒ ಉಪ॒ ಹಿ ಶ್ರಯ॑ನ್ತಾಮ್ ।
ತೇ ಗೃ॒ಹಾಸೋ॑ ಮಧು॒ಶ್ಚುತೋ॒ ವಿಶ್ವಾಹಾ᳚ಸ್ಮೈ ಶರ॒ಣಾ-ಸ್ಸ॒ನ್ತ್ವತ್ರ॑ ॥ ಏಣೀ᳚ರ್ಧಾ॒ನಾ ಹರಿ॑ಣೀ॒ರರ್ಜು॑ನೀ-ಸ್ಸನ್ತು ಧೇ॒ನವಃ॑ । ತಿಲ॑ವಥ್ಸಾ॒ ಊರ್ಜ॑ಮಸ್ಮೈ॒ ದುಹಾ॑ನಾ॒ ವಿಶ್ವಾಹಾ॑ ಸ॒ನ್ತ್ವನ॑ಪಸ್ಫುರನ್ತೀಃ ॥ 17 ॥

ಏ॒ಷಾ ತೇ॑ ಯಮ॒ಸಾದ॑ನೇ ಸ್ವ॒ಧಾ ನಿಧೀ॑ಯತೇ ಗೃ॒ಹೇ । ಅಖ್ಷಿ॑ತಿ॒ರ್ನಾಮ॑ ತೇ ಅಸೌ ॥ ಇ॒ದ-ಮ್ಪಿ॒ತೃಭ್ಯಃ॒ ಪ್ರಭ॑ರೇಮ ಬ॒ರ್॒ಹಿ-ರ್ದೇ॒ವೇಭ್ಯೋ॒ ಜೀವ॑ನ್ತ॒ ಉತ್ತ॑ರ-ಮ್ಭರೇಮ ।
ತತ್ತ್ವ॑ಮಾರೋ॒ಹಾಸೋ॒ ಮೇಘ್ಯೋ॒ ಭವ॑ಮ್ ಁಯ॒ಮೇನ॒ ತ್ವಮ್ ಁಯ॒ಮ್ಯಾ॑ ಸಂ​ವಿಁದಾ॒ನಃ ॥ ಮಾ ತ್ವಾ॑ ವೃ॒ಖ್ಷೌ ಸಮ್ಬಾ॑ಧಿಷ್ಟಾ॒-ಮ್ಮಾ ಮಾ॒ತಾ ಪೃ॑ಥಿವಿ॒ ತ್ವಮ್ ।
ಪಿ॒ತೄನ್. ಹಿ ಯತ್ರ॒ ಗಚ್ಛಾ॒ಸ್ಯೇಧಾ॑ಸಮ್ ಁಯಮ॒ರಾಜ್ಯೇ᳚ ॥
ಮಾ ತ್ವಾ॑ ವೃ॒ಖ್ಷೌ ಸಮ್ಬಾ॑ಧೇಥಾ॒-ಮ್ಮಾ ಮಾ॒ತಾ ಪೃ॑ಥಿ॒ವೀ ಮ॒ಹೀ । ವೈ॒ವ॒ಸ್ವ॒ತಗ್ಂ ಹಿ ಗಚ್ಛಾ॑ಸಿ ಯಮ॒ರಾಜ್ಯೇ॒ ವಿರಾ॑ಜಸಿ ॥
ನ॒ಳ-ಮ್ಪ್ಲ॒ವಮಾರೋ॑ಹೈ॒ತ-ನ್ನ॒ಳೇನ॑ ಪ॒ಥೋ-ಽನ್ವಿ॑ಹಿ ।
ಸ ತ್ವ॑-ನ್ನ॒ಳಪ್ಲ॑ವೋ ಭೂ॒ತ್ವಾ॒ ಸನ್ತ॑ರ॒ ಪ್ರತ॒ರೋತ್ತ॑ರ ॥ 18 ॥

ಸ॒ವಿ॒ತೈತಾನಿ॒ ಶರೀ॑ರಾಣಿ ಪೃಥಿ॒ವ್ಯೈ ಮಾ॒ತುರು॒ಪಸ್ಥ॒ ಆದ॑ಧೇ । ತೇಭ್ಯಃ॑ ಪೃಥಿವಿ॒ ಶ-ಮ್ಭ॑ವ ॥
ಷಡ್ಢೋ॑ತಾ॒ ಸೂರ್ಯ॑-ನ್ತೇ॒ ಚಖ್ಷು॑-ರ್ಗಚ್ಛತು॒ ವಾತ॑ಮಾ॒ತ್ಮಾ ದ್ಯಾ-ಞ್ಚ॒ ಗಚ್ಛ॑ ಪೃಥಿ॒ವೀ-ಞ್ಚ॒ ಧರ್ಮ॑ಣಾ ।
ಅ॒ಪೋ ವಾ॑ ಗಚ್ಛ॒ ಯದಿ॒ ತತ್ರ॑ ತೇ ಹಿ॒ತಮೋಷ॑ಧೀಷು॒ ಪ್ರತಿ॑ತಿಷ್ಠಾ॒ ಶರೀ॑ರೈಃ ॥ ಪರ॑-ಮ್ಮೃತ್ಯೋ॒ ಅನು॒ ಪರೇ॑ಹಿ॒ ಪನ್ಥಾ॒ಮ್ ಁಯಸ್ತೇ॒ ಸ್ವ ಇತ॑ರೋ ದೇವ॒ಯಾನಾ᳚ತ್ ।
ಚಖ್ಷು॑ಷ್ಮತೇ ಶೃಣ್ವ॒ತೇ ತೇ᳚ ಬ್ರವೀಮಿ॒ ಮಾ ನಃ॑ ಪ್ರ॒ಜಾಗ್ಂ ರೀ॑ರಿಷೋ॒ ಮೋತ ವೀ॒ರಾನ್ ॥
ಶಮ್ ಁವಾತ॒-ಶ್ಶಗ್ಂ ಹಿ ತೇ॒ ಘೃಣಿ॒-ಶ್ಶಮು॑ ತೇ ಸ॒ನ್ತ್ವೋಷ॑ಧೀಃ । ಕಲ್ಪ॑ನ್ತಾ-ಮ್ಮೇ॒ ದಿಶ॑-ಶ್ಶ॒ಗ್ಮಾಃ ॥
ಪೃ॒ಥಿ॒ವ್ಯಾಸ್ತ್ವಾ॑ ಲೋ॒ಕೇ ಸಾ॑ದಯಾಮ್ಯ॒ಮುಷ್ಯ॒ ಶರ್ಮಾ॑ಸಿ ಪಿ॒ತರೋ॑ ದೇ॒ವಾತಾ᳚ । ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ ॥ ಅ॒ನ್ತರಿ॑ಖ್ಷಸ್ಯ ತ್ವಾ ದಿ॒ವಸ್ತ್ವಾ॑ ದಿ॒ಶಾ-ನ್ತ್ವಾ॒ ನಾಕ॑ಸ್ಯ ತ್ವಾ ಪೃ॒ಷ್ಠೇ ಬ್ರ॒ದ್ಧ್ನಸ್ಯ॑ ತ್ವಾ ವಿ॒ಷ್ಟಪೇ॑ ಸಾದಯಾಮ್ಯ॒ಮುಷ್ಯ॒ ಶರ್ಮಾ॑ಸಿ ಪಿ॒ತರೋ॑ ದೇ॒ವತಾ᳚ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ ॥ 19 ॥
(ಅನ॑ಪಸ್ಫುರನ್ತೀ॒ - ರುತ್ತ॑ರ - ದೇ॒ವತ॑ಯಾ॒ ದ್ವೇ ಚ॑) (ಅ. 7)

ಅನುವಾಕಂ 8
ಅ॒ಪೂ॒ಪವಾ᳚-ನ್ಘೃ॒ತವಾಗ್॑ಶ್ಚ॒ರುರೇಹ ಸೀ॑ದತೂತ್ತಭ್ನು॒ವ-ನ್ಪೃ॑ಥಿ॒ವೀ-ನ್ದ್ಯಾಮು॒ತೋಪರಿ॑ । ಯೋ॒ನಿ॒ಕೃತಃ॑ ಪಥಿ॒ಕೃತ॑-ಸ್ಸಪರ್ಯತ॒ ಯೇ ದೇ॒ವಾನಾ᳚-ಙ್ಘೃ॒ತಭಾ॑ಗಾ ಇ॒ಹ ಸ್ಥ ।
ಏ॒ಷಾ ತೇ ಯಮ॒ಸಾದ॑ನೇ ಸ್ವ॒ಧಾ ನಿಧೀ॑ಯತೇ ಗೃ॒ಹೇ॑-ಽಸೌ ।
ದಶಾ᳚ಖ್ಷರಾ॒ ತಾಗ್ಂ ರ॑ಖ್ಷಸ್ವ॒ ತಾ-ಙ್ಗೋ॑ಪಾಯಸ್ವ॒ ತಾ-ನ್ತೇ॒ ಪರಿ॑ ದದಾಮಿ॒ ತಸ್ಯಾ᳚-ನ್ತ್ವಾ॒ ಮಾ ದ॑ಭ-ನ್ಪಿ॒ತರೋ॑ ದೇ॒ವತಾ᳚ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ ॥
ಅ॒ಪೂ॒ಪವಾ᳚-ಞ್ಛೃ॒ತವಾ᳚ನ್-ಖ್ಷೀ॒ರವಾ॒ನ್-ದಧಿ॑ವಾ॒-ನ್ಮಧು॑ಮಾಗ್​-ಶ್ಚ॒ರುರೇಹ ಸೀ॑ದತೂತ್ತಭ್ನು॒ವನ್-ಪೃ॑ಥಿ॒ವೀ-ನ್ದ್ಯಾಮು॒ತೋಪರಿ॑ । ಯೋ॒ನಿ॒ಕೃತಃ॑ ಪಥಿ॒ಕೃತ॑-ಸ್ಸಪರ್ಯತ॒ ಯೇ ದೇ॒ವಾನಾಗ್ಂ॑ ಶೃ॒ತಭಾ॑ಗಾಃ, ಖ್ಷೀ॒ರಭಾ॑ಗಾ॒ ದಧಿ॑ಭಾಗಾ॒ ಮಧು॑ಭಾಗಾ ಇ॒ಹ ಸ್ಥ । ಏ॒ಷಾ ತೇ॑ ಯಮ॒ಸಾದ॑ನೇ ಸ್ವ॒ಧಾ ನಿಧೀ॑ಯತೇ ಗೃ॒ಹೇ॑-ಽಸೌ । ಶ॒ತಾಖ್ಷ॑ರಾ ಸ॒ಹಸ್ರಾ᳚ಖ್ಷರಾ॒-ಽಯುತಾ᳚ಖ್ಷ॒ರಾ-ಽಚ್ಯು॑ತಾಖ್ಷರಾ॒ ತಾಗ್ಂ ರ॑ಖ್ಷಸ್ವ॒ ತಾ-ಙ್ಗೋ॑ಪಾಯಸ್ವ॒ ತಾ-ನ್ತೇ॒ ಪರಿ॑ದದಾಮಿ॒ ತಸ್ಯಾ᳚-ನ್ತ್ವಾ॒ ಮಾ ದ॑ಭ-ನ್ಪಿ॒ತರೋ॑ ದೇ॒ವತಾ᳚ । ಪ್ರ॒ಜಾಪ॑ತಿಸ್ತ್ವಾ ಸಾದಯತು॒ ತಯಾ॑ ದೇ॒ವತ॑ಯಾ ॥ 20 ॥
(ಅ॒ಪೂ॒ಪವಾ॑ನಸೌ॒ ದಶ॑) (ಅ. 8)

ಅನುವಾಕಂ 9
ಏ॒ತಾಸ್ತೇ᳚ ಸ್ವ॒ಧಾ ಅ॒ಮೃತಾಃ᳚ ಕರೋಮಿ॒ ಯಾಸ್ತೇ॑ ಧಾ॒ನಾಃ ಪ॑ರಿ॒ಕಿರಾ॒ಮ್ಯತ್ರ॑ । ತಾಸ್ತೇ॑ ಯ॒ಮಃ ಪಿ॒ತೃಭಿ॑-ಸ್ಸಂ​ವಿಁದಾ॒ನೋ-ಽತ್ರ॑ ಧೇ॒ನೂಃ ಕಾ॑ಮ॒ದುಘಾಃ᳚ ಕರೋತು ॥
ತ್ವಾಮರ್ಜು॒ನೌಷ॑ಧೀನಾ॒-ಮ್ಪಯೋ᳚ ಬ್ರ॒ಹ್ಮಾಣ॒ ಇದ್ವಿ॑ದುಃ ।
ತಾಸಾ᳚-ನ್ತ್ವಾ॒ ಮದ್ಧ್ಯಾ॒ದಾದ॑ದೇ ಚ॒ರುಭ್ಯೋ॒ ಅಪಿ॑ಧಾತವೇ ॥
ದೂ॒ರ್ವಾಣಾಗ್॑ ಸ್ತ॒ಮ್ಬಮಾಹ॑ರೈ॒ತಾ-ಮ್ಪ್ರಿ॒ಯತ॑ಮಾ॒-ಮ್ಮಮ॑ । ಇ॒ಮಾ-ನ್ದಿಶ॑-ಮ್ಮನು॒ಷ್ಯಾ॑ಣಾ॒-ಮ್ಭೂಯಿ॒ಷ್ಠಾ-ಽನು॒ ವಿ ರೋ॑ಹತು ॥ ಕಾಶಾ॑ನಾಗ್​ ಸ್ತ॒ಮ್ಬಮಾಹ॑ರ॒ ರಖ್ಷ॑ಸಾ॒ಮಪ॑ಹತ್ಯೈ ।
ಯ ಏ॒ತಸ್ಯೈ॑ ದಿ॒ಶಃ ಪ॒ರಾಭ॑ವನ್ನಘಾ॒ಯವೋ॒ ಯಥಾ॒ ತೇ ನಾಭ॑ವಾ॒-ನ್ಪುನಃ॑ ॥ ದ॒ರ್ಭಾಣಾಗ್॑ ಸ್ತ॒ಮ್ಬಮಾಹ॑ರ ಪಿತೃ॒ಣಾಮೋಷ॑ಧೀ-ಮ್ಪ್ರಿ॒ಯಾಮ್ । ಅನ್ವಸ್ಯೈ॒ ಮೂಲ॑-ಞ್ಜೀವಾ॒ದನು॒ ಕಾಣ್ಡ॒ಮಥೋ॒ ಫಲ᳚ಮ್ ॥ 21 ॥

ಲೋ॒ಕ-ಮ್ಪೃ॑ಣ ಛಿ॒ದ್ರ-ಮ್ಪೃ॒ಣಾಥೋ॑ ಸೀದ ಶಿ॒ವಾ ತ್ವಮ್ । ಇ॒ನ್ದ್ರಾ॒ಗ್ನೀ ತ್ವಾ॒ ಬೃಹ॒ಸ್ಪತಿ॑ರ॒ಸ್ಮಿನ್ ಯೋನಾ॑ವಸೀಷ॒ದನ್ನ್ ॥ ತಾ ಅ॑ಸ್ಯ॒ ಸೂದ॑ದೋಹಸ॒-ಸ್ಸೋಮಗ್ಗ್॑ ಶ್ರೀಣನ್ತಿ॒ ಪೃಶ್ನ॑ಯಃ । ಜನ್ಮ॑-ನ್ದೇ॒ವಾನಾಂ॒-ವಿಁಶ॑ಸ್ತ್ರಿ॒ಷ್ವಾ ರೋ॑ಚ॒ನೇ ದಿ॒ವಃ ॥
ಶಮ್ ಁವಾತ॒-ಶ್ಶಗ್ಂಹಿ ತೇ॒ ಘೃಣಿ॒-ಶ್ಶಮು॑ ತೇ ಸ॒ನ್ತ್ವೋಷ॑ಧೀಃ । ಕಲ್ಪ॑ನ್ತಾ-ನ್ತೇ॒ ದಿಶ॒-ಸ್ಸರ್ವಾಃ᳚ ॥ ಇ॒ದಮೇ॒ವ ಮೇತೋ-ಽಪ॑ರಾ॒ಮಾರ್ತಿ॑ಮಾರಾಮ॒ ಕಾಞ್ಚ॒ನ ।
ತಥಾ॒ ತದ॒ಶ್ವಿಭ್ಯಾ᳚-ಙ್ಕೃ॒ತ-ಮ್ಮಿ॒ತ್ರೇಣ॒ ವರು॑ಣೇನ ಚ ॥
ವ॒ರ॒ಣೋ ವಾ॑ರಯಾದಿ॒ದ-ನ್ದೇ॒ವೋ ವನ॒ಸ್ಪತಿಃ॑ ।
ಆರ್ತ್ಯೈ॒ ನಿರ್-ಋ॑ತ್ಯೈ॒ ದ್ವೇಷಾ᳚ಚ್ಚ॒ ವನ॒ಸ್ಪತಿಃ॑ ॥
ವಿಧೃ॑ತಿರಸಿ॒ ವಿಧಾ॑ರಯಾ॒ಸ್ಮದ॒ಘಾ ದ್ವೇಷಾಗ್ಂ॑ಸಿ ಶ॒ಮಿ ಶ॒ಮಯಾ॒ಸ್ಮದ॒ಘಾ ದ್ವೇಷಾಗ್ಂ॑ಸಿ ಯ॒ವ ಯ॒ವಯಾ॒ಸ್ಮದ॒ಘಾ ದ್ವೇಷಾಗ್ಂ॑ಸಿ ॥
ಪೃ॒ಥಿ॒ವೀ-ಙ್ಗ॑ಚ್ಛಾ॒ನ್ತರಿ॑ಖ್ಷ-ಙ್ಗಚ್ಛ॒ ದಿವ॑-ಙ್ಗಚ್ಛ॒ ದಿಶೋ॑ ಗಚ್ಛ॒ ಸುವ॑ರ್ಗಚ್ಛ॒ ಸುವ॑ರ್ಗಚ್ಛ॒ ದಿಶೋ॑ ಗಚ್ಛ॒ ದಿವ॑-ಙ್ಗಚ್ಛಾ॒ನ್ತರಿ॑ಖ್ಷ-ಙ್ಗಚ್ಛ ಪೃಥಿ॒ವೀ-ಙ್ಗ॑ಚ್ಛಾ॒ಪೋ ವಾ॑ ಗಚ್ಛ॒ ಯದಿ॒ ತತ್ರ॑ ತೇ ಹಿ॒ತಮೋಷ॑ಧೀಷು॒ ಪ್ರತಿ॑ತಿಷ್ಠಾ॒ ಶರೀ॑ರೈಃ ॥ ಲೋ॒ಕ-ಮ್ಪೃ॑ಣ ಛಿ॒ದ್ರ-ಮ್ಪೃ॒ಣಾಥೋ॑ ಸೀದ ಶಿ॒ವಾ ತ್ವಮ್ । ಇ॒ನ್ದ್ರಾ॒ಗ್ನೀ ತ್ವಾ॒ ಬೃಹ॒ಸ್ಪತಿ॑ರ॒ಸ್ಮಿನ್ ಯೋನಾ॑ವಸೀಷ॒ದನ್ನ್ ॥ ತಾ ಅ॑ಸ್ಯ॒ ಸೂದ॑ದೋಹಸ॒-ಸ್ಸೋಮಗ್ಗ್॑ ಶ್ರೀಣನ್ತಿ॒ ಪೃಶ್ನ॑ಯಃ । ಜನ್ಮ॑-ನ್ದೇ॒ವಾನಾಂ॒-ವಿಁಶ॑ಸ್ತ್ರಿ॒ಷ್ವಾ ರೋ॑ಚ॒ನೇ ದಿ॒ವಃ ॥
ಅಶ್ಮ॑ನ್ವತೀ ರೇವತೀ॒-ಸ್ಸಗ್ಂ ರ॑ಭದ್ಧ್ವ॒ ಮುತ್ತಿ॑ಷ್ಠತ॒ ಪ್ರತ॑ರತಾ ಸಖಾಯಃ । ಅತ್ರಾ॑ ಜಹಾಮ॒ ಯೇ ಅಸ॒ನ್ನಶೇ॑ವಾ-ಶ್ಶಿ॒ವಾನ್ ವ॒ಯಮ॒ಭಿ ವಾಜಾ॒ನುತ್ತ॑ರೇಮ ॥ ಯದ್ವೈ ದೇ॒ವಸ್ಯ॑ ಸವಿ॒ತುಃ ಪ॒ವಿತ್ರಗ್ಂ॑ ಸ॒ಹಸ್ರ॑ಧಾರ॒ಮ್ ಁವಿತ॑ತಮ॒ನ್ತರಿ॑ಖ್ಷೇ । ಯೇನಾಪು॑ನಾ॒ದಿನ್ದ್ರ॒ಮನಾ॑ರ್ತ॒-ಮಾರ್ತ್ಯೈ॒ ತೇನಾ॒ಹ-ಮ್ಮಾಗ್ಂ ಸ॒ರ್ವತ॑ನು-ಮ್ಪುನಾಮಿ ॥
ಧಾ॒ತಾ ಯಾ ರಾ॒ಷ್ಟ್ರಾ-ತ್ಪ॒ನ್ನಾದಪ॒ ಯನ್ತಿ॒ ಶಾಖಾ॑ ಅ॒ಭಿಮೃ॑ತಾ ನೃ॒ಪತಿ॑ಮಿ॒ಚ್ಛಮಾ॑ನಾಃ । ಧಾ॒ತುಸ್ತಾ-ಸ್ಸರ್ವಾಃ॒ ಪವ॑ನೇನ ಪೂ॒ತಾಃ ಪ್ರ॒ಜಯಾ॒-ಽಸ್ಮಾನ್-ರ॒ಯ್ಯಾ ವರ್ಚ॑ಸಾ॒ ಸಗ್ಂಸೃ॑ಜಾಥ ॥( ) ॥ 22 ॥
(ಅಥೋ॒ ಫಲ॑ಮ್ - ಧಾ॒ತಾ ಪು॑ನಾತು) (ಅ. 9)

ಅನುವಾಕಂ 10
ಆರೋ॑ಹ॒ತಾಯು॑-ರ್ಜ॒ರಸ॑-ಙ್ಗೃಣಾ॒ನಾ ಅ॑ನುಪೂ॒ರ್ವಮ್ ಁಯತ॑ಮಾನಾ॒ ಯತಿ॒ಷ್ಟ । ಇ॒ಹ ತ್ವಷ್ಟಾ॑ ಸು॒ಜನಿ॑ಮಾ ಸು॒ರತ್ನೋ॑ ದೀ॒ರ್ಘಮಾಯುಃ॑ ಕರತು ಜೀ॒ವಸೇ॑ ವಃ ॥
ಯಥಾ-ಽಹಾ᳚ನ್ಯನುಪೂ॒ರ್ವ-ಮ್ಭವ॑ನ್ತಿ॒ ಯಥ॒ರ್ತವ॑ ಋ॒ತುಭಿ॒-ರ್ಯನ್ತಿ॑ ಕ್ಲೃ॒ಪ್ತಾಃ । ಯಥಾ॒ ನ ಪೂರ್ವ॒ಮಪ॑ರೋ॒ ಜಹಾ᳚ತ್ಯೇ॒ವಾ ಧಾ॑ತ॒ರಾಯೂಗ್ಂ॑ಷಿ ಕಲ್ಪಯೈಷಾಮ್ ॥
ನ ಹಿ॑ ತೇ ಅಗ್ನೇ ತ॒ನುವೈ᳚ ಕ್ರೂ॒ರ-ಞ್ಚ॒ಕಾರ॒ ಮರ್ತ್ಯಃ॑ ।
ಕ॒ಪಿ-ರ್ಬ॑ಭಸ್ತಿ॒ ತೇಜ॑ನ॒-ಮ್ಪುನ॑ರ್ಜ॒ರಾಯು॒ ಗೌರಿ॑ವ ।
ಅಪ॑ ನ॒-ಶ್ಶೋಶು॑ಚದ॒ಘಮಗ್ನೇ॑ ಶುಶು॒ದ್ಧ್ಯಾ ರ॒ಯಿಮ್ ।
ಅಪ॑ ನ॒-ಶ್ಶೋಶು॑ಚದ॒ಘ-ಮ್ಮೃ॒ತ್ಯವೇ॒ ಸ್ವಾಹಾ᳚ ॥
ಅ॒ನ॒ಡ್ವಾಹ॑-ಮ॒ನ್ವಾರ॑ಭಾಮಹೇ ಸ್ವ॒ಸ್ತಯೇ᳚ ।
ಸ ನ॒ ಇನ್ದ್ರ॑ ಇವ ದೇ॒ವೇಭ್ಯೋ॒ ವಹ್ನಿ॑-ಸ್ಸ॒ಪಾಂರ॑ಣೋ ಭವ ॥ 23 ॥

ಇ॒ಮೇ ಜೀ॒ವಾ ವಿ॑ಮೃ॒ತೈರಾವ॑ವ-ರ್ತಿ॒ನ್ನಭೂ᳚-ದ್ಭ॒ದ್ರಾ ದೇ॒ವಹೂ॑ತಿ-ನ್ನೋ ಅ॒ದ್ಯ । ಪ್ರಾಞ್ಜೋ॑-ಽಗಾಮಾ ನೃ॒ತಯೇ॒ ಹಸಾ॑ಯ॒ ದ್ರಾಘೀ॑ಯ॒ ಆಯುಃ॑ ಪ್ರತ॒ರಾ-ನ್ದಧಾ॑ನಾಃ ॥
ಮೃ॒ತ್ಯೋಃ ಪ॒ದಮ್ ಁಯೋಪಯ॑ನ್ತೋ॒ ಯದೈಮ॒ ದ್ರಾಘೀ॑ಯ॒ ಆಯುಃ॑ ಪ್ರತ॒ರಾ-ನ್ದಧಾ॑ನಾಃ । ಆ॒ಪ್ಯಾಯ॑ಮಾನಾಃ ಪ್ರ॒ಜಯಾ॒ ಧನೇ॑ನ ಶು॒ದ್ಧಾಃ ಪೂ॒ತಾ ಭ॑ವಥ ಯಜ್ಞಿಯಾಸಃ ॥
ಇ॒ಮ-ಞ್ಜೀ॒ವೇಭ್ಯಃ॑ ಪರಿ॒ಧಿ-ನ್ದ॑ಧಾಮಿ॒ ಮಾ ನೋ ನು॑ ಗಾ॒ದಪ॑ರೋ॒ ಅರ್ಧ॑ಮೇ॒ತಮ್ ।
ಶ॒ತ-ಞ್ಜೀ॑ವನ್ತು ಶ॒ರದಃ॑ ಪುರೂ॒ಚೀಸ್ತಿ॒ರೋ ಮೃ॒ತ್ಯು-ನ್ದ॑ದ್ಮಹೇ॒ ಪರ್ವ॑ತೇನ ॥ ಇ॒ಮಾ ನಾರೀ॑ರವಿಧ॒ವಾ-ಸ್ಸು॒ಪತ್ನೀ॒ರಾಞ್ಜ॑ನೇನ ಸ॒ರ್ಪಿಷಾ॒ ಸಮ್ಮೃ॑ಶನ್ತಾಮ್ ।
ಅ॒ನ॒ಶ್ರವೋ॑ ಅನಮೀ॒ವಾ-ಸ್ಸು॒ಶೇವಾ॒ ಆರೋ॑ಹನ್ತು॒ ಜನ॑ಯೋ॒ ಯೋನಿ॒ಮಗ್ರೇ᳚ ॥ ಯದಾಞ್ಜ॑ನ-ನ್ತ್ರೈಕಕು॒ದ-ಞ್ಜಾ॒ತಗ್ಂ ಹಿ॒ಮವ॑ತ॒ಸ್ಪರಿ॑ ।
ತೇನಾ॒ಮೃತ॑ಸ್ಯ॒ ಮೂಲೇ॒ನಾರಾ॑ತೀ-ರ್ಜಮ್ಭಯಾಮಸಿ ॥
ಯಥಾ॒ ತ್ವ-ಮು॑ದ್ಭಿ॒ನ-ಥ್ಸ್ಯೋ॑ಷಧೇ ಪೃಥಿ॒ವ್ಯಾ ಅಧಿ॑ ।
ಏ॒ವಮಿ॒ಮ ಉದ್ಭಿ॑ನ್ದನ್ತು ಕೀ॒ರ್ತ್ಯಾ ಯಶ॑ಸಾ ಬ್ರಹ್ಮವರ್ಚ॒ಸೇನ॑ ॥ ಅ॒ಜೋ᳚-ಽಸ್ಯಜಾ॒ಸ್ಮದ॒ಘಾ ದ್ವೇಷಾಗ್ಂ॑ಸಿ ಯ॒ವೋ॑-ಽಸಿ ಯ॒ವಯಾ॒ಸ್ಮದ॒ಘಾ ದ್ವೇಷಾಗ್ಂ॑ಸಿ ॥ 24 ॥
(ಭ॒ವ॒ - ಜ॒ಮ್ಭ॒ಯಾ॒ಮ॒ಸಿ॒ ತ್ರೀಣಿ॑ ಚ) (ಅ. 10)

ಅನುವಾಕಂ 11
ಅಪ॑ ನ॒-ಶ್ಶೋಶು॑ಚದ॒ಘಮಗ್ನೇ॑ ಶುಶು॒ದ್ಧ್ಯಾ ರ॒ಯಿಮ್ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಸು॒ಖ್ಷೇ॒ತ್ರಿ॒ಯಾ ಸು॑ಗಾತು॒ಯಾ ವ॑ಸೂ॒ಯಾ ಚ॑ ಯಜಾಮಹೇ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥
ಪ್ರ ಯ-ದ್ಭನ್ದಿ॑ಷ್ಠ ಏಷಾ॒-ಮ್ಪ್ರಾಸ್ಮಾಕಾ॑ಸಶ್ಚ ಸೂ॒ರಯಃ॑ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಪ್ರಯದ॒ಗ್ನೇ-ಸ್ಸಹ॑ಸ್ವತೋ ವಿ॒ಶ್ವತೋ॒ ಯನ್ತಿ॑ ಸೂ॒ರಯಃ॑ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥
ಪ್ರಯತ್ತೇ॑ ಅಗ್ನೇ ಸೂ॒ರಯೋ॒ ಜಾಯೇ॑ಮಹಿ॒ ಪ್ರ ತೇ॑ ವ॒ಯಮ್ ।
ಅಪ॑ ನ॒-ಶ್ಶೋಶು॑ಚದ॒ಘಮ್ ॥ 25 ॥

ತ್ವಗ್ಂ ಹಿ ವಿ॑ಶ್ವತೋಮುಖ ವಿ॒ಶ್ವತಃ॑ ಪರಿ॒ಭೂರಸಿ॑ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ದ್ವಿಷೋ॑ ನೋ ವಿಶ್ವತೋಮು॒ಖಾತಿ॑ ನಾ॒ವೇವ॑ ಪಾರಯ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಸ ನ॒-ಸ್ಸಿನ್ಧು॑ಮಿವ ನಾ॒ವಯಾ-ಽತಿ॑ ಪರ್​ಷಾ ಸ್ವ॒ಸ್ತಯೇ᳚ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಆಪಃ॑ ಪ್ರವ॒ಣಾದಿ॑ವ ಯ॒ತೀ-ರಪಾ॒ಸ್ಮ-ಥ್ಸ್ಯ॑ನ್ದತಾಮ॒ಘಮ್ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಉ॒ದ್ವ॒ನಾ-ದು॑ದ॒ಕಾನೀ॒ವಾಪಾ॒ಸ್ಮ-ಥ್ಸ್ಯ॑ನ್ದತಾಮ॒ಘಮ್ ।
ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ಆ॒ನ॒ನ್ದಾಯ॑ ಪ್ರಮೋ॒ದಾಯ॒ ಪುನ॒ರಾಗಾ॒ಗ್॒ ಸ್ವಾನ್ಗೃ॒ಹಾನ್ । ಅಪ॑ ನ॒-ಶ್ಶೋಶು॑ಚದ॒ಘಮ್ ॥ ನ ವೈ ತತ್ರ॒ ಪ್ರಮೀ॑ಯತೇ॒ ಗೌರಶ್ವಃ॒ ಪುರು॑ಷಃ ಪ॒ಶುಃ ।
ಯತ್ರೇ॒ದ-ಮ್ಬ್ರಹ್ಮ॑ ಕ್ರಿ॒ಯತೇ॑ ಪರಿ॒ಧಿರ್ಜೀವ॑ನಾಯ॒ ಕಮಪ॑ ನ॒-ಶ್ಶೋಶು॑ಚದ॒ಘಮ್ ॥ 26 ॥
(ಅ॒ಘ - ಮ॒ಘ-ಞ್ಚ॒ತ್ವಾರಿ॑ ಚ) (ಅ. 11)

ಅನುವಾಕಂ 12
ಅಪ॑ಶ್ಯಾಮ ಯುವ॒ತಿ-ಮಾ॒ಚರ॑ನ್ತೀ-ಮ್ಮೃ॒ತಾಯ॑ ಜೀ॒ವಾ-ಮ್ಪ॑ರಿಣೀ॒ಯಮಾ॑ನಾಮ್ । ಅ॒ನ್ಧೇನ॒ ಯಾ ತಮ॑ಸಾ॒ ಪ್ರಾವೃ॑ತಾ-ಽಸಿ॒ ಪ್ರಾಚೀ॒ಮವಾ॑ಚೀ॒-ಮವ॒ಯ-ನ್ನರಿ॑ಷ್ಟ್ಯೈ ॥
ಮಯೈ॒ತಾ-ಮ್ಮಾ॒ಗ್॒ಸ್ತಾ-ಮ್ಭ್ರಿ॒ಯಮಾ॑ಣಾ ದೇ॒ವೀ ಸ॒ತೀ ಪಿ॑ತೃಲೋ॒ಕಮ್ ಁಯದೈಷಿ॑ । ವಿ॒ಶ್ವವಾ॑ರಾ॒ ನಭ॑ಸಾ॒ ಸಂ​ವ್ಯಁ॑ಯನ್ತ್ಯು॒ಭೌ ನೋ॑ ಲೋ॒ಕೌ ಪಯ॒ಸಾ-ಽಽವೃ॑ಣೀಹಿ ॥
ರಯಿ॑ಷ್ಠಾಮ॒ಗ್ನಿ-ಮ್ಮಧು॑ಮನ್ತಮೂ॒ರ್ಮಿಣ॒ಮೂರ್ಜ॑-ಸ್ಸನ್ತ-ನ್ತ್ವಾ॒ ಪಯ॒ಸೋಪ॒ ಸಗ್ಂಸ॑ದೇಮ ।
ಸಗ್ಂ ರ॒ಯ್ಯಾ ಸಮು॒ ವರ್ಚ॑ಸಾ॒ ಸಚ॑ಸ್ವಾ ನ-ಸ್ಸ್ವ॒ಸ್ತಯೇ᳚ ॥
ಯೇ ಜೀ॒ವಾ ಯೇ ಚ॑ ಮೃ॒ತಾ ಯೇ ಜಾ॒ತಾ ಯೇ ಚ॒ ಜನ್ತ್ಯಾಃ᳚ ।
ತೇಭ್ಯೋ॑ ಘೃ॒ತಸ್ಯ॑ ಧಾರಯಿತು॒-ಮ್ಮಧು॑ಧಾರಾ ವ್ಯುನ್ದ॒ತೀ ॥
ಮಾ॒ತಾ ರು॒ದ್ರಾಣಾ᳚-ನ್ದುಹಿ॒ತಾ ವಸೂ॑ನಾ॒ಗ್॒ ಸ್ವಸಾ॑-ಽಽದಿ॒ತ್ಯಾನಾ॑ಮ॒-ಮೃತ॑ಸ್ಯ॒ ನಾಭಿಃ॑ ।
ಪ್ರಣು॒ವೋಚ॑-ಞ್ಚಿಕಿ॒ತುಷೇ॒ ಜನಾ॑ಯ॒ ಮಾ ಗಾಮನಾ॑ಗಾ॒ಮದಿ॑ತಿಮ್ ಁವಧಿಷ್ಟ ॥
ಪಿಬ॑ತೂದ॒ಕ-ನ್ತೃಣಾ᳚ನ್ಯತ್ತು । ಓಮು-ಥ್ಸೃ॒ಜತ ॥ 27 ॥
(ವ॒ಧಿ॒ಷ್ಟ॒ ದ್ವೇ ಚ॑) (ಅ. 12)

(ಪ॒ರೇ॒ಯು॒ವಾಗ್ಂಸ॒-ಮ್ಪ್ರ ವಿ॒ದ್ವಾ-ನ್ಭುವ॑ನಸ್ಯಾ॒ಭ್ಯಾವ॑ ವೃಥ್ಸ್ವಾ॒ ಜೋ ಭಾ॒ಗೋ॑-ಽಯಮ್ ಁವೈ ಚತುಶ್ಚತ್ವಾರಿಗ್ಂಶತ್ ।
ಯ ಏ॒ತಸ್ಯ॒ ತ್ವ-ತ್ಪಞ್ಚ॑ । ಪ್ರಕೇ॒ತುನೇ॒ದನ್ತೇ॒ ನಾಕೇ॑ ಸುಪ॒ರ್ಣಮ್ ಁಯೌ ತೇ॒ ಯೇ ಯುದ್ಧ್ಯ॑ನ್ತೇ॒ ತಪ॒ಸಾ-ಽಶ್ಮ॑ನ್ವತೀ ರೇವತೀ॒-ಸ್ಸಗ್ಂರ॑ಭದ್ಧ್ವಮ॒ಷ್ಟಾವಿಗ್ಂ॑ಶತಿಃ । ಯ-ನ್ತೇ॒ ಯತ್ತ॒ ಉತ್ತಿಷ್ಠಾ॒ತ॑ ಇ॒ದನ್ತ॒ ಉತ್ತಿ॑ಷ್ಠ॒
ಪ್ರೇಹ್ಯಶ್ಮ॒ನ್॒. ಯದ್ವಾ ಉದ್ವ॒ಯಮ॒ಯ-ಮ್ಪಞ್ಚ॑ವಿಗ್ಂಶತಿಃ । ಆಯಾ॑ತು ತ್ರಿ॒ಗ್ಂ॒ಶತ್ । ವೈ॒ಶ್ವಾ॒ನ॒ರೇ ತಸ್ಮಿ॑-ನ್ದ್ರ॒ಫ್ಸ ಇ॒ಮಮಪೇ॒ತಾಹೋ॑ಭಿ-ರ್ಯುಜ್ಯನ್ತಾಮಘ್ನಿ॒ಯಾ ಅ॑ದಿತೇ ಪಾ॒ರಮ್ ಁವ॒ ಆ ಪ್ಯಾ॑ಯಸ್ವ ಸ॒ಪ್ತವಿಗ್ಂ॑ಶತಿಃ । ಉತ್ತೇ॑ ಗೃಹೇ-ಽಖಾಷಿ॑ತಿ॒ಸ್ತೇಭ್ಯಃ॑ ಪೃ॑ಥಿ॒ವ್ಯಾ ಅ॒ನ್ತರಿ॑ಖ್ಷಸ್ಯ॒ ದ್ವಾತ್ರಿಗ್ಂ॑ಶತ್ । ಅ॒ಪೂ॒ಪವಾ॑ನಸೌ॒ ದಶ॑ ಶ॒ತ ದ॑ಶ । ಏ॒ತಾಸ್ತೇ॑ ತೇ॒ ದಿಶ॒-ಸ್ಸರ್ವಾ॑ ಇ॒ದಮಶ್ಮ॑ನ್ ವಿಗ್ಂಶ॒ತಿಃ । ಓ॑ರೋಹತ ತ॒ನುವೈ᳚ ಕ್ರೂ॒ರ-ಞ್ಚ॒ಕಾರ॒ ಪುನ॑ರ್ಮೃ॒ತ್ಯವೇ॒ ಮಾ ನೋ ನು॑ ಗಾ-ದ್ದದ್ಮಹ ಇ॒ಮಾ ನಾರೀಃ॒ ಪರಿ॒ ತ್ರಯೋ॑ವಿಗ್ಂಶತಿಃ ।
ಅಪ॑ ನ-ಸ್ಸುಖ್ಷೇತ್ರಿ॒ಯಾ ಪ್ರ ಯದ್ಭ-ನ್ದಿ॑ಷ್ಠಃ॒ ಪ್ರ ಯದ॒ಗ್ನೇಃ ಪ್ರ ಯತ್ತೇ॑ ಅಗ್ನೇ॒ ತ್ವಗ್ಂ ಹಿ ದ್ವಿಷ॒-ಸ್ಸ ನ॒-ಸ್ಸಿನ್ಧು॒ಮಾಪಃ॑ ಪ್ರವ॒ಣಾದು॑-ದ್ವ॒ನಾದಾ॑ನ॒ನ್ದಾಯ॒ ನ ವೈ ತತ್ರ॒ ಯತ್ರೇ॒ದ-ಞ್ಚತು॑ರ್ವಿಗ್ಂಶತಿಃ॒ । ಅಪ॑ಶ್ಯಾ॒ಮಾವೃ॑ಣೀಹಿ॒ ದ್ವಾದ॑ಶ ದ್ವಾದಶ ।)

(ಪ॒ರೇ॒ಯು॒ವಾಗ್ಂಸ॒ - ಮಾಯಾ᳚ - ತ್ವೇ॒ತಾಸ್ತೇ॑ ಸ॒ಪ್ತವಿಗ್ಂ॑ಶತಿಃ )

(ಪ॒ರೇ॒ಯು॒ವಾಗ್ಂಸ॒ - ಮೋಮುಥ್ಸೃ॒ಜತ )

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಷಷ್ಠಃ ಪ್ರಪಾಠಕ-ಸ್ಸಮಾಪ್ತಃ ॥