ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಷಷ್ಠಃ ಪ್ರಪಾಠಕಃ - ಪಶುಹೌತ್ರಮ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಅನುವಾಕಂ 1 - ಯೂಪಸಂಸ್ಕಾರಾಃ
ಅ॒ಞ್ಜನ್ತಿ॒ ತ್ವಾಮ॑ದ್ಧ್ವ॒ರೇ ದೇ॑ವ॒ಯನ್ತಃ॑ । ವನ॑ಸ್ಪತೇ॒ ಮಧು॑ನಾ॒ ದೈವ್ಯೇ॑ನ । ಯದೂ॒ರ್ಧ್ವಸ್ತಿ॑ಷ್ಠಾ॒-ದ್ದ್ರವಿ॑ಣೇ॒ಹ ಧ॑ತ್ತಾತ್ । ಯದ್ವಾ॒ ಖ್ಷಯೋ॑ ಮಾ॒ತುರ॒ಸ್ಯಾ ಉ॒ಪಸ್ಥೇ᳚ ॥ ಉಚ್ಛ್ರ॑ಯಸ್ವ ವನಸ್ಪತೇ । ವರ್ಷ್ಮ॑-ನ್ಪೃಥಿ॒ವ್ಯಾ ಅಧಿ॑ । ಸುಮಿ॑ತೀ ಮೀ॒ಯಮಾ॑ನಃ ।
ವರ್ಚೋ॑ಧಾ ಯ॒ಜ್ಞವಾ॑ಹಸೇ ॥ ಸಮಿ॑ದ್ಧಸ್ಯ॒ ಶ್ರಯ॑ಮಾಣಃ ಪು॒ರಸ್ತಾ᳚ತ್ । ಬ್ರಹ್ಮ॑ ವನ್ವಾ॒ನೋ ಅ॒ಜರಗ್ಂ॑ ಸು॒ವೀರ᳚ಮ್ ॥ 1 ॥
ಆ॒ರೇ ಅ॒ಸ್ಮದಮ॑ತಿ॒-ಮ್ಬಾಧ॑ಮಾನಃ । ಉಚ್ಛ್ರ॑ಯಸ್ವ ಮಹ॒ತೇ ಸೌಭ॑ಗಾಯ ॥ ಊ॒ರ್ಧ್ವ ಊ॒ಷುಣ॑ ಊ॒ತಯೇ᳚ । ತಿಷ್ಠಾ॑ ದೇ॒ವೋ ನ ಸ॑ವಿ॒ತಾ । ಊ॒ರ್ಧ್ವೋ ವಾಜ॑ಸ್ಯ॒ ಸನಿ॑ತಾ॒ ಯದ॒ಞ್ಜಿಭಿಃ॑ । ವಾ॒ಘದ್ಭಿ॑-ರ್ವಿ॒ಹ್ವಯಾ॑ಮಹೇ ॥
ಊ॒ರ್ಧ್ವೋ ನಃ॑ ಪಾ॒ಹ್ಯಗ್ಂಹ॑ಸೋ॒ ನಿ ಕೇ॒ತುನಾ᳚ । ವಿಶ್ವ॒ಗ್ಂ॒ ಸಮ॒ತ್ರಿಣ॑-ನ್ದಹ ।
ಕೃ॒ಧೀ ನ॑ ಊ॒ರ್ಧ್ವಾಞ್ಚ॒ ರಥಾ॑ಯ ಜೀ॒ವಸೇ᳚ ।
ವಿ॒ದಾ ದೇ॒ವೇಷು॑ ನೋ॒ ದುವಃ॑ ॥ 2 ॥
ಜಾ॒ತೋ ಜಾ॑ಯತೇ ಸುದಿನ॒ತ್ವೇ ಅಹ್ನಾ᳚ಮ್ । ಸಮ॒ರ್ಯ ಆ ವಿ॒ದಥೇ॒ ವರ್ಧ॑ಮಾನಃ । ಪು॒ನನ್ತಿ॒ ಧೀರಾ॑ ಅ॒ಪಸೋ॑ ಮನೀ॒ಷಾ । ದೇ॒ವ॒ಯಾ ವಿಪ್ರ॒ ಉದಿ॑ಯರ್ತಿ॒ ವಾಚ᳚ಮ್ ॥ ಯುವಾ॑ ಸು॒ವಾಸಾಃ॒ ಪರಿ॑ವೀತ॒ ಆಗಾ᳚ತ್ । ಸ ಉ॒ ಶ್ರೇಯಾ᳚-ನ್ಭವತಿ॒ ಜಾಯ॑ಮಾನಃ ।
ತ-ನ್ಧೀರಾ॑ಸಃ ಕ॒ವಯ॒ ಉನ್ನ॑ಯನ್ತಿ । ಸ್ವಾ॒ಧಿಯೋ॒ ಮನ॑ಸಾ ದೇವ॒ಯನ್ತಃ॑ ॥ ಪೃ॒ಥು॒ಪಾಜಾ॒ ಅಮ॑ರ್ತ್ಯಃ । ಘೃ॒ತನಿ॑ರ್ಣಿ॒ಖ್-ಸ್ವಾ॑ಹುತಃ ॥ 3 ॥
ಅ॒ಗ್ನಿ-ರ್ಯ॒ಜ್ಞಸ್ಯ॑ ಹವ್ಯ॒ವಾಟ್ ॥ ತಗ್ಂ ಸ॒ಬಾಧೋ॑ ಯ॒ತಸ್ರು॑ಚಃ । ಇ॒ತ್ಥಾ ಧಿ॒ಯಾ ಯ॒ಜ್ಞವ॑ನ್ತಃ । ಆಚ॑ಕ್ರುರ॒ಗ್ನಿ-ಮೂ॒ತಯೇ᳚ ॥ ತ್ವಂ-ವಁರು॑ಣ ಉ॒ತ ಮಿ॒ತ್ರೋ ಅ॑ಗ್ನೇ । ತ್ವಾಂ-ವಁ॑ರ್ಧನ್ತಿ ಮ॒ತಿಭಿ॒-ರ್ವಸಿ॑ಷ್ಠಾಃ ।
ತ್ವೇ ವಸು॑ ಸುಷಣ॒ನಾನಿ॑ ಸನ್ತು ।
ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ 4 ॥
(ಸು॒ವೀರಂ॒ - ದುವಃ॒ - ಸ್ವಾ॑ಹುತೋ॒ - +-ಽಷ್ಟೌ ಚ॑) (ಅ. 1)
ಅನುವಾಕಂ 2 - ಪ್ರಯಾಜವಿಷಯಾ ಮೈತ್ರಾವರುಣಪ್ರೈಷಾಃ
ಹೋತಾ॑ ಯಖ್ಷದ॒ಗ್ನಿಗ್ಂ ಸ॒ಮಿಧಾ॑ ಸುಷ॒ಮಿಧಾ॒ ಸಮಿ॑ದ್ಧ॒-ನ್ನಾಭಾ॑ ಪೃಥಿ॒ವ್ಯಾ-ಸ್ಸ॑ಗ॒ನ್ಥೇ ವಾ॒ಮಸ್ಯ॑ ।
ವರ್ಷ್ಮ॑ನ್ದಿ॒ವ ಇ॒ಡಸ್ಪ॒ದೇ ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷ॒ತ್-ತನೂ॒ನಪಾ॑ತ॒-ಮದಿ॑ತೇ॒-ರ್ಗರ್ಭ॒-ಮ್ಭುವ॑ನಸ್ಯ ಗೋ॒ಪಾಮ್ । ಮದ್ಧ್ವಾ॒-ಽದ್ಯ ದೇ॒ವೋ ದೇ॒ವೇಭ್ಯೋ॑ ದೇವ॒ಯಾನಾ᳚ನ್ಪ॒ಥೋ ಅ॑ನಕ್ತು॒ ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷ॒-ನ್ನರಾ॒ಶಗ್ಂಸ॑-ನ್ನೃಶ॒ಸ್ತ್ರ-ನ್ನೄಗ್ಂಃ ಪ್ರ॑ಣೇತ್ರಮ್ । ಗೋಭಿ॑-ರ್ವ॒ಪಾವಾ॒ನ್-ಥ್ಸ್ಯಾ-ದ್ವೀ॒ರೈ-ಶ್ಶಕ್ತೀ॑ವಾ॒ನ್-ರಥೈಃ᳚ ಪ್ರಥಮ॒ಯಾವಾ॒ ಹಿರ॑ಣ್ಯೈಶ್ಚ॒ನ್ದ್ರೀ ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಖ್ಷದ॒ಗ್ನಿಮಿ॒ಡ ಈ॑ಡಿ॒ತೋ ದೇ॒ವೋ ದೇ॒ವಾಗ್ಂ ಆವ॑ಖ್ಷ-ದ್ದೂ॒ತೋ ಹ॑ವ್ಯ॒ವಾಡಮೂ॑ರಃ ।
ಉಪೇ॒ಮಂ-ಯಁ॒ಜ್ಞಮುಪೇ॒ಮಾ-ನ್ದೇ॒ವೋ ದೇ॒ವಹೂ॑ತಿಮವತು॒ ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಖ್ಷ-ದ್ಬ॒ರ್॒ಹಿ-ಸ್ಸು॒ಷ್ಟರೀ॒ಮೋರ್ಣ॑ಮ್ರದಾ ಅ॒ಸ್ಮಿನ್. ಯ॒ಜ್ಞೇ ವಿ ಚ॒ ಪ್ರ ಚ॑ ಪ್ರಥತಾಗ್ ಸ್ವಾಸ॒ಸ್ಥ-ನ್ದೇ॒ವೇಭ್ಯಃ॑ ।
ಏಮೇ॑ನದ॒ದ್ಯ ವಸ॑ವೋ ರು॒ದ್ರಾ ಆ॑ದಿತ್ಯಾ-ಸ್ಸ॑ದನ್ತು ಪ್ರಿ॒ಯಮಿನ್ದ್ರ॑ಸ್ಯಾಸ್ತು॒ ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ 5 ॥
ಹೋತಾ॑ ಯಖ್ಷ॒-ದ್ದುರ॑ ಋ॒ಷ್ವಾಃ ಕ॑ವ॒ಷ್ಯೋ-ಽಕೋ॑ಷಧಾವನೀ॒-ರುದಾತಾ॑ಭಿ॒-ರ್ಜಿಹ॑ತಾಂ॒-ವಿಁ ಪಖ್ಷೋ॑ಭಿ-ಶ್ಶ್ರಯನ್ತಾಮ್ । ಸು॒ಪ್ರಾ॒ಯ॒ಣಾ ಅ॒ಸ್ಮಿನ್. ಯ॒ಜ್ಞೇ ವಿಶ್ರ॑ಯನ್ತಾ-ಮೃತಾ॒ವೃಧೋ॑ ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷದು॒ಷಾಸಾ॒ನಕ್ತಾ॑ ಬೃಹ॒ತೀ ಸು॒ಪೇಶ॑ಸಾ॒ ನೄಗ್ಂಃ ಪತಿ॑ಭ್ಯೋ॒ ಯೋನಿ॑-ಙ್ಕೃಣ್ವಾ॒ನೇ ।
ಸ॒ಗ್ಗ್॒ಸ್ಮಯ॑ಮಾನೇ॒ ಇನ್ದ್ರೇ॑ಣ ದೇ॒ವೈರೇದ-ಮ್ಬ॒ರ್॒ಹಿ-ಸ್ಸೀ॑ದತಾಂ-ವೀಁ॒ತಾಮಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷ॒-ದ್ದೈವ್ಯಾ॒ ಹೋತಾ॑ರಾ ಮ॒ನ್ದ್ರಾ ಪೋತಾ॑ರಾ ಕ॒ವೀ ಪ್ರಚೇ॑ತಸಾ ।
ಸ್ವಿ॑ಷ್ಟಮ॒ದ್ಯಾನ್ಯಃ ಕ॑ರದಿ॒ಷಾ ಸ್ವ॑ಭಿಗೂರ್ತಮ॒ನ್ಯ ಊ॒ರ್ಜಾ ಸತ॑ವಸೇ॒ಮಂ-ಯಁ॒ಜ್ಞ-ನ್ದಿ॒ವಿ ದೇ॒ವೇಷು॑ ಧತ್ತಾಂ-ವೀಁ॒ತಾಮಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷತ್-ತಿ॒ಸ್ರೋ ದೇ॒ವೀರ॒ಪಸಾ॑ಮ॒ಪಸ್ತ॑ಮಾ॒ ಅಚ್ಛಿ॑ದ್ರ-ಮ॒ದ್ಯೇದಮಪ॑-ಸ್ತನ್ವತಾಮ್ ।
ದೇ॒ವೇಭ್ಯೋ॑ ದೇ॒ವೀ-ರ್ದೇ॒ವಮಪೋ॑ ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷ॒ತ್-ತ್ವಷ್ಟಾ॑ರ॒-ಮಚಿ॑ಷ್ಟು॒ಮಪಾ॑ಕಗ್ಂ ರೇತೋ॒ಧಾಂ-ವಿಁಶ್ರ॑ವಸಂ-ಯಁಶೋ॒ಧಾಮ್ ।
ಪು॒ರು॒ರೂಪ॒ಮಕಾ॑ಮಕರ್ಶನಗ್ಂ ಸು॒ಪೋಷಃ॒ ಪೋಷೈ॒-ಸ್ಸ್ಯಾ-ಥ್ಸು॒ವೀರೋ॑ ವೀ॒ರೈ-ರ್ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷ॒-ದ್ವನ॒ಸ್ಪತಿ॑-ಮು॒ಪಾವ॑ಸ್ರಖ್ಷದ್ಧಿ॒ಯೋ ಜೋ॒ಷ್ಟಾರಗ್ಂ॑ ಶ॒ಶಮ॒ನ್ನರಃ॑ ।
ಸ್ವದಾ॒-ಥ್ಸ್ವಧಿ॑ತಿರ್-ಋತು॒ಥಾ-ಽದ್ಯ ದೇ॒ವೋ ದೇ॒ವೇಭ್ಯೋ॑ ಹ॒ವ್ಯಾ-ಽವಾ॒ಡ್-ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥
ಹೋತಾ॑ ಯಖ್ಷದ॒ಗ್ನಿಗ್ಗ್ ಸ್ವಾಹಾ-ಽಽಜ್ಯ॑ಸ್ಯ॒ ಸ್ವಾಹಾ॒ ಮೇದ॑ಸ॒-ಸ್ಸ್ವಾಹಾ᳚ ಸ್ತೋ॒ಕಾನಾ॒ಗ್॒ ಸ್ವಾಹಾ॒ ಸ್ವಾಹಾ॑ ಕೃತೀನಾ॒ಗ್॒ ಸ್ವಾಹಾ॑ ಹ॒ವ್ಯಸೂ᳚ಕ್ತೀನಾಮ್ ।
ಸ್ವಾಹಾ॑ ದೇ॒ವಾಗ್ಂ ಆ᳚ಜ್ಯ॒ಪಾನ್-ಥ್ಸ್ವಾಹಾ॒-ಽಗ್ನಿಗ್ಂ ಹೋ॒ತ್ರಾಜ್ಜು॑ಷಾ॒ಣಾ ಅಗ್ನ॒ ಆಜ್ಯ॑ಸ್ಯ ವಿಯನ್ತು॒ ಹೋತ॒ರ್ಯಜ॑ ॥ 6 ॥
(ಪ್ರಿ॒ಯಮಿನ್ದ್ರ॑ಸ್ಯಾಸ್ತು॒ ವೇತ್ವಾಜ್ಯ್॑ಸ್ಯ॒ ಹೋತ॒ರ್ಯಜ॑ - ಸು॒ವೀರೋ॑ ವೀ॒ರೈ-ರ್ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ಚ॒ತ್ವಾರಿ॑ ಚ) (ಅ. 2)
(ಅ॒ಗ್ನಿ-ನ್ತನೂ॒ನಪಾ॑ತ॒-ನ್ನರಾ॒ಶಗ್ಂಸ॑ಮ॒ಗ್ನಿಮಿ॒ಡ ಈ॑ಡಿ॒ತೋ ಬ॒ರ್॒ಹಿರ್ದುರ॑ ಉ॒ಷಾಸಾ॒ನಕ್ತಾ॒ ದೈವ್ಯಾ॑ ತಿ॒ಸ್ರಸ್ತ್ವಷ್ಟಾ॑ರಂ॒-ವಁನ॒ಸ್ಪತಿ॑ಮ॒ಗ್ನಿಮ್ )
(ಪಞ್ಚ॒ ವೇತ್ವೇಕೋ॑ ವಿ॒ಯನ್ತು॒ ದ್ವಿರ್ವೀ॒ತಾಮೇಕೋ॑ ವಿ॒ಯನ್ತು॒ ದ್ವಿರ್ವೇತ್ವೇಕೋ॑ ವಿಯನ್ತು॒ ಹೋತ॒ರ್ಯಜ॑)
ಅನುವಾಕಂ 3 - ಆಪ್ರಿಯ ಪ್ರಯಾಜಾನಾಂ-ಯಾಁಜ್ಯಾಃ
ಸಮಿ॑ದ್ಧೋ ಅ॒ದ್ಯ ಮನು॑ಷೋ ದುರೋ॒ಣೇ । ದೇ॒ವೋ ದೇ॒ವಾನ್. ಯ॑ಜಸಿ ಜಾತವೇದಃ । ಆ ಚ॒ ವಹ॑ ಮಿತ್ರಮಹ-ಶ್ಚಿಕಿ॒ತ್ವಾನ್ । ತ್ವ-ನ್ದೂ॒ತಃ ಕ॒ವಿರ॑ಸಿ॒ ಪ್ರಚೇ॑ತಾಃ ॥ ತನೂ॑ನಪಾತ್ಪ॒ಥ ಋ॒ತಸ್ಯ॒ ಯಾನಾನ್॑ । ಮದ್ಧ್ವಾ॑ ಸಮ॒ಞ್ಜನ್-ಥ್ಸ್ವ॑ದಯಾ ಸುಜಿಹ್ವ ।
ಮನ್ಮಾ॑ನಿ ಧೀ॒ಭಿರು॒ತ ಯ॒ಜ್ಞಮೃ॒ನ್ಧನ್ನ್ । ದೇ॒ವ॒ತ್ರಾ ಚ॑ ಕೃಣುಹ್ಯದ್ಧ್ವ॒ರ-ನ್ನಃ॑ ॥ ನರಾ॒ಶಗ್ಂಸ॑ಸ್ಯ ಮಹಿ॒ಮಾನ॑ಮೇಷಾಮ್ । ಉಪ॑ಸ್ತೋಷಾಮ ಯಜ॒ತಸ್ಯ॑ ಯ॒ಜ್ಞೈಃ ॥ 7 ॥
ತೇ ಸು॒ಕ್ರತ॑ವ॒-ಶ್ಶುಚ॑ಯೋ ಧಿಯ॒ಧಾಂಃ । ಸ್ವದ॑ನ್ತು ದೇ॒ವಾ ಉ॒ಭಯಾ॑ನಿ ಹ॒ವ್ಯಾ ॥ ಆ॒ಜುಹ್ವಾ॑ನ॒ ಈಡ್ಯೋ॒ ವನ್ದ್ಯ॑ಶ್ಚ । ಆಯಾ᳚ಹ್ಯಗ್ನೇ॒ ವಸು॑ಭಿ-ಸ್ಸ॒ಜೋಷಾಃ᳚ ।
ತ್ವ-ನ್ದೇ॒ವಾನಾ॑ಮಸಿ ಯಹ್ವ॒ ಹೋತಾ᳚ । ಸ ಏ॑ನಾನ್. ಯಖ್ಷೀಷಿ॒ತೋ ಯಜೀ॑ಯಾನ್ ॥ ಪ್ರಾ॒ಚೀನ॑-ಮ್ಬ॒ರ್॒ಹಿಃ ಪ್ರ॒ದಿಶಾ॑ ಪೃಥಿ॒ವ್ಯಾಃ । ವಸ್ತೋ॑ರ॒ಸ್ಯಾ ವೃ॑ಜ್ಯತೇ॒ ಅಗ್ರೇ॒ ಅಹ್ನಾ᳚ಮ್ ।
ವ್ಯು॑ ಪ್ರಥತೇ ವಿತ॒ರಂ-ವಁರೀ॑ಯಃ । ದೇ॒ವೇಭ್ಯೋ॒ ಅದಿ॑ತಯೇ ಸ್ಯೋ॒ನಮ್ ॥ 8 ॥
ವ್ಯಚ॑ಸ್ವತೀರುರ್ವಿ॒ಯಾ ವಿಶ್ರ॑ಯನ್ತಾಮ್ । ಪತಿ॑ಭ್ಯೋ॒ ನಜನ॑ಯ॒-ಶ್ಶುಮ್ಭ॑ಮಾನಾಃ । ದೇವೀ᳚ರ್ದ್ವಾರೋ ಬೃಹತೀ-ರ್ವಿಶ್ವಮಿನ್ವಾಃ । ದೇ॒ವೇಭ್ಯೋ॑ ಭವಥ ಸುಪ್ರಾಯ॒ಣಾಃ ॥ ಆ ಸು॒ಷ್ವಯ॑ನ್ತೀ ಯಜ॒ತೇ ಉಪಾ॑ಕೇ । ಉ॒ಷಾಸಾ॒ನಕ್ತಾ॑ ಸದತಾ॒-ನ್ನಿ ಯೋನೌ᳚ ।
ದಿ॒ವ್ಯೇ ಯೋಷ॑ಣೇ ಬೃಹ॒ತೀ ಸು॑ರು॒ಕ್ಮೇ । ಅಧಿ॒ ಶ್ರಿಯಗ್ಂ॑ ಶುಕ್ರ॒ಪಿಶ॒-ನ್ದಧಾ॑ನೇ ॥ ದೈವ್ಯಾ॒ ಹೋತಾ॑ರಾ ಪ್ರಥ॒ಮಾ ಸು॒ವಾಚಾ᳚ । ಮಿಮಾ॑ನಾ ಯ॒ಜ್ಞ-ಮ್ಮನು॑ಷೋ॒ ಯಜ॑ದ್ಧ್ಯೈ ॥ 9 ॥
ಪ್ರ॒ಚೋ॒ದಯ॑ನ್ತಾ ವಿ॒ದಥೇ॑ಷು ಕಾ॒ರೂ । ಪ್ರಾ॒ಚೀನ॒-ಞ್ಜ್ಯೋತಿಃ॑ ಪ್ರ॒ದಿಶಾ॑ ದಿ॒ಶನ್ತಾ᳚ ॥ ಆನೋ॑ ಯ॒ಜ್ಞ-ಮ್ಭಾರ॑ತೀ॒ ತೂಯ॑ಮೇತು । ಇಡಾ॑ ಮನು॒ಷ್ವದಿ॒ಹ ಚೇ॒ತಯ॑ನ್ತೀ । ತಿ॒ಸ್ರೋ ದೇ॒ವೀ-ರ್ಬ॒ರ್॒ಹಿರೇದಗ್ಗ್ ಸ್ಯೋ॒ನಮ್ । ಸರ॑ಸ್ವತೀ॒ ಸ್ವಪ॑ಸ-ಸ್ಸದನ್ತು ॥
ಯ ಇ॒ಮೇ ದ್ಯಾವಾ॑ಪೃಥಿ॒ವೀ ಜನಿ॑ತ್ರೀ । ರೂ॒ಪೈರಪಿಗ್ಂ॑ಶ॒-ದ್ಭುವ॑ನಾನಿ॒ ವಿಶ್ವಾ᳚ । ತಮ॒ದ್ಯ ಹೋ॑ತರಿಷಿ॒ತೋ ಯಜೀ॑ಯಾನ್ ।
ದೇ॒ವ-ನ್ತ್ವಷ್ಟಾ॑ರಮಿ॒ಹ ಯ॑ಖ್ಷಿ ವಿ॒ದ್ವಾನ್ ॥ 10 ॥
ಉ॒ಪಾವ॑ಸೃಜ॒ತ್-ತ್ಮನ್ಯಾ॑ ಸಮ॒ಞ್ಜನ್ನ್ । ದೇ॒ವಾನಾ॒-ಮ್ಪಾಥ॑ ಋತು॒ಥಾ ಹ॒ವೀಗ್ಂಷಿ॑ । ವನ॒ಸ್ಪತಿ॑-ಶ್ಶಮಿ॒ತಾ ದೇ॒ವೋ ಅ॒ಗ್ನಿಃ । ಸ್ವದ॑ನ್ತು ಹ॒ವ್ಯ-ಮ್ಮಧು॑ನಾ ಘೃ॒ತೇನ॑ ॥
ಸ॒ದ್ಯೋ ಜಾ॒ತೋ ವ್ಯ॑ಮಿಮೀತ ಯ॒ಜ್ಞಮ್ । ಅ॒ಗ್ನಿ-ರ್ದೇ॒ವಾನಾ॑-ಮಭವತ್-ಪುರೋ॒ಗಾಃ । ಅ॒ಸ್ಯ ಹೋತುಃ॑ ಪ್ರ॒ದಿಶ್ಯೃ॒ತಸ್ಯ॑ ವಾ॒ಚಿ ।
ಸ್ವಾಹಾ॑ಕೃತಗ್ಂ ಹ॒ವಿರ॑ದನ್ತು ದೇ॒ವಾಃ ॥ 11 ॥
(ಯ॒ಜ್ಞೈಃ - ಸ್ಯೋ॒ನಂ - ಁಯಜ॑ದ್ಧ್ಯೈ - ವಿ॒ದ್ವಾನ॒ - +ಷ್ಟೌ ಚ॑) (ಅ. 3)
ಅನುವಾಕಂ 4 - ಪರ್ಯಗ್ನಿಕರಣೀಯಾ ಋಚಃ
ಅ॒ಗ್ನಿರ್-ಹೋತಾ॑ ನೋ ಅದ್ಧ್ವ॒ರೇ । ವಾ॒ಜೀ ಸನ್-ಪರಿ॑ಣೀಯತೇ ।
ದೇ॒ವೋ ದೇ॒ವೇಷು॑ ಯ॒ಜ್ಞಿಯಃ॑ ॥ ಪರಿ॑ ತ್ರಿವಿ॒ಷ್ಟ್ಯ॑ದ್ಧ್ವ॒ರಮ್ । ಯಾತ್ಯ॒ಗ್ನೀ ರ॒ಥೀರಿ॑ವ । ಆ ದೇ॒ವೇಷು॒ ಪ್ರಯೋ॒ ದಧ॑ತ್ ॥ ಪರಿ॒ ವಾಜ॑ಪತಿಃ ಕ॒ವಿಃ । ಅ॒ಗ್ನಿರ್-ಹ॒ವ್ಯಾ ನ್ಯ॑ಕ್ರಮೀತ್ ।
ದಧ॒-ದ್ರತ್ನಾ॑ನಿ ದಾ॒ಶುಷೇ᳚ ॥ 12 ॥
(ಅ॒ಗ್ನಿರ್-ಹೋತಾ॑ ನೋ॒ ನವ॑) (ಅ. 4)
ಅನುವಾಕಂ 5 - ಮೈತ್ರಾವರುಣಪ್ರೈಷಃ
ಅಜೈ॑ದ॒ಗ್ನಿಃ । ಅಸ॑ನ॒ದ್ವಾಜ॒-ನ್ನಿ । ದೇ॒ವೋ ದೇ॒ವೇಭ್ಯೋ॑ ಹ॒ವ್ಯಾ-ಽವಾ᳚ಟ್ । ಪ್ರಾಞ್ಜೋ॑ಭಿರ್-ಹಿನ್ವಾ॒ನಃ ।
ಧೇನಾ॑ಭಿಃ॒ ಕಲ್ಪ॑ಮಾನಃ । ಯ॒ಜ್ಞಸ್ಯಾಯುಃ॑ ಪ್ರತಿ॒ರನ್ನ್ ।
ಉಪ॒ ಪ್ರೇಷ್ಯ॑ ಹೋತಃ । ಹ॒ವ್ಯಾ ದೇ॒ವೇಭ್ಯಃ॑ ॥ 13 ॥
(ಅಜೈ॑ದ॒ಷ್ಟೌ) (ಅ. 5)
ಅನುವಾಕಂ 6 - ಹೋತುರಧ್ರಿಗುಪ್ರೈಷಃ
ದೈವ್ಯಾ᳚-ಶ್ಶಮಿತಾರ ಉ॒ತ ಮ॑ನುಷ್ಯಾ॒ ಆರ॑ಭದ್ಧ್ವಮ್ । ಉಪ॑ ನಯತ॒ ಮೇದ್ಧ್ಯಾ॒ ದುರಃ॑ । ಆ॒ಶಾಸಾ॑ನಾ॒ ಮೇಧ॑ಪತಿಭ್ಯಾ॒-ಮ್ಮೇಧ᳚ಮ್ । ಪ್ರಾಸ್ಮಾ॑ ಅ॒ಗ್ನಿ-ಮ್ಭ॑ರತ । ಸ್ತೃ॒ಣೀ॒ತ ಬ॒ರ್॒ಹಿಃ । ಅನ್ವೇ॑ನ-ಮ್ಮಾ॒ತಾ ಮ॑ನ್ಯತಾಮ್ । ಅನು॑ ಪಿ॒ತಾ ।
ಅನು॒ ಭ್ರಾತಾ॒ ಸಗ॑ರ್ಭ್ಯಃ । ಅನು॒ ಸಖಾ॒ ಸಯೂ᳚ಥ್ಯಃ ॥
ಉ॒ದೀ॒ಚೀನಾಗ್ಂ॑ ಅಸ್ಯ ಪ॒ದೋ ನಿಧ॑ತ್ತಾತ್ ॥ 14 ॥
ಸೂರ್ಯ॒-ಞ್ಚಖ್ಷು॑ರ್ಗಮಯತಾತ್ । ವಾತ॑-ಮ್ಪ್ರಾ॒ಣಮ॒ನ್ವ-ವ॑ಸೃಜತಾತ್ । ದಿಶ॒-ಶ್ಶ್ರೋತ್ರ᳚ಮ್ । ಅ॒ನ್ತರಿ॑ಖ್ಷ॒ಮಸು᳚ಮ್ । ಪೃ॒ಥಿ॒ವೀಗ್ಂ ಶರೀ॑ರಮ್ । ಏ॒ಕ॒ಧಾ-ಽಸ್ಯ॒ ತ್ವಚ॒ಮಾಚ್ಛ್ಯ॑ತಾತ್ । ಪು॒ರಾ ನಾಭ್ಯಾ॑ ಅಪಿ॒ಶಸೋ॑ ವ॒ಪಾಮುತ್ಖಿ॑ದತಾತ್ । ಅ॒ನ್ತರೇ॒ವೋಷ್ಮಾಣಂ॑-ವಾಁರಯತಾತ್ । ಶ್ಯೇ॒ನಮ॑ಸ್ಯ॒ ವಖ್ಷಃ॑ ಕೃಣುತಾತ್ । ಪ್ರ॒ಶಸಾ॑ ಬಾ॒ಹೂ ॥ 15 ॥
ಶ॒ಲಾ ದೋ॒ಷಣೀ᳚ । ಕ॒ಶ್ಯಪೇ॒ವಾಗ್ಂಸಾ᳚ । ಅಚ್ಛಿ॑ದ್ರೇ॒ ಶ್ರೋಣೀ᳚ ।
ಕ॒ವಷೋ॒ರೂ ಸ್ರೇ॒ಕಪ॑ರ್ಣಾ-ಽಷ್ಠೀ॒ವನ್ತಾ᳚ । ಷಡ್ವಿಗ್ಂ॑ಶತಿರಸ್ಯ॒ ವಙ್ಕ್ರ॑ಯಃ ।
ತಾ ಅ॑ನು॒ಷ್ಠ್ಯೋಚ್ಚ್ಯಾ॑ವಯತಾತ್ । ಗಾತ್ರ॑-ಙ್ಗಾತ್ರಮ॒ಸ್ಯಾನೂ॑ನ-ಙ್ಕೃಣುತಾತ್ । ಊ॒ವ॒ದ್ಧ್ಯ॒ಗೋ॒ಹ-ಮ್ಪಾರ್ಥಿ॑ವ-ಙ್ಖನತಾತ್ । ಅ॒ಸ್ನಾ ರಖ್ಷ॒-ಸ್ಸಗ್ಂಸೃ॑ಜತಾತ್ ।
ವ॒ನಿ॒ಷ್ಠುಮ॑ಸ್ಯ॒ ಮಾ ರಾ॑ವಿಷ್ಟ ॥ 16 ॥
ಉರೂ॑ಕ॒-ಮ್ಮನ್ಯ॑ಮಾನಾಃ ॥ ನೇದ್ವ॑ಸ್ತೋ॒ಕೇ ತನ॑ಯೇ । ರವಿ॑ತಾ॒ ರವ॑ಚ್ಛಮಿತಾರಃ । ಅದ್ಧ್ರಿ॑ಗೋ ಶಮೀ॒ದ್ಧ್ವಮ್ । ಸು॒ಶಮಿ॑ ಶಮೀದ್ಧ್ವಮ್ । ಶ॒ಮೀ॒ದ್ಧ್ವ-ಮ॑ದ್ಧ್ರಿಗೋ ॥
ಅದ್ಧ್ರಿ॑ಗು॒ಶ್ಚಾಪಾ॑ಪಶ್ಚ । ಉ॒ಭೌ ದೇ॒ವಾನಾಗ್ಂ॑ ಶಮಿ॒ತಾರೌ᳚ । ತಾವಿ॒ಮ-ಮ್ಪ॒ಶುಗ್ಗ್ ಶ್ರ॑ಪಯತಾ-ಮ್ಪ್ರವಿ॒ದ್ವಾಗ್ಂಸೌ᳚ ।
ಯಥಾ॑ ಯಥಾ-ಽಸ್ಯ॒ ಶ್ರಪ॑ಣ॒-ನ್ತಥಾ॑ತಥಾ ॥ 17 ॥
[ಧ॒ತ್ತಾ॒-ದ್- ಬಾ॒ಹೂ - ಮಾ ರಾ॑ವಿಷ್ಟ॒ - ತಥಾ॑ತಥಾ ] (ಅ. 6)
ಅನುವಾಕಂ 7 - ಸ್ತೋಕವಿಷಯ-ಮ್ಮೈತ್ರಾವರುಣಾನುವಚನಮ್
ಜು॒ಷಸ್ವ॑ ಸ॒ಪ್ರಥ॑ಸ್ತಮಮ್ । ವಚೋ॑ ದೇ॒ವಫ್ಸ॑ರಸ್ತಮಮ್ ।
ಹ॒ವ್ಯಾ ಜುಹ್ವಾ॑ನ ಆ॒ಸನಿ॑ ॥ ಇ॒ಮ-ನ್ನೋ॑ ಯ॒ಜ್ಞಮ॒ಮೃತೇ॑ಷು ಧೇಹಿ । ಇ॒ಮಾ ಹ॒ವ್ಯಾ ಜಾ॑ತವೇದೋ ಜುಷಸ್ವ । ಸ್ತೋ॒ಕಾನಾ॑ಮಗ್ನೇ॒ ಮೇದ॑ಸೋ ಘೃ॒ತಸ್ಯ॑ । ಹೋತಃ॒ ಪ್ರಾಶಾ॑ನ ಪ್ರಥ॒ಮೋ ನಿ॒ಷದ್ಯ॑ ॥ ಘೃ॒ತವ॑ನ್ತಃ ಪಾವಕ ತೇ ।
ಸ್ತೋ॒ಕಾಸ್ಶ್ಚೋ॑ತನ್ತಿ॒ ಮೇದ॑ಸಃ । ಸ್ವಧ॑ರ್ಮ-ನ್ದೇ॒ವವೀ॑ತಯೇ ॥ 18 ॥
ಶ್ರೇಷ್ಠ॑-ನ್ನೋ ಧೇಹಿ॒ ವಾರ್ಯ᳚ಮ್ ॥ ತುಭ್ಯಗ್ಗ್॑ ಸ್ತೋ॒ಕಾ ಘೃ॑ತ॒ಶ್ಚುತಃ॑ । ಅಗ್ನೇ॒ ವಿಪ್ರಾ॑ಯ ಸನ್ತ್ಯ । ಋಷಿ॒-ಶ್ಶ್ರೇಷ್ಠ॒-ಸ್ಸಮಿ॑ದ್ಧ್ಯಸೇ । ಯ॒ಜ್ಞಸ್ಯ॑ ಪ್ರಾವಿ॒ತಾ ಭ॑ವ ॥
ತುಭ್ಯಗ್ಗ್॑ ಶ್ಚೋತನ್ತ್ಯದ್ಧ್ರಿಗೋ ಶಚೀವಃ । ಸ್ತೋ॒ಕಾಸೋ॑ ಅಗ್ನೇ॒ ಮೇದ॑ಸೋ ಘೃ॒ತಸ್ಯ॑ । ಕ॒ವಿ॒ಶ॒ಸ್ತೋ ಬೃ॑ಹ॒ತಾ ಭಾ॒ನುನಾ-ಽಽಗಾಃ᳚ । ಹ॒ವ್ಯಾ ಜು॑ಷಸ್ವ ಮೇಧಿರ ॥
ಓಜಿ॑ಷ್ಠ-ನ್ತೇ ಮದ್ಧ್ಯ॒ತೋ ಮೇದ॒ ಉದ್ಭೃ॑ತಮ್ । ಪ್ರತೇ॑ ವ॒ಯ-ನ್ದ॑ದಾಮಹೇ । ಶ್ಚೋತ॑ನ್ತಿ ತೇ ವಸೋ ಸ್ತೋ॒ಕಾ ಅಧಿ॑ ತ್ವ॒ಚಿ ।
ಪ್ರತಿ॒ ತಾನ್ದೇ॑ವ॒ಶೋ ವಿ॑ಹಿ ॥ 19 ॥
(ದೇ॒ವವೀ॑ತಯ॒-ಉದ್ಭೃ॑ತ॒-ನ್ತ್ರೀಣಿ॑ ಚ) (ಅ. 7)
ಅನುವಾಕಂ 8 - ವಪಾ ಪುರೋಡಾಶಸ್ವಿಷ್ಟಕೃತಾ-ಮ್ಪುರೋನುವಾಕ್ಯಾಃ ಪ್ರೈಷಾಶ್ಚ
ಆ ವೃ॑ತ್ರಹಣಾ ವೃತ್ರ॒ಹಭಿ॒-ಶ್ಶುಷ್ಮೈಃ᳚ । ಇನ್ದ್ರ॑ ಯಾ॒ತ-ನ್ನಮೋ॑ಭಿರಗ್ನೇ ಅ॒ರ್ವಾಕ್ । ಯು॒ವಗ್ಂ ರಾಧೋ॑ಭಿ॒ರಕ॑ವೇಭಿರಿನ್ದ್ರ । ಅಗ್ನೇ॑ ಅ॒ಸ್ಮೇ ಭ॑ವತಮುತ್ತ॒ಮೇಭಿಃ॑ ॥ ಹೋತಾ॑ ಯಖ್ಷದಿನ್ದ್ರಾ॒ಗ್ನೀ । ಛಾಗ॑ಸ್ಯ ವ॒ಪಾಯಾ॒ ಮೇದ॑ಸಃ । ಜು॒ಷೇತಾಗ್ಂ॑ ಹ॒ವಿಃ । ಹೋತ॒ರ್ಯಜ॑ ॥ ವಿ ಹ್ಯಖ್ಯ॒-ನ್ಮನ॑ಸಾ॒ ವಸ್ಯ॑ ಇ॒ಚ್ಛನ್ನ್ । ಇನ್ದ್ರಾ᳚ಗ್ನೀ ಜ್ಞಾ॒ಸ ಉ॒ತ ವಾ॑ ಸಜಾ॒ತಾನ್ ॥ 20 ॥
ನಾನ್ಯಾ ಯು॒ವತ್ಪ್ರಮ॑ತಿರಸ್ತಿ॒ ಮಹ್ಯ᳚ಮ್ । ಸ ವಾ॒-ನ್ಧಿಯಂ॑-ವಾಁಜ॒ಯನ್ತೀ॑ಮತಖ್ಷಮ್ ॥ ಹೋತಾ॑ ಯಖ್ಷದಿನ್ದ್ರಾ॒ಗ್ನೀ । ಪು॒ರೋ॒ಡಾಶ॑ಸ್ಯ ಜು॒ಷೇತಾಗ್ಂ॑ ಹ॒ವಿಃ । ಹೋತ॒ರ್ಯಜ॑ ॥
ತ್ವಾಮೀ॑ಡತೇ ಅಜಿ॒ರ-ನ್ದೂ॒ತ್ಯಾ॑ಯ । ಹ॒ವಿಷ್ಮ॑ನ್ತ॒-ಸ್ಸದ॒ಮಿ-ನ್ಮಾನು॑ಷಾಸಃ । ಯಸ್ಯ॑ ದೇ॒ವೈರಾಸ॑ದೋ ಬ॒ರ್॒ಹಿರ॑ಗ್ನೇ । ಅಹಾ᳚ನ್ಯಸ್ಮೈ ಸು॒ದಿನಾ॑ ಭವನ್ತು ॥ ಹೋತಾ॑ ಯಖ್ಷದ॒ಗ್ನಿಮ್ । ಪು॒ರೋ॒ಡಾಶ॑ಸ್ಯ ಜು॒ಷತಾಗ್ಂ॑ ಹ॒ವಿಃ ।
ಹೋತ॒ರ್ಯಜ॑ ॥ 21 ॥
(ಸ॒ಜಾ॒ತಾ - ನ॒ಗ್ನಿ-ನ್ದ್ವೇ ಚ॑) (ಅ. 8)
ಅನುವಾಕಂ 9 - ತೇಷಾಮೇವ ಯಾಜ್ಯಾಃ
ಗೀ॒ರ್ಭಿರ್ವಿಪ್ರಃ॒ ಪ್ರಮ॑ತಿಮಿ॒ಚ್ಛಮಾ॑ನಃ । ಈ॒॑ ರ॒ಯಿಂ-ಯಁ॒ಶಸ॑-ಮ್ಪೂರ್ವ॒ಭಾಜ᳚ಮ್ । ಇನ್ದ್ರಾ᳚ಗ್ನೀ ವೃತ್ರಹಣಾ ಸುವಜ್ರಾ । ಪ್ರಣೋ॒ ನವ್ಯೇ॑ಭಿಸ್ತಿರತ-ನ್ದೇ॒ಷ್ಣೈಃ ॥ ಮಾಚ್ಛೇ᳚ದ್ಮ ರ॒ಶ್ಮೀಗ್ಂರಿತಿ॒ ನಾಧ॑ಮಾನಾಃ । ಪಿ॒ತೃ॒ಣಾಗ್ಂ ಶಕ್ತೀ॑ರನು॒ ಯಚ್ಛ॑ಮಾನಾಃ । ಇ॒ನ್ದ್ರಾ॒ಗ್ನಿಭ್ಯಾ॒-ಙ್ಕಂ-ವೃಁಷ॑ಣೋ ಮದನ್ತಿ । ತಾ ಹ್ಯದ್ರೀ॑ ಧಿ॒ಷಣಾ॑ಯಾ ಉ॒ಪಸ್ಥೇ᳚ ॥
ಅ॒ಗ್ನಿಗ್ಂ ಸು॑ದೀ॒ತಿಗ್ಂ ಸು॒ದೃಶ॑-ಙ್ಗೃ॒ಣನ್ತಃ॑ ।
ನ॒ಮ॒ಸ್ಯಾಮ॒ಸ್ತ್ವೇಡ್ಯ॑-ಞ್ಜಾತವೇದಃ ।
ತ್ವಾ-ನ್ದೂ॒ತಮ॑ರ॒ತಿಗ್ಂ ಹ॑ವ್ಯ॒ವಾಹ᳚ಮ್ ।
ದೇ॒ವಾ ಅ॑ಕೃಣ್ವ-ನ್ನ॒ಮೃತ॑ಸ್ಯ॒ ನಾಭಿ᳚ಮ್ ॥ 22 ॥
(ಜಾ॒ತ॒ವೇ॒ದೋ॒ ದ್ವೇ ಚ॑) (ಅ. 9)
ಅನುವಾಕಂ 10 - ಮನೋತಾಸೂಕ್ತಮ್
ತ್ವಗ್ಗ್ ಹ್ಯ॑ಗ್ನೇ ಪ್ರಥ॒ಮೋ ಮ॒ನೋತಾ᳚ । ಅ॒ಸ್ಯಾ ಧಿ॒ಯೋ ಅಭ॑ವೋ ದಸ್ಮ॒ ಹೋತಾ᳚ । ತ್ವಗ್ಂ ಸೀಂ᳚-ವೃಁಷ-ನ್ನಕೃಣೋ-ರ್ದು॒ಷ್ಟರೀ॑ತು । ಸಹೋ॒ ವಿಶ್ವ॑ಸ್ಮೈ॒ ಸಹ॑ಸೇ॒ ಸಹ॑ದ್ಧ್ಯೈ ॥ ಅಧಾ॒ ಹೋತಾ॒ ನ್ಯ॑ಸೀದೋ॒ ಯಜೀ॑ಯಾನ್ । ಇ॒ಡಸ್ಪ॒ದ ಇ॒ಷಯ॒ನ್ನೀಡ್ಯ॒-ಸ್ಸನ್ನ್ । ತ-ನ್ತ್ವಾ॒ ನರಃ॑ ಪ್ರಥ॒ಮ-ನ್ದೇ॑ವ॒ಯನ್ತಃ॑ । ಮ॒ಹೋ ರಾ॒ಯೇ ಚಿ॒ತಯ॑ನ್ತೋ॒ ಅನು॑ ಗ್ಮನ್ನ್ ॥ ವೃ॒ತೇವ॒ ಯನ್ತ॑-ಮ್ಬ॒ಹುಭಿ॑-ರ್ವಸ॒ವ್ಯೈಃ᳚ ।
ತ್ವೇ ರ॒ಯಿ-ಞ್ಜಾ॑ಗೃ॒ವಾಗ್ಂಸೋ॒ ಅನು॑ ಗ್ಮನ್ನ್ ॥ 23 ॥
ರುಶ॑ನ್ತಮ॒ಗ್ನಿ-ನ್ದ॑ರ್ಶ॒ತ-ಮ್ಬೃ॒ಹನ್ತ᳚ಮ್ । ವ॒ಪಾವ॑ನ್ತಂ-ವಿಁ॒ಶ್ವಹಾ॑ ದೀದಿ॒ವಾಗ್ಂಸ᳚ಮ್ ॥ ಪ॒ದ-ನ್ದೇ॒ವಸ್ಯ॒ ನಮ॑ಸಾ ವಿ॒ಯನ್ತಃ॑ । ಶ್ರ॒ವ॒ಸ್ಯವ॒-ಶ್ಶ್ರವ॑ ಆಪ॒ನ್ನಮೃ॑ಕ್ತಮ್ ।
ನಾಮಾ॑ನಿ ಚಿ-ದ್ದಧಿರೇ ಯ॒ಜ್ಞಿಯಾ॑ನಿ । ಭ॒ದ್ರಾಯಾ᳚-ನ್ತೇ ರಣಯನ್ತ॒ ಸನ್ದೃ॑ಷ್ಟೌ ॥ ತ್ವಾಂ-ವಁ॑ರ್ಧನ್ತಿ ಖ್ಷಿ॒ತಯಃ॑ ಪೃಥಿ॒ವ್ಯಾಮ್ । ತ್ವಗ್ಂ ರಾಯ॑ ಉ॒ಭಯಾ॑ಸೋ॒ ಜನಾ॑ನಾಮ್ ।
ತ್ವ-ನ್ತ್ರಾ॒ತಾ ತ॑ರಣೇ॒ ಚೇತ್ಯೋ॑ ಭೂಃ ।
ಪಿ॒ತಾ ಮಾ॒ತಾ ಸದ॒ಮಿ-ನ್ಮಾನು॑ಷಾಣಾಮ್ ॥ 24 ॥
ಸ ಪ॒ರ್ಯೇಣ್ಯ॒-ಸ್ಸ ಪ್ರಿ॒ಯೋ ವಿ॒ಖ್ಷ್ವ॑ಗ್ನಿಃ । ಹೋತಾ॑ ಮ॒ನ್ದ್ರೋ ನಿಷ॑ಸಾದಾ॒ ಯಜೀ॑ಯಾನ್ । ತ-ನ್ತ್ವಾ॑ ವ॒ಯ-ನ್ದಮ॒ ಆ ದೀ॑ದಿ॒ವಾಗ್ಂಸ᳚ಮ್ । ಉಪ॑ಜ್ಞು॒ಬಾಧೋ॒ ನಮ॑ಸಾ ಸದೇಮ ॥
ತ-ನ್ತ್ವಾ॑ ವ॒ಯಗ್ಂ ಸು॒ಧಿಯೋ॒ ನವ್ಯ॑ಮಗ್ನೇ । ಸು॒ಮ್ನಾ॒ಯವ॑ ಈಮಹೇ ದೇವ॒ಯನ್ತಃ॑ । ತ್ವಂ-ವಿಁಶೋ॑ ಅನಯೋ॒ ದೀದ್ಯಾ॑ನಃ । ದಿ॒ವೋ ಅ॑ಗ್ನೇ ಬೃಹ॒ತಾ ರೋ॑ಚ॒ನೇನ॑ ॥
ವಿ॒ಶಾ-ಙ್ಕ॒ವಿಂ-ವಿಁ॒ಶ್ಪತಿ॒ಗ್ಂ॒ ಶಶ್ವ॑ತೀನಾಮ್ ।
ನಿ॒ತೋಶ॑ನಂ-ವೃಁಷ॒ಭ-ಞ್ಚ॑ರ್ಷಣೀ॒ನಾಮ್ ॥ 25 ॥
ಪ್ರೇತೀ॑ಷಣಿಮಿ॒ಷಯ॑ನ್ತ-ಮ್ಪಾವ॒ಕಮ್ । ರಾಜ॑ನ್ತಮ॒ಗ್ನಿಂ-ಯಁ॑ಜ॒ತಗ್ಂ ರ॑ಯೀ॒ಣಾಮ್ ॥ ಸೋ ಅ॑ಗ್ನ ಈಜೇ ಶಶ॒ಮೇ ಚ॒ ಮರ್ತಃ॑ । ಯಸ್ತ॒ ಆನ॑ಟ್-ಥ್ಸ॒ಮಿಧಾ॑ ಹ॒ವ್ಯದಾ॑ತಿಮ್ ।
ಯ ಆಹು॑ತಿ॒-ಮ್ಪರಿ॒ ವೇದಾ॒ ನಮೋ॑ಭಿಃ । ವಿಶ್ವೇಥ್ಸ ವಾ॒ಮಾ ದ॑ಧತೇ॒ ತ್ವೋತಃ॑ ॥ ಅ॒ಸ್ಮಾ ಉ॑ ತೇ॒ ಮಹಿ॑ ಮ॒ಹೇ ವಿ॑ಧೇಮ । ನಮೋ॑ಭಿರಗ್ನೇ ಸ॒ಮಿಧೋ॒ತ ಹ॒ವ್ಯೈಃ ।
ವೇದೀ॑ ಸೂನೋ ಸಹಸೋ ಗೀ॒ರ್ಭಿರು॒ಕ್ಥೈಃ ।
ಆ ತೇ॑ ಭ॒ದ್ರಾಯಾಗ್ಂ॑ ಸುಮ॒ತೌ ಯ॑ತೇಮ ॥ 26 ॥
ಆ ಯಸ್ತ॒ತನ್ಥ॒ ರೋದ॑ಸೀ॒ ವಿ ಭಾ॒ಸಾ । ಶ್ರವೋ॑ಭಿಶ್ಚ ಶ್ರವ॒ಸ್ಯ॑ಸ್ತರು॑ತ್ರಃ । ಬೃ॒ಹದ್ಭಿ॒-ರ್ವಾಜೈ॒-ಸ್ಸ್ಥವಿ॑ರೇಭಿರ॒ಸ್ಮೇ । ರೇ॒ವದ್ಭಿ॑ರಗ್ನೇ ವಿತ॒ರಂ-ವಿಁಭಾ॑ಹಿ ॥
ನೃ॒ವದ್ವ॑ಸೋ॒ ಸದ॒ಮಿದ್ಧೇ᳚ಹ್ಯ॒ಸ್ಮೇ । ಭೂರಿ॑ ತೋ॒ಕಾಯ॒ ತನ॑ಯಾಯ ಪ॒ರ್ಶ್ವಃ । ಪೂ॒ರ್ವೀರಿಷೋ॑ ಬೃಹ॒ತೀರಾ॒ರೇ ಅ॑ಘಾಃ । ಅ॒ಸ್ಮೇ ಭ॒ದ್ರಾ ಸೌ᳚ಶ್ರವ॒ಸಾನಿ॑ ಸನ್ತು ॥
ಪು॒ರೂಣ್ಯ॑ಗ್ನೇ ಪುರು॒ಧಾ ತ್ವಾ॒ಯಾ । ವಸೂ॑ನಿ ರಾಜನ್-ವ॒ಸುತಾ॑ತೇ ಅಶ್ಯಾಮ್ । ಪು॒ರೂಣಿ॒ ಹಿ ತ್ವೇ ಪು॑ರುವಾರ॒ ಸನ್ತಿ॑ ।
ಅಗ್ನೇ॒ ವಸು॑ ವಿಧ॒ತೇ ರಾಜ॑ನಿ॒ ತ್ವೇ ॥ 27 ॥
(ಜಾ॒ಗೃ॒ವಾಗ್ಂಸೋ॒ ಅನು॑ ಗ್ಮ॒ನ್ - ಮಾನು॑ಷಾಣಾಂ - ಚರ್ಷಣೀ॒ನಾಂ - ಁಯ॑ತೇ - ಮಾಶ್ಯಾ॒-ನ್ದ್ವೇ ಚ॑) (ಅ. 10)
ಅನುವಾಕಂ 11 - ಹವಿರ್ವನಸ್ಪತಿಸ್ವಿಷ್ಟಕೃತಾ-ಮ್ಪುರೋನುವಾಕ್ಯಾಃ ಪ್ರೈಷಾಶ್ಚ
ಆ ಭ॑ರತಗ್ಂ ಶಿಖ್ಷತಂ-ವಁಜ್ರಬಾಹೂ ।
ಅ॒ಸ್ಮಾಗ್ಂ ಇ॑ನ್ದ್ರಾಗ್ನೀ ಅವತ॒ಗ್ಂ॒ ಶಚೀ॑ಭಿಃ ।
ಇ॒ಮೇ ನು ತೇ ರ॒ಶ್ಮಯ॒-ಸ್ಸೂರ್ಯ॑ಸ್ಯ ।
ಯೇಭಿ॑-ಸ್ಸಪಿ॒ತ್ವ-ಮ್ಪಿ॒ತರೋ॑ ನ॒ ಆಯನ್ನ್॑ ॥
ಹೋತಾ॑ ಯಖ್ಷದಿನ್ದ್ರಾ॒ಗ್ನೀ । ಛಾಗ॑ಸ್ಯ ಹ॒ವಿಷ॒ ಆತ್ತಾ॑ಮ॒ದ್ಯ । ಮ॒ದ್ಧ್ಯ॒ತೋ ಮೇದ॒ ಉದ್ಭೃ॑ತಮ್ । ಪು॒ರಾ ದ್ವೇಷೋ᳚ಭ್ಯಃ । ಪು॒ರಾ ಪೌರು॑ಷೇಯ್ಯಾ ಗೃ॒ಭಃ । ಘಸ್ತಾ᳚ನ್ನೂ॒ನಮ್ ॥ 28 ॥
ಘಾ॒ಸೇ ಅ॑ಜ್ರಾಣಾಂ॒-ಯಁವ॑ಸಪ್ರಥಮಾನಾಮ್ । ಸು॒ಮತ್ಖ್ಷ॑ರಾಣಾಗ್ಂ ಶ॒ತರು॑ದ್ರಿಯಾಣಾಮ್ ।
ಅ॒ಗ್ನಿ॒ಷ್ವಾ॒ತ್ತಾನಾ॒-ಮ್ಪೀವೋ॑ಪವಸನಾನಾಮ್ ।
ಪಾ॒ರ್ಶ್ವ॒ತ-ಶ್ಶ್ರೋ॑ಣಿ॒ತ-ಶ್ಶಿ॑ತಾಮ॒ತ ಉ॑ಥ್ಸಾದ॒ತಃ । ಅಙ್ಗಾ॑ದಙ್ಗಾ॒ದವ॑ತ್ತಾನಾಮ್ । ಕರ॑ತ ಏ॒ವೇನ್ದ್ರಾ॒ಗ್ನೀ । ಜು॒ಷೇತಾಗ್ಂ॑ ಹ॒ವಿಃ । ಹೋತ॒ರ್ಯಜ॑ ॥
ದೇ॒ವೇಭ್ಯೋ॑ ವನಸ್ಪತೇ ಹ॒ವೀಗ್ಂಷಿ॑ ।
ಹಿರ॑ಣ್ಯಪರ್ಣ ಪ್ರ॒ದಿವ॑ಸ್ತೇ॒ ಅರ್ಥ᳚ಮ್ ॥ 29 ॥
ಪ್ರ॒ದ॒ಖ್ಷಿ॒ಣಿ-ದ್ರ॑ಶ॒ನಯಾ॑ ನಿ॒ಯೂಯ॑ । ಋ॒ತಸ್ಯ॑ ವಖ್ಷಿ ಪ॒ಥಿಭೀ॒ ರಜಿ॑ಷ್ಠೈಃ ॥ ಹೋತಾ॑ ಯಖ್ಷ॒-ದ್ವನ॒ಸ್ಪತಿ॑ಮ॒ಭಿ ಹಿ । ಪಿ॒ಷ್ಟತ॑ಮಯಾ॒ ರಭಿ॑ಷ್ಠಯಾ ರಶ॒ನಯಾ-ಽಽಧಿ॑ತ ।
ಯತ್ರೇ᳚ನ್ದ್ರಾಗ್ನಿ॒ಯೋ-ಶ್ಛಾಗ॑ಸ್ಯ ಹ॒ವಿಷಃ॑ ಪ್ರಿ॒ಯಾ ಧಾಮಾ॑ನಿ ।
ಯತ್ರ॒ ವನ॒ಸ್ಪತೇಃ᳚ ಪ್ರಿ॒ಯಾ ಪಾಥಾಗ್ಂ॑ಸಿ ।
ಯತ್ರ॑ ದೇ॒ವಾನಾ॑ಮಾಜ್ಯ॒ಪಾನಾ᳚-ಮ್ಪ್ರಿ॒ಯಾ ಧಾಮಾ॑ನಿ । ಯತ್ರಾ॒ಗ್ನೇರ್-ಹೋತುಃ॑ ಪ್ರಿ॒ಯಾ ಧಾಮಾ॑ನಿ ।
ತತ್ರೈ॒ತ-ಮ್ಪ್ರ॒ಸ್ತು-ತ್ಯೇ॑ವೋ-ಪ॒ಸ್ತುತ್ಯೇ॑ವೋ॒ಪಾವ॑ಸ್ರಖ್ಷತ್ ।
ರಭೀ॑ಯಾಗ್ಂ ಸಮಿವ ಕೃ॒ತ್ವೀ ॥ 30 ॥
ಕರ॑ದೇ॒ವ-ನ್ದೇ॒ವೋ ವನ॒ಸ್ಪತಿಃ॑ । ಜು॒ಷತಾಗ್ಂ॑ ಹ॒ವಿಃ । ಹೋತ॒ರ್ಯಜ॑ ॥ ಪಿ॒ಪ್ರೀ॒ಹಿ ದೇ॒ವಾಗ್ಂ ಉ॑ಶ॒ತೋ ಯ॑ವಿಷ್ಠ । ವಿ॒ದ್ವಾಂ ಋ॒ತೂಗ್ಂರ್-ಋ॑ತುಪತೇ ಯಜೇ॒ಹ ।
ಯೇ ದೈವ್ಯಾ॑ ಋ॒ತ್ವಿಜ॒ಸ್ತೇಭಿ॑ರಗ್ನೇ ।
ತ್ವಗ್ಂ ಹೋತೄ॑ಣಾಮ॒ಸ್ಯಾಯ॑ಜಿಷ್ಠಃ ॥
ಹೋತಾ॑ ಯಖ್ಷದ॒ಗ್ನಿಗ್ಗ್ ಸ್ವಿ॑ಷ್ಟ॒ಕೃತ᳚ಮ್ ।
ಅಯಾ॑ಡ॒ಗ್ನಿ-ರಿ॑ನ್ದ್ರಾಗ್ನಿ॒ಯೋ-ಶ್ಛಾಗ॑ಸ್ಯ ಹ॒ವಿಷಃ॑ ಪ್ರಿ॒ಯಾ ಧಾಮಾ॑ನಿ । ಅಯಾ॒ಡ್ವನ॒ಸ್ಪತೇಃ᳚ ಪ್ರಿ॒ಯಾ ಪಾಥಾಗ್ಂ॑ಸಿ ।
ಅಯಾ᳚ಡ್ದೇ॒ವಾನಾ॑-ಮಾಜ್ಯ॒ಪಾನಾ᳚-ಮ್ಪ್ರಿ॒ಯಾ ಧಾಮಾ॑ನಿ ।
ಯಖ್ಷ॑ದ॒ಗ್ನೇರ್-ಹೋತುಃ॑ ಪ್ರಿ॒ಯಾ ಧಾಮಾ॑ನಿ । ಯಖ್ಷ॒-ಥ್ಸ್ವ-ಮ್ಮ॑ಹಿ॒ಮಾನ᳚ಮ್ । ಆಯ॑ಜತಾ॒ಮೇಜ್ಯಾ॒ ಇಷಃ॑ । ಕೃ॒ಣೋತು॒ ಸೋ ಅ॑ದ್ಧ್ವ॒ರಾ ಜಾ॒ತವೇ॑ದಾಃ । ಜು॒ಷತಾಗ್ಂ॑ ಹ॒ವಿಃ । ಹೋತ॒ರ್ಯಜ॑ ॥ 31 ॥
(ನೂ॒ನ - ಮರ್ಥಂ॑ - ಕೃ॒ತ್ವೀ - ಪಾಥಾಗ್ಂ॑ಸಿ ಸ॒ಪ್ತ ಚ॑) (ಅ. 11)
ಅನುವಾಕಂ 12 - ತೇಷಾಮೇವ ಯಾಜ್ಯಾಃ
ಉಪೋ॑ಹ॒ ಯದ್ವಿ॒ದಥಂ॑-ವಾಁ॒ಜಿನೋ॒ ಗೂಃ । ಗೀ॒ರ್ಭಿ-ರ್ವಿಪ್ರಾಃ॒ ಪ್ರಮ॑ತಿ-ಮಿ॒ಚ್ಛಮಾ॑ನಾಃ । ಅ॒ರ್ವನ್ತೋ॒ ನ ಕಾಷ್ಠಾ॒-ನ್ನಖ್ಷ॑ಮಾಣಾಃ । ಇ॒ನ್ದ್ರಾ॒ಗ್ನೀ ಜೋಹು॑ವತೋ॒ ನರ॒ಸ್ತೇ ॥
ವನ॑ಸ್ಪತೇ ರಶ॒ನಯಾ॑-ಽಭಿ॒ಧಾಯ॑ । ಪಿ॒ಷ್ಟತ॑ಮಯಾ ವ॒ಯುನಾ॑ನಿ ವಿ॒ದ್ವಾನ್ । ವಹ॑ ದೇವ॒ತ್ರಾ ದಿ॑ಧಿಷೋ ಹ॒ವೀಗ್ಂಷಿ॑ । ಪ್ರ ಚ॑ ದಾ॒ತಾರ॑ಮ॒ಮೃತೇ॑ಷು ವೋಚಃ ॥ ಅ॒ಗ್ನಿಗ್ಗ್ ಸ್ವಿ॑ಷ್ಟ॒ಕೃತ᳚ಮ್ । ಅಯಾ॑ಡ॒ಗ್ನಿ-ರಿ॑ನ್ದ್ರಾಗ್ನಿ॒ಯೋ-ಶ್ಛಾಗ॑ಸ್ಯ ಹ॒ವಿಷಃ॑ ಪ್ರಿ॒ಯಾ ಧಾಮಾ॑ನಿ ॥ 32 ॥
ಅಯಾ॒ಡ್ವನ॒ಸ್ಪತೇಃ᳚ ಪ್ರಿ॒ಯಾ ಪಾಥಾಗ್ಂ॑ಸಿ ।
ಅಯಾ᳚ಡ್ದೇ॒ವಾನಾ॑-ಮಾಜ್ಯ॒ಪಾನಾ᳚-ಮ್ಪ್ರಿ॒ಯಾ ಧಾಮಾ॑ನಿ ।
ಯಖ್ಷ॑ದ॒ಗ್ನೇರ್-ಹೋತುಃ॑ ಪ್ರಿ॒ಯಾ ಧಾಮಾ॑ನಿ । ಯಖ್ಷ॒-ಥ್ಸ್ವ-ಮ್ಮ॑ಹಿ॒ಮಾನ᳚ಮ್ । ಆಯ॑ಜತಾ॒ಮೇಜ್ಯಾ॒ ಇಷಃ॑ । ಕೃ॒ಣೋತು॒ ಸೋ ಅ॑ದ್ಧ್ವ॒ರಾ ಜಾ॒ತವೇ॑ದಾಃ । ಜು॒ಷತಾಗ್ಂ॑ ಹ॒ವಿಃ । ಅಗ್ನೇ॒ ಯದ॒ದ್ಯ ವಿ॒ಶೋ ಅ॑ದ್ಧ್ವರಸ್ಯ ಹೋತಃ ।
ಪಾವ॑ಕ ಶೋಚೇ॒ ವೇಷ್ಟ್ವಗ್ಂ ಹಿ ಯಜ್ವಾ᳚ ।
ಋ॒ತಾ ಯ॑ಜಾಸಿ ಮಹಿ॒ನಾ ವಿ ಯ-ದ್ಭೂಃ ।
ಹ॒ವ್ಯಾ ವ॑ಹ ಯವಿಷ್ಠ॒ ಯಾ ತೇ॑ ಅ॒ದ್ಯ ॥ 33 ॥
(ಧಾಮಾ॑ನಿ॒ - ಭುರೇಕ॑-ಞ್ಚ) (ಅ. 12)
ಅನುವಾಕಂ 13 - ಅನೂಯಾಜಪ್ರೈಷಾಃ
ದೇ॒ವ-ಮ್ಬ॒ರ್॒ಹಿ-ಸ್ಸು॑ದೇ॒ವ-ನ್ದೇ॒ವೈ-ಸ್ಸ್ಯಾ-ಥ್ಸು॒ವೀರಂ॑-ವೀಁ॒ರೈರ್ವಸ್ತೋ᳚-ರ್ವೃ॒ಜ್ಯೇತಾ॒ಕ್ತೋಃ ಪ್ರಭ್ರಿ॑-ಯೇ॒ತಾತ್ಯ॒ನ್ಯಾನ್-ರಾ॒ಯಾ ಬ॒ರ್॒ಹಿಷ್ಮ॑ತೋ ಮದೇಮ ವಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವೀ-ರ್ದ್ವಾರ॑-ಸ್ಸಙ್ಘಾ॒ತೇ ವಿ॒ಡ್ವೀರ್ಯಾಮ॑ಞ್ಛಿಥಿ॒ರಾ ಧ್ರು॒ವಾ ದೇ॒ವಹೂ॑ತೌ ವ॒ಥ್ಸ
ಈ॑ಮೇನಾ॒ಸ್ತರು॑ಣ॒ ಆಮಿ॑ಮೀಯಾತ್-ಕುಮಾ॒ರೋ ವಾ॒ ನವ॑ಜಾತೋ॒ ಮೈನಾ॒ ಅರ್ವಾ॑ ರೇ॒ಣುಕ॑ಕಾಟಃ॒ ಪೃಣ॑ಗ್ವಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವೀ ಉ॒ಷಾಸಾ॒ ನಕ್ತಾ-ಽದ್ಯಾ॒ಸ್ಮಿನ್. ಯ॒ಜ್ಞೇ ಪ್ರ॑ಯ॒ತ್ಯ॑ಹ್ವೇತಾ॒ಮಪಿ॑ ನೂ॒ನ-ನ್ದೈವೀ॒ರ್ವಿಶಃ॒ ಪ್ರಾಯಾ॑ಸಿಷ್ಟಾ॒ಗ್ಂ॒ ಸುಪ್ರೀ॑ತೇ॒ ಸುಧಿ॑ತೇ ವಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥
ದೇ॒ವೀ ಜೋಷ್ಟ್ರೀ॒ ವಸು॑ಧಿತೀ॒ ಯಯೋ॑ರ॒ನ್ಯಾ-ಽಘಾ ದ್ವೇಷಾಗ್ಂ॑ಸಿ ಯು॒ಯವ॒ದಾ-ಽನ್ಯಾ ವ॑ಖ್ಷ॒-ದ್ವಸು॒ ವಾರ್ಯಾ॑ಣಿ॒ ಯಜ॑ಮಾನಾಯ ವಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥
ದೇ॒ವೀ ಊ॒ರ್ಜಾಹು॑ತೀ॒ ಇಷ॒ಮೂರ್ಜ॑ಮ॒ನ್ಯಾ ವ॑ಖ್ಷ॒ಥ್ಸಗ್ಧಿ॒ಗ್ಂ॒ ಸಪೀ॑ತಿಮ॒ನ್ಯಾ ನವೇ॑ನ॒ ಪೂರ್ವ॒-ನ್ದಯ॑ಮಾನಾ॒-ಸ್ಸ್ಯಾಮ॑ ಪುರಾ॒ಣೇನ॒ ನವ॒-ನ್ತಾಮೂರ್ಜ॑ಮೂ॒ರ್ಜಾಹು॑ತೀ ಊ॒ರ್ಜಯ॑ಮಾನೇ ಅಧಾತಾಂ-ವಁಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥
ದೇ॒ವಾ ದೈವ್ಯಾ॒ ಹೋತಾ॑ರಾ॒ ನೇಷ್ಟಾ॑ರಾ॒ ಪೋತಾ॑ರಾ ಹ॒ತಾಘ॑ಶಗ್ಂಸಾ-ವಾಭ॒ರದ್ವ॑ಸೂ ವಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥
ದೇ॒ವೀಸ್ತಿ॒ಸ್ರಸ್ತಿ॒ಸ್ರೋ ದೇ॒ವೀರಿಡಾ॒ ಸರ॑ಸ್ವತೀ॒ ಭಾರ॑ತೀ॒ ದ್ಯಾ-ಮ್ಭಾರ॑ತ್ಯಾದಿ॒ತ್ಯೈ-ರ॑ಸ್ಪೃಖ್ಷ॒-ಥ್ಸರ॑ಸ್ವತೀ॒ಮಗ್ಂ ರು॒ದ್ರೈ-ರ್ಯ॒ಜ್ಞಮಾ॑ವೀ-ದಿ॒ಹೈವೇಡ॑ಯಾ॒ ವಸು॑ಮತ್ಯಾ
ಸಧ॒ಮಾದ॑-ಮ್ಮದೇಮ ವಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥
ದೇ॒ವೋ ನರಾ॒ಶಗ್ಂಸ॑-ಸ್ತ್ರಿಶೀ॒ರ್॒ಷಾ ಷ॑ಡ॒ಖ್ಷ-ಶ್ಶ॒ತಮಿದೇ॑ನಗ್ಂ ಶಿತಿಪೃ॒ಷ್ಠಾ ಆದ॑ಧತಿ ಸ॒ಹಸ್ರ॑ಮೀ॒-ಮ್ಪ್ರವ॑ಹನ್ತಿ ಮಿ॒ತ್ರಾವರು॒ಣೇದ॑ಸ್ಯ ಹೋ॒ತ್ರಮರ್ಹ॑ತೋ॒
ಬೃಹ॒ಸ್ಪತಿ॑-ಸ್ಸ್ತೋ॒ತ್ರಮ॒ಶ್ವಿನಾ ಽಽದ್ಧ್ವ॑ರ್ಯವಂ-ವಁಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥
ದೇ॒ವೋ ವನ॒ಸ್ಪತಿ॑-ರ್ವ॒ರ್॒ಷಪ್ರಾ॑ವಾ ಘೃ॒ತನಿ॑ರ್ಣಿ॒ಗ್-ದ್ಯಾ-
ಮಗ್ರೇ॒ಣಾಸ್ಪೃ॑ಖ್ಷ॒ದಾ-ಽನ್ತರಿ॑ಖ್ಷ॒-ಮ್ಮದ್ಧ್ಯೇ॑ನಾಪ್ರಾಃ ಪೃಥಿ॒ವೀ-ಮುಪ॑ರೇಣಾದೃಗ್ಂಹೀ-ದ್ವಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥
ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾ-ನ್ನಿ॒ಧೇ ಧಾ॑ಸಿ॒ ಪ್ರಚ್ಯು॑ತೀನಾ॒ಮ-ಪ್ರ॑ಚ್ಯುತ-ನ್ನಿಕಾಮ॒ಧರ॑ಣ-ಮ್ಪುರುಸ್ಪಾ॒ರ್॒ಹಂ-ಯಁಶ॑ಸ್ವದೇ॒ನಾ ಬ॒ರ್॒ಹಿಷಾ॒-ಽನ್ಯಾ ಬ॒ರ್॒ಹೀಗ್ಷ್ಯ॒ಭಿಷ್ಯಾ॑ಮ ವಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥
ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃ-ಥ್ಸು॒ದ್ರವಿ॑ಣಾ ಮ॒ನ್ದ್ರಃ ಕ॒ವಿ-ಸ್ಸ॒ತ್ಯಮ॑ನ್ಮಾ-ಽಽಯ॒ಜೀ ಹೋತಾ॒ ಹೋತು॑ರ್-ಹೋತು॒ರಾಯ॑ಜೀಯಾ॒ನಗ್ನೇ॒ ಯಾನ್-ದೇ॒ವಾನಯಾ॒ಡ್ಯಾಗ್ಂ ಅಪಿ॑ಪ್ರೇ॒ರ್ಯೇ ತೇ॑ ಹೋ॒ತ್ರೇ ಅಮ॑ಥ್ಸತ॒ ತಾಗ್ಂ ಸ॑ಸ॒ನುಷೀ॒ಗ್ಂ॒ ಹೋತ್ರಾ᳚-ನ್ದೇವ-ಙ್ಗ॒ಮಾ-ನ್ದಿ॒ವಿ ದೇ॒ವೇಷು॑ ಯ॒ಜ್ಞಮೇರ॑ಯೇ॒ಮಗ್ಗ್
ಸ್ವಿ॑ಷ್ಟ॒ಕೃಚ್ಚಾಗ್ನೇ॒ ಹೋತಾ-ಽಭೂ᳚ರ್ವಸು॒ವನೇ॑ ವಸು॒ಧೇಯ॑ಸ್ಯ ನಮೋವಾ॒ಕೇ ವೀಹಿ॒ ಯಜ॑ ॥ 34 ॥
(ಯಜೈಕ॑-ಞ್ಚ) (ಅ. 13)
ಅನುವಾಕಂ 14 - ಅನೂಯಾಜಯಾಜ್ಯಾಃ
ದೇ॒ವ-ಮ್ಬ॒ರ್॒ಹಿಃ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು ।
ದೇ॒ವೀರ್ದ್ವಾರಃ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು । ದೇ॒ವೀ ಉ॒ಷಾಸಾ॒ ನಕ್ತಾ᳚ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಮ್ । ದೇ॒ವೀ ಜೋಷ್ಟ್ರೀ᳚ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಮ್ ।
ದೇ॒ವೀ ಊ॒ರ್ಜಾಹು॑ತೀ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಮ್ ॥ 35 ॥
ದೇ॒ವಾ ದೈವ್ಯಾ॒ ಹೋತಾ॑ರಾ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಮ್ । ದೇ॒ವೀಸ್ತಿ॒ಸ್ರ-ಸ್ತಿ॒ಸ್ರೋ ದೇ॒ವೀಃ ।
ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು ।
ದೇ॒ವೋ ನರಾ॒ಶಗ್ಂಸಃ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು । ದೇ॒ವೋ ವನ॒ಸ್ಪತಿಃ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು । ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು ॥ 36 ॥
ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃತ್ । ಸು॒ದ್ರವಿ॑ಣಾ ಮ॒ನ್ದ್ರಃ ಕ॒ವಿಃ । ಸ॒ತ್ಯಮ॑ನ್ಮಾ-ಽಽಯ॒ಜೀ ಹೋತಾ᳚ । ಹೋತು॑ರ್-ಹೋತು॒ರಾಯ॑ಜೀಯಾನ್ ।
ಅಗ್ನೇ॒ ಯಾನ್ದೇ॒ವಾನಯಾ᳚ಟ್ । ಯಾಗ್ಂ ಅಪಿ॑ಪ್ರೇಃ । ಯೇ ತೇ॑ ಹೋ॒ತ್ರೇ ಅಮ॑ಥ್ಸತ । ತಾಗ್ಂ ಸ॑ಸ॒ನುಷೀ॒ಗ್ಂ॒ ಹೋತ್ರಾ᳚-ನ್ದೇವ-ಙ್ಗ॒ಮಾಮ್ । ದಿ॒ವಿ ದೇ॒ವೇಷು॑ ಯ॒ಜ್ಞಮೇರ॑ಯೇ॒ಮಮ್ । ಸ್ವಿ॒ಷ್ಟ॒ಕೃಚ್ಚಾಗ್ನೇ॒ ಹೋತಾ-ಽಭೂಃ᳚ ।
ವ॒ಸು॒ವನೇ॑ ವಸು॒ಧೇಯ॑ಸ್ಯ ನಮೋವಾ॒ಕೇ ವೀಹಿ॑ ॥ 37 ॥
(ವೀ॒ತಾಂ॒ - ಁವೇ॒ತ್ವ - ಭೂ॒ರೇಕ॑-ಞ್ಚ) (ಅ. 14)
ಅನುವಾಕಂ 15 - ಸೂಕ್ತವಾಕಪ್ರೈಷಾಃ
ಅ॒ಗ್ನಿಮ॒ದ್ಯ ಹೋತಾ॑ರಮವೃಣೀತಾ॒ಯಂ-ಯಁಜ॑ಮಾನಃ॒ ಪಚ॑-ನ್ಪ॒ಕ್ತೀಃ ಪಚ॑-ನ್ಪುರೋ॒ಡಾಶಂ॑
ಬ॒ದ್ಧ್ನ-ನ್ನಿ॑ನ್ದ್ರಾ॒ಗ್ನಿಭ್ಯಾ॒-ಞ್ಛಾಗಗ್ಂ॑ ಸೂಪ॒ಸ್ಥಾ ಅ॒ದ್ಯ ದೇ॒ವೋ ವನ॒ಸ್ಪತಿ॑-ರಭವ-ದಿನ್ದ್ರಾ॒ಗ್ನಿಭ್ಯಾ॒-ಞ್ಛಾಗೇ॒ನಾಘ॑ಸ್ತಾ॒-ನ್ತ-ಮ್ಮೇ॑ದ॒ಸ್ತಃ ಪ್ರತಿ॑ ಪಚ॒ತಾ-ಽಗ್ರ॑ಭೀಷ್ಟಾ॒ಮವೀ॑ವೃಧೇತಾ-ಮ್ಪುರೋ॒ಡಾಶೇ॑ನ॒ ತ್ವಾಮ॒ದ್ಯರ್ಷ॑ ಆರ್ಷೇಯರ್ಷೀಣಾ-ನ್ನಪಾದವೃಣೀತಾ॒ಯಂ-ಯಁಜ॑ಮಾನೋ ಬ॒ಹುಭ್ಯ॒ ಆ ಸಙ್ಗ॑ತೇಭ್ಯ ಏ॒ಷ ಮೇ॑ ದೇ॒ವೇಷು॒ ವಸು॒ ವಾರ್ಯಾ ಯ॑ಖ್ಷ್ಯತ॒ ಇತಿ॒ ತಾ ಯಾ
ದೇ॒ವಾ ದೇ॑ವ॒-ದಾನಾ॒ನ್ಯದು॒ಸ್ತಾನ್ಯ॑ಸ್ಮಾ॒ ಆ ಚ॒ ಶಾಸ್ವಾ ಚ॑ ಗುರಸ್ವೇಷಿ॒ತಶ್ಚ॑ ಹೋತ॒ರಸಿ॑ ಭದ್ರ॒ವಾಚ್ಯಾ॑ಯ॒ ಪ್ರೇಷಿ॑ತೋ॒ ಮಾನು॑ಷ-ಸ್ಸೂಕ್ತವಾ॒ಕಾಯ॑ ಸೂ॒ಕ್ತಾ ಬ್ರೂ॑ಹಿ ॥ 38 ॥
(ಅ॒ಗ್ನಿಮ॒ದ್ಯೈಕ᳚ಮ್) (ಅ. 15)
(ಅ॒ಞ್ಜನ್ತಿ॒ - ಹೋತಾ॑ ಯಖ್ಷ॒ಥ್ - ಸಮಿ॑ದ್ವೋ ಅ॒ದ್ಯಾ - ಗ್ನಿ - ರಜೈ॒-ದ್- ದೈವ್ಯಾ॑ - ಜು॒ಷಸ್ - ವಾ ವೃ॑ತ್ರಹಣಾ - ಗೀ॒ರ್ಭಿ - ಸ್ತ್ವಗ್ಗ್ ಹ್ಯಾ - ಭ॑ರತ॒ - ಮುಪೋ॑ಹ॒ ಯ-ದ್- ದೇ॒ವ-ಮ್ಬ॒ರ್॒ಹಿ-ಸ್ಸು॑ದೇ॒ವಂ - ದೇ॒ವ-ಮ್ಬ॒ರ್॒ಹಿ - ರ॒ಗ್ನಿಮ॒ದ್ಯ ಪಞ್ಚ॑ದಶ)
(ಅ॒ಞ್ಜನ್ - ತ್ಯು॒ಪಾವ॑ಸೃಜ॒ನ್ - ನಾನ್ಯಾ ಯು॒ವತ್ - ಕರ॑ದೇ॒ವ ಮ॒ಷ್ಟಾತ್ರಿಗ್ಂ॑ಶತ್)
(ಅ॒ಞ್ಜನ್ತಿ॑ - ಸೂ॒ಕ್ತಾ ಬ್ರೂ॑ಹಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ಷಷ್ಠಃ ಪ್ರಪಾಠಕ-ಸ್ಸಮಾಪ್ತಃ ॥
