ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ದ್ವಿತೀಯಃ ಪ್ರಪಾಠಕಃ - ದಶಪೂರ್ಣಮಾಸೇಷ್ಟಿಬ್ರಾಹ್ಮಣಮ್

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ವಥ್ಸಾಪಾಕರಣಮ್

ತೃ॒ತೀಯ॑ಸ್ಯಾಮಿ॒ತೋ ದಿ॒ವಿ ಸೋಮ॑ ಆಸೀತ್ । ತ-ಙ್ಗಾ॑ಯ॒ತ್ರ್ಯಾಹ॑ರತ್ ।
ತಸ್ಯ॑ ಪ॒ರ್ಣಮ॑ಚ್ಛಿದ್ಯತ । ತ-ತ್ಪ॒ರ್ಣೋ॑-ಽಭವತ್ । ತ-ತ್ಪ॒ರ್ಣಸ್ಯ॑ ಪರ್ಣ॒ತ್ವಮ್ । ಬ್ರಹ್ಮ॒ ವೈ ಪ॒ರ್ಣಃ । ಯ-ತ್ಪ॑ರ್ಣಶಾ॒ಖಯಾ॑ ವ॒ಥ್ಸಾನ॑ಪಾಕ॒ರೋತಿ॑ ।
ಬ್ರಹ್ಮ॑ಣೈ॒ವೈನಾ॑ನ॒ಪಾಕ॑ರೋತಿ ॥ ಗಾ॒ಯ॒ತ್ರೋ ವೈ ಪ॒ರ್ಣಃ । ಗಾ॒ಯ॒ತ್ರಾಃ ಪ॒ಶವಃ॑ ॥ 1 ॥

ತಸ್ಮಾ॒-ತ್ತ್ರೀಣಿ॑ತ್ರೀಣಿ ಪ॒ರ್ಣಸ್ಯ॑ ಪಲಾ॒ಶಾನಿ॑ । ತ್ರಿ॒ಪದಾ॑ ಗಾಯ॒ತ್ರೀ । ಯ-ತ್ಪ॑ರ್ಣಶ॒ಖಯಾ॒ ಗಾಃ ಪ್ರಾ॒ರ್ಪಯ॑ತಿ । ಸ್ವಯೈ॒ವೈನಾ॑ ದೇ॒ವತ॑ಯಾ॒ ಪ್ರಾರ್ಪ॑ಯತಿ । ಯ-ಙ್ಕಾ॒ಮಯೇ॑ತಾ ಪ॒ಶು-ಸ್ಸ್ಯಾ॒ದಿತಿ॑ । ಅ॒ಪ॒ರ್ಣಾ-ನ್ತಸ್ಮೈ॒ ಶುಷ್ಕಾ᳚ಗ್ರಾ॒ಮಾಹ॑ರೇತ್ ।
ಅ॒ಪ॒ಶುರೇ॒ವ ಭ॑ವತಿ । ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ದಿತಿ॑ । ಬ॒ಹು॒ಪ॒ರ್ಣಾ-ನ್ತಸ್ಮೈ॑ ಬಹುಶಾ॒ಖಾಮಾಹ॑ರೇತ್ । ಪ॒ಶು॒ಮನ್ತ॑-ಮೇ॒ವೈನ॑-ಙ್ಕರೋತಿ ॥ 2 ॥

ಯ-ತ್ಪ್ರಾಚೀ॑ಮಾ॒ಹರೇ᳚ತ್ । ದೇ॒ವ॒ಲೋ॒ಕ-ಮ॒ಭಿಜ॑ಯೇತ್ । ಯದುದೀ॑ಚೀ-ಮ್ಮನುಷ್ಯಲೋ॒ಕಮ್ । ಪ್ರಾಚೀ॒ಮುದೀ॑ಚೀ॒ಮಾಹ॑ರತಿ । ಉ॒ಭಯೋ᳚-ರ್ಲೋ॒ಕಯೋ॑-ರ॒ಭಿಜಿ॑ತ್ಯೈ ॥ ಇ॒ಷೇ ತ್ವೋ॒ರ್ಜೇ ತ್ವೇತ್ಯಾ॑ಹ । ಇಷ॑ಮೇ॒ವೋರ್ಜಂ॒-ಯಁಜ॑ಮಾನೇ ದಧಾತಿ ॥
ವಾ॒ಯವ॒-ಸ್ಸ್ಥೇತ್ಯಾ॑ಹ । ವಾ॒ಯುರ್ವಾ ಅ॒ನ್ತರಿ॑ಖ್ಷ॒-ಸ್ಯಾದ್ಧ್ಯ॑ಖ್ಷಾಃ ।
ಅ॒ನ್ತ॒ರಿ॒ಖ್ಷ॒ದೇ॒ವ॒ತ್ಯಾಃ᳚ ಖಲು॒ ವೈ ಪ॒ಶವಃ॑ ॥ 3 ॥

ವಾ॒ಯವ॑ ಏ॒ವೈನಾ॒-ನ್ಪರಿ॑ ದದಾತಿ । ಪ್ರ ವಾ ಏ॑ನಾನೇ॒ತದಾ-ಕ॑ರೋತಿ । ಯದಾಹ॑ । ವಾ॒ಯವ॒-ಸ್ಸ್ಥೇತ್ಯು॑ಪಾ॒ಯವಃ॒
ಸ್ಥೇತ್ಯಾ॑ಹ । ಯಜ॑ಮಾನಾಯೈ॒ವ ಪ॒ಶೂನುಪ॑ಹ್ವಯತೇ ॥
ದೇ॒ವೋ ವ॑-ಸ್ಸವಿ॒ತಾ ಪ್ರಾರ್ಪ॑ಯ॒ತ್ವಿತ್ಯಾ॑ಹ॒ ಪ್ರಸೂ᳚ತ್ಯೈ ॥ ಶ್ರೇಷ್ಠ॑ತಮಾಯ॒ ಕರ್ಮ॑ಣ॒ ಇತ್ಯಾ॑ಹ ।
ಯ॒ಜ್ಞೋ ಹಿ ಶ್ರೇಷ್ಠ॑ತಮ॒-ಙ್ಕರ್ಮ॑ । ತಸ್ಮಾ॑ದೇ॒ವಮಾ॑ಹ ॥
ಆಪ್ಯಾ॑ಯದ್ಧ್ವಮಘ್ನಿಯಾ ದೇವಭಾ॒ಗಮಿತ್ಯಾ॑ಹ ॥ 4 ॥

ವ॒ಥ್ಸೇಭ್ಯ॑ಶ್ಚ॒ ವಾ ಏ॒ತಾಃ ಪು॒ರಾ ಮ॑ನು॒ಷ್ಯೇ᳚ಭ್ಯ॒-ಶ್ಚಾಪ್ಯಾ॑ಯನ್ತ । ದೇ॒ವೇಭ್ಯ॑ ಏ॒ವೈನಾ॒ ಇನ್ದ್ರಾ॒ಯಾಪ್ಯಾ॑ಯತಿ ॥ ಊರ್ಜ॑ಸ್ವತೀಃ॒ ಪಯ॑ಸ್ವತೀ॒ರಿತ್ಯಾ॑ಹ । ಊರ್ಜ॒ಗ್ಂ ॒ಹಿ ಪಯ॑-ಸ್ಸ॒ಮ್ಭರ॑ನ್ತಿ ॥ ಪ್ರ॒ಜಾವ॑ತೀ-ರನಮೀ॒ವಾ ಅ॑ಯ॒ಖ್ಷ್ಮಾ ಇತ್ಯಾ॑ಹ॒ ಪ್ರಜಾ᳚ತ್ಯೈ । ಮಾವ॑-ಸ್ಸ್ತೇ॒ನ ಈ॑ಶತ॒ ಮಾ-ಽಘಶಗ್ಂ॑ಸ॒ ಇತ್ಯಾ॑ಹ॒ ಗುಪ್ತ್ಯೈ᳚ ॥ ರು॒ದ್ರಸ್ಯ॑ ಹೇ॒ತಿಃ ಪರಿ॑ ವೋ ವೃಣ॒ಕ್ತ್ವಿತ್ಯಾ॑ಹ । ರು॒ದ್ರಾ ದೇ॒ವೈನಾ᳚-ಸ್ತ್ರಾಯತೇ ॥
ಧ್ರು॒ವಾ ಅ॒ಸ್ಮಿ-ನ್ಗೋಪ॑ತೌ ಸ್ಯಾತ ಬ॒ಹ್ವೀರಿತ್ಯಾ॑ಹ ।
ಧ್ರು॒ವಾ ಏ॒ವಾಸ್ಮಿ॑-ನ್ಬ॒ಹ್ವೀಃ ಕ॑ರೋತಿ ॥ 5 ॥

ಯಜ॑ಮಾನಸ್ಯ ಪ॒ಶೂ-ನ್ಪಾ॒ಹೀತ್ಯಾ॑ಹ । ಪ॒ಶು॒ನಾ-ಙ್ಗೋ॑ಪೀ॒ಥಾಯ॑ । ತಸ್ಮಾ᳚ಥ್ಸಾ॒ಯ-ಮ್ಪ॒ಶವ॒ ಉಪ॑ ಸ॒ಮಾವ॑ರ್ತನ್ತೇ ॥ ಅನ॑ಧ-ಸ್ಸಾದಯತಿ । ಗರ್ಭಾ॑ಣಾ॒-ನ್ಧೃತ್ಯಾ॒ ಅಪ್ರ॑ಪಾದಾಯ । ತಸ್ಮಾ॒ದ್ಗರ್ಭಾಃ᳚ ಪ್ರ॒ಜಾನಾ॒ಮಪ್ರ॑ಪಾದುಕಾಃ ।
ಉ॒ಪರೀ॑ವ॒ ನಿದ॑ಧಾತಿ । ಉ॒ಪರೀ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 6 ॥
(ಪ॒ಶವಃ॑ - ಕರೋತಿ - ಪ॒ಶವೋ॑ - ದೇವಭಾ॒ಗಮಿತ್ಯಾ॑ಹ - ಕರೋತಿ॒ - +ನವ॑ ಚ) (ಅ. 1)

ಅನುವಾಕಂ 2 - ಬರ್​ಹಿರಾಹರಣಮ್
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯ॑ಶ್ವಪ॒ರ್॒ಶುಮಾದ॑ತ್ತೇ॒ ಪ್ರಸೂ᳚ತ್ಯೈ ।
ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹ ।
ಅ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ᳚ ॥ ಯೋ ವಾ ಓಷ॑ಧೀಃ ಪರ್ವ॒ಶೋ ವೇದ॑ । ನೈನಾ॒-ಸ್ಸ ಹಿ॑ನಸ್ತಿ । ಪ್ರ॒ಜಾಪ॑ತಿ॒ರ್ವಾ ಓಷ॑ಧೀಃ ಪರ್ವ॒ಶೋ ವೇ॑ದ । ಸ ಏ॑ನಾ॒ ನ ಹಿ॑ನಸ್ತಿ । ಅ॒ಶ್ವ॒ಪ॒ರ್​ಶ್ವಾ ಬ॒ರ್॒ಹಿರಚ್ಛೈ॑ತಿ ।
ಪ್ರಾ॒ಜಾ॒ಪ॒ತ್ಯೋ ವಾ ಅಶ್ವ॑-ಸ್ಸಯೋನಿ॒ತ್ವಾಯ॑ ॥ 7 ॥

ಓಷ॑ಧೀನಾ॒ಮಹಿಗ್ಂ॑ಸಾಯೈ ॥
ಯ॒ಜ್ಞಸ್ಯ॑ ಘೋ॒ಷದ॒ಸೀತ್ಯಾ॑ಹ ।
ಯಜ॑ಮಾನ ಏ॒ವ ರ॒ಯಿ-ನ್ದ॑ಧಾತಿ । ಪ್ರತ್ಯು॑ಷ್ಟ॒ಗ್ಂ॒ ರಖ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯ॒ ಇತ್ಯಾ॑ಹ ।
ರಖ್ಷ॑ಸಾ॒-ಮಪ॑ಹತ್ಯೈ ॥ ಪ್ರೇಯಮ॑ಗಾದ್ಧಿ॒ಷಣಾ॑ ಬ॒ರ್॒ಹಿರಚ್ಛೇತ್ಯಾ॑ಹ । ವಿ॒ದ್ಯಾ ವೈ ಧಿ॒ಷಣಾ᳚ । ವಿ॒ದ್ಯಯೈ॒ವೈನ॒ದಚ್ಛೈ॑ತಿ ॥ ಮನು॑ನಾ ಕೃ॒ತಾ ಸ್ವ॒ಧಯಾ॒ ವಿತ॒ಷ್ಟೇತ್ಯಾ॑ಹ । ಮಾ॒ನ॒ವೀ ಹಿ ಪರ್​ಶು॑-ಸ್ಸ್ವ॒ಧಾಕೃ॑ತಾ ॥ 8 ॥

ತ ಆವ॑ಹನ್ತಿ ಕ॒ವಯಃ॑ ಪು॒ರಸ್ತಾ॒ದಿತ್ಯಾ॑ಹ । ಶು॒ಶ್ರು॒ವಾಗ್ಂಸೋ॒ ವೈ ಕ॒ವಯಃ॑ । ಯ॒ಜ್ಞಃ ಪು॒ರಸ್ತಾ᳚ತ್ । ಮು॒ಖ॒ತ ಏ॒ವ ಯ॒ಜ್ಞಮಾರ॑ಭತೇ । ಅಥೋ॒ ಯದೇ॒ತದು॒ಕ್ತ್ವಾ ಯತಃ॒ ಕುತ॑ಶ್ಚಾ॒ಹರ॑ತಿ । ತ-ತ್ಪ್ರಾಚ್ಯಾ॑ ಏ॒ವ ದಿ॒ಶೋ ಭ॑ವತಿ ॥
ದೇ॒ವೇಭ್ಯೋ॒ ಜುಷ್ಟ॑ಮಿ॒ಹ ಬ॒ರ್॒ಹಿರಾ॒ಸದ॒ ಇತ್ಯಾ॑ಹ । ಬ॒ರ್॒ಹಿಷ॒-ಸ್ಸಮೃ॑ದ್ಧ್ಯೈ । ಕರ್ಮ॒ಣೋ-ಽನ॑ಪರಾಧಾಯ ॥ ದೇ॒ವಾನಾ᳚-ಮ್ಪರಿಷೂ॒ತಮ॒ಸೀತ್ಯಾ॑ಹ ॥ 9 ॥

ಯದ್ವಾ ಇ॒ದ-ಙ್ಕಿ-ಞ್ಚ॑ । ತ-ದ್ದೇ॒ವಾನಾ᳚-ಮ್ಪರಿಷೂ॒ತಮ್ ।
ಅಥೋ॒ ಯಥಾ॒ ವಸ್ಯ॑ಸೇ ಪ್ರತಿ॒ ಪ್ರೋಚ್ಯಾಹೇ॒ದ-ಙ್ಕ॑ರಿಷ್ಯಾ॒ಮೀತಿ॑ । ಏ॒ವಮೇ॒ವ ತದ॑ದ್ಧ್ವ॒ರ್ಯು-ರ್ದೇ॒ವೇಭ್ಯಃ॑ ಪ್ರತಿ॒ ಪ್ರೋಚ್ಯ॑ ಬ॒ರ್॒ಹಿರ್ದಾ॑ತಿ । ಆ॒ತ್ಮನೋ-ಽಹಿಗ್ಂ॑ಸಾಯೈ ॥ ಯಾವ॑ತ-ಸ್ಸ್ತ॒ಮ್ಬಾ-ನ್ಪ॑ರಿ ದಿ॒ಶೇತ್ । ಯತ್ತೇಷಾ॑-ಮುಚ್ಛಿ॒ಗ್ಗ್॒ಷ್ಯಾತ್ । ಅತಿ॒ ತ-ದ್ಯ॒ಜ್ಞಸ್ಯ॑ ರೇಚಯೇತ್ । ಏಕಗ್ಗ್॑ ಸ್ತ॒ಮ್ಬ-ಮ್ಪರಿ॑ದಿಶೇತ್ ।
ತಗ್ಂ ಸರ್ವ॑-ನ್ದಾಯಾತ್ ॥ 10 ॥

ಯ॒ಜ್ಞಸ್ಯಾನ॑ತಿರೇಕಾಯ ॥ ವ॒ರ್॒ಷವೃ॑ದ್ಧ-ಮ॒ಸೀತ್ಯಾ॑ಹ ।
ವ॒ರ್॒ಷ ವೃ॑ದ್ಧಾ॒ ವಾ ಓಷ॑ಧಯಃ ॥
ದೇವ॑ ಬರ್​ಹಿ॒ರಿತ್ಯಾ॑ಹ । ದೇ॒ವೇಭ್ಯ॑ ಏ॒ವೈನ॑-ತ್ಕರೋತಿ ।
ಮಾ ತ್ವಾ॒-ಽನ್ವಮ್ಮಾ ತಿ॒ರ್ಯಗಿತ್ಯಾ॒ಹಾ ಹಿಗ್ಂ॑ಸಾಯೈ ।
ಪರ್ವ॑ ತೇ ರಾದ್ಧ್ಯಾಸ॒ಮಿತ್ಯಾ॒-ಹರ್ಧ್ಯೈ᳚ ॥
ಆ॒ಚ್ಛೇ॒ತ್ತಾ ತೇ॒ ಮಾ ರಿ॑ಷ॒ಮಿತ್ಯಾ॑ಹ । ನಾಸ್ಯಾ॒ತ್ಮನೋ॑ ಮೀಯತೇ ।
ಯ ಏ॒ವಂ-ವೇಁದ॑ ॥ 11 ॥

ದೇವ॑ಬರ್​ಹಿ-ಶ್ಶ॒ತವ॑ಲ್​ಶಂ॒-ವಿಁರೋ॒ಹೇತ್ಯಾ॑ಹ । ಪ್ರ॒ಜಾ ವೈ ಬ॒ರ್॒ಹಿಃ । ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ॥ ಸ॒ಹಸ್ರ॑ವಲ್​ಶಾ॒ ವಿ ವ॒ಯಗ್ಂ ರು॑ಹೇ॒ಮೇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥ ಪೃ॒ಥಿ॒ವ್ಯಾ-ಸ್ಸ॒ಪೃಞ್ಚಃ॑ ಪಾ॒ಹೀತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ॥
ಅಯು॑ಙ್ಗಾಯುಙ್ಗಾ-ನ್ಮು॒ಷ್ಟೀನ್ ಁಲು॑ನೋತಿ । ಮಿ॒ಥು॒ನ॒ತ್ವಾಯ॒ ಪ್ರಜಾ᳚ತ್ಯೈ ॥ ಸು॒ಸ॒ಭೃನ್ತಾ᳚ ತ್ವಾ॒ ಸಮ್ಭ॑ರಾ॒ಮೀತ್ಯಾ॑ಹ । ಬ್ರಹ್ಮ॑ಣೈ॒ವೈನ॒ಥ್- ಸಮ್ಭ॑ರತಿ ॥ 12 ॥

ಅದಿ॑ತ್ಯೈ॒ ರಾಸ್ನಾ॒-ಽಸೀತ್ಯಾ॑ಹ । ಇ॒ಯಂ-ವಾಁ ಅದಿ॑ತಿಃ ।
ಅ॒ಸ್ಯಾ ಏ॒ವೈನ॒-ದ್ರಾಸ್ನಾ᳚-ಙ್ಕರೋತಿ ॥ ಇ॒ನ್ದ್ರಾ॒ಣ್ಯೈ ಸ॒ನಂಹ॑ನ॒ಮಿತ್ಯಾ॑ಹ । ಇ॒ನ್ದ್ರಾ॒ಣೀ ವಾ ಅಗ್ರೇ॑ ದೇ॒ವತಾ॑ನಾ॒ಗ್ಂ॒ ಸಮ॑ನಹ್ಯತ । ಸಾ ಽಽರ್ಧ್ನೋ᳚ತ್ ।
ಋದ್ಧ್ಯೈ॒ ಸನ್ನ॑ಹ್ಯತಿ । ಪ್ರ॒ಜಾ ವೈ ಬ॒ರ್॒ಹಿಃ ।
ಪ್ರ॒ಜಾನಾ॒ಮಪ॑ರಾವಾಪಾಯ ।
ತಸ್ಮಾ॒-ಥ್ಸ್ನಾವ॑ಸನ್ತತಾಃ ಪ್ರ॒ಜಾ ಜಾ॑ಯನ್ತೇ ॥ 13 ॥

ಪೂ॒ಷಾ ತೇ᳚ ಗ್ರ॒ನ್ಥಿ-ಙ್ಗ್ರ॑ಥ್ನಾ॒ತ್ವಿತ್ಯಾ॑ಹ ।
ಪುಷ್ಟಿ॑ಮೇ॒ವ ಯಜ॑ಮಾನೇ ದಧಾತಿ ॥ ಸ ತೇ॒ ಮಾ-ಽಽ ಸ್ಥಾ॒ದಿತ್ಯಾ॒ಹಾಹಿಗ್ಂ॑ಸಾಯೈ ॥ ಪ॒ಶ್ಚಾ-ತ್ಪ್ರಾಞ್ಚ॒ಮುಪ॑ಗೂಹತಿ ।
ಪ॒ಶ್ಚಾ-ದ್ವೈ ಪ್ರಾ॒ಚೀನ॒ಗ್ಂ॒ ರೇತೋ॑ ಧೀಯತೇ ।
ಪ॒ಶ್ಚಾದೇ॒ವಾಸ್ಮೈ᳚ ಪ್ರಾ॒ಚೀನ॒ಗ್ಂ॒ ರೇತೋ॑ ದಧಾತಿ ॥
ಇನ್ದ್ರ॑ಸ್ಯ ತ್ವಾ ಬಾ॒ಹುಭ್ಯಾ॒-ಮುದ್ಯ॑ಚ್ಛ॒ ಇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ ॥
ಬೃಹ॒ಸ್ಪತೇ᳚ರ್ಮೂ॒ರ್ಧ್ನಾ ಹ॑ರಾ॒ಮೀತ್ಯಾ॑ಹ ।
ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿಃ॑ ॥ 14 ॥

ಬ್ರಹ್ಮ॑ಣೈ॒ವೈನ॑ದ್ಧರತಿ ॥ ಉ॒ರ್ವ॑ನ್ತರಿ॑ಖ್ಷ॒-ಮನ್ವಿ॒ಹೀತ್ಯಾ॑ಹ॒ ಗತ್ಯೈ᳚ ॥ ದೇ॒ವ॒ಗ॒ಮ್ಮಮ॒ಸೀತ್ಯಾ॑ಹ । ದೇ॒ವಾನೇ॒ವೈನ॑ದ್ಗಮಯತಿ ॥ ಅನ॑ಧ-ಸ್ಸಾದಯತಿ ।
ಗರ್ಭಾ॑ಣಾ॒-ನ್ಧೃತ್ಯಾ॒ ಅಪ್ರ॑ಪಾದಾಯ । ತಸ್ಮಾ॒-ದ್ಗರ್ಭಾಃ᳚ ಪ್ರ॒ಜಾನಾ॒ಮಪ್ರ॑ಪಾದುಕಾಃ । ಉ॒ಪರೀ॑ವ॒ ನಿದ॑ಧಾತಿ । ಉ॒ಪರೀ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 15 ॥
(ಸ॒ಯೋ॒ನಿ॒ತ್ವಾಯ॑ - ಸ್ವ॒ಧಾಕೃ॑ತಾ॒ - ಽಸೀತ್ಯಾ॑ಹ - ದಾಯಾ॒-ದ್- ವೇದ॑ - ಭರತಿ - ಜಾಯನ್ತೇ॒ - ಬೃಹ॒ಸ್ಪತಿಃ॒ - ಸಮ॑ಷ್ಟ್ಯೈ) (ಅ. 2)

ಅನುವಾಕಂ 3 - ದೋಹನಮ್
ಪೂ॒ರ್ವೇ॒ದ್ಯುರಿ॒ದ್ಧ್ಮಾ ಬ॒ರ್॒ಹಿಃ ಕ॑ರೋತಿ । ಯ॒ಜ್ಞಮೇ॒ವಾರಭ್ಯ॑ ಗೃಹೀ॒ತ್ವೋಪ॑ವಸತಿ ॥ ಪ್ರ॒ಜಾಪ॑ತಿ-ರ್ಯ॒ಜ್ಞಮ॑ಸೃಜತ । ತಸ್ಯೋ॒ಖೇ ಅ॑ಸ್ರಗ್ಂಸೇತಾಮ್ । ಯ॒ಜ್ಞೋ ವೈ ಪ್ರ॒ಜಾಪ॑ತಿಃ ।
ಯ-ಥ್ಸಾ᳚ನ್ನಾಯ್ಯೋ॒ಖೇ ಭವ॑ತಃ ।
ಯ॒ಜ್ಞಸ್ಯೈ॒ವ ತದು॒ಖೇ ಉಪ॑ದಧಾ॒ತ್ಯ-ಪ್ರ॑ಸ್ರಗ್ಂಸಾಯ ॥
ಶುನ್ಧ॑ದ್ಧ್ವ॒-ನ್ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯಾ॒ ಇತ್ಯಾ॑ಹ । ದೇ॒ವ॒ಯ॒ಜ್ಯಾಯಾ॑ ಏ॒ವೈನಾ॑ನಿ ಶುನ್ಧತಿ ॥ ಮಾ॒ತ॒ರಿಶ್ವ॑ನೋ ಘ॒ರ್ಮೋ॑-ಽಸೀತ್ಯಾ॑ಹ ॥ 16 ॥

ಅ॒ನ್ತರಿ॑ಖ್ಷಂ॒-ವೈಁ ಮಾ॑ತ॒ರಿಶ್ವ॑ನೋ ಘ॒ರ್ಮಃ ।
ಏ॒ಷಾಂ-ಲೋಁ॒ಕಾನಾಂ॒-ವಿಁಧೃ॑ತ್ಯೈ ॥
ದ್ಯೌರ॑ಸಿ ಪೃಥಿ॒ವ್ಯ॑ಸೀತ್ಯಾ॑ಹ । ದಿ॒ವಶ್ಚ॒ ಹ್ಯೇ॑ಷಾ ಪೃ॑ಥಿ॒ವ್ಯಾಶ್ಚ॒ ಸಮ್ಭೃ॑ತಾ । ಯದು॒ಖಾ ।
ತಸ್ಮಾ॑ದೇ॒ವಮಾ॑ಹ ॥ ವಿ॒ಶ್ವಧಾ॑ಯಾ ಅಸಿ ಪರ॒ಮೇಣ॒ ಧಾಮ್ನೇತ್ಯಾ॑ಹ । ವೃಷ್ಟಿ॒ರ್ವೈ ವಿ॒ಶ್ವಧಾ॑ಯಾಃ । ವೃಷ್ಟಿ॑ಮೇ॒ವಾವ॑ರುನ್ಧೇ । ದೃಗ್ಂಹ॑ಸ್ವ॒ ಮಾ ಹ್ವಾ॒ರಿತ್ಯಾ॑ಹ॒ ಧೃತ್ಯೈ᳚ ॥ 17 ॥

ವಸೂ॑ನಾ-ಮ್ಪ॒ವಿತ್ರ॑ಮ॒ಸೀತ್ಯಾ॑ಹ । ಪ್ರಾ॒ಣಾ ವೈ ವಸ॑ವಃ ।
ತೇಷಾಂ॒-ವಾಁ ಏ॒ತ-ದ್ಭಾ॑ಗ॒ಧೇಯ᳚ಮ್ । ಯ-ತ್ಪ॒ವಿತ್ರ᳚ಮ್ । ತೇಭ್ಯ॑ ಏ॒ವೈನ॑-ತ್ಕರೋತಿ ॥ ಶ॒ತಧಾ॑ರಗ್ಂ ಸ॒ಹಸ್ರ॑ಧಾರ॒ಮಿತ್ಯಾ॑ಹ । ಪ್ರಾ॒ಣೇಷ್ವೇ॒ವಾಯು॑-ರ್ದಧಾತಿ ಸರ್ವ॒ತ್ವಾಯ॑ ॥ ತ್ರಿ॒ವೃ-ತ್ಪ॑ಲಾಶಶಾ॒ಖಾಯಾ᳚-ನ್ದರ್ಭ॒ಮಯ॑-ಮ್ಭವತಿ । ತ್ರಿ॒ವೃದ್ವೈ ಪ್ರಾ॒ಣಃ । ತ್ರಿ॒ವೃತ॑ಮೇ॒ವ ಪ್ರಾ॒ಣ-ಮ್ಮ॑ದ್ಧ್ಯ॒ತೋ ಯಜ॑ಮಾನೇ ದಧಾತಿ ॥ 18 ॥

ಸೌ॒ಮ್ಯಃ ಪ॒ರ್ಣ-ಸ್ಸ॑ಯೋನಿ॒ತ್ವಾಯ॑ । ಸಾ॒ಖ್ಷಾ-ತ್ಪ॒ವಿತ್ರ॑-ನ್ದ॒ರ್ಭಾಃ । ಪ್ರಾಖ್ಸಾ॒ಯಮಧಿ॒ ನಿದ॑ಧಾತಿ । ತ-ತ್ಪ್ರಾ॑ಣಾಪಾ॒ನಯೋ॑ ರೂ॒ಪಮ್ । ತಿ॒ರ್ಯಕ್ಪ್ರಾ॒ತಃ । ತ-ದ್ದರ್​ಶ॑ಸ್ಯ ರೂ॒ಪಮ್ । ದಾ॒ರ್​ಶ್ಯಗ್ಗ್​ ಹ್ಯೇ॑ತದಹಃ॑ । ಅನ್ನಂ॒-ವೈಁ ಚ॒ನ್ದ್ರಮಾಃ᳚ ।
ಅನ್ನ॑-ಮ್ಪ್ರಾ॒ಣಾಃ । ಉ॒ಭಯ॑ಮೇ॒ವೋಪೈ॒ತ್ಯಜಾ॑ಮಿತ್ವಾಯ ॥ 19 ॥

ತಸ್ಮಾ॑ದ॒ಯಗ್ಂ ಸ॒ರ್ವತಃ॑ ಪವತೇ ॥ ಹು॒ತ-ಸ್ಸ್ತೋ॒ಕೋ ಹು॒ತೋ ದ್ರ॒ಫ್ಸ ಇತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ । ಹ॒ವಿಷೋ-ಽಸ್ಕ॑ನ್ದಾಯ ।
ನ ಹಿ ಹು॒ತಗ್ಗ್​ ಸ್ವಾಹಾ॑ಕೃತ॒ಗ್ಗ್॒ ಸ್ಕನ್ದ॑ತಿ ।
ದಿ॒ವಿ ನಾಕೋ॒ ನಾಮಾ॒ಗ್ನಿಃ । ತಸ್ಯ॑ ವಿ॒ಪ್ರುಷೋ॑ ಭಾಗ॒ಧೇಯ᳚ಮ್ ।
ಅ॒ಗ್ನಯೇ॑ ಬೃಹ॒ತೇ ನಾಕಾ॒ಯೇತ್ಯಾ॑ಹ ।
ನಾಕ॑ಮೇ॒ವಾಗ್ನಿ-ಮ್ಭಾ॑ಗ॒ಧೇಯೇ॑ನ॒ ಸಮ॑ರ್ಧಯತಿ ।
ಸ್ವಾಹಾ॒ ದ್ಯಾವಾ॑ಪೃಥಿ॒ವೀಭ್ಯಾ॒ಮಿತ್ಯಾ॑ಹ ।
ದ್ಯಾವಾ॑ಪೃಥಿ॒ವ್ಯೋರೇ॒ವೈನ॒ತ್-ಪ್ರತಿ॑ಷ್ಠಾಪಯತಿ ॥ 20 ॥

ಪ॒ವಿತ್ರ॑ವ॒ತ್ಯಾನ॑ಯತಿ । ಅ॒ಪಾ-ಞ್ಚೈ॒ವೌಷ॑ಧೀನಾ-ಞ್ಚ॒ ರಸ॒ಗ್ಂ॒ ಸಗ್ಂಸೃ॑ಜತಿ । ಅಥೋ॒ ಓಷ॑ಧೀಷ್ವೇ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯತಿ ॥ ಅ॒ನ್ವಾ॒ರಭ್ಯ॒ ವಾಚಂ॑-ಯಁಚ್ಛತಿ ।
ಯ॒ಜ್ಞಸ್ಯ॒ ಧೃತ್ಯೈ᳚ । ಧಾ॒ರಯ॑ನ್ನಾಸ್ತೇ । ಧಾ॒ರಯ॑ನ್ತ ಇವ॒ ಹಿ ದು॒ಹನ್ತಿ॑ । ಕಾಮ॑ಧುಖ್ಷ॒ ಇತ್ಯಾ॒ಹಾತೃ॒ತೀಯ॑ಸ್ಯೈ । ತ್ರಯ॑ ಇ॒ಮೇ ಲೋ॒ಕಾಃ । ಇ॒ಮಾನೇ॒ವ ಲೋ॒ಕಾನ್. ಯಜ॑ಮಾನೋ ದುಹೇ ॥ 21 ॥

ಅ॒ಮೂಮಿತಿ॒ ನಾಮ॑ ಗೃಹ್ಣಾತಿ । ಭ॒ದ್ರಮೇ॒ವಾಸಾ॒-ಙ್ಕರ್ಮಾ॒ವಿಷ್ಕ॑ರೋತಿ ॥ ಸಾ ವಿ॒ಶ್ವಾಯು॒-ಸ್ಸಾ ವಿ॒ಶ್ವವ್ಯ॑ಚಾ॒-ಸ್ಸಾ ವಿ॒ಶ್ವಕ॒ರ್ಮೇತ್ಯಾ॑ಹ । ಇ॒ಯಂ-ವೈಁ ವಿ॒ಶ್ವಾಯುಃ॑ ।
ಅ॒ನ್ತರಿ॑ಖ್ಷಂ-ವಿಁ॒ಶ್ವವ್ಯ॑ಚಾಃ । ಅ॒ಸೌ ವಿ॒ಶ್ವಕ॑ರ್ಮಾ ।
ಇ॒ಮಾನೇ॒ವೈತಾಭಿ॑ರ್ಲೋ॒ಕಾನ್. ಯ॑ಥಾಪೂ॒ರ್ವ-ನ್ದು॑ಹೇ ।
ಅಥೋ॒ ಯಥಾ᳚ ಪ್ರದಾ॒ತ್ರೇ ಪುಣ್ಯ॑ಮಾ॒ಶಾಸ್ತೇ᳚ । ಏ॒ವಮೇ॒ವೈನಾ॑ ಏ॒ತದುಪ॑ಸ್ತೌತಿ । ತಸ್ಮಾ॒ತ್-ಪ್ರಾದಾ॒ದಿತ್ಯು॒ನ್ನೀಯ॒ ವನ್ದ॑ಮಾನಾ ಉಪಸ್ತು॒ವನ್ತಃ॑ ಪ॒ಶೂ-ನ್ದು॑ಹನ್ತಿ ॥ 22 ॥

ಬ॒ಹು ದು॒ಗ್ಧೀನ್ದ್ರಾ॑ಯ ದೇ॒ವೇಭ್ಯೋ॑ ಹ॒ವಿರಿತಿ॒ ವಾಚಂ॒-ವಿಁಸೃ॑ಜತೇ । ಯ॒ಥಾ॒ ದೇ॒ವ॒ತಮೇ॒ವ ಪ್ರಸೌ॑ತಿ ।
ದೈವ್ಯ॑ಸ್ಯ ಚ ಮಾನು॒ಷಸ್ಯ॑ ಚ॒ ವ್ಯಾವೃ॑ತ್ತ್ಯೈ ।
ತ್ರಿರಾ॑ಹ । ತ್ರಿಷ॑ತ್ಯಾ॒ ಹಿ ದೇ॒ವಾಃ । ಅವಾ॑ಚಂ-ಯಁ॒ಮೋ-ಽನ॑ನ್ವಾ-ರ॒ಭ್ಯೋತ್ತ॑ರಾಃ । ಅಪ॑ರಿಮಿತಮೇ॒ವಾವ॑ರುನ್ಧೇ ॥
ನ ದಾ॑ರುಪಾ॒ತ್ರೇಣ॑ ದುಹ್ಯಾತ್ । ಅ॒ಗ್ನಿ॒ವದ್ವೈ ದಾ॑ರುಪಾ॒ತ್ರಮ್ ।
ಯ-ದ್ದಾ॑ರುಪಾ॒ತ್ರೇಣ॑ ದು॒ಹ್ಯಾತ್ ॥ 23 ॥

ಯಾ॒ತಯಾ᳚ಮ್ನಾ ಹ॒ವಿಷಾ॑ ಯಜೇತ । ಅಥೋ॒ ಖಲ್ವಾ॑ಹುಃ ।
ಪು॒ರೋ॒ಡಾಶ॑ಮುಖಾನಿ॒ ವೈ ಹ॒ವೀಗ್ಂಷಿ॑ । ನೇತ ಇ॑ತಃ ಪುರೋ॒ಡಾಶಗ್ಂ॑ ಹ॒ವಿಷೋ॒ ಯಾಮೋ॒-ಽಸ್ತೀತಿ॑ ।
ಕಾಮ॑ಮೇ॒ವ ದಾ॑ರುಪಾ॒ತ್ರೇಣ॑ ದುಹ್ಯಾತ್ ॥ ಶೂ॒ದ್ರ ಏ॒ವ ನ ದು॑ಹ್ಯಾತ್ । ಅಸ॑ತೋ॒ ವಾ ಏ॒ಷ ಸಮ್ಭೂ॑ತಃ । ಯಚ್ಛೂ॒ದ್ರಃ । ಅಹ॑ವಿರೇ॒ವ ತದಿತ್ಯಾ॑ಹುಃ । ಯಚ್ಛೂ॒ದ್ರೋ ದೋಗ್ಧೀತಿ॑ ॥ 24 ॥

ಅ॒ಗ್ನಿ॒ಹೋ॒ತ್ರಮೇ॒ವನ ದು॑ಹ್ಯಾಚ್ಛೂ॒ದ್ರಃ । ತದ್ಧಿ ನೋತ್-ಪು॒ನನ್ತಿ॑ । ಯ॒ದಾ ಖಲು॒ ವೈ ಪ॒ವಿತ್ರ॑ಮ॒ತ್ಯೇತಿ॑ । ಅಥ॒ ತದ್ಧ॒ವಿರಿತಿ॑ ॥
ಸಮ್ಪೃ॑ಚ್ಯದ್ಧ್ವ-ಮೃತಾವರೀ॒ರಿತ್ಯಾ॑ಹ । ಅ॒ಪಾ-ಞ್ಚೈ॒ವೌಷ॑ಧೀನಾ-ಞ್ಚ॒ ರಸ॒ಗ್ಂ॒ ಸಗ್ಂಸೃ॑ಜತಿ ।
ತಸ್ಮಾ॑ದ॒ಪಾ-ಞ್ಚೌಷ॑ಧೀನಾ-ಞ್ಚ॒ ರಸ॒ಮುಪ॑ ಜೀವಾಮಃ ।
ಮ॒ನ್ದ್ರಾ ಧನ॑ಸ್ಯ ಸಾ॒ತಯ॒ ಇತ್ಯಾ॑ಹ । ಪುಷ್ಟಿ॑ಮೇ॒ವ ಯಜ॑ಮಾನೇ ದಧಾತಿ ॥ ಸೋಮೇ॑ನ॒ ತ್ವಾ-ಽಽತ॑ನ॒ಚ್ಮೀನ್ದ್ರಾ॑ಯ॒ ದಧೀತ್ಯಾ॑ಹ ॥ 25 ॥

ಸೋಮ॑ಮೇ॒ವೈನ॑-ತ್ಕರೋತಿ । ಯೋ ವೈ ಸೋಮ॑-ಮ್ಭಖ್ಷಯಿ॒ತ್ವಾ ।
ಸಂ॒​ವಁ॒ಥ್ಸ॒ರಗ್ಂ ಸೋಮ॒-ನ್ನ ಪಿಬ॑ತಿ । ಪು॒ನ॒ರ್ಭಖ್ಷ್ಯೋ᳚-ಽಸ್ಯ ಸೋಮಪೀ॒ಥೋ ಭ॑ವತಿ ॥
ಸೋಮಃ॒ ಖಲು॒ ವೈ ಸಾ᳚ನಾಂ॒ಯ್ಯಮ್ । ಯ ಏ॒ವಂ-ವಿಁ॒ದ್ವಾನ್-ಥ್ಸಾ᳚ನಾಂ॒ಯ್ಯ-ಮ್ಪಿಬ॑ತಿ । ಅ॒ಪು॒ನ॒ರ್ಭಖ್ಷ್ಯೋ᳚-ಽಸ್ಯ ಸೋಮಪೀ॒ಥೋ ಭ॑ವತಿ । ನ ಮೃ॒ನ್ಮಯೇ॒ನಾಪಿ॑ದದ್ಧ್ಯಾತ್ ।
ಯ-ನ್ಮೃ॒ನ್ಮಯೇ॑ನಾಪಿದ॒ದ್ಧ್ಯಾತ್ ।
ಪಿ॒ತೃ॒ದೇ॒ವ॒ತ್ಯಗ್ಗ್॑ ಸ್ಯಾತ್ ॥ 26 ॥
ಅ॒ಯ॒ಸ್ಪಾ॒ತ್ರೇಣ॑ ವಾ ದಾರುಪಾ॒ತ್ರೇಣ॒ ವಾ-ಽಪಿ॑ದಧಾತಿ ।
ತದ್ಧಿ ಸದೇ॑ವಮ್ ॥ ಉ॒ದ॒ನ್ವದ್- ಭ॑ವತಿ । ಆಪೋ॒ ವೈ ರ॑ಖ್ಷೋ॒ಘ್ನೀಃ । ರಖ್ಷ॑ಸಾ॒-ಮಪ॑ಹತ್ಯೈ ॥
ಅದ॑ಸ್ತಮಸಿ॒ ವಿಷ್ಣ॑ವೇ॒ ತ್ವೇತ್ಯಾ॑ಹ । ಯ॒ಜ್ಞೋ ವೈ ವಿಷ್ಣುಃ॑ ।
ಯ॒ಜ್ಞಾಯೈ॒ವೈನ॒ದದ॑ಸ್ತ-ಙ್ಕರೋತಿ । ವಿಷ್ಣೋ॑ ಹ॒ವ್ಯಗ್ಂ ರ॑ಖ್ಷ॒ಸ್ವೇತ್ಯಾ॑ಹ॒ ಗುಪ್ತ್ಯೈ᳚ ॥ ಅನ॑ಧ-ಸ್ಸಾದಯತಿ । ಗರ್ಭಾ॑ಣಾ॒-ನ್ಧೃತ್ಯಾ॒ ಅಪ್ರ॑ಪಾದಾಯ ।
ತಸ್ಮಾ॒-ದ್ಗರ್ಭಾಃ᳚ ಪ್ರ॒ಜಾನಾ॒ಮ ಪ್ರ॑ಪಾದುಕಾಃ । ಉ॒ಪರೀ॑ವ॒ ನಿದ॑ಧಾತಿ । ಉ॒ಪರೀ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ 27 ॥
(ಅ॒ಸೀತ್ಯಾ॑ಹ॒ - ಧೃತ್ಯೈ॒ - ಯಜ॑ಮಾನೇ ದಧಾ॒ - ತ್ಯಜಾ॑ಮಿತ್ವಾಯ - ಸ್ಥಾಪಯತಿ - ದುಹೇ - ದುಹನ್ತಿ - ದು॒ಹ್ಯಾ-ದ್- ದೋಗ್ಧೀತಿ॒ - ದಧೀತ್ಯಾ॑ಹ - ಸ್ಯಾಥ್ - ಸಾದಯತಿ॒ ಪಞ್ಚ॑ ಚ) (ಅ. 3)

ಅನುವಾಕಂ 4 - ಹವಿರ್ನಿರ್ವಾಪಃ
ಕರ್ಮ॑ಣೇ ವಾ-ನ್ದೇ॒ವೇಭ್ಯ॑-ಶ್ಶಕೇಯ॒ಮಿತ್ಯಾ॑ಹ॒ ಶಕ್ತ್ಯೈ᳚ ।
ಯ॒ಜ್ಞಸ್ಯ॒ ವೈ ಸನ್ತ॑ತಿ॒ಮನು॑ ಪ್ರ॒ಜಾಃ ಪ॒ಶವೋ॒ ಯಜ॑ಮಾನಸ್ಯ॒ ಸನ್ತಾ॑ಯನ್ತೇ । ಯ॒ಜ್ಞಸ್ಯ॒ ವಿಚ್ಛಿ॑ತ್ತಿ॒ಮನು॑ ಪ್ರ॒ಜಾಃ ಪ॒ಶವೋ॒ ಯಜ॑ಮಾನಸ್ಯ॒ ವಿಚ್ಛಿ॑ದ್ಯನ್ತೇ ।
ಯ॒ಜ್ಞಸ್ಯ॒ ಸನ್ತ॑ತಿರಸಿ ಯ॒ಜ್ಞಸ್ಯ॑ ತ್ವಾ॒ ಸನ್ತ॑ತ್ಯೈ ಸ್ತೃಣಾಮಿ॒ ಸನ್ತ॑ತ್ಯೈ ತ್ವಾ ಯ॒ಜ್ಞಸ್ಯೇತ್ಯಾಹ॑ವ॒ನೀಯಾ॒-ಥ್ಸನ್ತ॑ನೋತಿ । ಯಜ॑ಮಾನಸ್ಯ ಪ್ರ॒ಜಾಯೈ॑ ಪಶೂ॒ನಾಗ್ಂ ಸನ್ತ॑ತ್ಯೈ ॥ ಅ॒ಪಃ ಪ್ರಣ॑ಯತಿ । ಶ್ರ॒ದ್ಧಾ ವಾ ಆಪಃ॑ । ಶ್ರ॒ದ್ಧಾಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ । ಅ॒ಪಃ ಪ್ರಣ॑ಯತಿ । ಯ॒ಜ್ಞೋ ವಾ ಆಪಃ॑ ॥ 28 ॥

ಯ॒ಜ್ಞಮೇ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ । ಅ॒ಪಃ ಪ್ರಣ॑ಯತಿ । ವಜ್ರೋ॒ ವಾ ಆಪಃ॑ । ವಜ್ರ॑ಮೇ॒ವ ಭ್ರಾತೃ॑ವ್ಯೇಭ್ಯಃ ಪ್ರ॒ಹೃತ್ಯ॑ ಪ್ರ॒ಣೀಯ॒ ಪ್ರಚ॑ರತಿ । ಅ॒ಪಃ ಪ್ರಣ॑ಯತಿ ।
ಆಪೋ॒ ವೈ ರ॑ಖ್ಷೋ॒ಘ್ನೀಃ । ರಖ್ಷ॑ಸಾ॒-ಮಪ॑ಹತ್ಯೈ । ಅ॒ಪಃ ಪ್ರಣ॑ಯತಿ । ಆಪೋ॒ ವೈ ದೇ॒ವಾನಾ᳚-ಮ್ಪ್ರಿ॒ಯ-ನ್ಧಾಮ॑ ।
ದೇ॒ವಾನಾ॑ಮೇ॒ವ ಪ್ರಿ॒ಯ-ನ್ಧಾಮ॑ ಪ್ರ॒ಣೀಯ॒ ಪ್ರಚ॑ರತಿ ॥ 29 ॥

ಅ॒ಪಃ ಪ್ರಣ॑ಯತಿ । ಆಪೋ॒ ವೈ ಸರ್ವಾ॑ ದೇ॒ವತಾಃ᳚ ।
ದೇ॒ವತಾ॑ ಏ॒ವಾರಭ್ಯ॑ ಪ್ರ॒ಣೀಯ॒ ಪ್ರಚ॑ರತಿ ॥ ವೇಷಾ॑ಯ॒ ತ್ವೇತ್ಯಾ॑ಹ । ವೇಷಾ॑ಯ॒ ಹ್ಯೇ॑ನದಾದ॒ತ್ತೇ ॥ ಪ್ರತ್ಯು॑ಷ್ಟ॒ಗ್ಂ॒ ರಖ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯ॒ ಇತ್ಯಾ॑ಹ ।
ರಖ್ಷ॑ಸಾ॒-ಮಪ॑ಹತ್ಯೈ ॥ ಧೂರ॒ಸೀತ್ಯಾ॑ಹ । ಏ॒ಷ ವೈ ಧುರ್ಯೋ॒-ಽಗ್ನಿಃ । ತಂ-ಯಁದನು॑ಪಸ್ಪೃಶ್ಯಾತೀ॒ಯಾತ್ ॥ 30 ॥

ಅ॒ದ್ಧ್ವ॒ರ್ಯು-ಞ್ಚ॒ ಯಜ॑ಮಾನ-ಞ್ಚ॒ ಪ್ರದ॑ಹೇತ್ । ಉ॒ಪ॒ಸ್ಪೃಶ್ಯಾತ್ಯೇ॑ತಿ । ಅ॒ದ್ಧ್ವ॒ರ್ಯೋಶ್ಚ॒ ಯಜ॑ಮಾನಸ್ಯ॒ ಚಾಪ್ರ॑ದಾಹಾಯ ॥ ಧೂರ್ವ॒ ತಂ​ಯೋಁ᳚-ಽಸ್ಮಾ-ನ್ಧೂರ್ವ॑ತಿ॒ ತ-ನ್ಧೂ᳚ರ್ವ॒ ಯಂ-ವಁ॒ಯ-ನ್ಧೂರ್ವಾ॑ಮ॒ ಇತ್ಯಾ॑ಹ ।
ದ್ವೌ ವಾವ ಪುರು॑ಷೌ । ಯ-ಞ್ಚೈ॒ವ ಧೂರ್ವ॑ತಿ । ಯಶ್ಚೈ॑ನ॒-ನ್ಧೂರ್ವ॑ತಿ । ತಾವು॒ಭೌ ಶು॒ಚಾ-ಽರ್ಪ॑ಯತಿ ॥ ತ್ವ-ನ್ದೇ॒ವಾನಾ॑ಮಸಿ॒ ಸಸ್ನಿ॑ತಮ॒-ಮ್ಪಪ್ರಿ॑ತಮ॒-ಞ್ಜುಷ್ಟ॑ತಮಂ॒-ವಁಹ್ನಿ॑ತಮ-ನ್ದೇವ॒ಹೂತ॑ಮ॒ಮಿತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈ ತತ್ ॥ 31 ॥

ಅಹ್ರು॑ತಮಸಿ ಹವಿ॒ರ್ಧಾನ॒-ಮಿತ್ಯಾ॒ಹಾನಾ᳚ರ್ತ್ಯೈ ।
ದೃಗ್ಂಹ॑ಸ್ವ॒ ಮಾ ಹ್ವಾ॒ರಿತ್ಯಾ॑ಹ॒ ಧೃತ್ಯೈ᳚ ॥
ಮಿ॒ತ್ರಸ್ಯ॑ ತ್ವಾ॒ ಚಖ್ಷು॑ಷಾ॒ ಪ್ರೇಖ್ಷ॒ ಇತ್ಯಾ॑ಹ ಮಿತ್ರ॒ತ್ವಾಯ॑ ।
ಮಾ ಭೇರ್ಮಾ ಸಂ​ವಿಁ॑ಕ್ಥಾ॒ ಮಾ ತ್ವಾ॑ ಹಿಗ್ಂಸಿಷ॒-ಮಿತ್ಯಾ॒ಹಾಹಿಗ್ಂ॑ಸಾಯೈ । ಯದ್ವೈ ಕಿ-ಞ್ಚ॒ ವಾತೋ॒ ನಾಭಿ॒ವಾತಿ॑ ।
ತ-ಥ್ಸರ್ವಂ॑-ವಁರುಣದೇವ॒ತ್ಯ᳚ಮ್ ॥ ಉ॒ರು ವಾತಾ॒ಯೇತ್ಯಾ॑ಹ । ಅವಾ॑ರುಣಮೇ॒ವೈನ॑-ತ್ಕರೋತಿ ॥ ದೇ॒ವಸ್ಯ॑ ತ್ವಾ ಸವಿ॒ತುಃ

ಪ್ರ॑ಸ॒ವ ಇತ್ಯಾ॑ಹ॒ ಪ್ರಸೂ᳚ತ್ಯೈ ।
ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹ ॥ 32 ॥

ಅ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ᳚ । ಅ॒ಗ್ನಯೇ॒ ಜುಷ್ಟ॒-ನ್ನಿರ್ವ॑ಪಾ॒ಮೀತ್ಯಾ॑ಹ । ಅ॒ಗ್ನಯ॑ ಏ॒ವೈನಾ॒ಞ್ಜುಷ್ಟಂ॒
ನಿರ್ವ॑ಪತಿ । ತ್ರಿರ್ಯಜು॑ಷಾ । ತ್ರಯ॑ ಇ॒ಮೇ ಲೋ॒ಕಾಃ ।
ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ᳚ । ತೂ॒ಷ್ಣೀ-ಞ್ಚ॑ತು॒ರ್ಥಮ್ ।
ಅಪ॑ರಿಮಿತಮೇ॒ವಾವ॑ರುನ್ಧೇ । ಸ ಏ॒ವಮೇ॒ವಾನು॑ಪೂ॒ರ್ವಗ್ಂ ಹ॒ವೀಗ್ಂಷಿ॒ ನಿರ್ವ॑ಪತಿ ॥ 33 ॥

ಇ॒ದ-ನ್ದೇ॒ವಾನಾ॑ಮಿ॒ದಮು॑ ನ-ಸ್ಸ॒ಹೇತ್ಯಾ॑ಹ॒ ವ್ಯಾವೃ॑ತ್ತ್ಯೈ ॥
ಸ್ಫಾ॒ತ್ಯೈ ತ್ವಾ॒ ನಾರಾ᳚ತ್ಯಾ॒ ಇತ್ಯಾ॑ಹ॒ ಗುಪ್ತ್ಯೈ᳚ । ತಮ॑ಸೀವ॒ ವಾ ಏ॒ಷೋ᳚-ಽನ್ತಶ್ಚ॑ರತಿ । ಯಃ ಪ॑ರೀ॒ಣಹಿ॑ ॥ ಸುವ॑ರ॒ಭಿ ವಿಖ್ಯೇ॑ಷಂ-ವೈಁಶ್ವಾನ॒ರ-ಞ್ಜ್ಯೋತಿ॒ರಿತ್ಯಾ॑ಹ ।
ಸುವ॑ರೇ॒ವಾಭಿ ವಿ ಪ॑ಶ್ಯತಿ ವೈಶ್ವಾನ॒ರ-ಞ್ಜ್ಯೋತಿಃ॑ ।
ದ್ಯಾವಾ॑ಪೃಥಿ॒ವೀ ಹ॒ವಿಷಿ॑ ಗೃಹೀ॒ತ ಉದ॑ವೇಪೇತಾಮ್ ॥
ದೃಗ್ಂಹ॑ನ್ತಾ॒-ನ್ದುರ್ಯಾ॒ ದ್ಯಾವಾ॑ಪೃಥಿ॒ವ್ಯೋರಿತ್ಯಾ॑ಹ ।
ಗೃ॒ಹಾಣಾ॒-ನ್ದ್ಯಾವಾ॑ಪೃಥಿ॒ವ್ಯೋ-ರ್ಧೃತ್ಯೈ᳚ ॥
ಉ॒ರ್ವ॑ನ್ತರಿ॑ಖ್ಷ॒-ಮನ್ವಿ॒ಹೀತ್ಯಾ॑ಹ॒ ಗತ್ಯೈ᳚ ॥
ಅದಿ॑ತ್ಯಾಸ್ತ್ವೋ॒ಪಸ್ಥೇ॑ ಸಾದಯಾ॒ಮೀತ್ಯಾ॑ಹ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾ ಏ॒ವೈನ॑ದು॒ಪಸ್ಥೇ॑ ಸಾದಯತಿ ॥
ಅಗ್ನೇ॑ ಹ॒ವ್ಯಗ್ಂ ರ॑ಖ್ಷ॒ಸ್ವೇತ್ಯಾ॑ಹ॒ ಗುಪ್ತ್ಯೈ᳚ ॥ 34 ॥
(ಯ॒ಜ್ಞೋ ವಾ ಆಪೋ॒ - ಧಾಮ॑ ಪ್ರ॒ಣೀಯ॒ ಪ್ರಚ॑ರ - ತ್ಯತೀ॒ಯಾ - ದೇ॒ತ-ದ್- ಬಾ॒ಹುಭ್ಯಾ॒ಮಿತ್ಯಾ॑ಹ - ಹ॒ವಿಗ್ಂಷಿ॒ ನಿರ್ವ॑ಪತಿ॒ - ಗತ್ಯೈ॑ ಚ॒ತ್ವಾರಿ॑ ಚ) (ಅ. 4)

ಅನುವಾಕಂ 5 - ವ್ರೀಹ್ಯವಘಾತಃ
ಇನ್ದ್ರೋ॑ ವೃ॒ತ್ರಮ॑ಹನ್ನ್ । ಸೋ॑-ಽಪಃ । ಅ॒ಭ್ಯ॑ಮ್ರಿಯತ ।
ತಾಸಾಂ॒-ಯಁನ್ಮೇದ್ಧ್ಯಂ॑-ಯಁ॒ಜ್ಞಿಯ॒ಗ್ಂ॒ ಸದೇ॑ವ॒ಮಾಸೀ᳚ತ್ । ತದಪೋದ॑ಕ್ರಾಮತ್ । ತೇ ದ॒ರ್ಭಾ ಅ॑ಭವನ್ನ್ । ಯ-ದ್ದ॒ರ್ಭೈರ॒ಪ ಉ॑ತ್ಪು॒ನಾತಿ॑ । ಯಾ ಏ॒ವ ಮೇದ್ಧ್ಯಾ॑ ಯ॒ಜ್ಞಿಯಾ॒-ಸ್ಸದೇ॑ವಾ॒ ಆಪಃ॑ । ತಾಭಿ॑ರೇ॒ವೈನಾ॒ ಉತ್ಪು॑ನಾತಿ । ದ್ವಾಭ್ಯಾ॒ಮುತ್ಪು॑ನಾತಿ ॥ 35 ॥

ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ ॥ ದೇ॒ವೋ ವ॑-ಸ್ಸವಿ॒ತೋತ್-ಪು॑ನಾ॒ತ್ವಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವೈನಾ॒ ಉತ್ಪು॑ನಾತಿ । ಅಚ್ಛಿ॑ದ್ರೇಣ ಪ॒ವಿತ್ರೇ॒ಣೇತ್ಯಾ॑ಹ । ಅ॒ಸೌ ವಾ ಆ॑ದಿ॒ತ್ಯೋ-ಽಚ್ಛಿ॑ದ್ರ-ಮ್ಪ॒ವಿತ್ರ᳚ಮ್ । ತೇನೈ॒ವೈನಾ॒ ಉತ್ಪು॑ನಾತಿ । ವಸೋ॒-ಸ್ಸೂರ್ಯ॑ಸ್ಯ ರ॒ಶ್ಮಿಭಿ॒ರಿತ್ಯಾ॑ಹ । ಪ್ರಾ॒ಣಾ ವಾ ಆಪಃ॑ । ಪ್ರಾ॒ಣಾ ವಸ॑ವಃ । ಪ್ರಾ॒ಣಾ ರ॒ಶ್ಮಯಃ॑ ॥ 36 ॥

ಪ್ರಾ॒ಣೈರೇ॒ವ ಪ್ರಾ॒ಣಾನ್-ಥ್ಸಮ್ಪೃ॑ಣಕ್ತಿ । ಸಾ॒ವಿ॒ತ್ರಿ॒ಯರ್ಚಾ ।
ಸ॒ವಿ॒ತೃಪ್ರ॑ಸೂತ-ಮ್ಮೇ॒ ಕರ್ಮಾ॑ಸ॒ದಿತಿ॑ ।
ಸ॒ವಿ॒ತೃಪ್ರ॑ಸೂತಮೇ॒ವಾಸ್ಯ॒ ಕರ್ಮ॑ ಭವತಿ ।
ಪ॒ಚ್ಛೋ ಗಾ॑ಯತ್ರಿ॒ಯಾ ತ್ರಿ॑ಷ್ಷಮೃದ್ಧ॒ತ್ವಾಯ॑ ॥
ಆಪೋ॑ ದೇವೀರಗ್ರೇಪುವೋ ಅಗ್ರೇಗುವ॒ ಇತ್ಯಾ॑ಹ ।
ರೂ॒ಪ-ಮೇ॒ವಾಸಾ॑ಮೇ॒ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ।
ಅಗ್ರ॑ ಇ॒ಮಂ-ಯಁ॒ಜ್ಞ-ನ್ನ॑ಯ॒ತಾಗ್ರೇ॑
ಯ॒ಜ್ಞಪ॑ತಿ॒ಮಿತ್ಯಾ॑ಹ । ಅಗ್ರೇ॑ ಏ॒ವ ಯ॒ಜ್ಞ-ನ್ನ॑ಯನ್ತಿ ।
ಅಗ್ರೇ॑ ಯ॒ಜ್ಞಪ॑ತಿಮ್ ॥ 37 ॥

ಯು॒ಷ್ಮಾನಿನ್ದ್ರೋ॑ ಽವೃಣೀತ ವೃತ್ರ॒ತೂಯೇ॑ ಯೂ॒ಯಮಿನ್ದ್ರ॑ಮವೃಣೀದ್ಧ್ವಂ-ವೃಁತ್ರ॒ತೂರ್ಯ॒ ಇತ್ಯಾ॑ಹ ।
ವೃ॒ತ್ರಗ್ಂ ಹ॑ ಹನಿ॒ಷ್ಯನ್ನಿನ್ದ್ರ॒ ಆಪೋ॑ ವವ್ರೇ ।
ಆಪೋ॒ ಹೇನ್ದ್ರಂ॑-ವಁವ್ರಿರೇ । ಸ॒ಜ್ಞಾಂ-ಮೇ॒ವಾಸಾ॑ಮೇ॒ತ-ಥ್ಸಾಮಾ॑ನಂ॒-ವ್ಯಾಁಚ॑ಷ್ಟೇ ॥ ಪ್ರೋಖ್ಷಿ॑ತಾ॒-ಸ್ಸ್ಥೇತ್ಯಾ॑ಹ । ತೇನಾಪಃ॒ ಪ್ರೋಖ್ಷಿ॑ತಾಃ ॥ ಅ॒ಗ್ನಯೇ॑ ವೋ॒ ಜುಷ್ಟ॒-ಮ್ಪ್ರೋಖ್ಷಾ᳚-ಮ್ಯ॒ಗ್ನೀಷೋಮಾ᳚ಭ್ಯಾ॒-ಮಿತ್ಯಾ॑ಹ ।
ಯ॒ಥಾ॒ ದೇ॒ವ॒ತಮೇ॒ವೈನಾ॒-ನ್ಪ್ರೋಖ್ಷ॑ತಿ । ತ್ರಿಃ ಪ್ರೋಖ್ಷ॑ತಿ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ ॥ 38 ॥

ಅಥೋ॒ ರಖ್ಷ॑ಸಾ॒ಮಪ॑ಹತ್ಯೈ । ಶುನ್ಧ॑ದ್ಧ್ವಂ॒
ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯಾ॒ ಇತ್ಯಾ॑ಹ ।
ದೇ॒ವ॒ಯ॒ಜ್ಯಾಯಾ॑ ಏ॒ವೈನಾ॑ನಿ ಶುನ್ಧತಿ । ತ್ರಿಃ ಪ್ರೋಖ್ಷ॑ತಿ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ । ಅಥೋ॑ ಮೇದ್ಧ್ಯ॒ತ್ವಾಯ॑ । ಅವ॑ಧೂತ॒ಗ್ಂ॒ ರಖ್ಷೋ-ಽವ॑ಧೂತಾ॒ ಅರಾ॑ತಯ॒ ಇತ್ಯಾ॑ಹ ।
ರಖ್ಷ॑ಸಾ॒-ಮಪ॑ಹತ್ಯೈ । ಅದಿ॑ತ್ಯಾ॒ಸ್ತ್ವಗ॒ಸೀತ್ಯಾ॑ಹ । ಇ॒ಯಂ-ವಾಁ ಅದಿ॑ತಿಃ ॥ 39 ॥

ಅ॒ಸ್ಯಾ ಏ॒ವೈನ॒-ತ್ತ್ವಚ॑-ಙ್ಕರೋತಿ । ಪ್ರತಿ॑ ತ್ವಾ ಪೃಥಿ॒ವೀ ವೇ॒ತ್ತ್ವಿತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ॥ ಪು॒ರಸ್ತಾ᳚-ತ್ಪ್ರತೀ॒ಚೀನ॑ಗ್ರೀವ॒-ಮುತ್ತ॑ರಲೋ॒ಮೋಪ॑ಸ್ತೃಣಾತಿ ಮೇದ್ಧ್ಯ॒ತ್ವಾಯ॑ ।
ತಸ್ಮಾ᳚-ತ್ಪು॒ರಸ್ತಾ᳚-ತ್ಪ್ರ॒ತ್ಯಞ್ಚಃ॑ ಪ॒ಶವೋ॒ ಮೇಧ॒ಮುಪ॑ತಿಷ್ಠನ್ತೇ । ತಸ್ಮಾ᳚-ತ್ಪ್ರ॒ಜಾ ಮೃ॒ಗ-ಙ್ಗ್ರಾಹು॑ಕಾಃ । ಯ॒ಜ್ಞೋ ದೇ॒ವೇಭ್ಯೋ॒ ನಿಲಾ॑ಯತ ।
ಕೃಷ್ಣೋ॑ ರೂ॒ಪ-ಙ್ಕೃ॒ತ್ವಾ । ಯ-ತ್ಕೃ॑ಷ್ಣಾಜಿ॒ನೇ ಹ॒ವಿರ॑ದ್ಧ್ಯವ॒ಹನ್ತಿ॑ । ಯ॒ಜ್ಞಾದೇ॒ವ-ತ-ದ್ಯ॒ಜ್ಞ-ಮ್ಪ್ರಯು॑ಙ್ಕ್ತೇ । ಹ॒ವಿಷೋ-ಽಸ್ಕ॑ನ್ದಾಯ ॥ 40 ॥

ಅ॒ಧಿ॒ಷವ॑ಣಮಸಿ ವಾನಸ್ಪ॒ತ್ಯಮಿತ್ಯಾ॑ಹ । ಅ॒ಧಿ॒ಷವ॑ಣ-ಮೇ॒ವೈನ॑-ತ್ಕರೋತಿ । ಪ್ರತಿ॒ ತ್ವಾ-ಽದಿ॑ತ್ಯಾ॒ಸ್ತ್ವಗ್ವೇ॒ತ್ತ್ವಿತ್ಯಾ॑ಹ ಸಯ॒ತ್ವಾಯ॑ ॥
ಅ॒ಗ್ನೇಸ್ತ॒ನೂ-ರ॒ಸೀತ್ಯಾ॑ಹ । ಅ॒ಗ್ನೇರ್ವಾ ಏ॒ಷಾ ತ॒ನೂಃ ।
ಯದೋಷ॑ಧಯಃ । ವಾ॒ಚೋ ವಿ॒ಸರ್ಜ॑ನ॒ಮಿತ್ಯಾ॑ಹ ।
ಯ॒ದಾ ಹಿ ಪ್ರ॒ಜಾ ಓಷ॑ಧೀನಾ-ಮ॒ಶ್ನನ್ತಿ॑ । ಅಥ॒ ವಾಚಂ॒-ವಿಁಸೃ॑ಜನ್ತೇ । ದೇ॒ವವೀ॑ತಯೇ ತ್ವಾ ಗೃಹ್ಣಾ॒ಮೀತ್ಯಾ॑ಹ ॥ 41 ॥

ದೇ॒ವತಾ॑ಭಿರೇ॒ವೈನ॒-ಥ್ಸಮ॑ರ್ಧಯತಿ ॥
ಅದ್ರಿ॑ರಸಿ ವಾನಸ್ಪ॒ತ್ಯ ಇತ್ಯಾ॑ಹ । ಗ್ರಾವಾ॑ಣ-ಮೇ॒ವೈನ॑-ತ್ಕರೋತಿ ।
ಸ ಇ॒ದ-ನ್ದೇ॒ವೇಭ್ಯೋ॑ ಹ॒ವ್ಯಗ್ಂ ಸು॒ಶಮಿ॑ ಶಮಿ॒ಷ್ವೇತ್ಯಾ॑ಹ॒ ಶಾನ್ತ್ಯೈ᳚ ॥ ಹವಿ॑ಷ್ಕೃ॒ದೇಹೀತ್ಯಾ॑ಹ ।
ಯ ಏ॒ವ ದೇ॒ವಾನಾಗ್ಂ॑ ಹವಿ॒ಷ್ಕೃತಃ॑ । ತಾನ್. ಹ್ವ॑ಯತಿ ।
ತ್ರಿರ್​ಹ್ವ॑ಯತಿ । ತ್ರಿಷ॑ತ್ಯಾ॒ ಹಿ ದೇ॒ವಾಃ ॥ ಇಷ॒ಮಾ ವ॒ದೋರ್ಜ॒ಮಾ ವ॒ದೇತ್ಯಾ॑ಹ ॥ 42 ॥

ಇಷ॑ಮೇ॒ವೋರ್ಜಂ॒-ಯಁಜ॑ಮಾನೇ ದಧಾತಿ ।
ದ್ಯು॒ಮದ್ವ॑ದತ ವ॒ಯಗ್ಂ ಸ॑ಘಾ॒ನ್ತ-ಞ್ಜೇ॒ಷ್ಮೇತ್ಯಾ॑ಹ॒ ಭ್ರಾತೃ॑ವ್ಯಾಭಿಭೂತ್ಯೈ ॥ ಮನೋ᳚-ಶ್ಶ್ರ॒ದ್ಧಾದೇ॑ವಸ್ಯ॒ ಯಜ॑ಮಾನಸ್ಯಾಸುರ॒ಘ್ನೀ ವಾಕ್ । ಯ॒ಜ್ಞಾ॒ಯು॒ಧೇಷು॒ ಪ್ರವಿ॑ಷ್ಟಾ-ಽಽಸೀತ್ । ತೇ-ಽಸು॑ರಾ॒ ಯಾವ॑ನ್ತೋ ಯಜ್ಞಾಯು॒ಧಾನಾ॑ಮು॒ದ್ವದ॑ತಾ-ಮು॒ಪಾಶೃ॑ಣ್ವನ್ನ್ ।
ತೇ ಪರಾ॑-ಽಭವನ್ನ್ । ತಸ್ಮಾ॒-ಥ್ಸ್ವಾನಾ॒-ಮ್ಮದ್ಧ್ಯೇ॑-ಽವ॒ಸಾಯ॑ ಯಜೇತ । ಯಾವ॑ನ್ತೋ-ಽಸ್ಯ॒ ಭ್ರಾತೃ॑ವ್ಯಾ ಯಜ್ಞಾಯು॒ಧಾನಾ॑-ಮು॒ದ್ವದ॑ತಾ-ಮುಪಶೃ॒ಣ್ವನ್ತಿ॑ । ತೇ ಪರಾ॑ ಭವನ್ತಿ ।
ಉ॒ಚ್ಚೈ-ಸ್ಸ॒ಮಾಹ॑ನ್ತ॒ವಾ ಆ॑ಹ॒ ವಿಜಿ॑ತ್ಯೈ ॥ 43 ॥

ವೃ॒ಙ್ಕ್ತ ಏ॑ಷಾಮಿನ್ದ್ರಿ॒ಯಂ-ವೀಁ॒ರ್ಯ᳚ಮ್ । ಶ್ರೇಷ್ಠ॑ ಏಷಾ-ಮ್ಭವತಿ ॥ ವ॒ರ್॒ಷ ವೃ॑ದ್ಧಮಸಿ॒ ಪ್ರತಿ॑ ತ್ವಾ ವ॒ರ್॒ಷವೃ॑ದ್ಧಂ-ವೇಁ॒ತ್ತ್ವಿತ್ಯಾ॑ಹ ।
ವ॒ರ್॒ಷವೃ॑ದ್ಧಾ॒ ವಾ ಓಷ॑ಧಯಃ ।
ವ॒ರ್॒ಷವೃ॑ದ್ಧಾ ಇ॒ಷೀಕಾ॒-ಸ್ಸಮೃ॑ದ್ಧ್ಯೈ ।
ಯ॒ಜ್ಞಗ್ಂ ರಖ್ಷಾ॒ಗ್॒ಸ್ಯನು॒ ಪ್ರಾವಿ॑ಶನ್ನ್ ।
ತಾನ್ಯ॒ಸ್ನಾ ಪ॒ಶುಭ್ಯೋ॑ ನಿ॒ರವಾ॑ದಯನ್ತ ।
ತುಷೈ॒ರೋಷ॑ಧೀಭ್ಯಃ ॥ ಪರಾ॑ಪೂತ॒ಗ್ಂ॒ ರಖ್ಷಃ॒ ಪರಾ॑ಪೂತಾ॒ ಅರಾ॑ತಯ॒ ಇತ್ಯಾ॑ಹ ।
ರಖ್ಷ॑ಸಾ॒ಮಪ॑ಹತ್ಯೈ ॥ 44 ॥

ರಖ್ಷ॑ಸಾ-ಮ್ಭಾ॒ಗೋ॑-ಽಸೀತ್ಯಾ॑ಹ । ತುಷೈ॑ರೇ॒ವ ರಖ್ಷಾಗ್ಂ॑ಸಿ ನಿ॒ರವ॑ದಯತೇ । ಅ॒ಪ ಉಪ॑ಸ್ಪೃಶತಿ ಮೇದ್ಧ್ಯ॒ತ್ವಾಯ॑ । ವಾ॒ಯುರ್ವೋ॒ ವಿ ವಿ॑ನ॒ಕ್ತ್ವಿತ್ಯಾ॑ಹ । ಪ॒ವಿತ್ರಂ॒-ವೈಁ ವಾ॒ಯುಃ । ಪು॒ನಾತ್ಯೇ॒ವೈನಾನ್॑ । ಅ॒ನ್ತರಿ॑ಖ್ಷಾದಿವ॒ ವಾ ಏ॒ತೇ ಪ್ರಸ್ಕ॑ನ್ದನ್ತಿ । ಯೇ ಶೂರ್ಪಾ᳚ತ್ । ದೇ॒ವೋ ವ॑-ಸ್ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ಗೃಹ್ಣಾ॒ತ್ವಿತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ।
ಹ॒ವಿಷೋ-ಽಸ್ಕ॑ನ್ದಾಯ । ತ್ರಿಷ್ಫ॒ಲೀಕ॑ರ್ತ॒ವಾ ಆ॑ಹ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ । ಅಥೋ॑ ಮೇದ್ಧ್ಯ॒ತ್ವಾಯ॑ ॥ 45 ॥
(ದ್ವಾಭ್ಯಾ॒ಮು-ತ್ಪು॑ನಾತಿ - ರ॒ಶ್ಮಯೋ॑ - ನಯ॒ನ್ತ್ಯಗ್ರೇ॑ ಯ॒ಜ್ಞಪ॑ತಿಂ - ಁಯ॒ಜ್ಞೋ - ಽದಿ॑ತಿ॒ - ರಸ್ಕ॑ನ್ದಾಯ - ಗೃಹ್ಣಾ॒ಮೀತ್ಯಾ॑ಹ - ವ॒ದೇತ್ಯಾ॑ಹ॒ - ವಿಜಿ॑ತ್ಯಾ॒ - ಅಪ॑ಹತ್ಯಾ॒ - ಅಸ್ಕ॑ನ್ದಾಯ॒ ತ್ರೀಣಿ॑ ಚ) (ಅ. 5)

ಅನುವಾಕಂ 6 - ತಣ್ಡುಲಪೇಷಣಮ್
ಅವ॑ಧೂತ॒ಗ್ಂ॒ ರಖ್ಷೋ-ಽವ॑ಧೂತಾ॒ ಅರಾ॑ತಯ॒ ಇತ್ಯಾ॑ಹ । ರಖ್ಷ॑ಸಾ॒ಮಪ॑ಹತ್ಯೈ । ಅದಿ॑ತ್ಯಾ॒ಸ್ತ್ವಗ॒ಸೀತ್ಯಾ॑ಹ । ಇ॒ಯಂ-ವಾಁ ಅದಿ॑ತಿಃ । ಅ॒ಸ್ಯಾ ಏ॒ವೈನ॒-ತ್ತ್ವಚ॑-ಙ್ಕರೋತಿ । ಪ್ರತಿ॑ ತ್ವಾ ಪೃಥಿ॒ವೀ ವೇ॒ತ್ತ್ವಿತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ।
ಪು॒ರಸ್ತಾ᳚-ತ್ಪ್ರತೀ॒ಚೀನ॑ಗ್ರೀವ॒-ಮುತ್ತ॑ರಲೋ॒ಮೋಪ॑ಸ್ತೃಣಾತಿ ಮೇದ್ಧ್ಯ॒ತ್ವಾಯ॑ । ತಸ್ಮಾ᳚-ತ್ಪು॒ರಸ್ತಾ᳚-ತ್ಪ್ರ॒ತ್ಯಞ್ಚಃ॑ ಪ॒ಶವೋ॒ ಮೇಧ॒ಮುಪ॑ತಿಷ್ಠನ್ತೇ । ತಸ್ಮಾ᳚-ತ್ಪ್ರ॒ಜಾ ಮೃ॒ಗ-ಙ್ಗ್ರಾಹು॑ಕಾಃ । ಯ॒ಜ್ಞೋ ದೇ॒ವೇಭ್ಯೋ॒ ನಿಲಾ॑ಯತ ॥ 46 ॥

ಕೃಷ್ಣೋ॑ ರೂ॒ಪ-ಙ್ಕೃ॒ತ್ವಾ । ಯ-ತ್ಕೃ॑ಷ್ಣಾಜಿ॒ನೇ ಹ॒ವಿರ॑ಧಿಪಿ॒ನಷ್ಟಿ॑ । ಯ॒ಜ್ಞಾದೇ॒ವ ತ-ದ್ಯ॒ಜ್ಞ-ಮ್ಪ್ರಯು॑ಙ್ಕ್ತೇ । ಹ॒ವಿಷೋ-ಽಸ್ಕ॑ನ್ದಾಯ ॥ ದ್ಯಾವಾ॑ಪೃಥಿ॒ವೀ ಸ॒ಹಾಸ್ತಾ᳚ಮ್ । ತೇ ಶ॑ಮ್ಯಾಮಾ॒ತ್ರಮೇಕ॒ಮಹ॒ರ್ವ್ಯೈತಾಗ್ಂ॑ ಶಮ್ಯಾಮಾ॒ತ್ರಮೇಕ॒ಮಹಃ॑ ॥ ದಿ॒ವ-ಸ್ಸ್ಕ॑ಮ್ಭ॒ನಿರ॑ಸಿ॒ ಪ್ರತಿ॒ ತ್ವಾ ಽದಿ॑ತ್ಯಾ॒ಸ್ತ್ವಗ್ವೇ॒ತ್ತ್ವಿತ್ಯಾ॑ಹ ।
ದ್ಯಾವಾ॑ಪೃಥಿ॒ವ್ಯೋ-ರ್ವೀತ್ಯೈ᳚ । ಧಿ॒ಷಣಾ॑-ಽಸಿ ಪರ್ವ॒ತ್ಯಾ
ಪ್ರತಿ॑ ತ್ವಾ ದಿ॒ವ-ಸ್ಸ್ಕ॑ಮ್ಭ॒ನಿರ್ವೇ॒ತ್ತ್ವಿತ್ಯಾ॑ಹ ।
ದ್ಯಾವಾ॑ಪೃಥಿ॒ವ್ಯೋ-ರ್ವಿಧೃ॑ತ್ಯೈ ॥ 47 ॥

ಧಿ॒ಷಣಾ॑-ಽಸಿ ಪಾರ್ವತೇ॒ಯೀ ಪ್ರತಿ॑ ತ್ವಾ ಪರ್ವ॒ತಿರ್ವೇ॒ತ್ತ್ವಿತ್ಯಾ॑ಹ । ದ್ಯಾವಾ॑ಪೃಥಿ॒ವ್ಯೋರ್ಧೃತ್ಯೈ᳚ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ॒ ಪ್ರಸೂ᳚ತ್ಯೈ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹ । ಅ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚ಮ್ । ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ᳚ ।
ಅಧಿ॑ವಪಾ॒ಮೀತ್ಯಾ॑ಹ । ಯ॒ಥಾ॒ದೇ॒ವ॒ತ-ಮೇ॒ವೈನಾ॒ನಧಿ॑ ವಪತಿ ॥ ಧಾ॒ನ್ಯ॑ಮಸಿ ಧಿನು॒ಹಿ ದೇ॒ವಾನಿತ್ಯಾ॑ಹ । ಏ॒ತಸ್ಯ॒ ಯಜು॑ಷೋ ವೀ॒ರ್ಯೇ॑ಣ ॥ 48 ॥

ಯಾವ॒ದೇಕಾ॑ ದೇ॒ವತಾ॑ ಕಾ॒ಮಯ॑ತೇ॒ ಯಾವ॒ದೇಕಾ᳚ । ತಾವ॒ದಾಹು॑ತಿಃ ಪ್ರಥತೇ । ನ ಹಿ ತದಸ್ತಿ॑ । ಯತ್ತಾವ॑ದೇ॒ವ ಸ್ಯಾತ್ । ಯಾವ॑ಜ್ಜು॒ಹೋತಿ॑ ॥ ಪ್ರಾ॒ಣಾಯ॑ ತ್ವಾ-ಽಪಾ॒ನಾಯ॒ ತ್ವೇತ್ಯಾ॑ಹ । ಪ್ರಾ॒ಣಾನೇ॒ವ ಯಜ॑ಮಾನೇ ದಧಾತಿ । ದೀ॒ರ್ಘಾಮನು॒ ಪ್ರಸಿ॑ತಿ॒ಮಾಯು॑ಷೇ ಧಾ॒ಮಿತ್ಯಾ॑ಹ । ಆಯು॑ರೇ॒ವಾಸ್ಮಿ॑-ನ್ದಧಾತಿ ।
ಅ॒ನ್ತರಿ॑ಖ್ಷಾದಿವ॒ ವಾ ಏ॒ತಾನಿ॒ ಪ್ರಸ್ಕ॑ನ್ದನ್ತಿ । ಯಾನಿ॑ ದೃ॒ಷದಃ॑ । ದೇ॒ವೋ ವ॑-ಸ್ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ ಗೃಹ್ಣಾ॒ತ್ವಿತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ । ಹ॒ವಿಷೋ-ಽಸ್ಕ॑ನ್ದಾಯ ॥
ಅಸಂ॑​ವಁಪನ್ತೀ ಪಿಗ್ಂ॑ಷಾ॒ಣೂನಿ॑ ಕುರುತಾ॒ದಿತ್ಯಾ॑ಹ ಮೇದ್ಧ್ಯ॒ತ್ವಾಯ॑ ॥ 49 ॥
(ನಿಲಾ॑ಯತ॒ - ವಿಧೃ॑ತ್ಯೈ - ವೀ॒ರ್ಯೇ॑ಣ - ಸ್ಕನ್ದನ್ತಿ ಚ॒ತ್ವಾರಿ॑ ಚ ) (ಅ. 6)

ಅನುವಾಕಂ 7 - ಕಪಾಲೋಪಧಾನಮ್
ಧೃಷ್ಟಿ॑ರಸಿ॒ ಬ್ರಹ್ಮ॑ ಯ॒ಚ್ಛೇತ್ಯಾ॑ಹ॒ ಧೃತ್ಯೈ᳚ ॥
ಅಪಾ᳚ಗ್ನೇ॒ ಽಗ್ನಿಮಾ॒ಮಾದ॑-ಞ್ಜಹಿ॒ ನಿಷ್ಕ್ರ॒ವ್ಯಾದಗ್ಂ॑
ಸೇ॒ಧಾ ದೇ॑ವ॒ಯಜಂ॑-ವಁ॒ಹೇತ್ಯಾ॑ಹ ।
ಯ ಏ॒ವಾಮಾತ್ಕ್ರ॒ವ್ಯಾತ್ । ತಮ॑ಪ॒ಹತ್ಯ॑ । ಮೇದ್ಧ್ಯೇ॒-ಽಗ್ನೌ ಕ॒ಪಾಲ॒ಮುಪ॑ದಧಾತಿ ॥ ನಿರ್ದ॑ಗ್ಧ॒ಗ್ಂ॒ ರಖ್ಷೋ॒ ನಿರ್ದ॑ಗ್ಧಾ॒ ಅರಾ॑ತಯ॒ ಇತ್ಯಾ॑ಹ । ರಖ್ಷಾಗ್॑ಸ್ಯೇ॒ವ
ನಿರ್ದ॑ಹತಿ । ಅ॒ಗ್ನಿ॒ವತ್ಯುಪ॑ದಧಾತಿ । ಅ॒ಸ್ಮಿನ್ನೇ॒ವ ಲೋ॒ಕೇ ಜ್ಯೋತಿ॑ರ್ಧತ್ತೇ । ಅಙ್ಗಾ॑ರ॒ಮಧಿ॑-ವರ್ತಯತಿ ॥ 50 ॥

ಅ॒ನ್ತರಿ॑ಖ್ಷ ಏ॒ವ ಜ್ಯೋತಿ॑ರ್ಧತ್ತೇ ।
ಆ॒ದಿ॒ತ್ಯಮೇ॒ವಾಮುಷ್ಮಿ॑ನ್ ಁಲೋ॒ಕೇ ಜ್ಯೋತಿ॑ರ್ಧತ್ತೇ ।
ಜ್ಯೋತಿ॑ಷ್ಮನ್ತೋ-ಽಸ್ಮಾ ಇ॒ಮೇ ಲೋ॒ಕಾ ಭ॑ವನ್ತಿ ।
ಯ ಏ॒ವಂ-ವೇಁದ॑ ॥ ಧ್ರು॒ವಮ॑ಸಿ ಪೃಥಿ॒ವೀ-ನ್ದೃ॒ಗ್ಂ॒ಹೇತ್ಯಾ॑ಹ । ಪೃ॒ಥಿ॒ವೀಮೇ॒ವೈತೇನ॑ ದೃಗ್ಂಹತಿ ।
ಧ॒ರ್ತ್ರಮ॑ಸ್ಯ॒ನ್ತರಿ॑ಖ್ಷ-ನ್ದೃ॒ಗ್ಂ॒ಹೇತ್ಯಾ॑ಹ । ಅ॒ನ್ತರಿ॑ಖ್ಷಮೇ॒ವೈತೇನ॑ ದೃಗ್ಂಹತಿ ।
ಧ॒ರುಣ॑ಮಸಿ॒ ದಿವ॑-ನ್ದೃ॒ಗ್ಂ॒ಹೇತ್ಯಾ॑ಹ । ದಿವ॑ಮೇ॒ವೈತೇನ॑ ದೃಗ್ಂಹತಿ ॥ 51 ॥

ಧರ್ಮಾ॑ಸಿ॒ ದಿಶೋ॑ ದೃ॒ಗ್ಂ॒ಹೇತ್ಯಾ॑ಹ ।
ದಿಶ॑ ಏ॒ವೈತೇನ॑ ದೃಗ್ಂಹತಿ । ಇ॒ಮಾನೇ॒ವೈತೈ-ರ್ಲೋ॒ಕಾ-ನ್ದೃಗ್ಂ॑ಹತಿ । ದೃಗ್ಂ ಹ॑ನ್ತೇ-ಽಸ್ಮಾ ಇ॒ಮೇ ಲೋ॒ಕಾಃ ಪ್ರ॒ಜಯಾ॑ ಪ॒ಶುಭಿಃ॑ । ಯ ಏ॒ವಂ-ವೇಁದ॑ ॥ ತ್ರೀಣ್ಯಗ್ರೇ॑ ಕ॒ಪಾಲಾ॒ನ್ಯುಪ॑ದಧಾತಿ । ತ್ರಯ॑ ಇ॒ಮೇ ಲೋ॒ಕಾಃ ।
ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ᳚ ।
ಏಕ॒ಮಗ್ರೇ॑ ಕ॒ಪಾಲ॒ಮುಪ॑ದಧಾತಿ ।
ಏಕಂ॒-ವಾಁ ಅಗ್ರೇ॑ ಕ॒ಪಾಲ॒-ಮ್ಪುರು॑ಷಸ್ಯ ಸ॒ಭಂ​ವಁ॑ತಿ ॥ 52 ॥

ಅಥ॒ ದ್ವೇ । ಅಥ॒ ತ್ರೀಣಿ॑ । ಅಥ॑ ಚ॒ತ್ವಾರಿ॑ । ಅಥಾ॒ಷ್ಟೌ ।
ತಸ್ಮಾ॑ದ॒ಷ್ಟಾಕ॑ಪಾಲ॒-ಮ್ಪುರು॑ಷಸ್ಯ॒ ಶಿರಃ॑ ।
ಯದೇ॒ವ-ಙ್ಕ॒ಪಾಲಾ᳚ನ್ಯುಪ॒ ದಧಾ॑ತಿ । ಯ॒ಜ್ಞೋ ವೈ ಪ್ರ॒ಜಾಪ॑ತಿಃ । ಯ॒ಜ್ಞಮೇ॒ವ ಪ್ರ॒ಜಾಪ॑ತಿ॒ಗ್ಂ॒ ಸಗ್ಗ್​ಸ್ಕ॑ರೋತಿ ।
ಆ॒ತ್ಮಾನ॑ಮೇ॒ವ ತ-ಥ್ಸಗ್ಗ್​ಸ್ಕ॑ರೋತಿ । ತಗ್ಂ ಸಗ್ಗ್​ಸ್ಕೃ॑ತಮಾ॒ತ್ಮಾನ᳚ಮ್ ॥ 53 ॥

ಅ॒ಮುಷ್ಮಿ॑ನ್ ಁಲೋ॒ಕೇ-ಽನು॒ಪರೈ॑ತಿ ॥ ಯದ॒ಷ್ಟಾವು॑ಪ॒ ದಧಾ॑ತಿ । ಗಾ॒ಯ॒ತ್ರಿ॒ಯಾ ತ-ಥ್ಸಮ್ಮಿ॑ತಮ್ । ಯನ್ನವ॑ । ತ್ರಿ॒ವೃತಾ॒ ತತ್ । ಯ-ದ್ದಶ॑ । ವಿ॒ರಾಜಾ॒ ತತ್ । ಯದೇಕಾ॑ದಶ । ತ್ರಿ॒ಷ್ಟುಭಾ॒ ತತ್ । ಯದ್ದ್ವಾದ॑ಶ ॥ 54 ॥

ಜಗ॑ತ್ಯಾ॒ ತತ್ । ಛನ್ದ॑-ಸ್ಸಮ್ಮಿತಾನಿ॒ ಸ ಉ॑ಪ॒ದಧ॑-ತ್ಕ॒ಪಾಲಾ॑ನಿ । ಇ॒ಮಾನ್ ಁಲೋ॒ಕಾನ॑ನುಪೂ॒ರ್ವ-ನ್ದಿಶೋ॒ ವಿಧೃ॑ತ್ಯೈ ದೃಗ್ಂಹತಿ । ಅಥಾಯುಃ॑ ಪ್ರಾ॒ಣಾ-ನ್ಪ್ರ॒ಜಾ-ಮ್ಪ॒ಶೂನ್. ಯಜ॑ಮಾನೇ ದಧಾತಿ । ಸ॒ಜಾ॒ತಾನ॑ಸ್ಮಾ ಅ॒ಭಿತೋ॑ ಬಹು॒ಲಾನ್ ಕ॑ರೋತಿ ॥
ಚಿತ॒-ಸ್ಸ್ಥೇತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈತತ್ ॥
ಭೃಗೂ॑ಣಾ॒ಮಙ್ಗಿ॑ರಸಾ॒-ನ್ತಪ॑ಸಾ ತಪ್ಯದ್ಧ್ವ॒ಮಿತ್ಯಾ॑ಹ ।
ದೇ॒ವತಾ॑ನಾ-ಮೇ॒ವೈನಾ॑ನಿ॒ ತಪ॑ಸಾ ತಪತಿ । ತಾನಿ॒ ತತ॒-ಸ್ಸಗ್ಗ್​ಸ್ಥಿ॑ತೇ । ಯಾನಿ॑ ಘ॒ರ್ಮೇ ಕ॒ಪಾಲಾ᳚ನ್ ಯುಪಚಿ॒ನ್ವನ್ತಿ॑ ವೇ॒ಧಸ॒ ಇತಿ॒ ಚತು॑ಷ್ಪದಯ॒ರ್ಚಾ ವಿಮು॑ಞ್ಚತಿ । ಚತು॑ಷ್ಪಾದಃ ಪ॒ಶವಃ॑ । ಪ॒ಶುಷ್ವೇ॒ವೋಪರಿ॑ಷ್ಟಾ॒-ತ್ಪ್ರತಿ॑ತಿಷ್ಠತಿ ॥ 55 ॥
(ವ॒ರ್ತ॒ಯ॒ತಿ॒ - ದಿವ॑ಮೇ॒ವೈತೇನ॑ ದೃಗ್ಂಹತಿ - ಸ॒ಮ್ಭವ॑ತಿ॒ - ತಗ್ಂ ಸಗ್ಗ್​ಸ್ಕೃ॑ತಮಾ॒ತ್ಮಾನಂ॒ - ದ್ವಾದ॑ಶ॒ - ಸಗ್ಗ್​ಸ್ಥಿ॑ತೇ॒ ತ್ರೀಣಿ॑ ಚ) (ಅ. 7)

ಅನುವಾಕಂ 8 - ಪುರೋಡಾಶಾನಿಷ್ಪಾದನಮ್
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ॒ ಪ್ರಸೂ᳚ತ್ಯೈ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹ ।
ಅ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ᳚ ।
ಸಂ​ವಁ॑ಪಾ॒ಮೀತ್ಯಾ॑ಹ । ಯ॒ಥಾ॒ ದೇ॒ವ॒ತಮೇ॒ವೈನಾ॑ನಿ॒ ಸಂ​ವಁ॑ಪತಿ ॥ ಸಮಾಪೋ॑ ಅ॒ದ್ಭಿರ॑ಗ್ಮತ॒ ಸಮೋಷ॑ಧಯೋ॒ ರಸೇ॒ನೇತ್ಯಾ॑ಹ । ಆಪೋ॒ ವಾ ಓಷ॑ಧೀ-ರ್ಜಿನ್ವನ್ತಿ । ಓಷ॑ಧಯೋ॒-ಽಪೋ ಜಿ॑ನ್ವನ್ತಿ ।
ಅ॒ನ್ಯಾ ವಾ ಏ॒ತಾಸಾ॑ಮ॒ನ್ಯಾ ಜಿ॑ನ್ವನ್ತಿ ॥ 56 ॥

ತಸ್ಮಾ॑ದೇ॒ವಮಾ॑ಹ । ಸಗ್ಂ ರೇ॒ವತೀ॒-ರ್ಜಗ॑ತೀಭಿ॒-ರ್ಮಧು॑ಮತೀ॒-ರ್ಮಧು॑ಮತೀಭಿ-ಸ್ಸೃಜ್ಯದ್ಧ್ವ॒ಮಿತ್ಯಾ॑ಹ ।
ಆಪೋ॒ ವೈ ರೇ॒ವತೀಃ᳚ । ಪ॒ಶವೋ॒ ಜಗ॑ತೀಃ । ಓಷ॑ಧಯೋ॒ ಮಧು॑ಮತೀಃ । ಆಪ॒ ಓಷ॑ಧೀಃ ಪ॒ಶೂನ್ । ತಾನೇ॒ವಾಸ್ಮಾ॑ ಏಕ॒ಧಾ ಸ॒ಗ್ಂ॒ಸೃಜ್ಯ॑ । ಮಧು॑ಮತಃ ಕರೋತಿ ।
ಅ॒ದ್ಭ್ಯಃ ಪರಿ॒ ಪ್ರಜಾ॑ತಾ-ಸ್ಸ್ಥ॒ ಸಮ॒ದ್ಭಿಃ ಪೃ॑ಚ್ಯದ್ಧ್ವ॒ಮಿತಿ॑ ಪ॒ರ್ಯಾಪ್ಲಾ॑ವಯತಿ ।
ಯಥಾ॒ ಸುವೃ॑ಷ್ಟ ಇ॒ಮಾಮ॑ನು ವಿ॒ಸೃತ್ಯ॑ ॥ 57 ॥

ಆಪ॒ ಓಷ॑ಧೀರ್ಮ॒ಹಯ॑ನ್ತಿ । ತಾ॒ದೃಗೇ॒ವ ತತ್ ॥
ಜನ॑ಯತ್ಯೈ ತ್ವಾ॒ ಸಂ​ಯೌಁ॒ಮೀತ್ಯಾ॑ಹ । ಪ್ರ॒ಜಾ ಏ॒ವೈತೇನ॑ ದಾಧಾರ । ಅ॒ಗ್ನಯೇ᳚ ತ್ವಾ॒-ಽಗ್ನೀಷೋಮಾ᳚ಭ್ಯಾ॒ಮಿತ್ಯಾ॑ಹ॒ ವ್ಯಾವೃ॑ತ್ತ್ಯೈ । ಮ॒ಖಸ್ಯ॒ ಶಿರೋ॒-ಽಸೀತ್ಯಾ॑ಹ ।
ಯ॒ಜ್ಞೋ ವೈ ಮ॒ಖಃ । ತಸ್ಯೈ॒ತಚ್ಛಿರಃ॑ । ಯ-ತ್ಪು॑ರೋ॒ಡಾಶಃ॑ । ತಸ್ಮಾ॑ದೇ॒ವಮಾ॑ಹ ॥ 58 ॥

ಘ॒ರ್ಮೋ॑-ಽಸಿ ವಿ॒ಶ್ವಾಯು॒ರಿತ್ಯಾ॑ಹ । ವಿಶ್ವ॑ಮೇ॒ವಾಯು॒-ರ್ಯಜ॑ಮಾನೇ ದಧಾತಿ । ಉ॒ರು ಪ್ರ॑ಥಸ್ವೋ॒ರು ತೇ॑ ಯ॒ಜ್ಞಪ॑ತಿಃ ಪ್ರಥತಾ॒ಮಿತ್ಯಾ॑ಹ । ಯಜ॑ಮಾನಮೇ॒ವ ಪ್ರ॒ಜಯಾ॑ ಪ॒ಶುಭಿಃ॑ ಪ್ರಥಯತಿ । ತ್ವಚ॑-ಙ್ಗೃಹ್ಣೀ॒ಷ್ವೇತ್ಯಾ॑ಹ ।
ಸರ್ವ॑ಮೇ॒ವೈನ॒ಗ್ಂ॒ ಸತ॑ನು-ಙ್ಕರೋತಿ । ಅಥಾ॒ಪ ಆ॒ನೀಯ॒ ಪರಿ॑ ಮಾರ್​ಷ್ಟಿ । ಮಾ॒ಗ್ಂ॒ಸ ಏ॒ವ ತ-ತ್ತ್ವಚ॑-ನ್ದಧಾತಿ । ತಸ್ಮಾ᳚-ತ್ತ್ವ॒ಚಾ ಮಾ॒ಗ್ಂ॒ಸ-ಞ್ಛ॒ನ್ನಮ್ ॥
ಘ॒ರ್ಮೋ ವಾ ಏ॒ಷೋ-ಽಶಾ᳚ನ್ತಃ ॥ 59 ॥

ಅ॒ರ್ಧ॒ಮಾ॒ಸೇ᳚-ಽರ್ಧಮಾಸೇ॒ ಪ್ರವೃ॑ಜ್ಯತೇ । ಯ-ತ್ಪು॑ರೋ॒ಡಾಶಃ॑ । ಸ ಈ᳚ಶ್ವ॒ರೋ ಯಜ॑ಮಾನಗ್ಂ ಶು॒ಚಾ ಪ್ರ॒ದಹಃ॑ । ಪರ್ಯ॑ಗ್ನಿ ಕರೋತಿ । ಪ॒ಶುಮೇ॒ವೈನ॑ಮಕಃ । ಶಾನ್ತ್ಯಾ॒ ಅಪ್ರ॑ದಾಹಾಯ । ತ್ರಿಃ ಪರ್ಯ॑ಗ್ನಿ ಕರೋತಿ ।
ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ । ಅಥೋ॒ ರಖ್ಷ॑ಸಾ॒ಮಪ॑ಹತ್ಯೈ ॥
ಅ॒ನ್ತರಿ॑ತ॒ಗ್ಂ॒ ರಖ್ಷೋ॒-ಽನ್ತರಿ॑ತಾ॒ ಅರಾ॑ತಯ॒ ಇತ್ಯಾ॑ಹ ॥ 60 ॥

ರಖ್ಷ॑ಸಾ-ಮ॒ನ್ತರ್​ಹಿ॑ತ್ಯೈ । ಪು॒ರೋ॒ಡಾಶಂ॒-ವಾಁ ಅಧಿ॑ಶ್ರಿತ॒ಗ್ಂ॒ ರಖ್ಷಾಗ್॑ಸ್ಯಜಿಘಾಗ್ಂಸನ್ನ್ ।
ದಿ॒ವಿ ನಾಕೋ॒ ನಾಮಾ॒ಗ್ನೀ ರ॑ಖ್ಷೋ॒ಹಾ । ಸ ಏ॒ವಾಸ್ಮಾ॒-ದ್ರಖ್ಷಾ॒ಗ್॒ಸ್ಯಪಾ॑ಹನ್ನ್ । ದೇ॒ವಸ್ತ್ವಾ॑ ಸವಿ॒ತಾ ಶ್ರ॑ಪಯ॒ತ್ವಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವೈನಗ್ಗ್॑ ಶ್ರಪಯತಿ । ವರ್​ಷಿ॑ಷ್ಠೇ॒ ಅಧಿ॒ ನಾಕ॒ ಇತ್ಯಾ॑ಹ । ರಖ್ಷ॑ಸಾ॒ಮಪ॑ಹತ್ಯೈ । ಅ॒ಗ್ನಿಸ್ತೇ॑ ತ॒ನುವ॒-ಮ್ಮಾ-ಽತಿ॑ ಧಾ॒ಗಿತ್ಯಾ॒ಹಾನ॑ತಿದಾಹಾಯ । ಅಗ್ನೇ॑ ಹ॒ವ್ಯಗ್ಂ ರ॑ಖ್ಷ॒ಸ್ವೇತ್ಯಾ॑ಹ॒ ಗುಪ್ತ್ಯೈ᳚ ॥ 61 ॥
ಅವಿ॑ದಹನ್ತ-ಶ್ಶ್ರಪಯ॒ತೇತಿ॒ ವಾಚಂ॒-ವಿಁಸೃ॑ಜತೇ ।
ಯ॒ಜ್ಞಮೇ॒ವ ಹ॒ವೀಗ್​ಷ್ಯ॑ಭಿ-ವ್ಯಾ॒ಹೃತ್ಯ॒ ಪ್ರತ॑ನುತೇ ।
ಪು॒ರೋ॒ರುಚ॒ಮವಿ॑ದಾಹಾಯ॒ ಶೃತ್ಯೈ॑ ಕರೋತಿ ॥ ಮ॒ಸ್ತಿಷ್ಕೋ॒ ವೈ ಪು॑ರೋ॒ಡಾಶಃ॑ । ತಂ-ಯಁನ್ನಾಭಿ॑ವಾ॒ಸಯೇ᳚ತ್ । ಆ॒ವಿರ್ಮ॒ಸ್ತಿಷ್ಕ॑-ಸ್ಸ್ಯಾತ್ । ಅ॒ಭಿವಾ॑ಸಯತಿ ।
ತಸ್ಮಾ॒-ದ್ಗುಹಾ॑ ಮ॒ಸ್ತಿಷ್ಕಃ॑ । ಭಸ್ಮ॑ನಾ॒-ಽಭಿ ವಾ॑ಸಯತಿ ।
ತಸ್ಮಾ᳚-ನ್ಮಾ॒ಗ್ಂ॒ಸೇನಾಸ್ಥಿ॑ ಛ॒ನ್ನಮ್ ॥ 62 ॥

ವೇ॒ದೇನಾ॒ಭಿ ವಾ॑ಸಯತಿ । ತಸ್ಮಾ॒-ತ್ಕೇಶೈ॒-ಶ್ಶಿರ॑-ಶ್ಛ॒ನ್ನಮ್ ।
ಅಖ॑ಲತಿಭಾವುಕೋ ಭವತಿ । ಯ ಏ॒ವಂ-ವೇಁದ॑ ॥ ಪ॒ಶೋರ್ವೈ ಪ್ರ॑ತಿ॒ಮಾ ಪು॑ರೋ॒ಡಾಶಃ॑ । ಸ ನಾಯ॒ಜುಷ್ಕ॑-ಮಭಿ॒ವಾಸ್ಯಃ॑ । ವೃಥೇ॑ವ ಸ್ಯಾತ್ । ಈ॒ಶ್ವ॒ರಾ ಯಜ॑ಮಾನಸ್ಯ ಪ॒ಶವಃ॒ ಪ್ರಮೇ॑ತೋಃ ॥ ಸ-ಮ್ಬ್ರಹ್ಮ॑ಣಾ ಪೃಚ್ಯ॒ಸ್ವೇತ್ಯಾ॑ಹ । ಪ್ರಾ॒ಣಾ ವೈ ಬ್ರಹ್ಮ॑ ॥ 63 ॥

ಪ್ರಾ॒ಣಾಃ ಪ॒ಶವಃ॑ । ಪ್ರಾ॒ಣೈರೇ॒ವ ಪ॒ಶೂನ್ಥ್
ಸಮ್ಪೃ॑ಣಕ್ತಿ । ನ ಪ್ರ॒ಮಾಯು॑ಕಾ ಭವನ್ತಿ । ಯಜ॑ಮಾನೋ॒ ವೈ ಪು॑ರೋ॒ಡಾಶಃ॑ । ಪ್ರ॒ಜಾ ಪ॒ಶವಃ॒ ಪುರೀ॑ಷಮ್ ।
ಯದೇ॒ವಮ॑ಭಿ ವಾ॒ಸಯ॑ತಿ । ಯಜ॑ಮಾನಮೇ॒ವ ಪ್ರ॒ಜಯಾ॑ ಪ॒ಶುಭಿ॒-ಸ್ಸಮ॑ರ್ಧಯತಿ ॥ ದೇ॒ವಾ ವೈ ಹ॒ವಿ-ರ್ಭೃ॒ತ್ವಾ-ಽಬ್ರು॑ವನ್ನ್ । ಕಸ್ಮಿ॑ನ್ನಿ॒ದ-ಮ್ಮ್ರ॑ಖ್ಷ್ಯಾಮಹ॒ ಇತಿ॑ ।
ಸೋ᳚-ಽಗ್ನಿರ॑ಬ್ರವೀತ್ ॥ 64 ॥

ಮಯಿ॑ ತ॒ನೂ-ಸ್ಸನ್ನಿಧ॑ದ್ಧ್ವಮ್ । ಅ॒ಹಂ-ವಁ॒ಸ್ತ-ಞ್ಜ॑ನಯಿಷ್ಯಾಮಿ । ಯಸ್ಮಿ॑-ನ್ಮ್ರ॒ಖ್ಷ್ಯದ್ಧ್ವ॒ ಇತಿ॑ । ತೇ ದೇ॒ವಾ ಅ॒ಗ್ನೌ ತ॒ನೂ-ಸ್ಸ-ನ್ನ್ಯ॑ದಧತ । ತಸ್ಮಾ॑ದಾಹುಃ ।
ಅ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ಇತಿ॑ । ಸೋ-ಽಙ್ಗಾ॑ರೇಣಾ॒ಪಃ ।
ಅ॒ಭ್ಯ॑ಪಾತಯತ್ । ತತ॑ ಏಕ॒ತೋ॑-ಽಜಾಯತ ।
ಸ ದ್ವಿ॒ತೀಯ॑ಮ॒ಭ್ಯ॑ಪಾತಯತ್ ॥ 65 ॥

ತತೋ᳚ ದ್ವಿ॒ತೋ॑-ಽಜಾಯತ । ಸ ತೃ॒ತೀಯ॑-ಮ॒ಭ್ಯ॑ಪಾತಯತ್ ।
ತತ॑-ಸ್ತ್ರಿ॒ತೋ॑-ಽಜಾಯತ । ಯದ॒ದ್ಭ್ಯೋ-ಽಜಾ॑ಯನ್ತ । ತದಾ॒ಪ್ಯಾನಾ॑ಮಾಪ್ಯ॒ತ್ವಮ್ । ಯದಾ॒ತ್ಮಭ್ಯೋ ಽಜಾ॑ಯನ್ತ ।
ತದಾ॒ತ್ಮ್ಯಾನಾ॑-ಮಾತ್ಮ್ಯ॒ತ್ವಮ್ ॥ ತೇ ದೇ॒ವಾ ಆ॒ಪ್ಯೇಷ್ವ॑ಮೃಜತ । ಆ॒ಪ್ಯಾ ಅ॑ಮೃಜತ॒ ಸೂರ್ಯಾ᳚ಭ್ಯುದಿತೇ । ಸೂರ್ಯಾ᳚ಭ್ಯುದಿತ॒-ಸ್ಸೂರ್ಯಾ॑ಭಿನಿಮ್ರುಕ್ತೇ ॥ 66 ॥

ಸೂರ್ಯಾ॑ಭಿನಿಮ್ರುಕ್ತಃ ಕುನ॒ಖಿನಿ॑ । ಕು॒ನ॒ಖೀ ಶ್ಯಾ॒ವದ॑ತಿ । ಶ್ಯಾ॒ವದ॑ನ್ನಗ್ರದಿಧಿ॒ಷೌ । ಅ॒ಗ್ರ॒ದಿ॒ಧಿ॒ಷುಃ ಪ॑ರಿವಿ॒ತ್ತೇ । ಪ॒ರಿ॒ವಿ॒ತ್ತೋ ವೀ॑ರ॒ಹಣಿ॑ । ವೀ॒ರ॒ಹಾ ಬ್ರ॑ಹ್ಮ॒ಹಣಿ॑ ।
ತದ್ಬ್ರ॑ಹ್ಮ॒ಹಣ॒-ನ್ನಾತ್ಯ॑ಚ್ಯವತ । ಅ॒ನ್ತ॒ರ್ವೇ॒ದಿ ನಿನ॑ಯ॒ತ್ಯವ॑ರುದ್ಧ್ಯೈ । ಉಲ್ಮು॑ಕೇನಾ॒ಭಿ ಗೃ॑ಹ್ಣಾತಿ ಶೃತ॒ತ್ವಾಯ॑ । ಶೃ॒ತಕಾ॑ಮಾ ಇವ॒ ಹಿ ದೇ॒ವಾಃ ॥ 67 ॥
(ಅ॒ನ್ಯಾ ಜಿ॑ನ್ವನ್-ತ್ಯನುವಿ॒ಸೃತ್ಯೈ॒-ವಮಾ॒-ಹಾಶಾ᳚ನ್ತ-ಆಹ॒-ಗುಪ್ತ್ಯೈ॑-ಛ॒ನ್ನಂ - ಬ್ರಹ್ಮಾ᳚-ಬ್ರವೀ-ದ್ದ್ವಿ॒ತೀಯ॑ಮ॒ಭ್ಯ॑ಪಾತಯ॒-ಥ್ಸೂರ್ಯಾ॑ಭಿನಿಮ್ರುಕ್ತೇ-ದೇ॒ವಾಃ) (ಅ. 8)

ಅನುವಾಕಂ 9 - ವೇದಿಕರಣಮ್
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॒ ಸ್ಫ್ಯಮಾದ॑ತ್ತೇ॒ ಪ್ರಸೂ᳚ತ್ಯೈ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹ । ಅ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚ಮ್ । ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ᳚ ॥ ಆದ॑ದ॒ ಇನ್ದ್ರ॑ಸ್ಯ ಬಾ॒ಹುರ॑ಸಿ॒ ದಖ್ಷಿ॑ಣ॒ ಇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ । ಸ॒ಹಸ್ರ॑ಭೃಷ್ಟಿ-ಶ್ಶ॒ತತೇ॑ಜಾ॒ ಇತ್ಯಾ॑ಹ ।
ರೂ॒ಪಮೇ॒ವಾಸ್ಯೈ॒ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ॥
ವಾ॒ಯುರ॑ಸಿ ತಿ॒ಗ್ಮತೇ॑ಜಾ॒ ಇತ್ಯಾ॑ಹ । ತೇಜೋ॒ ವೈ ವಾ॒ಯುಃ ॥ 68 ॥

ತೇಜ॑ ಏ॒ವಾಸ್ಮಿ॑-ನ್ದಧಾತಿ ॥ ವಿ॒ಷಾದ್ವೈ ನಾಮಾ॑ಸು॒ರ ಆ॑ಸೀತ್ । ಸೋ॑-ಽಬಿಭೇತ್ । ಯ॒ಜ್ಞೇನ॑ ಮಾ ದೇ॒ವಾ ಅ॒ಭಿಭ॑ವಿಷ್ಯ॒ನ್ತೀತಿ॑ । ಸ ಪೃ॑ಥಿ॒ವೀಮ॒ಭ್ಯ॑ವಮೀತ್ । ಸಾ ಽಮೇ॒ದ್ಧ್ಯಾ ಽಭ॑ವತ್ । ಅಥೋ॒ ಯದಿನ್ದ್ರೋ॑ ವೃ॒ತ್ರಮಹನ್ನ್॑ । ತಸ್ಯ॒ ಲೋಹಿ॑ತ-ಮ್ಪೃಥಿ॒ವೀಮನು॒ ವ್ಯ॑ಧಾವತ್ । ಸಾ ಽಮೇ॒ದ್ಧ್ಯಾ ಽಭ॑ವತ್ ।
ಪೃಥಿ॑ವಿ ದೇವಯಜ॒ನೀತ್ಯಾ॑ಹ ॥ 69 ॥

ಮೇದ್ಧ್ಯಾ॑ಮೇ॒ವೈನಾ᳚-ನ್ದೇವ॒ಯಜ॑ನೀ-ಙ್ಕರೋತಿ ।
ಓಷ॑ದ್ಧ್ಯಾಸ್ತೇ॒ ಮೂಲ॒-ಮ್ಮಾ ಹಿಗ್ಂ॑ಸಿಷ॒ಮಿತ್ಯಾ॑ಹ । ಓಷ॑ಧೀನಾ॒-ಮಹಿಗ್ಂ॑ಸಾಯೈ ॥ ವ್ರ॒ಜ-ಙ್ಗ॑ಚ್ಛ ಗೋ॒ಸ್ಥಾನ॒ಮಿತ್ಯಾ॑ಹ । ಛನ್ದಾಗ್ಂ॑ಸಿ॒ ವೈ ವ್ರ॒ಜೋ ಗೋ॒ಸ್ಥಾನಃ॑ । ಛನ್ದಾಗ್॑ಸ್ಯೇ॒ವಾಸ್ಮೈ᳚ ವ್ರ॒ಜ-ಙ್ಗೋ॒ಸ್ಥಾನ॑-ಙ್ಕರೋತಿ ॥ ವರ್​ಷ॑ತು ತೇ॒ ದ್ಯೌರಿತ್ಯಾ॑ಹ ।
ವೃಷ್ಟಿ॒ರ್ವೈ ದ್ಯೌಃ । ವೃಷ್ಟಿ॑ಮೇ॒ವಾವ॑ರುನ್ಧೇ ॥
ಬ॒ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾ᳚-ಮ್ಪರಾ॒ವತೀತ್ಯಾ॑ಹ ॥ 70 ॥

ದ್ವೌ ವಾವ ಪುರು॑ಷೌ । ಯ-ಞ್ಚೈ॒ವ ದ್ವೇಷ್ಟಿ॑ । ಯಶ್ಚೈ॑ನ॒-ನ್ದ್ವೇಷ್ಟಿ॑ । ತಾವು॒ಭೌ ಬ॑ದ್ಧ್ನಾತಿ ಪರ॒ಮಸ್ಯಾ᳚-ಮ್ಪರಾ॒ವತಿ॑ ಶ॒ತೇನ॒ ಪಾಶೈಃ᳚ । ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಸ್ತಮತೋ॒ ಮಾ ಮೌ॒ಗಿತ್ಯಾ॒ಹಾನಿ॑ಮ್ರುಕ್ತ್ಯೈ ॥
ಅ॒ರರು॒ರ್ವೈ ನಾಮಾ॑ಸು॒ರ ಆ॑ಸೀತ್ ।
ಸ ಪೃ॑ಥಿ॒ವ್ಯಾಮುಪ॑ಮ್ಲುಪ್ತೋ-ಽಶಯತ್ ।
ತ-ನ್ದೇ॒ವಾ ಅಪ॑ಹತೋ॒-ಽರರುಃ॑ ಪೃಥಿ॒ವ್ಯಾ ಇತಿ॑ ಪೃಥಿ॒ವ್ಯಾ ಅಪಾ᳚ಘ್ನನ್ನ್ । ಭ್ರಾತೃ॑ವ್ಯೋ॒ ವಾ ಅ॒ರರುಃ॑ । ಅಪ॑ಹತೋ॒-ಽರರುಃ॑ ಪೃಥಿ॒ವ್ಯಾ ಇತಿ॒ ಯದಾಹ॑ ॥ 71 ॥
ಭ್ರಾತೃ॑ವ್ಯಮೇ॒ವ ಪೃ॑ಥಿ॒ವ್ಯಾ ಅಪ॑ಹನ್ತಿ । ತೇ॑-ಽಮನ್ಯನ್ತ ।
ದಿವಂ॒-ವಾಁ ಅ॒ಯಮಿ॒ತಃ ಪ॑ತಿಷ್ಯ॒ತೀತಿ॑ ।
ತಮ॒ರರು॑ಸ್ತೇ॒ ದಿವ॒-ಮ್ಮಾ ಸ್ಕಾ॒ನಿತಿ॑ ದಿ॒ವಃ ಪರ್ಯ॑ಬಾಧನ್ತ । ಭ್ರಾತೃ॑ವ್ಯೋ॒ ವಾ ಅ॒ರರುಃ॑ । ಅ॒ರರು॑ಸ್ತೇ॒ ದಿವ॒-ಮ್ಮಾ ಸ್ಕಾ॒ನಿತಿ॒ ಯದಾಹ॑ । ಭ್ರಾತೃ॑ವ್ಯಮೇ॒ವ ದಿ॒ವಃ ಪರಿ॑ಬಾಧತೇ ।
ಸ್ತ॒ಮ್ಬ॒ ಯ॒ಜುರ್-ಹ॑ರತಿ । ಪೃ॒ಥಿ॒ವ್ಯಾ ಏ॒ವ ಭ್ರಾತೃ॑ವ್ಯ॒-ಮಪ॑ಹನ್ತಿ । ದ್ವಿ॒ತೀಯಗ್ಂ॑ ಹರತಿ ॥ 72 ॥

ಅ॒ನ್ತರಿ॑ಖ್ಷಾದೇ॒ವೈನ॒-ಮಪ॑ಹನ್ತಿ । ತೃ॒ತೀಯಗ್ಂ॑ ಹರತಿ । ದಿ॒ವ ಏ॒ವೈನ॒-ಮಪ॑ಹನ್ತಿ । ತೂ॒ಷ್ಣೀ-ಞ್ಚ॑ತು॒ರ್ಥಗ್ಂ ಹ॑ರತಿ । ಅಪ॑ರಿಮಿತಾದೇ॒ವೈನ॒-ಮಪ॑ಹನ್ತಿ ॥ ಅಸು॑ರಾಣಾಂ॒-ವಾಁ ಇ॒ಯಮಗ್ರ॑ ಆಸೀತ್ । ಯಾವ॒ದಾಸೀ॑ನಃ ಪರಾ॒ ಪಶ್ಯ॑ತಿ ।
ತಾವ॑-ದ್ದೇ॒ವಾನಾ᳚ಮ್ । ತೇ ದೇ॒ವಾ ಅ॑ಬ್ರುವನ್ನ್ ।
ಅಸ್ತ್ವೇ॒ವ ನೋ॒-ಽಸ್ಯಾಮಪೀತಿ॑ ॥ 73 ॥

ಕ್ಯ॑ನ್ನೋ ದಾಸ್ಯ॒ಥೇತಿ॑ । ಯಾವ॑ಥ್ಸ್ವ॒ಯ-ಮ್ಪ॑ರಿಗೃಹ್ಣೀ॒ಥೇತಿ॑ ।
ತೇ ವಸ॑ವ॒ಸ್ತ್ವೇತಿ॑ ದಖ್ಷಿಣ॒ತಃ ಪರ್ಯ॑ಗೃಹ್ಣನ್ನ್ । ರು॒ದ್ರಾಸ್ತ್ವೇತಿ॑ ಪ॒ಶ್ಚಾತ್ । ಆ॒ದಿ॒ತ್ಯಾ-ಸ್ತ್ವೇತ್ಯು॑ತ್ತರ॒ತಃ । ತೇ᳚-ಽಗ್ನಿನಾ॒ ಪ್ರಾಞ್ಚೋ॑-ಽಜಯನ್ನ್ । ವಸು॑ಭಿ-ರ್ದಖ್ಷಿ॒ಣಾ ।
ರು॒ದ್ರೈಃ ಪ್ರ॒ತ್ಯಞ್ಚಃ॑ । ಆ॒ದಿ॒ತ್ಯೈರುದ॑ಞ್ಚಃ ।
ಯಸ್ಯೈ॒ವಂ-ವಿಁ॒ದುಷೋ॒ ವೇದಿ॑-ಮ್ಪರಿ ಗೃ॒ಹ್ಣನ್ತಿ॑ ॥ 74 ॥

ಭವ॑ತ್ಯಾ॒ತ್ಮನಾ᳚ । ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ ॥
ದೇ॒ವಸ್ಯ॑ ಸವಿ॒ತು-ಸ್ಸ॒ವ ಇತ್ಯಾ॑ಹ॒ ಪ್ರಸೂ᳚ತ್ಯೈ ।
ಕರ್ಮ॑ ಕೃಣ್ವನ್ತಿ ವೇ॒ಧಸ॒ ಇತ್ಯಾ॑ಹ । ಇ॒ಷಿ॒ತಗ್ಂ ಹಿ ಕರ್ಮ॑ ಕ್ರಿ॒ಯತೇ᳚ । ಪೃ॒ಥಿ॒ವ್ಯೈ ಮೇದ್ಧ್ಯ॑-ಞ್ಚಾಮೇ॒ದ್ಧ್ಯ-ಞ್ಚ॒ ವ್ಯುದ॑ಕ್ರಾಮತಾಮ್ । ಪ್ರಾ॒ಚೀನ॑-ಮುದೀ॒ಚೀನ॒-ಮ್ಮೇದ್ಧ್ಯ᳚ಮ್ । ಪ್ರ॒ತೀ॒ಚೀನ॑-ನ್ದಖ್ಷಿ॒ಣಾ ಽಮೇ॒ದ್ಧ್ಯಮ್ ।
ಪ್ರಾಚೀ॒ಮುದೀ॑ಚೀ-ಮ್ಪ್ರವ॒ಣಾ-ಙ್ಕ॑ರೋತಿ ।
ಮೇದ್ಧ್ಯಾ॑ಮೇ॒ವೈನಾ᳚-ನ್ದೇವ॒ಯಜ॑ನೀ-ಙ್ಕರೋತಿ ॥ 75 ॥

ಪ್ರಾಞ್ಚೌ॑ ವೇದ್ಯ॒ಗ್ಂ॒ ಸಾವುನ್ನ॑ಯತಿ । ಆ॒ಹ॒ವ॒ನೀಯ॑ಸ್ಯ॒ ಪರಿ॑ಗೃಹೀತ್ಯೈ । ಪ್ರ॒ತೀಚೀ॒ ಶ್ರೋಣೀ᳚ । ಗಾರ್​ಹ॑ಪತ್ಯಸ್ಯ॒ ಪರಿ॑ಗೃಹೀತ್ಯೈ । ಅಥೋ॑ ಮಿಥುನ॒ತ್ವಾಯ॑ । ಉದ್ಧ॑ನ್ತಿ । ಯದೇ॒ವಾಸ್ಯಾ॑ ಅಮೇ॒ದ್ಧ್ಯಮ್ । ತದಪ॑ಹನ್ತಿ । ಉದ್ಧ॑ನ್ತಿ ।
ತಸ್ಮಾ॒ದೋಷ॑ಧಯಃ॒ ಪರಾ॑ಭವನ್ತಿ ॥ 76 ॥

ಮೂಲ॑-ಞ್ಛಿನತ್ತಿ । ಭ್ರಾತೃ॑ವ್ಯಸ್ಯೈ॒ವ ಮೂಲ॑-ಞ್ಛಿನತ್ತಿ ।
ಮೂಲಂ॒-ವಾಁ ಅ॑ತಿ॒ತಿಷ್ಠ॒-ದ್ರಖ್ಷಾ॒ಗ್॒ಸ್ಯನೂ-ತ್ಪಿ॑ಪತೇ । ಯದ್ಧಸ್ತೇ॑ನ ಛಿ॒ನ್ದ್ಯಾತ್ । ಕು॒ನ॒ಖಿನೀಃ᳚ ಪ್ರ॒ಜಾ-ಸ್ಸ್ಯುಃ॑ । ಸ್ಫ್ಯೇನ॑ ಛಿನತ್ತಿ । ವಜ್ರೋ॒ ವೈ ಸ್ಫ್ಯಃ ।
ವಜ್ರೇ॑ಣೈ॒ವ ಯ॒ಜ್ಞಾ-ದ್ರಖ್ಷಾ॒ಗ್॒ಸ್ಯಪ॑ಹನ್ತಿ । ಪಿ॒ತೃ॒ದೇ॒ವ॒ತ್ಯಾ ಽತಿ॑ಖಾತಾ । ಇಯ॑ತೀ-ಙ್ಖನತಿ ॥ 77 ॥

ಪ್ರ॒ಜಾಪ॑ತಿನಾ ಯಜ್ಞಮು॒ಖೇನ॒ ಸಮ್ಮಿ॑ತಾಮ್ ॥ ವೇದಿ॑ರ್ದೇ॒ವೇಭ್ಯೋ॒ ನಿಲಾ॑ಯತ । ತಾ-ಞ್ಚ॑ತುರಙ್ಗು॒ಲೇ ಽನ್ವ॑ವಿನ್ದನ್ನ್ । ತಸ್ಮಾ᳚ಚ್ಚತುರಙ್ಗು॒ಲ-ಙ್ಖೇಯಾ᳚ ।
ಚ॒ತು॒ರಙ್ಗು॒ಲ-ಙ್ಖ॑ನತಿ । ಚ॒ತು॒ರ॒ಙ್ಗು॒ಲೇ ಹ್ಯೋಷ॑ಧಯಃ ಪ್ರತಿ॒ತಿಷ್ಠ॑ನ್ತಿ ।
ಆಪ್ರ॑ತಿ॒ಷ್ಠಾಯೈ॑ ಖನತಿ । ಯಜ॑ಮಾನಮೇ॒ವ ಪ್ರ॑ತಿ॒ಷ್ಠಾ-ಙ್ಗ॑ಮಯತಿ । ದ॒ಖ್ಷಿ॒ಣ॒ತೋ ವರ್​ಷೀ॑ಯಸೀ-ಙ್ಕರೋತಿ ।
ದೇ॒ವ॒ಯಜ॑ನಸ್ಯೈ॒ವ ರೂ॒ಪಮ॑ಕಃ ॥ 78 ॥

ಪುರೀ॑ಷವತೀ-ಙ್ಕರೋತಿ । ಪ್ರ॒ಜಾ ವೈ ಪ॒ಶವಃ॒ ಪುರೀ॑ಷಮ್ ।
ಪ್ರ॒ಜಯೈ॒ವೈನ॑-ಮ್ಪ॒ಶುಭಿಃ॒ ಪುರೀ॑ಷವನ್ತ-ಙ್ಕರೋತಿ । ಉತ್ತ॑ರ-ಮ್ಪರಿಗ್ರಾ॒ಹ-ಮ್ಪರಿ॑ಗೃಹ್ಣಾತಿ । ಏ॒ತಾವ॑ತೀ॒ ವೈ ಪೃ॑ಥಿ॒ವೀ । ಯಾವ॑ತೀ॒ ವೇದಿಃ॑ । ತಸ್ಯಾ॑ ಏ॒ತಾವ॑ತ ಏ॒ವ ಭ್ರಾತೃ॑ವ್ಯ-ನ್ನಿ॒ರ್ಭಜ್ಯ॑ । ಆ॒ತ್ಮನ॒ ಉತ್ತ॑ರ-ಮ್ಪರಿಗ್ರಾ॒ಹ-ಮ್ಪರಿ॑ಗೃಹ್ಣಾತಿ ।
ಋ॒ತ-ಮ॑ಸ್ಯೃತ॒ಸದ॑ನ-ಮಸ್ಯೃತ॒ಶ್ರೀರ॒ಸೀತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈ ತತ್ ॥ 79 ॥

ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ । ಯದ್ವೇದಿ॑-ಙ್ಕ॒ರೋತಿ॑ ।
ಧಾ ಅ॑ಸಿ ಸ್ವ॒ಧಾ ಅ॒ಸೀತಿ॑ ಯೋಯುಪ್ಯತೇ॒ ಶಾನ್ತ್ಯೈ᳚ ।
ಉ॒ರ್ವೀ ಚಾಸಿ॒ ವಸ್ವೀ॑ ಚಾ॒ಸೀತ್ಯಾ॑ಹ ।
ಉ॒ರ್ವೀಮೇ॒ವೈನಾಂ॒-ವಁಸ್ವೀ᳚-ಙ್ಕರೋತಿ ।
ಪು॒ರಾ ಕ್ರೂ॒ರಸ್ಯ॑ ವಿ॒ಸೃಪೋ॑ ವಿರಫ್ಶಿ॒ನ್ನಿತ್ಯಾ॑ಹ ಮೇದ್ಧ್ಯ॒ತ್ವಾಯ॑ । ಉ॒ದಾ॒ದಾಯ॑ ಪೃಥಿ॒ವೀ-ಞ್ಜೀ॒ರದಾ॑ನು॒ರ್ಯಾಮೈರ॑ಯ-ಞ್ಚ॒ನ್ದ್ರಮ॑ಸಿ ಸ್ವ॒ಧಾಭಿ॒ರಿತ್ಯಾ॑ಹ ।
ಯದೇ॒ವಾಸ್ಯಾ॑ ಅಮೇ॒ದ್ಧ್ಯಮ್ । ತದ॑ಪ॒ಹತ್ಯ॑ ।
ಮೇದ್ಧ್ಯಾ᳚-ನ್ದೇವ॒ಯಜ॑ನೀ-ಙ್ಕೃ॒ತ್ವಾ ॥ 80 ॥

ಯದ॒ದಶ್ಚ॒ನ್ದ್ರಮ॑ಸಿ॒ ಮೇದ್ಧ್ಯ᳚ಮ್ । ತದ॒ಸ್ಯಾಮೇರ॑ಯತಿ ।
ತಾ-ನ್ಧೀರಾ॑ಸೋ ಅನು॒ದೃಶ್ಯ॑ ಯಜನ್ತ॒ ಇತ್ಯಾ॒ಹಾನು॑ಖ್ಯಾತ್ಯೈ ॥ ಪ್ರೋಖ್ಷ॑ಣೀ॒ರಾಸಾ॑ದಯ । ಇ॒ದ್ಧ್ಮಾಬ॒ರ್॒ಹಿ-ರುಪ॑ಸಾದಯ । ಸ್ರು॒ವ-ಞ್ಚ॒ ಸ್ರುಚ॑ಶ್ಚ॒ ಸಮ್ಮೃ॑ಡ್ಢಿ । ಪತ್ನೀ॒ಗ್ಂ॒ ಸನ್ನ॑ಹ್ಯ । ಆಜ್ಯೇ॑ನೋ॒ದೇಹೀತ್ಯಾ॑ಹಾನುಪೂ॒ರ್ವತಾ॑ಯೈ । ಪ್ರೋಖ್ಷ॑ಣೀ॒ರಾಸಾ॑ದಯತಿ । ಆಪೋ॒ ವೈ ರ॑ಖ್ಷೋ॒ಘ್ನೀಃ ॥ 81 ॥

ರಖ್ಷ॑ಸಾ॒ಮಪ॑ಹತ್ಯೈ । ಸ್ಫ್ಯಸ್ಯ॒ ವರ್ತ್ಮನ್᳚-ಥ್ಸಾದಯತಿ । ಯ॒ಜ್ಞಸ್ಯ॒ ಸನ್ತ॑ತ್ಯೈ । ಉ॒ವಾಚ॒ ಹಾಸಿ॑ತೋ ದೈವ॒ಲಃ । ಏ॒ತಾವ॑ತೀ॒ರ್ವಾ ಅ॒ಮುಷ್ಮಿ॑ನ್ ಁಲೋ॒ಕ ಆಪ॑ ಆಸನ್ನ್ ।
ಯಾವ॑ತೀಃ॒ ಪ್ರೋಖ್ಷ॑ಣೀ॒ರಿತಿ॑ । ತಸ್ಮಾ᳚-ದ್ಬ॒ಹ್ವೀರಾ॒ಸಾದ್ಯಾಃ᳚ । ಸ್ಫ್ಯಮು॒ದಸ್ಯನ್ನ್॑ । ಯ-ನ್ದ್ವಿ॒ಷ್ಯಾತ್ತ-ನ್ಧ್ಯಾ॑ಯೇತ್ । ಶು॒ಚೈವೈನ॑-ಮರ್ಪಯತಿ ॥ 82 ॥
(ವೈ ವಾ॒ಯು - ರಾ॑ಹ - ಪರಾ॒ವತೀತ್ಯಾ॒ಹಾ - ಹ॑ - ದ್ವಿ॒ತೀಯಗ್ಂ॑ ಹರ॒ - ತೀತಿ॑ - ಪರಿಗೃ॒ಹ್ಣನ್ತಿ॑ - ದೇವ॒ಯಜ॑ನೀ-ಙ್ಕರೋತಿ - ಭವನ್ತಿ - ಖನತ್ಯ - ಕ - ರೇ॒ತತ್ - ಕೃ॒ತ್ವಾ - ರ॑ಖ್ಷೋ॒ಘ್ನೀ - ರ॑ರ್ಪಯತಿ) (ಅ. 9)

ಅನುವಾಕಂ 10 - ಇಧ್ಮಾಬರ್​ಹಿ-ಸ್ಸಾದನಮ್
ವಜ್ರೋ॒ ವೈ ಸ್ಫ್ಯಃ । ಯದ॒ನ್ವಞ್ಚ॑-ನ್ಧಾ॒ರಯೇ᳚ತ್ । ವಜ್ರೇ᳚-ಽದ್ಧ್ವ॒ರ್ಯುಃ, ಖ್ಷ॑ಣ್ವೀತ । ಪು॒ರಸ್ತಾ᳚-ತ್ತಿ॒ರ್ಯಞ್ಚ॑-ನ್ಧಾರಯತಿ । ವಜ್ರೋ॒ ವೈ ಸ್ಫ್ಯಃ । ವಜ್ರೇ॑ಣೈ॒ವ ಯ॒ಜ್ಞಸ್ಯ॑ ದಖ್ಷಿಣ॒ತೋ ರಖ್ಷಾ॒ಗ್॒ಸ್ಯಪ॑ಹನ್ತಿ ।
ಅ॒ಗ್ನಿಭ್ಯಾ॒-ಮ್ಪ್ರಾಚ॑ಶ್ಚ ಪ್ರ॒ತೀಚ॑ಶ್ಚ । ಸ್ಫ್ಯೇನೋದೀ॑ಚಶ್ಚಾ-ಧ॒ರಾಚ॑ಶ್ಚ । ಸ್ಫ್ಯೇನ॒ ವಾ ಏ॒ಷ ವಜ್ರೇ॑ಣಾ॒ಸ್ಯೈ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯ-ಮಪ॒ಹತ್ಯ॑ ।
ಉ॒ತ್ಕ॒ರೇ-ಽಧಿ॒ ಪ್ರವೃ॑ಶ್ಚತಿ ॥ 83 ॥

ಯಥೋ॑ಪ॒ಧಾಯ॑ ವೃ॒ಶ್ಚನ್ತ್ಯ॒ವಮ್ । ಹಸ್ತಾ॒ವವ॑ ನೇನಿಕ್ತೇ । ಆ॒ತ್ಮಾನ॑ಮೇ॒ವ ಪ॑ವಯತೇ । ಸ್ಫ್ಯ-ಮ್ಪ್ರಖ್ಷಾ॑ಲಯತಿ ಮೇದ್ಧ್ಯ॒ತ್ವಾಯ॑ । ಅಥೋ॑ ಪಾ॒ಪ್ಮನ॑ ಏ॒ವ ಭ್ರಾತೃ॑ವ್ಯಸ್ಯ ನ್ಯ॒ಙ್ಗ-ಞ್ಛಿ॑ನತ್ತಿ ॥ ಇ॒ದ್ಧ್ಮಾ-ಬ॒ರ್॒ಹಿ-ರುಪ॑ಸಾದಯತಿ॒ ಯುಕ್ತ್ಯೈ᳚ । ಯ॒ಜ್ಞಸ್ಯ॑ ಮಿಥುನ॒ತ್ವಾಯ॑ ।
ಅಥೋ॑ ಪುರೋ॒ರುಚ॑ಮೇ॒ವೈತಾ-ನ್ದ॑ಧಾತಿ ।
ಉತ್ತ॑ರಸ್ಯ॒ ಕರ್ಮ॒ಣೋ-ಽನು॑ಖ್ಯಾತ್ಯೈ ।
ನ ಪು॒ರಸ್ತಾ᳚-ತ್ಪ್ರ॒ತ್ಯಗುಪ॑ಸಾದಯೇತ್ ॥ 84 ॥

ಯ-ತ್ಪು॒ರಸ್ತಾ᳚-ತ್ಪ್ರ॒ತ್ಯ-ಗು॑ಪಸಾ॒ದಯೇ᳚ತ್ ।
ಅ॒ನ್ಯತ್ರಾ॑ಹುತಿಪ॒ಥಾದಿ॒ದ್ಧ್ಮ-ಮ್ಪ್ರತಿ॑ಪಾದಯೇತ್ । ಪ್ರ॒ಜಾ ವೈ ಬ॒ರ್॒ಹಿಃ । ಅಪ॑ರಾದ್ಧ್ನುಯಾ-ದ್ಬ॒ರ್॒ಹಿಷಾ᳚ ಪ್ರ॒ಜಾನಾ᳚-ಮ್ಪ್ರ॒ಜನ॑ನಮ್ । ಪ॒ಶ್ಚಾತ್-ಪ್ರಾಗುಪ॑ಸಾದಯತಿ । ಆ॒ಹು॒ತಿ॒ಪ॒ಥೇನೇ॒ದ್ಧ್ಮ-ಮ್ಪ್ರತಿ॑ಪಾದಯತಿ ।
ಸ॒ಪ್ರ॒ನ್ತ್ಯೇ॑ವ ಬ॒ರ್॒ಹಿಷಾ᳚ ಪ್ರ॒ಜಾನಾ᳚-ಮ್ಪ್ರ॒ಜನ॑ನ॒ಮುಪೈ॑ತಿ । ದಖ್ಷಿ॑ಣಮಿ॒ದ್ಧ್ಮಮ್ ।
ಉತ್ತ॑ರ-ಮ್ಬ॒ರ॒ಃಇಃ । ಆ॒ತ್ಮಾ ವಾ ಇ॒ದ್ಧ್ಮಃ ।
ಪ್ರ॒ಜಾ ಬ॒ರ್॒ಹಿಃ । ಪ್ರ॒ಜಾ ಹ್ಯಾ᳚ತ್ಮನ॒ ಉತ್ತ॑ರತರಾ ತೀ॒ರ್ಥೇ ।
ತತೋ॒ ಮೇಧ॑ಮುಪ॒ನೀಯ॑ । ಯ॒ಥಾ॒ ದೇ॒ವ॒ತಮೇ॒ವೈನ॒ತ್-ಪ್ರತಿ॑ಷ್ಠಾಪಯತಿ । ಪ್ರತಿ॑ತಿಷ್ಠತಿ ಪ್ರ॒ಜಯಾ॑ ಪ॒ಶುಭಿ॒-ರ್ಯಜ॑ಮಾನಃ ॥ 85 ॥
(ವೃ॒ಶ್ಚ॒ತಿ॒ - ಸಾ॒ದ॒ಯೇ॒ - ದಿ॒ದ್ಧ್ಮಃ ಪಞ್ಚ॑ ಚ) (ಅ. 10)

(ತೃತೀಯ॑ಸ್ಯಾಂ - ದೇ॒ವಸ್ಯಾ᳚ಶ್ವಪ॒ರ್॒ಶುಂ-ಯೋಁ ವೈ - ಪೂ᳚ರ್ವೇ॒ದ್ಯುಃ - ಕರ್ಮ॑ಣೇ ವಾ॒ - ಮಿನ್ದ್ರೋ॑ ವೃ॒ತ್ರಮ॑ಹ॒ನ್-ಥ್ಸೋ॑-ಽಪೋ - ಽವ॑ಧೂತಂ॒ - ಧೃಷ್ಟಿ॑--ರ್ ದೇ॒ವಸ್ಯೇತ್ಯಾ॑ಹ॒ ಸಂ​ವಁ॑ಪಾಮಿ - ದೇ॒ವಸ್ಯ॒ ಸ್ಫ್ಯಮಾದ॑ದೇ॒ - ವಜ್ರೋ॒ ವೈ ಸ್ಫ್ಯೋ ದಶ॑)

(ತೃ॒ತೀಯ॑ಸ್ಯಾಂ - ಁಯ॒ಜ್ಞಸ್ಯಾನ॑ತಿರೇಕಾಯ - ಪ॒ವಿತ್ರ॑ವತ್ಯ - ಧ್ವ॒ರ್ಯು-ಞ್ಚಾ॑ - ಧಿ॒ಷವ॑ಣಮಸ್ಯ॒ - ನ್ತರಿ॑ಖ್ಷ ಏ॒ವ - ರಖ್ಷ॑ಸಾಮ॒ನ್ತರ್​ಹಿ॑ತ್ಯೈ॒ - ದ್ವೌ ವಾವ ಪುರು॑ಷೋ॒ - ಯದ॒ದಶ್ಚ॒ನ್ದ್ರಮ॑ಸಿ॒ ಮೇದ್ಧ್ಯ॒-ಮ್ಪಞ್ಚಾಶೀ॑ತಿಃ)

(ತೃ॒ತೀಯ॑ಸ್ಯಾಂ॒ - ಁಯಜ॑ಮಾನಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ದ್ವಿತೀಯಃ ಪ್ರಪಾಠಕ-ಸ್ಸಮಾಪ್ತಃ ॥