ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ತೃತೀಯಃ ಪ್ರಪಾಠಕಃ - ದರ್.ಶಪೂರ್ಣಮಾಸೇಷ್ಟಿಬ್ರಾಹ್ಮಣಮ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಅನುವಾಕಂ 1 - ಸ್ತ್ರುಖ್ಸಮ್ಮಾರ್ಗಃ
ಪ್ರತ್ಯು॑ಷ್ಟ॒ಗ್ಂ॒ ರಖ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯ॒ ಇತ್ಯಾ॑ಹ । ರಖ್ಷ॑ಸಾ॒-ಮಪ॑ಹತ್ಯೈ । ಅ॒ಗ್ನೇರ್ವ॒ಸ್ತೇಜಿ॑ಷ್ಠೇನ॒ ತೇಜ॑ಸಾ॒ ನಿಷ್ಟ॑ಪಾ॒ಮೀತ್ಯಾ॑ಹ ಮೇದ್ಧ್ಯ॒ತ್ವಾಯ॑ ।
ಸ್ರುಚ॒-ಸ್ಸಮ್ಮಾ᳚ರ್ಷ್ಟಿ । ಸ್ರು॒ವಮಗ್ರೇ᳚ । ಪುಮಾಗ್ಂ॑ ಸಮೇ॒ವಾಭ್ಯ॒-ಸ್ಸಗ್ಗ್ಶ್ಯ॑ತಿ ಮಿಥುನ॒ತ್ವಾಯ॑ । ಅಥ॑ ಜು॒ಹೂಮ್ । ಅಥೋ॑ಪ॒ಭೃತ᳚ಮ್ । ಅಥ॑ ಧ್ರು॒ವಾಮ್ । ಅ॒ಸೌ ವೈ ಜು॒ಹೂಃ ॥ 1 ॥
ಅ॒ನ್ತರಿ॑ಖ್ಷಮುಪ॒ಭೃತ್ । ಪೃ॒ಥಿ॒ವೀ ಧ್ರು॒ವಾ ।
ಇ॒ಮೇ ವೈ ಲೋ॒ಕಾ-ಸ್ಸ್ರುಚಃ॑ । ವೃಷ್ಟಿ॑-ಸ್ಸ॒ಮಾಂರ್ಜ॑ನಾನಿ । ವೃಷ್ಟಿ॒ರ್ವಾ ಇ॒ಮಾನ್ ಁಲೋ॒ಕಾನ॑ನುಪೂ॒ರ್ವ-ಙ್ಕ॑ಲ್ಪಯತಿ ।
ತೇ ತತಃ॑ ಕ್ಲೃ॒ಪ್ತಾ-ಸ್ಸಮೇ॑ಧನ್ತೇ ।
ಸಮೇ॑ಧನ್ತೇ-ಽಸ್ಮಾ ಇ॒ಮೇ ಲೋ॒ಕಾಃ ಪ್ರ॒ಜಯಾ॑ ಪ॒ಶುಭಿಃ॑ ।
ಯ ಏ॒ವಂ-ವೇಁದ॑ ॥ ಯದಿ॑ ಕಾ॒ಮಯೇ॑ತ॒ ವರ್ಷು॑ಕಃ ಪ॒ರ್ಜನ್ಯ॑-ಸ್ಸ್ಯಾ॒ದಿತಿ॑ । ಅ॒ಗ್ರ॒ತ-ಸ್ಸಮ್ಮೃ॑ಜ್ಯಾತ್ ॥ 2 ॥
ವೃಷ್ಟಿ॑ಮೇ॒ವ ನಿಯ॑ಚ್ಛತಿ । ಅ॒ವಾ॒ಚೀನಾ᳚ಗ್ರಾ॒ ಹಿ ವೃಷ್ಟಿಃ॑ ।
ಯದಿ॑ ಕಾ॒ಮಯೇ॒ತಾವ॑ರ್ಷುಕ-ಸ್ಸ್ಯಾ॒ದಿತಿ॑ । ಮೂ॒ಲ॒ತ-ಸ್ಸಮ್ಮೃ॑ಜ್ಯಾತ್ । ವೃಷ್ಟಿ॑ಮೇ॒ವೋದ್ಯ॑ಚ್ಛತಿ । ತದು॒ ವಾ ಆ॑ಹುಃ । ಅ॒ಗ್ರ॒ತ ಏ॒ವೋಪರಿ॑ಷ್ಟಾ॒-ಥ್ಸಮ್ಮೃ॑ಜ್ಯಾತ್ ।
ಮೂ॒ಲ॒ತೋ॑-ಽಧಸ್ತಾ᳚ತ್ । ತದ॑ನುಪೂ॒ರ್ವ-ಙ್ಕ॑ಲ್ಪತೇ ।
ವರ್ಷು॑ಕೋ ಭವ॒ತೀತಿ॑ ॥ 3 ॥
ಪ್ರಾಚೀ॑ಮಭ್ಯಾ॒ಕಾರ᳚ಮ್ । ಅಗ್ರೈ॑ರನ್ತರ॒ತಃ । ಏ॒ವಮಿ॑ವ॒ ಹ್ಯನ್ನ॑ಮ॒ದ್ಯತೇ᳚ । ಅಥೋ॒ ಅಗ್ರಾ॒ದ್ವಾ ಓಷ॑ಧೀನಾ॒ಮೂರ್ಜ॑-ಮ್ಪ್ರ॒ಜಾ ಉಪ॑ಜೀವನ್ತಿ । ಊ॒ರ್ಜ ಏ॒ವಾ-ನ್ನಾದ್ಯ॒ಸ್ಯಾವ॑ರುದ್ಧ್ಯೈ । ಅ॒ಧಸ್ತಾ᳚-ತ್ಪ್ರ॒ತೀಚೀ᳚ಮ್ । ದ॒ಣ್ಡಮು॑ತ್ತಮ॒ತಃ ।
ಮೂಲೇ॑ನ॒ ಮೂಲ॒-ಮ್ಪ್ರತಿ॑ಷ್ಠಿತ್ಯೈ । ತಸ್ಮಾ॑ದರ॒ತ್ನೌ ಪ್ರಾಞ್ಚ್ಯು॒ಪರಿ॑ಷ್ಟಾ॒-ಲ್ಲೋಮಾ॑ನಿ । ಪ್ರ॒ತ್ಯಞ್ಚ್ಯ॒ಧಸ್ತಾ᳚ತ್ ॥ 4 ॥
ಸ್ರುಗ್ಘ್ಯೇ॑ಷಾ ॥ ಪ್ರಾ॒ಣೋ ವೈ ಸ್ರು॒ವಃ । ಜು॒ಹೂರ್ದಖ್ಷಿ॑ಣೋ॒ ಹಸ್ತಃ॑ । ಉ॒ಪ॒ಭೃಥ್ಸ॒ವ್ಯಃ । ಆ॒ತ್ಮಾ ಧ್ರು॒ವಾ । ಅನ್ನಗ್ಂ॑ ಸ॒ಮಾಂರ್ಜ॑ನಾನಿ । ಮು॒ಖ॒ತೋ ವೈ ಪ್ರಾ॒ಣೋ॑-ಽಪಾ॒ನೋ ಭೂ॒ತ್ವಾ ।
ಆ॒ತ್ಮಾನ॒ಮನ್ನ॑-ಮ್ಪ್ರ॒ವಿಶ್ಯ॑ । ಬಾ॒ಹ್ಯ॒ತಸ್ತ॒ನುವಗ್ಂ॑ ಶುಭಯತಿ । ತಸ್ಮಾ᳚-ಥ್ಸ್ರು॒ವಮೇ॒ವಾಗ್ರೇ॒ ಸಮ್ಮಾ᳚ರ್ಷ್ಟಿ ॥ ಮು॒ಖ॒ತೋ ಹಿ ಪ್ರಾ॒ಣೋ॑-ಽಪಾ॒ನೋ ಭೂ॒ತ್ವಾ ।
ಆ॒ತ್ಮಾನ॒ಮನ್ನ॑-ಮಾವಿ॒ಶತಿ॑ । ತೌ ಪ್ರಾ॑ಣಾಪಾ॒ನೌ ।
ಅವ್ಯ॑ರ್ಧುಕಃ ಪ್ರಾಣಾಪಾ॒ನಾಭ್ಯಾ᳚-ಮ್ಭವತಿ । ಯ ಏ॒ವಂ-ವೇಁದ॑ ॥ 5 ॥
(ಜು॒ಹು--ರ್ ಮೃ॑ಜ್ಯಾ-ದ್- ಭವ॒ತೀತಿ॑ - ಪ್ರ॒ತ್ಯಞ್ಚ್ಯ॒ಧಸ್ತಾ᳚ನ್ - ಮಾರ್ಷ್ಟಿ॒ ಪಞ್ಚ॑ ಚ) (ಅ. 1)
3.3.2 ಆನುವಾಕಂ 2 - ಸಮ್ಮಾರ್ಜನಾನಾಮಗ್ನೌ ಪ್ರಹರಣಮ್
ದಿ॒ವ-ಶ್ಶಿಲ್ಪ॒ಮವ॑ತತಮ್ । ಪೃ॒ಥಿ॒ವ್ಯಾಃ ಕ॒ಕುಭಿ॑ ಶ್ರಿ॒ತಮ್ ।
ತೇನ॑ ವ॒ಯಗ್ಂ ಸ॒ಹಸ್ರ॑ವಲ್ಶೇನ ।
ಸ॒ಪತ್ನ॑-ನ್ನಾಶಯಾಮಸಿ॒ ಸ್ವಾಹೇತಿ॑ ಸ್ರುಖ್ಸ॒ಮಾಂರ್ಜ॑ನಾನ್ಯ॒ಗ್ನೌ ಪ್ರಹ॑ರತಿ ।
ಆಪೋ॒ ವೈ ದ॒ರ್ಭಾಃ । ರೂ॒ಪಮೇ॒ವೈಷಾ॑ಮೇ॒ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ॥ ಅ॒ನು॒ಷ್ಟುಭ॒ರ್ಚಾ । ಆನು॑ಷ್ಟುಭಃ ಪ್ರ॒ಜಾಪ॑ತಿಃ । ಪ್ರಾ॒ಜಾ॒ಪ॒ತ್ಯೋ ವೇ॒ದಃ ।
ವೇ॒ದಸ್ಯಾಗ್ರಗ್ಗ್॑ ಸ್ರುಖ್ಸ॒ಮಾಂರ್ಜ॑ನಾನಿ ॥ 6 ॥
ಸ್ವೇನೈ॒ವೈನಾ॑ನಿ॒ ಛನ್ದ॑ಸಾ । ಸ್ವಯಾ॑ ದೇ॒ವತ॑ಯಾ॒ ಸಮ॑ರ್ಧಯತಿ । ಅಥೋ॒ ಋಗ್ವಾವ ಯೋಷಾ᳚ । ದ॒ರ್ಭೋ
ವೃಷಾ᳚ । ತನ್ಮಿ॑ಥು॒ನಮ್ । ಮಿ॒ಥು॒ನಮೇ॒ವಾಸ್ಯ॒ ತ-ದ್ಯ॒ಜ್ಞೇ ಕ॑ರೋತಿ ಪ್ರ॒ಜನ॑ನಾಯ । ಪ್ರಜಾ॑ಯತೇ ಪ್ರ॒ಜಯಾ॑ ಪ॒ಶುಭಿ॒-ರ್ಯಜ॑ಮಾನಃ ॥ ತಾನ್ಯೇಕೇ॒ ವೃಥೈ॒ವಾಪಾ᳚ಸ್ಯನ್ತಿ ।
ತತ್ತಥಾ॒ ನ ಕಾ᳚ರ್ಯಮ್ । ಆರ॑ಬ್ಧಸ್ಯ ಯ॒ಜ್ಞಿಯ॑ಸ್ಯ॒ ಕರ್ಮ॑ಣ॒-ಸ್ಸ ವಿ॑ದೋ॒ಹಃ ॥ 7 ॥
ಯದ್ಯೇ॑ನಾನಿ ಪ॒ಶವೋ॑-ಽಭಿ॒ತಿಷ್ಠೇ॑ಯುಃ ।
ನ ತ-ತ್ಪ॒ಶುಭ್ಯಃ॒ ಕಮ್ । ಅ॒ದ್ಭಿರ್ಮಾ᳚-ರ್ಜಯಿ॒ತ್ವೋತ್ಕ॒ರೇ ನ್ಯ॑ಸ್ಯೇತ್ ।
ಯದ್ವೈ ಯ॒ಜ್ಞಿಯ॑ಸ್ಯ॒ ಕರ್ಮ॑ಣೋ॒-ಽನ್ಯತ್ರಾಹು॑ತೀಭ್ಯ-ಸ್ಸ॒ನ್ತಿಷ್ಠ॑ತೇ । ಉ॒ತ್ಕ॒ರೋ ವಾವ ತಸ್ಯ॑ ಪ್ರತಿ॒ಷ್ಠಾ । ಏ॒ತಾಗ್ಂ ಹಿ ತಸ್ಮೈ᳚ ಪ್ರತಿ॒ಷ್ಠಾ-ನ್ದೇ॒ವಾ-ಸ್ಸ॒ಮಭ॑ರನ್ನ್ ।
ಯದ॒ದ್ಭಿರ್ಮಾ॒ರ್ಜಯ॑ತಿ । ತೇನ॑ ಶಾ॒ನ್ತಮ್ । ಯದು॑ತ್ಕ॒ರೇ ನ್ಯ॒ಸ್ಯತಿ॑ । ಪ್ರ॒ತಿ॒ಷ್ಠಾಮೇ॒ವೈನಾ॑ನಿ॒ ತ-ದ್ಗ॑ಮಯತಿ ॥ 8 ॥
ಪ್ರತಿ॑ತಿಷ್ಠತಿ ಪ್ರ॒ಜಯಾ॑ ಪ॒ಶುಭಿ॒ರ್ಯಜ॑ಮಾನಃ ॥
ಅಥೋ᳚ ಸ್ತ॒ಮ್ಬಸ್ಯ॒ ವಾ ಏ॒ತ-ದ್ರೂ॒ಪಮ್ । ಯ-ಥ್ಸ್ರು॑ಖ್ಸ॒ಮಾಂರ್ಜ॑ನಾನಿ । ಸ್ತ॒ಮ್ಬ॒ಶೋ ವಾ ಓಷ॑ಧಯಃ ।
ತಾಸಾ᳚-ಞ್ಜರತ್ಕ॒ಖ್ಷೇ ಪ॒ಶವೋ॒ ನ ರ॑ಮನ್ತೇ । ಅಪ್ರಿ॑ಯೋ॒ ಹ್ಯೇ॑ಷಾ-ಞ್ಜರತ್ಕ॒ಖ್ಷಃ । ಯಾವ॑ದಪ್ರಿಯೋ ಹ॒ ವೈ ಜ॑ರತ್ಕ॒ಖ್ಷಃ ಪ॑ಶೂ॒ನಾಮ್ । ತಾವ॑ದಪ್ರಿಯಃ ಪಶೂ॒ನಾ-ಮ್ಭ॑ವತಿ । ಯಸ್ಯೈ॒ತಾನ್ಯ॒ನ್ಯತ್ರಾ॒ಗ್ನೇ-ರ್ದಧ॑ತಿ ।
ನ॒ವ॒ದಾವ್ಯಾ॑ಸು॒ ವಾ ಓಷ॑ಧೀಷು ಪ॒ಶವೋ॑ ರಮನ್ತೇ ॥ 9 ॥
ನ॒ವ॒ದಾ॒ವೋ ಹ್ಯೇ॑ಷಾ-ಮ್ಪ್ರಿ॒ಯಃ । ಯಾವ॑ತ್ಪ್ರಿಯೋ ಹ॒ ವೈ ನ॑ವದಾ॒ವಃ ಪ॑ಶೂ॒ನಾಮ್ । ತಾವ॑ತ್ಪ್ರಿಯಃ ಪಶೂ॒ನಾ-ಮ್ಭ॑ವತಿ । ಯಸ್ಯೈ॒ತಾನ್ಯ॒ಗ್ನೌ ಪ್ರ॒ಹರ॑ನ್ತಿ । ತಸ್ಮಾ॑ದೇ॒ತಾನ್ಯ॒ಗ್ನಾವೇ॒ವ ಪ್ರಹ॑ರೇತ್ । ಯ॒ತ॒ರಸ್ಮಿನ್᳚-ಥ್ಸಮ್ಮೃ॒ಜ್ಯಾತ್ ।
ಪ॒ಶೂ॒ನಾ-ನ್ಧೃತ್ಯೈ᳚ ॥ ಯೋ ಭೂ॒ತಾನಾ॒ಮಧಿ॑ಪತಿಃ । ರು॒ದ್ರಸ್ತ॑ನ್ತಿಚ॒ರೋ ವೃಷಾ᳚ । ಪ॒ಶೂನ॒ಸ್ಮಾಕ॒-ಮ್ಮಾ ಹಿಗ್ಂ॑ಸೀಃ । ಏ॒ತದ॑ಸ್ತು ಹು॒ತ-ನ್ತವ॒ ಸ್ವಾಹೇತ್ಯ॑ಗ್ನಿ ಸ॒ಮಾಂರ್ಜ॑ನಾನ್ಯ॒ಗ್ನೌ ಪ್ರಹ॑ರತಿ । ಏ॒ಷಾ ವಾ ಏ॒ತೇಷಾಂ॒-ಯೋಁನಿಃ॑ । ಏ॒ಷಾ ಪ್ರ॑ತಿ॒ಷ್ಠಾ । ಸ್ವಾಮೇ॒ವೈನಾ॑ನಿ॒ ಯೋನಿ᳚ಮ್ ।
ಸ್ವಾ-ಮ್ಪ್ರ॑ತಿ॒ಷ್ಠಾ-ಙ್ಗ॑ಮಯತಿ । ಪ್ರತಿ॑ತಿಷ್ಠತಿ ಪ್ರ॒ಜಯಾ॑ ಪ॒ಶುಭಿ॒ರ್ಯಜ॑ಮಾನಃ ॥ 10 ॥
(ವೇ॒ದಸ್ಯಾಗ್ರಗ್ಗ್॑ ಸ್ರುಖ್ಸ॒ಮಾಂರ್ಜ॑ನಾನಿ - ವಿದೋ॒ಹೋ - ಗ॑ಮಯತಿ - ಪ॒ಶವೋ॑ ರಮನ್ತೇ - ಹಿಗ್ಂಸೀ॒-ಷ್ಷಟ್ಚ॑) (ಅ. 2)
ಅನುವಾಕಂ 3 - ಪತ್ನೀಸನ್ನಹನಮ್
ಅಯ॑ಜ್ಞೋ॒ ವಾ ಏ॒ಷಃ । ಯೋ॑-ಽಪ॒ತ್ನೀಕಃ॑ । ನ ಪ್ರ॒ಜಾಃ ಪ್ರಜಾ॑ಯೇರನ್ನ್ । ಪತ್ನ್ಯನ್ವಾ᳚ಸ್ತೇ । ಯ॒ಜ್ಞಮೇ॒ವಾಕಃ॑ । ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ । ಯ-ತ್ತಿಷ್ಠ॑ನ್ತೀ ಸ॒ನಂಹ್ಯೇ॑ತ ।
ಪ್ರಿ॒ಯ-ಞ್ಜ್ಞಾ॒ತಿಗ್ಂ ರು॑ನ್ಧ್ಯಾತ್ । ಆಸೀ॑ನಾ॒ ಸನ್ನ॑ಹ್ಯತೇ ।
ಆಸೀ॑ನಾ॒ ಹ್ಯೇ॑ಷಾ ವೀ॒ರ್ಯ॑-ಙ್ಕ॒ರೋತಿ॑ ॥ 11 ॥
ಯ-ತ್ಪ॒ಶ್ಚಾತ್-ಪ್ರಾಚ್ಯ॒ನ್ವಾಸೀ॑ತ । ಅ॒ನಯಾ॑ ಸ॒ಮದ॑-ನ್ದಧೀತ ।
ದೇ॒ವಾನಾ॒-ಮ್ಪತ್ನಿ॑ಯಾ ಸ॒ಮದ॑-ನ್ದಧೀತ । ದೇಶಾ᳚-ದ್ದಖ್ಷಿಣ॒ತ ಉದೀ॒ಚ್ಯನ್ವಾ᳚ಸ್ತೇ । ಆ॒ತ್ಮನೋ॑ ಗೋಪೀ॒ಥಾಯ॑ ॥ ಆ॒ಶಾಸಾ॑ನಾ ಸೌಮನ॒ಸಮಿತ್ಯಾ॑ಹ । ಮೇದ್ಧ್ಯಾ॑ಮೇ॒ವೈನಾ॒-ಙ್ಕೇವ॑ಲೀ-ಙ್ಕೃ॒ತ್ವಾ । ಆ॒ಶಿಷಾ॒ ಸಮ॑ರ್ಧಯತಿ ।
ಅ॒ಗ್ನೇರನು॑ವ್ರತಾ ಭೂ॒ತ್ವಾ ಸನ್ನ॑ಹ್ಯೇ ಸುಕೃ॒ತಾಯ॒ ಕಮಿತ್ಯಾ॑ಹ । ಏ॒ತದ್ವೈ ಪತ್ನಿ॑ಯೈ ವ್ರತೋಪ॒ನಯ॑ನಮ್ ॥ 12 ॥
ತೇನೈ॒ವೈನಾಂ᳚-ವ್ರಁ॒ತಮುಪ॑ನಯತಿ । ತಸ್ಮಾ॑ದಾಹುಃ ।
ಯಶ್ಚೈ॒ವಂ-ವೇಁದ॒ ಯಶ್ಚ॒ನ । ಯೋಕ್ತ್ರ॑ಮೇ॒ವ ಯು॑ತೇ । ಯಮ॒ನ್ವಾಸ್ತೇ᳚ । ತಸ್ಯಾ॒ಮುಷ್ಮಿ॑ನ್ ಁಲೋ॒ಕೇ ಭ॑ವ॒ತೀತಿ॒ ಯೋಕ್ತ್ರೇ॑ಣ । ಯ-ದ್ಯೋಕ್ತ್ರ᳚ಮ್ । ಸ ಯೋಗಃ॑ । ಯದಾಸ್ತೇ᳚ । ಸ ಖ್ಷೇಮಃ॑ ॥ 13 ॥
ಯೋ॒ಗ॒ಖ್ಷೇ॒ಮಸ್ಯ॒ ಕ್ಲೃಪ್ತ್ಯೈ᳚ ॥ ಯು॒ಕ್ತ-ಙ್ಕ್ರಿ॑ಯಾತಾ ಆ॒ಶೀಃ ಕಾಮೇ॑ ಯುಜ್ಯಾತಾ॒ ಇತಿ॑ । ಆ॒ಶಿಷ॒-ಸ್ಸಮೃ॑ದ್ಧ್ಯೈ । ಗ್ರ॒ನ್ಥಿ-ಙ್ಗ್ರ॑ಥ್ನಾತಿ । ಆ॒ಶಿಷ॑ ಏ॒ವಾಸ್ಯಾ॒-ಮ್ಪರಿ॑ಗೃಹ್ಣಾತಿ ।
ಪುಮಾ॒ನ್॒. ವೈ ಗ್ರ॒ನ್ಥಿಃ । ಸ್ತ್ರೀ ಪತ್ನೀ᳚ । ತ-ನ್ಮಿ॑ಥು॒ನಮ್ ।
ಮಿ॒ಥು॒ನಮೇ॒ವಾಸ್ಯ॒ ತ-ದ್ಯ॒ಜ್ಞೇ ಕ॑ರೋತಿ ಪ್ರ॒ಜನ॑ನಾಯ ।
ಪ್ರಜಾ॑ಯತೇ ಪ್ರ॒ಜಯಾ॑ ಪ॒ಶುಭಿ॒-ರ್ಯಜ॑ಮಾನಃ ॥ 14 ॥
ಅಥೋ॑ ಅ॒ರ್ಧೋ ವಾ ಏ॒ಷ ಆ॒ತ್ಮನಃ॑ । ಯ-ತ್ಪತ್ನೀ᳚ ।
ಯ॒ಜ್ಞಸ್ಯ॒ ಧೃತ್ಯಾ॒ ಅಶಿ॑ಥಿಲಮ್ಭಾವಾಯ ॥
ಸು॒ಪ್ರ॒ಜಸ॑ಸ್ತ್ವಾ ವ॒ಯಗ್ಂ ಸು॒ಪತ್ನೀ॒ರುಪ॑ಸೇದಿ॒ಮೇತ್ಯಾ॑ಹ ।
ಯ॒ಜ್ಞಮೇ॒ವ ತ-ನ್ಮಿ॑ಥು॒ನೀ ಕ॑ರೋತಿ । ಊ॒ನೇ-ಽತಿ॑ರಿಕ್ತ-ನ್ಧೀಯಾತಾ॒ ಇತಿ॒ ಪ್ರಜಾ᳚ತ್ಯೈ ॥ ಮ॒ಹೀ॒ನಾ-ಮ್ಪಯೋ॒-ಽಸ್ಯೋಷ॑ಧೀನಾ॒ಗ್ಂ॒ ರಸ॒ ಇತ್ಯಾ॑ಹ । ರೂ॒ಪಮೇ॒ವಾಸ್ಯೈ॒-ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ । ತಸ್ಯ॒ ತೇ-ಽಖ್ಷೀ॑ಯಮಾಣಸ್ಯ॒ ನಿರ್ವ॑ಪಾಮಿ ದೇವಯ॒ಜ್ಯಾಯಾ॒ ಇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥ 15 ॥
(ಕ॒ರೋತಿ॑ - ವ್ರತೋಪ॒ನಯ॑ನಂ॒ - ಖ್ಷೇಮೋ॒ - ಯಜ॑ಮಾನಃ - ಶಾಸ್ತೇ) (ಅ. 3)
ಅನುವಾಕಂ 4 - ಆಜ್ಯೋತ್ಪವನಮ್
ಘೃ॒ತ-ಞ್ಚ॒ ವೈ ಮಧು॑ ಚ ಪ್ರ॒ಜಾಪ॑ತಿರಾಸೀತ್ । ಯತೋ॒ ಮದ್ಧ್ವಾ॑ಸೀತ್ । ತತಃ॑ ಪ್ರ॒ಜಾ ಅ॑ಸೃಜತ ।
ತಸ್ಮಾ॒-ನ್ಮಧು॑ಷಿ ಪ್ರ॒ಜನ॑ನಮಿವಾಸ್ತಿ ।
ತಸ್ಮಾ॒-ನ್ಮಧು॑ಷಾ॒ ನ ಪ್ರಚ॑ರನ್ತಿ । ಯಾ॒ತಯಾ॑ಮ॒ ಹಿ । ಆಜ್ಯೇ॑ನ॒ ಪ್ರಚ॑ರನ್ತಿ । ಯ॒ಜ್ಞೋ ವಾ ಆಜ್ಯ᳚ಮ್ । ಯ॒ಜ್ಞೇನೈ॒ವ ಯ॒ಜ್ಞ-ಮ್ಪ್ರಚ॑ರ॒ನ್ತ್ಯಯಾ॑ತಯಾಮತ್ವಾಯ ।
ಪತ್ನ್ಯವೇ᳚ಖ್ಷತೇ ॥ 16 ॥
ಮಿ॒ಥು॒ನ॒ತ್ವಾಯ॒ ಪ್ರಜಾ᳚ತ್ಯೈ । ಯದ್ವೈ ಪತ್ನೀ॑ ಯ॒ಜ್ಞಸ್ಯ॑ ಕ॒ರೋತಿ॑ । ಮಿ॒ಥು॒ನ-ನ್ತತ್ । ಅಥೋ॒ ಪತ್ನಿ॑ಯಾ ಏ॒ವೈಷ ಯ॒ಜ್ಞಸ್ಯಾ᳚ನ್ವಾರ॒ಮ್ಭೋ-ಽನ॑ವಚ್ಛಿತ್ತ್ಯೈ ॥
ಅ॒ಮೇ॒ದ್ಧ್ಯಂ-ವಾಁ ಏ॒ತ-ತ್ಕ॑ರೋತಿ । ಯ-ತ್ಪತ್ನ್ಯ॒ವೇಖ್ಷ॑ತೇ ।
ಗಾರ್ಹ॑ಪ॒ತ್ಯೇ ಽಧಿ॑ಶ್ರಯತಿ ಮೇದ್ಧ್ಯ॒ತ್ವಾಯ॑ । ಆ॒ಹ॒ವ॒ನೀಯ॑-ಮ॒ಭ್ಯುದ್ದ್ರ॑ವತಿ । ಯ॒ಜ್ಞಸ್ಯ॒ ಸನ್ತ॑ತ್ಯೈ । ತೇಜೋ॑-ಽಸಿ॒ ತೇಜೋ-ಽನು॒ ಪ್ರೇಹೀತ್ಯಾ॑ಹ ॥ 17 ॥
ತೇಜೋ॒ ವಾ ಅ॒ಗ್ನಿಃ । ತೇಜ॒ ಆಜ್ಯ᳚ಮ್ । ತೇಜ॑ಸೈ॒ವ ತೇಜ॒-ಸ್ಸಮ॑ರ್ಧಯತಿ । ಅ॒ಗ್ನಿಸ್ತೇ॒ ತೇಜೋ॒ ಮಾ ವಿನೈ॒ದಿತ್ಯಾ॒ಹಾಹಿಗ್ಂ॑ಸಾಯೈ । ಸ್ಫ್ಯಸ್ಯ॒ ವರ್ತ್ಮನ್᳚ಥ್
ಸಾದಯತಿ । ಯ॒ಜ್ಞಸ್ಯ॒ ಸನ್ತ॑ತ್ಯೈ । ಅ॒ಗ್ನೇರ್ಜಿ॒ಹ್ವಾ-ಽಸಿ॑ ಸು॒ಭೂರ್ದೇ॒ವಾನಾ॒ಮಿತ್ಯಾ॑ಹ । ಯ॒ಥಾ॒ ಯ॒ಜುರೇ॒ವೈತತ್ । ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಭ॒ವೇತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥ 18 ॥
ತದ್ವಾ ಅತಃ॑ ಪ॒ವಿತ್ರಾ᳚ಭ್ಯಾಮೇ॒ವೋ-ತ್ಪು॑ನಾತಿ । ಯಜ॑ಮಾನೋ॒ ವಾ ಆಜ್ಯ᳚ಮ್ । ಪ್ರಾ॒ಣಾ॒ಪಾ॒ನೌ ಪ॒ವಿತ್ರೇ᳚ । ಯಜ॑ಮಾನ ಏ॒ವ ಪ್ರಾ॑ಣಾಪಾ॒ನೌ ದ॑ಧಾತಿ । ಪು॒ನ॒ರಾ॒ಹಾರ᳚ಮ್ ।
ಏ॒ವಮಿ॑ವ॒ ಹಿ ಪ್ರಾ॑ಣಾಪಾ॒ನೌ ಸ॒ಚಂರ॑ತಃ ।
ಶು॒ಕ್ರಮ॑ಸಿ॒ ಜ್ಯೋತಿ॑ರಸಿ॒ ತೇಜೋ॒-ಽಸೀತ್ಯಾ॑ಹ ।
ರೂ॒ಪಮೇ॒ವಾಸ್ಯೈ॒ ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ । ತ್ರಿರ್ಯಜು॑ಷಾ । ತ್ರಯ॑ ಇ॒ಮೇ ಲೋ॒ಕಾಃ ॥ 19 ॥
ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ᳚ । ತ್ರಿಃ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ ।
ಅಥೋ॑ ಮೇದ್ಧ್ಯ॒ತ್ವಾಯ॑ । ಅಥಾಜ್ಯ॑ವತೀಭ್ಯಾಮ॒ಪಃ । ರೂ॒ಪಮೇ॒ವಾಸಾ॑ಮೇ॒ತ-ದ್ವರ್ಣ॑-ನ್ದಧಾತಿ ।
ಅಪಿ॒ ವಾ ಉ॒ತಾಹುಃ॑ । ಯಥಾ॑ ಹ॒ ವೈ ಯೋಷಾ॑ ಸು॒ವರ್ಣ॒ಗ್ಂ॒ ಹಿರ॑ಣ್ಯ-ಮ್ಪೇಶ॒ಲ-ಮ್ಬಿಭ್ರ॑ತೀ ರೂ॒ಪಾಣ್ಯಾಸ್ತೇ᳚ ।
ಏ॒ವಮೇ॒ತಾ ಏ॒ತರ್ಹೀತಿ॑ । ಆಪೋ॒ ವೈ ಸರ್ವಾ॑ ದೇ॒ವತಾಃ᳚ ॥ 20 ॥
ಏ॒ಷಾ ಹಿ ವಿಶ್ವೇ॑ಷಾ-ನ್ದೇ॒ವಾನಾ᳚-ನ್ತ॒ನೂಃ । ಯದಾಜ್ಯ᳚ಮ್ ॥ ತತ್ರೋ॒ಭಯೋ᳚ರ್ಮೀಮಾ॒ಗ್ಂ॒ಸಾ । ಜಾ॒ಮಿ ಸ್ಯಾತ್ । ಯ-ದ್ಯಜು॒ಷಾ-ಽಽಜ್ಯಂ॒-ಯಁಜು॑ಷಾ॒-ಽಪ ಉ॑ತ್ಪುನೀ॒ಯಾತ್ ।
ಛನ್ದ॑ಸಾ॒-ಽಪ ಉತ್ಪು॑ನಾ॒ತ್ಯಜಾ॑ಮಿತ್ವಾಯ । ಅಥೋ॑ ಮಿಥುನ॒ತ್ವಾಯ॑ । ಸಾ॒ವಿ॒ತ್ರಿ॒ಯರ್ಚಾ । ಸ॒ವಿ॒ತೃಪ್ರ॑ಸೂತ-ಮ್ಮೇ॒ ಕರ್ಮಾ॑ಸ॒ದಿತಿ॑ । ಸ॒ವಿ॒ತೃಪ್ರ॑ಸೂತಮೇ॒ವಾಸ್ಯ॒ ಕರ್ಮ॑ ಭವತಿ । ಪ॒ಚ್ಛೋ ಗಾ॑ಯತ್ರಿ॒ಯಾ ತ್ರಿ॑-ಷ್ಷಮೃದ್ಧ॒ತ್ವಾಯ॑ । ಅ॒ದ್ಭಿರೇ॒ವೌಷ॑ಧೀ॒-ಸ್ಸನ್ನ॑ಯತಿ । ಓಷ॑ಧೀಭಿಃ ಪ॒ಶೂನ್ । ಪ॒ಶುಭಿ॒ರ್ಯಜ॑ಮಾನಮ್ । ಶು॒ಕ್ರ-ನ್ತ್ವಾ॑ ಶು॒ಕ್ರಾಯಾ॒-ಞ್ಜ್ಯೋತಿ॑ಸ್ತ್ವಾ॒ ಜ್ಯೋತಿ॑ಷ್ಯ॒ರ್ಚಿಸ್ತ್ವಾ॒ ಽರ್ಚಿಷೀತ್ಯಾ॑ಹ
ಸರ್ವ॒ತ್ವಾಯ॑ । ಪರ್ಯಾ᳚ಪ್ತ್ಯಾ॒ ಅನ॑ನ್ತರಾಯಾಯ ॥ 21 ॥
(ಈ॒ಖ್ಷ॒ತ॒- ಆ॒ಹ॒-ಶಾ॒ಸ್ತೇ॒-ಲೋ॒ಕಾ - ದೇ॒ವತಾ॑ - ಭವತಿ॒ ಷಟ್ಚ॑) (ಅ. 4)
ಅನುವಾಕಂ 5 - ಆಜ್ಯಗ್ರಹಣಮ್
ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸನ್ನ್ ।
ಸ ಏ॒ತಮಿನ್ದ್ರ॒ ಆಜ್ಯ॑ಸ್ಯಾವಕಾ॒ಶ-ಮ॑ಪಶ್ಯತ್ ।
ತೇನಾವೈ᳚ಖ್ಷತ । ತತೋ॑ ದೇ॒ವಾ ಅಭ॑ವನ್ನ್ । ಪರಾ-ಽಸು॑ರಾಃ ।
ಯ ಏ॒ವಂ-ವಿಁ॒ದ್ವಾನಾಜ್ಯ॑-ಮ॒ವೇಖ್ಷ॑ತೇ ।
ಭವ॑ತ್ಯಾ॒ತ್ಮನಾ᳚ । ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ । ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ ।
ಯದಾಜ್ಯೇ॑ನಾ॒ನ್ಯಾನಿ॑ ಹ॒ವೀಗ್ಷ್ಯ॑-ಭಿಘಾ॒ರಯ॑ತಿ ॥ 22 ॥
ಅಥ॒ ಕೇನಾಜ್ಯ॒ಮಿತಿ॑ । ಸ॒ತ್ಯೇನೇತಿ॑ ಬ್ರೂಯಾತ್ । ಚಖ್ಷು॒ರ್ವೈ ಸ॒ತ್ಯಮ್ । ಸ॒ತ್ಯೇನೈ॒ವೈನ॑ದ॒-ಭಿಘಾ॑ರಯತಿ । ಈ॒ಶ್ವ॒ರೋ ವಾ ಏ॒ಷೋ᳚-ಽನ್ಧೋ ಭವಿ॑ತೋಃ । ಯಶ್ಚಖ್ಷು॒ಷಾ ಽಽಜ್ಯ॑ಮ॒ವೇಖ್ಷ॑ತೇ । ನಿ॒ಮೀಲ್ಯಾವೇ᳚ಖ್ಷೇತ । ದಾ॒ಧಾರಾ॒ತ್ಮಞ್ಚಖ್ಷುಃ॑ । ಅ॒ಭ್ಯಾಜ್ಯ॑-ಙ್ಘಾರಯತಿ ॥ ಆಜ್ಯ॑-ಙ್ಗೃಹ್ಣಾತಿ ॥ 23 ॥
ಛನ್ದಾಗ್ಂ॑ಸಿ॒ ವಾ ಆಜ್ಯ᳚ಮ್ । ಛನ್ದಾಗ್॑ಸ್ಯೇ॒ವ ಪ್ರೀ॑ಣಾತಿ । ಚ॒ತುರ್ಜು॒ಹ್ವಾ-ಙ್ಗೃ॑ಹ್ಣಾತಿ । ಚತು॑ಷ್ಪಾದಃ ಪ॒ಶವಃ॑ । ಪ॒ಶೂನೇ॒ವಾವ॑ರುನ್ಧೇ । ಅ॒ಷ್ಟಾವು॑ಪ॒ಭೃತಿ॑ ।
ಅ॒ಷ್ಟಾಖ್ಷ॑ರಾ ಗಾಯ॒ತ್ರೀ । ಗಾ॒ಯ॒ತ್ರಃ ಪ್ರಾ॒ಣಃ । ಪ್ರಾ॒ಣಮೇ॒ವ ಪ॒ಶುಷು॑ ದಧಾತಿ ।
ಚ॒ತುರ್ಧ್ರು॒ವಾಯಾ᳚ಮ್ ॥ 24 ॥
ಚತು॑ಷ್ಪಾದಃ ಪ॒ಶವಃ॑ । ಪ॒ಶುಷ್ವೇ॒-ವೋಪರಿ॑ಷ್ಟಾ॒ತ್-ಪ್ರತಿ॑ತಿಷ್ಠತಿ । ಯ॒ಜ॒ಮಾ॒ನ॒ದೇ॒ವ॒ತ್ಯಾ॑ ವೈ ಜು॒ಹೂಃ । ಭ್ರಾ॒ತೃ॒ವ್ಯ॒ದೇ॒ವ॒ತ್ಯೋ॑ಪ॒ಭೃತ್ ।
ಚ॒ತುರ್ಜು॒ಹ್ವಾ-ಙ್ಗೃ॒ಹ್ಣನ್ಭೂಯೋ॑ ಗೃಹ್ಣೀಯಾತ್ । ಅ॒ಷ್ಟಾವು॑ಪ॒ಭೃತಿ॑ ಗೃ॒ಹ್ಣನ್ ಕನೀ॑ಯಃ ।
ಯಜ॑ಮಾನಾಯೈ॒ವ ಭ್ರಾತೃ॑ವ್ಯ॒ಮುಪ॑ಸ್ತಿ-ಙ್ಕರೋತಿ ॥
ಗೌರ್ವೈ ಸ್ರುಚಃ॑ । ಚ॒ತುರ್ಜು॒ಹ್ವಾ-ಙ್ಗೃ॑ಹ್ಣಾತಿ । ತಸ್ಮಾ॒ಚ್ಚತು॑ಷ್ಪದೀ ॥ 25 ॥
ಅ॒ಷ್ಟಾವು॑ಪ॒ಭೃತಿ॑ । ತಸ್ಮಾ॑ದ॒ಷ್ಟಾಶ॑ಫಾ । ಚ॒ತುರ್ಧ್ರು॒ವಾಯಾ᳚ಮ್ । ತಸ್ಮಾ॒ಚ್ಚತು॑-ಸ್ಸ್ತನಾ ।
ಗಾಮೇ॒ವ ತ-ಥ್ಸಗ್ಗ್ಸ್ಕ॑ರೋತಿ । ಸಾ-ಽಸ್ಮೈ॒ ಸಗ್ಗ್ಸ್ಕೃ॒ತೇಷ॒ಮೂರ್ಜ॑-ನ್ದುಹೇ ।
ಯಜ್ಜು॒ಹ್ವಾ-ಙ್ಗೃ॒ಹ್ಣಾತಿ॑ । ಪ್ರ॒ಯಾ॒ಜೇಭ್ಯ॒ಸ್ತತ್ ।
ಯದು॑ಪ॒ಭೃತಿ॑ । ಪ್ರ॒ಯಾ॒ಜಾ॒ನೂ॒ಯಾ॒ಜೇಭ್ಯ॒ಸ್ತತ್ । ಸರ್ವ॑ಸ್ಮೈ॒ ವಾ ಏ॒ತ-ದ್ಯ॒ಜ್ಞಾಯ॑ ಗೃಹ್ಯತೇ ।
ಯದ್ಧ್ರು॒ವಾಯಾ॒ಮಾಜ್ಯ᳚ಮ್ ॥ 26 ॥
(ಅ॒ಭಿ॒ಘಾ॒ರಯ॑ತಿ - ಗೃಹ್ಣಾತಿ - ಧ್ರು॒ವಾಯಾಂ॒ - ಚತು॑ಷ್ಪದೀ॒ - ಪ್ರಯಾಜಾನೂಯಾ॒ಜೇಭ್ಯ॒ಸ್ತ-ದ್ದ್ವೇ॒ ಚ॑) (ಅ. 5)
ಅನುವಾಕಂ 6 - ಸ್ತ್ರುಖ್ಸಾದನಮ್
ಆಪೋ॑ ದೇವೀರಗ್ರೇಪುವೋ ಅಗ್ರೇಗುವ॒ ಇತ್ಯಾ॑ಹ । ರೂ॒ಪಮೇ॒ವಾಸಾ॑ಮೇ॒ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ।
ಅಗ್ರ॑ ಇ॒ಮಂ-ಯಁ॒ಜ್ಞ-ನ್ನ॑ಯ॒ತಾಗ್ರೇ॑ ಯ॒ಜ್ಞಪ॑ತಿ॒ಮಿತ್ಯಾ॑ಹ । ಅಗ್ರ॑ ಏ॒ವ ಯ॒ಜ್ಞ-ನ್ನ॑ಯನ್ತಿ । ಅಗ್ರೇ॑ ಯ॒ಜ್ಞಪ॑ತಿಮ್ ।
ಯು॒ಷ್ಮಾನಿನ್ದ್ರೋ॑-ಽವೃಣೀತ ವೃತ್ರ॒ತೂರ್ಯೇ॑ ಯೂ॒ಯಮಿನ್ದ್ರ॑ಮವೃಣೀದ್ಧ್ವಂ-ವೃಁತ್ರ॒ತೂರ್ಯ॒ ಇತ್ಯಾ॑ಹ ।
ವೃ॒ತ್ರಗ್ಂ ಹ॑ ಹನಿ॒ಷ್ಯನ್ನಿನ್ದ್ರ॒ ಆಪೋ॑ ವವ್ರೇ । ಆಪೋ॒ ಹೇನ್ದ್ರಂ॑-ವಁವ್ರಿರೇ । ಸ॒ಜ್ಞಾಂ-ಮೇ॒ವಾಸಾ॑-ಮೇ॒ತ-ಥ್ಸಾಮಾ॑ನಂ॒-ವ್ಯಾಁಚ॑ಷ್ಟೇ । ಪ್ರೋಖ್ಷಿ॑ತಾ॒-ಸ್ಸ್ಥೇತ್ಯಾ॑ಹ ॥ 27 ॥
ತೇನಾಪಃ॒ ಪ್ರೋಖ್ಷಿ॑ತಾಃ ॥ ಅ॒ಗ್ನಿ-ರ್ದೇ॒ವೇಭ್ಯೋ॒ ನಿಲಾ॑ಯತ । ಕೃಷ್ಣೋ॑ ರೂ॒ಪ-ಙ್ಕೃ॒ತ್ವಾ । ಸ ವನ॒ಸ್ಪತೀ॒-ನ್ಪ್ರಾವಿ॑ಶತ್ । ಕೃಷ್ಣೋ᳚-ಽಸ್ಯಾಖರೇ॒ಷ್ಠೋ᳚-ಽಗ್ನಯೇ᳚ ತ್ವಾ॒ ಸ್ವಾಹೇತ್ಯಾ॑ಹ ।
ಅ॒ಗ್ನಯ॑ ಏ॒ವೈನ॒-ಞ್ಜುಷ್ಟ॑-ಙ್ಕರೋತಿ । ಅಥೋ॑ ಅ॒ಗ್ನೇರೇ॒ವ ಮೇಧ॒ಮವ॑ರುನ್ಧೇ ॥ ವೇದಿ॑ರಸಿ ಬ॒ರ್॒ಹಿಷೇ᳚ ತ್ವಾ॒ ಸ್ವಾಹೇತ್ಯಾ॑ಹ । ಪ್ರ॒ಜಾ ವೈ ಬ॒ರ್॒ಹಿಃ । ಪೃ॒ಥಿ॒ವೀ ವೇದಿಃ॑ ॥ 28 ॥
ಪ್ರ॒ಜಾ ಏ॒ವ ಪೃ॑ಥಿ॒ವ್ಯಾ-ಮ್ಪ್ರತಿ॑ಷ್ಠಾಪಯತಿ ।
ಬ॒ರ್॒ಹಿರ॑ಸಿ ಸ್ರು॒ಗ್ಭ್ಯಸ್ತ್ವಾ॒ ಸ್ವಾಹೇತ್ಯಾ॑ಹ ।
ಪ್ರ॒ಜಾ ವೈ ಬ॒ರ್॒ಹಿಃ । ಯಜ॑ಮಾನ॒-ಸ್ಸ್ರುಚಃ॑ । ಯಜ॑ಮಾನಮೇ॒ವ ಪ್ರ॒ಜಾಸು॒ ಪ್ರತಿ॑ಷ್ಠಾಪಯತಿ ॥
ದಿ॒ವೇ ತ್ವಾ॒-ಽನ್ತರಿ॑ಖ್ಷಾಯ ತ್ವಾ ಪೃಥಿ॒ವ್ಯೈ ತ್ವೇತಿ॑ ಬ॒ರ್॒ಹಿರಾ॒ಸಾದ್ಯ॒ ಪ್ರೋಖ್ಷ॑ತಿ । ಏ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॒ ಪ್ರೋಖ್ಷ॑ತಿ । ಅಥ॒ ತತ॑-ಸ್ಸ॒ಹ ಸ್ರು॒ಚಾ ಪು॒ರಸ್ತಾ᳚-ತ್ಪ್ರ॒ತ್ಯಞ್ಚ॑-ಙ್ಗ್ರ॒ನ್ಥಿ-ಮ್ಪ್ರತ್ಯು॑ಖ್ಷತಿ ।
ಪ್ರ॒ಜಾ ವೈ ಬ॒ರ್॒ಹಿಃ । ಯಥಾ॒ ಸೂತ್ಯೈ॑ ಕಾ॒ಲ ಆಪಃ॑
ಪು॒ರಸ್ತಾ॒-ದ್ಯನ್ತಿ॑ ॥ 29 ॥
ತಾ॒ದೃಗೇ॒ವ ತತ್ ॥ ಸ್ವ॒ಧಾ ಪಿ॒ತೃಭ್ಯ॒ ಇತ್ಯಾ॑ಹ । ಸ್ವ॒ಧಾ॒ಕಾ॒ರೋ ಹಿ ಪಿ॑ತೃ॒ಣಾಮ್ । ಊರ್ಗ್ಭ॑ವ ಬರ್ಹಿ॒ಷದ್ಭ್ಯ॒ ಇತಿ॒ ದಖ್ಷಿ॑ಣಾಯೈ॒ ಶ್ರೋಣೇ॒ರೋತ್ತ॑ರಸ್ಯೈ॒ ನಿನ॑ಯತಿ॒ ಸನ್ತ॑ತ್ಯೈ ।
ಮಾಸಾ॒ ವೈ ಪಿ॒ತರೋ॑ ಬರ್ಹಿ॒ಷದಃ॑ । ಮಾಸಾ॑ನೇ॒ವ ಪ್ರೀ॑ಣಾತಿ ।
ಮಾಸಾ॒ ವಾ ಓಷ॑ಧೀ-ರ್ವ॒ರ್ಧಯ॑ನ್ತಿ । ಮಾಸಾಃ᳚ ಪಚನ್ತಿ॒ ಸಮೃ॑ದ್ಧ್ಯೈ । ಅನ॑ತಿಸ್ಕನ್ದನ್. ಹ ಪ॒ರ್ಜನ್ಯೋ॑ ವರ್ಷತಿ । ಯತ್ರೈ॒ತದೇ॒ವ-ಙ್ಕ್ರಿ॒ಯತೇ᳚ ॥ 30 ॥
ಊ॒ರ್ಜಾ ಪೃ॑ಥಿ॒ವೀ-ಙ್ಗ॑ಚ್ಛ॒ತೇತ್ಯಾ॑ಹ । ಪೃ॒ಥಿ॒ವ್ಯಾಮೇ॒ವೋರ್ಜ॑-ನ್ದಧಾತಿ ।
ತಸ್ಮಾ᳚-ತ್ಪೃಥಿ॒ವ್ಯಾ ಊ॒ರ್ಜಾ ಭು॑ಞ್ಜತೇ । ಗ್ರ॒ನ್ಥಿಂ-ವಿಁಸ್ರಗ್ಂ॑ಸಯತಿ । ಪ್ರಜ॑ನಯತ್ಯೇ॒ವ ತತ್ । ಊ॒ರ್ಧ್ವ-ಮ್ಪ್ರಾಞ್ಚ॒ಮುದ್ಗೂ॑ಢ-ಮ್ಪ್ರ॒ತ್ಯಞ್ಚ॒ಮಾಯ॑ಚ್ಛತಿ ।
ತಸ್ಮಾ᳚-ತ್ಪ್ರಾ॒ಚೀನ॒ಗ್ಂ॒ ರೇತೋ॑ ಧೀಯತೇ । ಪ್ರ॒ತೀಚೀಃ᳚ ಪ್ರ॒ಜಾ ಜಾ॑ಯನ್ತೇ ॥ ವಿಷ್ಣೋ॒-ಸ್ಸ್ತೂಪೋ॒-ಽಸೀತ್ಯಾ॑ಹ ।
ಯ॒ಜ್ಞೋ ವೈ ವಿಷ್ಣುಃ॑ ॥ 31 ॥
ಯ॒ಜ್ಞಸ್ಯ॒ ಧೃತ್ಯೈ᳚ । ಪು॒ರಸ್ತಾ᳚-ತ್ಪ್ರಸ್ತ॒ರ-ಙ್ಗೃ॑ಹ್ಣಾತಿ । ಮುಖ್ಯ॑ಮೇ॒ವೈನ॑-ಙ್ಕರೋತಿ । ಇಯ॑ನ್ತ-ಙ್ಗೃಹ್ಣಾತಿ । ಪ್ರ॒ಜಾಪ॑ತಿನಾ ಯಜ್ಞಮು॒ಖೇನ॒ ಸಮ್ಮಿ॑ತಮ್ ।
ಇಯ॑ನ್ತ-ಙ್ಗೃಹ್ಣಾತಿ । ಯ॒ಜ್ಞ॒ಪ॒ರುಷಾ॒ ಸಮ್ಮಿ॑ತಮ್ ।
ಇಯ॑ನ್ತ-ಙ್ಗೃಹ್ಣಾತಿ । ಏ॒ತಾವ॒ದ್ವೈ ಪುರು॑ಷೇ ವೀ॒ರ್ಯ᳚ಮ್ ।
ವೀ॒ರ್ಯ॑ ಸಮ್ಮಿತಮ್ ॥ 32 ॥
ಅಪ॑ರಿಮಿತ-ಙ್ಗೃಹ್ಣಾತಿ । ಅಪ॑ರಿಮಿತ॒ಸ್ಯಾವ॑ರುದ್ಧ್ಯೈ ।
ತಸ್ಮಿ॑-ನ್ಪ॒ವಿತ್ರೇ॒ ಅಪಿ॑ಸೃಜತಿ । ಯಜ॑ಮಾನೋ॒ ವೈ ಪ್ರ॑ಸ್ತ॒ರಃ ।
ಪ್ರಾ॒ಣಾ॒ಪಾ॒ನೌ ಪ॒ವಿತ್ರೇ᳚ । ಯಜ॑ಮಾನ ಏ॒ವ ಪ್ರಾ॑ಣಾಪಾ॒ನೌ ದ॑ಧಾತಿ ॥ ಊರ್ಣಾ᳚ಮ್ರದಸ-ನ್ತ್ವಾ ಸ್ತೃಣಾ॒ಮೀತ್ಯಾ॑ಹ । ಯ॒ಥಾ॒ಯ॒ಜುರೇ॒ವೈ ತತ್ । ಸ್ವಾ॒ಸ॒ಸ್ಥ-ನ್ದೇ॒ವೇಭ್ಯ॒ ಇತ್ಯಾ॑ಹ । ದೇ॒ವೇಭ್ಯ॑ ಏ॒ವೈನ॑-ಥ್ಸ್ವಾಸ॒ಸ್ಥ-ಙ್ಕ॑ರೋತಿ ॥ 33 ॥
ಬ॒ರ್॒॒ಹಿ-ಸ್ಸ್ತೃ॑ಣಾತಿ । ಪ್ರ॒ಜಾ ವೈ ಬ॒ರ್॒ಹಿಃ । ಪೃ॒ಥಿ॒ವೀ ವೇದಿಃ॑ । ಪ್ರ॒ಜಾ ಏ॒ವ ಪೃ॑ಥಿ॒ವ್ಯಾ-ಮ್ಪ್ರತಿ॑ಷ್ಠಾಪಯತಿ ॥ ಅನ॑ತಿದೃಶ್ನಗ್ಗ್ ಸ್ತೃಣಾತಿ । ಪ್ರ॒ಜಯೈ॒ವೈನ॑-ಮ್ಪ॒ಶುಭಿ॒ರನ॑ತಿದೃಶ್ನ-ಙ್ಕರೋತಿ । ಧಾ॒ರಯ॑-ನ್ಪ್ರಸ್ತ॒ರ-ಮ್ಪ॑ರಿ॒ಧೀ-ನ್ಪರಿ॑ ದಧಾತಿ । ಯಜ॑ಮಾನೋ॒ ವೈ ಪ್ರ॑ಸ್ತ॒ರಃ ।
ಯಜ॑ಮಾನ ಏ॒ವ ತ-ಥ್ಸ್ವ॒ಯ-ಮ್ಪ॑ರಿ॒ಧೀ-ನ್ಪರಿ॑ ದಧಾತಿ ॥
ಗ॒ನ್ಧ॒ರ್ವೋ॑-ಽಸಿ ವಿ॒ಶ್ವಾವ॑ಸು॒ರಿತ್ಯಾ॑ಹ ॥ 34 ॥
ವಿಶ್ವ॑ಮೇ॒ವಾಯು॒-ರ್ಯಜ॑ಮಾನೇ ದಧಾತಿ । ಇನ್ದ್ರ॑ಸ್ಯ ಬಾ॒ಹುರ॑ಸಿ॒ ದಖ್ಷಿ॑ಣ॒ ಇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ । ಮಿ॒ತ್ರಾವರು॑ಣೌ ತ್ವೋತ್ತರ॒ತಃ ಪರಿ॑ಧತ್ತಾ॒ಮಿತ್ಯಾ॑ಹ ।
ಪ್ರಾ॒ಣಾ॒ಪಾ॒ನೌ ಮಿ॒ತ್ರಾವರು॑ಣೌ । ಪ್ರಾ॒ಣಾ॒ಪಾ॒ನಾ-ವೇ॒ವಾಸ್ಮಿ॑-ನ್ದಧಾತಿ । ಸೂರ್ಯ॑ಸ್ತ್ವಾ ಪು॒ರಸ್ತಾ᳚-ತ್ಪಾ॒ತ್ವಿತ್ಯಾ॑ಹ । ರಖ್ಷ॑ಸಾ॒-ಮಪ॑ಹತ್ಯೈ । ಕಸ್ಯಾ᳚ಶ್ಚಿದ॒ಭಿಶ॑ಸ್ತ್ಯಾ॒ ಇತ್ಯಾ॑ಹ । ಅಪ॑ರಿಮಿತಾದೇ॒ವೈನ॑-ಮ್ಪಾತಿ ॥ 35 ॥
ವೀ॒ತಿಹೋ᳚ತ್ರ-ನ್ತ್ವಾ ಕವ॒ ಇತ್ಯಾ॑ಹ । ಅ॒ಗ್ನಿಮೇ॒ವ ಹೋ॒ತ್ರೇಣ॒ ಸಮ॑ರ್ಧಯತಿ । ದ್ಯು॒ಮನ್ತ॒ಗ್ಂ॒ ಸಮಿ॑ಧೀಮ॒ಹೀತ್ಯಾ॑ಹ॒ ಸಮಿ॑ದ್ಧ್ಯೈ । ಅಗ್ನೇ॑ ಬೃ॒ಹನ್ತ॑ಮದ್ಧ್ವ॒ರ ಇತ್ಯಾ॑ಹ॒ ವೃದ್ಧ್ಯೈ᳚ । ವಿ॒ಶೋ ಯ॒ನ್ತ್ರೇ ಸ್ಥ॒ ಇತ್ಯಾ॑ಹ । ವಿ॒ಶಾಂ-ಯಁತ್ಯೈ᳚ ।
ಉ॒ದೀ॒ಚೀನಾ᳚ಗ್ರೇ॒ ನಿದ॑ಧಾತಿ॒ ಪ್ರತಿ॑ಷ್ಠಿತ್ಯೈ ।
ವಸೂ॑ನಾಗ್ಂ ರು॒ದ್ರಾಣಾ॑-ಮಾದಿ॒ತ್ಯಾನಾ॒ಗ್ಂ॒ ಸದ॑ಸಿ ಸೀ॒ದೇತ್ಯಾ॑ಹ । ದೇ॒ವತಾ॑ನಾಮೇ॒ವ ಸದ॑ನೇ ಪ್ರಸ್ತ॒ರಗ್ಂ ಸಾ॑ದಯತಿ ॥ ಜು॒ಹೂರ॑ಸಿ ಘೃ॒ತಾಚೀ॒ ನಾಮ್ನೇತ್ಯಾ॑ಹ ॥ 36 ॥
ಅ॒ಸೌ ವೈ ಜು॒ಹೂಃ । ಅ॒ನ್ತರಿ॑ಖ್ಷಮುಪ॒ಭೃತ್ । ಪೃ॒ಥಿ॒ವೀ ಧ್ರು॒ವಾ । ತಾಸಾ॑ಮೇ॒ತದೇ॒ವ ಪ್ರಿ॒ಯ-ನ್ನಾಮ॑ । ಯ-ದ್ಘೃ॒ತಾಚೀತಿ॑ । ಯ-ದ್ಘೃ॒ತಾಚೀತ್ಯಾಹ॑ । ಪ್ರಿ॒ಯೇಣೈ॒ವೈನಾ॒ ನಾಮ್ನಾ॑ ಸಾದಯತಿ ॥
ಏ॒ತಾ ಅ॑ಸದನ್-ಥ್ಸುಕೃ॒ತಸ್ಯ॑ ಲೋ॒ಕ ಇತ್ಯಾ॑ಹ ।
ಸ॒ತ್ಯಂ-ವೈಁ ಸು॑ಕೃ॒ತಸ್ಯ॑ ಲೋ॒ಕಃ ।
ಸ॒ತ್ಯ ಏ॒ವೈನಾ᳚-ಸ್ಸುಕೃ॒ತಸ್ಯ॑ ಲೋ॒ಕೇ ಸಾ॑ದಯತಿ ।
ತಾ ವಿ॑ಷ್ಣೋ ಪಾ॒ಹೀತ್ಯಾ॑ಹ । ಯ॒ಜ್ಞೋ ವೈ ವಿಷ್ಣುಃ॑ । ಯ॒ಜ್ಞಸ್ಯ॒ ಧೃತ್ಯೈ᳚ । ಪಾ॒ಹಿ ಯ॒ಜ್ಞ-ಮ್ಪಾ॒ಹಿ ಯ॒ಜ್ಞಪ॑ತಿ-ಮ್ಪಾ॒ಹಿ ಮಾಂ-ಯಁ॑ಜ್ಞ॒ನಿಯ॒ಮಿತ್ಯಾ॑ಹ । ಯ॒ಜ್ಞಾಯ॒ ಯಜ॑ಮಾನಾಯಾ॒ತ್ಮನೇ᳚ । ತೇಭ್ಯ॑ ಏ॒ವಾಶಿಷ॒ಮಾಶಾ॒ಸ್ತೇ-ಽನಾ᳚ರ್ತ್ಯೈ ॥ 37 ॥
(ಸ್ಥೇತ್ಯಾ॑ಹ - ಪೃಥಿ॒ವೀ ವೇದಿ॒--ರ್ ಯನ್ತಿ॑ - ಕ್ರಿ॒ಯತೇ॒ - ವಿಷ್ಣು॑--ರ್ ವೀ॒ರ್ಯ॑ಸಮ್ಮಿತಂ - ಕರೋ - ತ್ಯಾಹ - ಪಾತಿ॒ - ನಾಮ್ನೇತ್ಯಾ॑ಹ - ಲೋ॒ಕೇ ಸಾ॑ದಯತಿ॒ ಷಟ್ಚ॑) (ಅ. 6)
ಅನುವಾಕಂ 7 - ಆಘಾರಃ
ಅ॒ಗ್ನಿನಾ॒ ವೈ ಹೋತ್ರಾ᳚ । ದೇ॒ವಾ ಅಸು॑ರಾ-ನ॒ಭ್ಯ॑ಭವನ್ನ್ ।
ಅ॒ಗ್ನಯೇ॑ ಸಮಿ॒ದ್ಧ್ಯಮಾ॑ನಾ॒ಯಾ-ನು॑ಬ್ರೂ॒ಹೀತ್ಯಾ॑ಹ॒ ಭ್ರಾತೃ॑ವ್ಯಾಭಿಭೂತ್ಯೈ । ಏಕ॑ವಿಗ್ಂಶತಿ-ಮಿದ್ಧ್ಮದಾ॒ರೂಣಿ॑ ಭವನ್ತಿ । ಏ॒ಕ॒ವಿ॒ಗ್ಂ॒ಶೋ ವೈ ಪುರು॑ಷಃ ।
ಪುರು॑ಷ॒ಸ್ಯಾಪ್ತ್ಯೈ᳚ ।
ಪಞ್ಚ॑ದಶೇದ್ಧ್ಮದಾ॒ರೂಣ್ಯ॒-ಭ್ಯಾದ॑ಧಾತಿ ।
ಪಞ್ಚ॑ದಶ॒ ವಾ ಅ॑ರ್ಧಮಾ॒ಸಸ್ಯ॒ ರಾತ್ರ॑ಯಃ ।
ಅ॒ರ್ಧ॒ಮಾ॒ಸ॒ಶ-ಸ್ಸಂ॑ವಁಥ್ಸ॒ರ ಆ᳚ಪ್ಯತೇ ।
ತ್ರೀನ್-ಪ॑ರಿ॒ಧೀನ್-ಪರಿ॑-ದಧಾತಿ ॥ 38 ॥
ಊ॒ರ್ಧ್ವೇ ಸ॒ಮಿಧಾ॒ವಾದ॑ಧಾತಿ । ಅ॒ನೂ॒ಯಾ॒ಜೇಭ್ಯ॑-ಸ್ಸ॒ಮಿಧ॒ಮತಿ॑ಶಿನಷ್ಟಿ । ಷಟ್ಥ್ಸ-ಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ । ವೇ॒ದೇನೋಪ॑ವಾಜಯತಿ ।
ಪ್ರಾ॒ಜಾ॒ಪ॒ತ್ಯೋ ವೈ ವೇ॒ದಃ । ಪ್ರಾ॒ಜಾ॒ಪ॒ತ್ಯಃ ಪ್ರಾ॒ಣಃ । ಯಜ॑ಮಾನ ಆಹವ॒ನೀಯಃ॑ । ಯಜ॑ಮಾನ ಏ॒ವ ಪ್ರಾ॒ಣ-ನ್ದ॑ಧಾತಿ ॥ 39 ॥
ತ್ರಿರುಪ॑ವಾಜಯತಿ । ತ್ರಯೋ॒ ವೈ ಪ್ರಾ॒ಣಾಃ । ಪ್ರಾ॒ಣಾನೇ॒ವಾಸ್ಮಿ॑-ನ್ದಧಾತಿ । ವೇ॒ದೇನೋ॑ಪ॒ಯತ್ಯ॑ ಸ್ರು॒ವೇಣ॑ ಪ್ರಾಜಾಪ॒ತ್ಯ-ಮಾ॑ಘಾ॒ರ-ಮಾಘಾ॑ರಯತಿ । ಯ॒ಜ್ಞೋ ವೈ ಪ್ರ॒ಜಾಪ॑ತಿಃ । ಯ॒ಜ್ಞಮೇ॒ವ ಪ್ರ॒ಜಾಪ॑ತಿ-ಮ್ಮುಖ॒ತ ಆರ॑ಭತೇ ।
ಅಥೋ᳚ ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾಃ᳚ । ಸರ್ವಾ॑ ಏ॒ವ ದೇ॒ವತಾಃ᳚ ಪ್ರೀಣಾತಿ ॥ ಅ॒ಗ್ನಿಮ॑ಗ್ನೀ-ತ್ತ್ರಿಸ್ತ್ರಿ॒-ಸ್ಸಮ್ಮೃ॒ಡ್ಢೀತ್ಯಾ॑ಹ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ ॥ 40 ॥
ಅಥೋ॒ ರಖ್ಷ॑ಸಾ॒ಮಪ॑ಹತ್ಯೈ । ಪ॒ರಿ॒ಧೀನ್-ಥ್ಸಮ್ಮಾ᳚ರ್ಷ್ಟಿ । ಪು॒ನಾತ್ಯೇ॒ವೈನಾನ್॑ । ತ್ರಿಸ್ತ್ರಿ॒-ಸ್ಸಮ್ಮಾ᳚ರ್ಷ್ಟಿ । ತ್ರ್ಯಾ॑ವೃ॒ದ್ಧಿ ಯ॒ಜ್ಞಃ । ಅಥೋ॑ ಮೇದ್ಧ್ಯ॒ತ್ವಾಯ॑ । ಅಥೋ॑ ಏ॒ತೇ ವೈ ದೇ॑ವಾಶ್ವಾಃ । ದೇ॒ವಾ॒ಶ್ವಾನೇ॒ವ ತ-ಥ್ಸಮ್ಮಾ᳚ರ್ಷ್ಟಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ।
ಆಸೀ॑ನೋ॒-ಽನ್ಯ-ಮಾ॑ಘಾ॒ರ-ಮಾಘಾ॑ರಯತಿ ॥ 41 ॥
ತಿಷ್ಠ॑ನ್ನ॒ನ್ಯಮ್ । ಯಥಾ-ಽನೋ॑ ವಾ॒ ರಥಂ॑ವಾಁ ಯು॒ಞ್ಜ್ಯಾತ್ ।
ಏ॒ವಮೇ॒ವ ತದ॑ದ್ಧ್ವ॒ರ್ಯು-ರ್ಯ॒ಜ್ಞಂ-ಯುಁ॑ನಕ್ತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯಾ॒ಭ್ಯೂ᳚ಢ್ಯೈ ।
ವಹ॑ನ್ತ್ಯೇನ-ಙ್ಗ್ರಾ॒ಮ್ಯಾಃ ಪ॒ಶವಃ॑ ।
ಯ ಏ॒ವಂ-ವೇಁದ॑ ॥ ಭುವ॑ನಮಸಿ॒ ವಿಪ್ರ॑ಥ॒ಸ್ವೇತ್ಯಾ॑ಹ । ಯ॒ಜ್ಞೋ ವೈ ಭುವ॑ನಮ್ । ಯ॒ಜ್ಞ ಏ॒ವ ಯಜ॑ಮಾನ-ಮ್ಪ್ರ॒ಜಯಾ॑ ಪ॒ಶುಭಿಃ॑ ಪ್ರಥಯತಿ । ಅಗ್ನೇ॒ ಯಷ್ಟ॑ರಿ॒ದ-ನ್ನಮ॒ ಇತ್ಯಾ॑ಹ ॥ 42 ॥
ಅ॒ಗ್ನಿರ್ವೈ ದೇ॒ವಾನಾಂ॒-ಯಁಷ್ಟಾ᳚ । ಯ ಏ॒ವ ದೇ॒ವಾನಾಂ॒-ಯಁಷ್ಟಾ᳚ । ತಸ್ಮಾ॑ ಏ॒ವ ನಮ॑ಸ್ಕರೋತಿ ॥
ಜುಹ್ವೇಹ್ಯ॒ಗ್ನಿಸ್ತ್ವಾ᳚ ಹ್ವಯತಿ ದೇವಯ॒ಜ್ಯಾಯಾ॒ ಉಪ॑ಭೃ॒ದೇಹಿ॑ ದೇ॒ವಸ್ತ್ವಾ॑ ಸವಿ॒ತಾ ಹ್ವ॑ಯತಿ ದೇವಯ॒ಜ್ಯಾಯಾ॒ ಇತ್ಯಾ॑ಹ ।
ಆ॒ಗ್ನೇ॒ಯೀ ವೈ ಜು॒ಹೂಃ । ಸಾ॒ವಿ॒ತ್ರ್ಯು॑ಪ॒ಭೃತ್ । ತಾಭ್ಯಾ॑ಮೇ॒ವೈನೇ॒ ಪ್ರಸೂ॑ತ॒ ಆದ॑ತ್ತೇ ॥ ಅಗ್ನಾ॑ವಿಷ್ಣೂ॒ ಮಾ ವಾ॒ಮವ॑ಕ್ರಮಿಷ॒ಮಿತ್ಯಾ॑ಹ ।
ಅ॒ಗ್ನಿಃ ಪು॒ರಸ್ತಾ᳚ತ್ । ವಿಷ್ಣು॑ರ್ಯ॒ಜ್ಞಃ ಪ॒ಶ್ಚಾತ್ ॥ 43 ॥
ತಾಭ್ಯಾ॑ಮೇ॒ವ ಪ್ರ॑ತಿ॒ ಪ್ರೋಚ್ಯಾ॒ತ್ಯಾಕ್ರಾ॑ಮತಿ ।
ವಿಜಿ॑ಹಾಥಾ॒-ಮ್ಮಾ ಮಾ॒ ಸನ್ತಾ᳚ಪ್ತ॒ಮಿತ್ಯಾ॒ಹಾಹಿಗ್ಂ॑ಸಾಯೈ ।
ಲೋ॒ಕ-ಮ್ಮೇ॑ ಲೋಕಕೃತೌ ಕೃಣುತ॒ಮಿತ್ಯಾ॑ಹ ।
ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ॥ ವಿಷ್ಣೋ॒-ಸ್ಸ್ಥಾನ॑ಮ॒ಸೀತ್ಯಾ॑ಹ । ಯ॒ಜ್ಞೋ ವೈ ವಿಷ್ಣುಃ॑ । ಏ॒ತ-ತ್ಖಲು॒ ವೈ ದೇ॒ವಾನಾ॒-ಮಪ॑ರಾಜಿತ-ಮಾ॒ಯತ॑ನಮ್ । ಯ-ದ್ಯ॒ಜ್ಞಃ ।
ದೇ॒ವಾನಾ॑ಮೇ॒ವಾಪ॑ರಾಜಿತ ಆ॒ಯತ॑ನೇ ತಿಷ್ಠತಿ ॥
ಇ॒ತ ಇನ್ದ್ರೋ॑ ಅಕೃಣೋ-ದ್ವೀ॒ರ್ಯಾ॑ಣೀತ್ಯಾ॑ಹ ॥ 44 ॥
ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ ।
ಸ॒ಮಾ॒ರಭ್ಯೋ॒ರ್ಧ್ವೋ ಅ॑ದ್ಧ್ವ॒ರೋ ದಿ॑ವಿ॒ಸ್ಪೃಶ॒ಮಿತ್ಯಾ॑ಹ॒ ವೃದ್ಧ್ಯೈ᳚ । ಆ॒ಘಾ॒ರ-ಮಾ॑ಘಾ॒ರ್ಯಮಾ॑ಣ॒ಮನು॑ ಸಮಾ॒ರಭ್ಯ॑ । ಏ॒ತಸ್ಮಿ॑ನ್ ಕಾ॒ಲೇ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್ನ್ । ಸಾ॒ಖ್ಷಾದೇ॒ವ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ । ಅಥೋ॒ ಸಮೃ॑ದ್ಧೇನೈ॒ವ ಯ॒ಜ್ಞೇನ॒ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ।
ಅಹ್ರು॑ತೋ ಯ॒ಜ್ಞೋ ಯ॒ಜ್ಞಪ॑ತೇ॒ರಿತ್ಯಾ॒ಹಾನಾ᳚ರ್ತ್ಯೈ ।
ಇನ್ದ್ರಾ॑ವಾ॒ನ್-ಥ್ಸ್ವಾಹೇತ್ಯಾ॑ಹ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ । ಬೃ॒ಹದ್ಭಾ ಇತ್ಯಾ॑ಹ ॥ 45 ॥
ಸು॒ವ॒ರ್ಗೋ ವೈ ಲೋ॒ಕೋ ಬೃ॒ಹದ್ಭಾಃ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ಯ॒ಜ॒ಮಾ॒ನ॒ದೇ॒ವ॒ತ್ಯಾ॑ ವೈ ಜು॒ಹೂಃ । ಭ್ರಾ॒ತೃ॒ವ್ಯ॒ದೇ॒ವ॒ತ್ಯೋ॑ಪ॒ಭೃತ್ । ಪ್ರಾ॒ಣ ಆ॑ಘಾ॒ರಃ ।
ಯ-ಥ್ಸಗ್ಗ್॑ಸ್ಪ॒ರ್ಶಯೇ᳚ತ್ । ಭ್ರಾತೃ॑ವ್ಯೇ-ಽಸ್ಯ ಪ್ರಾ॒ಣ-ನ್ದ॑ದ್ಧ್ಯಾತ್ । ಅಸಗ್ಗ್॑ಸ್ಪರ್ಶಯನ್ನ॒ತ್ಯಾಕ್ರಾ॑ಮತಿ । ಯಜ॑ಮಾನ ಏ॒ವ ಪ್ರಾ॒ಣ-ನ್ದ॑ಧಾತಿ । ಪಾ॒ಹಿಮಾ᳚-ಽಗ್ನೇ॒ ದುಶ್ಚ॑ರಿತಾ॒ದಾ ಮಾ॒ ಸುಚ॑ರಿತೇ ಭ॒ಜೇತ್ಯಾ॑ಹ ॥ 46 ॥
ಅ॒ಗ್ನಿರ್ವಾವ ಪ॒ವಿತ್ರ᳚ಮ್ । ವೃ॒ಜಿ॒ನಮನೃ॑ತ॒-ನ್ದುಶ್ಚ॑ರಿತಮ್ ।
ಋ॒ಜು॒ಕ॒ರ್ಮಗ್ಂ ಸ॒ತ್ಯಗ್ಂ ಸುಚ॑ರಿತಮ್ ।
ಅ॒ಗ್ನಿರೇ॒ವೈನಂ॑-ವೃಁಜಿ॒ನಾದ-ನೃ॑ತಾ॒-ದ್ದುಶ್ಚ॑ರಿತಾತ್ಪಾತಿ ।
ಋ॒ಜು॒ಕ॒ರ್ಮೇ ಸ॒ತ್ಯೇ ಸುಚ॑ರಿತೇ ಭಜತಿ । ತಸ್ಮಾ॑ದೇ॒ವಮಾಶಾ᳚ಸ್ತೇ । ಆ॒ತ್ಮನೋ॑ ಗೋಪೀ॒ಥಾಯ॑ ॥ ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॑ । ಯದಾ॑ಘಾ॒ರಃ । ಆ॒ತ್ಮಾ ಧ್ರು॒ವಾ ॥ 47 ॥
ಆ॒ಘಾ॒ರ-ಮಾ॒ಘಾರ್ಯ॑ ಧ್ರು॒ವಾಗ್ಂ ಸಮ॑ನಕ್ತಿ ।
ಆ॒ತ್ಮನ್ನೇ॒ವ ಯ॒ಜ್ಞಸ್ಯ॒ ಶಿರಃ॒ ಪ್ರತಿ॑ದಧಾತಿ ।
ದ್ವಿ-ಸ್ಸಮ॑ನಕ್ತಿ । ದ್ವೌ ಹಿ ಪ್ರಾ॑ಣಾಪಾ॒ನೌ । ತದಾ॑ಹುಃ ।
ತ್ರಿರೇ॒ವ ಸಮ॑ಞ್ಜ್ಯಾತ್ । ತ್ರಿಧಾ॑ತು॒ ಹಿ ಶಿರ॒ ಇತಿ॑ । ಶಿರ॑ ಇವೈ॒ತ-ದ್ಯ॒ಜ್ಞಸ್ಯ॑ । ಅಥೋ॒ ತ್ರಯೋ॒ ವೈ ಪ್ರಾ॒ಣಾಃ ।
ಪ್ರಾ॒ಣಾನೇ॒ವಾಸ್ಮಿ॑-ನ್ದಧಾತಿ ॥
ಮ॒ಖಸ್ಯ॒ ಶಿರೋ॑-ಽಸಿ॒ ಸಞ್ಜ್ಯೋತಿ॑ಷಾ॒ ಜ್ಯೋತಿ॑ರಙ್ಕ್ತಾ॒ಮಿತ್ಯಾ॑ಹ ।
ಜ್ಯೋತಿ॑ರೇ॒ವಾಸ್ಮಾ॑ ಉ॒ಪರಿ॑ಷ್ಟಾ-ದ್ದಧಾತಿ ।
ಸು॒ವ॒ರ್ಗಸ್ಯ॑ ಲೋ॒ಕಸ್ಯಾನು॑ಖ್ಯಾತ್ಯೈ ॥ 48 ॥
(ಪರಿ॑ದಧಾತಿ - ಪ್ರಾ॒ಣ-ನ್ದ॑ಧಾತಿ॒ - ಹಿ ಯ॒ಜ್ಞೋ - ಘಾ॑ರಯತಿ॒ - ನಮ॒ ಇತ್ಯಾ॑ಹ - ಪ॒ಶ್ಚಾ-ದ್- ವೀ॒ರ್ಯಾ॑ಣೀತ್ಯಾ॑ಹ॒ - ಭಾ ಇತ್ಯಾ॑ಹ - ಭ॒ಜೇತ್ಯಾ॑ಹ - ಧ್ರು॒ - ವೈವಾಸ್ಮಿ॑-ನ್ದಧಾತಿ॒ ತ್ರೀಣಿ॑ ಚ) (ಅ. 7)
ಅನುವಾಕಂ 8 - ಇಡಾಭಖ್ಷಣಮ್
ಧಿಷ್ಣಿ॑ಯಾ॒ ವಾ ಏ॒ತೇ ನ್ಯು॑ಪ್ಯನ್ತೇ । ಯದ್ಬ್ರ॒ಹ್ಮಾ । ಯದ್ಧೋತಾ᳚ । ಯದ॑ದ್ಧ್ವ॒ರ್ಯುಃ । ಯದ॒ಗ್ನೀತ್ । ಯ-ದ್ಯಜ॑ಮಾನಃ । ತಾನ್. ಯದ॑ನ್ತರೇ॒ಯಾತ್ । ಯಜ॑ಮಾನಸ್ಯ ಪ್ರಾ॒ಣಾನ್-ಥ್ಸಙ್ಕ॑ರ್ಷೇತ್ । ಪ್ರ॒ಮಾಯು॑ಕ-ಸ್ಸ್ಯಾತ್ । ಪು॒ರೋ॒ಡಾಶ॑ಮಪ॒ಗೃಹ್ಯ॒ ಸಞ್ಚ॑ರತ್ಯದ್ಧ್ವ॒ರ್ಯುಃ ॥ 49 ॥
ಯಜ॑ಮಾನಾಯೈ॒ವ ತಲ್ಲೋ॒ಕಗ್ಂ ಶಿಗ್ಂ॑ಷತಿ ।
ನಾಸ್ಯ॑ ಪ್ರಾ॒ಣಾನ್-ಥ್ಸಙ್ಕ॑ರ್ಷತಿ । ನ ಪ್ರ॒ಮಾಯು॑ಕೋ ಭವತಿ । ಪು॒ರಸ್ತಾ᳚-ತ್ಪ್ರ॒ತ್ಯಙ್ಙಾಸೀ॑ನಃ । ಇಡಾ॑ಯಾ॒ ಇಡಾ॒ಮಾದ॑ಧಾತಿ ।
ಹಸ್ತ್ಯಾ॒ಗ್ಂ॒ ಹೋತ್ರೇ᳚ । ಪ॒ಶವೋ॒ ವಾ ಇಡಾ᳚ । ಪ॒ಶವಃ॒ ಪುರು॑ಷಃ । ಪ॒ಶುಷ್ವೇ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯತಿ । ಇಡಾ॑ಯೈ॒ ವಾ ಏ॒ಷಾ ಪ್ರಜಾ॑ತಿಃ ॥ 50 ॥
ತಾ-ಮ್ಪ್ರಜಾ॑ತಿಂ॒-ಯಁಜ॑ಮಾ॒ನೋ-ಽನು॒ ಪ್ರಜಾ॑ಯತೇ । ದ್ವಿರ॒ಙ್ಗುಲಾ॑ವನಕ್ತಿ॒ ಪರ್ವ॑ಣೋಃ ।
ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ । ಸ॒ಕೃದುಪ॑ಸ್ತೃಣಾತಿ । ದ್ವಿರಾದ॑ಧಾತಿ । ಸ॒ಕೃದ॒ಭಿಘಾ॑ರಯತಿ । ಚ॒ತು-ಸ್ಸಮ್ಪ॑ದ್ಯತೇ । ಚ॒ತ್ವಾರಿ॒ ವೈ ಪ॒ಶೋಃ ಪ್ರ॑ತಿ॒ಷ್ಠಾನಾ॑ನಿ ।
ಯಾವಾ॑ನೇ॒ವ ಪ॒ಶುಃ । ತಮುಪ॑ಹ್ವಯತೇ ॥ 51 ॥
ಮುಖ॑ಮಿವ॒ ಪ್ರತ್ಯುಪ॑ಹ್ವಯೇತ । ಸ॒ಮು॒ಙ್ಖಾನೇ॒ವ ಪ॒ಶೂನುಪ॑ಹ್ವಯತೇ । ಪ॒ಶವೋ॒ ವಾ ಇಡಾ᳚ ।
ತಸ್ಮಾ॒-ಥ್ಸಾ-ಽನ್ವಾ॒ರಭ್ಯಾ᳚ । ಅ॒ದ್ಧ್ವ॒ರ್ಯುಣಾ॑ ಚ॒ ಯಜ॑ಮಾನೇನ ಚ । ಉಪ॑ಹೂತಃ ಪಶು॒ಮಾನ॑ಸಾ॒ನೀತ್ಯಾ॑ಹ ।
ಉಪ॒ ಹ್ಯೇ॑ನೌ॒ ಹ್ವಯ॑ತೇ॒ ಹೋತಾ᳚ । ಇಡಾ॑ಯೈ ದೇ॒ವತಾ॑ನಾ-ಮುಪಹ॒ವೇ । ಉಪ॑ಹೂತಃ ಪಶು॒ಮಾ-ನ್ಭ॑ವತಿ ।
ಯ ಏ॒ವಂ-ವೇಁದ॑ ॥ 52 ॥
ಯಾಂ-ವೈಁ ಹಸ್ತ್ಯಾ॒ಮಿಡಾ॑ಮಾ॒ದಧಾ॑ತಿ । ವಾ॒ಚ-ಸ್ಸಾ ಭಾ॑ಗ॒ಧೇಯ᳚ಮ್ । ಯಾಮು॑ಪ॒ಹ್ವಯ॑ತೇ । ಪ್ರಾ॒ಣಾನಾ॒ಗ್ಂ॒ ಸಾ । ವಾಚ॑-ಞ್ಚೈ॒ವ ಪ್ರಾ॒ಣಾಗ್ಶ್ಚಾವ॑ರುನ್ಧೇ ॥
ಅಥ॒ ವಾ ಏ॒ತರ್ಹ್ಯುಪ॑ಹೂತಾಯಾ॒ಮಿಡಾ॑ಯಾಮ್ ।
ಪು॒ರೋ॒ಡಾಶ॑ಸ್ಯೈ॒ವ ಬ॑ರ್ಹಿ॒ಷದೋ॑ ಮೀಮಾ॒ಗ್ಂ॒ಸಾ । ಯಜ॑ಮಾನ-ನ್ದೇ॒ವಾ ಅ॑ಬ್ರುವನ್ನ್ । ಹ॒ವಿರ್ನೋ॒ ನಿರ್ವ॒ಪೇತಿ॑ । ನಾಹಮ॑ಭಾ॒ಗೋ ನಿರ್ವ॑ಫ್ಸ್ಯಾ॒ಮೀತ್ಯ॑ಬ್ರವೀತ್ ॥ 53 ॥
ನ ಮಯಾ॑-ಽಭಾ॒ಗಯಾ ಽನು॑ವಖ್ಷ್ಯ॒ಥೇತಿ॒ ವಾಗ॑ಬ್ರವೀತ್ ।
ನಾಹಮ॑ಭಾ॒ಗಾ ಪು॑ರೋ-ಽನುವಾ॒ಕ್ಯಾ॑ ಭವಿಷ್ಯಾ॒ಮೀತಿ॑ ಪುರೋ-ಽನುವಾ॒ಕ್ಯಾ᳚ । ನಾಹಮ॑ಭಾ॒ಗಾ ಯಾ॒ಜ್ಯಾ॑ ಭವಿಷ್ಯಾ॒ಮೀತಿ॑
ಯಾ॒ಜ್ಯಾ᳚ । ನ ಮಯಾ॑-ಽಭಾ॒ಗೇನ॒ ವಷ॑ಟ್ಕರಿಷ್ಯ॒ಥೇತಿ॑ ವಷಟ್ಕಾ॒ರಃ । ಯ-ದ್ಯ॑ಜಮಾನಭಾ॒ಗ-ನ್ನಿ॒ಧಾಯ॑ ಪುರೋ॒ಡಾಶ॑-ಮ್ಬರ್ಹಿ॒ಷದ॑-ಙ್ಕ॒ರೋತಿ॑ ।
ತಾನೇ॒ವ ತ-ದ್ಭಾ॒ಗಿನಃ॑ ಕರೋತಿ । ಚ॒ತು॒ರ್ಧಾ ಕ॑ರೋತಿ । ಚತ॑ಸ್ರೋ॒ ದಿಶಃ॑ । ದಿ॒ಖ್ಷ್ವೇ॑ವ ಪ್ರತಿ॑ತಿಷ್ಠತಿ । ಬ॒ರ್॒ಹಿ॒ಷದ॑-ಙ್ಕರೋತಿ ॥ 54 ॥
ಯಜ॑ಮಾನೋ॒ ವೈ ಪು॑ರೋ॒ಡಾಶಃ॑ । ಪ್ರ॒ಜಾ ಬ॒ರ್॒ಹಿಃ ।
ಯಜ॑ಮಾನಮೇ॒ವ ಪ್ರ॒ಜಾಸು॒ ಪ್ರತಿ॑ಷ್ಠಾಪಯತಿ ।
ತಸ್ಮಾ॑ದ॒ಸ್ಥ್ನಾ-ಽನ್ಯಾಃ ಪ್ರ॒ಜಾಃ ಪ್ರ॑ತಿ॒ತಿಷ್ಠ॑ನ್ತಿ । ಮಾ॒ಗ್ಂ॒ಸೇನಾ॒ನ್ಯಾಃ । ಅಥೋ॒ ಖಲ್ವಾ॑ಹುಃ । ದಖ್ಷಿ॑ಣಾ॒ ವಾ ಏ॒ತಾ ಹ॑ವಿ-ರ್ಯ॒ಜ್ಞಸ್ಯಾ᳚ನ್ತರ್ವೇ॒ದ್ಯವ॑ರುದ್ಧ್ಯನ್ತೇ ।
ಯ-ತ್ಪು॑ರೋ॒ಡಾಶ॑-ಮ್ಬರ್ಹಿ॒ಷದ॑-ಙ್ಕ॒ರೋತೀತಿ॑ । ಚ॒ತು॒ರ್ಧಾ ಕ॑ರೋತಿ । ಚ॒ತ್ವಾರೋ॒ ಹ್ಯೇ॑ತೇ ಹ॑ವಿ-ರ್ಯ॒ಜ್ಞಸ್ಯ॒ರ್ತ್ವಿಜಃ॑ ॥ 55 ॥
ಬ್ರ॒ಹ್ಮಾ ಹೋತಾ᳚-ಽದ್ಧ್ವ॒ರ್ಯುರ॒ಗ್ನೀತ್ । ತಮ॒ಭಿಮೃ॑ಶೇತ್ । ಇ॒ದ-ಮ್ಬ್ರ॒ಹ್ಮಣಃ॑ । ಇ॒ದಗ್ಂ ಹೋತುಃ॑ । ಇ॒ದಮ॑ದ್ಧ್ವ॒ರ್ಯೋಃ । ಇ॒ದಮ॒ಗ್ನೀಧ॒ ಇತಿ॑ । ಯಥೈ॒ವಾದ-ಸ್ಸೌ॒ಮ್ಯೇ᳚-ಽದ್ಧ್ವ॒ರೇ ।
ಆ॒ದೇಶ॑ಮೃ॒ತ್ವಿಗ್ಭ್ಯೋ॒ ದಖ್ಷಿ॑ಣಾ ನೀ॒ಯನ್ತೇ᳚ । ತಾ॒ದೃಗೇ॒ವ ತತ್ । ಅ॒ಗ್ನೀಧೇ᳚ ಪ್ರಥ॒ಮಾಯಾದ॑ಧಾತಿ ॥ 56 ॥
ಅ॒ಗ್ನಿಮು॑ಖಾ॒ ಹ್ಯೃದ್ಧಿಃ॑ । ಅ॒ಗ್ನಿಮು॑ಖಾಮೇ॒ವರ್ಧಿಂ॒-ಯಁಜ॑ಮಾನ ಋದ್ಧ್ನೋತಿ ॥ ಸ॒ಕೃದು॑ಪ॒ಸ್ತೀರ್ಯ॒ ದ್ವಿರಾ॒ದಧ॑ತ್ । ಉ॒ಪ॒ಸ್ತೀರ್ಯ॒ ದ್ವಿರ॒ಭಿಘಾ॑ರಯತಿ ।
ಷಟ್-ಥ್ಸಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ । ವೇ॒ದೇನ॑ ಬ್ರ॒ಹ್ಮಣೇ᳚ ಬ್ರಹ್ಮಭಾ॒ಗ-ಮ್ಪರಿ॑ಹರತಿ । ಪ್ರಾ॒ಜಾ॒ಪ॒ತ್ಯೋ ವೈ ವೇ॒ದಃ । ಪ್ರಾ॒ಜಾ॒ಪ॒ತ್ಯೋ ಬ್ರ॒ಹ್ಮಾ ॥ 57 ॥
ಸ॒ವಿ॒ತಾ ಯ॒ಜ್ಞಸ್ಯ॒ ಪ್ರಸೂ᳚ತ್ಯೈ । ಅಥ॒ ಕಾಮ॑ಮ॒ನ್ಯೇನ॑ । ತತೋ॒ ಹೋತ್ರೇ᳚ । ಮದ್ಧ್ಯಂ॒-ವಾಁ ಏ॒ತ-ದ್ಯ॒ಜ್ಞಸ್ಯ॑ । ಯದ್ಧೋತಾ᳚ । ಮ॒ದ್ಧ್ಯ॒ತ ಏ॒ವ ಯ॒ಜ್ಞ-ಮ್ಪ್ರೀ॑ಣಾತಿ ।
ಅಥಾ᳚ದ್ಧ್ವ॒ರ್ಯವೇ᳚ । ಪ್ರ॒ತಿ॒ಷ್ಠಾ ವಾ ಏ॒ಷಾ ಯ॒ಜ್ಞಸ್ಯ॑ । ಯದ॑ದ್ಧ್ವ॒ರ್ಯುಃ ।
ತಸ್ಮಾ᳚ದ್ಧವಿ-ರ್ಯ॒ಜ್ಞಸ್ಯೈ॒ತಾಮೇ॒ವಾವೃತ॒ಮನು॑ ॥ 58 ॥
ಅ॒ನ್ಯಾ ದಖ್ಷಿ॑ಣಾ ನೀಯನ್ತೇ । ಯ॒ಜ್ಞಸ್ಯ॒ ಪ್ರತಿ॑ಷ್ಠಿತ್ಯೈ ।
ಅ॒ಗ್ನಿಮ॑ಗ್ನೀ-ಥ್ಸ॒ಕೃ-ಥ್ಸ॑ಕೃ॒-ಥ್ಸಮ್ಮೃ॒ಡ್ಢೀತ್ಯಾ॑ಹ ।
ಪರಾಂ॑ಇವ॒ ಹ್ಯೇ॑ತರ್ಹಿ॑ ಯ॒ಜ್ಞಃ ॥ ಇ॒ಷಿ॒ತಾ ದೈವ್ಯಾ॒ ಹೋತಾ॑ರ॒ ಇತ್ಯಾ॑ಹ । ಇ॒ಷಿ॒ತಗ್ಂ ಹಿ ಕರ್ಮ॑ ಕ್ರಿ॒ಯತೇ᳚ ।
ಭ॒ದ್ರ॒ವಾಚ್ಯಾ॑ಯ॒ ಪ್ರೇಷಿ॑ತೋ॒ ಮಾನು॑ಷ-ಸ್ಸೂಕ್ತವಾ॒ಕಾಯ॑ ಸೂ॒ಕ್ತಾ ಬ್ರೂ॒ಹೀತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ।
ಸ್ವ॒ಗಾ ದೈವ್ಯಾ॒ ಹೋತೃ॑ಭ್ಯ॒ ಇತ್ಯಾ॑ಹ । ಯ॒ಜ್ಞಮೇ॒ವ ತಥ್ಸ್ವ॒ಗಾ ಕ॑ರೋತಿ । ಸ್ವ॒ಸ್ತಿ-ರ್ಮಾನು॑ಷೇಭ್ಯ॒ ಇತ್ಯಾ॑ಹ ।
ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ । ಶಂ॒ಯೋಁ-ರ್ಬ್ರೂ॒ಹೀತ್ಯಾ॑ಹ ।
ಶಂ॒ಯುಁಮೇ॒ವ ಬಾ॑ರ್ಹಸ್ಪ॒ತ್ಯ-ಮ್ಭಾ॑ಗ॒ಧೇಯೇ॑ನ॒ ಸಮ॑ರ್ಧಯತಿ ॥ 59 ॥
(ಚ॒ರ॒ತ್ಯ॒ದ್ಧ್ವ॒ರ್ಯುಃ - ಪ್ರಜಾ॑ತಿ--ರ್ ಹ್ವಯತೇ॒ - ವೇದಾ᳚ - ಬ್ರವೀ-ದ್- ಬರ್ಹಿ॒ಷದ॑-ಙ್ಕರೋ-ತ್ಯೃ॒ತ್ವಿಜೋ॑-ದಧಾತಿ-ಬ್ರ॒ಹ್ಮಾ-ಽನು॑-ಕರೋತಿ ಚ॒ತ್ವಾರಿ॑ ಚ) (ಅ. 8)
ಅನುವಾಕಂ 9 - ಪ್ರಸ್ತರಪ್ರಹಾರಾದಿಕಮ್
ಅಥ॒ ಸ್ರುಚಾ॑ವನು॒ಷ್ಟುಗ್ಭ್ಯಾಂ॒-ವಾಁಜ॑ವತೀಭ್ಯಾಂ॒-ವ್ಯೂಁ॑ಹತಿ । ಪ್ರ॒ತಿ॒ಷ್ಠಾ ವಾ ಅ॑ನು॒ಷ್ಟುಕ್ । ಅನ್ನಂ॒-ವಾಁಜಃ॒ ಪ್ರತಿ॑ಷ್ಠಿತ್ಯೈ । ಅ॒ನ್ನಾದ್ಯ॒ಸ್ಯಾವ॑ರುದ್ಧ್ಯೈ । ಪ್ರಾಚೀ᳚-ಞ್ಜು॒ಹೂಮೂ॑ಹತಿ । ಜಾ॒ತಾನೇ॒ವ ಭ್ರಾತೃ॑ವ್ಯಾ॒-ನ್ಪ್ರಣು॑ದತೇ । ಪ್ರ॒ತೀಚೀ॑ಮುಪ॒ಭೃತ᳚ಮ್ ।
ಜ॒ನಿ॒ಷ್ಯಮಾ॑ಣಾನೇ॒ವ ಪ್ರತಿ॑ನುದತೇ ।
ಸ ವಿಷೂ॑ಚ ಏ॒ವಾಪೋಹ್ಯ॑ ಸ॒ಪತ್ನಾ॒ನ್॒. ಯಜ॑ಮಾನಃ ।
ಅ॒ಸ್ಮಿನ್ ಁಲೋ॒ಕೇ ಪ್ರತಿ॑ತಿಷ್ಠತಿ ॥ 60 ॥
ದ್ವಾಭ್ಯಾ᳚ಮ್ । ದ್ವಿಪ್ರ॑ತಿಷ್ಠೋ॒ ಹಿ ॥ ವಸು॑ಭ್ಯಸ್ತ್ವಾ ರು॒ದ್ರೇಭ್ಯ॑ಸ್ತ್ವಾ-ಽಽದಿ॒ತ್ಯೇಭ್ಯ॒ಸ್ತ್ವೇತ್ಯಾ॑ಹ ।
ಯ॒ಥಾ॒ಯ॒ಜುರೇ॒ವೈ ತತ್ । ಸ್ರು॒ಖ್ಷು ಪ್ರ॑ಸ್ತ॒ರಮ॑ನಕ್ತಿ ।
ಇ॒ಮೇ ವೈ ಲೋ॒ಕಾ-ಸ್ಸ್ರುಚಃ॑ । ಯಜ॑ಮಾನಃ ಪ್ರಸ್ತ॒ರಃ । ಯಜ॑ಮಾನಮೇ॒ವ ತೇಜ॑ಸಾ-ಽನಕ್ತಿ । ತ್ರೇ॒ಧಾ-ಽನ॑ಕ್ತಿ ।
ತ್ರಯ॑ ಇ॒ಮೇ ಲೋ॒ಕಾಃ ॥ 61 ॥
ಏ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯೋ॑-ಽನಕ್ತಿ ।
ಅ॒ಭಿ॒ಪೂ॒ರ್ವಮ॑ನಕ್ತಿ । ಅ॒ಭಿ॒ಪೂ॒ರ್ವಮೇ॒ವ ಯಜ॑ಮಾನ॒-ನ್ತೇಜ॑ಸಾ-ಽನಕ್ತಿ ॥ ಅ॒ಕ್ತಗ್ಂ ರಿಹಾ॑ಣಾ॒ ಇತ್ಯಾ॑ಹ ।
ತೇಜೋ॒ ವಾ ಆಜ್ಯ᳚ಮ್ । ಯಜ॑ಮಾನಃ ಪ್ರಸ್ತ॒ರಃ ।
ಯಜ॑ಮಾನಮೇ॒ವ ತೇಜ॑ಸಾ-ಽನಕ್ತಿ । ವಿ॒ಯನ್ತು॒ ವಯ॒ ಇತ್ಯಾ॑ಹ । ವಯ॑ ಏ॒ವೈನ॑-ಙ್ಕೃ॒ತ್ವಾ ।
ಸು॒ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ ॥ 62 ॥
ಪ್ರ॒ಜಾಂ-ಯೋಁನಿ॒-ಮ್ಮಾ ನಿರ್ಮೃ॑ಖ್ಷ॒ಮಿತ್ಯಾ॑ಹ । ಪ್ರ॒ಜಾಯೈ॑ ಗೋಪೀ॒ಥಾಯ॑ ॥ ಆಪ್ಯಾ॑ಯನ್ತಾ॒ಮಾಪ॒ ಓಷ॑ಧಯ॒ ಇತ್ಯಾ॑ಹ । ಆಪ॑ ಏ॒ವೌಷ॑ಧೀ॒ರಾಪ್ಯಾ॑ಯಯತಿ । ಮ॒ರುತಾ॒-ಮ್ಪೃಷ॑ತಯ॒-ಸ್ಸ್ಥೇತ್ಯಾ॑ಹ । ಮ॒ರುತೋ॒ ವೈ ವೃಷ್ಟ್ಯಾ॑ ಈಶತೇ ।
ವೃಷ್ಟಿ॑ಮೇ॒ವಾವ॑ರುನ್ಧೇ । ದಿವ॑-ಙ್ಗಚ್ಛ॒ ತತೋ॑ ನೋ॒ ವೃಷ್ಟಿ॒ಮೇರ॒ಯೇತ್ಯಾ॑ಹ । ವೃಷ್ಟಿ॒ರ್ವೈ ದ್ಯೌಃ । ವೃಷ್ಟಿ॑ಮೇ॒ವಾವ॑ರುನ್ಧೇ ॥ 63 ॥
ಯಾವ॒ದ್ವಾ ಅ॑ದ್ಧ್ವ॒ರ್ಯುಃ ಪ್ರ॑ಸ್ತ॒ರ-ಮ್ಪ್ರ॒ಹರ॑ತಿ । ತಾವ॑ದ॒ಸ್ಯಾಯು॑ರ್ಮೀಯತೇ । ಆ॒ಯು॒ಷ್ಪಾ ಅ॑ಗ್ನೇ॒-ಽಸ್ಯಾಯು॑ರ್ಮೇ ಪಾ॒ಹೀತ್ಯಾ॑ಹ । ಆಯು॑ರೇ॒ವಾತ್ಮನ್-ಧ॑ತ್ತೇ ।
ಯಾವ॒ದ್ವಾ ಅ॑ದ್ಧ್ವ॒ರ್ಯುಃ ಪ್ರ॑ಸ್ತ॒ರ-ಮ್ಪ್ರ॒ಹರ॑ತಿ । ತಾವ॑ದಸ್ಯ॒ ಚಖ್ಷು॑ರ್ಮೀಯತೇ । ಚ॒ಖ್ಷು॒ಷ್ಪಾ ಅ॑ಗ್ನೇ-ಽಸಿ॒ ಚಖ್ಷು॑ರ್ಮೇ ಪಾ॒ಹೀತ್ಯಾ॑ಹ । ಚಖ್ಷು॑ರೇ॒ವಾತ್ಮನ್-ಧ॑ತ್ತೇ ॥
ಧ್ರು॒ವಾ-ಽಸೀತ್ಯಾ॑ಹ॒ ಪ್ರತಿ॑ಷ್ಠಿತ್ಯೈ ॥
ಯ-ಮ್ಪ॑ರಿ॒ಧಿ-ಮ್ಪ॒ರ್ಯಧ॑ತ್ಥಾ॒ ಇತ್ಯಾ॑ಹ ॥ 64 ॥
ಯ॒ಥಾ॒ಯ॒ಜುರೇ॒ವೈತತ್ । ಅಗ್ನೇ॑ ದೇವ ಪ॒ಣಿಭಿ॑-ರ್ವೀ॒ಯಮಾ॑ಣ॒ ಇತ್ಯಾ॑ಹ । ಅ॒ಗ್ನಯ॑ ಏ॒ವೈನ॒-ಞ್ಜುಷ್ಟ॑-ಙ್ಕರೋತಿ ।
ತ-ನ್ತ॑ ಏ॒ತಮನು॒ ಜೋಷ॑-ಮ್ಭರಾ॒ಮೀತ್ಯಾ॑ಹ ।
ಸ॒ಜಾ॒ತಾನೇ॒ವಾಸ್ಮಾ॒ ಅನು॑ಕಾನ್ಕರೋತಿ ।
ನೇದೇ॒ಷ ತ್ವದ॑ಪಚೇ॒ತಯಾ॑ತಾ॒ ಇತ್ಯಾ॒ಹಾನು॑ಖ್ಯಾತ್ಯೈ ॥ ಯ॒ಜ್ಞಸ್ಯ॒ ಪಾಥ॒ ಉಪ॒ ಸಮಿ॑ತ॒ಮಿತ್ಯಾ॑ಹ ।
ಭೂ॒ಮಾನ॑ಮೇ॒ವೋಪೈ॑ತಿ । ಪ॒ರಿ॒ಧೀನ್-ಪ್ರಹ॑ರತಿ ।
ಯ॒ಜ್ಞಸ್ಯ॒ ಸಮಿ॑ಷ್ಟ್ಯೈ ॥ 65 ॥
ಸ್ರುಚೌ॒ ಸ-ಮ್ಪ್ರಸ್ರಾ॑ವಯತಿ । ಯದೇ॒ವ ತತ್ರ॑ ಕ್ರೂ॒ರಮ್ ।
ತತ್-ತೇನ॑ ಶಮಯತಿ । ಜು॒ಹ್ವಾಮು॑ಪ॒ಭೃತ᳚ಮ್ । ಯ॒ಜ॒ಮಾ॒ನ॒ದೇ॒ವ॒ತ್ಯಾ॑ ವೈ ಜು॒ಹೂಃ ।
ಭ್ರಾ॒ತೃ॒ವ್ಯ॒ದೇ॒ವ॒ತ್ಯೋ॑ಪ॒ಭೃತ್ ।
ಯಜ॑ಮಾನಾಯೈ॒ವ ಭ್ರಾತೃ॑ವ್ಯ॒ಮುಪ॑ಸ್ತಿ-ಙ್ಕರೋತಿ ॥
ಸ॒ಗ್ಗ್॒ಸ್ರಾ॒ವಭಾ॑ಗಾ॒-ಸ್ಸ್ಥೇತ್ಯಾ॑ಹ ।
ವಸ॑ವೋ॒ ವೈ ರು॒ದ್ರಾ ಆ॑ದಿ॒ತ್ಯಾ-ಸ್ಸಗ್ಗ್॑ಸ್ರಾ॒ವಭಾ॑ಗಾಃ ।
ತೇಷಾ॒-ನ್ತ-ದ್ಭಾ॑ಗ॒ಧೇಯ᳚ಮ್ ॥ 66 ॥
ತಾನೇ॒ವ ತೇನ॑ ಪ್ರೀಣಾತಿ । ವೈ॒ಶ್ವ॒ದೇ॒ವ್ಯರ್ಚಾ । ಏ॒ತೇ ಹಿ ವಿಶ್ವೇ॑ ದೇ॒ವಾಃ । ತ್ರಿ॒ಷ್ಟುಗ್-ಭ॑ವತಿ । ಇ॒ನ್ದ್ರಿ॒ಯಂ-ವೈಁ ತ್ರಿ॒ಷ್ಟುಕ್ । ಇ॒ನ್ದ್ರಿ॒ಯಮೇ॒ವ ಯಜ॑ಮಾನೇ ದಧಾತಿ ॥ ಅ॒ಗ್ನೇರ್ವಾ॒ಮಪ॑ನ್ನಗೃಹಸ್ಯ॒ ಸದ॑ಸಿ ಸಾದಯಾ॒ಮೀತ್ಯಾ॑ಹ ।
ಇ॒ಯಂ-ವಾಁ ಅ॒ಗ್ನಿರಪ॑ನ್ನಗೃಹಃ । ಅ॒ಸ್ಯಾ ಏ॒ವೈನೇ॒ ಸದ॑ನೇ ಸಾದಯತಿ । ಸು॒ಮ್ನಾಯ॑ ಸುಮ್ನಿನೀ ಸು॒ಮ್ನೇ ಮಾ॑ ಧತ್ತ॒ಮಿತ್ಯಾ॑ಹ ॥ 67 ॥
ಪ್ರ॒ಜಾ ವೈ ಪ॒ಶವ॑-ಸ್ಸು॒ಮ್ನಮ್ । ಪ್ರ॒ಜಾಮೇ॒ವ ಪ॒ಶೂನಾ॒ತ್ಮನ್ಧ॑ತ್ತೇ । ಧು॒ರಿ ಧು॒ರ್ಯೌ॑ ಪಾತ॒ಮಿತ್ಯಾ॑ಹ । ಜಾ॒ಯಾ॒ಪ॒ತ್ಯೋ-ರ್ಗೋ॑ಪೀ॒ಥಾಯ॑ ॥ ಅಗ್ನೇ॑-ಽದಬ್ಧಾಯೋ-ಽಶೀತತನೋ॒ ಇತ್ಯಾ॑ಹ । ಯ॒ಥಾ॒ಯ॒ಜುರೇ॒ವೈತತ್ । ಪಾ॒ಹಿ ಮಾ॒-ಽದ್ಯ ದಿ॒ವಃ ಪಾ॒ಹಿ ಪ್ರಸಿ॑ತ್ಯೈ ಪಾ॒ಹಿ ದುರಿ॑ಷ್ಟ್ಯೈ ಪಾ॒ಹಿ ದು॑ರದ್ಮ॒ನ್ಯೈ ಪಾ॒ಹಿ ದುಶ್ಚ॑ರಿತಾ॒ದಿತ್ಯಾ॑ಹ । ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ।
ಅವಿ॑ಷ-ನ್ನಃ ಪಿ॒ತು-ಙ್ಕೃ॑ಣು ಸು॒ಷದಾ॒ ಯೋನಿ॒ಗ್ಗ್॒ ಸ್ವಾಹೇತೀ᳚ದ್ಧ್ಮ-ಸಂ॒ವೃಁಶ್ಚ॑ನಾನ್ಯನ್ವಾಹಾರ್ಯ॒ಪಚ॑ನೇ ಽಭ್ಯಾ॒ಧಾಯ॑ ಫಲೀಕರಣಹೋ॒ಮ-ಞ್ಜು॑ಹೋತಿ ।
ಅತಿ॑ರಿಕ್ತಾನಿ॒ ವಾ ಇ॑ದ್ಧ್ಮ ಸಂ॒ವೃಁಶ್ಚ॑ನಾನಿ ॥ 68 ॥
ಅತಿ॑ರಿಕ್ತಾಃ ಫಲೀ॒ಕರ॑ಣಾಃ । ಅತಿ॑ರಿಕ್ತಮಾಜ್ಯೋಚ್ಛೇಷ॒ಣಮ್ ।
ಅತಿ॑ರಿಕ್ತ ಏ॒ವಾತಿ॑ರಿಕ್ತ-ನ್ದಧಾತಿ । ಅಥೋ॒ ಅತಿ॑ರಿಕ್ತೇ-ನೈ॒ವಾತಿ॑ರಿಕ್ತ-ಮಾ॒ಪ್ತ್ವಾ-ಽವ॑ರುನ್ಧೇ ॥ ವೇದಿ॑-ರ್ದೇ॒ವೇಭ್ಯೋ॒ ನಿಲಾ॑ಯತ । ತಾಂ-ವೇಁ॒ದೇನಾನ್ವ॑ವಿನ್ದನ್ನ್ । ವೇ॒ದೇನ॒ ವೇದಿಂ॑-ವಿಁವಿದುಃ ಪೃಥಿ॒ವೀಮ್ । ಸಾ ಪ॑ಪ್ರಥೇ ಪೃಥಿ॒ವೀ ಪಾರ್ಥಿ॑ವಾನಿ ।
ಗರ್ಭ॑-ಮ್ಬಿಭರ್ತಿ॒ ಭುವ॑ನೇಷ್ವ॒ನ್ತಃ ।
ತತೋ॑ ಯ॒ಜ್ಞೋ ಜಾ॑ಯತೇ ವಿಶ್ವ॒ದಾನಿ॒ರಿತಿ॑ ಪು॒ರಸ್ತಾ᳚-ಥ್ಸ್ತಮ್ಬಯ॒ಜುಷೋ॑ ವೇ॒ದೇನ॒ ವೇದಿ॒ಗ್ಂ॒ ಸಮ್ಮಾ॒ಷ್ಟ್ರ್ಯನು॑ವಿತ್ತ್ಯೈ ॥ 69 ॥
ಅಥೋ॒ ಯ-ದ್ವೇ॒ದಶ್ಚ॒ ವೇದಿ॑ಶ್ಚ॒ ಭವ॑ತಃ । ಮಿ॒ಥು॒ನ॒ತ್ವಾಯ॒ ಪ್ರಜಾ᳚ತ್ಯೈ । ಪ್ರ॒ಜಾಪ॑ತೇ॒ರ್ವಾ ಏ॒ತಾನಿ॒ ಶ್ಮಶ್ರೂ॑ಣಿ । ಯ-ದ್ವೇ॒ದಃ । ಪತ್ನಿ॑ಯಾ ಉ॒ಪಸ್ಥ॒ ಆಸ್ಯ॑ತಿ ।
ಮಿ॒ಥು॒ನಮೇ॒ವ ಕ॑ರೋತಿ । ವಿ॒ನ್ದತೇ᳚ ಪ್ರ॒ಜಾಮ್ ।
ವೇ॒ದಗ್ಂ ಹೋತಾ-ಽಽಹ॑ವ॒ನೀಯಾ᳚-ಥ್ಸ್ತೃ॒ಣನ್ನೇ॑ತಿ ।
ಯ॒ಜ್ಞಮೇ॒ವ ತ-ಥ್ಸನ್ತ॑ನೋ॒ತ್ಯೋತ್ತ॑ರಸ್ಮಾ-ದರ್ಧಮಾ॒ಸಾತ್ ।
ತಗ್ಂ ಸನ್ತ॑ತ॒ಮುತ್ತ॑ರೇ-ಽರ್ಧಮಾ॒ಸ ಆಲ॑ಭತೇ ॥ 70 ॥
ತ-ಙ್ಕಾ॒ಲೇಕಾ॑ಲ॒ ಆಗ॑ತೇ ಯಜತೇ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ ।
ಸ ತ್ವಾ ಅ॑ದ್ಧ್ವ॒ರ್ಯು-ಸ್ಸ್ಯಾ᳚ತ್ । ಯೋ ಯತೋ॑ ಯ॒ಜ್ಞ-ಮ್ಪ್ರ॑ಯು॒ಙ್ಕ್ತೇ ।
ತದೇ॑ನ-ಮ್ಪ್ರತಿಷ್ಠಾ॒ಪಯ॒ತೀತಿ॑ ।
ವಾತಾ॒ದ್ವಾ ಅ॑ದ್ಧ್ವ॒ರ್ಯುರ್ಯ॒ಜ್ಞ-ಮ್ಪ್ರಯು॑ಙ್ಕ್ತೇ ।
ದೇವಾ॑ ಗಾತುವಿದೋ ಗಾ॒ತುಂ-ವಿಁ॒ತ್ವಾ ಗಾ॒ತುಮಿ॒ತೇತ್ಯಾ॑ಹ ।
ಯತ॑ ಏ॒ವ ಯ॒ಜ್ಞ-ಮ್ಪ್ರ॑ಯು॒ಙ್ಕ್ತೇ ।
ತದೇ॑ನ॒-ಮ್ಪ್ರತಿ॑ಷ್ಠಾಪಯತಿ ।
ಪ್ರತಿ॑ತಿಷ್ಠತಿ ಪ್ರ॒ಜಯಾ॑ ಪ॒ಶುಭಿ॒-ರ್ಯಜ॑ಮಾನಃ ॥ 71 ॥
(ತಿ॒ಷ್ಠ॒ತೀ॒ - ಮೇ ಲೋ॒ಕಾ - ಗ॑ಮಯತಿ॒ - ದ್ಯೌ-ರ್ವೃಷ್ಟಿ॑ಮೇ॒ವಾವ॑ರುನ್ಧೇ - ಪ॒ರ್ಯಧ॑ತ್ಥಾ॒ ಇತ್ಯಾ॑ಹ॒ - ಸಮಿ॑ಷ್ಟ್ಯೈ - ಭಾಗ॒ಧೇಯಂ॑ - ಧತ್ತ॒ಮಿತ್ಯಾ॑ಹ॒ - ವಾ ಇ॑ದ್ಧ್ಮ ಸಂ॒ವೃಁಶ್ಚ॑ನಾ॒ - ನ್ಯನು॑ವಿತ್ತ್ಯೈ - ಲಭತೇ॒ - ಯಜ॑ಮಾನಃ) (ಅ. 9)
ಅನುವಾಕಂ 10 - ಪತ್ನೀಯೋಕ್ರವಿಮೋಕಃ
ಯೋ ವಾ ಅಯ॑ಥಾದೇವತಂ-ಯಁ॒ಜ್ಞಮು॑ಪ॒ಚರ॑ತಿ ।
ಆ ದೇ॒ವತಾ᳚ಭ್ಯೋ ವೃಶ್ಚ್ಯತೇ । ಪಾಪೀ॑ಯಾ-ನ್ಭವತಿ । ಯೋ ಯ॑ಥಾದೇವ॒ತಮ್ । ನ ದೇ॒ವತಾ᳚ಭ್ಯ॒ ಆವೃ॑ಶ್ಚ್ಯತೇ ।
ವಸೀ॑ಯಾ-ನ್ಭವತಿ । ವಾ॒ರು॒ಣೋ ವೈ ಪಾಶಃ॑ ।
ಇ॒ಮಂ-ವಿಁಷ್ಯಾ॑ಮಿ॒ ವರು॑ಣಸ್ಯ॒ ಪಾಶ॒ಮಿತ್ಯಾ॑ಹ ।
ವ॒ರು॒ಣ॒ಪಾ॒ಶಾದೇ॒ವೈನಾ᳚-ಮ್ಮುಞ್ಚತಿ ।
ಸ॒ವಿ॒ತೃಪ್ರ॑ಸೂತೋ ಯಥಾದೇವ॒ತಮ್ ॥ 72 ॥
ನ ದೇ॒ವತಾ᳚ಭ್ಯ॒ ಆವೃ॑ಶ್ಚ್ಯತೇ । ವಸೀ॑ಯಾ-ನ್ಭವತಿ ।
ಧಾ॒ತುಶ್ಚ॒ ಯೋನೌ॑ ಸುಕೃ॒ತಸ್ಯ॑ ಲೋ॒ಕ ಇತ್ಯಾ॑ಹ । ಅ॒ಗ್ನಿರ್ವೈ ಧಾ॒ತಾ । ಪುಣ್ಯ॒-ಙ್ಕರ್ಮ॑ ಸುಕೃ॒ತಸ್ಯ॑ ಲೋ॒ಕಃ । ಅ॒ಗ್ನಿರೇ॒ವೈನಾ᳚-ನ್ಧಾ॒ತಾ । ಪುಣ್ಯೇ॒ ಕರ್ಮ॑ಣಿ ಸುಕೃ॒ತಸ್ಯ॑ ಲೋ॒ಕೇ ದ॑ಧಾತಿ । ಸ್ಯೋ॒ನ-ಮ್ಮೇ॑ ಸ॒ಹ ಪತ್ಯಾ॑ ಕರೋ॒ಮೀತ್ಯಾ॑ಹ ।
ಆ॒ತ್ಮನ॑ಶ್ಚ॒ ಯಜ॑ಮಾನಸ್ಯ॒ ಚಾನಾ᳚ತ್ಯೈ ಸ॒ತ್ವಾಂಯಁ॑ ॥
ಸಮಾಯು॑ಷಾ॒ ಸಮ್ಪ್ರ॒ಜಯೇತ್ಯಾ॑ಹ ॥ 73 ॥
ಆ॒ಶಿಷ॑ಮೇ॒ವೈತಾಮಾಶಾ᳚ಸ್ತೇ ಪೂರ್ಣಪಾ॒ತ್ರೇ । ಅ॒ನ್ತ॒ತೋ॑-ಽನು॒ಷ್ಟುಭಾ᳚ । ಚತು॑ಷ್ಪ॒ದ್ವಾ ಏ॒ತಚ್ಛನ್ದಃ॒ ಪ್ರತಿ॑ಷ್ಠಿತ॒-ಮ್ಪತ್ನಿ॑ಯೈ ಪೂರ್ಣಪಾ॒ತ್ರೇ ಭ॑ವತಿ ।
ಅ॒ಸ್ಮಿನ್ ಁಲೋ॒ಕೇ ಪ್ರತಿ॑ತಿಷ್ಠಾ॒ನೀತಿ॑ ।
ಅ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ । ಅಥೋ॒ ವಾಗ್ವಾ ಅ॑ನು॒ಷ್ಟುಕ್ । ವಾಮ್ಮಿ॑ಥು॒ನಮ್ । ಆಪೋ॒ ರೇತಃ॑ ಪ್ರ॒ಜನ॑ನಮ್ ।
ಏ॒ತಸ್ಮಾ॒ದ್ವೈ ಮಿ॑ಥು॒ನಾದ್ವಿ॒ದ್ಯೋತ॑ಮಾನ-ಸ್ಸ್ತ॒ನಯ॑ನ್ವರ್ಷತಿ । ರೇತ॑-ಸ್ಸಿ॒ಞ್ಚನ್ನ್ ॥ 74 ॥
ಪ್ರ॒ಜಾಃ ಪ್ರ॑ಜ॒ನಯನ್ನ್॑ ॥ ಯದ್ವೈ ಯ॒ಜ್ಞಸ್ಯ॒ ಬ್ರಹ್ಮ॑ಣಾ ಯು॒ಜ್ಯತೇ᳚ । ಬ್ರಹ್ಮ॑ಣಾ॒ ವೈ ತಸ್ಯ॑ ವಿಮೋ॒ಕಃ । ಅ॒ದ್ಭಿ-ಶ್ಶಾನ್ತಿಃ॑ । ವಿಮು॑ಕ್ತಂ॒-ವಾಁ ಏ॒ತರ್ಹಿ॒ ಯೋಕ್ತ್ರ॒-ಮ್ಬ್ರಹ್ಮ॑ಣಾ ।
ಆ॒ದಾಯೈ॑ನ॒ತ್ಪತ್ನೀ॑ ಸ॒ಹಾಪ ಉಪ॑ಗೃಹ್ಣೀತೇ॒ ಶಾನ್ತ್ಯೈ᳚ ।
ಅ॒ಞ್ಜ॒ಲೌ ಪೂ᳚ರ್ಣಪಾ॒ತ್ರಮಾನ॑ಯತಿ । ರೇತ॑ ಏ॒ವಾಸ್ಯಾ᳚-ಮ್ಪ್ರ॒ಜಾ-ನ್ದ॑ಧಾತಿ । ಪ್ರ॒ಜಯಾ॒ ಹಿ ಮ॑ನು॒ಷ್ಯಃ॑ ಪೂ॒ರ್ಣಃ ।
ಮುಖಂ॒-ವಿಁಮೃ॑ಷ್ಟೇ । ಅ॒ವ॒ಭೃ॒ಥಸ್ಯೈ॒ವ ರೂ॒ಪ-ಙ್ಕೃ॒ತ್ವೋತ್ತಿ॑ಷ್ಠತಿ ॥ 75 ॥
(ಸ॒ವಿ॒ತೃಪ್ರ॑ಸೂತೋ ಯಥಾದೇವ॒ತಂ-ಪ್ರ॒ಜಯೇತ್ಯಾ॑ಹ-ಸಿ॒ಞ್ಚ-ನ್ಮೃ॑ಷ್ಟ॒ ಏಕ॑-ಞ್ಚ) (ಅ. 10)
ಅನುವಾಕಂ 11 - ಉಪವೇಷೋಪಗೂಹನಮ್
ಪ॒ರಿ॒ವೇ॒ಷೋ ವಾ ಏ॒ಷ ವನ॒ಸ್ಪತೀ॑ನಾಮ್ । ಯದು॑ಪವೇ॒ಷಃ । ಯ ಏ॒ವಂ-ವೇಁದ॑ । ವಿ॒ನ್ದತೇ॑ ಪರಿವೇ॒ಷ್ಟಾರ᳚ಮ್ । ತಮು॑ತ್ಕ॒ರೇ ॥ ಯ-ನ್ದೇ॒ವಾ ಮ॑ನು॒ಷ್ಯೇ॑ಷು ।
ಉ॒ಪ॒ವೇ॒ಷಮಧಾ॑ರಯನ್ನ್ । ಯೇ ಅ॒ಸ್ಮದಪ॑ಚೇತಸಃ । ತಾನ॒ಸ್ಮಭ್ಯ॑-ಮಿ॒ಹಾಕು॑ರು । ಉಪ॑ವೇ॒ಷೋಪ॑ವಿಡ್ಢಿ ನಃ ॥ 76 ॥
ಪ್ರ॒ಜಾ-ಮ್ಪುಷ್ಟಿ॒ಮಥೋ॒ ಧನ᳚ಮ್ ।
ದ್ವಿ॒ಪದೋ॑ ನ॒ಶ್ಚತು॑ಷ್ಪದಃ । ಧ್ರು॒ವಾನ-ನ॑ಪಗಾನ್-ಕು॒ರ್ವಿತಿ॑ ಪು॒ರಸ್ತಾ᳚-ತ್ಪ್ರ॒ತ್ಯಞ್ಚ॒ಮುಪ॑ಗೂಹತಿ ।
ತಸ್ಮಾ᳚-ತ್ಪು॒ರಸ್ತಾ᳚-ತ್ಪ್ರ॒ತ್ಯಞ್ಚ॑-ಶ್ಶೂ॒ದ್ರಾ ಅವ॑ಸ್ಯನ್ತಿ । ಸ್ಥ॒ವಿ॒ಮ॒ತ ಉಪ॑ಗೂಹತಿ । ಅಪ್ರ॑ತಿವಾದಿನ ಏ॒ವೈನಾ᳚ನ್ ಕುರುತೇ ॥
ಧೃಷ್ಟಿ॒ರ್ವಾ ಉ॑ಪವೇ॒ಷಃ ।
ಶು॒ಚಾರ್ತೋ ವಜ್ರೋ॒ ಬ್ರಹ್ಮ॑ಣಾ॒ ಸಗ್ಂಶಿ॑ತಃ ।
ಯೋಪ॑ವೇ॒ಷೇ ಶುಕ್ । ಸಾ-ಽಮುಮೃ॑ಚ್ಛತು॒ ಯ-ನ್ದ್ವಿ॒ಷ್ಮ ಇತಿ॑ ॥ 77 ॥
ಅಥಾ᳚ಸ್ಮೈ ನಾಮ॒ ಗೃಹ್ಯ॒ ಪ್ರಹ॑ರತಿ । ನಿರ॒ಮು-ನ್ನು॑ದ॒ ಓಕ॑ಸಃ । ಸ॒ಪತ್ನೋ॒ ಯಃ ಪೃ॑ತ॒ನ್ಯತಿ॑ । ನಿ॒ರ್ಬಾ॒ದ್ಧ್ಯೇ॑ನ ಹ॒ವಿಷಾ᳚ । ಇನ್ದ್ರ॑ ಏಣ॒-ಮ್ಪರಾ॑ಶರೀತ್ ।
ಇ॒ಹಿ ತಿ॒ಸ್ರಃ ಪ॑ರಾ॒ವತಃ॑ । ಇ॒ಹಿ ಪಞ್ಚ॒ಜನಾ॒ಗ್ಂ॒ ಅತಿ॑ ।
ಇ॒ಹಿ ತಿ॒ಸ್ರೋ-ಽತಿ॑ ರೋಚ॒ನಾ ಯಾವ॑ತ್ । ಸೂರ್ಯೋ॒ ಅಸ॑-ದ್ದಿ॒ವಿ ।
ಪ॒ರ॒ಮಾ-ನ್ತ್ವಾ॑ ಪರಾ॒ವತ᳚ಮ್ ॥ 78 ॥
ಇನ್ದ್ರೋ॑ ನಯತು ವೃತ್ರ॒ಹಾ । ಯತೋ॒ ನ ಪುನ॒ರಾಯ॑ಸಿ ।
ಶ॒ಶ್ವ॒ತೀಭ್ಯ॒-ಸ್ಸಮಾ᳚ಭ್ಯ॒ ಇತಿ॑ । ತ್ರಿ॒ವೃದ್ವಾ ಏ॒ಷ ವಜ್ರೋ॒ ಬ್ರಹ್ಮ॑ಣಾ॒ ಸಗ್ಂಶಿ॑ತಃ । ಶು॒ಚೈವೈನಂ॑-ವಿಁ॒ದ್ಧ್ವಾ ।
ಏ॒ಭ್ಯೋ ಲೋ॒ಕೇಭ್ಯೋ॑ ನಿ॒ರ್ಣುದ್ಯ॑ । ವಜ್ರೇ॑ಣ॒ ಬ್ರಹ್ಮ॑ಣಾ ಸ್ತೃಣುತೇ । ಹ॒ತೋ॑ ಽಸಾವವ॑ಧಿಷ್ಮಾ॒-ಮುಮಿತ್ಯಾ॑ಹ॒
ಸ್ತೃತ್ಯೈ᳚ । ಯ-ನ್ದ್ವಿ॒ಷ್ಯಾತ್ತ-ನ್ಧ್ಯಾ॑ಯೇತ್ ।
ಶು॒ಚೈವೈನ॑-ಮರ್ಪಯತಿ ॥ 79 ॥
(ನೋ॒-ದ್ವಿ॒ಷ್ಮ ಇತಿ॑-ಪರಾ॒ವತ॑-ಮರ್ಪಯತಿ) (ಅ. 11)
(ಪ್ರತ್ಯು॑ಷ್ಟಂ - ದಿ॒ವ-ಶ್ಶಿಲ್ಪ॒ - ಮಯ॑ಜ್ಞೋ - ಧೃ॒ತ-ಞ್ಚ॑ - ದೇವಾಸು॒ರಾ-ಸ್ಸ ಏ॒ತಮಿನ್ದ್ರ॒ - ಆಪೋ॑ ದೇವೀ - ರ॒ಗ್ನಿನಾ॒ - ಧಿಷ್ಣಿ॑ಯಾ॒ - ಅಥ॒ ಸ್ರುಚೌ॒ - ಯೋ ವಾ ಅಯ॑ಥಾದೇವತಂ - ಪರಿವೇ॒ಷೋ ವಾ ಏಕಾ॑ದಶ)
(ಪ್ರತ್ಯು॑ಷ್ಟ॒ - ಮಯ॑ಜ್ಞ - ಏ॒ಷಾ ಹಿ ವಿಶ್ವೇ॑ಷಾ-ನ್ದೇ॒ವಾನಾ॑ - ಮೂ॒ರ್ಜಾ ಪೃ॑ಥಿ॒ವೀ - ಮಥೋ॒ ರಖ್ಷ॑ಸಾಂ॒ - ತಾ-ಮ್ಪ್ರಜಾ॑ತಿಂ॒ - ದ್ವಾಭ್ಯಾಂ॒ - ತ-ಙ್ಕಾ॒ಲೇಕಾ॑ಲೇ॒ ನವ॑ಸಪ್ತತಿಃ)
(ಪ್ರತ್ಯು॑ಷ್ಟಗ್ಂ - ಶು॒ಚೈವೈನ॑ಮರ್ಪಯತಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ತೃತೀಯಾಷ್ಟಕೇ ತೃತೀಯ ಪ್ರಪಾಠಕ-ಸ್ಸಮಾಪ್ತಃ ॥
