(శ్రీమద్భాగవతం 6.16.34-48)
చిత్రకేతురువాచ ।
అజిత జితః సమమతిభిః సాధుభి-
ర్భవాన్ జితాత్మభిర్భవతా ।
విజితాస్తేఽపి చ భజతామకామాత్మనాం
య ఆత్మదోఽతికరుణః ॥ 34 ॥
తవ విభవః ఖలు భగవన్
జగదుదయస్థితిలయాదీని ।
విశ్వసృజస్తేంఽశాంశాస్తత్ర
మృషా స్పర్ధన్తే పృథగభిమత్యా ॥ 35 ॥
పరమాణుపరమమహతోస్త్వ-
మాద్యన్తాన్తరవర్తీ త్రయవిధురః ।
ఆదావన్తేఽపి చ సత్త్వానాం
యద్ధ్రువం తదేవాన్తరాలేఽపి ॥ 36 ॥
క్షిత్యాదిభిరేష కిలావృతః
సప్తభిర్దశగుణోత్తరైరణ్డకోశః ।
యత్ర పతత్యణుకల్పః
సహాణ్డకోటికోటిభిస్తదనన్తః ॥ 37 ॥
విషయతృషో నరపశవో
య ఉపాసతే విభూతీర్న పరం త్వామ్ ।
తేషామాశిష ఈశ తదను
వినశ్యన్తి యథా రాజకులమ్ ॥ 38 ॥
కామధియస్త్వయి రచితా
న పరమ రోహన్తి యథా కరమ్భబీజాని ।
జ్ఞానాత్మన్యగుణమయే
గుణగణతోఽస్య ద్వన్ద్వజాలాని ॥ 39 ॥
జితమజిత తదా భవతా
యదాహ భాగవతం ధర్మమనవద్యమ్ ।
నిష్కిఞ్చనా యే మునయ ఆత్మారామా
యముపాసతేఽపవర్గాయ ॥ 40 ॥
విషమమతిర్న యత్ర నృణాం
త్వమహమితి మమ తవేతి చ యదన్యత్ర ।
విషమధియా రచితో యః
స హ్యవిశుద్ధః క్షయిష్ణురధర్మబహులః ॥ 41 ॥
కః క్షేమో నిజపరయోః
కియానర్థః స్వపరద్రుహా ధర్మేణ ।
స్వద్రోహాత్తవ కోపః
పరసమ్పీడయా చ తథాధర్మః ॥ 42 ॥
న వ్యభిచరతి తవేక్షా యయా
హ్యభిహితో భాగవతో ధర్మః ।
స్థిరచరసత్త్వకదమ్బేష్వపృథగ్ధియో
యముపాసతే త్వార్యాః ॥ 43 ॥
న హి భగవన్నఘటితమిదం
త్వద్దర్శనాన్నృణామఖిలపాపక్షయః ।
యన్నామ సకృచ్ఛ్రవణాత్పుల్కసకోఽపి
విముచ్యతే సంసారాత్ ॥ 44 ॥
అథ భగవన్ వయమధునా
త్వదవలోకపరిమృష్టాశయమలాః ।
సురఋషిణా యదుదితం తావకేన
కథమన్యథా భవతి ॥ 45 ॥
విదితమనన్త సమస్తం తవ
జగదాత్మనో జనైరిహాచరితమ్ ।
విజ్ఞాప్యం పరమగురోః కియదివ
సవితురివ ఖద్యోతైః ॥ 46 ॥
నమస్తుభ్యం భగవతే సకలజగ-
త్స్థితిలయోదయేశాయ ।
దురవసితాత్మగతయే
కుయోగినాం భిదా పరమహంసాయ ॥ 47 ॥
యం వై శ్వసన్తమను విశ్వసృజః శ్వసన్తి
యం చేకితానమను చిత్తయ ఉచ్చకన్తి ।
భూమణ్డలం సర్షపాయతి యస్య మూర్ధ్ని
తస్మై నమో భగవతేఽస్తు సహస్రమూర్ధ్నే ॥ 48 ॥
॥ ఇతి శ్రీమద్భాగవతమహాపురాణే షష్ఠస్కన్ధే షోడశాధ్యాయాన్తర్గతం చిత్రకేతుకృతం అనన్తస్తోత్రమ్ ॥
