(શ્રીમદ્ભાગવતં 6.16.34-48)
ચિત્રકેતુરુવાચ ।
અજિત જિતઃ સમમતિભિઃ સાધુભિ-
ર્ભવાન્ જિતાત્મભિર્ભવતા ।
વિજિતાસ્તેઽપિ ચ ભજતામકામાત્મનાં
ય આત્મદોઽતિકરુણઃ ॥ 34 ॥
તવ વિભવઃ ખલુ ભગવન્
જગદુદયસ્થિતિલયાદીનિ ।
વિશ્વસૃજસ્તેંઽશાંશાસ્તત્ર
મૃષા સ્પર્ધંતે પૃથગભિમત્યા ॥ 35 ॥
પરમાણુપરમમહતોસ્ત્વ-
માદ્યંતાંતરવર્તી ત્રયવિધુરઃ ।
આદાવંતેઽપિ ચ સત્ત્વાનાં
યદ્ધ્રુવં તદેવાંતરાલેઽપિ ॥ 36 ॥
ક્ષિત્યાદિભિરેષ કિલાવૃતઃ
સપ્તભિર્દશગુણોત્તરૈરંડકોશઃ ।
યત્ર પતત્યણુકલ્પઃ
સહાંડકોટિકોટિભિસ્તદનંતઃ ॥ 37 ॥
વિષયતૃષો નરપશવો
ય ઉપાસતે વિભૂતીર્ન પરં ત્વામ્ ।
તેષામાશિષ ઈશ તદનુ
વિનશ્યંતિ યથા રાજકુલમ્ ॥ 38 ॥
કામધિયસ્ત્વયિ રચિતા
ન પરમ રોહંતિ યથા કરંભબીજાનિ ।
જ્ઞાનાત્મન્યગુણમયે
ગુણગણતોઽસ્ય દ્વંદ્વજાલાનિ ॥ 39 ॥
જિતમજિત તદા ભવતા
યદાહ ભાગવતં ધર્મમનવદ્યમ્ ।
નિષ્કિંચના યે મુનય આત્મારામા
યમુપાસતેઽપવર્ગાય ॥ 40 ॥
વિષમમતિર્ન યત્ર નૃણાં
ત્વમહમિતિ મમ તવેતિ ચ યદન્યત્ર ।
વિષમધિયા રચિતો યઃ
સ હ્યવિશુદ્ધઃ ક્ષયિષ્ણુરધર્મબહુલઃ ॥ 41 ॥
કઃ ક્ષેમો નિજપરયોઃ
કિયાનર્થઃ સ્વપરદ્રુહા ધર્મેણ ।
સ્વદ્રોહાત્તવ કોપઃ
પરસંપીડયા ચ તથાધર્મઃ ॥ 42 ॥
ન વ્યભિચરતિ તવેક્ષા યયા
હ્યભિહિતો ભાગવતો ધર્મઃ ।
સ્થિરચરસત્ત્વકદંબેષ્વપૃથગ્ધિયો
યમુપાસતે ત્વાર્યાઃ ॥ 43 ॥
ન હિ ભગવન્નઘટિતમિદં
ત્વદ્દર્શનાન્નૃણામખિલપાપક્ષયઃ ।
યન્નામ સકૃચ્છ્રવણાત્પુલ્કસકોઽપિ
વિમુચ્યતે સંસારાત્ ॥ 44 ॥
અથ ભગવન્ વયમધુના
ત્વદવલોકપરિમૃષ્ટાશયમલાઃ ।
સુરઋષિણા યદુદિતં તાવકેન
કથમન્યથા ભવતિ ॥ 45 ॥
વિદિતમનંત સમસ્તં તવ
જગદાત્મનો જનૈરિહાચરિતમ્ ।
વિજ્ઞાપ્યં પરમગુરોઃ કિયદિવ
સવિતુરિવ ખદ્યોતૈઃ ॥ 46 ॥
નમસ્તુભ્યં ભગવતે સકલજગ-
ત્સ્થિતિલયોદયેશાય ।
દુરવસિતાત્મગતયે
કુયોગિનાં ભિદા પરમહંસાય ॥ 47 ॥
યં વૈ શ્વસંતમનુ વિશ્વસૃજઃ શ્વસંતિ
યં ચેકિતાનમનુ ચિત્તય ઉચ્ચકંતિ ।
ભૂમંડલં સર્ષપાયતિ યસ્ય મૂર્ધ્નિ
તસ્મૈ નમો ભગવતેઽસ્તુ સહસ્રમૂર્ધ્ને ॥ 48 ॥
॥ ઇતિ શ્રીમદ્ભાગવતમહાપુરાણે ષષ્ઠસ્કંધે ષોડશાધ્યાયાંતર્ગતં ચિત્રકેતુકૃતં અનંતસ્તોત્રમ્ ॥
